Library / Tipiṭaka / ཏིཔིཊཀ • Tipiṭaka / དཱིགྷནིཀཱཡ (ཊཱིཀཱ) • Dīghanikāya (ṭīkā)

    ༩. མཧཱསཏིཔཊྛཱནསུཏྟཝཎྞནཱ

    9. Mahāsatipaṭṭhānasuttavaṇṇanā

    ཨུདྡེསཝཱརཀཐཱཝཎྞནཱ

    Uddesavārakathāvaṇṇanā

    ༣༧༣. ‘‘ཀསྨཱ བྷགཝཱ ཨིདཾ སུཏྟམབྷཱསཱི’’ཏི ཨསཱདྷཱརཎཾ སམུཊྛཱནཾ པུཙྪཏི, སཱདྷཱརཎཾ པན ‘‘པཱཀཊ’’ནྟི ཨནཱམསིཏྭཱ ‘‘ཀུརུརཊྛཝཱསཱིན’’ནྟིཨཱདི ཝུཏྟཾ། སམུཊྛཱནནྟི ཧི དེསནཱནིདཱནཾ, ཏཾ སཱདྷཱརཎཱསཱདྷཱརཎབྷེདཏོ དུཝིདྷཾ, སཱདྷཱརཎམྤི ཨཛ྄ཛྷཏྟིཀབཱཧིརབྷེདཏོ དུཝིདྷཾ། ཏཏྠ སཱདྷཱརཎཾ ཨཛ྄ཛྷཏྟིཀཾ སམུཊྛཱནཾ ནཱམ བྷགཝཏོ མཧཱཀརུཎཱ། ཏཱཡ ཧི སམུསྶཱཧིཏསྶ བྷགཝཏོ ཝེནེཡྻཱནཾ དྷམྨདེསནཱཡ ཙིཏྟཾ ཨུདཔཱདི། ཡཐཱཧ ‘‘སཏྟེསུ ཙ ཀཱརུཉྙཏཾ པཊིཙྩ བུདྡྷཙཀྑུནཱ ལོཀཾ ཝོལོཀེསཱི’’ཏིཨཱདི། (དཱི॰ ནི॰ ༢.༦༩; མ॰ ནི॰ ༡.༢༨༣; ༢.༣༣༩; སཾ॰ ནི॰ ༡.༡༧༢; མཧཱཝ॰ ༩) བཱཧིརཾ པན སཱདྷཱརཎཾ སམུཊྛཱནཾ ནཱམ དསསཧསྶམཧཱབྲཧྨཔརིཝཱརསྶ སཧམྤཏིམཧཱབྲཧྨུནོ ཨཛ྄ཛྷེསནཾ། ཏཐཱ ཙཱཧ ‘‘བྲཧྨུནོ ཙ ཨཛ྄ཛྷེསནཾ ཝིདིཏྭཱ’’ཏི། (དཱི॰ ནི॰ ༢.༦༩; མ॰ ནི॰ ༡.༢༨༣; ༢.༣༣༩; སཾ॰ ནི॰ ༡.༡༧༩; མཧཱཝ॰ ༩) ཏདཛ྄ཛྷེསནུཏྟརཀཱལཉྷི དྷམྨཔཙྩཝེཀྑཎཱཛནིཏཾ ཨཔྤོསྶུཀྐཏཾ པཊིཔསྶམྦྷེཏྭཱ བྷགཝཱ དྷམྨཾ དེསེཏུཾ ཨུསྶཱཧཛཱཏོ ཨཧོསི། ཡཐཱ ཙ མཧཱཀརུཎཱ, ཨེཝཾ དསབལཉཱཎཱདཡོ ཙ དེསནཱཡ ཨཛ྄ཛྷཏྟསམུཊྛཱནབྷཱཝེ ཝཏྟབྦཱ། སབྦཉྷི ཉེཡྻདྷམྨཾ, ཏེསཾ དེསེཏབྦཔྤཀཱརཾ, སཏྟཱནཉྩ ཨཱསཡཱནུསཡཱདིཾ ཡཱཐཱཝཏོ ཛཱནིཏྭཱ བྷགཝཱ ཋཱནཱཊྛཱནཱདཱིསུ ཀོསལླེན ཝེནེཡྻཛ྄ཛྷཱསཡཱནུརཱུཔཾ ཝིཙིཏྟནཡདེསནཾ པཝཏྟེསཱིཏི། ཨསཱདྷཱརཎམྤི ཨཛ྄ཛྷཏྟིཀབཱཧིརབྷེདཏོ དུཝིདྷམེཝ། ཏཏྠ ཨཛ྄ཛྷཏྟིཀཾ ཡཱཡ མཧཱཀརུཎཱཡ, ཡེན ཙ དེསནཱཉཱཎེན ཨིདཾ སུཏྟཾ པཝཏྟིཏཾ, ཏདུབྷཡཾ ཝེདིཏབྦཾ, བཱཧིརཾ པན དསྶེཏུཾ ‘‘ཀུརུརཊྛཝཱསཱིན’’ནྟིཨཱདིམཱཧ། ཏེན ཝུཏྟཾ ‘‘ཨསཱདྷཱརཎཾ སམུཊྛཱནཾ པུཙྪཏཱི’’ཏི, ཏེན ‘‘ཨཏྟཛ྄ཛྷཱསཡཱདཱིསུ ཙཏཱུསུ སུཏྟནིཀྑེཔེསུ ཀཏརོཡ’’ནྟི སུཏྟནིཀྑེཔོ པུཙྪིཏོ ཧོཏཱིཏི ཨིཏརོ ‘‘ཀུརུརཊྛཝཱསཱིན’’ནྟིཨཱདིནཱ ‘‘པརཛ྄ཛྷཱསཡོཡཾ སུཏྟནིཀྑེཔོ’’ཏི དསྶེཏི།

    373. ‘‘Kasmā bhagavā idaṃ suttamabhāsī’’ti asādhāraṇaṃ samuṭṭhānaṃ pucchati, sādhāraṇaṃ pana ‘‘pākaṭa’’nti anāmasitvā ‘‘kururaṭṭhavāsīna’’ntiādi vuttaṃ. Samuṭṭhānanti hi desanānidānaṃ, taṃ sādhāraṇāsādhāraṇabhedato duvidhaṃ, sādhāraṇampi ajjhattikabāhirabhedato duvidhaṃ. Tattha sādhāraṇaṃ ajjhattikaṃ samuṭṭhānaṃ nāma bhagavato mahākaruṇā. Tāya hi samussāhitassa bhagavato veneyyānaṃ dhammadesanāya cittaṃ udapādi. Yathāha ‘‘sattesu ca kāruññataṃ paṭicca buddhacakkhunā lokaṃ volokesī’’tiādi. (Dī. ni. 2.69; ma. ni. 1.283; 2.339; saṃ. ni. 1.172; mahāva. 9) bāhiraṃ pana sādhāraṇaṃ samuṭṭhānaṃ nāma dasasahassamahābrahmaparivārassa sahampatimahābrahmuno ajjhesanaṃ. Tathā cāha ‘‘brahmuno ca ajjhesanaṃ viditvā’’ti. (Dī. ni. 2.69; ma. ni. 1.283; 2.339; saṃ. ni. 1.179; mahāva. 9) tadajjhesanuttarakālañhi dhammapaccavekkhaṇājanitaṃ appossukkataṃ paṭipassambhetvā bhagavā dhammaṃ desetuṃ ussāhajāto ahosi. Yathā ca mahākaruṇā, evaṃ dasabalañāṇādayo ca desanāya ajjhattasamuṭṭhānabhāve vattabbā. Sabbañhi ñeyyadhammaṃ, tesaṃ desetabbappakāraṃ, sattānañca āsayānusayādiṃ yāthāvato jānitvā bhagavā ṭhānāṭṭhānādīsu kosallena veneyyajjhāsayānurūpaṃ vicittanayadesanaṃ pavattesīti. Asādhāraṇampi ajjhattikabāhirabhedato duvidhameva. Tattha ajjhattikaṃ yāya mahākaruṇāya, yena ca desanāñāṇena idaṃ suttaṃ pavattitaṃ, tadubhayaṃ veditabbaṃ, bāhiraṃ pana dassetuṃ ‘‘kururaṭṭhavāsīna’’ntiādimāha. Tena vuttaṃ ‘‘asādhāraṇaṃ samuṭṭhānaṃ pucchatī’’ti, tena ‘‘attajjhāsayādīsu catūsu suttanikkhepesu kataroya’’nti suttanikkhepo pucchito hotīti itaro ‘‘kururaṭṭhavāsīna’’ntiādinā ‘‘parajjhāsayoyaṃ suttanikkhepo’’ti dasseti.

    ཀུརུརཊྛཾ ཀིར ཏདཱ ཏཾནིཝཱསིསཏྟཱནཾ ཡོནིསོམནསིཀཱརཝནྟཏཱདིནཱ ཡེབྷུཡྻེན སུཔྤཊིཔནྣཏཱཡ, པུབྦེ ཙ ཀཏཔུཉྙཏཱབལེན ཏདཱ ཨུཏུཨཱདིསམྤཏྟིཡུཏྟམེཝ ཨཧོསི། ཏེན ཝུཏྟཾ ‘‘ཨུཏུཔཙྩཡཱདིསམྤནྣཏྟཱ’’ཏི། ཨཱདི-སདྡེན བྷོཛནཱདིསམྤཏྟིཾ སངྒཎྷཱཏི། ཀེཙི པན ‘‘པུབྦེ པཝཏྟཀུརུཝཏྟདྷམྨཱནུཊྛཱནཝཱསནཱཡ ཨུཏྟརཀུརུ ཝིཡ ཡེབྷུཡྻེན ཨུཏུཨཱདིསམྤནྣམེཝ ཧོནྟཾ བྷགཝཏོ ཀཱལེ སཱཏིསཡཾ ཨུཏུསཔྤཱཡཱདིཡུཏྟཾ ཏཾ རཊྛཾ ཨཧོསཱི’’ཏི ཝདནྟི། ཙིཏྟསརཱིརཀལླཏཱཡཱཏི ཙིཏྟསྶ, སརཱིརསྶ ཙ ཨརོགཏཱཡ། ཨནུགྒཧིཏཔཉྙཱབལཱཏི ལདྡྷཱུཔཀཱརཉཱཎཱནུབྷཱཝཱ, ཨནུ ཨནུ ཝཱ ཨཱཙིཎྞཔཉྙཱཏེཛཱ། ཨེཀཝཱིསཏིཡཱ ཋཱནེསུཏི ཀཱཡཱནུཔསྶནཱཝསེན ཙུདྡསསུ ཋཱནེསུ, ཝེདནཱནུཔསྶནཱཝསེན ཨེཀསྨིཾ ཋཱནེ, ཏཐཱ ཙིཏྟཱནུཔསྶནཱཝསེན, དྷམྨཱནུཔསྶནཱཝསེན པཉྩསུ ཋཱནེསཱུཏི ཨེཝཾ ཨེཀཝཱིསཏིཡཱ ཋཱནེསུ། ཀམྨཊྛཱནཾ ཨརཧཏྟེ པཀྑིཔིཏྭཱཏི ཙཏུསཙྩཀམྨཊྛཱནཾ ཡཐཱ ཨརཧཏྟཾ པཱཔེཏི, ཨེཝཾ དེསནཱཝསེན ཨརཧཏྟེ པཀྑིཔིཏྭཱ། སུཝཎྞཙངྐོཊཀསུཝཎྞམཉྫཱུསཱསུ པཀྑིཏྟཱནི སུམནཙམྤཀཱདིནཱནཱཔུཔྥཱནི, མཎིམུཏྟཱདིསཏྟརཏནཱནི ཙ ཡཐཱ བྷཱཛནསམྤཏྟིཡཱ སཝིསེསཾ སོབྷནྟི, ཀིཙྩཀརཱནི ཙ ཧོནྟི མནུཉྙབྷཱཝཏོ, ཨེཝཾ སཱིལདསྶནཱདིསམྤཏྟིཡཱ བྷཱཛནཝིསེསབྷཱུཏཱཡ ཀུརུརཊྛཝཱསིཔརིསཱཡ དེསིཏཱ བྷགཝཏོ ཨཡཾ དེསནཱ བྷིཡྻོསོ མཏྟཱཡ སོབྷཏི, ཀིཙྩཀཱརཱི ཙ ཧོཏཱིཏི ཨིམམཏྠཾ དསྶེཏི ‘‘ཡཐཱ ཧི པུརིསོ’’ཏིཨཱདིནཱ། ཨེཏྠཱཏི ཀུརུརཊྛེ།

    Kururaṭṭhaṃ kira tadā taṃnivāsisattānaṃ yonisomanasikāravantatādinā yebhuyyena suppaṭipannatāya, pubbe ca katapuññatābalena tadā utuādisampattiyuttameva ahosi. Tena vuttaṃ ‘‘utupaccayādisampannattā’’ti. Ādi-saddena bhojanādisampattiṃ saṅgaṇhāti. Keci pana ‘‘pubbe pavattakuruvattadhammānuṭṭhānavāsanāya uttarakuru viya yebhuyyena utuādisampannameva hontaṃ bhagavato kāle sātisayaṃ utusappāyādiyuttaṃ taṃ raṭṭhaṃ ahosī’’ti vadanti. Cittasarīrakallatāyāti cittassa, sarīrassa ca arogatāya. Anuggahitapaññābalāti laddhūpakārañāṇānubhāvā, anu anu vā āciṇṇapaññātejā. Ekavīsatiyā ṭhānesuti kāyānupassanāvasena cuddasasu ṭhānesu, vedanānupassanāvasena ekasmiṃ ṭhāne, tathā cittānupassanāvasena, dhammānupassanāvasena pañcasu ṭhānesūti evaṃ ekavīsatiyā ṭhānesu. Kammaṭṭhānaṃ arahatte pakkhipitvāti catusaccakammaṭṭhānaṃ yathā arahattaṃ pāpeti, evaṃ desanāvasena arahatte pakkhipitvā. Suvaṇṇacaṅkoṭakasuvaṇṇamañjūsāsu pakkhittāni sumanacampakādinānāpupphāni, maṇimuttādisattaratanāni ca yathā bhājanasampattiyā savisesaṃ sobhanti, kiccakarāni ca honti manuññabhāvato, evaṃ sīladassanādisampattiyā bhājanavisesabhūtāya kururaṭṭhavāsiparisāya desitā bhagavato ayaṃ desanā bhiyyoso mattāya sobhati, kiccakārī ca hotīti imamatthaṃ dasseti ‘‘yathā hi puriso’’tiādinā. Etthāti kururaṭṭhe.

    པཀཏིཡཱཏི སརསཏོཔི, ཨིམིསྶཱ སཏིཔཊྛཱནསུཏྟདེསནཱཡ པུབྦེཔཱིཏི ཨདྷིཔྤཱཡོ། ཨནུཡུཏྟཱ ཝིཧརནྟི སཏྠུ དེསནཱནུསཱརཏོ བྷཱཝནཱནུཡོགཾ།

    Pakatiyāti sarasatopi, imissā satipaṭṭhānasuttadesanāya pubbepīti adhippāyo. Anuyuttā viharanti satthu desanānusārato bhāvanānuyogaṃ.

    ཝིསྶཊྛཨཏྟབྷཱཝེནཱཏི ཨནིཙྩཱདིཝསེན ཀིསྨིཉྩི ཡོནིསོམནསིཀཱརེ ཙིཏྟཾ ཨནིཡོཛེཏྭཱ རཱུཔཱདིཨཱརམྨཎེ ཨབྷིརཏིཝསེན ཝིསྶཊྛཙིཏྟེན བྷཝིཏུཾ ན ཝཊྚཏི, པམཱདཝིཧཱརཾ པཧཱཡ ཨཔྤམཏྟེན བྷཝིཏབྦནྟི ཨདྷིཔྤཱཡོ།

    Vissaṭṭhaattabhāvenāti aniccādivasena kismiñci yonisomanasikāre cittaṃ aniyojetvā rūpādiārammaṇe abhirativasena vissaṭṭhacittena bhavituṃ na vaṭṭati, pamādavihāraṃ pahāya appamattena bhavitabbanti adhippāyo.

    ཨེཀཱཡནོཏི ཨེཏྠ ཨཡན-སདྡོ མགྒཔརིཡཱཡོ། ན ཀེཝལཾ ཨཡནམེཝ, ཨཐ ཁོ ཨཉྙེཔི བཧཱུ མགྒཔརིཡཱཡཱཏི པདུདྡྷཱརཾ ཀརོནྟོ ‘‘མགྒསྶ ཧཱི’’ཏི ཨཱདིཾ ཝཏྭཱ ཡདི མགྒཔརིཡཱཡོ ཨཡན-སདྡོ, ཀསྨཱ པུན ‘‘མགྒོ’’ཏི ཝུཏྟནྟི ཙོདནཾ སནྡྷཱཡཱཧ ‘‘ཏསྨཱ’’ཏིཨཱདི། ཏཏྠ ཨེཀམགྒོཏི ཨེཀོ ཨེཝ མགྒོ། ན ཧི ནིབྦཱནགཱམིམགྒོ ཨཉྙོ ཨཏྠཱིཏི། ནནུ སཏིཔཊྛཱནཾ ཨིདྷ མགྒོཏི ཨདྷིཔྤེཏཾ, ཏདཉྙེ ཙ བཧཱུ མགྒདྷམྨཱ ཨཏྠཱིཏི? སཙྩཾ ཨཏྠི, ཏེ པན སཏིཔཊྛཱནགྒཧཎེནེཝ གཧིཏཱ ཏདཝིནཱབྷཱཝཏོ། ཏཐཱ ཧི ཉཱཎཝཱིརིཡཱདཡོ ནིདྡེསེ གཧིཏཱ, ཨུདྡེསེ པན སཏིཡཱ ཨེཝ གཧཎཾ ཝེནེཡྻཛ྄ཛྷཱསཡཝསེནཱཏི དཊྛབྦཾ། ‘‘ན དྭིདྷཱཔཐབྷཱུཏོ’’ཏི ཨིམིནཱ ཨིམསྶ མགྒསྶ ཨནེཀམགྒབྷཱཝཱབྷཱཝཾ ཝིཡ ཨནིབྦཱནགཱམིབྷཱཝཱབྷཱཝཉྩ དསྶེཏི། ཨེཀེནཱཏི ཨསཧཱཡེན། ཨསཧཱཡཏཱ ཙ དུཝིདྷཱ ཨཏྟདུཏིཡཏཱབྷཱཝེན ཝཱ, ཡཱ ‘‘ཝཱུཔཀཊྛཀཱཡཏཱ’’ཏི ཝུཙྩཏི, ཏཎྷཱདུཏིཡཏཱབྷཱཝེན ཝཱ, ཡཱ ‘‘པཝིཝིཏྟཙིཏྟཏཱ’’ཏི ཝུཙྩཏི། ཏེནཱཧ ‘‘ཝཱུཔཀཊྛེན པཝིཝིཏྟཙིཏྟེནཱ’’ཏི། སེཊྛོཔི ལོཀེ ‘‘ཨེཀོ’’ཏི ཝུཙྩཏི ‘‘ཡཱཝ པརེ ཨེཀཱཧཾ ཝོ ཀརོམཱི’’ཏིཨཱདཱིསཱུཏི ཨཱཧ ‘‘ཨེཀསྶཱཏི སེཊྛསྶཱ’’ཏི། ཡདི སཾསཱརཏོ ནིསྶརཎཊྛོ ཨཡནཊྛོ, ཨཉྙེསམྤི ཨུཔནིསྶཡསམྤནྣཱནཾ སཱདྷཱརཎཏོ, ཀཐཾ བྷགཝཏོཏི ཨཱཧ ‘‘ཀིཉྩཱཔཱི’’ཏིཨཱདི། ཨིམསྨིཾ ཁོཏི ཨེཏྠ ཁོ-སདྡོ ཨཝདྷཱརཎེ, ཏསྨཱ ཨིམསྨིཾ ཡེཝཱཏི ཨཏྠོ། དེསནཱབྷེདོཡེཝ ཧེསོ, ཡདིདཾ ‘‘མགྒོ’’ཏི ཝཱ ‘‘ཨཡནོ’’ཏི ཝཱ། ཨཡན-སདྡོ ཝཱ ཀམྨཀརཎཱདིཝིབྷཱགོ། ཏེནཱཧ ‘‘ཨཏྠཏོ པན ཨེཀོ ཝཱ’’ཏི།

    Ekāyanoti ettha ayana-saddo maggapariyāyo. Na kevalaṃ ayanameva, atha kho aññepi bahū maggapariyāyāti paduddhāraṃ karonto ‘‘maggassa hī’’ti ādiṃ vatvā yadi maggapariyāyo ayana-saddo, kasmā puna ‘‘maggo’’ti vuttanti codanaṃ sandhāyāha ‘‘tasmā’’tiādi. Tattha ekamaggoti eko eva maggo. Na hi nibbānagāmimaggo añño atthīti. Nanu satipaṭṭhānaṃ idha maggoti adhippetaṃ, tadaññe ca bahū maggadhammā atthīti? Saccaṃ atthi, te pana satipaṭṭhānaggahaṇeneva gahitā tadavinābhāvato. Tathā hi ñāṇavīriyādayo niddese gahitā, uddese pana satiyā eva gahaṇaṃ veneyyajjhāsayavasenāti daṭṭhabbaṃ. ‘‘Na dvidhāpathabhūto’’ti iminā imassa maggassa anekamaggabhāvābhāvaṃ viya anibbānagāmibhāvābhāvañca dasseti. Ekenāti asahāyena. Asahāyatā ca duvidhā attadutiyatābhāvena vā, yā ‘‘vūpakaṭṭhakāyatā’’ti vuccati, taṇhādutiyatābhāvena vā, yā ‘‘pavivittacittatā’’ti vuccati. Tenāha ‘‘vūpakaṭṭhena pavivittacittenā’’ti. Seṭṭhopi loke ‘‘eko’’ti vuccati ‘‘yāva pare ekāhaṃ vo karomī’’tiādīsūti āha ‘‘ekassāti seṭṭhassā’’ti. Yadi saṃsārato nissaraṇaṭṭho ayanaṭṭho, aññesampi upanissayasampannānaṃ sādhāraṇato, kathaṃ bhagavatoti āha ‘‘kiñcāpī’’tiādi. Imasmiṃ khoti ettha kho-saddo avadhāraṇe, tasmā imasmiṃ yevāti attho. Desanābhedoyeva heso, yadidaṃ ‘‘maggo’’ti vā ‘‘ayano’’ti vā. Ayana-saddo vā kammakaraṇādivibhāgo. Tenāha ‘‘atthato pana eko vā’’ti.

    ནཱནཱམུཁབྷཱཝནཱནཡཔྤཝཏྟོཏི ཀཱཡཱནུཔསྶནཱདིམུཁེན ཏཏྠཱཔི ཨཱནཱཔཱནཱདིམུཁེན བྷཱཝནཱནཡེན པཝཏྟོ། ཨེཀཱཡནནྟི ཨེཀགཱམིནཾ, ནིབྦཱནགཱམིནནྟི ཨཏྠོ། ནིབྦཱནཉྷི ཨདུཏིཡབྷཱཝཏོ, སེཊྛབྷཱཝཏོ ཙ ‘‘ཨེཀ’’ནྟི ཝུཙྩཏི། ཡཐཱཧ ‘‘ཨེཀཉྷི སཙྩཾ ན དུཏཱིཡམཏྠཱི’’ཏི (སུ॰ ནི॰ ༨༩༠)། ‘‘ཡཱཝཏཱ བྷིཀྑཝེ དྷམྨཱ སངྑཏཱ ཝཱ ཨསངྑཏཱ ཝཱ ཝིརཱགོ ཏེསཾ ཨགྒཾ ཨཀྑཱཡཏཱི’’ཏི། (ཨ॰ ནི॰ ༤.༣༤; ཨིཏིཝུ॰ ༩༠) ཁཡོ ཨེཝ ཨནྟོཏི ཁཡནྟོ, ཛཱཏིཡཱ ཁཡནྟཾ དིཊྛཝཱཏི ཛཱཏིཁཡནྟདསྶཱི། ཨཝིབྷཱགེན སབྦེཔི སཏྟེ ཧིཏེན ཨནུཀམྤཏཱིཏི ཧིཏཱནུཀམྤཱི། ཨཏརིཾསཱུཏི ཏརིཾསུ། པུབྦེཏི པུརིམཀཱ བུདྡྷཱ, པུབྦེ ཝཱ ཨཏཱིཏཀཱལེ།

    Nānāmukhabhāvanānayappavattoti kāyānupassanādimukhena tatthāpi ānāpānādimukhena bhāvanānayena pavatto. Ekāyananti ekagāminaṃ, nibbānagāminanti attho. Nibbānañhi adutiyabhāvato, seṭṭhabhāvato ca ‘‘eka’’nti vuccati. Yathāha ‘‘ekañhi saccaṃ na dutīyamatthī’’ti (su. ni. 890). ‘‘Yāvatā bhikkhave dhammā saṅkhatā vā asaṅkhatā vā virāgo tesaṃ aggaṃ akkhāyatī’’ti. (A. ni. 4.34; itivu. 90) khayo eva antoti khayanto, jātiyā khayantaṃ diṭṭhavāti jātikhayantadassī. Avibhāgena sabbepi satte hitena anukampatīti hitānukampī. Atariṃsūti tariṃsu. Pubbeti purimakā buddhā, pubbe vā atītakāle.

    ཏནྟི ཏེསཾ ཝཙནཾ, ཏཾ ཝཱ ཀིརིཡཱཝུཏྟིཝཱཙཀཏྟཾ ན ཡུཛྫཏི། ན ཧི སངྑེཡྻཔྤདྷཱནཏཱཡ སཏྟཝཱཙིནོ ཨེཀསདྡསྶ ཀིརིཡཱཝུཏྟིཝཱཙཀཏཱ ཨཏྠི། ‘‘སཀིམྤི ཨུདྡྷཾ གཙྪེཡྻཱ’’ཏིཨཱདཱིསུ (ཨ॰ ནི॰ ༧.༧༢) ཝིཡ སཀིཾ ཨཡནོཏི ཨིམིནཱ བྱཉྫནེན བྷཝིཏབྦཾ། ཨེཝམཏྠཾ ཡོཛེཏྭཱཏི ‘‘ཨེཀཾ ཨཡནཾ ཨསྶཱ’’ཏི ཨེཝཾ སམཱསཔདཏྠཾ ཡོཛེཏྭཱ། ཨུབྷཡཐཱཔཱིཏི པུརིམནཡེན, པཙྪིམནཡེན ཙ། ན ཡུཛྫཏི ཨིདྷཱདྷིཔྤེཏམགྒསྶ ཨནེཀཝཱརཾ པཝཏྟིསབྦྷཱཝཏོ། ཏེནཱཧ ‘‘ཀསྨཱ’’ཏིཨཱདི། ‘‘ཨནེཀཝཱརམྤི ཨཡཏཱི’’ཏི པུརིམནཡསྶ ཨཡུཏྟཏཱདསྶནཾ, ‘‘ཨནེཀཉྩསྶ ཨཡནཾ ཧོཏཱི’’ཏི པཙྪིམནཡསྶ།

    Tanti tesaṃ vacanaṃ, taṃ vā kiriyāvuttivācakattaṃ na yujjati. Na hi saṅkheyyappadhānatāya sattavācino ekasaddassa kiriyāvuttivācakatā atthi. ‘‘Sakimpi uddhaṃ gaccheyyā’’tiādīsu (a. ni. 7.72) viya sakiṃ ayanoti iminā byañjanena bhavitabbaṃ. Evamatthaṃ yojetvāti ‘‘ekaṃ ayanaṃ assā’’ti evaṃ samāsapadatthaṃ yojetvā. Ubhayathāpīti purimanayena, pacchimanayena ca. Na yujjati idhādhippetamaggassa anekavāraṃ pavattisabbhāvato. Tenāha ‘‘kasmā’’tiādi. ‘‘Anekavārampi ayatī’’ti purimanayassa ayuttatādassanaṃ, ‘‘anekañcassa ayanaṃ hotī’’ti pacchimanayassa.

    ཨིམསྨིཾ པདེཏི ‘‘ཨེཀཱཡནོ ཨཡཾ བྷིཀྑཝེ མགྒོ’’ཏི ཨིམསྨིཾ ཝཱཀྱེ, ཨིམསྨིཾ ཝཱ ‘‘པུབྦབྷཱགམགྒོ, ལོཀུཏྟརམགྒོ’’ཏི ཝིདྷཱནཔདེ། མིསྶཀམགྒོཏི ལོཀིཡེན མིསྶཀོ ལོཀུཏྟརམགྒོ ། ཝིསུདྡྷིཨཱདཱིནཾ ནིཔྤརིཡཱཡཧེཏུཀཾ སངྒཎྷནྟོ ཨཱཙརིཡཏྠེརོ ‘‘མིསྶཀམགྒོ’’ཏི ཨཱཧ། ཨིཏརོ པརིཡཱཡཧེཏུ ཨིདྷཱདྷིཔྤེཏོཏི ‘‘པུབྦབྷཱགམགྒོ’’ཏི ཨཝོཙ།

    Imasmiṃpadeti ‘‘ekāyano ayaṃ bhikkhave maggo’’ti imasmiṃ vākye, imasmiṃ vā ‘‘pubbabhāgamaggo, lokuttaramaggo’’ti vidhānapade. Missakamaggoti lokiyena missako lokuttaramaggo . Visuddhiādīnaṃ nippariyāyahetukaṃ saṅgaṇhanto ācariyatthero ‘‘missakamaggo’’ti āha. Itaro pariyāyahetu idhādhippetoti ‘‘pubbabhāgamaggo’’ti avoca.

    སདྡཾ སུཏྭཱཏི ‘‘ཀཱལོ བྷནྟེ དྷམྨསཝནཱཡཱ’’ཏི ཀཱལཱརོཙནསདྡཾ པཙྩཀྑཏོ, པརམྤརཱཡ ཙ སུཏྭཱ། ཨེཝཾ ཨུཀྑིཔིཏྭཱཏི ཨེཝཾ ‘‘སུནྡརཾ མནོཧརཾ ཨིམཾ ཀཐཾ ཚཌྜེམཱ’’ཏི ཨཚཌྜེནྟཱ ཨུཙྪུབྷཱརཾ ཝིཡ པགྒཧེཏྭཱ ན ཝིཙརནྟི། ཨཱལུལེ༹ཏཱིཏི ཝིལུལི༹ཏོ ཨཱཀུལོ ཧོཏཱིཏི ཨཏྠོ། ཨེཀཱཡནམགྒོ ཝུཙྩཏི པུབྦབྷཱགསཏིཔཊྛཱནམགྒོཏི ཨེཏྟཱཝཏཱ ཨིདྷཱདྷིཔྤེཏཏྠེ སིདྡྷེ ཏསྶེཝ ཨལངྐཱརཏྠཾ སོ པན ཡསྶ པུབྦབྷཱགམགྒོ, ཏཾ དསྶེཏུཾ ‘‘མགྒཱནཊྛངྒིཀོ’’ཏིཨཱདིཀཱ གཱཐཱཔི པཊིསམྦྷིདཱམགྒཏོཝ ཨཱནེཏྭཱ ཋཔིཏཱ།

    Saddaṃ sutvāti ‘‘kālo bhante dhammasavanāyā’’ti kālārocanasaddaṃ paccakkhato, paramparāya ca sutvā. Evaṃ ukkhipitvāti evaṃ ‘‘sundaraṃ manoharaṃ imaṃ kathaṃ chaḍḍemā’’ti achaḍḍentā ucchubhāraṃ viya paggahetvā na vicaranti. Āluḷetīti viluḷito ākulo hotīti attho. Ekāyanamaggo vuccati pubbabhāgasatipaṭṭhānamaggoti ettāvatā idhādhippetatthe siddhe tasseva alaṅkāratthaṃ so pana yassa pubbabhāgamaggo, taṃ dassetuṃ ‘‘maggānaṭṭhaṅgiko’’tiādikā gāthāpi paṭisambhidāmaggatova ānetvā ṭhapitā.

    ནིབྦཱནགམནཊྛེནཱཏི ནིབྦཱནཾ གཙྪཏི ཨདྷིགཙྪཏི ཨེཏེནཱཏི ནིབྦཱནགམནཾ,སོཡེཝ ཨཝིཔརཱིཏསབྷཱཝཏཱཡ ཨཏྠོ, ཏེན ནིབྦཱནགམནཊྛེན, ནིབྦཱནཱདྷིགམཱུཔཱཡཏཱཡཱཏི ཨཏྠོ། མགྒནཱིཡཊྛེནཱཏི གཝེསིཏབྦཏཱཡ། ‘‘གམནཱིཡཊྛེནཱ’’ཏི ཝཱ པཱཋོ, ཨུཔགནྟབྦཏཱཡཱཏི ཨཏྠོ། ‘‘རཱགཱདཱིཧཱི’’ཏི ཨིམིནཱ རཱགདོསམོཧཱནཾཡེཝ གཧཎཾ ‘‘རཱགོ མལཾ, དོསོ མལཾ, མོཧོ མལ’’ནྟི (ཝིབྷ॰ ༩༢༤) ཝཙནཏོ། ‘‘ཨབྷིཛ྄ཛྷཱཝིསམལོབྷཱདཱིཧཱི’’ཏི པན ཨིམིནཱ སབྦེསམྤི ཨུཔཀྐིལེསཱནཾ སངྒཎྷནཏྠཾ ཏེ ཝིསུཾ ཨུདྡྷཊཱ། ‘‘སཏྟཱནཾ ཝིསུདྡྷིཡཱ’’ཏི ཝུཏྟསྶ ཨཏྠསྶ ཨེཀནྟིཀཏཾ དསྶེནྟོ ‘‘ཏཐཱ ཧཱི’’ཏིཨཱདིམཱཧ། ཀཱམཾ ‘‘ཝིསུདྡྷིཡཱ’’ཏི སཱམཉྙཛོཏནཱ, ཙིཏྟསྶེཝ པན ཝིསུདྡྷི ཨིདྷཱདྷིཔྤེཏཱཏི དསྶེཏུཾ ‘‘རཱུཔམལཝསེན པནཱ’’ཏིཨཱདི ཝུཏྟཾ། ན ཀེཝལཾ ཨཊྛཀཐཱཝཙནམེཝ, ཨཐ ཁོ ཨིདཾ ཨེཏྠ ཨཱཧཙྩ བྷཱསིཏནྟི དསྶེནྟོ ‘‘ཏཐཱ ཧཱི’’ཏིཨཱདིམཱཧ།

    Nibbānagamanaṭṭhenāti nibbānaṃ gacchati adhigacchati etenāti nibbānagamanaṃ,soyeva aviparītasabhāvatāya attho, tena nibbānagamanaṭṭhena, nibbānādhigamūpāyatāyāti attho. Magganīyaṭṭhenāti gavesitabbatāya. ‘‘Gamanīyaṭṭhenā’’ti vā pāṭho, upagantabbatāyāti attho. ‘‘Rāgādīhī’’ti iminā rāgadosamohānaṃyeva gahaṇaṃ ‘‘rāgo malaṃ, doso malaṃ, moho mala’’nti (vibha. 924) vacanato. ‘‘Abhijjhāvisamalobhādīhī’’ti pana iminā sabbesampi upakkilesānaṃ saṅgaṇhanatthaṃ te visuṃ uddhaṭā. ‘‘Sattānaṃ visuddhiyā’’ti vuttassa atthassa ekantikataṃ dassento ‘‘tathā hī’’tiādimāha. Kāmaṃ ‘‘visuddhiyā’’ti sāmaññajotanā, cittasseva pana visuddhi idhādhippetāti dassetuṃ ‘‘rūpamalavasena panā’’tiādi vuttaṃ. Na kevalaṃ aṭṭhakathāvacanameva, atha kho idaṃ ettha āhacca bhāsitanti dassento ‘‘tathā hī’’tiādimāha.

    སཱ པནཱཡཾ ཙིཏྟཝིསུདྡྷི སིཛ྄ཛྷམཱནཱ ཡསྨཱ སོཀཱདཱིནཾ ཨནུཔྤཱདཱཡ སཾཝཏྟཏི, ཏསྨཱ ཝུཏྟཾ ‘‘སོཀཔརིདེཝཱནཾ སམཏིཀྐམཱཡཱ’’ཏིཨཱདི། ཏཏྠ སོཙནཾ ཉཱཏིབྱསནཱདིནིམིཏྟཾ ཙེཏསོ སནྟཱཔོ ཨནྟོནིཛ྄ཛྷཱནཾ སོཀོ། ཉཱཏིབྱསནཱདིནིམིཏྟམེཝ སོཀཱཝཏིཎྞཏོ ‘‘ཀཧཾ ཨེཀཔུཏྟཀ ཀཧཾ ཨེཀཔུཏྟཀཱ’’ཏིཨཱདིནཱ (མ॰ ནི॰ ༢.༣༥༣, ༣༥༤; སཾ॰ ནི॰ ༢.༦༣) པརིདེཝནཝསེན ཝཱཙཱཝིཔྤལཱཔོ པརིདཝནཾ པརིདེཝོ། ཨཱཡཏིཾ ཨནུཔྤཛྫནཾ ཨིདྷ སམཏིཀྐམོཏི ཨཱཧ ‘‘པཧཱནཱཡཱ’’ཏི། ཏཾ པནསྶ སམཏིཀྐམཱཝཧཏཾ ནིདསྶནཝསེན དསྶེནྟོ ‘‘ཨཡཉྷཱི’’ཏིཨཱདིམཱཧ།

    Sā panāyaṃ cittavisuddhi sijjhamānā yasmā sokādīnaṃ anuppādāya saṃvattati, tasmā vuttaṃ ‘‘sokaparidevānaṃ samatikkamāyā’’tiādi. Tattha socanaṃ ñātibyasanādinimittaṃ cetaso santāpo antonijjhānaṃ soko. Ñātibyasanādinimittameva sokāvatiṇṇato ‘‘kahaṃ ekaputtaka kahaṃ ekaputtakā’’tiādinā (ma. ni. 2.353, 354; saṃ. ni. 2.63) paridevanavasena vācāvippalāpo paridavanaṃ paridevo. Āyatiṃ anuppajjanaṃ idha samatikkamoti āha ‘‘pahānāyā’’ti. Taṃ panassa samatikkamāvahataṃ nidassanavasena dassento ‘‘ayañhī’’tiādimāha.

    ཏཏྠ ཡཾ པུབྦེ, ཏཾ ཝིསོདྷེཧཱིཏི ཨཏཱིཏེསུ ཁནྡྷེསུ ཏཎྷཱསཾཀིལེསཝིསོདྷནཾ ཝུཏྟཾ། པཙྪཱཏི པརཏོ ། ཏེཏི ཏུཡ྄ཧཾ། མཱཧཱུཏི མཱ ཨཧུ། ཀིཉྩནནྟི རཱགཱདིཀིཉྩནཾ, ཨེཏེན ཨནཱགཏེསུ ཁནྡྷེསུ སཾཀིལེསཝིསོདྷནཾ ཝུཏྟཾ། མཛ྄ཛྷེཏི ཏདུབྷཡཝེམཛ྄ཛྷེ། ནོ ཙེ གཧེསྶསཱིཏི ན ཨུཔཱདིཡིསྶསི ཙེ, ཨེཏེན པཙྩུཔྤནྣེ ཁནྡྷཔྤབནྡྷེ ཨུཔཱདཱནཔྤཝཏྟི ཝུཏྟཱ། ཨུཔསནྟོ ཙརིསྶསཱིཏི ཨེཝཾ ཨདྡྷཏྟཡགཏསཾཀིལེསཝིསོདྷནེ སཏི ནིབྦུཏསབྦཔརིལཱ༹ཧཏཱཡ ཨུཔསནྟོ ཧུཏྭཱ ཝིཧརིསྶསཱིཏི ཨརཧཏྟནིཀཱུཊེན གཱཐཾ ནིཊྛཔེསི། ཏེནཱཧ ‘‘ཨིམཾ གཱཐ’’ནྟིཨཱདི།

    Tattha yaṃ pubbe, taṃ visodhehīti atītesu khandhesu taṇhāsaṃkilesavisodhanaṃ vuttaṃ. Pacchāti parato . Teti tuyhaṃ. Māhūti mā ahu. Kiñcananti rāgādikiñcanaṃ, etena anāgatesu khandhesu saṃkilesavisodhanaṃ vuttaṃ. Majjheti tadubhayavemajjhe. No ce gahessasīti na upādiyissasi ce, etena paccuppanne khandhappabandhe upādānappavatti vuttā. Upasanto carissasīti evaṃ addhattayagatasaṃkilesavisodhane sati nibbutasabbapariḷāhatāya upasanto hutvā viharissasīti arahattanikūṭena gāthaṃ niṭṭhapesi. Tenāha ‘‘imaṃ gātha’’ntiādi.

    པུཏྟཱཏི ཨོརསཱ, ཨཉྙེཔི ཝཱ དིནྣཀཀིཏྟིམཱདཡོ ཡེ ཀེཙི། པིཏཱཏི ཛནཀོ, ཨཉྙེཔི ཝཱ པིཏུཊྛཱནིཡཱ། བནྡྷཝཱཏི ཉཱཏཀཱ། ཨཡཉྷེཏྠ ཨཏྠོ – པུཏྟཱ ཝཱ པིཏཱ ཝཱ བནྡྷཝཱ ཝཱ ཨནྟཀེན མཙྩུནཱ ཨདྷིཔནྣསྶ ཨབྷིབྷཱུཏསྶ མརཎཏོ ཏཱཎཱཡ ན ཧོནྟི། ཀསྨཱ? ནཏྠི ཉཱཏཱིསུ ཏཱཎཏཱཏི། ན ཧི ཉཱཏཱིནཾ ཝསེན མརཎཏོ ཨཱརཀྑཱ ཨཏྠི, ཏསྨཱ པཊཱཙཱརེ ‘‘ཨུབྷོ པུཏྟཱ ཀཱལངྐཏཱ’’ཏིཨཱདིནཱ (ཨཔ॰ ཐེརཱི ༡.༤༩༨) མཱ ནིརཏྠཀཾ པརིདེཝི, དྷམྨཾཡེཝ པན ཡཱཐཱཝཏོ པསྶཱཏི ཨདྷིཔྤཱཡོ། སོཏཱཔཏྟིཕལེ པཏིཊྛིཏཱཏི ཡཐཱནུལོམཾ པཝཏྟིཏཱཡ སཱམུཀྐཾསིཀཱཡ དྷམྨདེསནཱཡ པརིཡོསཱནེ སཧསྶནཡཔཊིམཎྜིཏེ སོཏཱཔཏྟིཕལེ པཏིཊྛཧི། ཀཐཾ པནཱཡཾ སཏིཔཊྛཱནམགྒཝསེན སོཏཱཔཏྟིཕལེ པཏིཊྛཱསཱིཏི ཨཱཧ ‘‘ཡསྨཱ པནཱ’’ཏིཨཱདི། ན ཧི ཙཏུསཙྩཀམྨཊྛཱནཀཐཱཡ ཝིནཱ སཱཝཀཱནཾ ཨརིཡམགྒཱདྷིགམོ ཨཏྠི། ‘‘ཨིམཾ གཱཐཾ སུཏྭཱ’’ཏི པནིདཾ སོཀཝིནོདནཝསེན པཝཏྟིཏཱཡ གཱཐཱཡ པཋམཾ སུཏཏྟཱ ཝུཏྟཾ, སཱཔི ཧི སཙྩདེསནཱཡ པརིཝཱརབནྡྷཱ ཨེཝ ཨནིཙྩཏཱཀཐཱཏི ཀཏྭཱ། ཨིཏརགཱཐཱཡཾ པན ཝཏྟབྦམེཝ ནཏྠི། བྷཱཝནཱཏི པཉྙཱབྷཱཝནཱ། སཱ ཧི ཨིདྷ ཨདྷིཔྤེཏཱ། ཏསྨཱཏི ཡསྨཱ རཱུཔཱདཱིནཾ ཨནིཙྩཱདིཏོ ཨནུཔསྶནཱཔི སཏིཔཊྛཱནབྷཱཝནཱཝ, ཏསྨཱ། ཏེཔཱིཏི སནྟཏིམཧཱམཏྟཔཊཱཙཱརཱཔི།

    Puttāti orasā, aññepi vā dinnakakittimādayo ye keci. Pitāti janako, aññepi vā pituṭṭhāniyā. Bandhavāti ñātakā. Ayañhettha attho – puttā vā pitā vā bandhavā vā antakena maccunā adhipannassa abhibhūtassa maraṇato tāṇāya na honti. Kasmā? Natthi ñātīsu tāṇatāti. Na hi ñātīnaṃ vasena maraṇato ārakkhā atthi, tasmā paṭācāre ‘‘ubho puttā kālaṅkatā’’tiādinā (apa. therī 1.498) mā niratthakaṃ paridevi, dhammaṃyeva pana yāthāvato passāti adhippāyo. Sotāpattiphale patiṭṭhitāti yathānulomaṃ pavattitāya sāmukkaṃsikāya dhammadesanāya pariyosāne sahassanayapaṭimaṇḍite sotāpattiphale patiṭṭhahi. Kathaṃ panāyaṃ satipaṭṭhānamaggavasena sotāpattiphale patiṭṭhāsīti āha ‘‘yasmā panā’’tiādi. Na hi catusaccakammaṭṭhānakathāya vinā sāvakānaṃ ariyamaggādhigamo atthi. ‘‘Imaṃ gāthaṃ sutvā’’ti panidaṃ sokavinodanavasena pavattitāya gāthāya paṭhamaṃ sutattā vuttaṃ, sāpi hi saccadesanāya parivārabandhā eva aniccatākathāti katvā. Itaragāthāyaṃ pana vattabbameva natthi. Bhāvanāti paññābhāvanā. Sā hi idha adhippetā. Tasmāti yasmā rūpādīnaṃ aniccādito anupassanāpi satipaṭṭhānabhāvanāva, tasmā. Tepīti santatimahāmattapaṭācārāpi.

    པཉྩསཏེ ཙོརེཏི སཏསཏཙོརཔརིཝཱརེ པཉྩཙོརེ པཊིཔཱཊིཡཱ པེསེསི, ཏེ ཨརཉྙཾ པཝིསིཏྭཱ ཐེརཾ པརིཡེསནྟཱ ཨནུཀྐམེན ཐེརསྶ སམཱིཔེ སམཱགཙྪིཾསུ། ཏེནཱཧ ‘‘ཏེ གནྟྭཱ ཐེརཾ པརིཝཱརེཏྭཱ ནིསཱིདིཾསཱུ’’ཏི། ཝེདནཾ ཝིཀྑམྦྷེཏྭཱཏི ཨཱུརུཊྛིབྷེདཔཙྩཡཾ དུཀྑཝེདནཾ ཨམནསིཀཱརེན ཝིནོདེཏྭཱ། པཱིཏིཔཱམོཛྫཾ ཨུཔྤཛྫི ཝིཔྤཊིསཱརལེསསྶཔི ཨསམྦྷཝཏོ། ཏེནཱཧ ‘‘པརིསུདྡྷཾ སཱིལཾ ནིསྶཱཡཱ’’ཏི། ཐེརསྶ ཧི སཱིལཾ པཙྩཝེཀྑཏོ པརིསུདྡྷཾ སཱིལཾ ནིསྶཱཡ ཨུལཱ༹རཾ པཱིཏིཔཱམོཛྫཾ ཨུཔྤཛྫམཱནཾ ཨཱུརུཊྛིབྷེདཛནིཏཾ དུཀྑཝེདནཾ ཝིཀྑམྦྷེསི། ཏིཡཱམརཏྟིནྟི ཨཙྩནྟསཾཡོགེ ཨུཔཡོགཝཙནཾ, ཏེནསྶ ཝིཔསྶནཱཡཾ ཨཔྤམཱདཾ, པཊིཔཏྟིཨུསྶུཀྐཱཔནཉྩ དསྶེཏི། པཱདཱནཱིཏི པཱདེ། སཾཡམེསྶཱམཱིཏི སཉྙཔེསྶཱམི, སཉྙཏྟིཾ ཀརིསྶཱམཱིཏི ཨཏྠོ། ཨཊྚིཡཱམཱིཏི ཛིགུཙྪཱམི། ཧརཱཡཱམཱིཏི ལཛྫཱམི། ཝིཔསྶིསནྟི སམྤསྶིཾ།

    Pañcasatecoreti satasatacoraparivāre pañcacore paṭipāṭiyā pesesi, te araññaṃ pavisitvā theraṃ pariyesantā anukkamena therassa samīpe samāgacchiṃsu. Tenāha ‘‘te gantvā theraṃ parivāretvā nisīdiṃsū’’ti. Vedanaṃ vikkhambhetvāti ūruṭṭhibhedapaccayaṃ dukkhavedanaṃ amanasikārena vinodetvā. Pītipāmojjaṃ uppajji vippaṭisāralesassapi asambhavato. Tenāha ‘‘parisuddhaṃ sīlaṃ nissāyā’’ti. Therassa hi sīlaṃ paccavekkhato parisuddhaṃ sīlaṃ nissāya uḷāraṃ pītipāmojjaṃ uppajjamānaṃ ūruṭṭhibhedajanitaṃ dukkhavedanaṃ vikkhambhesi. Tiyāmarattinti accantasaṃyoge upayogavacanaṃ, tenassa vipassanāyaṃ appamādaṃ, paṭipattiussukkāpanañca dasseti. Pādānīti pāde. Saṃyamessāmīti saññapessāmi, saññattiṃ karissāmīti attho. Aṭṭiyāmīti jigucchāmi. Harāyāmīti lajjāmi. Vipassisanti sampassiṃ.

    པཙལཱཡནྟཱནནྟི པཙལཱཡིཀཱནཾ ནིདྡཾ ཨུཔགཏཱནཾ། ཨགཏིནྟི ཨགོཙརཾ། ཝཏསམྤནྣོཏི དྷུཏགུཎསམྤནྣོ། པམཱདནྟི པཙལཱཡནཾ སནྡྷཱཡཱཧ། ཨོརུདྡྷམཱནསོཏི ཨུཔརུདྡྷཨདྷིཙིཏྟོ། པཉྫརསྨིནྟི སརཱིརེ། སརཱིརཉྷི ནྷཱརུསམྦནྡྷཨཊྛིསངྒྷཱཊཏཱཡ ཨིདྷ ‘‘པཉྫར’’ནྟི ཝུཏྟཾ།

    Pacalāyantānanti pacalāyikānaṃ niddaṃ upagatānaṃ. Agatinti agocaraṃ. Vatasampannoti dhutaguṇasampanno. Pamādanti pacalāyanaṃ sandhāyāha. Oruddhamānasoti uparuddhaadhicitto. Pañjarasminti sarīre. Sarīrañhi nhārusambandhaaṭṭhisaṅghāṭatāya idha ‘‘pañjara’’nti vuttaṃ.

    པཱིཏཝཎྞཱཡ པན པཊཱཀཱཡ ཀཱཡཾ པརིཧརཎཏོ, མལླཡུདྡྷཙིཏྟཀཏཱཡ ཙ ‘‘པཱིཏམལློ’’ཏི པཉྙཱཏོ པབྦཛིཏྭཱ པཱིཏམལླཏྠེརོ ནཱམ ཛཱཏོ། ཏཱིསུ རཛྫེསཱུཏི པཎྜུཙོལ༹གོལ༹རཛྫེསུ། ‘‘སབྦམལླཱ སཱིཧལ༹དཱིཔེ སཀྐཱརསམྨཱནཾ ལབྷནྟཱི’’ཏི ཏམྦཔཎྞིདཱིཔཾ ཨཱགམྨ། ཏཾཡེཝ ཨངྐུསཾ ཀཏྭཱཏི ‘‘རཱུཔཱདཡོ ‘མམཱ’ཏི ན གཧེཏབྦཱ’’ཏི ནཏུམྷཱཀཝགྒེན པཀཱསིཏམཏྠཾ ཨཏྟནོ ཙིཏྟམཏྟཧཏྠིནོ ཨངྐུསཾ ཀཏྭཱ། པཱདེསུ ཨཝཧནྟེསཱུཏི ཨཏིཝེལཾ ཙངྐམནེན ཨཀྐམིཏུཾ ཨསམཏྠེསུ། ཛཎྞུཀེཧི ཙངྐམཏི ‘‘ནིསིནྣེ ནིདྡཱཡ ཨཝསརོ ཧོཏཱི’’ཏི། བྱཱཀརིཏྭཱཏི ཨཏྟནོ ཝཱིརིཡཱརམྦྷསྶ སཕལཏཱཔཝེདནམུཁེན སབྲཧྨཙཱརཱིནཾ ཏཏྠ ཨུསྶཱཧཾ ཛནེནྟོ ཨཉྙཾ བྱཱཀརིཏྭཱ། བྷཱསིཏནྟི ཝཙནཾ, ཀསྶ པན ཏནྟི ཨཱཧ ‘‘བུདྡྷསེཊྛསྶ སབྦལོཀགྒཝཱདིནོ’’ཏི། ‘‘ན ཏུམྷཱཀ’’ནྟིཨཱདི ཏསྶ པཝཏྟིཨཱཀཱརདསྶནཾ། ཏཡིདཾ མེ སངྑཱརཱནཾ ཨཙྩནྟཝཱུཔསམཀཱརཎནྟི དསྶེནྟོ ‘‘ཨནིཙྩཱ ཝཏཱ’’ཏི གཱཐམཱཧརི, ཏེན ཨིདཱནཱཧཾ སངྑཱརཱནཾ ཁཎེ ཁཎེ བྷངྒསངྑཱཏསྶ རོགསྶ ཨབྷཱཝེན ཨརོགོ པརིནིབྦུཏོཏི དསྶེཏི།

    Pītavaṇṇāya pana paṭākāya kāyaṃ pariharaṇato, mallayuddhacittakatāya ca ‘‘pītamallo’’ti paññāto pabbajitvā pītamallatthero nāma jāto. Tīsu rajjesūti paṇḍucoḷagoḷarajjesu. ‘‘Sabbamallā sīhaḷadīpe sakkārasammānaṃ labhantī’’ti tambapaṇṇidīpaṃ āgamma. Taṃyeva aṅkusaṃ katvāti ‘‘rūpādayo ‘mamā’ti na gahetabbā’’ti natumhākavaggena pakāsitamatthaṃ attano cittamattahatthino aṅkusaṃ katvā. Pādesu avahantesūti ativelaṃ caṅkamanena akkamituṃ asamatthesu. Jaṇṇukehi caṅkamati ‘‘nisinne niddāya avasaro hotī’’ti. Byākaritvāti attano vīriyārambhassa saphalatāpavedanamukhena sabrahmacārīnaṃ tattha ussāhaṃ janento aññaṃ byākaritvā. Bhāsitanti vacanaṃ, kassa pana tanti āha ‘‘buddhaseṭṭhassa sabbalokaggavādino’’ti. ‘‘Na tumhāka’’ntiādi tassa pavattiākāradassanaṃ. Tayidaṃ me saṅkhārānaṃ accantavūpasamakāraṇanti dassento ‘‘aniccā vatā’’ti gāthamāhari, tena idānāhaṃ saṅkhārānaṃ khaṇe khaṇe bhaṅgasaṅkhātassa rogassa abhāvena arogo parinibbutoti dasseti.

    ཨསྶཱཏི སཀྐསྶ། ཨུཔཔཏྟཱིཏི དེཝཱུཔཔཏྟི། པུན པཱཀཏིཀཱཝ ཨཧོསི སཀྐབྷཱཝེནེཝ ཨུཔཔནྣཏྟཱ།

    Assāti sakkassa. Upapattīti devūpapatti. Puna pākatikāva ahosi sakkabhāveneva upapannattā.

    སུབྲཧྨཱཏི ཨེཝཾནཱམོ། ཨཙྪརཱནཾ ནིརཡཱུཔཔཏྟིཾ དིསྭཱ ཏཏོ པབྷུཏི སཏཏཾ པཝཏྟམཱནཾ ཨཏྟནོ ཙིཏྟུཏྲཱསཾ སནྡྷཱཡཱཧ ‘‘ནིཙྩཾ ཨུཏྲསྟམིདཾ ཙིཏྟ’’ནྟིཨཱདི། ཏཏྠ ཨུཏྲསྟནྟི སནྟསྟཾ བྷཱིཏཾ ། ཨུབྦིགྒནྟི སཾཝིགྒཾ། ཨུཏྲསྟནྟི ཝཱ སཾཝིགྒཾ། ཨུབྦིགྒནྟི བྷཡཝསེན སཧ ནིསྶཡེན སཉྩལིཏཾ། ཨནུཔྤནྣེསཱུཏི ཨནཱགཏེསུ། ཀིཙྩེསཱུཏི ཏེསུ ཏེསུ ཨིཏིཀཏྟབྦེསུ། ‘‘ཀིཙྪེསཱུ’’ཏི ཝཱ པཱཋོ, དུཀྑེསཱུཏི ཨཏྠོ, ནིམིཏྟཏྠེ ཙེཏཾ བྷུམྨཾ, བྷཱཝིདུཀྑནིམིཏྟནྟི ཨཏྠོ། ཨུཔྤཏིཏེསཱུཏི ཨུཔྤནྣེསུ ཀིཙྩེསཱུཏི ཡོཛནཱ། ཏདཱ ཨཏྟནོ པརིཝཱརསྶ ཨུཔྤནྣཾ དུཀྑཾ སནྡྷཱཡ ཝདཏི།

    Subrahmāti evaṃnāmo. Accharānaṃ nirayūpapattiṃ disvā tato pabhuti satataṃ pavattamānaṃ attano cittutrāsaṃ sandhāyāha ‘‘niccaṃ utrastamidaṃ citta’’ntiādi. Tattha utrastanti santastaṃ bhītaṃ . Ubbigganti saṃviggaṃ. Utrastanti vā saṃviggaṃ. Ubbigganti bhayavasena saha nissayena sañcalitaṃ. Anuppannesūti anāgatesu. Kiccesūti tesu tesu itikattabbesu. ‘‘Kicchesū’’ti vā pāṭho, dukkhesūti attho, nimittatthe cetaṃ bhummaṃ, bhāvidukkhanimittanti attho. Uppatitesūti uppannesu kiccesūti yojanā. Tadā attano parivārassa uppannaṃ dukkhaṃ sandhāya vadati.

    བོཛ྄ཛྷཱཏི བོདྷིཏོ, ཨརིཡམགྒཏོཏི ཨཏྠོ། ‘‘ཨཉྙཏྲཱ’’ཏི ཙ པདཾ ཨཔེཀྑིཏྭཱ ནིསྶཀྐཝཙནཾ, བོདྷིཾ ཋཔེཏྭཱཏི ཨཏྠོ། སེསེསུཔི ཨེསེཝ ནཡོ། ཏཔསཱཏི ཏཔོཀམྨཏོ, ཏེན མགྒཱདྷིགམསྶ ཨུཔཱཡབྷཱུཏཾ སལླེཁཔཊིཔདཾ དསྶེཏི། ཨིནྡྲིཡསཾཝརཱཏི མནཙྪཊྛཱནཾ ཨིནྡྲིཡཱནཾ སཾཝརཎཏོ , ཨེཏེན སཏིསཾཝརསཱིསེན སབྦམྤི སཾཝརསཱིལཾ, ལཀྑཎཧཱརནཡེན ཝཱ སབྦམྤི ཙཏུཔཱརིསུདྡྷིསཱིལཾ དསྶེཏི། སབྦནིསྶགྒཱཏི སབྦསྶཔི ནིསྶཛྫནཏོ སབྦཀིལེསཔྤཧཱནཏོ། ཀིལེསེསུ ཧི ནིསྶཊྛེསུ ཀམྨཝཊྚཾ, ཝིཔཱཀཝཊྚཉྩ ནིསྶཊྛམེཝ ཧོཏཱིཏི། སོཏྠིནྟི ཁེམཾ ཨནུཔདྡཝཏཾ།

    Bojjhāti bodhito, ariyamaggatoti attho. ‘‘Aññatrā’’ti ca padaṃ apekkhitvā nissakkavacanaṃ, bodhiṃ ṭhapetvāti attho. Sesesupi eseva nayo. Tapasāti tapokammato, tena maggādhigamassa upāyabhūtaṃ sallekhapaṭipadaṃ dasseti. Indriyasaṃvarāti manacchaṭṭhānaṃ indriyānaṃ saṃvaraṇato , etena satisaṃvarasīsena sabbampi saṃvarasīlaṃ, lakkhaṇahāranayena vā sabbampi catupārisuddhisīlaṃ dasseti. Sabbanissaggāti sabbassapi nissajjanato sabbakilesappahānato. Kilesesu hi nissaṭṭhesu kammavaṭṭaṃ, vipākavaṭṭañca nissaṭṭhameva hotīti. Sotthinti khemaṃ anupaddavataṃ.

    ཉཱཡཏི ནིཙྪཡེན ཀམཏི ནིབྦཱནཾ, ཏཾ ཝཱ ཉཱཡཏི པཊིཝིཛ྄ཛྷཱིཡཏི ཨེཏེནཱཏི ཉཱཡོ, ཨརིཡམགྒོཏི ཨཱཧ ‘‘ཉཱཡོ ཝུཙྩཏི ཨརིཡོ ཨཊྛངྒིཀོ མགྒོ’’ཏི། ཏཎྷཱཝཱནཝིརཧིཏཏྟཱཏི ཏཎྷཱསངྑཱཏཝཱནཝིཝིཏྟཏྟཱ། ཏཎྷཱ ཧི ཁནྡྷེཧི ཁནྡྷཾ, ཀམྨུནཱ ཕལཾ, སཏྟེཧི ཙ དུཀྑཾ ཝིནཏི སཾསིབྦཏཱིཏི ‘‘ཝཱན’’ནྟི ཝུཙྩཏི, ཏཡིདཾ ནཏྠི ཨེཏྠ ཝཱནཾ, ན ཝཱ ཨེཏསྨིཾ ཨདྷིགཏེ པུགྒལསྶ ཝཱནནྟི ནིབྦཱནཾ, ཨསངྑཏཱ དྷཱཏུ། པརཔྤཙྩཡེན ཝིནཱ པཙྩཀྑཀརཎཾ སཙྪིཀིརིཡཱཏི ཨཱཧ ‘‘ཨཏྟཔཙྩཀྑཏཱཡཱ’’ཏི།

    Ñāyati nicchayena kamati nibbānaṃ, taṃ vā ñāyati paṭivijjhīyati etenāti ñāyo, ariyamaggoti āha ‘‘ñāyo vuccati ariyo aṭṭhaṅgiko maggo’’ti. Taṇhāvānavirahitattāti taṇhāsaṅkhātavānavivittattā. Taṇhā hi khandhehi khandhaṃ, kammunā phalaṃ, sattehi ca dukkhaṃ vinati saṃsibbatīti ‘‘vāna’’nti vuccati, tayidaṃ natthi ettha vānaṃ, na vā etasmiṃ adhigate puggalassa vānanti nibbānaṃ, asaṅkhatā dhātu. Parappaccayena vinā paccakkhakaraṇaṃ sacchikiriyāti āha ‘‘attapaccakkhatāyā’’ti.

    ནནུ ‘‘ཝིསུདྡྷིཡཱ’’ཏི ཙིཏྟཝིསུདྡྷིཡཱ ཨདྷིཔྤེཏཏྟཱ ཝིསུདྡྷིགྒཧཎེནེཝེཏྠ སོཀསམཏིཀྐམཱདཡོཔི གཧིཏཱ ཨེཝ ཧོནྟི, ཏེ པུན ཀསྨཱ གཧིཏཱཏི ཨནུཡོགཾ སནྡྷཱཡ ‘‘ཏཏྠ ཀིཉྩཱཔཱི’’ཏིཨཱདི ཝུཏྟཾ། སཱསནཡུཏྟིཀོཝིདེཏི སཙྩཔཊིཙྩསམུཔྤཱདཱདིལཀྑཎཱཡཾ དྷམྨནཱིཏིཡཾ ཚེཀེ། ཏཾ ཏམཏྠཾ ཉཱཔེཏཱིཏི ཡེ ཡེ བོདྷནེཡྻཔུགྒལཱ སངྑེཔཝིཏྠཱརཱདིཝསེན ཡཐཱ ཡཐཱ བོདྷེཏབྦཱ, ཨཏྟནོ དེསནཱཝིལཱསེན བྷགཝཱ ཏེ ཏེ ཏཐཱ ཏཐཱ བོདྷེནྟོ ཏཾ ཏམཏྠཾ ཉཱཔེཏི། ཏཾ ཏཾ པཱཀཊཾ ཀཏྭཱ དསྶེནྟོཏི ཨཏྠཱཔཏྟིཾ ཨགཎེནྟོ ཏཾ ཏམཏྠཾ པཱཀཊཾ ཀཏྭཱ དསྶེནྟོ། ན ཧི སམྨཱསམྦུདྡྷོ ཨཏྠཱཔཏྟིཉཱཔཀཱདིསཱདྷནཱིཡཝཙནཱཏི། སཾཝཏྟཏཱིཏི ཛཱཡཏི, ཧོཏཱིཏི ཨཏྠོ། ཡསྨཱ ཨནཏིཀྐནྟསོཀཔརིདེཝསྶ ན ཀདཱཙི ཙིཏྟཝིསུདྡྷི ཨཏྠི སོཀཔརིདེཝསམཏིཀྐམནམུཁེནེཝ ཙིཏྟཝིསུདྡྷིཡཱ ཨིཛ྄ཛྷནཏོ, ཏསྨཱ ཨཱཧ ‘‘སོཀཔརིདེཝཱནཾ སམཏིཀྐམེན ཧོཏཱི’’ཏི། ཡསྨཱ པན དོམནསྶཔཙྩཡེཧི དུཀྑདྷམྨེཧི ཕུཊྛཾ པུཐུཛྫནཾ སོཀཱདཡོ ཨབྷིབྷཝནྟི, པརིཉྙཱཏེསུ ཙ ཏེསུ ཏེ ན ཧོནྟི, ཏསྨཱ ཝུཏྟཾ ‘‘སོཀཔརིདེཝཱནཾ སམཏིཀྐམོ དུཀྑདོམནསྶཱནཾ ཨཏྠངྒམེནཱ’’ཏི། ཉཱཡསྶཱཏི ཨགྒམགྒསྶ, ཏཏིཡམགྒསྶ ཙ། ཏདདྷིགམེན ཧི ཡཐཱཀྐམཾ དུཀྑདོམནསྶཱནཾ ཨཏྠངྒམོ། སཙྪིཀིརིཡཱབྷིསམཡསཧབྷཱཝཱིཔི ཨིཏརཱབྷིསམཡོ ཏདཝིནཱབྷཱཝཏོ སཙྪིཀིརིཡཱབྷིསམཡཧེཏུཀོ ཝིཡ ཝུཏྟོ། ཉཱཡསྶཱདྷིགམོ ནིབྦཱནསྶ སཙྪིཀིརིཡཱཡཱཏི ཕལཉཱཎེན ཝཱ པཙྩཀྑཀརཎཾ སནྡྷཱཡ ཝུཏྟཾ, ‘‘ནིབྦཱནསྶ སཙྪིཀིརིཡཱཡཱ’’ཏི སམྤདཱནཝཙནཉྩེཏཾ དཊྛབྦཾ།

    Nanu ‘‘visuddhiyā’’ti cittavisuddhiyā adhippetattā visuddhiggahaṇenevettha sokasamatikkamādayopi gahitā eva honti, te puna kasmā gahitāti anuyogaṃ sandhāya ‘‘tattha kiñcāpī’’tiādi vuttaṃ. Sāsanayuttikovideti saccapaṭiccasamuppādādilakkhaṇāyaṃ dhammanītiyaṃ cheke. Taṃ tamatthaṃñāpetīti ye ye bodhaneyyapuggalā saṅkhepavitthārādivasena yathā yathā bodhetabbā, attano desanāvilāsena bhagavā te te tathā tathā bodhento taṃ tamatthaṃ ñāpeti. Taṃ taṃ pākaṭaṃ katvā dassentoti atthāpattiṃ agaṇento taṃ tamatthaṃ pākaṭaṃ katvā dassento. Na hi sammāsambuddho atthāpattiñāpakādisādhanīyavacanāti. Saṃvattatīti jāyati, hotīti attho. Yasmā anatikkantasokaparidevassa na kadāci cittavisuddhi atthi sokaparidevasamatikkamanamukheneva cittavisuddhiyā ijjhanato, tasmā āha ‘‘sokaparidevānaṃ samatikkamena hotī’’ti. Yasmā pana domanassapaccayehi dukkhadhammehi phuṭṭhaṃ puthujjanaṃ sokādayo abhibhavanti, pariññātesu ca tesu te na honti, tasmā vuttaṃ ‘‘sokaparidevānaṃ samatikkamo dukkhadomanassānaṃ atthaṅgamenā’’ti. Ñāyassāti aggamaggassa, tatiyamaggassa ca. Tadadhigamena hi yathākkamaṃ dukkhadomanassānaṃ atthaṅgamo. Sacchikiriyābhisamayasahabhāvīpi itarābhisamayo tadavinābhāvato sacchikiriyābhisamayahetuko viya vutto. Ñāyassādhigamo nibbānassa sacchikiriyāyāti phalañāṇena vā paccakkhakaraṇaṃ sandhāya vuttaṃ, ‘‘nibbānassa sacchikiriyāyā’’ti sampadānavacanañcetaṃ daṭṭhabbaṃ.

    ཝཎྞབྷཎནནྟི པསཾསཱཝཙནཾ། ཏཡིདཾ ན ཨིདྷེཝ, ཨཐ ཁོ ཨཉྙཏྠཱཔི སཏྠུ ཨཱཙིཎྞཾ ཨེཝཱཏི དསྶེནྟོ ‘‘ཡཐེཝ ཧཱི’’ཏིཨཱདིམཱཧ། ཏཏྠ ཨཱདིམྷི ཀལྱཱཎམཱདི ཝཱ ཀལྱཱཎཾ ཨེཏསྶཱཏི ཨཱདིཀལྱཱཎཾ། སེསཔདདྭཡེཔི ཨེསེཝ ནཡོ། ཨཏྠསམྤཏྟིཡཱ སཱཏྠཾ། བྱཉྫནསམྤཏྟིཡཱ སབྱཉྫནཾ། སཱིལཱདིཔཉྩདྷམྨཀྑནྡྷཔཱརིཔཱུརིཏོ, ཨུཔནེཏབྦསྶ ཨབྷཱཝཏོ ཙ ཀེཝལཔརིཔུཎྞཾ། ནིརུཔཀྐིལེསཏོ ཨཔནེཏབྦསྶ ཙ ཨབྷཱཝཏོ པརིསུདྡྷཾ། སེཊྛཙརིཡབྷཱཝཏོ སཱསནབྲཧྨཙརིཡཾ, མགྒབྲཧྨཙརིཡཉྩ ཝོ པཀཱསེསྶཱམཱིཏི། ཨཡམེཏྠ སངྑེཔོ, ཝིཏྠཱརོ པན ཝིསུདྡྷིམགྒེ (ཝིསུདྡྷི॰ ༡.༡༤༧) ཝུཏྟནཡེནེཝ ཝེདིཏབྦོ། ཨརིཡཝཾསཱཏི ཨརིཡཱནཾ བུདྡྷཱདཱིནཾ ཝཾསཱ པཝེཎིཡོ། ཨགྒཉྙཱཏི ཨགྒཱཏི ཛཱནིཏབྦཱ སབྦཝཾསེཧི སེཊྛབྷཱཝཏོ། རཏྟཉྙཱཏི ཙིརརཏྟཱཏི ཛཱནིཏབྦཱ། ཝཾསཉྙཱཏི བུདྡྷཱདཱིནཾ ཝཾསཱཏི ཛཱནིཏབྦཱ། པོརཱཎཱཏི པུརཱཏནཱ ཨནདྷུནཱཏནཏྟཱ། ཨསངྐིཎྞཱཏི ཨཝིཀིཎྞཱ ཨནཔནཱིཏཱ། ཨསངྐིཎྞཔུབྦཱཏི ‘‘ཀིཾ ཨིམེཧཱི’’ཏི ཨརིཡེཧི ན ཨཔནཱིཏཔུབྦཱ ། ན སངྐཱིཡནྟཱིཏི ཨིདཱནིཔི ཏེཧི ན ཨཔནཱིཡནྟི། ན སངྐཱིཡིསྶནྟཱིཏི ཨནཱགཏེཔི ཏེཧི ན ཨཔནཱིཡིསྶནྟི། ཨཔྤཊིཀུཊྛཱ…པེ॰… ཝིཉྙཱུཧཱིཏི ཡེ ལོཀེ ཝིཉྙཱུ སམཎབྲཱཧྨཎཱ, ཏེཧི ཨཔྤཙྩཀྑཏཱ ཨནིནྡིཏཱ, ཨགརཧིཏཱཏི ཨཏྠོ། ‘‘ཝིསུདྡྷིཡཱ’’ཏིཨཱདཱིཧཱིཏི ཝིསུདྡྷིཨཱདིདཱིཔནེཧི། པདེཧཱིཏི ཝཱཀྱེཧི, ཝིསུདྡྷིཨཏྠཏཱདིབྷེདབྷིནྣེཧི ཝཱ དྷམྨཀོཊྛཱསེཧི། ཨུཔདྡཝེཏི ཨནཏྠེ། ཝིསུདྡྷིནྟི ཝིསུཛ྄ཛྷནཾ སཾཀིལེསཔྤཧཱནཾ། ཝཱཙུགྒཏཀརཎཾ ཨུགྒཧོ། པརིཡཱཔུཎནཾ པརིཙཡོ། ཨཏྠསྶ ཧདཡེ ཋཔནཾ དྷཱརཎཾ། པརིཝཏྟནཾ ཝཱཙནཾ།

    Vaṇṇabhaṇananti pasaṃsāvacanaṃ. Tayidaṃ na idheva, atha kho aññatthāpi satthu āciṇṇaṃ evāti dassento ‘‘yatheva hī’’tiādimāha. Tattha ādimhi kalyāṇamādi vā kalyāṇaṃ etassāti ādikalyāṇaṃ. Sesapadadvayepi eseva nayo. Atthasampattiyā sātthaṃ. Byañjanasampattiyā sabyañjanaṃ. Sīlādipañcadhammakkhandhapāripūrito, upanetabbassa abhāvato ca kevalaparipuṇṇaṃ. Nirupakkilesato apanetabbassa ca abhāvato parisuddhaṃ. Seṭṭhacariyabhāvato sāsanabrahmacariyaṃ, maggabrahmacariyañca vo pakāsessāmīti. Ayamettha saṅkhepo, vitthāro pana visuddhimagge (visuddhi. 1.147) vuttanayeneva veditabbo. Ariyavaṃsāti ariyānaṃ buddhādīnaṃ vaṃsā paveṇiyo. Aggaññāti aggāti jānitabbā sabbavaṃsehi seṭṭhabhāvato. Rattaññāti cirarattāti jānitabbā. Vaṃsaññāti buddhādīnaṃ vaṃsāti jānitabbā. Porāṇāti purātanā anadhunātanattā. Asaṅkiṇṇāti avikiṇṇā anapanītā. Asaṅkiṇṇapubbāti ‘‘kiṃ imehī’’ti ariyehi na apanītapubbā . Na saṅkīyantīti idānipi tehi na apanīyanti. Na saṅkīyissantīti anāgatepi tehi na apanīyissanti. Appaṭikuṭṭhā…pe… viññūhīti ye loke viññū samaṇabrāhmaṇā, tehi appaccakkhatā aninditā, agarahitāti attho. ‘‘Visuddhiyā’’tiādīhīti visuddhiādidīpanehi. Padehīti vākyehi, visuddhiatthatādibhedabhinnehi vā dhammakoṭṭhāsehi. Upaddaveti anatthe. Visuddhinti visujjhanaṃ saṃkilesappahānaṃ. Vācuggatakaraṇaṃ uggaho. Pariyāpuṇanaṃ paricayo. Atthassa hadaye ṭhapanaṃ dhāraṇaṃ. Parivattanaṃ vācanaṃ.

    གནྡྷཱརཀོཏི གནྡྷཱརདེསེ ཨུཔྤནྣོ། པཧོནྟཱིཏི སཀྐོནྟི། ཨནིཡྻཱནིཀམགྒཱཏི མིཙྪཱམགྒཱ, མིཙྪཏྟནིཡཏཱནིཡཏམགྒཱཔི ཝཱ། སུཝཎྞནྟི ཀཱུཊསུཝཎྞམྤི ཝུཙྩཏི། མཎཱིཏི ཀཱཙམཎིཔི, མུཏྟཱཏི ཝེལུ༹ཛཱཔི, པཝཱལ༹ནྟི པལླཝོཔི ཝུཙྩཏཱིཏི རཏྟཛམྦུནདཱདིཔདེཧི ཏེ ཝིསེསིཏཱ།

    Gandhārakoti gandhāradese uppanno. Pahontīti sakkonti. Aniyyānikamaggāti micchāmaggā, micchattaniyatāniyatamaggāpi vā. Suvaṇṇanti kūṭasuvaṇṇampi vuccati. Maṇīti kācamaṇipi, muttāti veḷujāpi, pavāḷanti pallavopi vuccatīti rattajambunadādipadehi te visesitā.

    ན ཏཏོ ཧེཊྛཱཏི ཨིདྷཱདྷིཔྤེཏཀཱཡཱདཱིནཾ ཝེདནཱདིསབྷཱཝཏྟཱབྷཱཝཱ, ཀཱཡཝེདནཱཙིཏྟཝིམུཏྟསྶ ཏེབྷཱུམཀདྷམྨསྶ ཝིསུཾ ཝིཔལླཱསཝཏྠནྟརབྷཱཝེན གཧིཏཏྟཱ ཙ ཧེཊྛཱ གཧཎེསུ ཝིཔལླཱསཝཏྠཱུནཾ ཨནིཊྛཱནཾ སནྡྷཱཡ ཝུཏྟཾ, པཉྩམསྶ པན ཝིཔལླཱསཝཏྠུནོ ཨབྷཱཝཱ ‘‘ན ཨུདྡྷ’’ནྟི ཨཱཧ། ཨཱརམྨཎཝིབྷཱགེན ཧེཏྠ སཏིཔཊྛཱནཝིབྷཱགོཏི། ཏཡོ སཏིཔཊྛཱནཱཏི སཏིཔཊྛཱན-སདྡསྶ ཨཏྠུདྡྷཱརདསྶནཾ, ན ཨིདྷ པཱལི༹ཡཾ ཝུཏྟསྶ སཏིཔཊྛཱན-སདྡསྶ ཨཏྠདསྶནནྟི། ཨཱདཱིསུ ཧི སཏིགོཙརོཏི ཨེཏྠ ཨཱདི-སདྡེན ‘‘ཕསྶསམུདཡཱ ཝེདནཱནཾ སམུདཡོ, ནཱམརཱུཔསམུདཡཱ ཙིཏྟསྶ སམུདཡོ, མནསིཀཱརསམུདཡཱ དྷམྨཱནཾ སམུདཡོ’’ཏི (སཾ॰ ནི॰ ༥.༤༠༨) ‘‘སཏིཔཊྛཱནཱ’’ཏི ཝུཏྟཱནཾ སབྷིགོཙརཱནཾ པཀཱསཀེ སུཏྟཔྤདེསེ སངྒཎྷཱཏི། ཨེཝཾ ‘‘པཊིསམྦྷིདཱཔཱལི༹ཡ’’མྤི (པཊི॰ མ॰ ༢.༣༤) ཨཝསེསཔཱལི༹པྤདེསདསྶནཏྠོ ཨཱདི-སདྡོ དཊྛབྦོ། སཏིཡཱ པཊྛཱནནྟི སཏིཡཱ པཏིཊྛཱཏབྦཊྛཱནཾ། དཱནཱདཱིནི ཀརོནྟསྶ རཱུཔཱདཱིནི སཏིཡཱ ཋཱནཾ ཧོནྟཱིཏི ཏཾནིཝཱརཎཏྠམཱཧ ‘‘པདྷཱནཾ ཋཱན’’ནྟི། པ-སདྡོ ཧི ཨིདྷ ‘‘པཎཱིཏཱ དྷམྨཱ’’ཏིཨཱདཱིསུ (དྷ॰ སཾ॰ མཱཏིཀཱ ༡༤) ཝིཡ པདྷཱནཏྠདཱིཔཀོཏི ཨདྷིཔྤཱཡོ།

    Na tato heṭṭhāti idhādhippetakāyādīnaṃ vedanādisabhāvattābhāvā, kāyavedanācittavimuttassa tebhūmakadhammassa visuṃ vipallāsavatthantarabhāvena gahitattā ca heṭṭhā gahaṇesu vipallāsavatthūnaṃ aniṭṭhānaṃ sandhāya vuttaṃ, pañcamassa pana vipallāsavatthuno abhāvā ‘‘na uddha’’nti āha. Ārammaṇavibhāgena hettha satipaṭṭhānavibhāgoti. Tayo satipaṭṭhānāti satipaṭṭhāna-saddassa atthuddhāradassanaṃ, na idha pāḷiyaṃ vuttassa satipaṭṭhāna-saddassa atthadassananti. Ādīsu hi satigocaroti ettha ādi-saddena ‘‘phassasamudayā vedanānaṃ samudayo, nāmarūpasamudayā cittassa samudayo, manasikārasamudayā dhammānaṃ samudayo’’ti (saṃ. ni. 5.408) ‘‘satipaṭṭhānā’’ti vuttānaṃ sabhigocarānaṃ pakāsake suttappadese saṅgaṇhāti. Evaṃ ‘‘paṭisambhidāpāḷiya’’mpi (paṭi. ma. 2.34) avasesapāḷippadesadassanattho ādi-saddo daṭṭhabbo. Satiyā paṭṭhānanti satiyā patiṭṭhātabbaṭṭhānaṃ. Dānādīni karontassa rūpādīni satiyā ṭhānaṃ hontīti taṃnivāraṇatthamāha ‘‘padhānaṃ ṭhāna’’nti. Pa-saddo hi idha ‘‘paṇītā dhammā’’tiādīsu (dha. saṃ. mātikā 14) viya padhānatthadīpakoti adhippāyo.

