| Library / Tipiṭaka / திபிடக • Tipiṭaka / ஸாரத்த²தீ³பனீ-டீகா • Sāratthadīpanī-ṭīkā |
மஹாஸமுத்³தே³ அட்ட²ச்ச²ரியகதா²வண்ணனா
Mahāsamudde aṭṭhacchariyakathāvaṇṇanā
384. அட்டி²மே, பி⁴க்க²வே, மஹாஸமுத்³தே³தி (உதா³॰ அட்ட²॰ 45) கோ அனுஸந்தி⁴? ய்வாயங் அபரிஸுத்³தா⁴ய பரிஸாய பாதிமொக்க²ஸ்ஸ அனுத்³தே³ஸோ, ஸோ இமஸ்மிங் த⁴ம்மவினயே அச்ச²ரியோ அப்³பு⁴தோ த⁴ம்மோதி தங் அபரேஹி ஸத்தஹி அச்ச²ரியஅப்³பு⁴தத⁴ம்மேஹி ஸத்³தி⁴ங் விப⁴ஜித்வா த³ஸ்ஸேதுகாமோ பட²மங் தாவ தேஸங் உபமாபா⁴வேன மஹாஸமுத்³தே³ அச்ச²ரியஅப்³பு⁴தத⁴ம்மே த³ஸ்ஸெந்தோ ஸத்தா² ‘‘அட்டி²மே, பி⁴க்க²வே, மஹாஸமுத்³தே³’’திஆதி³மாஹ. அஸுராதி தே³வா விய ந ஸுரந்தி ந ஈஸந்தி ந விரோசந்தீதி அஸுரா. ஸுரா நாம தே³வா, தேஸங் படிபக்கா²தி வா அஸுரா, வேபசித்திபஹாராதா³த³யோ. தேஸங் ப⁴வனங் ஸினேருஸ்ஸ ஹெட்டா²பா⁴கே³, தே தத்த² பவிஸந்தா நிக்க²மந்தா ஸினேருபாதே³ மண்ட³பாதீ³னி நிம்மினித்வா கீளந்தாவ அபி⁴ரமந்தி. ஸா தத்த² தேஸங் அபி⁴ரதி இமே கு³ணே தி³ஸ்வாதி ஆஹ ‘‘யே தி³ஸ்வா தி³ஸ்வா அஸுரா மஹாஸமுத்³தே³ அபி⁴ரமந்தீ’’தி. தத்த² அபி⁴ரமந்தீதி ரதிங் விந்த³ந்தி, அனுக்கண்ட²மானா வஸந்தீதி அத்தோ².
384.Aṭṭhime, bhikkhave, mahāsamuddeti (udā. aṭṭha. 45) ko anusandhi? Yvāyaṃ aparisuddhāya parisāya pātimokkhassa anuddeso, so imasmiṃ dhammavinaye acchariyo abbhuto dhammoti taṃ aparehi sattahi acchariyaabbhutadhammehi saddhiṃ vibhajitvā dassetukāmo paṭhamaṃ tāva tesaṃ upamābhāvena mahāsamudde acchariyaabbhutadhamme dassento satthā ‘‘aṭṭhime, bhikkhave, mahāsamudde’’tiādimāha. Asurāti devā viya na suranti na īsanti na virocantīti asurā. Surā nāma devā, tesaṃ paṭipakkhāti vā asurā, vepacittipahārādādayo. Tesaṃ bhavanaṃ sinerussa heṭṭhābhāge, te tattha pavisantā nikkhamantā sinerupāde maṇḍapādīni nimminitvā kīḷantāva abhiramanti. Sā tattha tesaṃ abhirati ime guṇe disvāti āha ‘‘ye disvā disvā asurā mahāsamudde abhiramantī’’ti. Tattha abhiramantīti ratiṃ vindanti, anukkaṇṭhamānā vasantīti attho.
அனுபுப்³ப³னின்னோதிஆதீ³னி ஸப்³பா³னி அனுபடிபாடியா நின்னபா⁴வஸ்ஸேவ வேவசனானி. ந ஆயதகேனேவ பபாதோதி நச்சி²ன்னதடமஹாஸொப்³போ⁴ விய ஆதி³தோ ஏவ பபாதோ. ஸோ ஹி தீரதே³ஸதோ பட்டா²ய ஏகங்கு³லத்³வங்கு³லவித³த்தி²ரதனயட்டி²உஸப⁴அட்³ட⁴கா³வுதகா³வுதஅட்³ட⁴யோஜனயோஜனாதி³வஸேன க³ம்பீ⁴ரோ ஹுத்வா க³ச்ச²ந்தோ க³ச்ச²ந்தோ ஸினேருபாத³மூலே சதுராஸீதியோஜனஸஹஸ்ஸக³ம்பீ⁴ரோ ஹுத்வா டி²தோதி த³ஸ்ஸேதி.
