| Library / Tipiṭaka / তিপিটক • Tipiṭaka / মজ্ঝিমনিকায (অট্ঠকথা) • Majjhimanikāya (aṭṭhakathā) |
৯. মহাসারোপমসুত্তৰণ্ণনা
9. Mahāsāropamasuttavaṇṇanā
৩০৭. এৰং মে সুতন্তি মহাসারোপমসুত্তং। তত্থ অচিরপক্কন্তেতি সঙ্ঘং ভিন্দিত্ৰা রুহিরুপ্পাদকম্মং কত্ৰা নচিরপক্কন্তে সলিঙ্গেনেৰ পাটিযেক্কে জাতে।
307.Evaṃme sutanti mahāsāropamasuttaṃ. Tattha acirapakkanteti saṅghaṃ bhinditvā ruhiruppādakammaṃ katvā nacirapakkante saliṅgeneva pāṭiyekke jāte.
ইধ, ভিক্খৰে, একচ্চো কুলপুত্তোতি কিঞ্চাপি অসুককুলপুত্তোতি ন নিযামিতো, দেৰদত্তংযেৰ পন সন্ধায ইদং ৰুত্তন্তি ৰেদিতব্বং। সো হি অসম্ভিন্নায মহাসম্মতপৰেণিযা ওক্কাকৰংসে জাতত্তা জাতিকুলপুত্তো। ওতিণ্ণোতি যস্স জাতি অন্তো অনুপৰিট্ঠা, সো জাতিযা ওতিণ্ণো নাম। জরাদীসুপি এসেৰ নযো। লাভসক্কারাদীসুপি লাভোতি চত্তারো পচ্চযা। সক্কারোতি তেসংযেৰ সুকতভাৰো। সিলোকোতি ৰণ্ণভণনং। অভিনিব্বত্তেতীতি উপ্পাদেতি। অপঞ্ঞাতাতি দ্ৰিন্নং জনানং ঠিতট্ঠানে ন পঞ্ঞাযন্তি, ঘাসচ্ছাদনমত্তম্পি ন লভন্তি। অপ্পেসক্খাতি অপ্পপরিৰারা, পুরতো ৰা পচ্ছতো ৰা গচ্ছন্তং ন লভন্তি।
Idha, bhikkhave, ekacco kulaputtoti kiñcāpi asukakulaputtoti na niyāmito, devadattaṃyeva pana sandhāya idaṃ vuttanti veditabbaṃ. So hi asambhinnāya mahāsammatapaveṇiyā okkākavaṃse jātattā jātikulaputto. Otiṇṇoti yassa jāti anto anupaviṭṭhā, so jātiyā otiṇṇo nāma. Jarādīsupi eseva nayo. Lābhasakkārādīsupi lābhoti cattāro paccayā. Sakkāroti tesaṃyeva sukatabhāvo. Silokoti vaṇṇabhaṇanaṃ. Abhinibbattetīti uppādeti. Apaññātāti dvinnaṃ janānaṃ ṭhitaṭṭhāne na paññāyanti, ghāsacchādanamattampi na labhanti. Appesakkhāti appaparivārā, purato vā pacchato vā gacchantaṃ na labhanti.
সারেন সারকরণীযন্তি রুক্খসারেন কত্তব্বং অক্খচক্কযুগনঙ্গলাদিকং যংকিঞ্চি। সাখাপলাসং অগ্গহেসি ব্রহ্মচরিযস্সাতি মগ্গফলসারস্স সাসনব্রহ্মচরিযস্স চত্তারো পচ্চযা সাখাপলাসং নাম, তং অগ্গহেসি। তেন চ ৰোসানং আপাদীতি তেনেৰ চ অলমেত্তাৰতা সারো মে পত্তোতি ৰোসানং আপন্নো।
Sārena sārakaraṇīyanti rukkhasārena kattabbaṃ akkhacakkayuganaṅgalādikaṃ yaṃkiñci. Sākhāpalāsaṃ aggahesi brahmacariyassāti maggaphalasārassa sāsanabrahmacariyassa cattāro paccayā sākhāpalāsaṃ nāma, taṃ aggahesi. Tena ca vosānaṃ āpādīti teneva ca alamettāvatā sāro me pattoti vosānaṃ āpanno.
৩১০. ঞাণদস্সনং আরাধেতীতি দেৰদত্তো পঞ্চাভিঞ্ঞো, দিব্বচক্খু চ পঞ্চন্নং অভিঞ্ঞানং মত্থকে ঠিতং, তং ইমস্মিং সুত্তে ‘‘ঞাণদস্সন’’ন্তি ৰুত্তং । অজানং অপস্সং ৰিহরন্তীতি কিঞ্চি সুখুমং রূপং অজানন্তা অন্তমসো পংসুপিসাচকম্পি অপস্সন্তা ৰিহরন্তি।
310.Ñāṇadassanaṃ ārādhetīti devadatto pañcābhiñño, dibbacakkhu ca pañcannaṃ abhiññānaṃ matthake ṭhitaṃ, taṃ imasmiṃ sutte ‘‘ñāṇadassana’’nti vuttaṃ . Ajānaṃ apassaṃ viharantīti kiñci sukhumaṃ rūpaṃ ajānantā antamaso paṃsupisācakampi apassantā viharanti.
