| Library / Tipiṭaka / திபிடக • Tipiṭaka / தீ³க⁴ நிகாய (அட்ட²கதா²) • Dīgha nikāya (aṭṭhakathā) |
8. மஹாஸீஹனாத³ஸுத்தவண்ணனா
8. Mahāsīhanādasuttavaṇṇanā
அசேலகஸ்ஸபவத்து²வண்ணனா
Acelakassapavatthuvaṇṇanā
381. ஏவங் மே ஸுதங்…பே॰… உருஞ்ஞாயங் விஹரதீதி மஹாஸீஹனாத³ஸுத்தங். தத்ராயங் அபுப்³ப³பத³வண்ணனா. உருஞ்ஞாயந்தி உருஞ்ஞாதி தஸ்ஸ ரட்ட²ஸ்ஸபி நக³ரஸ்ஸபி ஏததே³வ நாமங், ப⁴க³வா உருஞ்ஞானக³ரங் உபனிஸ்ஸாய விஹரதி. கண்ணகத்த²லே மிக³தா³யேதி தஸ்ஸ நக³ரஸ்ஸ அவிதூ³ரே கண்ணகத்த²லங் நாம ஏகோ ரமணீயோ பூ⁴மிபா⁴கோ³ அத்தி². ஸோ மிகா³னங் அப⁴யத்தா²ய தி³ன்னத்தா ‘‘மிக³தா³யோ’’தி வுச்சதி, தஸ்மிங் கண்ணகத்த²லே மிக³தா³யே. அசேலோதி நக்³க³பரிப்³பா³ஜகோ. கஸ்ஸபோதி தஸ்ஸ நாமங். தபஸ்ஸிந்தி தபனிஸ்ஸிதகங். லூகா²ஜீவிந்தி அசேலகமுத்தாசாராதி³வஸேன லூகோ² ஆஜீவோ அஸ்ஸாதி லூகா²ஜீவீ, தங் லூகா²ஜீவிங். உபக்கோஸதீதி உபண்டே³தி. உபவத³தீதி ஹீளேதி வம்பே⁴தி. த⁴ம்மஸ்ஸ ச அனுத⁴ம்மங் ப்³யாகரொந்தீதி போ⁴தா கோ³தமேன வுத்தகாரணஸ்ஸ அனுகாரணங் கதெ²ந்தி. ஸஹத⁴ம்மிகோ வாதா³னுவாதோ³தி பரேஹி வுத்தகாரணேன ஸகாரணோ ஹுத்வா தும்ஹாகங் வாதோ³ வா அனுவாதோ³ வா விஞ்ஞூஹி க³ரஹிதப்³ப³ங், காரணங் கோசி அப்பமத்தகோபி கிங் ந ஆக³ச்ச²தி. இத³ங் வுத்தங் ஹோதி, ‘‘கிங் ஸப்³பா³காரேனபி தவ வாதே³ கா³ரய்ஹங் காரணங் நத்தீ²’’தி. அனப்³ப⁴க்கா²துகாமாதி ந அபூ⁴தேன வத்துகாமா.
381.Evaṃme sutaṃ…pe… uruññāyaṃ viharatīti mahāsīhanādasuttaṃ. Tatrāyaṃ apubbapadavaṇṇanā. Uruññāyanti uruññāti tassa raṭṭhassapi nagarassapi etadeva nāmaṃ, bhagavā uruññānagaraṃ upanissāya viharati. Kaṇṇakatthale migadāyeti tassa nagarassa avidūre kaṇṇakatthalaṃ nāma eko ramaṇīyo bhūmibhāgo atthi. So migānaṃ abhayatthāya dinnattā ‘‘migadāyo’’ti vuccati, tasmiṃ kaṇṇakatthale migadāye. Aceloti naggaparibbājako. Kassapoti tassa nāmaṃ. Tapassinti tapanissitakaṃ. Lūkhājīvinti acelakamuttācārādivasena lūkho ājīvo assāti lūkhājīvī, taṃ lūkhājīviṃ. Upakkosatīti upaṇḍeti. Upavadatīti hīḷeti vambheti. Dhammassa ca anudhammaṃ byākarontīti bhotā gotamena vuttakāraṇassa anukāraṇaṃ kathenti. Sahadhammiko vādānuvādoti parehi vuttakāraṇena sakāraṇo hutvā tumhākaṃ vādo vā anuvādo vā viññūhi garahitabbaṃ, kāraṇaṃ koci appamattakopi kiṃ na āgacchati. Idaṃ vuttaṃ hoti, ‘‘kiṃ sabbākārenapi tava vāde gārayhaṃ kāraṇaṃ natthī’’ti. Anabbhakkhātukāmāti na abhūtena vattukāmā.
382. ஏகச்சங் தபஸ்ஸிங் லூகா²ஜீவிந்திஆதீ³ஸு இதே⁴கச்சோ அசேலகபப்³ப³ஜ்ஜாதி³தபனிஸ்ஸிதத்தா தபஸ்ஸீ ‘‘லூகே²ன ஜீவிதங் கப்பெஸ்ஸாமீ’’தி திணகோ³மயாதி³ப⁴க்க²னாதீ³ஹி நானப்பகாரேஹி அத்தானங் கிலமேதி, அப்பபுஞ்ஞதாய ச ஸுகே²ன ஜீவிதவுத்திமேவ ந லப⁴தி, ஸோ தீணி து³ச்சரிதானி பூரெத்வா நிரயே நிப்³ப³த்ததி.
382.Ekaccaṃ tapassiṃ lūkhājīvintiādīsu idhekacco acelakapabbajjāditapanissitattā tapassī ‘‘lūkhena jīvitaṃ kappessāmī’’ti tiṇagomayādibhakkhanādīhi nānappakārehi attānaṃ kilameti, appapuññatāya ca sukhena jīvitavuttimeva na labhati, so tīṇi duccaritāni pūretvā niraye nibbattati.
அபரோ தாதி³ஸங் தபனிஸ்ஸிதோபி புஞ்ஞவா ஹோதி, லப⁴தி லாப⁴ஸக்காரங். ஸோ ‘‘ந தா³னி மயா ஸதி³ஸோ அத்தீ²’’தி அத்தானங் உச்சே டா²னே ஸம்பா⁴வெத்வா ‘‘பி⁴ய்யோஸோமத்தாய லாப⁴ங் உப்பாதெ³ஸ்ஸாமீ’’தி அனேஸனவஸேன தீணி து³ச்சரிதானி பூரெத்வா நிரயே நிப்³ப³த்ததி. இமே த்³வே ஸந்தா⁴ய பட²மனயோ வுத்தோ.
Aparo tādisaṃ tapanissitopi puññavā hoti, labhati lābhasakkāraṃ. So ‘‘na dāni mayā sadiso atthī’’ti attānaṃ ucce ṭhāne sambhāvetvā ‘‘bhiyyosomattāya lābhaṃ uppādessāmī’’ti anesanavasena tīṇi duccaritāni pūretvā niraye nibbattati. Ime dve sandhāya paṭhamanayo vutto.
அபரோ தபனிஸ்ஸிதகோ லூகா²ஜீவீ அப்பபுஞ்ஞோ ஹோதி, ந லப⁴தி ஸுகே²ன ஜீவிதவுத்திங். ஸோ ‘‘மய்ஹங் புப்³பே³பி அகதபுஞ்ஞதாய ஸுக²ஜீவிகா நுப்பஜ்ஜதி , ஹந்த³தா³னி புஞ்ஞானி கரோமீ’’தி தீணி ஸுசரிதானி பூரெத்வா ஸக்³கே³ நிப்³ப³த்ததி.
Aparo tapanissitako lūkhājīvī appapuñño hoti, na labhati sukhena jīvitavuttiṃ. So ‘‘mayhaṃ pubbepi akatapuññatāya sukhajīvikā nuppajjati , handadāni puññāni karomī’’ti tīṇi sucaritāni pūretvā sagge nibbattati.
அபரோ லூகா²ஜீவீ புஞ்ஞவா ஹோதி, லப⁴தி ஸுகே²ன ஜீவிதவுத்திங். ஸோ – ‘‘மய்ஹங் புப்³பே³பி கதபுஞ்ஞதாய ஸுக²ஜீவிகா உப்பஜ்ஜதீ’’தி சிந்தெத்வா அனேஸனங் பஹாய தீணி ஸுசரிதானி பூரெத்வா ஸக்³கே³ நிப்³ப³த்ததி. இமே த்³வே ஸந்தா⁴ய து³தியனயோ வுத்தோ.
Aparo lūkhājīvī puññavā hoti, labhati sukhena jīvitavuttiṃ. So – ‘‘mayhaṃ pubbepi katapuññatāya sukhajīvikā uppajjatī’’ti cintetvā anesanaṃ pahāya tīṇi sucaritāni pūretvā sagge nibbattati. Ime dve sandhāya dutiyanayo vutto.
ஏகோ பன தபஸ்ஸீ அப்பது³க்க²விஹாரீ ஹோதி பா³ஹிரகாசாரயுத்தோ தாபஸோ வா ச²ன்னபரிப்³பா³ஜகோ வா, அப்பபுஞ்ஞதாய ச மனாபே பச்சயே ந லப⁴தி. ஸோ அனேஸனவஸேன தீணி து³ச்சரிதானி பூரெத்வா அத்தானங் ஸுகே² ட²பெத்வா நிரயே நிப்³ப³த்ததி.
Eko pana tapassī appadukkhavihārī hoti bāhirakācārayutto tāpaso vā channaparibbājako vā, appapuññatāya ca manāpe paccaye na labhati. So anesanavasena tīṇi duccaritāni pūretvā attānaṃ sukhe ṭhapetvā niraye nibbattati.
அபரோ புஞ்ஞவா ஹோதி, ஸோ – ‘‘ந தா³னி மயா ஸதி³ஸோ அத்தீ²’’தி மானங் உப்பாதெ³த்வா அனேஸனவஸேன லாப⁴ஸக்காரங் வா உப்பாதெ³ந்தோ மிச்சா²தி³ட்டி²வஸேன – ‘‘ஸுகோ² இமிஸ்ஸா பரிப்³பா³ஜிகாய த³ஹராய முது³காய லோமஸாய ஸம்ப²ஸ்ஸோ’’திஆதீ³னி சிந்தெத்வா காமேஸு பாதப்³யதங் வா ஆபஜ்ஜந்தோ தீணி து³ச்சரிதானி பூரெத்வா நிரயே நிப்³ப³த்ததி. இமே த்³வே ஸந்தா⁴ய ததியனயோ வுத்தோ.
Aparo puññavā hoti, so – ‘‘na dāni mayā sadiso atthī’’ti mānaṃ uppādetvā anesanavasena lābhasakkāraṃ vā uppādento micchādiṭṭhivasena – ‘‘sukho imissā paribbājikāya daharāya mudukāya lomasāya samphasso’’tiādīni cintetvā kāmesu pātabyataṃ vā āpajjanto tīṇi duccaritāni pūretvā niraye nibbattati. Ime dve sandhāya tatiyanayo vutto.
அபரோ பன அப்பது³க்க²விஹாரீ அப்பபுஞ்ஞோ ஹோதி, ஸோ – ‘‘அஹங் புப்³பே³பி அகதபுஞ்ஞதாய ஸுகே²ன ஜீவிகங் ந லபா⁴மீ’’தி தீணி ஸுசரிதானி பூரெத்வா ஸக்³கே³ நிப்³ப³த்ததி.
Aparo pana appadukkhavihārī appapuñño hoti, so – ‘‘ahaṃ pubbepi akatapuññatāya sukhena jīvikaṃ na labhāmī’’ti tīṇi sucaritāni pūretvā sagge nibbattati.
அபரோ புஞ்ஞவா ஹோதி, ஸோ – ‘‘புப்³பே³பாஹங் கதபுஞ்ஞதாய ஸுக²ங் லபா⁴மி, இதா³னி புஞ்ஞானி கரிஸ்ஸாமீ’’தி தீணி ஸுசரிதானி பூரெத்வா ஸக்³கே³ நிப்³ப³த்ததி. இமே த்³வே ஸந்தா⁴ய சதுத்த²னயோ வுத்தோ. இத³ங் தித்தி²யவஸேன ஆக³தங், ஸாஸனேபி பன லப்³ப⁴தி.
