| Library / Tipiṭaka / ཏིཔིཊཀ • Tipiṭaka / མཛྫྷིམནིཀཱཡ (ཊཱིཀཱ) • Majjhimanikāya (ṭīkā) |
༩. མཧཱསཱརོཔམསུཏྟཝཎྞནཱ
9. Mahāsāropamasuttavaṇṇanā
༣༠༧. ནཙིརཔཀྐནྟེཏི ན ཙིརཾ པཀྐནྟེ, པཀྐནྟསྶ སཏོ ན ཙིརསྶེཝ། སལིངྒེནེཝཱཏི མུཎྜིཡཀཱསཱཡགྒཧཎཱདིནཱ ཨཏྟནོ པུརིམལིངྒེནེཝ། པཱཊིཡེཀྐེ ཛཱཏེཏི ཝིཔནྣཱཙཱརདིཊྛིཏཱཡ པཀཱསནཱིཡཀམྨཀརཎཏོ པརཾ ཨཉྙཏིཏྠིཡསདིསེ ཝིསུཾ བྷཱུཏེ། ཀུལཔུཏྟོཏི ཛཱཏིམཏྟེན ཀུལཔུཏྟོ། ཨསམྦྷིནྣཱཡཱཏི སམྦྷེདརཧིཏཱཡ, ཛཱཏིསངྐརཝིརཧིཏཱཡཱཏི ཨཏྟོ། ཛཱཏིསཱིསེན ཨིདྷ ཛཱཏིཝཏྠུཀཾ དུཀྑཾ ཝུཏྟནྟི ཨཱཧ ‘‘ཨོཏིཎྞོཏི ཡསྶ ཛཱཏི ཨནྟོ ཨནུཔཝིཊྛཱ’’ཏི། ཛཱཏོ ཧི སཏྟོ ཛཱཏཀཱལཏོ པཊྛཱཡ ཛཱཏིནིམིཏྟེན དུཀྑེན ཨནྟོ ཨནུཔཝིཊྛོ ཝིཡ ཝིབཱདྷཱིཡཏི། ཛརཱཡཱཏིཨཱདཱིསུཔི ཨེསེཝ ནཡོ། ཙཏྟཱརོ པཙྩཡཱ ལབྦྷནྟཱིཏི ལཱབྷཱ, ཙཏུནྣཾ པཙྩཡཱནཾ ལབྦྷམཱནཱནཾ སུཀཏབྷཱཝོ སུཊྛུ ཨབྷིསངྑཏབྷཱཝོ། ཝཎྞབྷཎནནྟི གུཎཀིཏྟནཾ། ཨཔཉྙཱཏཱཏི སམྦྷཱཝནཱཝསེན ན པཉྙཱཏཱ། ལཱབྷཱདིནིབྦཏྟིཡཱབྷཱཝདསྶནཉྷེཏཾ། ཏེནཱཧ ‘‘གྷཱསཙྪཱདནམཏྟམྤི ན ལབྷནྟཱི’’ཏི། ཨཔྤེསཀྑཱཏི ཨཔྤཱནུབྷཱཝཱ། སཱ པན ཨཔྤེསཀྑཏཱ ཨདྷིཔཏེཡྻསམྤཏྟིཡཱ ཙ པརིཝཱརསམྤཏྟིཡཱ ཙ ཨབྷཱཝེན པཱཀཊཱ ཧོཏི། ཏཏྠ པརིཝཱརསམྤཏྟིཡཱ ཨབྷཱཝཾ དསྶེནྟོ ‘‘ཨཔྤཔརིཝཱརཱ’’ཏི ཨཱཧ།
307.Nacirapakkanteti na ciraṃ pakkante, pakkantassa sato na cirasseva. Saliṅgenevāti muṇḍiyakāsāyaggahaṇādinā attano purimaliṅgeneva. Pāṭiyekke jāteti vipannācāradiṭṭhitāya pakāsanīyakammakaraṇato paraṃ aññatitthiyasadise visuṃ bhūte. Kulaputtoti jātimattena kulaputto. Asambhinnāyāti sambhedarahitāya, jātisaṅkaravirahitāyāti atto. Jātisīsena idha jātivatthukaṃ dukkhaṃ vuttanti āha ‘‘otiṇṇoti yassa jāti anto anupaviṭṭhā’’ti. Jāto hi satto jātakālato paṭṭhāya jātinimittena dukkhena anto anupaviṭṭho viya vibādhīyati. Jarāyātiādīsupi eseva nayo. Cattāro paccayā labbhantīti lābhā, catunnaṃ paccayānaṃ labbhamānānaṃ sukatabhāvo suṭṭhu abhisaṅkhatabhāvo. Vaṇṇabhaṇananti guṇakittanaṃ. Apaññātāti sambhāvanāvasena na paññātā. Lābhādinibbattiyābhāvadassanañhetaṃ. Tenāha ‘‘ghāsacchādanamattampi na labhantī’’ti. Appesakkhāti appānubhāvā. Sā pana appesakkhatā adhipateyyasampattiyā ca parivārasampattiyā ca abhāvena pākaṭā hoti. Tattha parivārasampattiyā abhāvaṃ dassento ‘‘appaparivārā’’ti āha.
