Library / Tipiṭaka / ತಿಪಿಟಕ • Tipiṭaka / ದೀಘನಿಕಾಯ • Dīghanikāya

    ೭. ಮಹಾಸಮಯಸುತ್ತಂ

    7. Mahāsamayasuttaṃ

    ೩೩೧. ಏವಂ ಮೇ ಸುತಂ – ಏಕಂ ಸಮಯಂ ಭಗವಾ ಸಕ್ಕೇಸು ವಿಹರತಿ ಕಪಿಲವತ್ಥುಸ್ಮಿಂ ಮಹಾವನೇ ಮಹತಾ ಭಿಕ್ಖುಸಙ್ಘೇನ ಸದ್ಧಿಂ ಪಞ್ಚಮತ್ತೇಹಿ ಭಿಕ್ಖುಸತೇಹಿ ಸಬ್ಬೇಹೇವ ಅರಹನ್ತೇಹಿ; ದಸಹಿ ಚ ಲೋಕಧಾತೂಹಿ ದೇವತಾ ಯೇಭುಯ್ಯೇನ ಸನ್ನಿಪತಿತಾ ಹೋನ್ತಿ ಭಗವನ್ತಂ ದಸ್ಸನಾಯ ಭಿಕ್ಖುಸಙ್ಘಞ್ಚ। ಅಥ ಖೋ ಚತುನ್ನಂ ಸುದ್ಧಾವಾಸಕಾಯಿಕಾನಂ ದೇವತಾನಂ 1 ಏತದಹೋಸಿ – ‘‘ಅಯಂ ಖೋ ಭಗವಾ ಸಕ್ಕೇಸು ವಿಹರತಿ ಕಪಿಲವತ್ಥುಸ್ಮಿಂ ಮಹಾವನೇ ಮಹತಾ ಭಿಕ್ಖುಸಙ್ಘೇನ ಸದ್ಧಿಂ ಪಞ್ಚಮತ್ತೇಹಿ ಭಿಕ್ಖುಸತೇಹಿ ಸಬ್ಬೇಹೇವ ಅರಹನ್ತೇಹಿ; ದಸಹಿ ಚ ಲೋಕಧಾತೂಹಿ ದೇವತಾ ಯೇಭುಯ್ಯೇನ ಸನ್ನಿಪತಿತಾ ಹೋನ್ತಿ ಭಗವನ್ತಂ ದಸ್ಸನಾಯ ಭಿಕ್ಖುಸಙ್ಘಞ್ಚ। ಯಂನೂನ ಮಯಮ್ಪಿ ಯೇನ ಭಗವಾ ತೇನುಪಸಙ್ಕಮೇಯ್ಯಾಮ; ಉಪಸಙ್ಕಮಿತ್ವಾ ಭಗವತೋ ಸನ್ತಿಕೇ ಪಚ್ಚೇಕಂ ಗಾಥಂ 2 ಭಾಸೇಯ್ಯಾಮಾ’’ತಿ।

    331. Evaṃ me sutaṃ – ekaṃ samayaṃ bhagavā sakkesu viharati kapilavatthusmiṃ mahāvane mahatā bhikkhusaṅghena saddhiṃ pañcamattehi bhikkhusatehi sabbeheva arahantehi; dasahi ca lokadhātūhi devatā yebhuyyena sannipatitā honti bhagavantaṃ dassanāya bhikkhusaṅghañca. Atha kho catunnaṃ suddhāvāsakāyikānaṃ devatānaṃ 3 etadahosi – ‘‘ayaṃ kho bhagavā sakkesu viharati kapilavatthusmiṃ mahāvane mahatā bhikkhusaṅghena saddhiṃ pañcamattehi bhikkhusatehi sabbeheva arahantehi; dasahi ca lokadhātūhi devatā yebhuyyena sannipatitā honti bhagavantaṃ dassanāya bhikkhusaṅghañca. Yaṃnūna mayampi yena bhagavā tenupasaṅkameyyāma; upasaṅkamitvā bhagavato santike paccekaṃ gāthaṃ 4 bhāseyyāmā’’ti.

    ೩೩೨. ಅಥ ಖೋ ತಾ ದೇವತಾ ಸೇಯ್ಯಥಾಪಿ ನಾಮ ಬಲವಾ ಪುರಿಸೋ ಸಮಿಞ್ಜಿತಂ ವಾ ಬಾಹಂ ಪಸಾರೇಯ್ಯ ಪಸಾರಿತಂ ವಾ ಬಾಹಂ ಸಮಿಞ್ಜೇಯ್ಯ , ಏವಮೇವ ಸುದ್ಧಾವಾಸೇಸು ದೇವೇಸು ಅನ್ತರಹಿತಾ ಭಗವತೋ ಪುರತೋ ಪಾತುರಹೇಸುಂ। ಅಥ ಖೋ ತಾ ದೇವತಾ ಭಗವನ್ತಂ ಅಭಿವಾದೇತ್ವಾ ಏಕಮನ್ತಂ ಅಟ್ಠಂಸು। ಏಕಮನ್ತಂ ಠಿತಾ ಖೋ ಏಕಾ ದೇವತಾ ಭಗವತೋ ಸನ್ತಿಕೇ ಇಮಂ ಗಾಥಂ ಅಭಾಸಿ –

    332. Atha kho tā devatā seyyathāpi nāma balavā puriso samiñjitaṃ vā bāhaṃ pasāreyya pasāritaṃ vā bāhaṃ samiñjeyya , evameva suddhāvāsesu devesu antarahitā bhagavato purato pāturahesuṃ. Atha kho tā devatā bhagavantaṃ abhivādetvā ekamantaṃ aṭṭhaṃsu. Ekamantaṃ ṭhitā kho ekā devatā bhagavato santike imaṃ gāthaṃ abhāsi –

    ‘‘ಮಹಾಸಮಯೋ ಪವನಸ್ಮಿಂ, ದೇವಕಾಯಾ ಸಮಾಗತಾ।

    ‘‘Mahāsamayo pavanasmiṃ, devakāyā samāgatā;

    ಆಗತಮ್ಹ ಇಮಂ ಧಮ್ಮಸಮಯಂ, ದಕ್ಖಿತಾಯೇ ಅಪರಾಜಿತಸಙ್ಘ’’ನ್ತಿ॥

    Āgatamha imaṃ dhammasamayaṃ, dakkhitāye aparājitasaṅgha’’nti.

    ಅಥ ಖೋ ಅಪರಾ ದೇವತಾ ಭಗವತೋ ಸನ್ತಿಕೇ ಇಮಂ ಗಾಥಂ ಅಭಾಸಿ –

    Atha kho aparā devatā bhagavato santike imaṃ gāthaṃ abhāsi –

    ‘‘ತತ್ರ ಭಿಕ್ಖವೋ ಸಮಾದಹಂಸು, ಚಿತ್ತಮತ್ತನೋ ಉಜುಕಂ ಅಕಂಸು 5।

    ‘‘Tatra bhikkhavo samādahaṃsu, cittamattano ujukaṃ akaṃsu 6;

    ಸಾರಥೀವ ನೇತ್ತಾನಿ ಗಹೇತ್ವಾ, ಇನ್ದ್ರಿಯಾನಿ ರಕ್ಖನ್ತಿ ಪಣ್ಡಿತಾ’’ತಿ॥

    Sārathīva nettāni gahetvā, indriyāni rakkhanti paṇḍitā’’ti.

