Library / Tipiṭaka / ཏིཔིཊཀ • Tipiṭaka / མཛྫྷིམནིཀཱཡ (ཊཱིཀཱ) • Majjhimanikāya (ṭīkā)

    ༢. མཧཱསཱིཧནཱདསུཏྟཝཎྞནཱ

    2. Mahāsīhanādasuttavaṇṇanā

    ཝེསཱལཱིནགརཝཎྞནཱ

    Vesālīnagaravaṇṇanā

    ༡༤༦. ཨཔརཱཔརནྟི པུནཔྤུནཾ། ཝིསཱལཱིབྷཱུཏཏཱཡཱཏི གཱཝུཏནྟརཾ གཱཝུཏནྟརཾ པུཐུབྷཱུཏཏཱཡ། ཏཏྲཱཏི ཏསྶཾ ཝིསཱལཱིབྷཱུཏཏཱཡཾ། ཚཌྜིཏམཏྟེཏི ཝིསྶཊྛམཏྟེ། ཨཱུམིབྷཡཱདཱིཧཱིཏི ཨཱུམིཀུམྦྷཱིལཨཱཝཊྚསཾསུཀཱབྷཡེཧི། ཨུདཀཔྤཝཱཧེནཱགཏསྶཔི ཙ ཨུསྨཱ ན ཝིགཙྪཏི, ཨུསྨཱ ཙ ནཱམ ཨཱིདིསསྶ སཝིཉྙཱཎཀཏཱཡ བྷཝེཡྻཱཏི ‘‘སིཡཱ གབྦྷོ’’ཏི ཙིནྟེསི། ཏཐཱ ཧཱིཏིཨཱདི ཏཏྠ ཀཱརཎཙིནྟཱ། པུཉྙཝནྟཏཱཡ དུགྒནྡྷཾ ནཱཧོསི, སཨུསུམཏཱཡ པཱུཏིཀབྷཱཝོ། དཱརཀཱནཾ པུཉྙཱུཔནིསྶཡཏོ ཨངྒུཊྛཀཏོ ཙསྶ ཁཱིརཾ ནིབྦཏྟི, ཁཱིརབྷཏྟཉྩ ལབྷི། ཙརིམཀབྷཝེ བོདྷིསཏྟེ ཀུཙྪིགཏེ བོདྷིསཏྟམཱཏུ ཝིཡ ཨུདརཙྪཝིཡཱ ཨཙྪཝིཔྤསནྣཏཱཡ ནིཙྪཝི ཝིཡཱཏི ཀཏྭཱ ཨཱཧ ‘‘ནིཙྪཝཱི ཨཧེསུ’’ནྟི། ཏེསནྟི དྭིནྣཾ དཱརཀཱནཾ། མཱཏཱཔིཏརོཏི པོསཀམཱཏཱཔིཏརོ། ཨབྷིསིཉྩིཏྭཱ རཱཛཱནཾ ཨཀཾསུ རཛྫསམྤཏྟིཡཱ དཱཡཀསྶ ཀམྨསྶ ཀཏཏྟཱ, ཨསམྦྷིནྣེ ཨེཝ རཱཛཀུལེ ཨུཔྤནྣཏྟཱ ཙ། ཀུམཱརསྶ པུཉྙཱནུབྷཱཝསཉྩོདིཏཱ དེཝཏཱདྷིགྒཧིཏཱཏི ཀེཙི།

    146.Aparāparanti punappunaṃ. Visālībhūtatāyāti gāvutantaraṃ gāvutantaraṃ puthubhūtatāya. Tatrāti tassaṃ visālībhūtatāyaṃ. Chaḍḍitamatteti vissaṭṭhamatte. Ūmibhayādīhīti ūmikumbhīlaāvaṭṭasaṃsukābhayehi. Udakappavāhenāgatassapi ca usmā na vigacchati, usmā ca nāma īdisassa saviññāṇakatāya bhaveyyāti ‘‘siyā gabbho’’ti cintesi. Tathā hītiādi tattha kāraṇacintā. Puññavantatāya duggandhaṃ nāhosi, sausumatāya pūtikabhāvo. Dārakānaṃ puññūpanissayato aṅguṭṭhakato cassa khīraṃ nibbatti, khīrabhattañca labhi. Carimakabhave bodhisatte kucchigate bodhisattamātu viya udaracchaviyā acchavippasannatāya nicchavi viyāti katvā āha ‘‘nicchavī ahesu’’nti. Tesanti dvinnaṃ dārakānaṃ. Mātāpitaroti posakamātāpitaro. Abhisiñcitvā rājānaṃ akaṃsu rajjasampattiyā dāyakassa kammassa katattā, asambhinne eva rājakule uppannattā ca. Kumārassa puññānubhāvasañcoditā devatādhiggahitāti keci.

    པུརསྶ ཨཔརེཏི པུརསྶ ཨཔརདིསཱཡ གཱཝུཏམཏྟེ ཋཱནེ ཛཱིཝཀམྦཝནཾ ཝིཡ སཔཱཀཱརམནྡིརཀེ། ཨཙིརཔཀྐནྟོཏི ཨེཏྠ ན དེསནྟརཔཀྐམནཾ ཨདྷིཔྤེཏཾ, ཨཐ ཁོ སཱསནཏོ ཨཔཀྐམནནྟི དསྶེནྟོ ‘‘ཝིབྦྷམིཏྭཱ’’ཏིཨཱདིམཱཧ། ཏེནེཝཱཧ ‘‘ཨིམསྨཱ དྷམྨཝིནཡཱ’’ཏི། པརིསཏཱིཏི པརིསཱཡཾ, ཛནསམཱུཧེཏི ཨཏྠོ། ཛནསམཱུཧགཏོ པན ‘‘པརིསམཛ྄ཛྷེ’’ཏི ཝུཏྟོ། བྷཱཝནཱམནསིཀཱརེན ཝིནཱ པཀཏིཡཱཝ མནུསྶེཧི ནིབྦཏྟེཏབྦོ དྷམྨོཏི མནུསྶདྷམྨོ, མནུསྶཏྟབྷཱཝཱཝཧོ ཝཱ དྷམྨོ མནུསྶདྷམྨོ, ཨནུལཱ༹རཾ པརིཏྟཀུསལཾ། ཡཾ ཨསཏིཔི བུདྡྷུཔྤཱདེ ཝཏྟཏི, ཡཉྩ སནྡྷཱཡཱཧ ‘‘ཧཱིནེན བྲཧྨཙརིཡེན, ཁཏྟིཡེ ཨུཔཔཛྫཏཱི’’ཏི། ‘‘ཨམྷཱཀཾ བུདྡྷོ’’ཏི བུདྡྷེ མམཏྟཀཱརིནོ བུདྡྷམཱམཀཱ། སེསཔདདྭཡེཔི ཨེསེཝ ནཡོ།

    Purassa apareti purassa aparadisāya gāvutamatte ṭhāne jīvakambavanaṃ viya sapākāramandirake. Acirapakkantoti ettha na desantarapakkamanaṃ adhippetaṃ, atha kho sāsanato apakkamananti dassento ‘‘vibbhamitvā’’tiādimāha. Tenevāha ‘‘imasmā dhammavinayā’’ti. Parisatīti parisāyaṃ, janasamūheti attho. Janasamūhagato pana ‘‘parisamajjhe’’ti vutto. Bhāvanāmanasikārena vinā pakatiyāva manussehi nibbattetabbo dhammoti manussadhammo, manussattabhāvāvaho vā dhammo manussadhammo, anuḷāraṃ parittakusalaṃ. Yaṃ asatipi buddhuppāde vattati, yañca sandhāyāha ‘‘hīnena brahmacariyena, khattiye upapajjatī’’ti. ‘‘Amhākaṃ buddho’’ti buddhe mamattakārino buddhamāmakā. Sesapadadvayepi eseva nayo.

    ཨུཏྟརིམནུསྶདྷམྨཱདིཝཎྞནཱ

    Uttarimanussadhammādivaṇṇanā

    ཨལཾ ཨརིཡཱཡ ཨརིཡབྷཱཝཱཡཱཏི ཨལམརིཡོ, རཱུཔཱཡཏནཾ ཛཱནཱཏི ཙཀྑུཝིཉྙཱཎཾ ཝིཡ པསྶཏི ཙཱཏི ཉཱཎདསྶནཾ, དིབྦཙཀྑུ། སམྨསནུཔགེ ཙ པན དྷམྨེ ལཀྑཎཏྟཡཉྩ ཏཐཱ ཛཱནཱཏི པསྶཏི ཙཱཏི ཉཱཎདསྶནཾ, ཝིཔསྶནཱ། ནིབྦཱནཾ, ཙཏྟཱརི ཝཱ སཙྩཱནི ཨསམྨོཧཔཊིཝེདྷཏོ ཛཱནཱཏི པསྶཏི ཙཱཏི ཉཱཎདསྶནཾ, མགྒོ། ཕལཾ པན ནིབྦཱནཝསེནེཝ ཡོཛེཏབྦཾ། པཙྩཝེཀྑཎཱ མགྒཱདྷིགཏསྶ ཨཏྠསྶ པཙྩཀྑཏོ ཛཱནནཊྛེན ཉཱཎདསྶནཾ, སབྦཉྙུཏཱ ཨནཱཝརཎཏཱཡ སམནྟཙཀྑུཏཱཡ ཙ ཉཱཎདསྶནཾ། ལོཀུཏྟརམགྒོ ཨདྷིཔྤེཏོ, ཏསྨིཉྷི པཊིསིདྡྷེ སབྦེསམྤི བུདྡྷགུཎཱནཾ ཨསམྦྷཝོཏི ཨདྷིཔྤཱཡོ། ཏེནཱཧ ‘‘ཏཉྷི སོ བྷགཝཏོ པཊིསེདྷེཏཱི’’ཏི།

    Alaṃ ariyāya ariyabhāvāyāti alamariyo, rūpāyatanaṃ jānāti cakkhuviññāṇaṃ viya passati cāti ñāṇadassanaṃ, dibbacakkhu. Sammasanupage ca pana dhamme lakkhaṇattayañca tathā jānāti passati cāti ñāṇadassanaṃ, vipassanā. Nibbānaṃ, cattāri vā saccāni asammohapaṭivedhato jānāti passati cāti ñāṇadassanaṃ, maggo. Phalaṃ pana nibbānavaseneva yojetabbaṃ. Paccavekkhaṇā maggādhigatassa atthassa paccakkhato jānanaṭṭhena ñāṇadassanaṃ, sabbaññutā anāvaraṇatāya samantacakkhutāya ca ñāṇadassanaṃ. Lokuttaramaggo adhippeto, tasmiñhi paṭisiddhe sabbesampi buddhaguṇānaṃ asambhavoti adhippāyo. Tenāha ‘‘tañhi so bhagavato paṭisedhetī’’ti.

    སུཁུམཾ དྷམྨནྟརཾ ནཱམ ཛྷཱནཝིཔསྶནཱདིཀཾ ཨཱཙརིཡཱནུགྒཧེན གཧིཏཾ ནཱམ ནཏྠི། ཏཀྐཔརིཡཱཧཏནྟི ‘‘ཨིཏི བྷཝིསྶཏི, ཨེཝཾ བྷཝིསྶཏཱི’’ཏི ཏཾཏཾདསྶེཏབྦམཏྠཏཀྐནེན ཝིཏཀྐནམཏྟེན པརིཏོ ཨཱཧཏཾ པརིཝཏྟིཏཾ ཀཏྭཱ། ཏེནཱཧ ‘‘ཏཀྐེཏྭཱ’’ཏིཨཱདི། ལོཀིཡཔཉྙཾ ཨནུཛཱནཱཏི ཨུཔནིསིནྣཔརིསཱཡ ཨནུཀཱུལདྷམྨཀཐནཏོཏི ཨདྷིཔྤཱཡོ། ཏེནཱཧ ‘‘སམཎོ གོཏམོ’’ཏིཨཱདི། པཊིབྷཱཏཱིཏི པཊིབྷཱནཾ, ‘‘ཨིཏི ཝཀྑཱམཱི’’ཏི ཨེཝཾཔཝཏྟཾ ཀཐནཙིཏྟཾ, ཏཏོ པཊིབྷཱནཏོ ཛཱནནཾ པཊིབྷཱནཾ, ཨཱགམཱབྷཱཝཏོ སཡམེཝ ཨུཔཊྛིཏཏྟཱ སཡཾཔཊིབྷཱནཾ། ཏེནཱཧ ‘‘ཨིམིནཱསྶ དྷམྨེསུ པཙྩཀྑབྷཱཝཾ པཊིབཱཧཏཱི’’ཏི། སུཕུསིཏནྟི ནིབྦིཝརཾ། ཨཕུསིཏཏྟེ ཧི སུཁེན ཝཙཱིགྷོསོ ན ནིཙྪརཏི། དནྟཱཝརཎནྟི ཨོཊྛདྭཡཾ། ཛིཝ྄ཧཱཔི ཐདྡྷཏཱཡ སུཁེན ཝཙཱིགྷོསོ ན ནིཙྪརཏཱིཏི ཨཱཧ ‘‘མུདུཀཱ ཛིཝ྄ཧཱ’’ཏི། ཀརཝཱིཀརུཏམཉྫུཏཱཡ མདྷུརོ སརོ། ཨེལཾ ཝུཙྩཏི དོསོ, ཨེལཾ གལ༹ཏཱིཏི ཨེལགལཱ༹, ན ཨེལགལཱ༹ ཨནེལགལཱ༹, ནིདྡོསཱ, ན རུཛ྄ཛྷཏཱིཏི ཨཏྠོ། སབྦམེཏཾ རཉྫནསྶེཝ ཀཱརཎཾ དསྶེནྟོ ཝདཏི།