Aparo puññavā hoti, so – ‘‘pubbepāhaṃ katapuññatāya sukhaṃ labhāmi, idāni puññāni karissāmī’’ti tīṇi sucaritāni pūretvā sagge nibbattati. Ime dve sandhāya catutthanayo vutto. Idaṃ titthiyavasena āgataṃ, sāsanepi pana labbhati.
ஏகச்சோ ஹி து⁴தங்க³ஸமாதா³னவஸேன லூகா²ஜீவீ ஹோதி, அப்பபுஞ்ஞதாய வா ஸகலம்பி கா³மங் விசரித்வா உத³ரபூரங் ந லப⁴தி. ஸோ – ‘‘பச்சயே உப்பாதெ³ஸ்ஸாமீ’’தி வேஜ்ஜகம்மாதி³வஸேன வா அனேஸனங் கத்வா, அரஹத்தங் வா படிஜானித்வா, தீணி வா குஹனவத்தூ²னி படிஸேவித்வா நிரயே நிப்³ப³த்ததி.
Ekacco hi dhutaṅgasamādānavasena lūkhājīvī hoti, appapuññatāya vā sakalampi gāmaṃ vicaritvā udarapūraṃ na labhati. So – ‘‘paccaye uppādessāmī’’ti vejjakammādivasena vā anesanaṃ katvā, arahattaṃ vā paṭijānitvā, tīṇi vā kuhanavatthūni paṭisevitvā niraye nibbattati.
அபரோ ச தாதி³ஸோவ புஞ்ஞவா ஹோதி. ஸோ தாய புஞ்ஞஸம்பத்தியா மானங் ஜனயித்வா உப்பன்னங் லாப⁴ங் தா²வரங் கத்துகாமோ அனேஸனவஸேன தீணி து³ச்சரிதானி பூரெத்வா நிரயே உப்பஜ்ஜதி.
Aparo ca tādisova puññavā hoti. So tāya puññasampattiyā mānaṃ janayitvā uppannaṃ lābhaṃ thāvaraṃ kattukāmo anesanavasena tīṇi duccaritāni pūretvā niraye uppajjati.
அபரோ ஸமாதி³ன்னது⁴தங்கோ³ அப்பபுஞ்ஞோவ ஹோதி, ந லப⁴தி ஸுகே²ன ஜீவிதவுத்திங். ஸோ – ‘‘புப்³பே³பாஹங் அகதபுஞ்ஞதாய கிஞ்சி ந லபா⁴மி, ஸசே இதா³னி அனேஸனங் கரிஸ்ஸங், ஆயதிம்பி து³ல்லப⁴ஸுகோ² ப⁴விஸ்ஸாமீ’’தி தீணி ஸுசரிதானி பூரெத்வா அரஹத்தங் பத்துங் அஸக்கொந்தோ ஸக்³கே³ நிப்³ப³த்ததி.
Aparo samādinnadhutaṅgo appapuññova hoti, na labhati sukhena jīvitavuttiṃ. So – ‘‘pubbepāhaṃ akatapuññatāya kiñci na labhāmi, sace idāni anesanaṃ karissaṃ, āyatimpi dullabhasukho bhavissāmī’’ti tīṇi sucaritāni pūretvā arahattaṃ pattuṃ asakkonto sagge nibbattati.
அபரோ புஞ்ஞவா ஹோதி, ஸோ – ‘‘புப்³பே³பாஹங் கதபுஞ்ஞதாய ஏதரஹி ஸுகி²தோ, இதா³னிபி புஞ்ஞங் கரிஸ்ஸாமீ’’தி அனேஸனங் பஹாய தீணி ஸுசரிதானி பூரெத்வா அரஹத்தங் பத்துங் அஸக்கொந்தோ ஸக்³கே³ நிப்³ப³த்ததி.
Aparo puññavā hoti, so – ‘‘pubbepāhaṃ katapuññatāya etarahi sukhito, idānipi puññaṃ karissāmī’’ti anesanaṃ pahāya tīṇi sucaritāni pūretvā arahattaṃ pattuṃ asakkonto sagge nibbattati.
383. ஆக³திஞ்சாதி – ‘‘அஸுகட்டா²னதோ நாம இமே ஆக³தா’’தி ஏவங் ஆக³திஞ்ச. க³திஞ்சாதி இதா³னி க³ந்தப்³ப³ட்டா²னஞ்ச. சுதிஞ்சாதி ததோ சவனஞ்ச. உபபத்திஞ்சாதி ததோ சுதானங் புன உபபத்திஞ்ச. கிங் ஸப்³ப³ங் தபங் க³ரஹிஸ்ஸாமீதி – ‘‘கேன காரணேன க³ரஹிஸ்ஸாமி, க³ரஹிதப்³ப³மேவ ஹி மயங் க³ரஹாம, பஸங்ஸிதப்³ப³ங் பஸங்ஸாம, ந ப⁴ண்டி³கங் கரொந்தோ மஹாரஜகோ விய தோ⁴தஞ்ச அதோ⁴தஞ்ச ஏகதோ கரோமா’’தி த³ஸ்ஸேதி. இதா³னி தமத்த²ங் பகாஸெந்தோ – ‘‘ஸந்தி கஸ்ஸப ஏகே ஸமணப்³ராஹ்மணா’’திஆதி³மாஹ.
383.Āgatiñcāti – ‘‘asukaṭṭhānato nāma ime āgatā’’ti evaṃ āgatiñca. Gatiñcāti idāni gantabbaṭṭhānañca. Cutiñcāti tato cavanañca. Upapattiñcāti tato cutānaṃ puna upapattiñca. Kiṃ sabbaṃ tapaṃ garahissāmīti – ‘‘kena kāraṇena garahissāmi, garahitabbameva hi mayaṃ garahāma, pasaṃsitabbaṃ pasaṃsāma, na bhaṇḍikaṃ karonto mahārajako viya dhotañca adhotañca ekato karomā’’ti dasseti. Idāni tamatthaṃ pakāsento – ‘‘santi kassapa eke samaṇabrāhmaṇā’’tiādimāha.
384. யங் தே ஏகச்சந்தி பஞ்சவித⁴ங் ஸீலங், தஞ்ஹி லோகே ந கோசி ‘‘ந ஸாதூ⁴’’தி வத³தி. புன யங் தே ஏகச்சந்தி பஞ்சவித⁴ங் வேரங், தங் ந கோசி ‘‘ஸாதூ⁴’’தி வத³தி. புன யங் தே ஏகச்சந்தி பஞ்சத்³வாரே அஸங்வரங், தே கிர – ‘‘சக்கு² நாம ந நிருந்தி⁴தப்³ப³ங், சக்கு²னா மனாபங் ரூபங் த³ட்ட²ப்³ப³’’ந்தி வத³ந்தி, ஏஸ நயோ ஸோதாதீ³ஸு. புன யங் தே ஏகச்சந்தி பஞ்சத்³வாரே ஸங்வரங்.
384.Yaṃ te ekaccanti pañcavidhaṃ sīlaṃ, tañhi loke na koci ‘‘na sādhū’’ti vadati. Puna yaṃ te ekaccanti pañcavidhaṃ veraṃ, taṃ na koci ‘‘sādhū’’ti vadati. Puna yaṃ te ekaccanti pañcadvāre asaṃvaraṃ, te kira – ‘‘cakkhu nāma na nirundhitabbaṃ, cakkhunā manāpaṃ rūpaṃ daṭṭhabba’’nti vadanti, esa nayo sotādīsu. Puna yaṃ te ekaccanti pañcadvāre saṃvaraṃ.
ஏவங் பரேஸங் வாதே³ன ஸஹ அத்தனோ வாத³ஸ்ஸ ஸமானாஸமானதங் த³ஸ்ஸெத்வா இதா³னி அத்தனோ வாதே³ன ஸஹ பரேஸங் வாத³ஸ்ஸ ஸமானாஸமானதங் த³ஸ்ஸெந்தோ ‘‘யங் மய’’ந்திஆதி³மாஹ. தத்ராபி பஞ்சஸீலாதி³வஸேனேவ அத்தோ² வேதி³தப்³போ³.
Evaṃ paresaṃ vādena saha attano vādassa samānāsamānataṃ dassetvā idāni attano vādena saha paresaṃ vādassa samānāsamānataṃ dassento ‘‘yaṃ maya’’ntiādimāha. Tatrāpi pañcasīlādivaseneva attho veditabbo.
ஸமனுயுஞ்ஜாபனகதா²வண்ணனா
Samanuyuñjāpanakathāvaṇṇanā
385. ஸமனுயுஞ்ஜந்தந்தி ஸமனுயுஞ்ஜந்து, எத்த² ச லத்³தி⁴ங் புச்ச²ந்தோ ஸமனுயுஞ்ஜதி நாம, காரணங் புச்ச²ந்தோ ஸமனுகா³ஹதி நாம, உப⁴யங் புச்ச²ந்தோ ஸமனுபா⁴ஸதி நாம. ஸத்தா²ரா வா ஸத்தா²ரந்தி ஸத்தா²ரா வா ஸத்³தி⁴ங் ஸத்தா²ரங் உபஸங்ஹரித்வா – ‘‘கிங் தே ஸத்தா² தே த⁴ம்மே ஸப்³ப³ஸோ பஹாய வத்ததி, உதா³ஹு ஸமணோ கோ³தமோ’’தி. து³தியபதே³பி ஏஸேவ நயோ.
385.Samanuyuñjantanti samanuyuñjantu, ettha ca laddhiṃ pucchanto samanuyuñjati nāma, kāraṇaṃ pucchanto samanugāhati nāma, ubhayaṃ pucchanto samanubhāsati nāma. Satthārā vā satthāranti satthārā vā saddhiṃ satthāraṃ upasaṃharitvā – ‘‘kiṃ te satthā te dhamme sabbaso pahāya vattati, udāhu samaṇo gotamo’’ti. Dutiyapadepi eseva nayo.
இதா³னி தமத்த²ங் யோஜெத்வா த³ஸ்ஸெந்தோ – ‘‘யே இமேஸங் ப⁴வத’’ந்திஆதி³மாஹ. தத்த² அகுஸலா அகுஸலஸங்கா²தாதி அகுஸலா சேவ ‘‘அகுஸலா’’தி ச ஸங்கா²தா ஞாதா கொட்டா²ஸங் வா கத்வா ட²பிதாதி அத்தோ². ஏஸ நயோ ஸப்³ப³பதே³ஸு. அபி செத்த² ஸாவஜ்ஜாதி ஸதோ³ஸா. ந அலமரியாதி நித்³தோ³ஸட்டே²ன அரியா ப⁴விதுங் நாலங் அஸமத்தா².
Idāni tamatthaṃ yojetvā dassento – ‘‘ye imesaṃ bhavata’’ntiādimāha. Tattha akusalā akusalasaṅkhātāti akusalā ceva ‘‘akusalā’’ti ca saṅkhātā ñātā koṭṭhāsaṃ vā katvā ṭhapitāti attho. Esa nayo sabbapadesu. Api cettha sāvajjāti sadosā. Na alamariyāti niddosaṭṭhena ariyā bhavituṃ nālaṃ asamatthā.
