| Library / Tipiṭaka / д̇ибидага • Tipiṭaka / саарад̇т̇ад̣̇ийбаний-дийгаа • Sāratthadīpanī-ṭīkā |
махаасамуд̣̇д̣̇з адтажчарияагат̇ааван̣н̣анаа
Mahāsamudde aṭṭhacchariyakathāvaṇṇanā
384. адтимз, бхигкавз, махаасамуд̣̇д̣̇зд̇и (уд̣̇аа. адта. 45) го анусанд̇хи? явааяам̣ абарисуд̣̇д̇хааяа барисааяа баад̇имогкасса ануд̣̇д̣̇зсо, со имасмим̣ д̇хаммавинаяз ажчарияо аб̣бхуд̇о д̇хаммод̇и д̇ам̣ абарзхи сад̇д̇ахи ажчарияааб̣бхуд̇ад̇хаммзхи сад̣̇д̇хим̣ вибхаж̇ид̇ваа д̣̇ассзд̇угаамо батамам̣ д̇аава д̇зсам̣ убамаабхаавзна махаасамуд̣̇д̣̇з ажчарияааб̣бхуд̇ад̇хаммз д̣̇ассзнд̇о сад̇т̇аа ‘‘адтимз, бхигкавз, махаасамуд̣̇д̣̇з’’д̇иаад̣̇имааха. асураад̇и д̣̇зваа вияа на суранд̇и на ийсанд̇и на вирожанд̇ийд̇и асураа. сураа наама д̣̇зваа, д̇зсам̣ бадибагкаад̇и ваа асураа, взбажид̇д̇ибахаараад̣̇аад̣̇аяо. д̇зсам̣ бхаванам̣ синзрусса хздтаабхааг̇з, д̇з д̇ад̇т̇а бависанд̇аа нигкаманд̇аа синзрубаад̣̇з ман̣д̣абаад̣̇ийни нимминид̇ваа гийл̣анд̇аава абхираманд̇и. саа д̇ад̇т̇а д̇зсам̣ абхирад̇и имз г̇ун̣з д̣̇исваад̇и ааха ‘‘яз д̣̇исваа д̣̇исваа асураа махаасамуд̣̇д̣̇з абхираманд̇ий’’д̇и. д̇ад̇т̇а абхираманд̇ийд̇и рад̇им̣ винд̣̇анд̇и, анугган̣тамаанаа васанд̇ийд̇и ад̇т̇о.
384.Aṭṭhime, bhikkhave, mahāsamuddeti (udā. aṭṭha. 45) ko anusandhi? Yvāyaṃ aparisuddhāya parisāya pātimokkhassa anuddeso, so imasmiṃ dhammavinaye acchariyo abbhuto dhammoti taṃ aparehi sattahi acchariyaabbhutadhammehi saddhiṃ vibhajitvā dassetukāmo paṭhamaṃ tāva tesaṃ upamābhāvena mahāsamudde acchariyaabbhutadhamme dassento satthā ‘‘aṭṭhime, bhikkhave, mahāsamudde’’tiādimāha. Asurāti devā viya na suranti na īsanti na virocantīti asurā. Surā nāma devā, tesaṃ paṭipakkhāti vā asurā, vepacittipahārādādayo. Tesaṃ bhavanaṃ sinerussa heṭṭhābhāge, te tattha pavisantā nikkhamantā sinerupāde maṇḍapādīni nimminitvā kīḷantāva abhiramanti. Sā tattha tesaṃ abhirati ime guṇe disvāti āha ‘‘ye disvā disvā asurā mahāsamudde abhiramantī’’ti. Tattha abhiramantīti ratiṃ vindanti, anukkaṇṭhamānā vasantīti attho.
анубуб̣б̣аниннод̇иаад̣̇ийни саб̣б̣аани анубадибаадияаа ниннабхаавассзва взважанаани. на ааяад̇агзнзва бабаад̇од̇и нажчиннад̇адамахаасоб̣бхо вияа аад̣̇ид̇о зва бабаад̇о. со хи д̇ийрад̣̇зсад̇о бадтааяа зган̇г̇улад̣̇ван̇г̇улавид̣̇ад̇т̇ирад̇анаяадтиусабхаад̣дхаг̇аавуд̇аг̇аавуд̇аад̣дхаяож̇анаяож̇анаад̣̇ивасзна г̇амбхийро худ̇ваа г̇ажчанд̇о г̇ажчанд̇о синзрубаад̣̇амуулз жад̇ураасийд̇ияож̇анасахассаг̇амбхийро худ̇ваа тид̇од̇и д̣̇ассзд̇и.