    ཨརིཡོཏི ཨརིཡཾ སབྦསཏྟསེཊྛཾ སམྨཱསམྦུདྡྷམཱཧ། ཨེཏྠཱཏི ཨེཏསྨིཾ སལཱ༹ཡཏནཝིབྷངྒསུཏྟེ།(མ॰ ནི॰ ༣.༣༡༠) སུཏྟེཀདེསེན ཧི སུཏྟཾ དསྶེཏི། ཏཏྠ ཧི –

    Ariyoti ariyaṃ sabbasattaseṭṭhaṃ sammāsambuddhamāha. Etthāti etasmiṃ saḷāyatanavibhaṅgasutte.(Ma. ni. 3.310) suttekadesena hi suttaṃ dasseti. Tattha hi –

    ‘‘ཏཡོ སཏིཔཊྛཱནཱ ཡདརིཡོ…པེ॰… ཨརཧཏཱིཏི ཨིཏི ཁོ པནེཏཾ ཝུཏྟཾ, ཀིཉྩེཏཾ པཊིཙྩ ཝུཏྟཾ། ཨིདྷ, བྷིཀྑཝེ, སཏྠཱ སཱཝཀཱནཾ དྷམྨཾ དེསེཏི ཨནུཀམྤཀོ ཧིཏེསཱི ཨནུཀམྤཾ ཨུཔཱདཱཡ ‘ཨིདཾ ཝོ ཧིཏཱཡ ཨིདཾ ཝོ སུཁཱཡཱ’ཏི། ཏསྶ སཱཝཀཱ ན སུསྶཱུསནྟི། ན སོཏཾ ཨོདཧནྟི, ན ཨཉྙཱ ཙིཏྟཾ ཨུཔཊྛཔེནྟི, ཝོཀྐམྨ ཙ སཏྠུ སཱསནཱ ཝཏྟནྟི། ཏཏྲ, བྷིཀྑཝེ, ཏཐཱགཏོ ན ཙེཝ ཨནཏྟམནོ ཧོཏི, ན ཙ ཨནཏྟམནཏཾ པཊིསཾཝེདེཏི, ཨནཝསྶུཏོ ཙ ཝིཧརཏི སཏོ སམྤཛཱནོ། ཨིདཾ, བྷིཀྑཝེ, པཋམཾ སཏིཔཊྛཱནཾ། ཡདརིཡོ སེཝཏི…པེ॰… ཨརཧཏི།

    ‘‘Tayo satipaṭṭhānā yadariyo…pe… arahatīti iti kho panetaṃ vuttaṃ, kiñcetaṃ paṭicca vuttaṃ. Idha, bhikkhave, satthā sāvakānaṃ dhammaṃ deseti anukampako hitesī anukampaṃ upādāya ‘idaṃ vo hitāya idaṃ vo sukhāyā’ti. Tassa sāvakā na sussūsanti. Na sotaṃ odahanti, na aññā cittaṃ upaṭṭhapenti, vokkamma ca satthu sāsanā vattanti. Tatra, bhikkhave, tathāgato na ceva anattamano hoti, na ca anattamanataṃ paṭisaṃvedeti, anavassuto ca viharati sato sampajāno. Idaṃ, bhikkhave, paṭhamaṃ satipaṭṭhānaṃ. Yadariyo sevati…pe… arahati.

    པུན ཙཔརཾ, བྷིཀྑཝེ, སཏྠཱ…པེ॰..ཨིདཾ ཝོ སུཁཱཡཱཏི ། ཏསྶ ཨེཀཙྩེ སཱཝཀཱ ན སུསྶཱུསནྟི…པེ॰… ན ཙ ཝོཀྐམྨ སཏྠུ སཱསནཱ ཝཏྟནྟི། ཏཏྲ, བྷིཀྑཝེ, ཏཐཱགཏོ ན ཙེཝ ཨནཏྟམནོ ཧོཏི, ན ཙ ཨནཏྟམནཏཾ པཊིསཾཝེདེཏི, ན ཙ ཨཏྟམནོ ཧོཏི, ན ཙ ཨཏྟམནཏཾ པཊིསཾཝེདེཏི, ཨནཏྟམནཏཱ ཙ ཨཏྟམནཏཱ ཙ ཏདུབྷཡཾ ཨབྷིནིཝཛྫེཏྭཱ ཨུཔེཀྑཀོ ཝིཧརཏི སཏོ སམྤཛཱནོ། ཨིདཾ ཝུཙྩཏི, བྷིཀྑཝེ, དུཏིཡཾ།

    Puna caparaṃ, bhikkhave, satthā…pe...idaṃ vo sukhāyāti . Tassa ekacce sāvakā na sussūsanti…pe… na ca vokkamma satthu sāsanā vattanti. Tatra, bhikkhave, tathāgato na ceva anattamano hoti, na ca anattamanataṃ paṭisaṃvedeti, na ca attamano hoti, na ca attamanataṃ paṭisaṃvedeti, anattamanatā ca attamanatā ca tadubhayaṃ abhinivajjetvā upekkhako viharati sato sampajāno. Idaṃ vuccati, bhikkhave, dutiyaṃ.

    པུན ཙཔརཾ, བྷིཀྑཝེ…པེ॰… སུཁཱཡཱཏི, ཏསྶ སཱཝཀཱ སུསྶཱུསནྟི…པེ॰… ཝཏྟནྟི། ཏཏྲ, བྷིཀྑཝེ, ཏཐཱགཏོ ཨཏྟམནོ ཙེཝ ཧོཏི, ཨཏྟམནཏཉྩ པཊིསཾཝེདེཏི, ཨནཝསྶུཏོ ཙ ཝིཧརཏི སཏོ སམྤཛཱནོ། ཨིདཾ ཝུཙྩཏི, བྷིཀྑཝེ, ཏཏིཡ’’ནྟི (མ॰ ནི॰ ༣.༣༡༡)།

    Puna caparaṃ, bhikkhave…pe… sukhāyāti, tassa sāvakā sussūsanti…pe… vattanti. Tatra, bhikkhave, tathāgato attamano ceva hoti, attamanatañca paṭisaṃvedeti, anavassuto ca viharati sato sampajāno. Idaṃ vuccati, bhikkhave, tatiya’’nti (ma. ni. 3.311).

    ཨེཝཾ པཊིགྷཱནུནཡེཧི ཨནཝསྶུཏཏཱ, ནིཙྩཾ ཨུཔཊྛིཏསྶཏིཏཱཡ ཏདུབྷཡཝཱིཏིཝཏྟཏཱ ‘‘སཏིཔཊྛཱན’’ནྟི ཝུཏྟཱ། བུདྡྷཱནཾཡེཝ ཧི ནིཙྩཾ ཨུཔཊྛིཏསྶཏིཏཱ ཧོཏི ཨཱཝེཎིཀདྷམྨབྷཱཝཏོ, ན པཙྩེཀབུདྡྷཱདཱིནཾ། པ-སདྡོ ཨཱརམྦྷཾ ཛོཏེཏི, ཨཱརམྦྷོ ཙ པཝཏྟཱིཏི ཀཏྭཱ ཨཱཧ ‘‘པཝཏྟཡིཏབྦཏོཏི ཨཏྠོ’’ཏི། སཏིཡཱ ཀརཎབྷཱུཏཱཡ པཊྛཱནཾ པཊྛཔེཏབྦཾ སཏིཔཊྛཱནཾ། ཨན-སདྡོ ཧི བཧུལཾཝཙནེན ཀམྨཏྠོཔི ཧོཏཱིཏི། ཏཐཱསྶ ཀཏྟུཨཏྠོཔི ལབྦྷཏཱིཏི ‘‘པཊྛཱཏཱིཏི པཊྛཱན’’ནྟི ཝུཏྟཾ། པཊྛཱཏཱིཏི ཨེཏྠ པ-སདྡོ བྷུསཏྠཝིསིཊྛཾ པཀྑནྡནཾ དཱིཔེཏཱིཏི ‘‘ཨོཀྐནྡིཏྭཱ པཀྑནྡིཏྭཱ པཏྠརིཏྭཱ པཝཏྟཏཱིཏི ཨཏྠོ’’ཏི ཨཱཧ། པུན བྷཱཝཏྠཾ སཏི, སདྡཾ, པཊྛཱནསདྡཉྩ ཝཎྞེནྟོ ‘‘ཨཐ ཝཱ’’ཏིཨཱདིམཱཧ, ཏེན པུརིམཝིཀཔྤེ སཏི, སདྡོ, པཊྛཱན-སདྡོ ཙ ཀཏྟུཨཏྠོཏི ཝིཉྙཱཡཏི། སརཎཊྛེནཱཏི ཙིརཀཏསྶ, ཙིརབྷཱསིཏསྶ ཙ ཨནུསྶརཎཊྛེན། ཨིདནྟི ཡཾ ‘‘སཏིཡེཝ སཏིཔཊྛཱན’’ནྟི ཝུཏྟཾ, ཨིདཾ། ཨིདྷ ཨིམསྨིཾ སུཏྟཔདེསེ ཨདྷིཔྤེཏཾ།

    Evaṃ paṭighānunayehi anavassutatā, niccaṃ upaṭṭhitassatitāya tadubhayavītivattatā ‘‘satipaṭṭhāna’’nti vuttā. Buddhānaṃyeva hi niccaṃ upaṭṭhitassatitā hoti āveṇikadhammabhāvato, na paccekabuddhādīnaṃ. Pa-saddo ārambhaṃ joteti, ārambho ca pavattīti katvā āha ‘‘pavattayitabbatoti attho’’ti. Satiyā karaṇabhūtāya paṭṭhānaṃ paṭṭhapetabbaṃ satipaṭṭhānaṃ. Ana-saddo hi bahulaṃvacanena kammatthopi hotīti. Tathāssa kattuatthopi labbhatīti ‘‘paṭṭhātīti paṭṭhāna’’nti vuttaṃ. Paṭṭhātīti ettha pa-saddo bhusatthavisiṭṭhaṃ pakkhandanaṃ dīpetīti ‘‘okkanditvā pakkhanditvā pattharitvā pavattatīti attho’’ti āha. Puna bhāvatthaṃ sati, saddaṃ, paṭṭhānasaddañca vaṇṇento ‘‘atha vā’’tiādimāha, tena purimavikappe sati, saddo, paṭṭhāna-saddo ca kattuatthoti viññāyati. Saraṇaṭṭhenāti cirakatassa, cirabhāsitassa ca anussaraṇaṭṭhena. Idanti yaṃ ‘‘satiyeva satipaṭṭhāna’’nti vuttaṃ, idaṃ. Idha imasmiṃ suttapadese adhippetaṃ.

    ཡདི ཨེཝནྟི། ཡདི སཏི ཨེཝ སཏིཔཊྛཱནཾ, སཏི ནཱམ ཨེཀོ དྷམྨོ, ཨེཝཾ སནྟེ ཀསྨཱ ‘‘སཏིཔཊྛཱནཱ’’ཏི བཧུཝཙནནྟི ཨཱཧ ‘‘སཏིབཧུཏྟཱ’’ཏིཨཱདི། ཡདི བཧུཀཱ ཏཱ སཏིཡོ, ཨཐ ཀསྨཱ ‘‘མགྒོ’’ཏི ཨེཀཝཙནནྟི ཡོཛནཱ། མགྒཊྛེནཱཏི ནིཡྻཱནཊྛེན། ནིཡྻཱནིཀོ ཧི མགྒདྷམྨོ, ཏེནེཝ ནིཡྻཱནིཀབྷཱཝེན ཨེཀཏྟཱུཔགཏོ ཨེཀནྟཏོ ནིབྦཱནཾ གཙྪཏི, ཨཏྠིཀེཧི ཙ ཏདཏྠཾ མགྒཱིཡཏཱིཏི ཨཱཧ ‘‘ཝུཏྟཉྷེཏ’’ནྟི, ཨཏྟནཱཝ པུབྦེ ཝུཏྟཾ པཙྩཱཧརཏི། ཏཏྠ ཙཏསྶོཔི ཙེཏཱཏི ཀཱཡཱནུཔསྶནཱདིཝསེན ཙཏུབྦིདྷཱཔི ཙ ཨེཏཱ སཏིཡོ། ཨཔརབྷཱགེཏི ཨརིཡམགྒཀྑཎེ། ཀིཙྩཾ སཱདྷཡམཱནཱཏི པུབྦབྷཱགེ ཀཱཡཱདཱིསུ སུབྷསཉྙཱདིཝིདྷམནཝསེན ཝིསུཾ ཝིསུཾ པཝཏྟིཏྭཱ མགྒཀྑཎེ སཏིཡེཝ ཏཏྠ ཙཏུབྦིདྷསྶཔི ཝིཔལླཱསསྶ སམུཙྪེདཝསེན པཧཱནཀིཙྩཾ སཱདྷཡམཱནཱ ཨཱརམྨཎཀརཎཝསེན ནིབྦཱནཾ གཙྪཏི། ཙཏུཀིཙྩསཱདྷནེནེཝ ཧེཏྠ བཧུཝཙནནིདྡེསོ། ཨེཝཉྩ སཏཱིཏི ཨེཝཾ མགྒཊྛེན ཨེཀཏྟཾ ཨུཔཱདཱཡ ‘‘མགྒོ’’ཏི ཨེཀཝཙནེན, ཨཱརམྨཎབྷེདེན ཙཏུབྦིདྷཏཾ ཨུཔཱདཱཡ ‘‘ཙཏྟཱརོ’’ཏི ཙ ཝཏྟབྦཏཱཡ སཏི ཝིཛྫམཱནཏྟཱ། ཝཙནཱནུསནྡྷིནཱ ‘‘ཨེཀཱཡནོ ཨཡ’’ནྟིཨཱདིཀཱ དེསནཱ སཱནུསནྡྷིཀཱཝ, ན ཨནནུསནྡྷིཀཱཏི ཨདྷིཔྤཱཡོ། ཝུཏྟམེཝཏྠཾ ནིདསྶནེན པཊིཔཱདེཏུཾ ‘‘མཱརསེནཔྤམདྡན’’ནྟི (སཾ॰ ནི॰ ༥.༢༢༤) སུཏྟཔདཾ ཨཱནེཏྭཱ ‘‘ཡཐཱ’’ཏིཨཱདིནཱ ནིདསྶནཾ སཾསནྡཏི། ‘‘ཏསྨཱ’’ཏིཨཱདི ནིགམནཾ།

    Yadi evanti. Yadi sati eva satipaṭṭhānaṃ, sati nāma eko dhammo, evaṃ sante kasmā ‘‘satipaṭṭhānā’’ti bahuvacananti āha ‘‘satibahuttā’’tiādi. Yadi bahukā tā satiyo, atha kasmā ‘‘maggo’’ti ekavacananti yojanā. Maggaṭṭhenāti niyyānaṭṭhena. Niyyāniko hi maggadhammo, teneva niyyānikabhāvena ekattūpagato ekantato nibbānaṃ gacchati, atthikehi ca tadatthaṃ maggīyatīti āha ‘‘vuttañheta’’nti, attanāva pubbe vuttaṃ paccāharati. Tattha catassopi cetāti kāyānupassanādivasena catubbidhāpi ca etā satiyo. Aparabhāgeti ariyamaggakkhaṇe. Kiccaṃ sādhayamānāti pubbabhāge kāyādīsu subhasaññādividhamanavasena visuṃ visuṃ pavattitvā maggakkhaṇe satiyeva tattha catubbidhassapi vipallāsassa samucchedavasena pahānakiccaṃ sādhayamānā ārammaṇakaraṇavasena nibbānaṃ gacchati. Catukiccasādhaneneva hettha bahuvacananiddeso. Evañca satīti evaṃ maggaṭṭhena ekattaṃ upādāya ‘‘maggo’’ti ekavacanena, ārammaṇabhedena catubbidhataṃ upādāya ‘‘cattāro’’ti ca vattabbatāya sati vijjamānattā. Vacanānusandhinā ‘‘ekāyano aya’’ntiādikā desanā sānusandhikāva, na ananusandhikāti adhippāyo. Vuttamevatthaṃ nidassanena paṭipādetuṃ ‘‘mārasenappamaddana’’nti (saṃ. ni. 5.224) suttapadaṃ ānetvā ‘‘yathā’’tiādinā nidassanaṃ saṃsandati. ‘‘Tasmā’’tiādi nigamanaṃ.

    ཝིསེསཏོ ཀཱཡོ, ཝེདནཱ ཙ ཨསྶཱདསྶ ཀཱརཎནྟི ཏཔྤཧཱནཏྠཾ ཏེསུ ཏཎྷཱཝཏྠཱུསུ ཨོལཱ༹རིཀསུཁུམེསུ ཨསུབྷདུཀྑབྷཱཝདསྶནཱནི མནྡཏིཀྑཔཉྙེཧི ཏཎྷཱཙརིཏེཧི སུཀརཱནཱིཏི ཏཱནི ཏེསཾ ‘‘ཝིསུདྡྷིམགྒོ’’ཏི ཝུཏྟཱནི། ཏཐཱ ‘‘ནིཙྩཾ ཨཏྟཱ’’ཏི ཨབྷིནིཝེསཝཏྠུཏཱཡ དིཊྛིཡཱ ཝིསེསཀཱརཎེསུ ཙིཏྟདྷམྨེསུ ཨནིཙྩཱནཏྟཏཱདསྶནཱནི སརཱགཱདིཝསེན, སཉྙཱཕསྶཱདིཝསེན, ནཱིཝརཎཱདིཝསེན ཙ ནཱཏིཔྤབྷེདཱཏིཔྤབྷེདགཏེསུ ཏེསུ ཏཔྤཧཱནཏྠཾ མནྡཏིཀྑཔཉྙཱནཾ དིཊྛིཙརིཏཱནཾ སུཀརཱནཱིཏི ཏེསཾ ཏཱནི ‘‘ཝིསུདྡྷིམགྒོ’’ཏི ཝུཏྟཱནི། ཨེཏྠ ཙ ཡཐཱ ཙིཏྟདྷམྨཱནམྤི ཏཎྷཱཡ ཝཏྠུབྷཱཝོ སམྦྷཝཏི, ཏཐཱ ཀཱཡཝེདནཱནམྤི དིཊྛིཡཱཏི སཏིཔི ནེསཾ ཙཏུནྣམྤི ཏཎྷཱདིཊྛིཝཏྠུབྷཱཝེ ཡོ ཡསྶཱ སཱཏིསཡཔཙྩཡོ, ཏཾ དསྶནཏྠཾ ཝིསེསགྒཧཎཾ ཀཏནྟི དཊྛབྦཾ། ཏིཀྑཔཉྙསམཐཡཱནིཀོ ཨོལཱ༹རིཀཱརམྨཎཾ པརིགྒཎྷནྟོ ཏཏྠ ཨཊྛཏྭཱ ཛྷཱནཾ སམཱཔཛྫིཏྭཱ ཨུཊྛཱཡ ཝེདནཾ པརིགྒཎྷཱཏཱིཏི ཝུཏྟཾ ‘‘ཨོལཱ༹རིཀཱརམྨཎེ ཨསཎྛཧནཏོ’’ཏི། ཝིཔསྶནཱཡཱནིཀསྶ པན སུཁུམེ ཙིཏྟེ, དྷམྨེསུ ཙ ཙིཏྟཾ པཀྑནྡཏཱིཏི ཙིཏྟདྷམྨཱནུཔསྶནཱནཾ མནྡཏིཀྑཔཉྙཝིཔསྶནཱཡཱནིཀཱནཾ ཝིསུདྡྷིམགྒཏཱ ཝུཏྟཱ།

    Visesato kāyo, vedanā ca assādassa kāraṇanti tappahānatthaṃ tesu taṇhāvatthūsu oḷārikasukhumesu asubhadukkhabhāvadassanāni mandatikkhapaññehi taṇhācaritehi sukarānīti tāni tesaṃ ‘‘visuddhimaggo’’ti vuttāni. Tathā ‘‘niccaṃ attā’’ti abhinivesavatthutāya diṭṭhiyā visesakāraṇesu cittadhammesu aniccānattatādassanāni sarāgādivasena, saññāphassādivasena, nīvaraṇādivasena ca nātippabhedātippabhedagatesu tesu tappahānatthaṃ mandatikkhapaññānaṃ diṭṭhicaritānaṃ sukarānīti tesaṃ tāni ‘‘visuddhimaggo’’ti vuttāni. Ettha ca yathā cittadhammānampi taṇhāya vatthubhāvo sambhavati, tathā kāyavedanānampi diṭṭhiyāti satipi nesaṃ catunnampi taṇhādiṭṭhivatthubhāve yo yassā sātisayapaccayo, taṃ dassanatthaṃ visesaggahaṇaṃ katanti daṭṭhabbaṃ. Tikkhapaññasamathayāniko oḷārikārammaṇaṃ pariggaṇhanto tattha aṭṭhatvā jhānaṃ samāpajjitvā uṭṭhāya vedanaṃ pariggaṇhātīti vuttaṃ ‘‘oḷārikārammaṇe asaṇṭhahanato’’ti. Vipassanāyānikassa pana sukhume citte, dhammesu ca cittaṃ pakkhandatīti cittadhammānupassanānaṃ mandatikkhapaññavipassanāyānikānaṃ visuddhimaggatā vuttā.

    ཏེསཾ ཏཏྠཱཏི ཨེཏྠ ཏཏྠ-སདྡསྶ ‘‘པཧཱནཏྠ’’ནྟི ཨེཏེན ཡོཛནཱ། པརཏོ ཏེསཾ ཏཏྠཱཏི ཨེཏྠཱཔི ཨེསེཝ ནཡོ། པཉྩ ཀཱམགུཎཱ སཝིསེསཱ ཀཱཡེ ལབྦྷནྟཱིཏི ཝིསེསེན ཀཱཡོ ཀཱམོགྷསྶ ཝཏྠུ, བྷཝེསུ སུཁགྒཧཎཝསེན བྷཝསྶཱདོ ཧོཏཱིཏི བྷཝོགྷསྶ ཝེདནཱ ཝཏྠུ, སནྟཏིགྷནགྒཧཎཝསེན ཝིསེསཏོ ཙིཏྟེ ཨཏྟཱབྷིནིཝེསོ ཧོཏཱིཏི དིཊྛོགྷསྶ ཙིཏྟཾ ཝཏྠུ, དྷམྨེསུ ཝིནིབྦྷོགསྶ དུཀྐརཏྟཱ, དྷམྨཱནཾ དྷམྨམཏྟཏཱཡ དུཔྤཊིཝིཛ྄ཛྷཏྟཱ ཙ སམྨོཧོ ཧོཏཱིཏི ཨཝིཛྫོགྷསྶ དྷམྨཱ ཝཏྠུ, ཏསྨཱ ཏེསུ ཏེསཾ པཧཱནཏྠཾ ཙཏྟཱརོཝ ཝུཏྟཱ།

    Tesaṃ tatthāti ettha tattha-saddassa ‘‘pahānattha’’nti etena yojanā. Parato tesaṃ tatthāti etthāpi eseva nayo. Pañca kāmaguṇā savisesā kāye labbhantīti visesena kāyo kāmoghassa vatthu, bhavesu sukhaggahaṇavasena bhavassādo hotīti bhavoghassa vedanā vatthu, santatighanaggahaṇavasena visesato citte attābhiniveso hotīti diṭṭhoghassa cittaṃ vatthu, dhammesu vinibbhogassa dukkarattā, dhammānaṃ dhammamattatāya duppaṭivijjhattā ca sammoho hotīti avijjoghassa dhammā vatthu, tasmā tesu tesaṃ pahānatthaṃ cattārova vuttā.

    ཨེཝཾ ཀཱཡཱདཱིནཾ ཀཱམོགྷཱདིཝཏྠུབྷཱཝཀཐནེནེཝ ཀཱམཡོགཀཱམཱསཝཱདཱིནམྤི ཝཏྠུབྷཱཝོ དཱིཔིཏོ ཧོཏི ཨོགྷེཧི ཏེསཾ ཨཏྠཏོ ཨནཉྙཏྟཱ། ཡདགྒེན ཙ ཀཱཡོ ཀཱམོགྷཱདཱིནཾ ཝཏྠུ, ཏདགྒེན ཨབྷིཛ྄ཛྷཱཀཱཡགནྠསྶ ཝཏྠུ། ‘‘དུཀྑཱཡ ཝེདནཱཡ པཊིགྷཱནུསཡོ ཨནུསེཏཱི’’ཏི དུཀྑདུཀྑཝིཔརིཎཱམདུཀྑསངྑཱརདུཀྑབྷཱུཏཱ ཝེདནཱ ཝིསེསེན བྱཱཔཱདཀཱཡགནྠསྶ ཝཏྠུ། ཙིཏྟེ ནིཙྩགྒཧཎཝསེན སསྶཏསྶ ཨཏྟནོ སཱིལེན སུདྡྷཱིཏི ཨཱདི པརཱམསནཾ ཧོཏཱིཏི སཱིལབྦཏཔརཱམཱསསྶ ཙིཏྟཾ ཝཏྠུ། ནཱམརཱུཔཔརིཙྪེདེན བྷཱུཏཾ བྷཱུཏཏོ ཨཔསྶནྟསྶ བྷཝཝིབྷཝདིཊྛིསངྑཱཏོ ཨིདཾསཙྩཱབྷིནིཝེསོ ཧོཏཱིཏི ཏསྶ དྷམྨཱ ཝཏྠུ། ཀཱཡསྶ ཀཱམུཔཱདཱནཝཏྠུཏཱ ཝུཏྟནཡཱཝ། ཡདགྒེན ཧི ཀཱཡོ ཀཱམོགྷསྶ ཝཏྠུ, ཏདགྒེན ཀཱམུཔཱདཱནསྶཔི ཝཏྠུ ཨཏྠཏོ ཨབྷིནྣཏྟཱ། སུཁཝེདནསྶཱདཝསེན པརལོཀནིརཔེཀྑོ ‘‘ནཏྠི དིནྣ’’ནྟིཨཱདིཀཾ (དཱི॰ ནི॰ ༡.༡༧༡; མ॰ ནི॰ ༡.༤༤༥; ༢.༩༥, ༢༢༥; ༣.༩༡, ༡༡༦; སཾ॰ ནི॰ ༣.༢༡༠; དྷ॰ ས॰ ༡༢༢༡; ཝིབྷ॰ ༩༣༨) པརཱམཱསཾ ཨུཔྤཱདེཏཱིཏི དིཊྛུཔཱདཱནསྶ ཝེདནཱ ཝཏྠུ ། ཙིཏྟདྷམྨཱནཾ ཨིཏརུཔཱདཱནཝཏྠུཏཱ ཏཏིཡཙཏུཏྠགནྠཡོཛནཱཡཾ ཝུཏྟནཡཱ ཨེཝ། ཀཱཡཝེདནཱནཾ ཚནྡདོསཱགཏིཝཏྠུཏཱ ཀཱམོགྷབྱཱཔཱདཀཱཡགནྠཡོཛནཱཡཾ ཝུཏྟནཡཱ ཨེཝ། སནྟཏིགྷནགྒཧཎཝསེན སརཱགཱདིཙིཏྟེ སམྨོཧོ ཧོཏཱིཏི མོཧཱགཏིཡཱ ཙིཏྟཾ ཝཏྠུ། དྷམྨསབྷཱཝཱནཝབོདྷེ བྷཡཾ ཧོཏཱིཏི བྷཡཱགཏིཡཱ དྷམྨཱ ཝཏྠུ།

    Evaṃ kāyādīnaṃ kāmoghādivatthubhāvakathaneneva kāmayogakāmāsavādīnampi vatthubhāvo dīpito hoti oghehi tesaṃ atthato anaññattā. Yadaggena ca kāyo kāmoghādīnaṃ vatthu, tadaggena abhijjhākāyaganthassa vatthu. ‘‘Dukkhāya vedanāya paṭighānusayo anusetī’’ti dukkhadukkhavipariṇāmadukkhasaṅkhāradukkhabhūtā vedanā visesena byāpādakāyaganthassa vatthu. Citte niccaggahaṇavasena sassatassa attano sīlena suddhīti ādi parāmasanaṃ hotīti sīlabbataparāmāsassa cittaṃ vatthu. Nāmarūpaparicchedena bhūtaṃ bhūtato apassantassa bhavavibhavadiṭṭhisaṅkhāto idaṃsaccābhiniveso hotīti tassa dhammā vatthu. Kāyassa kāmupādānavatthutā vuttanayāva. Yadaggena hi kāyo kāmoghassa vatthu, tadaggena kāmupādānassapi vatthu atthato abhinnattā. Sukhavedanassādavasena paralokanirapekkho ‘‘natthi dinna’’ntiādikaṃ (dī. ni. 1.171; ma. ni. 1.445; 2.95, 225; 3.91, 116; saṃ. ni. 3.210; dha. sa. 1221; vibha. 938) parāmāsaṃ uppādetīti diṭṭhupādānassa vedanā vatthu . Cittadhammānaṃ itarupādānavatthutā tatiyacatutthaganthayojanāyaṃ vuttanayā eva. Kāyavedanānaṃ chandadosāgativatthutā kāmoghabyāpādakāyaganthayojanāyaṃ vuttanayā eva. Santatighanaggahaṇavasena sarāgādicitte sammoho hotīti mohāgatiyā cittaṃ vatthu. Dhammasabhāvānavabodhe bhayaṃ hotīti bhayāgatiyā dhammā vatthu.

    ཨཱཧཱརསམུདཡཱ ཀཱཡསྶ སམུདཡཱ, ཕསྶསམུདཡཱ ཝེདནཱནཾ སམུདཡོ, (སཾ॰ ནི॰ ༥.༤༠༨) སངྑཱརཔཙྩཡཱ ཝིཉྙཱཎཾ, ཝིཉྙཱཎཔཙྩཡཱ ནཱམརཱུཔནྟི (མ॰ ནི॰ ༣.༡༢༦; ཨུདཱ॰ ༡; ཝིབྷ॰ ༢༢༥) ཝཙནཏོ ཀཱཡཱདཱིནཾ སམུདཡབྷཱུཏཱ ཀབལཱི༹ཀཱརཕསྶམནོསཉྩེཏནཱཝིཉྙཱཎཱཧཱརཱ ཀཱཡཱདིཔརིཛཱནནེན པརིཉྙཱཏཱ ཧོནྟཱིཏི ཨཱཧ ‘‘ཙཏུབྦིདྷཱཧཱརཔརིཉྙཏྠ’’ནྟི། པཀརཎནཡོཏི ནེཏྟིཔཀརཎཝསེན སུཏྟནྟསཾཝཎྞནཱནཡོ།

    Āhārasamudayā kāyassa samudayā, phassasamudayā vedanānaṃ samudayo, (saṃ. ni. 5.408) saṅkhārapaccayā viññāṇaṃ, viññāṇapaccayā nāmarūpanti (ma. ni. 3.126; udā. 1; vibha. 225) vacanato kāyādīnaṃ samudayabhūtā kabaḷīkāraphassamanosañcetanāviññāṇāhārā kāyādiparijānanena pariññātā hontīti āha ‘‘catubbidhāhārapariññattha’’nti. Pakaraṇanayoti nettipakaraṇavasena suttantasaṃvaṇṇanānayo.

    སརཎཝསེནཱཏི ཀཱཡཱདཱིནཾ, ཀུསལཱདིདྷམྨཱནཉྩ ཨུཔདྷཱརཎཝསེན། སརནྟི གཙྪནྟི ནིབྦཱནཾ ཨེཏཱཡཱཏི སཏཱིཏི ཨིམསྨིཾ ཨཏྠེ ཨེཀཏྟེ ཨེཀསབྷཱཝེ ནིབྦཱནེ སམོསརཎཾ སམཱགམོ ཨེཀཏྟསམོསརཎཾ། ཨེཏདེཝ ཧི དསྶེཏུཾ ‘‘ཡཐཱ ཧཱི’’ཏིཨཱདི ཝུཏྟཾ།

    Saraṇavasenāti kāyādīnaṃ, kusalādidhammānañca upadhāraṇavasena. Saranti gacchanti nibbānaṃ etāyāti satīti imasmiṃ atthe ekatte ekasabhāve nibbāne samosaraṇaṃ samāgamo ekattasamosaraṇaṃ. Etadeva hi dassetuṃ ‘‘yathā hī’’tiādi vuttaṃ.

    ཨེཀནིབྦཱནཔཝེསཧེཏུབྷཱུཏོ ཝཱ སམཱནཏཱཡ ཨེཀོ སཏིཔཊྛཱནསབྷཱཝོ ཨེཀཏྟཾ, ཏཏྠ སམོསརཎཾ ཨེཀཏྟསམོསརཎཾ, ཏཾསབྷཱགཏཱཝ, ཨེཀནིབྦཱནཔཝེསཧེཏུབྷཱཝཾ པན དསྶེཏུཾ ‘‘ཡཐཱ’’ཏིཨཱདིམཱཧ། ཨེཏསྨིཾ ཨཏྠེ སརཎེཀཏྟསམོསརཎཱནི སཧེཝ སཏིཔཊྛཱནེཀབྷཱཝསྶ ཀཱརཎཏྟེན ཝུཏྟཱནཱིཏི དཊྛབྦཱནི, པུརིམསྨིཾ ཝིསུཾ། སརཎཝསེནཱཏི ཝཱ གམནཝསེནཱཏི ཨཏྠེ སཏི ཏདེཝ གམནཾ སམོསརཎནྟི, སམོསརཎེ ཝཱ སཏི-སདྡཏྠཝསེན ཨཝུཙྩམཱནེ དྷཱརཎཏཱཝ སཏཱིཏི སཏི-སདྡཏྠནྟརཱབྷཱཝཱ པུརིམཾ སཏིབྷཱཝསྶ ཀཱརཎཾ, པཙྪིམཾ ཨེཀབྷཱཝསྶཱཏི ནིབྦཱནསམོསརཎེཔི སཧིཏཱནེཝ ཏཱནི སཏིཔཊྛཱནེཀབྷཱཝསྶ ཀཱརཎཱནི ཝུཏྟཱནི ཧོནྟི།

    Ekanibbānapavesahetubhūto vā samānatāya eko satipaṭṭhānasabhāvo ekattaṃ, tattha samosaraṇaṃ ekattasamosaraṇaṃ, taṃsabhāgatāva, ekanibbānapavesahetubhāvaṃ pana dassetuṃ ‘‘yathā’’tiādimāha. Etasmiṃ atthe saraṇekattasamosaraṇāni saheva satipaṭṭhānekabhāvassa kāraṇattena vuttānīti daṭṭhabbāni, purimasmiṃ visuṃ. Saraṇavasenāti vā gamanavasenāti atthe sati tadeva gamanaṃ samosaraṇanti, samosaraṇe vā sati-saddatthavasena avuccamāne dhāraṇatāva satīti sati-saddatthantarābhāvā purimaṃ satibhāvassa kāraṇaṃ, pacchimaṃ ekabhāvassāti nibbānasamosaraṇepi sahitāneva tāni satipaṭṭhānekabhāvassa kāraṇāni vuttāni honti.

    ‘‘ཙུདྡསཝིདྷེན, ནཝཝིདྷེན, སོལ༹སཝིདྷེན, པཉྩཝིདྷེནཱ’’ཏི ཨིདཾ ཨུཔརི པཱལི༹ཡཾ (དཱི॰ ནི॰ ༢.༣༧༤) ཨཱགཏཱནཾ ཨཱནཱཔཱནཔབྦཱདཱིནཾ ཝསེན ཝུཏྟཾ, ཏེསཾ པན ཨནནྟརབྷེདཝསེན, ཏདནུགཏབྷེདཝསེན ཙ བྷཱཝནཱཡ ཨནེཀཝིདྷཏཱ ལབྦྷཏིཡེཝ, ཙཏཱུསུ དིསཱསུ ཨུཊྛཱནཀབྷཎྜསདིསཏཱ ཀཱཡཱནུཔསྶནཱདིཏཾཏཾསཏིཔཊྛཱནབྷཱཝནཱནུབྷཱཝསྶ དཊྛབྦཱ།

    ‘‘Cuddasavidhena, navavidhena, soḷasavidhena, pañcavidhenā’’ti idaṃ upari pāḷiyaṃ (dī. ni. 2.374) āgatānaṃ ānāpānapabbādīnaṃ vasena vuttaṃ, tesaṃ pana anantarabhedavasena, tadanugatabhedavasena ca bhāvanāya anekavidhatā labbhatiyeva, catūsu disāsu uṭṭhānakabhaṇḍasadisatā kāyānupassanāditaṃtaṃsatipaṭṭhānabhāvanānubhāvassa daṭṭhabbā.

    ཀཐེཏུཀམྱཏཱཔུཙྪཱ ཨིཏརཱསཾ པུཙྪཱནཾ ཨིདྷ ཨསམྦྷཝཏོ, ནིདྡེསཱདིཝསེན དེསེཏུཀམྱཏཱཡ ཙ ཏཐཱ ཝུཏྟཏྟཱ། ‘‘ཨིདྷཱ’’ཏི ཝུཙྩམཱནཔཊིཔཏྟིསམྤཱདཀསྶ བྷིཀྑུནོ སནྣིསྶཡདསྶནཾ, སོ ཙསྶ སནྣིསྶཡོ སཱསནཏོ ཨཉྙོ ནཏྠཱིཏི ཝུཏྟཾ ‘‘ཨིདྷཱཏི ཨིམསྨིཾ སཱསནེ’’ཏི། དྷམྨ…པེ॰… ལཔནམེཏཾ ཏེསཾ ཨཏྟནོ སམྨུཁཱབྷིམུཁབྷཱཝཀརཎཏྠཾ, ཏཉྩ དྷམྨསྶ སཀྐཙྩསཝནཏྠཾ། ‘‘གོཙརེ བྷིཀྑཝེ ཙརཐ སཀེ པེཏྟིཀེ ཝིསཡེ’’ཏིཨཱདི (དཱི॰ ནི॰ ༣.༨༠; སཾ॰ ནི॰ ༥.༣༧༢) ཝཙནཏོ བྷིཀྑུགོཙརཱ ཨེཏེ དྷམྨཱ, ཡདིདཾ ཀཱཡཱནུཔསྶནཱདཡོ། ཏཏྠ ཡསྨཱ ཀཱཡཱནུཔསྶནཱདིཔཊིཔཏྟིཡཱ བྷིཀྑུ ཧོཏི, ཏསྨཱ ‘‘ཀཱཡཱནུཔསྶཱི ཝིཧརཏཱི’’ཏིཨཱདིནཱ བྷིཀྑུཾ དསྶེཏི བྷིཀྑུམྷི ཏཾནིཡམཏོཏི ཨཱཧ ‘‘པཊིཔཏྟིཡཱ བྷིཀྑུབྷཱཝདསྶནཏོ’’ཏི། སཏྠུཙརིཡཱནུཝིདྷཱཡཀཏྟཱ, སཀལསཱསནསམྤཊིགྒཱཧཀཏྟཱ ཙ སབྦཔྤཀཱརཱཡ ཨནུསཱསནིཡཱ བྷཱཛནབྷཱཝོ། ཏསྨིཾ གཧིཏེཏི བྷིཀྑུམྷི གཧིཏེ། བྷིཀྑུཔརིསཱཡ ཛེཊྛབྷཱཝཏོ རཱཛགམནཉཱཡེན ཨིཏརཱ པརིསཱཔི ཨཏྠཏོ གཧིཏཱཝ ཧོནྟཱིཏི ཨཱཧ ‘‘སེསཱ’’ཏིཨཱདི། ཨེཝཾ པཋམཾ ཀཱརཎཾ ཝིབྷཛིཏྭཱ ཨིཏརམྤི ཝིབྷཛིཏུཾ ‘‘ཡོ ཙ ཨིམ’’ནྟིཨཱདི ཝུཏྟཾ།

    Kathetukamyatāpucchā itarāsaṃ pucchānaṃ idha asambhavato, niddesādivasena desetukamyatāya ca tathā vuttattā. ‘‘Idhā’’ti vuccamānapaṭipattisampādakassa bhikkhuno sannissayadassanaṃ, so cassa sannissayo sāsanato añño natthīti vuttaṃ ‘‘idhāti imasmiṃ sāsane’’ti. Dhamma…pe… lapanametaṃ tesaṃ attano sammukhābhimukhabhāvakaraṇatthaṃ, tañca dhammassa sakkaccasavanatthaṃ. ‘‘Gocare bhikkhave caratha sake pettike visaye’’tiādi (dī. ni. 3.80; saṃ. ni. 5.372) vacanato bhikkhugocarā ete dhammā, yadidaṃ kāyānupassanādayo. Tattha yasmā kāyānupassanādipaṭipattiyā bhikkhu hoti, tasmā ‘‘kāyānupassī viharatī’’tiādinā bhikkhuṃ dasseti bhikkhumhi taṃniyamatoti āha ‘‘paṭipattiyā bhikkhubhāvadassanato’’ti. Satthucariyānuvidhāyakattā, sakalasāsanasampaṭiggāhakattā ca sabbappakārāya anusāsaniyā bhājanabhāvo. Tasmiṃ gahiteti bhikkhumhi gahite. Bhikkhuparisāya jeṭṭhabhāvato rājagamanañāyena itarā parisāpi atthato gahitāva hontīti āha ‘‘sesā’’tiādi. Evaṃ paṭhamaṃ kāraṇaṃ vibhajitvā itarampi vibhajituṃ ‘‘yo ca ima’’ntiādi vuttaṃ.

    སམཾ ཙརེཡྻཱཏི ཀཱཡཱདི ཝིསམཙརིཡཾ པཧཱཡ ཀཱཡཱདཱིཧི སམཾ ཙརེཡྻ། རཱགཱདིཝཱུཔསམེན སནྟོ, ཨིནྡྲིཡདམེན དནྟོ, ཙཏུམགྒནིཡཱམེན ནིཡཏོ, སེཊྛཙརིཏཱཡ བྲཧྨཙཱརཱི, སབྦཏྠ ཀཱཡདཎྜཱདིཨོརོཔནེན ནིདྷཱཡ དཎྜཾ། ཨརིཡབྷཱཝེ ཋིཏོ སོ ཨེཝརཱུཔོ བཱཧིཏཔཱཔསམིཏཔཱཔབྷིནྣཀིལེསཏཱཧི ‘‘བྲཱཧྨཎོ, སམཎོ, བྷིཀྑཱུ’’ཏི ཙ ཝེདིཏབྦོ།

    Samaṃ careyyāti kāyādi visamacariyaṃ pahāya kāyādīhi samaṃ careyya. Rāgādivūpasamena santo, indriyadamena danto, catumagganiyāmena niyato, seṭṭhacaritāya brahmacārī, sabbattha kāyadaṇḍādioropanena nidhāya daṇḍaṃ. Ariyabhāve ṭhito so evarūpo bāhitapāpasamitapāpabhinnakilesatāhi ‘‘brāhmaṇo, samaṇo, bhikkhū’’ti ca veditabbo.

    ‘‘ཨཡཉྩེཝ ཀཱཡོ, བཧིདྡྷཱ ཙ ནཱམརཱུཔ’’ནྟིཨཱདཱིསུ ཁནྡྷཔཉྩཀཾ, ཏཐཱ ‘‘སུཁཉྩ ཀཱཡེན པཊིསཾཝེདེཏཱི’’ཏིཨཱདཱིསུ (མ॰ ནི॰ ༡.༢༧༡, ༢༨༧; པཱརཱ॰ ༡༡), ‘‘ཡཱ ཏསྨིཾ སམཡེ ཀཱཡསྶ པསྶདྡྷི པཊིཔྤསྶདྡྷཱི’’ཏིཨཱདཱིསུ ཙ ཝེདནཱདཡོ ཙེཏསིཀཱ ཁནྡྷཱ ཀཱཡོཏི ཝུཙྩནྟཱིཏི ཏཏོ ཝིསེསནཏྠཾ ‘‘ཀཱཡེཏི རཱུཔཀཱཡེ’’ཏི ཨཱཧ། ཀེསཱདཱིནཉྩ དྷམྨཱནནྟི ཀེསཱདིསཉྙིཏཱནཾ བྷཱུཏུཔཱདཱདྷམྨཱནཾ། ཨེཝཾ ‘‘ཙཡཊྛོ སརཱིརཊྛོ ཀཱཡཊྛོ’’ཏི སདྡནཡེན ཀཱཡ-སདྡཾ དསྶེཏྭཱ ཨིདཱནི ནིརུཏྟིནཡེནཔི ཏཾ དསྶེཏུཾ ‘‘ཡཐཱ ཙཱ’’ཏིཨཱདི ཝུཏྟཾ། ཨཱཡནྟཱིཏི ཨུཔྤཛྫནྟི།

    ‘‘Ayañceva kāyo, bahiddhā ca nāmarūpa’’ntiādīsu khandhapañcakaṃ, tathā ‘‘sukhañca kāyena paṭisaṃvedetī’’tiādīsu (ma. ni. 1.271, 287; pārā. 11), ‘‘yā tasmiṃ samaye kāyassa passaddhi paṭippassaddhī’’tiādīsu ca vedanādayo cetasikā khandhā kāyoti vuccantīti tato visesanatthaṃ ‘‘kāyeti rūpakāye’’ti āha. Kesādīnañca dhammānanti kesādisaññitānaṃ bhūtupādādhammānaṃ. Evaṃ ‘‘cayaṭṭho sarīraṭṭho kāyaṭṭho’’ti saddanayena kāya-saddaṃ dassetvā idāni niruttinayenapi taṃ dassetuṃ ‘‘yathā cā’’tiādi vuttaṃ. Āyantīti uppajjanti.

    ཨསམྨིསྶཏོཏི ཝེདནཱདཡོཔི ཨེཏྠ སིཏཱ, ཨེཏྠ པཊིབདྡྷཱཏི ཀཱཡེ ཝེདནཱདིཨནུཔསྶནཱཔསངྒེཔི ཨཱཔནྣེ ཏཏོ ཨསམྨིསྶཏོཏི ཨཏྠོ། སམཱུཧཝིསཡཏཱཡ ཙསྶ ཀཱཡ-སདྡསྶ, སམུདཱཡུཔཱདཱནཏཱཡ ཙ ཨསུབྷཱཀཱརསྶ ‘‘ཀཱཡེ’’ཏི ཨེཀཝཙནཾ, ཏཐཱ ཨཱརམྨཎཱདིཝིབྷཱགེན ཨནེཀབྷེདབྷིནྣམྤི ཙིཏྟཾ ཙིཏྟབྷཱཝསཱམཉྙེན ཨེཀཛ྄ཛྷཾ གཧེཏྭཱ ‘‘ཙིཏྟེ’’ཏི ཨེཀཝཙནཾ, ཝེདནཱ པན སུཁཱདིབྷེདབྷིནྣཱ ཝིསུཾ ཝིསུཾ ཨནུཔསྶིཏབྦཱཏི དསྶེནྟེན ‘‘ཝེདནཱསཱུ’’ཏི བཧུཝཙནེན ཝུཏྟཱ, ཏཐེཝ ཙ ནིདྡེསོ པཝཏྟིཏོ, དྷམྨཱ ཙ པརོཔཎྞཱསབྷེདཱ, ཨནུཔསྶིཏབྦཱཀཱརེན ཙ ཨནེཀབྷེདཱ ཨེཝཱཏི ཏེཔི བཧུཝཙནཝསེནེཝ ཝུཏྟཱ།

    Asammissatoti vedanādayopi ettha sitā, ettha paṭibaddhāti kāye vedanādianupassanāpasaṅgepi āpanne tato asammissatoti attho. Samūhavisayatāya cassa kāya-saddassa, samudāyupādānatāya ca asubhākārassa ‘‘kāye’’ti ekavacanaṃ, tathā ārammaṇādivibhāgena anekabhedabhinnampi cittaṃ cittabhāvasāmaññena ekajjhaṃ gahetvā ‘‘citte’’ti ekavacanaṃ, vedanā pana sukhādibhedabhinnā visuṃ visuṃ anupassitabbāti dassentena ‘‘vedanāsū’’ti bahuvacanena vuttā, tatheva ca niddeso pavattito, dhammā ca paropaṇṇāsabhedā, anupassitabbākārena ca anekabhedā evāti tepi bahuvacanavaseneva vuttā.

    ཨཝཡཝཱིགཱཧསམཉྙཱཏིདྷཱཝནསཱརཱདཱནཱབྷིནིཝེསནིསེདྷནཏྠཾ ཀཱཡཾ ཨངྒཔཙྩངྒེཧི, ཏཱནི ཙ ཀེསཱདཱིཧི, ཀེསཱདིཀེ ཙ བྷཱུཏུཔཱདཱཡརཱུཔེཧི ཝིནིབྦྷུཉྫནྟོ ‘‘ཏཐཱ ན ཀཱཡེ’’ཏིཨཱདིམཱཧ། པཱསཱདཱདིནགརཱཝཡཝསམཱུཧེ ཨཝཡཝཱིཝཱདིནོཔི ཨཝཡཝཱིགཱཧཾ ན ཀརོནྟི, ‘‘ནགརཾ ནཱམ ཀོཙི ཨཏྠོ ཨཏྠཱི’’ཏི པན ཀེསཉྩི སམཉྙཱཏིདྷཱཝནཾ སིཡཱཏི ཨིཏྠིཔུརིསཱདིསམཉྙཱཏིདྷཱཝནེ ནགརནིདསྶནཾ ཝུཏྟཾ། ཨངྒཔཙྩངྒསམཱུཧོ, ཀེསལོམཱདིསམཱུཧོ, བྷཱུཏུཔཱདཱཡསམཱུཧོ ཙ ཡཐཱཝུཏྟསམཱུཧོ, ཏབྦིནིམུཏྟོ ཀཱཡོཔི ནཱམ ཀོཙི ནཏྠི, པགེཝ ཨིཏྠིཨཱདཡོཏི ཨཱཧ ‘‘ཀཱཡོ ཝཱ ཨིཏྠཱི ཝཱ པུརིསོ ཝཱ ཨཉྙོ ཝཱ ཀོཙི དྷམྨོ དིསྶཏཱི’’ཏི། ‘‘ཀོཙི དྷམྨོ’’ཏི ཨིམིནཱ སཏྟཛཱིཝཱདིཾ པཊིཀྑིཔཏི, ཨཝཡཝཱི པན ཀཱཡཔཊིཀྑེཔེནེཝ པཊིཀྑིཏྟོཏི། ཡདི ཨེཝཾ ཀཐཾ ཀཱཡཱདིསམཉྙཱཏིདྷཱཝནཱནཱིཏི ཨཱཧ ‘‘ཡཐཱཝུཏྟདྷམྨ…པེ॰… ཀརོནྟཱི’’ཏི། ཏཐཱ ཏཐཱཏི ཀཱཡཱདིཨཱཀཱརེན།

    Avayavīgāhasamaññātidhāvanasārādānābhinivesanisedhanatthaṃ kāyaṃ aṅgapaccaṅgehi, tāni ca kesādīhi, kesādike ca bhūtupādāyarūpehi vinibbhuñjanto ‘‘tathā na kāye’’tiādimāha. Pāsādādinagarāvayavasamūhe avayavīvādinopi avayavīgāhaṃ na karonti, ‘‘nagaraṃ nāma koci attho atthī’’ti pana kesañci samaññātidhāvanaṃ siyāti itthipurisādisamaññātidhāvane nagaranidassanaṃ vuttaṃ. Aṅgapaccaṅgasamūho, kesalomādisamūho, bhūtupādāyasamūho ca yathāvuttasamūho, tabbinimutto kāyopi nāma koci natthi, pageva itthiādayoti āha ‘‘kāyo vā itthī vā puriso vā añño vā koci dhammo dissatī’’ti. ‘‘Koci dhammo’’ti iminā sattajīvādiṃ paṭikkhipati, avayavī pana kāyapaṭikkhepeneva paṭikkhittoti. Yadi evaṃ kathaṃ kāyādisamaññātidhāvanānīti āha ‘‘yathāvuttadhamma…pe… karontī’’ti. Tathā tathāti kāyādiākārena.

    ཡཾ པསྶཏཱིཏི ཡཾ ཨིཏྠིཾ, པུརིསཾ ཝཱ པསྶཏི། ནནུ ཙཀྑུནཱ ཨིཏྠིཔུརིསདསྶནཾ ནཏྠཱིཏི? སཙྩམེཏཾ, ‘‘ཨིཏྠིཾ པསྶཱམི, པུརིསཾ པསྶཱམཱི’’ཏི པན པཝཏྟསཉྙཱཡ ཝསེན ‘‘ཡཾ པསྶཏཱི’’ཏི ཝུཏྟཾ མིཙྪཱདསྶནེན ཝཱ དིཊྛིཡཱ ཡཾ པསྶཏི, ན ཏཾ དིཊྛཾ ཏཾ རཱུཔཱཡཏནཾ ན ཧོཏཱིཏི ཨཏྠོ ཝིཔརཱིཏགྒཱཧཝསེན མིཙྪཱཔརིཀཔྤིཏརཱུཔཏྟཱ། ཨཐ ཝཱ ཏཾ ཀེསཱདིབྷཱུཏུཔཱདཱཡསམཱུཧསངྑཱཏཾ དིཊྛཾ ན ཧོཏི, ཨཙཀྑུཝིཉྙཱཎཝིཉྙེཡྻཏྟཱ དིཊྛཾ ཝཱ ཏཾ ན ཧོཏི། ཡཾ དིཊྛཾ, ཏཾ ན པསྶཏཱིཏི ཡཾ རཱུཔཱཡཏནཾ ཀེསཱདིབྷཱུཏུཔཱདཱཡསམཱུཧསངྑཱཏཾ དིཊྛཾ, ཏཾ པཉྙཱཙཀྑུནཱ བྷཱུཏཏོ ན པསྶཏཱིཏི ཨཏྠོ། ཨཔསྶཾ བཛ྄ཛྷཏེཏི ཨིམཾ ཨཏྟབྷཱཝཾ ཡཐཱབྷཱུཏཾ པཉྙཱཙཀྑུནཱ ཨཔསྶནྟོ ‘‘ཨེཏཾ མམ, ཨེསོ ཧམསྨི, ཨེསོ མེ ཨཏྟཱ’’ཏི ཀིལེསབནྡྷནེན བཛ྄ཛྷཏི།

    Yaṃpassatīti yaṃ itthiṃ, purisaṃ vā passati. Nanu cakkhunā itthipurisadassanaṃ natthīti? Saccametaṃ, ‘‘itthiṃ passāmi, purisaṃ passāmī’’ti pana pavattasaññāya vasena ‘‘yaṃ passatī’’ti vuttaṃ micchādassanena vā diṭṭhiyā yaṃ passati, na taṃ diṭṭhaṃ taṃ rūpāyatanaṃ na hotīti attho viparītaggāhavasena micchāparikappitarūpattā. Atha vā taṃ kesādibhūtupādāyasamūhasaṅkhātaṃ diṭṭhaṃ na hoti, acakkhuviññāṇaviññeyyattā diṭṭhaṃ vā taṃ na hoti. Yaṃ diṭṭhaṃ, taṃ na passatīti yaṃ rūpāyatanaṃ kesādibhūtupādāyasamūhasaṅkhātaṃ diṭṭhaṃ, taṃ paññācakkhunā bhūtato na passatīti attho. Apassaṃ bajjhateti imaṃ attabhāvaṃ yathābhūtaṃ paññācakkhunā apassanto ‘‘etaṃ mama, eso hamasmi, eso me attā’’ti kilesabandhanena bajjhati.

    ན ཨཉྙདྷམྨཱནུཔསྶཱིཏི ན ཨཉྙསབྷཱཝཱནུཔསྶཱི, ཨསུབྷཱདིཏོ ཨཉྙཱཀཱརཱནུཔསྶཱི ན ཧོཏཱིཏི ཨཏྠོ། ‘‘ཀིཾ ཝུཏྟཾ ཧོཏཱི’’ཏིཨཱདིནཱ ཏཾ ཨེཝཏྠཾ པཱཀཊཾ ཀརོཏི། པཐཝཱིཀཱཡནྟི ཀེསཱདིཀོཊྛཱསཾ པཐཝིཾ དྷམྨསམཱུཧཏྟཱ ‘‘ཀཱཡོ’’ཏི ཝདཏི, ལཀྑཎཔཐཝིམེཝ ཝཱ ཨནེཀཔྤབྷེདཾ སཀལསརཱིརགཏཾ, པུབྦཱཔརིཡབྷཱཝེན ཙ པཝཏྟམཱནཾ སམཱུཧཝསེན གཧེཏྭཱ ‘‘ཀཱཡོ’’ཏི ཝདཏི། ‘‘ཨཱཔོཀཱཡ’’ནྟིཨཱདཱིསུཔི ཨེསེཝ ནཡོ།

    Na aññadhammānupassīti na aññasabhāvānupassī, asubhādito aññākārānupassī na hotīti attho. ‘‘Kiṃ vuttaṃ hotī’’tiādinā taṃ evatthaṃ pākaṭaṃ karoti. Pathavīkāyanti kesādikoṭṭhāsaṃ pathaviṃ dhammasamūhattā ‘‘kāyo’’ti vadati, lakkhaṇapathavimeva vā anekappabhedaṃ sakalasarīragataṃ, pubbāpariyabhāvena ca pavattamānaṃ samūhavasena gahetvā ‘‘kāyo’’ti vadati. ‘‘Āpokāya’’ntiādīsupi eseva nayo.

    ཨེཝཾ གཧེཏབྦསྶཱཏི ‘‘ཨཧཾ མམ’’ནྟི ཨེཝཾ ཨཏྟཏྟནིཡབྷཱཝེན ཨནྡྷབཱལེཧི གཧེཏབྦསྶ།

    Evaṃ gahetabbassāti ‘‘ahaṃ mama’’nti evaṃ attattaniyabhāvena andhabālehi gahetabbassa.

    ཨིདཱནི སཏྟནྣཾ ཨནུཔསྶནཱཀཱརཱནམྤི ཝསེན ཀཱཡཱནུཔསྶནཾ དསྶེཏུཾ ‘‘ཨཔིཙཱ’’ཏིཨཱདི ཨཱརདྡྷཾ། ཏཏྠ ཨནིཙྩཏོ ཨནུཔསྶཏཱིཏི ཙཏུསམུཊྛཱནིཀཾ ཀཱཡཾ ‘‘ཨནིཙྩ’’ནྟི ཨནུཔསྶཏི, ཨེཝཾ པསྶནྟོ ཨེཝཉྩསྶ ཨནིཙྩཱཀཱརམྤི ‘‘ཨནུཔསྶཏཱི’’ཏི ཝུཙྩཏི། ཏཐཱབྷཱུཏསྶ ཙསྶ ནིཙྩགྒཱཧསྶ ལེསོཔི ན ཧོཏཱིཏི ཝུཏྟཾ ‘‘ནོ ནིཙྩཏོ’’ཏི། ཏཐཱ ཧེས ‘‘ནིཙྩསཉྙཾ པཛཧཏཱི’’ཏི (པཊི॰ མ॰ ༣.༣༥) ཝུཏྟོ། ཨེཏྠ ཙ ‘‘ཨནིཙྩཏོ ཨེཝ ཨནུཔསྶཏཱི’’ཏི ཨེཝ-ཀཱརོ ལུཏྟནིདྡིཊྛོཏི ཏེན ནིཝཏྟིཏམཏྠཾ དསྶེཏུཾ ‘‘ནོ ནིཙྩཏོ’’ཏི ཝུཏྟཾ། ན ཙེཏྠ དུཀྑཏོ ཨནུཔསྶནཱདིནིཝཏྟནཾ ཨཱསངྐིཏབྦཾ པཊིཡོགཱིནིཝཏྟནཔརཏྟཱ ཨེཝ-ཀཱརསྶ, ཨུཔརི དེསནཱརུལ༹ྷཏྟཱ ཙ ཏཱསཾ། ‘‘དུཀྑཏོ ཨནུཔསྶཏཱི’’ཏིཨཱདཱིསུཔི ཨེསེཝ ནཡོ། ཨཡཾ པན ཝིསེསོ – ཨནིཙྩསྶ དུཀྑཏྟཱ ཏམེཝ ཙ ཀཱཡཾ དུཀྑཏོ ཨནུཔསྶཏི, དུཀྑསྶ ཨནཏྟཏྟཱ ཨནཏྟཏོ ཨནུཔསྶཏི། ཡསྨཱ པན ཡཾ ཨནིཙྩཾ དུཀྑཾ ཨནཏྟཱ, ན ཏཾ ཨབྷིནནྡིཏབྦཾ, ཡཉྩ ན ཨབྷིནནྡིཏབྦཾ, ན ཏཏྠ རཉྫིཏབྦཾ, ཏསྨཱ ཝུཏྟཾ ‘‘ནིབྦིནྡཏི, ནོ ནནྡཏི། ཝིརཛྫཏི, ནོ རཛྫཏཱི’’ཏི། སོ ཨེཝཾ ཨརཛྫནྟོ རཱགཾ ནིརོདྷེཏི, ནོ སམུདེཏི སམུདཡཾ ན ཀརོཏཱིཏི ཨཏྠོ། ཨེཝཾ པཊིཔནྣོ ཙ པཊིནིསྶཛྫཏི, ནོ ཨཱདིཡཏི། ཨཡཉྷི ཨནིཙྩཱདིཨནུཔསྶནཱ ཏདངྒཝསེན སདྡྷིཾ ཀཱཡཾ ཏནྣིསྶཡཁནྡྷཱབྷིསངྑཱརེཧི ཀིལེསཱནཾ པརིཙྩཛནཏོ, སངྑཏདོསདསྶནེན ཏབྦིཔརཱིཏེ ནིབྦཱནེ ཏནྣིནྣཏཱཡ པཀྑནྡནཏོ ‘‘པརིཙྩཱགཔཊིནིསྶགྒོ ཙེཝ པཀྑནྡནཔཊིནིསྶགྒོ ཙཱ’’ཏི ཝུཙྩཏི, ཏསྨཱ ཏཱཡ སམནྣཱགཏོ བྷིཀྑུ ཝུཏྟནཡེན ཀིལེསེ པརིཙྩཛཏི, ནིབྦཱནེ ཙ པཀྑནྡཏི, ཏཐཱབྷཱུཏོ ཙ ནིབྦཏྟནཝསེན ཀིལེསེ ན ཨཱདིཡཏི, ནཱཔི ཨདོསདསྶིཏཱཝསེན སངྑཏཱརམྨཎཾ, ཏེན ཝུཏྟཾ ‘‘པཊིནིསྶཛྫཏི, ནོ ཨཱདིཡཏཱི’’ཏི། ཨིདཱནིསྶ ཏཱཧི ཨནུཔསྶནཱཧི ཡེསཾ དྷམྨཱནཾ པཧཱནཾ ཧོཏི, ཏཾ དསྶེཏུཾ ‘‘ཨནིཙྩཏོ ཨནུཔསྶནྟོ ནིཙྩསཉྙཾ པཛཧཏཱི’’ཏིཨཱདི ཝུཏྟཾ། ཏཏྠ ནིཙྩསཉྙནྟི ‘‘སངྑཱརཱ ནིཙྩཱ’’ཏི ཨེཝཾ པཝཏྟཾ ཝིཔརཱིཏསཉྙཾ། དིཊྛིཙིཏྟཝིཔལླཱསཔྤཧཱནམུཁེནེཝ སཉྙཱཝིཔལླཱསཔྤཧཱནནྟི སཉྙཱགྒཧཎཾ, སཉྙཱསཱིསེན ཝཱ ཏེསམྤི གཧཎཾ དཊྛབྦཾ། ནནྡིནྟི སཔྤཱིཏིཀཏཎྷཾ། སེསཾ ཝུཏྟནཡམེཝ།

    Idāni sattannaṃ anupassanākārānampi vasena kāyānupassanaṃ dassetuṃ ‘‘apicā’’tiādi āraddhaṃ. Tattha aniccato anupassatīti catusamuṭṭhānikaṃ kāyaṃ ‘‘anicca’’nti anupassati, evaṃ passanto evañcassa aniccākārampi ‘‘anupassatī’’ti vuccati. Tathābhūtassa cassa niccaggāhassa lesopi na hotīti vuttaṃ ‘‘no niccato’’ti. Tathā hesa ‘‘niccasaññaṃ pajahatī’’ti (paṭi. ma. 3.35) vutto. Ettha ca ‘‘aniccato eva anupassatī’’ti eva-kāro luttaniddiṭṭhoti tena nivattitamatthaṃ dassetuṃ ‘‘no niccato’’ti vuttaṃ. Na cettha dukkhato anupassanādinivattanaṃ āsaṅkitabbaṃ paṭiyogīnivattanaparattā eva-kārassa, upari desanāruḷhattā ca tāsaṃ. ‘‘Dukkhato anupassatī’’tiādīsupi eseva nayo. Ayaṃ pana viseso – aniccassa dukkhattā tameva ca kāyaṃ dukkhato anupassati, dukkhassa anattattā anattato anupassati. Yasmā pana yaṃ aniccaṃ dukkhaṃ anattā, na taṃ abhinanditabbaṃ, yañca na abhinanditabbaṃ, na tattha rañjitabbaṃ, tasmā vuttaṃ ‘‘nibbindati, no nandati. Virajjati, no rajjatī’’ti. So evaṃ arajjanto rāgaṃ nirodheti, no samudeti samudayaṃ na karotīti attho. Evaṃ paṭipanno ca paṭinissajjati, no ādiyati. Ayañhi aniccādianupassanā tadaṅgavasena saddhiṃ kāyaṃ tannissayakhandhābhisaṅkhārehi kilesānaṃ pariccajanato, saṅkhatadosadassanena tabbiparīte nibbāne tanninnatāya pakkhandanato ‘‘pariccāgapaṭinissaggo ceva pakkhandanapaṭinissaggo cā’’ti vuccati, tasmā tāya samannāgato bhikkhu vuttanayena kilese pariccajati, nibbāne ca pakkhandati, tathābhūto ca nibbattanavasena kilese na ādiyati, nāpi adosadassitāvasena saṅkhatārammaṇaṃ, tena vuttaṃ ‘‘paṭinissajjati, no ādiyatī’’ti. Idānissa tāhi anupassanāhi yesaṃ dhammānaṃ pahānaṃ hoti, taṃ dassetuṃ ‘‘aniccato anupassanto niccasaññaṃ pajahatī’’tiādi vuttaṃ. Tattha niccasaññanti ‘‘saṅkhārā niccā’’ti evaṃ pavattaṃ viparītasaññaṃ. Diṭṭhicittavipallāsappahānamukheneva saññāvipallāsappahānanti saññāggahaṇaṃ, saññāsīsena vā tesampi gahaṇaṃ daṭṭhabbaṃ. Nandinti sappītikataṇhaṃ. Sesaṃ vuttanayameva.

    ‘‘ཝིཧརཏཱི’’ཏི ཨིམིནཱ ཀཱཡཱནུཔསྶནཱསམངྒིནོ ཨིརིཡཱཔཐཝིཧཱརོ ཝུཏྟོཏི ཨཱཧ ‘‘ཨིརིཡཏཱི’’ཏི, ཨིརིཡཱཔཐཾ པཝཏྟེཏཱིཏི ཨཏྠོ། ཨཱརམྨཎཀརཎཝསེན ཨབྷིབྱཱཔནཏོ ‘‘ཏཱིསུ བྷཝེསཱུ’’ཏི ཝུཏྟཾ, ཨུཔྤཛྫནཝསེན པན ཀིལེསཱ པརིཏྟབྷཱུམཀཱ ཨེཝཱཏི། ཡདིཔི ཀིལེསཱནཾ པཧཱནཾ ཨཱཏཱཔནནྟི ཏཾ སམྨཱདིཊྛིཨཱདཱིནམྤི ཨཏྠེཝ, ཨཱཏཔྤ-སདྡོ ཝིཡ པན ཨཱཏཱཔསདྡོ ཝཱིརིཡེཡེཝ ནིརུལ༹ྷོཏི ཝུཏྟཾ ‘‘ཝཱིརིཡསྶེཏཾ ནཱམ’’ནྟི། ཨཐ ཝཱ པཊིཔཀྑཔྤཧཱནེ སམྤཡུཏྟདྷམྨཱནཾ ཨབྦྷུསྶཧནཝསེན པཝཏྟམཱནསྶ ཝཱིརིཡསྶ སཱཏིསཡཾ ཏདཱཏཱཔནནྟི ཝཱིརིཡམེཝ ཏཐཱ ཝུཙྩཏི, ན ཨཉྙེ དྷམྨཱ། ཨཱཏཱཔཱིཏི ཙཱཡམཱིཀཱརོ པསཾསཱཡ, ཨཏིསཡསྶ ཝཱ དཱིཔཀོཏི ཨཱཏཱཔཱིགཧཎེན སམྨཔྤདྷཱནསམངྒིཏཾ དསྶེཏི། སམྨཱ, སམནྟཏོ, སཱམཉྩ པཛཱནནྟོ སམྤཛཱནོ, ཨསམྨིསྶཏོ ཝཝཏྠཱནེ ཨཉྙདྷམྨཱནུཔསྶིཏཱབྷཱཝེན སམྨཱ ཨཝིཔརཱིཏཾ, སབྦཱཀཱརཔཛཱནནེན སམནྟཏོ, ཨུཔརཱུཔརི ཝིསེསཱཝཧབྷཱཝེན པཝཏྟིཡཱ སཱམཾ པཛཱནནྟོཏི ཨཏྠོ ། ཡདི པཉྙཱཡ ཨནུཔསྶཏི, ཀཐཾ སཏིཔཊྛཱནཏཱཏི ཨཱཧ ‘‘ན ཧཱི’’ཏིཨཱདི། སབྦཏྠིཀནྟི སབྦཏྠ བྷཝཾ སབྦཏྠ ལཱིནེ, ཨུདྡྷཏེ ཙ ཙིཏྟེ ཨིཙྪིཏབྦཏྟཱ། སབྦེ ཝཱ ལཱིནེ, ཨུདྡྷཏེ ཙ བྷཱཝེཏབྦཱ བོཛ྄ཛྷངྒཱ ཨཏྠིཀཱ ཨེཏཱཡཱཏི སབྦཏྠིཀཱ། སཏིཡཱ ལདྡྷུཔཀཱརཱཡ ཨེཝ པཉྙཱཡ ཨེཏྠ ཡཐཱཝུཏྟེ ཀཱཡེ ཀམྨཊྛཱནིཀོ བྷིཀྑུ ཀཱཡཱནུཔསྶཱི ཝིཧརཏི། ཨནྟོ སངྑེཔོ ཨནྟོཨོལཱིཡནོ, ཀོསཛྫནྟི ཨཏྠོ། ཨུཔཱཡཔརིགྒཧེཏི ཨེཏྠ སཱིལཝིསོདྷནཱདི, གཎནཱདི, ཨུགྒཧཀོསལླཱདི ཙ ཨུཔཱཡོ, ཏབྦིཔརིཡཱཡཏོ ཨནུཔཱཡོ ཝེདིཏབྦོ། ཡསྨཱ ཙ ཨུཔཊྛིཏསྶཏི ཡཐཱཝུཏྟཾ ཨུཔཱཡཾ ན པརིཙྩཛཏི, ཨནུཔཱཡཉྩ ན ཨུཔཱདིཡཏི, ཏསྨཱ ཝུཏྟཾ ‘‘མུཊྛསྶཏཱི …པེ॰… ཨསམཏྠོ ཧོཏཱི’’ཏི། ཏེནཱཏི ཨུཔཱཡཱནུཔཱཡཱནཾ པརིགྒཧཔརིཝཛྫནེསུ, པརིཙྩཱགཱཔརིགྒཧེསུ ཙ ཨསམཏྠབྷཱཝེན། ཨསྶ ཡོགིནོ།

    ‘‘Viharatī’’ti iminā kāyānupassanāsamaṅgino iriyāpathavihāro vuttoti āha ‘‘iriyatī’’ti, iriyāpathaṃ pavattetīti attho. Ārammaṇakaraṇavasena abhibyāpanato ‘‘tīsu bhavesū’’ti vuttaṃ, uppajjanavasena pana kilesā parittabhūmakā evāti. Yadipi kilesānaṃ pahānaṃ ātāpananti taṃ sammādiṭṭhiādīnampi attheva, ātappa-saddo viya pana ātāpasaddo vīriyeyeva niruḷhoti vuttaṃ ‘‘vīriyassetaṃ nāma’’nti. Atha vā paṭipakkhappahāne sampayuttadhammānaṃ abbhussahanavasena pavattamānassa vīriyassa sātisayaṃ tadātāpananti vīriyameva tathā vuccati, na aññe dhammā. Ātāpīti cāyamīkāro pasaṃsāya, atisayassa vā dīpakoti ātāpīgahaṇena sammappadhānasamaṅgitaṃ dasseti. Sammā, samantato, sāmañca pajānanto sampajāno, asammissato vavatthāne aññadhammānupassitābhāvena sammā aviparītaṃ, sabbākārapajānanena samantato, uparūpari visesāvahabhāvena pavattiyā sāmaṃ pajānantoti attho . Yadi paññāya anupassati, kathaṃ satipaṭṭhānatāti āha ‘‘na hī’’tiādi. Sabbatthikanti sabbattha bhavaṃ sabbattha līne, uddhate ca citte icchitabbattā. Sabbe vā līne, uddhate ca bhāvetabbā bojjhaṅgā atthikā etāyāti sabbatthikā. Satiyā laddhupakārāya eva paññāya ettha yathāvutte kāye kammaṭṭhāniko bhikkhu kāyānupassī viharati. Anto saṅkhepo antoolīyano, kosajjanti attho. Upāyapariggaheti ettha sīlavisodhanādi, gaṇanādi, uggahakosallādi ca upāyo, tabbipariyāyato anupāyo veditabbo. Yasmā ca upaṭṭhitassati yathāvuttaṃ upāyaṃ na pariccajati, anupāyañca na upādiyati, tasmā vuttaṃ ‘‘muṭṭhassatī…pe… asamattho hotī’’ti. Tenāti upāyānupāyānaṃ pariggahaparivajjanesu, pariccāgāpariggahesu ca asamatthabhāvena. Assa yogino.

    ཡསྨཱ སཏིཡེཝེཏྠ སཏིཔཊྛཱནཾ ཝུཏྟཾ, ཏསྨཱསྶ སམྤཡུཏྟདྷམྨཱ ཝཱིརིཡཱདཡོ ཨངྒནྟི ཨཱཧ ‘‘སམྤཡོགངྒཉྩསྶ དསྶེཏྭཱ’’ཏི། ཨངྒ-སདྡོ ཙེཏྠ ཀཱརཎཔརིཡཱཡོ དཊྛབྦོ། སཏིགྒཧཎེནེཝ ཙེཏྠ སམཱདྷིསྶཱཔི གཧཎཾ དཊྛབྦཾ ཏསྶཱ སམཱདྷིཀྑནྡྷེ སངྒཧིཏཏྟཱ། ཡསྨཱ ཝཱ སཏིསཱིསེནཱཡཾ དེསནཱ། ན ཧི ཀེཝལཱཡ སཏིཡཱ ཀིལེསཔྤཧཱནཾ སམྦྷཝཏི, ནིབྦཱནཱདྷིགམོ ཝཱ, ནཱཔི ཀེཝལཱ སཏི པཝཏྟཏི, ཏསྨཱསྶ ཛྷཱནདེསནཱཡཾ སཝིཏཀྐཱདིཝཙནསྶ ཝིཡ སམྤཡོགངྒདསྶནཏཱཏི ཨངྒ-སདྡསྶ ཨཝཡཝཔརིཡཱཡཏཱ དཊྛབྦཱ། པཧཱནངྒནྟི ‘‘ཝིཝིཙྩེཝ ཀཱམེཧཱི’’ཏིཨཱདཱིསུ (དཱི॰ ནི॰ ༡.༢༢༦; མ॰ ནི॰ ༡.༢༧༡, ༢༨༧, ༢༩༧; སཾ॰ ནི॰ ༢.༡༥༢; ཨ॰ ནི॰ ༤.༡༢༣; པཱརཱ॰ ༡༡) ཝིཡ པཧཱཏབྦངྒཾ དསྶེཏུཾ། ཡསྨཱ ཨེཏྠ ལོཀིཡམགྒོ ཨདྷིཔྤེཏོ, ན ལོཀུཏྟརམགྒོ, ཏསྨཱ པུབྦབྷཱགིཡམེཝ ཝིནཡཾ དསྶེནྟོ ‘‘ཏདངྒཝིནཡེན ཝཱ ཝིཀྑམྦྷནཝིནཡེན ཝཱ’’ཏི ཨཱཧ། ཏེསཾ དྷམྨཱནནྟི ཝེདནཱདིདྷམྨཱནཾ། ཏེསཉྷི ཏཏྠ ཨནདྷིཔྤེཏཏྟཱ ‘‘ཨཏྠུདྡྷཱརནཡེནེཏཾ ཝུཏྟ’’ནྟི ཝུཏྟཾ། ཏཏྠཱཏི ཝིབྷངྒེ། ཨེཏྠཱཏི ‘‘ལོཀེ’’ཏི ཨེཏསྨིཾ པདེ།

    Yasmā satiyevettha satipaṭṭhānaṃ vuttaṃ, tasmāssa sampayuttadhammā vīriyādayo aṅganti āha ‘‘sampayogaṅgañcassa dassetvā’’ti. Aṅga-saddo cettha kāraṇapariyāyo daṭṭhabbo. Satiggahaṇeneva cettha samādhissāpi gahaṇaṃ daṭṭhabbaṃ tassā samādhikkhandhe saṅgahitattā. Yasmā vā satisīsenāyaṃ desanā. Na hi kevalāya satiyā kilesappahānaṃ sambhavati, nibbānādhigamo vā, nāpi kevalā sati pavattati, tasmāssa jhānadesanāyaṃ savitakkādivacanassa viya sampayogaṅgadassanatāti aṅga-saddassa avayavapariyāyatā daṭṭhabbā. Pahānaṅganti ‘‘vivicceva kāmehī’’tiādīsu (dī. ni. 1.226; ma. ni. 1.271, 287, 297; saṃ. ni. 2.152; a. ni. 4.123; pārā. 11) viya pahātabbaṅgaṃ dassetuṃ. Yasmā ettha lokiyamaggo adhippeto, na lokuttaramaggo, tasmā pubbabhāgiyameva vinayaṃ dassento ‘‘tadaṅgavinayena vā vikkhambhanavinayena vā’’ti āha. Tesaṃ dhammānanti vedanādidhammānaṃ. Tesañhi tattha anadhippetattā ‘‘atthuddhāranayenetaṃ vutta’’nti vuttaṃ. Tatthāti vibhaṅge. Etthāti ‘‘loke’’ti etasmiṃ pade.