    ಅಥ ಖೋ ಅಪರಾ ದೇವತಾ ಭಗವತೋ ಸನ್ತಿಕೇ ಇಮಂ ಗಾಥಂ ಅಭಾಸಿ –

    Atha kho aparā devatā bhagavato santike imaṃ gāthaṃ abhāsi –

    ‘‘ಛೇತ್ವಾ ಖೀಲಂ ಛೇತ್ವಾ ಪಲಿಘಂ, ಇನ್ದಖೀಲಂ ಊಹಚ್ಚ 7 ಮನೇಜಾ।

    ‘‘Chetvā khīlaṃ chetvā palighaṃ, indakhīlaṃ ūhacca 8 manejā;

    ತೇ ಚರನ್ತಿ ಸುದ್ಧಾ ವಿಮಲಾ, ಚಕ್ಖುಮತಾ ಸುದನ್ತಾ ಸುಸುನಾಗಾ’’ತಿ॥

    Te caranti suddhā vimalā, cakkhumatā sudantā susunāgā’’ti.

    ಅಥ ಖೋ ಅಪರಾ ದೇವತಾ ಭಗವತೋ ಸನ್ತಿಕೇ ಇಮಂ ಗಾಥಂ ಅಭಾಸಿ –

    Atha kho aparā devatā bhagavato santike imaṃ gāthaṃ abhāsi –

    ‘‘ಯೇಕೇಚಿ ಬುದ್ಧಂ ಸರಣಂ ಗತಾಸೇ, ನ ತೇ ಗಮಿಸ್ಸನ್ತಿ ಅಪಾಯಭೂಮಿಂ।

    ‘‘Yekeci buddhaṃ saraṇaṃ gatāse, na te gamissanti apāyabhūmiṃ;

    ಪಹಾಯ ಮಾನುಸಂ ದೇಹಂ, ದೇವಕಾಯಂ ಪರಿಪೂರೇಸ್ಸನ್ತೀ’’ತಿ॥

    Pahāya mānusaṃ dehaṃ, devakāyaṃ paripūressantī’’ti.

    ದೇವತಾಸನ್ನಿಪಾತಾ

    Devatāsannipātā

    ೩೩೩. ಅಥ ಖೋ ಭಗವಾ ಭಿಕ್ಖೂ ಆಮನ್ತೇಸಿ – ‘‘ಯೇಭುಯ್ಯೇನ, ಭಿಕ್ಖವೇ, ದಸಸು ಲೋಕಧಾತೂಸು ದೇವತಾ ಸನ್ನಿಪತಿತಾ ಹೋನ್ತಿ 9, ತಥಾಗತಂ ದಸ್ಸನಾಯ ಭಿಕ್ಖುಸಙ್ಘಞ್ಚ । ಯೇಪಿ ತೇ, ಭಿಕ್ಖವೇ, ಅಹೇಸುಂ ಅತೀತಮದ್ಧಾನಂ ಅರಹನ್ತೋ ಸಮ್ಮಾಸಮ್ಬುದ್ಧಾ, ತೇಸಮ್ಪಿ ಭಗವನ್ತಾನಂ ಏತಂಪರಮಾಯೇವ 10 ದೇವತಾ ಸನ್ನಿಪತಿತಾ ಅಹೇಸುಂ ಸೇಯ್ಯಥಾಪಿ ಮಯ್ಹಂ ಏತರಹಿ। ಯೇಪಿ ತೇ, ಭಿಕ್ಖವೇ, ಭವಿಸ್ಸನ್ತಿ ಅನಾಗತಮದ್ಧಾನಂ ಅರಹನ್ತೋ ಸಮ್ಮಾಸಮ್ಬುದ್ಧಾ, ತೇಸಮ್ಪಿ ಭಗವನ್ತಾನಂ ಏತಂಪರಮಾಯೇವ ದೇವತಾ ಸನ್ನಿಪತಿತಾ ಭವಿಸ್ಸನ್ತಿ ಸೇಯ್ಯಥಾಪಿ ಮಯ್ಹಂ ಏತರಹಿ। ಆಚಿಕ್ಖಿಸ್ಸಾಮಿ, ಭಿಕ್ಖವೇ, ದೇವಕಾಯಾನಂ ನಾಮಾನಿ; ಕಿತ್ತಯಿಸ್ಸಾಮಿ, ಭಿಕ್ಖವೇ, ದೇವಕಾಯಾನಂ ನಾಮಾನಿ; ದೇಸೇಸ್ಸಾಮಿ, ಭಿಕ್ಖವೇ, ದೇವಕಾಯಾನಂ ನಾಮಾನಿ। ತಂ ಸುಣಾಥ, ಸಾಧುಕಂ ಮನಸಿಕರೋಥ, ಭಾಸಿಸ್ಸಾಮೀ’’ತಿ। ‘‘ಏವಂ, ಭನ್ತೇ’’ತಿ ಖೋ ತೇ ಭಿಕ್ಖೂ ಭಗವತೋ ಪಚ್ಚಸ್ಸೋಸುಂ।

    333. Atha kho bhagavā bhikkhū āmantesi – ‘‘yebhuyyena, bhikkhave, dasasu lokadhātūsu devatā sannipatitā honti 11, tathāgataṃ dassanāya bhikkhusaṅghañca . Yepi te, bhikkhave, ahesuṃ atītamaddhānaṃ arahanto sammāsambuddhā, tesampi bhagavantānaṃ etaṃparamāyeva 12 devatā sannipatitā ahesuṃ seyyathāpi mayhaṃ etarahi. Yepi te, bhikkhave, bhavissanti anāgatamaddhānaṃ arahanto sammāsambuddhā, tesampi bhagavantānaṃ etaṃparamāyeva devatā sannipatitā bhavissanti seyyathāpi mayhaṃ etarahi. Ācikkhissāmi, bhikkhave, devakāyānaṃ nāmāni; kittayissāmi, bhikkhave, devakāyānaṃ nāmāni; desessāmi, bhikkhave, devakāyānaṃ nāmāni. Taṃ suṇātha, sādhukaṃ manasikarotha, bhāsissāmī’’ti. ‘‘Evaṃ, bhante’’ti kho te bhikkhū bhagavato paccassosuṃ.

    ೩೩೪. ಭಗವಾ ಏತದವೋಚ –

    334. Bhagavā etadavoca –

    ‘‘ಸಿಲೋಕಮನುಕಸ್ಸಾಮಿ, ಯತ್ಥ ಭುಮ್ಮಾ ತದಸ್ಸಿತಾ।

    ‘‘Silokamanukassāmi, yattha bhummā tadassitā;

    ಯೇ ಸಿತಾ ಗಿರಿಗಬ್ಭರಂ, ಪಹಿತತ್ತಾ ಸಮಾಹಿತಾ॥

    Ye sitā girigabbharaṃ, pahitattā samāhitā.

    ‘‘ಪುಥೂಸೀಹಾವ ಸಲ್ಲೀನಾ, ಲೋಮಹಂಸಾಭಿಸಮ್ಭುನೋ।

    ‘‘Puthūsīhāva sallīnā, lomahaṃsābhisambhuno;

    ಓದಾತಮನಸಾ ಸುದ್ಧಾ, ವಿಪ್ಪಸನ್ನಮನಾವಿಲಾ’’ 13॥

    Odātamanasā suddhā, vippasannamanāvilā’’ 14.

    ಭಿಯ್ಯೋ ಪಞ್ಚಸತೇ ಞತ್ವಾ, ವನೇ ಕಾಪಿಲವತ್ಥವೇ।

    Bhiyyo pañcasate ñatvā, vane kāpilavatthave;

    ತತೋ ಆಮನ್ತಯೀ ಸತ್ಥಾ, ಸಾವಕೇ ಸಾಸನೇ ರತೇ॥

    Tato āmantayī satthā, sāvake sāsane rate.

