| Library / Tipiṭaka / திபிடக • Tipiṭaka / மஜ்ஜி²மனிகாய (டீகா) • Majjhimanikāya (ṭīkā) |
9. மஹாஸாரோபமஸுத்தவண்ணனா
9. Mahāsāropamasuttavaṇṇanā
307. நசிரபக்கந்தேதி ந சிரங் பக்கந்தே, பக்கந்தஸ்ஸ ஸதோ ந சிரஸ்ஸேவ. ஸலிங்கே³னேவாதி முண்டி³யகாஸாயக்³க³ஹணாதி³னா அத்தனோ புரிமலிங்கே³னேவ. பாடியேக்கே ஜாதேதி விபன்னாசாரதி³ட்டி²தாய பகாஸனீயகம்மகரணதோ பரங் அஞ்ஞதித்தி²யஸதி³ஸே விஸுங் பூ⁴தே. குலபுத்தோதி ஜாதிமத்தேன குலபுத்தோ. அஸம்பி⁴ன்னாயாதி ஸம்பே⁴த³ரஹிதாய, ஜாதிஸங்கரவிரஹிதாயாதி அத்தோ. ஜாதிஸீஸேன இத⁴ ஜாதிவத்து²கங் து³க்க²ங் வுத்தந்தி ஆஹ ‘‘ஓதிண்ணோதி யஸ்ஸ ஜாதி அந்தோ அனுபவிட்டா²’’தி. ஜாதோ ஹி ஸத்தோ ஜாதகாலதோ பட்டா²ய ஜாதினிமித்தேன து³க்கே²ன அந்தோ அனுபவிட்டோ² விய விபா³தீ⁴யதி. ஜராயாதிஆதீ³ஸுபி ஏஸேவ நயோ. சத்தாரோ பச்சயா லப்³ப⁴ந்தீதி லாபா⁴, சதுன்னங் பச்சயானங் லப்³ப⁴மானானங் ஸுகதபா⁴வோ ஸுட்டு² அபி⁴ஸங்க²தபா⁴வோ. வண்ணப⁴ணனந்தி கு³ணகித்தனங். அபஞ்ஞாதாதி ஸம்பா⁴வனாவஸேன ந பஞ்ஞாதா. லாபா⁴தி³னிப்³ப³த்தியாபா⁴வத³ஸ்ஸனஞ்ஹேதங். தேனாஹ ‘‘கா⁴ஸச்சா²த³னமத்தம்பி ந லப⁴ந்தீ’’தி. அப்பேஸக்கா²தி அப்பானுபா⁴வா. ஸா பன அப்பேஸக்க²தா அதி⁴பதெய்யஸம்பத்தியா ச பரிவாரஸம்பத்தியா ச அபா⁴வேன பாகடா ஹோதி. தத்த² பரிவாரஸம்பத்தியா அபா⁴வங் த³ஸ்ஸெந்தோ ‘‘அப்பபரிவாரா’’தி ஆஹ.
307.Nacirapakkanteti na ciraṃ pakkante, pakkantassa sato na cirasseva. Saliṅgenevāti muṇḍiyakāsāyaggahaṇādinā attano purimaliṅgeneva. Pāṭiyekke jāteti vipannācāradiṭṭhitāya pakāsanīyakammakaraṇato paraṃ aññatitthiyasadise visuṃ bhūte. Kulaputtoti jātimattena kulaputto. Asambhinnāyāti sambhedarahitāya, jātisaṅkaravirahitāyāti atto. Jātisīsena idha jātivatthukaṃ dukkhaṃ vuttanti āha ‘‘otiṇṇoti yassa jāti anto anupaviṭṭhā’’ti. Jāto hi satto jātakālato paṭṭhāya jātinimittena dukkhena anto anupaviṭṭho viya vibādhīyati. Jarāyātiādīsupi eseva nayo. Cattāro paccayā labbhantīti lābhā, catunnaṃ paccayānaṃ labbhamānānaṃ sukatabhāvo suṭṭhu abhisaṅkhatabhāvo. Vaṇṇabhaṇananti guṇakittanaṃ. Apaññātāti sambhāvanāvasena na paññātā. Lābhādinibbattiyābhāvadassanañhetaṃ. Tenāha ‘‘ghāsacchādanamattampi na labhantī’’ti. Appesakkhāti appānubhāvā. Sā pana appesakkhatā adhipateyyasampattiyā ca parivārasampattiyā ca abhāvena pākaṭā hoti. Tattha parivārasampattiyā abhāvaṃ dassento ‘‘appaparivārā’’ti āha.