    Sukhumaṃ dhammantaraṃ nāma jhānavipassanādikaṃ ācariyānuggahena gahitaṃ nāma natthi. Takkapariyāhatanti ‘‘iti bhavissati, evaṃ bhavissatī’’ti taṃtaṃdassetabbamatthatakkanena vitakkanamattena parito āhataṃ parivattitaṃ katvā. Tenāha ‘‘takketvā’’tiādi. Lokiyapaññaṃ anujānāti upanisinnaparisāya anukūladhammakathanatoti adhippāyo. Tenāha ‘‘samaṇo gotamo’’tiādi. Paṭibhātīti paṭibhānaṃ, ‘‘iti vakkhāmī’’ti evaṃpavattaṃ kathanacittaṃ, tato paṭibhānato jānanaṃ paṭibhānaṃ, āgamābhāvato sayameva upaṭṭhitattā sayaṃpaṭibhānaṃ. Tenāha ‘‘imināssa dhammesu paccakkhabhāvaṃ paṭibāhatī’’ti. Suphusitanti nibbivaraṃ. Aphusitatte hi sukhena vacīghoso na niccharati. Dantāvaraṇanti oṭṭhadvayaṃ. Jivhāpi thaddhatāya sukhena vacīghoso na niccharatīti āha ‘‘mudukā jivhā’’ti. Karavīkarutamañjutāya madhuro saro. Elaṃ vuccati doso, elaṃ gaḷatīti elagaḷā, na elagaḷā anelagaḷā, niddosā, na rujjhatīti attho. Sabbametaṃ rañjanasseva kāraṇaṃ dassento vadati.

    པཉྩ དྷམྨཱཏི གམྦྷཱིརཉཱཎཙརིཡབྷཱུཏཱནཾ ཁནྡྷཱདཱིནཾ ཨུགྒཧཎ-སཝན-དྷཱརཎ-པརིཙཡ-ཡོནིསོམནསིཀཱརེ སནྡྷཱཡཱཧ། ཏཀྐརསྶ སམྨཱ དུཀྑཀྑཡཱཡཱཏི ཨེཏྠ སམྨཱ-སདྡོ ཨུབྷཡཏྠཱཔི ཡོཛེཏབྦོ ‘‘སམྨཱ ཏཀྐརསྶ སམྨཱ དུཀྑཀྑཡཱཡཱ’’ཏི། ཡོ ཧི སམྨཱ དྷམྨཾ པཊིཔཛྫཏི, ཏསྶེཝ སམྨཱ དུཀྑཀྑཡོ ཧོཏི། ཡོ པན ཝུཏྟནཡེན ཏཀྐརོ, ཏསྶ ནིཡྻཱནཾ ཨཏྠཏོ དྷམྨསྶེཝ ནིཡྻཱནནྟི ཨཱཧ ‘‘སོ དྷམྨོ…པེ॰… ནིཡྻཱཏི གཙྪཏཱི’’ཏི།

    Pañca dhammāti gambhīrañāṇacariyabhūtānaṃ khandhādīnaṃ uggahaṇa-savana-dhāraṇa-paricaya-yonisomanasikāre sandhāyāha. Takkarassa sammā dukkhakkhayāyāti ettha sammā-saddo ubhayatthāpi yojetabbo ‘‘sammā takkarassa sammā dukkhakkhayāyā’’ti. Yo hi sammā dhammaṃ paṭipajjati, tasseva sammā dukkhakkhayo hoti. Yo pana vuttanayena takkaro, tassa niyyānaṃ atthato dhammasseva niyyānanti āha ‘‘so dhammo…pe… niyyāti gacchatī’’ti.

    ༡༤༧. ཀོདྷནོཏི ཀུཛ྄ཛྷནསཱིལོ། ཡསྨཱ པན སུནཀྑཏྟོ ཀོདྷཝསེན ཀུརཱུརོ ཕརུསཝཙནོ ཙ, ཏསྨཱ ཨཱཧ ‘‘ཀོདྷནོཏི ཙཎྜོ ཕརུསོ ཙཱ’’ཏི། ཏསྨིཾ ཨཏྟབྷཱཝེ མགྒཕལཱནཾ ཨུཔནིསྶཡོ ནཏྠཱིཏི ཏསྨིཾ ཨཏྟབྷཱཝེ ཨུཔྤཛྫནཱརཧཱནཾ མགྒཕལཱནཾ ཨུཔནིསྶཡོ ནཏྠི། ཏཾ བུདྡྷཱ ‘‘མོགྷཔུརིསོ’’ཏི ཝདནྟི ཡཐཱ ཏཾ སུདིནྣལཱལུ༹དཱཡིཨཱདིཀེ། ཨུཔནིསྶཡེ སཏིཔི ཏསྨིཾ ཁཎེ མགྒེ ཝཱ ཕལེ ཝཱ ཨསཏི ‘‘མོགྷཔུརིསོ’’ཏི ཝདནྟི ཡཐཱ ཏཾ དྷནིཡཱུཔསེནཏྠེརཱདིཀེ། སམུཙྪིནྣོཔནིསྶཡེ པན ཝཏྟབྦམེཝ ནཏྠི། ཡཐཱ ‘‘མཀྑལི མོགྷཔུརིསོ མནུསྶཁིཔྤཾ མཉྙེ’’ཏི (ཨ॰ ནི॰ ༡.༣༡༡) ཏཐཱ སུནཀྑཏྟོཔཱིཏི ཨཱཧ ‘‘ཨིམསྶ པནཱ’’ཏིཨཱདི། ཨསྶཱཏི ཨེཏེན། ཀཏྟརི ཧིདཾ སཱམིཝཙནཾ། ཀོདྷེནཱཏི ཀོདྷཧེཏུནཱ།

    147.Kodhanoti kujjhanasīlo. Yasmā pana sunakkhatto kodhavasena kurūro pharusavacano ca, tasmā āha ‘‘kodhanoti caṇḍo pharuso cā’’ti. Tasmiṃ attabhāve maggaphalānaṃ upanissayo natthīti tasmiṃ attabhāve uppajjanārahānaṃ maggaphalānaṃ upanissayo natthi. Taṃ buddhā ‘‘moghapuriso’’ti vadanti yathā taṃ sudinnalāḷudāyiādike. Upanissaye satipi tasmiṃ khaṇe magge vā phale vā asati ‘‘moghapuriso’’ti vadanti yathā taṃ dhaniyūpasenattherādike. Samucchinnopanissaye pana vattabbameva natthi. Yathā ‘‘makkhali moghapuriso manussakhippaṃ maññe’’ti (a. ni. 1.311) tathā sunakkhattopīti āha ‘‘imassa panā’’tiādi. Assāti etena. Kattari hidaṃ sāmivacanaṃ. Kodhenāti kodhahetunā.

    བྷགཝཏོཏི སམྤདཱནཝཙནཾ ཀུདྡྷཔདཱཔེཀྑཱཡ། པུབྦེཏི བྷིཀྑུཀཱལེ། སདྡཾ སོཏུཀཱམོཏི སོ ཀིར དིབྦཙཀྑུནཱ ཏཱཝཏིཾསབྷཝནེ དེཝཏཱནཾ རཱུཔཾ པསྶནྟོ ཨོཊྛཙལནཾ པསྶཏི, ན པན སདྡཾ སུཎཱཏི, ཏསྨཱ ཏཱསཾ སདྡཾ སོཏུཀཱམོ ཨཧོསི། ཏེན ཝུཏྟཾ ‘‘སདྡཾ སོཏུཀཱམོ…པེ॰… པུཙྪཱི’’ཏི། སོ ཙ ཨཏཱིཏེ ཨེཀཾ སཱིལཝནྟཾ བྷིཀྑུཾ ཀཎྞསཀྑལིཡཾ པཧརིཏྭཱ བདྷིརམཀཱསི, ཏསྨཱ པརིཀམྨཾ ཀརོནྟོཔི ཨབྷབྦོཝ དིབྦསོཏཱདྷིགམཱཡ། ཏཾ སནྡྷཱཡ ཝུཏྟཾ ‘‘ཨུཔནིསྶཡོ ནཏྠཱིཏི ཉཏྭཱ པརིཀམྨཾ ན ཀཐེསཱི’’ཏི། ཙིནྟེསཱིཏི ཨཏྟནོ མིཙྪཱཔརིཝིཏཀྐིཏེན ཨཡོནིསོ ཨུམྨུཛྫནྟོ ཙིནྟེསི།

    Bhagavatoti sampadānavacanaṃ kuddhapadāpekkhāya. Pubbeti bhikkhukāle. Saddaṃ sotukāmoti so kira dibbacakkhunā tāvatiṃsabhavane devatānaṃ rūpaṃ passanto oṭṭhacalanaṃ passati, na pana saddaṃ suṇāti, tasmā tāsaṃ saddaṃ sotukāmo ahosi. Tena vuttaṃ ‘‘saddaṃ sotukāmo…pe… pucchī’’ti. So ca atīte ekaṃ sīlavantaṃ bhikkhuṃ kaṇṇasakkhaliyaṃ paharitvā badhiramakāsi, tasmā parikammaṃ karontopi abhabbova dibbasotādhigamāya. Taṃ sandhāya vuttaṃ ‘‘upanissayo natthīti ñatvā parikammaṃ na kathesī’’ti. Cintesīti attano micchāparivitakkitena ayoniso ummujjanto cintesi.

    ནིཡྻཱནིཀཏྟཱཝབོདྷནཏོ ཨབྷེདོཔཙཱརེན ‘‘དེསནཱདྷམྨོ ནིཡྻཱནིཀོ’’ཏི ཝུཏྟོ། ནིཡྻཱནོ ཝཱ ཨརིཡམགྒོ བོདྷེཏབྦོ ཨེཏསྶ ཨཏྠཱིཏི ནིཡྻཱནིཀོ དེསནཱདྷམྨོ། ཨཏྟནི ཨཏྠིཏཾ དསྶེཏི ཀིཙྩསིདྡྷིདསྶནེན ཏཏྠ ཏཏྠ པཱཀཊཱིཀཏཏྟཱ, ན པཊིཉྙཱམཏྟེན། ཏཐཱ ཧི ཡཐཱཔརཱདྷཾ ཏཾཏཾསིཀྑཱཔདཔཉྙཏྟིཡཱ ཡཐཱདྷམྨཾ ཝེནེཡྻཛ྄ཛྷཱསཡཱནུརཱུཔཉྩ ཨཝིཔརཱིཏདྷམྨདེསནཱཡ དེཝམནུསྶེཧི ཡཐཱབྷིསངྑཏཔཉྷཱནཾ ཏདཛ྄ཛྷཱསཡཱནུཀཱུལཾ ཋཱནསོ ཝིསྶཛྫནེན ཙ བྷགཝཏོ སབྦཏྠ ཨཔྤཊིཧཏཉཱཎཙཱརབྷཱཝེན སབྦཉྙུཏཉྙཱཎཾ ཝིཉྙཱུནཾ པཱཀཊཾ, ཏཐཱ ཏཏྠ ཏཏྠ ཡམཀཔཱཊིཧཱརིཡཀརཎཱདཱིསུ ཨིདྡྷིཝིདྷཉཱཎཱདཱིནཱིཏི། ཏེནཱཧ ‘‘མཡ྄ཧཉྩཱ’’ཏིཨཱདི། ཨནྭེཏི ཡཐཱགཧིཏསངྐེཏསྶ ཨནུགམནཝསེན ཨེཏི ཛཱནཱཏཱིཏི ཨནྭཡོ། ཏེནཱཧ ‘‘ཨནུབུཛ྄ཛྷཏཱིཏི ཨཏྠོ’’ཏི། སངྐེཏཱནུགམནཉྩེཏྠ ‘‘ཡཐཱཔརཱདྷཾ ཏཾཏཾསིཀྑཱཔདཔཉྙཏྟིཡཱ’’ཏིཨཱདིནཱ ཝུཏྟནཡམེཝ། ཨེཝཾ ཡོཛནཱ ཝེདིཏབྦཱཏི ཡཐཱ སབྦཉྙུཏཉྙཱཎེན ཡོཛནཱ ཀཏཱ, ཨེཝཾ ‘‘ཨེཝརཱུཔམྤི ནཱམ མཡ྄ཧཾ ཨིདྡྷིཝིདྷཉཱཎསངྑཱཏཾ ཨུཏྟརིམནུསྶདྷམྨ’’ནྟིཨཱདིནཱ ཏཏྠ ཏཏྠ ཡོཛནཱ ཝེདིཏབྦཱ།

    Niyyānikattāvabodhanato abhedopacārena ‘‘desanādhammo niyyāniko’’ti vutto. Niyyāno vā ariyamaggo bodhetabbo etassa atthīti niyyāniko desanādhammo. Attani atthitaṃ dasseti kiccasiddhidassanena tattha tattha pākaṭīkatattā, na paṭiññāmattena. Tathā hi yathāparādhaṃ taṃtaṃsikkhāpadapaññattiyā yathādhammaṃ veneyyajjhāsayānurūpañca aviparītadhammadesanāya devamanussehi yathābhisaṅkhatapañhānaṃ tadajjhāsayānukūlaṃ ṭhānaso vissajjanena ca bhagavato sabbattha appaṭihatañāṇacārabhāvena sabbaññutaññāṇaṃ viññūnaṃ pākaṭaṃ, tathā tattha tattha yamakapāṭihāriyakaraṇādīsu iddhividhañāṇādīnīti. Tenāha ‘‘mayhañcā’’tiādi. Anveti yathāgahitasaṅketassa anugamanavasena eti jānātīti anvayo. Tenāha ‘‘anubujjhatīti attho’’ti. Saṅketānugamanañcettha ‘‘yathāparādhaṃ taṃtaṃsikkhāpadapaññattiyā’’tiādinā vuttanayameva. Evaṃ yojanā veditabbāti yathā sabbaññutaññāṇena yojanā katā, evaṃ ‘‘evarūpampi nāma mayhaṃ iddhividhañāṇasaṅkhātaṃ uttarimanussadhamma’’ntiādinā tattha tattha yojanā veditabbā.