    ‘‘ದೇವಕಾಯಾ ಅಭಿಕ್ಕನ್ತಾ, ತೇ ವಿಜಾನಾಥ ಭಿಕ್ಖವೋ’’।

    ‘‘Devakāyā abhikkantā, te vijānātha bhikkhavo’’;

    ತೇ ಚ ಆತಪ್ಪಮಕರುಂ, ಸುತ್ವಾ ಬುದ್ಧಸ್ಸ ಸಾಸನಂ॥

    Te ca ātappamakaruṃ, sutvā buddhassa sāsanaṃ.

    ತೇಸಂ ಪಾತುರಹು ಞಾಣಂ, ಅಮನುಸ್ಸಾನದಸ್ಸನಂ।

    Tesaṃ pāturahu ñāṇaṃ, amanussānadassanaṃ;

    ಅಪ್ಪೇಕೇ ಸತಮದ್ದಕ್ಖುಂ, ಸಹಸ್ಸಂ ಅಥ ಸತ್ತರಿಂ॥

    Appeke satamaddakkhuṃ, sahassaṃ atha sattariṃ.

    ಸತಂ ಏಕೇ ಸಹಸ್ಸಾನಂ, ಅಮನುಸ್ಸಾನಮದ್ದಸುಂ।

    Sataṃ eke sahassānaṃ, amanussānamaddasuṃ;

    ಅಪ್ಪೇಕೇನನ್ತಮದ್ದಕ್ಖುಂ , ದಿಸಾ ಸಬ್ಬಾ ಫುಟಾ ಅಹುಂ॥

    Appekenantamaddakkhuṃ , disā sabbā phuṭā ahuṃ.

    ತಞ್ಚ ಸಬ್ಬಂ ಅಭಿಞ್ಞಾಯ, ವವತ್ಥಿತ್ವಾನ 15 ಚಕ್ಖುಮಾ।

    Tañca sabbaṃ abhiññāya, vavatthitvāna 16 cakkhumā;

    ತತೋ ಆಮನ್ತಯೀ ಸತ್ಥಾ, ಸಾವಕೇ ಸಾಸನೇ ರತೇ॥

    Tato āmantayī satthā, sāvake sāsane rate.

    ‘‘ದೇವಕಾಯಾ ಅಭಿಕ್ಕನ್ತಾ, ತೇ ವಿಜಾನಾಥ ಭಿಕ್ಖವೋ।

    ‘‘Devakāyā abhikkantā, te vijānātha bhikkhavo;

    ಯೇ ವೋಹಂ ಕಿತ್ತಯಿಸ್ಸಾಮಿ, ಗಿರಾಹಿ ಅನುಪುಬ್ಬಸೋ॥

    Ye vohaṃ kittayissāmi, girāhi anupubbaso.

    ೩೩೫.‘‘ಸತ್ತಸಹಸ್ಸಾ ತೇ ಯಕ್ಖಾ, ಭುಮ್ಮಾ ಕಾಪಿಲವತ್ಥವಾ।

    335.‘‘Sattasahassā te yakkhā, bhummā kāpilavatthavā.

    ಇದ್ಧಿಮನ್ತೋ ಜುತಿಮನ್ತೋ, ವಣ್ಣವನ್ತೋ ಯಸಸ್ಸಿನೋ।

    Iddhimanto jutimanto, vaṇṇavanto yasassino;

    ಮೋದಮಾನಾ ಅಭಿಕ್ಕಾಮುಂ, ಭಿಕ್ಖೂನಂ ಸಮಿತಿಂ ವನಂ॥

    Modamānā abhikkāmuṃ, bhikkhūnaṃ samitiṃ vanaṃ.

    ‘‘ಛಸಹಸ್ಸಾ ಹೇಮವತಾ, ಯಕ್ಖಾ ನಾನತ್ತವಣ್ಣಿನೋ।

    ‘‘Chasahassā hemavatā, yakkhā nānattavaṇṇino;

    ಇದ್ಧಿಮನ್ತೋ ಜುತೀಮನ್ತೋ 17, ವಣ್ಣವನ್ತೋ ಯಸಸ್ಸಿನೋ।

    Iddhimanto jutīmanto 18, vaṇṇavanto yasassino;

    ಮೋದಮಾನಾ ಅಭಿಕ್ಕಾಮುಂ, ಭಿಕ್ಖೂನಂ ಸಮಿತಿಂ ವನಂ॥

    Modamānā abhikkāmuṃ, bhikkhūnaṃ samitiṃ vanaṃ.

    ‘‘ಸಾತಾಗಿರಾ ತಿಸಹಸ್ಸಾ, ಯಕ್ಖಾ ನಾನತ್ತವಣ್ಣಿನೋ।

    ‘‘Sātāgirā tisahassā, yakkhā nānattavaṇṇino;

    ಇದ್ಧಿಮನ್ತೋ ಜುತಿಮನ್ತೋ, ವಣ್ಣವನ್ತೋ ಯಸಸ್ಸಿನೋ।

    Iddhimanto jutimanto, vaṇṇavanto yasassino;

    ಮೋದಮಾನಾ ಅಭಿಕ್ಕಾಮುಂ, ಭಿಕ್ಖೂನಂ ಸಮಿತಿಂ ವನಂ॥

    Modamānā abhikkāmuṃ, bhikkhūnaṃ samitiṃ vanaṃ.

    ‘‘ಇಚ್ಚೇತೇ ಸೋಳಸಸಹಸ್ಸಾ, ಯಕ್ಖಾ ನಾನತ್ತವಣ್ಣಿನೋ।

    ‘‘Iccete soḷasasahassā, yakkhā nānattavaṇṇino;

    ಇದ್ಧಿಮನ್ತೋ ಜುತಿಮನ್ತೋ, ವಣ್ಣವನ್ತೋ ಯಸಸ್ಸಿನೋ।

    Iddhimanto jutimanto, vaṇṇavanto yasassino;

    ಮೋದಮಾನಾ ಅಭಿಕ್ಕಾಮುಂ, ಭಿಕ್ಖೂನಂ ಸಮಿತಿಂ ವನಂ॥

    Modamānā abhikkāmuṃ, bhikkhūnaṃ samitiṃ vanaṃ.

    ‘‘ವೇಸ್ಸಾಮಿತ್ತಾ ಪಞ್ಚಸತಾ, ಯಕ್ಖಾ ನಾನತ್ತವಣ್ಣಿನೋ।

    ‘‘Vessāmittā pañcasatā, yakkhā nānattavaṇṇino;

    ಇದ್ಧಿಮನ್ತೋ ಜುತಿಮನ್ತೋ, ವಣ್ಣವನ್ತೋ ಯಸಸ್ಸಿನೋ।

    Iddhimanto jutimanto, vaṇṇavanto yasassino;

    ಮೋದಮಾನಾ ಅಭಿಕ್ಕಾಮುಂ, ಭಿಕ್ಖೂನಂ ಸಮಿತಿಂ ವನಂ॥

    Modamānā abhikkāmuṃ, bhikkhūnaṃ samitiṃ vanaṃ.

    ‘‘ಕುಮ್ಭೀರೋ ರಾಜಗಹಿಕೋ, ವೇಪುಲ್ಲಸ್ಸ ನಿವೇಸನಂ।

    ‘‘Kumbhīro rājagahiko, vepullassa nivesanaṃ;

    ಭಿಯ್ಯೋ ನಂ ಸತಸಹಸ್ಸಂ, ಯಕ್ಖಾನಂ ಪಯಿರುಪಾಸತಿ।

    Bhiyyo naṃ satasahassaṃ, yakkhānaṃ payirupāsati;

    ಕುಮ್ಭೀರೋ ರಾಜಗಹಿಕೋ, ಸೋಪಾಗಾ ಸಮಿತಿಂ ವನಂ॥

    Kumbhīro rājagahiko, sopāgā samitiṃ vanaṃ.

