| Library / Tipiṭaka / ཏིཔིཊཀ • Tipiṭaka / དཱིགྷ ནིཀཱཡ (ཨཊྛཀཐཱ) • Dīgha nikāya (aṭṭhakathā) |
༨. མཧཱསཱིཧནཱདསུཏྟཝཎྞནཱ
8. Mahāsīhanādasuttavaṇṇanā
ཨཙེལཀསྶཔཝཏྠུཝཎྞནཱ
Acelakassapavatthuvaṇṇanā
༣༨༡. ཨེཝཾ མེ སུཏཾ…པེ॰… ཨུརུཉྙཱཡཾ ཝིཧརཏཱིཏི མཧཱསཱིཧནཱདསུཏྟཾ། ཏཏྲཱཡཾ ཨཔུབྦཔདཝཎྞནཱ། ཨུརུཉྙཱཡནྟི ཨུརུཉྙཱཏི ཏསྶ རཊྛསྶཔི ནགརསྶཔི ཨེཏདེཝ ནཱམཾ, བྷགཝཱ ཨུརུཉྙཱནགརཾ ཨུཔནིསྶཱཡ ཝིཧརཏི། ཀཎྞཀཏྠལེ མིགདཱཡེཏི ཏསྶ ནགརསྶ ཨཝིདཱུརེ ཀཎྞཀཏྠལཾ ནཱམ ཨེཀོ རམཎཱིཡོ བྷཱུམིབྷཱགོ ཨཏྠི། སོ མིགཱནཾ ཨབྷཡཏྠཱཡ དིནྣཏྟཱ ‘‘མིགདཱཡོ’’ཏི ཝུཙྩཏི, ཏསྨིཾ ཀཎྞཀཏྠལེ མིགདཱཡེ། ཨཙེལོཏི ནགྒཔརིབྦཱཛཀོ། ཀསྶཔོཏི ཏསྶ ནཱམཾ། ཏཔསྶིནྟི ཏཔནིསྶིཏཀཾ། ལཱུཁཱཛཱིཝིནྟི ཨཙེལཀམུཏྟཱཙཱརཱདིཝསེན ལཱུཁོ ཨཱཛཱིཝོ ཨསྶཱཏི ལཱུཁཱཛཱིཝཱི, ཏཾ ལཱུཁཱཛཱིཝིཾ། ཨུཔཀྐོསཏཱིཏི ཨུཔཎྜེཏི། ཨུཔཝདཏཱིཏི ཧཱིལེ༹ཏི ཝམྦྷེཏི། དྷམྨསྶ ཙ ཨནུདྷམྨཾ བྱཱཀརོནྟཱིཏི བྷོཏཱ གོཏམེན ཝུཏྟཀཱརཎསྶ ཨནུཀཱརཎཾ ཀཐེནྟི། སཧདྷམྨིཀོ ཝཱདཱནུཝཱདོཏི པརེཧི ཝུཏྟཀཱརཎེན སཀཱརཎོ ཧུཏྭཱ ཏུམྷཱཀཾ ཝཱདོ ཝཱ ཨནུཝཱདོ ཝཱ ཝིཉྙཱུཧི གརཧིཏབྦཾ, ཀཱརཎཾ ཀོཙི ཨཔྤམཏྟཀོཔི ཀིཾ ན ཨཱགཙྪཏི། ཨིདཾ ཝུཏྟཾ ཧོཏི, ‘‘ཀིཾ སབྦཱཀཱརེནཔི ཏཝ ཝཱདེ གཱརཡ྄ཧཾ ཀཱརཎཾ ནཏྠཱི’’ཏི། ཨནབྦྷཀྑཱཏུཀཱམཱཏི ན ཨབྷཱུཏེན ཝཏྟུཀཱམཱ།
381.Evaṃme sutaṃ…pe… uruññāyaṃ viharatīti mahāsīhanādasuttaṃ. Tatrāyaṃ apubbapadavaṇṇanā. Uruññāyanti uruññāti tassa raṭṭhassapi nagarassapi etadeva nāmaṃ, bhagavā uruññānagaraṃ upanissāya viharati. Kaṇṇakatthale migadāyeti tassa nagarassa avidūre kaṇṇakatthalaṃ nāma eko ramaṇīyo bhūmibhāgo atthi. So migānaṃ abhayatthāya dinnattā ‘‘migadāyo’’ti vuccati, tasmiṃ kaṇṇakatthale migadāye. Aceloti naggaparibbājako. Kassapoti tassa nāmaṃ. Tapassinti tapanissitakaṃ. Lūkhājīvinti acelakamuttācārādivasena lūkho ājīvo assāti lūkhājīvī, taṃ lūkhājīviṃ. Upakkosatīti upaṇḍeti. Upavadatīti hīḷeti vambheti. Dhammassa ca anudhammaṃ byākarontīti bhotā gotamena vuttakāraṇassa anukāraṇaṃ kathenti. Sahadhammiko vādānuvādoti parehi vuttakāraṇena sakāraṇo hutvā tumhākaṃ vādo vā anuvādo vā viññūhi garahitabbaṃ, kāraṇaṃ koci appamattakopi kiṃ na āgacchati. Idaṃ vuttaṃ hoti, ‘‘kiṃ sabbākārenapi tava vāde gārayhaṃ kāraṇaṃ natthī’’ti. Anabbhakkhātukāmāti na abhūtena vattukāmā.
༣༨༢. ཨེཀཙྩཾ ཏཔསྶིཾ ལཱུཁཱཛཱིཝིནྟིཨཱདཱིསུ ཨིདྷེཀཙྩོ ཨཙེལཀཔབྦཛྫཱདིཏཔནིསྶིཏཏྟཱ ཏཔསྶཱི ‘‘ལཱུཁེན ཛཱིཝིཏཾ ཀཔྤེསྶཱམཱི’’ཏི ཏིཎགོམཡཱདིབྷཀྑནཱདཱིཧི ནཱནཔྤཀཱརེཧི ཨཏྟཱནཾ ཀིལམེཏི, ཨཔྤཔུཉྙཏཱཡ ཙ སུཁེན ཛཱིཝིཏཝུཏྟིམེཝ ན ལབྷཏི, སོ ཏཱིཎི དུཙྩརིཏཱནི པཱུརེཏྭཱ ནིརཡེ ནིབྦཏྟཏི།
382.Ekaccaṃ tapassiṃ lūkhājīvintiādīsu idhekacco acelakapabbajjāditapanissitattā tapassī ‘‘lūkhena jīvitaṃ kappessāmī’’ti tiṇagomayādibhakkhanādīhi nānappakārehi attānaṃ kilameti, appapuññatāya ca sukhena jīvitavuttimeva na labhati, so tīṇi duccaritāni pūretvā niraye nibbattati.
ཨཔརོ ཏཱདིསཾ ཏཔནིསྶིཏོཔི པུཉྙཝཱ ཧོཏི, ལབྷཏི ལཱབྷསཀྐཱརཾ། སོ ‘‘ན དཱནི མཡཱ སདིསོ ཨཏྠཱི’’ཏི ཨཏྟཱནཾ ཨུཙྩེ ཋཱནེ སམྦྷཱཝེཏྭཱ ‘‘བྷིཡྻོསོམཏྟཱཡ ལཱབྷཾ ཨུཔྤཱདེསྶཱམཱི’’ཏི ཨནེསནཝསེན ཏཱིཎི དུཙྩརིཏཱནི པཱུརེཏྭཱ ནིརཡེ ནིབྦཏྟཏི། ཨིམེ དྭེ སནྡྷཱཡ པཋམནཡོ ཝུཏྟོ།
Aparo tādisaṃ tapanissitopi puññavā hoti, labhati lābhasakkāraṃ. So ‘‘na dāni mayā sadiso atthī’’ti attānaṃ ucce ṭhāne sambhāvetvā ‘‘bhiyyosomattāya lābhaṃ uppādessāmī’’ti anesanavasena tīṇi duccaritāni pūretvā niraye nibbattati. Ime dve sandhāya paṭhamanayo vutto.
ཨཔརོ ཏཔནིསྶིཏཀོ ལཱུཁཱཛཱིཝཱི ཨཔྤཔུཉྙོ ཧོཏི, ན ལབྷཏི སུཁེན ཛཱིཝིཏཝུཏྟིཾ། སོ ‘‘མཡ྄ཧཾ པུབྦེཔི ཨཀཏཔུཉྙཏཱཡ སུཁཛཱིཝིཀཱ ནུཔྤཛྫཏི , ཧནྡདཱནི པུཉྙཱནི ཀརོམཱི’’ཏི ཏཱིཎི སུཙརིཏཱནི པཱུརེཏྭཱ སགྒེ ནིབྦཏྟཏི།
Aparo tapanissitako lūkhājīvī appapuñño hoti, na labhati sukhena jīvitavuttiṃ. So ‘‘mayhaṃ pubbepi akatapuññatāya sukhajīvikā nuppajjati , handadāni puññāni karomī’’ti tīṇi sucaritāni pūretvā sagge nibbattati.
ཨཔརོ ལཱུཁཱཛཱིཝཱི པུཉྙཝཱ ཧོཏི, ལབྷཏི སུཁེན ཛཱིཝིཏཝུཏྟིཾ། སོ – ‘‘མཡ྄ཧཾ པུབྦེཔི ཀཏཔུཉྙཏཱཡ སུཁཛཱིཝིཀཱ ཨུཔྤཛྫཏཱི’’ཏི ཙིནྟེཏྭཱ ཨནེསནཾ པཧཱཡ ཏཱིཎི སུཙརིཏཱནི པཱུརེཏྭཱ སགྒེ ནིབྦཏྟཏི། ཨིམེ དྭེ སནྡྷཱཡ དུཏིཡནཡོ ཝུཏྟོ།
Aparo lūkhājīvī puññavā hoti, labhati sukhena jīvitavuttiṃ. So – ‘‘mayhaṃ pubbepi katapuññatāya sukhajīvikā uppajjatī’’ti cintetvā anesanaṃ pahāya tīṇi sucaritāni pūretvā sagge nibbattati. Ime dve sandhāya dutiyanayo vutto.
ཨེཀོ པན ཏཔསྶཱི ཨཔྤདུཀྑཝིཧཱརཱི ཧོཏི བཱཧིརཀཱཙཱརཡུཏྟོ ཏཱཔསོ ཝཱ ཚནྣཔརིབྦཱཛཀོ ཝཱ, ཨཔྤཔུཉྙཏཱཡ ཙ མནཱཔེ པཙྩཡེ ན ལབྷཏི། སོ ཨནེསནཝསེན ཏཱིཎི དུཙྩརིཏཱནི པཱུརེཏྭཱ ཨཏྟཱནཾ སུཁེ ཋཔེཏྭཱ ནིརཡེ ནིབྦཏྟཏི།
Eko pana tapassī appadukkhavihārī hoti bāhirakācārayutto tāpaso vā channaparibbājako vā, appapuññatāya ca manāpe paccaye na labhati. So anesanavasena tīṇi duccaritāni pūretvā attānaṃ sukhe ṭhapetvā niraye nibbattati.
ཨཔརོ པུཉྙཝཱ ཧོཏི, སོ – ‘‘ན དཱནི མཡཱ སདིསོ ཨཏྠཱི’’ཏི མཱནཾ ཨུཔྤཱདེཏྭཱ ཨནེསནཝསེན ལཱབྷསཀྐཱརཾ ཝཱ ཨུཔྤཱདེནྟོ མིཙྪཱདིཊྛིཝསེན – ‘‘སུཁོ ཨིམིསྶཱ པརིབྦཱཛིཀཱཡ དཧརཱཡ མུདུཀཱཡ ལོམསཱཡ སམྥསྶོ’’ཏིཨཱདཱིནི ཙིནྟེཏྭཱ ཀཱམེསུ པཱཏབྱཏཾ ཝཱ ཨཱཔཛྫནྟོ ཏཱིཎི དུཙྩརིཏཱནི པཱུརེཏྭཱ ནིརཡེ ནིབྦཏྟཏི། ཨིམེ དྭེ སནྡྷཱཡ ཏཏིཡནཡོ ཝུཏྟོ།
Aparo puññavā hoti, so – ‘‘na dāni mayā sadiso atthī’’ti mānaṃ uppādetvā anesanavasena lābhasakkāraṃ vā uppādento micchādiṭṭhivasena – ‘‘sukho imissā paribbājikāya daharāya mudukāya lomasāya samphasso’’tiādīni cintetvā kāmesu pātabyataṃ vā āpajjanto tīṇi duccaritāni pūretvā niraye nibbattati. Ime dve sandhāya tatiyanayo vutto.
ཨཔརོ པན ཨཔྤདུཀྑཝིཧཱརཱི ཨཔྤཔུཉྙོ ཧོཏི, སོ – ‘‘ཨཧཾ པུབྦེཔི ཨཀཏཔུཉྙཏཱཡ སུཁེན ཛཱིཝིཀཾ ན ལབྷཱམཱི’’ཏི ཏཱིཎི སུཙརིཏཱནི པཱུརེཏྭཱ སགྒེ ནིབྦཏྟཏི།
Aparo pana appadukkhavihārī appapuñño hoti, so – ‘‘ahaṃ pubbepi akatapuññatāya sukhena jīvikaṃ na labhāmī’’ti tīṇi sucaritāni pūretvā sagge nibbattati.