386-392. யங் விஞ்ஞூ ஸமனுயுஞ்ஜந்தாதி யேன விஞ்ஞூ அம்ஹே ச அஞ்ஞே ச புச்ச²ந்தா ஏவங் வதெ³ய்யுங், தங் டா²னங் விஜ்ஜதி, அத்தி² தங் காரணந்தி அத்தோ². யங் வா பன பொ⁴ந்தோ பரே க³ணாசரியாதி பரே பன பொ⁴ந்தோ க³ணாசரியா யங் வா தங் வா அப்பமத்தகங் பஹாய வத்தந்தீதி அத்தோ². அம்ஹேவ தத்த² யேபு⁴ய்யேன பஸங்ஸெய்யுந்தி இத³ங் ப⁴க³வா ஸத்தா²ரா ஸத்தா²ரங் ஸமனுயுஞ்ஜனேபி ஆஹ – ஸங்கே⁴ன ஸங்க⁴ங் ஸமனுயுஞ்ஜனேபி. கஸ்மா? ஸங்க⁴பஸங்ஸாயபி ஸத்து²யேவ பஸங்ஸாஸித்³தி⁴தோ. பஸீத³மானாபி ஹி பு³த்³த⁴ஸம்பத்தியா ஸங்கே⁴, ஸங்க⁴ஸம்பத்தியா ச பு³த்³தே⁴ பஸீத³ந்தி, ததா² ஹி ப⁴க³வதோ ஸரீரஸம்பத்திங் தி³ஸ்வா, த⁴ம்மதே³ஸனங் வா ஸுத்வா ப⁴வந்தி வத்தாரோ – ‘‘லாபா⁴ வத போ⁴ ஸாவகானங் யே ஏவரூபஸ்ஸ ஸத்து² ஸந்திகாவசரா’’தி, ஏவங் பு³த்³த⁴ஸம்பத்தியா ஸங்கே⁴ பஸீத³ந்தி. பி⁴க்கூ²னங் பனாசாரகோ³சரங் அபி⁴க்கமபடிக்கமாதீ³னி ச தி³ஸ்வா ப⁴வந்தி வத்தாரோ – ‘‘ஸந்திகாவசரானங் வத போ⁴ ஸாவகானங் அயஞ்ச உபஸமகு³ணோ ஸத்து² கீவ ரூபோ ப⁴விஸ்ஸதீ’’தி, ஏவங் ஸங்க⁴ஸம்பத்தியா பு³த்³தே⁴ பஸீத³ந்தி. இதி யா ஸத்து²பஸங்ஸா, ஸா ஸங்க⁴ஸ்ஸ. யா ஸங்க⁴ஸ்ஸ பஸங்ஸா, ஸா ஸத்தூ²தி ஸங்க⁴பஸங்ஸாயபி ஸத்து²யேவ பஸங்ஸாஸித்³தி⁴தோ ப⁴க³வா த்³வீஸுபி நயேஸு – ‘‘அம்ஹேவ தத்த² யேபு⁴ய்யேன பஸங்ஸெய்யு’’ந்தி ஆஹ. ஸமணோ கோ³தமோ இமே த⁴ம்மே அனவஸேஸங் பஹாய வத்ததி, யங் வா பன பொ⁴ந்தோ பரே க³ணாசரியாதிஆதீ³ஸுபி பனெத்த² அயமதி⁴ப்பாயோ – ஸம்பத்தஸமாதா³னஸேதுகா⁴தவஸேன ஹி திஸ்ஸோ விரதியோ. தாஸு ஸம்பத்தஸமாதா³ன விரதிமத்தமேவ அஞ்ஞேஸங் ஹோதி, ஸேதுகா⁴தவிரதி பன ஸப்³பே³ன ஸப்³ப³ங் நத்தி². பஞ்சஸு பன தத³ங்க³விக்க²ம்ப⁴னஸமுச்சே²த³படிபஸ்ஸத்³தி⁴னிஸ்ஸரணப்பஹானேஸு அட்ட²ஸமாபத்திவஸேன சேவ விபஸ்ஸனாமத்தவஸேன ச தத³ங்க³விக்க²ம்ப⁴னப்பஹானமத்தமேவ அஞ்ஞேஸங் ஹோதி. இதரானி தீணி பஹானானி ஸப்³பே³ன ஸப்³ப³ங் நத்தி². ததா² ஸீலஸங்வரோ, க²ந்திஸங்வரோ, ஞாணஸங்வரோ, ஸதிஸங்வரோ, வீரியஸங்வரோதி பஞ்ச ஸங்வரா, தேஸு பஞ்சஸீலமத்தமேவ அதி⁴வாஸனக²ந்திமத்தமேவ ச அஞ்ஞேஸங் ஹோதி, ஸேஸங் ஸப்³பே³ன ஸப்³ப³ங் நத்தி².
386-392.Yaṃ viññū samanuyuñjantāti yena viññū amhe ca aññe ca pucchantā evaṃ vadeyyuṃ, taṃ ṭhānaṃ vijjati, atthi taṃ kāraṇanti attho. Yaṃ vā pana bhonto pare gaṇācariyāti pare pana bhonto gaṇācariyā yaṃ vā taṃ vā appamattakaṃ pahāya vattantīti attho. Amheva tattha yebhuyyena pasaṃseyyunti idaṃ bhagavā satthārā satthāraṃ samanuyuñjanepi āha – saṅghena saṃghaṃ samanuyuñjanepi. Kasmā? Saṅghapasaṃsāyapi satthuyeva pasaṃsāsiddhito. Pasīdamānāpi hi buddhasampattiyā saṅghe, saṅghasampattiyā ca buddhe pasīdanti, tathā hi bhagavato sarīrasampattiṃ disvā, dhammadesanaṃ vā sutvā bhavanti vattāro – ‘‘lābhā vata bho sāvakānaṃ ye evarūpassa satthu santikāvacarā’’ti, evaṃ buddhasampattiyā saṅghe pasīdanti. Bhikkhūnaṃ panācāragocaraṃ abhikkamapaṭikkamādīni ca disvā bhavanti vattāro – ‘‘santikāvacarānaṃ vata bho sāvakānaṃ ayañca upasamaguṇo satthu kīva rūpo bhavissatī’’ti, evaṃ saṅghasampattiyā buddhe pasīdanti. Iti yā satthupasaṃsā, sā saṅghassa. Yā saṅghassa pasaṃsā, sā satthūti saṅghapasaṃsāyapi satthuyeva pasaṃsāsiddhito bhagavā dvīsupi nayesu – ‘‘amheva tattha yebhuyyena pasaṃseyyu’’nti āha. Samaṇo gotamo ime dhamme anavasesaṃ pahāya vattati, yaṃ vā pana bhonto pare gaṇācariyātiādīsupi panettha ayamadhippāyo – sampattasamādānasetughātavasena hi tisso viratiyo. Tāsu sampattasamādāna viratimattameva aññesaṃ hoti, setughātavirati pana sabbena sabbaṃ natthi. Pañcasu pana tadaṅgavikkhambhanasamucchedapaṭipassaddhinissaraṇappahānesu aṭṭhasamāpattivasena ceva vipassanāmattavasena ca tadaṅgavikkhambhanappahānamattameva aññesaṃ hoti. Itarāni tīṇi pahānāni sabbena sabbaṃ natthi. Tathā sīlasaṃvaro, khantisaṃvaro, ñāṇasaṃvaro, satisaṃvaro, vīriyasaṃvaroti pañca saṃvarā, tesu pañcasīlamattameva adhivāsanakhantimattameva ca aññesaṃ hoti, sesaṃ sabbena sabbaṃ natthi.
பஞ்ச கோ² பனிமே உபோஸது²த்³தே³ஸா, தேஸு பஞ்சஸீலமத்தமேவ அஞ்ஞேஸங் ஹோதி. பாதிமொக்க²ஸங்வரஸீலங் ஸப்³பே³ன ஸப்³ப³ங் நத்தி². இதி அகுஸலப்பஹானே ச குஸலஸமாதா³னே ச, தீஸு விரதீஸு, பஞ்சஸு பஹானேஸு, பஞ்சஸு ஸங்வரேஸு, பஞ்சஸு உத்³தே³ஸேஸு, – ‘‘அஹமேவ ச மய்ஹஞ்ச ஸாவகஸங்கோ⁴ லோகே பஞ்ஞாயதி, மயா ஹி ஸதி³ஸோ ஸத்தா² நாம, மய்ஹங் ஸாவகஸங்கே⁴ன ஸதி³ஸோ ஸங்கோ⁴ நாம நத்தீ²’’தி ப⁴க³வா ஸீஹனாத³ங் நத³தி.
Pañca kho panime uposathuddesā, tesu pañcasīlamattameva aññesaṃ hoti. Pātimokkhasaṃvarasīlaṃ sabbena sabbaṃ natthi. Iti akusalappahāne ca kusalasamādāne ca, tīsu viratīsu, pañcasu pahānesu, pañcasu saṃvaresu, pañcasu uddesesu, – ‘‘ahameva ca mayhañca sāvakasaṅgho loke paññāyati, mayā hi sadiso satthā nāma, mayhaṃ sāvakasaṅghena sadiso saṅgho nāma natthī’’ti bhagavā sīhanādaṃ nadati.
அரியஅட்ட²ங்கி³கமக்³க³வண்ணனா
Ariyaaṭṭhaṅgikamaggavaṇṇanā
393. ஏவங் ஸீஹனாத³ங் நதி³த்வா தஸ்ஸ ஸீஹனாத³ஸ்ஸ அவிபரீதபா⁴வாவபோ³த⁴னத்த²ங் – ‘‘அத்தி², கஸ்ஸப, மக்³கோ³’’திஆதி³மாஹ. தத்த² மக்³கோ³தி லோகுத்தரமக்³கோ³. படிபதா³தி புப்³ப³பா⁴க³படிபதா³. காலவாதீ³திஆதீ³னி ப்³ரஹ்மஜாலே வண்ணிதானி. இதா³னி தங் து³வித⁴ங் மக்³க³ஞ்ச படிபத³ஞ்ச ஏகதோ கத்வா த³ஸ்ஸெந்தோ – ‘‘அயமேவ அரியோ’’திஆதி³மாஹ. இத³ங் பன ஸுத்வா அசேலோ சிந்தேஸி – ‘‘ஸமணோ கோ³தமோ மய்ஹங்யேவ மக்³கோ³ ச படிபதா³ ச அத்தி², அஞ்ஞேஸங் நத்தீ²தி மஞ்ஞதி, ஹந்த³ஸ்ஸாஹங் அம்ஹாகம்பி மக்³க³ங் கதே²மீ’’தி. ததோ அசேலகபடிபத³ங் கதே²ஸி. தேனாஹ – ‘‘ஏவங் வுத்தே அசேலோ கஸ்ஸபோ ப⁴க³வந்தங் ஏதத³வோச…பே॰… உத³கோரோஹனானுயோக³மனுயுத்தோ விஹரதீ’’தி.
393. Evaṃ sīhanādaṃ naditvā tassa sīhanādassa aviparītabhāvāvabodhanatthaṃ – ‘‘atthi, kassapa, maggo’’tiādimāha. Tattha maggoti lokuttaramaggo. Paṭipadāti pubbabhāgapaṭipadā. Kālavādītiādīni brahmajāle vaṇṇitāni. Idāni taṃ duvidhaṃ maggañca paṭipadañca ekato katvā dassento – ‘‘ayameva ariyo’’tiādimāha. Idaṃ pana sutvā acelo cintesi – ‘‘samaṇo gotamo mayhaṃyeva maggo ca paṭipadā ca atthi, aññesaṃ natthīti maññati, handassāhaṃ amhākampi maggaṃ kathemī’’ti. Tato acelakapaṭipadaṃ kathesi. Tenāha – ‘‘evaṃ vutte acelo kassapo bhagavantaṃ etadavoca…pe… udakorohanānuyogamanuyutto viharatī’’ti.