སཱརེནཔི ཀེཙི ཨཛཱནནེན ཨཉྙཱལཱབྷེན ཝཱ ཨསཱརབྷཱུཏམྤི ཀཏྟབྦཾ ཀརོནྟཱིཏི ཏཏོ ཝིསེསནཏྠཾ ‘‘སཱརེན སཱརཀརཎཱིཡ’’ནྟི ཝུཏྟནྟི ཏཾ དསྶེནྟོ ‘‘ཨཀྑཙཀྐཡུགནངྒལཱདིཀ’’ནྟི ཨཱཧ། བྲཧྨཙརིཡསྶཱཏི སིཀྑཱཏྟཡསངྒཧསྶ སཱསནབྲཧྨཙརིཡསྶ། མཧཱརུཀྑསྶ མགྒཕལསཱརསྶ ཉཱཎདསྶནཕེགྒུཀསྶ སམཱདྷིཏཙསྶ སཱིལཔཔཊིཀསྶ ཙཉྩལསབྷཱཝཱ སཾསཔྤཙཱརཱིཏི ཙ ཙཏྟཱརོ པཙྩཡཱ སཱཁཱཔལཱསཾ ནཱམ། ཏེནེཝཱཏི ལཱབྷསཀྐཱརསིལོཀནིབྦཏྟནེནེཝ། སཱརོ མེ པཏྟོཏི ཨིམསྨིཾ སཱསནེ ཨདྷིགནྟབྦསཱརོ ནཱམ ཨིམིནཱ ལཱབྷཱདིནིབྦཏྟནེན ཨནུཔྤཏྟོཏི ཝོསཱནཾ ནིཊྛིཏཀིཙྩཾ ཨཱཔནྣོ།
Sārenapi keci ajānanena aññālābhena vā asārabhūtampi kattabbaṃ karontīti tato visesanatthaṃ ‘‘sārena sārakaraṇīya’’nti vuttanti taṃ dassento ‘‘akkhacakkayuganaṅgalādika’’nti āha. Brahmacariyassāti sikkhāttayasaṅgahassa sāsanabrahmacariyassa. Mahārukkhassa maggaphalasārassa ñāṇadassanapheggukassa samādhitacassa sīlapapaṭikassa cañcalasabhāvā saṃsappacārīti ca cattāro paccayā sākhāpalāsaṃ nāma. Tenevāti lābhasakkārasilokanibbattaneneva. Sāro me pattoti imasmiṃ sāsane adhigantabbasāro nāma iminā lābhādinibbattanena anuppattoti vosānaṃ niṭṭhitakiccaṃ āpanno.
༣༡༠. ཉཱཎདསྶནནྟི ཉཱཎབྷཱུཏཾ དསྶནཾ ཝིསཡསྶ སཙྪིཀརཎཝསེན པཝཏྟཾ ཨབྷིཉྙཱཉཱཎཾ། སུཁུམཾ རཱུཔནྟི དེཝཱདཱིནཾ, ཨཉྙམྤི ཝཱ སུཁུམསབྷཱཝཾ རཱུཔཾ། ཏེནཱཧ ‘‘ཨནྟམསོ…པེ॰… ཝིཧརནྟཱི’’ཏི, དིབྦཙཀྑུ ཧི ཨིདྷ ཨུཀྐཊྛནིདྡེསེན ‘‘ཉཱཎདསྶན’’ནྟི གཧིཏཾ།
310.Ñāṇadassananti ñāṇabhūtaṃ dassanaṃ visayassa sacchikaraṇavasena pavattaṃ abhiññāñāṇaṃ. Sukhumaṃ rūpanti devādīnaṃ, aññampi vā sukhumasabhāvaṃ rūpaṃ. Tenāha ‘‘antamaso…pe… viharantī’’ti, dibbacakkhu hi idha ukkaṭṭhaniddesena ‘‘ñāṇadassana’’nti gahitaṃ.