    ཨཝིསེསེན དྭཱིཧིཔི ནཱིཝརཎཔྤཧཱནཾ ཝུཏྟནྟི ཀཏྭཱ པུན ཨེཀེཀེན ཝུཏྟཾ པཧཱནཝིསེསཾ དསྶེཏུཾ ‘‘ཝིསེསེནཱ’’ཏི ཨཱཧ། ཨཐ ཝཱ ‘‘ཝིནེཡྻ ནཱིཝརཎཱནཱི’’ཏི ཨཝཏྭཱ ཨབྷིཛ྄ཛྷཱདོམནསྶཝིནཡཝཙནསྶ པཡོཛནཾ དསྶེནྟོ ‘‘ཝིསེསེནཱ’’ཏིཨཱདིམཱཧ། ཀཱཡཱནུཔསྶནཱབྷཱཝནཱཡ ཧི ཨུཛུཝིཔཙྩནཱིཀཱནཾ ཨནུརོདྷཝིརོདྷཱདཱིནཾ པཧཱནདསྶནཾ ཨེཏསྶ པཡོཛནནྟི། ཀཱཡསམྤཏྟིམཱུལཀསྶཱཏི རཱུཔབལཡོབྦནཱརོགྱཱདིསརཱིརསམྤདཱནིམིཏྟསྶ། ཝུཏྟཝིཔརིཡཱཡཏོ ཀཱཡཝིཔཏྟིམཱུལཀོ ཝིརོདྷོ ཝེདིཏབྦོ། ཀཱཡབྷཱཝནཱཡཱཏི ཀཱཡཱནུཔསྶནཱབྷཱཝནཱཡ། སཱ ཧི ཨིདྷ ཀཱཡབྷཱཝནཱཏི ཨདྷིཔྤེཏཱ། སུབྷསུཁབྷཱཝཱདཱིནནྟི ཨཱདི-སདྡེན མནུཉྙནིཙྩཏཱདིསངྒཧོ དཊྛབྦོ། ཨསུབྷཱསུཁབྷཱཝཱདཱིནནྟི ཨེཏྠ པན ཨཱདི-སདྡེན ཨམནུཉྙཨནིཙྩཏཱདཱིནཾ། ཏེནཱཏི ཨནུརོདྷཱདིཔྤཧཱནཝཙནེན། ‘‘ཡོགཱནུབྷཱཝོ ཧཱི’’ཏིཨཱདི ཝུཏྟསྶེཝཏྠསྶ པཱཀཊཀརཎཾ། ཡོགཱནུབྷཱཝོ ཧི བྷཱཝནཱནུབྷཱཝོ། ཡོགསམཏྠོཏི ཡོགམནུཡུཉྫིཏུཾ སམཏྠོ། པུརིམེན ཧི ‘‘ཨནུརོདྷཝིརོདྷཝིཔྤམུཏྟོ’’ཏིཨཱདིཝཙནེན བྷཱཝནཾ ཨནུཡུཏྟསྶ ཨཱནིསཾསོ ཝུཏྟོ, དུཏིཡེན བྷཱཝནཾ ཨནུཡུཉྫནྟསྶ པཊིཔཏྟི། ན ཧི ཨནུརོདྷཝིརོདྷཱདཱིཧི ཨུཔདྡུཏསྶ བྷཱཝནཱ ཨིཛ྄ཛྷཏི།

    Avisesena dvīhipi nīvaraṇappahānaṃ vuttanti katvā puna ekekena vuttaṃ pahānavisesaṃ dassetuṃ ‘‘visesenā’’ti āha. Atha vā ‘‘vineyya nīvaraṇānī’’ti avatvā abhijjhādomanassavinayavacanassa payojanaṃ dassento ‘‘visesenā’’tiādimāha. Kāyānupassanābhāvanāya hi ujuvipaccanīkānaṃ anurodhavirodhādīnaṃ pahānadassanaṃ etassa payojananti. Kāyasampattimūlakassāti rūpabalayobbanārogyādisarīrasampadānimittassa. Vuttavipariyāyato kāyavipattimūlako virodho veditabbo. Kāyabhāvanāyāti kāyānupassanābhāvanāya. Sā hi idha kāyabhāvanāti adhippetā. Subhasukhabhāvādīnanti ādi-saddena manuññaniccatādisaṅgaho daṭṭhabbo. Asubhāsukhabhāvādīnanti ettha pana ādi-saddena amanuññaaniccatādīnaṃ. Tenāti anurodhādippahānavacanena. ‘‘Yogānubhāvo hī’’tiādi vuttassevatthassa pākaṭakaraṇaṃ. Yogānubhāvo hi bhāvanānubhāvo. Yogasamatthoti yogamanuyuñjituṃ samattho. Purimena hi ‘‘anurodhavirodhavippamutto’’tiādivacanena bhāvanaṃ anuyuttassa ānisaṃso vutto, dutiyena bhāvanaṃ anuyuñjantassa paṭipatti. Na hi anurodhavirodhādīhi upaddutassa bhāvanā ijjhati.

    ཨནུཔསྶཱིཏི ཨེཏྠཱཏི ‘‘ཨནུཔསྶཱི’’ཏི ཨེཏསྨིཾ པདེ ལབྦྷམཱནཱཡ ཨནུཔསྶནཱཡ ཨནུཔསྶནཱཛོཏནཱཡ ཀམྨཊྛཱནཾ ཝུཏྟནྟི ཨེཝམཏྠོ དཊྛབྦོ, ཨཉྙཐཱ ‘‘ཨནུཔསྶནཱཡཱ’’ཏི ཀརཎཝཙནཾ ན ཡུཛྫེཡྻ། ཨནུཔསྶནཱ ཨེཝ ཧི ཀམྨཊྛཱནཾ, ན ཨེཏྠ ཨཱརམྨཎཾ ཨདྷིཔྤེཏཾ, ཡུཛྫཏི ཝཱ། ཀཱཡཔརིཧརཎཾ ཝུཏྟནྟི སམྦནྡྷོ། ཀམྨཊྛཱནཔརིཧརཎསྶ ཙེཏྠ ཨཏྠསིདྡྷཏྟཱ ‘‘ཀཱཡཔརིཧརཎ’’ནྟྭེཝ ཝུཏྟཾ། ཀམྨཊྛཱནིཀསྶ ཧི ཀཱཡཔརིཧརཎཾ ཡཱཝདེཝ ཀམྨཊྛཱནཾ པརིཧརཎཏྠནྟི། ཀམྨཊྛཱནཔརིཧརཎསྶ ཝཱ ‘‘ཨཱཏཱཔཱི’’ཏིཨཱདིནཱ (དཱི॰ ནི॰ ༢.༣༧༣) ཝུཙྩམཱནཏྟཱ ‘‘ཀཱཡཔརིཧརཎ’’ནྟྭེཝ ཝུཏྟཾ། ཀཱཡགྒཧཎེན ཝཱ ནཱམཀཱཡསྶཱཔི གཧཎཾ, ན རཱུཔཀཱཡསྶེཝ, ཏེནེཝ ཀམྨཊྛཱནཔརིཧརཎམྤི སངྒཧིཏཾ ཧོཏི, ཨེཝཉྩ ཀཏྭཱ ‘‘ཝིཧརཏཱིཏི ཨེཏྠ ཝུཏྟཝིཧཱརེནཱ’’ཏི ཨེཏྠགྒཧཎཉྩ སམཏྠིཏཾ ཧོཏི ‘‘ཀཱཡཱནུཔསྶཱི ཝིཧརཏཱི’’ཏི ཝིཧཱརསྶ ཝིསེསེཏྭཱ ཝུཏྟཏྟཱ། ‘‘ཨཱཏཱཔཱི’’ཏིཨཱདི པན སངྑེཔཏོ ཝུཏྟསྶ ཀམྨཊྛཱནཔརིཧརཎསྶ སཧ སཱདྷནེན ཝིཏྠཱརེཏྭཱ དསྶནཾ། ཨཱཏཱཔེནཱཏི ཨཱཏཱཔགྒཧཎེན། ‘‘སཏིསམྤཛཉྙེནཱ’’ཏིཨཱདཱིསུཔི ཨེསེཝ ནཡོ། སབྦཏྠཀཀམྨཊྛཱནནྟི བུདྡྷཱནུསྶཏི, མེཏྟཱ, མརཎསྶཏི , ཨསུབྷབྷཱཝནཱ ཙ། ཨིདཉྷི ཙཏུཀྐཾ ཡོགིནཱ པརིཧརིཡམཱནཾ ‘‘སབྦཏྠཀཀམྨཊྛཱན’’ནྟི ཝུཙྩཏི, སབྦཏྠ ཀམྨཊྛཱནཱནུཡོགསྶཱརཀྑབྷཱུཏཏྟཱ སཏིསམྤཛཉྙབལེན ཨཝིཙྪིནྣསྶ པརིཧརིཏབྦཏྟཱ སཏིསམྤཛཉྙགྒཧཎེན ཏསྶ ཝུཏྟཏཱ ཝུཏྟཱ། སཏིཡཱ ཝཱ སམཐོ ཝུཏྟོ ཏསྶཱ སམཱདྷིཀྑནྡྷེན སངྒཧིཏཏྟཱ།

    Anupassītietthāti ‘‘anupassī’’ti etasmiṃ pade labbhamānāya anupassanāya anupassanājotanāya kammaṭṭhānaṃ vuttanti evamattho daṭṭhabbo, aññathā ‘‘anupassanāyā’’ti karaṇavacanaṃ na yujjeyya. Anupassanā eva hi kammaṭṭhānaṃ, na ettha ārammaṇaṃ adhippetaṃ, yujjati vā. Kāyapariharaṇaṃ vuttanti sambandho. Kammaṭṭhānapariharaṇassa cettha atthasiddhattā ‘‘kāyapariharaṇa’’ntveva vuttaṃ. Kammaṭṭhānikassa hi kāyapariharaṇaṃ yāvadeva kammaṭṭhānaṃ pariharaṇatthanti. Kammaṭṭhānapariharaṇassa vā ‘‘ātāpī’’tiādinā (dī. ni. 2.373) vuccamānattā ‘‘kāyapariharaṇa’’ntveva vuttaṃ. Kāyaggahaṇena vā nāmakāyassāpi gahaṇaṃ, na rūpakāyasseva, teneva kammaṭṭhānapariharaṇampi saṅgahitaṃ hoti, evañca katvā ‘‘viharatīti ettha vuttavihārenā’’ti etthaggahaṇañca samatthitaṃ hoti ‘‘kāyānupassī viharatī’’ti vihārassa visesetvā vuttattā. ‘‘Ātāpī’’tiādi pana saṅkhepato vuttassa kammaṭṭhānapariharaṇassa saha sādhanena vitthāretvā dassanaṃ. Ātāpenāti ātāpaggahaṇena. ‘‘Satisampajaññenā’’tiādīsupi eseva nayo. Sabbatthakakammaṭṭhānanti buddhānussati, mettā, maraṇassati , asubhabhāvanā ca. Idañhi catukkaṃ yoginā parihariyamānaṃ ‘‘sabbatthakakammaṭṭhāna’’nti vuccati, sabbattha kammaṭṭhānānuyogassārakkhabhūtattā satisampajaññabalena avicchinnassa pariharitabbattā satisampajaññaggahaṇena tassa vuttatā vuttā. Satiyā vā samatho vutto tassā samādhikkhandhena saṅgahitattā.

    ཝིབྷངྒེ(ཝིབྷ॰ ཀཱཡཱནུཔསྶནཱནིདྡེསེ) པན ཨཏྠོ ཝུཏྟོཏི ཡོཛནཱ། ཏེནཱཏི སདྡཏྠཾ ཨནཱདིཡིཏྭཱ བྷཱཝཏྠསྶེཝ ཝིབྷཛནཝསེན པཝཏྟེན ཝིབྷངྒཔཱཋེན སཧ། ཨཊྛཀཐཱནཡོཏི སདྡཏྠསྶཱཔི ཝིཝརཎཝསེན ཡཐཱརཧཾ ཝུཏྟོ ཨཏྠསཾཝཎྞནཱནཡོ། ཡཐཱ སཾསནྡཏཱིཏི ཡཐཱ ཨཏྠཏོ, ཨདྷིཔྤཱཡཏོ ཙ ཨཝིལོམེནྟོ ཨཉྙདཏྠུ སཾསནྡཏི སམེཏི, ཨེཝཾ ཝེདིཏབྦོ།

    Vibhaṅge(vibha. kāyānupassanāniddese) pana attho vuttoti yojanā. Tenāti saddatthaṃ anādiyitvā bhāvatthasseva vibhajanavasena pavattena vibhaṅgapāṭhena saha. Aṭṭhakathānayoti saddatthassāpi vivaraṇavasena yathārahaṃ vutto atthasaṃvaṇṇanānayo. Yathā saṃsandatīti yathā atthato, adhippāyato ca avilomento aññadatthu saṃsandati sameti, evaṃ veditabbo.

    ཝེདནཱདཱིནཾ པུན ཝཙནེཏི ཨེཏྠ ནིསྶཡཔཙྩཡབྷཱཝཝསེན ཙིཏྟདྷམྨཱནཾ ཝེདནཱསནྣིསྶིཏཏྟཱ, པཉྩཝོཀཱརབྷཝེ ཨརཱུཔདྷམྨཱནཾ རཱུཔཔཊིབདྡྷཝུཏྟིཏོ ཙ ཝེདནཱཡ ཀཱཡཱདིཨནུཔསྶནཱཔྤསངྒེཔི ཨཱཔནྣེ ཏཏོ ཨསམྨིསྶཏོ ཝཝཏྠཱནཾ དསྶནཏྠཾ, གྷནཝིནིབྦྷོགཱདིདསྶནཏྠཉྩ དུཏིཡཾ ཝེདནཱགྒཧཎཾ, ཏེན ན ཝེདནཱཡཾ ཀཱཡཱནུཔསྶཱི, ཙིཏྟདྷམྨཱནུཔསྶཱི ཝཱ, ཨཐ ཁོ ཝེདནཱནུཔསྶཱི ཨེཝཱཏི ཝེདནཱསངྑཱཏེ ཝཏྠུསྨིཾ ཝེདནཱནུཔསྶནཱཀཱརསྶེཝ དསྶནེན ཨསམྨིསྶཏོ ཝཝཏྠཱནཾ དསྶིཏཾ ཧོཏི། ཏཐཱ ‘‘ཡསྨིཾ སམཡེ སུཁཱ ཝེདནཱ, ན ཏསྨིཾ སམཡེ དུཀྑཱ, ཨདུཀྑམསུཁཱ ཝཱ ཝེདནཱ, ཡསྨིཾ ཝཱ པན སམཡེ དུཀྑཱ, ཨདུཀྑམསུཁཱ ཝཱ ཝེདནཱ, ན ཏསྨིཾ སམཡེ ཨིཏརཱ ཝེདནཱ’’ཏི ཝེདནཱབྷཱཝསཱམཉྙེ ཨཝཏྭཱ ཏཾ ཏཾ ཝེདནཾ ཝིནིབྦྷུཛྫིཏྭཱ དསྶནེན གྷནཝིནིབྦྷོགོ དྷུཝབྷཱཝཝིཝེཀོ དསྶིཏོ ཧོཏི, ཏེན ཏཱསཾ ཁཎམཏྟཱཝཊྛཱནདསྶནེན ཨནིཙྩཏཱཡ , ཏཏོ ཨེཝ དུཀྑཏཱཡ, ཨནཏྟཏཱཡ ཙ དསྶནཾ ཝིབྷཱཝིཏཾ ཧོཏི། གྷནཝིནིབྦྷོགཱདཱིཏི ཨཱདི-སདྡེན ཨཡམྤི ཨཏྠོ ཝེདིཏབྦོ། ཨཡཉྷི ཝེདནཱཡཾ ཝེདནཱནུཔསྶཱི ཨེཝ, ན ཨཉྙདྷམྨཱནུཔསྶཱི། ཀིཾ ཝུཏྟཾ ཧོཏི – ཡཐཱ ནཱམ བཱལོ ཨམཎིསབྷཱཝེཔི ཨུདཀཔུབྦུལ༹ཀེ མཎིཨཱཀཱརཱནུཔསྶཱི ཧོཏི, ན ཨེཝཾ ཨཡཾ ཋིཏིརམཎཱིཡེཔི ཝེདཡིཏེ, པགེཝ ཨིཏརསྨིཾ མནུཉྙཱཀཱརཱནུཔསྶཱི, ཨཐ ཁོ ཁཎཔབྷངྒུརཏཱཡ, ཨཝསཝཏྟིཏཱཡ ཀིལེསཱསུཙིཔགྒྷརཎཏཱཡ ཙ ཨནིཙྩཨནཏྟཨསུབྷཱཀཱརཱནུཔསྶཱི, ཝིཔརིཎཱམདུཀྑཏཱཡ, སངྑཱརདུཀྑཏཱཡ ཙ ཝིསེསཏོ དུཀྑཱནུཔསྶཱི ཡེཝཱཏི། ཨེཝཾ ཙིཏྟ དྷམྨེསུཔི ཡཐཱརཧཾ པུནཝཙནེ པཡོཛནཾ ཝཏྟབྦཾ། ལོཀིཡཱ ཨེཝ སམྨསནཙཱརསྶ ཨདྷིཔྤེཏཏྟཱ། ‘‘ཀེཝལཾ པནིདྷཱ’’ཏིཨཱདིནཱ ‘‘ཨིདྷ ཨེཏྟཀཾ ཝེདིཏབྦ’’ནྟི ཝེདིཏབྦཔརིཙྪེདཾ དསྶེཏི། ‘‘ཨེས ནཡོ’’ཏི ཨིམིནཱ ཡཐཱ ཙིཏྟཾ, དྷམྨཱ ཙ ཨནུཔསྶིཏབྦཱ, ཏཐཱ ཏཱནི ཨནུཔསྶནྟོ ཙིཏྟེ ཙིཏྟཱནུཔསྶཱི, དྷམྨེསུ དྷམྨཱནུཔསྶཱིཏི ཝེདིཏབྦོཏི ཨིམམཏྠཾ ཨཏིདིསཏི། དུཀྑཏོཏི དུཀྑསབྷཱཝཏོ, དུཀྑནྟི ཨནུཔསྶིཏབྦཱཏི ཨཏྠོ། སེསཔདདྭཡེཔི ཨེསེཝ ནཡོ།

    Vedanādīnaṃ puna vacaneti ettha nissayapaccayabhāvavasena cittadhammānaṃ vedanāsannissitattā, pañcavokārabhave arūpadhammānaṃ rūpapaṭibaddhavuttito ca vedanāya kāyādianupassanāppasaṅgepi āpanne tato asammissato vavatthānaṃ dassanatthaṃ, ghanavinibbhogādidassanatthañca dutiyaṃ vedanāggahaṇaṃ, tena na vedanāyaṃ kāyānupassī, cittadhammānupassī vā, atha kho vedanānupassī evāti vedanāsaṅkhāte vatthusmiṃ vedanānupassanākārasseva dassanena asammissato vavatthānaṃ dassitaṃ hoti. Tathā ‘‘yasmiṃ samaye sukhā vedanā, na tasmiṃ samaye dukkhā, adukkhamasukhā vā vedanā, yasmiṃ vā pana samaye dukkhā, adukkhamasukhā vā vedanā, na tasmiṃ samaye itarā vedanā’’ti vedanābhāvasāmaññe avatvā taṃ taṃ vedanaṃ vinibbhujjitvā dassanena ghanavinibbhogo dhuvabhāvaviveko dassito hoti, tena tāsaṃ khaṇamattāvaṭṭhānadassanena aniccatāya , tato eva dukkhatāya, anattatāya ca dassanaṃ vibhāvitaṃ hoti. Ghanavinibbhogādīti ādi-saddena ayampi attho veditabbo. Ayañhi vedanāyaṃ vedanānupassī eva, na aññadhammānupassī. Kiṃ vuttaṃ hoti – yathā nāma bālo amaṇisabhāvepi udakapubbuḷake maṇiākārānupassī hoti, na evaṃ ayaṃ ṭhitiramaṇīyepi vedayite, pageva itarasmiṃ manuññākārānupassī, atha kho khaṇapabhaṅguratāya, avasavattitāya kilesāsucipaggharaṇatāya ca aniccaanattaasubhākārānupassī, vipariṇāmadukkhatāya, saṅkhāradukkhatāya ca visesato dukkhānupassī yevāti. Evaṃ citta dhammesupi yathārahaṃ punavacane payojanaṃ vattabbaṃ. Lokiyā eva sammasanacārassa adhippetattā. ‘‘Kevalaṃ panidhā’’tiādinā ‘‘idha ettakaṃ veditabba’’nti veditabbaparicchedaṃ dasseti. ‘‘Esa nayo’’ti iminā yathā cittaṃ, dhammā ca anupassitabbā, tathā tāni anupassanto citte cittānupassī, dhammesu dhammānupassīti veditabboti imamatthaṃ atidisati. Dukkhatoti dukkhasabhāvato, dukkhanti anupassitabbāti attho. Sesapadadvayepi eseva nayo.

    ཡོ སུཁཾ དུཀྑཏོ ཨདྡཱཏི ཡོ བྷིཀྑུ སུཁཾ ཝེདནཾ ཝིཔརིཎཱམདུཀྑཏཱཡ ‘‘དུཀྑཱ’’ཏི པཉྙཱཙཀྑུནཱ ཨདྡཀྑི། དུཀྑཾ ཨདྡཀྑི སལླཏོཏི དུཀྑཾ ཝེདནཾ པཱིལཱ༹ཛནནཏོ, ཨནྟོཏུདནཏོ, དུནྣཱིཧརཎཏོ ཙ སལླཏོ ཨདྡཀྑི པསྶི། ཨདུཀྑམསུཁནྟི ཨུཔེཀྑཱཝེདནཾ། སནྟནྟི སུཁདུཀྑཱནི ཝིཡ ཨནོལཱ༹རིཀཏཱཡ, པཙྩཡཝསེན ཝཱུཔསནྟསབྷཱཝཏཱཡ ཙ སནྟཾ། ཨནིཙྩཏོཏི ཧུཏྭཱཨབྷཱཝཏོ, ཨུདཡཝཡཝནྟཏོ, ཏཱཝཀཱལིཀཏོ, ནིཙྩཔཊིཔཀྑཏོ ཙ ‘‘ཨནིཙྩ’’ནྟི ཡོ ཨདྡཀྑི། ས ཝེ སམྨདྡསོ བྷིཀྑུ ཨེཀཾསེན, པརིབྱཏྟཾ ཝཱ ཝེདནཱཡ སམྨཱཔསྶནཀོཏི ཨཏྠོ།

    Yo sukhaṃ dukkhato addāti yo bhikkhu sukhaṃ vedanaṃ vipariṇāmadukkhatāya ‘‘dukkhā’’ti paññācakkhunā addakkhi. Dukkhaṃ addakkhi sallatoti dukkhaṃ vedanaṃ pīḷājananato, antotudanato, dunnīharaṇato ca sallato addakkhi passi. Adukkhamasukhanti upekkhāvedanaṃ. Santanti sukhadukkhāni viya anoḷārikatāya, paccayavasena vūpasantasabhāvatāya ca santaṃ. Aniccatoti hutvāabhāvato, udayavayavantato, tāvakālikato, niccapaṭipakkhato ca ‘‘anicca’’nti yo addakkhi. Sa ve sammaddasobhikkhu ekaṃsena, paribyattaṃ vā vedanāya sammāpassanakoti attho.

    དུཀྑཱཏིཔཱིཏི སངྑཱརདུཀྑཏཱཡ དུཀྑཱ ཨིཏིཔི། ཏཾ དུཀྑསྨིནྟི སབྦཾ ཏཾ ཝེདཡིཏཾ དུཀྑསྨིཾ ཨནྟོགདྷཾ པརིཡཱཔནྣཾ ཝདཱམི སངྑཱརདུཀྑཏཱནཏིཝཏྟནཏོ། སུཁདུཀྑཏོཔི ཙཱཏི སུཁཱདཱིནཾ ཋིཏིཝིཔརིཎཱམཉཱཎསུཁཏཱཡ, ཝིཔརིཎཱམཋིཏིཨཉྙཱཎདུཀྑཏཱཡ ཙ ཝུཏྟཏྟཱ ཏིསྶོཔི ཙ སུཁཏོ, ཏིསྶོཔི ཙ དུཀྑཏོ ཨནུཔསྶིཏབྦཱཏི ཨཏྠོ། སཏྟ ཨནུཔསྶནཱ ཧེཊྛཱ པཀཱསིཏཱ ཨེཝ། སེསནྟི ཡཐཱཝུཏྟཾ སུཁཱདིཝིབྷཱགཏོ སེསཾ སཱམིསནིརཱམིསཱདིབྷེདཾ ཝེདནཱནུཔསྶནཱཡཾ ཝཏྟབྦཾ།

    Dukkhātipīti saṅkhāradukkhatāya dukkhā itipi. Taṃ dukkhasminti sabbaṃ taṃ vedayitaṃ dukkhasmiṃ antogadhaṃ pariyāpannaṃ vadāmi saṅkhāradukkhatānativattanato. Sukhadukkhatopi cāti sukhādīnaṃ ṭhitivipariṇāmañāṇasukhatāya, vipariṇāmaṭhitiaññāṇadukkhatāya ca vuttattā tissopi ca sukhato, tissopi ca dukkhato anupassitabbāti attho. Satta anupassanā heṭṭhā pakāsitā eva. Sesanti yathāvuttaṃ sukhādivibhāgato sesaṃ sāmisanirāmisādibhedaṃ vedanānupassanāyaṃ vattabbaṃ.

    ཨཱརམྨཎ…པེ॰… བྷེདཱནནྟི རཱུཔཱདིཨཱརམྨཎནཱནཏྟསྶ ནཱིལཱདིཏབྦྷེདསྶ, ཚནྡཱདིཨདྷིཔཏིནཱནཏྟསྶ ཧཱིནཱདིཏབྦྷེདསྶ, ཉཱཎཛྷཱནཱདིསཧཛཱཏནཱནཏྟསྶ སསངྑཱརིཀཱསངྑཱརིཀསཝིཏཀྐཱདིཏབྦྷེདསྶ, ཀཱམཱཝཙརཱདིབྷཱུམིནཱནཏྟསྶ ཨུཀྐཊྛམཛ྄ཛྷིམཱདིཏབྦྷེདསྶ, ཀུསལཱདིཀམྨནཱནཏྟསྶ དེཝགཏིསཾཝཏྟནིཡཏཱདིཏབྦྷེདསྶ, ཀཎྷསུཀྐཝིཔཱཀནཱནཏྟསྶ དིཊྛདྷམྨཝེདནཱིཡཏཱདིཏབྦྷེདསྶ, པརིཏྟབྷཱུམཀཱདིཀིརིཡཱནཱནཏྟསྶ ཏིཧེཏུཀཱདིཏབྦྷེདསྶ ཝསེན ཨནུཔསྶིཏབྦནྟི ཡོཛནཱ། ཨཱདི-སདྡེན སཝཏྠུཀཱཝཏྠུཀཱདིནཱནཏྟསྶ པུགྒལཏྟཡསཱདྷཱརཎཱདིཏབྦྷེདསྶ ཙ སངྒཧོ དཊྛབྦོ། སལཀྑཎསཱམཉྙལཀྑཎཱནནྟི ཕུསནཱདིཏཾཏཾལཀྑཎཱནཉྩེཝ ཨནིཙྩཏཱདིསཱམཉྙལཀྑཎཱནཉྩ ཝསེནཱཏི ཡོཛནཱ། སུཉྙཏདྷམྨསྶཱཏི ཨནཏྟཏཱསངྑཱཏསུཉྙཏཱསབྷཱཝསྶ། ཡཾ ཝིབྷཱཝེཏུཾ ཨབྷིདྷམྨེ‘‘ཏསྨིཾ ཁོ པན སམཡེ དྷམྨཱ ཧོནྟི, ཁནྡྷཱ ཧོནྟཱི’’ཏིཨཱདིནཱ (དྷ॰ ས॰ ༡༢༡) སུཉྙཏཱཝཱརདེསནཱ པཝཏྟཱ, ཏཾ པཧཱིནམེཝ པུབྦེ པཧཱིནཏྟཱ, ཏསྨཱ ཏསྶ ཏསྶ པུན པཧཱནཾ ན ཝཏྟབྦཾ། ན ཧི ཀིལེསཱ པཧཱིཡམཱནཱ ཨཱརམྨཎཝིབྷཱགེན པཧཱིཡནྟི ཨནཱགཏཱནཾཡེཝ ཨུཔྤཛྫནཱརཧཱནཾ པཧཱཏབྦཏྟཱ, ཏསྨཱ ཨབྷིཛ྄ཛྷཱདཱིནཾ ཨེཀཏྠ པཧཱནཾ ཝཏྭཱ ཨིཏརཏྠ ན ཝཏྟབྦཾ ཨེཝཱཏི ཨིམམཏྠཾ དསྶེཏི ‘‘ཀཱམཉྩེཏྠཱ’’ཏིཨཱདིནཱ། ཨཐ ཝཱ མགྒཙིཏྟཀྑཎེ ཨེཀཏྠ པཧཱིནཾ སབྦཏྠ པཧཱིནམེཝ ཧོཏཱིཏི ཝིསུཾ ཝིསུཾ པཧཱནཾ ན ཝཏྟབྦཾ། མགྒེན ཧི པཧཱིནཱཏི ཝཏྟབྦཏཾ ཨརཧནྟི། ཏཏྠ པུརིམཱཡ ཙོདནཱཡ ནཱནཱཔུགྒལཔརིཧཱརོ, ན ཧི ཨེཀསྶ པཧཱིནཾ ཏཏོ ཨཉྙསྶ པཧཱིནཾ ནཱམ ཧོཏི། པཙྪིམཱཡ ནཱནཱཙིཏྟཀྑཎིཀཔརིཧཱརོ། ནཱནཱཙིཏྟཀྑཎེཏི ཧི ལོཀིཡམགྒཙིཏྟཀྑཎེཏི ཨདྷིཔྤཱཡོ། པུབྦབྷཱགམགྒོ ཧི ཨིདྷཱདྷིཔྤེཏོ། ལོཀིཡབྷཱཝནཱཡ ཙ ཀཱཡེ པཧཱིནཾ ན ཝེདནཱདཱིསུ ཝིཀྑམྦྷིཏཾ ཧོཏི། ཡདིཔི ནཔྤཝཏྟེཡྻ, པཊིཔཀྑབྷཱཝནཱཡ སུཔྤཧཱིནཏྟཱ ཏཏྠ སཱ ‘‘ཨབྷིཛ྄ཛྷཱདོམནསྶསྶ ཨཔྤཝཏྟཱི’’ཏི ན ཝཏྟབྦཱ, ཏསྨཱ པུནཔི ཏཔྤཧཱནཾ ཝཏྟབྦམེཝ། ཨེཀཏྠ པཧཱིནཾ སེསེསུཔི པཧཱིནཾ ཧོཏཱིཏི ལོཀུཏྟརསཏིཔཊྛཱནབྷཱཝནཾ, ལོཀིཡབྷཱཝནཱཡ ཝཱ སབྦཏྠ ཨཔྤཝཏྟིམཏྟཾ སནྡྷཱཡ ཝུཏྟཾ། ‘‘པཉྩཔི ཁནྡྷཱ ཨུཔཱདཱནཀྑནྡྷཱ ལོཀོ’’ཏི (ཝིབྷ॰ ༣༦༢, ༣༦༤, ༣༦༦) ཧི ཝིབྷངྒེཙཏཱུསུཔི ཋཱནེསུ ཝུཏྟནྟི།

    Ārammaṇa…pe… bhedānanti rūpādiārammaṇanānattassa nīlāditabbhedassa, chandādiadhipatinānattassa hīnāditabbhedassa, ñāṇajhānādisahajātanānattassa sasaṅkhārikāsaṅkhārikasavitakkāditabbhedassa, kāmāvacarādibhūminānattassa ukkaṭṭhamajjhimāditabbhedassa, kusalādikammanānattassa devagatisaṃvattaniyatāditabbhedassa, kaṇhasukkavipākanānattassa diṭṭhadhammavedanīyatāditabbhedassa, parittabhūmakādikiriyānānattassa tihetukāditabbhedassa vasena anupassitabbanti yojanā. Ādi-saddena savatthukāvatthukādinānattassa puggalattayasādhāraṇāditabbhedassa ca saṅgaho daṭṭhabbo. Salakkhaṇasāmaññalakkhaṇānanti phusanāditaṃtaṃlakkhaṇānañceva aniccatādisāmaññalakkhaṇānañca vasenāti yojanā. Suññatadhammassāti anattatāsaṅkhātasuññatāsabhāvassa. Yaṃ vibhāvetuṃ abhidhamme‘‘tasmiṃ kho pana samaye dhammā honti, khandhā hontī’’tiādinā (dha. sa. 121) suññatāvāradesanā pavattā, taṃ pahīnameva pubbe pahīnattā, tasmā tassa tassa puna pahānaṃ na vattabbaṃ. Na hi kilesā pahīyamānā ārammaṇavibhāgena pahīyanti anāgatānaṃyeva uppajjanārahānaṃ pahātabbattā, tasmā abhijjhādīnaṃ ekattha pahānaṃ vatvā itarattha na vattabbaṃ evāti imamatthaṃ dasseti ‘‘kāmañcetthā’’tiādinā. Atha vā maggacittakkhaṇe ekattha pahīnaṃ sabbattha pahīnameva hotīti visuṃ visuṃ pahānaṃ na vattabbaṃ. Maggena hi pahīnāti vattabbataṃ arahanti. Tattha purimāya codanāya nānāpuggalaparihāro, na hi ekassa pahīnaṃ tato aññassa pahīnaṃ nāma hoti. Pacchimāya nānācittakkhaṇikaparihāro. Nānācittakkhaṇeti hi lokiyamaggacittakkhaṇeti adhippāyo. Pubbabhāgamaggo hi idhādhippeto. Lokiyabhāvanāya ca kāye pahīnaṃ na vedanādīsu vikkhambhitaṃ hoti. Yadipi nappavatteyya, paṭipakkhabhāvanāya suppahīnattā tattha sā ‘‘abhijjhādomanassassa appavattī’’ti na vattabbā, tasmā punapi tappahānaṃ vattabbameva. Ekattha pahīnaṃ sesesupi pahīnaṃ hotīti lokuttarasatipaṭṭhānabhāvanaṃ, lokiyabhāvanāya vā sabbattha appavattimattaṃ sandhāya vuttaṃ. ‘‘Pañcapi khandhā upādānakkhandhā loko’’ti (vibha. 362, 364, 366) hi vibhaṅgecatūsupi ṭhānesu vuttanti.

    ཨུདྡེསཝཱརཝཎྞནཱཡ ལཱིནཏྠཔྤཀཱསནཱ།

    Uddesavāravaṇṇanāya līnatthappakāsanā.

    ཀཱཡཱནུཔསྶནཱ

    Kāyānupassanā

    ཨཱནཱཔཱནཔབྦཝཎྞནཱ

    Ānāpānapabbavaṇṇanā

    ༣༧༤. ཨཱརམྨཎཝསེནཱཏི ཨནུཔསྶིཏབྦཀཱཡཱདིཨཱརམྨཎཝསེན། ཙཏུདྷཱ བྷིནྡིཏྭཱཏི ཨུདྡེསཝསེན ཙཏུདྷཱ བྷིནྡིཏྭཱ། ཏཏོ ཙཏུབྦིདྷསཏིཔཊྛཱནཏོ ཨེཀེཀཾ སཏིཔཊྛཱནཾ གཧེཏྭཱ ཀཱཡཾ ཝིབྷཛནྟོཏི པཱཋསེསོ།

    374.Ārammaṇavasenāti anupassitabbakāyādiārammaṇavasena. Catudhā bhinditvāti uddesavasena catudhā bhinditvā. Tato catubbidhasatipaṭṭhānato ekekaṃ satipaṭṭhānaṃ gahetvā kāyaṃ vibhajantoti pāṭhaseso.

    ཀཐཉྩཱཏི ཨེཏྠ ཀཐནྟི པཀཱརཔུཙྪཱ, ཏེན ནིདྡིསིཡམཱནེ ཀཱཡཱནུཔསྶནཱཔཀཱརེ པུཙྪཏི། ཙ-སདྡོ བྱཏིརེཀོ, ཏེན ཨུདྡེསཝཱརེན ཨཔཱཀཊཾ ནིདྡེསཝཱརེན ཝིབྷཱཝིཡམཱནཾ ཝིསེསཾ ཛོཏེཏི། བཱཧིརཀེསུཔི ཨིཏོ ཨེཀདེསསྶ སམྦྷཝཏོ སབྦཔྤཀཱརགྒཧཎཾ ཀཏཾ ‘‘སབྦཔྤཀཱརཀཱཡཱནུཔསྶནཱནིབྦཏྟཀསྶཱ’’ཏི, ཏེན ཡེ ཨིམེ ཨཱནཱཔཱནཔབྦཱདིཝསེན ཨཱགཏཱ ཙུདྡསཔྤཀཱརཱ, ཏདནྟོགདྷཱ ཙ ཨཛ྄ཛྷཏྟཱདིཨནུཔསྶནཱཔྤཀཱརཱ, ཏཐཱ ཀཱཡགཏཱསཏིསུཏྟེ (མ॰ ནི॰ ༣.༡༥༣) ཝུཏྟཱ ཀེསཱདིཝཎྞསཎྛཱནཀསིཎཱརམྨཎཙཏུཀྐཛ྄ཛྷཱནཔྤཀཱརཱ, ལོཀིཡཱདིཔྤཀཱརཱ ཙ, ཏེ སབྦེཔི ཨནཝསེསཏོ སངྒཎྷཱཏི། ཨིམེ ཙ པཀཱརཱ ཨིམསྨིཾཡེཝ སཱསནེ, ན ཨིཏོ བཧིདྡྷཱཏི ཝུཏྟཾ ‘‘སབྦཔྤཀཱར…པེ॰… པཊིསེདྷནོ ཙཱ’’ཏི། ཏཏྠ ཏཐཱབྷཱཝཔཊིསེདྷནོཏི སབྦཔྤཀཱརཀཱཡཱནུཔསྶནཱནིབྦཏྟཀསྶ པུགྒལསྶ ཨཉྙསཱསནསྶ ནིསྶཡབྷཱཝཔཊིསེདྷནོ, ཨེཏེན ཨིདྷ བྷིཀྑཝེཏི ཨེཏྠ ཨིདྷ-སདྡོ ཨནྟོགདྷཨེཝསདྡཏྠོཏི དསྶེཏི། སནྟི ཧི ཨེཀཔདཱནིཔི ཨཝདྷཱརཎཱནི ཡཐཱ ‘‘ཝཱཡུབྷཀྑོ’’ཏི། ཏེནཱཧ ‘‘ཨིདྷེཝ བྷིཀྑཝེ སམཎོ’’ཏིཨཱདི། པརིཔུཎྞསམཎཔྤཀརཎདྷམྨོ ཧི སོ པུགྒལོ, ཡོ སབྦཔྤཀཱརཀཱཡཱནུཔསྶནཱནིབྦཏྟཀོ། པརཔྤཝཱདཱཏི པརེསཾ ཨཉྙཏིཏྠིཡཱནཾ ནཱནཔྤཀཱརཱ ཝཱདཱ ཏིཏྠཱཡཏནཱནི།

    Kathañcāti ettha kathanti pakārapucchā, tena niddisiyamāne kāyānupassanāpakāre pucchati. Ca-saddo byatireko, tena uddesavārena apākaṭaṃ niddesavārena vibhāviyamānaṃ visesaṃ joteti. Bāhirakesupi ito ekadesassa sambhavato sabbappakāraggahaṇaṃ kataṃ ‘‘sabbappakārakāyānupassanānibbattakassā’’ti, tena ye ime ānāpānapabbādivasena āgatā cuddasappakārā, tadantogadhā ca ajjhattādianupassanāppakārā, tathā kāyagatāsatisutte (ma. ni. 3.153) vuttā kesādivaṇṇasaṇṭhānakasiṇārammaṇacatukkajjhānappakārā, lokiyādippakārā ca, te sabbepi anavasesato saṅgaṇhāti. Ime ca pakārā imasmiṃyeva sāsane, na ito bahiddhāti vuttaṃ ‘‘sabbappakāra…pe… paṭisedhano cā’’ti. Tattha tathābhāvapaṭisedhanoti sabbappakārakāyānupassanānibbattakassa puggalassa aññasāsanassa nissayabhāvapaṭisedhano, etena idha bhikkhaveti ettha idha-saddo antogadhaevasaddatthoti dasseti. Santi hi ekapadānipi avadhāraṇāni yathā ‘‘vāyubhakkho’’ti. Tenāha ‘‘idheva bhikkhavesamaṇo’’tiādi. Paripuṇṇasamaṇappakaraṇadhammo hi so puggalo, yo sabbappakārakāyānupassanānibbattako. Parappavādāti paresaṃ aññatitthiyānaṃ nānappakārā vādā titthāyatanāni.

    ཨརཉྙཱདིཀསྶེཝ བྷཱཝནཱནུརཱུཔསེནཱསནཏཾ དསྶེཏུཾ ‘‘ཨིམསྶཧཱི’’ཏིཨཱདི ཝུཏྟཾ། དུདྡམོ དམཐཾ ཨནུཔགཏོ གོཎོ ཀཱུཊགོཎོ། དོཧནཀཱལེ ཡཐཱ ཐནེཧི ཨནཝསེསཏོ ཁཱིརཾ ན པགྒྷརཏི, ཨེཝཾ དོཧཔཊིབནྡྷིནཱི ཀཱུཊདྷེནུ། རཱུཔ-སདྡཱདིཀེ པཊིཙྩ ཨུཔྤཛྫནཀཨསྶཱདོ རཱུཔཱརམྨཎཱདིརསོ། པུབྦེ ཨཱཙིཎྞཱརམྨཎནྟི པབྦཛྫཏོ པུབྦེ, ཨནཱདིམཏི ཝཱ སཾསཱརེ པརིཙིཏཱརམྨཎཾ། ནིབནྡྷེཡྻཱཏི བནྡྷེཡྻ། སཏིཡཱཏི སམྨདེཝ ཀམྨཊྛཱནསྶ སལླཀྑཎཝསེན པཝཏྟཱཡ སཏིཡཱ། ཨཱརམྨཎེཏི ཀམྨཊྛཱནཱརམྨཎེ། དལ༹ྷནྟི ཐིརཾ, ཡཐཱ སཏོཀཱརིསྶ ཨུཔཙཱརཔྤནཱབྷེདོ སམཱདྷི ཨིཛ྄ཛྷཏི, ཏཐཱ ཐཱམགཏཾ ཀཏྭཱཏི ཨཏྠོ།

    Araññādikasseva bhāvanānurūpasenāsanataṃ dassetuṃ ‘‘imassahī’’tiādi vuttaṃ. Duddamo damathaṃ anupagato goṇo kūṭagoṇo. Dohanakāle yathā thanehi anavasesato khīraṃ na paggharati, evaṃ dohapaṭibandhinī kūṭadhenu. Rūpa-saddādike paṭicca uppajjanakaassādo rūpārammaṇādiraso. Pubbe āciṇṇārammaṇanti pabbajjato pubbe, anādimati vā saṃsāre paricitārammaṇaṃ. Nibandheyyāti bandheyya. Satiyāti sammadeva kammaṭṭhānassa sallakkhaṇavasena pavattāya satiyā. Ārammaṇeti kammaṭṭhānārammaṇe. Daḷhanti thiraṃ, yathā satokārissa upacārappanābhedo samādhi ijjhati, tathā thāmagataṃ katvāti attho.

    ཝིསེསཱདྷིགམདིཊྛདྷམྨསུཁཝིཧཱརཔདཊྛཱནནྟི སབྦེསཾ བུདྡྷཱནཾ, ཨེཀཙྩཱནཾ པཙྩེཀབུདྡྷཱནཾ, བུདྡྷསཱཝཀཱནཉྩ ཝིསེསཱདྷིགམསྶ ཨཉྙེན ཀམྨཊྛཱནེན ཨདྷིགཏཝིསེསཱནཾ དིཊྛདྷམྨསུཁཝིཧཱརསྶ པདཊྛཱནབྷཱུཏཾ།

    Visesādhigamadiṭṭhadhammasukhavihārapadaṭṭhānanti sabbesaṃ buddhānaṃ, ekaccānaṃ paccekabuddhānaṃ, buddhasāvakānañca visesādhigamassa aññena kammaṭṭhānena adhigatavisesānaṃ diṭṭhadhammasukhavihārassa padaṭṭhānabhūtaṃ.

    ཝཏྠུཝིཛྫཱཙརིཡོ ཝིཡ བྷགཝཱ ཡོགཱིནཾ ཨནུརཱུཔནིཝཱསཊྛཱནུཔདིསནཏོ། བྷིཀྑུ དཱིཔིསདིསོ ཨརཉྙེ ཨེཀཀོ ཝིཧརིཏྭཱ པཊིཔཀྑནིམྨཐནཝསེན ཨིཙྪིཏཏྠསཱདྷནཏོ ཕལམུཏྟམནྟི སཱམཉྙཕལཾ སནྡྷཱཡ ཝདཏི། པརཀྐམཛཝཡོགྒབྷཱུམིནྟི བྷཱཝནུསྶཱཧཛཝསྶ ཡོགྒཀརཎབྷཱུམིབྷཱུཏཾ།

    Vatthuvijjācariyo viya bhagavā yogīnaṃ anurūpanivāsaṭṭhānupadisanato. Bhikkhu dīpisadiso araññe ekako viharitvā paṭipakkhanimmathanavasena icchitatthasādhanato phalamuttamanti sāmaññaphalaṃ sandhāya vadati. Parakkamajavayoggabhūminti bhāvanussāhajavassa yoggakaraṇabhūmibhūtaṃ.

    ཨདྡྷཱནཝསེན པཝཏྟཱནཾ ཨསྶཱསཔསྶཱསཱནཾ ཝསེན དཱིགྷཾ ཝཱ ཨསྶསནྟོ, ཨིཏྟརཝསེན པཝཏྟཱནཾ ཨསྶཱསཔསྶཱསཱནཾ ཝསེན རསྶཾ ཝཱ ཨསྶསནྟོཏི ཡོཛནཱ། ཨེཝཾ སིཀྑཏོཏི ཨསྶཱསཔསྶཱསཱནཾ དཱིགྷརསྶཏཱཔཛཱནནསབྦཀཱཡཔྤཊིསཾཝེདནཨོལཱ༹རིཀོལཱ༹རིཀཔཊིཔྤསྶམྦྷནཝསེན བྷཱཝནཾ སིཀྑཏོ, ཏཐཱབྷཱུཏོ ཝཱ ཧུཏྭཱ ཏིསྶོ སིཀྑཱ པཝཏྟཡཏོ། ཨསྶཱསཔསྶཱསནིམིཏྟེཏི ཨསྶཱསཔསྶཱསསནྣིསྶཡེན ཨུཔཊྛིཏཔཊིབྷཱགནིམིཏྟེ། ཨསྶཱསཔསྶཱསེ པརིགྒཎྷཱཏི རཱུཔམུཁེན ཝིཔསྶནཾ ཨབྷིནིཝིསནྟོ, ཡོ ‘‘ཨསྶཱསཔསྶཱསཀམྨིཀོ’’ཏི ཝུཏྟོ། ཛྷཱནངྒཱནི པརིགྒཎྷཱཏི ཨརཱུཔམུཁེན ཝིཔསྶནཾ ཨབྷིནིཝིསནྟོ། ཝཏྠུ ནཱམ ཀརཛཀཱཡོ ཙིཏྟཙེཏསིཀཱནཾ པཝཏྟིཊྛཱནབྷཱཝཏོ། ཨཉྙོ སཏྟོ ཝཱ པུགྒལོ ཝཱ ནཏྠཱིཏི ཝིསུདྡྷིདིཊྛི ‘‘ཏཡིདཾ དྷམྨམཏྟཾ, ན ཨཧེཏུཀཾ, ནཱཔི ཨིསྶརཱདིཝིསམཧེཏུཀཾ, ཨཐ ཁོ ཨཝིཛྫཱདིཧེཏུཀ’’ནྟི ཨདྡྷཱཏྟཡེཔི ཀངྑཱཝིཏརཎེན ཝིཏིཎྞཀངྑོ། ‘‘ཡཾ ཀིཉྩི བྷིཀྑུ རཱུཔ’’ནྟིཨཱདིནཱ (མ॰ ནི॰ ༡.༣༦༡; ༢.༡༡༣; ༣.༨༦, ༨༩; པཊི॰ མ॰ ༡.༥༤) ནཡེན ཀལཱཔསམྨསནཝསེན ཏིལཀྑཎཾ ཨཱརོཔེཏྭཱ། ཨུདཡཝཡཱནུཔསྶནཱདིཝསེན ཝིཔསྶནཾ ཝཌྜྷེནྟོ། ཨནུཀྐམེན མགྒཔཊིཔཱཊིཡཱ།

    Addhānavasena pavattānaṃ assāsapassāsānaṃ vasena dīghaṃ vā assasanto, ittaravasena pavattānaṃ assāsapassāsānaṃ vasena rassaṃ vā assasantoti yojanā. Evaṃ sikkhatoti assāsapassāsānaṃ dīgharassatāpajānanasabbakāyappaṭisaṃvedanaoḷārikoḷārikapaṭippassambhanavasena bhāvanaṃ sikkhato, tathābhūto vā hutvā tisso sikkhā pavattayato. Assāsapassāsanimitteti assāsapassāsasannissayena upaṭṭhitapaṭibhāganimitte. Assāsapassāse pariggaṇhāti rūpamukhena vipassanaṃ abhinivisanto, yo ‘‘assāsapassāsakammiko’’ti vutto. Jhānaṅgāni pariggaṇhāti arūpamukhena vipassanaṃ abhinivisanto. Vatthu nāma karajakāyo cittacetasikānaṃ pavattiṭṭhānabhāvato. Añño satto vā puggalo vā natthīti visuddhidiṭṭhi ‘‘tayidaṃ dhammamattaṃ, na ahetukaṃ, nāpi issarādivisamahetukaṃ, atha kho avijjādihetuka’’nti addhāttayepi kaṅkhāvitaraṇena vitiṇṇakaṅkho. ‘‘Yaṃ kiñci bhikkhu rūpa’’ntiādinā (ma. ni. 1.361; 2.113; 3.86, 89; paṭi. ma. 1.54) nayena kalāpasammasanavasena tilakkhaṇaṃ āropetvā. Udayavayānupassanādivasena vipassanaṃ vaḍḍhento. Anukkamena maggapaṭipāṭiyā.

    ‘‘པརསྶ ཝཱ ཨསྶཱསཔསྶཱསཀཱཡེ’’ཏི ཨིདཾ སམྨསནཝཱརཝསེནཱཡཾ པཱལི༹ པཝཏྟཱཏི ཀཏྭཱ ཝུཏྟཾ, སམཐཝསེན པན པརསྶ ཨསྶཱསཔསྶཱསཀཱཡེ ཨཔྤནཱནིམིཏྟུཔྤཏྟི ཨེཝ ནཏྠི། ཨཊྛཔེཏྭཱཏི ཨནྟརནྟརཱ ན ཋཔེཏྭཱ། ཨཔརཱཔརཾ སཉྩརཎཀཱལོཏི ཨཛ྄ཛྷཏྟབཧིདྡྷཱདྷམྨེསུཔི ནིརནྟརཾ ཝཱ བྷཱཝནཱཡ པཝཏྟནཀཱལོ ཀཐིཏོ། ཨེཀསྨིཾ ཀཱལེ པནིདཾ ཨུབྷཡཾ ན ལབྦྷཏཱིཏི ‘‘ཨཛ྄ཛྷཏྟཾ, བཧིདྡྷཱ’’ཏི ཙ ཝུཏྟཾ ཨིདཾ དྷམྨདྭཡཾ གྷཊིཏཾ ཨེཀསྨིཾ ཀཱལེ ཨེཀཏོ ཨཱརམྨཎབྷཱཝེན ན ལབྦྷཏི, ཨེཀཛ྄ཛྷཾ ཨཱལམྦིཏུཾ ན སཀྐཱཏི ཨཏྠོ།

    ‘‘Parassa vā assāsapassāsakāye’’ti idaṃ sammasanavāravasenāyaṃ pāḷi pavattāti katvā vuttaṃ, samathavasena pana parassa assāsapassāsakāye appanānimittuppatti eva natthi. Aṭṭhapetvāti antarantarā na ṭhapetvā. Aparāparaṃ sañcaraṇakāloti ajjhattabahiddhādhammesupi nirantaraṃ vā bhāvanāya pavattanakālo kathito. Ekasmiṃ kāle panidaṃ ubhayaṃ na labbhatīti ‘‘ajjhattaṃ, bahiddhā’’ti ca vuttaṃ idaṃ dhammadvayaṃ ghaṭitaṃ ekasmiṃ kāle ekato ārammaṇabhāvena na labbhati, ekajjhaṃ ālambituṃ na sakkāti attho.

    སམུདེཏི ཨེཏསྨཱཏི སམུདཡོ, སོ ཨེཝ ཀཱརཎཊྛེན དྷམྨོཏི སམུདཡདྷམྨོ། ཨསྶཱསཔསྶཱསཱནཾ ཨུཔྤཏྟིཧེཏུ ཀརཛཀཱཡཱདི, ཏསྶ ཨནུཔསྶནསཱིལོ སམུདཡདྷམྨཱནུཔསྶཱི, ཏཾ པན སམུདཡདྷམྨཾ ཨུཔམཱཡ དསྶེནྟོ ‘‘ཡཐཱ ནཱམཱ’’ཏིཨཱདིམཱཧ། ཏཏྠ བྷསྟནྟི རུཏྟིཾ། གགྒརནཱལི༹ནྟི ཨུཀྐཱཔནཱལི༹ཾ། ཏེཏི ཀརཛཀཱཡཱདིཀེ། ཡཐཱ ཨསྶཱསཔསྶཱསཀཱཡོ ཀརཛཀཱཡཱདིསམྦནྡྷཱི ཏཾནིམིཏྟཏཱཡ, ཨེཝཾ ཀརཛཀཱཡཱདཡོཔི ཨསྶཱསཔསྶཱསཀཱཡསམྦནྡྷིནོ ཏཾནིམིཏྟབྷཱཝེནཱཏི ‘‘སམུདཡདྷམྨཱ ཀཱཡསྨི’’ནྟི ཝཏྟབྦཏཾ ལབྷནྟཱིཏི ཝུཏྟཾ ‘‘སམུདཡ…པེ॰… ཝུཙྩཏཱི’’ཏི། པཀཏིཝཱཙཱི ཝཱ དྷམྨ-སདྡོ ‘‘ཛཱཏིདྷམྨཱན’’ནྟིཨཱདཱིསུ (མ॰ ནི॰ ༡.༡༣༡; ༣.༣༡༠; པཊི॰ མ॰ ༡.༣༣) ཝིཡཱཏི ཀཱཡསྶ པཙྩཡསམཝཱཡེ ཨུཔྤཛྫནཀཔཀཏིཀཱཡཱནུཔསྶཱི ཝཱ ‘‘སམུདཡདྷམྨཱནུཔསྶཱི’’ཏི ཝུཏྟོ། ཏེནཱཧ ‘‘ཀརཛཀཱཡཉྩཱ’’ཏིཨཱདི། ཨེཝཉྩ ཀཏྭཱ ཀཱཡསྨིནྟི བྷུམྨཝཙནཾ སུཊྛུཏརཾ ཡུཛྫཏི།

    Samudeti etasmāti samudayo, so eva kāraṇaṭṭhena dhammoti samudayadhammo. Assāsapassāsānaṃ uppattihetu karajakāyādi, tassa anupassanasīlo samudayadhammānupassī, taṃ pana samudayadhammaṃ upamāya dassento ‘‘yathā nāmā’’tiādimāha. Tattha bhastanti ruttiṃ. Gaggaranāḷinti ukkāpanāḷiṃ. Teti karajakāyādike. Yathā assāsapassāsakāyo karajakāyādisambandhī taṃnimittatāya, evaṃ karajakāyādayopi assāsapassāsakāyasambandhino taṃnimittabhāvenāti ‘‘samudayadhammā kāyasmi’’nti vattabbataṃ labhantīti vuttaṃ ‘‘samudaya…pe… vuccatī’’ti. Pakativācī vā dhamma-saddo ‘‘jātidhammāna’’ntiādīsu (ma. ni. 1.131; 3.310; paṭi. ma. 1.33) viyāti kāyassa paccayasamavāye uppajjanakapakatikāyānupassī vā ‘‘samudayadhammānupassī’’ti vutto. Tenāha ‘‘karajakāyañcā’’tiādi. Evañca katvā kāyasminti bhummavacanaṃ suṭṭhutaraṃ yujjati.

    ཝཡདྷམྨཱནུཔསྶཱིཏི ཨེཏྠ ཨཧེཏུཀཏྟེཔི ཝིནཱསསྶ ཡེསཾ ཧེཏུདྷམྨཱནཾ ཨབྷཱཝེ ཡཾ ན ཧོཏི, ཏདབྷཱཝོ ཏསྶ ཨབྷཱཝསྶ ཧེཏུ ཝིཡ ཝོཧརཱིཡཏཱིཏི ཨུཔཙཱརཏོ ཀརཛཀཱཡཱདིཨབྷཱཝོ ཨསྶཱསཔསྶཱསཀཱཡསྶ ཝཡཀཱརཎཾ ཝུཏྟོ། ཏེནཱཧ ‘‘ཡཐཱ བྷསྟཱཡཱ’’ཏིཨཱདི ། ཨཡཾ ཏཱཝེཏྠ པཋམཝིཀཔྤཝསེན ཨཏྠཝིབྷཱཝནཱ། དུཏིཡཝིཀཔྤཝསེན ཨུཔཙཱརེན ཝིནཱཡེཝ ཨཏྠོ ཝེདིཏབྦོ།

    Vayadhammānupassīti ettha ahetukattepi vināsassa yesaṃ hetudhammānaṃ abhāve yaṃ na hoti, tadabhāvo tassa abhāvassa hetu viya voharīyatīti upacārato karajakāyādiabhāvo assāsapassāsakāyassa vayakāraṇaṃ vutto. Tenāha ‘‘yathā bhastāyā’’tiādi . Ayaṃ tāvettha paṭhamavikappavasena atthavibhāvanā. Dutiyavikappavasena upacārena vināyeva attho veditabbo.

    ཨཛ྄ཛྷཏྟབཧིདྡྷཱནུཔསྶནཱ ཝིཡ བྷིནྣཝཏྠུཝིསཡཏཱཡ སམུདཡཝཡདྷམྨཱནུཔསྶནཱཔི ཨེཀཀཱལེ ན ལབྦྷཏཱིཏི ཨཱཧ ‘‘ཀཱལེན སམུདཡཾ ཀཱལེན ཝཡཾ ཨནུཔསྶནྟོ’’ཏི། ‘‘ཨཏྠི ཀཱཡོ’’ཏི ཨེཝ-སདྡོ ལུཏྟནིདྡིཊྛོཏི ‘‘ཀཱཡོཝ ཨཏྠཱི’’ཏི ཝཏྭཱ ཨཝདྷཱརཎེན ནིཝཏྟིཏཾ དསྶེནྟོ ‘‘ན སཏྟོ’’ཏིཨཱདིམཱཧ། ཏསྶཏྠོ – ཡོ རཱུཔཱདཱིསུ སཏྟཝིསཏྟཏཱཡ, པརེསཉྩ སཛྫཱཔནཊྛེན, སཏྭགུཎཡོགཏོ ཝཱ ‘‘སཏྟོ’’ཏི པརེཧི པརིཀཔྤིཏོ, ཏསྶ སཏྟནིཀཱཡསྶ པཱུརཎཏོ ཙ ཙཝནུཔཔཛྫནདྷམྨཏཱཡ གལནཏོ ཙ ‘‘པུགྒལོ’’ཏི, ཐཱིཡཏི སཾཧཉྙཏི ཨེཏྠ གབྦྷོཏི ‘‘ཨིཏྠཱི’’ཏི, པུརི པུརེ བྷཱགེ སེཏི པཝཏྟཏཱིཏི ‘‘པུརིསོ’’ཏི, ཨཱཧིཏོ ཨཧཾ མཱནོ ཨེཏྠཱཏི ‘‘ཨཏྟཱ’’ཏི, ཨཏྟནོ སནྟཀབྷཱཝེན ‘‘ཨཏྟནིཡ’’ནྟི, པརོ ན ཧོཏཱིཏི ཀཏྭཱ ‘‘ཨཧ’’ནྟི, མམ སནྟཀནྟི ཀཏྭཱ ‘‘མམཱ’’ཏི, ཝུཏྟཔྤཀཱརཝིནིམུཏྟོ ཨཉྙོཏི ཀཏྭཱ ‘‘ཀོཙཱི’’ཏི, ཏསྶ སནྟཀབྷཱཝེན ‘‘ཀསྶཙཱི’’ཏི, ཝིཀཔྤེཏབྦོ ཀོཙི ནཏྠི, ཀེཝལཾ ‘‘ཀཱཡོ ཨེཝ ཨཏྠཱི’’ཏི། དསཧིཔི པདེཧི ཨཏྟཏྟནིཡསུཉྙཏམེཝ ཀཱཡསྶ ཝིབྷཱཝེཏི། ཨེཝནྟི ‘‘ཀཱཡོཝ ཨཏྠཱི’’ཏིཨཱདིནཱ ཝུཏྟཔྤཀཱརེན།

    Ajjhattabahiddhānupassanā viya bhinnavatthuvisayatāya samudayavayadhammānupassanāpi ekakāle na labbhatīti āha ‘‘kālena samudayaṃ kālena vayaṃ anupassanto’’ti. ‘‘Atthi kāyo’’ti eva-saddo luttaniddiṭṭhoti ‘‘kāyova atthī’’ti vatvā avadhāraṇena nivattitaṃ dassento ‘‘na satto’’tiādimāha. Tassattho – yo rūpādīsu sattavisattatāya, paresañca sajjāpanaṭṭhena, satvaguṇayogato vā ‘‘satto’’ti parehi parikappito, tassa sattanikāyassa pūraṇato ca cavanupapajjanadhammatāya galanato ca ‘‘puggalo’’ti, thīyati saṃhaññati ettha gabbhoti ‘‘itthī’’ti, puri pure bhāge seti pavattatīti ‘‘puriso’’ti, āhito ahaṃ māno etthāti ‘‘attā’’ti, attano santakabhāvena ‘‘attaniya’’nti, paro na hotīti katvā ‘‘aha’’nti, mama santakanti katvā ‘‘mamā’’ti, vuttappakāravinimutto aññoti katvā ‘‘kocī’’ti, tassa santakabhāvena ‘‘kassacī’’ti, vikappetabbo koci natthi, kevalaṃ ‘‘kāyo eva atthī’’ti. Dasahipi padehi attattaniyasuññatameva kāyassa vibhāveti. Evanti ‘‘kāyova atthī’’tiādinā vuttappakārena.

    ཉཱཎཔམཱཎཏྠཱཡཱཏི ཀཱཡཱནུཔསྶནཱཉཱཎཾ པརཾ པམཱཎཾ པཱཔནཏྠཱཡ། སཏིཔམཱཎཏྠཱཡཱཏི ཀཱཡཔརིགྒཱཧིཀཾ སཏིཾ པཝཏྟནསཏིཾ པརཾ པམཱཎཾ པཱཔནཏྠཱཡ། ཨིམསྶ ཧི ཝུཏྟནཡེན ‘‘ཨཏྠི ཀཱཡོ’’ཏི ཨཔརཱཔརུཔྤཏྟིཝསེན པཙྩུཔཊྛིཏཱ སཏི བྷིཡྻོསོ མཏྟཱཡ ཏཏྠ ཉཱཎསྶ, སཏིཡཱ ཙ པརིབྲཱུཧནཱཡ ཧོཏི། ཏེནཱཧ ‘‘སཏིསམྤཛཉྙཱནཾ ཝུཌྜྷཏྠཱཡཱ’’ཏི། ཨིམིསྶཱ བྷཱཝནཱཡ ཏཎྷཱདིཊྛིགྒཱཧཱནཾ ཨུཛུཔཊིཔཀྑཏྟཱ ཝུཏྟཾ ‘‘ཏཎྷཱ…པེ॰… ཝིཧརཏཱི’’ཏི། ཏཐཱབྷཱུཏོ ཙ ལོཀེ ཀིཉྩིཔི ‘‘ཨཧ’’ནྟི ཝཱ ‘‘མམ’’ནྟི ཝཱ གཧེཏབྦཾ ན པསྶཏི, ཀུཏོ གཎྷེཡྻཱཏི ཨཱཧ ‘‘ན ཙ ཀིཉྩཱི’’ཏིཨཱདི། ཨེཝམྤཱིཏི ཨེཏྠ པི-སདྡོ ཧེཊྛཱ ནིདྡིཊྛསྶ ཏཱདིསསྶ ཨཏྠསྶ ཨབྷཱཝཏོ ཨཝུཏྟསམུཙྩཡཏྠོཏི དསྶེནྟོ ‘‘ཨུཔརི ཨཏྠཾ ཨུཔཱདཱཡཱ’’ཏི ཨཱཧ ཡཐཱ ‘‘ཨནྟམསོ ཏིརཙྪཱནགཏཱཡཔི, ཨཡམྤི པཱརཱཛིཀོ ཧོཏཱི’’ཏི། (པཱརཱ॰ ༤༢) ཨེཝནྟི པན ནིདྡིཊྛཱཀཱརསྶ པཙྩཱམསནཾ ནིགམནཝསེན ཀཏནྟི ཨཱཧ ‘‘ཨིམིནཱ པན…པེ॰… དསྶེཏཱི’’ཏི།

    Ñāṇapamāṇatthāyāti kāyānupassanāñāṇaṃ paraṃ pamāṇaṃ pāpanatthāya. Satipamāṇatthāyāti kāyapariggāhikaṃ satiṃ pavattanasatiṃ paraṃ pamāṇaṃ pāpanatthāya. Imassa hi vuttanayena ‘‘atthi kāyo’’ti aparāparuppattivasena paccupaṭṭhitā sati bhiyyoso mattāya tattha ñāṇassa, satiyā ca paribrūhanāya hoti. Tenāha ‘‘satisampajaññānaṃ vuḍḍhatthāyā’’ti. Imissā bhāvanāya taṇhādiṭṭhiggāhānaṃ ujupaṭipakkhattā vuttaṃ ‘‘taṇhā…pe… viharatī’’ti. Tathābhūto ca loke kiñcipi ‘‘aha’’nti vā ‘‘mama’’nti vā gahetabbaṃ na passati, kuto gaṇheyyāti āha ‘‘na ca kiñcī’’tiādi. Evampīti ettha pi-saddo heṭṭhā niddiṭṭhassa tādisassa atthassa abhāvato avuttasamuccayatthoti dassento ‘‘upari atthaṃ upādāyā’’ti āha yathā ‘‘antamaso tiracchānagatāyapi, ayampi pārājiko hotī’’ti. (Pārā. 42) evanti pana niddiṭṭhākārassa paccāmasanaṃ nigamanavasena katanti āha ‘‘iminā pana…pe… dassetī’’ti.

    པུབྦབྷཱགསཏིཔཊྛཱནསྶ ཨིདྷ ཨདྷིཔྤེཏཏྟཱ ཝུཏྟཾ ‘‘སཏི དུཀྑསཙྩ’’ནྟི། སཱ པན སཏི ཡསྨིཾ ཨཏྟབྷཱཝེ, ཏསྶ སམུཊྛཱཔིཀཱ ཏཎྷཱ, ཏསྶཱཔི སམུཊྛཱཔིཀཱ ཨེཝ ནཱམ ཧོཏི ཏདབྷཱཝེ ཨབྷཱཝཏོཏི ཨཱཧ ‘‘ཏསྶཱ སམུཊྛཱཔིཀཱ པུརིམཏཎྷཱ’’ཏི, ཡཐཱ ‘‘སངྑཱརཔཙྩཡཱ’’ཏི (མ॰ ནི॰ ༣.༡༢༦; ཨུདཱ॰ ༡; ཝིབྷ॰ ༤༨༤)། ཏཾཝིཉྙཱཎབཱིཛཏཾསནྟཏིསམྦྷཱུཏོ སབྦོཔི ལོཀིཡོ ཝིཉྙཱཎཔྤབནྡྷོ ‘‘སངྑཱརཔཙྩཡཱ ཝིཉྙཱཎཾ’’ ཏྭེཝ ཝུཙྩཏི སུཏྟནྟནཡེན། ཨཔྤཝཏྟཱིཏི ཨཔྤཝཏྟིནིམིཏྟཾ, ཨུབྷིནྣཾ ཨཔྤཝཏྟིཡཱ ནིམིཏྟབྷཱུཏོཏི ཨཏྠོ། ན པཝཏྟཏི ཨེཏྠཱཏི ཝཱ ཨཔྤཝཏྟི། ‘‘དུཀྑཔརིཛཱནནོ’’ཏིཨཱདི ཨེཀནྟཏོ ཙཏུཀིཙྩསཱདྷནཝསེནེཝ ཨརིཡམགྒསྶ པཝཏྟཱིཏི དསྶེཏུཾ ཝུཏྟཾ། ཨཝུཏྟསིདྡྷོ ཧི ཏསྶ བྷཱཝནཱཔཊིཝེདྷོ། ཙཏུསཙྩཝསེནཱཏི ཙཏུསཙྩཀམྨཊྛཱནཝསེན། ཨུསྶཀྐིཏྭཱཏི ཝིསུདྡྷིཔརམྤརཱཡ ཨཱརུཧིཏྭཱ, བྷཱཝནཾ ཨུཔརི ནེཏྭཱཏི ཨཏྠོ། ནིཡྻཱནམུཁནྟི ཝཊྚདུཀྑཏོ ནིསྶརཎཱུཔཱཡོ།

    Pubbabhāgasatipaṭṭhānassa idha adhippetattā vuttaṃ ‘‘sati dukkhasacca’’nti. Sā pana sati yasmiṃ attabhāve, tassa samuṭṭhāpikā taṇhā, tassāpi samuṭṭhāpikā eva nāma hoti tadabhāve abhāvatoti āha ‘‘tassā samuṭṭhāpikā purimataṇhā’’ti, yathā ‘‘saṅkhārapaccayā’’ti (ma. ni. 3.126; udā. 1; vibha. 484). Taṃviññāṇabījataṃsantatisambhūto sabbopi lokiyo viññāṇappabandho ‘‘saṅkhārapaccayā viññāṇaṃ’’ tveva vuccati suttantanayena. Appavattīti appavattinimittaṃ, ubhinnaṃ appavattiyā nimittabhūtoti attho. Na pavattati etthāti vā appavatti. ‘‘Dukkhaparijānano’’tiādi ekantato catukiccasādhanavaseneva ariyamaggassa pavattīti dassetuṃ vuttaṃ. Avuttasiddho hi tassa bhāvanāpaṭivedho. Catusaccavasenāti catusaccakammaṭṭhānavasena. Ussakkitvāti visuddhiparamparāya āruhitvā, bhāvanaṃ upari netvāti attho. Niyyānamukhanti vaṭṭadukkhato nissaraṇūpāyo.

    ཨཱནཱཔཱནཔབྦཝཎྞནཱ ནིཊྛིཏཱ།

    Ānāpānapabbavaṇṇanā niṭṭhitā.

    ཨིརིཡཱཔཐཔབྦཝཎྞནཱ

    Iriyāpathapabbavaṇṇanā

    ༣༧༥. ཨིརིཡཱཔཐཝསེནཱཏི ཨིརིཡནཾ ཨིརིཡཱ, ཀིརིཡཱ, ཨིདྷ པན ཀཱཡིཀཔཡོགོ ཝེདིཏབྦོ། ཨིརིཡཱནཾ པཐོ པཝཏྟིམགྒོཏི ཨིརིཡཱཔཐོ, གམནཱདིཝསེན པཝཏྟཱ སརཱིརཱཝཏྠཱ། གཙྪནྟོ ཝཱ ཧི སཏྟོ ཀཱཡེན ཀཱཏབྦཀིརིཡཾ ཀརོཏི ཋིཏོ ཝཱ ནིསིནྣོ ཝཱ ནིཔནྣོ ཝཱཏི, ཏེསཾ ཨིརིཡཱཔཐཱནཾ ཝསེན, ཨིརིཡཱཔཐཝིབྷཱགེནཱཏི ཨཏྠོ། པུན ཙཔརནྟི པུན ཙ ཨཔརཾ, ཡཐཱཝུཏྟཨཱནཱཔཱནཀམྨཊྛཱནཏོ བྷིཡྻོཔི ཨཉྙཾ ཀཱཡཱནུཔསྶནཱཀམྨཊྛཱནཾ ཀཐེམི, སུཎཱཐཱཏི ཝཱ ཨདྷིཔྤཱཡོ ། ‘‘གཙྪནྟོ ཝཱ’’ཏིཨཱདི གམནཱདིམཏྟཛཱནནསྶ, གམནཱདིགཏཝིསེསཛཱནནསྶ ཙ སཱདྷཱརཎཝཙནཾ, ཏཏྠ གམནཱདིམཏྟཛཱནནཾ ན ཨིདྷ ནཱདྷིཔྤེཏཾ, གམནཱདིགཏཝིསེསཛཱནནཾ པན ཨདྷིཔྤེཏནྟི ཏཾ ཝིབྷཛིཏྭཱ དསྶེཏུཾ ‘‘ཏཏྠ ཀཱམ’’ནྟིཨཱདི ཝུཏྟཾ། སཏྟཱུཔལདྡྷིནྟི ‘‘སཏྟོ ཨཏྠཱི’’ཏི ཨུཔལདྡྷིཾ སཏྟགྒཱཧཾ། ན པཛཧཏི ན པརིཙྩཛཏི ‘‘ཨཧཾ གཙྪཱམི, མམ གམན’’ནྟི གཱཧསབྦྷཱཝཏོ། ཏཏོ ཨེཝ ཨཏྟསཉྙཾ ‘‘ཨཏྠི ཨཏྟཱ ཀཱརཀོ ཝེདཀོ’’ཏི ཨེཝཾ པཝཏྟཾ ཝིཔརཱིཏསཉྙཾ ན ཨུགྒྷཱཊེཏི ནཱཔནེཏི ཨཔྤཊིཔཀྑབྷཱཝཏོ, ཨནནུབྲཱུཧནཏོ ཝཱ། ཨེཝཾ བྷཱུཏསྶ ཙསྶ ཀུཏོ ཀམྨཊྛཱནཱདིབྷཱཝོཏི ཨཱཧ ‘‘ཀམྨཊྛཱནཾ ཝཱ སཏིཔཊྛཱནབྷཱཝནཱ ཝཱ ན ཧོཏཱི’’ཏི། ‘‘ཨིམསྶ པནཱ’’ཏིཨཱདི སུཀྐཔཀྑོ, ཏསྶ ཝུཏྟཝིཔརིཡཱཡེན ཨཏྠོ ཝེདིཏབྦོ། ཏམེཝ ཧི ཨཏྠཾ ཝིཝརིཏུཾ ‘‘ཨིདཉྷཱི’’ཏིཨཱདི ཝུཏྟཾ།

    375.Iriyāpathavasenāti iriyanaṃ iriyā, kiriyā, idha pana kāyikapayogo veditabbo. Iriyānaṃ patho pavattimaggoti iriyāpatho, gamanādivasena pavattā sarīrāvatthā. Gacchanto vā hi satto kāyena kātabbakiriyaṃ karoti ṭhito vā nisinno vā nipanno vāti, tesaṃ iriyāpathānaṃ vasena, iriyāpathavibhāgenāti attho. Puna caparanti puna ca aparaṃ, yathāvuttaānāpānakammaṭṭhānato bhiyyopi aññaṃ kāyānupassanākammaṭṭhānaṃ kathemi, suṇāthāti vā adhippāyo . ‘‘Gacchanto vā’’tiādi gamanādimattajānanassa, gamanādigatavisesajānanassa ca sādhāraṇavacanaṃ, tattha gamanādimattajānanaṃ na idha nādhippetaṃ, gamanādigatavisesajānanaṃ pana adhippetanti taṃ vibhajitvā dassetuṃ ‘‘tattha kāma’’ntiādi vuttaṃ. Sattūpaladdhinti ‘‘satto atthī’’ti upaladdhiṃ sattaggāhaṃ. Na pajahati na pariccajati ‘‘ahaṃ gacchāmi, mama gamana’’nti gāhasabbhāvato. Tato eva attasaññaṃ ‘‘atthi attā kārako vedako’’ti evaṃ pavattaṃ viparītasaññaṃ na ugghāṭeti nāpaneti appaṭipakkhabhāvato, ananubrūhanato vā. Evaṃ bhūtassa cassa kuto kammaṭṭhānādibhāvoti āha ‘‘kammaṭṭhānaṃ vā satipaṭṭhānabhāvanā vā na hotī’’ti. ‘‘Imassa panā’’tiādi sukkapakkho, tassa vuttavipariyāyena attho veditabbo. Tameva hi atthaṃ vivarituṃ ‘‘idañhī’’tiādi vuttaṃ.

    ཏཏྠ ཀོ གཙྪཏཱིཏི སཱདྷནཾ, ཀིརིཡཉྩ ཨཝིནིབྦྷུཏྟཾ ཀཏྭཱ གམནཀིརིཡཱཡ ཀཏྟུཔུཙྪཱ, སཱ ཀཏྟུབྷཱཝཝིསིཊྛཨཏྟཔཊིཀྑེཔཏྠཱ དྷམྨམཏྟསྶེཝ གམནསིདྡྷིདསྶནཏོ། ཀསྶ གམནནྟི ཏམེཝཏྠཾ པརིཡཱཡནྟརེན ཝདཏི སཱདྷནཾ, ཀིརིཡཉྩ ཝིནིབྦྷུཏྟཾ ཀཏྭཱ གམནཀིརིཡཱཡ ཨཀཏྟུསམྦནྡྷཱིབྷཱཝཝིབྷཱཝནཏོ། པཊིཀྑེཔཏྠཉྷི ཨནྟོནཱིཏཾ ཀཏྭཱ ཨུབྷཡཏྠཾ ཀིཾ-སདྡོ པཝཏྟོ། ཀིཾ ཀཱརཎཱཏི པན པཊིཀྑིཏྟཀཏྟུཀཱཡ གམནཀིརིཡཱཡ ཨཝིཔརཱིཏཀཱརཎཔུཙྪཱ། ཨིདཉྷི གམནཾ ནཱམ ཨཏྟཱ མནསཱ སཾཡུཛྫཏི, མནོ ཨིནྡྲིཡེཧི, ཨིནྡྲིཡཱནི ཨཏྟེཧཱིཏི ཨེཝམཱདི མིཙྪཱཀཱརཎཝིནིམུཏྟཨནུརཱུཔཔཙྩཡཧེཏུཀོ དྷམྨཱནཾ པཝཏྟིཨཱཀཱརཝིསེསོ། ཏེནཱཧ ‘‘ཏཏྠཱ’’ཏིཨཱདི།

    Tattha ko gacchatīti sādhanaṃ, kiriyañca avinibbhuttaṃ katvā gamanakiriyāya kattupucchā, sā kattubhāvavisiṭṭhaattapaṭikkhepatthā dhammamattasseva gamanasiddhidassanato. Kassa gamananti tamevatthaṃ pariyāyantarena vadati sādhanaṃ, kiriyañca vinibbhuttaṃ katvā gamanakiriyāya akattusambandhībhāvavibhāvanato. Paṭikkhepatthañhi antonītaṃ katvā ubhayatthaṃ kiṃ-saddo pavatto. Kiṃ kāraṇāti pana paṭikkhittakattukāya gamanakiriyāya aviparītakāraṇapucchā. Idañhi gamanaṃ nāma attā manasā saṃyujjati, mano indriyehi, indriyāni attehīti evamādi micchākāraṇavinimuttaanurūpapaccayahetuko dhammānaṃ pavattiākāraviseso. Tenāha ‘‘tatthā’’tiādi.