ஸாரேனபி கேசி அஜானநேன அஞ்ஞாலாபே⁴ன வா அஸாரபூ⁴தம்பி கத்தப்³ப³ங் கரொந்தீதி ததோ விஸேஸனத்த²ங் ‘‘ஸாரேன ஸாரகரணீய’’ந்தி வுத்தந்தி தங் த³ஸ்ஸெந்தோ ‘‘அக்க²சக்கயுக³னங்க³லாதி³க’’ந்தி ஆஹ. ப்³ரஹ்மசரியஸ்ஸாதி ஸிக்கா²த்தயஸங்க³ஹஸ்ஸ ஸாஸனப்³ரஹ்மசரியஸ்ஸ. மஹாருக்க²ஸ்ஸ மக்³க³ப²லஸாரஸ்ஸ ஞாணத³ஸ்ஸனபெ²க்³கு³கஸ்ஸ ஸமாதி⁴தசஸ்ஸ ஸீலபபடிகஸ்ஸ சஞ்சலஸபா⁴வா ஸங்ஸப்பசாரீதி ச சத்தாரோ பச்சயா ஸாகா²பலாஸங் நாம. தேனேவாதி லாப⁴ஸக்காரஸிலோகனிப்³ப³த்தனேனேவ. ஸாரோ மே பத்தோதி இமஸ்மிங் ஸாஸனே அதி⁴க³ந்தப்³ப³ஸாரோ நாம இமினா லாபா⁴தி³னிப்³ப³த்தனேன அனுப்பத்தோதி வோஸானங் நிட்டி²தகிச்சங் ஆபன்னோ.
Sārenapi keci ajānanena aññālābhena vā asārabhūtampi kattabbaṃ karontīti tato visesanatthaṃ ‘‘sārena sārakaraṇīya’’nti vuttanti taṃ dassento ‘‘akkhacakkayuganaṅgalādika’’nti āha. Brahmacariyassāti sikkhāttayasaṅgahassa sāsanabrahmacariyassa. Mahārukkhassa maggaphalasārassa ñāṇadassanapheggukassa samādhitacassa sīlapapaṭikassa cañcalasabhāvā saṃsappacārīti ca cattāro paccayā sākhāpalāsaṃ nāma. Tenevāti lābhasakkārasilokanibbattaneneva. Sāro me pattoti imasmiṃ sāsane adhigantabbasāro nāma iminā lābhādinibbattanena anuppattoti vosānaṃ niṭṭhitakiccaṃ āpanno.
310. ஞாணத³ஸ்ஸனந்தி ஞாணபூ⁴தங் த³ஸ்ஸனங் விஸயஸ்ஸ ஸச்சி²கரணவஸேன பவத்தங் அபி⁴ஞ்ஞாஞாணங். ஸுகு²மங் ரூபந்தி தே³வாதீ³னங், அஞ்ஞம்பி வா ஸுகு²மஸபா⁴வங் ரூபங். தேனாஹ ‘‘அந்தமஸோ…பே॰… விஹரந்தீ’’தி, தி³ப்³ப³சக்கு² ஹி இத⁴ உக்கட்ட²னித்³தே³ஸேன ‘‘ஞாணத³ஸ்ஸன’’ந்தி க³ஹிதங்.
310.Ñāṇadassananti ñāṇabhūtaṃ dassanaṃ visayassa sacchikaraṇavasena pavattaṃ abhiññāñāṇaṃ. Sukhumaṃ rūpanti devādīnaṃ, aññampi vā sukhumasabhāvaṃ rūpaṃ. Tenāha ‘‘antamaso…pe… viharantī’’ti, dibbacakkhu hi idha ukkaṭṭhaniddesena ‘‘ñāṇadassana’’nti gahitaṃ.