Anupubbaninnotiādīni sabbāni anupaṭipāṭiyā ninnabhāvasseva vevacanāni. Na āyatakeneva papātoti nacchinnataṭamahāsobbho viya ādito eva papāto. So hi tīradesato paṭṭhāya ekaṅguladvaṅgulavidatthiratanayaṭṭhiusabhaaḍḍhagāvutagāvutaaḍḍhayojanayojanādivasena gambhīro hutvā gacchanto gacchanto sinerupādamūle caturāsītiyojanasahassagambhīro hutvā ṭhitoti dasseti.
டி²தத⁴ம்மோதி டி²தஸபா⁴வோ அவட்டி²தஸபா⁴வோ. குணபேனாதி யேன கேனசி ஹத்தி²அஸ்ஸாதி³களேவரேன. வாஹேதீதி ஹத்தே²ன க³ஹெத்வா விய வீசிப்பஹாரேனேவ த²லே கி²பதி. க³ங்கா³ யமுனாதி அனோதத்தத³ஹஸ்ஸ த³க்கி²ணமுக²தோ நிக்க²ந்தனதீ³ பஞ்சதா⁴ரா ஹுத்வா பவத்தட்டா²னே க³ங்கா³திஆதி³னா பஞ்சதா⁴ ஸங்க²ங் க³தா. தத்த² நதீ³ நின்னகா³திஆதி³கங் கொ³த்தங், க³ங்கா³ யமுனாதிஆதி³கங் நாமங். ஸவந்தியோதி யா காசி ஸவமானா ஸந்த³மானா க³ச்ச²ந்தியோ மஹானதி³யோ வா குன்னதி³யோ வா. அப்பெந்தீதி அல்லீயந்தி ஓஸரந்தி. தா⁴ராதி வுட்டி²தா⁴ரா. பூரத்தந்தி புண்ணபா⁴வோ. மஹாஸமுத்³த³ஸ்ஸ ஹி அயங் த⁴ம்மதா – ‘‘இமஸ்மிங் காலே தே³வோ மந்தோ³ ஜாதோ, ஜாலக்கி²பாதீ³னி ஆதா³ய மச்ச²கச்ச²பே க³ண்ஹிஸ்ஸாமீ’’தி வா ‘‘இமஸ்மிங் காலே அதிமஹந்தா வுட்டி², லபி⁴ஸ்ஸாம நு கோ² பிட்டி²பஸாரணட்டா²ன’’ந்தி வா ந ஸக்கா வத்துங். பட²மகப்பிககாலதோ பட்டா²ய ஹி தீரங் ப⁴ஸ்ஸித்வா ஸினேருமேக²லங் ஆஹச்ச உத³கங் டி²தங், ததோ ஏகங்கு³லமத்தம்பி உத³கங் நேவ ஹெட்டா² ஓதரதி, ந உத்³த⁴ங் உத்தரதி. ஏகரஸோதி அஸம்பி⁴ன்னரஸோ.
Ṭhitadhammoti ṭhitasabhāvo avaṭṭhitasabhāvo. Kuṇapenāti yena kenaci hatthiassādikaḷevarena. Vāhetīti hatthena gahetvā viya vīcippahāreneva thale khipati. Gaṅgā yamunāti anotattadahassa dakkhiṇamukhato nikkhantanadī pañcadhārā hutvā pavattaṭṭhāne gaṅgātiādinā pañcadhā saṅkhaṃ gatā. Tattha nadī ninnagātiādikaṃ gottaṃ, gaṅgā yamunātiādikaṃ nāmaṃ. Savantiyoti yā kāci savamānā sandamānā gacchantiyo mahānadiyo vā kunnadiyo vā. Appentīti allīyanti osaranti. Dhārāti vuṭṭhidhārā. Pūrattanti puṇṇabhāvo. Mahāsamuddassa hi ayaṃ dhammatā – ‘‘imasmiṃ kāle devo mando jāto, jālakkhipādīni ādāya macchakacchape gaṇhissāmī’’ti vā ‘‘imasmiṃ kāle atimahantā vuṭṭhi, labhissāma nu kho piṭṭhipasāraṇaṭṭhāna’’nti vā na sakkā vattuṃ. Paṭhamakappikakālato paṭṭhāya hi tīraṃ bhassitvā sinerumekhalaṃ āhacca udakaṃ ṭhitaṃ, tato ekaṅgulamattampi udakaṃ neva heṭṭhā otarati, na uddhaṃ uttarati. Ekarasoti asambhinnaraso.