    ཨུཏྟརིམནུསྶདྷམྨཱདིཝཎྞནཱ ནིཊྛིཏཱ།

    Uttarimanussadhammādivaṇṇanā niṭṭhitā.

    དསབལཉཱཎཝཎྞནཱ

    Dasabalañāṇavaṇṇanā

    ༡༤༨. ཡདིཔི ཨཱདིཏོ ཨབྷིཉྙཱཏྟཡཝསེན དེསནཱཡ ཨཱགཏཏྟཱ ཙེཏོཔརིཡཉཱཎཱནནྟརཾ ཨུཔརི ཏིསྶོ ཨབྷིཉྙཱ ཝཏྟབྦཱ སིཡུནྟི ཝཏྟབྦཾ སིཡཱ, ཨཏྠཏོ པན ཝིཛྫཱཏྟཡཾ ཡཐཱཝུཏྟཨབྷིཉྙཱཏྟཡམེཝཱཏི ཀཏྭཱ ‘‘ཏིསྶོ ཝིཛྫཱ ཝཏྟབྦཱ སིཡུ’’ནྟི ཝུཏྟཾ། ཀསྨཱ པནེཏྠ ‘‘ཏཱསུ ཝུཏྟཱསུ ཨུཔརི དསབལཉཱཎཾ ན པརིཔཱུརཏཱི’’ཏི ཝུཏྟཾ, ནནུ ཨིམཱནི ཉཱཎཱནི སེསཱབྷིཉྙཱ ཝིཡ ཨཏྟནོ ཝིསཡསྶ ཨབྷིཛཱནནཊྛཾ ཨུཔཱདཱཡ ཨབྷིཉྙཱསུ ཝཏྟབྦཱནི, ཨཀམྤིཡཊྛཾ པན ཨུཔཏྠམྦྷནཊྛཉྩ ཨུཔཱདཱཡ བལཉཱཎེསུ ཡཐཱ སམྨཱསཏིཨཱདཡོ ཨིནྡྲིཡབལབོཛ྄ཛྷངྒམགྒངྒེསཱུཏི? ནཡིདམེཝཾ། ཏཏྠ ཧི དྷམྨཱནཾ དྷམྨཀིཙྩཝིསེསཝིབྷཱཝནཔརཱཡ དེསནཱཡ ཝུཏྟཾ, ཨིདྷ པན སཏྠུ གུཎཝིསེསཝིབྷཱཝནཔརཱཡ དེསནཱཡ ཏཐཱ ཝཏྟུཾ ན སཀྐཱ ཨཏྠཏོ ཨནཉྙཏྟཱ, ཨེཀཙྩཱནཾ པུཐུཛྫནཱནཾ ཨེཝཾ ཙིཏྟཾ ཨུཔྤཛྫེཡྻ ‘‘ཀིམིདཾ བྷགཝཱ ཧེཊྛཱ ཝུཏྟགུཎེ པུནཔི གཎྷནྟོ གུཎཱདྷིཀདསྶནཾ ཀརོཏཱི’’ཏི། ཏསྨཱ སུཝུཏྟམེཏཾ ‘‘ཨུཔརི དསབལཉཱཎཾ ན པརིཔཱུརཏཱི’’ཏི།

    148. Yadipi ādito abhiññāttayavasena desanāya āgatattā cetopariyañāṇānantaraṃ upari tisso abhiññā vattabbā siyunti vattabbaṃ siyā, atthato pana vijjāttayaṃ yathāvuttaabhiññāttayamevāti katvā ‘‘tisso vijjā vattabbā siyu’’nti vuttaṃ. Kasmā panettha ‘‘tāsu vuttāsu upari dasabalañāṇaṃ na paripūratī’’ti vuttaṃ, nanu imāni ñāṇāni sesābhiññā viya attano visayassa abhijānanaṭṭhaṃ upādāya abhiññāsu vattabbāni, akampiyaṭṭhaṃ pana upatthambhanaṭṭhañca upādāya balañāṇesu yathā sammāsatiādayo indriyabalabojjhaṅgamaggaṅgesūti? Nayidamevaṃ. Tattha hi dhammānaṃ dhammakiccavisesavibhāvanaparāya desanāya vuttaṃ, idha pana satthu guṇavisesavibhāvanaparāya desanāya tathā vattuṃ na sakkā atthato anaññattā, ekaccānaṃ puthujjanānaṃ evaṃ cittaṃ uppajjeyya ‘‘kimidaṃ bhagavā heṭṭhā vuttaguṇe punapi gaṇhanto guṇādhikadassanaṃ karotī’’ti. Tasmā suvuttametaṃ ‘‘upari dasabalañāṇaṃ na paripūratī’’ti.

    ཨཉྙེཧི ཨསཱདྷཱརཎཱནཱིཏི ཀསྨཱ ཝུཏྟཾ (ཨ॰ ནི॰ ཊཱི॰ ༣.༡༠.༢༡), ནནུ ཙེཏཱནི སཱཝཀཱནམྤི ཨེཀཙྩཱནཾ ཨུཔྤཛྫནྟཱིཏི? ཀཱམཾ ཨུཔྤཛྫནྟི, ཡཱདིསཱནི པན བུདྡྷཱནཾ ཋཱནཱཊྛཱནཉཱཎཱདཱིནི, ན ཏཱདིསཱནི ཏདཉྙེསཾ ཀདཱཙིཔི ཨུཔྤཛྫནྟཱིཏི ཨཉྙེཧི ཨསཱདྷཱརཎཱནཱིཏི། ཏེནཱཧ ‘‘ཏཐཱགཏསྶེཝ བལཱནཱི’’ཏི། ཨིམམེཝ ཧི ཡཐཱཝུཏྟལེསཾ ཨཔེཀྑིཏྭཱ ཏདབྷཱཝཏོ ཨཱསཡཱནུསཡཉཱཎཱདཱིསུ ཨེཝ ཨསཱདྷཱརཎགུཎསམཉྙཱ ནིརུལ༹ྷཱ། ཀཱམཾ ཉཱཎབལཱནཾ ཉཱཎསམྦྷཱརོ ཝིསེསཔཙྩཡོ, པུཉྙསམྦྷཱརོཔི པན ནེསཾ པཙྩཡོ ཨེཝ , ཉཱཎསམྦྷཱརསྶཔི ཝཱ པུཉྙསམྦྷཱརབྷཱཝཏོ ‘‘པུཉྙུསྶཡསམྤཏྟིཡཱ ཨཱགཏཱནཱི’’ཏི ཝུཏྟཾ།

    Aññehi asādhāraṇānīti kasmā vuttaṃ (a. ni. ṭī. 3.10.21), nanu cetāni sāvakānampi ekaccānaṃ uppajjantīti? Kāmaṃ uppajjanti, yādisāni pana buddhānaṃ ṭhānāṭṭhānañāṇādīni, na tādisāni tadaññesaṃ kadācipi uppajjantīti aññehi asādhāraṇānīti. Tenāha ‘‘tathāgatasseva balānī’’ti. Imameva hi yathāvuttalesaṃ apekkhitvā tadabhāvato āsayānusayañāṇādīsu eva asādhāraṇaguṇasamaññā niruḷhā. Kāmaṃ ñāṇabalānaṃ ñāṇasambhāro visesapaccayo, puññasambhāropi pana nesaṃ paccayo eva , ñāṇasambhārassapi vā puññasambhārabhāvato ‘‘puññussayasampattiyā āgatānī’’ti vuttaṃ.

    པཀཏིཧཏྠིཀུལནྟི (སཾ॰ ནི॰ ༢.༢༢) གིརིཙརནདཱིཙརཝནཙརཱདིཔྤབྷེདཱ གོཙརིཡཀཱལཱཝཀནཱམཱ སབྦཱཔི བལེན པཱཀཏིཀཱ ཧཏྠིཛཱཏི། དསནྣཾ པུརིསཱནནྟི ཐཱམམཛ྄ཛྷིམཱནཾ དསནྣཾ པུརིསཱནཾ། ཨེཀསྶ ཏཐཱགཏསྶ ཀཱཡབལནྟི ཨཱནེཏྭཱ སམྦནྡྷོ། ཨེཀསྶཱཏི ཙ ཏཐཱ ཧེཊྛཱཀཐཱཡཾ ཨཱགཏཏྟཱ དེསནཱསོཏེན ཝུཏྟཾ། ནཱརཱཡནསངྒྷཱཏབལནྟི ཨེཏྠ ནཱརཱ ཝུཙྩནྟི རསྨིཡོ, ཏཱ བཧཱུ ནཱནཱཝིདྷཱ ཨིཏོ ཨུཔྤཛྫནྟཱིཏི ནཱརཱཡནཾ, ཝཛིརཾ, ཏསྨཱ ནཱརཱཡནསངྒྷཱཏབལནྟི ཝཛིརསངྒྷཱཏབལནྟི ཨཏྠོ། ཉཱཎབལཾ པན པཱལི༹ཡཾ ཨཱགཏམེཝ, ན ཀཱཡབལཾ ཝིཡ ཨཊྛཀཐཱརུལ༹ྷམེཝཱཏི ཨདྷིཔྤཱཡོ། ‘‘སཾཡུཏྟཀེ ཨཱགཏཱནི ཏེསཏྟཏི ཉཱཎཱནི སཏྟསཏྟཏི ཉཱཎཱནཱི’’ཏི ཝུཏྟཾ (ཝིབྷ॰ མཱུལཊཱི॰ ༧༦༠), ཏཏྠ པན ནིདཱནཝགྒེ སཏྟསཏྟཏི ཨཱགཏཱནི ཙཏུཙཏྟཱརཱིསཉྩ, ཏེསཏྟཏི པན པཊིསམྦྷིདཱམགྒེ (པཊི॰ མ॰ ༡.༧༣ མཱཏིཀཱ) སུཏམཡཱདཱིནི ཨཱགཏཱནི དིསྶནྟི, ན སཾཡུཏྟཀེ། ཨཉྙཱནིཔཱིཏི ཨེཏེན ཉཱཎཝཏྠུཝིབྷངྒེ ཨེཀཀཱདིཝསེན ཝུཏྟཱནི, ཨཉྙཏྠ ཙ ‘‘པུབྦནྟེ ཉཱཎ’’ནྟིཨཱདིནཱ (དྷ॰ ས॰ ༡༠༧༦) བྲཧྨཛཱལཱདཱིསུ (དཱི॰ ནི॰ ༡.༣༦) ཙ ‘‘ཏཡིདཾ ཏཐཱགཏོ པཛཱནཱཏི, ཨིམཱནི དིཊྛིཊྛཱནཱནི ཨེཝཾ གཧིཏཱནཱི’’ཏིཨཱདིནཱ ཝུཏྟཱནི ཨནེཀཱནི ཉཱཎཔྤབྷེདཱནི སངྒཎྷཱཏི། ཡཱཐཱཝཔཊིཝེདྷཏོ སཡཉྩ ཨཀམྤིཡཾ པུགྒལཉྩ ཏཾསམངྒིཾ ནེཡྻེསུ ཨདྷིབལཾ ཀརོཏཱིཏི ཨཱཧ ‘‘ཨཀམྤིཡཊྛེན ཨུཔཏྠམྦྷནཊྛེན ཙཱ’’ཏི།

    Pakatihatthikulanti (saṃ. ni. 2.22) giricaranadīcaravanacarādippabhedā gocariyakālāvakanāmā sabbāpi balena pākatikā hatthijāti. Dasannaṃ purisānanti thāmamajjhimānaṃ dasannaṃ purisānaṃ. Ekassa tathāgatassa kāyabalanti ānetvā sambandho. Ekassāti ca tathā heṭṭhākathāyaṃ āgatattā desanāsotena vuttaṃ. Nārāyanasaṅghātabalanti ettha nārā vuccanti rasmiyo, tā bahū nānāvidhā ito uppajjantīti nārāyanaṃ, vajiraṃ, tasmā nārāyanasaṅghātabalanti vajirasaṅghātabalanti attho. Ñāṇabalaṃ pana pāḷiyaṃ āgatameva, na kāyabalaṃ viya aṭṭhakathāruḷhamevāti adhippāyo. ‘‘Saṃyuttake āgatāni tesattati ñāṇāni sattasattati ñāṇānī’’ti vuttaṃ (vibha. mūlaṭī. 760), tattha pana nidānavagge sattasattati āgatāni catucattārīsañca, tesattati pana paṭisambhidāmagge (paṭi. ma. 1.73 mātikā) sutamayādīni āgatāni dissanti, na saṃyuttake. Aññānipīti etena ñāṇavatthuvibhaṅge ekakādivasena vuttāni, aññattha ca ‘‘pubbante ñāṇa’’ntiādinā (dha. sa. 1076) brahmajālādīsu (dī. ni. 1.36) ca ‘‘tayidaṃ tathāgato pajānāti, imāni diṭṭhiṭṭhānāni evaṃ gahitānī’’tiādinā vuttāni anekāni ñāṇappabhedāni saṅgaṇhāti. Yāthāvapaṭivedhato sayañca akampiyaṃ puggalañca taṃsamaṅgiṃ neyyesu adhibalaṃ karotīti āha ‘‘akampiyaṭṭhena upatthambhanaṭṭhena cā’’ti.

