| Library / Tipiṭaka / ཏིཔིཊཀ • Tipiṭaka / མཛྫྷིམནིཀཱཡ (ཨཊྛཀཐཱ) • Majjhimanikāya (aṭṭhakathā) |
༧. མཧཱསལཱ༹ཡཏནིཀསུཏྟཝཎྞནཱ
7. Mahāsaḷāyatanikasuttavaṇṇanā
༤༢༨. ཨེཝཾ མེ སུཏནྟི མཧཱསལཱ༹ཡཏནིཀསུཏྟཾ། ཏཏྠ མཧཱསལཱ༹ཡཏནིཀནྟི མཧནྟཱནཾ ཚནྣཾ ཨཱཡཏནཱནཾ ཛོཏཀཾ དྷམྨཔརིཡཱཡཾ།
428.Evaṃme sutanti mahāsaḷāyatanikasuttaṃ. Tattha mahāsaḷāyatanikanti mahantānaṃ channaṃ āyatanānaṃ jotakaṃ dhammapariyāyaṃ.
༤༢༩. ཨཛཱནནྟི སཧཝིཔསྶནེན མགྒེན ཨཛཱནནྟོ། ཨུཔཙཡཾ གཙྪནྟཱིཏི ཝུཌྜྷིཾ གཙྪནྟི, ཝསིབྷཱཝཾ གཙྪནྟཱིཏི ཨཏྠོ། ཀཱཡིཀཱཏི པཉྩདྭཱརིཀདརཐཱ། ཙེཏསིཀཱཏི མནོདྭཱརིཀདརཐཱ། སནྟཱཔཱདཱིསུཔི ཨེསེཝ ནཡོ།
429.Ajānanti sahavipassanena maggena ajānanto. Upacayaṃ gacchantīti vuḍḍhiṃ gacchanti, vasibhāvaṃ gacchantīti attho. Kāyikāti pañcadvārikadarathā. Cetasikāti manodvārikadarathā. Santāpādīsupi eseva nayo.
༤༣༠. ཀཱཡསུཁནྟི པཉྩདྭཱརིཀསུཁཾ། ཙེཏོསུཁནྟི མནོདྭཱརིཀསུཁཾ། ཨེཏྠ ཙ པཉྩདྭཱརིཀཛཝནེན སམཱཔཛྫནཾ ཝཱ ཝུཊྛཱནཾ ཝཱ ནཏྠི, ཨུཔྤནྣམཏྟཀམེཝ ཧོཏི། མནོདྭཱརིཀེན སབྦཾ ཧོཏི། ཨཡཉྩ མགྒཝུཊྛཱནསྶ པཙྩཡབྷཱུཏཱ བལཝཝིཔསྶནཱ, སཱཔི མནོདྭཱརིཀེནེཝ ཧོཏི།
430.Kāyasukhanti pañcadvārikasukhaṃ. Cetosukhanti manodvārikasukhaṃ. Ettha ca pañcadvārikajavanena samāpajjanaṃ vā vuṭṭhānaṃ vā natthi, uppannamattakameva hoti. Manodvārikena sabbaṃ hoti. Ayañca maggavuṭṭhānassa paccayabhūtā balavavipassanā, sāpi manodvārikeneva hoti.
༤༣༡. ཏཐཱབྷཱུཏསྶཱཏི ཀུསལཙིཏྟསམྤཡུཏྟཙེཏོསུཁསམངྒཱིབྷཱུཏསྶ། པུབྦེཝ ཁོ པནསྶཱཏི ཨསྶ བྷིཀྑུནོ ཝཱཙཱཀམྨནྟཱཛཱིཝཱ པུབྦསུདྡྷིཀཱ ནཱམ ཨཱདིཏོ པཊྛཱཡ པརིསུདྡྷཱཝ ཧོནྟི། དིཊྛིསངྐཔྤཝཱཡཱམསཏིསམཱདྷིསངྑཱཏཱནི པན པཉྩངྒཱནི སབྦཏྠཀཀཱརཱཔཀངྒཱནི ནཱམ། ཨེཝཾ ལོཀུཏྟརམགྒོ ཨཊྛངྒིཀོ ཝཱ སཏྟངྒིཀོ ཝཱ ཧོཏི།
431.Tathābhūtassāti kusalacittasampayuttacetosukhasamaṅgībhūtassa. Pubbeva kho panassāti assa bhikkhuno vācākammantājīvā pubbasuddhikā nāma ādito paṭṭhāya parisuddhāva honti. Diṭṭhisaṅkappavāyāmasatisamādhisaṅkhātāni pana pañcaṅgāni sabbatthakakārāpakaṅgāni nāma. Evaṃ lokuttaramaggo aṭṭhaṅgiko vā sattaṅgiko vā hoti.