    ೩೩೬.‘‘ಪುರಿಮಞ್ಚ ದಿಸಂ ರಾಜಾ, ಧತರಟ್ಠೋ ಪಸಾಸತಿ।

    336.‘‘Purimañca disaṃ rājā, dhataraṭṭho pasāsati.

    ಗನ್ಧಬ್ಬಾನಂ ಅಧಿಪತಿ, ಮಹಾರಾಜಾ ಯಸಸ್ಸಿಸೋ॥

    Gandhabbānaṃ adhipati, mahārājā yasassiso.

    ‘‘ಪುತ್ತಾಪಿ ತಸ್ಸ ಬಹವೋ, ಇನ್ದನಾಮಾ ಮಹಬ್ಬಲಾ।

    ‘‘Puttāpi tassa bahavo, indanāmā mahabbalā;

    ಇದ್ಧಿಮನ್ತೋ ಜುತಿಮನ್ತೋ, ವಣ್ಣವನ್ತೋ ಯಸಸ್ಸಿನೋ।

    Iddhimanto jutimanto, vaṇṇavanto yasassino;

    ಮೋದಮಾನಾ ಅಭಿಕ್ಕಾಮುಂ, ಭಿಕ್ಖೂನಂ ಸಮಿತಿಂ ವನಂ॥

    Modamānā abhikkāmuṃ, bhikkhūnaṃ samitiṃ vanaṃ.

    ‘‘ದಕ್ಖಿಣಞ್ಚ ದಿಸಂ ರಾಜಾ, ವಿರೂಳ್ಹೋ ತಂ ಪಸಾಸತಿ 19।

    ‘‘Dakkhiṇañca disaṃ rājā, virūḷho taṃ pasāsati 20;

    ಕುಮ್ಭಣ್ಡಾನಂ ಅಧಿಪತಿ, ಮಹಾರಾಜಾ ಯಸಸ್ಸಿಸೋ॥

    Kumbhaṇḍānaṃ adhipati, mahārājā yasassiso.

    ‘‘ಪುತ್ತಾಪಿ ತಸ್ಸ ಬಹವೋ, ಇನ್ದನಾಮಾ ಮಹಬ್ಬಲಾ।

    ‘‘Puttāpi tassa bahavo, indanāmā mahabbalā;

    ಇದ್ಧಿಮನ್ತೋ ಜುತಿಮನ್ತೋ, ವಣ್ಣವನ್ತೋ ಯಸಸ್ಸಿನೋ।

    Iddhimanto jutimanto, vaṇṇavanto yasassino;

    ಮೋದಮಾನಾ ಅಭಿಕ್ಕಾಮುಂ, ಭಿಕ್ಖೂನಂ ಸಮಿತಿಂ ವನಂ॥

    Modamānā abhikkāmuṃ, bhikkhūnaṃ samitiṃ vanaṃ.

    ‘‘ಪಚ್ಛಿಮಞ್ಚ ದಿಸಂ ರಾಜಾ, ವಿರೂಪಕ್ಖೋ ಪಸಾಸತಿ।

    ‘‘Pacchimañca disaṃ rājā, virūpakkho pasāsati;

    ನಾಗಾನಞ್ಚ ಅಧಿಪತಿ, ಮಹಾರಾಜಾ ಯಸಸ್ಸಿಸೋ॥

    Nāgānañca adhipati, mahārājā yasassiso.

    ‘‘ಪುತ್ತಾಪಿ ತಸ್ಸ ಬಹವೋ, ಇನ್ದನಾಮಾ ಮಹಬ್ಬಲಾ।

    ‘‘Puttāpi tassa bahavo, indanāmā mahabbalā;

    ಇದ್ಧಿಮನ್ತೋ ಜುತಿಮನ್ತೋ, ವಣ್ಣವನ್ತೋ ಯಸಸ್ಸಿನೋ।

    Iddhimanto jutimanto, vaṇṇavanto yasassino;

    ಮೋದಮಾನಾ ಅಭಿಕ್ಕಾಮುಂ, ಭಿಕ್ಖೂನಂ ಸಮಿತಿಂ ವನಂ॥

    Modamānā abhikkāmuṃ, bhikkhūnaṃ samitiṃ vanaṃ.

    ‘‘ಉತ್ತರಞ್ಚ ದಿಸಂ ರಾಜಾ, ಕುವೇರೋ ತಂ ಪಸಾಸತಿ।

    ‘‘Uttarañca disaṃ rājā, kuvero taṃ pasāsati;

    ಯಕ್ಖಾನಞ್ಚ ಅಧಿಪತಿ, ಮಹಾರಾಜಾ ಯಸಸ್ಸಿಸೋ॥

    Yakkhānañca adhipati, mahārājā yasassiso.

    ‘‘ಪುತ್ತಾಪಿ ತಸ್ಸ ಬಹವೋ, ಇನ್ದನಾಮಾ ಮಹಬ್ಬಲಾ।

    ‘‘Puttāpi tassa bahavo, indanāmā mahabbalā;

    ಇದ್ಧಿಮನ್ತೋ ಜುತಿಮನ್ತೋ, ವಣ್ಣವನ್ತೋ ಯಸಸ್ಸಿನೋ।

    Iddhimanto jutimanto, vaṇṇavanto yasassino;

    ಮೋದಮಾನಾ ಅಭಿಕ್ಕಾಮುಂ, ಭಿಕ್ಖೂನಂ ಸಮಿತಿಂ ವನಂ॥

    Modamānā abhikkāmuṃ, bhikkhūnaṃ samitiṃ vanaṃ.

    ‘‘ಪುರಿಮಂ ದಿಸಂ ಧತರಟ್ಠೋ, ದಕ್ಖಿಣೇನ ವಿರೂಳ್ಹಕೋ।

    ‘‘Purimaṃ disaṃ dhataraṭṭho, dakkhiṇena virūḷhako;

    ಪಚ್ಛಿಮೇನ ವಿರೂಪಕ್ಖೋ, ಕುವೇರೋ ಉತ್ತರಂ ದಿಸಂ॥

    Pacchimena virūpakkho, kuvero uttaraṃ disaṃ.

    ‘‘ಚತ್ತಾರೋ ತೇ ಮಹಾರಾಜಾ, ಸಮನ್ತಾ ಚತುರೋ ದಿಸಾ।

    ‘‘Cattāro te mahārājā, samantā caturo disā;

    ದದ್ದಲ್ಲಮಾನಾ 21 ಅಟ್ಠಂಸು, ವನೇ ಕಾಪಿಲವತ್ಥವೇ॥

    Daddallamānā 22 aṭṭhaṃsu, vane kāpilavatthave.

    ೩೩೭.‘‘ತೇಸಂ ಮಾಯಾವಿನೋ ದಾಸಾ, ಆಗುಂ 23 ವಞ್ಚನಿಕಾ ಸಠಾ।

    337.‘‘Tesaṃ māyāvino dāsā, āguṃ 24 vañcanikā saṭhā.

    ಮಾಯಾ ಕುಟೇಣ್ಡು ವಿಟೇಣ್ಡು 25, ವಿಟುಚ್ಚ 26 ವಿಟುಟೋ ಸಹ॥

    Māyā kuṭeṇḍu viṭeṇḍu 27, viṭucca 28 viṭuṭo saha.