311. அஸமயவிமொக்க²ங் ஆராதே⁴தீதி எத்த² அதி⁴ப்பேதங் அஸமயவிமொக்க²ங் பாளியா ஏவ த³ஸ்ஸேதுங் ‘‘கதமோ அஸமயவிமொக்கோ²’’திஆதி³ வுத்தங். அட்ட²ன்னஞ்ஹி ஸமாபஜ்ஜனஸமயோபி அத்தி² அஸமயோபி, மக்³க³விமொக்கே²ன பன விமுச்சனஸ்ஸ ஸமயோ வா அஸமயோ வா நத்தி². யஸ்ஸ ஸத்³தா⁴ ப³லவதீ, விபஸ்ஸனா ச ஆரத்³தா⁴, தஸ்ஸ க³ச்ச²ந்தஸ்ஸ திட்ட²ந்தஸ்ஸ நிஸீத³ந்தஸ்ஸ பு⁴ஞ்ஜந்தஸ்ஸ ச மக்³க³ப²லபடிவேதோ⁴ நாம ந ஹோதீதி ந வத்தப்³ப³ங், இதி மக்³க³விமொக்கே²ன விமுச்சந்தஸ்ஸ ஸமயோ வா அஸமயோ வா நத்தீ²தி ஸோ அஸமயவிமொக்கோ². தேனாஹ ‘‘லோகியஸமாபத்தியோ ஹீ’’திஆதி³.
311.Asamayavimokkhaṃārādhetīti ettha adhippetaṃ asamayavimokkhaṃ pāḷiyā eva dassetuṃ ‘‘katamo asamayavimokkho’’tiādi vuttaṃ. Aṭṭhannañhi samāpajjanasamayopi atthi asamayopi, maggavimokkhena pana vimuccanassa samayo vā asamayo vā natthi. Yassa saddhā balavatī, vipassanā ca āraddhā, tassa gacchantassa tiṭṭhantassa nisīdantassa bhuñjantassa ca maggaphalapaṭivedho nāma na hotīti na vattabbaṃ, iti maggavimokkhena vimuccantassa samayo vā asamayo vā natthīti so asamayavimokkho. Tenāha ‘‘lokiyasamāpattiyo hī’’tiādi.
ந குப்பதி, ந நஸ்ஸதீதி அகுப்பா, கதா³சிபி அபரிஹானஸபா⁴வா. ஸப்³ப³ஸங்கிலேஸேஹி படிப்பஸ்ஸத்³தி⁴வஸேன சேதஸோ விமுத்தீதி சேதோவிமுத்தி. தேனாஹ ‘‘அரஹத்தப²லவிமுத்தீ’’தி. அயமத்தோ² பயோஜனங் ஏதஸ்ஸாதி ஏதத³த்த²ங், ஸாஸனப்³ரஹ்மசரியங், தஸ்ஸ ஏஸா பரமகோடி. யதா²ரத்³த⁴ஸ்ஸ ஸாரோபமேன ப²லேன தே³ஸனா நிட்டா²பிதாதி ஆஹ ‘‘யதா²னுஸந்தி⁴னாவ தே³ஸனங் நிட்ட²பேஸீ’’தி. யங் பனெத்த² அத்த²தோ அவிப⁴த்தங், தங் ஸுவிஞ்ஞெய்யமேவ.
Na kuppati, na nassatīti akuppā, kadācipi aparihānasabhāvā. Sabbasaṃkilesehi paṭippassaddhivasena cetaso vimuttīti cetovimutti. Tenāha ‘‘arahattaphalavimuttī’’ti. Ayamattho payojanaṃ etassāti etadatthaṃ, sāsanabrahmacariyaṃ, tassa esā paramakoṭi. Yathāraddhassa sāropamena phalena desanā niṭṭhāpitāti āha ‘‘yathānusandhināva desanaṃ niṭṭhapesī’’ti. Yaṃ panettha atthato avibhattaṃ, taṃ suviññeyyameva.
மஹாஸாரோபமஸுத்தவண்ணனாய லீனத்த²ப்பகாஸனா ஸமத்தா.
Mahāsāropamasuttavaṇṇanāya līnatthappakāsanā samattā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / மஜ்ஜி²மனிகாய • Majjhimanikāya / 9. மஹாஸாரோபமஸுத்தங் • 9. Mahāsāropamasuttaṃ
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / மஜ்ஜி²மனிகாய (அட்ட²கதா²) • Majjhimanikāya (aṭṭhakathā) / 9. மஹாஸாரோபமஸுத்தவண்ணனா • 9. Mahāsāropamasuttavaṇṇanā