༣༡༡. ཨསམཡཝིམོཀྑཾ ཨཱརཱདྷེཏཱིཏི ཨེཏྠ ཨདྷིཔྤེཏཾ ཨསམཡཝིམོཀྑཾ པཱལི༹ཡཱ ཨེཝ དསྶེཏུཾ ‘‘ཀཏམོ ཨསམཡཝིམོཀྑོ’’ཏིཨཱདི ཝུཏྟཾ། ཨཊྛནྣཉྷི སམཱཔཛྫནསམཡོཔི ཨཏྠི ཨསམཡོཔི, མགྒཝིམོཀྑེན པན ཝིམུཙྩནསྶ སམཡོ ཝཱ ཨསམཡོ ཝཱ ནཏྠི། ཡསྶ སདྡྷཱ བལཝཏཱི, ཝིཔསྶནཱ ཙ ཨཱརདྡྷཱ, ཏསྶ གཙྪནྟསྶ ཏིཊྛནྟསྶ ནིསཱིདནྟསྶ བྷུཉྫནྟསྶ ཙ མགྒཕལཔཊིཝེདྷོ ནཱམ ན ཧོཏཱིཏི ན ཝཏྟབྦཾ, ཨིཏི མགྒཝིམོཀྑེན ཝིམུཙྩནྟསྶ སམཡོ ཝཱ ཨསམཡོ ཝཱ ནཏྠཱིཏི སོ ཨསམཡཝིམོཀྑོ། ཏེནཱཧ ‘‘ལོཀིཡསམཱཔཏྟིཡོ ཧཱི’’ཏིཨཱདི།
311.Asamayavimokkhaṃārādhetīti ettha adhippetaṃ asamayavimokkhaṃ pāḷiyā eva dassetuṃ ‘‘katamo asamayavimokkho’’tiādi vuttaṃ. Aṭṭhannañhi samāpajjanasamayopi atthi asamayopi, maggavimokkhena pana vimuccanassa samayo vā asamayo vā natthi. Yassa saddhā balavatī, vipassanā ca āraddhā, tassa gacchantassa tiṭṭhantassa nisīdantassa bhuñjantassa ca maggaphalapaṭivedho nāma na hotīti na vattabbaṃ, iti maggavimokkhena vimuccantassa samayo vā asamayo vā natthīti so asamayavimokkho. Tenāha ‘‘lokiyasamāpattiyo hī’’tiādi.
ན ཀུཔྤཏི, ན ནསྶཏཱིཏི ཨཀུཔྤཱ, ཀདཱཙིཔི ཨཔརིཧཱནསབྷཱཝཱ། སབྦསཾཀིལེསེཧི པཊིཔྤསྶདྡྷིཝསེན ཙེཏསོ ཝིམུཏྟཱིཏི ཙེཏོཝིམུཏྟི། ཏེནཱཧ ‘‘ཨརཧཏྟཕལཝིམུཏྟཱི’’ཏི། ཨཡམཏྠོ པཡོཛནཾ ཨེཏསྶཱཏི ཨེཏདཏྠཾ, སཱསནབྲཧྨཙརིཡཾ, ཏསྶ ཨེསཱ པརམཀོཊི། ཡཐཱརདྡྷསྶ སཱརོཔམེན ཕལེན དེསནཱ ནིཊྛཱཔིཏཱཏི ཨཱཧ ‘‘ཡཐཱནུསནྡྷིནཱཝ དེསནཾ ནིཊྛཔེསཱི’’ཏི། ཡཾ པནེཏྠ ཨཏྠཏོ ཨཝིབྷཏྟཾ, ཏཾ སུཝིཉྙེཡྻམེཝ།
Na kuppati, na nassatīti akuppā, kadācipi aparihānasabhāvā. Sabbasaṃkilesehi paṭippassaddhivasena cetaso vimuttīti cetovimutti. Tenāha ‘‘arahattaphalavimuttī’’ti. Ayamattho payojanaṃ etassāti etadatthaṃ, sāsanabrahmacariyaṃ, tassa esā paramakoṭi. Yathāraddhassa sāropamena phalena desanā niṭṭhāpitāti āha ‘‘yathānusandhināva desanaṃ niṭṭhapesī’’ti. Yaṃ panettha atthato avibhattaṃ, taṃ suviññeyyameva.
མཧཱསཱརོཔམསུཏྟཝཎྞནཱཡ ལཱིནཏྠཔྤཀཱསནཱ སམཏྟཱ།
Mahāsāropamasuttavaṇṇanāya līnatthappakāsanā samattā.
Related texts:
ཏིཔིཊཀ (མཱུལ) • Tipiṭaka (Mūla) / སུཏྟཔིཊཀ • Suttapiṭaka / མཛྫྷིམནིཀཱཡ • Majjhimanikāya / ༩. མཧཱསཱརོཔམསུཏྟཾ • 9. Mahāsāropamasuttaṃ
ཨཊྛཀཐཱ • Aṭṭhakathā / སུཏྟཔིཊཀ (ཨཊྛཀཐཱ) • Suttapiṭaka (aṭṭhakathā) / མཛྫྷིམནིཀཱཡ (ཨཊྛཀཐཱ) • Majjhimanikāya (aṭṭhakathā) / ༩. མཧཱསཱརོཔམསུཏྟཝཎྞནཱ • 9. Mahāsāropamasuttavaṇṇanā