ཨཔརོ པུཉྙཝཱ ཧོཏི, སོ – ‘‘པུབྦེཔཱཧཾ ཀཏཔུཉྙཏཱཡ སུཁཾ ལབྷཱམི, ཨིདཱནི པུཉྙཱནི ཀརིསྶཱམཱི’’ཏི ཏཱིཎི སུཙརིཏཱནི པཱུརེཏྭཱ སགྒེ ནིབྦཏྟཏི། ཨིམེ དྭེ སནྡྷཱཡ ཙཏུཏྠནཡོ ཝུཏྟོ། ཨིདཾ ཏིཏྠིཡཝསེན ཨཱགཏཾ, སཱསནེཔི པན ལབྦྷཏི།
Aparo puññavā hoti, so – ‘‘pubbepāhaṃ katapuññatāya sukhaṃ labhāmi, idāni puññāni karissāmī’’ti tīṇi sucaritāni pūretvā sagge nibbattati. Ime dve sandhāya catutthanayo vutto. Idaṃ titthiyavasena āgataṃ, sāsanepi pana labbhati.
ཨེཀཙྩོ ཧི དྷུཏངྒསམཱདཱནཝསེན ལཱུཁཱཛཱིཝཱི ཧོཏི, ཨཔྤཔུཉྙཏཱཡ ཝཱ སཀལམྤི གཱམཾ ཝིཙརིཏྭཱ ཨུདརཔཱུརཾ ན ལབྷཏི། སོ – ‘‘པཙྩཡེ ཨུཔྤཱདེསྶཱམཱི’’ཏི ཝེཛྫཀམྨཱདིཝསེན ཝཱ ཨནེསནཾ ཀཏྭཱ, ཨརཧཏྟཾ ཝཱ པཊིཛཱནིཏྭཱ, ཏཱིཎི ཝཱ ཀུཧནཝཏྠཱུནི པཊིསེཝིཏྭཱ ནིརཡེ ནིབྦཏྟཏི།
Ekacco hi dhutaṅgasamādānavasena lūkhājīvī hoti, appapuññatāya vā sakalampi gāmaṃ vicaritvā udarapūraṃ na labhati. So – ‘‘paccaye uppādessāmī’’ti vejjakammādivasena vā anesanaṃ katvā, arahattaṃ vā paṭijānitvā, tīṇi vā kuhanavatthūni paṭisevitvā niraye nibbattati.
ཨཔརོ ཙ ཏཱདིསོཝ པུཉྙཝཱ ཧོཏི། སོ ཏཱཡ པུཉྙསམྤཏྟིཡཱ མཱནཾ ཛནཡིཏྭཱ ཨུཔྤནྣཾ ལཱབྷཾ ཐཱཝརཾ ཀཏྟུཀཱམོ ཨནེསནཝསེན ཏཱིཎི དུཙྩརིཏཱནི པཱུརེཏྭཱ ནིརཡེ ཨུཔྤཛྫཏི།
Aparo ca tādisova puññavā hoti. So tāya puññasampattiyā mānaṃ janayitvā uppannaṃ lābhaṃ thāvaraṃ kattukāmo anesanavasena tīṇi duccaritāni pūretvā niraye uppajjati.
ཨཔརོ སམཱདིནྣདྷུཏངྒོ ཨཔྤཔུཉྙོཝ ཧོཏི, ན ལབྷཏི སུཁེན ཛཱིཝིཏཝུཏྟིཾ། སོ – ‘‘པུབྦེཔཱཧཾ ཨཀཏཔུཉྙཏཱཡ ཀིཉྩི ན ལབྷཱམི, སཙེ ཨིདཱནི ཨནེསནཾ ཀརིསྶཾ, ཨཱཡཏིམྤི དུལླབྷསུཁོ བྷཝིསྶཱམཱི’’ཏི ཏཱིཎི སུཙརིཏཱནི པཱུརེཏྭཱ ཨརཧཏྟཾ པཏྟུཾ ཨསཀྐོནྟོ སགྒེ ནིབྦཏྟཏི།
Aparo samādinnadhutaṅgo appapuññova hoti, na labhati sukhena jīvitavuttiṃ. So – ‘‘pubbepāhaṃ akatapuññatāya kiñci na labhāmi, sace idāni anesanaṃ karissaṃ, āyatimpi dullabhasukho bhavissāmī’’ti tīṇi sucaritāni pūretvā arahattaṃ pattuṃ asakkonto sagge nibbattati.
ཨཔརོ པུཉྙཝཱ ཧོཏི, སོ – ‘‘པུབྦེཔཱཧཾ ཀཏཔུཉྙཏཱཡ ཨེཏརཧི སུཁིཏོ, ཨིདཱནིཔི པུཉྙཾ ཀརིསྶཱམཱི’’ཏི ཨནེསནཾ པཧཱཡ ཏཱིཎི སུཙརིཏཱནི པཱུརེཏྭཱ ཨརཧཏྟཾ པཏྟུཾ ཨསཀྐོནྟོ སགྒེ ནིབྦཏྟཏི།
Aparo puññavā hoti, so – ‘‘pubbepāhaṃ katapuññatāya etarahi sukhito, idānipi puññaṃ karissāmī’’ti anesanaṃ pahāya tīṇi sucaritāni pūretvā arahattaṃ pattuṃ asakkonto sagge nibbattati.
༣༨༣. ཨཱགཏིཉྩཱཏི – ‘‘ཨསུཀཊྛཱནཏོ ནཱམ ཨིམེ ཨཱགཏཱ’’ཏི ཨེཝཾ ཨཱགཏིཉྩ། གཏིཉྩཱཏི ཨིདཱནི གནྟབྦཊྛཱནཉྩ། ཙུཏིཉྩཱཏི ཏཏོ ཙཝནཉྩ། ཨུཔཔཏྟིཉྩཱཏི ཏཏོ ཙུཏཱནཾ པུན ཨུཔཔཏྟིཉྩ། ཀིཾ སབྦཾ ཏཔཾ གརཧིསྶཱམཱིཏི – ‘‘ཀེན ཀཱརཎེན གརཧིསྶཱམི, གརཧིཏབྦམེཝ ཧི མཡཾ གརཧཱམ, པསཾསིཏབྦཾ པསཾསཱམ, ན བྷཎྜིཀཾ ཀརོནྟོ མཧཱརཛཀོ ཝིཡ དྷོཏཉྩ ཨདྷོཏཉྩ ཨེཀཏོ ཀརོམཱ’’ཏི དསྶེཏི། ཨིདཱནི ཏམཏྠཾ པཀཱསེནྟོ – ‘‘སནྟི ཀསྶཔ ཨེཀེ སམཎབྲཱཧྨཎཱ’’ཏིཨཱདིམཱཧ།
383.Āgatiñcāti – ‘‘asukaṭṭhānato nāma ime āgatā’’ti evaṃ āgatiñca. Gatiñcāti idāni gantabbaṭṭhānañca. Cutiñcāti tato cavanañca. Upapattiñcāti tato cutānaṃ puna upapattiñca. Kiṃ sabbaṃ tapaṃ garahissāmīti – ‘‘kena kāraṇena garahissāmi, garahitabbameva hi mayaṃ garahāma, pasaṃsitabbaṃ pasaṃsāma, na bhaṇḍikaṃ karonto mahārajako viya dhotañca adhotañca ekato karomā’’ti dasseti. Idāni tamatthaṃ pakāsento – ‘‘santi kassapa eke samaṇabrāhmaṇā’’tiādimāha.
༣༨༤. ཡཾ ཏེ ཨེཀཙྩནྟི པཉྩཝིདྷཾ སཱིལཾ, ཏཉྷི ལོཀེ ན ཀོཙི ‘‘ན སཱདྷཱུ’’ཏི ཝདཏི། པུན ཡཾ ཏེ ཨེཀཙྩནྟི པཉྩཝིདྷཾ ཝེརཾ, ཏཾ ན ཀོཙི ‘‘སཱདྷཱུ’’ཏི ཝདཏི། པུན ཡཾ ཏེ ཨེཀཙྩནྟི པཉྩདྭཱརེ ཨསཾཝརཾ, ཏེ ཀིར – ‘‘ཙཀྑུ ནཱམ ན ནིརུནྡྷིཏབྦཾ, ཙཀྑུནཱ མནཱཔཾ རཱུཔཾ དཊྛབྦ’’ནྟི ཝདནྟི, ཨེས ནཡོ སོཏཱདཱིསུ། པུན ཡཾ ཏེ ཨེཀཙྩནྟི པཉྩདྭཱརེ སཾཝརཾ།
384.Yaṃ te ekaccanti pañcavidhaṃ sīlaṃ, tañhi loke na koci ‘‘na sādhū’’ti vadati. Puna yaṃ te ekaccanti pañcavidhaṃ veraṃ, taṃ na koci ‘‘sādhū’’ti vadati. Puna yaṃ te ekaccanti pañcadvāre asaṃvaraṃ, te kira – ‘‘cakkhu nāma na nirundhitabbaṃ, cakkhunā manāpaṃ rūpaṃ daṭṭhabba’’nti vadanti, esa nayo sotādīsu. Puna yaṃ te ekaccanti pañcadvāre saṃvaraṃ.
ཨེཝཾ པརེསཾ ཝཱདེན སཧ ཨཏྟནོ ཝཱདསྶ སམཱནཱསམཱནཏཾ དསྶེཏྭཱ ཨིདཱནི ཨཏྟནོ ཝཱདེན སཧ པརེསཾ ཝཱདསྶ སམཱནཱསམཱནཏཾ དསྶེནྟོ ‘‘ཡཾ མཡ’’ནྟིཨཱདིམཱཧ། ཏཏྲཱཔི པཉྩསཱིལཱདིཝསེནེཝ ཨཏྠོ ཝེདིཏབྦོ།
Evaṃ paresaṃ vādena saha attano vādassa samānāsamānataṃ dassetvā idāni attano vādena saha paresaṃ vādassa samānāsamānataṃ dassento ‘‘yaṃ maya’’ntiādimāha. Tatrāpi pañcasīlādivaseneva attho veditabbo.
སམནུཡུཉྫཱཔནཀཐཱཝཎྞནཱ
Samanuyuñjāpanakathāvaṇṇanā
༣༨༥. སམནུཡུཉྫནྟནྟི སམནུཡུཉྫནྟུ, ཨེཏྠ ཙ ལདྡྷིཾ པུཙྪནྟོ སམནུཡུཉྫཏི ནཱམ, ཀཱརཎཾ པུཙྪནྟོ སམནུགཱཧཏི ནཱམ, ཨུབྷཡཾ པུཙྪནྟོ སམནུབྷཱསཏི ནཱམ། སཏྠཱརཱ ཝཱ སཏྠཱརནྟི སཏྠཱརཱ ཝཱ སདྡྷིཾ སཏྠཱརཾ ཨུཔསཾཧརིཏྭཱ – ‘‘ཀིཾ ཏེ སཏྠཱ ཏེ དྷམྨེ སབྦསོ པཧཱཡ ཝཏྟཏི, ཨུདཱཧུ སམཎོ གོཏམོ’’ཏི། དུཏིཡཔདེཔི ཨེསེཝ ནཡོ།
385.Samanuyuñjantanti samanuyuñjantu, ettha ca laddhiṃ pucchanto samanuyuñjati nāma, kāraṇaṃ pucchanto samanugāhati nāma, ubhayaṃ pucchanto samanubhāsati nāma. Satthārā vā satthāranti satthārā vā saddhiṃ satthāraṃ upasaṃharitvā – ‘‘kiṃ te satthā te dhamme sabbaso pahāya vattati, udāhu samaṇo gotamo’’ti. Dutiyapadepi eseva nayo.
ཨིདཱནི ཏམཏྠཾ ཡོཛེཏྭཱ དསྶེནྟོ – ‘‘ཡེ ཨིམེསཾ བྷཝཏ’’ནྟིཨཱདིམཱཧ། ཏཏྠ ཨཀུསལཱ ཨཀུསལསངྑཱཏཱཏི ཨཀུསལཱ ཙེཝ ‘‘ཨཀུསལཱ’’ཏི ཙ སངྑཱཏཱ ཉཱཏཱ ཀོཊྛཱསཾ ཝཱ ཀཏྭཱ ཋཔིཏཱཏི ཨཏྠོ། ཨེས ནཡོ སབྦཔདེསུ། ཨཔི ཙེཏྠ སཱཝཛྫཱཏི སདོསཱ། ན ཨལམརིཡཱཏི ནིདྡོསཊྛེན ཨརིཡཱ བྷཝིཏུཾ ནཱལཾ ཨསམཏྠཱ།
Idāni tamatthaṃ yojetvā dassento – ‘‘ye imesaṃ bhavata’’ntiādimāha. Tattha akusalā akusalasaṅkhātāti akusalā ceva ‘‘akusalā’’ti ca saṅkhātā ñātā koṭṭhāsaṃ vā katvā ṭhapitāti attho. Esa nayo sabbapadesu. Api cettha sāvajjāti sadosā. Na alamariyāti niddosaṭṭhena ariyā bhavituṃ nālaṃ asamatthā.