    ‘‘ಚನ್ದನೋ ಕಾಮಸೇಟ್ಠೋ ಚ, ಕಿನ್ನಿಘಣ್ಡು 29 ನಿಘಣ್ಡು ಚ।

    ‘‘Candano kāmaseṭṭho ca, kinnighaṇḍu 30 nighaṇḍu ca;

    ಪನಾದೋ ಓಪಮಞ್ಞೋ ಚ, ದೇವಸೂತೋ ಚ ಮಾತಲಿ॥

    Panādo opamañño ca, devasūto ca mātali.

    ‘‘ಚಿತ್ತಸೇನೋ ಚ ಗನ್ಧಬ್ಬೋ, ನಳೋರಾಜಾ ಜನೇಸಭೋ 31।

    ‘‘Cittaseno ca gandhabbo, naḷorājā janesabho 32;

    ಆಗಾ ಪಞ್ಚಸಿಖೋ ಚೇವ, ತಿಮ್ಬರೂ ಸೂರಿಯವಚ್ಚಸಾ 33॥

    Āgā pañcasikho ceva, timbarū sūriyavaccasā 34.

    ‘‘ಏತೇ ಚಞ್ಞೇ ಚ ರಾಜಾನೋ, ಗನ್ಧಬ್ಬಾ ಸಹ ರಾಜುಭಿ।

    ‘‘Ete caññe ca rājāno, gandhabbā saha rājubhi;

    ಮೋದಮಾನಾ ಅಭಿಕ್ಕಾಮುಂ, ಭಿಕ್ಖೂನಂ ಸಮಿತಿಂ ವನಂ॥

    Modamānā abhikkāmuṃ, bhikkhūnaṃ samitiṃ vanaṃ.

    ೩೩೮.‘‘ಅಥಾಗುಂ ನಾಗಸಾ ನಾಗಾ, ವೇಸಾಲಾ ಸಹತಚ್ಛಕಾ।

    338.‘‘Athāguṃ nāgasā nāgā, vesālā sahatacchakā.

    ಕಮ್ಬಲಸ್ಸತರಾ ಆಗುಂ, ಪಾಯಾಗಾ ಸಹ ಞಾತಿಭಿ॥

    Kambalassatarā āguṃ, pāyāgā saha ñātibhi.

    ‘‘ಯಾಮುನಾ ಧತರಟ್ಠಾ ಚ, ಆಗೂ ನಾಗಾ ಯಸಸ್ಸಿನೋ।

    ‘‘Yāmunā dhataraṭṭhā ca, āgū nāgā yasassino;

    ಏರಾವಣೋ ಮಹಾನಾಗೋ, ಸೋಪಾಗಾ ಸಮಿತಿಂ ವನಂ॥

    Erāvaṇo mahānāgo, sopāgā samitiṃ vanaṃ.

    ‘‘ಯೇ ನಾಗರಾಜೇ ಸಹಸಾ ಹರನ್ತಿ, ದಿಬ್ಬಾ ದಿಜಾ ಪಕ್ಖಿ ವಿಸುದ್ಧಚಕ್ಖೂ।

    ‘‘Ye nāgarāje sahasā haranti, dibbā dijā pakkhi visuddhacakkhū;

    ವೇಹಾಯಸಾ 35 ತೇ ವನಮಜ್ಝಪತ್ತಾ, ಚಿತ್ರಾ ಸುಪಣ್ಣಾ ಇತಿ ತೇಸ ನಾಮಂ॥

    Vehāyasā 36 te vanamajjhapattā, citrā supaṇṇā iti tesa nāmaṃ.

    ‘‘ಅಭಯಂ ತದಾ ನಾಗರಾಜಾನಮಾಸಿ, ಸುಪಣ್ಣತೋ ಖೇಮಮಕಾಸಿ ಬುದ್ಧೋ।

    ‘‘Abhayaṃ tadā nāgarājānamāsi, supaṇṇato khemamakāsi buddho;

    ಸಣ್ಹಾಹಿ ವಾಚಾಹಿ ಉಪವ್ಹಯನ್ತಾ, ನಾಗಾ ಸುಪಣ್ಣಾ ಸರಣಮಕಂಸು ಬುದ್ಧಂ॥

    Saṇhāhi vācāhi upavhayantā, nāgā supaṇṇā saraṇamakaṃsu buddhaṃ.

    ೩೩೯.‘‘ಜಿತಾ ವಜಿರಹತ್ಥೇನ, ಸಮುದ್ದಂ ಅಸುರಾಸಿತಾ।

    339.‘‘Jitā vajirahatthena, samuddaṃ asurāsitā.

    ಭಾತರೋ ವಾಸವಸ್ಸೇತೇ, ಇದ್ಧಿಮನ್ತೋ ಯಸಸ್ಸಿನೋ॥

    Bhātaro vāsavassete, iddhimanto yasassino.

    ‘‘ಕಾಲಕಞ್ಚಾ ಮಹಾಭಿಸ್ಮಾ 37, ಅಸುರಾ ದಾನವೇಘಸಾ।

    ‘‘Kālakañcā mahābhismā 38, asurā dānaveghasā;

    ವೇಪಚಿತ್ತಿ ಸುಚಿತ್ತಿ ಚ, ಪಹಾರಾದೋ ನಮುಚೀ ಸಹ॥

    Vepacitti sucitti ca, pahārādo namucī saha.

    ‘‘ಸತಞ್ಚ ಬಲಿಪುತ್ತಾನಂ, ಸಬ್ಬೇ ವೇರೋಚನಾಮಕಾ।

    ‘‘Satañca baliputtānaṃ, sabbe verocanāmakā;

    ಸನ್ನಯ್ಹಿತ್ವಾ ಬಲಿಸೇನಂ 39, ರಾಹುಭದ್ದಮುಪಾಗಮುಂ।

    Sannayhitvā balisenaṃ 40, rāhubhaddamupāgamuṃ;

    ಸಮಯೋದಾನಿ ಭದ್ದನ್ತೇ, ಭಿಕ್ಖೂನಂ ಸಮಿತಿಂ ವನಂ॥

    Samayodāni bhaddante, bhikkhūnaṃ samitiṃ vanaṃ.

    ೩೪೦.‘‘ಆಪೋ ಚ ದೇವಾ ಪಥವೀ, ತೇಜೋ ವಾಯೋ ತದಾಗಮುಂ।

    340.‘‘Āpo ca devā pathavī, tejo vāyo tadāgamuṃ.

    ವರುಣಾ ವಾರಣಾ 41 ದೇವಾ, ಸೋಮೋ ಚ ಯಸಸಾ ಸಹ॥

    Varuṇā vāraṇā 42 devā, somo ca yasasā saha.

    ‘‘ಮೇತ್ತಾ ಕರುಣಾ ಕಾಯಿಕಾ, ಆಗುಂ ದೇವಾ ಯಸಸ್ಸಿನೋ।

    ‘‘Mettā karuṇā kāyikā, āguṃ devā yasassino;

    ದಸೇತೇ ದಸಧಾ ಕಾಯಾ, ಸಬ್ಬೇ ನಾನತ್ತವಣ್ಣಿನೋ॥

    Dasete dasadhā kāyā, sabbe nānattavaṇṇino.

    ‘‘ಇದ್ಧಿಮನ್ತೋ ಜುತಿಮನ್ತೋ, ವಣ್ಣವನ್ತೋ ಯಸಸ್ಸಿನೋ।

    ‘‘Iddhimanto jutimanto, vaṇṇavanto yasassino;

    ಮೋದಮಾನಾ ಅಭಿಕ್ಕಾಮುಂ, ಭಿಕ್ಖೂನಂ ಸಮಿತಿಂ ವನಂ॥

    Modamānā abhikkāmuṃ, bhikkhūnaṃ samitiṃ vanaṃ.