Anupubbaninnotiādīni sabbāni anupaṭipāṭiyā ninnabhāvasseva vevacanāni. Na āyatakeneva papātoti nacchinnataṭamahāsobbho viya ādito eva papāto. So hi tīradesato paṭṭhāya ekaṅguladvaṅgulavidatthiratanayaṭṭhiusabhaaḍḍhagāvutagāvutaaḍḍhayojanayojanādivasena gambhīro hutvā gacchanto gacchanto sinerupādamūle caturāsītiyojanasahassagambhīro hutvā ṭhitoti dasseti.
тид̇ад̇хаммод̇и тид̇асабхааво авадтид̇асабхааво. гун̣абзнаад̇и язна гзнажи хад̇т̇иассаад̣̇игал̣зварзна. ваахзд̇ийд̇и хад̇т̇зна г̇ахзд̇ваа вияа вийжиббахаарзнзва т̇алз кибад̇и. г̇ан̇г̇аа яамунаад̇и анод̇ад̇д̇ад̣̇ахасса д̣̇агкин̣амукад̇о нигканд̇анад̣̇ий бан̃жад̇хаараа худ̇ваа бавад̇д̇адтаанз г̇ан̇г̇аад̇иаад̣̇инаа бан̃жад̇хаа сан̇кам̣ г̇ад̇аа. д̇ад̇т̇а над̣̇ий ниннаг̇аад̇иаад̣̇игам̣ г̇од̇д̇ам̣, г̇ан̇г̇аа яамунаад̇иаад̣̇игам̣ наамам̣. саванд̇ияод̇и яаа гаажи савамаанаа санд̣̇амаанаа г̇ажчанд̇ияо махаанад̣̇ияо ваа гуннад̣̇ияо ваа. аббзнд̇ийд̇и аллийяанд̇и осаранд̇и. д̇хаараад̇и вудтид̇хаараа. буурад̇д̇анд̇и бун̣н̣абхааво. махаасамуд̣̇д̣̇асса хи аяам̣ д̇хаммад̇аа – ‘‘имасмим̣ гаалз д̣̇зво манд̣̇о ж̇аад̇о, ж̇аалагкибаад̣̇ийни аад̣̇ааяа мажчагажчабз г̇ан̣хиссаамий’’д̇и ваа ‘‘имасмим̣ гаалз ад̇имаханд̇аа вудти, лабхиссаама ну ко бидтибасааран̣адтаана’’нд̇и ваа на саггаа вад̇д̇ум̣. батамагаббигагаалад̇о бадтааяа хи д̇ийрам̣ бхассид̇ваа синзрумзкалам̣ аахажжа уд̣̇агам̣ тид̇ам̣, д̇ад̇о зган̇г̇уламад̇д̇амби уд̣̇агам̣ нзва хздтаа од̇арад̇и, на уд̣̇д̇хам̣ уд̇д̇арад̇и. згарасод̇и асамбхиннарасо.
Ṭhitadhammoti ṭhitasabhāvo avaṭṭhitasabhāvo. Kuṇapenāti yena kenaci hatthiassādikaḷevarena. Vāhetīti hatthena gahetvā viya vīcippahāreneva thale khipati. Gaṅgā yamunāti anotattadahassa dakkhiṇamukhato nikkhantanadī pañcadhārā hutvā pavattaṭṭhāne gaṅgātiādinā pañcadhā saṅkhaṃ gatā. Tattha nadī ninnagātiādikaṃ gottaṃ, gaṅgā yamunātiādikaṃ nāmaṃ. Savantiyoti yā kāci savamānā sandamānā gacchantiyo mahānadiyo vā kunnadiyo vā. Appentīti allīyanti osaranti. Dhārāti vuṭṭhidhārā. Pūrattanti puṇṇabhāvo. Mahāsamuddassa hi ayaṃ dhammatā – ‘‘imasmiṃ kāle devo mando jāto, jālakkhipādīni ādāya macchakacchape gaṇhissāmī’’ti vā ‘‘imasmiṃ kāle atimahantā vuṭṭhi, labhissāma nu kho piṭṭhipasāraṇaṭṭhāna’’nti vā na sakkā vattuṃ. Paṭhamakappikakālato paṭṭhāya hi tīraṃ bhassitvā sinerumekhalaṃ āhacca udakaṃ ṭhitaṃ, tato ekaṅgulamattampi udakaṃ neva heṭṭhā otarati, na uddhaṃ uttarati. Ekarasoti asambhinnaraso.