༣༨༦-༣༩༢. ཡཾ ཝིཉྙཱུ སམནུཡུཉྫནྟཱཏི ཡེན ཝིཉྙཱུ ཨམྷེ ཙ ཨཉྙེ ཙ པུཙྪནྟཱ ཨེཝཾ ཝདེཡྻུཾ, ཏཾ ཋཱནཾ ཝིཛྫཏི, ཨཏྠི ཏཾ ཀཱརཎནྟི ཨཏྠོ། ཡཾ ཝཱ པན བྷོནྟོ པརེ གཎཱཙརིཡཱཏི པརེ པན བྷོནྟོ གཎཱཙརིཡཱ ཡཾ ཝཱ ཏཾ ཝཱ ཨཔྤམཏྟཀཾ པཧཱཡ ཝཏྟནྟཱིཏི ཨཏྠོ། ཨམྷེཝ ཏཏྠ ཡེབྷུཡྻེན པསཾསེཡྻུནྟི ཨིདཾ བྷགཝཱ སཏྠཱརཱ སཏྠཱརཾ སམནུཡུཉྫནེཔི ཨཱཧ – སངྒྷེན སཾགྷཾ སམནུཡུཉྫནེཔི། ཀསྨཱ? སངྒྷཔསཾསཱཡཔི སཏྠུཡེཝ པསཾསཱསིདྡྷིཏོ། པསཱིདམཱནཱཔི ཧི བུདྡྷསམྤཏྟིཡཱ སངྒྷེ, སངྒྷསམྤཏྟིཡཱ ཙ བུདྡྷེ པསཱིདནྟི, ཏཐཱ ཧི བྷགཝཏོ སརཱིརསམྤཏྟིཾ དིསྭཱ, དྷམྨདེསནཾ ཝཱ སུཏྭཱ བྷཝནྟི ཝཏྟཱརོ – ‘‘ལཱབྷཱ ཝཏ བྷོ སཱཝཀཱནཾ ཡེ ཨེཝརཱུཔསྶ སཏྠུ སནྟིཀཱཝཙརཱ’’ཏི, ཨེཝཾ བུདྡྷསམྤཏྟིཡཱ སངྒྷེ པསཱིདནྟི། བྷིཀྑཱུནཾ པནཱཙཱརགོཙརཾ ཨབྷིཀྐམཔཊིཀྐམཱདཱིནི ཙ དིསྭཱ བྷཝནྟི ཝཏྟཱརོ – ‘‘སནྟིཀཱཝཙརཱནཾ ཝཏ བྷོ སཱཝཀཱནཾ ཨཡཉྩ ཨུཔསམགུཎོ སཏྠུ ཀཱིཝ རཱུཔོ བྷཝིསྶཏཱི’’ཏི, ཨེཝཾ སངྒྷསམྤཏྟིཡཱ བུདྡྷེ པསཱིདནྟི། ཨིཏི ཡཱ སཏྠུཔསཾསཱ, སཱ སངྒྷསྶ། ཡཱ སངྒྷསྶ པསཾསཱ, སཱ སཏྠཱུཏི སངྒྷཔསཾསཱཡཔི སཏྠུཡེཝ པསཾསཱསིདྡྷིཏོ བྷགཝཱ དྭཱིསུཔི ནཡེསུ – ‘‘ཨམྷེཝ ཏཏྠ ཡེབྷུཡྻེན པསཾསེཡྻུ’’ནྟི ཨཱཧ། སམཎོ གོཏམོ ཨིམེ དྷམྨེ ཨནཝསེསཾ པཧཱཡ ཝཏྟཏི, ཡཾ ཝཱ པན བྷོནྟོ པརེ གཎཱཙརིཡཱཏིཨཱདཱིསུཔི པནེཏྠ ཨཡམདྷིཔྤཱཡོ – སམྤཏྟསམཱདཱནསེཏུགྷཱཏཝསེན ཧི ཏིསྶོ ཝིརཏིཡོ། ཏཱསུ སམྤཏྟསམཱདཱན ཝིརཏིམཏྟམེཝ ཨཉྙེསཾ ཧོཏི, སེཏུགྷཱཏཝིརཏི པན སབྦེན སབྦཾ ནཏྠི། པཉྩསུ པན ཏདངྒཝིཀྑམྦྷནསམུཙྪེདཔཊིཔསྶདྡྷིནིསྶརཎཔྤཧཱནེསུ ཨཊྛསམཱཔཏྟིཝསེན ཙེཝ ཝིཔསྶནཱམཏྟཝསེན ཙ ཏདངྒཝིཀྑམྦྷནཔྤཧཱནམཏྟམེཝ ཨཉྙེསཾ ཧོཏི། ཨིཏརཱནི ཏཱིཎི པཧཱནཱནི སབྦེན སབྦཾ ནཏྠི། ཏཐཱ སཱིལསཾཝརོ, ཁནྟིསཾཝརོ, ཉཱཎསཾཝརོ, སཏིསཾཝརོ, ཝཱིརིཡསཾཝརོཏི པཉྩ སཾཝརཱ, ཏེསུ པཉྩསཱིལམཏྟམེཝ ཨདྷིཝཱསནཁནྟིམཏྟམེཝ ཙ ཨཉྙེསཾ ཧོཏི, སེསཾ སབྦེན སབྦཾ ནཏྠི།
386-392.Yaṃ viññū samanuyuñjantāti yena viññū amhe ca aññe ca pucchantā evaṃ vadeyyuṃ, taṃ ṭhānaṃ vijjati, atthi taṃ kāraṇanti attho. Yaṃ vā pana bhonto pare gaṇācariyāti pare pana bhonto gaṇācariyā yaṃ vā taṃ vā appamattakaṃ pahāya vattantīti attho. Amheva tattha yebhuyyena pasaṃseyyunti idaṃ bhagavā satthārā satthāraṃ samanuyuñjanepi āha – saṅghena saṃghaṃ samanuyuñjanepi. Kasmā? Saṅghapasaṃsāyapi satthuyeva pasaṃsāsiddhito. Pasīdamānāpi hi buddhasampattiyā saṅghe, saṅghasampattiyā ca buddhe pasīdanti, tathā hi bhagavato sarīrasampattiṃ disvā, dhammadesanaṃ vā sutvā bhavanti vattāro – ‘‘lābhā vata bho sāvakānaṃ ye evarūpassa satthu santikāvacarā’’ti, evaṃ buddhasampattiyā saṅghe pasīdanti. Bhikkhūnaṃ panācāragocaraṃ abhikkamapaṭikkamādīni ca disvā bhavanti vattāro – ‘‘santikāvacarānaṃ vata bho sāvakānaṃ ayañca upasamaguṇo satthu kīva rūpo bhavissatī’’ti, evaṃ saṅghasampattiyā buddhe pasīdanti. Iti yā satthupasaṃsā, sā saṅghassa. Yā saṅghassa pasaṃsā, sā satthūti saṅghapasaṃsāyapi satthuyeva pasaṃsāsiddhito bhagavā dvīsupi nayesu – ‘‘amheva tattha yebhuyyena pasaṃseyyu’’nti āha. Samaṇo gotamo ime dhamme anavasesaṃ pahāya vattati, yaṃ vā pana bhonto pare gaṇācariyātiādīsupi panettha ayamadhippāyo – sampattasamādānasetughātavasena hi tisso viratiyo. Tāsu sampattasamādāna viratimattameva aññesaṃ hoti, setughātavirati pana sabbena sabbaṃ natthi. Pañcasu pana tadaṅgavikkhambhanasamucchedapaṭipassaddhinissaraṇappahānesu aṭṭhasamāpattivasena ceva vipassanāmattavasena ca tadaṅgavikkhambhanappahānamattameva aññesaṃ hoti. Itarāni tīṇi pahānāni sabbena sabbaṃ natthi. Tathā sīlasaṃvaro, khantisaṃvaro, ñāṇasaṃvaro, satisaṃvaro, vīriyasaṃvaroti pañca saṃvarā, tesu pañcasīlamattameva adhivāsanakhantimattameva ca aññesaṃ hoti, sesaṃ sabbena sabbaṃ natthi.
པཉྩ ཁོ པནིམེ ཨུཔོསཐུདྡེསཱ, ཏེསུ པཉྩསཱིལམཏྟམེཝ ཨཉྙེསཾ ཧོཏི། པཱཏིམོཀྑསཾཝརསཱིལཾ སབྦེན སབྦཾ ནཏྠི། ཨིཏི ཨཀུསལཔྤཧཱནེ ཙ ཀུསལསམཱདཱནེ ཙ, ཏཱིསུ ཝིརཏཱིསུ, པཉྩསུ པཧཱནེསུ, པཉྩསུ སཾཝརེསུ, པཉྩསུ ཨུདྡེསེསུ, – ‘‘ཨཧམེཝ ཙ མཡ྄ཧཉྩ སཱཝཀསངྒྷོ ལོཀེ པཉྙཱཡཏི, མཡཱ ཧི སདིསོ སཏྠཱ ནཱམ, མཡ྄ཧཾ སཱཝཀསངྒྷེན སདིསོ སངྒྷོ ནཱམ ནཏྠཱི’’ཏི བྷགཝཱ སཱིཧནཱདཾ ནདཏི།
Pañca kho panime uposathuddesā, tesu pañcasīlamattameva aññesaṃ hoti. Pātimokkhasaṃvarasīlaṃ sabbena sabbaṃ natthi. Iti akusalappahāne ca kusalasamādāne ca, tīsu viratīsu, pañcasu pahānesu, pañcasu saṃvaresu, pañcasu uddesesu, – ‘‘ahameva ca mayhañca sāvakasaṅgho loke paññāyati, mayā hi sadiso satthā nāma, mayhaṃ sāvakasaṅghena sadiso saṅgho nāma natthī’’ti bhagavā sīhanādaṃ nadati.
ཨརིཡཨཊྛངྒིཀམགྒཝཎྞནཱ
Ariyaaṭṭhaṅgikamaggavaṇṇanā
༣༩༣. ཨེཝཾ སཱིཧནཱདཾ ནདིཏྭཱ ཏསྶ སཱིཧནཱདསྶ ཨཝིཔརཱིཏབྷཱཝཱཝབོདྷནཏྠཾ – ‘‘ཨཏྠི, ཀསྶཔ, མགྒོ’’ཏིཨཱདིམཱཧ། ཏཏྠ མགྒོཏི ལོཀུཏྟརམགྒོ། པཊིཔདཱཏི པུབྦབྷཱགཔཊིཔདཱ། ཀཱལཝཱདཱིཏིཨཱདཱིནི བྲཧྨཛཱལེ ཝཎྞིཏཱནི། ཨིདཱནི ཏཾ དུཝིདྷཾ མགྒཉྩ པཊིཔདཉྩ ཨེཀཏོ ཀཏྭཱ དསྶེནྟོ – ‘‘ཨཡམེཝ ཨརིཡོ’’ཏིཨཱདིམཱཧ། ཨིདཾ པན སུཏྭཱ ཨཙེལོ ཙིནྟེསི – ‘‘སམཎོ གོཏམོ མཡ྄ཧཾཡེཝ མགྒོ ཙ པཊིཔདཱ ཙ ཨཏྠི, ཨཉྙེསཾ ནཏྠཱིཏི མཉྙཏི, ཧནྡསྶཱཧཾ ཨམྷཱཀམྤི མགྒཾ ཀཐེམཱི’’ཏི། ཏཏོ ཨཙེལཀཔཊིཔདཾ ཀཐེསི། ཏེནཱཧ – ‘‘ཨེཝཾ ཝུཏྟེ ཨཙེལོ ཀསྶཔོ བྷགཝནྟཾ ཨེཏདཝོཙ…པེ॰… ཨུདཀོརོཧནཱནུཡོགམནུཡུཏྟོ ཝིཧརཏཱི’’ཏི།
393. Evaṃ sīhanādaṃ naditvā tassa sīhanādassa aviparītabhāvāvabodhanatthaṃ – ‘‘atthi, kassapa, maggo’’tiādimāha. Tattha maggoti lokuttaramaggo. Paṭipadāti pubbabhāgapaṭipadā. Kālavādītiādīni brahmajāle vaṇṇitāni. Idāni taṃ duvidhaṃ maggañca paṭipadañca ekato katvā dassento – ‘‘ayameva ariyo’’tiādimāha. Idaṃ pana sutvā acelo cintesi – ‘‘samaṇo gotamo mayhaṃyeva maggo ca paṭipadā ca atthi, aññesaṃ natthīti maññati, handassāhaṃ amhākampi maggaṃ kathemī’’ti. Tato acelakapaṭipadaṃ kathesi. Tenāha – ‘‘evaṃ vutte acelo kassapo bhagavantaṃ etadavoca…pe… udakorohanānuyogamanuyutto viharatī’’ti.