    ‘‘ವೇಣ್ಡುದೇವಾ ಸಹಲಿ ಚ 43, ಅಸಮಾ ಚ ದುವೇ ಯಮಾ।

    ‘‘Veṇḍudevā sahali ca 44, asamā ca duve yamā;

    ಚನ್ದಸ್ಸೂಪನಿಸಾ ದೇವಾ, ಚನ್ದಮಾಗುಂ ಪುರಕ್ಖತ್ವಾ॥

    Candassūpanisā devā, candamāguṃ purakkhatvā.

    ‘‘ಸೂರಿಯಸ್ಸೂಪನಿಸಾ 45 ದೇವಾ, ಸೂರಿಯಮಾಗುಂ ಪುರಕ್ಖತ್ವಾ।

    ‘‘Sūriyassūpanisā 46 devā, sūriyamāguṃ purakkhatvā;

    ನಕ್ಖತ್ತಾನಿ ಪುರಕ್ಖತ್ವಾ, ಆಗುಂ ಮನ್ದವಲಾಹಕಾ॥

    Nakkhattāni purakkhatvā, āguṃ mandavalāhakā.

    ‘‘ವಸೂನಂ ವಾಸವೋ ಸೇಟ್ಠೋ, ಸಕ್ಕೋಪಾಗಾ ಪುರಿನ್ದದೋ।

    ‘‘Vasūnaṃ vāsavo seṭṭho, sakkopāgā purindado;

    ದಸೇತೇ ದಸಧಾ ಕಾಯಾ, ಸಬ್ಬೇ ನಾನತ್ತವಣ್ಣಿನೋ॥

    Dasete dasadhā kāyā, sabbe nānattavaṇṇino.

    ‘‘ಇದ್ಧಿಮನ್ತೋ ಜುತಿಮನ್ತೋ, ವಣ್ಣವನ್ತೋ ಯಸಸ್ಸಿನೋ।

    ‘‘Iddhimanto jutimanto, vaṇṇavanto yasassino;

    ಮೋದಮಾನಾ ಅಭಿಕ್ಕಾಮುಂ, ಭಿಕ್ಖೂನಂ ಸಮಿತಿಂ ವನಂ॥

    Modamānā abhikkāmuṃ, bhikkhūnaṃ samitiṃ vanaṃ.

    ‘‘ಅಥಾಗುಂ ಸಹಭೂ ದೇವಾ, ಜಲಮಗ್ಗಿಸಿಖಾರಿವ।

    ‘‘Athāguṃ sahabhū devā, jalamaggisikhāriva;

    ಅರಿಟ್ಠಕಾ ಚ ರೋಜಾ ಚ, ಉಮಾಪುಪ್ಫನಿಭಾಸಿನೋ॥

    Ariṭṭhakā ca rojā ca, umāpupphanibhāsino.

    ‘‘ವರುಣಾ ಸಹಧಮ್ಮಾ ಚ, ಅಚ್ಚುತಾ ಚ ಅನೇಜಕಾ।

    ‘‘Varuṇā sahadhammā ca, accutā ca anejakā;

    ಸೂಲೇಯ್ಯರುಚಿರಾ ಆಗುಂ, ಆಗುಂ ವಾಸವನೇಸಿನೋ।

    Sūleyyarucirā āguṃ, āguṃ vāsavanesino;

    ದಸೇತೇ ದಸಧಾ ಕಾಯಾ, ಸಬ್ಬೇ ನಾನತ್ತವಣ್ಣಿನೋ॥

    Dasete dasadhā kāyā, sabbe nānattavaṇṇino.

    ‘‘ಇದ್ಧಿಮನ್ತೋ ಜುತಿಮನ್ತೋ, ವಣ್ಣವನ್ತೋ ಯಸಸ್ಸಿನೋ।

    ‘‘Iddhimanto jutimanto, vaṇṇavanto yasassino;

    ಮೋದಮಾನಾ ಅಭಿಕ್ಕಾಮುಂ, ಭಿಕ್ಖೂನಂ ಸಮಿತಿಂ ವನಂ॥

    Modamānā abhikkāmuṃ, bhikkhūnaṃ samitiṃ vanaṃ.

    ‘‘ಸಮಾನಾ ಮಹಾಸಮನಾ, ಮಾನುಸಾ ಮಾನುಸುತ್ತಮಾ।

    ‘‘Samānā mahāsamanā, mānusā mānusuttamā;

    ಖಿಡ್ಡಾಪದೋಸಿಕಾ ಆಗುಂ, ಆಗುಂ ಮನೋಪದೋಸಿಕಾ॥

    Khiḍḍāpadosikā āguṃ, āguṃ manopadosikā.

    ‘‘ಅಥಾಗುಂ ಹರಯೋ ದೇವಾ, ಯೇ ಚ ಲೋಹಿತವಾಸಿನೋ।

    ‘‘Athāguṃ harayo devā, ye ca lohitavāsino;

    ಪಾರಗಾ ಮಹಾಪಾರಗಾ, ಆಗುಂ ದೇವಾ ಯಸಸ್ಸಿನೋ।

    Pāragā mahāpāragā, āguṃ devā yasassino;

    ದಸೇತೇ ದಸಧಾ ಕಾಯಾ, ಸಬ್ಬೇ ನಾನತ್ತವಣ್ಣಿನೋ॥

    Dasete dasadhā kāyā, sabbe nānattavaṇṇino.

    ‘‘ಇದ್ಧಿಮನ್ತೋ ಜುತಿಮನ್ತೋ, ವಣ್ಣವನ್ತೋ ಯಸಸ್ಸಿನೋ।

    ‘‘Iddhimanto jutimanto, vaṇṇavanto yasassino;

    ಮೋದಮಾನಾ ಅಭಿಕ್ಕಾಮುಂ, ಭಿಕ್ಖೂನಂ ಸಮಿತಿಂ ವನಂ॥

    Modamānā abhikkāmuṃ, bhikkhūnaṃ samitiṃ vanaṃ.

    ‘‘ಸುಕ್ಕಾ ಕರಮ್ಭಾ 47 ಅರುಣಾ, ಆಗುಂ ವೇಘನಸಾ ಸಹ।

    ‘‘Sukkā karambhā 48 aruṇā, āguṃ veghanasā saha;

    ಓದಾತಗಯ್ಹಾ ಪಾಮೋಕ್ಖಾ, ಆಗುಂ ದೇವಾ ವಿಚಕ್ಖಣಾ॥

    Odātagayhā pāmokkhā, āguṃ devā vicakkhaṇā.

    ‘‘ಸದಾಮತ್ತಾ ಹಾರಗಜಾ, ಮಿಸ್ಸಕಾ ಚ ಯಸಸ್ಸಿನೋ।

    ‘‘Sadāmattā hāragajā, missakā ca yasassino;

    ಥನಯಂ ಆಗ ಪಜ್ಜುನ್ನೋ, ಯೋ ದಿಸಾ ಅಭಿವಸ್ಸತಿ॥

    Thanayaṃ āga pajjunno, yo disā abhivassati.

    ‘‘ದಸೇತೇ ದಸಧಾ ಕಾಯಾ, ಸಬ್ಬೇ ನಾನತ್ತವಣ್ಣಿನೋ।

    ‘‘Dasete dasadhā kāyā, sabbe nānattavaṇṇino;

    ಇದ್ಧಿಮನ್ತೋ ಜುತಿಮನ್ತೋ, ವಣ್ಣವನ್ತೋ ಯಸಸ್ಸಿನೋ।

    Iddhimanto jutimanto, vaṇṇavanto yasassino;

    ಮೋದಮಾನಾ ಅಭಿಕ್ಕಾಮುಂ, ಭಿಕ್ಖೂನಂ ಸಮಿತಿಂ ವನಂ॥

    Modamānā abhikkāmuṃ, bhikkhūnaṃ samitiṃ vanaṃ.