৩১১. অসমযৰিমোক্খং আরাধেতীতি, ‘‘কতমো অসমযৰিমোক্খো? চত্তারো চ অরিযমগ্গা চত্তারি চ সামঞ্ঞফলানি, নিব্বানঞ্চ, অযং অসমযৰিমোক্খো’’তি (পটি॰ ম॰ ১.২১৩) এৰং ৰুত্তে নৰলোকুত্তরধম্মে আরাধেতি সম্পাদেতি পটিলভতি। লোকিযসমাপত্তিযো হি অপ্পিতপ্পিতক্খণেযেৰ পচ্চনীকধম্মেহি ৰিমুচ্চন্তি, তস্মা, ‘‘কতমো সমযৰিমোক্খো? চত্তারি চ ঝানানি চতস্সো চ অরূপাৰচরসমাপত্তিযো, অযং সমযৰিমোক্খো’’তি এৰং সমযৰিমোক্খোতি ৰুত্তা। লোকুত্তরধম্মা পন কালেন কালং ৰিমুচ্চন্তি, সকিং ৰিমুত্তানি হি মগ্গফলানি ৰিমুত্তানেৰ হোন্তি। নিব্বানং সব্বকিলেসেহি অচ্চন্তং ৰিমুত্তমেৰাতি ইমে নৰ ধম্মা অসমযৰিমোক্খোতি ৰুত্তা।
311.Asamayavimokkhaṃ ārādhetīti, ‘‘katamo asamayavimokkho? Cattāro ca ariyamaggā cattāri ca sāmaññaphalāni, nibbānañca, ayaṃ asamayavimokkho’’ti (paṭi. ma. 1.213) evaṃ vutte navalokuttaradhamme ārādheti sampādeti paṭilabhati. Lokiyasamāpattiyo hi appitappitakkhaṇeyeva paccanīkadhammehi vimuccanti, tasmā, ‘‘katamo samayavimokkho? Cattāri ca jhānāni catasso ca arūpāvacarasamāpattiyo, ayaṃ samayavimokkho’’ti evaṃ samayavimokkhoti vuttā. Lokuttaradhammā pana kālena kālaṃ vimuccanti, sakiṃ vimuttāni hi maggaphalāni vimuttāneva honti. Nibbānaṃ sabbakilesehi accantaṃ vimuttamevāti ime nava dhammā asamayavimokkhoti vuttā.
অকুপ্পা চেতোৰিমুত্তীতি অরহত্তফলৰিমুত্তি। অযমত্থো এতস্সাতি এতদত্থং, অরহত্তফলত্থমিদং ব্রহ্মচরিযং। অযং এতস্স অত্থোতি ৰুত্তং হোতি। এতং সারন্তি এতং অরহত্তফলং ব্রহ্মচরিযস্স সারং। এতং পরিযোসানন্তি এতং অরহত্তফলং ব্রহ্মচরিযস্স পরিযোসানং, এসা কোটি, ন ইতো পরং পত্তব্বং অত্থীতি যথানুসন্ধিনাৰ দেসনং নিট্ঠপেসীতি।
Akuppā cetovimuttīti arahattaphalavimutti. Ayamattho etassāti etadatthaṃ, arahattaphalatthamidaṃ brahmacariyaṃ. Ayaṃ etassa atthoti vuttaṃ hoti. Etaṃ sāranti etaṃ arahattaphalaṃ brahmacariyassa sāraṃ. Etaṃ pariyosānanti etaṃ arahattaphalaṃ brahmacariyassa pariyosānaṃ, esā koṭi, na ito paraṃ pattabbaṃ atthīti yathānusandhināva desanaṃ niṭṭhapesīti.
পপঞ্চসূদনিযা মজ্ঝিমনিকাযট্ঠকথায
Papañcasūdaniyā majjhimanikāyaṭṭhakathāya
মহাসারোপমসুত্তৰণ্ণনা নিট্ঠিতা।
Mahāsāropamasuttavaṇṇanā niṭṭhitā.
Related texts:
তিপিটক (মূল) • Tipiṭaka (Mūla) / সুত্তপিটক • Suttapiṭaka / মজ্ঝিমনিকায • Majjhimanikāya / ৯. মহাসারোপমসুত্তং • 9. Mahāsāropamasuttaṃ
টীকা • Tīkā / সুত্তপিটক (টীকা) • Suttapiṭaka (ṭīkā) / মজ্ঝিমনিকায (টীকা) • Majjhimanikāya (ṭīkā) / ৯. মহাসারোপমসুত্তৰণ্ণনা • 9. Mahāsāropamasuttavaṇṇanā