    ན ཀོཙི སཏྟོ ཝཱ པུགྒལོ ཝཱ གཙྪཏི དྷམྨམཏྟསྶེཝ གམནསིདྡྷིཏོ, ཏབྦིནིམུཏྟསྶ ཙ ཀསྶཙི ཨབྷཱཝཏོ། ཨིདཱནི དྷམྨམཏྟསྶེཝ གམནསིདྡྷིཾ དསྶེཏུཾ ‘‘ཙིཏྟཀིརིཡཱཝཱཡོདྷཱཏུཝིཔྥཱརེནཱ’’ཏིཨཱདི ཝུཏྟཾ། ཏཏྠ ཙིཏྟཀིརིཡཱ ཙ སཱ, ཝཱཡོདྷཱཏུཡཱ ཝིཔྥཱརོ ཝིཔྥནྡནཉྩཱཏི ཙིཏྟཀིརིཡཱཝཱཡོདྷཱཏུཝིཔྥཱརོ, ཏེན། ཨེཏྠ ཙ ཙིཏྟཀིརིཡགྒཧཎེན ཨནིནྡྲིཡབདྡྷཝཱཡོདྷཱཏུཝིཔྥཱརཾ ནིཝཏྟེཏི, ཝཱཡོདྷཱཏུཝིཔྥཱརགྒཧཎེན ཙེཏནཱཝཙཱིཝིཉྙཏྟིབྷེདཾ ཙིཏྟཀིརིཡཾ ནིཝཏྟེཏི, ཨུབྷཡེན པན ཀཱཡཝིཉྙཏྟིཾ ཝིབྷཱཝེཏི། ‘‘གཙྪཏཱི’’ཏི ཝཏྭཱ ཡཐཱ པཝཏྟམཱནེ ཀཱཡེ ‘‘གཙྪཏཱི’’ཏི ཝོཧཱརོ ཧོཏི, ཏཾ དསྶེཏུཾ ‘‘ཏསྨཱ’’ཏིཨཱདི ཝུཏྟཾ། ཏནྟི གནྟུཀཱམཏཱཝསེན པཝཏྟཙིཏྟཾ། ཝཱཡཾ ཛནེཏཱིཏི ཝཱཡོདྷཱཏུཨདྷིཀཾ རཱུཔཀལཱཔཾ ཨུཔྤཱདེཏི, ཨདྷིཀཏཱ ཙེཏྠ སཱམཏྠིཡཏོ, ན པམཱཎཏོ། གམནཙིཏྟསམུཊྛིཏཾ སཧཛཱཏརཱུཔཀཱཡསྶ ཐམྦྷནསནྡྷཱརཎཙལནཱནཾ པཙྩཡབྷཱུཏེན ཨཱཀཱརཝིསེསེན པཝཏྟམཱནཾ ཝཱཡོདྷཱཏུཾ སནྡྷཱཡཱཧ ‘‘ཝཱཡོ ཝིཉྙཏྟིཾ ཛནེཏཱི’’ཏི། ཨདྷིཔྤཱཡསཧབྷཱཝཱི ཧི ཝིཀཱརོ ཝིཉྙཏྟི། ཡཐཱཝུཏྟཨདྷིཀབྷཱཝེནེཝ ཙ ཝཱཡོགཧཎཾ , ན ཝཱཡོདྷཱཏུཡཱ ཨེཝ ཛནཀབྷཱཝཏོ, ཨཉྙཐཱ ཝིཉྙཏྟིཡཱ ཨུཔཱདཱཡརཱུཔབྷཱཝོ དུརུཔཔཱདོ སིཡཱ། པུརཏོ ཨབྷིནཱིཧཱརོ པུརཏོབྷཱགེན ཀཱཡསྶ པཝཏྟནཾ, ཡོ ‘‘ཨབྷིཀྐམོ’’ཏི ཝུཙྩཏི།

    Na koci satto vā puggalo vā gacchati dhammamattasseva gamanasiddhito, tabbinimuttassa ca kassaci abhāvato. Idāni dhammamattasseva gamanasiddhiṃ dassetuṃ ‘‘cittakiriyāvāyodhātuvipphārenā’’tiādi vuttaṃ. Tattha cittakiriyā ca sā, vāyodhātuyā vipphāro vipphandanañcāti cittakiriyāvāyodhātuvipphāro, tena. Ettha ca cittakiriyaggahaṇena anindriyabaddhavāyodhātuvipphāraṃ nivatteti, vāyodhātuvipphāraggahaṇena cetanāvacīviññattibhedaṃ cittakiriyaṃ nivatteti, ubhayena pana kāyaviññattiṃ vibhāveti. ‘‘Gacchatī’’ti vatvā yathā pavattamāne kāye ‘‘gacchatī’’ti vohāro hoti, taṃ dassetuṃ ‘‘tasmā’’tiādi vuttaṃ. Tanti gantukāmatāvasena pavattacittaṃ. Vāyaṃ janetīti vāyodhātuadhikaṃ rūpakalāpaṃ uppādeti, adhikatā cettha sāmatthiyato, na pamāṇato. Gamanacittasamuṭṭhitaṃ sahajātarūpakāyassa thambhanasandhāraṇacalanānaṃ paccayabhūtena ākāravisesena pavattamānaṃ vāyodhātuṃ sandhāyāha ‘‘vāyo viññattiṃ janetī’’ti. Adhippāyasahabhāvī hi vikāro viññatti. Yathāvuttaadhikabhāveneva ca vāyogahaṇaṃ , na vāyodhātuyā eva janakabhāvato, aññathā viññattiyā upādāyarūpabhāvo durupapādo siyā. Purato abhinīhāro puratobhāgena kāyassa pavattanaṃ, yo ‘‘abhikkamo’’ti vuccati.

    ‘‘ཨེསེཝ ནཡོ’’ཏི ཨཏིདེསེན སངྑེཔཏོ ཝཏྭཱ ཏམཏྠཾ ཝིཝརིཏུཾ ‘‘ཏཏྲཱཔི ཧཱི’’ཏིཨཱདི ཝུཏྟཾ། ཀོཊིཏོ པཊྛཱཡཱཏི ཧེཊྛིམཀོཊིཏོ པཊྛཱཡ པཱདཏལཏོ པཊྛཱཡ། ཨུསྶིཏབྷཱཝོཏི ཨུབྦིདྡྷབྷཱཝོ།

    ‘‘Eseva nayo’’ti atidesena saṅkhepato vatvā tamatthaṃ vivarituṃ ‘‘tatrāpi hī’’tiādi vuttaṃ. Koṭito paṭṭhāyāti heṭṭhimakoṭito paṭṭhāya pādatalato paṭṭhāya. Ussitabhāvoti ubbiddhabhāvo.

    ཨེཝཾ པཛཱནཏོཏི ཨེཝཾ ཙིཏྟཀིརིཡཝཱཡོདྷཱཏུཝིཔྥཱརེནེཝ གམནཱདི ཧོཏཱིཏི པཛཱནཏོ། ཏསྶ ཨེཝཾ པཛཱནནཱཡ ནིཙྪཡགམནཏྠཾ ‘‘ཨེཝཾ ཧོཏཱི’’ཏི ཝིཙཱརཎཱ ཝུཙྩཏི ལོཀེ ཡཐཱབྷཱུཏཾ ཨཛཱནནྟེཧི མིཙྪཱབྷིནིཝེསཝསེན, ལོཀཝོཧཱརཝསེན ཝཱ། ཨཏྠི པནཱཏི ཨཏྟནོ ཨེཝཾ ཝཱིམཾསནཝསེན པུཙྪཱཝཙནཾ། ནཏྠཱིཏི ནིཙྪཡཝསེན སཏྟསྶ པཊིཀྑེཔཝཙནཾ། ‘‘ཡཐཱ པནཱ’’ཏིཨཱདི ཏསྶེཝ ཨཏྠསྶ ཨུཔམཱཡ ཝིབྷཱཝནཾ, ཏཾ སུཝིཉྙེཡྻམེཝ།

    Evaṃ pajānatoti evaṃ cittakiriyavāyodhātuvipphāreneva gamanādi hotīti pajānato. Tassa evaṃ pajānanāya nicchayagamanatthaṃ ‘‘evaṃ hotī’’ti vicāraṇā vuccati loke yathābhūtaṃ ajānantehi micchābhinivesavasena, lokavohāravasena vā. Atthi panāti attano evaṃ vīmaṃsanavasena pucchāvacanaṃ. Natthīti nicchayavasena sattassa paṭikkhepavacanaṃ. ‘‘Yathā panā’’tiādi tasseva atthassa upamāya vibhāvanaṃ, taṃ suviññeyyameva.

    ནཱཝཱ མཱལུཏཝེགེནཱཏི ཡཐཱ ཨཙེཏནཱ ནཱཝཱ ཝཱཏཝེགེན དེསནྟརཾ ཡཱཏི, ཡཐཱ ཙ ཨཙེཏནོ ཏེཛནཾ ཀཎྜོ ཛིཡཱཝེགེན དེསནྟརཾ ཡཱཏི, ཏཐཱ ཨཙེཏནོ ཀཱཡོ ཝཱཏཱཧཏོ ཡཐཱཝུཏྟཝཱཡུནཱ ནཱིཏོ དེསནྟརཾ ཡཱཏཱིཏི ཨེཝཾ ཨུཔམཱསཾསནྡནཾ ཝེདིཏབྦཾ། སཙེ པན ཀོཙི ཝདེཡྻ ‘‘ཡཐཱ ནཱཝཱཏེཛནཱནཾ པེལླཀསྶ པུརིསསྶ ཝསེན དེསནྟརགམནཾ, ཨེཝཾ ཀཱཡསྶཱཔཱི’’ཏི, ཧོཏུ, ཨེཝཾ ཨིཙྪིཏོ ཝཱཡམཏྠོ ཡཐཱ ཧི ནཱཝཱཏེཛནཱནཾ སཾཧཏལཀྑཎསྶེཝ པུརིསསྶ ཝསེན གམནཾ, ན ཨསཾཧཏལཀྑཎསྶ, ཨེཝཾ ཀཱཡསྶཱཔཱིཏི། ཀཱ ནོ ཧཱནི, བྷིཡྻོཔི དྷམྨམཏྟཏཱཝ པཏིཊྛཾ ལབྷཏི, ན པུརིསཝཱདོ། ཏེནཱཧ ‘‘ཡནྟསུཏྟཝསེནཱ’’ཏིཨཱདི།

    Nāvā mālutavegenāti yathā acetanā nāvā vātavegena desantaraṃ yāti, yathā ca acetano tejanaṃ kaṇḍo jiyāvegena desantaraṃ yāti, tathā acetano kāyo vātāhato yathāvuttavāyunā nīto desantaraṃ yātīti evaṃ upamāsaṃsandanaṃ veditabbaṃ. Sace pana koci vadeyya ‘‘yathā nāvātejanānaṃ pellakassa purisassa vasena desantaragamanaṃ, evaṃ kāyassāpī’’ti, hotu, evaṃ icchito vāyamattho yathā hi nāvātejanānaṃ saṃhatalakkhaṇasseva purisassa vasena gamanaṃ, na asaṃhatalakkhaṇassa, evaṃ kāyassāpīti. Kā no hāni, bhiyyopi dhammamattatāva patiṭṭhaṃ labhati, na purisavādo. Tenāha ‘‘yantasuttavasenā’’tiādi.

    ཏཏྠ པཡུཏྟནྟི ཧེཊྛཱ ཝུཏྟནཡེན གམནཱདིཀིརིཡཱཝསེན པཙྩཡེཧི པཡོཛིཏཾ། ཋཱཏཱིཏི ཏིཊྛཏི། ཨེཏྠཱཏི ཨིམསྨིཾ ལོཀེ། ཝིནཱ ཧེཏུཔཙྩཡེཏི གནྟུཀཱམཏཱཙིཏྟཏཾསམུཊྛཱནཝཱཡོདྷཱཏུཨཱདིཧེཏུཔཙྩཡེཧི ཝིནཱ། ཏིཊྛེཏི ཏིཊྛེཡྻ། ཝཛེཏི ཝཛེཡྻ གཙྪེཡྻ ཀོ ནཱམཱཏི སམྦནྡྷོ། པཊིཀྑེཔཏྠོ ཙེཏྠ ཀིཾ-སདྡོཏི ཧེཏུཔཙྩཡཝིརཧེན ཋཱནགམནཔཊིཀྑེཔམུཁེན སབྦཱཡཔི དྷམྨཔྤཝཏྟིཡཱ པཙྩཡཱདྷཱིནཝུཏྟིཏཱཝིབྷཱཝནེན ཨཏྟསུཉྙཏཱ ཝིཡ ཨནིཙྩདུཀྑཏཱཔི ཝིབྷཱཝིཏཱཏི དཊྛབྦཱ།

    Tattha payuttanti heṭṭhā vuttanayena gamanādikiriyāvasena paccayehi payojitaṃ. Ṭhātīti tiṭṭhati. Etthāti imasmiṃ loke. Vinā hetupaccayeti gantukāmatācittataṃsamuṭṭhānavāyodhātuādihetupaccayehi vinā. Tiṭṭheti tiṭṭheyya. Vajeti vajeyya gaccheyya ko nāmāti sambandho. Paṭikkhepattho cettha kiṃ-saddoti hetupaccayavirahena ṭhānagamanapaṭikkhepamukhena sabbāyapi dhammappavattiyā paccayādhīnavuttitāvibhāvanena attasuññatā viya aniccadukkhatāpi vibhāvitāti daṭṭhabbā.

    པཎིཧིཏོཏི ཡཐཱ ཡཐཱ པཙྩཡེཧི པཀཱརེཧི ནིཧིཏོ ཋཔིཏོ། སབྦསངྒཱཧིཀཝཙནནྟི སབྦེསམྤི ཙཏུནྣཾ ཨིརིཡཱཔཐཱནཾ ཨེཀཛ྄ཛྷཾ སངྒཎྷནཝཙནཾ, པུབྦེ ཝིསུཾ ཝིསུཾ ཨིརིཡཱཔཐཱནཾ ཝུཏྟཏྟཱ ཨིདཾ ནེསཾ ཨེཀཛ྄ཛྷཾ གཧེཏྭཱ ཝཙནནྟི ཨཏྠོ། པུརིམནཡོ ཝཱ ཨིརིཡཱཔཐཔྤདྷཱནོ ཝུཏྟོཏི ཏཏྠ ཀཱཡོ ཨཔྤདྷཱནོ ཨནུནིཔྥཱདཱིཏི ཨིདྷ ཀཱཡཾ པདྷཱནཾ, ཨཔདྷཱནཉྩ ཨིརིཡཱཔཐཾ ཨནུནིཔྥཱདིཾ ཀཏྭཱ དསྶེཏུཾ དུཏིཡནཡོ ཝུཏྟོཏི ཨེཝམྤེཏྠ དྭིནྣཾ ནཡཱནཾ ཝིསེསོ ཝེདིཏབྦོ། ཋིཏོཏི པཝཏྟོ།

    Paṇihitoti yathā yathā paccayehi pakārehi nihito ṭhapito. Sabbasaṅgāhikavacananti sabbesampi catunnaṃ iriyāpathānaṃ ekajjhaṃ saṅgaṇhanavacanaṃ, pubbe visuṃ visuṃ iriyāpathānaṃ vuttattā idaṃ nesaṃ ekajjhaṃ gahetvā vacananti attho. Purimanayo vā iriyāpathappadhāno vuttoti tattha kāyo appadhāno anunipphādīti idha kāyaṃ padhānaṃ, apadhānañca iriyāpathaṃ anunipphādiṃ katvā dassetuṃ dutiyanayo vuttoti evampettha dvinnaṃ nayānaṃ viseso veditabbo. Ṭhitoti pavatto.

    ཨིརིཡཱཔཐཔརིགྒཎྷནམྤི ཨིརིཡཱཔཐཝཏོ ཀཱཡསྶེཝ པརིགྒཎྷནཾ ཏསྶ ཨཝཏྠཱཝིསེསབྷཱཝཏོཏི ཝུཏྟཾ ‘‘ཨིརིཡཱཔཐཔརིགྒཎྷནེན ཀཱཡེ ཀཱཡཱནུཔསྶཱི ཝིཧརཏཱི’’ཏི། ཏེནེཝེཏྠ རཱུཔཀྑནྡྷཝསེནེཝ སམུདཡཱདཡོ ཨུདྡྷཊཱ། ཨེས ནཡོ སེསཝཱརེསུཔི། ཨཱདིནཱཏི ཨེཏྠ ཨཱདི-སདྡེན ཡཐཱ ‘‘ཏཎྷཱསམུདཡཱ ཀམྨསམུདཡཱ ཨཱཧཱརསམུདཡཱ’’ཏི ནིབྦཏྟིལཀྑཎཾ པསྶནྟོཔི རཱུཔཀྑནྡྷསྶ ཨུདཡཾ པསྶཏཱིཏི ཨིམེ ཙཏྟཱརོ ཨཱཀཱརཱ སངྒཡ྄ཧནྟི, ཨེཝཾ ‘‘ཨཝིཛྫཱནིརོདྷཱ’’ཏི ཨཱདཡོཔི པཉྩ ཨཱཀཱརཱ སངྒཧིཏཱཏི དཊྛབྦཱ། སེསཾ ཝུཏྟནཡམེཝ།

    Iriyāpathapariggaṇhanampi iriyāpathavato kāyasseva pariggaṇhanaṃ tassa avatthāvisesabhāvatoti vuttaṃ ‘‘iriyāpathapariggaṇhanena kāye kāyānupassī viharatī’’ti. Tenevettha rūpakkhandhavaseneva samudayādayo uddhaṭā. Esa nayo sesavāresupi. Ādināti ettha ādi-saddena yathā ‘‘taṇhāsamudayā kammasamudayā āhārasamudayā’’ti nibbattilakkhaṇaṃ passantopi rūpakkhandhassa udayaṃ passatīti ime cattāro ākārā saṅgayhanti, evaṃ ‘‘avijjānirodhā’’ti ādayopi pañca ākārā saṅgahitāti daṭṭhabbā. Sesaṃ vuttanayameva.

    ཨིརིཡཱཔཐཔབྦཝཎྞནཱ ནིཊྛིཏཱ།

    Iriyāpathapabbavaṇṇanā niṭṭhitā.

    ཙཏུསམྤཛཉྙཔབྦཝཎྞནཱ

    Catusampajaññapabbavaṇṇanā

    ༣༧༦. ཙཏུསམྤཛཉྙཝསེནཱཏི སམནྟཏོ པཀཱརེཧི, པཀཊྛཾ ཝཱ སཝིསེསཾ ཛཱནཱཏཱིཏི སམྤཛཱནོ, སམྤཛཱནསྶ བྷཱཝོ སམྤཛཉྙཾ, ཏཐཱཔཝཏྟཾ ཉཱཎཾ, ཧཏྠཝིཀཱརཱདིབྷེདབྷིནྣཏྟཱ ཙཏྟཱརི སམྤཛཉྙཱནི སམཱཧཊཱནི ཙཏུསམྤཛཉྙཾ, ཏསྶ ཝསེན། ‘‘ཨབྷིཀྐནྟེ’’ཏིཨཱདཱིནི སཱམཉྙཕལེ (དཱི॰ ནི॰ ཨཊྛ॰ ༡.༢༡༤; དཱི॰ ནི॰ ཊཱི॰ ༡.༢༡༤ ཝཱཀྱཁནྡྷེཔི) ཝཎྞིཏཱནི, ན པུན ཝཎྞེཏབྦཱནི, ཏསྨཱ ཏཾཏཾསཾཝཎྞནཱཡ ལཱིནཏྠཔྤཀཱསནཱཔི ཏཏྠ ཝིཧིཏནཡེནེཝ གཧེཏབྦཱ། ‘‘ཨབྷིཀྐནྟེ པཊིཀྐནྟེ སམྤཛཱནཀཱརཱི ཧོཏཱི’’ཏིཨཱདི ཝཙནཏོ ཨབྷིཀྐམཱདིགཏཙཏུསམྤཛཉྙཔརིགྒཎྷནེན རཱུཔཀཱཡསྶེཝེཏྠ སམུདཡདྷམྨཱནུཔསྶིཏཱདི ཨདྷིཔྤེཏོཏི ཨཱཧ ‘‘རཱུཔཀྑནྡྷསྶེཝ སམུདཡོ ཙ ཝཡོ ཙ ནཱིཧརིཏབྦོ’’ཏི། རཱུཔདྷམྨཱནཾཡེཝ ཧི པཝཏྟིཨཱཀཱརཝིསེསཱ ཨབྷིཀྐམཱདཡོཏི། སེསཾ ཝུཏྟནཡམེཝ།

    376.Catusampajaññavasenāti samantato pakārehi, pakaṭṭhaṃ vā savisesaṃ jānātīti sampajāno, sampajānassa bhāvo sampajaññaṃ, tathāpavattaṃ ñāṇaṃ, hatthavikārādibhedabhinnattā cattāri sampajaññāni samāhaṭāni catusampajaññaṃ, tassa vasena. ‘‘Abhikkante’’tiādīni sāmaññaphale (dī. ni. aṭṭha. 1.214; dī. ni. ṭī. 1.214 vākyakhandhepi) vaṇṇitāni, na puna vaṇṇetabbāni, tasmā taṃtaṃsaṃvaṇṇanāya līnatthappakāsanāpi tattha vihitanayeneva gahetabbā. ‘‘Abhikkante paṭikkante sampajānakārī hotī’’tiādi vacanato abhikkamādigatacatusampajaññapariggaṇhanena rūpakāyassevettha samudayadhammānupassitādi adhippetoti āha ‘‘rūpakkhandhasseva samudayo ca vayo canīharitabbo’’ti. Rūpadhammānaṃyeva hi pavattiākāravisesā abhikkamādayoti. Sesaṃ vuttanayameva.

    ཙཏུསམྤཛཉྙཔབྦཝཎྞནཱ ནིཊྛིཏཱ།

    Catusampajaññapabbavaṇṇanā niṭṭhitā.

    པཊིཀྐཱུལམནསིཀཱརཔབྦཝཎྞནཱ

    Paṭikkūlamanasikārapabbavaṇṇanā

    ༣༧༧. པཊིཀྐཱུལམནསིཀཱརཝསེནཱཏི ཛིགུཙྪནཱིཡཏཱཡ པཊིཀཱུལམེཝ པཊིཀྐཱུལཾ, ཡོ པཊིཀྐཱུལསབྷཱཝོ པཊིཀྐཱུལཱཀཱརོ, ཏསྶ མནསི ཀརཎཝསེན། ཨནྟརེནཱཔི ཧི བྷཱཝཝཱཙིནཾ སདྡཾ བྷཱཝཏྠོ ཝིཉྙཱཡཏི ཡཐཱ ‘‘པཊསྶ སུཀྐ’’ནྟི། ཡསྨཱ ཝིསུདྡྷིམགྒེ (ཝིསུདྡྷི॰ ༡.༡༨༢) ཝུཏྟཾ, ཏསྨཱ ཏཏྠ, ཏཾསཾཝཎྞནཱཡཉྩ (ཝིསུདྡྷི॰ ཊཱི॰ ༡.༡༨༢ ཨཱདཡོ) ཝུཏྟནཡེན ‘‘ཨིམམེཝ ཀཱཡ’’ནྟི ཨཱདཱིནམཏྠོ ཝེདིཏབྦོ།

    377.Paṭikkūlamanasikāravasenāti jigucchanīyatāya paṭikūlameva paṭikkūlaṃ, yo paṭikkūlasabhāvo paṭikkūlākāro, tassa manasi karaṇavasena. Antarenāpi hi bhāvavācinaṃ saddaṃ bhāvattho viññāyati yathā ‘‘paṭassa sukka’’nti. Yasmā visuddhimagge (visuddhi. 1.182) vuttaṃ, tasmā tattha, taṃsaṃvaṇṇanāyañca (visuddhi. ṭī. 1.182 ādayo) vuttanayena ‘‘imameva kāya’’nti ādīnamattho veditabbo.

    ཝཏྠཱདཱིཧི པསིབྦཀཱཀཱརེན བནྡྷིཏྭཱ ཀཏཾ ཨཱཝཱཊནཾ པུཏོལི༹། ནཱནཱཀཱརཱ ཨེཀསྨིཾ ཋཱནེ སམྨིསྶཱཏི ཨེཏྟཱཝཏཱ ནཱནཱཝཎྞཱནཾ ཀེསཱདཱིནཉྩ ཨུཔམེཡྻཏཱ། ཝིབྷཱུཏཀཱལོཏི པཎྞཏྟིཾ སམཏིཀྐམིཏྭཱ ཀེསཱདཱིནཾ ཨསུབྷཱཀཱརསྶ ཨུཔཊྛིཏཀཱལོ། ཨིཏི-སདྡསྶ ཨཱཀཱརཏྠཏཾ དསྶེནྟོ ‘‘ཨེཝ’’ནྟི ཝཏྭཱ ཏཾ ཨཱཀཱརཾ སརཱུཔཏོ དསྶེནྟོ ‘‘ཀེསཱདིཔརིགྒཎྷནེནཱ’’ཏིཨཱདིམཱཧ། ཀེསཱདིསཉྙིཏཱནཉྷི ཨསུཙིབྷཱཝཱནཾ པརམདུགྒནྡྷཛེགུཙྪཔཊིཀྐཱུལཱཀཱརསྶ སམུདཡཏོ ཨནུཔསྶནཱ ཨིདྷ ཀཱཡཱནུཔསྶནཱཏི། སེསཾ ཝུཏྟནཡམེཝ།

    Vatthādīhi pasibbakākārena bandhitvā kataṃ āvāṭanaṃ putoḷi. Nānākārā ekasmiṃ ṭhāne sammissāti ettāvatā nānāvaṇṇānaṃ kesādīnañca upameyyatā. Vibhūtakāloti paṇṇattiṃ samatikkamitvā kesādīnaṃ asubhākārassa upaṭṭhitakālo. Iti-saddassa ākāratthataṃ dassento ‘‘eva’’nti vatvā taṃ ākāraṃ sarūpato dassento ‘‘kesādipariggaṇhanenā’’tiādimāha. Kesādisaññitānañhi asucibhāvānaṃ paramaduggandhajegucchapaṭikkūlākārassa samudayato anupassanā idha kāyānupassanāti. Sesaṃ vuttanayameva.

    པཊིཀྐཱུལམནསིཀཱརཔབྦཝཎྞནཱ ནིཊྛིཏཱ།

    Paṭikkūlamanasikārapabbavaṇṇanā niṭṭhitā.

    དྷཱཏུམནསིཀཱརཔབྦཝཎྞནཱ

    Dhātumanasikārapabbavaṇṇanā

    ༣༧༨. དྷཱཏུམནསིཀཱརཝསེནཱཏི པཐཝཱིདྷཱཏུཨཱདིཀཱ ཙཏསྶོ དྷཱཏུཡོ ཨཱརབྦྷ པཝཏྟབྷཱཝནཱམནསིཀཱརཝསེན, ཙཏུདྷཱཏུཝཝཏྠཱནཝསེནཱཏི ཨཏྠོ། དྷཱཏུམནསིཀཱརོ, དྷཱཏུཀམྨཊྛཱནཾ, ཙཏུདྷཱཏུཝཝཏྠཱནནྟི ཧི ཨཏྠཏོ ཨེཀཾ། གོགྷཱཏཀོཏི ཛཱིཝིཀཏྠཱཡ གུནྣཾ གྷཱཏཀོ། ཨནྟེཝཱསིཀོཏི ཀམྨཀརཎཝསེན ཏསྶ སམཱིཔཝཱསཱི ཏཾ ནིསྶཱཡ ཛཱིཝནཀོ ། ཝིནིཝིཛ྄ཛྷིཏྭཱཏི ཨེཀསྨིཾ ཋཱནེ ཨཉྙམཉྙཾ ཝིནིཝིཛ྄ཛྷིཏྭཱ། མཧཱཔཐཱནཾ ཝེམཛ྄ཛྷཊྛཱནསངྑཱཏེཏི ཙཏུནྣཾ མཧཱཔཐཱནཾ ཏཱཡ ཨེཝ ཝིནིཝིཛ྄ཛྷནཊྛཱནཏཱཡ ཝེམཛ྄ཛྷསངྑཱཏེ། ཡསྨཱ ཏེ ཙཏྟཱརོ མཧཱཔཐཱ ཙཏཱུཧི དིསཱཧི ཨཱགནྟྭཱ ཏཏྠ སམོཧིཏཱ ཝིཡ ཧོནྟི, ཏསྨཱ ཏཾ ཋཱནཾ ཙཏུམཧཱཔཐཾ, ཏསྨིཾ ཙཏུམཧཱཔཐེ། ཋིཏ-སདྡོ ‘‘ཋིཏོ ཝཱ’’ཏིཨཱདཱིསུ (དཱི॰ ནི॰ ༡.༢༦༣; ཨ॰ ནི॰ ༥.༢༨) ཋཱནསངྑཱཏཨིརིཡཱཔཐསམངྒིཏཱཡ, ཋཱ-སདྡསྶ ཝཱ གཏིནིཝཏྟིཨཏྠཏཱཡ ཨཉྙཏྠ ཋཔེཏྭཱ གམནཾ སེསཨིརིཡཱཔཐསམངྒིཏཱཡ བོདྷཀོ, ཨིདྷ པན ཡཐཱ ཏཐཱ རཱུཔཀཱཡསྶ པཝཏྟིཨཱཀཱརབོདྷཀོ ཨདྷིཔྤེཏོཏི ཨཱཧ ‘‘ཙཏུནྣཾ ཨིརིཡཱཔཐཱནཾ ཡེན ཀེནཙི ཨཱཀཱརེན ཋིཏཏྟཱ ཡཐཱ ཋིཏ’’ནྟི། ཏཏྠ ཨཱཀཱརེནཱཏི ཋཱནཱདིནཱ རཱུཔཀཱཡསྶ པཝཏྟིཨཱཀཱརེན། ཋཱནཱདཡོ ཧི ཨིརིཡཱཔཐསངྑཱཏཱཡ ཀིརིཡཱཡ པཐོ པཝཏྟིམགྒོཏི ‘‘ཨིརིཡཱཔཐོ’’ཏི ཝུཙྩནྟཱིཏི ཝུཏྟོ ཝཱཡམཏྠོ། ཡཐཱཋིཏནྟི ཡཐཱཔཝཏྟཾ, ཡཐཱཝུཏྟཾ ཋཱནམེཝེཏྠ པཎིདྷཱནནྟི ཨདྷིཔྤེཏནྟི ཨཱཧ ‘‘ཡཐཱ ཋིཏཏྟཱ ཙ ཡཐཱཔཎིཧིཏ’’ནྟི། ‘‘ཋིཏ’’ནྟི ཝཱ ཀཱཡསྶ ཋཱནསངྑཱཏཨིརིཡཱཔཐསམཱཡོགཔརིདཱིཔནཾ, ‘‘པཎིཧིཏ’’ནྟི ཏདཉྙཨིརིཡཱཔཐསམཱཡོགཔརིདཱིཔནཾ། ‘‘ཋིཏ’’ནྟི ཝཱ ཀཱཡསངྑཱཏཱནཾ རཱུཔདྷམྨཱནཾ ཏསྨིཾ ཏསྨིཾ ཁཎེ སཀིཙྩཝསེན ཨཝཊྛཱནཔརིདཱིཔནཾ, པཎིཧིཏནྟི པཙྩཡཝསེན ཏེཧི ཏེཧི པཙྩཡེཧི པཀཱརཏོ ནིཧིཏཾ པཎིཧིཏནྟི ཨེཝམྤེཏྠ ཨཏྠོ ཝེདིཏབྦོ། པཙྩཝེཀྑཏཱིཏི པཏི པཏི ཨཝེཀྑཏི, ཉཱཎཙཀྑུནཱ ཝིནིབྦྷུཛྫིཏྭཱ ཝིསུཾ ཝིསུཾ པསྶཏི།

    378.Dhātumanasikāravasenāti pathavīdhātuādikā catasso dhātuyo ārabbha pavattabhāvanāmanasikāravasena, catudhātuvavatthānavasenāti attho. Dhātumanasikāro, dhātukammaṭṭhānaṃ, catudhātuvavatthānanti hi atthato ekaṃ. Goghātakoti jīvikatthāya gunnaṃ ghātako. Antevāsikoti kammakaraṇavasena tassa samīpavāsī taṃ nissāya jīvanako . Vinivijjhitvāti ekasmiṃ ṭhāne aññamaññaṃ vinivijjhitvā. Mahāpathānaṃ vemajjhaṭṭhānasaṅkhāteti catunnaṃ mahāpathānaṃ tāya eva vinivijjhanaṭṭhānatāya vemajjhasaṅkhāte. Yasmā te cattāro mahāpathā catūhi disāhi āgantvā tattha samohitā viya honti, tasmā taṃ ṭhānaṃ catumahāpathaṃ, tasmiṃ catumahāpathe. Ṭhita-saddo ‘‘ṭhito vā’’tiādīsu (dī. ni. 1.263; a. ni. 5.28) ṭhānasaṅkhātairiyāpathasamaṅgitāya, ṭhā-saddassa vā gatinivattiatthatāya aññattha ṭhapetvā gamanaṃ sesairiyāpathasamaṅgitāya bodhako, idha pana yathā tathā rūpakāyassa pavattiākārabodhako adhippetoti āha ‘‘catunnaṃ iriyāpathānaṃ yena kenaci ākārena ṭhitattā yathā ṭhita’’nti. Tattha ākārenāti ṭhānādinā rūpakāyassa pavattiākārena. Ṭhānādayo hi iriyāpathasaṅkhātāya kiriyāya patho pavattimaggoti ‘‘iriyāpatho’’ti vuccantīti vutto vāyamattho. Yathāṭhitanti yathāpavattaṃ, yathāvuttaṃ ṭhānamevettha paṇidhānanti adhippetanti āha ‘‘yathā ṭhitattā ca yathāpaṇihita’’nti. ‘‘Ṭhita’’nti vā kāyassa ṭhānasaṅkhātairiyāpathasamāyogaparidīpanaṃ, ‘‘paṇihita’’nti tadaññairiyāpathasamāyogaparidīpanaṃ. ‘‘Ṭhita’’nti vā kāyasaṅkhātānaṃ rūpadhammānaṃ tasmiṃ tasmiṃ khaṇe sakiccavasena avaṭṭhānaparidīpanaṃ, paṇihitanti paccayavasena tehi tehi paccayehi pakārato nihitaṃ paṇihitanti evampettha attho veditabbo. Paccavekkhatīti pati pati avekkhati, ñāṇacakkhunā vinibbhujjitvā visuṃ visuṃ passati.

    ཨིདཱནི ཝུཏྟམེཝཏྠཾ བྷཱཝཏྠཝིབྷཱཝནཝསེན དསྶེཏུཾ ‘‘ཡཐཱ གོགྷཱཏཀསྶཱ’’ཏིཨཱདི ཝུཏྟཾ། ཏཏྠ པོསེནྟསྶཱཏི མཾསཱུཔཙཡཔརིབྲཱུཧནཱཡ ཀུཎྜཀབྷཏྟཀཔྤཱསཊྛིཨཱདཱིཧི སཾཝཌྜྷེནྟསྶ། ཝདྷིཏཾ མཏནྟི ཧིཾསིཏཾ ཧུཏྭཱ མཏཾ། མཏནྟི ཙ མཏམཏྟཾ། ཏེནེཝཱཧ ‘‘ཏཱཝདེཝཱ’’ཏི། གཱཝཱིཏི སཉྙཱ ན ཨནྟརདྷཱཡཏཱིཏི ཡཱནི ཨངྒཔཙྩངྒཱནི ཡཐཱསནྣིཝིཊྛཱནི ཨུཔཱདཱཡ གཱཝཱིསམཉྙཱ མཏམཏྟཱཡཔི གཱཝིཡཱ ཏེསཾ ཏཾསནྣིཝེསསྶ ཨཝིནཊྛཏྟཱ། ཝིལཱིཡནྟི བྷིཛྫནྟི ཝིབྷུཛྫནྟཱིཏི བཱིལཱ, བྷཱགཱ ཝ-ཀཱརསྶ བ-ཀཱརཾ, ཨིཀཱརསྶ ཙ ཨཱིཀཱརཾ ཀཏྭཱ། བཱིལསོཏི བཱིལཾ བཱིལཾ ཀཏྭཱ། ཝིབྷཛིཏྭཱཏི ཨཊྛིསངྒྷཱཏཏོ མཾསཾ ཝིཝེཙེཏྭཱ, ཏཏོ ཝཱ ཝིཝེཙིཏཾ མཾསཾ བྷཱགསོ ཀཏྭཱ། ཏེནེཝཱཧ ‘‘མཾསསཉྙཱ པཝཏྟཏཱི’’ཏི། པབྦཛིཏསྶཱཔི ཨཔརིགྒཧིཏཀམྨཊྛཱནསྶ། གྷནཝིནིབྦྷོགནྟི སནྟཏིསམཱུཧཀིཙྩགྷནཱནཾ ཝིནིབྦྷུཛྫནཾ ཝིཝེཙནཾ། དྷཱཏུསོ པཙྩཝེཀྑཏོཏི གྷནཝིནིབྦྷོགཀརཎེན དྷཱཏུཾ དྷཱཏུཾ པཐཝཱིཨཱདིདྷཱཏུཾ ཝིསུཾ ཝིསུཾ ཀཏྭཱ པཙྩཝེཀྑནྟསྶ། སཏྟསཉྙཱཏི ཨཏྟཱནུདིཊྛིཝསེན པཝཏྟཱ སཏྟསཉྙཱཏི ཝདནྟི, ཝོཧཱརཝསེན པཝཏྟསཏྟསཉྙཱཡཔི ཏདཱ ཨནྟརདྷཱནཾ ཡུཏྟམེཝ ཡཱཐཱཝཏོ གྷནཝིནིབྦྷོགསྶ སམྤཱདནཏོ། ཨེཝཉྷི སཏི ཡཐཱཝུཏྟཨོཔམྨཏྠེན ཨུཔམེཡྻཏྠོ ཨཉྙདཏྠུ སཾསནྡཏི སམེཏི། ཏེནེཝཱཧ ‘‘དྷཱཏུཝསེནེཝ ཙིཏྟཾ སནྟིཊྛཏཱི’’ཏི། དཀྑོཏི ཚེཀོ ཏཾཏཾསམཉྙཱཡ ཀུསལོ ‘‘ཡཐཱཛཱཏེ སཱུནསྨིཾ ནངྒུཊྛཁུརཝིསཱཎཱདིཝནྟེ ཨཊྛིམཾསཱདིཨཝཡཝསམུདཱཡེ ཨཝིབྷཏྟེ གཱཝཱིསམཉྙཱ, ན ཝིབྷཏྟེ། ཝིབྷཏྟེ པན ཨཊྛིམཾསཱདིཨཝཡཝསམཉྙཱ’’ཏི ཛཱནནཏོ། ཙཏུམཧཱཔཐོ ཝིཡ ཙཏུཨིརིཡཱཔཐོཏི གཱཝིཡཱ ཋིཏཙཏུམཧཱཔཐོ ཝིཡ ཀཱཡསྶ པཝཏྟིམགྒབྷཱུཏོ ཙཏུབྦིདྷོ ཨིརིཡཱཔཐོ ཡསྨཱ ཝིསུདྡྷིམགྒེ (ཝིསུདྡྷི॰ ༡.༣༠༥) ཝིཏྠཱརིཏཱ, ཏསྨཱ ཏཏྠ, ཏཾསཾཝཎྞནཱཡཉྩ (ཝིསུདྡྷི॰ ཊཱི॰ ༡.༣༠༦) ཝུཏྟནཡེན ཝེདིཏབྦོ། སེསཾ ཝུཏྟནཡམེཝ།

    Idāni vuttamevatthaṃ bhāvatthavibhāvanavasena dassetuṃ ‘‘yathā goghātakassā’’tiādi vuttaṃ. Tattha posentassāti maṃsūpacayaparibrūhanāya kuṇḍakabhattakappāsaṭṭhiādīhi saṃvaḍḍhentassa. Vadhitaṃ matanti hiṃsitaṃ hutvā mataṃ. Matanti ca matamattaṃ. Tenevāha ‘‘tāvadevā’’ti. Gāvīti saññā na antaradhāyatīti yāni aṅgapaccaṅgāni yathāsanniviṭṭhāni upādāya gāvīsamaññā matamattāyapi gāviyā tesaṃ taṃsannivesassa avinaṭṭhattā. Vilīyanti bhijjanti vibhujjantīti bīlā, bhāgā va-kārassa ba-kāraṃ, ikārassa ca īkāraṃ katvā. Bīlasoti bīlaṃ bīlaṃ katvā. Vibhajitvāti aṭṭhisaṅghātato maṃsaṃ vivecetvā, tato vā vivecitaṃ maṃsaṃ bhāgaso katvā. Tenevāha ‘‘maṃsasaññā pavattatī’’ti. Pabbajitassāpi apariggahitakammaṭṭhānassa. Ghanavinibbhoganti santatisamūhakiccaghanānaṃ vinibbhujjanaṃ vivecanaṃ. Dhātusopaccavekkhatoti ghanavinibbhogakaraṇena dhātuṃ dhātuṃ pathavīādidhātuṃ visuṃ visuṃ katvā paccavekkhantassa. Sattasaññāti attānudiṭṭhivasena pavattā sattasaññāti vadanti, vohāravasena pavattasattasaññāyapi tadā antaradhānaṃ yuttameva yāthāvato ghanavinibbhogassa sampādanato. Evañhi sati yathāvuttaopammatthena upameyyattho aññadatthu saṃsandati sameti. Tenevāha ‘‘dhātuvaseneva cittaṃ santiṭṭhatī’’ti. Dakkhoti cheko taṃtaṃsamaññāya kusalo ‘‘yathājāte sūnasmiṃ naṅguṭṭhakhuravisāṇādivante aṭṭhimaṃsādiavayavasamudāye avibhatte gāvīsamaññā, na vibhatte. Vibhatte pana aṭṭhimaṃsādiavayavasamaññā’’ti jānanato. Catumahāpatho viya catuiriyāpathoti gāviyā ṭhitacatumahāpatho viya kāyassa pavattimaggabhūto catubbidho iriyāpatho yasmā visuddhimagge (visuddhi. 1.305) vitthāritā, tasmā tattha, taṃsaṃvaṇṇanāyañca (visuddhi. ṭī. 1.306) vuttanayena veditabbo. Sesaṃ vuttanayameva.

    དྷཱཏུམནསིཀཱརཔབྦཝཎྞནཱ ནིཊྛིཏཱ།

    Dhātumanasikārapabbavaṇṇanā niṭṭhitā.

    ནཝསིཝཐིཀཔབྦཝཎྞནཱ

    Navasivathikapabbavaṇṇanā

    ༣༧༩. སིཝཐིཀཱཡ ཨཔཝིདྡྷཨུདྡྷུམཱཏཀཱདིཔཊིསཾཡུཏྟཱནཾ ཨོདྷིསོ པཝཏྟཱནཾ ཀཐཱནཾ, ཏདབྷིདྷེཡྻཱནཉྩ ཨུདྡྷུམཱཏཀཱདིཨསུབྷབྷཱགཱནཾ སིཝཐིཀཔབྦཱནཱིཏི སངྒཱིཏིཀཱརེཧི གཧིཏསམཉྙཱ ། ཏེནཱཧ ‘‘སིཝཐིཀཔབྦེཧི ཝིབྷཛིཏུ’’ནྟི། མརིཏྭཱ ཨེཀཱཧཱཏིཀྐནྟཾ ཨེཀཱཧམཏཾ། ཨུདྡྷཾ ཛཱིཝིཏཔརིཡཱདཱནཱཏི ཛཱིཝིཏཀྑཡཏོ ཨུཔརི མརཎཏོ པརཾ། སམུགྒཏེནཱཏི སམུཊྛིཏེན། ཨུདྡྷུམཱཏཏྟཱཏི ཨུདྡྷཾ ཨུདྡྷཾ དྷུམཱཏཏྟཱ སཱུནཏྟཱ། སེཏརཏྟེཧི ཝིཔརིབྷིནྣཾ ཝིམིསྶིཏཾ ནཱིལཾ ཝིནཱིལཾ, པུརིམཝཎྞཝིཔརིཎཱམབྷཱུཏཾ ཝཱ ནཱིལཾ ཝིནཱིལཾ། ཝིནཱིལམེཝ ཝིནཱིལཀནྟི ཀ-ཀཱརེན པདཝཌྜྷནཾ ཨནཏྠནྟརཏོ ཡཐཱ ‘‘པཱིཏཀཾ ལོཧིཏཀ’’ནྟི (དྷ॰ ས॰ ༦༡༦)། པཊིཀྐཱུལཏྟཱཏི ཛིགུཙྪནཱིཡཏྟཱ། ཀུཙྪིཏཾ ཝིནཱིལནྟི ཝིནཱིལཀནྟི ཀུཙྪནཏྠོ ཝཱ ཨཡཾ ཀ-ཀཱརོཏི དསྶེཏུཾ ཝུཏྟཾ ཡཐཱ ‘‘པཱཔཀོ ཀིཏྟིསདྡོ ཨབྦྷུགྒཙྪཏཱི’’ཏི། (དཱི॰ ནི॰ ༣.༣༡༦; ཨ॰ ནི॰ ༥.༢༡༣; མཧཱཝ॰ ༢༨༥) པརིབྷིནྣཊྛཱནེཧི ཀཱཀཀངྐཱདཱིཧི། ཝིསྶནྡམཱནཔུབྦནྟི ཝིསྶཝནྟཔུབྦཾ, ཏཧཾ ཏཧཾ པགྒྷརནྟཔུབྦནྟི ཨཏྠོ། ཏཐཱབྷཱཝནྟི ཝིསྶནྡམཱནཔུབྦབྷཱཝཾ།

    379. Sivathikāya apaviddhauddhumātakādipaṭisaṃyuttānaṃ odhiso pavattānaṃ kathānaṃ, tadabhidheyyānañca uddhumātakādiasubhabhāgānaṃ sivathikapabbānīti saṅgītikārehi gahitasamaññā . Tenāha ‘‘sivathikapabbehi vibhajitu’’nti. Maritvā ekāhātikkantaṃ ekāhamataṃ. Uddhaṃ jīvitapariyādānāti jīvitakkhayato upari maraṇato paraṃ. Samuggatenāti samuṭṭhitena. Uddhumātattāti uddhaṃ uddhaṃ dhumātattā sūnattā. Setarattehi viparibhinnaṃ vimissitaṃ nīlaṃ vinīlaṃ, purimavaṇṇavipariṇāmabhūtaṃ vā nīlaṃ vinīlaṃ. Vinīlameva vinīlakanti ka-kārena padavaḍḍhanaṃ anatthantarato yathā ‘‘pītakaṃ lohitaka’’nti (dha. sa. 616). Paṭikkūlattāti jigucchanīyattā. Kucchitaṃ vinīlanti vinīlakanti kucchanattho vā ayaṃ ka-kāroti dassetuṃ vuttaṃ yathā ‘‘pāpako kittisaddo abbhuggacchatī’’ti. (Dī. ni. 3.316; a. ni. 5.213; mahāva. 285) paribhinnaṭṭhānehi kākakaṅkādīhi. Vissandamānapubbanti vissavantapubbaṃ, tahaṃ tahaṃ paggharantapubbanti attho. Tathābhāvanti vissandamānapubbabhāvaṃ.

    སོ བྷིཀྑཱུཏི ཡོ ‘‘པསྶེཡྻ སརཱིརཾ སིཝཐིཀཱཡ ཚཌྜིཏ’’ནྟི ཝུཏྟོ, སོ བྷིཀྑུ། ཨུཔསཾཧརཏི སདིསཏཾ། ‘‘ཨཡམྤི ཁོ’’ཏིཨཱདི ཨུཔསཾཧརཎཱཀཱརདསྶནཾ། ཨཱཡཱུཏི རཱུཔཛཱིཝིཏིནྡྲིཡཾ, ཨརཱུཔཛཱིཝིཏིནྡྲིཡཾ པནེཏྠ ཝིཉྙཱཎགཏིཀམེཝ། ཨུསྨཱཏི ཀམྨཛཏེཛོ། ཨེཝཾ པཱུཏིཀསབྷཱཝོཡེཝཱཏི ཨེཝཾ ཨཏིཝིཡ དུགྒནྡྷཛེགུཙྪཔཊིཀྐཱུལཔཱུབྷིཀསབྷཱཝོ ཨེཝ, ན ཨཱཡུཨཱདཱིནཾ ཨཝིགམེ ཝིཡ མཏྟསོཏི ཨདྷིཔྤཱཡོ། ཨེདིསོ བྷཝིསྶཏཱིཏི ཨེཝཾབྷཱཝཱིཏི ཨཱཧ ‘‘ཨེཝཾ ཨུདྡྷུམཱཏཱདིབྷེདོ བྷཝིསྶཏཱི’’ཏི།

    Sobhikkhūti yo ‘‘passeyya sarīraṃ sivathikāya chaḍḍita’’nti vutto, so bhikkhu. Upasaṃharati sadisataṃ. ‘‘Ayampi kho’’tiādi upasaṃharaṇākāradassanaṃ. Āyūti rūpajīvitindriyaṃ, arūpajīvitindriyaṃ panettha viññāṇagatikameva. Usmāti kammajatejo. Evaṃ pūtikasabhāvoyevāti evaṃ ativiya duggandhajegucchapaṭikkūlapūbhikasabhāvo eva, na āyuādīnaṃ avigame viya mattasoti adhippāyo. Ediso bhavissatīti evaṃbhāvīti āha ‘‘evaṃ uddhumātādibhedo bhavissatī’’ti.

    ལུཉྩིཏྭཱ ལུཉྩིཏྭཱཏི ཨུཔྤཱཊེཏྭཱ ཨུཔྤཱཊེཏྭཱ། སཱཝསེསམཾསལོཧིཏཡུཏྟནྟི སབྦསོ ཨཁཱདིཏཏྟཱ ཏཧཾ ཏཧཾ སེསེན ཨཔྤཱཝསེསེན མཾསལོཧིཏེན ཡུཏྟཾ། ‘‘ཨཉྙེན ཧཏྠཊྛིཀ’’ནྟི ཨཝིསེསེན ཧཏྠཊྛིཀཱནཾ ཝིཔྤཀིཎྞཏཱ ཛོཏིཏཱཏི ཨནཝསེསཏོ ཏེསཾ ཝིཔྤཀིཎྞཏཾ དསྶེནྟོ ‘‘ཙཏུསཊྛིབྷེདམྤཱི’’ཏིཨཱདིམཱཧ །

    Luñcitvā luñcitvāti uppāṭetvā uppāṭetvā. Sāvasesamaṃsalohitayuttanti sabbaso akhāditattā tahaṃ tahaṃ sesena appāvasesena maṃsalohitena yuttaṃ. ‘‘Aññena hatthaṭṭhika’’nti avisesena hatthaṭṭhikānaṃ vippakiṇṇatā jotitāti anavasesato tesaṃ vippakiṇṇataṃ dassento ‘‘catusaṭṭhibhedampī’’tiādimāha .

    ཏེརོཝསྶིཀཱནཱིཏི ཏིརོཝསྶཾ གཏཱནི, ཏཱནི པན སཾཝཙྪརཾ ཝཱིཏིཝཏྟཱནི ཧོནྟཱིཏི ཨཱཧ ‘‘ཨཏིཀྐནྟསཾཝཙྪརཱནཱི’’ཏི། པུརཱཎཏཱཡ གྷནབྷཱཝཝིགམེན ཝིཙུཎྞཏཱ ཨིདྷ པཱུཏིབྷཱཝོཏི སོ ཡཐཱ ཧོཏི, ཏཾ དསྶེནྟོ ‘‘ཨབྦྷོཀཱསེ’’ཏིཨཱདིམཱཧ། ཏེརོཝསྶིཀཱནེཝཱཏི སཾཝཙྪརམཏྟཱཏིཀྐནྟཱནི ཨེཝ། ཁཛྫམཱནཏཱདིཝསེན དུཏིཡསིཝཐིཀཔབྦཱདཱིནཾ ཝཝཏྠཱཔིཏཏྟཱ ཝུཏྟཾ ‘‘ཁཛྫམཱནཏཱདཱིནཾ ཝསེན ཡོཛནཱ ཀཱཏབྦཱ’’ཏི།

    Terovassikānīti tirovassaṃ gatāni, tāni pana saṃvaccharaṃ vītivattāni hontīti āha ‘‘atikkantasaṃvaccharānī’’ti. Purāṇatāya ghanabhāvavigamena vicuṇṇatā idha pūtibhāvoti so yathā hoti, taṃ dassento ‘‘abbhokāse’’tiādimāha. Terovassikānevāti saṃvaccharamattātikkantāni eva. Khajjamānatādivasena dutiyasivathikapabbādīnaṃ vavatthāpitattā vuttaṃ ‘‘khajjamānatādīnaṃ vasena yojanā kātabbā’’ti.

    ནཝསིཝཐིཀཔབྦཝཎྞནཱ ནིཊྛིཏཱ།

    Navasivathikapabbavaṇṇanā niṭṭhitā.

    ཨིམཱནེཝ དྭེཏི ཨཝདྷཱརཎེན ཨཔྤནཱཀམྨཊྛཱནཾ ཏཏྠ ནིཡམེཏི ཨཉྙཔབྦེསུ ཏདབྷཱཝཏོ། ཡཏོ ཧི ཨེཝ-ཀཱརོ, ཏཏོ ཨཉྙཏྠ ནིཡམེཏི, ཏེན པབྦདྭཡསྶ ཝིཔསྶནཱཀམྨཊྛཱནཏཱཔི ཨཔྤཊིསིདྡྷཱ དཊྛབྦཱ ཨནིཙྩཏཱདིདསྶནཏོ། སངྑཱརེསུ ཨཱདཱིནཝཝིབྷཱཝནཱནི སིཝཐིཀཔབྦཱནཱིཏི ཨཱཧ ‘‘སིཝཐིཀཱནཾ ཨཱདཱིནཝཱནུཔསྶནཱཝསེན ཝུཏྟཏྟཱ’’ཏི། ཨིརིཡཱཔཐཔབྦཱདཱིནཾ ཨཔྤནཱཝཧཏཱ པཱཀཊཱ ཨེཝཱཏི ‘‘སེསཱནི དྭཱདསཔཱི’’ཏི ཝུཏྟཾ། ཡཾ པནེཏྠ ཨཏྠཏོ ཨཝིབྷཏྟཾ། ཏཾ སུཝིཉྙེཡྻམེཝ།

    Imāneva dveti avadhāraṇena appanākammaṭṭhānaṃ tattha niyameti aññapabbesu tadabhāvato. Yato hi eva-kāro, tato aññattha niyameti, tena pabbadvayassa vipassanākammaṭṭhānatāpi appaṭisiddhā daṭṭhabbā aniccatādidassanato. Saṅkhāresu ādīnavavibhāvanāni sivathikapabbānīti āha ‘‘sivathikānaṃ ādīnavānupassanāvasena vuttattā’’ti. Iriyāpathapabbādīnaṃ appanāvahatā pākaṭā evāti ‘‘sesāni dvādasapī’’ti vuttaṃ. Yaṃ panettha atthato avibhattaṃ. Taṃ suviññeyyameva.

    ཀཱཡཱནུཔསྶནཱཝཎྞནཱ ནིཊྛིཏཱ།

    Kāyānupassanāvaṇṇanā niṭṭhitā.

    ཝེདནཱནུཔསྶནཱཝཎྞནཱ

    Vedanānupassanāvaṇṇanā

    ༣༨༠. སུཁཾ ཝེདནནྟི ཨེཏྠ སུཁཡཏཱིཏི སུཁཱ། སམྤཡུཏྟདྷམྨེ, ཀཱཡཉྩ ལདྡྷསྶཱདེ ཀརོཏཱིཏི ཨཏྠོ། སུཊྛུ ཝཱ ཁཱདཏི, ཁནཏི ཝཱ ཀཱཡིཀཾ, ཙེཏསིཀཉྩཱབཱདྷནྟི སུཁཱ། ‘‘སུཀརཾ ཨོཀཱསདཱནཾ ཨེཏིསྶཱཏི སུཁཱ’’ཏི ཨཔརེ། ཝེདཡཏི ཨཱརམྨཎརསཾ ཨནུབྷཝཏཱིཏི ཝེདནཱ། ཝེདཡམཱནོཏི ཨནུབྷཝམཱནོ། ‘‘ཀཱམ’’ནྟིཨཱདཱིསུ ཡཾ ཝཏྟབྦཾ, ཏཾ ཨིརིཡཱཔཐཔབྦེ ཝུཏྟནཡམེཝ། སམྤཛཱནསྶ ཝེདིཡནཾ སམྤཛཱནཝེདིཡནཾ།

    380.Sukhaṃvedananti ettha sukhayatīti sukhā. Sampayuttadhamme, kāyañca laddhassāde karotīti attho. Suṭṭhu vā khādati, khanati vā kāyikaṃ, cetasikañcābādhanti sukhā. ‘‘Sukaraṃ okāsadānaṃ etissāti sukhā’’ti apare. Vedayati ārammaṇarasaṃ anubhavatīti vedanā. Vedayamānoti anubhavamāno. ‘‘Kāma’’ntiādīsu yaṃ vattabbaṃ, taṃ iriyāpathapabbe vuttanayameva. Sampajānassa vediyanaṃ sampajānavediyanaṃ.

    ཝཏྠུཨཱརམྨཎཱཏི རཱུཔཱདིཨཱརམྨཎཱ། རཱུཔཱདིཨཱརམྨཎཉྷེཏྠ ཝེདནཱཡ པཝཏྟིཊྛཱནཏཱཡ ‘‘ཝཏྠཱུ’’ཏི ཨདྷིཔྤེཏཾ ། ཨསྶཱཏི བྷཝེཡྻ། དྷམྨཝིནིམུཏྟསྶ ཀཏྟུ ཨབྷཱཝཏོ དྷམྨསྶེཝ ཀཏྟུབྷཱཝཾ དསྶེནྟོ ‘‘ཝེདནཱཝ ཝེདཡཏཱི’’ཏི ཨཱཧ། ‘‘ཝོཧཱརམཏྟཾ ཧོཏཱི’’ཏི ཨེཏེན ‘‘སུཁཾ ཝེདནཾ ཝེདཡམཱནོ སུཁཾ ཝེདནཾ ཝེདཡཱམཱི’’ཏི ཨིདཾ ཝོཧཱརམཏྟནྟི དསྶེཏི།

    Vatthuārammaṇāti rūpādiārammaṇā. Rūpādiārammaṇañhettha vedanāya pavattiṭṭhānatāya ‘‘vatthū’’ti adhippetaṃ . Assāti bhaveyya. Dhammavinimuttassa kattu abhāvato dhammasseva kattubhāvaṃ dassento ‘‘vedanāva vedayatī’’ti āha. ‘‘Vohāramattaṃ hotī’’ti etena ‘‘sukhaṃ vedanaṃ vedayamāno sukhaṃ vedanaṃ vedayāmī’’ti idaṃ vohāramattanti dasseti.

    ནིཏྠུནནྟོཏི བལཝཏོ ཝེདནཱཝེགསྶ ནིརོདྷནེ ཨཱདཱིནཝཾ དིསྭཱ ཏསྶ ཨཝསརདཱནཝསེན ནིཏྠུནནྟོ ། ཝེགསནྡྷཱརཎེ ཧི ཨཏིམཧནྟཾ དུཀྑཾ ཨུཔྤཛྫཏཱིཏི ཨཉྙམྤི ཝིཀཱརཾ ཨུཔྤཱདེཡྻ, ཏེན ཐེརོ ཨཔརཱཔརཾ པརིཝཏྟཏི། ཝཱིརིཡསམཐཾ ཡོཛེཏྭཱཏི ཨདྷིཝཱསནཝཱིརིཡསྶ ཨདྷིམཏྟཏྟཱ ཏསྶ ཧཱཔནཝསེན སམཱདྷིནཱ སམརསཏཱཔཱདནེན ཝཱིརིཡསམཐཾ ཡོཛེཏྭཱ། སཧ པཊིསམྦྷིདཱཧཱིཏི ལོཀུཏྟརཔཊིསམྦྷིདཱཧི སཧ། ཨརིཡམགྒཀྑཎེ ཧི པཊིསམྦྷིདཱནཾ ཨསམྨོཧཝསེན ཨདྷིགམོ, ཨཏྠཔཊིསམྦྷིདཱཡ པན ཨཱརམྨཎཀརཎཝསེནཔི། ལོཀིཡཱནམྤི ཝཱ སཏི ཨུཔྤཏྟིཀཱལེ ཏཏྠ སམཏྠཏཾ སནྡྷཱཡཱཧ ‘‘སཧ པཊིསམྦྷིདཱཧཱི’’ཏི། སམསཱིསཱིཏི ཝཱརསམསཱིསཱི ཧུཏྭཱ, པཙྩཝེཀྑཎཝཱརསྶ ཨནནྟརཝཱརེ པརིནིབྦཱཡཱིཏི ཨཏྠོ།

    Nitthunantoti balavato vedanāvegassa nirodhane ādīnavaṃ disvā tassa avasaradānavasena nitthunanto . Vegasandhāraṇe hi atimahantaṃ dukkhaṃ uppajjatīti aññampi vikāraṃ uppādeyya, tena thero aparāparaṃ parivattati. Vīriyasamathaṃ yojetvāti adhivāsanavīriyassa adhimattattā tassa hāpanavasena samādhinā samarasatāpādanena vīriyasamathaṃ yojetvā. Saha paṭisambhidāhīti lokuttarapaṭisambhidāhi saha. Ariyamaggakkhaṇe hi paṭisambhidānaṃ asammohavasena adhigamo, atthapaṭisambhidāya pana ārammaṇakaraṇavasenapi. Lokiyānampi vā sati uppattikāle tattha samatthataṃ sandhāyāha ‘‘saha paṭisambhidāhī’’ti. Samasīsīti vārasamasīsī hutvā, paccavekkhaṇavārassa anantaravāre parinibbāyīti attho.

    ཡཐཱ ཙ སུཁཾ, ཨེཝཾ དུཀྑནྟི ཡཐཱ ‘‘སུཁཾ ཀོ ཝེདཡཏཱི’’ཏིཨཱདིནཱ སམྤཛཱནཝེདིཡནཾ སནྡྷཱཡ ཝུཏྟཾ, ཨེཝཾ དུཀྑམྤི། ཏཏྠ དུཀྑཡཏཱིཏི དུཀྑཱ, སམྤཡུཏྟདྷམྨེ, ཀཱཡཉྩ པཱིལེ༹ཏི ཝིབཱདྷཏཱིཏི ཨཏྠོ། དུཊྛུཾ ཝཱ ཁཱདཏི, ཁནཏི ཀཱཡིཀཾ, ཙེཏསིཀཉྩ སཱཏནྟི དུཀྑཱ། ‘‘དུཀྐརཾ ཨོཀཱསདཱནཾ ཨེཏིསྶཱཏི དུཀྑཱ’’ཏི ཨཔརེ། ཨརཱུཔཀམྨཊྛཱནནྟི ཨརཱུཔཔརིགྒཧཾ, ཨརཱུཔདྷམྨམུཁེན ཝིཔསྶནཱབྷིནིཝེསནནྟི ཨཏྠོ། ན པཱཀཊཾ ཧོཏི ཕསྶསྶ, ཙིཏྟསྶ ཙ ཨཝིབྷཱུཏཱཀཱརཏྟཱ། ཏེནཱཧ ‘‘ཨནྡྷཀཱརཾ ཝིཡ ཁཱཡཏཱི’’ཏི། ‘‘ན པཱཀཊཾ ཧོཏཱི’’ཏི ཙ ཨིདཾ ཏཱདིསེ པུགྒལེ སནྡྷཱཡ ཝུཏྟཾ, ཏེསཾ ཨཱདིཏོ ཝེདནཱཝ ཝིབྷཱུཏཏརཱ ཧུཏྭཱ ཨུཔཊྛཱཏི། ཨེཝཉྷི ཡཾ ཝུཏྟཾ སཀྐཔཉྷཝཎྞནཱ དཱིསུ ‘‘ཕསྶོ པཱཀཊོ ཧོཏི, ཝིཉྙཱཎཾ པཱཀཊཾ ཧོཏཱི’’ཏི, (དཱི॰ ནི॰ ཨཊྛ॰ ༢.༣༥༩) ཏཾ ཨཝིརོདྷིཏཾ ཧོཏི། ཝེདནཱཝསེན ཀཐིཡམཱནཾ ཀམྨཊྛཱནཾ པཱཀཊཾ ཧོཏཱིཏི ཡོཛནཱ། ‘‘ཝེདནཱནཾ ཨུཔྤཏྟིཔཱཀཊཏཱཡཱ’’ཏི ཙ ཨིདཾ སུཁདུཀྑཝེདནཱནཾ ཝསེན ཝུཏྟཾ། ཏཱསཉྷི པཝཏྟི ཨོལཱ༹རིཀཱ, ན ཨིཏརཱཡ། ཏདུབྷཡགྒཧཎམུཁེན ཝཱ གཧེཏབྦཏྟཱ ཨིཏརཱཡཔི པཝཏྟི ཝིཉྙཱུནཾ པཱཀཊཱ ཨེཝཱཏི ‘‘ཝེདནཱན’’ནྟི ཨཝིསེསགྒཧཎཾ དཊྛབྦཾ། སཀྐཔཉྷེ ཝུཏྟནཡེནེཝ ཝེདིཏབྦོ, ཏསྨཱ ཏཏྠ ཝཏྟབྦོ ཨཏྠཝིསེསོ ཏཏྠ ལཱིནཏྠཔྤཀཱསནིཡཾ ཝུཏྟནཡེནེཝ གཧེཏབྦོ།

    Yathā ca sukhaṃ, evaṃ dukkhanti yathā ‘‘sukhaṃ ko vedayatī’’tiādinā sampajānavediyanaṃ sandhāya vuttaṃ, evaṃ dukkhampi. Tattha dukkhayatīti dukkhā, sampayuttadhamme, kāyañca pīḷeti vibādhatīti attho. Duṭṭhuṃ vā khādati, khanati kāyikaṃ, cetasikañca sātanti dukkhā. ‘‘Dukkaraṃ okāsadānaṃ etissāti dukkhā’’ti apare. Arūpakammaṭṭhānanti arūpapariggahaṃ, arūpadhammamukhena vipassanābhinivesananti attho. Na pākaṭaṃ hoti phassassa, cittassa ca avibhūtākārattā. Tenāha ‘‘andhakāraṃ viya khāyatī’’ti. ‘‘Na pākaṭaṃhotī’’ti ca idaṃ tādise puggale sandhāya vuttaṃ, tesaṃ ādito vedanāva vibhūtatarā hutvā upaṭṭhāti. Evañhi yaṃ vuttaṃ sakkapañhavaṇṇanā dīsu ‘‘phasso pākaṭo hoti, viññāṇaṃ pākaṭaṃ hotī’’ti, (dī. ni. aṭṭha. 2.359) taṃ avirodhitaṃ hoti. Vedanāvasena kathiyamānaṃ kammaṭṭhānaṃ pākaṭaṃ hotīti yojanā. ‘‘Vedanānaṃ uppattipākaṭatāyā’’ti ca idaṃ sukhadukkhavedanānaṃ vasena vuttaṃ. Tāsañhi pavatti oḷārikā, na itarāya. Tadubhayaggahaṇamukhena vā gahetabbattā itarāyapi pavatti viññūnaṃ pākaṭā evāti ‘‘vedanāna’’nti avisesaggahaṇaṃ daṭṭhabbaṃ. Sakkapañhe vuttanayeneva veditabbo, tasmā tattha vattabbo atthaviseso tattha līnatthappakāsaniyaṃ vuttanayeneva gahetabbo.

    པུབྦེ ‘‘ཝཏྠུཾ ཨཱརམྨཎཾ ཀཏྭཱ ཝེདནཱཝ ཝེདཡཏཱི’’ཏི ཝེདནཱཡ ཨཱརམྨཎཱདྷཱིནཝུཏྟིཏཱཡ ཙ ཨནཏྟཏཱཡ ཙ པཛཱནནཾ ཝུཏྟཾ, ཨིདཱནི ཏསྶཱ ཨནིཙྩཏཱདིཔཛཱནནཾ དསྶེནྟོ ‘‘ཨཡཾ ཨཔརོཔི པཛཱནནཔརིཡཱཡོ’’ཏི ཨཱཧ། ཡཐཱ ཨེཀསྨིཾ ཁཎེ ཙིཏྟདྭཡསྶ ཨསམྦྷཝོ ཨེཀཛ྄ཛྷཾ ཨནེཀནྟཔཙྩཡཱབྷཱཝཏོ, ཨེཝཾ ཝེདནཱདྭཡསྶ ཝིསིཊྛཱརམྨཎཝུཏྟིཏོ ཙཱཏི ཨཱཧ ‘‘སུཁཝེདནཱཀྑཎེ དུཀྑཱཡ ཝེདནཱཡ ཨབྷཱཝཏོ’’ཏི། ནིདསྶནམཏྟཉྩེཏཾ ཏདཱ ཨུཔེཀྑཱཝེདནཱཡཔི ཨབྷཱཝཏོ, ཏེན སུཁཝེདནཱཀྑཎེ བྷཱུཏཔུབྦཱནཾ ཨིཏརཝེདནཱནཾ ཧུཏྭཱཨབྷཱཝཔཛཱནནེན སུཁཝེདནཱཡཔི ཧུཏྭཱ ཨབྷཱཝོ ཉཱཏོ ཨེཝ ཧོཏཱིཏི ཏསྶཱ པཱཀཊབྷཱཝམེཝ དསྶེནྟོ ‘‘ཨིམིསྶཱ ཙ སུཁཱཡ ཝེདནཱཡ ཨིཏོ པཋམཾ ཨབྷཱཝཏོ’’ཏི ཨཱཧ, ཨེཏེནེཝ ཙ ཏཱསམྤི ཝེདནཱནཾ པཱཀཊབྷཱཝོ དསྶིཏོཏི དཊྛབྦཾ། ཏེནཱཧ ‘‘ཝེདནཱ ནཱམ ཨནིཙྩཱ ཨདྷུཝཱ ཝིཔརིཎཱམདྷམྨཱ’’ཏི། ཨནིཙྩགྒཧཎེན ཧི ཝེདནཱནཾ ཝིདྡྷཾསནབྷཱཝོ དསྶིཏོ ཝིདྡྷསྟེ ཨནིཙྩཏཱཡ སུཝིཉྙེཡྻཏྟཱ། ཨདྷུཝགྒཧཎེན པཱཀཊབྷཱཝོ ཏསྶ ཨསདཱབྷཱཝིཏཱདིབྷཱཝནཏོ། ཝིཔརིཎཱམགྒཧཎེན དུཀྑབྷཱཝོ ཏསྶ ཨཉྙཐཏྟདཱིཔནཏོ, ཏེན སུཁཱཔི ཝེདནཱ དུཀྑཱ, པགེཝ ཨིཏརཱཏི ཏིསྶནྣམྤི ཝེདནཱནཾ དུཀྑཏཱ དསྶིཏཱ ཧོཏི། ཨིཏི ‘‘ཡདནིཙྩཾ དུཀྑཾ, ཏཾ ཨེཀནྟཏོ ཨནཏྟཱ’’ཏི ཏཱིསུཔི ཝེདནཱསུ ལཀྑཎཏྟཡཔཛཱནནཱ ཛོཏིཏཱཏི དཊྛབྦཾ། ཏེནཱཧ ‘‘ཨིཏིཧ ཏཏྠ སམྤཛཱནོ ཧོཏཱི’’ཏི།

    Pubbe ‘‘vatthuṃ ārammaṇaṃ katvā vedanāva vedayatī’’ti vedanāya ārammaṇādhīnavuttitāya ca anattatāya ca pajānanaṃ vuttaṃ, idāni tassā aniccatādipajānanaṃ dassento ‘‘ayaṃ aparopi pajānanapariyāyo’’ti āha. Yathā ekasmiṃ khaṇe cittadvayassa asambhavo ekajjhaṃ anekantapaccayābhāvato, evaṃ vedanādvayassa visiṭṭhārammaṇavuttito cāti āha ‘‘sukhavedanākkhaṇe dukkhāya vedanāya abhāvato’’ti. Nidassanamattañcetaṃ tadā upekkhāvedanāyapi abhāvato, tena sukhavedanākkhaṇe bhūtapubbānaṃ itaravedanānaṃ hutvāabhāvapajānanena sukhavedanāyapi hutvā abhāvo ñāto eva hotīti tassā pākaṭabhāvameva dassento ‘‘imissā casukhāya vedanāya ito paṭhamaṃabhāvato’’ti āha, eteneva ca tāsampi vedanānaṃ pākaṭabhāvo dassitoti daṭṭhabbaṃ. Tenāha ‘‘vedanā nāma aniccā adhuvā vipariṇāmadhammā’’ti. Aniccaggahaṇena hi vedanānaṃ viddhaṃsanabhāvo dassito viddhaste aniccatāya suviññeyyattā. Adhuvaggahaṇena pākaṭabhāvo tassa asadābhāvitādibhāvanato. Vipariṇāmaggahaṇena dukkhabhāvo tassa aññathattadīpanato, tena sukhāpi vedanā dukkhā, pageva itarāti tissannampi vedanānaṃ dukkhatā dassitā hoti. Iti ‘‘yadaniccaṃ dukkhaṃ, taṃ ekantato anattā’’ti tīsupi vedanāsu lakkhaṇattayapajānanā jotitāti daṭṭhabbaṃ. Tenāha ‘‘itiha tattha sampajāno hotī’’ti.

    ཨིདཱནི ཏམཏྠཾ སུཏྟེན (མ॰ ནི॰ ༢.༢༠༥) སཱདྷེཏུཾ ‘‘ཝུཏྟམྤི ཙེཏ’’ནྟིཨཱདིམཱཧ། ཏཏྠ ནེཝ ཏསྨིཾ སམཡེ དུཀྑཾ ཝེདནཾ ཝེདེཏཱིཏི ཏསྨིཾ སུཁཝེདནཱསམངྒིསམཡེ ནེཝ དུཀྑཾ ཝེདནཾ ཝེདེཏི ནིརུདྡྷཏྟཱ, ཨནུཔྤནྣཏྟཱ ཙ ཡཐཱཀྐམཾ ཨཏཱིཏཱནཱགཏཱནཾ། པཙྩུཔྤནྣཱཡ པན ཨསམྦྷཝོ ཝུཏྟོ ཨེཝ། སཀིཙྩཀྑཎམཏྟཱཝཊྛཱནཏོ ཨནིཙྩཱ། སམེཙྩ སམྦྷུཡྻ པཙྩཡེཧི ཀཏཏྟཱ སངྑཏཱ། ཝཏྠཱརམྨཎཱདིཔཙྩཡཾ པཊིཙྩ ཨུཔྤནྣཏྟཱ པཊིཙྩསམུཔྤནྣཱ། ཁཡཝཡཔལུཛྫནནིརུཛ྄ཛྷནཔཀཏིཏཱཡ ཁཡདྷམྨཱ ཝཡདྷམྨཱ ཝིརཱགདྷམྨཱ ནིརོདྷདྷམྨཱཏི དཊྛབྦཱ།

    Idāni tamatthaṃ suttena (ma. ni. 2.205) sādhetuṃ ‘‘vuttampi ceta’’ntiādimāha. Tattha neva tasmiṃ samaye dukkhaṃ vedanaṃ vedetīti tasmiṃ sukhavedanāsamaṅgisamaye neva dukkhaṃ vedanaṃ vedeti niruddhattā, anuppannattā ca yathākkamaṃ atītānāgatānaṃ. Paccuppannāya pana asambhavo vutto eva. Sakiccakkhaṇamattāvaṭṭhānato aniccā. Samecca sambhuyya paccayehi katattā saṅkhatā. Vatthārammaṇādipaccayaṃ paṭicca uppannattā paṭiccasamuppannā. Khayavayapalujjananirujjhanapakatitāya khayadhammā vayadhammā virāgadhammā nirodhadhammāti daṭṭhabbā.

    ཀིལེསེཧི ཨཱམསིཏབྦཏོ ཨཱམིསཾ ནཱམ, པཉྩ ཀཱམགུཎཱ, ཨཱརམྨཎཀརཎཝསེན སཧ ཨཱམིསེཧཱིཏི སཱམིསཾ། ཏེནཱཧ ‘‘པཉྩཀཱམགུཎཱམིསནིསྶིཏཱ’’ཏི།

    Kilesehi āmasitabbato āmisaṃ nāma, pañca kāmaguṇā, ārammaṇakaraṇavasena saha āmisehīti sāmisaṃ. Tenāha ‘‘pañcakāmaguṇāmisanissitā’’ti.

    ཨིཏོ པརནྟི ‘‘ཨཏྠི ཝེདནཱ’’ཏི ཨེཝམཱདི པཱལི༹ཾ སནྡྷཱཡཱཧ ‘‘ཀཱཡཱནུཔསྶནཱཡཾ ཝུཏྟནཡམེཝཱ’’ཏི།

    Ito paranti ‘‘atthi vedanā’’ti evamādi pāḷiṃ sandhāyāha ‘‘kāyānupassanāyaṃ vuttanayamevā’’ti.

    ཝེདནཱནུཔསྶནཱཝཎྞནཱ ནིཊྛིཏཱ།

    Vedanānupassanāvaṇṇanā niṭṭhitā.