    ཨུསབྷསྶ ཨིདནྟི ཨཱསབྷཾ, (ཨ॰ ནི॰ ཊཱི॰ ༢.༤.༨) སེཊྛཾ ཋཱནཾ། སབྦཉྙུཏཔཊིཛཱནནཝསེན ཨབྷིམུཁཾ གཙྪནྟི, ཨཊྛ ཝཱ པརིསཱ ཨུཔསངྐམནྟཱིཏི ཨཱསབྷཱ, པུབྦབུདྡྷཱ། ཨིདཾ པནཱཏི བུདྡྷཱནཾ ཋཱནཾ སབྦཉྙུཏམེཝ ཝདཏི། ཏིཊྛམཱནོཝཱཏི ཨཝདནྟོཔི (སཾ॰ ནི॰ ཊཱི॰ ༢.༢.༢༢) ཏིཊྛམཱནོཝ པཊིཛཱནཱཏི ནཱམཱཏི ཨཏྠོ། ཨུཔགཙྪཏཱིཏི ཨནུཛཱནཱཏི།

    Usabhassa idanti āsabhaṃ, (a. ni. ṭī. 2.4.8) seṭṭhaṃ ṭhānaṃ. Sabbaññutapaṭijānanavasena abhimukhaṃ gacchanti, aṭṭha vā parisā upasaṅkamantīti āsabhā, pubbabuddhā. Idaṃ panāti buddhānaṃ ṭhānaṃ sabbaññutameva vadati. Tiṭṭhamānovāti avadantopi (saṃ. ni. ṭī. 2.2.22) tiṭṭhamānova paṭijānāti nāmāti attho. Upagacchatīti anujānāti.

    ཨཊྛསུ པརིསཱསཱུཏི ‘‘ཨབྷིཛཱནཱམི ཁོ པནཱཧཾ, སཱརིཔུཏྟ, ཨནེཀསཏཾ ཁཏྟིཡཔརིསཾ…པེ॰… ཏཏྲ ཝཏ མཾ བྷཡཾ ཝཱ སཱརཛྫཾ ཝཱ ཨོཀྐམིསྶཏཱིཏི ནིམིཏྟམེཏཾ, སཱརིཔུཏྟ, ན སམནུཔསྶཱམཱི’’ཏི (མ॰ ནི॰ ༡.༡༥༡) ཝུཏྟཱསུ ཨཊྛསུ པརིསཱསུ། ཨབྷཱིཏནཱདཾ ནདཏཱིཏི པརཏོ དསྶིཏཉཱཎཡོགེན དསབལོཧནྟི ཨབྷཱིཏནཱདཾ ནདཏི། སཱིཧནཱདསུཏྟེན ཁནྡྷཝགྒེ (སཾ॰ ནི॰ ༣.༧༨) ཨཱགཏེན།

    Aṭṭhasu parisāsūti ‘‘abhijānāmi kho panāhaṃ, sāriputta, anekasataṃ khattiyaparisaṃ…pe… tatra vata maṃ bhayaṃ vā sārajjaṃ vā okkamissatīti nimittametaṃ, sāriputta, na samanupassāmī’’ti (ma. ni. 1.151) vuttāsu aṭṭhasu parisāsu. Abhītanādaṃnadatīti parato dassitañāṇayogena dasabalohanti abhītanādaṃ nadati. Sīhanādasuttena khandhavagge (saṃ. ni. 3.78) āgatena.

    ‘‘དེཝམནུསྶཱནཾ ཙཏུཙཀྐཾ ཝཏྟཏཱི’’ཏི (ཨ॰ ནི॰ ༤.༣༡) སུཏྟསེསེན སཔྤུརིསཱུཔསྶཡཱདཱིནཾ ཕལསམྤཏྟིཔཝཏྟི, པུརིམསཔྤུརིསཱུཔསྶཡཱདིཾ ཨུཔནིསྶཱཡ པཙྪིམསཔྤུརིསཱུཔསྶཡཱདཱིནཾ སམྤཏྟིཔཝཏྟི ཝཱ ཝུཏྟཱཏི ཨཱདི-སདྡེན ཏཏྠ ཙ ཙཀྐ-སདྡསྶ གཧཎཾ ཝེདིཏབྦཾ། ཝིཙཀྐསཎྛཱནཱ ཨསནི ཨེཝ ཨསནིཝིཙཀྐཾ། ཨུརཙཀྐཱདཱིསཱུཏི ཨཱདི-སདྡེན ཨཱཎཱསམཱུཧཱདཱིསུཔི ཙཀྐ-སདྡསྶ པཝཏྟི ཝེདིཏབྦཱ། ‘‘སངྒྷབྷེདཾ ཀརིསྶཱམ ཙཀྐབྷེད’’ནྟིཨཱདཱིསུ (པཱརཱ॰ ༤༠༩; ཙཱུལ༹ཝ॰ ༣༤༣) ཧི ཨཱཎཱ ‘‘ཙཀྐ’’ནྟི ཝུཏྟཱ, ‘‘དེཝཙཀྐཾ ཨསུརཙཀྐ’’ནྟིཨཱདཱིསུ (ཨ॰ ནི॰ ཊཱི॰ ༢.༤.༨) སམཱུཧོཏི། པཊིཝེདྷནིཊྛཏྟཱ ཨརཧཏྟམགྒཉཱཎཾ པཊིཝེདྷོཏི ‘‘ཕལཀྑཎེ ཨུཔྤནྣཾ ནཱམཱ’’ཏི ཝུཏྟཾ། ཏེན པཊིལདྡྷསྶཔི དེསནཱཉཱཎསྶ ཀིཙྩནིཔྥཏྟི པརསྶ བུཛ྄ཛྷནམཏྟེན ཧོཏཱིཏི ‘‘ཨཉྙཱཏཀོཎྜཉྙསྶ སོཏཱཔཏྟི…པེ॰… ཕལཀྑཎེ པཝཏྟཾ ནཱམཱ’’ཏི ཝུཏྟཾ། ཏཏོ པརཾ པན ཡཱཝ པརིནིབྦཱནཱ དེསནཱཉཱཎཔྤཝཏྟི ཏསྶེཝ པཝཏྟིཏསྶ དྷམྨཙཀྐསྶ ཋཱནནྟི ཝེདིཏབྦཾ པཝཏྟིཏཙཀྐསྶ ཙཀྐཝཏྟིནོ ཙཀྐརཏནསྶ ཋཱནཾ ཝིཡ།

    ‘‘Devamanussānaṃ catucakkaṃ vattatī’’ti (a. ni. 4.31) suttasesena sappurisūpassayādīnaṃ phalasampattipavatti, purimasappurisūpassayādiṃ upanissāya pacchimasappurisūpassayādīnaṃ sampattipavatti vā vuttāti ādi-saddena tattha ca cakka-saddassa gahaṇaṃ veditabbaṃ. Vicakkasaṇṭhānā asani eva asanivicakkaṃ. Uracakkādīsūti ādi-saddena āṇāsamūhādīsupi cakka-saddassa pavatti veditabbā. ‘‘Saṅghabhedaṃ karissāma cakkabheda’’ntiādīsu (pārā. 409; cūḷava. 343) hi āṇā ‘‘cakka’’nti vuttā, ‘‘devacakkaṃ asuracakka’’ntiādīsu (a. ni. ṭī. 2.4.8) samūhoti. Paṭivedhaniṭṭhattā arahattamaggañāṇaṃ paṭivedhoti ‘‘phalakkhaṇe uppannaṃ nāmā’’ti vuttaṃ. Tena paṭiladdhassapi desanāñāṇassa kiccanipphatti parassa bujjhanamattena hotīti ‘‘aññātakoṇḍaññassa sotāpatti…pe… phalakkhaṇe pavattaṃ nāmā’’ti vuttaṃ. Tato paraṃ pana yāva parinibbānā desanāñāṇappavatti tasseva pavattitassa dhammacakkassa ṭhānanti veditabbaṃ pavattitacakkassa cakkavattino cakkaratanassa ṭhānaṃ viya.

    ‘‘ཏིཊྛཏཱི’’ཏི ཝུཏྟཾ, ཀིཾ བྷཱུམིཡཾ པུརིསོ ཝིཡ? ནོཏི ཨཱཧ ‘‘ཏདཱཡཏྟཝུཏྟིཏཱཡཱ’’ཏི། ཋཱནནྟི ཙེཏྠ ཨཏྟལཱབྷོ དྷརམཱནཏཱ ཙ, ན གཏིནིཝཏྟཱིཏི ཨཱཧ ‘‘ཨུཔྤཛྫཏི ཙེཝ པཝཏྟཏི ཙཱ’’ཏི ། ཡཏྠ པནེཏཾ དསབལཉཱཎཾ ཝིཏྠཱརིཏཾ, ཏཾ དསྶེནྟོ ‘‘ཨབྷིདྷམྨེ པནཱ’’ཏིཨཱདིམཱཧ། སེསེསུཔི ཨེསེཝ ནཡོ།

    ‘‘Tiṭṭhatī’’ti vuttaṃ, kiṃ bhūmiyaṃ puriso viya? Noti āha ‘‘tadāyattavuttitāyā’’ti. Ṭhānanti cettha attalābho dharamānatā ca, na gatinivattīti āha ‘‘uppajjati ceva pavattati cā’’ti . Yattha panetaṃ dasabalañāṇaṃ vitthāritaṃ, taṃ dassento ‘‘abhidhamme panā’’tiādimāha. Sesesupi eseva nayo.

    སམཱདིཡནྟཱིཏི སམཱདཱནཱནི, ཏཱནི པན སམཱདིཡིཏྭཱ ཀཏཱནི ཧོནྟཱིཏི ཨཱཧ ‘‘སམཱདིཡིཏྭཱ ཀཏཱན’’ནྟི། ཀམྨམེཝ ཝཱ ཀམྨསམཱདཱནནྟི ཨེཏེན སམཱདཱནསདྡསྶ ཨཔུབྦཏྠཱབྷཱཝཾ དསྶེཏི མུཏྟགཏསདྡེ གཏསདྡསྶ ཝིཡ། གཏཱིཏི ནིརཡཱདིགཏིཡོ། ཨུཔདྷཱིཏི ཨཏྟབྷཱཝོ། ཀཱལོཏི ཀམྨསྶ ཝིཔཙྩནཱརཧཀཱལོ། པཡོགོཏི ཝིཔཱཀུཔྤཏྟིཡཱ པཙྩཡབྷཱུཏཱ ཀིརིཡཱ།

    Samādiyantīti samādānāni, tāni pana samādiyitvā katāni hontīti āha ‘‘samādiyitvā katāna’’nti. Kammameva vā kammasamādānanti etena samādānasaddassa apubbatthābhāvaṃ dasseti muttagatasadde gatasaddassa viya. Gatīti nirayādigatiyo. Upadhīti attabhāvo. Kāloti kammassa vipaccanārahakālo. Payogoti vipākuppattiyā paccayabhūtā kiriyā.