ཏཔོཔཀྐམཀཐཱཝཎྞནཱ
Tapopakkamakathāvaṇṇanā
༣༩༤. ཏཏྠ ཏཔོཔཀྐམཱཏི ཏཔཱརམྦྷཱ, ཏཔཀམྨཱནཱིཏི ཨཏྠོ། སཱམཉྙསངྑཱཏཱཏི སམཎཀམྨསངྑཱཏཱ། བྲཧྨཉྙསངྑཱཏཱཏི བྲཱཧྨཎཀམྨསངྑཱཏཱ། ཨཙེལཀོཏི ནིཙྩོལོ, ནགྒོཏི ཨཏྠོ། མུཏྟཱཙཱརོཏི ཝིསཊྛཱཙཱརོ, ཨུཙྩཱརཀམྨཱདཱིསུ ལོཀིཡཀུལཔུཏྟཱཙཱརེན ཝིརཧིཏོ ཋིཏཀོཝ ཨུཙྩཱརཾ ཀརོཏི, པསྶཱཝཾ ཀརོཏི, ཁཱདཏི, བྷུཉྫཏི ཙ། ཧཏྠཱཔལེཁནོཏི ཧཏྠེ པིཎྜམྷི ཋིཏེ ཛིཝ྄ཧཱཡ ཧཏྠཾ ཨཔལིཁཏི, ཨུཙྩཱརཾ ཝཱ ཀཏྭཱ ཧཏྠསྨིཉྙེཝ དཎྜཀསཉྙཱི ཧུཏྭཱ ཧཏྠེན ཨཔལིཁཏི། ‘‘བྷིཀྑཱགཧཎཏྠཾ ཨེཧི, བྷནྟེ’’ཏི ཝུཏྟོ ན ཨེཏཱིཏི ན ཨེཧིབྷདྡནྟིཀོ། ‘‘ཏེན ཧི ཏིཊྛ, བྷནྟེ’’ཏི ཝུཏྟོཔི ན ཏིཊྛཏཱིཏི ནཏིཊྛབྷདྡནྟིཀོ། ཏདུབྷཡམྤི ཀིར སོ – ‘‘ཨེཏསྶ ཝཙནཾ ཀཏཾ བྷཝིསྶཏཱི’’ཏི ན ཀརོཏི། ཨབྷིཧཊནྟི པུརེཏརཾ གཧེཏྭཱ ཨཱཧཊཾ བྷིཀྑཾ, ཨུདྡིསྶཀཏནྟི ‘‘ཨིམཾ ཏུམྷེ ཨུདྡིསྶ ཀཏ’’ནྟི ཨེཝཾ ཨཱརོཙིཏཾ བྷིཀྑཾ། ན ནིམནྟནནྟི ‘‘ཨསུཀཾ ནཱམ ཀུལཾ ཝཱ ཝཱིཐིཾ ཝཱ གཱམཾ ཝཱ པཝིསེཡྻཱཐཱ’’ཏི ཨེཝཾ ནིམནྟིཏབྷིཀྑམྤི ན སཱདིཡཏི, ན གཎྷཏི། ན ཀུམྦྷིམུཁཱཏི ཀུམྦྷིཏོ ཨུདྡྷརིཏྭཱ དིཡྻམཱནཾ བྷིཀྑཾ ན གཎྷཏི། ན ཀལོ༹པིམུཁཱཏི ཀལོ༹པཱིཏི ཨུཀྑལི ཝཱ པཙྪི ཝཱ, ཏཏོཔི ན གཎྷཏི། ཀསྨཱ? ཀུམྦྷིཀལོ༹པིཡོ མཾ ནིསྶཱཡ ཀཊཙྪུནཱ པཧཱརཾ ལབྷནྟཱིཏི། ན ཨེལ༹ཀམནྟརནྟི ཨུམྨཱརཾ ཨནྟརཾ ཀཏྭཱ དིཡྻམཱནཾ ན གཎྷཏི། ཀསྨཱ? ‘‘ཨཡཾ མཾ ནིསྶཱཡ ཨནྟརཀརཎཾ ལབྷཏཱི’’ཏི། དཎྜམུསལེསུཔི ཨེསེཝ ནཡོ།
394. Tattha tapopakkamāti tapārambhā, tapakammānīti attho. Sāmaññasaṅkhātāti samaṇakammasaṅkhātā. Brahmaññasaṅkhātāti brāhmaṇakammasaṅkhātā. Acelakoti niccolo, naggoti attho. Muttācāroti visaṭṭhācāro, uccārakammādīsu lokiyakulaputtācārena virahito ṭhitakova uccāraṃ karoti, passāvaṃ karoti, khādati, bhuñjati ca. Hatthāpalekhanoti hatthe piṇḍamhi ṭhite jivhāya hatthaṃ apalikhati, uccāraṃ vā katvā hatthasmiññeva daṇḍakasaññī hutvā hatthena apalikhati. ‘‘Bhikkhāgahaṇatthaṃ ehi, bhante’’ti vutto na etīti na ehibhaddantiko. ‘‘Tena hi tiṭṭha, bhante’’ti vuttopi na tiṭṭhatīti natiṭṭhabhaddantiko. Tadubhayampi kira so – ‘‘etassa vacanaṃ kataṃ bhavissatī’’ti na karoti. Abhihaṭanti puretaraṃ gahetvā āhaṭaṃ bhikkhaṃ, uddissakatanti ‘‘imaṃ tumhe uddissa kata’’nti evaṃ ārocitaṃ bhikkhaṃ. Na nimantananti ‘‘asukaṃ nāma kulaṃ vā vīthiṃ vā gāmaṃ vā paviseyyāthā’’ti evaṃ nimantitabhikkhampi na sādiyati, na gaṇhati. Nakumbhimukhāti kumbhito uddharitvā diyyamānaṃ bhikkhaṃ na gaṇhati. Na kaḷopimukhāti kaḷopīti ukkhali vā pacchi vā, tatopi na gaṇhati. Kasmā? Kumbhikaḷopiyo maṃ nissāya kaṭacchunā pahāraṃ labhantīti. Na eḷakamantaranti ummāraṃ antaraṃ katvā diyyamānaṃ na gaṇhati. Kasmā? ‘‘Ayaṃ maṃ nissāya antarakaraṇaṃ labhatī’’ti. Daṇḍamusalesupi eseva nayo.
དྭིནྣནྟི དྭཱིསུ བྷུཉྫམཱནེསུ ཨེཀསྨིཾ ཨུཊྛཱཡ དེནྟེ ན གཎྷཏི། ཀསྨཱ? ‘‘ཨེཀསྶ ཀབལ༹ནྟརཱཡོ ཧོཏཱི’’ཏི། ན གབྦྷིནིཡཱཏིཨཱདཱིསུ པན ‘‘གབྦྷིནིཡཱ ཀུཙྪིཡཾ དཱརཀོ ཀིལམཏི། པཱཡནྟིཡཱ དཱརཀསྶ ཁཱིརནྟརཱཡོ ཧོཏི, པུརིསནྟརགཏཱཡ རཏིཨནྟརཱཡོ ཧོཏཱི’’ཏི ན གཎྷཏི། སཾཀིཏྟཱིསཱུཏི སཾཀིཏྟེཏྭཱ ཀཏབྷཏྟེསུ, དུབྦྷིཀྑསམཡེ ཀིར ཨཙེལཀསཱཝཀཱ ཨཙེལཀཱནཾ ཨཏྠཱཡ ཏཏོ ཏཏོ ཏཎྜུལཱདཱིནི སམཱདཔེཏྭཱ བྷཏྟཾ པཙནྟི། ཨུཀྐཊྛོ ཨཙེལཀོ ཏཏོཔི ན པཊིགྒཎྷཏི། ན ཡཏྠ སཱཏི ཡཏྠ སུནཁོ – ‘‘པིཎྜཾ ལབྷིསྶཱམཱི’’ཏི ཨུཔཊྛིཏོ ཧོཏི, ཏཏྠ ཏསྶ ཨདཏྭཱ ཨཱཧཊཾ ན གཎྷཏི། ཀསྨཱ? ཨེཏསྶ པིཎྜནྟརཱཡོ ཧོཏཱིཏི། སཎྜསཎྜཙཱརིནཱིཏི སམཱུཧསམཱུཧཙཱརིནཱི, སཙེ ཧི ཨཙེལཀཾ དིསྭཱ – ‘‘ཨིམསྶ བྷིཀྑཾ དསྶཱམཱ’’ཏི མནུསྶཱ བྷཏྟགེཧཾ པཝིསནྟི, ཏེསུ ཙ པཝིསནྟེསུ ཀལོ༹པིམུཁཱདཱིསུ ནིལཱིནཱ མཀྑིཀཱ ཨུཔྤཏིཏྭཱ སཎྜསཎྜཱ ཙརནྟི, ཏཏོ ཨཱཧཊཾ བྷིཀྑཾ ན གཎྷཏི། ཀསྨཱ? མཾ ནིསྶཱཡ མཀྑིཀཱནཾ གོཙརནྟརཱཡོ ཛཱཏོཏི།
Dvinnanti dvīsu bhuñjamānesu ekasmiṃ uṭṭhāya dente na gaṇhati. Kasmā? ‘‘Ekassa kabaḷantarāyo hotī’’ti. Na gabbhiniyātiādīsu pana ‘‘gabbhiniyā kucchiyaṃ dārako kilamati. Pāyantiyā dārakassa khīrantarāyo hoti, purisantaragatāya ratiantarāyo hotī’’ti na gaṇhati. Saṃkittīsūti saṃkittetvā katabhattesu, dubbhikkhasamaye kira acelakasāvakā acelakānaṃ atthāya tato tato taṇḍulādīni samādapetvā bhattaṃ pacanti. Ukkaṭṭho acelako tatopi na paṭiggaṇhati. Na yattha sāti yattha sunakho – ‘‘piṇḍaṃ labhissāmī’’ti upaṭṭhito hoti, tattha tassa adatvā āhaṭaṃ na gaṇhati. Kasmā? Etassa piṇḍantarāyo hotīti. Saṇḍasaṇḍacārinīti samūhasamūhacārinī, sace hi acelakaṃ disvā – ‘‘imassa bhikkhaṃ dassāmā’’ti manussā bhattagehaṃ pavisanti, tesu ca pavisantesu kaḷopimukhādīsu nilīnā makkhikā uppatitvā saṇḍasaṇḍā caranti, tato āhaṭaṃ bhikkhaṃ na gaṇhati. Kasmā? Maṃ nissāya makkhikānaṃ gocarantarāyo jātoti.
ཐུསོདཀནྟི སབྦསསྶསམྦྷཱརེཧི ཀཏཾ སོཝཱིརཀཾ། ཨེཏྠ ཙ སུརཱཔཱནམེཝ སཱཝཛྫཾ, ཨཡཾ པན སབྦེསུཔི སཱཝཛྫསཉྙཱི། ཨེཀཱགཱརིཀོཏི ཡོ ཨེཀསྨིཾཡེཝ གེཧེ བྷིཀྑཾ ལབྷིཏྭཱ ནིཝཏྟཏི ། ཨེཀཱལོཔིཀོཏི ཡོ ཨེཀེནེཝ ཨཱལོཔེན ཡཱཔེཏི། དྭཱགཱརིཀཱདཱིསུཔི ཨེསེཝ ནཡོ། ཨེཀིསྶཱཔི དཏྟིཡཱཏི ཨེཀཱཡ དཏྟིཡཱ། དཏྟི ནཱམ ཨེཀཱ ཁུདྡཀཔཱཏི ཧོཏི, ཡཏྠ ཨགྒབྷིཀྑཾ པཀྑིཔིཏྭཱ ཋཔེནྟི། ཨེཀཱཧིཀནྟི ཨེཀདིཝསནྟརིཀཾ། ཨདྡྷམཱསིཀནྟི ཨདྡྷམཱསནྟརིཀཾ། པརིཡཱཡབྷཏྟབྷོཛནནྟི ཝཱརབྷཏྟབྷོཛནཾ, ཨེཀཱཧཝཱརེན དྭཱིཧཝཱརེན སཏྟཱཧཝཱརེན ཨཌྜྷམཱསཝཱརེནཱཏི ཨེཝཾ དིཝསཝཱརེན ཨཱགཏབྷཏྟབྷོཛནཾ།
Thusodakanti sabbasassasambhārehi kataṃ sovīrakaṃ. Ettha ca surāpānameva sāvajjaṃ, ayaṃ pana sabbesupi sāvajjasaññī. Ekāgārikoti yo ekasmiṃyeva gehe bhikkhaṃ labhitvā nivattati . Ekālopikoti yo ekeneva ālopena yāpeti. Dvāgārikādīsupi eseva nayo. Ekissāpi dattiyāti ekāya dattiyā. Datti nāma ekā khuddakapāti hoti, yattha aggabhikkhaṃ pakkhipitvā ṭhapenti. Ekāhikanti ekadivasantarikaṃ. Addhamāsikanti addhamāsantarikaṃ. Pariyāyabhattabhojananti vārabhattabhojanaṃ, ekāhavārena dvīhavārena sattāhavārena aḍḍhamāsavārenāti evaṃ divasavārena āgatabhattabhojanaṃ.
༣༩༥. སཱཀབྷཀྑོཏི ཨལླསཱཀབྷཀྑོ། སཱམཱཀབྷཀྑོཏི སཱམཱཀཏཎྜུལབྷཀྑོ། ནཱིཝཱརཱདཱིསུ ནཱིཝཱརོ ནཱམ ཨརཉྙེ སཡཾཛཱཏཱ ཝཱིཧིཛཱཏི། དདྡུལནྟི ཙམྨཀཱརེཧི ཙམྨཾ ལིཁིཏྭཱ ཚཌྜིཏཀསཊཾ། ཧཊཾ ཝུཙྩཏི སིལེསོཔི སེཝཱལོཔི། ཀཎནྟི ཀུཎྜཀཾ། ཨཱཙཱམོཏི བྷཏྟཨུཀྑལིཀཱཡ ལགྒོ ཛྷཱམཀཨོདནོ, ཏཾ ཚཌྜིཏཊྛཱནཏོཝ གཧེཏྭཱ ཁཱདཏི, ‘‘ཨོདནཀཉྫིཡ’’ནྟིཔི ཝདནྟི། པིཉྙཱཀཱདཡོ པཱཀཊཱ ཨེཝ། པཝཏྟཕལབྷོཛཱིཏི པཏིཏཕལབྷོཛཱི།
395.Sākabhakkhoti allasākabhakkho. Sāmākabhakkhoti sāmākataṇḍulabhakkho. Nīvārādīsu nīvāro nāma araññe sayaṃjātā vīhijāti. Daddulanti cammakārehi cammaṃ likhitvā chaḍḍitakasaṭaṃ. Haṭaṃ vuccati silesopi sevālopi. Kaṇanti kuṇḍakaṃ. Ācāmoti bhattaukkhalikāya laggo jhāmakaodano, taṃ chaḍḍitaṭṭhānatova gahetvā khādati, ‘‘odanakañjiya’’ntipi vadanti. Piññākādayo pākaṭā eva. Pavattaphalabhojīti patitaphalabhojī.