    ཙིཏྟཱནུཔསྶནཱཝཎྞནཱ

    Cittānupassanāvaṇṇanā

    ༣༨༡. སམྤཡོགཝསེན པཝཏྟམཱནེན སཧ རཱགེནཱཏི སརཱགཾ། ཏེནཱཧ ‘‘ལོབྷསཧགཏ’’ནྟི། ཝཱིཏརཱགནྟི ཨེཏྠ ཀཱམཾ སརཱགཔདཔཊིཡོགིནཱ ཝཱིཏརཱགཔདེན བྷཝིཏབྦཾ, སམྨསནཙཱརསྶ པན ཨདྷིཔྤེཏཏྟཱ ཏེབྷཱུམཀསྶེཝ གཧཎནྟི ‘‘ལོཀིཡཀུསལཱབྱཱཀཏ’’ནྟི ཝཏྭཱ ‘‘ཨིདཾ པནཱ’’ཏིཨཱདིནཱ ཏམེཝ ཨདྷིཔྤཱཡཾ ཝིཝརཏི། སེསཱནི དྭེ དོསམཱུལཱནི, དྭེ མོཧམཱུལཱནཱིཏི ཙཏྟཱརི ཨཀུསལཙིཏྟཱནི། ཏེསཉྷི རཱགེན སམྤཡོགཱབྷཱཝཏོ ནཏྠེཝ སརཱགཏཱ, ཏཾནིམིཏྟཀཏཱཡ པན སིཡཱ ཏཾསཧིཏཀཱལེ སོཏི ནཏྠེཝ ཝཱིཏརཱགཏཱཔཱིཏི དུཀྑཝིནིམུཏྟཏཱ ཨེཝེཏྠ ལབྦྷཏཱིཏི ཨཱཧ ‘‘ནེཝ པུརིམཔདཾ ན པཙྪིམཔདཾ བྷཛནྟཱི’’ཏི། ཡདི ཨེཝཾ པདེསིཀཾ པཛཱནནཾ ཨཱཔཛྫཏཱིཏི? ནཱཔཛྫཏི, དུཀནྟརཔརིཡཱཔནྣཏྟཱ ཏེསཾ། ཡེ པན ‘‘པཊིཔཀྑབྷཱཝེ ཨགཡ྄ཧམཱནེ སམྤཡོགཱབྷཱཝོ ཨེཝེཏྠ པམཱཎཾ ཨེཀཙྩཨབྱཱཀཏཱནཾ ཝིཡཱ’’ཏི ཨིཙྪནྟི, ཏེསཾ མཏེན སེསཱཀུསལཙིཏྟཱནམྤི དུཏིཡཔདསངྒཧོ ཝེདིཏབྦོ ། དུཏིཡདུཀེཔི ཝུཏྟནཡེན ཨཏྠོ ཝེདིཏབྦོ། ཨཀུསལམཱུལེསུ སཧ མོཧེནེཝ ཝཏྟཏཱིཏི སམོཧནྟི ཨཱཧ ‘‘ཝིཙིཀིཙྪཱསཧགཏཉྩེཝ ཨུདྡྷཙྩསཧགཏཉྩཱ’’ཏི། ཡསྨཱ ཙེཏྠ ‘‘སཧེཝ མོཧེནཱཏི སམོཧ’’ནྟི པུརིམཔདཱཝདྷཱརཎམྤི ལབྦྷཏིཡེཝ, ཏསྨཱ ཝུཏྟཾ ‘‘ཡསྨཱ པནཱ’’ཏིཨཱདི། ཡཐཱ པན ཨཏིམཱུལ༹ྷཏཱཡ པཱཊིཔུགྒལིཀནཡེན སཝིསེསམོཧཝནྟཏཱཡ ‘‘མོམཱུཧཙིཏྟ’’ནྟི ཝཏྟབྦཏོ ཝིཙིཀིཙྪཱཨུདྡྷཙྩསཧགཏདྭཡཾ ཝིསེསཏོ ‘‘སམོཧ’’ནྟི ཝུཙྩཏི, ན ཏཐཱ སེསཱཀུསལཙིཏྟཱནཱིཏི ‘‘ཝཊྚནྟིཡེཝཱ’’ཏི སཱསངྐཾ ཝདཏི། སམྤཡོགཝསེན ཐིནམིདྡྷེན ཨནུཔཏིཏཾ ཨནུགཏནྟི ཐིནམིདྡྷཱནུཔཏིཏཾ, པཉྩཝིདྷཾསསངྑཱརིཀཱཀུསལཙིཏྟཾ སངྐུཙིཏཙིཏྟཾ, སངྐུཙིཏཙིཏྟཾ ནཱམ ཨཱརམྨཎེ སངྐོཙནཝསེན པཝཏྟནཏོ། པཙྩཡཝིསེསཝསེན ཐཱམཛཱཏེན ཨུདྡྷཙྩེན སཧགཏཾ སཾསཊྛནྟི ཨུདྡྷཙྩསཧགཏཾ, ཨཉྙཐཱ སབྦམྤི ཨཀུསལཙིཏྟཾ ཨུདྡྷཙྩསཧགཏམེཝཱཏི། པསཊཙིཏྟཾ ནཱམ ཨཱརམྨཎེ སཝིསེསཾ ཝིཀྑེཔཝསེན ཝིསཊབྷཱཝེན པཝཏྟནཏོ།

    381. Sampayogavasena pavattamānena saha rāgenāti sarāgaṃ. Tenāha ‘‘lobhasahagata’’nti. Vītarāganti ettha kāmaṃ sarāgapadapaṭiyoginā vītarāgapadena bhavitabbaṃ, sammasanacārassa pana adhippetattā tebhūmakasseva gahaṇanti ‘‘lokiyakusalābyākata’’nti vatvā ‘‘idaṃ panā’’tiādinā tameva adhippāyaṃ vivarati. Sesāni dve dosamūlāni, dve mohamūlānīti cattāri akusalacittāni. Tesañhi rāgena sampayogābhāvato nattheva sarāgatā, taṃnimittakatāya pana siyā taṃsahitakāle soti nattheva vītarāgatāpīti dukkhavinimuttatā evettha labbhatīti āha ‘‘neva purimapadaṃ na pacchimapadaṃ bhajantī’’ti. Yadi evaṃ padesikaṃ pajānanaṃ āpajjatīti? Nāpajjati, dukantarapariyāpannattā tesaṃ. Ye pana ‘‘paṭipakkhabhāve agayhamāne sampayogābhāvo evettha pamāṇaṃ ekaccaabyākatānaṃ viyā’’ti icchanti, tesaṃ matena sesākusalacittānampi dutiyapadasaṅgaho veditabbo . Dutiyadukepi vuttanayena attho veditabbo. Akusalamūlesu saha moheneva vattatīti samohanti āha ‘‘vicikicchāsahagatañceva uddhaccasahagatañcā’’ti. Yasmā cettha ‘‘saheva mohenāti samoha’’nti purimapadāvadhāraṇampi labbhatiyeva, tasmā vuttaṃ ‘‘yasmā panā’’tiādi. Yathā pana atimūḷhatāya pāṭipuggalikanayena savisesamohavantatāya ‘‘momūhacitta’’nti vattabbato vicikicchāuddhaccasahagatadvayaṃ visesato ‘‘samoha’’nti vuccati, na tathā sesākusalacittānīti ‘‘vaṭṭantiyevā’’ti sāsaṅkaṃ vadati. Sampayogavasena thinamiddhena anupatitaṃ anugatanti thinamiddhānupatitaṃ, pañcavidhaṃsasaṅkhārikākusalacittaṃ saṅkucitacittaṃ, saṅkucitacittaṃ nāma ārammaṇe saṅkocanavasena pavattanato. Paccayavisesavasena thāmajātena uddhaccena sahagataṃ saṃsaṭṭhanti uddhaccasahagataṃ, aññathā sabbampi akusalacittaṃ uddhaccasahagatamevāti. Pasaṭacittaṃ nāma ārammaṇe savisesaṃ vikkhepavasena visaṭabhāvena pavattanato.

    ཀིལེསཝིཀྑམྦྷནསམཏྠཏཱཡ ཝིཔུལཕལཏཱཡ ཙ དཱིགྷསནྟཱནཏཱཡ ཙ མཧནྟབྷཱཝཾ གཏཾ, མཧནྟེཧི ཝཱ ཨུལཱ༹རཙྪནྡཱདཱིཧི གཏཾ པཊིཔནྣནྟི མཧགྒཏཾ, ཏཾ པན རཱུཔཱརཱུཔབྷཱུམིགཏཾ ཏཏོ མཧནྟསྶ ལོཀེ ཨབྷཱཝཏོ། ཏེནཱཧ ‘‘རཱུཔཱརཱུཔཱཝཙར’’ནྟི། ཏསྶ ཙེཏྠ པཊིཡོགཱི པརིཏྟཾ ཨེཝཱཏི ཨཱཧ ‘‘ཨམཧགྒཏནྟི ཀཱམཱཝཙར’’ནྟི། ཨཏྟཱནཾ ཨུཏྟརིཏུཾ སམཏྠེཧི སཧ ཨུཏྟརེཧཱིཏི སཨུཏྟརཾ། ཏཔྤཊིཔཀྑེན ཨནུཏྟརཾ། ཏདུབྷཡཾ ཨུཔཱདཱཡུཔཱདཱཡ ཝེདིཏབྦནྟི ཨཱཧ ‘‘སཨུཏྟརནྟི ཀཱམཱཝཙརནྟིཨཱདི། པཊིཔཀྑཝིཀྑམྦྷནསམཏྠེན སམཱདྷིནཱ སམྨདེཝ ཨཱཧིཏཾ སམཱཧིཏཾ། ཏེནཱཧ ‘‘ཡསྶཱ’’ཏིཨཱདི། ཡསྶཱཏི ཡསྶ ཙིཏྟསྶ། ཡཐཱཝུཏྟེན སམཱདྷིནཱ ན སམཱཧིཏནྟི ཨསམཱཧིཏཾ། ཏེནཱཧ ‘‘ཨུབྷཡསམཱདྷིརཧིཏ’’ནྟི། ཏདངྒཝིམུཏྟིཡཱ ཝིམུཏྟཾ, ཀཱམཱཝཙརཀུསལཙིཏྟཾ, ཝིཀྑམྦྷནཝིམུཏྟིཡཱ ཝིམུཏྟཾ, མཧགྒཏཙིཏྟནྟི ཏདུབྷཡཾ སནྡྷཱཡཱཧ ‘‘ཏདངྒཝིཀྑམྦྷནཝིམུཏྟཱིཧི ཝིམུཏྟ’’ནྟི། ཡཏྠ ཏདུབྷཡཝིམུཏྟི ནཏྠི, ཏཾ ཨུབྷཡཝིམུཏྟིརཧིཏནྟི གཡ྄ཧམཱནེ ལོཀུཏྟརཙིཏྟེཔི སིཡཱསངྐཱཏི ཏཾ ནིཝཏྟནཏྠཾ ‘‘སམུཙྪེད…པེ॰… ཨོཀཱསོཝ ནཏྠཱི’’ཏི ཨཱཧ། ཨོཀཱསབྷཱཝོ ཙ སམྨསནཙཱརསྶ ཨདྷིཔྤེཏཏྟཱ ཝེདིཏབྦོ། ཡཾ པནེཏྠ ཨཏྠཏོ ཨཝིབྷཏྟཾ, ཏཾ ཧེཊྛཱ ཝུཏྟནཡཏྟཱ ཨུཏྟཱནམེཝ།

    Kilesavikkhambhanasamatthatāya vipulaphalatāya ca dīghasantānatāya ca mahantabhāvaṃ gataṃ, mahantehi vā uḷāracchandādīhi gataṃ paṭipannanti mahaggataṃ, taṃ pana rūpārūpabhūmigataṃ tato mahantassa loke abhāvato. Tenāha ‘‘rūpārūpāvacara’’nti. Tassa cettha paṭiyogī parittaṃ evāti āha ‘‘amahaggatanti kāmāvacara’’nti. Attānaṃ uttarituṃ samatthehi saha uttarehīti sauttaraṃ. Tappaṭipakkhena anuttaraṃ. Tadubhayaṃ upādāyupādāya veditabbanti āha ‘‘sauttaranti kāmāvacarantiādi. Paṭipakkhavikkhambhanasamatthena samādhinā sammadeva āhitaṃ samāhitaṃ. Tenāha ‘‘yassā’’tiādi. Yassāti yassa cittassa. Yathāvuttena samādhinā na samāhitanti asamāhitaṃ. Tenāha ‘‘ubhayasamādhirahita’’nti. Tadaṅgavimuttiyā vimuttaṃ, kāmāvacarakusalacittaṃ, vikkhambhanavimuttiyā vimuttaṃ, mahaggatacittanti tadubhayaṃ sandhāyāha ‘‘tadaṅgavikkhambhanavimuttīhi vimutta’’nti. Yattha tadubhayavimutti natthi, taṃ ubhayavimuttirahitanti gayhamāne lokuttaracittepi siyāsaṅkāti taṃ nivattanatthaṃ ‘‘samuccheda…pe… okāsova natthī’’ti āha. Okāsabhāvo ca sammasanacārassa adhippetattā veditabbo. Yaṃ panettha atthato avibhattaṃ, taṃ heṭṭhā vuttanayattā uttānameva.

    ཙིཏྟཱནུཔསྶནཱཝཎྞནཱ ནིཊྛིཏཱ།

    Cittānupassanāvaṇṇanā niṭṭhitā.

    དྷམྨཱནུཔསྶནཱ

    Dhammānupassanā

    ནཱིཝརཎཔབྦཝཎྞནཱ

    Nīvaraṇapabbavaṇṇanā

    ༣༨༢. པཧཱཏབྦཱདིདྷམྨཝིབྷཱགདསྶནཝསེན པཉྩདྷཱ དྷམྨཱནུཔསྶནཱ ནིདྡིཊྛཱཏི ཨཡམཏྠོ པཱལི༹ཏོ ཨེཝ ཝིཉྙཱཡཏཱིཏི ཏམཏྠཾ ཨུལླིངྒེནྟོ ‘‘པཉྩཝིདྷེན དྷམྨཱནུཔསྶནཾ ཀཐེཏུ’’ནྟི ཨཱཧ། ཡདི ཨེཝཾ ཀསྨཱ ནཱིཝརཎཱདིཝསེནེཝ ནིདྡིཊྛནྟི? ཝིནེཡྻཛ྄ཛྷཱསཡཏོ། ཡེསཉྷི ཝེནེཡྻཱནཾ པཧཱཏབྦདྷམྨེསུ པཋམཾ ནཱིཝརཎཱནི ཝིབྷཱགེན ཝཏྟབྦཱནི, ཏེསཾ ཝསེནེཏྠ བྷགཝཏཱ པཋམཾ ནཱིཝརཎེསུ དྷམྨཱནུཔསྶནཱ ཀཐིཏཱ། ཏཐཱ ཧི ཀཱཡཱནུཔསྶནཱཔི སམཐཔུབྦངྒམཱ དེསིཏཱ, ཏཏོ པརིཉྙེཡྻེསུ ཁནྡྷེསུ, ཨཱཡཏནེསུ ཙ བྷཱཝེཏབྦེསུ བོཛ྄ཛྷངྒེསུ, པརིཉྙེཡྻཱདིཝིབྷཱགེསུ སཙྩེསུ ཙ ཨུཏྟརཱ དེསནཱ, ཏསྨཱ ཙེཏྠ སམཐབྷཱཝནཱཔི ཡཱཝདེཝ ཝིཔསྶནཏྠཱ ཨིཙྪིཏཱ། ཝིཔསྶནཱཔདྷཱནཱ, ཝིཔསྶནཱབཧུལཱ ཙ སཏིཔཊྛཱནདེསནཱཏི ཏསྶཱ ཝིཔསྶནཱབྷིནིཝེསཝིབྷཱགེན དེསིཏབྷཱཝཾ ཝིབྷཱཝེནྟོ ‘‘ཨཔིཙཱ’’ཏིཨཱདིམཱཧ། ཏཏྠ ཁནྡྷཱཡཏནདུཀྑསཙྩཝསེན མིསྶཀཔརིགྒཧཀཐནཾ དཊྛབྦཾ། སཉྙཱསངྑཱརཀྑནྡྷཔརིགྒཧམྤཱིཏི པི-སདྡེན སཀལཔཉྩུཔཱདཱནཀྑནྡྷཔརིགྒཧཾ སམྤིཎྜེཏི ཨིཏརེསཾ ཏདནྟོགདྷཏྟཱ།

    382. Pahātabbādidhammavibhāgadassanavasena pañcadhā dhammānupassanā niddiṭṭhāti ayamattho pāḷito eva viññāyatīti tamatthaṃ ulliṅgento ‘‘pañcavidhena dhammānupassanaṃ kathetu’’nti āha. Yadi evaṃ kasmā nīvaraṇādivaseneva niddiṭṭhanti? Vineyyajjhāsayato. Yesañhi veneyyānaṃ pahātabbadhammesu paṭhamaṃ nīvaraṇāni vibhāgena vattabbāni, tesaṃ vasenettha bhagavatā paṭhamaṃ nīvaraṇesu dhammānupassanā kathitā. Tathā hi kāyānupassanāpi samathapubbaṅgamā desitā, tato pariññeyyesu khandhesu, āyatanesu ca bhāvetabbesu bojjhaṅgesu, pariññeyyādivibhāgesu saccesu ca uttarā desanā, tasmā cettha samathabhāvanāpi yāvadeva vipassanatthā icchitā. Vipassanāpadhānā, vipassanābahulā ca satipaṭṭhānadesanāti tassā vipassanābhinivesavibhāgena desitabhāvaṃ vibhāvento ‘‘apicā’’tiādimāha. Tattha khandhāyatanadukkhasaccavasena missakapariggahakathanaṃ daṭṭhabbaṃ. Saññāsaṅkhārakkhandhapariggahampīti pi-saddena sakalapañcupādānakkhandhapariggahaṃ sampiṇḍeti itaresaṃ tadantogadhattā.

    ‘‘ཀཎྷསུཀྐདྷམྨཱནཾ ཡུགནནྡྷཏཱ ནཏྠཱི’’ཏི པཛཱནནཀཱལེ ཨབྷཱཝཱ ‘‘ཨབྷིཎྷསམུདཱཙཱརཝསེནཱ’’ཏི ཝུཏྟཾ། སཾཝིཛྫམཱནནྟི ཨཏྟནོ སནྟཱནེ ཨུཔལབྦྷམཱནཾ། ཡཐཱཏི ཡེནཱཀཱརེན, སོ པན ‘‘ཀཱམཙྪནྡསྶ ཨུཔྤཱདོ ཧོཏཱི’’ཏི ཝུཏྟཏྟཱ ཀཱམཙྪནྡསྶ ཀཱརཎཱཀཱརོཝ, ཨཏྠཏོ ཀཱརཎམེཝཱཏི ཨཱཧ ‘‘ཡེན ཀཱརཎེནཱ’’ཏི། ཙ-སདྡོ ཝཀྑམཱནཏྠསམུཙྩཡཏྠོ།

    ‘‘Kaṇhasukkadhammānaṃ yuganandhatā natthī’’ti pajānanakāle abhāvā ‘‘abhiṇhasamudācāravasenā’’ti vuttaṃ. Saṃvijjamānanti attano santāne upalabbhamānaṃ. Yathāti yenākārena, so pana ‘‘kāmacchandassa uppādo hotī’’ti vuttattā kāmacchandassa kāraṇākārova, atthato kāraṇamevāti āha ‘‘yena kāraṇenā’’ti. Ca-saddo vakkhamānatthasamuccayattho.

    ཏཏྠཱཏི ‘‘ཡཐཱ ཙཱ’’ཏིཨཱདིནཱ ཝུཏྟཔདེ། སུབྷམྤཱིཏི ཀཱམཙྪནྡོཔི། སོ ཧི ཨཏྟནོ གཧཎཱཀཱརེན ‘‘སུབྷ’’ནྟི ཝུཏྟོ, ཏེནཱཀཱརེན པཝཏྟནཀསྶ ཨཉྙསྶ ཀཱམཙྪནྡསྶ ནིམིཏྟཏྟཱ ‘‘ནིམིཏྟ’’ནྟི ཙ། ཨིཊྛཾ, ཨིཊྛཱཀཱརེན ཝཱ གཡ྄ཧམཱནཾ རཱུཔཱདི སུབྷཱརམྨཎཾ། ཨཱཀངྑིཏསྶ ཧིཏསུཁསྶ པཏྟིཡཱ ཨནུཔཱཡབྷཱུཏོ མནསིཀཱརོ ཨནུཔཱཡམནསིཀཱརོ། ཏནྟི ཨཡོནིསོམནསིཀཱརཾ ། ཏཏྠཱཏི ཏསྨིཾ སབྷཱགཧེཏུབྷཱུཏེ, ཨཱརམྨཎབྷཱུཏེ ཙ དུཝིདྷེ སུབྷནིམིཏྟེ། ཨཱཧཱརོཏི པཙྩཡོ ཨཏྟནོ ཕལཾ ཨཱཧརཏཱིཏི ཀཏྭཱ།

    Tatthāti ‘‘yathā cā’’tiādinā vuttapade. Subhampīti kāmacchandopi. So hi attano gahaṇākārena ‘‘subha’’nti vutto, tenākārena pavattanakassa aññassa kāmacchandassa nimittattā ‘‘nimitta’’nti ca. Iṭṭhaṃ, iṭṭhākārena vā gayhamānaṃ rūpādi subhārammaṇaṃ. Ākaṅkhitassa hitasukhassa pattiyā anupāyabhūto manasikāro anupāyamanasikāro. Tanti ayonisomanasikāraṃ . Tatthāti tasmiṃ sabhāgahetubhūte, ārammaṇabhūte ca duvidhe subhanimitte. Āhāroti paccayo attano phalaṃ āharatīti katvā.

    ཨསུབྷནྟི ཨསུབྷཛ྄ཛྷཱནཾ ཨུཏྟརཔདལོཔེན, ཏཾ པན དསསུ ཨཝིཉྙཱཎཀཨསུབྷེསུ ཙ ཀེསཱདཱིསུ སཝིཉྙཱཎཀཨསུབྷེསུ ཙ པཝཏྟཾ དཊྛབྦཾ། ཀེསཱདཱིསུ ཧི སཉྙཱ ‘‘ཨསུབྷསཉྙཱ’’ཏི གིརིམཱནནྡསུཏྟེ (ཨ॰ ནི॰ ༡༠.༦༠) ཝུཏྟཱ། ཨེཏྠ ཙ ཙཏུབྦིདྷསྶ ཨཡོནིསོམནསིཀཱརསྶ, ཡོནིསོམནསིཀཱརསྶ ཙ གཧཎཾ ནིརཝསེསདསྶནཏྠཾ ཀཏནྟི དཊྛབྦཾ, ཏེསུ པན ཨསུབྷེསུ ‘‘སུབྷ’’ནྟི, ‘‘ཨསུབྷ’’ནྟི ཙ མནསིཀཱརོ ཨིདྷཱདྷིཔྤེཏོ, ཏདནུཀཱུལཏྟཱ པན ཨིཏརེ པཱིཏི།

    Asubhanti asubhajjhānaṃ uttarapadalopena, taṃ pana dasasu aviññāṇakaasubhesu ca kesādīsu saviññāṇakaasubhesu ca pavattaṃ daṭṭhabbaṃ. Kesādīsu hi saññā ‘‘asubhasaññā’’ti girimānandasutte (a. ni. 10.60) vuttā. Ettha ca catubbidhassa ayonisomanasikārassa, yonisomanasikārassa ca gahaṇaṃ niravasesadassanatthaṃ katanti daṭṭhabbaṃ, tesu pana asubhesu ‘‘subha’’nti, ‘‘asubha’’nti ca manasikāro idhādhippeto, tadanukūlattā pana itare pīti.

    ཨེཀཱདསསུ ཨསུབྷེསུ པཊིཀྐཱུལཱཀཱརསྶ ཨུགྒཎྷནཾ, ཡཐཱ ཝཱ ཏཏྠ ཨུགྒཧནིམིཏྟཾ ཨུཔྤཛྫཏི, ཏཐཱ པཊིཔཏྟི ཨསུབྷནིམིཏྟསྶ ཨུགྒཧོ། ཨུཔཙཱརཔྤནཱཝཧཱཡ ཨསུབྷབྷཱཝནཱཡ ཨནུཡུཉྫནཱ ཨསུབྷབྷཱཝནཱནུཡོགོ། ‘‘བྷོཛནེ མཏྟཉྙུནོ མིཏཱཧཱརསྶ ཐིནམིདྡྷཱབྷིབྷཝཱབྷཱཝཱ ཨོཏཱརཾ ཨལབྷམཱནོ ཀཱམཙྪནྡོ པཧཱིཡཏཱི’’ཏི ཝདནྟི, ཨཡམེཝ ཙ ཨཏྠོ ནིདྡེསེཔི ཝུཙྩཏི། ཡོ པན བྷོཛནསྶ པཊིཀྐཱུལཏཾ, ཏབྦིཔརིཎཱམསྶ ཏདཱདྷཱརསྶ ཏསྶ ཙ ཨུཔནིསྶཡབྷཱུཏསྶ ཨཏིཝིཡ ཛེགུཙྪཏཾ, ཀཱཡསྶ ཙ ཨཱཧཱརཊྛིཏིཀཏྟཾ སམྨདེཝ ཛཱནཱཏི, སོ སབྦསོ བྷོཛནེ པམཱཎསྶ ཛཱནནེན བྷོཛནེམཏྟཉྙཱུ ནཱམ། ཏཱདིསསྶ ཧི ཀཱམཙྪནྡོ པཧཱིཡཏེཝ།

    Ekādasasu asubhesu paṭikkūlākārassa uggaṇhanaṃ, yathā vā tattha uggahanimittaṃ uppajjati, tathā paṭipatti asubhanimittassa uggaho. Upacārappanāvahāya asubhabhāvanāya anuyuñjanā asubhabhāvanānuyogo. ‘‘Bhojane mattaññuno mitāhārassa thinamiddhābhibhavābhāvā otāraṃ alabhamāno kāmacchando pahīyatī’’ti vadanti, ayameva ca attho niddesepi vuccati. Yo pana bhojanassa paṭikkūlataṃ, tabbipariṇāmassa tadādhārassa tassa ca upanissayabhūtassa ativiya jegucchataṃ, kāyassa ca āhāraṭṭhitikattaṃ sammadeva jānāti, so sabbaso bhojane pamāṇassa jānanena bhojanemattaññū nāma. Tādisassa hi kāmacchando pahīyateva.

    ཨསུབྷཀམྨིཀཏིསྶཏྠེརོ དནྟཊྛིདསྶཱཝཱི། པཧཱིནསྶཱཏི ཝིཀྑམྦྷནཝསེན པཧཱིནསྶ། ཨིཏོ པརེསུཔི ཨེཝརཱུཔེསུ ཋཱནེསུ ཨེསེཝ ནཡོ། ཨབྷིདྷམྨཔརིཡཱཡེན (དྷ॰ ས॰ ༡༡༥༩, ༡༥༠༣) སབྦོཔི ལོབྷོ ཀཱམཙྪནྡནཱིཝརཎནྟི ཨཱཧ ‘‘ཨརཧཏྟམགྒེནཱ’’ཏི།

    Asubhakammikatissatthero dantaṭṭhidassāvī. Pahīnassāti vikkhambhanavasena pahīnassa. Ito paresupi evarūpesu ṭhānesu eseva nayo. Abhidhammapariyāyena (dha. sa. 1159, 1503) sabbopi lobho kāmacchandanīvaraṇanti āha ‘‘arahattamaggenā’’ti.

    པཊིགྷམྤི པུརིམུཔྤནྣཾ པཊིགྷནིམིཏྟཾ པརཏོ ཨུཔྤཛྫནཀསྶ པཊིགྷསྶ ཀཱརཎནྟི ཀཏྭཱ།

    Paṭighampi purimuppannaṃ paṭighanimittaṃ parato uppajjanakassa paṭighassa kāraṇanti katvā.

    མེཛྫཏི སིནིཡ྄ཧཏཱིཏི མིཏྟོ, ཧིཏེསཱི པུགྒལོ, ཏསྨིཾ མིཏྟེ བྷཝཱ, མིཏྟསྶ ཝཱ ཨེསཱཏི མེཏྟཱ, ཧིཏེསིཏཱ, ཏསྶཱ མེཏྟཱཡ། ཨཔྤནཱཔི ཨུཔཙཱརོཔི ཝཊྚཏི སཱདྷཱརཎཝཙནབྷཱཝཏོ། ‘‘ཙེཏོཝིམུཏྟཱི’’ཏི ཝུཏྟེ ཨཔྤནཱཝ ཝཊྚཏི ཨཔྤནཾ ཨཔྤཏྟཱཡ པཊིཔཀྑཏོ སུཊྛུ མུཙྩནསྶ ཨབྷཱཝཏོ། ཏནྟི ཡོནིསོམནསིཀཱརཾ། ཏཏྠཱཏི མེཏྟཱཡ། བཧུལཾ པཝཏྟཡཏོཏི བཧུལཱིཀཱརཝཏོ།

    Mejjati siniyhatīti mitto, hitesī puggalo, tasmiṃ mitte bhavā, mittassa vā esāti mettā, hitesitā, tassā mettāya. Appanāpi upacāropi vaṭṭati sādhāraṇavacanabhāvato. ‘‘Cetovimuttī’’ti vutte appanāva vaṭṭati appanaṃ appattāya paṭipakkhato suṭṭhu muccanassa abhāvato. Tanti yonisomanasikāraṃ. Tatthāti mettāya. Bahulaṃ pavattayatoti bahulīkāravato.

    སཏྟེསུ མེཏྟཱཡནསྶ ཧིཏཱུཔསཾཧཱརསྶ ཨུཔྤཱདནཾ པཝཏྟནཾ མེཏྟཱནིམིཏྟསྶ ཨུགྒཧོ, པཋམུཔྤནྣོ མེཏྟཱམནསིཀཱརོ པརཏོ ཨུཔྤཛྫནཀསྶ ཀཱརཎབྷཱཝཏོ མེཏྟཱམནསིཀཱརོཝ མེཏྟཱནིམིཏྟཾ། ཀམྨམེཝ སཀཾ ཨེཏེསནྟི ཀམྨསྶཀཱ, སཏྟཱ, ཏབྦྷཱཝོ ཀམྨསྶཀཏཱ, ཀམྨདཱཡཱདཏཱ། དོསམེཏྟཱསུ ཡཱཐཱཝཏོ ཨཱདཱིནཝཱནིསཾསཱནཾ པཊིསངྑཱནཾ ཝཱིམཾསཱ ཨིདྷ པཊིསངྑཱནཾ། མེཏྟཱཝིཧཱརིཀལྱཱཎམིཏྟཝནྟཏཱ ཨིདྷ ཀལྱཱཎམིཏྟཏཱ། ཨོདིསྶཀཨནོདིསྶཀདིསཱཕརཎཱནནྟི (ཨོདྷིསཀཨནོདྷིསཀདིསཱཕརཎཱནཾ མ॰ ནི॰ ཨཊྛ॰ ༡.༡༡༥) ཨཏྟཨཏིཔིཡསཧཱཡམཛ྄ཛྷཏྟཝེརིཝསེན ཨོདིསྶཀཏཱ, སཱིམཱསམྦྷེདེ ཀཏེ ཨནོདིསྶཀཏཱ། ཨེཀཱདིདིསཱཕརཎཝསེན དིསཱཕརཎཏཱ མེཏྟཱཡ ཨུགྒཧཎེ ཝེདིཏབྦཱ། ཝིཧཱརརཙྪཱགཱམཱདིཝསེན ཝཱ ཨོདིསྶཀདིསཱཕརཎཾ། ཝིཧཱརཱདིཨུདྡེསརཧིཏཾ པུརཏྠིམཱདིདིསཱཝསེན ཨནོདིསྶཀདིསཱཕརཎནྟི ཨེཝཾ དྭིདྷཱ ཨུགྒཧཎཾ སནྡྷཱཡ ‘‘ཨོདིསྶཀཨནོདིསྶཀདིསཱཕརཎཱན’’ནྟི ཝུཏྟཾ། ཨུགྒཧོཏི ཙ ཡཱཝ ཨུཔཙཱརཱ དཊྛབྦོ། ཨུགྒཧིཏཱཡ ཨཱསེཝནཱ བྷཱཝནཱ། ཏཏྠ སབྦེ སཏྟཱ, པཱཎཱ, བྷཱུཏཱ, པུགྒལཱ, ཨཏྟབྷཱཝཔརིཡཱཔནྣཱཏི ཨེཏེསཾ ཝསེན པཉྩཝིདྷཱ, ཨེཀེཀསྨིཾ ཨཝེརཱ ཧོནྟུ , ཨབྱཱཔཛ྄ཛྷཱ, ཨནཱིགྷཱ, སུཁཱི ཨཏྟཱནཾ པརིཧརནྟཱུཏི ཙཏུདྷཱ པཝཏྟིཏོ ཝཱིསཏིཝིདྷཱ ཨནོདིསྶཀཕརཎཱ མེཏྟཱ། སབྦཱ ཨིཏྠིཡོ, པུརིསཱ, ཨརིཡཱ, ཨནརིཡཱ, དེཝཱ, མནུསྶཱ, ཝིནིཔཱཏིཀཱཏི སཏྟོདྷིཀརཎཝསེན པཝཏྟཱ སཏྟཝིདྷཱ, ཨཊྛཝཱིསཏི ཝིདྷཱ ཝཱ, དསཧི དིསཱཧི དིསོདྷིཀརཎཝསེན པཝཏྟཱ དསཝིདྷཱ, ཨེཀེཀཱཡ ཝཱ དིསཱཡ སཏྟཱདིཨིཏྠཱདིཨཝེརཱདིབྷེདེན ཨསཱིཏཱདྷིཀཙཏུསཏཔྤབྷེདཱ ཙ ཨོདྷིསོ ཕརཎཱ ཝེདིཏབྦཱ།

    Sattesu mettāyanassa hitūpasaṃhārassa uppādanaṃ pavattanaṃ mettānimittassa uggaho, paṭhamuppanno mettāmanasikāro parato uppajjanakassa kāraṇabhāvato mettāmanasikārova mettānimittaṃ. Kammameva sakaṃ etesanti kammassakā, sattā, tabbhāvo kammassakatā, kammadāyādatā. Dosamettāsu yāthāvato ādīnavānisaṃsānaṃ paṭisaṅkhānaṃ vīmaṃsā idha paṭisaṅkhānaṃ. Mettāvihārikalyāṇamittavantatā idha kalyāṇamittatā. Odissakaanodissakadisāpharaṇānanti (odhisakaanodhisakadisāpharaṇānaṃ ma. ni. aṭṭha. 1.115) attaatipiyasahāyamajjhattaverivasena odissakatā, sīmāsambhede kate anodissakatā. Ekādidisāpharaṇavasena disāpharaṇatā mettāya uggahaṇe veditabbā. Vihāraracchāgāmādivasena vā odissakadisāpharaṇaṃ. Vihārādiuddesarahitaṃ puratthimādidisāvasena anodissakadisāpharaṇanti evaṃ dvidhā uggahaṇaṃ sandhāya ‘‘odissakaanodissakadisāpharaṇāna’’nti vuttaṃ. Uggahoti ca yāva upacārā daṭṭhabbo. Uggahitāya āsevanā bhāvanā. Tattha sabbe sattā, pāṇā, bhūtā, puggalā, attabhāvapariyāpannāti etesaṃ vasena pañcavidhā, ekekasmiṃ averā hontu , abyāpajjhā, anīghā, sukhī attānaṃ pariharantūti catudhā pavattito vīsatividhā anodissakapharaṇā mettā. Sabbā itthiyo, purisā, ariyā, anariyā, devā, manussā, vinipātikāti sattodhikaraṇavasena pavattā sattavidhā, aṭṭhavīsati vidhā vā, dasahi disāhi disodhikaraṇavasena pavattā dasavidhā, ekekāya vā disāya sattādiitthādiaverādibhedena asītādhikacatusatappabhedā ca odhiso pharaṇā veditabbā.

    ཡེན ཨཡོནིསོམནསིཀཱརེན ཨརཏིཨཱདིཀཱནི ཨུཔྤཛྫནྟི, སོ ཨརཏིཨཱདཱིསུ ཨཡོནིསོམནསིཀཱརོ། ཏེན ནིཔྥཱདེཏབྦེ ཧི ཨིདཾ བྷུམྨཾ། ཨེས ནཡོ ཨིཏོ པརེསུཔི། ཨུཀྐཎྛིཏཱ པནྟསེནཱསནེསུ, ཨདྷིཀུསལདྷམྨེསུ ཙ ཨུཔྤཛྫནབྷཱཝརིཉྩནཱ། ཀཱཡཝིནམནཱཏི ཀརཛཀཱཡསྶ ཝིརཱུཔེནཱཀཱརེན ནམནཱ། ལཱིནཱཀཱརོཏི སངྐོཙཱཔཏྟི།

    Yena ayonisomanasikārena aratiādikāni uppajjanti, so aratiādīsu ayonisomanasikāro. Tena nipphādetabbe hi idaṃ bhummaṃ. Esa nayo ito paresupi. Ukkaṇṭhitā pantasenāsanesu, adhikusaladhammesu ca uppajjanabhāvariñcanā. Kāyavinamanāti karajakāyassa virūpenākārena namanā. Līnākāroti saṅkocāpatti.

    ཀུསལདྷམྨཔཊིཔཏྟིཡཱ པཊྛཔནསབྷཱཝཏཱཡ, ཏཔྤཊིཔཀྑཱནཾ ཝིསོསནསབྷཱཝཏཱཡ ཙ ཨཱརམྦྷདྷཱཏུཨཱདིཏོ པཝཏྟཝཱིརིཡནྟི ཨཱཧ ‘‘པཋམཱརམྦྷཝཱིརིཡ’’ནྟི། ཡསྨཱ པཋམཱརམྦྷམཏྟསྶ ཀོསཛྫཝིདྷམནཾ, ཐཱམགམནཉྩ ནཏྠི, ཏསྨཱ ཝུཏྟཾ ‘‘ཀོསཛྫཏོ ནིཀྑནྟཏཱཡ ཏཏོ བལཝཏར’’ནྟི ། ཡསྨཱ པན ཨཔརཱཔརུཔྤཏྟིཡཱ ལདྡྷཱསེཝནཾ ཨུཔརཱུཔརི ཝིསེསཾ ཨཱཝཧནྟཾ ཨཏིཝིཡ ཐཱམགཏམེཝ ཧོཏི, ཏསྨཱ ཝུཏྟཾ ‘‘པརཾ པརཾ ཋཱནཾ ཨཀྐམནཏོ ཏཏོཔི བལཝཏར’’ནྟི།

    Kusaladhammapaṭipattiyā paṭṭhapanasabhāvatāya, tappaṭipakkhānaṃ visosanasabhāvatāya ca ārambhadhātuādito pavattavīriyanti āha ‘‘paṭhamārambhavīriya’’nti. Yasmā paṭhamārambhamattassa kosajjavidhamanaṃ, thāmagamanañca natthi, tasmā vuttaṃ ‘‘kosajjato nikkhantatāya tato balavatara’’nti . Yasmā pana aparāparuppattiyā laddhāsevanaṃ uparūpari visesaṃ āvahantaṃ ativiya thāmagatameva hoti, tasmā vuttaṃ ‘‘paraṃ paraṃ ṭhānaṃ akkamanato tatopi balavatara’’nti.

    ཨཏིབྷོཛནེ ནིམིཏྟགྒཱཧོཏི ཨཏིབྷོཛནེ ཐིནམིདྡྷསྶ ནིམིཏྟགྒཱཧོ , ཨེཏྟཀེ བྷུཏྟེ ཏཾ བྷོཛནཾ ཐིནམིདྡྷསྶ ཀཱརཎཾ ཧོཏི, ཨེཏྟཀེ ན ཧོཏཱིཏི ཐིནམིདྡྷསྶ ཀཱརཎཱཀཱརཎགཱཧོ ཧོཏཱིཏི ཨཏྠོ། བྱཏིརེཀཝསེན ཙེཏཾ ཝུཏྟཾ, ཏསྨཱ ‘‘ཨེཏྟཀེ བྷུཏྟེ ཏཾ བྷོཛནཾ ཐིནམིདྡྷསྶ ཀཱརཎཾ ན ཧོཏཱི’’ཏི བྷོཛནེ མཏྟཉྙུཏཱ ཙ ཨཏྠཏོ དསྶིཏཱཏི དཊྛབྦཾ། ཏེནཱཧ ‘‘ཙཏུཔཉྩ…པེ॰… ན ཧོཏཱི’’ཏི། དིཝཱ སཱུརིཡཱལོཀནྟི དིཝཱ གཧིཏནིམིཏྟཾ སཱུརིཡཱལོཀཾ རཏྟིཡཾ མནསི ཀརོནྟསྶཱཔཱིཏི ཨེཝམེཏྠ ཨཏྠོ ཝེདིཏབྦོ། དྷུཏངྒཱནཾ ཝཱིརིཡནིསྶིཏཏྟཱ ཝུཏྟཾ ‘‘དྷུཏངྒནིསྶིཏསཔྤཱཡཀཐཱཡཔཱི’’ཏི།

    Atibhojane nimittaggāhoti atibhojane thinamiddhassa nimittaggāho , ettake bhutte taṃ bhojanaṃ thinamiddhassa kāraṇaṃ hoti, ettake na hotīti thinamiddhassa kāraṇākāraṇagāho hotīti attho. Byatirekavasena cetaṃ vuttaṃ, tasmā ‘‘ettake bhutte taṃ bhojanaṃ thinamiddhassa kāraṇaṃ na hotī’’ti bhojane mattaññutā ca atthato dassitāti daṭṭhabbaṃ. Tenāha ‘‘catupañca…pe… na hotī’’ti. Divā sūriyālokanti divā gahitanimittaṃ sūriyālokaṃ rattiyaṃ manasi karontassāpīti evamettha attho veditabbo. Dhutaṅgānaṃ vīriyanissitattā vuttaṃ ‘‘dhutaṅganissitasappāyakathāyapī’’ti.

    ཀུཀྐུཙྩམྤི ཀཏཱཀཏཱནུསོཙནཝསེན པཝཏྟམཱནཾ ཙེཏསོ ཨཝཱུཔསམཱཝཧཏཱཡ ཨུདྡྷཙྩེན སམཱནལཀྑཎམེཝཱཏི ‘‘ཨཝཱུཔསམོ ནཱམ ཨཝཱུཔསནྟཱཀཱརོ, ཨུདྡྷཙྩཀུཀྐུཙྩམེཝེཏཾ ཨཏྠཏོ’’ཏི ཝུཏྟཾ།

    Kukkuccampi katākatānusocanavasena pavattamānaṃ cetaso avūpasamāvahatāya uddhaccena samānalakkhaṇamevāti ‘‘avūpasamo nāma avūpasantākāro, uddhaccakukkuccamevetaṃ atthato’’ti vuttaṃ.

    བཧུསྶུཏསྶ གནྠཏོ, ཨཏྠཏོ ཙ སུཏྟཱདཱིནི ཝིཙཱརེནྟསྶ ཏབྦཧུལཝིཧཱརིནོ ཨཏྠཝེདཱདིཔཊིལཱབྷསབྦྷཱཝཏོ ཝིཀྑེཔོ ན ཧོཏཱིཏི, ཡཐཱཝིདྷིཔཊིཔཏྟིཡཱ, ཡཐཱནུརཱུཔཔཏིཀཱརཔྤཝཏྟིཡཱ ཙ ཀཏཱཀཏཱནུསོཙནཉྩ ན ཧོཏཱིཏི ‘‘བཱཧུསཙྩེནཔི…པེ॰… ཨུདྡྷཙྩཀུཀྐུཙྩཾ པཧཱིཡཏཱི’’ཏི ཨཱཧ། ཡདགྒེན བཱཧུསཙྩེན ཨུདྡྷཙྩཀུཀྐུཙྩཾ པཧཱིཡཏི, ཏདགྒེན པརིཔུཙྪཀཏཱཝིནཡཔཀཏཉྙུཏཱཧིཔི ཏཾ པཧཱིཡཏཱིཏི དཊྛབྦཾ། ཝུདྡྷསེཝིཏཱ ཙ ཝུདྡྷསཱིལིཏཾ ཨཱཝཧཏཱིཏི ཙེཏོཝཱུཔསམཀརཏྟཱ ཨུདྡྷཙྩཀུཀྐུཙྩཔྤཧཱནཀཱརཱི ཝུཏྟཱ། ཝུདྡྷཏྟཾ པན ཨནཔེཀྑིཏྭཱ ཀུཀྐུཙྩཝིནོདཀཱ ཝིནཡདྷརཱ ཀལྱཱཎམིཏྟཱ ཝུཏྟཱཏི དཊྛབྦཱ། ཝིཀྑེཔོ ཙ པབྦཛིཏཱནཾ ཡེབྷུཡྻེན ཀུཀྐུཙྩཧེཏུཀོ ཧོཏཱིཏི ‘‘ཀཔྤིཡཱཀཔྤིཡཔརིཔུཙྪཱབཧུལསྶཱ’’ཏིཨཱདིནཱ ཝིནཡནཡེནེཝ པརིཔུཙྪཀཏཱདཡོ ནིདྡིཊྛཱ། པཧཱིནེ ཨུདྡྷཙྩཀུཀྐུཙྩེཏི ནིདྡྷཱརཎེ བྷུམྨཾ། ཀུཀྐུཙྩསྶ དོམནསྶསཧགཏཏྟཱ ཨནཱགཱམིམགྒེན ཨཱཡཏིཾ ཨནུཔྤཱདོ ཝུཏྟོ།

    Bahussutassa ganthato, atthato ca suttādīni vicārentassa tabbahulavihārino atthavedādipaṭilābhasabbhāvato vikkhepo na hotīti, yathāvidhipaṭipattiyā, yathānurūpapatikārappavattiyā ca katākatānusocanañca na hotīti ‘‘bāhusaccenapi…pe… uddhaccakukkuccaṃ pahīyatī’’ti āha. Yadaggena bāhusaccena uddhaccakukkuccaṃ pahīyati, tadaggena paripucchakatāvinayapakataññutāhipi taṃ pahīyatīti daṭṭhabbaṃ. Vuddhasevitā ca vuddhasīlitaṃ āvahatīti cetovūpasamakarattā uddhaccakukkuccappahānakārī vuttā. Vuddhattaṃ pana anapekkhitvā kukkuccavinodakā vinayadharā kalyāṇamittā vuttāti daṭṭhabbā. Vikkhepo ca pabbajitānaṃ yebhuyyena kukkuccahetuko hotīti ‘‘kappiyākappiyaparipucchābahulassā’’tiādinā vinayanayeneva paripucchakatādayo niddiṭṭhā. Pahīne uddhaccakukkucceti niddhāraṇe bhummaṃ. Kukkuccassa domanassasahagatattā anāgāmimaggena āyatiṃ anuppādo vutto.

    ཏིཊྛཏི པཝཏྟཏི ཨེཏྠཱཏི ཋཱནཱིཡཱ ཝིཙིཀིཙྪཱཡ ཋཱནཱིཡཱ ཝིཙིཀིཙྪཱཋཱནཱིཡཱ, ཝིཙིཀིཙྪཱཡ ཀཱརཎབྷཱུཏཱ དྷམྨཱ, ཏིཊྛཏཱིཏི ཝཱ ཋཱནཱིཡཱ, ཝིཙིཀིཙྪཱ ཋཱནཱིཡཱ ཨེཏིསྶཱཏི ཝིཙིཀིཙྪཱཋཱནཱིཡཱ, ཨཏྠཏོ ཝིཙིཀིཙྪཱ ཨེཝ། སཱ ཧི པུརིམུཔྤནྣཱ པརཏོ ཨུཔྤཛྫནཀཝིཙིཀིཙྪཱཡ སབྷཱགཧེཏུཏཱཡ ཨསཱདྷཱརཎཾ ཀཱརཎཾ།

    Tiṭṭhati pavattati etthāti ṭhānīyā vicikicchāya ṭhānīyā vicikicchāṭhānīyā, vicikicchāya kāraṇabhūtā dhammā, tiṭṭhatīti vā ṭhānīyā, vicikicchā ṭhānīyā etissāti vicikicchāṭhānīyā, atthato vicikicchā eva. Sā hi purimuppannā parato uppajjanakavicikicchāya sabhāgahetutāya asādhāraṇaṃ kāraṇaṃ.

    ཀུསལཱཀུསལཱཏི ཀོསལླསམྦྷཱུཏཊྛེན ཀུསལཱ, ཏཔྤཊིཔཀྑཏོ ཨཀུསལཱ། ཡེ ཨཀུསལཱ, ཏེ སཱཝཛྫཱ, ཨསེཝིཏབྦཱ, ཧཱིནཱ ཙ། ཡེ ཀུསལཱ, ཏེ ཨནཝཛྫཱ, སེཝིཏབྦཱ, པཎཱིཏཱ ཙ། ཀུསལཱ ཝཱ ཧཱིནེཧི ཚནྡཱདཱིཧི ཨཱརདྡྷཱ ཧཱིནཱ, པཎཱིཏེཧི པཎཱིཏཱ། ཀཎྷཱཏི ཀཱལ༹ཀཱ ཙིཏྟསྶ ཨཔབྷསྶརབྷཱཝཀརཎཱ། སུཀྐཱཏི ཨོདཱཏཱ ཙིཏྟསྶ པབྷསྶརབྷཱཝཀརཎཱ། ཀཎྷཱབྷིཛཱཏིཧེཏུཏོ ཝཱ ཀཎྷཱ། སུཀྐཱབྷིཛཱཏིཧེཏུཏོ སུཀྐཱ། ཏེ ཨེཝ སཔྤཊིབྷཱགཱ། ཀཎྷཱ ཧི ཨུཛུཝིཔཙྩནཱིཀཏཱཡ སུཀྐསཔྤཊིབྷཱགཱ, ཏཐཱ སུཀྐཱཔི ཨིཏརེཧི། ཨཐ ཝཱ ཀཎྷསུཀྐཱ ཙ སཔྤཊིབྷཱགཱ ཙ ཀཎྷསུཀྐསཔྤཊིབྷཱགཱ། སུཁཱ ཧི ཝེདནཱ དུཀྑཱཡ ཝེདནཱཡ སཔྤཊིབྷཱགཱ, དུཀྑཱ ཙ ཝེདནཱ སུཁཱཡ ཝེདནཱཡ སཔྤཊིབྷཱགཱཏི།

    Kusalākusalāti kosallasambhūtaṭṭhena kusalā, tappaṭipakkhato akusalā. Ye akusalā, te sāvajjā, asevitabbā, hīnā ca. Ye kusalā, te anavajjā, sevitabbā,paṇītā ca. Kusalā vā hīnehi chandādīhi āraddhā hīnā, paṇītehi paṇītā. Kaṇhāti kāḷakā cittassa apabhassarabhāvakaraṇā. Sukkāti odātā cittassa pabhassarabhāvakaraṇā. Kaṇhābhijātihetuto vā kaṇhā. Sukkābhijātihetuto sukkā. Te eva sappaṭibhāgā. Kaṇhā hi ujuvipaccanīkatāya sukkasappaṭibhāgā, tathā sukkāpi itarehi. Atha vā kaṇhasukkā ca sappaṭibhāgā ca kaṇhasukkasappaṭibhāgā. Sukhā hi vedanā dukkhāya vedanāya sappaṭibhāgā, dukkhā ca vedanā sukhāya vedanāya sappaṭibhāgāti.

    ཀཱམཾ བཱཧུསཙྩཔརིཔུཙྪཀཏཱཧི སབྦཱཔི ཨཊྛཝཏྠུཀཱ ཝིཙིཀིཙྪཱ པཧཱིཡཏི, ཏཐཱཔི རཏནཏྟཡཝིཙིཀིཙྪཱམཱུལིཀཱ སེསཝིཙིཀིཙྪཱཏི ཀཏྭཱ ཨཱཧ ‘‘ཏཱིཎི རཏནཱནི ཨཱརབྦྷཱ’’ཏི། རཏནཏྟཡགུཎཱཝབོདྷེ ‘‘སཏྠརི ཀངྑཏཱི’’ཏིཨཱདི (དྷ॰ ས॰ ༡༠༠༨, ༡༡༢༣, ༡༡༦༧, ༡༢༤༡, ༡༢༦༣, ༡༢༧༠; ཝིབྷ॰ ༩༡༥) ཝིཙིཀིཙྪཱཡ ཨསམྦྷཝོཏི། ཝིནཡེ པཀཏཉྙུཏཱ ‘‘སིཀྑཱཡ ཀངྑཏཱི’’ཏི ཝུཏྟཱཡ ཝིཙིཀིཙྪཱཡ པཧཱནཾ ཀརོཏཱིཏི ཨཱཧ ‘‘ཝིནཡེ ཙིཎྞཝསཱིབྷཱཝསྶཱཔཱི’’ཏི། ཨོཀཔྤནིཡསདྡྷཱསངྑཱཏཨདྷིམོཀྑབཧུལསྶཱཏི སདྡྷེཡྻཝཏྠུནོ ཨནུཔཝིསནསདྡྷཱསངྑཱཏཨདྷིམོཀྑེན ཨདྷིམུཙྩནབཧུལསྶ, ཨདྷིམུཙྩནཉྩ ཨདྷིམོཀྑུཔྤཱདནམེཝཱཏི དཊྛབྦཾ, སདྡྷཱཡ ཝཱ ནིནྣཔོཎཏཱཨདྷིམུཏྟི ཨདྷིམོཀྑོ།

    Kāmaṃ bāhusaccaparipucchakatāhi sabbāpi aṭṭhavatthukā vicikicchā pahīyati, tathāpi ratanattayavicikicchāmūlikā sesavicikicchāti katvā āha ‘‘tīṇi ratanāni ārabbhā’’ti. Ratanattayaguṇāvabodhe ‘‘satthari kaṅkhatī’’tiādi (dha. sa. 1008, 1123, 1167, 1241, 1263, 1270; vibha. 915) vicikicchāya asambhavoti. Vinaye pakataññutā ‘‘sikkhāya kaṅkhatī’’ti vuttāya vicikicchāya pahānaṃ karotīti āha ‘‘vinaye ciṇṇavasībhāvassāpī’’ti. Okappaniyasaddhāsaṅkhātaadhimokkhabahulassāti saddheyyavatthuno anupavisanasaddhāsaṅkhātaadhimokkhena adhimuccanabahulassa, adhimuccanañca adhimokkhuppādanamevāti daṭṭhabbaṃ, saddhāya vā ninnapoṇatāadhimutti adhimokkho.

    སམུདཡཝཡཱཏི སམུདཡཝཡདྷམྨཱ། སུབྷནིམིཏྟཨསུབྷནིམིཏྟཱདཱིསཱུཏི ‘‘སུབྷནིམིཏྟཱདཱིསུ ཨསུབྷནིམིཏྟཱདཱིསཱུ’’ཏི ཨཱདི-སདྡོ པཙྩེཀཾ ཡོཛེཏབྦོ། ཏཏྠ པཋམེན ཨཱདི-སདྡེན པཊིགྷནིམིཏྟཱདཱིནཾ སངྒཧོ, དུཏིཡེནམེཏྟཱཙེཏོཝིམུཏྟིཨཱདཱིནཾ། སེསམེཏྠ ཡཾ ཝཏྟབྦཾ, ཏཾ ཝུཏྟནཡམེཝ།

    Samudayavayāti samudayavayadhammā. Subhanimittaasubhanimittādīsūti ‘‘subhanimittādīsu asubhanimittādīsū’’ti ādi-saddo paccekaṃ yojetabbo. Tattha paṭhamena ādi-saddena paṭighanimittādīnaṃ saṅgaho, dutiyenamettācetovimuttiādīnaṃ. Sesamettha yaṃ vattabbaṃ, taṃ vuttanayameva.

    ནཱིཝརཎཔབྦཝཎྞནཱ ནིཊྛིཏཱ།

    Nīvaraṇapabbavaṇṇanā niṭṭhitā.

    ཁནྡྷཔབྦཝཎྞནཱ

    Khandhapabbavaṇṇanā

    ༣༨༣. ཨུཔཱདཱནེཧི ཨཱརམྨཎཀརཎཱདིཝསེན ཨུཔཱདཱཏབྦཱ ཝཱ ཁནྡྷཱ ཨུཔཱདཱནཀྑནྡྷཱ།

    383. Upādānehi ārammaṇakaraṇādivasena upādātabbā vā khandhā upādānakkhandhā.

    ཨིཏི རཱུཔནྟི ཨེཏྠ ཨིཏི-སདྡོ ཨིདཾ-སདྡེན སམཱནཏྠོཏི ཨདྷིཔྤཱཡེནཱཧ ‘‘ཨིདཾ རཱུཔ’’ནྟི། ཏཡིདཾ སརཱུཔགྒཧཎབྷཱཝཏོ ཨནཝསེསཔརིཡཱདཱནཾ ཧོཏཱིཏི ཨཱཧ ‘‘ཨེཏྟཀཾ རཱུཔཾ, ན ཨིཏོ པརཾ རཱུཔཾ ཨཏྠཱི’’ཏི། ཨིཏཱིཏི ཝཱ པཀཱརཏྠེ ནིཔཱཏོ, ཏསྨཱ ‘‘ཨིཏི རཱུཔ’’ནྟི ཨིམིནཱ བྷཱུཏུཔཱདཱདིཝསེན ཡཏྟཀོ རཱུཔསྶ པབྷེདོ, ཏེན སདྡྷིཾ རཱུཔཾ ཨནཝསེསཏོ པརིཡཱདིཡིཏྭཱ དསྶེཏི། སབྷཱཝཏོཏི རུཔྤནསབྷཱཝཏོ, ཙཀྑཱདིཝཎྞཱདིསབྷཱཝཏོ ཙ། ཝེདནཱདཱིསུཔཱིཏི ཨེཏྠ ‘‘ཨཡཾ ཝེདནཱ, ཨེཏྟཀཱ ཝེདནཱ, ན ཨིཏོ པརཾ ཝེདནཱ ཨཏྠཱིཏི སབྷཱཝཏོ ཝེདནཾ པཛཱནཱཏཱི’’ཏིཨཱདིནཱ, སབྷཱཝཏོཏི ཙ ‘‘ཨནུབྷཝནསབྷཱཝཏོ, སཱཏཱདིསབྷཱཝཏོ ཙཱ’’ཏི ཨེཝམཱདིནཱ ཡོཛེཏབྦཾ། སེསཾ ཝུཏྟནཡཏྟཱ སུཝིཉྙེཡྻམེཝ།

    Itirūpanti ettha iti-saddo idaṃ-saddena samānatthoti adhippāyenāha ‘‘idaṃ rūpa’’nti. Tayidaṃ sarūpaggahaṇabhāvato anavasesapariyādānaṃ hotīti āha ‘‘ettakaṃ rūpaṃ, na ito paraṃ rūpaṃ atthī’’ti. Itīti vā pakāratthe nipāto, tasmā ‘‘iti rūpa’’nti iminā bhūtupādādivasena yattako rūpassa pabhedo, tena saddhiṃ rūpaṃ anavasesato pariyādiyitvā dasseti. Sabhāvatoti ruppanasabhāvato, cakkhādivaṇṇādisabhāvato ca. Vedanādīsupīti ettha ‘‘ayaṃ vedanā, ettakā vedanā, na ito paraṃ vedanā atthīti sabhāvato vedanaṃ pajānātī’’tiādinā, sabhāvatoti ca ‘‘anubhavanasabhāvato, sātādisabhāvato cā’’ti evamādinā yojetabbaṃ. Sesaṃ vuttanayattā suviññeyyameva.

    ཁནྡྷཔབྦཝཎྞནཱ ནིཊྛིཏཱ།

    Khandhapabbavaṇṇanā niṭṭhitā.

    ཨཱཡཏནཔབྦཝཎྞནཱ

    Āyatanapabbavaṇṇanā

    ༣༨༤. ཚསུ ཨཛ྄ཛྷཏྟིཀབཱཧིརེསཱུཏི ‘‘ཚསུ ཨཛ྄ཛྷཏྟིཀེསུ ཚསུ བཱཧིརེསཱུ’’ཏི ‘‘ཚསཱུ’’ཏི པདཾ པཙྩེཀཾ ཡོཛེཏབྦཾ། ཀསྨཱ པནེཏཱནི ཨུབྷཡཱནི ཚལེ༹ཝ ཝུཏྟཱནི? ཚཝིཉྙཱཎཀཱཡུཔྤཏྟིདྭཱརཱརམྨཎཝཝཏྠཱནཏོ། ཙཀྑུཝིཉྙཱཎཝཱིཐིཡཱ པརིཡཱཔནྣསྶ ཧི ཝིཉྙཱཎཀཱཡསྶ ཙཀྑཱཡཏནམེཝ ཨུཔྤཏྟིདྭཱརཾ, རཱུཔཱཡཏནམེཝ ཙ ཨཱརམྨཎཾ, ཏཐཱ ཨིཏརཱནི ཨིཏརེསཾ, ཚཊྛསྶ པན བྷཝངྒམནསངྑཱཏོ མནཱཡཏནེཀདེསོ ཨུཔྤཏྟིདྭཱརཾ, ཨསཱདྷཱརཎཉྩ དྷམྨཱཡཏནཾ ཨཱརམྨཎཾ། ཙཀྑཏཱིཏི ཙཀྑུ, རཱུཔཾ ཨསྶཱདེཏི, ཝིབྷཱཝེཏི ཙཱཏི ཨཏྠོ། སུཎཱཏཱིཏི སོཏཾ། གྷཱཡཏཱིཏི གྷཱནཾ། ཛཱིཝིཏནིམིཏྟཏཱཡ རསོ ཛཱིཝིཏཾ, ཏཾ ཛཱིཝིཏཾ ཨཝ྄ཧཱཡཏཱིཏི ཛིཝ྄ཧཱ། ཀུཙྪིཏཱནཾ སཱསཝདྷམྨཱནཾ ཨཱཡོ ཨུཔྤཏྟིདེསོཏི ཀཱཡོ། མུནཱཏི ཨཱརམྨཎཾ ཝིཛཱནཱཏཱིཏི མནོ། རཱུཔཡཏི ཝཎྞཝིཀཱརཾ ཨཱཔཛྫམཱནཾ ཧདཡངྒཏབྷཱཝཾ པཀཱསེཏཱིཏི རཱུཔཾ། སཔྤཏི ཨཏྟནོ པཙྩཡེཧི ཧརཱིཡཏི སོཏཝིཉྙེཡྻབྷཱཝཾ གམཱིཡཏཱིཏི སདྡོ། གནྡྷཡཏི ཨཏྟནོ ཝཏྠུཾ སཱུཙེཏཱིཏི གནྡྷོ ། རསནྟི ཏཾ སཏྟཱ ཨསྶཱདེནྟཱིཏི རསོ། ཕུསཱིཡཏཱིཏི ཕོཊྛབྦཾ། ཨཏྟནོ སབྷཱཝཾ དྷཱརེནྟཱིཏི དྷམྨཱ། སབྦཱནི པན ཨཱཡཱནཾ ཏནནཱདིཨཏྠེན ཨཱཡཏནཱནི། ཨཡམེཏྠ སངྑེཔོ, ཝིཏྠཱརོ པན ཝིསུདྡྷིམགྒསཾཝཎྞནཱཡཾ (ཝིསུདྡྷི॰ ༢.༥༡༠, ༥༡༡, ༥༡༢; ཝིསུདྡྷི॰ ཊཱི॰ ༢.༥༡༠) ཝུཏྟནཡེནེཝ ཝེདིཏབྦོ།

    384.Chasu ajjhattikabāhiresūti ‘‘chasu ajjhattikesu chasu bāhiresū’’ti ‘‘chasū’’ti padaṃ paccekaṃ yojetabbaṃ. Kasmā panetāni ubhayāni chaḷeva vuttāni? Chaviññāṇakāyuppattidvārārammaṇavavatthānato. Cakkhuviññāṇavīthiyā pariyāpannassa hi viññāṇakāyassa cakkhāyatanameva uppattidvāraṃ, rūpāyatanameva ca ārammaṇaṃ, tathā itarāni itaresaṃ, chaṭṭhassa pana bhavaṅgamanasaṅkhāto manāyatanekadeso uppattidvāraṃ, asādhāraṇañca dhammāyatanaṃ ārammaṇaṃ. Cakkhatīti cakkhu, rūpaṃ assādeti, vibhāveti cāti attho. Suṇātīti sotaṃ. Ghāyatīti ghānaṃ. Jīvitanimittatāya raso jīvitaṃ, taṃ jīvitaṃ avhāyatīti jivhā. Kucchitānaṃ sāsavadhammānaṃ āyo uppattidesoti kāyo. Munāti ārammaṇaṃ vijānātīti mano. Rūpayati vaṇṇavikāraṃ āpajjamānaṃ hadayaṅgatabhāvaṃ pakāsetīti rūpaṃ. Sappati attano paccayehi harīyati sotaviññeyyabhāvaṃ gamīyatīti saddo. Gandhayati attano vatthuṃ sūcetīti gandho. Rasanti taṃ sattā assādentīti raso. Phusīyatīti phoṭṭhabbaṃ. Attano sabhāvaṃ dhārentīti dhammā. Sabbāni pana āyānaṃ tananādiatthena āyatanāni. Ayamettha saṅkhepo, vitthāro pana visuddhimaggasaṃvaṇṇanāyaṃ (visuddhi. 2.510, 511, 512; visuddhi. ṭī. 2.510) vuttanayeneva veditabbo.

    ཙཀྑུཉྩ པཛཱནཱཏཱིཏི (དཱི॰ ནི॰ ༢.༣༨༤; མ॰ ནི॰ ༡.༡༡༧) ཨེཏྠ ཙཀྑུ ནཱམ པསཱདཙཀྑུ, ན སསམྦྷཱརཙཀྑུ, ནཱཔི དིབྦཙཀྑུཨཱདིཀནྟི ཨཱཧ ཙཀྑུཔསཱདནྟི། ཡཾ སནྡྷཱཡ ཝུཏྟཾ ‘‘ཡཾ ཙཀྑུ ཙཏུནྣཾ མཧཱབྷཱུཏཱནཾ ཨུཔཱདཱཡ པསཱདོ’’ཏི། (དྷ॰ ས॰ ༥༩༦) ཙ-སདྡོ ཝཀྑམཱནཏྠསམུཙྩཡཏྠོ། ཡཱཐཱཝསརསལཀྑཎཝསེནཱཏི ཨཝིཔརཱིཏསྶ ཨཏྟནོ རསསྶ ཙེཝ ལཀྑཎསྶ ཙ ཝསེན, རཱུཔེསུ ཨཱཝིཉྪནཀིཙྩསྶ ཙེཝ རཱུཔཱབྷིགྷཱཏཱརཧབྷཱུཏཔསཱདལཀྑཎསྶ ཙ དཊྛུཀཱམཏཱནིདཱནཀམྨསམུཊྛཱནབྷཱུཏཔསཱདལཀྑཎསྶ ཙ ཝསེནཱཏི ཨཏྠོ། ཨཐ ཝཱ ཡཱཐཱཝསརསལཀྑཎཝསེནཱཏི ཡཱཐཱཝསརསཝསེན ཙེཝ ལཀྑཎཝསེན ཙ, ཡཱཐཱཝསརསོཏི ཙ ཨཝིཔརཱིཏསབྷཱཝོ ཝེདིཏབྦོ། སོ ཧི རསཱིཡཏི ཨཝིརདྡྷཔཊིཝེདྷཝསེན ཨསྶཱདཱིཡཏི རམཱིཡཏཱིཏི ‘‘རསོ’’ཏི ཝུཙྩཏི, ཏསྨཱ སལཀྑཎཝསེནཱཏི ཝུཏྟཾ ཧོཏི། ལཀྑཎཝསེནཱཏི ཨནིཙྩཱདིསཱམཉྙལཀྑཎཝསེན།

    Cakkhuñcapajānātīti (dī. ni. 2.384; ma. ni. 1.117) ettha cakkhu nāma pasādacakkhu, na sasambhāracakkhu, nāpi dibbacakkhuādikanti āha cakkhupasādanti. Yaṃ sandhāya vuttaṃ ‘‘yaṃ cakkhu catunnaṃ mahābhūtānaṃ upādāya pasādo’’ti. (Dha. sa. 596) ca-saddo vakkhamānatthasamuccayattho. Yāthāvasarasalakkhaṇavasenāti aviparītassa attano rasassa ceva lakkhaṇassa ca vasena, rūpesu āviñchanakiccassa ceva rūpābhighātārahabhūtapasādalakkhaṇassa ca daṭṭhukāmatānidānakammasamuṭṭhānabhūtapasādalakkhaṇassa ca vasenāti attho. Atha vā yāthāvasarasalakkhaṇavasenāti yāthāvasarasavasena ceva lakkhaṇavasena ca, yāthāvasarasoti ca aviparītasabhāvo veditabbo. So hi rasīyati aviraddhapaṭivedhavasena assādīyati ramīyatīti ‘‘raso’’ti vuccati, tasmā salakkhaṇavasenāti vuttaṃ hoti. Lakkhaṇavasenāti aniccādisāmaññalakkhaṇavasena.

    ‘‘ཙཀྑུཉྩ པཊིཙྩ རཱུཔེ ཙ ཨུཔྤཛྫཏི ཙཀྑུཝིཉྙཱཎ’’ནྟིཨཱདཱིསུ (མ॰ ནི॰ ༡.༢༠༤, ༤༠༠; མ॰ ནི॰ ༣.༤༢༡, ༤༢༥, ༤༢༦; སཾ॰ ནི॰ ༢.༤༣, ༤༥; ༢.༤.༦༠) སམུདིཏཱནིཡེཝ རཱུཔཱཡཏནཱནི ཙཀྑུཝིཉྙཱཎུཔྤཏྟིཧེཏུ, ན ཝིསུཾ ཝིསུནྟི ཨིམསྶ ཨཏྠསྶ ཛོཏནཏྠཾ ‘‘རཱུཔེ ཙཱ’’ཏི པུཐུཝཙནགྒཧཎཾ, ཏཱཡ ཨེཝ ཙ དེསནཱགཏིཡཱ ཀཱམཾ ཨིདྷཱཔི ‘‘རཱུཔེ ཙ པཛཱནཱཏཱི’’ཏི ཝུཏྟཾ, རཱུཔབྷཱཝསཱམཉྙེན པན སབྦཾ ཨེཀཛ྄ཛྷཾ གཧེཏྭཱ བཧིདྡྷཱ ཙཏུསམུཊྛཱནིཀརཱུཔཉྩཱཏི ཨེཀཝཙནཝསེན ཨཏྠོ། སརསལཀྑཎ ཝསེནཱཏི ཙཀྑུཝིཉྙཱཎསྶ ཝིསཡབྷཱཝཀིཙྩསྶ ཝསེན ཙེཝ ཙཀྑུཔཊིཧནནལཀྑཎསྶ ཝསེན ཙཱཏི ཡོཛེཏབྦཾ།

    ‘‘Cakkhuñca paṭicca rūpe ca uppajjati cakkhuviññāṇa’’ntiādīsu (ma. ni. 1.204, 400; ma. ni. 3.421, 425, 426; saṃ. ni. 2.43, 45; 2.4.60) samuditāniyeva rūpāyatanāni cakkhuviññāṇuppattihetu, na visuṃ visunti imassa atthassa jotanatthaṃ ‘‘rūpe cā’’ti puthuvacanaggahaṇaṃ, tāya eva ca desanāgatiyā kāmaṃ idhāpi ‘‘rūpe ca pajānātī’’ti vuttaṃ, rūpabhāvasāmaññena pana sabbaṃ ekajjhaṃ gahetvā bahiddhā catusamuṭṭhānikarūpañcāti ekavacanavasena attho. Sarasalakkhaṇa vasenāti cakkhuviññāṇassa visayabhāvakiccassa vasena ceva cakkhupaṭihananalakkhaṇassa vasena cāti yojetabbaṃ.

    ཨུབྷཡཾ པཊིཙྩཱཏི ཙཀྑུཾ ཨུཔནིསྶཡཔཙྩཡཝསེན པཙྩཡབྷཱུཏཾ, རཱུཔེ ཨཱརམྨཎཱདྷིཔཏིཨཱརམྨཎཱུཔནིསྶཡཝསེན པཙྩཡབྷཱུཏེ ཙ པཊིཙྩ། ཀཱམཾ ཨཡཾ སུཏྟནྟསཾཝཎྞནཱ, ནིཔྤརིཡཱཡཀཐཱ ནཱམ ཨབྷིདྷམྨསནྣིསྶིཏཱ ཨེཝཱཏི ཨབྷིདྷམྨནཡེནེཝ སཾཡོཛནཱནི དསྶེནྟོ ‘‘ཀཱམརཱག…པེ॰… ཨཝིཛྫཱསཾཡོཛན’’ནྟི ཨཱཧ། ཏཏྠ ཀཱམེསུ རཱགོ, ཀཱམོ ཙ སོ རཱགོ ཙཱཏི ཝཱ ཀཱམརཱགོ། སོ ཨེཝ བནྡྷནཊྛེན སཾཡོཛནཾ། ཨཡཉྷི ཡསྶ སཾཝིཛྫཏི, ཏཾ པུགྒལཾ ཝཊྚསྨིཾ སཾཡོཛེཏི བནྡྷཏི ཨིཏི དུཀྑེན སཏྟཾ, བྷཝཱདིཀེ ཝཱ བྷཝནྟརཱདཱིཧི, ཀམྨུནཱ ཝཱ ཝིཔཱཀཾ སཾཡོཛེཏི བནྡྷཏཱིཏི སཾཡོཛནཾ། ཨེཝཾ པཊིགྷསཾཡོཛཾཨཱདཱིནམྤི ཡཐཱརཧམཏྠོ ཝཏྟབྦོ། སརསལཀྑཎཝསེནཱཏི ཨེཏྠ པན སཏྟསྶ ཝཊྚཏོ ཨནིསྶཛྫནསངྑཱཏསྶ ཨཏྟནོ ཀིཙྩསྶ ཙེཝ ཡཐཱཝུཏྟབནྡྷནསངྑཱཏསྶ ལཀྑཎསྶ ཙ ཝསེནཱཏི ཡོཛེཏབྦཾ།

    Ubhayaṃ paṭiccāti cakkhuṃ upanissayapaccayavasena paccayabhūtaṃ, rūpe ārammaṇādhipatiārammaṇūpanissayavasena paccayabhūte ca paṭicca. Kāmaṃ ayaṃ suttantasaṃvaṇṇanā, nippariyāyakathā nāma abhidhammasannissitā evāti abhidhammanayeneva saṃyojanāni dassento ‘‘kāmarāga…pe… avijjāsaṃyojana’’nti āha. Tattha kāmesu rāgo, kāmo ca so rāgo cāti vā kāmarāgo. So eva bandhanaṭṭhena saṃyojanaṃ. Ayañhi yassa saṃvijjati, taṃ puggalaṃ vaṭṭasmiṃ saṃyojeti bandhati iti dukkhena sattaṃ, bhavādike vā bhavantarādīhi, kammunā vā vipākaṃ saṃyojeti bandhatīti saṃyojanaṃ. Evaṃ paṭighasaṃyojaṃādīnampi yathārahamattho vattabbo. Sarasalakkhaṇavasenāti ettha pana sattassa vaṭṭato anissajjanasaṅkhātassa attano kiccassa ceva yathāvuttabandhanasaṅkhātassa lakkhaṇassa ca vasenāti yojetabbaṃ.

    བྷཝསྶཱདདིཊྛིསྶཱདནིཝཏྟནཏྠཾ ཀཱམསྶཱདགྒཧཎཾ། ཨསྶཱདཡཏོཏི ཨབྷིརམནྟསྶ། ཨབྷིནནྡཏོཏི སཔྤཱིཏིཀཏཎྷཱཝསེན ནནྡནྟསྶ། པདདྭཡེནཱཔི བལཝཏོ ཀཱམརཱགསྶ པཙྩཡབྷཱུཏཱ ཀཱམརཱགུཔྤཏྟི ཝུཏྟཱ། ཨེས ནཡོ སེསེསུཔི། ཨནིཊྛཱརམྨཎེཏི ཨེཏྠ ‘‘ཨཱཔཱཐགཏེ’’ཏི ཝིབྷཏྟིཝིཔརིཎཱམནཝསེན ‘‘ཨཱཔཱཐགཏ’’ནྟི པདཾ ཨཱནེཏྭཱ སམྦནྡྷིཏབྦཾ། ཨེཏཾ ཨཱརམྨཎནྟི ཨེཏཾ ཨེཝཾསུཁུམཾ ཨེཝཾདུབྦིབྷཱགཾ ཨཱརམྨཎཾ། ‘‘ནིཙྩཾ དྷུཝ’’ནྟི ཨིདཾ ནིདསྶནམཏྟཾ། ‘‘ཨུཙྪིཛྫིསྶཏི ཝིནསྶིསྶཏཱིཏི གཎྷཏོ’’ཏི ཨེཝམཱདཱིནམྤི སངྒཧོ ཨིཙྪིཏབྦོ། པཋམཱཡ སཀྐཱཡདིཊྛིཡཱ ཨནུརོདྷཝསེན ‘‘སཏྟོ ནུ ཁོ’’ཏི, ཨིཏརཱཡ ཨནུརོདྷཝསེན ‘‘སཏྟསྶ ནུ ཁོ’’ཏི ཝིཙིཀིཙྪཏོ། ཨཏྟཏྟནིཡཱདིགཱཧཱནུགཏཱ ཧི ཝིཙིཀིཙྪཱ དིཊྛིཡཱ ཨསཏི ཨབྷཱཝཏོ། བྷཝཾ པཏྠེནྟསྶཱཏི ‘‘ཨཱིདིསེ སམྤཏྟིབྷཝེ ཡསྨཱ ཨམྷཱཀཾ ཨིདཾ ཨིཊྛཾ རཱུཔཱརམྨཎཾ སུལབྷཾ ཛཱཏཾ, ཏསྨཱ ཨཱཡཏིམྤི ཨེདིསོ, ཨིཏོ ཝཱ ཨུཏྟརིཏརོ སམྤཏྟིབྷཝོ བྷཝེཡྻཱ’’ཏི བྷཝཾ ནིཀཱམེནྟསྶ། ཨེཝརཱུཔནྟི ཨེཝརཱུཔཾ རཱུཔཾ། ཏཾསདིསེ ཧི ཏབྦོཧཱརཝསེནེཝཾ ཝུཏྟཾ། བྷཝཏི ཧི ཏཾསདིསེསུ ཏབྦོཧཱརོ ཡཐཱ ‘‘སཱ ཨེཝ ཏིཏྟིརཱི, ཏཱནི ཨེཝ ཨོསདྷཱནཱི’’ཏི། ཨུསཱུཡཏོཏི ཨུསཱུཡཾ ཨིསྶཾ ཨུཔྤཱདཡཏོ། ཨཉྙསྶ མཙྪརཱཡཏོཏི ཨཉྙེན ཨསཱདྷཱརཎབྷཱཝཀརཎེན མཙྪརིཡཾ ཀརོཏོ། སབྦེཧེཝ ཡཐཱཝུཏྟེཧི ནཝཧི སཾཡོཛནེཧི།

    Bhavassādadiṭṭhissādanivattanatthaṃ kāmassādaggahaṇaṃ. Assādayatoti abhiramantassa. Abhinandatoti sappītikataṇhāvasena nandantassa. Padadvayenāpi balavato kāmarāgassa paccayabhūtā kāmarāguppatti vuttā. Esa nayo sesesupi. Aniṭṭhārammaṇeti ettha ‘‘āpāthagate’’ti vibhattivipariṇāmanavasena ‘‘āpāthagata’’nti padaṃ ānetvā sambandhitabbaṃ. Etaṃ ārammaṇanti etaṃ evaṃsukhumaṃ evaṃdubbibhāgaṃ ārammaṇaṃ. ‘‘Niccaṃ dhuva’’nti idaṃ nidassanamattaṃ. ‘‘Ucchijjissati vinassissatīti gaṇhato’’ti evamādīnampi saṅgaho icchitabbo. Paṭhamāya sakkāyadiṭṭhiyā anurodhavasena ‘‘satto nu kho’’ti, itarāya anurodhavasena ‘‘sattassa nu kho’’ti vicikicchato. Attattaniyādigāhānugatā hi vicikicchā diṭṭhiyā asati abhāvato. Bhavaṃ patthentassāti ‘‘īdise sampattibhave yasmā amhākaṃ idaṃ iṭṭhaṃ rūpārammaṇaṃ sulabhaṃ jātaṃ, tasmā āyatimpi ediso, ito vā uttaritaro sampattibhavo bhaveyyā’’ti bhavaṃ nikāmentassa. Evarūpanti evarūpaṃ rūpaṃ. Taṃsadise hi tabbohāravasenevaṃ vuttaṃ. Bhavati hi taṃsadisesu tabbohāro yathā ‘‘sā eva tittirī, tāni eva osadhānī’’ti. Usūyatoti usūyaṃ issaṃ uppādayato. Aññassa maccharāyatoti aññena asādhāraṇabhāvakaraṇena macchariyaṃ karoto. Sabbeheva yathāvuttehi navahi saṃyojanehi.