    ‘‘ಖೇಮಿಯಾ ತುಸಿತಾ ಯಾಮಾ, ಕಟ್ಠಕಾ ಚ ಯಸಸ್ಸಿನೋ।

    ‘‘Khemiyā tusitā yāmā, kaṭṭhakā ca yasassino;

    ಲಮ್ಬೀತಕಾ ಲಾಮಸೇಟ್ಠಾ, ಜೋತಿನಾಮಾ ಚ ಆಸವಾ।

    Lambītakā lāmaseṭṭhā, jotināmā ca āsavā;

    ನಿಮ್ಮಾನರತಿನೋ ಆಗುಂ, ಅಥಾಗುಂ ಪರನಿಮ್ಮಿತಾ॥

    Nimmānaratino āguṃ, athāguṃ paranimmitā.

    ‘‘ದಸೇತೇ ದಸಧಾ ಕಾಯಾ, ಸಬ್ಬೇ ನಾನತ್ತವಣ್ಣಿನೋ।

    ‘‘Dasete dasadhā kāyā, sabbe nānattavaṇṇino;

    ಇದ್ಧಿಮನ್ತೋ ಜುತಿಮನ್ತೋ, ವಣ್ಣವನ್ತೋ ಯಸಸ್ಸಿನೋ।

    Iddhimanto jutimanto, vaṇṇavanto yasassino;

    ಮೋದಮಾನಾ ಅಭಿಕ್ಕಾಮುಂ, ಭಿಕ್ಖೂನಂ ಸಮಿತಿಂ ವನಂ॥

    Modamānā abhikkāmuṃ, bhikkhūnaṃ samitiṃ vanaṃ.

    ‘‘ಸಟ್ಠೇತೇ ದೇವನಿಕಾಯಾ, ಸಬ್ಬೇ ನಾನತ್ತವಣ್ಣಿನೋ।

    ‘‘Saṭṭhete devanikāyā, sabbe nānattavaṇṇino;

    ನಾಮನ್ವಯೇನ ಆಗಚ್ಛುಂ 49, ಯೇ ಚಞ್ಞೇ ಸದಿಸಾ ಸಹ॥

    Nāmanvayena āgacchuṃ 50, ye caññe sadisā saha.

    ‘‘‘ಪವುಟ್ಠಜಾತಿಮಖಿಲಂ 51, ಓಘತಿಣ್ಣಮನಾಸವಂ।

    ‘‘‘Pavuṭṭhajātimakhilaṃ 52, oghatiṇṇamanāsavaṃ;

    ದಕ್ಖೇಮೋಘತರಂ ನಾಗಂ, ಚನ್ದಂವ ಅಸಿತಾತಿಗಂ’॥

    Dakkhemoghataraṃ nāgaṃ, candaṃva asitātigaṃ’.

    ೩೪೧.‘‘ಸುಬ್ರಹ್ಮಾ ಪರಮತ್ತೋ ಚ 53, ಪುತ್ತಾ ಇದ್ಧಿಮತೋ ಸಹ।

    341.‘‘Subrahmā paramatto ca 54, puttā iddhimato saha.

    ಸನಙ್ಕುಮಾರೋ ತಿಸ್ಸೋ ಚ, ಸೋಪಾಗ ಸಮಿತಿಂ ವನಂ॥

    Sanaṅkumāro tisso ca, sopāga samitiṃ vanaṃ.

    ‘‘ಸಹಸ್ಸಂ ಬ್ರಹ್ಮಲೋಕಾನಂ, ಮಹಾಬ್ರಹ್ಮಾಭಿತಿಟ್ಠತಿ।

    ‘‘Sahassaṃ brahmalokānaṃ, mahābrahmābhitiṭṭhati;

    ಉಪಪನ್ನೋ ಜುತಿಮನ್ತೋ, ಭಿಸ್ಮಾಕಾಯೋ ಯಸಸ್ಸಿಸೋ॥

    Upapanno jutimanto, bhismākāyo yasassiso.

    ‘‘ದಸೇತ್ಥ ಇಸ್ಸರಾ ಆಗುಂ, ಪಚ್ಚೇಕವಸವತ್ತಿನೋ।

    ‘‘Dasettha issarā āguṃ, paccekavasavattino;

    ತೇಸಞ್ಚ ಮಜ್ಝತೋ ಆಗ, ಹಾರಿತೋ ಪರಿವಾರಿತೋ॥

    Tesañca majjhato āga, hārito parivārito.

    ೩೪೨.‘‘ತೇ ಚ ಸಬ್ಬೇ ಅಭಿಕ್ಕನ್ತೇ, ಸಇನ್ದೇ 55 ದೇವೇ ಸಬ್ರಹ್ಮಕೇ।

    342.‘‘Te ca sabbe abhikkante, sainde 56 deve sabrahmake.

    ಮಾರಸೇನಾ ಅಭಿಕ್ಕಾಮಿ, ಪಸ್ಸ ಕಣ್ಹಸ್ಸ ಮನ್ದಿಯಂ॥

    Mārasenā abhikkāmi, passa kaṇhassa mandiyaṃ.

    ‘‘‘ಏಥ ಗಣ್ಹಥ ಬನ್ಧಥ, ರಾಗೇನ ಬದ್ಧಮತ್ಥು ವೋ।

    ‘‘‘Etha gaṇhatha bandhatha, rāgena baddhamatthu vo;

    ಸಮನ್ತಾ ಪರಿವಾರೇಥ, ಮಾ ವೋ ಮುಞ್ಚಿತ್ಥ ಕೋಚಿ ನಂ’॥

    Samantā parivāretha, mā vo muñcittha koci naṃ’.

    ‘‘ಇತಿ ತತ್ಥ ಮಹಾಸೇನೋ, ಕಣ್ಹೋ ಸೇನಂ ಅಪೇಸಯಿ।

    ‘‘Iti tattha mahāseno, kaṇho senaṃ apesayi;

    ಪಾಣಿನಾ ತಲಮಾಹಚ್ಚ, ಸರಂ ಕತ್ವಾನ ಭೇರವಂ॥

    Pāṇinā talamāhacca, saraṃ katvāna bheravaṃ.

    ‘‘ಯಥಾ ಪಾವುಸ್ಸಕೋ ಮೇಘೋ, ಥನಯನ್ತೋ ಸವಿಜ್ಜುಕೋ। +

    ‘‘Yathā pāvussako megho, thanayanto savijjuko; +

    ತದಾ ಸೋ ಪಚ್ಚುದಾವತ್ತಿ, ಸಙ್ಕುದ್ಧೋ ಅಸಯಂವಸೇ 57॥

    Tadā so paccudāvatti, saṅkuddho asayaṃvase 58.

    ೩೪೩. ತಞ್ಚ ಸಬ್ಬಂ ಅಭಿಞ್ಞಾಯ, ವವತ್ಥಿತ್ವಾನ ಚಕ್ಖುಮಾ।

    343. Tañca sabbaṃ abhiññāya, vavatthitvāna cakkhumā.

    ತತೋ ಆಮನ್ತಯೀ ಸತ್ಥಾ, ಸಾವಕೇ ಸಾಸನೇ ರತೇ॥

    Tato āmantayī satthā, sāvake sāsane rate.