தபோபக்கமகதா²வண்ணனா
Tapopakkamakathāvaṇṇanā
394. தத்த² தபோபக்கமாதி தபாரம்பா⁴, தபகம்மானீதி அத்தோ². ஸாமஞ்ஞஸங்கா²தாதி ஸமணகம்மஸங்கா²தா. ப்³ரஹ்மஞ்ஞஸங்கா²தாதி ப்³ராஹ்மணகம்மஸங்கா²தா. அசேலகோதி நிச்சோலோ, நக்³கோ³தி அத்தோ². முத்தாசாரோதி விஸட்டா²சாரோ, உச்சாரகம்மாதீ³ஸு லோகியகுலபுத்தாசாரேன விரஹிதோ டி²தகோவ உச்சாரங் கரோதி, பஸ்ஸாவங் கரோதி, கா²த³தி, பு⁴ஞ்ஜதி ச. ஹத்தா²பலேக²னோதி ஹத்தே² பிண்ட³ம்ஹி டி²தே ஜிவ்ஹாய ஹத்த²ங் அபலிக²தி, உச்சாரங் வா கத்வா ஹத்த²ஸ்மிஞ்ஞேவ த³ண்ட³கஸஞ்ஞீ ஹுத்வா ஹத்தே²ன அபலிக²தி. ‘‘பி⁴க்கா²க³ஹணத்த²ங் ஏஹி, ப⁴ந்தே’’தி வுத்தோ ந ஏதீதி ந ஏஹிப⁴த்³த³ந்திகோ. ‘‘தேன ஹி திட்ட², ப⁴ந்தே’’தி வுத்தோபி ந திட்ட²தீதி நதிட்ட²ப⁴த்³த³ந்திகோ. தது³ப⁴யம்பி கிர ஸோ – ‘‘ஏதஸ்ஸ வசனங் கதங் ப⁴விஸ்ஸதீ’’தி ந கரோதி. அபி⁴ஹடந்தி புரேதரங் க³ஹெத்வா ஆஹடங் பி⁴க்க²ங், உத்³தி³ஸ்ஸகதந்தி ‘‘இமங் தும்ஹே உத்³தி³ஸ்ஸ கத’’ந்தி ஏவங் ஆரோசிதங் பி⁴க்க²ங். ந நிமந்தனந்தி ‘‘அஸுகங் நாம குலங் வா வீதி²ங் வா கா³மங் வா பவிஸெய்யாதா²’’தி ஏவங் நிமந்திதபி⁴க்க²ம்பி ந ஸாதி³யதி, ந க³ண்ஹதி. ந கும்பி⁴முகா²தி கும்பி⁴தோ உத்³த⁴ரித்வா தி³ய்யமானங் பி⁴க்க²ங் ந க³ண்ஹதி. ந களோபிமுகா²தி களோபீதி உக்க²லி வா பச்சி² வா, ததோபி ந க³ண்ஹதி. கஸ்மா? கும்பி⁴களோபியோ மங் நிஸ்ஸாய கடச்சு²னா பஹாரங் லப⁴ந்தீதி. ந ஏளகமந்தரந்தி உம்மாரங் அந்தரங் கத்வா தி³ய்யமானங் ந க³ண்ஹதி. கஸ்மா? ‘‘அயங் மங் நிஸ்ஸாய அந்தரகரணங் லப⁴தீ’’தி. த³ண்ட³முஸலேஸுபி ஏஸேவ நயோ.
394. Tattha tapopakkamāti tapārambhā, tapakammānīti attho. Sāmaññasaṅkhātāti samaṇakammasaṅkhātā. Brahmaññasaṅkhātāti brāhmaṇakammasaṅkhātā. Acelakoti niccolo, naggoti attho. Muttācāroti visaṭṭhācāro, uccārakammādīsu lokiyakulaputtācārena virahito ṭhitakova uccāraṃ karoti, passāvaṃ karoti, khādati, bhuñjati ca. Hatthāpalekhanoti hatthe piṇḍamhi ṭhite jivhāya hatthaṃ apalikhati, uccāraṃ vā katvā hatthasmiññeva daṇḍakasaññī hutvā hatthena apalikhati. ‘‘Bhikkhāgahaṇatthaṃ ehi, bhante’’ti vutto na etīti na ehibhaddantiko. ‘‘Tena hi tiṭṭha, bhante’’ti vuttopi na tiṭṭhatīti natiṭṭhabhaddantiko. Tadubhayampi kira so – ‘‘etassa vacanaṃ kataṃ bhavissatī’’ti na karoti. Abhihaṭanti puretaraṃ gahetvā āhaṭaṃ bhikkhaṃ, uddissakatanti ‘‘imaṃ tumhe uddissa kata’’nti evaṃ ārocitaṃ bhikkhaṃ. Na nimantananti ‘‘asukaṃ nāma kulaṃ vā vīthiṃ vā gāmaṃ vā paviseyyāthā’’ti evaṃ nimantitabhikkhampi na sādiyati, na gaṇhati. Nakumbhimukhāti kumbhito uddharitvā diyyamānaṃ bhikkhaṃ na gaṇhati. Na kaḷopimukhāti kaḷopīti ukkhali vā pacchi vā, tatopi na gaṇhati. Kasmā? Kumbhikaḷopiyo maṃ nissāya kaṭacchunā pahāraṃ labhantīti. Na eḷakamantaranti ummāraṃ antaraṃ katvā diyyamānaṃ na gaṇhati. Kasmā? ‘‘Ayaṃ maṃ nissāya antarakaraṇaṃ labhatī’’ti. Daṇḍamusalesupi eseva nayo.
த்³வின்னந்தி த்³வீஸு பு⁴ஞ்ஜமானேஸு ஏகஸ்மிங் உட்டா²ய தெ³ந்தே ந க³ண்ஹதி. கஸ்மா? ‘‘ஏகஸ்ஸ கப³ளந்தராயோ ஹோதீ’’தி. ந க³ப்³பி⁴னியாதிஆதீ³ஸு பன ‘‘க³ப்³பி⁴னியா குச்சி²யங் தா³ரகோ கிலமதி. பாயந்தியா தா³ரகஸ்ஸ கீ²ரந்தராயோ ஹோதி, புரிஸந்தரக³தாய ரதிஅந்தராயோ ஹோதீ’’தி ந க³ண்ஹதி. ஸங்கித்தீஸூதி ஸங்கித்தெத்வா கதப⁴த்தேஸு, து³ப்³பி⁴க்க²ஸமயே கிர அசேலகஸாவகா அசேலகானங் அத்தா²ய ததோ ததோ தண்டு³லாதீ³னி ஸமாத³பெத்வா ப⁴த்தங் பசந்தி. உக்கட்டோ² அசேலகோ ததோபி ந படிக்³க³ண்ஹதி. ந யத்த² ஸாதி யத்த² ஸுனகோ² – ‘‘பிண்ட³ங் லபி⁴ஸ்ஸாமீ’’தி உபட்டி²தோ ஹோதி, தத்த² தஸ்ஸ அத³த்வா ஆஹடங் ந க³ண்ஹதி. கஸ்மா? ஏதஸ்ஸ பிண்ட³ந்தராயோ ஹோதீதி. ஸண்ட³ஸண்ட³சாரினீதி ஸமூஹஸமூஹசாரினீ, ஸசே ஹி அசேலகங் தி³ஸ்வா – ‘‘இமஸ்ஸ பி⁴க்க²ங் த³ஸ்ஸாமா’’தி மனுஸ்ஸா ப⁴த்தகே³ஹங் பவிஸந்தி, தேஸு ச பவிஸந்தேஸு களோபிமுகா²தீ³ஸு நிலீனா மக்கி²கா உப்பதித்வா ஸண்ட³ஸண்டா³ சரந்தி, ததோ ஆஹடங் பி⁴க்க²ங் ந க³ண்ஹதி. கஸ்மா? மங் நிஸ்ஸாய மக்கி²கானங் கோ³சரந்தராயோ ஜாதோதி.
Dvinnanti dvīsu bhuñjamānesu ekasmiṃ uṭṭhāya dente na gaṇhati. Kasmā? ‘‘Ekassa kabaḷantarāyo hotī’’ti. Na gabbhiniyātiādīsu pana ‘‘gabbhiniyā kucchiyaṃ dārako kilamati. Pāyantiyā dārakassa khīrantarāyo hoti, purisantaragatāya ratiantarāyo hotī’’ti na gaṇhati. Saṃkittīsūti saṃkittetvā katabhattesu, dubbhikkhasamaye kira acelakasāvakā acelakānaṃ atthāya tato tato taṇḍulādīni samādapetvā bhattaṃ pacanti. Ukkaṭṭho acelako tatopi na paṭiggaṇhati. Na yattha sāti yattha sunakho – ‘‘piṇḍaṃ labhissāmī’’ti upaṭṭhito hoti, tattha tassa adatvā āhaṭaṃ na gaṇhati. Kasmā? Etassa piṇḍantarāyo hotīti. Saṇḍasaṇḍacārinīti samūhasamūhacārinī, sace hi acelakaṃ disvā – ‘‘imassa bhikkhaṃ dassāmā’’ti manussā bhattagehaṃ pavisanti, tesu ca pavisantesu kaḷopimukhādīsu nilīnā makkhikā uppatitvā saṇḍasaṇḍā caranti, tato āhaṭaṃ bhikkhaṃ na gaṇhati. Kasmā? Maṃ nissāya makkhikānaṃ gocarantarāyo jātoti.
து²ஸோத³கந்தி ஸப்³ப³ஸஸ்ஸஸம்பா⁴ரேஹி கதங் ஸோவீரகங். எத்த² ச ஸுராபானமேவ ஸாவஜ்ஜங், அயங் பன ஸப்³பே³ஸுபி ஸாவஜ்ஜஸஞ்ஞீ. ஏகாகா³ரிகோதி யோ ஏகஸ்மிங்யேவ கே³ஹே பி⁴க்க²ங் லபி⁴த்வா நிவத்ததி . ஏகாலோபிகோதி யோ ஏகேனேவ ஆலோபேன யாபேதி. த்³வாகா³ரிகாதீ³ஸுபி ஏஸேவ நயோ. ஏகிஸ்ஸாபி த³த்தியாதி ஏகாய த³த்தியா. த³த்தி நாம ஏகா கு²த்³த³கபாதி ஹோதி, யத்த² அக்³க³பி⁴க்க²ங் பக்கி²பித்வா ட²பெந்தி. ஏகாஹிகந்தி ஏகதி³வஸந்தரிகங். அத்³த⁴மாஸிகந்தி அத்³த⁴மாஸந்தரிகங். பரியாயப⁴த்தபோ⁴ஜனந்தி வாரப⁴த்தபோ⁴ஜனங், ஏகாஹவாரேன த்³வீஹவாரேன ஸத்தாஹவாரேன அட்³ட⁴மாஸவாரேனாதி ஏவங் தி³வஸவாரேன ஆக³தப⁴த்தபோ⁴ஜனங்.
Thusodakanti sabbasassasambhārehi kataṃ sovīrakaṃ. Ettha ca surāpānameva sāvajjaṃ, ayaṃ pana sabbesupi sāvajjasaññī. Ekāgārikoti yo ekasmiṃyeva gehe bhikkhaṃ labhitvā nivattati . Ekālopikoti yo ekeneva ālopena yāpeti. Dvāgārikādīsupi eseva nayo. Ekissāpi dattiyāti ekāya dattiyā. Datti nāma ekā khuddakapāti hoti, yattha aggabhikkhaṃ pakkhipitvā ṭhapenti. Ekāhikanti ekadivasantarikaṃ. Addhamāsikanti addhamāsantarikaṃ. Pariyāyabhattabhojananti vārabhattabhojanaṃ, ekāhavārena dvīhavārena sattāhavārena aḍḍhamāsavārenāti evaṃ divasavārena āgatabhattabhojanaṃ.
395. ஸாகப⁴க்கோ²தி அல்லஸாகப⁴க்கோ². ஸாமாகப⁴க்கோ²தி ஸாமாகதண்டு³லப⁴க்கோ². நீவாராதீ³ஸு நீவாரோ நாம அரஞ்ஞே ஸயங்ஜாதா வீஹிஜாதி. த³த்³து³லந்தி சம்மகாரேஹி சம்மங் லிகி²த்வா ச²ட்³டி³தகஸடங். ஹடங் வுச்சதி ஸிலேஸோபி ஸேவாலோபி. கணந்தி குண்ட³கங். ஆசாமோதி ப⁴த்தஉக்க²லிகாய லக்³கோ³ ஜா²மகஓத³னோ, தங் ச²ட்³டி³தட்டா²னதோவ க³ஹெத்வா கா²த³தி, ‘‘ஓத³னகஞ்ஜிய’’ந்திபி வத³ந்தி. பிஞ்ஞாகாத³யோ பாகடா ஏவ. பவத்தப²லபோ⁴ஜீதி பதிதப²லபோ⁴ஜீ.