    ཏཉྩ ཀཱརཎནྟི སུབྷནིམིཏྟཔཊིགྷནིམིཏྟཱདིཝིབྷཱགཾ ཨིཊྛཱནིཊྛཱདིརཱུཔཱརམྨཎཉྩེཝ ཏཛྫཱཡོནིསོམནསིཀཱརཉྩཱཏི ཏསྶ ཏསྶ སཾཡོཛནསྶ ཀཱརཎཾ། ཨཝིཀྑམྦྷིཏཱསམཱུཧཏབྷཱུམིལདྡྷུཔྤནྣཾ ཏཾ སནྡྷཱཡ ‘‘ཨཔྤཧཱིནཊྛེན ཨུཔྤནྣསྶཱ’’ཏི ཝུཏྟཾ། ཝཏྟམཱནུཔྤནྣཏཱ སམུདཱཙཱརགྒཧཎེནེཝ གཧིཏཱ། ཡེན ཀཱརཎེནཱཏི ཡེན ཝིཔསྶནཱསམཐབྷཱཝནཱསངྑཱཏེན ཀཱརཎེན ། ཏཉྷི ཏསྶ ཏདངྒཝསེན ཙེཝ ཝིཀྑམྦྷནཝསེན ཙ པཧཱནཀཱརཎཾ། ཨིསྶཱམཙྪརིཡཱནཾ ཨཔཱཡགམནཱིཡཏཱཡ པཋམམགྒཝཛ྄ཛྷཏཱ ཝུཏྟཱ། ཡདི ཨེཝཾ ‘‘ཏིཎྞཾ སཾཡོཛནཱནཾ པརིཀྑཡཱ སོཏཱཔནྣོ ཧོཏཱི’’ཏི (ཨ॰ ནི॰ ༤.༢༤༡) སུཏྟཔདཾ ཀཐནྟི? ཏཾ སུཏྟནྟཔརིཡཱཡེན ཝུཏྟཾ། ཡཐཱནུལོམསཱསནཱ ཧི སུཏྟནྟདེསནཱ, ཨཡཾ པན ཨབྷིདྷམྨནཡེན སཾཝཎྞནཱཏི ནཱཡཾ དོསོཏི། ཨོལཱ༹རིཀསྶཱཏི ཐཱུལསྶ, ཡཏོ ཨབྷིཎྷསམུཔྤཏྟིཔརིཡུཊྛཱནཏིབྦཏཱཝ ཧོཏི། ཨཎུསཧགཏསྶཱཏི ཝུཏྟཔྤཀཱརཱབྷཱཝེན ཨཎུབྷཱཝཾ སུཁུམབྷཱཝཾ གཏསྶ། ཨུདྡྷཙྩསཾཡོཛནསྶཔེཏྠ ཨནུཔྤཱདོ ཝུཏྟོཡེཝཱཏི དཊྛབྦོ ཡཐཱཝུཏྟསཾཡོཛནེཧི ཨཝིནཱབྷཱཝཏོ། ཨེཀཏྠཏཱཡ སོཏཱདཱིནཾ སབྷཱཝསརསལཀྑཎཝསེན པཛཱནནཱ, ཏཔྤཙྩཡཱནཾ སཾཡོཛནཱནཾ ཨུཔྤཱདཱདིཔཛཱནནཱ ཙ ཝུཏྟནཡེནེཝ ཝེདིཏབྦཱཏི དསྶེནྟོ ‘‘ཨེསེཝ ནཡོ’’ཏི ཨཏིདིསཏི།

    Tañca kāraṇanti subhanimittapaṭighanimittādivibhāgaṃ iṭṭhāniṭṭhādirūpārammaṇañceva tajjāyonisomanasikārañcāti tassa tassa saṃyojanassa kāraṇaṃ. Avikkhambhitāsamūhatabhūmiladdhuppannaṃ taṃ sandhāya ‘‘appahīnaṭṭhena uppannassā’’ti vuttaṃ. Vattamānuppannatā samudācāraggahaṇeneva gahitā. Yena kāraṇenāti yena vipassanāsamathabhāvanāsaṅkhātena kāraṇena . Tañhi tassa tadaṅgavasena ceva vikkhambhanavasena ca pahānakāraṇaṃ. Issāmacchariyānaṃ apāyagamanīyatāya paṭhamamaggavajjhatā vuttā. Yadi evaṃ ‘‘tiṇṇaṃ saṃyojanānaṃ parikkhayā sotāpanno hotī’’ti (a. ni. 4.241) suttapadaṃ kathanti? Taṃ suttantapariyāyena vuttaṃ. Yathānulomasāsanā hi suttantadesanā, ayaṃ pana abhidhammanayena saṃvaṇṇanāti nāyaṃ dosoti. Oḷārikassāti thūlassa, yato abhiṇhasamuppattipariyuṭṭhānatibbatāva hoti. Aṇusahagatassāti vuttappakārābhāvena aṇubhāvaṃ sukhumabhāvaṃ gatassa. Uddhaccasaṃyojanassapettha anuppādo vuttoyevāti daṭṭhabbo yathāvuttasaṃyojanehi avinābhāvato. Ekatthatāya sotādīnaṃ sabhāvasarasalakkhaṇavasena pajānanā, tappaccayānaṃ saṃyojanānaṃ uppādādipajānanā ca vuttanayeneva veditabbāti dassento ‘‘eseva nayo’’ti atidisati.

    ཨཏྟནོ ཝཱ དྷམྨེསཱུཏི ཨཏྟནོ ཨཛ྄ཛྷཏྟིཀཱཡཏནདྷམྨེསུ, ཨཏྟནོ ཨུབྷཡདྷམྨེསུ ཝཱ། ཨིམསྨིཾ པཀྑེ ཨཛ྄ཛྷཏྟིཀཱཡཏནཔརིགྒཎྷནེནཱཏི ཨཛ྄ཛྷཏྟིཀཱཡཏནཔརིགྒཎྷནམུཁེནཱཏི ཨཏྠོ། ཨེཝཉྩ ཨནཝསེསཏོ སཔརསནྟཱནེསུ ཨཱཡཏནཱནཾ པརིགྒཧོ སིདྡྷོ ཧོཏི། པརསྶ ཝཱ དྷམྨེསཱུཏི ཨེཏྠཱཔི ཨེསེཝ ནཡོ། རཱུཔཱཡཏནསྶཱཏི ཨཌྜྷེཀཱདསཔྤབྷེདསྶ རཱུཔསབྷཱཝསྶ ཨཱཡཏནསྶ རཱུཔཀྑནྡྷེ ‘‘ཝུཏྟནཡེན ནཱིཧརིཏབྦོ’’ཏི ཨཱནེཏྭཱ སམྦནྡྷིཏབྦཾ། སེསཀྑནྡྷེསཱུཏི ཝེདནཱསཉྙཱསངྑཱརཀྑནྡྷེསུ། ཝུཏྟནཡེནཱཏི ཨིམིནཱ ཨཏིདེསེན རཱུཔཀྑནྡྷེ ‘‘ཨཱཧཱརསམུདཡཱ’’ཏི ཝིཉྙཱཎཀྑནྡྷེ ‘‘ནཱམརཱུཔསམུདཡཱ’’ཏི སེསཁནྡྷེསུ ‘‘ཕསྶསམུདཡཱ’’ཏི ཨིམཾ ཝིསེསཾ ཝིབྷཱཝེཏི, ཨིཏརཾ པན སབྦཏྠ སམཱནནྟི ཁནྡྷཔབྦེ ཝིཡ ཨཱཡཏནཔབྦེཔི ལོཀུཏྟརནིཝཏྟནཾ པཱལི༹ཡཾ གཧིཏཾ ནཏྠཱིཏི ཝུཏྟཾ ‘‘ལོཀུཏྟརདྷམྨཱ ན གཧེཏབྦཱ’’ཏི། སེསཾ ཝུཏྟནཡམེཝ།

    Attano vā dhammesūti attano ajjhattikāyatanadhammesu, attano ubhayadhammesu vā. Imasmiṃ pakkhe ajjhattikāyatanapariggaṇhanenāti ajjhattikāyatanapariggaṇhanamukhenāti attho. Evañca anavasesato saparasantānesu āyatanānaṃ pariggaho siddho hoti. Parassavā dhammesūti etthāpi eseva nayo. Rūpāyatanassāti aḍḍhekādasappabhedassa rūpasabhāvassa āyatanassa rūpakkhandhe ‘‘vuttanayena nīharitabbo’’ti ānetvā sambandhitabbaṃ. Sesakkhandhesūti vedanāsaññāsaṅkhārakkhandhesu. Vuttanayenāti iminā atidesena rūpakkhandhe ‘‘āhārasamudayā’’ti viññāṇakkhandhe ‘‘nāmarūpasamudayā’’ti sesakhandhesu ‘‘phassasamudayā’’ti imaṃ visesaṃ vibhāveti, itaraṃ pana sabbattha samānanti khandhapabbe viya āyatanapabbepi lokuttaranivattanaṃ pāḷiyaṃ gahitaṃ natthīti vuttaṃ ‘‘lokuttaradhammā na gahetabbā’’ti. Sesaṃ vuttanayameva.

    ཨཱཡཏནཔབྦཝཎྞནཱ ནིཊྛིཏཱ།

    Āyatanapabbavaṇṇanā niṭṭhitā.

    བོཛ྄ཛྷངྒཔབྦཝཎྞནཱ

    Bojjhaṅgapabbavaṇṇanā

    ༣༨༥. བུཛ྄ཛྷནཀསཏྟསྶཱཏི ཀིལེསནིདྡཱཡ པཊིབུཛ྄ཛྷནཀསཏྟསྶ, ཨརིཡསཙྩཱནཾ ཝཱ པཊིཝིཛ྄ཛྷནཀསཏྟསྶ། ཨངྒེསཱུཏི ཀཱརཎེསུ, ཨཝཡཝེསུ ཝཱ ། ཨུདཡཝཡཉཱཎུཔྤཏྟིཏོ པཊྛཱཡ སམྦོདྷིཔཊིཔདཱཡཾ ཋིཏོ ནཱམ ཧོཏཱིཏི ཨཱཧ ‘‘ཨཱརདྡྷཝིཔསྶཀཏོ པཊྛཱཡ ཡོགཱཝཙརོཏི སམྦོདྷཱི’’ཏི། སུཏྟནྟདེསནཱ ནཱམ པརིཡཱཡཀཐཱ, ཨཡཉྩ སཏིཔཊྛཱནདེསནཱ ལོཀིཡམགྒཝསེན པཝཏྟཱཏི ཝུཏྟཾ ‘‘ཡོགཱཝཙརོཏི སམྦོདྷཱི’’ཏི, ཨཉྙཐཱ ‘‘ཨརིཡསཱཝཀོ’’ཏི ཝདེཡྻ།

    385.Bujjhanakasattassāti kilesaniddāya paṭibujjhanakasattassa, ariyasaccānaṃ vā paṭivijjhanakasattassa. Aṅgesūti kāraṇesu, avayavesu vā . Udayavayañāṇuppattito paṭṭhāya sambodhipaṭipadāyaṃ ṭhito nāma hotīti āha ‘‘āraddhavipassakato paṭṭhāya yogāvacaroti sambodhī’’ti. Suttantadesanā nāma pariyāyakathā, ayañca satipaṭṭhānadesanā lokiyamaggavasena pavattāti vuttaṃ ‘‘yogāvacaroti sambodhī’’ti, aññathā ‘‘ariyasāvako’’ti vadeyya.

    ‘‘སཏིསམྦོཛ྄ཛྷངྒཊྛཱནཱིཡཱ’’ཏི པདསྶ ཨཏྠོ ‘‘ཝིཙིཀིཙྪཱཊྛཱནཱིཡཱ’’ཏི ཨེཏྠ ཝུཏྟནཡེན ཝེདིཏབྦོ། ཏནྟི ཡོནིསོམནསིཀཱརཾ། ཏཏྠཱཏི སཏིཡཾ, ནིཔྥཱདེཏབྦེ ཙེཏཾ བྷུམྨཾ།

    ‘‘Satisambojjhaṅgaṭṭhānīyā’’ti padassa attho ‘‘vicikicchāṭṭhānīyā’’ti ettha vuttanayena veditabbo. Tanti yonisomanasikāraṃ. Tatthāti satiyaṃ, nipphādetabbe cetaṃ bhummaṃ.

    སཏི ཙ སམྤཛཉྙཉྩ སཏིསམྤཛཉྙཾ། ཨཐ ཝཱ སཏིཔྤདྷཱནཾ ཨབྷིཀྐནྟཱདིསཱཏྠཀབྷཱཝཔརིགྒཎྷནཉཱཎཾ སཏིསམྤཛཉྙཾ། ཏཾ སབྦཏྠ སཏོཀཱརཱིབྷཱཝཱཝཧཏྟཱ སཏིསམྦོཛ྄ཛྷངྒསྶ ཨུཔྤཱདཱཡ ཧོཏི། ཡཐཱ པཙྩནཱིཀདྷམྨཔྤཧཱནཾ, ཨནུརཱུཔདྷམྨསེཝནཱ ཙ ཨནུཔྤནྣཱནཾ ཀུསལཱནཾ དྷམྨཱནཾ ཨུཔྤཱདཱཡ ཧོཏི, ཨེཝཾ སཏིརཧིཏཔུགྒལཝིཝཛྫནཱ, སཏོཀཱརཱིཔུགྒལསེཝནཱ, ཏཏྠ ཙ ཡུཏྟཔྤཡུཏྟཏཱ སཏིསམྦོཛ྄ཛྷངྒསྶ ཨུཔྤཱདཱཡ ཧོཏཱིཏི ཨིམམཏྠཾ དསྶེཏི ‘‘སཏིསམྤཛཉྙ’’ནྟིཨཱདིནཱ། ཏིསྶདཏྟཏྠེརོ ནཱམ, ཡོ བོདྷིམཎྜེ སུཝཎྞསལཱཀཾ གཧེཏྭཱ ‘‘ཨཊྛཱརསསུ བྷཱསཱསུ ཀཏརབྷཱསཱཡ དྷམྨཾ ཀཐེམཱི’’ཏི པརིསཾ པཝཱརེསི། ཨབྷཡཏྠེརོཏི དཏྟཱབྷཡཏྠེརམཱཧ།

    Sati ca sampajaññañca satisampajaññaṃ. Atha vā satippadhānaṃ abhikkantādisātthakabhāvapariggaṇhanañāṇaṃ satisampajaññaṃ. Taṃ sabbattha satokārībhāvāvahattā satisambojjhaṅgassa uppādāya hoti. Yathā paccanīkadhammappahānaṃ, anurūpadhammasevanā ca anuppannānaṃ kusalānaṃ dhammānaṃ uppādāya hoti, evaṃ satirahitapuggalavivajjanā, satokārīpuggalasevanā, tattha ca yuttappayuttatā satisambojjhaṅgassa uppādāya hotīti imamatthaṃ dasseti ‘‘satisampajañña’’ntiādinā. Tissadattatthero nāma, yo bodhimaṇḍe suvaṇṇasalākaṃ gahetvā ‘‘aṭṭhārasasu bhāsāsu katarabhāsāya dhammaṃ kathemī’’ti parisaṃ pavāresi. Abhayattheroti dattābhayattheramāha.

    དྷམྨཱནཾ, དྷམྨེསུ ཝཱ ཝིཙཡོ དྷམྨཝིཙཡོ, སོ ཨེཝ སམྦོཛ྄ཛྷངྒོ, ཏསྶ དྷམྨཝིཙཡསམྦོཛ྄ཛྷངྒསྶ། ‘‘ཀུསལཱཀུསལཱ དྷམྨཱ’’ཏིཨཱདཱིསུ ཡཾ ཝཏྟབྦཾ, ཏཾ ཧེཊྛཱ ཝུཏྟནཡམེཝ། ཏཏྠ ཡོནིསོམནསིཀཱརབཧུལཱིཀཱརོཏི ཀུསལཱདཱིནཾ ཏཾཏཾསབྷཱཝསརསལཀྑཎཨཱདིཀསྶ ཡཱཐཱཝཏོ ཨཝབུཛ྄ཛྷནཝསེན ཨུཔྤནྣོ ཉཱཎསམྤཡུཏྟཙིཏྟུཔྤཱདོ། སོ ཧི ཨཝིཔརཱིཏམནསིཀཱརཏཱཡ ‘‘ཡོནིསོམནསིཀཱརོ’’ཏི ཝུཏྟོ, ཏདཱབྷོགཏཱཡ ཨཱཝཛྫནཱཔི ཏགྒཏིཀཱ ཨེཝ, ཏསྶ ཨབྷིཎྷཾ པཝཏྟནཾ བཧུལཱིཀཱརོ། བྷིཡྻོབྷཱཝཱཡཱཏི པུནཔྤུནཾ བྷཱཝཱཡ། ཝེཔུལླཱཡཱཏི ཝིཔུལབྷཱཝཱཡ། པཱརིཔཱུརིཡཱཏི པརིབྲཱུཧནཱཡ།

    Dhammānaṃ, dhammesu vā vicayo dhammavicayo, so eva sambojjhaṅgo, tassa dhammavicayasambojjhaṅgassa. ‘‘Kusalākusalā dhammā’’tiādīsu yaṃ vattabbaṃ, taṃ heṭṭhā vuttanayameva. Tattha yonisomanasikārabahulīkāroti kusalādīnaṃ taṃtaṃsabhāvasarasalakkhaṇaādikassa yāthāvato avabujjhanavasena uppanno ñāṇasampayuttacittuppādo. So hi aviparītamanasikāratāya ‘‘yonisomanasikāro’’ti vutto, tadābhogatāya āvajjanāpi taggatikā eva, tassa abhiṇhaṃ pavattanaṃ bahulīkāro. Bhiyyobhāvāyāti punappunaṃ bhāvāya. Vepullāyāti vipulabhāvāya. Pāripūriyāti paribrūhanāya.

    པརིཔུཙྪཀཏཱཏི པརིཡོགཱཧེཏྭཱ པུཙྪཀབྷཱཝོ། ཨཱཙརིཡེ པཡིརུཔཱསིཏྭཱ པཉྩཔི ནིཀཱཡེ སཧ ཨཊྛཀཐཱཡ པརིཡོགཱཧེཏྭཱ ཡཾ ཡཾ ཏཏྠ གཎྛིཊྛཱནབྷཱུཏཾ, ཏཾ ཏཾ ‘‘ཨིདཾ བྷནྟེ ཀཐཾ, ཨིམསྶ ཀོ ཨཏྠོ’’ཏི ཁནྡྷཱཡཏནཱདིཨཏྠཾ པུཙྪནྟསྶ དྷམྨཝིཙཡསམྦོཛ྄ཛྷངྒོ ཨུཔྤཛྫཏི། ཏེནཱཧ ‘‘ཁནྡྷདྷཱཏུ…པེ॰… བཧུལཏཱ’’ཏི། ཝཏྠཱུནཾ ཝིསདབྷཱཝཀརཎནྟི ཨེཏྠ ཙིཏྟཙེཏསིཀཱནཾ པཝཏྟིཊྛཱནབྷཱཝཏོ སརཱིརཾ, ཏཔྤཊིབདྡྷཱནི ཙཱིཝརཱནི ཙ ‘‘ཝཏྠཱུནཱི’’ཏི ཨདྷིཔྤེཏཱནི, ཏཱནི ཡཐཱ ཙིཏྟསྶ སུཁཱཝཧཱནི ཧོནྟི, ཏཐཱ ཀརཎཾ ཏེསཾ ཝིསདབྷཱཝཀརཎཾ། ཏེན ཝུཏྟཾ ‘‘ཨཛ྄ཛྷཏྟིཀབཱཧིརཱན’’ནྟིཨཱདི། ཨུསྶནྣདོསནྟི ཝཱཏཱདིཨུསྶནྣདོསཾ། སེདམལམཀྑིཏནྟི སེདེན ཙེཝ ཛལླིཀཱསངྑཱཏེན སརཱིརམལེན ཙ མཀྑིཏཾ། ཙ-སདྡེན ཨཉྙམྤི སརཱིརསྶ, ཙིཏྟསྶ ཙ པཱིལཱ༹ཝཧཾ སངྒཎྷཱཏི། སེནཱསནཾ ཝཱཏི ཝཱ-སདྡེན པཏྟཱདཱིནཾ སངྒཧོ དཊྛབྦོ། ཨཝིསདེ སཏི, ཝིསཡབྷཱུཏེ ཝཱ། ཀཐཾ བྷཱཝནམནུཡུཏྟསྶ ཏཱནི ཝིསཡོ? ཨནྟརནྟརཱ པཝཏྟནཀཙིཏྟུཔྤཱདཝསེནེཝཾ ཝུཏྟཾ། ཏེ ཧི ཙིཏྟུཔྤཱདཱ ཙིཏྟེཀགྒཏཱཡ ཨཔརིསུདྡྷབྷཱཝཱཡ སཾཝཏྟནྟི། ཙིཏྟཙེཏསིཀེསུ ནིསྶཡཱདིཔཙྩཡབྷཱུཏེསུ། ཉཱཎམྤཱིཏི པི-སདྡོ སམྤིཎྜནཏྠོ, ཏེན ན ཀེཝལཾ ཏཾ ཝཏྠུཡེཝ, ཨཐ ཁོ ཏསྨིཾ ཨཔརིསུདྡྷེ ཉཱཎམྤི ཨཔརིསུདྡྷཾ ཧོཏཱིཏི ནིསྶཡཱཔརིསུདྡྷིཡཱ ཏཾནིསྶིཏཱཔརིསུདྡྷི ཝིཡ ཝིསཡསྶ ཨཔརིསུདྡྷཏཱཡ ཝིསཡིནོ ཨཔརིསུདྡྷིཾ དསྶེཏི།

    Paripucchakatāti pariyogāhetvā pucchakabhāvo. Ācariye payirupāsitvā pañcapi nikāye saha aṭṭhakathāya pariyogāhetvā yaṃ yaṃ tattha gaṇṭhiṭṭhānabhūtaṃ, taṃ taṃ ‘‘idaṃ bhante kathaṃ, imassa ko attho’’ti khandhāyatanādiatthaṃ pucchantassa dhammavicayasambojjhaṅgo uppajjati. Tenāha ‘‘khandhadhātu…pe… bahulatā’’ti. Vatthūnaṃ visadabhāvakaraṇanti ettha cittacetasikānaṃ pavattiṭṭhānabhāvato sarīraṃ, tappaṭibaddhāni cīvarāni ca ‘‘vatthūnī’’ti adhippetāni, tāni yathā cittassa sukhāvahāni honti, tathā karaṇaṃ tesaṃ visadabhāvakaraṇaṃ. Tena vuttaṃ ‘‘ajjhattikabāhirāna’’ntiādi. Ussannadosanti vātādiussannadosaṃ. Sedamalamakkhitanti sedena ceva jallikāsaṅkhātena sarīramalena ca makkhitaṃ. Ca-saddena aññampi sarīrassa, cittassa ca pīḷāvahaṃ saṅgaṇhāti. Senāsanaṃ vāti vā-saddena pattādīnaṃ saṅgaho daṭṭhabbo. Avisade sati, visayabhūte vā. Kathaṃ bhāvanamanuyuttassa tāni visayo? Antarantarā pavattanakacittuppādavasenevaṃ vuttaṃ. Te hi cittuppādā cittekaggatāya aparisuddhabhāvāya saṃvattanti. Cittacetasikesu nissayādipaccayabhūtesu. Ñāṇampīti pi-saddo sampiṇḍanattho, tena na kevalaṃ taṃ vatthuyeva, atha kho tasmiṃ aparisuddhe ñāṇampi aparisuddhaṃ hotīti nissayāparisuddhiyā taṃnissitāparisuddhi viya visayassa aparisuddhatāya visayino aparisuddhiṃ dasseti.

    སམབྷཱཝཀརཎནྟི ཀིཙྩཏོ ཨནཱུནཱདྷིཀབྷཱཝཀརཎཾ། སདྡྷེཡྻཝཏྠུསྨིཾ པཙྩཡཝསེན ཨདྷིམོཀྑཀིཙྩསྶ པཊུཏརབྷཱཝེན, པཉྙཱཡ ཨཝིསདཏཱཡ, ཝཱིརིཡཱདཱིནཉྩ སིཐིལཏཱདིནཱ སདྡྷིནྡྲིཡཾ བལཝཾ ཧོཏི། ཏེནཱཧ ‘‘ཨིཏརཱནི མནྡཱནཱི’’ཏི། ཏཏོཏི ཏསྨཱ སདྡྷིནྡྲིཡསྶ བལཝབྷཱཝཏོ , ཨིཏརེསཉྩ མནྡཏྟཱ། ཀོསཛྫཔཀྑེ པཏིཏུཾ ཨདཏྭཱ སམྤཡུཏྟདྷམྨཱནཾ པགྒཎྷནཾ ཨནུབལཔྤདཱནཾ པགྒཧོ, པགྒཧོཝ ཀིཙྩཾ པགྒཧཀིཙྩཾ, ‘‘ཀཱཏུཾ ན སཀྐོཏཱི’’ཏི ཨཱནེཏྭཱ སམྦནྡྷིཏབྦཾ། ཨཱརམྨཎཾ ཨུཔགནྟྭཱ ཋཱནཾ, ཨནིསྶཛྫནཾ ཝཱ ཨུཔཊྛཱནཾ། ཝིཀྑེཔཔཊིཀྑེཔོ, ཡེན ཝཱ སམྤཡུཏྟཱ ཨཝིཀྑིཏྟཱ ཧོནྟི, སོ ཨཝིཀྑེཔོ། རཱུཔགཏཾ ཝིཡ ཙཀྑུནཱ ཡེན ཡཱཐཱཝཏོ ཝིསཡསབྷཱཝཾ པསྶཏི, ཏཾ དསྶནཀིཙྩཾ། ཀཱཏུཾ ན སཀྐོཏི བལཝཏཱ སདྡྷིནྡྲིཡེན ཨབྷིབྷཱུཏཏྟཱ། སཧཛཱཏདྷམྨེསུ ཧི ཨིནྡཊྛཾ ཀཱརེནྟཱནཾ སཧཔཝཏྟམཱནཱནཾ དྷམྨཱནཾ ཨེཀརསཏཱཝསེནེཝ ཨཏྠསིདྡྷི, ན ཨཉྙཐཱ། ཏསྨཱཏི ཝུཏྟམེཝཏྠཾ ཀཱརཎབྷཱཝེན པཙྩཱམསཏི། ཏནྟི སདྡྷིནྡྲིཡཾ ། དྷམྨསབྷཱཝཔཙྩཝེཀྑཎེནཱཏི ཡསྶ སདྡྷེཡྻསྶ ཝཏྠུནོ ཨུལཱ༹རཏཱདིགུཎེ ཨདྷིམུཙྩནསྶ སཱཏིསཡཔྤཝཏྟིཡཱ སདྡྷིནྡྲིཡཾ བལཝཾ ཛཱཏཾ, ཏསྶ པཙྩཡཔཙྩཡུཔྤནྣཏཱདིཝིབྷཱགཏོ ཡཱཐཱཝཏོ ཝཱིམཾསནེན། ཨེཝཉྷི ཨེཝཾདྷམྨཏཱནཡེན སབྷཱཝསརསཏོ པརིགྒཡ྄ཧམཱནེ སཝིཔྥཱརོ ཨདྷིམོཀྑོ ན ཧོཏི ‘‘ཨཡཾ ཨིམེསཾ དྷམྨཱནཾ སབྷཱཝོ’’ཏི པརིཛཱནནཝསེན པཉྙཱབྱཱཔཱརསྶ སཱཏིསཡཏྟཱ། དྷུརིཡདྷམྨེསུ ཧི ཡཐཱ སདྡྷཱཡ བལཝབྷཱཝེ པཉྙཱཡ མནྡབྷཱཝོ ཧོཏི, ཨེཝཾ པཉྙཱཡ བལཝབྷཱཝེ སདྡྷཱཡ མནྡབྷཱཝོ ཧོཏཱིཏི། ཏེན ཝུཏྟཾ ‘‘ཏཾ དྷམྨསབྷཱཝཔཙྩཝེཀྑཎེན ཝཱ, ཡཐཱ ཝཱ མནསིཀརོཏོ བལཝཾ ཛཱཏཾ, ཏཐཱ ཨམནསིཀཱརེན ཧཱཔེཏབྦ’’ནྟི། ཏཐཱ ཨམནསིཀཱརེནཱཏི ཡེནཱཀཱརེན བྷཱཝནཾ ཨནུཡུཉྫནྟསྶ སདྡྷིནྡྲིཡཾ བལཝཾ ཛཱཏཾ, ཏེནཱཀཱརེན བྷཱཝནཱཡ ཨནནུཡུཉྫནཏོཏི ཝུཏྟཾ ཧོཏི། ཨིདྷ དུཝིདྷེན སདྡྷིནྡྲིཡསྶ བལཝབྷཱཝོ ཨཏྟནོ ཝཱ པཙྩཡཝིསེསེན ཀིཙྩུཏྟརིཡཏོ, ཝཱིརིཡཱདཱིནཾ ཝཱ མནྡཀིཙྩཏཱཡ། ཏཏྠ པཋམཝིཀཔྤེ ཧཱཔནཝིདྷི དསྶིཏོ། དུཏིཡཀཔྤེ པན ཡཐཱ མནསི ཀརོཏོ ཝཱིརིཡཱདཱིནཾ མནྡཀིཙྩཏཱཡ སདྡྷིནྡྲིཡཾ བལཝཾ ཛཱཏཾ, ཏཐཱ ཨམནསིཀཱརེན, ཝཱིརིཡཱདཱིནཾ པཊུཀིཙྩབྷཱཝཱཝཧེན མནསིཀཱརེན སདྡྷིནྡྲིཡཾ ཏེཧི སམརསཾ ཀརོནྟེན ཧཱཔེཏབྦཾ། ཨིམིནཱ ནཡེན སེསིནྡྲིཡེསུཔི ཧཱཔནཝིདྷི ཝེདིཏབྦོ།

    Samabhāvakaraṇanti kiccato anūnādhikabhāvakaraṇaṃ. Saddheyyavatthusmiṃ paccayavasena adhimokkhakiccassa paṭutarabhāvena, paññāya avisadatāya, vīriyādīnañca sithilatādinā saddhindriyaṃ balavaṃ hoti. Tenāha ‘‘itarāni mandānī’’ti. Tatoti tasmā saddhindriyassa balavabhāvato , itaresañca mandattā. Kosajjapakkhe patituṃ adatvā sampayuttadhammānaṃ paggaṇhanaṃ anubalappadānaṃ paggaho, paggahova kiccaṃ paggahakiccaṃ, ‘‘kātuṃ na sakkotī’’ti ānetvā sambandhitabbaṃ. Ārammaṇaṃ upagantvā ṭhānaṃ, anissajjanaṃ vā upaṭṭhānaṃ. Vikkhepapaṭikkhepo, yena vā sampayuttā avikkhittā honti, so avikkhepo. Rūpagataṃ viya cakkhunā yena yāthāvato visayasabhāvaṃ passati, taṃ dassanakiccaṃ. Kātuṃ na sakkoti balavatā saddhindriyena abhibhūtattā. Sahajātadhammesu hi indaṭṭhaṃ kārentānaṃ sahapavattamānānaṃ dhammānaṃ ekarasatāvaseneva atthasiddhi, na aññathā. Tasmāti vuttamevatthaṃ kāraṇabhāvena paccāmasati. Tanti saddhindriyaṃ . Dhammasabhāvapaccavekkhaṇenāti yassa saddheyyassa vatthuno uḷāratādiguṇe adhimuccanassa sātisayappavattiyā saddhindriyaṃ balavaṃ jātaṃ, tassa paccayapaccayuppannatādivibhāgato yāthāvato vīmaṃsanena. Evañhi evaṃdhammatānayena sabhāvasarasato pariggayhamāne savipphāro adhimokkho na hoti ‘‘ayaṃ imesaṃ dhammānaṃ sabhāvo’’ti parijānanavasena paññābyāpārassa sātisayattā. Dhuriyadhammesu hi yathā saddhāya balavabhāve paññāya mandabhāvo hoti, evaṃ paññāya balavabhāve saddhāya mandabhāvo hotīti. Tena vuttaṃ ‘‘taṃ dhammasabhāvapaccavekkhaṇena vā, yathā vā manasikaroto balavaṃ jātaṃ, tathā amanasikārena hāpetabba’’nti. Tathā amanasikārenāti yenākārena bhāvanaṃ anuyuñjantassa saddhindriyaṃ balavaṃ jātaṃ, tenākārena bhāvanāya ananuyuñjanatoti vuttaṃ hoti. Idha duvidhena saddhindriyassa balavabhāvo attano vā paccayavisesena kiccuttariyato, vīriyādīnaṃ vā mandakiccatāya. Tattha paṭhamavikappe hāpanavidhi dassito. Dutiyakappe pana yathā manasi karoto vīriyādīnaṃ mandakiccatāya saddhindriyaṃ balavaṃ jātaṃ, tathā amanasikārena, vīriyādīnaṃ paṭukiccabhāvāvahena manasikārena saddhindriyaṃ tehi samarasaṃ karontena hāpetabbaṃ. Iminā nayena sesindriyesupi hāpanavidhi veditabbo.

    ཝཀྐལིཏྠེརཝཏྠཱུཏི། སོ ཧི ཨཱཡསྨཱ སདྡྷཱདྷིམུཏྟཏཱཡ ཀཏཱདྷིཀཱརོ སཏྠུ རཱུཔཀཱཡདསྶནཔྤསུཏོ ཨེཝ ཧུཏྭཱ ཝིཧརནྟོ སཏྠཱརཱ ‘‘ཀིཾ ཏེ ཝཀྐལི ཨིམིནཱ པཱུཏིཀཱཡེན དིཊྛེན, ཡོ ཁོ ཝཀྐལི དྷམྨཾ པསྶཏི, སོ མཾ པསྶཏཱི’’ཏིཨཱདིནཱ (སཾ॰ ནི॰ ༣.༨༧; དཱི॰ ནི॰ ཨཊྛ॰ ༡.པཋམམཧཱསངྒཱིཏིཀཐཱ; ཨ॰ ནི॰ ཨཊྛ॰ ༡.༡.༢༠༨; དྷ॰ པ॰ ཨཊྛ॰ ༢.༣༨༠; པཊི॰ མ॰ ཨཊྛ॰ ༢.༢.༡༣༠; དྷ॰ ས॰ ཨཊྛ॰ ༡༠༠༧; ཐེརགཱ॰ ཨཊྛ॰ ༢.ཝཀྐལིཏྠེརགཱཐཱཝཎྞནཱ) ཨོཝདིཏྭཱ ཀམྨཊྛཱནེ ནིཡོཛིཏོཔི ཏཾ ཨནནུཡུཉྫནྟོ པཎཱམིཏོ ཨཏྟཱནཾ ཝིནིཔཱཏེཏུཾ པཔཱཏཊྛཱནཾ ཨབྷིརུཧི, ཨཐ ནཾ སཏྠཱ ཡཐཱནིསིནྣོཝ ཨོབྷཱསཾ ཝིསྶཛྫནེན ཨཏྟཱནཾ དསྶེཏྭཱ –

    Vakkalittheravatthūti. So hi āyasmā saddhādhimuttatāya katādhikāro satthu rūpakāyadassanappasuto eva hutvā viharanto satthārā ‘‘kiṃ te vakkali iminā pūtikāyena diṭṭhena, yo kho vakkali dhammaṃ passati, so maṃ passatī’’tiādinā (saṃ. ni. 3.87; dī. ni. aṭṭha. 1.paṭhamamahāsaṅgītikathā; a. ni. aṭṭha. 1.1.208; dha. pa. aṭṭha. 2.380; paṭi. ma. aṭṭha. 2.2.130; dha. sa. aṭṭha. 1007; theragā. aṭṭha. 2.vakkalittheragāthāvaṇṇanā) ovaditvā kammaṭṭhāne niyojitopi taṃ ananuyuñjanto paṇāmito attānaṃ vinipātetuṃ papātaṭṭhānaṃ abhiruhi, atha naṃ satthā yathānisinnova obhāsaṃ vissajjanena attānaṃ dassetvā –

    ‘‘པཱམོཛྫབཧུལོ བྷིཀྑུ, པསནྣོ བུདྡྷསཱསནེ།

    ‘‘Pāmojjabahulo bhikkhu, pasanno buddhasāsane;

    ཨདྷིགཙྪེ པདཾ སནྟཾ, སངྑཱརཱུཔསམཾ སུཁ’’ནྟི༎ (དྷ॰ པ॰ ༣༨༡) –

    Adhigacche padaṃ santaṃ, saṅkhārūpasamaṃ sukha’’nti. (dha. pa. 381) –

    གཱཐཾ ཝཏྭཱ ‘‘ཨེཧི ཝཀྐལཱི’’ཏི ཨཱཧ། སོ ཏེན ཨམཏེནེཝ ཨབྷིསིཏྟོ ཧཊྛཏུཊྛོ ཧུཏྭཱ ཝིཔསྶནཾ པཊྛཔེསི། སདྡྷཱཡ བལཝབྷཱཝཏོ ཝིཔསྶནཱཝཱིཐིཾ ན ཨོཏརཏི, ཏཾ ཉཏྭཱ བྷགཝཱ ཏསྶ ཨིནྡྲིཡསམཏྟཔཊིཔཱདནཱཡ ཀམྨཊྛཱནཾ སོདྷེཏྭཱ ཨདཱསི། སོ སཏྠཱརཱ དིནྣནཡེ ཋཏྭཱ ཝིཔསྶནཾ ཨུསྶུཀྐཱཔེཏྭཱ མགྒཔྤཊིཔཱཊིཡཱ ཨརཧཏྟཾ པཱཔུཎི། ཏེནེཏཾ ཝུཏྟཾ ‘‘ཝཀྐལིཏྠེརཝཏྠུ ཙེཏྠ ནིདསྶན’’ནྟི། ཨེཏྠཱཏི སདྡྷིནྡྲིཡསྶ ཨདྷིམཏྟབྷཱཝེ སེསིནྡྲིཡཱནཾ སཀིཙྩཱཀརཎེ།

    Gāthaṃ vatvā ‘‘ehi vakkalī’’ti āha. So tena amateneva abhisitto haṭṭhatuṭṭho hutvā vipassanaṃ paṭṭhapesi. Saddhāya balavabhāvato vipassanāvīthiṃ na otarati, taṃ ñatvā bhagavā tassa indriyasamattapaṭipādanāya kammaṭṭhānaṃ sodhetvā adāsi. So satthārā dinnanaye ṭhatvā vipassanaṃ ussukkāpetvā maggappaṭipāṭiyā arahattaṃ pāpuṇi. Tenetaṃ vuttaṃ ‘‘vakkalittheravatthu cettha nidassana’’nti. Etthāti saddhindriyassa adhimattabhāve sesindriyānaṃ sakiccākaraṇe.

    ཨིཏརཀིཙྩབྷེདནྟི ཨུཔཊྛཱནཱདིཀིཙྩཝིསེསཾ། པསྶདྡྷཱདཱིཏི ཨཱདི-སདྡེན སམཱདྷིཨུཔེཀྑཱསམྦོཛ྄ཛྷངྒཱནཾ སངྒཧོ དཊྛབྦོ། ཧཱཔེཏབྦནྟི ཡཐཱ སདྡྷིནྡྲིཡསྶ བལཝབྷཱཝོ དྷམྨསབྷཱཝཔཙྩཝེཀྑཎེན ཧཱཡཏི, ཨེཝཾ ཝཱིརིཡིནྡྲིཡསྶ ཨདྷིམཏྟཏཱ པསྶདྡྷིཨཱདིབྷཱཝནཱཡ ཧཱཡཏི སམཱདྷིཔཀྑིཡཏྟཱ ཏསྶཱ། ཏཐཱ ཧི སམཱདྷིནྡྲིཡསྶ ཨདྷིམཏྟཏཾ ཀོསཛྫཔཱཏཏོ རཀྑནྟཱི ཝཱིརིཡཱདིབྷཱཝནཱ ཝིཡ ཝཱིརིཡིནྡྲིཡསྶ ཨདྷིམཏྟཏཾ ཨུདྡྷཙྩཔཱཏཏོ རཀྑནྟཱི ཨེཀཾསཏོ ཧཱཔེཏི། ཏེན ཝུཏྟཾ ‘‘པསྶདྡྷཨཱདིབྷཱཝནཱཡ ཧཱཔེཏབྦ’’ནྟི། སོཎཏྠེརསྶ ཝཏྠཱུཏི སུཀུམཱརསོཎཏྠེརསྶ ཝཏྠུ། (མཧཱཝ॰ ༢༤༢; ཨ॰ ནི॰ ཨཊྛ॰ ༡.༡.༢༠༥) སོ ཧི ཨཱཡསྨཱ སཏྠུ སནྟིཀེ ཀམྨཊྛཱནཾ གཧེཏྭཱ སཱིཏཝནེ ཝིཧརནྟོ ‘‘མམ སརཱིརཾ སུཁུམཱལཾ, ན ཙ སཀྐཱ སུཁེནེཝ སུཁཾ ཨདྷིགནྟུཾ, ཀིལམེཏྭཱཔི སམཎདྷམྨོ ཀཱཏབྦོ’’ཏི ཏཾ ཋཱནཙངྐམམེཝ ཨདྷིཊྛཱཡ པདྷཱནཾ ཨནུཡུཉྫནྟོ པཱདཏལེསུ ཕོཊེསུ ཨུཊྛིཏེསུཔི ཝེདནཾ ཨཛ྄ཛྷུཔེཀྑིཏྭཱ དལ༹ྷཾ ཝཱིརིཡཾ ཀརོནྟོ ཨཙྩཱརདྡྷཝཱིརིཡཏཱཡ ཝིསེསཾ ནིབྦཏྟེཏུཾ ནཱསཀྑི། སཏྠཱ ཏཏྠ གནྟྭཱ ཝཱིཎཱུཔམོཝཱདེན ཨོཝདིཏྭཱ ཝཱིརིཡསམཏཱཡོཛནཝཱིཐིཾ དསྶེནྟོ ཀམྨཊྛཱནཾ སོདྷེཏྭཱ གིཛ྄ཛྷཀཱུཊཾ གཏོ། ཐེརོཔི སཏྠཱརཱ དིནྣནཡེན ཝཱིརིཡསམཏཾ ཡོཛེཏྭཱ བྷཱཝེནྟོ ཝིཔསྶནཾ ཨུསྶུཀྐཱཔེཏྭཱ ཨརཧཏྟེ པཏིཊྛཱསི། ཏེན ཝུཏྟཾ ‘‘སོཎཏྠེརསྶ ཝཏྠུ དསྶེཏབྦ’’ནྟི། སེསེསུཔཱིཏི སཏིསམཱདྷིཔཉྙིནྡྲིཡེསུཔི།

    Itarakiccabhedanti upaṭṭhānādikiccavisesaṃ. Passaddhādīti ādi-saddena samādhiupekkhāsambojjhaṅgānaṃ saṅgaho daṭṭhabbo. Hāpetabbanti yathā saddhindriyassa balavabhāvo dhammasabhāvapaccavekkhaṇena hāyati, evaṃ vīriyindriyassa adhimattatā passaddhiādibhāvanāya hāyati samādhipakkhiyattā tassā. Tathā hi samādhindriyassa adhimattataṃ kosajjapātato rakkhantī vīriyādibhāvanā viya vīriyindriyassa adhimattataṃ uddhaccapātato rakkhantī ekaṃsato hāpeti. Tena vuttaṃ ‘‘passaddhaādibhāvanāya hāpetabba’’nti. Soṇattherassa vatthūti sukumārasoṇattherassa vatthu. (Mahāva. 242; a. ni. aṭṭha. 1.1.205) so hi āyasmā satthu santike kammaṭṭhānaṃ gahetvā sītavane viharanto ‘‘mama sarīraṃ sukhumālaṃ, na ca sakkā sukheneva sukhaṃ adhigantuṃ, kilametvāpi samaṇadhammo kātabbo’’ti taṃ ṭhānacaṅkamameva adhiṭṭhāya padhānaṃ anuyuñjanto pādatalesu phoṭesu uṭṭhitesupi vedanaṃ ajjhupekkhitvā daḷhaṃ vīriyaṃ karonto accāraddhavīriyatāya visesaṃ nibbattetuṃ nāsakkhi. Satthā tattha gantvā vīṇūpamovādena ovaditvā vīriyasamatāyojanavīthiṃ dassento kammaṭṭhānaṃ sodhetvā gijjhakūṭaṃ gato. Theropi satthārā dinnanayena vīriyasamataṃ yojetvā bhāvento vipassanaṃ ussukkāpetvā arahatte patiṭṭhāsi. Tena vuttaṃ ‘‘soṇattherassa vatthu dassetabba’’nti. Sesesupīti satisamādhipaññindriyesupi.

    སམཏནྟི སདྡྷཱཔཉྙཱནཾ ཨཉྙམཉྙཾ ཨནཱུནཱནདྷིཀབྷཱཝཾ, ཏཐཱ སམཱདྷིཝཱིརིཡཱནཾ། ཡཐཱ ཧི སདྡྷཱཔཉྙཱནཾ ཝིསུཾ ཝིསུཾ དྷུརིཡདྷམྨབྷཱུཏཱནཾ ཀིཙྩཏོ ཨཉྙམཉྙཾ ནཱཏིཝཏྟནཾ ཝིསེསཏོ ཨིཙྪིཏབྦཾ, ཡཏོ ནེསཾ སམདྷུརཏཱཡ ཨཔྤནཱ སམྤཛྫཏི, ཨེཝཾ སམཱདྷིཝཱིརིཡཱནཾ ཀོསཛྫུདྡྷཙྩཔཀྑིཀཱནཾ སམརསཏཱཡ སཏི ཨཉྙམཉྙཱུཔཏྠམྦྷནཏོ སམྤཡུཏྟདྷམྨཱནཾ ཨནྟདྭཡཔཱཏཱབྷཱཝེན སམྨདེཝ ཨཔྤནཱ ཨིཛ྄ཛྷཏི། ‘‘བལཝསདྡྷོ’’ཏིཨཱདི བྱཏིརེཀམུཁེན ཝུཏྟསྶེཝ ཨཏྠསྶ སམཏྠནཾ། ཏསྶཏྠོ ཡོ བལཝཏིཡཱ སདྡྷཱཡ སམནྣཱགཏོ ཨཝིསདཉཱཎོ, སོ མུདྷཔྤསནྣོ ཧོཏི, ན ཨཝེཙྩཔྤསནྣོ། ཏཐཱ ཧི ཨཝཏྠུསྨིཾ པསཱིདཏི སེཡྻཐཱཔི ཏིཏྠིཡསཱཝཀཱ། ཀེརཱཊིཀཔཀྑནྟི སཱཋེཡྻཔཀྑཾ བྷཛཏི། སདྡྷཱཧཱིནཱཡ པཉྙཱཡ ཨཏིདྷཱཝནྟོ ‘‘དེཡྻཝཏྠུཔརིཙྩཱགེན ཝིནཱ ཙིཏྟུཔྤཱདམཏྟེནཔི དཱནམཡཾ པུཉྙཾ ཧོཏཱི’’ཏིཨཱདཱིནི པརིཀཔྤེཏི ཧེཏུཔཏིརཱུཔཀེཧི ཝཉྩིཏོ, ཨེཝཾབྷཱུཏོ ཙ སུཀྑཏཀྐཝིལུཏྟཙིཏྟོ པཎྜིཏཱནཾ ཝཙནཾ ནཱདིཡཏི སཉྙཏྟིཾ ན གཙྪཏི། ཏེནཱཧ ‘‘བྷེསཛྫསམུཊྛིཏོ ཝིཡ རོགོ ཨཏེཀིཙྪོ ཧོཏཱི’’ཏི། ཡཐཱ ཙེཏྠ སདྡྷཱཔཉྙཱནཾ ཨཉྙམཉྙཾ ཝིསམབྷཱཝོ ན ཨཏྠཱཝཧོ, ཨནཏྠཱཝཧོཝ, ཨེཝཾ, སམཱདྷིཝཱིརིཡཱནཾ ཨཉྙམཉྙཾ ཝིསམབྷཱཝོ ན ཨཏྠཱཝཧོ, ཨནཏྠཱཝཧོཝ, ཏཐཱ ན ཨཝིཀྑེཔཱཝཧོ, ཝིཀྑེཔཱཝཧོཝཱཏི། ཀོསཛྫཾ ཨབྷིབྷཝཏི, ཏེན ཨཔྤནཾ ན པཱཔུཎཱཏཱིཏི ཨདྷིཔྤཱཡོ། ཨུདྡྷཙྩཾ ཨབྷིབྷཝཏཱིཏི ཨེཏྠཱཔི ཨེསེཝ ནཡོ། ཏདུབྷཡནྟི སདྡྷཱཔཉྙཱདྭཡཾ, སམཱདྷིཝཱིརིཡདྭཡཉྩ། སམཾ ཀཱཏབྦནྟི སམརསཾ ཀཱཏབྦཾ །

    Samatanti saddhāpaññānaṃ aññamaññaṃ anūnānadhikabhāvaṃ, tathā samādhivīriyānaṃ. Yathā hi saddhāpaññānaṃ visuṃ visuṃ dhuriyadhammabhūtānaṃ kiccato aññamaññaṃ nātivattanaṃ visesato icchitabbaṃ, yato nesaṃ samadhuratāya appanā sampajjati, evaṃ samādhivīriyānaṃ kosajjuddhaccapakkhikānaṃ samarasatāya sati aññamaññūpatthambhanato sampayuttadhammānaṃ antadvayapātābhāvena sammadeva appanā ijjhati. ‘‘Balavasaddho’’tiādi byatirekamukhena vuttasseva atthassa samatthanaṃ. Tassattho yo balavatiyā saddhāya samannāgato avisadañāṇo, so mudhappasanno hoti, na aveccappasanno. Tathā hi avatthusmiṃ pasīdati seyyathāpi titthiyasāvakā. Kerāṭikapakkhanti sāṭheyyapakkhaṃ bhajati. Saddhāhīnāya paññāya atidhāvanto ‘‘deyyavatthupariccāgena vinā cittuppādamattenapi dānamayaṃ puññaṃ hotī’’tiādīni parikappeti hetupatirūpakehi vañcito, evaṃbhūto ca sukkhatakkaviluttacitto paṇḍitānaṃ vacanaṃ nādiyati saññattiṃ na gacchati. Tenāha ‘‘bhesajjasamuṭṭhito viya rogo atekiccho hotī’’ti. Yathā cettha saddhāpaññānaṃ aññamaññaṃ visamabhāvo na atthāvaho, anatthāvahova, evaṃ, samādhivīriyānaṃ aññamaññaṃ visamabhāvo na atthāvaho, anatthāvahova, tathā na avikkhepāvaho, vikkhepāvahovāti. Kosajjaṃ abhibhavati, tena appanaṃ na pāpuṇātīti adhippāyo. Uddhaccaṃ abhibhavatīti etthāpi eseva nayo. Tadubhayanti saddhāpaññādvayaṃ, samādhivīriyadvayañca. Samaṃ kātabbanti samarasaṃ kātabbaṃ .

    སམཱདྷིཀམྨིཀསྶཱཏི སམཐཀམྨཊྛཱནིཀསྶ། ཨེཝནྟི ཨེཝཾ སནྟེ, སདྡྷཱཡ ཐོཀཾ བལཝབྷཱཝེ སཏཱིཏི ཨཏྠོ། སདྡཧནྟོཏི ‘‘པཐཝཱི པཐཝཱིཏི མནསིཀརཎམཏྟེན ཀཐཾ ཛྷཱནུཔྤཏྟཱི’’ཏི ཨཙིནྟེཏྭཱ ‘‘ཨདྡྷཱ སམྨཱསམྦུདྡྷེན ཝུཏྟཝིདྷི ཨིཛ྄ཛྷིསྶཏཱི’’ཏི སདྡཧནྟོ སདྡྷཾ ཛནེནྟོ། ཨོཀཔྤེནྟོཏི ཨཱརམྨཎཾ ཨནུཔཝིསིཏྭཱ ཝིཡ ཨདྷིམུཙྩནཝསེན ཨཝཀཔྤེནྟོ པཀྑནྡནྟོ། ཨེཀགྒཏཱ བལཝཏཱི ཝཊྚཏི སམཱདྷིཔྤདྷཱནཏྟཱ ཛྷཱནསྶ། ཨུབྷིནྣནྟི སམཱདྷིཔཉྙཱནཾ། སམཱདྷིཀམྨིཀསྶ སམཱདྷིནོ ཨདྷིམཏྟཏཱཡ པཉྙཱཡ ཨདྷིམཏྟཏཱཔི ཨིཙྪིཏབྦཱཏི ཨཱཧ ‘‘སམཏཱཡཔཱི’’ཏི, སམབྷཱཝེནཱཔཱིཏི ཨཏྠོ། ཨཔྤནཱཏི ལོཀིཡཔྤནཱ། ཏཐཱ ཧི ‘‘ཧོཏིཡེཝཱ’’ཏི སཱསངྐཾ ཝདཏི། ལོཀུཏྟརཔྤནཱ པན ཏེསཾ སམབྷཱཝེནེཝ ཨིཙྪིཏཱ། ཡཐཱཧ ‘‘སམཐཝིཔསྶནཾ ཡུགནནྡྷཾ བྷཱཝེཏཱི’’ཏི (ཨ॰ ནི॰ ༤.༡༧༠; པཊི॰ མ॰ ༢.༥)།

    Samādhikammikassāti samathakammaṭṭhānikassa. Evanti evaṃ sante, saddhāya thokaṃ balavabhāve satīti attho. Saddahantoti ‘‘pathavī pathavīti manasikaraṇamattena kathaṃ jhānuppattī’’ti acintetvā ‘‘addhā sammāsambuddhena vuttavidhi ijjhissatī’’ti saddahanto saddhaṃ janento. Okappentoti ārammaṇaṃ anupavisitvā viya adhimuccanavasena avakappento pakkhandanto. Ekaggatā balavatī vaṭṭati samādhippadhānattā jhānassa. Ubhinnanti samādhipaññānaṃ. Samādhikammikassa samādhino adhimattatāya paññāya adhimattatāpi icchitabbāti āha ‘‘samatāyapī’’ti, samabhāvenāpīti attho. Appanāti lokiyappanā. Tathā hi ‘‘hotiyevā’’ti sāsaṅkaṃ vadati. Lokuttarappanā pana tesaṃ samabhāveneva icchitā. Yathāha ‘‘samathavipassanaṃ yuganandhaṃ bhāvetī’’ti (a. ni. 4.170; paṭi. ma. 2.5).

    ཡདི ཝིསེསཏོ སདྡྷཱཔཉྙཱནཾ, སམཱདྷིཝཱིརིཡཱནཉྩ སམཏཱཝ ཨིཙྪིཏཱ, ཀཐཾ སཏཱིཏི ཨཱཧ ‘‘སཏི པན སབྦཏྠ བལཝཏཱི ཝཊྚཏཱི’’ཏི། སབྦཏྠཱཏི ལཱིནུདྡྷཙྩཔཀྑིཀེསུ པཉྩསུ ཨིནྡྲིཡེསུ། ཨུདྡྷཙྩཔཀྑིཀེཀདེསེ གཎྷནྟོ ‘‘སདྡྷཱཝཱིརིཡཔཉྙཱན’’ནྟི ཨཱཧ། ཨཉྙཐཱ པཱིཏི ཙ གཧེཏབྦཱ སིཡཱ། ཏཐཱ ཧི ‘‘ཀོསཛྫཔཀྑིཀེན སམཱདྷིནཱ’’ ཨིཙྩེཝ ཝུཏྟཾ, ན ‘‘པསྶདྡྷིསམཱདྷིཨུཔེཀྑཱཧཱི’’ཏི། སཱཏི སཏི། སབྦེསུ རཱཛཀམྨེསུ ནིཡུཏྟོ སབྦཀམྨིཀོ། ཏེནཱཏི ཏེན སབྦཏྠ ཨིཙྪིཏབྦཊྛེན ཀཱརཎེན། ཨཱཧ ཨཊྛཀཐཱཡཾ། སབྦཏྠ ནིཡུཏྟཱ སབྦཏྠིཀཱ སབྦཏྠ ལཱིནེ, ཨུདྡྷཏེ ཙ ཙིཏྟེ ཨིཙྪིཏབྦཏྟཱ, སབྦེ ཝཱ ལཱིནེ, ཨུདྡྷཏེ ཙ ཙིཏྟེ བྷཱཝེཏབྦཱ བོཛ྄ཛྷངྒཱ ཨཏྠིཀཱ ཨེཏཱཡཱཏི སབྦཏྠིཀཱ། ཙིཏྟནྟི ཀུསལཾ ཙིཏྟཾ། ཏསྶ ཧི སཏི པཊིསརཎཾ པརཱཡཎཾ ཨཔྤཏྟསྶ པཏྟིཡཱ ཨནདྷིགཏསྶ ཨདྷིགམཱཡ། ཏེནཱཧ ‘‘ཨཱརཀྑཔཙྩུཔཊྛཱནཱ’’ཏིཨཱདི།

    Yadi visesato saddhāpaññānaṃ, samādhivīriyānañca samatāva icchitā, kathaṃ satīti āha ‘‘sati pana sabbattha balavatī vaṭṭatī’’ti. Sabbatthāti līnuddhaccapakkhikesu pañcasu indriyesu. Uddhaccapakkhikekadese gaṇhanto ‘‘saddhāvīriyapaññāna’’nti āha. Aññathā pīti ca gahetabbā siyā. Tathā hi ‘‘kosajjapakkhikena samādhinā’’ icceva vuttaṃ, na ‘‘passaddhisamādhiupekkhāhī’’ti. Sāti sati. Sabbesu rājakammesu niyutto sabbakammiko. Tenāti tena sabbattha icchitabbaṭṭhena kāraṇena. Āha aṭṭhakathāyaṃ. Sabbattha niyuttā sabbatthikā sabbattha līne, uddhate ca citte icchitabbattā, sabbe vā līne, uddhate ca citte bhāvetabbā bojjhaṅgā atthikā etāyāti sabbatthikā. Cittanti kusalaṃ cittaṃ. Tassa hi sati paṭisaraṇaṃ parāyaṇaṃ appattassa pattiyā anadhigatassa adhigamāya. Tenāha ‘‘ārakkhapaccupaṭṭhānā’’tiādi.

    ཁནྡྷཱདིབྷེདེ ཨནོགཱལ༹ྷཔཉྙཱནནྟི པརིཡཏྟིབཱཧུསཙྩཝསེནཔི ཁནྡྷཱཡཏནཱདཱིསུ ཨཔྤཏིཊྛིཏབུདྡྷཱིནཾ། བཧུསྶུཏསེཝནཱ ཧི སུཏམཡཉཱཎཱཝཧཱ། ཏརུཎཝིཔསྶནཱསམངྒཱིཔི བྷཱཝནཱམཡཉཱཎེ ཋིཏཏྟཱ ཨེཀཾསཏོ པཉྙཝཱ ཨེཝ ནཱམ ཧོཏཱིཏི ཨཱཧ ‘‘སམཔཉྙཱས ལཀྑཎཔརིགྒཱཧིཀཱཡ ཨུདཡབྦཡཔཉྙཱཡ སམནྣཱགཏཔུགྒལསེཝནཱ’’ཏི། ཉེཡྻདྷམྨསྶ གམྦྷཱིརབྷཱཝཝསེན ཏཔྤརིཙྪེདཀཉཱཎསྶ གམྦྷཱིརབྷཱཝགྒཧཎནྟི ཨཱཧ ‘‘གམྦྷཱིརེསུ ཁནྡྷཱདཱིསུ པཝཏྟཱཡ གམྦྷཱིརཔཉྙཱཡཱ’’ཏི། ཏཉྷི ཉེཡྻཾ ཏཱདིསཱཡ པཉྙཱཡ ཙརིཏབྦཏོ གམྦྷཱིརཉཱཎཙརིཡཾ, ཏསྶཱ ཝཱ པཉྙཱཡ ཏཏྠ པབྷེདཏོ པཝཏྟི གམྦྷཱིརཉཱཎཙརིཡཱ, ཏསྶཱ པཙྩཝེཀྑཎཱཏི ཨཱཧ ‘‘གམྦྷཱིརཔཉྙཱཡ པབྷེདཔཙྩཝེཀྑཎཱ’’ཏི། ཡཐཱ སཏིཝེཔུལླཔྤཏྟོ ནཱམ ཨརཧཱ ཨེཝ, ཨེཝཾ པཉྙཱཝེཔུལླཔྤཏྟོཏིཔི སོ ཨེཝཱཏི ཨཱཧ ‘‘ཨརཧཏྟམགྒེན བྷཱཝནཱཔཱརིཔཱུརཱི ཧོཏཱི’’ཏི། ཝཱིརིཡཱདཱིསུཔི ཨེསེཝ ནཡོ།

    Khandhādibhede anogāḷhapaññānanti pariyattibāhusaccavasenapi khandhāyatanādīsu appatiṭṭhitabuddhīnaṃ. Bahussutasevanā hi sutamayañāṇāvahā. Taruṇavipassanāsamaṅgīpi bhāvanāmayañāṇe ṭhitattā ekaṃsato paññavā eva nāma hotīti āha ‘‘samapaññāsa lakkhaṇapariggāhikāya udayabbayapaññāya samannāgatapuggalasevanā’’ti. Ñeyyadhammassa gambhīrabhāvavasena tapparicchedakañāṇassa gambhīrabhāvaggahaṇanti āha ‘‘gambhīresu khandhādīsu pavattāya gambhīrapaññāyā’’ti. Tañhi ñeyyaṃ tādisāya paññāya caritabbato gambhīrañāṇacariyaṃ, tassā vā paññāya tattha pabhedato pavatti gambhīrañāṇacariyā, tassā paccavekkhaṇāti āha ‘‘gambhīrapaññāya pabhedapaccavekkhaṇā’’ti. Yathā sativepullappatto nāma arahā eva, evaṃ paññāvepullappattotipi so evāti āha ‘‘arahattamaggena bhāvanāpāripūrī hotī’’ti. Vīriyādīsupi eseva nayo.

    ‘‘ཏཏྟཾ ཨཡོཁིལཾ ཧཏྠེ གམེནྟཱི’’ཏིཨཱདིནཱ (མ॰ ནི॰ ༣.༢༥༠, ༢༦༧; ཨ॰ ནི॰ ༣.༣༦) ཝུཏྟཔཉྩཝིདྷབནྡྷནཀམྨཀཱརཎཱ ནིརཡེ ནིབྦཏྟསཏྟསྶ ཡེབྷུཡྻེན སབྦཔཋམཾ ཀརོནྟཱིཏི, དེཝདཱུཏསུཏྟཱདཱིསུ ཏསྶ ཨཱདིཏོ ཝུཏྟཏྟཱ ཙ ཨཱཧ ‘‘པཉྩཝིདྷབནྡྷནཀམྨཀཱརཎཏོ པཊྛཱཡཱ’’ཏི། སཀཊཝཧནཱདིཀཱལེཏི ཨཱདི-སདྡེན ཏདཉྙམནུསྶེཧི, ཏིརཙྪཱནེཧི ཙ ཝིབཱདྷིཡམཱནཀཱལཾ སངྒཎྷཱཏི། ‘‘ཨེཀཾ བུདྡྷནྟར’’ནྟི ཨིདཾ ཨཔརཱཔརཾ པེཏེསུ ཨེཝ ཨུཔྤཛྫནཀསཏྟཝསེན ཝུཏྟཾ, ཨེཀཙྩཱནཾ ཝཱ པེཏཱནཾ ཨེཀཙྩཏིརཙྪཱནཱནཾ ཝིཡ ཏཐཱ དཱིགྷཱཡུཀཏཱཔི སིཡཱཏི ཏཐཱ ཝུཏྟཾ། ཏཐཱ ཧི ‘‘ཀཱལོ ནཱགརཱཛཱ ཙཏུནྣཾ བུདྡྷཱནཾ སམྨུཁཱིབྷཱཝཾ ལབྷིཏྭཱ ཋིཏོ མེཏྟེཡྻསྶཔི བྷགཝཏོ སམྨུཁཱིབྷཱཝཾ ལབྷིསྶཏཱི’’ཏི ཝདནྟི, ཡཾ ཏསྶ ཀཔྤཱཡུཀཏཱ ཝུཏྟཱ།

    ‘‘Tattaṃ ayokhilaṃ hatthe gamentī’’tiādinā (ma. ni. 3.250, 267; a. ni. 3.36) vuttapañcavidhabandhanakammakāraṇā niraye nibbattasattassa yebhuyyena sabbapaṭhamaṃ karontīti, devadūtasuttādīsu tassa ādito vuttattā ca āha ‘‘pañcavidhabandhanakammakāraṇato paṭṭhāyā’’ti. Sakaṭavahanādikāleti ādi-saddena tadaññamanussehi, tiracchānehi ca vibādhiyamānakālaṃ saṅgaṇhāti. ‘‘Ekaṃ buddhantara’’nti idaṃ aparāparaṃ petesu eva uppajjanakasattavasena vuttaṃ, ekaccānaṃ vā petānaṃ ekaccatiracchānānaṃ viya tathā dīghāyukatāpi siyāti tathā vuttaṃ. Tathā hi ‘‘kālo nāgarājā catunnaṃ buddhānaṃ sammukhībhāvaṃ labhitvā ṭhito metteyyassapi bhagavato sammukhībhāvaṃ labhissatī’’ti vadanti, yaṃ tassa kappāyukatā vuttā.

    ཨཱནིསཾསདསྶཱཝིནོཏི ‘‘ཝཱིརིཡཱཡཏྟོ ཨེཝ སབྦོ ལོཀུཏྟརོ, ལོཀིཡོ ཙ ཝིསེསཱདྷིགམོ’’ཏི ཨེཝཾ ཝཱིརིཡེ ཨཱནིསཾསདསྶནསཱིལསྶ། གམནཝཱིཐིནྟི སཔུབྦབྷཱགཾ ནིབྦཱནགཱམིནིཾ པཊིཔདཾ, སཧ ཝིཔསྶནཱཡ ཨརིཡམགྒཔཊིཔཱཊི , སཏྟཝིསུདྡྷིཔརམྤརཱ ཝཱ། སཱ ཧི བྷིཀྑུནོ ཝཊྚནིཡྻཱནཱཡ གནྟབྦཱ པཊིཔདཱཏི ཀཏྭཱ གམནཝཱིཐི ནཱམ། ཀཱཡདལ༹ྷཱིབཧུལོཏི ཡཐཱ ཏཐཱ ཀཱཡསྶ དལ༹ྷཱིཀམྨཔྤསུཏོ། པིཎྜནྟི རཊྛཔིཎྜཾ། པཙྩཡདཱཡཀཱནཾ ཨཏྟནི ཀཱརསྶ ཨཏྟནོ སམྨཱཔཊིཔཏྟིཡཱ མཧཔྥལབྷཱཝསྶ ཀརཎེན པིཎྜསྶ བྷིཀྑཱཡ པཊིཔཱུཛནཱ པིཎྜཱཔཙཱཡནཾ།

    Ānisaṃsadassāvinoti ‘‘vīriyāyatto eva sabbo lokuttaro, lokiyo ca visesādhigamo’’ti evaṃ vīriye ānisaṃsadassanasīlassa. Gamanavīthinti sapubbabhāgaṃ nibbānagāminiṃ paṭipadaṃ, saha vipassanāya ariyamaggapaṭipāṭi , sattavisuddhiparamparā vā. Sā hi bhikkhuno vaṭṭaniyyānāya gantabbā paṭipadāti katvā gamanavīthi nāma. Kāyadaḷhībahuloti yathā tathā kāyassa daḷhīkammappasuto. Piṇḍanti raṭṭhapiṇḍaṃ. Paccayadāyakānaṃ attani kārassa attano sammāpaṭipattiyā mahapphalabhāvassa karaṇena piṇḍassa bhikkhāya paṭipūjanā piṇḍāpacāyanaṃ.

    ནཱིཧརནྟོཏི པཏྟཐཝིཀཏོ ནཱིཧརནྟོ། ཏཾ སདྡཾ སུཏྭཱཏི ཏཾ ཨུཔཱསིཀཱཡ ཝཙནཾ ཨཏྟནོ ཝསནཔཎྞསཱལདྭཱརེ ཋིཏོཝ པཉྩཱབྷིཉྙཏཱཡ དིབྦསོཏེན སུཏྭཱ། མནུསྶསམྤཏྟི, དིབྦསམྤཏྟི, ནིབྦཱནསམྤཏྟཱིཏི ཨིམཱ ཏིསྶོ སམྤཏྟིཡོ། དཱཏུཾ སཀྑིསྶསཱིཏི ‘‘ཏཡི ཀཏེན དཱནམཡེན, ཝེཡྻཱཝཙྩམཡེན ཙ པུཉྙཀམྨེན ཁེཏྟཝིསེསབྷཱཝཱུཔགམནེན ཨཔརཱཔརཾ དེཝམནུསྶསམྤཏྟིཡོ, ཨནྟེ ནིབྦཱནསམྤཏྟིཉྩ དཱཏུཾ སཀྑིསྶསཱི’’ཏི ཐེརོ ཨཏྟཱནཾ པུཙྪཏི། སིཏཾ ཀརོནྟོ ཝཱཏི ‘‘ཨཀིཙྪེནེཝ མཡཱ ཝཊྚདུཀྑཾ སམཏིཀྐནྟ’’ནྟི པཙྩཝེཀྑཎཱཝསཱནེ སཉྫཱཏཔཱམོཛྫཝསེན སིཏཾ ཀརོནྟོ ཨེཝ།

    Nīharantoti pattathavikato nīharanto. Taṃ saddaṃ sutvāti taṃ upāsikāya vacanaṃ attano vasanapaṇṇasāladvāre ṭhitova pañcābhiññatāya dibbasotena sutvā. Manussasampatti, dibbasampatti, nibbānasampattīti imā tisso sampattiyo. Dātuṃ sakkhissasīti ‘‘tayi katena dānamayena, veyyāvaccamayena ca puññakammena khettavisesabhāvūpagamanena aparāparaṃ devamanussasampattiyo, ante nibbānasampattiñca dātuṃ sakkhissasī’’ti thero attānaṃ pucchati. Sitaṃ karonto vāti ‘‘akiccheneva mayā vaṭṭadukkhaṃ samatikkanta’’nti paccavekkhaṇāvasāne sañjātapāmojjavasena sitaṃ karonto eva.

    ཝིཔྤཊིཔནྣནྟི ཛཱཏིདྷམྨཀུལདྷམྨཱདིལངྒྷནེན ཨསམྨཱཔཊིཔནྣཾ། ཨེཝཾ ཡཐཱ ཨསམྨཱཔཊིཔནྣོ པུཏྟོ ཏཱཡ ཨེཝ ཨསམྨཱཔཊིཔཏྟིཡཱ ཀུལསནྟཱནཏོ བཱཧིརོ ཧུཏྭཱ པིཏུ སནྟིཀཱ དཱཡཛྫསྶ ན བྷཱགཱི, ཨེཝཾ། ཀུསཱིཏོཔི ཏེན ཀུསཱིཏབྷཱཝེན ཨསམྨཱཔཊིཔནྣོ སཏྠུ སནྟིཀཱ ལདྡྷབྦཨརིཡདྷནདཱཡཛྫསྶ ན བྷཱགཱི། ཨཱརདྡྷཝཱིརིཡོཝ ལབྷཏི སམྨཱཔཊིཔཛྫནཏོ། ཨུཔྤཛྫཏི ཝཱིརིཡསམྦོཛ྄ཛྷངྒོཏི ཡོཛནཱ, ཨེཝཾ སབྦཏྠ།

    Vippaṭipannanti jātidhammakuladhammādilaṅghanena asammāpaṭipannaṃ. Evaṃ yathā asammāpaṭipanno putto tāya eva asammāpaṭipattiyā kulasantānato bāhiro hutvā pitu santikā dāyajjassa na bhāgī, evaṃ. Kusītopi tena kusītabhāvena asammāpaṭipanno satthu santikā laddhabbaariyadhanadāyajjassa na bhāgī. Āraddhavīriyova labhati sammāpaṭipajjanato. Uppajjati vīriyasambojjhaṅgoti yojanā, evaṃ sabbattha.

    མཧཱཏི སཱིལཱདཱིཧི གུཎེཧི མཧནྟོ ཝིཔུལོ ཨནཉྙསཱདྷཱརཎོ། ཏཾ པནསྶ གུཎམཧཏྟཾ དསསཧསྶིལོཀདྷཱཏུཀམྤནེན ལོཀེ པཱཀཊནྟི དསྶེནྟོ ‘‘སཏྠུནོ ཧཱི’’ཏིཨཱདིམཱཧ།

    Mahāti sīlādīhi guṇehi mahanto vipulo anaññasādhāraṇo. Taṃ panassa guṇamahattaṃ dasasahassilokadhātukampanena loke pākaṭanti dassento ‘‘satthuno hī’’tiādimāha.

    ཡསྨཱ སཏྠུསཱསནེ པབྦཛིཏསྶ པབྦཛྫཱུཔགམེན སཀྱཔུཏྟསྶབྷཱཝོ སམྤཛཱཡཏི, ཏསྨཱ བུདྡྷཔུཏྟབྷཱཝཾ དསྶེནྟོ ‘‘ཨསམྦྷིནྣཱཡཱ’’ཏིཨཱདིམཱཧ།

    Yasmā satthusāsane pabbajitassa pabbajjūpagamena sakyaputtassabhāvo sampajāyati, tasmā buddhaputtabhāvaṃ dassento ‘‘asambhinnāyā’’tiādimāha.

    ཨལསཱནཾ བྷཱཝནཱཡ ནཱམམཏྟམྤི ཨཛཱནནྟཱནཾ ཀཱཡདལ༹ྷཱིབཧུལཱནཾ ཡཱཝདཏྠཾ བྷུཉྫིཏྭཱ སེཡྻསུཁཱདིཨནུཡུཉྫནཀཱནཾ ཏིརཙྪཱནཀཐིཀཱནཾ པུགྒལཱནཾ དཱུརཏོ ཝཛྫནཱ ཀུསཱིཏཔུགྒལཔརིཝཛྫནཱ། ‘‘དིཝསཾ ཙངྐམེན ནིསཛྫཱཡཱ’’ཏིཨཱདིནཱ (མ॰ ནི॰ ༡.༤༢༣; ༣.༦༥; སཾ॰ ནི॰ ༤.༡༢༠; མཧཱནི॰ ༡༦༡) བྷཱཝནཱརདྡྷཝསེན ཨཱརདྡྷཝཱིརིཡཱནཾ དལ༹ྷཔརཀྐམཱནཾ ཀཱལེན ཀཱལཾ ཨུཔསངྐམནཱ ཨཱརདྡྷཝཱིརིཡཔུགྒལསེཝནཱ། ཏེནཱཧ ‘‘ཀུཙྪིཾ པཱུརེཏྭཱ’’ཏིཨཱདི། ཝིསུདྡྷིམགྒེ (ཝིསུདྡྷི॰ ༡.༦༤) པན ཛཱཏིམཧཏྟཔཙྩཝེཀྑཎཱ, སབྲཧྨཙཱརཱིམཧཏྟཔཙྩཝེཀྑཎཱཏི ཨིདཾ དྭཡཾ ན གཧིཏཾ, ཐིནམིདྡྷཝིནོདནཏཱ, སམྨཔྤདྷཱནཔཙྩཝེཀྑཎཏཱཏི ཨིདཾ དྭཡཾ གཧིཏཾ། ཏཏྠ ཨཱནིསཾསདསྶཱཝིཏཱཡ ཨེཝ སམྨཔྤདྷཱནཔཙྩཝེཀྑཎཱ གཧིཏཱ ཧོཏི ལོཀིཡལོཀུཏྟརཝིསེསཱདྷིགམསྶ ཝཱིརིཡཱཡཏྟཏཱདསྶནབྷཱཝཏོ། ཐིནམིདྡྷཝིནོདནཾ ཏདདྷིམུཏྟཏཱཡ ཨེཝ གཧིཏཾ ཧོཏི, ཝཱིརིཡུཔྤཱདནེ ཡུཏྟཔྤཡུཏྟསྶ ཐིནམིདྡྷཝིནོདནཾ ཨཏྠསིདྡྷམེཝ། ཏཏྠ ཐིནམིདྡྷཝིནོདནཀུསཱིཏཔུགྒལཔརིཝཛྫནཨཱརདྡྷཝཱིརིཡཔུགྒལསེཝན- ཏདདྷིམུཏྟཏཱཔཊིཔཀྑཝིདྷམནཔཙྩཡཱུཔསཾཧཱརཝསེན, ཨཔཱཡབྷཡཔཙྩཝེཀྑཎཱདཡོ སམུཏྟེཛནཝསེན ཝཱིརིཡསམྦོཛ྄ཛྷངྒསྶ ཨུཔྤཱདཀཱ དཊྛབྦཱ།

    Alasānaṃ bhāvanāya nāmamattampi ajānantānaṃ kāyadaḷhībahulānaṃ yāvadatthaṃ bhuñjitvā seyyasukhādianuyuñjanakānaṃ tiracchānakathikānaṃ puggalānaṃ dūrato vajjanā kusītapuggalaparivajjanā. ‘‘Divasaṃ caṅkamena nisajjāyā’’tiādinā (ma. ni. 1.423; 3.65; saṃ. ni. 4.120; mahāni. 161) bhāvanāraddhavasena āraddhavīriyānaṃ daḷhaparakkamānaṃ kālena kālaṃ upasaṅkamanā āraddhavīriyapuggalasevanā. Tenāha ‘‘kucchiṃ pūretvā’’tiādi. Visuddhimagge (visuddhi. 1.64) pana jātimahattapaccavekkhaṇā, sabrahmacārīmahattapaccavekkhaṇāti idaṃ dvayaṃ na gahitaṃ, thinamiddhavinodanatā, sammappadhānapaccavekkhaṇatāti idaṃ dvayaṃ gahitaṃ. Tattha ānisaṃsadassāvitāya eva sammappadhānapaccavekkhaṇā gahitā hoti lokiyalokuttaravisesādhigamassa vīriyāyattatādassanabhāvato. Thinamiddhavinodanaṃ tadadhimuttatāya eva gahitaṃ hoti, vīriyuppādane yuttappayuttassa thinamiddhavinodanaṃ atthasiddhameva. Tattha thinamiddhavinodanakusītapuggalaparivajjanaāraddhavīriyapuggalasevana- tadadhimuttatāpaṭipakkhavidhamanapaccayūpasaṃhāravasena, apāyabhayapaccavekkhaṇādayo samuttejanavasena vīriyasambojjhaṅgassa uppādakā daṭṭhabbā.

    པུརིམུཔྤནྣཱ པཱིཏི པརཏོ ཨུཔྤཛྫནཀཔཱིཏིཡཱ ཝིསེསཀཱརཎསབྷཱགཧེཏུབྷཱཝཏོ ‘‘པཱིཏིཡེཝ པཱིཏིསམྦོཛ྄ཛྷངྒཊྛཱནཱིཡཱ དྷམྨཱ’’ཏི ཝུཏྟཱ, ཏསྶཱ པན བཧུསོ པཝཏྟིཡཱ པུཐུཏྟཾ ཨུཔཱདཱཡ བཧུཝཙནནིདྡེསོ། ཡཐཱ སཱ ཨུཔྤཛྫཏི, ཨེཝཾ པཊིཔཏྟི ཏསྶཱ ཨུཔྤཱདཀམནསིཀཱརོ།

    Purimuppannā pīti parato uppajjanakapītiyā visesakāraṇasabhāgahetubhāvato ‘‘pītiyeva pītisambojjhaṅgaṭṭhānīyā dhammā’’ti vuttā, tassā pana bahuso pavattiyā puthuttaṃ upādāya bahuvacananiddeso. Yathā sā uppajjati, evaṃ paṭipatti tassā uppādakamanasikāro.

    ‘‘བུདྡྷཱནུསྶཏཱི’’ཏིཨཱདཱིསུ ཝཏྟབྦཾ ཝིསུདྡྷིམགྒེ (ཝིསུདྡྷི॰ ༡.༡༢༣) ཝུཏྟནཡེནེཝ ཝེདིཏབྦཾ།

    ‘‘Buddhānussatī’’tiādīsu vattabbaṃ visuddhimagge (visuddhi. 1.123) vuttanayeneva veditabbaṃ.

    བུདྡྷཱནུསྶཏིཡཱ ཨུཔཙཱརསམཱདྷིནིཊྛཏྟཱ ཝུཏྟཾ ‘‘ཡཱཝ ཨུཔཙཱརཱ’’ཏི། སཀལསརཱིརཾ ཕརམཱནོཏི པཱིཏིསམུཊྛཱནེཧི པཎཱིཏརཱུཔེཧི སཀལསརཱིརཾ ཕརམཱནོ། དྷམྨགུཎེ ཨནུསྶརནྟསྶཱཔི ཡཱཝ ཨུཔཙཱརཱ སཀལསརཱིརཾ ཕརམཱནོ པཱིཏིསམྦོཛ྄ཛྷངྒོ ཨུཔྤཛྫཏཱིཏི ཡོཛནཱ, ཨེཝཾ སེསཨནུསྶཏཱིསུ། པསཱདནཱིཡསུཏྟནྟཔཙྩཝེཀྑཎཱཡཉྩ ཡོཛེཏབྦཾ ཏསྶཱཔི ཝིམུཏྟཱཡཏནབྷཱཝེན ཏགྒཏིཀཏྟཱ། སངྑཱརཱནཾ སཔྤདེསཝཱུཔསམེཔི ནིཔྤདེསཝཱུཔསམེ ཝིཡ ཏཐཱ པཉྙཱཡ པཝཏྟིཏོ བྷཱཝནཱམནསིཀཱརོ ཀིལེསཝིཀྑམྦྷནསམཏྠོ ཧུཏྭཱ ཨུཔཙཱརསམཱདྷིཾ ཨཱཝཧནྟོ ཏཐཱརཱུཔཔཱིཏིསོམནསྶསམནྣཱགཏོ པཱིཏིསམྦོཛ྄ཛྷངྒསྶ ཨུཔྤཱདཱཡ ཧོཏཱིཏི ཨཱཧ ‘‘སམཱཔཏྟིཡཱ…པེ॰… པཙྩཝེཀྑནྟསྶཱཔཱི’’ཏི། ཏཏྠ ‘‘ཝིཀྑམྦྷིཏཱ ཀིལེསཱ’’ཏི པཱཋོ། ཏེ ཧི ན སམུདཱཙརནྟཱིཏི། ཨིཏི-སདྡོ ཀཱརཎཏྠོ, ཡསྨཱ ན སམུདཱཙརནྟི, ཏསྨཱ ཏཾ ནེསཾ ཨསམུདཱཙཱརཾ པཙྩཝེཀྑནྟསྶཱཏི ཡོཛནཱ ། ན ཧི ཀིལེསེ པཙྩཝེཀྑནྟསྶ བོཛ྄ཛྷངྒུཔྤཏྟི ཡུཏྟཱ། པསཱདནཱིཡེསུ ཋཱནེསུ པསཱདསིནེཧཱབྷཱཝེན ཐཱུསསམཧདཡཏཱ ལཱུཁཏཱ, སཱ ཏཏྠ ཨཱདརགཱརཝཱཀརཎེན ཝིཉྙཱཡཏཱིཏི ཨཱཧ ‘‘ཨསཀྐཙྩཀིརིཡཱཡ སཾསཱུཙིཏལཱུཁབྷཱཝེ’’ཏི།

    Buddhānussatiyā upacārasamādhiniṭṭhattā vuttaṃ ‘‘yāva upacārā’’ti. Sakalasarīraṃ pharamānoti pītisamuṭṭhānehi paṇītarūpehi sakalasarīraṃ pharamāno. Dhammaguṇe anussarantassāpi yāva upacārā sakalasarīraṃ pharamāno pītisambojjhaṅgo uppajjatīti yojanā, evaṃ sesaanussatīsu. Pasādanīyasuttantapaccavekkhaṇāyañca yojetabbaṃ tassāpi vimuttāyatanabhāvena taggatikattā. Saṅkhārānaṃ sappadesavūpasamepi nippadesavūpasame viya tathā paññāya pavattito bhāvanāmanasikāro kilesavikkhambhanasamattho hutvā upacārasamādhiṃ āvahanto tathārūpapītisomanassasamannāgato pītisambojjhaṅgassa uppādāya hotīti āha ‘‘samāpattiyā…pe… paccavekkhantassāpī’’ti. Tattha ‘‘vikkhambhitā kilesā’’ti pāṭho. Te hi na samudācarantīti. Iti-saddo kāraṇattho, yasmā na samudācaranti, tasmā taṃ nesaṃ asamudācāraṃ paccavekkhantassāti yojanā . Na hi kilese paccavekkhantassa bojjhaṅguppatti yuttā. Pasādanīyesu ṭhānesu pasādasinehābhāvena thūsasamahadayatā lūkhatā, sā tattha ādaragāravākaraṇena viññāyatīti āha ‘‘asakkaccakiriyāya saṃsūcitalūkhabhāve’’ti.