༣༩༦. སཱཎཱནཱིཏི སཱཎཝཱཀཙོལཱ༹ནི། མསཱཎཱནཱིཏི མིསྶཀཙོལཱ༹ནི། ཚཝདུསྶཱནཱིཏི མཏསརཱིརཏོ ཚཌྜིཏཝཏྠཱནི, ཨེརཀཏིཎཱདཱིནི ཝཱ གནྠེཏྭཱ ཀཏནིཝཱསནཱནི། པཾསུཀཱུལཱནཱིཏི པཐཝིཡཾ ཚཌྜིཏནནྟཀཱནི། ཏིརཱིཊཱནཱིཏི རུཀྑཏཙཝཏྠཱནི། ཨཛིནནྟི ཨཛིནམིགཙམྨཾ། ཨཛིནཀྑིཔནྟི ཏདེཝ མཛ྄ཛྷེ ཕཱལིཏཀཾ། ཀུསཙཱིརནྟི ཀུསཏིཎཱནི གནྠེཏྭཱ ཀཏཙཱིརཾ། ཝཱཀཙཱིརཕལཀཙཱིརེསུཔི ཨེསེཝ ནཡོ། ཀེསཀམྦལནྟི མནུསྶཀེསེཧི ཀཏཀམྦལཾ། ཡཾ སནྡྷཱཡ ཝུཏྟཾ –
396.Sāṇānīti sāṇavākacoḷāni. Masāṇānīti missakacoḷāni. Chavadussānīti matasarīrato chaḍḍitavatthāni, erakatiṇādīni vā ganthetvā katanivāsanāni. Paṃsukūlānīti pathaviyaṃ chaḍḍitanantakāni. Tirīṭānīti rukkhatacavatthāni. Ajinanti ajinamigacammaṃ. Ajinakkhipanti tadeva majjhe phālitakaṃ. Kusacīranti kusatiṇāni ganthetvā katacīraṃ. Vākacīraphalakacīresupi eseva nayo. Kesakambalanti manussakesehi katakambalaṃ. Yaṃ sandhāya vuttaṃ –
‘‘སེཡྻཐཱཔི བྷིཀྑཝེ, ཡཱནི ཀཱནིཙི ཏནྟཱཝུཏཱནི ཝཏྠཱནི, ཀེསཀམྦལོ ཏེསཾ པཊིཀིཊྛོ ཨཀྑཱཡཏི། ཀེསཀམྦལོ, བྷིཀྑཝེ, སཱིཏེ སཱིཏོ, ཨུཎྷེ ཨུཎྷོ ཨཔྤགྒྷོ ཙ དུབྦཎྞོ ཙ དུགྒནྡྷོ དུཀྑསམྥསྶོ’’ཏི།
‘‘Seyyathāpi bhikkhave, yāni kānici tantāvutāni vatthāni, kesakambalo tesaṃ paṭikiṭṭho akkhāyati. Kesakambalo, bhikkhave, sīte sīto, uṇhe uṇho appaggho ca dubbaṇṇo ca duggandho dukkhasamphasso’’ti.
ཝཱལ༹ཀམྦལནྟི ཨསྶཝཱལེཧི ཀཏཀམྦལཾ། ཨུལཱུཀཔཀྑིཀནྟི ཨུལཱུཀཔཀྑཱནི གནྠེཏྭཱ ཀཏནིཝཱསནཾ། ཨུཀྐུཊིཀཔྤདྷཱནམནུཡུཏྟོཏི ཨུཀྐུཊིཀཝཱིརིཡཾ ཨནུཡུཏྟོ, གཙྪནྟོཔི ཨུཀྐུཊིཀོཝ ཧུཏྭཱ ཨུཔྤཏིཏྭཱ ཨུཔྤཏིཏྭཱ གཙྪཏི། ཀཎྚཀཱཔསྶཡིཀོཏི ཨཡཀཎྚཀེ ཝཱ པཀཏིཀཎྚཀེ ཝཱ བྷཱུམིཡཾ ཀོཊྚེཏྭཱ ཏཏྠ ཙམྨཾ ཨཏྠརིཏྭཱ ཋཱནཙངྐམཱདཱིནི ཀརོཏི། སེཡྻནྟི སཡནྟོཔི ཏཏྠེཝ སེཡྻཾ ཀཔྤེཏི། ཕལཀསེཡྻནྟི རུཀྑཕལཀེ སེཡྻཾ། ཐཎྜིལསེཡྻནྟི ཐཎྜིལེ ཨུཙྩེ བྷཱུམིཋཱནེ སེཡྻཾ། ཨེཀཔསྶཡིཀོཏི ཨེཀཔསྶེནེཝ སཡཏི། རཛོཛལླདྷརོཏི སརཱིརཾ ཏེལེན མཀྑིཏྭཱ རཛུཊྛཱནཊྛཱནེ ཏིཊྛཏི, ཨཐསྶ སརཱིརེ རཛོཛལླཾ ལགྒཏི, ཏཾ དྷཱརེཏི། ཡཐཱསནྠཏིཀོཏི ལདྡྷཾ ཨཱསནཾ ཨཀོཔེཏྭཱ ཡདེཝ ལབྷཏི, ཏཏྠེཝ ནིསཱིདནསཱིལོ། ཝེཀཊིཀོཏི ཝིཀཊཁཱདནསཱིལོ། ཝིཀཊནྟི གཱུཐཾ ཝུཙྩཏི། ཨཔཱནཀོཏི པཊིཀྑིཏྟསཱིཏུདཀཔཱནོ། སཱཡཾ ཏཏིཡམསྶཱཏི སཱཡཏཏིཡཀཾ། པཱཏོ, མཛ྄ཛྷནྷིཀེ, སཱཡནྟི དིཝསསྶ ཏིཀྑཏྟུཾ པཱཔཾ པཝཱཧེསྶཱམཱིཏི ཨུདཀོརོཧནཱནུཡོགཾ ཨནུཡུཏྟོ ཝིཧརཏཱིཏི།
Vāḷakambalanti assavālehi katakambalaṃ. Ulūkapakkhikanti ulūkapakkhāni ganthetvā katanivāsanaṃ. Ukkuṭikappadhānamanuyuttoti ukkuṭikavīriyaṃ anuyutto, gacchantopi ukkuṭikova hutvā uppatitvā uppatitvā gacchati. Kaṇṭakāpassayikoti ayakaṇṭake vā pakatikaṇṭake vā bhūmiyaṃ koṭṭetvā tattha cammaṃ attharitvā ṭhānacaṅkamādīni karoti. Seyyanti sayantopi tattheva seyyaṃ kappeti. Phalakaseyyanti rukkhaphalake seyyaṃ. Thaṇḍilaseyyanti thaṇḍile ucce bhūmiṭhāne seyyaṃ. Ekapassayikoti ekapasseneva sayati. Rajojalladharoti sarīraṃ telena makkhitvā rajuṭṭhānaṭṭhāne tiṭṭhati, athassa sarīre rajojallaṃ laggati, taṃ dhāreti. Yathāsanthatikoti laddhaṃ āsanaṃ akopetvā yadeva labhati, tattheva nisīdanasīlo. Vekaṭikoti vikaṭakhādanasīlo. Vikaṭanti gūthaṃ vuccati. Apānakoti paṭikkhittasītudakapāno. Sāyaṃ tatiyamassāti sāyatatiyakaṃ. Pāto, majjhanhike, sāyanti divasassa tikkhattuṃ pāpaṃ pavāhessāmīti udakorohanānuyogaṃ anuyutto viharatīti.
ཏཔོཔཀྐམནིརཏྠཀཏཱཝཎྞནཱ
Tapopakkamaniratthakatāvaṇṇanā
༣༩༧. ཨཐ བྷགཝཱ སཱིལསམྤདཱདཱིཧི ཝིནཱ ཏེསཾ ཏཔོཔཀྐམཱནཾ ནིརཏྠཀཏཾ དསྶེནྟོ – ‘‘ཨཙེལཀོ ཙེཔི ཀསྶཔ ཧོཏཱི’’ཏིཨཱདིམཱཧ། ཏཏྠ ཨཱརཀཱ ཝཱཏི དཱུརེཡེཝ། ཨཝེརནྟི དོསཝེརཝིརཧིཏཾ། ཨབྱཱཔཛྫནྟི དོམནསྶབྱཱཔཛྫརཧིཏཾ།
397. Atha bhagavā sīlasampadādīhi vinā tesaṃ tapopakkamānaṃ niratthakataṃ dassento – ‘‘acelako cepi kassapa hotī’’tiādimāha. Tattha ārakā vāti dūreyeva. Averanti dosaveravirahitaṃ. Abyāpajjanti domanassabyāpajjarahitaṃ.
༣༩༨. དུཀྐརཾ, བྷོ གོཏམཱཏི ཨིདཾ ཀསྶཔོ ‘‘མཡཾ པུབྦེ ཨེཏྟཀམཏྟཾ སཱམཉྙཉྩ བྲཧྨཉྙཉྩཱཏི ཝིཙརཱམ, ཏུམྷེ པན ཨཉྙཾཡེཝ སཱམཉྙཉྩ བྲཧྨཉྙཉྩ ཝདཐཱ’’ཏི དཱིཔེནྟོ ཨཱཧ། པཀཏི ཁོ ཨེསཱཏི པཀཏིཀཐཱ ཨེསཱ། ཨིམཱཡ ཙ, ཀསྶཔ, མཏྟཱཡཱཏི ‘‘ཀསྶཔ ཡདི ཨིམིནཱ པམཱཎེན ཨེཝཾ པརིཏྟཀེན པཊིཔཏྟིཀྐམེན སཱམཉྙཾ ཝཱ བྲཧྨཉྙཾ ཝཱ དུཀྐརཾ སུདུཀྐརཾ ནཱམ ཨབྷཝིསྶ, ཏཏོ ནེཏཾ ཨབྷཝིསྶ ཀལླཾ ཝཙནཱཡ དུཀྐརཾ སཱམཉྙ’’ནྟི ཨཡམེཏྠ པདསམྦནྡྷེན སདྡྷིཾ ཨཏྠོ། ཨེཏེན ནཡེན སབྦཏྠ པདསམྦནྡྷོ ཝེདིཏབྦོ།
398.Dukkaraṃ, bho gotamāti idaṃ kassapo ‘‘mayaṃ pubbe ettakamattaṃ sāmaññañca brahmaññañcāti vicarāma, tumhe pana aññaṃyeva sāmaññañca brahmaññañca vadathā’’ti dīpento āha. Pakati kho esāti pakatikathā esā. Imāya ca, kassapa, mattāyāti ‘‘kassapa yadi iminā pamāṇena evaṃ parittakena paṭipattikkamena sāmaññaṃ vā brahmaññaṃ vā dukkaraṃ sudukkaraṃ nāma abhavissa, tato netaṃ abhavissa kallaṃ vacanāya dukkaraṃ sāmañña’’nti ayamettha padasambandhena saddhiṃ attho. Etena nayena sabbattha padasambandho veditabbo.
༣༩༩. དུཛྫཱནོཏི ཨིདམྤི སོ ‘‘མཡཾ པུབྦེ ཨེཏྟཀེན སམཎོ ཝཱ བྲཱཧྨཎོ ཝཱ ཧོཏཱིཏི ཝིཙརཱམ, ཏུམྷེ པན ཨཉྙཐཱ ཝདཐཱ’’ཏི ཨིདཾ སནྡྷཱཡཱཧ། ཨཐསྶ བྷགཝཱ ཏཾ པཀཏིཝཱདཾ པཊིཀྑིཔིཏྭཱ སབྷཱཝཏོཝ དུཛྫཱནབྷཱཝཾ ཨཱཝིཀརོནྟོ པུནཔི – ‘‘པཀཏི ཁོ’’ཏིཨཱདིམཱཧ། ཏཏྲཱཔི ཝུཏྟནཡེནེཝ པདསམྦནྡྷཾ ཀཏྭཱ ཨཏྠོ ཝེདིཏབྦོ།
399.Dujjānoti idampi so ‘‘mayaṃ pubbe ettakena samaṇo vā brāhmaṇo vā hotīti vicarāma, tumhe pana aññathā vadathā’’ti idaṃ sandhāyāha. Athassa bhagavā taṃ pakativādaṃ paṭikkhipitvā sabhāvatova dujjānabhāvaṃ āvikaronto punapi – ‘‘pakati kho’’tiādimāha. Tatrāpi vuttanayeneva padasambandhaṃ katvā attho veditabbo.