395.Sākabhakkhoti allasākabhakkho. Sāmākabhakkhoti sāmākataṇḍulabhakkho. Nīvārādīsu nīvāro nāma araññe sayaṃjātā vīhijāti. Daddulanti cammakārehi cammaṃ likhitvā chaḍḍitakasaṭaṃ. Haṭaṃ vuccati silesopi sevālopi. Kaṇanti kuṇḍakaṃ. Ācāmoti bhattaukkhalikāya laggo jhāmakaodano, taṃ chaḍḍitaṭṭhānatova gahetvā khādati, ‘‘odanakañjiya’’ntipi vadanti. Piññākādayo pākaṭā eva. Pavattaphalabhojīti patitaphalabhojī.
396. ஸாணானீதி ஸாணவாகசோளானி. மஸாணானீதி மிஸ்ஸகசோளானி. ச²வது³ஸ்ஸானீதி மதஸரீரதோ ச²ட்³டி³தவத்தா²னி, ஏரகதிணாதீ³னி வா க³ந்தெ²த்வா கதனிவாஸனானி. பங்ஸுகூலானீதி பத²வியங் ச²ட்³டி³தனந்தகானி. திரீடானீதி ருக்க²தசவத்தா²னி. அஜினந்தி அஜினமிக³சம்மங். அஜினக்கி²பந்தி ததே³வ மஜ்ஜே² பா²லிதகங். குஸசீரந்தி குஸதிணானி க³ந்தெ²த்வா கதசீரங். வாகசீரப²லகசீரேஸுபி ஏஸேவ நயோ. கேஸகம்ப³லந்தி மனுஸ்ஸகேஸேஹி கதகம்ப³லங். யங் ஸந்தா⁴ய வுத்தங் –
396.Sāṇānīti sāṇavākacoḷāni. Masāṇānīti missakacoḷāni. Chavadussānīti matasarīrato chaḍḍitavatthāni, erakatiṇādīni vā ganthetvā katanivāsanāni. Paṃsukūlānīti pathaviyaṃ chaḍḍitanantakāni. Tirīṭānīti rukkhatacavatthāni. Ajinanti ajinamigacammaṃ. Ajinakkhipanti tadeva majjhe phālitakaṃ. Kusacīranti kusatiṇāni ganthetvā katacīraṃ. Vākacīraphalakacīresupi eseva nayo. Kesakambalanti manussakesehi katakambalaṃ. Yaṃ sandhāya vuttaṃ –
‘‘ஸெய்யதா²பி பி⁴க்க²வே, யானி கானிசி தந்தாவுதானி வத்தா²னி, கேஸகம்ப³லோ தேஸங் படிகிட்டோ² அக்கா²யதி. கேஸகம்ப³லோ, பி⁴க்க²வே, ஸீதே ஸீதோ, உண்ஹே உண்ஹோ அப்பக்³கோ⁴ ச து³ப்³ப³ண்ணோ ச து³க்³க³ந்தோ⁴ து³க்க²ஸம்ப²ஸ்ஸோ’’தி.
‘‘Seyyathāpi bhikkhave, yāni kānici tantāvutāni vatthāni, kesakambalo tesaṃ paṭikiṭṭho akkhāyati. Kesakambalo, bhikkhave, sīte sīto, uṇhe uṇho appaggho ca dubbaṇṇo ca duggandho dukkhasamphasso’’ti.
வாளகம்ப³லந்தி அஸ்ஸவாலேஹி கதகம்ப³லங். உலூகபக்கி²கந்தி உலூகபக்கா²னி க³ந்தெ²த்வா கதனிவாஸனங். உக்குடிகப்பதா⁴னமனுயுத்தோதி உக்குடிகவீரியங் அனுயுத்தோ, க³ச்ச²ந்தோபி உக்குடிகோவ ஹுத்வா உப்பதித்வா உப்பதித்வா க³ச்ச²தி. கண்டகாபஸ்ஸயிகோதி அயகண்டகே வா பகதிகண்டகே வா பூ⁴மியங் கொட்டெத்வா தத்த² சம்மங் அத்த²ரித்வா டா²னசங்கமாதீ³னி கரோதி. ஸெய்யந்தி ஸயந்தோபி தத்தே²வ ஸெய்யங் கப்பேதி. ப²லகஸெய்யந்தி ருக்க²ப²லகே ஸெய்யங். த²ண்டி³லஸெய்யந்தி த²ண்டி³லே உச்சே பூ⁴மிடா²னே ஸெய்யங். ஏகபஸ்ஸயிகோதி ஏகபஸ்ஸேனேவ ஸயதி. ரஜோஜல்லத⁴ரோதி ஸரீரங் தேலேன மக்கி²த்வா ரஜுட்டா²னட்டா²னே திட்ட²தி, அத²ஸ்ஸ ஸரீரே ரஜோஜல்லங் லக்³க³தி, தங் தா⁴ரேதி. யதா²ஸந்த²திகோதி லத்³த⁴ங் ஆஸனங் அகோபெத்வா யதே³வ லப⁴தி, தத்தே²வ நிஸீத³னஸீலோ. வேகடிகோதி விகடகா²த³னஸீலோ. விகடந்தி கூ³த²ங் வுச்சதி. அபானகோதி படிக்கி²த்தஸீதுத³கபானோ. ஸாயங் ததியமஸ்ஸாதி ஸாயததியகங். பாதோ, மஜ்ஜ²ன்ஹிகே, ஸாயந்தி தி³வஸஸ்ஸ திக்க²த்துங் பாபங் பவாஹெஸ்ஸாமீதி உத³கோரோஹனானுயோக³ங் அனுயுத்தோ விஹரதீதி.
Vāḷakambalanti assavālehi katakambalaṃ. Ulūkapakkhikanti ulūkapakkhāni ganthetvā katanivāsanaṃ. Ukkuṭikappadhānamanuyuttoti ukkuṭikavīriyaṃ anuyutto, gacchantopi ukkuṭikova hutvā uppatitvā uppatitvā gacchati. Kaṇṭakāpassayikoti ayakaṇṭake vā pakatikaṇṭake vā bhūmiyaṃ koṭṭetvā tattha cammaṃ attharitvā ṭhānacaṅkamādīni karoti. Seyyanti sayantopi tattheva seyyaṃ kappeti. Phalakaseyyanti rukkhaphalake seyyaṃ. Thaṇḍilaseyyanti thaṇḍile ucce bhūmiṭhāne seyyaṃ. Ekapassayikoti ekapasseneva sayati. Rajojalladharoti sarīraṃ telena makkhitvā rajuṭṭhānaṭṭhāne tiṭṭhati, athassa sarīre rajojallaṃ laggati, taṃ dhāreti. Yathāsanthatikoti laddhaṃ āsanaṃ akopetvā yadeva labhati, tattheva nisīdanasīlo. Vekaṭikoti vikaṭakhādanasīlo. Vikaṭanti gūthaṃ vuccati. Apānakoti paṭikkhittasītudakapāno. Sāyaṃ tatiyamassāti sāyatatiyakaṃ. Pāto, majjhanhike, sāyanti divasassa tikkhattuṃ pāpaṃ pavāhessāmīti udakorohanānuyogaṃ anuyutto viharatīti.
தபோபக்கமனிரத்த²கதாவண்ணனா
Tapopakkamaniratthakatāvaṇṇanā
397. அத² ப⁴க³வா ஸீலஸம்பதா³தீ³ஹி வினா தேஸங் தபோபக்கமானங் நிரத்த²கதங் த³ஸ்ஸெந்தோ – ‘‘அசேலகோ சேபி கஸ்ஸப ஹோதீ’’திஆதி³மாஹ. தத்த² ஆரகா வாதி தூ³ரேயேவ. அவேரந்தி தோ³ஸவேரவிரஹிதங். அப்³யாபஜ்ஜந்தி தோ³மனஸ்ஸப்³யாபஜ்ஜரஹிதங்.
397. Atha bhagavā sīlasampadādīhi vinā tesaṃ tapopakkamānaṃ niratthakataṃ dassento – ‘‘acelako cepi kassapa hotī’’tiādimāha. Tattha ārakā vāti dūreyeva. Averanti dosaveravirahitaṃ. Abyāpajjanti domanassabyāpajjarahitaṃ.
398. து³க்கரங், போ⁴ கோ³தமாதி இத³ங் கஸ்ஸபோ ‘‘மயங் புப்³பே³ எத்தகமத்தங் ஸாமஞ்ஞஞ்ச ப்³ரஹ்மஞ்ஞஞ்சாதி விசராம, தும்ஹே பன அஞ்ஞங்யேவ ஸாமஞ்ஞஞ்ச ப்³ரஹ்மஞ்ஞஞ்ச வத³தா²’’தி தீ³பெந்தோ ஆஹ. பகதி கோ² ஏஸாதி பகதிகதா² ஏஸா. இமாய ச, கஸ்ஸப, மத்தாயாதி ‘‘கஸ்ஸப யதி³ இமினா பமாணேன ஏவங் பரித்தகேன படிபத்திக்கமேன ஸாமஞ்ஞங் வா ப்³ரஹ்மஞ்ஞங் வா து³க்கரங் ஸுது³க்கரங் நாம அப⁴விஸ்ஸ, ததோ நேதங் அப⁴விஸ்ஸ கல்லங் வசனாய து³க்கரங் ஸாமஞ்ஞ’’ந்தி அயமெத்த² பத³ஸம்ப³ந்தே⁴ன ஸத்³தி⁴ங் அத்தோ². ஏதேன நயேன ஸப்³ப³த்த² பத³ஸம்ப³ந்தோ⁴ வேதி³தப்³போ³.
398.Dukkaraṃ, bho gotamāti idaṃ kassapo ‘‘mayaṃ pubbe ettakamattaṃ sāmaññañca brahmaññañcāti vicarāma, tumhe pana aññaṃyeva sāmaññañca brahmaññañca vadathā’’ti dīpento āha. Pakati kho esāti pakatikathā esā. Imāya ca, kassapa, mattāyāti ‘‘kassapa yadi iminā pamāṇena evaṃ parittakena paṭipattikkamena sāmaññaṃ vā brahmaññaṃ vā dukkaraṃ sudukkaraṃ nāma abhavissa, tato netaṃ abhavissa kallaṃ vacanāya dukkaraṃ sāmañña’’nti ayamettha padasambandhena saddhiṃ attho. Etena nayena sabbattha padasambandho veditabbo.
399. து³ஜ்ஜானோதி இத³ம்பி ஸோ ‘‘மயங் புப்³பே³ எத்தகேன ஸமணோ வா ப்³ராஹ்மணோ வா ஹோதீதி விசராம, தும்ஹே பன அஞ்ஞதா² வத³தா²’’தி இத³ங் ஸந்தா⁴யாஹ. அத²ஸ்ஸ ப⁴க³வா தங் பகதிவாத³ங் படிக்கி²பித்வா ஸபா⁴வதோவ து³ஜ்ஜானபா⁴வங் ஆவிகரொந்தோ புனபி – ‘‘பகதி கோ²’’திஆதி³மாஹ. தத்ராபி வுத்தனயேனேவ பத³ஸம்ப³ந்த⁴ங் கத்வா அத்தோ² வேதி³தப்³போ³.
399.Dujjānoti idampi so ‘‘mayaṃ pubbe ettakena samaṇo vā brāhmaṇo vā hotīti vicarāma, tumhe pana aññathā vadathā’’ti idaṃ sandhāyāha. Athassa bhagavā taṃ pakativādaṃ paṭikkhipitvā sabhāvatova dujjānabhāvaṃ āvikaronto punapi – ‘‘pakati kho’’tiādimāha. Tatrāpi vuttanayeneva padasambandhaṃ katvā attho veditabbo.