ཝིཏཎྜཝཱདཱི པན ‘‘ཡཱ ཡཐཱབྷཱུཏསྶ དིཊྛཱི’’ཏི ཨིམམེཝ སུཏྟཔདེསཾ གཧེཏྭཱ ‘‘ལོཀུཏྟརམགྒོ པཉྩངྒིཀོ’’ཏི ཝདཏི། སོ – ‘‘ཨེཝམསྶཱཡཾ ཨརིཡོ ཨཊྛངྒིཀོ མགྒོ བྷཱཝནཱཔཱརིཔཱུརིཾ གཙྪཏཱི’’ཏི ཨིམིནཱ ཨནནྟརཝཙནེནེཝ པཊིསེདྷིཏབྦོ། ཨུཏྟརི ཙ ཨེཝཾ སཉྙཱཔེཏབྦོ – ལོཀུཏྟརམགྒོ པཉྩངྒིཀོ ནཱམ ནཏྠི, ཨིམཱནི པན པཉྩ སབྦཏྠཀཀཱརཱཔཀངྒཱནི མགྒཀྑཎེ ཝིརཏིཝསེན པཱུརེནྟི། ‘‘ཡཱ ཙཏཱུཧི ཝཙཱིདུཙྩརིཏེཧི ཨཱརཏི ཝིརཏཱི’’ཏི ཨེཝཾ ཝུཏྟཝིརཏཱིསུ ཧི མིཙྪཱཝཱཙཾ པཛཧཏི, སམྨཱཝཱཙཾ བྷཱཝེཏི, ཨེཝཾ སམྨཱཝཱཙཾ བྷཱཝེནྟསྶ ཨིམཱནི པཉྩངྒིཀཱནི ན ཝིནཱ, སཧེཝ ཝིརཏིཡཱ པཱུརེནྟི། སམྨཱཀམྨནྟཱཛཱིཝེསུཔི ཨེསེཝ ནཡོ། ཨིཏི ཝཙཱིཀམྨཱདཱིནི ཨཱདིཏོ པཊྛཱཡ པརིསུདྡྷཱནེཝ ཝཊྚནྟི། ཨིམཱནི པན པཉྩ སབྦཏྠཀཀཱརཱཔཀངྒཱནི ཝིརཏིཝསེན པརིཔཱུརེནྟཱིཏི པཉྩངྒིཀོ མགྒོ ནཱམ ནཏྠི། སུབྷདྡསུཏྟེཔི (དཱི॰ ནི॰ ༢.༢༡༤) ཙེཏཾ ཝུཏྟཾ – ‘‘ཡསྨིཾ ཁོ, སུབྷདྡ, དྷམྨཝིནཡེ ཨརིཡོ ཨཊྛངྒིཀོ མགྒོ’’ཏི། ཨཉྙེསུ ཙ ཨནེཀེསུ སུཏྟསཏེསུ ཨཊྛངྒིཀོཝ མགྒོ ཨཱགཏོཏི།
Vitaṇḍavādī pana ‘‘yā yathābhūtassa diṭṭhī’’ti imameva suttapadesaṃ gahetvā ‘‘lokuttaramaggo pañcaṅgiko’’ti vadati. So – ‘‘evamassāyaṃ ariyo aṭṭhaṅgiko maggo bhāvanāpāripūriṃ gacchatī’’ti iminā anantaravacaneneva paṭisedhitabbo. Uttari ca evaṃ saññāpetabbo – lokuttaramaggo pañcaṅgiko nāma natthi, imāni pana pañca sabbatthakakārāpakaṅgāni maggakkhaṇe virativasena pūrenti. ‘‘Yā catūhi vacīduccaritehi ārati viratī’’ti evaṃ vuttaviratīsu hi micchāvācaṃ pajahati, sammāvācaṃ bhāveti, evaṃ sammāvācaṃ bhāventassa imāni pañcaṅgikāni na vinā, saheva viratiyā pūrenti. Sammākammantājīvesupi eseva nayo. Iti vacīkammādīni ādito paṭṭhāya parisuddhāneva vaṭṭanti. Imāni pana pañca sabbatthakakārāpakaṅgāni virativasena paripūrentīti pañcaṅgiko maggo nāma natthi. Subhaddasuttepi (dī. ni. 2.214) cetaṃ vuttaṃ – ‘‘yasmiṃ kho, subhadda, dhammavinaye ariyo aṭṭhaṅgiko maggo’’ti. Aññesu ca anekesu suttasatesu aṭṭhaṅgikova maggo āgatoti.