སཱིལསམཱདྷིཔཉྙཱསམྤདཱཝཎྞནཱ
Sīlasamādhipaññāsampadāvaṇṇanā
༤༠༠-༤༠༡. ཀཏམཱ པན སཱ, བྷོ གོཏམཱཏི ཀསྨཱ པུཙྪཏི། ཨཡཾ ཀིར པཎྜིཏོ བྷགཝཏོ ཀཐེནྟསྶེཝ ཀཐཾ ཨུགྒཧེསི, ཨཐ ཨཏྟནོ པཊིཔཏྟིཡཱ ནིརཏྠཀཏཾ ཝིདིཏྭཱ སམཎོ གོཏམོ – ‘‘ཏསྶ ‘ཙཱཡཾ སཱིལསམྤདཱ, ཙིཏྟསམྤདཱ, པཉྙཱསམྤདཱ ཨབྷཱཝིཏཱ ཧོཏི ཨསཙྪིཀཏཱ, ཨཐ ཁོ སོ ཨཱརཀཱཝ སཱམཉྙཱ’ཏིཨཱདིམཱཧ། ཧནྡ དཱནི ནཾ ཏཱ སམྤཏྟིཡོ པུཙྪཱམཱི’’ཏི སཱིལསམྤདཱདིཝིཛཱནནཏྠཾ པུཙྪཏི། ཨཐསྶ བྷགཝཱ བུདྡྷུཔྤཱདཾ དསྶེཏྭཱ ཏནྟིདྷམྨཾ ཀཐེནྟོ ཏཱ སམྤཏྟིཡོ དསྶེཏུཾ – ‘‘ཨིདྷ ཀསྶཔཱ’’ཏིཨཱདིམཱཧ། ཨིམཱཡ ཙ ཀསྶཔ སཱིལསམྤདཱཡཱཏི ཨིདཾ ཨརཧཏྟཕལམེཝ སནྡྷཱཡ ཝུཏྟཾ། ཨརཧཏྟཕལཔརིཡོསཱནཉྷི བྷགཝཏོ སཱསནཾ། ཏསྨཱ ཨརཧཏྟཕལསམྤཡུཏྟཱཧི སཱིལཙིཏྟཔཉྙཱསམྤདཱཧི ཨཉྙཱ ཨུཏྟརིཏརཱ ཝཱ པཎཱིཏཏརཱ ཝཱ སཱིལཱདིསམྤདཱ ནཏྠཱིཏི ཨཱཧ།
400-401.Katamā pana sā, bho gotamāti kasmā pucchati. Ayaṃ kira paṇḍito bhagavato kathentasseva kathaṃ uggahesi, atha attano paṭipattiyā niratthakataṃ viditvā samaṇo gotamo – ‘‘tassa ‘cāyaṃ sīlasampadā, cittasampadā, paññāsampadā abhāvitā hoti asacchikatā, atha kho so ārakāva sāmaññā’tiādimāha. Handa dāni naṃ tā sampattiyo pucchāmī’’ti sīlasampadādivijānanatthaṃ pucchati. Athassa bhagavā buddhuppādaṃ dassetvā tantidhammaṃ kathento tā sampattiyo dassetuṃ – ‘‘idha kassapā’’tiādimāha. Imāya ca kassapa sīlasampadāyāti idaṃ arahattaphalameva sandhāya vuttaṃ. Arahattaphalapariyosānañhi bhagavato sāsanaṃ. Tasmā arahattaphalasampayuttāhi sīlacittapaññāsampadāhi aññā uttaritarā vā paṇītatarā vā sīlādisampadā natthīti āha.
སཱིཧནཱདཀཐཱཝཎྞནཱ
Sīhanādakathāvaṇṇanā
༤༠༢. ཨེཝཉྩ པན ཝཏྭཱ ཨིདཱནི ཨནུཏྟརཾ མཧཱསཱིཧནཱདཾ ནདནྟོ – ‘‘སནྟི ཀསྶཔ ཨེཀེ སམཎབྲཱཧྨཎཱ’’ཏིཨཱདིམཱཧ། ཏཏྠ ཨརིཡནྟི ནིརུཔཀྐིལེསཾ པརམཝིསུདྡྷཾ། པརམནྟི ཨུཏྟམཾ, པཉྩསཱིལཱནི ཧིཨཱདིཾ ཀཏྭཱ ཡཱཝ པཱཏིམོཀྑསཾཝརསཱིལཱ སཱིལམེཝ, ལོཀུཏྟརམགྒཕལསམྤཡུཏྟཾ པན པརམསཱིལཾ ནཱམ། ནཱཧཾ ཏཏྠཱཏི ཏཏྠ སཱིལེཔི པརམསཱིལེཔི ཨཧཾ ཨཏྟནོ སམསམཾ མམ སཱིལསམེན སཱིལེན མཡཱ སམཾ པུགྒལཾ ན པསྶཱམཱིཏི ཨཏྠོ། ཨཧམེཝ ཏཏྠ བྷིཡྻོཏི ཨཧམེཝ ཏསྨིཾ སཱིལེ ཨུཏྟམོ། ཀཏམསྨིཾ? ཡདིདཾ ཨདྷིསཱིལནྟི ཡཾ ཨེཏཾ ཨུཏྟམཾ སཱིལནྟི ཨཏྠོ། ཨིཏི ཨིམཾ པཋམཾ སཱིཧནཱདཾ ནདཏི།
402. Evañca pana vatvā idāni anuttaraṃ mahāsīhanādaṃ nadanto – ‘‘santi kassapa eke samaṇabrāhmaṇā’’tiādimāha. Tattha ariyanti nirupakkilesaṃ paramavisuddhaṃ. Paramanti uttamaṃ, pañcasīlāni hiādiṃ katvā yāva pātimokkhasaṃvarasīlā sīlameva, lokuttaramaggaphalasampayuttaṃ pana paramasīlaṃ nāma. Nāhaṃ tatthāti tattha sīlepi paramasīlepi ahaṃ attano samasamaṃ mama sīlasamena sīlena mayā samaṃ puggalaṃ na passāmīti attho. Ahameva tattha bhiyyoti ahameva tasmiṃ sīle uttamo. Katamasmiṃ? Yadidaṃ adhisīlanti yaṃ etaṃ uttamaṃ sīlanti attho. Iti imaṃ paṭhamaṃ sīhanādaṃ nadati.
ཏཔོཛིགུཙྪཝཱདཱཏི ཡེ ཏཔོཛིགུཙྪཾ ཝདནྟི། ཏཏྠ ཏཔཏཱིཏི ཏཔོ, ཀིལེསསནྟཱཔཀཝཱིརིཡསྶེཏཾ ནཱམཾ, ཏདེཝ ཏེ ཀིལེསེ ཛིགུཙྪཏཱིཏི ཛིགུཙྪཱ། ཨརིཡཱ པརམཱཏི ཨེཏྠ ནིདྡོསཏྟཱ ཨརིཡཱ, ཨཊྛཨཱརམྦྷཝཏྠུཝསེནཔི ཨུཔྤནྣཱ ཝིཔསྶནཱཝཱིརིཡསངྑཱཏཱ ཏཔོཛིགུཙྪཱ ཏཔོཛིགུཙྪཱཝ, མགྒཕལསམྤཡུཏྟཱ པརམཱ ནཱམ། ཨདྷིཛེགུཙྪནྟི ཨིདྷ ཛིགུཙྪབྷཱཝོ ཛེགུཙྪཾ, ཨུཏྟམཾ ཛེགུཙྪཾ ཨདྷིཛེགུཙྪཾ, ཏསྨཱ ཡདིདཾ ཨདྷིཛེགུཙྪཾ, ཏཏྠ ཨཧམེཝ བྷིཡྻོཏི ཨེཝམེཏྠ ཨཏྠོ དཊྛབྦོ། པཉྙཱདྷིཀཱརེཔི ཀམྨསྶཀཏཱཔཉྙཱ ཙ ཝིཔསྶནཱཔཉྙཱ ཙ པཉྙཱ ནཱམ, མགྒཕལསམྤཡུཏྟཱ པརམཱ པཉྙཱ ནཱམ། ཨདྷིཔཉྙནྟི ཨེཏྠ ལིངྒཝིཔལླཱསོ ཝེདིཏབྦོ, ཨཡཾ པནེཏྠཏྠོ – ཡཱཡཾ ཨདྷིཔཉྙཱ ནཱམ ཨཧམེཝ ཏཏྠ བྷིཡྻོཏི ཝིམུཏྟཱདྷིཀཱརེ ཏདངྒཝིཀྑམྦྷནཝིམུཏྟིཡོ ཝིམུཏྟི ནཱམ, སམུཙྪེདཔཊིཔསྶདྡྷིནིསྶརཎཝིམུཏྟིཡོ པན པརམཱ ཝིམུཏྟཱིཏི ཝེདིཏབྦཱ། ཨིདྷཱཔི ཙ ཡདིདཾ ཨདྷིཝིམུཏྟཱིཏི ཡཱ ཨཡཾ ཨདྷིཝིམུཏྟི, ཨཧམེཝ ཏཏྠ བྷིཡྻོཏི ཨཏྠོ།
Tapojigucchavādāti ye tapojigucchaṃ vadanti. Tattha tapatīti tapo, kilesasantāpakavīriyassetaṃ nāmaṃ, tadeva te kilese jigucchatīti jigucchā. Ariyā paramāti ettha niddosattā ariyā, aṭṭhaārambhavatthuvasenapi uppannā vipassanāvīriyasaṅkhātā tapojigucchā tapojigucchāva, maggaphalasampayuttā paramā nāma. Adhijegucchanti idha jigucchabhāvo jegucchaṃ, uttamaṃ jegucchaṃ adhijegucchaṃ, tasmā yadidaṃ adhijegucchaṃ, tattha ahameva bhiyyoti evamettha attho daṭṭhabbo. Paññādhikārepi kammassakatāpaññā ca vipassanāpaññā ca paññā nāma, maggaphalasampayuttā paramā paññā nāma. Adhipaññanti ettha liṅgavipallāso veditabbo, ayaṃ panetthattho – yāyaṃ adhipaññā nāma ahameva tattha bhiyyoti vimuttādhikāre tadaṅgavikkhambhanavimuttiyo vimutti nāma, samucchedapaṭipassaddhinissaraṇavimuttiyo pana paramā vimuttīti veditabbā. Idhāpi ca yadidaṃ adhivimuttīti yā ayaṃ adhivimutti, ahameva tattha bhiyyoti attho.
༤༠༣. སུཉྙཱགཱརེཏི སུཉྙེ གྷརེ, ཨེཀཀོཝ ནིསཱིདིཏྭཱཏི ཨདྷིཔྤཱཡོ། པརིསཱསུ ཙཱཏི ཨཊྛསུ པརིསཱསུ། ཝུཏྟམྤི ཙེཏཾ –
403.Suññāgāreti suññe ghare, ekakova nisīditvāti adhippāyo. Parisāsu cāti aṭṭhasu parisāsu. Vuttampi cetaṃ –
‘‘ཙཏྟཱརིམཱནི, སཱརིཔུཏྟ, ཏཐཱགཏསྶ ཝེསཱརཛྫཱནི། ཡེཧི ཝེསཱརཛྫེཧི སམནྣཱགཏོ ཏཐཱགཏོ ཨཱསབྷཾ ཋཱནཾ པཊིཛཱནཱཏི, པརིསཱསུ སཱིཧནཱདཾ ནདཏཱི’’ཏི (མ॰ ནི॰ ༡.༡༥༠) སུཏྟཾ ཝིཏྠཱརེཏབྦཾ།
‘‘Cattārimāni, sāriputta, tathāgatassa vesārajjāni. Yehi vesārajjehi samannāgato tathāgato āsabhaṃ ṭhānaṃ paṭijānāti, parisāsu sīhanādaṃ nadatī’’ti (ma. ni. 1.150) suttaṃ vitthāretabbaṃ.