    ཨགཏིགཱམིནིནྟི ནིབྦཱནགཱམིནིཾ། ཝཀྑཏི ཧི ‘‘ནིབྦཱནཉྩཱཧཾ, སཱརིཔུཏྟ, པཛཱནཱམི ནིབྦཱནགཱམིཉྩ མགྒཾ ནིབྦཱནགཱམིནིཉྩ པཊིཔད’’ནྟི (མ॰ ནི॰ ༡.༡༥༣)། བཧཱུསུཔི མནུསྶེསུ ཨེཀམེཝ པཱཎཾ གྷཱཏེནྟེསུ ཀཱམཾ སབྦེསཾ ཙེཏནཱ ཏསྶེཝེཀསྶ ཛཱིཝིཏིནྡྲིཡཱརམྨཎཱ, ཏཾ པན ཀམྨཾ ཏེསཾ ནཱནཱཀཱརཾ། ཏེསུ (ཝིབྷ॰ ཨཊྛ॰ ༨༡༡) ཧི ཨེཀོ ཨཱདརེན ཚནྡཛཱཏོ ཀརོཏི, ཨེཀོ ‘‘ཨེཧི ཏྭམྤི ཀརོཧཱི’’ཏི པརེཧི ནིཔྤཱིལི༹ཏོ ཀརོཏི, ཨེཀོ སམཱནཙྪནྡོ ཝིཡ ཧུཏྭཱ ཨཔྤཊིབཱཧམཱནོ ཝིཙརཏི། ཏེསུ ཨེཀོ ཏེནེཝ ཀམྨེན ནིརཡེ ནིབྦཏྟཏི, ཨེཀོ ཏིརཙྪཱནཡོནིཡཾ, ཨེཀོ པེཏྟིཝིསཡེ། ཏཾ ཏཐཱགཏོ ཨཱཡཱུཧནཀྑཎེ ཨེཝ – ‘‘ཨིམིནཱ ནཱིཧཱརེན ཨཱཡཱུཧིཏཏྟཱ ཨེས ནིརཡེ ནིབྦཏྟིསྶཏི, ཨེས ཏིརཙྪཱནཡོནིཡཾ, ཨེས པེཏྟིཝིསཡེ’’ཏི ཛཱནཱཏི། ནིརཡེ ནིབྦཏྟམཱནམྤི – ‘‘ཨེས མཧཱནིརཡེ ནིབྦཏྟིསྶཏི, ཨེས ཨུསྶདནིརཡེ’’ཏི ཛཱནཱཏི། ཏིརཙྪཱནཡོནིཡཾ ནིབྦཏྟམཱནམྤི – ‘‘ཨེས ཨཔཱདཀོ བྷཝིསྶཏི, ཨེས དྭིཔཱདཀོ, ཨེས ཙཏུཔྤདོ, ཨེས བཧུཔྤདོ’’ཏི ཛཱནཱཏི། པེཏྟིཝིསཡེ ནིབྦཏྟམཱནམྤི – ‘‘ཨེས ནིཛ྄ཛྷཱམཏཎྷིཀོ བྷཝིསྶཏི, ཨེས ཁུཔྤིཔཱསིཀོ, ཨེས པརདཏྟཱུཔཛཱིཝཱི’’ཏི ཛཱནཱཏི། ཏེསུ ཙ ཀམྨེསུ – ‘‘ཨིདཾ ཀམྨཾ པཊིསནྡྷིམཱཀཌྜྷིསྶཏི, ཨིདཾ ཨཉྙེན དིནྣཱཡ པཊིསནྡྷིཡཱ ཨུཔདྷིཝེཔཀྐཾ བྷཝིསྶཏཱི’’ཏི ཛཱནཱཏི།

    Agatigāmininti nibbānagāminiṃ. Vakkhati hi ‘‘nibbānañcāhaṃ, sāriputta, pajānāmi nibbānagāmiñca maggaṃ nibbānagāminiñca paṭipada’’nti (ma. ni. 1.153). Bahūsupi manussesu ekameva pāṇaṃ ghātentesu kāmaṃ sabbesaṃ cetanā tassevekassa jīvitindriyārammaṇā, taṃ pana kammaṃ tesaṃ nānākāraṃ. Tesu (vibha. aṭṭha. 811) hi eko ādarena chandajāto karoti, eko ‘‘ehi tvampi karohī’’ti parehi nippīḷito karoti, eko samānacchando viya hutvā appaṭibāhamāno vicarati. Tesu eko teneva kammena niraye nibbattati, eko tiracchānayoniyaṃ, eko pettivisaye. Taṃ tathāgato āyūhanakkhaṇe eva – ‘‘iminā nīhārena āyūhitattā esa niraye nibbattissati, esa tiracchānayoniyaṃ, esa pettivisaye’’ti jānāti. Niraye nibbattamānampi – ‘‘esa mahāniraye nibbattissati, esa ussadaniraye’’ti jānāti. Tiracchānayoniyaṃ nibbattamānampi – ‘‘esa apādako bhavissati, esa dvipādako, esa catuppado, esa bahuppado’’ti jānāti. Pettivisaye nibbattamānampi – ‘‘esa nijjhāmataṇhiko bhavissati, esa khuppipāsiko, esa paradattūpajīvī’’ti jānāti. Tesu ca kammesu – ‘‘idaṃ kammaṃ paṭisandhimākaḍḍhissati, idaṃ aññena dinnāya paṭisandhiyā upadhivepakkaṃ bhavissatī’’ti jānāti.

    ཏཐཱ སཀལགཱམཝཱསིཀེསུ ཨེཀཏོ པིཎྜཔཱཏཾ དདམཱནེསུ ཀཱམཾ སབྦེསམྤི ཙེཏནཱ པིཎྜཔཱཏཱརམྨཎཱཝ, ཏཾ པན ཀམྨཾ ཏེསཾ ནཱནཱཀཱརཾ། ཏེསུ ཧི ཨེཀོ ཨཱདརེན ཀརོཏཱིཏི སེསཾ པུརིམསདིསཾ, ཏསྨཱ ཏེསུ ཀེཙི དེཝལོཀེ ནིབྦཏྟནྟི, ཀེཙི མནུསྶལོཀེ, ཏཾ ཏཐཱགཏོ ཨཱཡཱུཧནཀྑཎེཡེཝ ཛཱནཱཏི – ‘‘ཨིམིནཱ ནཱིཧཱརེན ཨཱཡཱུཧིཏཏྟཱ ཨེས མནུསྶལོཀེ ནིབྦཏྟིསྶཏི, ཨེས དེཝལོཀེ, ཏཏྠཱཔི ཨེས ཁཏྟིཡཀུལེ, ཨེས བྲཱཧྨཎཀུལེ, ཨེས ཝེསྶཀུལེ, ཨེས སུདྡཀུལེ, ཨེས པརནིམྨིཏཝསཝཏྟཱིསུ, ཨེས ནིམྨཱནརཏཱིསུ, ཨེས ཏུསིཏེསུ, ཨེས ཡཱམེསུ, ཨེས ཏཱཝཏིཾསེསུ, ཨེས ཙཱཏུམཧཱརཱཛིཀེསུ, ཨེས བྷུམྨདེཝེསཱུ’’ཏིཨཱདིནཱ ཏཏྠ ཏཏྠ ཧཱིནཔཎཱིཏསུཝཎྞདུབྦཎྞཨཔྤཔརིཝཱརམཧཱཔརིཝཱརཏཱདིབྷེདཾ ཏཾ ཏཾ ཝིསེསཾ ཨཱཡཱུཧནཀྑཎེཡེཝ ཛཱནཱཏི།

    Tathā sakalagāmavāsikesu ekato piṇḍapātaṃ dadamānesu kāmaṃ sabbesampi cetanā piṇḍapātārammaṇāva, taṃ pana kammaṃ tesaṃ nānākāraṃ. Tesu hi eko ādarena karotīti sesaṃ purimasadisaṃ, tasmā tesu keci devaloke nibbattanti, keci manussaloke, taṃ tathāgato āyūhanakkhaṇeyeva jānāti – ‘‘iminā nīhārena āyūhitattā esa manussaloke nibbattissati, esa devaloke, tatthāpi esa khattiyakule, esa brāhmaṇakule, esa vessakule, esa suddakule, esa paranimmitavasavattīsu, esa nimmānaratīsu, esa tusitesu, esa yāmesu, esa tāvatiṃsesu, esa cātumahārājikesu, esa bhummadevesū’’tiādinā tattha tattha hīnapaṇītasuvaṇṇadubbaṇṇaappaparivāramahāparivāratādibhedaṃ taṃ taṃ visesaṃ āyūhanakkhaṇeyeva jānāti.

    ཏཐཱ ཝིཔསྶནཾ པཊྛཔེནྟེསུཡེཝ – ‘‘ཨིམིནཱ ནཱིཧཱརེན ཨེས ཀིཉྩི སལླཀྑེཏུཾ ན སཀྑིསྶཏི, ཨེས མཧཱབྷཱུཏམཏྟམེཝ ཝཝཏྠཔེསྶཏི, ཨེས རཱུཔཔརིགྒཧེཡེཝ ཋསྶཏི, ཨེས ཨརཱུཔཔརིགྒཧེཡེཝ, ཨེས ནཱམརཱུཔཔརིགྒཧེཡེཝ , ཨེས པཙྩཡཔརིགྒཧེ ཨེཝ, ཨེས ལཀྑཎཱརམྨཎིཀཝིཔསྶནཱཡ ཨེཝ, ཨེས པཋམཕལེཡེཝ, ཨེས དུཏིཡཕལེ ཨེཝ, ཨེས ཏཏིཡཕལེ ཨེཝ, ཨེས ཨརཧཏྟཾ པཱཔུཎིསྶཏཱི’’ཏི ཛཱནཱཏི། ཀསིཎཔརིཀམྨཾ ཀརོནྟེསུཔི – ‘‘ཨིམསྶ པརིཀམྨམཏྟམེཝ བྷཝིསྶཏི, ཨེས ནིམིཏྟཾ ཨུཔྤཱདེསྶཏི, ཨེས ཨཔྤནཾ ཨེཝ པཱཔུཎིསྶཏི, ཨེས ཛྷཱནཾ པཱདཀཾ ཀཏྭཱ ཝིཔསྶནཾ པཊྛཔེཏྭཱ ཨརཧཏྟཾ གཎྷིསྶཏཱི’’ཏི ཛཱནཱཏི། ཏེནཱཧ ‘‘ཨིམསྶ ཙེཏནཱ’’ཏིཨཱདི།

    Tathā vipassanaṃ paṭṭhapentesuyeva – ‘‘iminā nīhārena esa kiñci sallakkhetuṃ na sakkhissati, esa mahābhūtamattameva vavatthapessati, esa rūpapariggaheyeva ṭhassati, esa arūpapariggaheyeva, esa nāmarūpapariggaheyeva , esa paccayapariggahe eva, esa lakkhaṇārammaṇikavipassanāya eva, esa paṭhamaphaleyeva, esa dutiyaphale eva, esa tatiyaphale eva, esa arahattaṃ pāpuṇissatī’’ti jānāti. Kasiṇaparikammaṃ karontesupi – ‘‘imassa parikammamattameva bhavissati, esa nimittaṃ uppādessati, esa appanaṃ eva pāpuṇissati, esa jhānaṃ pādakaṃ katvā vipassanaṃ paṭṭhapetvā arahattaṃ gaṇhissatī’’ti jānāti. Tenāha ‘‘imassa cetanā’’tiādi.