ஸீலஸமாதி⁴பஞ்ஞாஸம்பதா³வண்ணனா
Sīlasamādhipaññāsampadāvaṇṇanā
400-401. கதமா பன ஸா, போ⁴ கோ³தமாதி கஸ்மா புச்ச²தி. அயங் கிர பண்டி³தோ ப⁴க³வதோ கதெ²ந்தஸ்ஸேவ கத²ங் உக்³க³ஹேஸி, அத² அத்தனோ படிபத்தியா நிரத்த²கதங் விதி³த்வா ஸமணோ கோ³தமோ – ‘‘தஸ்ஸ ‘சாயங் ஸீலஸம்பதா³, சித்தஸம்பதா³, பஞ்ஞாஸம்பதா³ அபா⁴விதா ஹோதி அஸச்சி²கதா, அத² கோ² ஸோ ஆரகாவ ஸாமஞ்ஞா’திஆதி³மாஹ. ஹந்த³ தா³னி நங் தா ஸம்பத்தியோ புச்சா²மீ’’தி ஸீலஸம்பதா³தி³விஜானநத்த²ங் புச்ச²தி. அத²ஸ்ஸ ப⁴க³வா பு³த்³து⁴ப்பாத³ங் த³ஸ்ஸெத்வா தந்தித⁴ம்மங் கதெ²ந்தோ தா ஸம்பத்தியோ த³ஸ்ஸேதுங் – ‘‘இத⁴ கஸ்ஸபா’’திஆதி³மாஹ. இமாய ச கஸ்ஸப ஸீலஸம்பதா³யாதி இத³ங் அரஹத்தப²லமேவ ஸந்தா⁴ய வுத்தங். அரஹத்தப²லபரியோஸானஞ்ஹி ப⁴க³வதோ ஸாஸனங். தஸ்மா அரஹத்தப²லஸம்பயுத்தாஹி ஸீலசித்தபஞ்ஞாஸம்பதா³ஹி அஞ்ஞா உத்தரிதரா வா பணீததரா வா ஸீலாதி³ஸம்பதா³ நத்தீ²தி ஆஹ.
400-401.Katamā pana sā, bho gotamāti kasmā pucchati. Ayaṃ kira paṇḍito bhagavato kathentasseva kathaṃ uggahesi, atha attano paṭipattiyā niratthakataṃ viditvā samaṇo gotamo – ‘‘tassa ‘cāyaṃ sīlasampadā, cittasampadā, paññāsampadā abhāvitā hoti asacchikatā, atha kho so ārakāva sāmaññā’tiādimāha. Handa dāni naṃ tā sampattiyo pucchāmī’’ti sīlasampadādivijānanatthaṃ pucchati. Athassa bhagavā buddhuppādaṃ dassetvā tantidhammaṃ kathento tā sampattiyo dassetuṃ – ‘‘idha kassapā’’tiādimāha. Imāya ca kassapa sīlasampadāyāti idaṃ arahattaphalameva sandhāya vuttaṃ. Arahattaphalapariyosānañhi bhagavato sāsanaṃ. Tasmā arahattaphalasampayuttāhi sīlacittapaññāsampadāhi aññā uttaritarā vā paṇītatarā vā sīlādisampadā natthīti āha.
ஸீஹனாத³கதா²வண்ணனா
Sīhanādakathāvaṇṇanā
402. ஏவஞ்ச பன வத்வா இதா³னி அனுத்தரங் மஹாஸீஹனாத³ங் நத³ந்தோ – ‘‘ஸந்தி கஸ்ஸப ஏகே ஸமணப்³ராஹ்மணா’’திஆதி³மாஹ. தத்த² அரியந்தி நிருபக்கிலேஸங் பரமவிஸுத்³த⁴ங். பரமந்தி உத்தமங், பஞ்சஸீலானி ஹிஆதி³ங் கத்வா யாவ பாதிமொக்க²ஸங்வரஸீலா ஸீலமேவ, லோகுத்தரமக்³க³ப²லஸம்பயுத்தங் பன பரமஸீலங் நாம. நாஹங் தத்தா²தி தத்த² ஸீலேபி பரமஸீலேபி அஹங் அத்தனோ ஸமஸமங் மம ஸீலஸமேன ஸீலேன மயா ஸமங் புக்³க³லங் ந பஸ்ஸாமீதி அத்தோ². அஹமேவ தத்த² பி⁴ய்யோதி அஹமேவ தஸ்மிங் ஸீலே உத்தமோ. கதமஸ்மிங்? யதி³த³ங் அதி⁴ஸீலந்தி யங் ஏதங் உத்தமங் ஸீலந்தி அத்தோ². இதி இமங் பட²மங் ஸீஹனாத³ங் நத³தி.
402. Evañca pana vatvā idāni anuttaraṃ mahāsīhanādaṃ nadanto – ‘‘santi kassapa eke samaṇabrāhmaṇā’’tiādimāha. Tattha ariyanti nirupakkilesaṃ paramavisuddhaṃ. Paramanti uttamaṃ, pañcasīlāni hiādiṃ katvā yāva pātimokkhasaṃvarasīlā sīlameva, lokuttaramaggaphalasampayuttaṃ pana paramasīlaṃ nāma. Nāhaṃ tatthāti tattha sīlepi paramasīlepi ahaṃ attano samasamaṃ mama sīlasamena sīlena mayā samaṃ puggalaṃ na passāmīti attho. Ahameva tattha bhiyyoti ahameva tasmiṃ sīle uttamo. Katamasmiṃ? Yadidaṃ adhisīlanti yaṃ etaṃ uttamaṃ sīlanti attho. Iti imaṃ paṭhamaṃ sīhanādaṃ nadati.
தபோஜிகு³ச்ச²வாதா³தி யே தபோஜிகு³ச்ச²ங் வத³ந்தி. தத்த² தபதீதி தபோ, கிலேஸஸந்தாபகவீரியஸ்ஸேதங் நாமங், ததே³வ தே கிலேஸே ஜிகு³ச்ச²தீதி ஜிகு³ச்சா². அரியா பரமாதி எத்த² நித்³தோ³ஸத்தா அரியா, அட்ட²ஆரம்ப⁴வத்து²வஸேனபி உப்பன்னா விபஸ்ஸனாவீரியஸங்கா²தா தபோஜிகு³ச்சா² தபோஜிகு³ச்சா²வ, மக்³க³ப²லஸம்பயுத்தா பரமா நாம. அதி⁴ஜேகு³ச்ச²ந்தி இத⁴ ஜிகு³ச்ச²பா⁴வோ ஜேகு³ச்ச²ங், உத்தமங் ஜேகு³ச்ச²ங் அதி⁴ஜேகு³ச்ச²ங், தஸ்மா யதி³த³ங் அதி⁴ஜேகு³ச்ச²ங், தத்த² அஹமேவ பி⁴ய்யோதி ஏவமெத்த² அத்தோ² த³ட்ட²ப்³போ³. பஞ்ஞாதி⁴காரேபி கம்மஸ்ஸகதாபஞ்ஞா ச விபஸ்ஸனாபஞ்ஞா ச பஞ்ஞா நாம, மக்³க³ப²லஸம்பயுத்தா பரமா பஞ்ஞா நாம. அதி⁴பஞ்ஞந்தி எத்த² லிங்க³விபல்லாஸோ வேதி³தப்³போ³, அயங் பனெத்த²த்தோ² – யாயங் அதி⁴பஞ்ஞா நாம அஹமேவ தத்த² பி⁴ய்யோதி விமுத்தாதி⁴காரே தத³ங்க³விக்க²ம்ப⁴னவிமுத்தியோ விமுத்தி நாம, ஸமுச்சே²த³படிபஸ்ஸத்³தி⁴னிஸ்ஸரணவிமுத்தியோ பன பரமா விமுத்தீதி வேதி³தப்³பா³. இதா⁴பி ச யதி³த³ங் அதி⁴விமுத்தீதி யா அயங் அதி⁴விமுத்தி, அஹமேவ தத்த² பி⁴ய்யோதி அத்தோ².
Tapojigucchavādāti ye tapojigucchaṃ vadanti. Tattha tapatīti tapo, kilesasantāpakavīriyassetaṃ nāmaṃ, tadeva te kilese jigucchatīti jigucchā. Ariyā paramāti ettha niddosattā ariyā, aṭṭhaārambhavatthuvasenapi uppannā vipassanāvīriyasaṅkhātā tapojigucchā tapojigucchāva, maggaphalasampayuttā paramā nāma. Adhijegucchanti idha jigucchabhāvo jegucchaṃ, uttamaṃ jegucchaṃ adhijegucchaṃ, tasmā yadidaṃ adhijegucchaṃ, tattha ahameva bhiyyoti evamettha attho daṭṭhabbo. Paññādhikārepi kammassakatāpaññā ca vipassanāpaññā ca paññā nāma, maggaphalasampayuttā paramā paññā nāma. Adhipaññanti ettha liṅgavipallāso veditabbo, ayaṃ panetthattho – yāyaṃ adhipaññā nāma ahameva tattha bhiyyoti vimuttādhikāre tadaṅgavikkhambhanavimuttiyo vimutti nāma, samucchedapaṭipassaddhinissaraṇavimuttiyo pana paramā vimuttīti veditabbā. Idhāpi ca yadidaṃ adhivimuttīti yā ayaṃ adhivimutti, ahameva tattha bhiyyoti attho.
403. ஸுஞ்ஞாகா³ரேதி ஸுஞ்ஞே க⁴ரே, ஏககோவ நிஸீதி³த்வாதி அதி⁴ப்பாயோ. பரிஸாஸு சாதி அட்ட²ஸு பரிஸாஸு. வுத்தம்பி சேதங் –
403.Suññāgāreti suññe ghare, ekakova nisīditvāti adhippāyo. Parisāsu cāti aṭṭhasu parisāsu. Vuttampi cetaṃ –
‘‘சத்தாரிமானி, ஸாரிபுத்த, ததா²க³தஸ்ஸ வேஸாரஜ்ஜானி. யேஹி வேஸாரஜ்ஜேஹி ஸமன்னாக³தோ ததா²க³தோ ஆஸப⁴ங் டா²னங் படிஜானாதி, பரிஸாஸு ஸீஹனாத³ங் நத³தீ’’தி (ம॰ நி॰ 1.150) ஸுத்தங் வித்தா²ரேதப்³ப³ங்.
‘‘Cattārimāni, sāriputta, tathāgatassa vesārajjāni. Yehi vesārajjehi samannāgato tathāgato āsabhaṃ ṭhānaṃ paṭijānāti, parisāsu sīhanādaṃ nadatī’’ti (ma. ni. 1.150) suttaṃ vitthāretabbaṃ.
பஞ்ஹஞ்ச நங் புச்ச²ந்தீதி பண்டி³தா தே³வமனுஸ்ஸா நங் பஞ்ஹங் அபி⁴ஸங்க²ரித்வா புச்ச²ந்தி. ப்³யாகரோதீதி தங்க²ணஞ்ஞேவ விஸ்ஸஜ்ஜேஸி. சித்தங் ஆராதே⁴தீதி பஞ்ஹாவிஸ்ஸஜ்ஜனேன மஹாஜனஸ்ஸ சித்தங் பரிதோஸேதியேவ. நோ ச கோ² ஸோதப்³ப³ங் மஞ்ஞந்தீதி சித்தங் ஆராதெ⁴த்வா கதெ²ந்தஸ்ஸபிஸ்ஸ வசனங் பரே ஸோதப்³ப³ங் ந மஞ்ஞந்தீதி, ஏவஞ்ச வதெ³ய்யுந்தி அத்தோ². ஸோதப்³ப³ஞ்சஸ்ஸ மஞ்ஞந்தீதி தே³வாபி மனுஸ்ஸாபி மஹந்தேனேவ உஸ்ஸாஹேன ஸோதப்³ப³ங் மஞ்ஞந்தி. பஸீத³ந்தீதி ஸுபஸன்னா கல்லசித்தா முது³சித்தா ஹொந்தி. பஸன்னாகாரங் கரொந்தீதி ந முத்³த⁴ப்பஸன்னாவ ஹொந்தி, பணீதானி சீவராதீ³னி வேளுவனவிஹாராத³யோ ச மஹாவிஹாரே பரிச்சஜந்தா பஸன்னாகாரங் கரொந்தி. தத²த்தாயாதி யங் ஸோ த⁴ம்மங் தே³ஸேதி ததா² பா⁴வாய, த⁴ம்மானுத⁴ம்மபடிபத்திபூரணத்தா²ய படிபஜ்ஜந்தீதி அத்தோ². தத²த்தாய ச படிபஜ்ஜந்தீதி தத²பா⁴வாய படிபஜ்ஜந்தி, தஸ்ஸ ஹி ப⁴க³வதோ த⁴ம்மங் ஸுத்வா கேசி ஸரணேஸு கேசி பஞ்சஸு ஸீலேஸு பதிட்ட²ஹந்தி, அபரே நிக்க²மித்வா பப்³ப³ஜந்தி. படிபன்னா ச ஆராதெ⁴ந்தீதி தஞ்ச பன படிபத³ங் படிபன்னா பூரேதுங் ஸக்கொந்தி, ஸப்³பா³காரேன பன பூரெந்தி, படிபத்திபூரணேன தஸ்ஸ போ⁴தோ கோ³தமஸ்ஸ சித்தங் ஆராதெ⁴ந்தீதி வத்தப்³பா³.