    ཀཱཡཙིཏྟདརཐཝཱུཔསམལཀྑཎཱ པསྶདྡྷི ཨེཝ ཡཐཱཝུཏྟབོདྷིཨངྒབྷཱུཏོ པསྶདྡྷིསམྦོཛ྄ཛྷངྒོ, ཏསྶ པསྶདྡྷིསམྦོཛ྄ཛྷངྒསྶ ཨེཝཾ ཨུཔྤཱདོ ཧོཏཱིཏི ཡོཛནཱ།

    Kāyacittadarathavūpasamalakkhaṇā passaddhi eva yathāvuttabodhiaṅgabhūto passaddhisambojjhaṅgo, tassa passaddhisambojjhaṅgassa evaṃ uppādo hotīti yojanā.

    པཎཱིཏབྷོཛནསེཝནཏཱཏི པཎཱིཏསཔྤཱཡབྷོཛནསེཝ ནཏཱ ། ཨུཏུཨིརིཡཱཔཐསུཁགྒཧཎེན སཔྤཱཡཨུཏུཨིརིཡཱཔཐགྒཧཎཾ དཊྛབྦཾ། ཏཉྷི ཏིཝིདྷམྤི སཔྤཱཡཾ སེཝིཡམཱནཾ ཀཱཡསྶ ཀལླཏཱཔཱདནཝསེན ཙིཏྟསྶ ཀལླཏཾ ཨཱཝཧནྟཾ དུཝིདྷཱཡཔི པསྶདྡྷིཡཱ ཀཱརཎཾ ཧོཏི། ཨཧེཏུཀཾ སཏྟེསུ ལབྦྷམཱནཾ སུཁདུཀྑནྟི ཨཡམེཀོ ཨནྟོ, ཨིསྶརཱདིཝིསམཧེཏུཀནྟི པན ཨཡཾ དུཏིཡོ། ཨེཏེ ཨུབྷོ ཨནྟེ ཨནུཔགམྨ ཡཐཱསཀཾ ཀམྨུནཱ ཧོཏཱིཏི ཨཡཾ མཛ྄ཛྷིམཱ པཊིཔཏྟི། མཛ྄ཛྷཏྟོ པཡོགོ ཡསྶ སོ མཛ྄ཛྷཏྟཔཡོགོ, ཏསྶ བྷཱཝོ མཛ྄ཛྷཏྟཔཡོགཏཱ། ཨཡཉྷི པཧཱཡ སཱརདྡྷཀཱཡཏཾ པསྶདྡྷཀཱཡཏཱཡ ཀཱརཎཾ ཧོནྟཱི པསྶདྡྷིདྭཡཾ ཨཱཝཧཏི, ཨེཏེནེཝ སཱརདྡྷཀཱཡཔུགྒལཔརིཝཛྫནཔསྶདྡྷཀཱཡཔུགྒལསེཝནཱནཾ ཏདཱཝཧནཏཱ སཾཝཎྞིཏཱཏི དཊྛབྦཾ།

    Paṇītabhojanasevanatāti paṇītasappāyabhojanaseva natā . Utuiriyāpathasukhaggahaṇena sappāyautuiriyāpathaggahaṇaṃ daṭṭhabbaṃ. Tañhi tividhampi sappāyaṃ seviyamānaṃ kāyassa kallatāpādanavasena cittassa kallataṃ āvahantaṃ duvidhāyapi passaddhiyā kāraṇaṃ hoti. Ahetukaṃ sattesu labbhamānaṃ sukhadukkhanti ayameko anto, issarādivisamahetukanti pana ayaṃ dutiyo. Ete ubho ante anupagamma yathāsakaṃ kammunā hotīti ayaṃ majjhimā paṭipatti. Majjhatto payogo yassa so majjhattapayogo, tassa bhāvo majjhattapayogatā. Ayañhi pahāya sāraddhakāyataṃ passaddhakāyatāya kāraṇaṃ hontī passaddhidvayaṃ āvahati, eteneva sāraddhakāyapuggalaparivajjanapassaddhakāyapuggalasevanānaṃ tadāvahanatā saṃvaṇṇitāti daṭṭhabbaṃ.

    ཡཐཱསམཱཧིཏཱཀཱརསལླཀྑཎཝསེན གཡ྄ཧམཱནོ པུརིམུཔྤནྣོ སམཐོ ཨེཝ སམཐནིམིཏྟཾ། ནཱནཱརམྨཎེ པརིབྦྷམནེན ཝིཝིདྷཾ ཨགྒཾ ཨེཏསྶཱཏི བྱགྒོ, ཝིཀྑེཔོ། ཏཐཱ ཧི སོ ཨནཝཊྛཱནརསོ, བྷནྟཏཱཔཙྩུཔཊྛཱནོ ཙ ཝུཏྟོ, ཨེཀགྒཏཱབྷཱཝཏོ བྱགྒཔཊིཔཀྑོཏི ཨབྱགྒོ, སམཱདྷི། སོ ཨེཝ ནིམིཏྟནྟི པུབྦེ ཝིཡ ཝཏྟབྦཾ། ཏེནཱཧ ‘‘ཨཝིཀྑེཔཊྛེན ཙ ཨབྱགྒནིམིཏྟ’’ནྟི།

    Yathāsamāhitākārasallakkhaṇavasena gayhamāno purimuppanno samatho eva samathanimittaṃ. Nānārammaṇe paribbhamanena vividhaṃ aggaṃ etassāti byaggo, vikkhepo. Tathā hi so anavaṭṭhānaraso, bhantatāpaccupaṭṭhāno ca vutto, ekaggatābhāvato byaggapaṭipakkhoti abyaggo, samādhi. So eva nimittanti pubbe viya vattabbaṃ. Tenāha ‘‘avikkhepaṭṭhena ca abyagganimitta’’nti.

    ཝཏྠུཝིསདཀིརིཡཱ, ཨིནྡྲིཡསམཏྟཔཊིཔཱདནཱ ཙ པཉྙཱཝཧཱ ཝུཏྟཱ, སམཱདྷཱནཱཝཧཱཔི ཏཱ ཧོནྟི སམཱདྷཱནཱཝཧབྷཱཝེནེཝ པཉྙཱཝཧབྷཱཝཏོཏི ཝུཏྟཾ ‘‘ཝཏྠུཝིསད…པེ॰… ཝེདིཏབྦཱ’’ཏི།

    Vatthuvisadakiriyā, indriyasamattapaṭipādanā ca paññāvahā vuttā, samādhānāvahāpi tā honti samādhānāvahabhāveneva paññāvahabhāvatoti vuttaṃ ‘‘vatthuvisada…pe… veditabbā’’ti.

    ཀརཎབྷཱཝནཱཀོསལླཱནཾ ཨཝིནཱབྷཱཝཏོ, རཀྑནཀོསལླསྶ ཙ ཏཾམཱུལཀཏྟཱ ‘‘ནིམིཏྟཀུསལཏཱ ནཱམ ཀསིཎནིམིཏྟསྶ ཨུགྒཧཎཀུསལཏཱ’’ ཨིཙྩེཝ ཝུཏྟཾ། ཀསིཎནིམིཏྟསྶཱཏི ཙ ནིདསྶནམཏྟཾ དཊྛབྦཾ། ཨསུབྷནིམིཏྟསྶཱཔི ཧི ཡསྶ ཀསྶཙི ཛྷཱནུཔྤཏྟིནིམིཏྟསྶ ཨུགྒཧཎཀོསལླཾ ནིམིཏྟཀུསལཏཱ ཨེཝཱཏི། ཨཏིསིཐིལཝཱིརིཡཏཱདཱིཧཱིཏི ཨཱདི-སདྡེན པཉྙཱཔཡོགམནྡཏཾ , པམོདཝེཀལླཉྩ སངྒཎྷཱཏི། ཏསྶ པགྒཎྷནནྟི ཏསྶ ལཱིནསྶ ཙིཏྟསྶ དྷམྨཝིཙཡསམྦོཛ྄ཛྷངྒཱདིསམུཊྛཱཔནེན ལཡཱཔཏྟིཏོ སམུདྡྷརཎཾ། ཝུཏྟཉྷེཏཾ བྷགཝཏཱ –

    Karaṇabhāvanākosallānaṃ avinābhāvato, rakkhanakosallassa ca taṃmūlakattā ‘‘nimittakusalatā nāma kasiṇanimittassa uggahaṇakusalatā’’ icceva vuttaṃ. Kasiṇanimittassāti ca nidassanamattaṃ daṭṭhabbaṃ. Asubhanimittassāpi hi yassa kassaci jhānuppattinimittassa uggahaṇakosallaṃ nimittakusalatā evāti. Atisithilavīriyatādīhīti ādi-saddena paññāpayogamandataṃ , pamodavekallañca saṅgaṇhāti. Tassa paggaṇhananti tassa līnassa cittassa dhammavicayasambojjhaṅgādisamuṭṭhāpanena layāpattito samuddharaṇaṃ. Vuttañhetaṃ bhagavatā –

    ‘‘ཡསྨིཉྩ ཁོ, བྷིཀྑཝེ, སམཡེ ལཱིནཾ ཙིཏྟཾ ཧོཏི, ཀཱལོ ཏསྨིཾ སམཡེ དྷམྨཝིཙཡསམྦོཛ྄ཛྷངྒསྶ བྷཱཝནཱཡ, ཀཱལོ ཝཱིརིཡསམྦོཛ྄ཛྷངྒསྶ བྷཱཝནཱཡ, ཀཱལོ པཱིཏིསམྦོཛ྄ཛྷངྒསྶ བྷཱཝནཱཡ། ཏཾ ཀིསྶ ཧེཏུ? ལཱིནཾ, བྷིཀྑཝེ, ཙིཏྟཾ ཏཾ ཨེཏེཧི དྷམྨེཧི སུསམུཊྛཱཔཡཾ ཧོཏི། སེཡྻཐཱཔི, བྷིཀྑཝེ, པུརིསོ པརིཏྟཾ ཨགྒིཾ ཨུཛྫཱལིཏུཀཱམོ ཨསྶ, སོ ཏཏྠ སུཀྑཱནི ཙེཝ ཏིཎཱནི པཀྑིཔེཡྻ, སུཀྑཱནི གོམཡཱནི པཀྑིཔེཡྻ, སུཀྑཱནི ཀཊྛཱནི པཀྑིཔེཡྻ, མུཁཝཱཏཉྩ དདེཡྻ, ན ཙ པཾསུཀེན ཨོཀིརེཡྻ, བྷབྦོ ནུ ཁོ སོ པུརིསོ པརིཏྟཾ ཨགྒིཾ ཨུཛྫཱལིཏུནྟི། ཨེཝཾ བྷནྟེ’’ཏི (སཾ॰ ནི॰ ༥.༢༣༤)།

    ‘‘Yasmiñca kho, bhikkhave, samaye līnaṃ cittaṃ hoti, kālo tasmiṃ samaye dhammavicayasambojjhaṅgassa bhāvanāya, kālo vīriyasambojjhaṅgassa bhāvanāya, kālo pītisambojjhaṅgassa bhāvanāya. Taṃ kissa hetu? Līnaṃ, bhikkhave, cittaṃ taṃ etehi dhammehi susamuṭṭhāpayaṃ hoti. Seyyathāpi, bhikkhave, puriso parittaṃ aggiṃ ujjālitukāmo assa, so tattha sukkhāni ceva tiṇāni pakkhipeyya, sukkhāni gomayāni pakkhipeyya, sukkhāni kaṭṭhāni pakkhipeyya, mukhavātañca dadeyya, na ca paṃsukena okireyya, bhabbo nu kho so puriso parittaṃ aggiṃ ujjālitunti. Evaṃ bhante’’ti (saṃ. ni. 5.234).

    ཨེཏྠ ཙ ཡཐཱསཀཾ ཨཱཧཱརཝསེན དྷམྨཝིཙཡསམྦོཛ྄ཛྷངྒཱདཱིནཾ བྷཱཝནཱསམུཊྛཱཔནཱཏི ཝེདིཏབྦཱ, སཱ ཨནནྟརཾ ཝིབྷཱཝིཏཱ ཨེཝ། ཨཱརདྡྷཝཱིརིཡཏཱདཱིཧཱིཏི ཨཱདི-སདྡེན པཉྙཱཔཡོགབལཝཏཾ, པམོདུབྦིལཱཝནཉྩ སངྒཎྷཱཏི། ཏསྶ ནིགྒཎྷནནྟི ཏསྶ ཨུདྡྷཏསྶ ཙིཏྟསྶ སམཱདྷིསམྦོཛ྄ཛྷངྒཱདིསམུཊྛཱཔནེན ཨུདྡྷཏཱཔཏྟིཏོ ནིསེདྷནཾ། ཝུཏྟམྤི ཙེཏཾ བྷགཝཏཱ –

    Ettha ca yathāsakaṃ āhāravasena dhammavicayasambojjhaṅgādīnaṃ bhāvanāsamuṭṭhāpanāti veditabbā, sā anantaraṃ vibhāvitā eva. Āraddhavīriyatādīhīti ādi-saddena paññāpayogabalavataṃ, pamodubbilāvanañca saṅgaṇhāti. Tassa niggaṇhananti tassa uddhatassa cittassa samādhisambojjhaṅgādisamuṭṭhāpanena uddhatāpattito nisedhanaṃ. Vuttampi cetaṃ bhagavatā –

    ‘‘ཡསྨིཉྩ ཁོ, བྷིཀྑཝེ, སམཡེ ཨུདྡྷཏཾ ཙིཏྟཾ ཧོཏི, ཀཱལོ ཏསྨིཾ སམཡེ པསྶདྡྷིསམྦོཛ྄ཛྷངྒསྶ བྷཱཝནཱཡ, ཀཱལོ སམཱདྷིསམྦོཛ྄ཛྷངྒསྶ བྷཱཝནཱཡ, ཀཱལོ ཨུཔེཀྑཱསམྦོཛ྄ཛྷངྒསྶ བྷཱཝནཱཡ། ཏཾ ཀིསྶ ཧེཏུ? ཨུདྡྷཏཾ, བྷིཀྑཝེ, ཙིཏྟཾ ཏཾ ཨེཏེཧི དྷམྨེཧི སུཝཱུཔསམཡཾ ཧོཏི། སེཡྻཐཱཔི, བྷིཀྑཝེ, པུརིསོ མཧནྟཾ ཨགྒིཀྑནྡྷཾ ནིབྦཱཔེཏུཀཱམོ ཨསྶ, སོ ཏཏྠ ཨལླཱནི ཙེཝ ཏིཎཱནི…པེ॰… པཾསུཀེན ཙ ཨོཀིརེཡྻ, བྷབྦོ ནུ ཁོ སོ པུརིསོ མཧནྟཾ ཨགྒིཀྑནྡྷཾ ནིབྦཱཔེཏུནྟི། ཨེཝཾ བྷནྟེ’’ཏི (སཾ॰ ནི॰ ༥.༢༣༤)།

    ‘‘Yasmiñca kho, bhikkhave, samaye uddhataṃ cittaṃ hoti, kālo tasmiṃ samaye passaddhisambojjhaṅgassa bhāvanāya, kālo samādhisambojjhaṅgassa bhāvanāya, kālo upekkhāsambojjhaṅgassa bhāvanāya. Taṃ kissa hetu? Uddhataṃ, bhikkhave, cittaṃ taṃ etehi dhammehi suvūpasamayaṃ hoti. Seyyathāpi, bhikkhave, puriso mahantaṃ aggikkhandhaṃ nibbāpetukāmo assa, so tattha allāni ceva tiṇāni…pe… paṃsukena ca okireyya, bhabbo nu kho so puriso mahantaṃ aggikkhandhaṃ nibbāpetunti. Evaṃ bhante’’ti (saṃ. ni. 5.234).

    ཨེཏྠཱཔི ཡཐཱསཀཾ ཨཱཧཱརཝསེན པསྶདྡྷིསམྦོཛ྄ཛྷངྒཱདཱིནཾ བྷཱཝནཱསམུཊྛཱཔནཱཏི ཝེདིཏབྦཱ, ཏཏྠ པསྶདྡྷིསམྦོཛ྄ཛྷངྒསྶ བྷཱཝནཱ ཝུཏྟཱ ཨེཝ། སམཱདྷིསམྦོཛ྄ཛྷངྒསྶ ཨནནྟརཾ ཝཀྑཏི། པཉྙཱཔཡོགམནྡཏཱཡཱཏི པཉྙཱབྱཱཔཱརསྶ ཨཔྤབྷཱཝེན། ཡཐཱ ཧི དཱནཾ ཨལོབྷཔདྷཱནཾ, སཱིལཾ ཨདོསཔདྷཱནཾ, ཨེཝཾ བྷཱཝནཱ ཨམོཧཔདྷཱནཱ། ཏཏྠ ཡདཱ པཉྙཱ ན བལཝཏཱི ཧོཏི, ཏདཱ བྷཱཝནཱ པུབྦེནཱཔརཾ ཝིསེསཱཝཧཱ ན ཧོཏི, ཨནབྷིསངྑཏོ ཝིཡ ཨཱཧཱརོ པུརིསསྶ ཡོགིནོ ཙིཏྟསྶ ཨབྷིརུཙིཾ ན ཛནེཏི, ཏེན ཏཾ ནིརསྶཱདཾ ཧོཏི, ཏཐཱ བྷཱཝནཱཡ སམྨདེཝ ཨཝཱིཐིཔཊིཔཏྟིཡཱ ཨུཔསམསུཁཾ ན ཝིནྡཏི, ཏེནཱཔི ཙིཏྟཾ ནིརསྶཱདཾ ཧོཏི། ཏེན ཝུཏྟཾ ‘‘པཉྙཱཔཡོག…པེ॰… ནིརསྶཱདཾ ཧོཏཱི’’ཏི། ཏསྶ སཾཝེགུཔྤཱདནཾ, པསཱདུཔྤཱདནཉྩ ཏིཀིཙྪནནྟི ཏཾ དསྶེནྟོ ‘‘ཨཊྛ སཾཝེགཝཏྠཱུནཱི’’ཏིཨཱདིམཱཧ། ཏཏྠ ཛཱཏིཛརཱབྱཱདྷིམརཎཱནི ཡཐཱརཧཾ སུགཏིཡཾ, དུགྒཏིཡཉྩ ཧོནྟཱིཏི ཏདཉྙམེཝ པཉྩཝིདྷབནྡྷནཱདིཁུཔྤིཔཱསཱདི ཨཉྙམཉྙཾ ཝིབཱདྷནཱདིཧེཏུཀཾ ཨཔཱཡདུཀྑཾ དཊྛབྦཾ, ཏཡིདཾ སབྦཾ ཏེསཾ ཏེསཾ སཏྟཱནཾ པཙྩུཔྤནྣབྷཝནིསྶིཏཾ གཧིཏནྟི ཨཏཱིཏེ ཨནཱགཏེ ཙ ཀཱལེ ཝཊྚམཱུལཀདུཀྑཱནི ཝིསུཾ གཧིཏཱནི། ཡེ པན སཏྟཱ ཨཱཧཱརཱུཔཛཱིཝིནོ, ཏཏྠ ཙ ཨུཊྛཱནཕལཱུཔཛཱིཝིནོ, ཏེསཾ ཨཉྙེཧི ཨསཱདྷཱརཎཾ ཛཱིཝིཀཱདུཀྑཾ ཨཊྛམཾ སཾཝེགཝཏྠུ གཧིཏནྟི དཊྛབྦཾ། ཨཡཾ ཝུཙྩཏི སམཡེ སམྤཧཾསནཱཏི ཨཡཾ བྷཱཝནཱཙིཏྟསྶ སམྤཧཾསིཏབྦསམཡེ ཝུཏྟནཡེན སཾཝེགཛནནཝསེན ཙེཝ པསཱདུཔྤཱདནཝསེན ཙ སམྨདེཝ པཧཾསནཱ, སཾཝེགཛནནཔུབྦཀཔསཱདུཔྤཱདནེན ཏོསནཱཏི ཨཏྠོ།

    Etthāpi yathāsakaṃ āhāravasena passaddhisambojjhaṅgādīnaṃ bhāvanāsamuṭṭhāpanāti veditabbā, tattha passaddhisambojjhaṅgassa bhāvanā vuttā eva. Samādhisambojjhaṅgassa anantaraṃ vakkhati. Paññāpayogamandatāyāti paññābyāpārassa appabhāvena. Yathā hi dānaṃ alobhapadhānaṃ, sīlaṃ adosapadhānaṃ, evaṃ bhāvanā amohapadhānā. Tattha yadā paññā na balavatī hoti, tadā bhāvanā pubbenāparaṃ visesāvahā na hoti, anabhisaṅkhato viya āhāro purisassa yogino cittassa abhiruciṃ na janeti, tena taṃ nirassādaṃ hoti, tathā bhāvanāya sammadeva avīthipaṭipattiyā upasamasukhaṃ na vindati, tenāpi cittaṃ nirassādaṃ hoti. Tena vuttaṃ ‘‘paññāpayoga…pe… nirassādaṃ hotī’’ti. Tassa saṃveguppādanaṃ, pasāduppādanañca tikicchananti taṃ dassento ‘‘aṭṭha saṃvegavatthūnī’’tiādimāha. Tattha jātijarābyādhimaraṇāni yathārahaṃ sugatiyaṃ, duggatiyañca hontīti tadaññameva pañcavidhabandhanādikhuppipāsādi aññamaññaṃ vibādhanādihetukaṃ apāyadukkhaṃ daṭṭhabbaṃ, tayidaṃ sabbaṃ tesaṃ tesaṃ sattānaṃ paccuppannabhavanissitaṃ gahitanti atīte anāgate ca kāle vaṭṭamūlakadukkhāni visuṃ gahitāni. Ye pana sattā āhārūpajīvino, tattha ca uṭṭhānaphalūpajīvino, tesaṃ aññehi asādhāraṇaṃ jīvikādukkhaṃ aṭṭhamaṃ saṃvegavatthu gahitanti daṭṭhabbaṃ. Ayaṃ vuccati samaye sampahaṃsanāti ayaṃ bhāvanācittassa sampahaṃsitabbasamaye vuttanayena saṃvegajananavasena ceva pasāduppādanavasena ca sammadeva pahaṃsanā, saṃvegajananapubbakapasāduppādanena tosanāti attho.

    སམྨཱཔཊིཔཏྟིཾ ཨཱགམྨཱཏི ལཱིནུདྡྷཙྩཝིརཧེན, སམཐཝཱིཐིཔཊིཔཏྟིཡཱ ཙ སམྨཱ ཨཝིསམཾ སམྨདེཝ བྷཱཝནཱཔཊིཔཏྟིཾ ཨཱགམྨ། ‘‘ཨལཱིན’’ནྟིཨཱདཱིསུ ཀོསཛྫཔཀྑིཀཱནཾ དྷམྨཱནཾ ཨནདྷིམཏྟཏཱཡ ཨལཱིནཾ, ཨུདྡྷཙྩཔཀྑིཀཱནཾ ཨནདྷིམཏྟཏཱཡ ཨནུདྡྷཏཾ, པཉྙཱཔཡོགསམྤཏྟིཡཱ, ཨུཔསམསུཁཱདྷིགམེན ཙ ཨནིརསྶཱདཾ, ཏཏོ ཨེཝ ཨཱརམྨཎེ སམཔྤཝཏྟཾ སམཐཝཱིཐིཔཊིཔནྣཾ། ཏཏྠ ཨལཱིནཏཱཡ པགྒཧེ, ཨནུདྡྷཏཏཱཡ ནིགྒཧེ, ཨནིརསྶཱདཏཱཡ སམྤཧཾསནེ ན བྱཱཔཱརཾ ཨཱཔཛྫཏི། ཨལཱིནཱནུདྡྷཏཏཱ ཧི ཨཱརམྨཎེ སམཔྤཝཏྟཾ, ཨནིརསྶཱདཏཱཡ སམཐཝཱིཐིཔཊིཔནྣཾ, སམཔྤཝཏྟིཡཱ ཝཱ ཨལཱིནཾ ཨནུདྡྷཏཾ། སམཐཝཱིཐིཔཊིཔཏྟིཡཱ ཨནིརསྶཱདནྟི དཊྛབྦཾ། ཨཡཾ ཝུཙྩཏི སམཡེ ཨཛ྄ཛྷུཔེཀྑནཏཱཏི ཨཡཾ ཨཛ྄ཛྷུཔེཀྑིཏབྦསམཡེ བྷཱཝནཱཙིཏྟསྶ པགྒཧནིགྒཧསམྤཧཾསནེསུ ཨབྱཱཝཊཏཱསངྑཱཏཾ པཊིཔཀྑཾ ཨབྷིབྷུཡྻ པེཀྑནཱ ཝུཙྩཏི། པཊིཔཀྑཝིཀྑམྦྷནཏོ, ཝིཔསྶནཱཡ ཨདྷིཊྛཱནབྷཱཝཱུཔགམནཏོ ཙ ཨུཔཙཱརཛ྄ཛྷཱནམྤི སམཱདྷཱན ཀིཙྩནིཔྥཏྟིཡཱ པུགྒལསྶ སམཱཧིཏབྷཱཝསཱདྷནཾ ཨེཝཱཏི ཏཏྠ སམདྷུརབྷཱཝེནཱཧ ‘‘ཨུཔཙཱརཾ ཝཱ ཨཔྤནཾ ཝཱ’’ཏི།

    Sammāpaṭipattiṃ āgammāti līnuddhaccavirahena, samathavīthipaṭipattiyā ca sammā avisamaṃ sammadeva bhāvanāpaṭipattiṃ āgamma. ‘‘Alīna’’ntiādīsu kosajjapakkhikānaṃ dhammānaṃ anadhimattatāya alīnaṃ, uddhaccapakkhikānaṃ anadhimattatāya anuddhataṃ, paññāpayogasampattiyā, upasamasukhādhigamena ca anirassādaṃ, tato eva ārammaṇe samappavattaṃsamathavīthipaṭipannaṃ. Tattha alīnatāya paggahe, anuddhatatāya niggahe, anirassādatāya sampahaṃsane na byāpāraṃ āpajjati. Alīnānuddhatatā hi ārammaṇe samappavattaṃ, anirassādatāya samathavīthipaṭipannaṃ, samappavattiyā vā alīnaṃ anuddhataṃ. Samathavīthipaṭipattiyā anirassādanti daṭṭhabbaṃ. Ayaṃ vuccati samaye ajjhupekkhanatāti ayaṃ ajjhupekkhitabbasamaye bhāvanācittassa paggahaniggahasampahaṃsanesu abyāvaṭatāsaṅkhātaṃ paṭipakkhaṃ abhibhuyya pekkhanā vuccati. Paṭipakkhavikkhambhanato, vipassanāya adhiṭṭhānabhāvūpagamanato ca upacārajjhānampi samādhāna kiccanipphattiyā puggalassa samāhitabhāvasādhanaṃ evāti tattha samadhurabhāvenāha ‘‘upacāraṃ vā appanaṃ vā’’ti.

    ཨུཔེཀྑཱསམྦོཛ྄ཛྷངྒཊྛཱནཱིཡཱ དྷམྨཱཏི ཨེཏྠ ཡཾ ཝཏྟབྦཾ, ཏཾ ཧེཊྛཱ ཝུཏྟནཡཱནུསཱརེན ཝེདིཏབྦཾ། ཨནུརོདྷཝིརོདྷཝིཔྤཧཱནཝསེན མཛ྄ཛྷཏྟབྷཱཝོ ཨུཔེཀྑཱསམྦོཛ྄ཛྷངྒསྶ ཀཱརཎཾ ཏསྨིཾ སཏི སིཛ྄ཛྷནཏོ, ཨསཏི ཙ ཨསིཛ྄ཛྷནཏོ། སོ ཙ མཛ྄ཛྷཏྟབྷཱཝོ ཝིསཡཝསེན དུཝིདྷོཏི ཨཱཧ ‘‘སཏྟམཛ྄ཛྷཏྟཏཱ སངྑཱརམཛ྄ཛྷཏྟཏཱ’’ཏི། ཏདུབྷཡེ ཙ ཝིརུཛ྄ཛྷནཾ པསྶདྡྷིསམྦོཛ྄ཛྷངྒབྷཱཝནཱཡ ཨེཝ དཱུརཱིཀཏནྟི ཨནུརུཛ྄ཛྷནསྶེཝ པཧཱནཝིདྷིཾ དསྶེཏུཾ ‘‘སཏྟམཛ྄ཛྷཏྟཏཱ’’ཏིཨཱདི ཝུཏྟཾ། ཏེནཱཧ ‘‘སཏྟསངྑཱརཀེལཱཡནཔུགྒལཔརིཝཛྫནཏཱ’’ཏི། ཨུཔེཀྑཱཡ ཧི ཝིསེསཏོ རཱགོ པཊིཔཀྑོ། ཏཐཱ ཙཱཧ ‘‘ཨུཔེཀྑཱ རཱགབཧུལསྶ ཝིསུདྡྷིམགྒོ’’ཏི (ཝིསུདྡྷི॰ ༡.༢༦༧)། དྭཱིཧཱཀཱརེཧཱིཏི ཀམྨསྶཀཏཱཔཙྩཝེཀྑཎཾ, ཨཏྟསུཉྙཏཱཔཙྩཝེཀྑཎནྟི ཨིམེཧི དྭཱིཧི ཀཱརཎེཧི། དྭཱིཧེཝཱཏི ཨཝདྷཱརཎཾ སངྑྱཱསམཱནཏཱདསྶནཏྠཾ། སངྑྱཱ ཨེཝེཏྠ སམཱནཱ, ན སངྑྱེཡྻཾ སབྦཐཱ སམཱནནྟི། ཨསྶཱམིཀབྷཱཝོ ཨནཏྟནིཡཏཱ། སཏི ཧི ཨཏྟནི ཏསྶ ཀིཉྩནབྷཱཝེན ཙཱིཝརཾ, ཨཉྙཾ ཝཱ ཀིཉྩི ཨཏྟནིཡཾ ནཱམ སིཡཱ, སོ པན ཀོཙི ནཏྠེཝཱཏི ཨདྷིཔྤཱཡོ། ཨནདྡྷནིཡནྟི ན ཨདྡྷཱནཀྑམཾ ན ཙིརཊྛཱཡི, ཨིཏྟརཾ ཨནིཙྩནྟི ཨཏྠོ། ཏཱཝཀཱལིཀནྟི ཏསྶེཝ ཝེཝཙནཾ།

    Upekkhāsambojjhaṅgaṭṭhānīyā dhammāti ettha yaṃ vattabbaṃ, taṃ heṭṭhā vuttanayānusārena veditabbaṃ. Anurodhavirodhavippahānavasena majjhattabhāvo upekkhāsambojjhaṅgassa kāraṇaṃ tasmiṃ sati sijjhanato, asati ca asijjhanato. So ca majjhattabhāvo visayavasena duvidhoti āha ‘‘sattamajjhattatā saṅkhāramajjhattatā’’ti. Tadubhaye ca virujjhanaṃ passaddhisambojjhaṅgabhāvanāya eva dūrīkatanti anurujjhanasseva pahānavidhiṃ dassetuṃ ‘‘sattamajjhattatā’’tiādi vuttaṃ. Tenāha ‘‘sattasaṅkhārakelāyanapuggalaparivajjanatā’’ti. Upekkhāya hi visesato rāgo paṭipakkho. Tathā cāha ‘‘upekkhā rāgabahulassa visuddhimaggo’’ti (visuddhi. 1.267). Dvīhākārehīti kammassakatāpaccavekkhaṇaṃ, attasuññatāpaccavekkhaṇanti imehi dvīhi kāraṇehi. Dvīhevāti avadhāraṇaṃ saṅkhyāsamānatādassanatthaṃ. Saṅkhyā evettha samānā, na saṅkhyeyyaṃ sabbathā samānanti. Assāmikabhāvo anattaniyatā. Sati hi attani tassa kiñcanabhāvena cīvaraṃ, aññaṃ vā kiñci attaniyaṃ nāma siyā, so pana koci natthevāti adhippāyo. Anaddhaniyanti na addhānakkhamaṃ na ciraṭṭhāyi, ittaraṃ aniccanti attho. Tāvakālikanti tasseva vevacanaṃ.

    མམཱཡཏཱིཏི མམཏྟཾ ཀརོཏི ‘‘མམཱ’’ཏི ཏཎྷཱཡ པརིགྒཡ྄ཧ ཏིཊྛཏི།

    Mamāyatīti mamattaṃ karoti ‘‘mamā’’ti taṇhāya pariggayha tiṭṭhati.

    མམཱཡནྟཱཏི མཱནཾ དབྦཾ ཀརོནྟཱ།

    Mamāyantāti mānaṃ dabbaṃ karontā.

    ཨཡཾ སཏིཔཊྛཱནདེསནཱ པུབྦབྷཱགམགྒཝསེན དེསིཏཱཏི པུབྦབྷཱགིཡབོཛ྄ཛྷངྒེ སནྡྷཱཡཱཧ ‘‘བོཛ྄ཛྷངྒཔརིགྒཱཧིཀཱ སཏི དུཀྑསཙྩ’’ནྟི། སེསཾ ཝུཏྟནཡཏྟཱ སུཝིཉྙེཡྻམེཝ།

    Ayaṃ satipaṭṭhānadesanā pubbabhāgamaggavasena desitāti pubbabhāgiyabojjhaṅge sandhāyāha ‘‘bojjhaṅgapariggāhikā sati dukkhasacca’’nti. Sesaṃ vuttanayattā suviññeyyameva.

    བོཛ྄ཛྷངྒཔབྦཝཎྞནཱ ནིཊྛིཏཱ།

    Bojjhaṅgapabbavaṇṇanā niṭṭhitā.

    པཋམབྷཱཎཝཱརཝཎྞནཱ ནིཊྛིཏཱ།

    Paṭhamabhāṇavāravaṇṇanā niṭṭhitā.

    ཙཏུསཙྩཔབྦཝཎྞནཱ

    Catusaccapabbavaṇṇanā

    ༣༨༦. ཡཐཱསབྷཱཝཏོཏི ཨཝིཔརཱིཏསབྷཱཝཏོ། བཱདྷནཀྑཎཏོ ཡོ ཡོ ཝཱ སབྷཱཝོ ཡཐཱསབྷཱཝོ, ཏཏོ, རུཔྤནཱདི ཀཀྑལཱ༹དིསབྷཱཝཏོཏི ཨཏྠོ། ཛནིཀཾ སམུཊྛཱཔིཀནྟི པཝཏྟལཀྑཎསྶ དུཀྑསྶ ཛནིཀཾ ནིམིཏྟལཀྑཎསྶ སམུཊྛཱཔིཀཾ། པུརིམཏཎྷནྟི ཡཐཱཔརིགྒཧིཏསྶ དུཀྑསྶ ནིབྦཏྟིཏོ པུརེཏརཾ སིདྡྷཾ ཏཎྷཾ། སིདྡྷེ ཧི ཀཱརཎེ ཏསྶ ཕལུཔྤཏྟི། ཨཡཾ དུཀྑསམུདཡོཏི པཛཱནཱཏཱིཏི ཡོཛནཱ། ཨཡཾ དུཀྑནིརོདྷོཏི ཨེཏྠཱཔི ཨེསེཝ ནཡོ། ཨུབྷིནྣཾ ཨཔྤཝཏྟིནྟི དུཀྑཾ, སམུདཡོ ཙཱཏི དྭིནྣཾ ཨཔྤཝཏྟིནིམིཏྟཾ, ཏདུབྷཡཾ ན པཝཏྟི ཨེཏཱཡཱཏི ཨཔྤཝཏྟི, ཨསངྑཏཱ དྷཱཏུ། དུཀྑཾ དུཀྑསཙྩཾ པརིཛཱནཱཏི པརིཉྙཱབྷིསམཡཝསེན པརིཙྪིནྡཏཱིཏི དུཀྑཔརིཛཱནནོ, ཨརིཡམགྒོ, ཏཾ དུཀྑཔརིཛཱནནཾ། སེསཔདདྭཡེཔི ཨིམིནཱ ནཡེན ཨཏྠོ ཝེདིཏབྦོ།

    386.Yathāsabhāvatoti aviparītasabhāvato. Bādhanakkhaṇato yo yo vā sabhāvo yathāsabhāvo, tato, ruppanādi kakkhaḷādisabhāvatoti attho. Janikaṃ samuṭṭhāpikanti pavattalakkhaṇassa dukkhassa janikaṃ nimittalakkhaṇassa samuṭṭhāpikaṃ. Purimataṇhanti yathāpariggahitassa dukkhassa nibbattito puretaraṃ siddhaṃ taṇhaṃ. Siddhe hi kāraṇe tassa phaluppatti. Ayaṃ dukkhasamudayoti pajānātīti yojanā. Ayaṃ dukkhanirodhoti etthāpi eseva nayo. Ubhinnaṃ appavattinti dukkhaṃ, samudayo cāti dvinnaṃ appavattinimittaṃ, tadubhayaṃ na pavatti etāyāti appavatti, asaṅkhatā dhātu. Dukkhaṃ dukkhasaccaṃ parijānāti pariññābhisamayavasena paricchindatīti dukkhaparijānano, ariyamaggo, taṃ dukkhaparijānanaṃ. Sesapadadvayepi iminā nayena attho veditabbo.

    དུཀྑསཙྩནིདྡེསཝཎྞནཱ

    Dukkhasaccaniddesavaṇṇanā

    ༣༨༨. ཨེཝཾ ཝུཏྟཱཏི ཨེཝཾ ཨུདྡེསཝསེན ཝུཏྟཱ། སབྦསཏྟཱནཾ པརིཡཱདཱནཝཙནཾ བྱཱཔནིཙྪཱཝསེན ཨཱམེཌིཏནིདྡེསབྷཱཝཏོ། སཏྟནིཀཱཡེཏི སཏྟཱནཾ ནིཀཱཡེ, སཏྟགྷཊེ སཏྟསམཱུཧེཏི ཨཏྠོ། དེཝམནུསྶཱདིབྷེདཱསུ ཧི གཏཱིསུ བྷུམྨདེཝཱདིཁཏྟིཡཱདིཧཏྠིཨཱདིཁུཔྤིཔཱསིཀཱདིཏཾཏཾཛཱཏིཝིསིཊྛོ སཏྟསམཱུཧོ སཏྟནིཀཱཡོ། ནིཔྤརིཡཱཡཏོ ཁནྡྷཱནཾ པཋམཱབྷིནིབྦཏྟི ཛཱཏཱིཏི ཀཏྭཱ ‘‘ཛནནཾ ཛཱཏཱི’’ཏི ཝཏྭཱ སྭཱཡཾ ཨུཔྤཱདཝིཀཱརོ ཨཔརིནིཔྥནྣོ ཡེསུ ཁནྡྷེསུ ཨིཙྪིཏབྦོ, ཏེ ཏེནེཝ སདྡྷིཾ དསྶེཏུཾ ‘‘སཝིཀཱརཱན’’ནྟིཨཱདི ཝུཏྟཾ། སཝིཀཱརཱནནྟི ཨུཔྤཱདསངྑཱཏེན ཝིཀཱརེན སཝིཀཱརཱནཾ། ཛཱཏིཨཱདཱིནི ཧི ཏཱིཎི ལཀྑཎཱནི དྷམྨཱནཾ ཝིཀཱརཝིསེསཱཏི། ‘‘ཨུཔསགྒམཎྜིཏཝེཝཙན’’ནྟི ཨིམིནཱ ཀེཝལཾ ཨུཔསགྒེན པདཝཌྜྷནཾ ཀཏནྟི དསྶེཏི། ཨནུཔཝིཊྛཱཀཱརེནཱཏི ཨཎྜཀོསཾ, ཝཏྠིཀོསཉྩ ཨོགཱཧནཱཀཱརེན། ནིབྦཏྟིསངྑཱཏེནཱཏི ཨཱཡཏནཱནཾ པཱརིཔཱུརིསཾསིདྡྷིསངྑཱཏེན།

    388.Evaṃ vuttāti evaṃ uddesavasena vuttā. Sabbasattānaṃ pariyādānavacanaṃ byāpanicchāvasena āmeḍitaniddesabhāvato. Sattanikāyeti sattānaṃ nikāye, sattaghaṭe sattasamūheti attho. Devamanussādibhedāsu hi gatīsu bhummadevādikhattiyādihatthiādikhuppipāsikāditaṃtaṃjātivisiṭṭho sattasamūho sattanikāyo. Nippariyāyato khandhānaṃ paṭhamābhinibbatti jātīti katvā ‘‘jananaṃ jātī’’ti vatvā svāyaṃ uppādavikāro aparinipphanno yesu khandhesu icchitabbo, te teneva saddhiṃ dassetuṃ ‘‘savikārāna’’ntiādi vuttaṃ. Savikārānanti uppādasaṅkhātena vikārena savikārānaṃ. Jātiādīni hi tīṇi lakkhaṇāni dhammānaṃ vikāravisesāti. ‘‘Upasaggamaṇḍitavevacana’’nti iminā kevalaṃ upasaggena padavaḍḍhanaṃ katanti dasseti. Anupaviṭṭhākārenāti aṇḍakosaṃ, vatthikosañca ogāhanākārena. Nibbattisaṅkhātenāti āyatanānaṃ pāripūrisaṃsiddhisaṅkhātena.

    ཨཐ ཝཱ ཛནནཾ ཛཱཏཱིཏི ཨཔརིཔུཎྞཱཡཏནཾ ཛཱཏིམཱཧ། སཉྫཱཏཱིཏི སམྤུཎྞཱཡཏནཾ། སམྤུཎྞཱ ཧི ཛཱཏི སཉྫཱཏི། ཨོཀྐམནཊྛེན ཨོཀྐནྟཱིཏི ཨཎྜཛཛལཱབུཛཝསེན ཛཱཏི། ཏེ ཧི ཨཎྜཀོསཾ, ཝཏྠིཀོསཉྩ ཨོཀྐམནྟཱ པཝིསནྟཱ ཝིཡ པཊིསནྡྷིཾ གཎྷནྟི། ཨབྷིནིབྦཏྟནཊྛེན ཨབྷིནིབྦཏྟཱིཏི སཾསེདཛཨོཔཔཱཏིཀཝསེན། ཏེ ཧི པཱཀཊཱ ཨེཝ ཧུཏྭཱ ནིབྦཏྟནྟི། ཨབྷིབྱཏྟཱ ནིབྦཏྟི ཨབྷིནིབྦཏྟི། ‘‘ཛནནཾ ཛཱཏཱི’’ཏིཨཱདི ཨཱཡཏནཝསེན, ཡོནིཝསེན ཙ དྭཱིཧི དྭཱིཧི པདེཧི སབྦསཏྟེ པརིཡཱདིཡིཏྭཱ ཛཱཏིཾ དསྶེཏུཾ ཝུཏྟཾ། ‘‘ཏེསཾ ཏེསཾ སཏྟཱནཾ…པེ॰… ཨབྷིནིབྦཏྟཱི’’ཏི སཏྟཝསེན ཝུཏྟཏྟཱ སམྨུཏིཀཐཱ། པཱཏུབྷཱཝོཏི ཨེཏྠ ཨིཏི-སདྡོ ཨཱདིཨཏྠོ, པཀཱརཏྠོ ཝཱ, ཏེན ‘‘ཨཱཡཏནཱནཾ པཊིལཱབྷོ’’ཏི ཨིམསྶ པདསྶ སངྒཧོ དཊྛབྦོ། ཨཡམྤི ཧི པརམཏྠཀཐཱཏི། ཨེཀཝོཀཱརབྷཝཱདཱིསཱུཏི ཨེཀཙཏུཔཉྩཝོཀཱརབྷཝེསུ། ཏསྨིཾ ཁནྡྷཱནཾ པཱཏུབྷཱཝེ སཏི། ཨཱཡཏནཱནཾ པཊིལཱབྷོཏི ཨེཀཙཏུཝོཀཱརབྷཝེསུ དྭིནྣཾ དྭིནྣཾ ཨཱཡཏནཱནཾ ཝསེན, སེསེསུ རཱུཔདྷཱཏུཡཾ པཊིསནྡྷིཀྑཎེ ཨུཔྤཛྫམཱནཱནཾ པཉྩནྣཾ, ཀཱམདྷཱཏུཡཾ ཝིཀལཱཝིཀལིནྡྲིཡཱནཾ ཝསེན སཏྟནྣཾ, ནཝནྣཾ, དསནྣཾ, པུནདསནྣཾ, ཨེཀཱདསནྣཉྩ ཨཱཡཏནཱནཾ ཝསེན སངྒཧོ དཊྛབྦོ། པཱཏུབྷཝནྟཱནེཝ, ན ཀུཏོཙི ཨཱགཏཱནི། པཊིལདྡྷཱནི ནཱམ ཧོནྟི སཏྟསནྟཱནསྶ ཏསྶ སཾཝིཛྫམཱནཏྟཱ། ཨཱཡཏནཱནཾ པཊིལཱབྷོཏི ཝཱ ཨཱཡཏནཱནཾ ཨཏྟལཱབྷོ ཝེདིཏབྦོ།

    Atha vā jananaṃ jātīti aparipuṇṇāyatanaṃ jātimāha. Sañjātīti sampuṇṇāyatanaṃ. Sampuṇṇā hi jāti sañjāti. Okkamanaṭṭhena okkantīti aṇḍajajalābujavasena jāti. Te hi aṇḍakosaṃ, vatthikosañca okkamantā pavisantā viya paṭisandhiṃ gaṇhanti. Abhinibbattanaṭṭhena abhinibbattīti saṃsedajaopapātikavasena. Te hi pākaṭā eva hutvā nibbattanti. Abhibyattā nibbatti abhinibbatti. ‘‘Jananaṃ jātī’’tiādi āyatanavasena, yonivasena ca dvīhi dvīhi padehi sabbasatte pariyādiyitvā jātiṃ dassetuṃ vuttaṃ. ‘‘Tesaṃ tesaṃ sattānaṃ…pe… abhinibbattī’’ti sattavasena vuttattā sammutikathā. Pātubhāvoti ettha iti-saddo ādiattho, pakārattho vā, tena ‘‘āyatanānaṃ paṭilābho’’ti imassa padassa saṅgaho daṭṭhabbo. Ayampi hi paramatthakathāti. Ekavokārabhavādīsūti ekacatupañcavokārabhavesu. Tasmiṃ khandhānaṃ pātubhāve sati. Āyatanānaṃ paṭilābhoti ekacatuvokārabhavesu dvinnaṃ dvinnaṃ āyatanānaṃ vasena, sesesu rūpadhātuyaṃ paṭisandhikkhaṇe uppajjamānānaṃ pañcannaṃ, kāmadhātuyaṃ vikalāvikalindriyānaṃ vasena sattannaṃ, navannaṃ, dasannaṃ, punadasannaṃ, ekādasannañca āyatanānaṃ vasena saṅgaho daṭṭhabbo. Pātubhavantāneva, na kutoci āgatāni. Paṭiladdhāni nāma honti sattasantānassa tassa saṃvijjamānattā. Āyatanānaṃ paṭilābhoti vā āyatanānaṃ attalābho veditabbo.

    ༣༨༩. སབྷཱཝནིདྡེསོཏི སརཱུཔནིདྡེསོ། སརཱུཔཉྷེཏཾ ཛིཎྞཏཱཡ, ཡདིདཾ ‘‘ཛརཱ’’ཏི, ‘‘ཝཡོཧཱནཱིཏི ཝཱ། ཛཱིརཎམེཝ ཛཱིརཎཏཱ, ཛཱིརནྟསྶ ཝཱ ཨཱཀཱརོ ཏཱ-སདྡེན ཝུཏྟོཏི ཨཱཧ ‘‘ཨཱཀཱརབྷཱཝནིདྡེསོ’’ཏི། ཁཎྜིཏདནྟཱ ཁཎྜིཏཱ ནཱམ ཨུཏྟརཔདལོཔེན། ཡསྶ ཝིཀཱརསྶ ཝསེན སཏྟོ ‘‘ཁཎྜིཏོ’’ཏི ཝུཙྩཏི, ཏཾ ཁཎྜིཙྩཾ། ཏཐཱ པལིཏཱནི ཨསྶ སནྟཱིཏི ‘‘པལིཏོ’’ཏི ཝུཙྩཏི, ཏཾ པཱལིཙྩཾ། ཝལིཏྟཙཏཱཡ ཝཱ ཝལི ཏཙོ ཨསྶཱཏི ཝལིཏྟཙོ།

    389.Sabhāvaniddesoti sarūpaniddeso. Sarūpañhetaṃ jiṇṇatāya, yadidaṃ ‘‘jarā’’ti, ‘‘vayohānīti vā. Jīraṇameva jīraṇatā, jīrantassa vā ākāro tā-saddena vuttoti āha ‘‘ākārabhāvaniddeso’’ti. Khaṇḍitadantā khaṇḍitā nāma uttarapadalopena. Yassa vikārassa vasena satto ‘‘khaṇḍito’’ti vuccati, taṃ khaṇḍiccaṃ. Tathā palitāni assa santīti ‘‘palito’’ti vuccati, taṃ pāliccaṃ. Valittacatāya vā vali taco assāti valittaco.

    ཕལཱུཔཙཱརེནཱཏི ཕལཝོཧཱརེན།

    Phalūpacārenāti phalavohārena.

    ༣༩༠. ཙཝནམེཝ ཙཝནཏཱ, ཙཝནྟསྶ ཝཱ ཨཱཀཱརོ ཏཱ-སདྡེན ཝུཏྟོ། ཁནྡྷཱ བྷིཛྫནྟཱིཏི ཨེཀབྷཝཔརིཡཱཔནྣསྶ ཁནྡྷསནྟཱནསྶ པརིཡོསཱནབྷཱུཏཱ ཁནྡྷཱ བྷིཛྫནྟི, ཏེནེཝ བྷེདེན ནིརོདྷནཾ ཨདསྶནཾ གཙྪནྟི, ཏསྨཱ བྷེདོ ཨནྟརདྷཱནཾ མརཎཾ། མཙྩུམརཎནྟི མཙྩུསངྑཱཏཾ ཨེཀབྷཝཔརིཡཱཔནྣཛཱིཝིཏིནྡྲིཡུཔཙྪེདབྷཱུཏཾ མརཎཾ། ཏེནཱཧ ‘‘ན ཁཎིཀམརཎ’’ནྟི། ‘‘མཙྩུ མརཎ’’ནྟི སམཱསཾ ཨཀཏྭཱ ཡོ ‘‘མཙྩཱུ’’ཏི ཝུཙྩཏི བྷེདོ, ཡཉྩ མརཎཾ པཱཎཙཱགོ, ཨིདཾ ཝུཙྩཏི མརཎནྟི ཝིསུཾ སམྦནྡྷོ ན ན ཡུཛྫཏི། ཀཱལཀིརིཡཱཏི མརཎཀཱལོ, ཨནཏིཀྐམནཱིཡཏྟཱ ཝིསེསེན ‘‘ཀཱལོ’’ཏི ཝུཏྟོཏི ཏསྶ ཀིརིཡཱ, ཨཏྠཏོ ཙུཏིཁནྡྷཱནཾ བྷེདཔྤཏྟིཡེཝ, ཀཱལསྶ ཝཱ ཨནྟཀསྶ ཀིརིཡཱཏི ཡཱ ལོཀེ ཝུཙྩཏི, སཱ ཙུཏི, མརཎནྟི ཨཏྠོ། ཨཡཾ སབྦཱཔི སམྨུཏིཀཐཱཝ ‘‘ཡཾ ཏེསཾ ཏེསཾ སཏྟཱན’’ནྟིཨཱདིནཱ སཏྟཝསེན ཝུཏྟཏྟཱ། ཨཡཾ པརམཏྠཀཐཱ པརམཏྠཏོ ལབྦྷམཱནཱནཾ རུཔྤནཱདིསབྷཱཝཱནཾ དྷམྨཱནཾ ཝིནསྶནཛོཏནཱབྷཱཝཏོ།

    390. Cavanameva cavanatā, cavantassa vā ākāro tā-saddena vutto. Khandhā bhijjantīti ekabhavapariyāpannassa khandhasantānassa pariyosānabhūtā khandhā bhijjanti, teneva bhedena nirodhanaṃ adassanaṃ gacchanti, tasmā bhedo antaradhānaṃ maraṇaṃ. Maccumaraṇanti maccusaṅkhātaṃ ekabhavapariyāpannajīvitindriyupacchedabhūtaṃ maraṇaṃ. Tenāha ‘‘na khaṇikamaraṇa’’nti. ‘‘Maccu maraṇa’’nti samāsaṃ akatvā yo ‘‘maccū’’ti vuccati bhedo, yañca maraṇaṃ pāṇacāgo, idaṃ vuccati maraṇanti visuṃ sambandho na na yujjati. Kālakiriyāti maraṇakālo, anatikkamanīyattā visesena ‘‘kālo’’ti vuttoti tassa kiriyā, atthato cutikhandhānaṃ bhedappattiyeva, kālassa vā antakassa kiriyāti yā loke vuccati, sā cuti, maraṇanti attho. Ayaṃ sabbāpi sammutikathāva ‘‘yaṃ tesaṃ tesaṃ sattāna’’ntiādinā sattavasena vuttattā. Ayaṃ paramatthakathā paramatthato labbhamānānaṃ ruppanādisabhāvānaṃ dhammānaṃ vinassanajotanābhāvato.

    ཨཏྟཱཏི བྷཝཏི ཨེཏྠ ཙིཏྟནྟི ཨཏྟབྷཱཝོ, ཁནྡྷསམཱུཧོ, ཏསྶ ནིཀྑེཔོ ནིཀྑིཔནཾ, པཱཏནཾ ཝིནཱསོཏི ཨཏྠོ། ཨཊྛཀཐཱཡཾཔན ‘‘མརཎཾ པཏྟསྶཱ’’ཏིཨཱདིནཱ ནིཀྑེཔཧེཏུཏཱཡ པཏནཾ ‘‘ནིཀྑེཔོ’’ཏི ཕལཱུཔཙཱརེན ཝུཏྟནྟི དསྶེཏི། ‘‘ཁནྡྷཱནཾ བྷེདོ’’ཏི པབནྡྷཝསེན པཝཏྟམཱནསྶ དྷམྨསམཱུཧསྶ ཝིནཱསཛོཏནཱཏི ཨེཀདེསཏོ པརམཏྠཀཐཱ, ‘‘ཛཱིཝིཏིནྡྲིཡསྶ ཨུཔཙྪེདོ’’ཏི པནེཏྠ ན ཀོཙི ཝོཧཱརལེསོ པཱིཏི ཨཱཧ ‘‘ཛཱིཝིཏིནྡྲིཡསྶ ཨུཔཙྪེདོ པན སབྦཱཀཱརཏོ པརམཏྠཏོ མརཎ’’ནྟི། ཨེཝཾ སནྟེཔི ཡསྶ ཁནྡྷབྷེདསྶ པཝཏྟཏྟཱ ‘‘ཏིསྶོ མཏོ, ཕུསྶོ མཏོ’’ཏི ཝོཧཱརོ ཧོཏི, སོ བྷེདོ ཁནྡྷཔྤབནྡྷསྶ ཨནུཔཙྪིནྣཏཱཡ ‘‘སམྨུཏིམརཎ’’ནྟི ཝཏྟབྦཏཾ ཨརཧཏཱིཏི ཨཱཧ ‘‘ཨེཏདེཝ སམྨུཏིམརཎནྟིཔི ཝུཙྩཏཱི’’ཏི། ཏེནཱཧ ‘‘ཛཱིཝིཏིནྡྲིཡུཔཙྪེདམེཝ ཧཱི’’ཏིཨཱདི། སབྦསོ པབནྡྷསམུཙྪེདོ ཧི སམུཙྪེདམརཎནྟི།

    Attāti bhavati ettha cittanti attabhāvo, khandhasamūho, tassa nikkhepo nikkhipanaṃ, pātanaṃ vināsoti attho. Aṭṭhakathāyaṃpana ‘‘maraṇaṃ pattassā’’tiādinā nikkhepahetutāya patanaṃ ‘‘nikkhepo’’ti phalūpacārena vuttanti dasseti. ‘‘Khandhānaṃ bhedo’’ti pabandhavasena pavattamānassa dhammasamūhassa vināsajotanāti ekadesato paramatthakathā, ‘‘jīvitindriyassa upacchedo’’ti panettha na koci vohāraleso pīti āha ‘‘jīvitindriyassa upacchedo pana sabbākārato paramatthato maraṇa’’nti. Evaṃ santepi yassa khandhabhedassa pavattattā ‘‘tisso mato, phusso mato’’ti vohāro hoti, so bhedo khandhappabandhassa anupacchinnatāya ‘‘sammutimaraṇa’’nti vattabbataṃ arahatīti āha ‘‘etadeva sammutimaraṇantipi vuccatī’’ti. Tenāha ‘‘jīvitindriyupacchedameva hī’’tiādi. Sabbaso pabandhasamucchedo hi samucchedamaraṇanti.

    ༣༩༡. བྱསནེནཱཏི ཨནཏྠེན། ‘‘དྷམྨཔཊིསམྦྷིདཱ’’ཏིཨཱདཱིསུ (ཝིབྷ॰ ༧༢༡) ཝིཡ དྷམྨ-སདྡོ ཧེཏུཔརིཡཱཡོཏི ཨཱཧ ‘‘དུཀྑཀཱརཎེནཱ’’ཏི། སོཙནནྟི ལཀྑིཏབྦཏཱཡ སོཙནལཀྑཎོ། སོཙིཏསྶ སོཙནཀསྶ པུགྒལསྶ, ཙིཏྟསྶ ཝཱ བྷཱཝོ སོཙིཏབྷཱཝོ། ཨབྦྷནྟརེཏི ཨཏྟབྷཱཝསྶ ཨནྟོ། ཨཏྟནོ ལཱུཁསབྷཱཝཏཱཡ སོསེནྟོ། ཐཱམགམནེན སམནྟཏོ སོསནཝསེན པརིསོསེནྟོ།

    391.Byasanenāti anatthena. ‘‘Dhammapaṭisambhidā’’tiādīsu (vibha. 721) viya dhamma-saddo hetupariyāyoti āha ‘‘dukkhakāraṇenā’’ti. Socananti lakkhitabbatāya socanalakkhaṇo. Socitassa socanakassa puggalassa, cittassa vā bhāvo socitabhāvo. Abbhantareti attabhāvassa anto. Attano lūkhasabhāvatāya sosento. Thāmagamanena samantato sosanavasena parisosento.

    ༣༩༢. ‘‘ཨཱདིསྶ ཨཱདིསྶ དེཝནྟི པརིདེཝནྟི ཨེཏེནཱཏི ཨཱདེཝོ’’ཏི ཨཱདེཝན-སདྡཾ ཀཏྭཱ ཨསྶུམོཙནཱདིཝིཀཱརཾ ཨཱཔཛྫནྟཱནཾ ཏབྦིཀཱརཱཔཏྟིཡཱ སོ སདྡོ ཀཱརཎབྷཱཝེན ཝུཏྟོ། ཏཾ ཏཾ ཝཎྞནྟི ཏཾ ཏཾ གུཎཾ། ཏསྶེཝཱཏི ཨཱདེཝཔརིདེཝསྶེཝ། བྷཱཝནིདྡེསཱཏི ‘‘ཨཱདེཝིཏཏྟཾ པརིདེཝིཏཏྟ’’ནྟི བྷཱཝནིདྡེསཱ།

    392.‘‘Ādissa ādissa devanti paridevanti etenāti ādevo’’ti ādevana-saddaṃ katvā assumocanādivikāraṃ āpajjantānaṃ tabbikārāpattiyā so saddo kāraṇabhāvena vutto. Taṃtaṃ vaṇṇanti taṃ taṃ guṇaṃ. Tassevāti ādevaparidevasseva. Bhāvaniddesāti ‘‘ādevitattaṃ paridevitatta’’nti bhāvaniddesā.

    ༣༩༣. ནིསྶཡབྷཱུཏོ ཀཱཡོ ཨེཏསྶ ཨཏྠཱིཏི ཀཱཡིཀཾ། ཏེནཱཧ ‘‘ཀཱཡཔསཱདཝཏྠུཀ’’ནྟི། དུཀྐརཾ ཁམནཾ ཨེཏསྶཱཏི དུཀྑམནཾ, སོ ཨེཝ ཨཏྠོ སབྷཱཝོཏི དུཀྑམནཊྛོ, ཏེན། སཱཏཝིདྷུརཏཱཡ ཨསཱཏཾ།

    393. Nissayabhūto kāyo etassa atthīti kāyikaṃ. Tenāha ‘‘kāyapasādavatthuka’’nti. Dukkaraṃ khamanaṃ etassāti dukkhamanaṃ, so eva attho sabhāvoti dukkhamanaṭṭho, tena. Sātavidhuratāya asātaṃ.

    ༣༩༤. ཙེཏསི བྷཝནྟི ཙེཏསིཀཾ, ཏཾ པན ཡསྨཱ ཙིཏྟེན སམཾ པཀཱརེཧི ཡུཏྟཾ, ཏསྨཱ ཨཱཧ ‘‘ཙིཏྟསམྤཡུཏྟ’’ནྟི།

    394. Cetasi bhavanti cetasikaṃ, taṃ pana yasmā cittena samaṃ pakārehi yuttaṃ, tasmā āha ‘‘cittasampayutta’’nti.

    ༣༩༥. སབྦཝིསཡཔཊིཔཏྟིནིཝཱརཎཝསེན སམནྟཏོ སཱིདནཾ སཾསཱིདནཾ། ཨུཊྛཱཏུམྤི ཨསཀྐུཎེཡྻཏཱཀརཎཝསེན ཨཏིབལཝཾ, ཝིརཱུཔཾ ཝཱ སཱིདནཾ ཝིསཱིདནཾ། ཙིཏྟཀིལམཐོཏི ཝིསཱིདནཱཀཱརེན ཙིཏྟསྶ པརིཁེདོ། ཨུཔཱཡཱསོ, སཡཾ ན དུཀྑོ དོསཏྟཱ, སངྑཱརཀྑནྡྷཔརིཡཱཔནྣདྷམྨནྟརཏྟཱ ཝཱ། ཡེ པན དོམནསྶམེཝ ‘‘ཨུཔཱཡཱསོ’’ཏི ཝདེཡྻུཾ, ཏེ ‘‘ཨུཔཱཡཱསོ ཏཱིཧི ཁནྡྷེཧི ཨེཀེནཱཡཏནེན ཨེཀཱཡ དྷཱཏུཡཱ སམྤཡུཏྟོ, ཨེཀེན ཁནྡྷེན ཨེཀེནཱཡཏནེན ཨེཀཱཡ དྷཱཏུཡཱ ཀེཧིཙི སམྤཡུཏྟོ’’ཏི (དྷཱཏུ॰ ༢༤༩)། ཨིམཱཡ པཱལི༹ཡཱ པཊིཀྑིཔིཏབྦཱ། ཨུཔ-སདྡོ བྷུསཏྠོཏི ཨཱཧ ‘‘བལཝཏརཾ ཨཱཡཱསོ ཨུཔཱཡཱསོ’’ཏི། དྷམྨམཏྟཏཱདཱིཔནོ བྷཱཝནིདྡེསོ དྷམྨཏོ ཨཉྙསྶ ཀཏྟུཨབྷཱཝཛོཏནོ, ཨསཏི ཙ ཀཏྟརི ཏེན ཀཏྟབྦསྶ, པརིགྒཧེཏབྦསྶ ཙ ཨབྷཱཝོ ཨེཝཱཏི ཨཱཧ ‘‘ཨཏྟཏྟནིཡཱབྷཱཝདཱིཔཀཱབྷཱཝནིདྡེསཱ’’ཏི།

    395. Sabbavisayapaṭipattinivāraṇavasena samantato sīdanaṃ saṃsīdanaṃ. Uṭṭhātumpi asakkuṇeyyatākaraṇavasena atibalavaṃ, virūpaṃ vā sīdanaṃ visīdanaṃ. Cittakilamathoti visīdanākārena cittassa parikhedo. Upāyāso, sayaṃ na dukkho dosattā, saṅkhārakkhandhapariyāpannadhammantarattā vā. Ye pana domanassameva ‘‘upāyāso’’ti vadeyyuṃ, te ‘‘upāyāso tīhi khandhehi ekenāyatanena ekāya dhātuyā sampayutto, ekena khandhena ekenāyatanena ekāya dhātuyā kehici sampayutto’’ti (dhātu. 249). Imāya pāḷiyā paṭikkhipitabbā. Upa-saddo bhusatthoti āha ‘‘balavataraṃ āyāso upāyāso’’ti. Dhammamattatādīpano bhāvaniddeso dhammato aññassa kattuabhāvajotano, asati ca kattari tena kattabbassa, pariggahetabbassa ca abhāvo evāti āha ‘‘attattaniyābhāvadīpakābhāvaniddesā’’ti.

    ༣༩༨. ཛཱཏིདྷམྨཱནནྟི ཨེཏྠ དྷམྨ-སདྡོ པཀཏིཔརིཡཱཡོཏི ཨཱཧ ‘‘ཛཱཏིསབྷཱཝཱན’’ནྟི, ཛཱཡནཔཀཏིཀཱནནྟི ཝུཏྟཾ ཧོཏི། མགྒབྷཱཝནཱཡ མགྒབྷཱཝནིཙྪཱཧེཏུཀཏཱ ཨིཙྪིཏབྦཱཏི ཏཱདིསཾ ཨིཙྪཾ ནིཝཏྟེནྟོ ‘‘ཝིནཱ མགྒབྷཱཝན’’ནྟི ཨཱཧ། ཨཔརོ ནཡོ ན ཁོ པནེཏནྟི ཡམེཏཾ ‘‘ཨཧོ ཝཏ མཡཾ ན ཛཱཏིདྷམྨཱ ཨསྶཱམ, ན ཙ ཝཏ ནོ ཛཱཏི ཨཱགཙྪེཡྻཱ’’ཏི ཨེཝཾ པཧཱིནསམུདཡེསུ ཨརིཡེསུ ཝིཛྫམཱནཾ ཨཛཱཏིདྷམྨཏྟཾ, པརིནིབྦུཏེསུ ཙ ཝིཛྫམཱནཾ ཛཱཏིཡཱ ཨནཱགམནཾ ཨིཙྪིཏཾ, ཏཾ ཨིཙྪནྟསྶཱཔི མགྒབྷཱཝནཱཡ ཝིནཱ ཨཔྤཏྟབྦཏོ , ཨནིཙྪནྟསྶཱཔི བྷཱཝནཱཡ པཏྟབྦཏོ ན ཨིཙྪཱཡ པཏྟབྦཾ ནཱམ ཧོཏཱིཏི ཨེཝམེཏྠ ཨཏྠོ དཊྛབྦོ། ཝཀྑམཱནཏྠསམྤིཎྜནཏྠོ པི-སདྡོཏི ཨཱཧ ‘‘ཨུཔརི སེསཱནི ཨུཔཱདཱཡ པི-ཀཱརོ’’ཏི། ཡནྟི ཧེཏུཨཏྠེ ཀརཎེ པཙྩཏྟཝཙནནྟི ཨཱཧ ‘‘ཡེནཔི དྷམྨེནཱ’’ཏི། ཧེཏུཨཏྠོ ཧི ཨཡཾ དྷམྨ-སདྡོ , ཨལབྦྷནེཡྻབྷཱཝོ ཨེཏྠ ཧེཏུ ཝེདིཏབྦོ། ཏནྟི ཝཱ ཨིཙྪིཏསྶ ཝཏྠུནོ ཨལབྦྷནཾ, ཨེཝམེཏྠ ‘‘ཡམྤཱིཏི ཡེནཔཱི’’ཏི ཝིབྷཏྟིཝིཔལླཱསེན ཨཏྠོ ཝུཏྟོ། ཡདཱ པན ཡཾ-སདྡོ ‘‘ཨིཙྪ’’ནྟི ཨེཏཾ ཨཔེཀྑཏི, ཏདཱ ཨལཱབྷཝིསིཊྛཱ ཨིཙྪཱ ཝུཏྟཱ ཧོཏི། ཡདཱ པན ‘‘ན ལབྷཏཱི’’ཏི ཨེཏཾ ཨཔེཀྑཏི, ཏདཱ ཨིཙྪཱཝིསིཊྛོ ཨལཱབྷོ ཝུཏྟོ ཧོཏི, སོ པན ཨཏྠཏོ ཨཉྙོ དྷམྨོ ནཏྠི, ཏཐཱཔི ཨལབྦྷནེཡྻཝཏྠུགཏཱ ཨིཙྪཱཝ ཝུཏྟཱ ཧོཏི། སབྦཏྠཱཏི ‘‘ཛརཱདྷམྨཱན’’ནྟིཨཱདིནཱ ཨཱགཏེསུ སབྦཝཱརེསུ།

    398.Jātidhammānanti ettha dhamma-saddo pakatipariyāyoti āha ‘‘jātisabhāvāna’’nti, jāyanapakatikānanti vuttaṃ hoti. Maggabhāvanāya maggabhāvanicchāhetukatā icchitabbāti tādisaṃ icchaṃ nivattento ‘‘vinā maggabhāvana’’nti āha. Aparo nayo na kho panetanti yametaṃ ‘‘aho vata mayaṃ na jātidhammā assāma, na ca vata no jāti āgaccheyyā’’ti evaṃ pahīnasamudayesu ariyesu vijjamānaṃ ajātidhammattaṃ, parinibbutesu ca vijjamānaṃ jātiyā anāgamanaṃ icchitaṃ, taṃ icchantassāpi maggabhāvanāya vinā appattabbato , anicchantassāpi bhāvanāya pattabbato na icchāya pattabbaṃ nāma hotīti evamettha attho daṭṭhabbo. Vakkhamānatthasampiṇḍanattho pi-saddoti āha ‘‘upari sesāni upādāya pi-kāro’’ti. Yanti hetuatthe karaṇe paccattavacananti āha ‘‘yenapi dhammenā’’ti. Hetuattho hi ayaṃ dhamma-saddo , alabbhaneyyabhāvo ettha hetu veditabbo. Tanti vā icchitassa vatthuno alabbhanaṃ, evamettha ‘‘yampīti yenapī’’ti vibhattivipallāsena attho vutto. Yadā pana yaṃ-saddo ‘‘iccha’’nti etaṃ apekkhati, tadā alābhavisiṭṭhā icchā vuttā hoti. Yadā pana ‘‘na labhatī’’ti etaṃ apekkhati, tadā icchāvisiṭṭho alābho vutto hoti, so pana atthato añño dhammo natthi, tathāpi alabbhaneyyavatthugatā icchāva vuttā hoti. Sabbatthāti ‘‘jarādhammāna’’ntiādinā āgatesu sabbavāresu.

    སམུདཡསཙྩནིདྡེསཝཎྞནཱ

    Samudayasaccaniddesavaṇṇanā

    ༤༠༠. པུནབྦྷཝཀརཎཾ པུནོབྦྷཝོ ཨུཏྟརཔདལོཔཾ ཀཏྭཱ མནོ-སདྡསྶ ཝིཡ པུརིམཔདསྶ ཨོ-ཀཱརནྟཏཱ དཊྛབྦཱ། ཨཐ ཝཱ སཱིལནཊྛེན ཨིཀ-སདྡེན གམིཏཏྠཏྟཱ ཀིརིཡཱཝཱཙཀསྶ སདྡསྶ ཨདསྶནཾ དཊྛབྦཾ ཡཐཱ ‘‘ཨསཱུཔབྷཀྑནསཱིལོ ཨསཱུཔིཀོ’’ཏི། སམྨོཧཝིནོདནིཡཾ པན ‘‘པུནབྦྷཝཾ དེཏི, པུནབྦྷཝཱཡ སཾཝཏྟཏི, པུནཔྤུནཾ བྷཝེ ནིབྦཏྟེཏཱིཏི པོནོབྦྷཝིཀཱ’’ཏི (ཝིབྷ॰ ཨཊྛ॰ ༢༠༣) ཨཏྠོ ཝུཏྟོ སོ ‘‘ཏདྡྷིཏཱ’’ ཨིཏི བཧུཝཙནནིདྡེསཏོ, ཝིཙིཏྟཏྟཱ ཝཱ ཏདྡྷིཏཝུཏྟིཡཱ, ཨབྷིདྷཱནལཀྑཎཏྟཱ ཝཱ ཏདྡྷིཏཱནཾ ཏེསུཔི ཨཏྠེསུ པོནོབྦྷཝིཀསདྡསིདྡྷི སམྦྷཝེཡྻཱཏི ཀཏྭཱ ཝུཏྟོ། ཏཏྠ ཀམྨུནཱ སཧཛཱཏཱ པུནབྦྷཝཾ དེཏི, ཨསཧཛཱཏཱ ཀམྨསཧཱཡབྷཱུཏཱ པུནབྦྷཝཱཡ སཾཝཏྟཏི, དུཝིདྷཱཔི པུནཔྤུནཾ བྷཝེ ནིབྦཏྟེཏཱིཏི དཊྛབྦཱ། ནནྡནཊྛེན, རཉྫནཊྛེན ཙ ནནྡཱིརཱགོ, ཡོ ཙ ནནྡཱིརཱགོ, ཡཱ ཙ ཏཎྷཱཡནཊྛེན ཏཎྷཱ, ཨུབྷཡམེཏཾ ཨེཀཏྠཾ, བྱཉྫནམེཝ ནཱནནྟི ཏཎྷཱ ‘‘ནནྡཱིརཱགེན སདྡྷིཾ ཨཏྠཏོ ཨེཀཏྟམེཝ གཏཱ’’ཏི ཝུཏྟཱ། ཏབྦྷཱཝཏྠོ ཧེཏྠ སཧ-སདྡོ ‘‘སནིདསྶནཱ དྷམྨཱ’’ཏིཨཱདཱིསུ (དྷ॰ ས॰ དུཀམཱཏིཀཱ ༩) ཝིཡ། ཏསྨཱ ནནྡཱིརཱགསཧགཏཱཏི ནནྡཱིརཱགབྷཱཝཾ གཏཱ སབྦཱསུཔི ཨཝཏྠཱསུ ནནྡཱིརཱགབྷཱཝསྶ ཨཔཙྩཀྑཱཡ ཝཏྟནཏོཏི ཨཏྠོ། རཱགསམྦནྡྷེན ཨུཔྤནྣསྶཱཏི ཝུཏྟཾ། རཱུཔཱརཱུཔབྷཝརཱགསྶ ཝིསུཾ ཝུཙྩམཱནཏྟཱ ཀཱམབྷཝེ ཨེཝ བྷཝཔཏྠནུཔྤཏྟི ཝུཏྟཱཏི ཝེདིཏབྦཱ།

    400.Punabbhavakaraṇaṃ punobbhavo uttarapadalopaṃ katvā mano-saddassa viya purimapadassa o-kārantatā daṭṭhabbā. Atha vā sīlanaṭṭhena ika-saddena gamitatthattā kiriyāvācakassa saddassa adassanaṃ daṭṭhabbaṃ yathā ‘‘asūpabhakkhanasīlo asūpiko’’ti. Sammohavinodaniyaṃ pana ‘‘punabbhavaṃ deti, punabbhavāya saṃvattati, punappunaṃ bhave nibbattetīti ponobbhavikā’’ti (vibha. aṭṭha. 203) attho vutto so ‘‘taddhitā’’ iti bahuvacananiddesato, vicittattā vā taddhitavuttiyā, abhidhānalakkhaṇattā vā taddhitānaṃ tesupi atthesu ponobbhavikasaddasiddhi sambhaveyyāti katvā vutto. Tattha kammunā sahajātā punabbhavaṃ deti, asahajātā kammasahāyabhūtā punabbhavāya saṃvattati, duvidhāpi punappunaṃ bhave nibbattetīti daṭṭhabbā. Nandanaṭṭhena, rañjanaṭṭhena ca nandīrāgo, yo ca nandīrāgo, yā ca taṇhāyanaṭṭhena taṇhā, ubhayametaṃ ekatthaṃ, byañjanameva nānanti taṇhā ‘‘nandīrāgena saddhiṃ atthato ekattameva gatā’’ti vuttā. Tabbhāvattho hettha saha-saddo ‘‘sanidassanā dhammā’’tiādīsu (dha. sa. dukamātikā 9) viya. Tasmā nandīrāgasahagatāti nandīrāgabhāvaṃ gatā sabbāsupi avatthāsu nandīrāgabhāvassa apaccakkhāya vattanatoti attho. Rāgasambandhena uppannassāti vuttaṃ. Rūpārūpabhavarāgassa visuṃ vuccamānattā kāmabhave eva bhavapatthanuppatti vuttāti veditabbā.