༤༣༣. ཙཏྟཱརོཔི སཏིཔཊྛཱནཱཏི མགྒསམྤཡུཏྟཱཝ ཙཏྟཱརོ སཏིཔཊྛཱནཱ། སམྨཔྤདྷཱནཱདཱིསུཔི ཨེསེཝ ནཡོ། ཡུགནནྡྷཱཏི ཨེཀཀྑཎིཀཡུགནནྡྷཱ། ཨེཏེཧི ཨཉྙསྨིཾ ཁཎེ སམཱཔཏྟི, ཨཉྙསྨིཾ ཝིཔསྶནཱཏི། ཨེཝཾ ནཱནཱཁཎིཀཱཔི ཧོནྟི, ཨརིཡམགྒེ པན ཨེཀཀྑཎིཀཱ།
433.Cattāropi satipaṭṭhānāti maggasampayuttāva cattāro satipaṭṭhānā. Sammappadhānādīsupi eseva nayo. Yuganandhāti ekakkhaṇikayuganandhā. Etehi aññasmiṃ khaṇe samāpatti, aññasmiṃ vipassanāti. Evaṃ nānākhaṇikāpi honti, ariyamagge pana ekakkhaṇikā.
ཝིཛྫཱ ཙ ཝིམུཏྟི ཙཱཏི ཨརཧཏྟམགྒཝིཛྫཱ ཙ ཕལཝིམུཏྟི ཙ། སེསཾ སབྦཏྠ ཨུཏྟཱནམེཝཱཏི།
Vijjā ca vimutti cāti arahattamaggavijjā ca phalavimutti ca. Sesaṃ sabbattha uttānamevāti.
པཔཉྩསཱུདནིཡཱ མཛ྄ཛྷིམནིཀཱཡཊྛཀཐཱཡ
Papañcasūdaniyā majjhimanikāyaṭṭhakathāya
མཧཱསལཱ༹ཡཏནིཀསུཏྟཝཎྞནཱ ནིཊྛིཏཱ།
Mahāsaḷāyatanikasuttavaṇṇanā niṭṭhitā.
Related texts:
ཏིཔིཊཀ (མཱུལ) • Tipiṭaka (Mūla) / སུཏྟཔིཊཀ • Suttapiṭaka / མཛྫྷིམནིཀཱཡ • Majjhimanikāya / ༧. མཧཱསལཱ༹ཡཏནིཀསུཏྟཾ • 7. Mahāsaḷāyatanikasuttaṃ
ཊཱིཀཱ • Tīkā / སུཏྟཔིཊཀ (ཊཱིཀཱ) • Suttapiṭaka (ṭīkā) / མཛྫྷིམནིཀཱཡ (ཊཱིཀཱ) • Majjhimanikāya (ṭīkā) / ༧. མཧཱསལཱ༹ཡཏནིཀསུཏྟཝཎྞནཱ • 7. Mahāsaḷāyatanikasuttavaṇṇanā