Pañhañca naṃ pucchantīti paṇḍitā devamanussā naṃ pañhaṃ abhisaṅkharitvā pucchanti. Byākarotīti taṅkhaṇaññeva vissajjesi. Cittaṃ ārādhetīti pañhāvissajjanena mahājanassa cittaṃ paritosetiyeva. No ca kho sotabbaṃ maññantīti cittaṃ ārādhetvā kathentassapissa vacanaṃ pare sotabbaṃ na maññantīti, evañca vadeyyunti attho. Sotabbañcassa maññantīti devāpi manussāpi mahanteneva ussāhena sotabbaṃ maññanti. Pasīdantīti supasannā kallacittā muducittā honti. Pasannākāraṃ karontīti na muddhappasannāva honti, paṇītāni cīvarādīni veḷuvanavihārādayo ca mahāvihāre pariccajantā pasannākāraṃ karonti. Tathattāyāti yaṃ so dhammaṃ deseti tathā bhāvāya, dhammānudhammapaṭipattipūraṇatthāya paṭipajjantīti attho. Tathattāya ca paṭipajjantīti tathabhāvāya paṭipajjanti, tassa hi bhagavato dhammaṃ sutvā keci saraṇesu keci pañcasu sīlesu patiṭṭhahanti, apare nikkhamitvā pabbajanti. Paṭipannā ca ārādhentīti tañca pana paṭipadaṃ paṭipannā pūretuṃ sakkonti, sabbākārena pana pūrenti, paṭipattipūraṇena tassa bhoto gotamassa cittaṃ ārādhentīti vattabbā.
இமஸ்மிங் பனோகாஸே ட²த்வா ஸீஹனாதா³ ஸமோதா⁴னேதப்³பா³. ஏகச்சங் தபஸ்ஸிங் நிரயே நிப்³ப³த்தங் பஸ்ஸாமீதி ஹி ப⁴க³வதோ ஏகோ ஸீஹனாதோ³. அபரங் ஸக்³கே³ நிப்³ப³த்தங் பஸ்ஸாமீதி ஏகோ. அகுஸலத⁴ம்மப்பஹானே அஹமேவ ஸெட்டோ²தி ஏகோ. குஸலத⁴ம்மஸமாதா³னேபி அஹமேவ ஸெட்டோ²தி ஏகோ. அகுஸலத⁴ம்மப்பஹானே மய்ஹமேவ ஸாவகஸங்கோ⁴ ஸெட்டோ²தி ஏகோ. குஸலத⁴ம்மஸமாதா³னேபி மய்ஹங்யேவ ஸாவகஸங்கோ⁴ ஸெட்டோ²தி ஏகோ. ஸீலேன மய்ஹங் ஸதி³ஸோ நத்தீ²தி ஏகோ. வீரியேன மய்ஹங் ஸதி³ஸோ நத்தீ²தி ஏகோ. பஞ்ஞாய…பே॰… விமுத்தியா…பே॰… ஸீஹனாத³ங் நத³ந்தோ பரிஸமஜ்ஜே² நிஸீதி³த்வா நதா³மீதி ஏகோ. விஸாரதோ³ ஹுத்வா நதா³மீதி ஏகோ. பஞ்ஹங் மங் புச்ச²ந்தீதி ஏகோ. பஞ்ஹங் புட்டோ² விஸ்ஸஜ்ஜேமீதி ஏகோ. விஸ்ஸஜ்ஜனேன பரஸ்ஸ சித்தங் ஆராதே⁴மீதி ஏகோ. ஸுத்வா ஸோதப்³ப³ங் மஞ்ஞந்தீதி ஏகோ. ஸுத்வா மே பஸீத³ந்தீதி ஏகோ. பஸன்னாகாரங் கரொந்தீதி ஏகோ. யங் படிபத்திங் தே³ஸேமி, தத²த்தாய படிபஜ்ஜந்தீதி ஏகோ. படிபன்னா ச மங் ஆராதெ⁴ந்தீதி ஏகோ. இதி புரிமானங் த³ஸன்னங் ஏகேகஸ்ஸ – ‘‘பரிஸாஸு ச நத³தீ’’தி ஆத³யோ த³ஸ த³ஸ பரிவாரா. ஏவங் தே த³ஸ புரிமானங் த³ஸன்னங் பரிவாரவஸேன ஸதங் புரிமா ச த³ஸாதி த³ஸாதி⁴கங் ஸீஹனாத³ஸதங் ஹோதி. இதோ அஞ்ஞஸ்மிங் பன ஸுத்தே எத்தகா ஸீஹனாதா³ து³ல்லபா⁴, தேனித³ங் ஸுத்தங் மஹாஸீஹனாத³ந்தி வுச்சதி. இதி ப⁴க³வா ‘‘ஸீஹனாத³ங் கோ² ஸமணோ கோ³தமோ நத³தி, தஞ்ச கோ² ஸுஞ்ஞாகா³ரே நத³தீ’’தி ஏவங் வாதா³னு வாத³ங் படிஸேதெ⁴த்வா இதா³னி பரிஸதி நதி³தபுப்³ப³ங் ஸீஹனாத³ங் த³ஸ்ஸெந்தோ ‘‘ஏகமிதா³ஹ’’ந்திஆதி³மாஹ.
Imasmiṃ panokāse ṭhatvā sīhanādā samodhānetabbā. Ekaccaṃ tapassiṃ niraye nibbattaṃ passāmīti hi bhagavato eko sīhanādo. Aparaṃ sagge nibbattaṃ passāmīti eko. Akusaladhammappahāne ahameva seṭṭhoti eko. Kusaladhammasamādānepi ahameva seṭṭhoti eko. Akusaladhammappahāne mayhameva sāvakasaṅgho seṭṭhoti eko. Kusaladhammasamādānepi mayhaṃyeva sāvakasaṅgho seṭṭhoti eko. Sīlena mayhaṃ sadiso natthīti eko. Vīriyena mayhaṃ sadiso natthīti eko. Paññāya…pe… vimuttiyā…pe… sīhanādaṃ nadanto parisamajjhe nisīditvā nadāmīti eko. Visārado hutvā nadāmīti eko. Pañhaṃ maṃ pucchantīti eko. Pañhaṃ puṭṭho vissajjemīti eko. Vissajjanena parassa cittaṃ ārādhemīti eko. Sutvā sotabbaṃ maññantīti eko. Sutvā me pasīdantīti eko. Pasannākāraṃ karontīti eko. Yaṃ paṭipattiṃ desemi, tathattāya paṭipajjantīti eko. Paṭipannā ca maṃ ārādhentīti eko. Iti purimānaṃ dasannaṃ ekekassa – ‘‘parisāsu ca nadatī’’ti ādayo dasa dasa parivārā. Evaṃ te dasa purimānaṃ dasannaṃ parivāravasena sataṃ purimā ca dasāti dasādhikaṃ sīhanādasataṃ hoti. Ito aññasmiṃ pana sutte ettakā sīhanādā dullabhā, tenidaṃ suttaṃ mahāsīhanādanti vuccati. Iti bhagavā ‘‘sīhanādaṃ kho samaṇo gotamo nadati, tañca kho suññāgāre nadatī’’ti evaṃ vādānu vādaṃ paṭisedhetvā idāni parisati naditapubbaṃ sīhanādaṃ dassento ‘‘ekamidāha’’ntiādimāha.
தித்தி²யபரிவாஸகதா²வண்ணனா
Titthiyaparivāsakathāvaṇṇanā
404. தத்த² தத்ர மங் அஞ்ஞதரோ தபப்³ரஹ்மசாரீதி தத்ர ராஜக³ஹே கி³ஜ்ஜ²கூடே பப்³ப³தே விஹரந்தங் மங் அஞ்ஞதரோ தபப்³ரஹ்மசாரீ நிக்³ரோதோ⁴ நாம பரிப்³பா³ஜகோ . அதி⁴ஜேகு³ச்சே²தி வீரியேன பாபஜிகு³ச்ச²னாதி⁴காரே பஞ்ஹங் புச்சி². இத³ங் யங் தங் ப⁴க³வா கி³ஜ்ஜ²கூடே மஹாவிஹாரே நிஸின்னோ உது³ம்ப³ரிகாய தே³வியா உய்யானே நிஸின்னஸ்ஸ நிக்³ரோத⁴ஸ்ஸ ச பரிப்³பா³ஜகஸ்ஸ ஸந்தா⁴னஸ்ஸ ச உபாஸகஸ்ஸ தி³ப்³பா³ய ஸோததா⁴துயா கதா²ஸல்லாபங் ஸுத்வா ஆகாஸேனாக³ந்த்வா தேஸங் ஸந்திகே பஞ்ஞத்தே ஆஸனே நிஸீதி³த்வா நிக்³ரோதே⁴ன அதி⁴ஜேகு³ச்சே² புட்ட²பஞ்ஹங் விஸ்ஸஜ்ஜேஸி, தங் ஸந்தா⁴ய வுத்தங். பரங் விய மத்தாயாதி பரமாய மத்தாய, அதிமஹந்தேனேவ பமாணேனாதி அத்தோ². கோ ஹி, ப⁴ந்தேதி ட²பெத்வா அந்த⁴பா³லங் தி³ட்டி²க³திகங் அஞ்ஞோ பண்டி³தஜாதிகோ ‘‘கோ நாம ப⁴க³வதோ த⁴ம்மங் ஸுத்வா ந அத்தமனோ அஸ்ஸா’’தி வத³தி. லபெ⁴ய்யாஹந்தி இத³ங் ஸோ – ‘‘சிரங் வத மே அனிய்யானிகபக்கே² யோஜெத்வா அத்தா கிலமிதோ, ‘ஸுக்க²னதீ³தீரே ந்ஹாயிஸ்ஸாமீ’தி ஸம்பரிவத்தெந்தேன விய து²ஸே கொட்டெந்தேன விய ந கோசி அத்தோ² நிப்பா²தி³தோ. ஹந்தா³ஹங் அத்தானங் யோகே³ யோஜெஸ்ஸாமீ’’தி சிந்தெத்வா ஆஹ. அத² ப⁴க³வா யோ அனேன க²ந்த⁴கே தித்தி²யபரிவாஸோ பஞ்ஞத்தோ, யோ அஞ்ஞதித்தி²யபுப்³போ³ ஸாமணேரபூ⁴மியங் டி²தோ – ‘‘அஹங் ப⁴ந்தே, இத்த²ன்னாமோ அஞ்ஞதித்தி²யபுப்³போ³ இமஸ்மிங் த⁴ம்மவினயே ஆகங்கா²மி உபஸம்பத³ங், ஸ்வாஹங், ப⁴ந்தே, ஸங்க⁴ங் சத்தாரோ மாஸே பரிவாஸங் யாசாமீ’’திஆதி³னா (மஹாவ॰ 86) நயேன ஸமாதி³யித்வா பரிவஸதி, தங் ஸந்தா⁴ய – ‘‘யோ கோ², கஸ்ஸப, அஞ்ஞதித்தி²யபுப்³போ³’’திஆதி³மாஹ.