    ཀཱམནཏོ, ཀཱམེཏབྦཏོ, ཀཱམཔཊིསཾཡུཏྟཏོ ཙ ཀཱམོ དྷཱཏུ ཀཱམདྷཱཏུ། ཨཱདི-སདྡེན བྱཱཔཱདདྷཱཏུ-རཱུཔདྷཱཏུ-ཨཱདཱིནཾ སངྒཧོ། ཝིལཀྑཎཏཱཡཱཏི ཝིསདིསསབྷཱཝཏཱཡ། ཁནྡྷཱཡཏནདྷཱཏུལོཀནྟི ཨནེཀདྷཱཏུཾ ནཱནཱདྷཱཏུཾ ཁནྡྷལོཀཾ ཨཱཡཏནལོཀཾ དྷཱཏུལོཀཾ ཡཐཱབྷཱུཏཾ པཛཱནཱཏཱིཏི ཡོཛནཱ། ‘‘ཨཡཾ རཱུཔཀྑནྡྷོ ནཱམ…པེ॰… ཨཡཾ ཝིཉྙཱཎཀྑནྡྷོ ནཱམ། ཏེསུཔི ཨེཀཝིདྷེན རཱུཔཀྑནྡྷོ, ཨེཀཱདསཝིདྷེན རཱུཔཀྑནྡྷོ (ཝིབྷ॰ ༣༣)། ཨེཀཝིདྷེན ཝེདནཱཀྑནྡྷོ, བཧུཝིདྷེན ཝེདནཱཀྑནྡྷོ (ཝིབྷ॰ ༣༤-༦༡)། ཨེཀཝིདྷེན སཉྙཱཀྑནྡྷོ, བཧུཝིདྷེན སཉྙཱཀྑནྡྷོ (ཝིབྷ॰ ༦༢-༩༡)། ཨེཀཝིདྷེན སངྑཱརཀྑནྡྷོ, བཧུཝིདྷེན སངྑཱརཀྑནྡྷོ (ཝིབྷ॰ ༩༢-༡༢༠)། ཨེཀཝིདྷེན ཝིཉྙཱཎཀྑནྡྷོ, བཧུཝིདྷེན ཝིཉྙཱཎཀྑནྡྷོ’’ཏི (ཝིབྷ॰ ༡༢༡-༡༤༩) ཨེཝཾ ཏཱཝ ཁནྡྷལོཀསྶ, ‘‘ཨིདཾ ཙཀྑཱཡཏནཾ ནཱམ…པེ॰… ཨིདཾ དྷམྨཱཡཏནཾ ནཱམ། ཏཏྠ དསཱཡཏནཱ ཀཱམཱཝཙརཱ, དྭེ ཙཱཏུབྷཱུམཀཱ’’ཏིཨཱདིནཱ (ཝིབྷ॰ ༡༥༦-༡༧༡) ཨཱཡཏནལོཀསྶ, ‘‘ཨཡཾ ཙཀྑུདྷཱཏུ ནཱམ…པེ॰… ཨཡཾ མནོཝིཉྙཱཎདྷཱཏུ ནཱམ, ཏཏྠ སོལ༹ས དྷཱཏུཡོ ཀཱམཱཝཙརཱ, དྭེ ཙཱཏུབྷཱུམཀཱ’’ཏིཨཱདིནཱ (ཝིབྷ॰ ༡༧༢-༡༨༨) དྷཱཏུལོཀསྶ ཨནེཀསབྷཱཝཾ ནཱནཱསབྷཱཝཉྩ པཛཱནཱཏི། ན ཀེཝལཾ ཨུཔཱདིནྣཀསངྑཱརལོཀསྶེཝ, ཨཐ ཁོ ཨནུཔཱདིནྣཀསངྑཱརལོཀསྶཔི – ‘‘ཨིམཱཡ ནཱམ དྷཱཏུཡཱ ཨུསྶནྣཏྟཱ ཨིམསྶ རུཀྑསྶ ཁནྡྷོ སེཏོ, ཨིམསྶ ཀཱལོ༹, ཨིམསྶ མཊྛོ, ཨིམསྶ སཀཎྚཀོ, ཨིམསྶ བཧལཏྟཙོ, ཨིམསྶ ཏནུཏྟཙོ, ཨིམསྶ པཏྟཾ ཝཎྞསཎྛཱནཱདིཝསེན ཨེཝརཱུཔཾ, ཨིམསྶ པུཔྥཾ ནཱིལཾ པཱིཏཾ ལོཧིཏཾ ཨོདཱཏཾ སུགནྡྷཾ དུགྒནྡྷཾ, ཨིམསྶ ཕལཾ ཁུདྡཀཾ མཧནྟཾ དཱིགྷཾ རསྶཾ ཝཊྚཾ སུསཎྛཱནཾ དུསྶཎྛཱནཾ མུདུཀཾ ཕརུསཾ སུགནྡྷཾ དུགྒནྡྷཾ མདྷུརཾ ཏིཏྟཀཾ ཀཊུཀཾ ཨམྦིལཾ ཀསཱཝཾ, ཨིམསྶ ཀཎྚཀོ ཏིཁིཎོ ཀུཎྛོ ཨུཛུཀོ ཀུཊིལོ ཏམྦོ ཀཱལོ༹ ཨོདཱཏོ ཧོཏཱི’’ཏིཨཱདིནཱ པཛཱནཱཏི། སབྦཉྙུབུདྡྷཱདཱིནཾ ཨེཝ ཧི ཨེཏཾ བལཾ, ན ཨཉྙེསཾ།

    Kāmanato, kāmetabbato, kāmapaṭisaṃyuttato ca kāmo dhātu kāmadhātu. Ādi-saddena byāpādadhātu-rūpadhātu-ādīnaṃ saṅgaho. Vilakkhaṇatāyāti visadisasabhāvatāya. Khandhāyatanadhātulokanti anekadhātuṃ nānādhātuṃ khandhalokaṃ āyatanalokaṃ dhātulokaṃ yathābhūtaṃ pajānātīti yojanā. ‘‘Ayaṃ rūpakkhandho nāma…pe… ayaṃ viññāṇakkhandho nāma. Tesupi ekavidhena rūpakkhandho, ekādasavidhena rūpakkhandho (vibha. 33). Ekavidhena vedanākkhandho, bahuvidhena vedanākkhandho (vibha. 34-61). Ekavidhena saññākkhandho, bahuvidhena saññākkhandho (vibha. 62-91). Ekavidhena saṅkhārakkhandho, bahuvidhena saṅkhārakkhandho (vibha. 92-120). Ekavidhena viññāṇakkhandho, bahuvidhena viññāṇakkhandho’’ti (vibha. 121-149) evaṃ tāva khandhalokassa, ‘‘idaṃ cakkhāyatanaṃ nāma…pe… idaṃ dhammāyatanaṃ nāma. Tattha dasāyatanā kāmāvacarā, dve cātubhūmakā’’tiādinā (vibha. 156-171) āyatanalokassa, ‘‘ayaṃ cakkhudhātu nāma…pe… ayaṃ manoviññāṇadhātu nāma, tattha soḷasa dhātuyo kāmāvacarā, dve cātubhūmakā’’tiādinā (vibha. 172-188) dhātulokassa anekasabhāvaṃ nānāsabhāvañca pajānāti. Na kevalaṃ upādinnakasaṅkhāralokasseva, atha kho anupādinnakasaṅkhāralokassapi – ‘‘imāya nāma dhātuyā ussannattā imassa rukkhassa khandho seto, imassa kāḷo, imassa maṭṭho, imassa sakaṇṭako, imassa bahalattaco, imassa tanuttaco, imassa pattaṃ vaṇṇasaṇṭhānādivasena evarūpaṃ, imassa pupphaṃ nīlaṃ pītaṃ lohitaṃ odātaṃ sugandhaṃ duggandhaṃ, imassa phalaṃ khuddakaṃ mahantaṃ dīghaṃ rassaṃ vaṭṭaṃ susaṇṭhānaṃ dussaṇṭhānaṃ mudukaṃ pharusaṃ sugandhaṃ duggandhaṃ madhuraṃ tittakaṃ kaṭukaṃ ambilaṃ kasāvaṃ, imassa kaṇṭako tikhiṇo kuṇṭho ujuko kuṭilo tambo kāḷo odāto hotī’’tiādinā pajānāti. Sabbaññubuddhādīnaṃ eva hi etaṃ balaṃ, na aññesaṃ.

    ནཱནཱདྷིམུཏྟིཀཏནྟི ནཱནཱཨཛ྄ཛྷཱསཡཏཾ། ཨདྷིམུཏྟི ནཱམ ཨཛ྄ཛྷཱསཡདྷཱཏུ ཨཛ྄ཛྷཱསཡསབྷཱཝོ། སོ པན ཧཱིནཔཎཱིཏཏཱསཱམཉྙེན པཱལི༹ཡཾ དྭིདྷཱཝ ཝུཏྟོཔི ཧཱིནཔཎཱིཏཱདིབྷེདེན ཨནེཀཝིདྷོཏི ཨཱཧ ‘‘ཧཱིནཱདཱིཧི ཨདྷིམུཏྟཱིཧི ནཱནཱདྷིམུཏྟིཀབྷཱཝ’’ནྟི། ཏཏྠ ཏཏྠ ཡེ ཡེ སཏྟཱ ཡཾཡཾཨདྷིམུཏྟིཀཱ, ཏེ ཏེ ཏཾཏདདྷིམུཏྟིཀེ ཨེཝ སེཝནྟི བྷཛནྟི པཡིརུཔཱསནྟི དྷཱཏུསབྷཱགཏོ། ཡཐཱ གཱུཐཱདཱིནཾ དྷཱཏུསབྷཱཝོ ཨེསོ, ཡཾ གཱུཐཱདཱིཧི ཨེཝ སཾསནྡནྟི སམེནྟི, ཨེཝཾ (པུགྒལཱནཾ ཨཛ྄ཛྷཱསཡསྶེཝེས སབྷཱཝོ, ཡཾ) (ཝིབྷ॰ མཱུལཊཱི॰ ༨༡༣) ཧཱིནཛ྄ཛྷཱསཡཱ དུསྶཱིལཱདཱིཧི ཨེཝ སཾསནྡནྟི སམེནྟི, སམྤནྣསཱིལཱདཡོ ཙ སམྤནྣསཱིལཱདཱིཧེཝ། ཏཾ ནེསཾ ནཱནཱདྷིམུཏྟིཀཏཾ བྷགཝཱ ཡཐཱབྷཱུཏཾ པཛཱནཱཏཱིཏི།

    Nānādhimuttikatanti nānāajjhāsayataṃ. Adhimutti nāma ajjhāsayadhātu ajjhāsayasabhāvo. So pana hīnapaṇītatāsāmaññena pāḷiyaṃ dvidhāva vuttopi hīnapaṇītādibhedena anekavidhoti āha ‘‘hīnādīhi adhimuttīhi nānādhimuttikabhāva’’nti. Tattha tattha ye ye sattā yaṃyaṃadhimuttikā, te te taṃtadadhimuttike eva sevanti bhajanti payirupāsanti dhātusabhāgato. Yathā gūthādīnaṃ dhātusabhāvo eso, yaṃ gūthādīhi eva saṃsandanti samenti, evaṃ (puggalānaṃ ajjhāsayassevesa sabhāvo, yaṃ) (vibha. mūlaṭī. 813) hīnajjhāsayā dussīlādīhi eva saṃsandanti samenti, sampannasīlādayo ca sampannasīlādīheva. Taṃ nesaṃ nānādhimuttikataṃ bhagavā yathābhūtaṃ pajānātīti.

    ཝུདྡྷིཉྩ ཧཱནིཉྩཱཏི པཙྩཡཝིསེསེན སཱམཏྠིཡཏོ ཨདྷིཀཏཾ ཨནདྷིཀཏཉྩ། ཨིནྡྲིཡཔརོཔརིཡཏྟཉཱཎནིདྡེསེ (ཝིབྷ॰ ༨༡༤; པཊི॰ མ॰ ༡.༡༡༣) ‘‘ཨཱསཡཾ ཛཱནཱཏི ཨནུསཡཾ ཛཱནཱཏཱི’’ཏི ཨཱསཡཱདིཛཱནནཾ ཀསྨཱ ནིདྡིཊྛནྟི? ཨཱསཡཛཱནནཱདིནཱ ཡེཧི ཨིནྡྲིཡེཧི པརོཔརེཧི སཏྟཱ ཀལྱཱཎཔཱཔཱསཡཱདིཀཱ ཧོནྟི, ཏེསཾ ཛཱནནསྶ ཝིབྷཱཝནཏོ། ཨེཝཉྩ ཀཏྭཱ ཨིནྡྲིཡཔརོཔརིཡཏྟཨཱསཡཱནུསཡཉཱཎཱནཾ ཝིསུཾ ཨསཱདྷཱརཎཏཱ, ཨིནྡྲིཡཔརོཔརིཡཏྟནཱནཱདྷིམུཏྟིཀཏཱཉཱཎཱནཾ ཝིསུཾ བལཏཱ ཙ སིདྡྷཱ ཧོཏི། ཏཏྠ ཨཱསཡནྟི ཡཏྠ སཏྟཱ ནིཝསནྟི, ཏཾ ཏེསཾ ནིཝཱསཊྛཱནཾ དིཊྛིགཏཾ ཝཱ ཡཐཱབྷཱུཏཉཱཎཾ ཝཱ ཨཱསཡོ། ཨནུསཡོ ཨཔྤཧཱིནབྷཱཝེན ཐཱམགཏོ ཀིལེསོ། ཏཾ པན བྷགཝཱ སཏྟཱནཾ ཨཱསཡཾ ཛཱནནྟོ ཏེསཾ ཏེསཾ དིཊྛིགཏཱནཾ, ཝིཔསྶནཱམགྒཉཱཎཱནཉྩ ཨཔྤཝཏྟིཀྑཎེཔི ཛཱནཱཏི། ཝུཏྟཾ ཧེཏཾ –

    Vuddhiñca hāniñcāti paccayavisesena sāmatthiyato adhikataṃ anadhikatañca. Indriyaparopariyattañāṇaniddese (vibha. 814; paṭi. ma. 1.113) ‘‘āsayaṃ jānāti anusayaṃ jānātī’’ti āsayādijānanaṃ kasmā niddiṭṭhanti? Āsayajānanādinā yehi indriyehi paroparehi sattā kalyāṇapāpāsayādikā honti, tesaṃ jānanassa vibhāvanato. Evañca katvā indriyaparopariyattaāsayānusayañāṇānaṃ visuṃ asādhāraṇatā, indriyaparopariyattanānādhimuttikatāñāṇānaṃ visuṃ balatā ca siddhā hoti. Tattha āsayanti yattha sattā nivasanti, taṃ tesaṃ nivāsaṭṭhānaṃ diṭṭhigataṃ vā yathābhūtañāṇaṃ vā āsayo.Anusayo appahīnabhāvena thāmagato kileso. Taṃ pana bhagavā sattānaṃ āsayaṃ jānanto tesaṃ tesaṃ diṭṭhigatānaṃ, vipassanāmaggañāṇānañca appavattikkhaṇepi jānāti. Vuttaṃ hetaṃ –