པཉྷཉྩ ནཾ པུཙྪནྟཱིཏི པཎྜིཏཱ དེཝམནུསྶཱ ནཾ པཉྷཾ ཨབྷིསངྑརིཏྭཱ པུཙྪནྟི། བྱཱཀརོཏཱིཏི ཏངྑཎཉྙེཝ ཝིསྶཛྫེསི། ཙིཏྟཾ ཨཱརཱདྷེཏཱིཏི པཉྷཱཝིསྶཛྫནེན མཧཱཛནསྶ ཙིཏྟཾ པརིཏོསེཏིཡེཝ། ནོ ཙ ཁོ སོཏབྦཾ མཉྙནྟཱིཏི ཙིཏྟཾ ཨཱརཱདྷེཏྭཱ ཀཐེནྟསྶཔིསྶ ཝཙནཾ པརེ སོཏབྦཾ ན མཉྙནྟཱིཏི, ཨེཝཉྩ ཝདེཡྻུནྟི ཨཏྠོ། སོཏབྦཉྩསྶ མཉྙནྟཱིཏི དེཝཱཔི མནུསྶཱཔི མཧནྟེནེཝ ཨུསྶཱཧེན སོཏབྦཾ མཉྙནྟི། པསཱིདནྟཱིཏི སུཔསནྣཱ ཀལླཙིཏྟཱ མུདུཙིཏྟཱ ཧོནྟི། པསནྣཱཀཱརཾ ཀརོནྟཱིཏི ན མུདྡྷཔྤསནྣཱཝ ཧོནྟི, པཎཱིཏཱནི ཙཱིཝརཱདཱིནི ཝེལུ༹ཝནཝིཧཱརཱདཡོ ཙ མཧཱཝིཧཱརེ པརིཙྩཛནྟཱ པསནྣཱཀཱརཾ ཀརོནྟི། ཏཐཏྟཱཡཱཏི ཡཾ སོ དྷམྨཾ དེསེཏི ཏཐཱ བྷཱཝཱཡ, དྷམྨཱནུདྷམྨཔཊིཔཏྟིཔཱུརཎཏྠཱཡ པཊིཔཛྫནྟཱིཏི ཨཏྠོ། ཏཐཏྟཱཡ ཙ པཊིཔཛྫནྟཱིཏི ཏཐབྷཱཝཱཡ པཊིཔཛྫནྟི, ཏསྶ ཧི བྷགཝཏོ དྷམྨཾ སུཏྭཱ ཀེཙི སརཎེསུ ཀེཙི པཉྩསུ སཱིལེསུ པཏིཊྛཧནྟི, ཨཔརེ ནིཀྑམིཏྭཱ པབྦཛནྟི། པཊིཔནྣཱ ཙ ཨཱརཱདྷེནྟཱིཏི ཏཉྩ པན པཊིཔདཾ པཊིཔནྣཱ པཱུརེཏུཾ སཀྐོནྟི, སབྦཱཀཱརེན པན པཱུརེནྟི, པཊིཔཏྟིཔཱུརཎེན ཏསྶ བྷོཏོ གོཏམསྶ ཙིཏྟཾ ཨཱརཱདྷེནྟཱིཏི ཝཏྟབྦཱ།
Pañhañca naṃ pucchantīti paṇḍitā devamanussā naṃ pañhaṃ abhisaṅkharitvā pucchanti. Byākarotīti taṅkhaṇaññeva vissajjesi. Cittaṃ ārādhetīti pañhāvissajjanena mahājanassa cittaṃ paritosetiyeva. No ca kho sotabbaṃ maññantīti cittaṃ ārādhetvā kathentassapissa vacanaṃ pare sotabbaṃ na maññantīti, evañca vadeyyunti attho. Sotabbañcassa maññantīti devāpi manussāpi mahanteneva ussāhena sotabbaṃ maññanti. Pasīdantīti supasannā kallacittā muducittā honti. Pasannākāraṃ karontīti na muddhappasannāva honti, paṇītāni cīvarādīni veḷuvanavihārādayo ca mahāvihāre pariccajantā pasannākāraṃ karonti. Tathattāyāti yaṃ so dhammaṃ deseti tathā bhāvāya, dhammānudhammapaṭipattipūraṇatthāya paṭipajjantīti attho. Tathattāya ca paṭipajjantīti tathabhāvāya paṭipajjanti, tassa hi bhagavato dhammaṃ sutvā keci saraṇesu keci pañcasu sīlesu patiṭṭhahanti, apare nikkhamitvā pabbajanti. Paṭipannā ca ārādhentīti tañca pana paṭipadaṃ paṭipannā pūretuṃ sakkonti, sabbākārena pana pūrenti, paṭipattipūraṇena tassa bhoto gotamassa cittaṃ ārādhentīti vattabbā.
ཨིམསྨིཾ པནོཀཱསེ ཋཏྭཱ སཱིཧནཱདཱ སམོདྷཱནེཏབྦཱ། ཨེཀཙྩཾ ཏཔསྶིཾ ནིརཡེ ནིབྦཏྟཾ པསྶཱམཱིཏི ཧི བྷགཝཏོ ཨེཀོ སཱིཧནཱདོ། ཨཔརཾ སགྒེ ནིབྦཏྟཾ པསྶཱམཱིཏི ཨེཀོ། ཨཀུསལདྷམྨཔྤཧཱནེ ཨཧམེཝ སེཊྛོཏི ཨེཀོ། ཀུསལདྷམྨསམཱདཱནེཔི ཨཧམེཝ སེཊྛོཏི ཨེཀོ། ཨཀུསལདྷམྨཔྤཧཱནེ མཡ྄ཧམེཝ སཱཝཀསངྒྷོ སེཊྛོཏི ཨེཀོ། ཀུསལདྷམྨསམཱདཱནེཔི མཡ྄ཧཾཡེཝ སཱཝཀསངྒྷོ སེཊྛོཏི ཨེཀོ། སཱིལེན མཡ྄ཧཾ སདིསོ ནཏྠཱིཏི ཨེཀོ། ཝཱིརིཡེན མཡ྄ཧཾ སདིསོ ནཏྠཱིཏི ཨེཀོ། པཉྙཱཡ…པེ॰… ཝིམུཏྟིཡཱ…པེ॰… སཱིཧནཱདཾ ནདནྟོ པརིསམཛ྄ཛྷེ ནིསཱིདིཏྭཱ ནདཱམཱིཏི ཨེཀོ། ཝིསཱརདོ ཧུཏྭཱ ནདཱམཱིཏི ཨེཀོ། པཉྷཾ མཾ པུཙྪནྟཱིཏི ཨེཀོ། པཉྷཾ པུཊྛོ ཝིསྶཛྫེམཱིཏི ཨེཀོ། ཝིསྶཛྫནེན པརསྶ ཙིཏྟཾ ཨཱརཱདྷེམཱིཏི ཨེཀོ། སུཏྭཱ སོཏབྦཾ མཉྙནྟཱིཏི ཨེཀོ། སུཏྭཱ མེ པསཱིདནྟཱིཏི ཨེཀོ། པསནྣཱཀཱརཾ ཀརོནྟཱིཏི ཨེཀོ། ཡཾ པཊིཔཏྟིཾ དེསེམི, ཏཐཏྟཱཡ པཊིཔཛྫནྟཱིཏི ཨེཀོ། པཊིཔནྣཱ ཙ མཾ ཨཱརཱདྷེནྟཱིཏི ཨེཀོ། ཨིཏི པུརིམཱནཾ དསནྣཾ ཨེཀེཀསྶ – ‘‘པརིསཱསུ ཙ ནདཏཱི’’ཏི ཨཱདཡོ དས དས པརིཝཱརཱ། ཨེཝཾ ཏེ དས པུརིམཱནཾ དསནྣཾ པརིཝཱརཝསེན སཏཾ པུརིམཱ ཙ དསཱཏི དསཱདྷིཀཾ སཱིཧནཱདསཏཾ ཧོཏི། ཨིཏོ ཨཉྙསྨིཾ པན སུཏྟེ ཨེཏྟཀཱ སཱིཧནཱདཱ དུལླབྷཱ, ཏེནིདཾ སུཏྟཾ མཧཱསཱིཧནཱདནྟི ཝུཙྩཏི། ཨིཏི བྷགཝཱ ‘‘སཱིཧནཱདཾ ཁོ སམཎོ གོཏམོ ནདཏི, ཏཉྩ ཁོ སུཉྙཱགཱརེ ནདཏཱི’’ཏི ཨེཝཾ ཝཱདཱནུ ཝཱདཾ པཊིསེདྷེཏྭཱ ཨིདཱནི པརིསཏི ནདིཏཔུབྦཾ སཱིཧནཱདཾ དསྶེནྟོ ‘‘ཨེཀམིདཱཧ’’ནྟིཨཱདིམཱཧ།
Imasmiṃ panokāse ṭhatvā sīhanādā samodhānetabbā. Ekaccaṃ tapassiṃ niraye nibbattaṃ passāmīti hi bhagavato eko sīhanādo. Aparaṃ sagge nibbattaṃ passāmīti eko. Akusaladhammappahāne ahameva seṭṭhoti eko. Kusaladhammasamādānepi ahameva seṭṭhoti eko. Akusaladhammappahāne mayhameva sāvakasaṅgho seṭṭhoti eko. Kusaladhammasamādānepi mayhaṃyeva sāvakasaṅgho seṭṭhoti eko. Sīlena mayhaṃ sadiso natthīti eko. Vīriyena mayhaṃ sadiso natthīti eko. Paññāya…pe… vimuttiyā…pe… sīhanādaṃ nadanto parisamajjhe nisīditvā nadāmīti eko. Visārado hutvā nadāmīti eko. Pañhaṃ maṃ pucchantīti eko. Pañhaṃ puṭṭho vissajjemīti eko. Vissajjanena parassa cittaṃ ārādhemīti eko. Sutvā sotabbaṃ maññantīti eko. Sutvā me pasīdantīti eko. Pasannākāraṃ karontīti eko. Yaṃ paṭipattiṃ desemi, tathattāya paṭipajjantīti eko. Paṭipannā ca maṃ ārādhentīti eko. Iti purimānaṃ dasannaṃ ekekassa – ‘‘parisāsu ca nadatī’’ti ādayo dasa dasa parivārā. Evaṃ te dasa purimānaṃ dasannaṃ parivāravasena sataṃ purimā ca dasāti dasādhikaṃ sīhanādasataṃ hoti. Ito aññasmiṃ pana sutte ettakā sīhanādā dullabhā, tenidaṃ suttaṃ mahāsīhanādanti vuccati. Iti bhagavā ‘‘sīhanādaṃ kho samaṇo gotamo nadati, tañca kho suññāgāre nadatī’’ti evaṃ vādānu vādaṃ paṭisedhetvā idāni parisati naditapubbaṃ sīhanādaṃ dassento ‘‘ekamidāha’’ntiādimāha.
ཏིཏྠིཡཔརིཝཱསཀཐཱཝཎྞནཱ
Titthiyaparivāsakathāvaṇṇanā
༤༠༤. ཏཏྠ ཏཏྲ མཾ ཨཉྙཏརོ ཏཔབྲཧྨཙཱརཱིཏི ཏཏྲ རཱཛགཧེ གིཛ྄ཛྷཀཱུཊེ པབྦཏེ ཝིཧརནྟཾ མཾ ཨཉྙཏརོ ཏཔབྲཧྨཙཱརཱི ནིགྲོདྷོ ནཱམ པརིབྦཱཛཀོ ། ཨདྷིཛེགུཙྪེཏི ཝཱིརིཡེན པཱཔཛིགུཙྪནཱདྷིཀཱརེ པཉྷཾ པུཙྪི། ཨིདཾ ཡཾ ཏཾ བྷགཝཱ གིཛ྄ཛྷཀཱུཊེ མཧཱཝིཧཱརེ ནིསིནྣོ ཨུདུམྦརིཀཱཡ དེཝིཡཱ ཨུཡྻཱནེ ནིསིནྣསྶ ནིགྲོདྷསྶ ཙ པརིབྦཱཛཀསྶ སནྡྷཱནསྶ ཙ ཨུཔཱསཀསྶ དིབྦཱཡ སོཏདྷཱཏུཡཱ ཀཐཱསལླཱཔཾ སུཏྭཱ ཨཱཀཱསེནཱགནྟྭཱ ཏེསཾ སནྟིཀེ པཉྙཏྟེ ཨཱསནེ ནིསཱིདིཏྭཱ ནིགྲོདྷེན ཨདྷིཛེགུཙྪེ པུཊྛཔཉྷཾ ཝིསྶཛྫེསི, ཏཾ སནྡྷཱཡ ཝུཏྟཾ། པརཾ ཝིཡ མཏྟཱཡཱཏི པརམཱཡ མཏྟཱཡ, ཨཏིམཧནྟེནེཝ པམཱཎེནཱཏི ཨཏྠོ། ཀོ ཧི, བྷནྟེཏི ཋཔེཏྭཱ ཨནྡྷབཱལཾ དིཊྛིགཏིཀཾ ཨཉྙོ པཎྜིཏཛཱཏིཀོ ‘‘ཀོ ནཱམ བྷགཝཏོ དྷམྨཾ སུཏྭཱ ན ཨཏྟམནོ ཨསྶཱ’’ཏི ཝདཏི། ལབྷེཡྻཱཧནྟི ཨིདཾ སོ – ‘‘ཙིརཾ ཝཏ མེ ཨནིཡྻཱནིཀཔཀྑེ ཡོཛེཏྭཱ ཨཏྟཱ ཀིལམིཏོ, ‘སུཀྑནདཱིཏཱིརེ ནྷཱཡིསྶཱམཱི’ཏི སམྤརིཝཏྟེནྟེན ཝིཡ ཐུསེ ཀོཊྚེནྟེན ཝིཡ ན ཀོཙི ཨཏྠོ ནིཔྥཱདིཏོ། ཧནྡཱཧཾ ཨཏྟཱནཾ ཡོགེ ཡོཛེསྶཱམཱི’’ཏི ཙིནྟེཏྭཱ ཨཱཧ། ཨཐ བྷགཝཱ ཡོ ཨནེན ཁནྡྷཀེ ཏིཏྠིཡཔརིཝཱསོ པཉྙཏྟོ, ཡོ ཨཉྙཏིཏྠིཡཔུབྦོ སཱམཎེརབྷཱུམིཡཾ ཋིཏོ – ‘‘ཨཧཾ བྷནྟེ, ཨིཏྠནྣཱམོ ཨཉྙཏིཏྠིཡཔུབྦོ ཨིམསྨིཾ དྷམྨཝིནཡེ ཨཱཀངྑཱམི ཨུཔསམྤདཾ, སྭཱཧཾ, བྷནྟེ, སཾགྷཾ ཙཏྟཱརོ མཱསེ པརིཝཱསཾ ཡཱཙཱམཱི’’ཏིཨཱདིནཱ (མཧཱཝ॰ ༨༦) ནཡེན སམཱདིཡིཏྭཱ པརིཝསཏི, ཏཾ སནྡྷཱཡ – ‘‘ཡོ ཁོ, ཀསྶཔ, ཨཉྙཏིཏྠིཡཔུབྦོ’’ཏིཨཱདིམཱཧ།
404. Tattha tatra maṃ aññataro tapabrahmacārīti tatra rājagahe gijjhakūṭe pabbate viharantaṃ maṃ aññataro tapabrahmacārī nigrodho nāma paribbājako . Adhijeguccheti vīriyena pāpajigucchanādhikāre pañhaṃ pucchi. Idaṃ yaṃ taṃ bhagavā gijjhakūṭe mahāvihāre nisinno udumbarikāya deviyā uyyāne nisinnassa nigrodhassa ca paribbājakassa sandhānassa ca upāsakassa dibbāya sotadhātuyā kathāsallāpaṃ sutvā ākāsenāgantvā tesaṃ santike paññatte āsane nisīditvā nigrodhena adhijegucche puṭṭhapañhaṃ vissajjesi, taṃ sandhāya vuttaṃ. Paraṃ viya mattāyāti paramāya mattāya, atimahanteneva pamāṇenāti attho. Ko hi, bhanteti ṭhapetvā andhabālaṃ diṭṭhigatikaṃ añño paṇḍitajātiko ‘‘ko nāma bhagavato dhammaṃ sutvā na attamano assā’’ti vadati. Labheyyāhanti idaṃ so – ‘‘ciraṃ vata me aniyyānikapakkhe yojetvā attā kilamito, ‘sukkhanadītīre nhāyissāmī’ti samparivattentena viya thuse koṭṭentena viya na koci attho nipphādito. Handāhaṃ attānaṃ yoge yojessāmī’’ti cintetvā āha. Atha bhagavā yo anena khandhake titthiyaparivāso paññatto, yo aññatitthiyapubbo sāmaṇerabhūmiyaṃ ṭhito – ‘‘ahaṃ bhante, itthannāmo aññatitthiyapubbo imasmiṃ dhammavinaye ākaṅkhāmi upasampadaṃ, svāhaṃ, bhante, saṃghaṃ cattāro māse parivāsaṃ yācāmī’’tiādinā (mahāva. 86) nayena samādiyitvā parivasati, taṃ sandhāya – ‘‘yo kho, kassapa, aññatitthiyapubbo’’tiādimāha.