    ཏསྨིཾ ཏསྨིཾ པིཡརཱུཔེ པཋམུཔྤཏྟིཝསེན ‘‘ཨུཔྤཛྫཏཱི’’ཏི ཝུཏྟཾ, པུནཔྤུནཾ པཝཏྟིཝསེན ‘‘ནིཝིསཏཱི’’ཏི། པརིཡུཊྛཱནཱནུསཡཝསེན ཝཱ ཨུཔྤཏྟིནིཝེསཱ ཡོཛེཏབྦཱ། སམྤཏྟིཡནྟི མནུསྶསོབྷགྒེ, དེཝཏྟེ ཙ། ཨཏྟནོ ཙཀྑུནྟི སཝཏྠུཀཾ ཙཀྑུཾ ཝདཏི, སཔསཱདཾ ཝཱ མཾསཔིཎྜཾ། ཝིཔྤསནྣཾ པཉྩཔསཱདནྟི པརིསུདྡྷསུཔྤསནྣནཱིལཔཱིཏལོཧིཏཀཎྷཨོདཱཏཝཎྞཝནྟཾ། རཛཏཔནཱལི༹ཀཾ ཝིཡ ཚིདྡཾ ཨབྦྷནྟརེ ཨོདཱཏཏྟཱ། པཱམངྒསུཏྟཾ ཝིཡ ཨཱལམྦཀཎྞབདྡྷཾ། ཏུངྒཱ ཨུཙྩཱ དཱིགྷཱ ནཱསིཀཱ ཏུངྒནཱསཱ, ཨེཝཾ ལདྡྷཝོཧཱརཾ ཨཏྟནོ གྷཱནཾ། ‘‘ལདྡྷཝོཧཱརཱ’’ཏི ཝཱ པཱཋོ, ཏསྨིཾ སཏི ཏུངྒཱ ནཱསཱ ཡེསཾ ཏེ ཏུངྒནཱསཱ, ཨེཝཾ ལདྡྷཝོཧཱརཱ སཏྟཱ ཨཏྟནོ གྷཱནནྟི ཡོཛནཱ ཀཱཏབྦཱ། ཛིཝ྄ཧཾ…པེ॰… མཉྙནྟི ཝཎྞསཎྛཱནཏོ, ཀིཙྩཏོ ཙ། ཀཱཡཾ…པེ॰… མཉྙནྟི ཨཱརོཧཔརིཎཱཧསམྤཏྟིཡཱ། མནཾ…པེ॰… མཉྙནྟི ཨཏཱིཏཱདིཨཏྠཙིནྟནསམཏྠཾ། ཨཏྟནཱ པཊིལདྡྷཱནི ཨཛ྄ཛྷཏྟཉྩ སརཱིརགནྡྷཱདཱིནི, བཧིདྡྷཱ ཙ ཝིལེཔནགནྡྷཱདཱིནི། ཨུཔྤཛྫམཱནཱ ཨུཔྤཛྫཏཱིཏི ཡདཱ ཨུཔྤཛྫམཱནཱ ཧོཏི, ཏདཱ ཨེཏྠ ཨུཔྤཛྫཏཱིཏི སཱམཉྙེན གཧིཏཱ ཨུཔྤཱདཀིརིཡཱ ལཀྑཎབྷཱཝེན ཝུཏྟཱ, ཝིསཡཝིསིཊྛཱ ཙ ལཀྑིཏབྦབྷཱཝེན། ན ཧི སཱམཉྙཝིསེསེཧི ནཱནཏྟཝོཧཱརོ ན ཧོཏཱིཏི། ཨུཔྤཛྫམཱནཱཏི ཝཱ ཨནིཙྪིཏོ ཨུཔྤཱདོ ཧེཏུབྷཱཝེན ཝུཏྟོ, ཨུཔྤཛྫཏཱིཏི ནིཙྪིཏོ ཕལབྷཱཝེན ཡདི ཨུཔྤཛྫམཱནཱ ཧོཏི, ཨེཏྠ ཨུཔྤཛྫཏཱིཏི།

    Tasmiṃ tasmiṃ piyarūpe paṭhamuppattivasena ‘‘uppajjatī’’ti vuttaṃ, punappunaṃ pavattivasena ‘‘nivisatī’’ti. Pariyuṭṭhānānusayavasena vā uppattinivesā yojetabbā. Sampattiyanti manussasobhagge, devatte ca. Attano cakkhunti savatthukaṃ cakkhuṃ vadati, sapasādaṃ vā maṃsapiṇḍaṃ. Vippasannaṃ pañcapasādanti parisuddhasuppasannanīlapītalohitakaṇhaodātavaṇṇavantaṃ. Rajatapanāḷikaṃ viya chiddaṃ abbhantare odātattā. Pāmaṅgasuttaṃ viya ālambakaṇṇabaddhaṃ. Tuṅgā uccā dīghā nāsikā tuṅganāsā, evaṃ laddhavohāraṃ attano ghānaṃ. ‘‘Laddhavohārā’’ti vā pāṭho, tasmiṃ sati tuṅgā nāsā yesaṃ te tuṅganāsā, evaṃ laddhavohārā sattā attano ghānanti yojanā kātabbā. Jivhaṃ…pe… maññanti vaṇṇasaṇṭhānato, kiccato ca. Kāyaṃ…pe… maññanti ārohapariṇāhasampattiyā. Manaṃ…pe… maññanti atītādiatthacintanasamatthaṃ. Attanā paṭiladdhāni ajjhattañca sarīragandhādīni, bahiddhā ca vilepanagandhādīni. Uppajjamānā uppajjatīti yadā uppajjamānā hoti, tadā ettha uppajjatīti sāmaññena gahitā uppādakiriyā lakkhaṇabhāvena vuttā, visayavisiṭṭhā ca lakkhitabbabhāvena. Na hi sāmaññavisesehi nānattavohāro na hotīti. Uppajjamānāti vā anicchito uppādo hetubhāvena vutto, uppajjatīti nicchito phalabhāvena yadi uppajjamānā hoti, ettha uppajjatīti.

    ནིརོདྷསཙྩནིདྡེསཝཎྞནཱ

    Nirodhasaccaniddesavaṇṇanā

    ༤༠༡. ‘‘སབྦཱནི ནིབྦཱནཝེཝཙནཱནེཝཱ’’ཏི ཝཏྭཱ ཏམཏྠཾ པཱཀཊཏརཾ ཀཱཏུཾ ‘‘ནིབྦཱནཉྷཱི’’ཏིཨཱདི ཨཱརདྡྷཾ། ཏཏྠ ཨཱགམྨཱཏི ནིམིཏྟཾ ཀཏྭཱ། ནིབྦཱནཧེཏུཀོ ཧི ཏཎྷཱཡ ཨསེསཝིརཱགནིརོདྷོ། ཁཡགམནཝསེན ཝིརཛྫཏི། ཨཔྤཝཏྟིགམནཝསེན ནིརུཛ྄ཛྷཏི། ཨནཔེཀྑཏཱཡ ཙཛནཝསེན, ཧཱནིཝསེན ཝཱ ཙཛཱིཡཏི། པུན ཡཐཱ ནཔྤཝཏྟཏི, ཏཐཱ དཱུར ཁིཔནཝསེན པཊིནིསྶཛྫཱིཡཏི། བནྡྷནབྷཱུཏཱཡ མོཙནཝསེན མུཙྩཏི། ཨསཾཀིལེསཝསེན ན ཨལླཱིཡཏི། ཀསྨཱ པནེཏཾ ནིབྦཱནཾ ཨེཀམེཝ སམཱནཾ ནཱནཱནཱམེཧི ཝུཙྩཏཱིཏི? པཊིཔཀྑནཱནཏཱཡཱཏི དསྶེནྟོ ‘‘ཨེཀམེཝ ཧཱི’’ཏིཨཱདིམཱཧ། སངྑཏདྷམྨཝིདྷུརསབྷཱཝཏྟཱ ནིབྦཱནསྶ ནཱམཱནིཔི གུཎནེམིཏྟིཀཏྟཱ སངྑཏདྷམྨཝིདྷུརཱནེཝ ཧོནྟཱིཏི ཝུཏྟཾ ‘‘སབྦསངྑཏཱནཾ ནཱམཔཊིཔཀྑཝསེནཱ’’ཏི། ཨསེསཾ ཝིརཛྫཏི ཏཎྷཱ ཨེཏྠཱཏི ཨསེསཝིརཱགོཏི། ཨེས ནཡོ སེསེསུཔི། ཨཡཾ པན ཝིསེསོ – ནཏྠི ཨེཏསྶ ཨུཔྤཱདོ, ན ཝཱ ཨེཏསྨིཾ ཨདྷིགཏེ པུགྒལསྶ ཨུཔྤཱདོཏི ཨནུཔྤཱདོ, ཨསངྑཏདྷམྨོ། ‘‘ཨཔྤཝཏྟ’’ནྟིཨཱདཱིསུཔི ཨིམིནཱ ནཡེན ཨཏྠོ ཝེདིཏབྦོ། ཨཱཡཱུཧནཾ སམུདཡོ, ཏཔྤཊིཔཀྑཝསེན ཨནཱཡཱུཧནཾ།

    401. ‘‘Sabbāni nibbānavevacanānevā’’ti vatvā tamatthaṃ pākaṭataraṃ kātuṃ ‘‘nibbānañhī’’tiādi āraddhaṃ. Tattha āgammāti nimittaṃ katvā. Nibbānahetuko hi taṇhāya asesavirāganirodho. Khayagamanavasena virajjati. Appavattigamanavasena nirujjhati. Anapekkhatāya cajanavasena, hānivasena vā cajīyati. Puna yathā nappavattati, tathā dūra khipanavasena paṭinissajjīyati. Bandhanabhūtāya mocanavasena muccati. Asaṃkilesavasena na allīyati. Kasmā panetaṃ nibbānaṃ ekameva samānaṃ nānānāmehi vuccatīti? Paṭipakkhanānatāyāti dassento ‘‘ekameva hī’’tiādimāha. Saṅkhatadhammavidhurasabhāvattā nibbānassa nāmānipi guṇanemittikattā saṅkhatadhammavidhurāneva hontīti vuttaṃ ‘‘sabbasaṅkhatānaṃ nāmapaṭipakkhavasenā’’ti. Asesaṃ virajjati taṇhā etthāti asesavirāgoti. Esa nayo sesesupi. Ayaṃ pana viseso – natthi etassa uppādo, na vā etasmiṃ adhigate puggalassa uppādoti anuppādo, asaṅkhatadhammo. ‘‘Appavatta’’ntiādīsupi iminā nayena attho veditabbo. Āyūhanaṃ samudayo, tappaṭipakkhavasena anāyūhanaṃ.

    ཏཎྷཱ ཨཔྤཧཱིནེ སཏི ཡཏྠ ཨུཔྤཛྫཏི, པཧཱནེ པན སཏི ཏཏྠ ཏཏྠེཝསྶཱ ཨབྷཱཝོ སུདསྶིཏོཏི ཨཱཧ ‘‘ཏཏྠེཝ ཨབྷཱཝཾ དསྶེཏུ’’ནྟི། ཨཔཉྙཏྟིནྟི ཨཔཉྙཱཔནཾ, ‘‘ཏིཏྟ ཨལཱབུ ཨཏྠཱི’’ཏི ཝོཧཱརཱབྷཱཝཾ ཝཱ། ཏིཏྟཨལཱབུཝལླིཡཱ ཨཔྤཝཏྟིཾ ཨིཙྪནྟོ པུརིསོ ཝིཡ ཨརིཡམགྒོ, ཏསྶ ཏསྶཱ ཨཔྤཝཏྟིནིནྣཙིཏྟསྶ མཱུལཙྪེདནཾ ཝིཡ མགྒསྶ ནིབྦཱནཱརམྨཎསྶ ཏཎྷཱཡ པཧཱནཾ, ཏདཔྤཝཏྟི ཝིཡ ཏཎྷཱཡ ཨཔྤཝཏྟིབྷཱུཏཾ ནིབྦཱནཾ དཊྛབྦཾ།

    Taṇhā appahīne sati yattha uppajjati, pahāne pana sati tattha tatthevassā abhāvo sudassitoti āha ‘‘tattheva abhāvaṃ dassetu’’nti. Apaññattinti apaññāpanaṃ, ‘‘titta alābu atthī’’ti vohārābhāvaṃ vā. Tittaalābuvalliyā appavattiṃ icchanto puriso viya ariyamaggo, tassa tassā appavattininnacittassa mūlacchedanaṃ viya maggassa nibbānārammaṇassa taṇhāya pahānaṃ, tadappavatti viya taṇhāya appavattibhūtaṃ nibbānaṃ daṭṭhabbaṃ.

    དུཏིཡཨུཔམཱཡཾ དཀྑིཎདྭཱརཾ ཝིཡ ནིབྦཱནཾ, ཙོརགྷཱཏཀཱ ཝིཡ མགྒོ། དཀྑིཎདྭཱརེ གྷཱཏིཏཱཔི ཙོརཱ པཙྪཱ ‘‘ཨཊཝིཡཾ ཙོརཱ གྷཱཏིཏཱ’’ཏི ཝུཙྩནྟི, ཨེཝཾ ནིབྦཱནཾ ཨཱགམྨ ནིརུདྡྷཱཔི ཏཎྷཱ ‘‘ཙཀྑཱདཱིསུ ནིརུདྡྷཱ’’ཏི ཝུཙྩཏི ཏཏྠ ཀིཙྩཀརཎཱབྷཱཝཏོཏི དཊྛབྦཾ། པུརིམཱ ཝཱ ཨུཔམཱ མགྒེན ནིརུདྡྷཱཡ ‘‘པིཡརཱུཔསཱཏརཱུཔེསུ ནིརུདྡྷཱ’’ཏི ཝཏྟབྦཏཱདསྶནཏྠཾ ཝུཏྟཱ, པཙྪིམཱ ནིབྦཱནཾ ཨཱགམྨ ནིརུདྡྷཱཡ ‘‘པིཡརཱུཔསཱཏརཱུཔེསུ ནིརུདྡྷཱ’’ཏི ཝཏྟབྦཏཱདསྶནཏྠཾ ཝུཏྟཱཏི ཨཡཾ ཨེཏཱསཾ ཝིསེསོ།

    Dutiyaupamāyaṃ dakkhiṇadvāraṃ viya nibbānaṃ, coraghātakā viya maggo. Dakkhiṇadvāre ghātitāpi corā pacchā ‘‘aṭaviyaṃ corā ghātitā’’ti vuccanti, evaṃ nibbānaṃ āgamma niruddhāpi taṇhā ‘‘cakkhādīsu niruddhā’’ti vuccati tattha kiccakaraṇābhāvatoti daṭṭhabbaṃ. Purimā vā upamā maggena niruddhāya ‘‘piyarūpasātarūpesu niruddhā’’ti vattabbatādassanatthaṃ vuttā, pacchimā nibbānaṃ āgamma niruddhāya ‘‘piyarūpasātarūpesu niruddhā’’ti vattabbatādassanatthaṃ vuttāti ayaṃ etāsaṃ viseso.

    མགྒསཙྩནིདྡེསཝཎྞནཱ

    Maggasaccaniddesavaṇṇanā

    ༤༠༢. ཨཉྙམགྒཔཊིཀྑེཔནཏྠནྟི ཏིཏྠིཡེཧི པརིཀཔྤིཏསྶ མགྒསྶ དུཀྑནིརོདྷགཱམིནིཔཊིཔདཱབྷཱཝཔཊིཀྑེཔནཏྠཾ, ཨཉྙསྶ ཝཱ མགྒབྷཱཝཔཊིཀྑེཔོ ཨཉྙམགྒཔཊིཀྑེཔོ, ཏདཏྠཾ། ‘‘ཨཡ’’ནྟི པན ཨཏྟནོ, ཏེསུ ཙ བྷིཀྑཱུསུ ཨེཀཙྩཱནཾ པཙྩཀྑབྷཱཝཏོ ཨཱསནྣཔཙྩཀྑཝཙནཾ། ཨཱརཀཏྟཱཏི ནིརུཏྟིནཡེན ཨརིཡསདྡསིདྡྷིམཱཧ། ཨརིཡབྷཱཝཀརཏྟཱཏི ཨརིཡཀརཎོ ཨརིཡོཏི ཨུཏྟརཔདལོཔེན, པུགྒལསྶ ཨརིཡབྷཱཝཀརཏྟཱ ཨརིཡཾ ཀརོཏཱིཏི ཝཱ ཨརིཡོ, ཨརིཡཕལཔཊིལཱབྷཀརཏྟཱ ཝཱ ཨརིཡཾ ཕལཾ ལབྷཱཔེཏི ཛནེཏཱིཏི ཨརིཡོ། པུརིམེན ཙེཏྠ ཨཏྟནོ ཀིཙྩཝསེན, པཙྪིམེན ཕལཝསེན ཨརིཡནཱམལཱབྷོ ཝུཏྟོཏི དཊྛབྦོ། ཙཏུསཙྩཔཊིཝེདྷཱཝཧཾ ཀམྨཊྛཱནཾ ཙཏུསཙྩཀམྨཊྛཱནཾ , ཙཏུསཙྩཾ ཝཱ ཨུདྡིསྶ པཝཏྟཾ བྷཱཝནཱཀམྨཾ ཡོགིནོ སུཁཝིསེསཱནཾ ཋཱནབྷཱུཏནྟི ཙཏུསཙྩཀམྨཊྛཱནཾ། པུརིམཱནི དྭེ སཙྩཱནི ཝཊྚཾ པཝཏྟིཧེཏུབྷཱཝཏོ། པཙྪིམཱནི ཝིཝཊྚཾ ནིཝཏྟིཏདདྷིགམུཔཱཡབྷཱཝཏོ། ཝཊྚེ ཀམྨཊྛཱནཱབྷིནིཝེསོ སརཱུཔཏོ པརིགྒཧསབྦྷཱཝཏོ། ཝིཝཊྚེ ནཏྠི ཨཝིསཡཏྟཱ, ཝིསཡཏྟེ ཙ པཡོཛནཱབྷཱཝཏོ། པུརིམཱནི དྭེ སཙྩཱནི ཨུགྒཎྷིཏྭཱཏི སམྦནྡྷོ། ཀམྨཊྛཱནཔཱལི༹ཡཱ ཧི ཏདཏྠསལླཀྑཎེན ཝཱཙུགྒཏཀརཎཾ ཨུགྒཧོ། ཏེནཱཧ ‘‘ཝཱཙཱཡ པུནཔྤུནཾ པརིཝཏྟེནྟོ’’ཏི། ཨིཊྛཾ ཀནྟནྟི ནིརོདྷམགྒེསུ ནིནྣབྷཱཝཾ དསྶེཏི, ན ཨབྷིནནྡནཾ, ཏནྣིནྣབྷཱཝོཡེཝ ཙ ཏཏྠ ཀམྨཀརཎཾ དཊྛབྦཾ།

    402.Aññamaggapaṭikkhepanatthanti titthiyehi parikappitassa maggassa dukkhanirodhagāminipaṭipadābhāvapaṭikkhepanatthaṃ, aññassa vā maggabhāvapaṭikkhepo aññamaggapaṭikkhepo, tadatthaṃ. ‘‘Aya’’nti pana attano, tesu ca bhikkhūsu ekaccānaṃ paccakkhabhāvato āsannapaccakkhavacanaṃ. Ārakattāti niruttinayena ariyasaddasiddhimāha. Ariyabhāvakarattāti ariyakaraṇo ariyoti uttarapadalopena, puggalassa ariyabhāvakarattā ariyaṃ karotīti vā ariyo, ariyaphalapaṭilābhakarattā vā ariyaṃ phalaṃ labhāpeti janetīti ariyo. Purimena cettha attano kiccavasena, pacchimena phalavasena ariyanāmalābho vuttoti daṭṭhabbo. Catusaccapaṭivedhāvahaṃ kammaṭṭhānaṃ catusaccakammaṭṭhānaṃ, catusaccaṃ vā uddissa pavattaṃ bhāvanākammaṃ yogino sukhavisesānaṃ ṭhānabhūtanti catusaccakammaṭṭhānaṃ. Purimāni dve saccānivaṭṭaṃ pavattihetubhāvato. Pacchimāni vivaṭṭaṃ nivattitadadhigamupāyabhāvato. Vaṭṭe kammaṭṭhānābhiniveso sarūpato pariggahasabbhāvato. Vivaṭṭe natthi avisayattā, visayatte ca payojanābhāvato. Purimāni dve saccāni uggaṇhitvāti sambandho. Kammaṭṭhānapāḷiyā hi tadatthasallakkhaṇena vācuggatakaraṇaṃ uggaho. Tenāha ‘‘vācāya punappunaṃ parivattento’’ti. Iṭṭhaṃ kantanti nirodhamaggesu ninnabhāvaṃ dasseti, na abhinandanaṃ, tanninnabhāvoyeva ca tattha kammakaraṇaṃ daṭṭhabbaṃ.

    ཨེཀཔཊིཝེདྷེནེཝཱཏི ཨེཀཉཱཎེནེཝ པཊིཝིཛ྄ཛྷནེན། པཊིཝེདྷོ པཊིགྷཱཏཱབྷཱཝེན ཝིསཡེ ནིསྶངྒཙཱརསངྑཱཏཾ ནིབྦིཛ྄ཛྷནཾ། ཨབྷིསམཡོ ཨཝིརཛ྄ཛྷིཏྭཱ ཝིསཡསྶ ཨདྷིགམསངྑཱཏོ ཨཝབོདྷོ། ‘‘ཨིདཾ དུཀྑཾ, ཨེཏྟཀཾ དུཀྑཾ, ན ཨིཏོ བྷིཡྻོ’’ཏི པརིཙྪིནྡིཏྭཱ ཛཱནནམེཝ ཝུཏྟནཡེན པཊིཝེདྷོཏི པརིཉྙཱཔཊིཝེདྷོ, ཏེན། ཨིདཉྩ ཡཐཱ ཏསྨིཾ ཉཱཎེ པཝཏྟེ པཙྪཱ དུཀྑསྶ སརཱུཔཱདིཔརིཙྪེདེ སམྨོཧོ ན ཧོཏི, ཏཐཱ པཝཏྟིཾ གཧེཏྭཱ ཝུཏྟཾ, ན པན མགྒཉཱཎསྶ ‘‘ཨིདཾ དུཀྑ’’ནྟིཨཱདིནཱ (མ॰ ནི॰ ༢.༤༨༤; ༣.༡༠༤) པཝཏྟནཏོ། པཧཱིནསྶ པུན ཨཔྤཧཱཏབྦཏཱཡ པཀཊྛཾ ཧཱནཾ ཙཛནཾ སམུཙྪིནྡནཾ, པཧཱནམེཝ ཝུཏྟནཡེན པཊིཝེདྷོཏི པཧཱནཔཊིཝེདྷོ, ཏེན། ཨཡམྤི ཡསྨིཾ ཀིལེསེ ཨཔྤཧཱིཡམཱནེ མགྒབྷཱཝནཱཡ ན བྷཝིཏབྦཾ, ཨསཏི ཙ མགྒབྷཱཝནཱཡ ཡོ ཨུཔྤཛྫེཡྻ, ཏསྶ ཀིལེསསྶ པཊིགྷཱཏཾ ཀརོནྟསྶ ཨནུཔྤཏྟིདྷམྨཏཾ ཨཱཔཱདེནྟསྶ ཉཱཎསྶ ཏཐཱཔཝཏྟིཡཾ པཊིགྷཱཏཱབྷཱཝེན ནིསྶངྒཙཱརཾ ཨུཔཱདཱཡ ཨེཝཾ ཝུཏྟོ། སཙྪིཀིརིཡཱ པཙྩཀྑཀརཎཾ ཨནུསྶཝཱཀཱརཔརིཝིཏཀྐཱདིཀེ མུཉྩིཏྭཱ སརཱུཔཏོ ཨཱརམྨཎཀརཎཾ ‘‘ཨིདཾ ཏ’’ནྟི ཡཐཱསབྷཱཝཏོ གཧཎཾ, སཱ ཨེཝ ཝུཏྟནཡེན པཊིཝེདྷོཏི སཙྪིཀིརིཡཱཔཊིཝེདྷོ, ཏེན། ཨཡཾ པནསྶ ཨཱཝརཎསྶ ཨསམུཙྪིནྡནཏོ ཉཱཎཾ ནིརོདྷཾ ཨཱལམྦིཏུཾ ན སཀྐོཏི, ཏསྶ སམུཙྪིནྡནཏོ ཏཾ སརཱུཔཏོ ཝིབྷཱཝེནྟམེཝ པཝཏྟཏཱིཏི ཨེཝཾ ཝུཏྟོ། བྷཱཝནཱ ཨུཔྤཱདནཱ, ཝཌྜྷནཱ ཙ། ཏཏྠ པཋམམགྒེ ཨུཔྤཱདནཊྛེན, དུཏིཡཱདཱིསུ ཝཌྜྷནཊྛེན, ཨུབྷཡཏྠཱཔི ཝཱ ཨུབྷཡཐཱཔི ཝེདིཏབྦཾ། པཋམམགྒེཔི ཧི ཡཐཱརཧཾ ཝུཊྛཱནགཱམིནིཡཾ པཝཏྟཾ པརིཛཱནནཱདིཾ ཝཌྜྷེནྟོ པཝཏྟོཏི ཝཌྜྷནཊྛེན བྷཱཝནཱ སཀྐཱ ཝིཉྙཱཏུཾ། དུཏིཡཱདཱིསུཔི ཨཔྤཧཱིནཀིལེསཔྤཧཱནཏོ, པུགྒལནྟརབྷཱཝསཱདྷནཏོ ཙ ཨུཔྤཱདནཊྛེན བྷཱཝནཱ སཀྐཱ ཝིཉྙཱཏུཾ, སཱ ཨེཝ ཝུཏྟནཡེན པཊིཝེདྷོཏི བྷཱཝནཱཔཊིཝེདྷོ, ཏེན། ཨཡམྤི ཧི ཡཐཱ ཉཱཎེ པཝཏྟེ པཙྪཱ མགྒདྷམྨཱནཾ སརཱུཔཔརིཙྪེདེ སམྨོཧོ ན ཧོཏི, ཏཐཱ པཝཏྟིམེཝ གཧེཏྭཱ ཝུཏྟོ།

    Ekapaṭivedhenevāti ekañāṇeneva paṭivijjhanena. Paṭivedho paṭighātābhāvena visaye nissaṅgacārasaṅkhātaṃ nibbijjhanaṃ. Abhisamayo avirajjhitvā visayassa adhigamasaṅkhāto avabodho. ‘‘Idaṃ dukkhaṃ, ettakaṃ dukkhaṃ, na ito bhiyyo’’ti paricchinditvā jānanameva vuttanayena paṭivedhoti pariññāpaṭivedho, tena. Idañca yathā tasmiṃ ñāṇe pavatte pacchā dukkhassa sarūpādiparicchede sammoho na hoti, tathā pavattiṃ gahetvā vuttaṃ, na pana maggañāṇassa ‘‘idaṃ dukkha’’ntiādinā (ma. ni. 2.484; 3.104) pavattanato. Pahīnassa puna appahātabbatāya pakaṭṭhaṃ hānaṃ cajanaṃ samucchindanaṃ, pahānameva vuttanayena paṭivedhoti pahānapaṭivedho, tena. Ayampi yasmiṃ kilese appahīyamāne maggabhāvanāya na bhavitabbaṃ, asati ca maggabhāvanāya yo uppajjeyya, tassa kilesassa paṭighātaṃ karontassa anuppattidhammataṃ āpādentassa ñāṇassa tathāpavattiyaṃ paṭighātābhāvena nissaṅgacāraṃ upādāya evaṃ vutto. Sacchikiriyā paccakkhakaraṇaṃ anussavākāraparivitakkādike muñcitvā sarūpato ārammaṇakaraṇaṃ ‘‘idaṃ ta’’nti yathāsabhāvato gahaṇaṃ, sā eva vuttanayena paṭivedhoti sacchikiriyāpaṭivedho, tena. Ayaṃ panassa āvaraṇassa asamucchindanato ñāṇaṃ nirodhaṃ ālambituṃ na sakkoti, tassa samucchindanato taṃ sarūpato vibhāventameva pavattatīti evaṃ vutto. Bhāvanā uppādanā, vaḍḍhanā ca. Tattha paṭhamamagge uppādanaṭṭhena, dutiyādīsu vaḍḍhanaṭṭhena, ubhayatthāpi vā ubhayathāpi veditabbaṃ. Paṭhamamaggepi hi yathārahaṃ vuṭṭhānagāminiyaṃ pavattaṃ parijānanādiṃ vaḍḍhento pavattoti vaḍḍhanaṭṭhena bhāvanā sakkā viññātuṃ. Dutiyādīsupi appahīnakilesappahānato, puggalantarabhāvasādhanato ca uppādanaṭṭhena bhāvanā sakkā viññātuṃ, sā eva vuttanayena paṭivedhoti bhāvanāpaṭivedho, tena. Ayampi hi yathā ñāṇe pavatte pacchā maggadhammānaṃ sarūpaparicchede sammoho na hoti, tathā pavattimeva gahetvā vutto.

    ཏིཊྛནྟུ ཏཱཝ ཡཐཱདྷིགཏཱ མགྒདྷམྨཱ, ཡཐཱཔཝཏྟེསུ ཕལདྷམྨེསུཔི ཨཡཾ ཡཐཱདྷིགཏསཙྩདྷམྨེསུ ཝིཡ ཝིགཏསམྨོཧོཝ ཧོཏི། ཏེནེཝཱཧ ‘‘དིཊྛདྷམྨོ པཏྟདྷམྨོ ཝིདིཏདྷམྨོ པརིཡོགཱལ༹ྷདྷམྨོ’’ཏི (མཧཱཝ॰ ༡༨; དཱི॰ ནི॰ ༡.༢༩༩; མ॰ ནི॰ ༢.༦༩) ཡཏོ སཙསྶ དྷམྨཏཱསཉྩོདིཏཱ ཡཐཱདྷིགཏསཙྩདྷམྨཱལམྦནིཡོ མགྒཝཱིཐིཏོ པརཏོ མགྒཕལཔཧཱིནཱཝསིཊྛཀིལེསནིབྦཱནཱནཾ པཙྩཝེཀྑཎཱ པཝཏྟནྟི, དུཀྑསཙྩམྨོཔི སཀྐཱཡདིཊྛིཨཱདཡོ། ཨཡཉྩ ཨཏྠཝཎྞནཱ ‘‘པརིཉྙཱབྷིསམཡེནཱ’’ཏིཨཱདཱིསུཔི ཝིབྷཱཝེཏབྦཱ། ཨེཀཱབྷིསམཡེན ཨབྷིསམེཏཱིཏི ཨེཏྠཱཧ ཝིཏཎྜཝཱདཱི ‘‘ཨརིཡམགྒཉཱཎཾ ཙཏཱུསུ སཙྩེསུ ནཱནཱབྷིསམཡཝསེན ཀིཙྩཀར’’ནྟི, སོ ཨབྷིདྷམྨེ (ཀཐཱ॰ ༢༧༤) ཨོདྷིསོཀཐཱཡ སཉྙཱཔེཏབྦོ། ཨིདཱནི ཏམེཝ ཨེཀཱབྷིསམཡཾ ཝིཏྠཱརཝསེན ཝིབྷཱཝེཏུཾ ‘‘ཨེཝམསྶཱ’’ཏིཨཱདི ཝུཏྟཾ། ‘‘པུབྦབྷཱགེ…པེ॰… པཊིཝེདྷོ ཧོཏཱི’’ཏི ཀསྨཱ ཝུཏྟཾ, ནནུ པཊིཝེདྷོ པུབྦབྷཱགིཡོ ན ཧོཏཱིཏི? སཙྩམེཏཾ ནིཔྤརིཡཱཡཏོ, ཨིདྷ པན ཨུགྒཧཱདིཝསེན པཝཏྟོ ཨཝབོདྷོ པརིཡཱཡཏོ ཏཐཱ ཝུཏྟོ། པཊིཝེདྷནིམིཏྟཏྟཱ ཝཱ ཨུགྒཧཱདིཝསེན པཝཏྟཾ དུཀྑཱདཱིསུ པུབྦབྷཱགེ ཉཱཎཾ ‘‘པཊིཝེདྷོ’’ཏི ཝུཏྟཾ, ན པཊིཝིཛ྄ཛྷནསབྷཱཝཾ། ཀིཙྩཏོཏི པུབྦབྷཱགེཧི དུཀྑཱདིཉཱཎེཧི ཀཱཏབྦཀིཙྩསྶ ཨིདྷ ནིཔྥཏྟིཏོ, ཨིམསྶེཝ ཝཱ ཉཱཎསྶ དུཀྑཱདིཔྤཀཱསནཀིཙྩཏོ, པརིཉྙཱདིཏོཏི ཨཏྠོ། ཨཱརམྨཎཔཊིཝེདྷོཏི སཙྪིཀིརིཡཱཔཊིཝེདྷམཱཧ། སཱཏི པཙྩཝེཀྑཎཱ། ཨིདྷཱཏི ཨིམསྨིཾ ཋཱནེ། ཨུགྒཧཱདཱིསུ ཝུཙྩམཱནེསུ ན ཝུཏྟཱ ཨནཝསརཏྟཱ། ཨདྷིགམེ ཧི སཏི ཏསྶཱ སིཡཱ ཨཝསརོ།

    Tiṭṭhantu tāva yathādhigatā maggadhammā, yathāpavattesu phaladhammesupi ayaṃ yathādhigatasaccadhammesu viya vigatasammohova hoti. Tenevāha ‘‘diṭṭhadhammo pattadhammo viditadhammo pariyogāḷhadhammo’’ti (mahāva. 18; dī. ni. 1.299; ma. ni. 2.69) yato sacassa dhammatāsañcoditā yathādhigatasaccadhammālambaniyo maggavīthito parato maggaphalapahīnāvasiṭṭhakilesanibbānānaṃ paccavekkhaṇā pavattanti, dukkhasaccammopi sakkāyadiṭṭhiādayo. Ayañca atthavaṇṇanā ‘‘pariññābhisamayenā’’tiādīsupi vibhāvetabbā. Ekābhisamayena abhisametīti etthāha vitaṇḍavādī ‘‘ariyamaggañāṇaṃ catūsu saccesu nānābhisamayavasena kiccakara’’nti, so abhidhamme (kathā. 274) odhisokathāya saññāpetabbo. Idāni tameva ekābhisamayaṃ vitthāravasena vibhāvetuṃ ‘‘evamassā’’tiādi vuttaṃ. ‘‘Pubbabhāge…pe… paṭivedho hotī’’ti kasmā vuttaṃ, nanu paṭivedho pubbabhāgiyo na hotīti? Saccametaṃ nippariyāyato, idha pana uggahādivasena pavatto avabodho pariyāyato tathā vutto. Paṭivedhanimittattā vā uggahādivasena pavattaṃ dukkhādīsu pubbabhāge ñāṇaṃ ‘‘paṭivedho’’ti vuttaṃ, na paṭivijjhanasabhāvaṃ. Kiccatoti pubbabhāgehi dukkhādiñāṇehi kātabbakiccassa idha nipphattito, imasseva vā ñāṇassa dukkhādippakāsanakiccato, pariññāditoti attho. Ārammaṇapaṭivedhoti sacchikiriyāpaṭivedhamāha. Sāti paccavekkhaṇā. Idhāti imasmiṃ ṭhāne. Uggahādīsu vuccamānesu na vuttā anavasarattā. Adhigame hi sati tassā siyā avasaro.

    ཏཾཡེཝ ཧི ཨནཝསརཾ དསྶེཏུཾ ‘‘ཨིམསྶ ཙཱ’’ཏིཨཱདི ཝུཏྟཾ། པུབྦེ པརིགྒཧཏོཏི ཀམྨཊྛཱནཔརིགྒཧཏོ པུབྦེ། ཨུགྒཧཱདིཝསེན སཙྩཱནཾ པརིགྒཎྷནཉྷི པརིགྒཧོ། ཏཐཱ ཏཱནི པརིགྒཎྷནཏོ མནསིཀཱརདལ༹ྷཏཱཡ པུབྦབྷཱགིཡཱ དུཀྑཔརིཉྙཱདཡོ ཧོནྟི ཡེཝཱཏི ཨཱཧ ‘‘པརིགྒཧཏོ པཊྛཱཡ ཧོཏཱི’’ཏི། ཨཔརབྷཱགེཏི མགྒཀྑཎེ། དུདྡསཏྟཱཏི ཨཏྟནོ པཝཏྟིཀྑཎཝསེན པཱཀཊཱནིཔི པཀཏིཉཱཎེན སབྷཱཝརསཏོ དཊྛུཾ ཨསཀྐུཎེཡྻཏྟཱ། གམྦྷཱིརེནེཝ ཙ བྷཱཝནཱཉཱཎེན, ཏཐཱཔི མཏྠཀཔྤཏྟེན ཨརིཡམགྒཉཱཎེནེཝ ཡཱཐཱཝཏོ པསྶིཏབྦཏྟཱ གམྦྷཱིརཱནི ། ཏེནཱཧ ‘‘ལཀྑཎཔཊིཝེདྷཏོ པན ཨུབྷཡམྤི གམྦྷཱིར’’ནྟི། ཨིཏརཱནི ཨསཾཀིལིཊྛཨསཾཀིལེསིཀཏཱཡ ཨཙྩནྟསུཁཔྤཏྟཱཡ ཨནུཔྤཏྟིབྷཝཏཱཡ, ཨནུཔྤནྣཔུབྦཏཱཡ ཙ པཝཏྟིཝསེན ཨཔཱཀཊཏྟཱ ཙ པརམགམྦྷཱིརཏྟཱ, ཏཐཱ པརམགམྦྷཱིརཉཱཎེནེཝ པསྶིཏབྦཏཱཡ པཀཏིཉཱཎེན དཊྛུཾ ན སཀྐུཎེཡྻཱནཱིཏི དུདྡསཱནི། ཏེནཱཧ ‘‘ཨིཏརེསཾ པནཱ’’ཏིཨཱདི། པཡོགོཏི ཀིརིཡཱ, ཝཱཡཱམོ ཝཱ། ཏསྶ མཧནྟཏརསྶ ཨིཙྪིཏབྦཏཾ, དུཀྐརཏརཏཉྩ ཨུཔམཱཧི དསྶེཏི ‘‘བྷཝགྒགྒཧཎཏྠ’’ནྟིཨཱདིནཱ། པཊིཝེདྷཀྑཎེཏི ཨརིཡསྶ མགྒསྶ ཙཏུསཙྩསམྤཊིཝེདྷཀྑཎེ། ཨེཀམེཝ ཏཾ ཉཱཎནྟི དུཀྑཱདཱིསུ པརིཉྙཱདིཀིཙྩསཱདྷནཝསེན ཨེཀམེཝ ཏཾ མགྒཉཱཎཾ ཧོཏི།

    Taṃyeva hi anavasaraṃ dassetuṃ ‘‘imassa cā’’tiādi vuttaṃ. Pubbe pariggahatoti kammaṭṭhānapariggahato pubbe. Uggahādivasena saccānaṃ pariggaṇhanañhi pariggaho. Tathā tāni pariggaṇhanato manasikāradaḷhatāya pubbabhāgiyā dukkhapariññādayo honti yevāti āha ‘‘pariggahato paṭṭhāya hotī’’ti. Aparabhāgeti maggakkhaṇe. Duddasattāti attano pavattikkhaṇavasena pākaṭānipi pakatiñāṇena sabhāvarasato daṭṭhuṃ asakkuṇeyyattā. Gambhīreneva ca bhāvanāñāṇena, tathāpi matthakappattena ariyamaggañāṇeneva yāthāvato passitabbattā gambhīrāni. Tenāha ‘‘lakkhaṇapaṭivedhato pana ubhayampi gambhīra’’nti. Itarāni asaṃkiliṭṭhaasaṃkilesikatāya accantasukhappattāya anuppattibhavatāya, anuppannapubbatāya ca pavattivasena apākaṭattā ca paramagambhīrattā, tathā paramagambhīrañāṇeneva passitabbatāya pakatiñāṇena daṭṭhuṃ na sakkuṇeyyānīti duddasāni. Tenāha ‘‘itaresaṃ panā’’tiādi. Payogoti kiriyā, vāyāmo vā. Tassa mahantatarassa icchitabbataṃ, dukkarataratañca upamāhi dasseti ‘‘bhavaggaggahaṇattha’’ntiādinā. Paṭivedhakkhaṇeti ariyassa maggassa catusaccasampaṭivedhakkhaṇe. Ekameva taṃ ñāṇanti dukkhādīsu pariññādikiccasādhanavasena ekameva taṃ maggañāṇaṃ hoti.

    ཨིམེསུ ཏཱིསུ ཋཱནེསཱུཏི ཨིམེསུ ཝིརམིཏབྦཏཱཝསེན ཛོཏིཏེསུ ཏཱིསུ ཀཱམབྱཱཔཱདཝིཧིཾསཱཝིཏཀྐཝཏྠཱུསུ། ཝིསུཾ ཝིསུཾ ཨུཔྤནྣསྶ ཏིཝིདྷཨཀུསལསངྐཔྤསྶ། པདཔཙྪེདཏོཏི ཨེཏྠ གཏམགྒོ ‘‘པད’’ནྟི ཝུཙྩཏི, ཡེན ཙ ཨུཔཱཡེན ཀཱརཎེན ཀཱམཝིཏཀྐོ ཨུཔྤཛྫཏི, སོ ཏསྶ གཏམགྒོཏི ཏསྶ པཙྪེདོ གྷཱཏོ པདཔཙྪེདོ, ཏཏོ པདཔཙྪེདཏོ། ཨནུཔྤཏྟིདྷམྨཏཱཔཱདནཾ ཨནུཔྤཏྟིསཱདྷནཾ, ཏསྶ ཝསེན། མགྒཀིཙྩསཱདྷནེན མགྒངྒཾ པཱུརཡམཱནོ ཨེཀོཝ ཏིཝིདྷཀིཙྩསཱདྷནོ ཀུསལསངྐཔྤོ ཨུཔྤཛྫཏི། ཏིཝིདྷཱཀུསལསངྐཔྤསམུཙྪེདནམེཝ ཧེཏྠ ཏིཝིདྷཀིཙྩསཱདྷནཾ དཊྛབྦཾ། ཨིམིནཱ ནཡེན ‘‘ཨིམེསུ ཙཏཱུསུ ཋཱནེསཱུ’’ཏིཨཱདཱིསུཔི ཨཏྠོ ཝེདིཏབྦོ།

    Imesu tīsu ṭhānesūti imesu viramitabbatāvasena jotitesu tīsu kāmabyāpādavihiṃsāvitakkavatthūsu. Visuṃ visuṃ uppannassa tividhaakusalasaṅkappassa. Padapacchedatoti ettha gatamaggo ‘‘pada’’nti vuccati, yena ca upāyena kāraṇena kāmavitakko uppajjati, so tassa gatamaggoti tassa pacchedo ghāto padapacchedo, tato padapacchedato. Anuppattidhammatāpādanaṃ anuppattisādhanaṃ, tassa vasena. Maggakiccasādhanena maggaṅgaṃ pūrayamāno ekova tividhakiccasādhano kusalasaṅkappo uppajjati. Tividhākusalasaṅkappasamucchedanameva hettha tividhakiccasādhanaṃ daṭṭhabbaṃ. Iminā nayena ‘‘imesu catūsu ṭhānesū’’tiādīsupi attho veditabbo.

    མུསཱཝཱདཱཝེརམཎིཨཱདཡོཏི ཨེཏྠ ཡསྨཱ སིཀྑཱཔདཝིབྷངྒེ (ཝིབྷ॰ ༧༠༣) ཝིརཏིཙེཏནཱ, སབྦེ སམྤཡུཏྟདྷམྨཱ ཙ སིཀྑཱཔདཱནཱིཏི ཨཱགཏཱནཱིཏི ཏཏྠ པདྷཱནཱནཾ ཝིརཏིཙེཏནཱནཾ ཝསེན ‘‘ཝིརཏིཡོཔི ཧོནྟི ཙེཏནཱཡོཔཱི’’ཏི (ཝིབྷ॰ ཨཊྛ॰ ༧༠༣) སམྨོཧཝིནོདནིཡཾ ཝུཏྟཾ, ཏསྨཱ ཀེཙི ‘‘ཨཱདི-སདྡེན ན ཀེཝལཾ པིསུཎཝཱཙཱ ཝེརམཎིཨཱདཱིནཾཡེཝ སངྒཧོ, ཨཐ ཁོ ཏཱདིསཱནཾ ཙེཏནཱནམྤི སངྒཧོ’’ཏི ཝདནྟི, ཏཾ པུབྦབྷཱགཝསེན ཝུཙྩམཱནཏྟཱ ཡུཛྫེཡྻ, མུསཱཝཱདཱདཱིཧི ཝིརམཎཀཱལེ ཝཱ ཝིརཏིཡོ, སུབྷཱསིཏཱདིཝཱཙཱབྷཱསནཱདིཀཱལེ ཙ ཙེཏནཱཡོ ཡོཛེཏབྦཱ, མགྒཀྑཎེ པན ཝིརཏིཡོཝ ཨིཙྪིཏབྦཱ ཙེཏནཱནཾ ཨམགྒངྒཏྟཱ། ཨེཀསྶ ཉཱཎསྶ དུཀྑཱདིཉཱཎཏཱ ཝིཡ, ཨེཀཱཡ ཝིརཏིཡཱ མུསཱཝཱདཱདིཝིརཏིབྷཱཝོ ཝིཡ ཙ ཨེཀཱཡ ཙེཏནཱཡ སམྨཱཝཱཙཱདིཀིཙྩཏྟཡསཱདྷནསབྷཱཝཱབྷཱཝཱ སམྨཱཝཱཙཱདིབྷཱཝཱསིདྡྷིཏོ, ཏཾསིདྡྷིཡཾ ཨངྒཏྟཡཏཱསིདྡྷིཏོ ཙ།

    Musāvādāveramaṇiādayoti ettha yasmā sikkhāpadavibhaṅge (vibha. 703) viraticetanā, sabbe sampayuttadhammā ca sikkhāpadānīti āgatānīti tattha padhānānaṃ viraticetanānaṃ vasena ‘‘viratiyopi honti cetanāyopī’’ti (vibha. aṭṭha. 703) sammohavinodaniyaṃ vuttaṃ, tasmā keci ‘‘ādi-saddena na kevalaṃ pisuṇavācā veramaṇiādīnaṃyeva saṅgaho, atha kho tādisānaṃ cetanānampi saṅgaho’’ti vadanti, taṃ pubbabhāgavasena vuccamānattā yujjeyya, musāvādādīhi viramaṇakāle vā viratiyo, subhāsitādivācābhāsanādikāle ca cetanāyo yojetabbā, maggakkhaṇe pana viratiyova icchitabbā cetanānaṃ amaggaṅgattā. Ekassa ñāṇassa dukkhādiñāṇatā viya, ekāya viratiyā musāvādādiviratibhāvo viya ca ekāya cetanāya sammāvācādikiccattayasādhanasabhāvābhāvā sammāvācādibhāvāsiddhito, taṃsiddhiyaṃ aṅgattayatāsiddhito ca.

    བྷིཀྑུསྶ ཨཱཛཱིཝཧེཏུཀཾ ཀཱཡཝཙཱིདུཙྩརིཏཾ ནཱམ ཨཡོནིསོ ཨཱཧཱརཔརིཡེསནཧེཏུཀམེཝ སིཡཱཏི ཨཱཧ ‘‘ཁཱདནཱིཡ…པེ॰… དུཙྩརིཏ’’ནྟི། ཀཱཡཝཙཱིདུཙྩརིཏགྒཧཎཉྩ ཀཱཡཝཙཱིདྭཱརེཡེཝ ཨཱཛཱིཝཔཀོཔོ, ན མནོདྭཱརེཏི དསྶནཏྠཾ། ཏེནཱཧ ‘‘ཨིམེསུཡེཝ སཏྟསུ ཋཱནེསཱུ’’ཏི།

    Bhikkhussa ājīvahetukaṃ kāyavacīduccaritaṃ nāma ayoniso āhārapariyesanahetukameva siyāti āha ‘‘khādanīya…pe… duccarita’’nti. Kāyavacīduccaritaggahaṇañca kāyavacīdvāreyeva ājīvapakopo, na manodvāreti dassanatthaṃ. Tenāha ‘‘imesuyeva sattasu ṭhānesū’’ti.

    ཨནུཔྤནྣཱནནྟི ཨསམུདཱཙཱརཝསེན ཝཱ ཨནནུབྷཱུཏཱརམྨཎཝསེན ཝཱ ཨནུཔྤནྣཱནཾ། ཨཉྙཐཱ ཧི ཨནམཏགྒེ སཾསཱརེ ཨནུཔྤནྣཱ པཱཔཀཱ ཨཀུསལཱ དྷམྨཱ ནཱམ ན སནྟི། ཏེནཱཧ ‘‘ཨེཀསྨིཾ བྷཝེ’’ཏིཨཱདི། ཡསྨིཾ བྷཝེ ཨཡཾ ཨིམཾ ཝཱིརིཡཾ ཨཱརབྷཏི, ཏསྨིཾ ཨེཀསྨིཾ བྷཝེ། ཛནེཏཱིཏི ཨུཔྤཱདེཏི། ཏཱདིསཾ ཚནྡཾ ཀུརུམཱནོ ཨེཝཾ ཚནྡཾ ཛནེཏི ནཱམ། ཝཱཡཱམཾ ཀརོཏཱིཏི པཡོགཾ པརཀྐམཾ ཀརོཏི། ཝཱིརིཡཾ པཝཏྟེཏཱིཏི ཀཱཡིཀཙེཏསིཀཝཱིརིཡཾ པཀཱརཏོ ཝཏྟེཏི། ཝཱིརིཡེན ཙིཏྟཾ པགྒཧིཏཾ ཀརོཏཱིཏི ཏེནེཝ སཧཛཱཏཝཱིརིཡེན ཙིཏྟཾ ཨུཀྑིཔེནྟོ ཀོསཛྫཔཱཏཏོ ནིསེདྷནེན པགྒཧིཏཾ ཀརོཏི། པདཧནཾ པཝཏྟེཏཱིཏི པདྷཱནཾ ཝཱིརིཡཾ ཀརོཏི། པཊིཔཱཊིཡཱ པནེཏཱནི ཙཏྟཱརི པདཱནི ཨཱསེཝནཱབྷཱཝནཱབཧུལཱིཀམྨསཱཏཙྩཀིརིཡཱཧི ཡོཛེཏབྦཱནི།

    Anuppannānanti asamudācāravasena vā ananubhūtārammaṇavasena vā anuppannānaṃ. Aññathā hi anamatagge saṃsāre anuppannā pāpakā akusalā dhammā nāma na santi. Tenāha ‘‘ekasmiṃ bhave’’tiādi. Yasmiṃ bhave ayaṃ imaṃ vīriyaṃ ārabhati, tasmiṃ ekasmiṃ bhave.Janetīti uppādeti. Tādisaṃ chandaṃ kurumāno evaṃ chandaṃ janeti nāma. Vāyāmaṃ karotīti payogaṃ parakkamaṃ karoti. Vīriyaṃpavattetīti kāyikacetasikavīriyaṃ pakārato vatteti. Vīriyena cittaṃ paggahitaṃ karotīti teneva sahajātavīriyena cittaṃ ukkhipento kosajjapātato nisedhanena paggahitaṃ karoti. Padahanaṃ pavattetīti padhānaṃ vīriyaṃ karoti. Paṭipāṭiyā panetāni cattāri padāni āsevanābhāvanābahulīkammasātaccakiriyāhi yojetabbāni.

    ཨུཔྤནྣཔུབྦཱནནྟི སདིསཝོཧཱརེན ཝུཏྟཾ། བྷཝཏི ཧི ཏཾསདིསེསུ ཏབྦོཧཱརོ ཡཐཱ ‘‘སཱ ཨེཝ ཏིཏྟིརི, ཏཱནི ཨེཝ ཨོསདྷཱནཱི’’ཏི། ཏེནཱཧ ‘‘ཨིདཱནི ཏཱདིསེ’’ཏི། ཨུཔྤནྣཱནནྟི ‘‘ཨནུཔྤནྣཱ’’ཏི ཨཝཏྟབྦཏཾ ཨཱཔནྣཱནཾ། པཧཱནཱཡཱཏི པཛཧནཏྠཱཡ། ཨནུཔྤནྣཱནཾ ཀུསལཱནནྟི ཨེཏྠ ཀུསལཱཏི ཨུཏྟརིམནུསྶདྷམྨཱ ཨདྷིཔྤེཏཱ, ཏེསཉྩ ཨུཔྤཱདོ ནཱམ ཨདྷིགམོ པཊིལཱབྷོ, ཏཔྤཊིཀྑེཔེན ཨནུཔྤཱདོ ཨཔྤཊིལཱབྷོཏི ཨཱཧ ‘‘ཨཔྤཊིལདྡྷཱནཾ པཋམཛ྄ཛྷཱནཱདཱིན’’ནྟི། ‘‘ཋིཏིཡཱ ཝཱིརིཡཾ ཨཱརབྷཏཱི’’ཏི ཝུཏྟེ ན ཁཎཋིཏི ཨདྷིཔྤེཏཱ ཏདཏྠཾ ཝཱིརིཡཱརབྦྷེན པཡོཛནཱབྷཱཝཏོ, ཨཐ ཁོ པབནྡྷཋིཏི ཨདྷིཔྤེཏཱཏི ཨཱཧ ‘‘པུནཔྤུནཾ ཨུཔྤཏྟིཔབནྡྷཝསེན ཋིཏཏྠ’’ནྟི། སམྨུསྶནཾ པཊིཔཀྑདྷམྨཝསེན ཨདསྶནམུཔགམནནྟི ཏཔྤཊིཀྑེཔེན ཨསམྨུསྶནཾ ཨསམྨོསོཏི ཨཱཧ ‘‘ཨསམྨོསཱཡཱཏི ཨཝིནཱསནཏྠ’’ནྟི། བྷིཡྻོབྷཱཝོ པུནཔྤུནཾ བྷཝནཾ, སོ པན ཨུཔརཱུཔརི ཨུཔྤཏྟཱིཏི ཨཱཧ ‘‘ཨུཔརིབྷཱཝཱཡཱ’’ཏི། ཝེཔུལླཾ ཨབྷིཎྷཔྤཝཏྟིཡཱ པགུཎབལཝབྷཱཝཱཔཏྟཱིཏི ཝུཏྟཾ ‘‘ཝེཔུལླཱཡཱཏི ཝིཔུལབྷཱཝཱཡཱ’’ཏི, མཧནྟབྷཱཝཱཡཱཏི ཨཏྠོ། བྷཱཝནཱཡ པརིཔཱུརཎཏྠནྟི ཛྷཱནཱདིབྷཱཝནཱཔརིབྲཱུཧནཏྠཾ།

    Uppannapubbānanti sadisavohārena vuttaṃ. Bhavati hi taṃsadisesu tabbohāro yathā ‘‘sā eva tittiri, tāni eva osadhānī’’ti. Tenāha ‘‘idāni tādise’’ti. Uppannānanti ‘‘anuppannā’’ti avattabbataṃ āpannānaṃ. Pahānāyāti pajahanatthāya. Anuppannānaṃ kusalānanti ettha kusalāti uttarimanussadhammā adhippetā, tesañca uppādo nāma adhigamo paṭilābho, tappaṭikkhepena anuppādo appaṭilābhoti āha ‘‘appaṭiladdhānaṃ paṭhamajjhānādīna’’nti. ‘‘Ṭhitiyā vīriyaṃ ārabhatī’’ti vutte na khaṇaṭhiti adhippetā tadatthaṃ vīriyārabbhena payojanābhāvato, atha kho pabandhaṭhiti adhippetāti āha ‘‘punappunaṃ uppattipabandhavasena ṭhitattha’’nti. Sammussanaṃ paṭipakkhadhammavasena adassanamupagamananti tappaṭikkhepena asammussanaṃ asammosoti āha ‘‘asammosāyāti avināsanattha’’nti. Bhiyyobhāvo punappunaṃ bhavanaṃ, so pana uparūpari uppattīti āha ‘‘uparibhāvāyā’’ti. Vepullaṃ abhiṇhappavattiyā paguṇabalavabhāvāpattīti vuttaṃ ‘‘vepullāyāti vipulabhāvāyā’’ti, mahantabhāvāyāti attho. Bhāvanāya paripūraṇatthanti jhānādibhāvanāparibrūhanatthaṃ.

    ཙཏཱུསུ ཋཱནེསཱུཏི ཨནུཔྤནྣཱཀུསལཱནུཔྤཱདནཱདཱིསུ ཙཏཱུསུ ཋཱནེསུ། ཀིཙྩསཱདྷནཝསེནཱཏི ཙཏུབྦིདྷསྶཔི ཀིཙྩསྶ ཨེཀཛ྄ཛྷཾ ནིཔྥཱདནཝསེན།

    Catūsuṭhānesūti anuppannākusalānuppādanādīsu catūsu ṭhānesu. Kiccasādhanavasenāti catubbidhassapi kiccassa ekajjhaṃ nipphādanavasena.

    ཛྷཱནཱནི པུབྦབྷཱགེཔི མགྒཀྑཎེཔི ནཱནཱཏི ཡདིཔི སམཱདྷིཨུཔཀཱརཀེཧི ཨབྷིནིརོཔནཱནུམཛྫནསམྤིཡཱཡནབྲཱུཧནསནྟསུཁསབྷཱཝེཧི ཝིཏཀྐཱདཱིཧི སམྤཡོགབྷེདཏོ བྷཱཝནཱཏིསཡཔྤཝཏྟཱནཾ ཙཏུནྣཾ ཛྷཱནཱནཾ ཝསེན སམྨཱསམཱདྷི ཝིབྷཏྟོ, ཏཐཱཔི ཝཱཡཱམོ ཝིཡ ཨནུཔྤནྣཱཀུསལཱནུཔྤཱདནཱདིཙཏུཝཱཡཱམཀིཙྩཾ, སཏི ཝིཡ ཙ ཨསུབྷཱསུཁཱནིཙྩཱནཏྟེསུ ཀཱཡཱདཱིསུ སུབྷཱདིསཉྙཱཔྤཧཱནཙཏུསཏིཀིཙྩཾ, ཨེཀོ སམཱདྷི ཙཏུཛྷཱནསམཱདྷིཀིཙྩཾ ན སཱདྷེཏཱིཏི པུབྦབྷཱགེཔི པཋམཛ྄ཛྷཱནསམཱདྷི ཨེཝ མགྒཀྑཎེཔི, ཏཐཱ པུབྦབྷཱགེཔི ཙཏུཏྠཛ྄ཛྷཱནསམཱདྷི ཨེཝ མགྒཀྑཎེ པཱིཏི ཨཏྠོ། ནཱནཱམགྒཝསེནཱཏི པཋམམགྒཱདིནཱནཱམགྒཝསེན ཛྷཱནཱནི ནཱནཱ། དུཏིཡཱདཡོཔི མགྒཱ དུཏིཡཱདཱིནཾ ཛྷཱནཱནཾ། ཨཡཾ པནསྶཱཏི ཨེཏྠ མགྒབྷཱཝེན ཙཏུབྦིདྷམྤི ཨེཀཏྟེན གཧེཏྭཱ ‘‘ཨསྶཱ’’ཏི ཝུཏྟཾ, ཨསྶ མགྒསྶཱཏི ཨཏྠོ། ཨཡནྟི པན ཨཡཾ ཛྷཱནཝསེན སབྦསདིསསབྦཱསདིསེཀཙྩསདིསཏཱ ཝིསེསོ།

    Jhānāni pubbabhāgepi maggakkhaṇepi nānāti yadipi samādhiupakārakehi abhiniropanānumajjanasampiyāyanabrūhanasantasukhasabhāvehi vitakkādīhi sampayogabhedato bhāvanātisayappavattānaṃ catunnaṃ jhānānaṃ vasena sammāsamādhi vibhatto, tathāpi vāyāmo viya anuppannākusalānuppādanādicatuvāyāmakiccaṃ, sati viya ca asubhāsukhāniccānattesu kāyādīsu subhādisaññāppahānacatusatikiccaṃ, eko samādhi catujhānasamādhikiccaṃ na sādhetīti pubbabhāgepi paṭhamajjhānasamādhi eva maggakkhaṇepi, tathā pubbabhāgepi catutthajjhānasamādhi eva maggakkhaṇe pīti attho. Nānāmaggavasenāti paṭhamamaggādinānāmaggavasena jhānāni nānā. Dutiyādayopi maggā dutiyādīnaṃ jhānānaṃ. Ayaṃ panassāti ettha maggabhāvena catubbidhampi ekattena gahetvā ‘‘assā’’ti vuttaṃ, assa maggassāti attho. Ayanti pana ayaṃ jhānavasena sabbasadisasabbāsadisekaccasadisatā viseso.

    པཱདཀཛ྄ཛྷཱནནིཡམེན ཧོཏཱིཏི ཨིདྷ པཱདཀཛ྄ཛྷཱནནིཡམཾ དྷུརཾ ཀཏྭཱ ཝུཏྟཾ, ཡཐཱ ཙེཏྠ, ཨེཝཾ སམྨོཧཝིནོདནིཡམྤི (ཝིབྷ॰ ཨཊྛ॰ ༢༠༥)། ཨཊྛསཱལིནིཡཾ (དྷ॰ ས॰ ཨཊྛ॰ ༣༥༠) པན ཝིཔསྶནཱནིཡམོ ཝུཏྟོ སབྦཝཱདཱཝིརོདྷཏོ, ཨིདྷ པན སམྨསིཏཛ྄ཛྷཱནཔུགྒལཛ྄ཛྷཱསཡཝཱདནིཝཏྟནཏོ པཱདཀཛ྄ཛྷཱནནིཡམོ ཝུཏྟོ། ཝིཔསྶནཱནིཡམོ པན སཱདྷཱརཎཏྟཱ ཨིདྷཱཔི ན པཊིཀྑིཏྟོཏི དཊྛབྦོ། ཨཉྙེ ཙ ཨཱཙརིཡཝཱདཱ པརཏོ ཝཀྑམཱནཱ ཝིབྷཛིཏབྦཱཏི ཡཐཱཝུཏྟམེཝ ཏཱཝ པཱདཀཛ྄ཛྷཱནནིཡམཾ ཝིབྷཛནྟོ ཨཱཧ ‘‘པཱདཀཛ྄ཛྷཱནནིཡམེན ཏཱཝཱ’’ཏི། པཋམཛ྄ཛྷཱནིཀོ ཧོཏི, ཡསྨཱ ཨཱསནྣཔདེསེ ཝུཊྛིཏསམཱཔཏྟི མགྒསྶ ཨཏྟནོ སདིསབྷཱཝཾ ཀརོཏི བྷཱུམིཝཎྞོ ཝིཡ གོདྷཱཝཎྞསྶ། པརིཔུཎྞཱནེཝ ཧོནྟཱིཏི ཨཊྛ སཏྟ ཙ ཧོནྟཱིཏི ཨཏྠོ། སཏྟ ཧོནྟི སམྨཱསངྐཔྤསྶ ཨབྷཱཝཏོ། ཚ ཧོནྟི པཱིཏིསམྦོཛ྄ཛྷངྒསྶ ཨབྷཱཝཏོ། མགྒངྒབོཛ྄ཛྷངྒཱནཾ སཏྟཚབྷཱཝཾ ཨཏིདིསཏི ‘‘ཨེས ནཡོ’’ཏི། ཨརཱུཔེ ཙཏུཀྐཔཉྩཀཛ྄ཛྷཱནཾ…པེ॰… ཝུཏྟཾ ཨཊྛསཱལིནིཡནྟི ཨདྷིཔྤཱཡོ། ནནུ ཏཏྠ ‘‘ཨརཱུཔེ ཏིཀཙཏུཀྐཛ྄ཛྷཱནཾ ཨུཔྤཛྫཏཱི’’ཏི (དྷ॰ ས॰ ཨཊྛ॰ ༣༥༠) ཝུཏྟཾ , ན ‘‘ཙཏུཀྐཔཉྩཀཛ྄ཛྷཱན’’ནྟི? སཙྩམེཏཾ, ཡེསུ པན སཾསཡོ ཨཏྠི, ཏེསཾ ཨུཔྤཏྟིདསྶནེན , ཏེན ཨཏྠཏོ ‘‘ཙཏུཀྐཔཉྩཀཛ྄ཛྷཱནཾ ཨུཔྤཛྫཏཱི’’ཏི ཝུཏྟམེཝ ཧོཏཱིཏི ཨེཝམཱཧཱཏི ཝེདིཏབྦཾ། སམུདཱཡཉྩ ཨཔེཀྑིཏྭཱ ‘‘ཏཉྩ ལོཀུཏྟརཾ, ན ལོཀིཡ’’ནྟི ཨཱཧ ‘‘ཨཝཡཝེཀཏྟཾ ལིངྒསམུདཱཡསྶ ཝིསེསཀཾ ཧོཏཱི’’ཏི། ཙཏུཏྠཛ྄ཛྷཱནམེཝ ཧི ཏཏྠ ལོཀིཡཾ ཨུཔྤཛྫཏི, ན ཙཏུཀྐཾ, པཉྩཀཾ ཝཱཏི། ཨེཏྠ ཀཐནྟི པཱདཀཛ྄ཛྷཱནསྶ ཨབྷཱཝཱ ཀཐཾ དཊྛབྦནྟི ཨཏྠོ། ཏཾཛྷཱནིཀཱཝསྶ ཏཏྠ ཏཡོ མགྒཱ ཨུཔྤཛྫནྟི, ཏཛ྄ཛྷཱནིཀཾཔཋམཕལཱདིཾ པཱདཀཾ ཀཏྭཱ ཨུཔརིམགྒབྷཱཝནཱཡཱཏི ཨདྷིཔྤཱཡོ། ཏིཀཙཏུཀྐཛ྄ཛྷཱནིཀཾ པན མགྒཾ བྷཱཝེཏྭཱ ཏཏྠ ཨུཔྤནྣསྶ ཨརཱུཔཙཏུཏྠཛ྄ཛྷཱནཾ, ཏཛ྄ཛྷཱནིཀཾ ཕལཉྩ པཱདཀཾ ཀཏྭཱ ཨུཔརིམགྒབྷཱཝནཱཡ ཨཉྙཛྷཱནིཀཱཔི ཨུཔྤཛྫནྟཱིཏི, ཛྷཱནངྒཱདིནིཡཱམིཀཱ པུབྦཱབྷིསངྑཱརསམཱཔཏྟིཔཱདཀཾ, ན སམྨསིཏབྦཱཏི ཕལསྶཱཔི པཱདཀཏཱ དཊྛབྦཱ།

    Pādakajjhānaniyamena hotīti idha pādakajjhānaniyamaṃ dhuraṃ katvā vuttaṃ, yathā cettha, evaṃ sammohavinodaniyampi (vibha. aṭṭha. 205). Aṭṭhasāliniyaṃ (dha. sa. aṭṭha. 350) pana vipassanāniyamo vutto sabbavādāvirodhato, idha pana sammasitajjhānapuggalajjhāsayavādanivattanato pādakajjhānaniyamo vutto. Vipassanāniyamo pana sādhāraṇattā idhāpi na paṭikkhittoti daṭṭhabbo. Aññe ca ācariyavādā parato vakkhamānā vibhajitabbāti yathāvuttameva tāva pādakajjhānaniyamaṃ vibhajanto āha ‘‘pādakajjhānaniyamena tāvā’’ti. Paṭhamajjhāniko hoti, yasmā āsannapadese vuṭṭhitasamāpatti maggassa attano sadisabhāvaṃ karoti bhūmivaṇṇo viya godhāvaṇṇassa. Paripuṇṇāneva hontīti aṭṭha satta ca hontīti attho. Satta honti sammāsaṅkappassa abhāvato. Cha honti pītisambojjhaṅgassa abhāvato. Maggaṅgabojjhaṅgānaṃ sattachabhāvaṃ atidisati ‘‘esa nayo’’ti. Arūpe catukkapañcakajjhānaṃ…pe… vuttaṃ aṭṭhasāliniyanti adhippāyo. Nanu tattha ‘‘arūpe tikacatukkajjhānaṃ uppajjatī’’ti (dha. sa. aṭṭha. 350) vuttaṃ , na ‘‘catukkapañcakajjhāna’’nti? Saccametaṃ, yesu pana saṃsayo atthi, tesaṃ uppattidassanena , tena atthato ‘‘catukkapañcakajjhānaṃ uppajjatī’’ti vuttameva hotīti evamāhāti veditabbaṃ. Samudāyañca apekkhitvā ‘‘tañca lokuttaraṃ, na lokiya’’nti āha ‘‘avayavekattaṃ liṅgasamudāyassa visesakaṃ hotī’’ti. Catutthajjhānameva hi tattha lokiyaṃ uppajjati, na catukkaṃ, pañcakaṃ vāti. Ettha kathanti pādakajjhānassa abhāvā kathaṃ daṭṭhabbanti attho. Taṃjhānikāvassa tattha tayo maggā uppajjanti, tajjhānikaṃpaṭhamaphalādiṃ pādakaṃ katvā uparimaggabhāvanāyāti adhippāyo. Tikacatukkajjhānikaṃ pana maggaṃ bhāvetvā tattha uppannassa arūpacatutthajjhānaṃ, tajjhānikaṃ phalañca pādakaṃ katvā uparimaggabhāvanāya aññajhānikāpi uppajjantīti, jhānaṅgādiniyāmikā pubbābhisaṅkhārasamāpattipādakaṃ, na sammasitabbāti phalassāpi pādakatā daṭṭhabbā.

    ཀེཙི པནཱཏི མོརཝཱཔཱིམཧཱདཏྟཏྠེརཾ སནྡྷཱཡཱཧ། པུན ཀེཙཱིཏི ཏིཔིཊཀཙཱུལཱ༹བྷཡཏྠེརཾ ། ཏཏིཡཝཱརེ ཀེཙཱིཏི ‘‘པཱདཀཛ྄ཛྷཱནམེཝ ནིཡམེཏཱི’’ཏི ཨེཝཾ ཝཱདིནཾ ཏིཔིཊཀཙཱུལ༹ནཱགཏྠེརཉྩེཝ ཨནནྟརཾ ཝུཏྟེ དྭེ ཙ ཐེརེ ཋཔེཏྭཱ ཨིཏརེ ཐེརེ སནྡྷཱཡ ཝདཏི།

    Keci panāti moravāpīmahādattattheraṃ sandhāyāha. Puna kecīti tipiṭakacūḷābhayattheraṃ . Tatiyavāre kecīti ‘‘pādakajjhānameva niyametī’’ti evaṃ vādinaṃ tipiṭakacūḷanāgattherañceva anantaraṃ vutte dve ca there ṭhapetvā itare there sandhāya vadati.

    ༤༠༣. སསནྟཏིཔརིཡཱཔནྣཱནཾ དུཀྑསམུདཡཱནཾ ཨཔྤཝཏྟིབྷཱཝེན པརིགྒཡ྄ཧམཱནོ ནིརོདྷོཔི སསནྟཏིཔརིཡཱཔནྣོ ཝིཡ ཧོཏཱིཏི ཀཏྭཱ ཝུཏྟཾ ‘‘ཨཏྟནོ ཝཱ ཙཏྟཱརི སཙྩཱནཱི’’ཏི། པརསྶ ཝཱཏི ཨེཏྠཱཔི ཨེསེཝ ནཡོ། ཏེནཱཧ བྷགཝཱ ‘‘ཨིམསྨིཾཡེཝ བྱཱམམཏྟེ ཀལེ༹ཝརེ སསཉྙིམྷི སམནཀེ ལོཀཉྩ པཉྙཱཔེམི, ལོཀསམུདཡཉྩ པཉྙཱཔེམི, ལོཀནིརོདྷཉྩ པཉྙཱཔེམི, ལོཀནིརོདྷགཱམིནིཔཊིཔདཉྩ པཉྙཱཔེམཱི’’ཏི (སཾ॰ ནི॰ ༡.༡༠༧; ཨ॰ ནི॰ ༤.༤༥) ཀཐཾ པན ཨཱདིཀམྨིཀོ ནིརོདྷམགྒསཙྩཱནི པརིགྒཎྷཱཏཱིཏི? ཨནུསྶཝཱདིསིདྡྷམཱཀཱརཾ པརིགྒཎྷཱཏི། ཨེཝཉྩ ཀཏྭཱ ལོཀུཏྟརབོཛ྄ཛྷངྒེ ཨུདྡིསྶཱཔི པརིགྒཧོ ན ཝིརུཛ྄ཛྷཏི། ཡཐཱསམྦྷཝཏོཏི སམྦྷཝཱནུརཱུཔཾ, ཋཔེཏྭཱ ནིརོདྷསཙྩཾ སེསསཙྩཝསེན སམུདཡཝཡཱཏི ཝེདིཏབྦཱཏི ཨཏྠོ།

    403. Sasantatipariyāpannānaṃ dukkhasamudayānaṃ appavattibhāvena pariggayhamāno nirodhopi sasantatipariyāpanno viya hotīti katvā vuttaṃ ‘‘attano vā cattāri saccānī’’ti. Parassa vāti etthāpi eseva nayo. Tenāha bhagavā ‘‘imasmiṃyeva byāmamatte kaḷevare sasaññimhi samanake lokañca paññāpemi, lokasamudayañca paññāpemi, lokanirodhañca paññāpemi, lokanirodhagāminipaṭipadañca paññāpemī’’ti (saṃ. ni. 1.107; a. ni. 4.45) kathaṃ pana ādikammiko nirodhamaggasaccāni pariggaṇhātīti? Anussavādisiddhamākāraṃ pariggaṇhāti. Evañca katvā lokuttarabojjhaṅge uddissāpi pariggaho na virujjhati. Yathāsambhavatoti sambhavānurūpaṃ, ṭhapetvā nirodhasaccaṃ sesasaccavasena samudayavayāti veditabbāti attho.

    ཙཏུསཙྩཔབྦཝཎྞནཱ ནིཊྛིཏཱ།

    Catusaccapabbavaṇṇanā niṭṭhitā.

    དྷམྨཱནུཔསྶནཱཝཎྞནཱ ནིཊྛིཏཱ།

    Dhammānupassanāvaṇṇanā niṭṭhitā.

    ༤༠༤. ‘‘ཨཊྛིཀསངྑལིཀཾ སམཾས’’ནྟིཨཱདིཀཱ སཏྟ སིཝཐིཀཱ ཨཊྛིཀཀམྨཊྛཱནཏཱཡ ཨིཏརཱསཾ ཨུདྡྷུམཱཏཀཱདཱིནཾ སབྷཱཝེནེཝཱཏི ནཝནྣཾ སིཝཐིཀཱནཾ ཨཔྤནཱཀམྨཊྛཱནཏཱ ཝུཏྟཱ། དྭེཡེཝཱཏི ཨཱནཱཔཱནཾ, དྭཏྟིཾསཱཀཱརོཏི ཨིམཱནི དྭེཡེཝ། ཨབྷིནིཝེསོཏི ཝིཔསྶནཱབྷིནིཝེསོ, སོ པན སམྨསནིཡདྷམྨཔརིགྒཧོ། ཨིརིཡཱཔཐཱ, ཨཱལོཀིཏཱདཡོ ཙ རཱུཔདྷམྨཱནཾ ཨཝཏྠཱཝིསེསམཏྟཏཱཡ ན སམྨསནུཔགཱ ཝིཉྙཏྟིཨཱདཡོ ཝིཡ། ནཱིཝརཎབོཛ྄ཛྷངྒཱ ཨཱདིཏོ ན པརིགྒཧེཏབྦཱཏི ཝུཏྟཾ ‘‘ཨིརིཡཱཔཐ…པེ॰… ན ཛཱཡཏཱི’’ཏི། ཀེསཱདིཨཔདེསེན ཏདུཔཱདཱནདྷམྨཱ ཝིཡ ཨིརིཡཱཔཐཱདིཨཔདེསེན ཏདཝཏྠཱ རཱུཔདྷམྨཱ པརིགྒཡ྄ཧནྟི, ནཱིཝརཎཱདིམུཁེན ཙ ཏཾསམྤཡུཏྟཱ, ཏཾནིསྶཡདྷམྨཱཏི ཨདྷིཔྤཱཡེན མཧཱསིཝཏྠེརོ ཙ ཨིརིཡཱཔཐཱདཱིསུཔི ‘‘ཨབྷིནིཝེསོ ཛཱཡཏཱི’’ཏི ཨཝོཙ། ‘‘ཨཏྠི ནུ ཁོ མེ’’ཏིཨཱདི པན སབྷཱཝཏོ ཨིརིཡཱཔཐཱདཱིནཾ ཨཱདིཀམྨིཀསྶ ཨནིཙྪིཏབྷཱཝདསྶནཾ། ཨཔརིཉྙཱཔུབྦིཀཱ ཧི པརིཉྙཱཏི།

    404. ‘‘Aṭṭhikasaṅkhalikaṃ samaṃsa’’ntiādikā satta sivathikā aṭṭhikakammaṭṭhānatāya itarāsaṃ uddhumātakādīnaṃ sabhāvenevāti navannaṃ sivathikānaṃ appanākammaṭṭhānatā vuttā. Dveyevāti ānāpānaṃ, dvattiṃsākāroti imāni dveyeva. Abhinivesoti vipassanābhiniveso, so pana sammasaniyadhammapariggaho. Iriyāpathā, ālokitādayo ca rūpadhammānaṃ avatthāvisesamattatāya na sammasanupagā viññattiādayo viya. Nīvaraṇabojjhaṅgā ādito na pariggahetabbāti vuttaṃ ‘‘iriyāpatha…pe… na jāyatī’’ti. Kesādiapadesena tadupādānadhammā viya iriyāpathādiapadesena tadavatthā rūpadhammā pariggayhanti, nīvaraṇādimukhena ca taṃsampayuttā, taṃnissayadhammāti adhippāyena mahāsivatthero ca iriyāpathādīsupi ‘‘abhiniveso jāyatī’’ti avoca. ‘‘Atthi nu kho me’’tiādi pana sabhāvato iriyāpathādīnaṃ ādikammikassa anicchitabhāvadassanaṃ. Apariññāpubbikā hi pariññāti.

    ཀཱམཾ ‘‘ཨིདྷ བྷིཀྑཝེ བྷིཀྑཱུ’’ཏིཨཱདིནཱ ཨུདྡེསནིདྡེསེསུ ཏཏྠ ཏཏྠ བྷིཀྑུགྒཧཎཾ ཀཏཾ ཏཾཔཊིཔཏྟིཡཱ བྷིཀྑུབྷཱཝདསྶནཏྠཾ, དེསནཱ པན སབྦསཱདྷཱརཎཱཏི དསྶེཏུཾ ‘‘ཡོ ཧི ཀོཙི བྷིཀྑཝེ’’ ཨིཙྩེཝ ཝུཏྟཾ, ན བྷིཀྑུ ཡེཝཱཏི དསྶེནྟོ ‘‘ཡོ ཧི ཀོཙི བྷིཀྑུ ཝཱ’’ཏིཨཱདིམཱཧ། དསྶནམགྒེན ཉཱཏམརིཡཱདཾ ཨནཏིཀྐམིཏྭཱ ཛཱནནྟཱི སིཁཱཔྤཏྟཱ ཨགྒམགྒཔཉྙཱ ཨཉྙཱ ནཱམ, ཏསྶ ཕལབྷཱཝཏོ ཨགྒཕལཾ པཱིཏི ཨཱཧ ‘‘ཨཉྙཱཏི ཨརཧཏྟ’’ནྟི།

    Kāmaṃ ‘‘idha bhikkhave bhikkhū’’tiādinā uddesaniddesesu tattha tattha bhikkhuggahaṇaṃ kataṃ taṃpaṭipattiyā bhikkhubhāvadassanatthaṃ, desanā pana sabbasādhāraṇāti dassetuṃ ‘‘yo hi koci bhikkhave’’ icceva vuttaṃ, na bhikkhu yevāti dassento ‘‘yo hi koci bhikkhu vā’’tiādimāha. Dassanamaggena ñātamariyādaṃ anatikkamitvā jānantī sikhāppattā aggamaggapaññā aññā nāma, tassa phalabhāvato aggaphalaṃ pīti āha ‘‘aññāti arahatta’’nti.

    ཨཔྤཏརེཔི ཀཱལེ སཱསནསྶ ནིཡྻཱནིཀབྷཱཝཾ དསྶེནྟོཏི ཡོཛནཱ། ནིཡྻཱཏེནྟོཏི ནིགམེནྟོ།

    Appatarepi kāle sāsanassa niyyānikabhāvaṃ dassentoti yojanā. Niyyātentoti nigamento.

    མཧཱསཏིཔཊྛཱནསུཏྟཝཎྞནཱཡ ལཱིནཏྠཔྤཀཱསནཱ།

    Mahāsatipaṭṭhānasuttavaṇṇanāya līnatthappakāsanā.




    Next: ༡༠. པཱཡཱསིརཱཛཉྙསུཏྟཝཎྞནཱ • 10. Pāyāsirājaññasuttavaṇṇanā




    Related texts:



    ཏིཔིཊཀ (མཱུལ) • Tipiṭaka (Mūla) / སུཏྟཔིཊཀ • Suttapiṭaka / དཱིགྷནིཀཱཡ • Dīghanikāya / ༩. མཧཱསཏིཔཊྛཱནསུཏྟཾ • 9. Mahāsatipaṭṭhānasuttaṃ

    ཨཊྛཀཐཱ • Aṭṭhakathā / སུཏྟཔིཊཀ (ཨཊྛཀཐཱ) • Suttapiṭaka (aṭṭhakathā) / དཱིགྷ ནིཀཱཡ (ཨཊྛཀཐཱ) • Dīgha nikāya (aṭṭhakathā) / ༩. མཧཱསཏིཔཊྛཱནསུཏྟཝཎྞནཱ • 9. Mahāsatipaṭṭhānasuttavaṇṇanā


    © 1991-2023 The Titi Tudorancea Bulletin | Titi Tudorancea® is a Registered Trademark | Terms of use and privacy policy
    Contact