    ‘‘ཀཱམཾ སེཝནྟཾཡེཝ བྷགཝཱ ཛཱནཱཏི ‘ཨཡཾ པུགྒལོ ཀཱམགརུཀོ ཀཱམཱསཡོ ཀཱམཱདྷིམུཏྟོ’ཏི། ཀཱམཾ སེཝནྟཉྙེཝ ཛཱནཱཏི ‘ཨཡཾ པུགྒལོ ནེཀྑམྨགརུཀོ ནེཀྑམྨཱསཡོ ནེཀྑམྨཱདྷིམུཏྟོ’ཏི། ནེཀྑམྨཾ སེཝནྟཉྙེཝ ཛཱནཱཏི། བྱཱཔཱདཾ, ཨབྱཱཔཱདཾ, ཐིནམིདྡྷཾ, ཨཱལོཀསཉྙཾ སེཝནྟཾཡེཝ ཛཱནཱཏི ‘ཨཡཾ པུགྒལོ ཐིནམིདྡྷགརུཀོ ཐིནམིདྡྷཱསཡོ ཐིནམིདྡྷཱདྷིམུཏྟོ’ཏི’’ (པཊི॰ མ॰ ༡.༡༡༣)།

    ‘‘Kāmaṃ sevantaṃyeva bhagavā jānāti ‘ayaṃ puggalo kāmagaruko kāmāsayo kāmādhimutto’ti. Kāmaṃ sevantaññeva jānāti ‘ayaṃ puggalo nekkhammagaruko nekkhammāsayo nekkhammādhimutto’ti. Nekkhammaṃ sevantaññeva jānāti. Byāpādaṃ, abyāpādaṃ, thinamiddhaṃ, ālokasaññaṃ sevantaṃyeva jānāti ‘ayaṃ puggalo thinamiddhagaruko thinamiddhāsayo thinamiddhādhimutto’ti’’ (paṭi. ma. 1.113).

    པཋམཱདཱིནཾ ཙཏུནྣཾ ཛྷཱནཱནནྟི རཱུཔཱཝཙརཱནཾ པཋམཱདཱིནཾ པཙྩནཱིཀཛྷཱཔནཊྛེན ཨཱརམྨཎཱུཔནིཛ྄ཛྷཱནཊྛེན ཙ ཛྷཱནཱནཾ། ཙཏུཀྐནཡེན ཧེཏཾ ཝུཏྟཾ། ཨཊྛནྣཾ ཝིམོཀྑཱནནྟི ཨེཏྠ པཊིཔཱཊིཡཱ སཏྟ ཨཔྤིཏཔྤིཏཀྑཎེ པཙྩནཱིཀདྷམྨེཧི ཝིམུཙྩནཏོ ཨཱརམྨཎེ ཙ ཨདྷིམུཙྩནཏོ ཝིམོཀྑཱ ནཱམ, ཨཊྛམོ པན སབྦསོ སཉྙཱཝེདཡིཏེཧི ཝིམུཏྟཏྟཱ ཨཔགམཝིམོཀྑོ ནཱམ། ཙཏུཀྐནཡཔཉྩཀནཡེསུ པཋམཛྷཱནསམཱདྷི སཝིཏཀྐསཝིཙཱརོ ནཱམ, པཉྩཀནཡེ དུཏིཡཛ྄ཛྷཱནསམཱདྷི ཨཝིཏཀྐཝིཙཱརམཏྟོ, ནཡདྭཡེཔི ཨུཔརི ཏཱིསུ ཛྷཱནེསུ སམཱདྷི ཨཝིཏཀྐཨཝིཙཱརོ, སམཱཔཏྟཱིསུ པཊིཔཱཊིཡཱ ཨཊྛནྣཾ སམཱདྷཱིཏིཔི ནཱམཾ, སམཱཔཏྟཱིཏིཔི ཙིཏྟེཀགྒཏཱསབྦྷཱཝཏོ, ནིརོདྷསམཱཔཏྟིཡཱ ཏདབྷཱཝཏོ ན སམཱདྷཱིཏི ནཱམཾ། ཧཱནབྷཱགིཡདྷམྨནྟི ཨཔྤགུཎེཧི པཋམཛ྄ཛྷཱནཱདཱིཧི ཝུཊྛིཏསྶ སཉྙཱམནསིཀཱརཱནཾ ཀཱམཱདིཨནུཔཀྑནྡནཾ། ཝིསེསབྷཱགིཡདྷམྨནྟི པགུཎེཧི པཋམཛ྄ཛྷཱནཱདཱིཧི ཝུཊྛིཏསྶ སཉྙཱམནསིཀཱརཱནཾ དུཏིཡཛ྄ཛྷཱནཱདིཔཀྑནྡནཾ། ཨིཏི སཉྙཱམནསིཀཱརཱནཾ ཀཱམཱདིདུཏིཡཛ྄ཛྷཱནཱདིཔཀྑནྡནཱནི ཧཱནབྷཱགིཡཝིསེསབྷཱགིཡདྷམྨཱཏི དསྶིཏཱནི, ཏེཧི པན ཛྷཱནཱནཾ ཏཾསབྷཱཝཏཱ དྷམྨ-སདྡེན ཝུཏྟཱ། ཏསྨཱཏི ཝུཏྟམེཝཏྠཾ ཧེཏུབྷཱཝེན པཙྩཱམསཏི། ཝོདཱནནྟི པགུཎཏཱསངྑཱཏཾ ཝོདཱནཾ། ཏཉྷི པཋམཛ྄ཛྷཱནཱདཱིཧི ཝུཊྛཧིཏྭཱ དུཏིཡཛ྄ཛྷཱནཱདིཨདྷིགམསྶ པཙྩཡཏྟཱ ‘‘ཝུཊྛཱན’’ནྟི ཝུཏྟཾ། ཡེ (ཨ॰ ནི॰ ཊཱི॰ ༣.༡༠.༢༡) པན ‘‘ནིརོདྷཏོ ཕལསམཱཔཏྟིཡཱ ཝུཊྛཱནནྟི པཱལི༹ ནཏྠཱི’’ཏི ཝདནྟི, ཏེ ‘‘ནིརོདྷཱ ཝུཊྛཧནྟསྶ ནེཝསཉྙཱནཱསཉྙཱཡཏནཾ ཕལསམཱཔཏྟིཡཱ ཨནནྟརཔཙྩཡེན པཙྩཡོ’’ཏི ཨིམཱཡ པཱལི༹ཡཱ (པཊྛཱ॰ ༡.༡.༤༡༧) པཊིསེདྷེཏབྦཱ། ཡོ སམཱཔཏྟིལཱབྷཱི སམཱནོ ཨེཝ ‘‘ན ལབྷཱམཧ’’ནྟི, ཀམྨཊྛཱནཾ སམཱནཾ ཨེཝ ‘‘ན ཀམྨཊྛཱན’’ནྟི སཉྙཱི ཧོཏི, སོ སམྤཏྟིཾཡེཝ སམཱནཾ ‘‘ཝིཔཏྟཱི’’ཏི པཙྩེཏཱིཏི ཝེདིཏབྦོ།

    Paṭhamādīnaṃ catunnaṃ jhānānanti rūpāvacarānaṃ paṭhamādīnaṃ paccanīkajhāpanaṭṭhena ārammaṇūpanijjhānaṭṭhena ca jhānānaṃ. Catukkanayena hetaṃ vuttaṃ. Aṭṭhannaṃ vimokkhānanti ettha paṭipāṭiyā satta appitappitakkhaṇe paccanīkadhammehi vimuccanato ārammaṇe ca adhimuccanato vimokkhā nāma, aṭṭhamo pana sabbaso saññāvedayitehi vimuttattā apagamavimokkho nāma. Catukkanayapañcakanayesu paṭhamajhānasamādhi savitakkasavicāro nāma, pañcakanaye dutiyajjhānasamādhi avitakkavicāramatto, nayadvayepi upari tīsu jhānesu samādhi avitakkaavicāro, samāpattīsu paṭipāṭiyā aṭṭhannaṃ samādhītipi nāmaṃ, samāpattītipi cittekaggatāsabbhāvato, nirodhasamāpattiyā tadabhāvato na samādhīti nāmaṃ. Hānabhāgiyadhammanti appaguṇehi paṭhamajjhānādīhi vuṭṭhitassa saññāmanasikārānaṃ kāmādianupakkhandanaṃ. Visesabhāgiyadhammanti paguṇehi paṭhamajjhānādīhi vuṭṭhitassa saññāmanasikārānaṃ dutiyajjhānādipakkhandanaṃ. Iti saññāmanasikārānaṃ kāmādidutiyajjhānādipakkhandanāni hānabhāgiyavisesabhāgiyadhammāti dassitāni, tehi pana jhānānaṃ taṃsabhāvatā dhamma-saddena vuttā. Tasmāti vuttamevatthaṃ hetubhāvena paccāmasati. Vodānanti paguṇatāsaṅkhātaṃ vodānaṃ. Tañhi paṭhamajjhānādīhi vuṭṭhahitvā dutiyajjhānādiadhigamassa paccayattā ‘‘vuṭṭhāna’’nti vuttaṃ. Ye (a. ni. ṭī. 3.10.21) pana ‘‘nirodhato phalasamāpattiyā vuṭṭhānanti pāḷi natthī’’ti vadanti, te ‘‘nirodhā vuṭṭhahantassa nevasaññānāsaññāyatanaṃ phalasamāpattiyā anantarapaccayena paccayo’’ti imāya pāḷiyā (paṭṭhā. 1.1.417) paṭisedhetabbā. Yo samāpattilābhī samāno eva ‘‘na labhāmaha’’nti, kammaṭṭhānaṃ samānaṃ eva ‘‘na kammaṭṭhāna’’nti saññī hoti, so sampattiṃyeva samānaṃ ‘‘vipattī’’ti paccetīti veditabbo.

    ༡༤༩. ཨཔྤནནྟི ནིགམནཾ། ན ཏཐཱ དཊྛབྦནྟི ཡཐཱ པརཝཱདིནཱ ཝུཏྟཾ, ཏཐཱ ན དཊྛབྦཾ། སཀསཀཀིཙྩམེཝ ཛཱནཱཏཱིཏི ཋཱནཱཊྛཱནཛཱནནཱདིཾ སཀཾ སཀཾཡེཝ ཀིཙྩཾ ཀཱཏུཾ ཛཱནཱཏི, ཡཐཱསཀམེཝ ཝིསཡཾ པཊིཝིཛ྄ཛྷཏཱིཏི ཨཏྠོ། ཏམྤཱིཏི ཏེཧི དསབལཉཱཎེཧི ཛཱནིཏབྦམྤི། ཀམྨནྟརཝིཔཱཀནྟརམེཝཱཏི ཀམྨནྟརསྶཝིཔཱཀནྟརམེཝ ཛཱནཱཏི, ཙེཏནཱཙེཏནཱསམྤཡུཏྟདྷམྨེ ནིརཡཱདིནིབྦཱནགཱམིནིཔཊིཔདཱབྷཱུཏེ ཀམྨནྟི གཧེཏྭཱ ཨཱཧ ‘‘ཀམྨཔརིཙྪེདམེཝཱ’’ཏི། དྷཱཏུནཱནཏྟཉྩ དྷཱཏུནཱནཏྟཀཱརཎཉྩ དྷཱཏུནཱནཏྟཀཱརཎནྟི ཨེཀདེསསརཱུཔེཀསེསོ དཊྛབྦོ། ཏཉྷི ཉཱཎཾ ཏདུབྷཡམྤི ཛཱནཱཏི, ‘‘ཨིམཱཡ ནཱམ དྷཱཏུཡཱ ཨུསྶནྣཏྟཱ’’ཏིཨཱདིནཱ (ཝིབྷ॰ ཨཊྛ॰ ༨༡༢) ཏཐཱ ཙེཝ སཾཝཎྞིཏཾ། སཙྩཔརིཙྪེདམེཝཱཏི པརིཉྙཱབྷིསམཡཱདིཝསེན སཙྩཱནཾ པརིཙྪིནྡནམེཝ། ཨཔྤེཏུཾ ན སཀྐོཏི ཨཊྛམནཝམབལཱནི ཝིཡ ཏཾསདིསཾ ཨིདྡྷིཝིདྷཉཱཎཾ ཝིཡ ཝིཀུབྦིཏུཾ། ཨེཏེནསྶ བལསདིསཏཉྩ ནིཝཱརེཏི། ཛྷཱནཱདིཉཱཎཾ ཝིཡ ཝཱ ཨཔྤེཏུཾ ཝིཀུབྦིཏུཉྩ། ཡདིཔི ཧི ‘‘ཛྷཱནཱདིཔཙྩཝེཀྑཎཱཉཱཎཾ སཏྟམབལ’’ནྟི ཏསྶ སཝིཏཀྐསཝིཙཱརཏཱ ཝུཏྟཱ, ཏཐཱཔི ‘‘ཛྷཱནཱདཱིཧི ཝིནཱ པཙྩཝེཀྑཎཱ ནཏྠཱི’’ཏི ཛྷཱནཱདིསཧགཏཾ ཉཱཎཾ ཏདནྟོགདྷཾ ཀཏྭཱ ཨེཝཾ ཝུཏྟནྟི ཝེདིཏབྦཾ། ཨཐ ཝཱ སབྦཉྙུཏཉྙཱཎཾ ཛྷཱནཱདིཀིཙྩཾ ཝིཡ ན སབྦཾ བལཀིཙྩཾ ཀཱཏུཾ སཀྐོཏཱིཏི དསྶེཏུཾ ‘‘ཛྷཱནཾ ཧུཏྭཱ ཨཔྤེཏུཾ ན སཀྐོཏི ཨིདྡྷི ཧུཏྭཱ ཝིཀུབྦིཏུཾ ན སཀྐོཏཱི’’ཏི ཝུཏྟཾ, ན པན ཀསྶཙི བལསྶ ཛྷཱནཨིདྡྷིབྷཱཝཏོཏི དཊྛབྦཾ། ཨེཝཾ ཀིཙྩཝིསེསཝསེནཔི དསབལཉཱཎསབྦཉྙུཏཉྙཱཎཱནཾ ཝིསེསཾ དསྶེཏྭཱ ཨིདཱནི ཝིཏཀྐཏྟིཀབྷཱུམནྟརཝསེནཔི ཏཾ དསྶེཏུཾ ‘‘ཨཔིཙཱ’’ཏིཨཱདི ཝུཏྟཾ། པཊིཔཱཊིཡཱཏིཨཱདིཏོ པཊྛཱཡ པཊིཔཱཊིཡཱ།