    ‘‘ಮಾರಸೇನಾ ಅಭಿಕ್ಕನ್ತಾ, ತೇ ವಿಜಾನಾಥ ಭಿಕ್ಖವೋ।

    ‘‘Mārasenā abhikkantā, te vijānātha bhikkhavo;

    ತೇ ಚ ಆತಪ್ಪಮಕರುಂ, ಸುತ್ವಾ ಬುದ್ಧಸ್ಸ ಸಾಸನಂ।

    Te ca ātappamakaruṃ, sutvā buddhassa sāsanaṃ;

    ವೀತರಾಗೇಹಿ ಪಕ್ಕಾಮುಂ, ನೇಸಂ ಲೋಮಾಪಿ ಇಞ್ಜಯುಂ॥

    Vītarāgehi pakkāmuṃ, nesaṃ lomāpi iñjayuṃ.

    ‘‘‘ಸಬ್ಬೇ ವಿಜಿತಸಙ್ಗಾಮಾ, ಭಯಾತೀತಾ ಯಸಸ್ಸಿನೋ।

    ‘‘‘Sabbe vijitasaṅgāmā, bhayātītā yasassino;

    ಮೋದನ್ತಿ ಸಹ ಭೂತೇಹಿ, ಸಾವಕಾ ತೇ ಜನೇಸುತಾ’’ತಿ॥

    Modanti saha bhūtehi, sāvakā te janesutā’’ti.

    ಮಹಾಸಮಯಸುತ್ತಂ ನಿಟ್ಠಿತಂ ಸತ್ತಮಂ।

    Mahāsamayasuttaṃ niṭṭhitaṃ sattamaṃ.




    Next: ೮. ಸಕ್ಕಪಞ್ಹಸುತ್ತಂ • 8. Sakkapañhasuttaṃ




    Footnotes:
    1. ದೇವಾನಂ (ಸೀ॰ ಸ್ಯಾ॰ ಪೀ॰)
    2. ಪಚ್ಚೇಕಗಾಥಂ (ಸೀ॰ ಸ್ಯಾ॰ ಪೀ॰), ಪಚ್ಚೇಕಗಾಥಾ (ಕ॰ ಸೀ॰)
    3. devānaṃ (sī. syā. pī.)
    4. paccekagāthaṃ (sī. syā. pī.), paccekagāthā (ka. sī.)
    5. ಉಜುಕಮಕಂಸು (ಸೀ॰ ಸ್ಯಾ॰ ಪೀ॰)
    6. ujukamakaṃsu (sī. syā. pī.)
    7. ಉಹಚ್ಚ (ಕ॰)
    8. uhacca (ka.)
    9. ( ) ಸೀ॰ ಇಪೋತ್ಥಕೇಸು ನತ್ಥಿ
    10. ಏತಪರಮಾಯೇವ (ಸೀ॰ ಸ್ಯಾ॰ ಪೀ॰)
    11. ( ) sī. ipotthakesu natthi
    12. etaparamāyeva (sī. syā. pī.)
    13. ವಿಪ್ಪಸನ್ನಾಮನಾವಿಲಾ (ಪೀ॰ ಕ॰)
    14. vippasannāmanāvilā (pī. ka.)
    15. ವವಕ್ಖಿತ್ವಾನ (ಸೀ॰ ಸ್ಯಾ॰ ಪೀ॰), ಅವೇಕ್ಖಿತ್ವಾನ (ಟೀಕಾ)
    16. vavakkhitvāna (sī. syā. pī.), avekkhitvāna (ṭīkā)
    17. ಜುತೀಮನ್ತೋ (ಸೀ॰ ಪೀ॰)
    18. jutīmanto (sī. pī.)
    19. ತಪ್ಪಸಾಸತಿ (ಸ್ಯಾ॰)
    20. tappasāsati (syā.)
    21. ದದ್ದಳ್ಹಮಾನಾ (ಕ॰)
    22. daddaḷhamānā (ka.)
    23. ಆಗೂ (ಸ್ಯಾ॰), ಆಗು (ಸೀ॰ ಪೀ॰) ಏವಮುಪರಿಪಿ
    24. āgū (syā.), āgu (sī. pī.) evamuparipi
    25. ವೇಟೇಣ್ಡು (ಸೀ॰ ಸ್ಯಾ॰ ಪೀ॰)
    26. ವಿಟೂ ಚ (ಸ್ಯಾ॰)
    27. veṭeṇḍu (sī. syā. pī.)
    28. viṭū ca (syā.)
    29. ಕಿನ್ನುಘಣ್ಡು (ಸೀ॰ ಸ್ಯಾ॰ ಪೀ॰)
    30. kinnughaṇḍu (sī. syā. pī.)
    31. ಜನೋಸಭೋ (ಸ್ಯಾ॰)
    32. janosabho (syā.)
    33. ಸುರಿಯವಚ್ಚಸಾ (ಸೀ॰ ಪೀ॰)
    34. suriyavaccasā (sī. pī.)
    35. ವೇಹಾಸಯಾ (ಸೀ॰ ಪೀ॰)
    36. vehāsayā (sī. pī.)
    37. ಕಾಲಕಞ್ಜಾ ಮಹಾಭಿಂಸಾ (ಸೀ॰ ಪೀ॰)
    38. kālakañjā mahābhiṃsā (sī. pī.)
    39. ಬಲೀಸೇನಂ (ಸ್ಯಾ॰)
    40. balīsenaṃ (syā.)
    41. ವಾರುಣಾ (ಸ್ಯಾ॰)
    42. vāruṇā (syā.)
    43. ವೇಣ್ಹೂಚ ದೇವಾ ಸಹಲೀಚ (ಸೀ॰ ಪೀ॰)
    44. veṇhūca devā sahalīca (sī. pī.)
    45. ಸುರಿಯಸ್ಸೂಪನಿಸಾ (ಸೀ॰ ಸ್ಯಾ॰ ಪೀ॰)
    46. suriyassūpanisā (sī. syā. pī.)
    47. ಕರುಮ್ಹಾ (ಸೀ॰ ಸ್ಯಾ॰ ಪೀ॰)
    48. karumhā (sī. syā. pī.)
    49. ಆಗಞ್ಛುಂ (ಸೀ॰ ಸ್ಯಾ॰ ಪೀ॰)
    50. āgañchuṃ (sī. syā. pī.)
    51. ಪವುತ್ಥಜಾತಿಂ ಅಖಿಲಂ (ಸೀ॰ ಪೀ॰)
    52. pavutthajātiṃ akhilaṃ (sī. pī.)
    53. ಪರಮತ್ಥೋ ಚ (ಕ॰)
    54. paramattho ca (ka.)
    55. ಸಿನ್ದೇ (ಸ್ಯಾ॰)
    56. sinde (syā.)
    57. ಅಸಯಂವಸೀ (ಸೀ॰ ಪೀ॰)
    58. asayaṃvasī (sī. pī.)



    Related texts:



    ಅಟ್ಠಕಥಾ • Aṭṭhakathā / ಸುತ್ತಪಿಟಕ (ಅಟ್ಠಕಥಾ) • Suttapiṭaka (aṭṭhakathā) / ದೀಘ ನಿಕಾಯ (ಅಟ್ಠಕಥಾ) • Dīgha nikāya (aṭṭhakathā) / ೭. ಮಹಾಸಮಯಸುತ್ತವಣ್ಣನಾ • 7. Mahāsamayasuttavaṇṇanā

    ಟೀಕಾ • Tīkā / ಸುತ್ತಪಿಟಕ (ಟೀಕಾ) • Suttapiṭaka (ṭīkā) / ದೀಘನಿಕಾಯ (ಟೀಕಾ) • Dīghanikāya (ṭīkā) / ೭. ಮಹಾಸಮಯಸುತ್ತವಣ್ಣನಾ • 7. Mahāsamayasuttavaṇṇanā


    © 1991-2023 The Titi Tudorancea Bulletin | Titi Tudorancea® is a Registered Trademark | Terms of use and privacy policy
    Contact