муд̇д̇аад̇и куд̣̇д̣̇агамаханд̇аваддад̣̇ийгхаад̣̇ибхзд̣̇аа анзгавид̇хамуд̇д̇аа. ман̣ийд̇и рад̇д̇анийлаад̣̇ибхзд̣̇о анзгавид̇хо ман̣и. взл̣урияод̇и вам̣саван̣н̣асирийсабубпаван̣н̣аад̣̇исан̣таанад̇о анзгавид̇хо. сан̇код̇и д̣̇агкин̣ааваддагад̇умб̣агужчид̇хаманасан̇каад̣̇ибхзд̣̇о анзгавид̇хо. силаад̇и сзд̇агаал̣амуг̇г̇аван̣н̣аад̣̇ибхзд̣̇аа анзгавид̇хаа. баваал̣амби куд̣̇д̣̇агамаханд̇арад̇д̇агханарад̇д̇аад̣̇ибхзд̣̇ам̣ анзгавид̇хам̣. лохид̇аго бад̣̇умарааг̇аад̣̇ибхзд̣̇о анзгавид̇хо. масаараг̇аллам̣ габ̣араман̣и. жид̇д̇апалиганд̇иби вад̣̇анд̇и. махад̇ам̣ бхууд̇аананд̇и маханд̇аанам̣ сад̇д̇аанам̣. д̇ими д̇имин̇г̇ало д̇имид̇имин̇г̇алод̇и д̇иссо мажчаж̇аад̇ияо. д̇имим̣ г̇иланасамад̇т̇о д̇имин̇г̇ало, д̇имин̃жа д̇имин̇г̇алан̃жа г̇иланасамад̇т̇о д̇имид̇имин̇г̇алод̇и вад̣̇анд̇и. нааг̇аад̇и уумибидтиваасиноби вимаанадтаганааг̇ааби.
Muttāti khuddakamahantavaṭṭadīghādibhedā anekavidhamuttā. Maṇīti rattanīlādibhedo anekavidho maṇi. Veḷuriyoti vaṃsavaṇṇasirīsapupphavaṇṇādisaṇṭhānato anekavidho. Saṅkhoti dakkhiṇāvaṭṭakatumbakucchidhamanasaṅkhādibhedo anekavidho. Silāti setakāḷamuggavaṇṇādibhedā anekavidhā. Pavāḷampi khuddakamahantarattaghanarattādibhedaṃ anekavidhaṃ. Lohitako padumarāgādibhedo anekavidho. Masāragallaṃ kabaramaṇi. Cittaphalikantipi vadanti. Mahataṃ bhūtānanti mahantānaṃ sattānaṃ. Timi timiṅgalo timitimiṅgaloti tisso macchajātiyo. Timiṃ gilanasamattho timiṅgalo, timiñca timiṅgalañca gilanasamattho timitimiṅgaloti vadanti. Nāgāti ūmipiṭṭhivāsinopi vimānaṭṭhakanāgāpi.
Related texts:
д̇ибидага (муула) • Tipiṭaka (Mūla) / винаяабидага • Vinayapiṭaka / жуул̣аваг̇г̇абаал̣и • Cūḷavaggapāḷi / 2. махаасамуд̣̇д̣̇задтажчарияам̣ • 2. Mahāsamuddeaṭṭhacchariyaṃ
адтагат̇аа • Aṭṭhakathā / винаяабидага (адтагат̇аа) • Vinayapiṭaka (aṭṭhakathā) / жуул̣аваг̇г̇а-адтагат̇аа • Cūḷavagga-aṭṭhakathā / баад̇имогкуд̣̇д̣̇зсаяаажанагат̇аа • Pātimokkhuddesayācanakathā
дийгаа • Tīkā / винаяабидага (дийгаа) • Vinayapiṭaka (ṭīkā) / важ̇ираб̣уд̣̇д̇хи-дийгаа • Vajirabuddhi-ṭīkā / баад̇имогкуд̣̇д̣̇зсаяаажанагат̇ааван̣н̣анаа • Pātimokkhuddesayācanakathāvaṇṇanā
дийгаа • Tīkā / винаяабидага (дийгаа) • Vinayapiṭaka (ṭīkā) / вимад̇ивинод̣̇аний-дийгаа • Vimativinodanī-ṭīkā / баад̇имогкуд̣̇д̣̇зсаяаажанагат̇ааван̣н̣анаа • Pātimokkhuddesayācanakathāvaṇṇanā
дийгаа • Tīkā / винаяабидага (дийгаа) • Vinayapiṭaka (ṭīkā) / баажид̇яаад̣̇ияож̇анаабаал̣и • Pācityādiyojanāpāḷi / 1. баад̇имогкуд̣̇д̣̇зсаяаажанагат̇аа • 1. Pātimokkhuddesayācanakathā