முத்தாதி கு²த்³த³கமஹந்தவட்டதீ³கா⁴தி³பே⁴தா³ அனேகவித⁴முத்தா. மணீதி ரத்தனீலாதி³பே⁴தோ³ அனேகவிதோ⁴ மணி. வேளுரியோதி வங்ஸவண்ணஸிரீஸபுப்ப²வண்ணாதி³ஸண்டா²னதோ அனேகவிதோ⁴. ஸங்கோ²தி த³க்கி²ணாவட்டகதும்ப³குச்சி²த⁴மனஸங்கா²தி³பே⁴தோ³ அனேகவிதோ⁴. ஸிலாதி ஸேதகாளமுக்³க³வண்ணாதி³பே⁴தா³ அனேகவிதா⁴. பவாளம்பி கு²த்³த³கமஹந்தரத்தக⁴னரத்தாதி³பே⁴த³ங் அனேகவித⁴ங். லோஹிதகோ பது³மராகா³தி³பே⁴தோ³ அனேகவிதோ⁴. மஸாரக³ல்லங் கப³ரமணி. சித்தப²லிகந்திபி வத³ந்தி. மஹதங் பூ⁴தானந்தி மஹந்தானங் ஸத்தானங். திமி திமிங்க³லோ திமிதிமிங்க³லோதி திஸ்ஸோ மச்ச²ஜாதியோ. திமிங் கி³லனஸமத்தோ² திமிங்க³லோ, திமிஞ்ச திமிங்க³லஞ்ச கி³லனஸமத்தோ² திமிதிமிங்க³லோதி வத³ந்தி. நாகா³தி ஊமிபிட்டி²வாஸினோபி விமானட்ட²கனாகா³பி.
Muttāti khuddakamahantavaṭṭadīghādibhedā anekavidhamuttā. Maṇīti rattanīlādibhedo anekavidho maṇi. Veḷuriyoti vaṃsavaṇṇasirīsapupphavaṇṇādisaṇṭhānato anekavidho. Saṅkhoti dakkhiṇāvaṭṭakatumbakucchidhamanasaṅkhādibhedo anekavidho. Silāti setakāḷamuggavaṇṇādibhedā anekavidhā. Pavāḷampi khuddakamahantarattaghanarattādibhedaṃ anekavidhaṃ. Lohitako padumarāgādibhedo anekavidho. Masāragallaṃ kabaramaṇi. Cittaphalikantipi vadanti. Mahataṃ bhūtānanti mahantānaṃ sattānaṃ. Timi timiṅgalo timitimiṅgaloti tisso macchajātiyo. Timiṃ gilanasamattho timiṅgalo, timiñca timiṅgalañca gilanasamattho timitimiṅgaloti vadanti. Nāgāti ūmipiṭṭhivāsinopi vimānaṭṭhakanāgāpi.
Related texts:
திபிடக (மூல) • Tipiṭaka (Mūla) / வினயபிடக • Vinayapiṭaka / சூளவக்³க³பாளி • Cūḷavaggapāḷi / 2. மஹாஸமுத்³தே³அட்ட²ச்ச²ரியங் • 2. Mahāsamuddeaṭṭhacchariyaṃ
அட்ட²கதா² • Aṭṭhakathā / வினயபிடக (அட்ட²கதா²) • Vinayapiṭaka (aṭṭhakathā) / சூளவக்³க³-அட்ட²கதா² • Cūḷavagga-aṭṭhakathā / பாதிமொக்கு²த்³தே³ஸயாசனகதா² • Pātimokkhuddesayācanakathā
டீகா • Tīkā / வினயபிடக (டீகா) • Vinayapiṭaka (ṭīkā) / வஜிரபு³த்³தி⁴-டீகா • Vajirabuddhi-ṭīkā / பாதிமொக்கு²த்³தே³ஸயாசனகதா²வண்ணனா • Pātimokkhuddesayācanakathāvaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / விமதிவினோத³னீ-டீகா • Vimativinodanī-ṭīkā / பாதிமொக்கு²த்³தே³ஸயாசனகதா²வண்ணனா • Pātimokkhuddesayācanakathāvaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / பாசித்யாதி³யோஜனாபாளி • Pācityādiyojanāpāḷi / 1. பாதிமொக்கு²த்³தே³ஸயாசனகதா² • 1. Pātimokkhuddesayācanakathā