༤༠༥. ཏཏྠ པབྦཛྫནྟི ཝཙནསིལིཊྛཏཱཝསེནེཝ ཝུཏྟཾ, ཨཔརིཝསིཏྭཱཡེཝ ཧི པབྦཛྫཾ ལབྷཏི། ཨུཔསམྤདཏྠིཀེན པན ནཱཏིཀཱལེན གཱམཔྤཝེསནཱདཱིནི ཨཊྛ ཝཏྟཱནི པཱུརེནྟེན པརིཝསིཏབྦཾ། ཨཱརདྡྷཙིཏྟཱཏི ཨཊྛཝཏྟཔཱུརཎེན ཏུཊྛཙིཏྟཱ, ཨཡམེཏྠ སངྑེཔཏྠོ། ཝིཏྠཱརཏོ པནེས ཏིཏྠིཡཔརིཝཱསོ སམནྟཔཱསཱདིཀཱཡ ཝིནཡཊྛཀཐཱཡཾ པབྦཛྫཁནྡྷཀཝཎྞནཱཡ ཝུཏྟནཡེན ཝེདིཏབྦོ། ཨཔི ཙ མེཏྠཱཏི ཨཔི ཙ མེ ཨེཏྠ། པུགྒལཝེམཏྟཏཱ ཝིདིཏཱཏི པུགྒལནཱནཏྟཾ ཝིདིཏཾ། ‘‘ཨཡཾ པུགྒལོ པརིཝཱསཱརཧོ, ཨཡཾ ན པརིཝཱསཱརཧོ’’ཏི ཨིདཾ མཡ྄ཧཾ པཱཀཊནྟི དསྶེཏི། ཏཏོ ཀསྶཔོ ཙིནྟེསི – ‘‘ཨཧོ ཨཙྪརིཡཾ བུདྡྷསཱསནཾ, ཡཏྠ ཨེཝཾ གྷཾསིཏྭཱ ཀོཊྚེཏྭཱ ཡུཏྟམེཝ གཎྷནྟི, ཨཡུཏྟཾ ཚཌྜེནྟཱི’’ཏི, ཏཏོ སུཊྛུཏརཾ པབྦཛྫཱཡ སཉྫཱཏུསྶཱཧོ – ‘‘སཙེ བྷནྟེ’’ཏིཨཱདིམཱཧ།
405. Tattha pabbajjanti vacanasiliṭṭhatāvaseneva vuttaṃ, aparivasitvāyeva hi pabbajjaṃ labhati. Upasampadatthikena pana nātikālena gāmappavesanādīni aṭṭha vattāni pūrentena parivasitabbaṃ. Āraddhacittāti aṭṭhavattapūraṇena tuṭṭhacittā, ayamettha saṅkhepattho. Vitthārato panesa titthiyaparivāso samantapāsādikāya vinayaṭṭhakathāyaṃ pabbajjakhandhakavaṇṇanāya vuttanayena veditabbo. Api ca metthāti api ca me ettha. Puggalavemattatā viditāti puggalanānattaṃ viditaṃ. ‘‘Ayaṃ puggalo parivāsāraho, ayaṃ na parivāsāraho’’ti idaṃ mayhaṃ pākaṭanti dasseti. Tato kassapo cintesi – ‘‘aho acchariyaṃ buddhasāsanaṃ, yattha evaṃ ghaṃsitvā koṭṭetvā yuttameva gaṇhanti, ayuttaṃ chaḍḍentī’’ti, tato suṭṭhutaraṃ pabbajjāya sañjātussāho – ‘‘sace bhante’’tiādimāha.
ཨཐ ཁོ བྷགཝཱ ཏསྶ ཏིབྦཙྪནྡཏཾ ཝིདིཏྭཱ – ‘‘ན ཀསྶཔོ པརིཝཱསཾ ཨརཧཏཱི’’ཏི ཨཉྙཏརཾ བྷིཀྑུཾ ཨཱམནྟེསི – ‘‘གཙྪ བྷིཀྑུ ཀསྶཔཾ ནྷཱཔེཏྭཱ པབྦཱཛེཏྭཱ ཨཱནེཧཱི’’ཏི། སོ ཏཐཱ ཀཏྭཱ ཏཾ པབྦཱཛེཏྭཱ བྷགཝཏོ སནྟིཀཾ ཨཱགམཱསི། བྷགཝཱ ཏཾ གཎམཛ྄ཛྷེ ནིསཱིདཱཔེཏྭཱ ཨུཔསམྤཱདེསི། ཏེན ཝུཏྟཾ – ‘‘ཨལཏྠ ཁོ ཨཙེལོ ཀསྶཔོ བྷགཝཏོ སནྟིཀེ པབྦཛྫཾ, ཨལཏྠ ཨུཔསམྤད’’ནྟི། ཨཙིརཱུཔསམྤནྣོཏི ཨུཔསམྤནྣོ ཧུཏྭཱ ནཙིརམེཝ། ཝཱུཔཀཊྛོཏི ཝཏྠུཀཱམཀིལེསཀཱམེཧི ཀཱཡེན ཙེཝ ཙིཏྟེན ཙ ཝཱུཔཀཊྛོ། ཨཔྤམཏྟོཏི ཀམྨཊྛཱནེ སཏིཾ ཨཝིཛཧནྟོ། ཨཱཏཱཔཱིཏི ཀཱཡིཀཙེཏསིཀསངྑཱཏེན ཝཱིརིཡཱཏཱཔེན ཨཱཏཱཔཱི། པཧིཏཏྟོཏི ཀཱཡེ ཙ ཛཱིཝིཏེ ཙ ཨནཔེཀྑཏཱཡ པེསིཏཙིཏྟོ ཝིསྶཊྛཨཏྟབྷཱཝོ། ཡསྶཏྠཱཡཱཏི ཡསྶ ཨཏྠཱཡ། ཀུལཔུཏྟཱཏི ཨཱཙཱརཀུལཔུཏྟཱ། སམྨདེཝཱཏི ཧེཏུནཱཝ ཀཱརཎེནེཝ། ཏདནུཏྟརནྟི ཏཾ ཨནུཏྟརཾ། བྲཧྨཙརིཡཔརིཡོསཱནནྟི མགྒབྲཧྨཙརིཡསྶ པརིཡོསཱནབྷཱུཏཾ ཨརཧཏྟཕལཾ། ཏསྶ ཧི ཨཏྠཱཡ ཀུལཔུཏྟཱ པབྦཛནྟི། དིཊྛེཝ དྷམྨེཏི ཨིམསྨིཾཡེཝ ཨཏྟབྷཱཝེ། སཡཾ ཨབྷིཉྙཱ སཙྪིཀཏྭཱཏི ཨཏྟནཱཡེཝ པཉྙཱཡ པཙྩཀྑཾ ཀཏྭཱ, ཨཔརཔྤཙྩཡཾ ཀཏྭཱཏི ཨཏྠོ། ཨུཔསམྤཛྫ ཝིཧཱསཱིཏི པཱཔུཎིཏྭཱ སམྤཱདེཏྭཱ ཝིཧཱསི, ཨེཝཾ ཝིཧརནྟོ ཙ ཁཱིཎཱ ཛཱཏི…པེ॰… ཨབྦྷཉྙཱསཱིཏི།
Atha kho bhagavā tassa tibbacchandataṃ viditvā – ‘‘na kassapo parivāsaṃ arahatī’’ti aññataraṃ bhikkhuṃ āmantesi – ‘‘gaccha bhikkhu kassapaṃ nhāpetvā pabbājetvā ānehī’’ti. So tathā katvā taṃ pabbājetvā bhagavato santikaṃ āgamāsi. Bhagavā taṃ gaṇamajjhe nisīdāpetvā upasampādesi. Tena vuttaṃ – ‘‘alattha kho acelo kassapo bhagavato santike pabbajjaṃ, alattha upasampada’’nti. Acirūpasampannoti upasampanno hutvā nacirameva. Vūpakaṭṭhoti vatthukāmakilesakāmehi kāyena ceva cittena ca vūpakaṭṭho. Appamattoti kammaṭṭhāne satiṃ avijahanto. Ātāpīti kāyikacetasikasaṅkhātena vīriyātāpena ātāpī. Pahitattoti kāye ca jīvite ca anapekkhatāya pesitacitto vissaṭṭhaattabhāvo. Yassatthāyāti yassa atthāya. Kulaputtāti ācārakulaputtā. Sammadevāti hetunāva kāraṇeneva. Tadanuttaranti taṃ anuttaraṃ. Brahmacariyapariyosānanti maggabrahmacariyassa pariyosānabhūtaṃ arahattaphalaṃ. Tassa hi atthāya kulaputtā pabbajanti. Diṭṭheva dhammeti imasmiṃyeva attabhāve. Sayaṃ abhiññā sacchikatvāti attanāyeva paññāya paccakkhaṃ katvā, aparappaccayaṃ katvāti attho. Upasampajja vihāsīti pāpuṇitvā sampādetvā vihāsi, evaṃ viharanto ca khīṇā jāti…pe… abbhaññāsīti.
ཨེཝམསྶ པཙྩཝེཀྑཎབྷཱུམིཾ དསྶེཏྭཱ ཨརཧཏྟནིཀཱུཊེན དེསནཾ ནིཊྛཱཔེཏུཾ ‘‘ཨཉྙཏརོ ཁོ པནཱཡསྨཱ ཀསྶཔོ ཨརཧཏཾ ཨཧོསཱི’’ཏི ཝུཏྟཾ། ཏཏྠ ཨཉྙཏརོཏི ཨེཀོ། ཨརཧཏནྟི ཨརཧནྟཱནཾ, བྷགཝཏོ སཱཝཀཱནཾ ཨརཧནྟཱནཾ ཨབྦྷནྟརོ ཨཧོསཱིཏི ཨཡམེཏྠ ཨདྷིཔྤཱཡོ། ཡཾ ཡཾ པན ཨནྟརནྟརཱ ན ཝུཏྟཾ, ཏཾ ཏཾ ཏཏྠ ཏཏྠ ཝུཏྟཏྟཱ པཱཀཊམེཝཱཏི།
Evamassa paccavekkhaṇabhūmiṃ dassetvā arahattanikūṭena desanaṃ niṭṭhāpetuṃ ‘‘aññataro kho panāyasmā kassapo arahataṃ ahosī’’ti vuttaṃ. Tattha aññataroti eko. Arahatanti arahantānaṃ, bhagavato sāvakānaṃ arahantānaṃ abbhantaro ahosīti ayamettha adhippāyo. Yaṃ yaṃ pana antarantarā na vuttaṃ, taṃ taṃ tattha tattha vuttattā pākaṭamevāti.
ཨིཏི སུམངྒལཝིལཱསིནིཡཱ དཱིགྷནིཀཱཡཊྛཀཐཱཡཾ
Iti sumaṅgalavilāsiniyā dīghanikāyaṭṭhakathāyaṃ
མཧཱསཱིཧནཱདསུཏྟཝཎྞནཱ ནིཊྛིཏཱ།
Mahāsīhanādasuttavaṇṇanā niṭṭhitā.
Related texts:
ཏིཔིཊཀ (མཱུལ) • Tipiṭaka (Mūla) / སུཏྟཔིཊཀ • Suttapiṭaka / དཱིགྷནིཀཱཡ • Dīghanikāya / ༨. མཧཱསཱིཧནཱདསུཏྟཾ • 8. Mahāsīhanādasuttaṃ
ཊཱིཀཱ • Tīkā / སུཏྟཔིཊཀ (ཊཱིཀཱ) • Suttapiṭaka (ṭīkā) / དཱིགྷནིཀཱཡ (ཊཱིཀཱ) • Dīghanikāya (ṭīkā) / ༨. མཧཱསཱིཧནཱདསུཏྟཝཎྞནཱ • 8. Mahāsīhanādasuttavaṇṇanā