404. Tattha tatra maṃ aññataro tapabrahmacārīti tatra rājagahe gijjhakūṭe pabbate viharantaṃ maṃ aññataro tapabrahmacārī nigrodho nāma paribbājako . Adhijeguccheti vīriyena pāpajigucchanādhikāre pañhaṃ pucchi. Idaṃ yaṃ taṃ bhagavā gijjhakūṭe mahāvihāre nisinno udumbarikāya deviyā uyyāne nisinnassa nigrodhassa ca paribbājakassa sandhānassa ca upāsakassa dibbāya sotadhātuyā kathāsallāpaṃ sutvā ākāsenāgantvā tesaṃ santike paññatte āsane nisīditvā nigrodhena adhijegucche puṭṭhapañhaṃ vissajjesi, taṃ sandhāya vuttaṃ. Paraṃ viya mattāyāti paramāya mattāya, atimahanteneva pamāṇenāti attho. Ko hi, bhanteti ṭhapetvā andhabālaṃ diṭṭhigatikaṃ añño paṇḍitajātiko ‘‘ko nāma bhagavato dhammaṃ sutvā na attamano assā’’ti vadati. Labheyyāhanti idaṃ so – ‘‘ciraṃ vata me aniyyānikapakkhe yojetvā attā kilamito, ‘sukkhanadītīre nhāyissāmī’ti samparivattentena viya thuse koṭṭentena viya na koci attho nipphādito. Handāhaṃ attānaṃ yoge yojessāmī’’ti cintetvā āha. Atha bhagavā yo anena khandhake titthiyaparivāso paññatto, yo aññatitthiyapubbo sāmaṇerabhūmiyaṃ ṭhito – ‘‘ahaṃ bhante, itthannāmo aññatitthiyapubbo imasmiṃ dhammavinaye ākaṅkhāmi upasampadaṃ, svāhaṃ, bhante, saṃghaṃ cattāro māse parivāsaṃ yācāmī’’tiādinā (mahāva. 86) nayena samādiyitvā parivasati, taṃ sandhāya – ‘‘yo kho, kassapa, aññatitthiyapubbo’’tiādimāha.
405. தத்த² பப்³ப³ஜ்ஜந்தி வசனஸிலிட்ட²தாவஸேனேவ வுத்தங், அபரிவஸித்வாயேவ ஹி பப்³ப³ஜ்ஜங் லப⁴தி. உபஸம்பத³த்தி²கேன பன நாதிகாலேன கா³மப்பவேஸனாதீ³னி அட்ட² வத்தானி பூரெந்தேன பரிவஸிதப்³ப³ங். ஆரத்³த⁴சித்தாதி அட்ட²வத்தபூரணேன துட்ட²சித்தா, அயமெத்த² ஸங்கே²பத்தோ². வித்தா²ரதோ பனேஸ தித்தி²யபரிவாஸோ ஸமந்தபாஸாதி³காய வினயட்ட²கதா²யங் பப்³ப³ஜ்ஜக²ந்த⁴கவண்ணனாய வுத்தனயேன வேதி³தப்³போ³. அபி ச மெத்தா²தி அபி ச மே எத்த². புக்³க³லவேமத்ததா விதி³தாதி புக்³க³லனானத்தங் விதி³தங். ‘‘அயங் புக்³க³லோ பரிவாஸாரஹோ, அயங் ந பரிவாஸாரஹோ’’தி இத³ங் மய்ஹங் பாகடந்தி த³ஸ்ஸேதி. ததோ கஸ்ஸபோ சிந்தேஸி – ‘‘அஹோ அச்ச²ரியங் பு³த்³த⁴ஸாஸனங், யத்த² ஏவங் க⁴ங்ஸித்வா கொட்டெத்வா யுத்தமேவ க³ண்ஹந்தி, அயுத்தங் ச²ட்³டெ³ந்தீ’’தி, ததோ ஸுட்டு²தரங் பப்³ப³ஜ்ஜாய ஸஞ்ஜாதுஸ்ஸாஹோ – ‘‘ஸசே ப⁴ந்தே’’திஆதி³மாஹ.
405. Tattha pabbajjanti vacanasiliṭṭhatāvaseneva vuttaṃ, aparivasitvāyeva hi pabbajjaṃ labhati. Upasampadatthikena pana nātikālena gāmappavesanādīni aṭṭha vattāni pūrentena parivasitabbaṃ. Āraddhacittāti aṭṭhavattapūraṇena tuṭṭhacittā, ayamettha saṅkhepattho. Vitthārato panesa titthiyaparivāso samantapāsādikāya vinayaṭṭhakathāyaṃ pabbajjakhandhakavaṇṇanāya vuttanayena veditabbo. Api ca metthāti api ca me ettha. Puggalavemattatā viditāti puggalanānattaṃ viditaṃ. ‘‘Ayaṃ puggalo parivāsāraho, ayaṃ na parivāsāraho’’ti idaṃ mayhaṃ pākaṭanti dasseti. Tato kassapo cintesi – ‘‘aho acchariyaṃ buddhasāsanaṃ, yattha evaṃ ghaṃsitvā koṭṭetvā yuttameva gaṇhanti, ayuttaṃ chaḍḍentī’’ti, tato suṭṭhutaraṃ pabbajjāya sañjātussāho – ‘‘sace bhante’’tiādimāha.
அத² கோ² ப⁴க³வா தஸ்ஸ திப்³ப³ச்ச²ந்த³தங் விதி³த்வா – ‘‘ந கஸ்ஸபோ பரிவாஸங் அரஹதீ’’தி அஞ்ஞதரங் பி⁴க்கு²ங் ஆமந்தேஸி – ‘‘க³ச்ச² பி⁴க்கு² கஸ்ஸபங் ந்ஹாபெத்வா பப்³பா³ஜெத்வா ஆனேஹீ’’தி. ஸோ ததா² கத்வா தங் பப்³பா³ஜெத்வா ப⁴க³வதோ ஸந்திகங் ஆக³மாஸி. ப⁴க³வா தங் க³ணமஜ்ஜே² நிஸீதா³பெத்வா உபஸம்பாதே³ஸி. தேன வுத்தங் – ‘‘அலத்த² கோ² அசேலோ கஸ்ஸபோ ப⁴க³வதோ ஸந்திகே பப்³ப³ஜ்ஜங், அலத்த² உபஸம்பத³’’ந்தி. அசிரூபஸம்பன்னோதி உபஸம்பன்னோ ஹுத்வா நசிரமேவ. வூபகட்டோ²தி வத்து²காமகிலேஸகாமேஹி காயேன சேவ சித்தேன ச வூபகட்டோ². அப்பமத்தோதி கம்மட்டா²னே ஸதிங் அவிஜஹந்தோ. ஆதாபீதி காயிகசேதஸிகஸங்கா²தேன வீரியாதாபேன ஆதாபீ. பஹிதத்தோதி காயே ச ஜீவிதே ச அனபெக்க²தாய பேஸிதசித்தோ விஸ்ஸட்ட²அத்தபா⁴வோ. யஸ்ஸத்தா²யாதி யஸ்ஸ அத்தா²ய. குலபுத்தாதி ஆசாரகுலபுத்தா. ஸம்மதே³வாதி ஹேதுனாவ காரணேனேவ. தத³னுத்தரந்தி தங் அனுத்தரங். ப்³ரஹ்மசரியபரியோஸானந்தி மக்³க³ப்³ரஹ்மசரியஸ்ஸ பரியோஸானபூ⁴தங் அரஹத்தப²லங். தஸ்ஸ ஹி அத்தா²ய குலபுத்தா பப்³ப³ஜந்தி. தி³ட்டே²வ த⁴ம்மேதி இமஸ்மிங்யேவ அத்தபா⁴வே. ஸயங் அபி⁴ஞ்ஞா ஸச்சி²கத்வாதி அத்தனாயேவ பஞ்ஞாய பச்சக்க²ங் கத்வா, அபரப்பச்சயங் கத்வாதி அத்தோ². உபஸம்பஜ்ஜ விஹாஸீதி பாபுணித்வா ஸம்பாதெ³த்வா விஹாஸி, ஏவங் விஹரந்தோ ச கீ²ணா ஜாதி…பே॰… அப்³ப⁴ஞ்ஞாஸீதி.
Atha kho bhagavā tassa tibbacchandataṃ viditvā – ‘‘na kassapo parivāsaṃ arahatī’’ti aññataraṃ bhikkhuṃ āmantesi – ‘‘gaccha bhikkhu kassapaṃ nhāpetvā pabbājetvā ānehī’’ti. So tathā katvā taṃ pabbājetvā bhagavato santikaṃ āgamāsi. Bhagavā taṃ gaṇamajjhe nisīdāpetvā upasampādesi. Tena vuttaṃ – ‘‘alattha kho acelo kassapo bhagavato santike pabbajjaṃ, alattha upasampada’’nti. Acirūpasampannoti upasampanno hutvā nacirameva. Vūpakaṭṭhoti vatthukāmakilesakāmehi kāyena ceva cittena ca vūpakaṭṭho. Appamattoti kammaṭṭhāne satiṃ avijahanto. Ātāpīti kāyikacetasikasaṅkhātena vīriyātāpena ātāpī. Pahitattoti kāye ca jīvite ca anapekkhatāya pesitacitto vissaṭṭhaattabhāvo. Yassatthāyāti yassa atthāya. Kulaputtāti ācārakulaputtā. Sammadevāti hetunāva kāraṇeneva. Tadanuttaranti taṃ anuttaraṃ. Brahmacariyapariyosānanti maggabrahmacariyassa pariyosānabhūtaṃ arahattaphalaṃ. Tassa hi atthāya kulaputtā pabbajanti. Diṭṭheva dhammeti imasmiṃyeva attabhāve. Sayaṃ abhiññā sacchikatvāti attanāyeva paññāya paccakkhaṃ katvā, aparappaccayaṃ katvāti attho. Upasampajja vihāsīti pāpuṇitvā sampādetvā vihāsi, evaṃ viharanto ca khīṇā jāti…pe… abbhaññāsīti.
ஏவமஸ்ஸ பச்சவெக்க²ணபூ⁴மிங் த³ஸ்ஸெத்வா அரஹத்தனிகூடேன தே³ஸனங் நிட்டா²பேதுங் ‘‘அஞ்ஞதரோ கோ² பனாயஸ்மா கஸ்ஸபோ அரஹதங் அஹோஸீ’’தி வுத்தங். தத்த² அஞ்ஞதரோதி ஏகோ. அரஹதந்தி அரஹந்தானங், ப⁴க³வதோ ஸாவகானங் அரஹந்தானங் அப்³ப⁴ந்தரோ அஹோஸீதி அயமெத்த² அதி⁴ப்பாயோ. யங் யங் பன அந்தரந்தரா ந வுத்தங், தங் தங் தத்த² தத்த² வுத்தத்தா பாகடமேவாதி.
Evamassa paccavekkhaṇabhūmiṃ dassetvā arahattanikūṭena desanaṃ niṭṭhāpetuṃ ‘‘aññataro kho panāyasmā kassapo arahataṃ ahosī’’ti vuttaṃ. Tattha aññataroti eko. Arahatanti arahantānaṃ, bhagavato sāvakānaṃ arahantānaṃ abbhantaro ahosīti ayamettha adhippāyo. Yaṃ yaṃ pana antarantarā na vuttaṃ, taṃ taṃ tattha tattha vuttattā pākaṭamevāti.
இதி ஸுமங்க³லவிலாஸினியா தீ³க⁴னிகாயட்ட²கதா²யங்
Iti sumaṅgalavilāsiniyā dīghanikāyaṭṭhakathāyaṃ
மஹாஸீஹனாத³ஸுத்தவண்ணனா நிட்டி²தா.
Mahāsīhanādasuttavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / தீ³க⁴னிகாய • Dīghanikāya / 8. மஹாஸீஹனாத³ஸுத்தங் • 8. Mahāsīhanādasuttaṃ
டீகா • Tīkā / ஸுத்தபிடக (டீகா) • Suttapiṭaka (ṭīkā) / தீ³க⁴னிகாய (டீகா) • Dīghanikāya (ṭīkā) / 8. மஹாஸீஹனாத³ஸுத்தவண்ணனா • 8. Mahāsīhanādasuttavaṇṇanā