    149.Appananti nigamanaṃ. Na tathā daṭṭhabbanti yathā paravādinā vuttaṃ, tathā na daṭṭhabbaṃ. Sakasakakiccameva jānātīti ṭhānāṭṭhānajānanādiṃ sakaṃ sakaṃyeva kiccaṃ kātuṃ jānāti, yathāsakameva visayaṃ paṭivijjhatīti attho. Tampīti tehi dasabalañāṇehi jānitabbampi. Kammantaravipākantaramevāti kammantarassavipākantarameva jānāti, cetanācetanāsampayuttadhamme nirayādinibbānagāminipaṭipadābhūte kammanti gahetvā āha ‘‘kammaparicchedamevā’’ti. Dhātunānattañca dhātunānattakāraṇañca dhātunānattakāraṇanti ekadesasarūpekaseso daṭṭhabbo. Tañhi ñāṇaṃ tadubhayampi jānāti, ‘‘imāya nāma dhātuyā ussannattā’’tiādinā (vibha. aṭṭha. 812) tathā ceva saṃvaṇṇitaṃ. Saccaparicchedamevāti pariññābhisamayādivasena saccānaṃ paricchindanameva. Appetuṃ na sakkoti aṭṭhamanavamabalāni viya taṃsadisaṃ iddhividhañāṇaṃ viya vikubbituṃ. Etenassa balasadisatañca nivāreti. Jhānādiñāṇaṃ viya vā appetuṃ vikubbituñca. Yadipi hi ‘‘jhānādipaccavekkhaṇāñāṇaṃ sattamabala’’nti tassa savitakkasavicāratā vuttā, tathāpi ‘‘jhānādīhi vinā paccavekkhaṇā natthī’’ti jhānādisahagataṃ ñāṇaṃ tadantogadhaṃ katvā evaṃ vuttanti veditabbaṃ. Atha vā sabbaññutaññāṇaṃ jhānādikiccaṃ viya na sabbaṃ balakiccaṃ kātuṃ sakkotīti dassetuṃ ‘‘jhānaṃ hutvā appetuṃ na sakkoti iddhi hutvā vikubbituṃ na sakkotī’’ti vuttaṃ, na pana kassaci balassa jhānaiddhibhāvatoti daṭṭhabbaṃ. Evaṃ kiccavisesavasenapi dasabalañāṇasabbaññutaññāṇānaṃ visesaṃ dassetvā idāni vitakkattikabhūmantaravasenapi taṃ dassetuṃ ‘‘apicā’’tiādi vuttaṃ. Paṭipāṭiyātiādito paṭṭhāya paṭipāṭiyā.

    ཨནུཔདཝཎྞནཾ ཀཏྭཱ ཝེདིཏབྦཱནཱིཏི སམྦནྡྷོ། ཀིལེསཱཝརཎཾ ནིཡཏམིཙྪཱདིཊྛི, ཀིལེསཱཝརཎསྶ ཨབྷཱཝོ ཨཱསཝཀྑཡཱདྷིགམསྶ ཋཱནཾ, ཏབྦྷཱཝོ ཨཊྛཱནཾ, ཨནདྷིགམསྶ པན ཏདུབྷཡཾ ཡཐཱཀྐམཾ ཨཊྛཱནཉྩ ཋཱནཉྩཱཏི ཏཏྠ ཀཱརཎཾ དསྶེནྟོ ‘‘ལོཀིཡ…པེ॰… དསྶནཏོ ཙཱ’’ཏི ཨཱཧ། ཏཏྠ ལོཀིཡསམྨཱདིཊྛིཡཱ ཋིཏི ཨཱསཝཀྑཡཱདྷིགམསྶ ཋཱནཾ ཀིལེསཱཝརཎཱབྷཱཝསྶ ཀཱརཎཏྟཱ། སཱ ཧི ཏསྨིཾ སཏི ན ཧོཏི, ཨསཏི ཙ ཧོཏི། ཨེཏེན ཏསྶཱ ཨཊྛིཏིཡཱ ཏསྶ ཨཊྛཱནཏཱ ཝུཏྟཱ ཨེཝ། ནེསཾ ཝེནེཡྻསཏྟཱནཾ། དྷཱཏུཝེམཏྟདསྶནཏོཏི ཀཱམདྷཱཏུཨཱདཱིནཾ པཝཏྟིབྷེདདསྶནཏོ། ཡདགྒེན དྷཱཏུཝེམཏྟཾ ཛཱནཱཏི, ཏདགྒེན ཙརིཡཱཝིསེསམྤི ཛཱནཱཏི། དྷཱཏུཝེམཏྟདསྶནཏོཏི ཝཱ དྷམྨདྷཱཏུཝེམཏྟདསྶནཏོ། སབྦཱཔི ཧི ཙརིཡཱ དྷམྨདྷཱཏུཔརིཡཱཔནྣཱ ཨེཝཱཏི། པཡོགཾ ཨནཱདིཡིཏྭཱཔི སནྟཏིམཧཱམཏྟཱདཱིནཾ (དྷ॰ པ॰ ༡༤༢) ཝིཡ། དིབྦཙཀྑུཉཱཎཱནུབྷཱཝཏོ པཏྟབྦེནཱཏི ཨེཏྠ དིབྦཙཀྑུནཱ པརསྶ ཧདཡཝཏྠུསནྣིསྶཡལོཧིཏཝཎྞདསྶནམུཁེན ཏདཱ པཝཏྟམཱནཙིཏྟཛཱནནཏྠཾ པརིཀམྨཀརཎཾ ནཱམ སཱཝཀཱནཾ, ཏཉྩ ཁོ ཨཱདིཀམྨིཀཱནཾ, ཡཏོ དིབྦཙཀྑུཨཱནུབྷཱཝཏོ ཙེཏོཔརིཡཉཱཎསྶ པཏྟབྦཏཱ སིཡཱ, བུདྡྷཱནཾ པན ཡདིཔི ཨཱསཝཀྑཡཉཱཎཱདྷིགམཏོ པགེཝ དིབྦཙཀྑུཉཱཎཱདྷིགམོ, ཏཐཱཔི ཏཐཱ པརིཀམྨཀརཎཾ ནཏྠི ཝིཛྫཱཏྟཡསིདྡྷིཡཱ སིཛ྄ཛྷནཏོ། སེསཱབྷིཉྙཱཏྟཡེ ཙེཏོཔརིཡཉཱཎཾ དིབྦཙཀྑུཉཱཎཱདྷིགམེན པཏྟནྟི ཙ ཝཏྟབྦཏཾ ལབྷཏཱིཏི ཏཐཱ ཝུཏྟནྟི དཊྛབྦཾ།

    Anupadavaṇṇanaṃ katvā veditabbānīti sambandho. Kilesāvaraṇaṃ niyatamicchādiṭṭhi, kilesāvaraṇassa abhāvo āsavakkhayādhigamassa ṭhānaṃ, tabbhāvo aṭṭhānaṃ, anadhigamassa pana tadubhayaṃ yathākkamaṃ aṭṭhānañca ṭhānañcāti tattha kāraṇaṃ dassento ‘‘lokiya…pe… dassanato cā’’ti āha. Tattha lokiyasammādiṭṭhiyā ṭhiti āsavakkhayādhigamassa ṭhānaṃ kilesāvaraṇābhāvassa kāraṇattā. Sā hi tasmiṃ sati na hoti, asati ca hoti. Etena tassā aṭṭhitiyā tassa aṭṭhānatā vuttā eva. Nesaṃ veneyyasattānaṃ. Dhātuvemattadassanatoti kāmadhātuādīnaṃ pavattibhedadassanato. Yadaggena dhātuvemattaṃ jānāti, tadaggena cariyāvisesampi jānāti. Dhātuvemattadassanatoti vā dhammadhātuvemattadassanato. Sabbāpi hi cariyā dhammadhātupariyāpannā evāti. Payogaṃ anādiyitvāpi santatimahāmattādīnaṃ (dha. pa. 142) viya. Dibbacakkhuñāṇānubhāvato pattabbenāti ettha dibbacakkhunā parassa hadayavatthusannissayalohitavaṇṇadassanamukhena tadā pavattamānacittajānanatthaṃ parikammakaraṇaṃ nāma sāvakānaṃ, tañca kho ādikammikānaṃ, yato dibbacakkhuānubhāvato cetopariyañāṇassa pattabbatā siyā, buddhānaṃ pana yadipi āsavakkhayañāṇādhigamato pageva dibbacakkhuñāṇādhigamo, tathāpi tathā parikammakaraṇaṃ natthi vijjāttayasiddhiyā sijjhanato. Sesābhiññāttaye cetopariyañāṇaṃ dibbacakkhuñāṇādhigamena pattanti ca vattabbataṃ labhatīti tathā vuttanti daṭṭhabbaṃ.

    པུན ཨེཝརཱུཔིཾ ཝཱཙཾ ན ཝཀྑཱམཱིཏི ཙིཏྟཾ ཨུཔྤཱདེནྟོ ཏཾ ཝཱཙཾ པཛཧཏི ནཱམ། ཝཱཙཱཡ པན སོ ཨཏྠོ པཱཀཊོ ཧོཏཱིཏི ‘‘ཝདནྟོ’’ཏི ཝུཏྟཾ། དིཊྛིཾ ན གཎྷིསྶཱམཱིཏི དིཊྛིགྒཱཧཔཊིཀྑེཔོ། དིཊྛིཡཱ ཨནུཔྤཱདནཾ པཛཧནམེཝཱཏི ཨཱཧ ‘‘པཛཧནྟོ’’ཏི། སོ ཨརིཡཱུཔཝཱདཱི ནིརཡེ ཋཔིཏོཡེཝ, ནཱསྶ ནིརཡཱུཔཔཏྟིཡཱ ཀོཙི ཝིབནྡྷོ ཨེཀཾསིཀོ ཨཡམཏྠོཏི ཨདྷིཔྤཱཡོ།

    Puna evarūpiṃ vācaṃ na vakkhāmīti cittaṃ uppādento taṃ vācaṃ pajahati nāma. Vācāya pana so attho pākaṭo hotīti ‘‘vadanto’’ti vuttaṃ. Diṭṭhiṃ na gaṇhissāmīti diṭṭhiggāhapaṭikkhepo. Diṭṭhiyā anuppādanaṃ pajahanamevāti āha ‘‘pajahanto’’ti. So ariyūpavādī niraye ṭhapitoyeva, nāssa nirayūpapattiyā koci vibandho ekaṃsiko ayamatthoti adhippāyo.

    ཨསྶཱཏི ཨེཀཾསིཀབྷཱཝསྶ། སིཀྑཱཧི སཱིལསམཱདྷིཔཉྙཱཧི, ཏདཏྠཱཡ ཝིཔསྶནཱཡ ཙ ཝིནཱ ཨཉྙཱརཱདྷནསྶ ཨསམྦྷཝཏོ ‘‘ལོཀིཡལོཀུཏྟརཱ སཱིལསམཱདྷིཔཉྙཱ ཝེདིཏབྦཱ’’ཏི ཝཏྭཱ པུན ཨཱསནྣཏརེ སཱིལཱདིཀེ དསྶེནྟོ ‘‘ལོཀུཏྟརཝསེནེཝ ཝིནིཝཏྟེཏུམྤི ཝཊྚཏཱི’’ཏི ཨཱཧ, ཏསྨཱ ཨགྒམགྒཔརིཡཱཔནྣཱ སཱིལཱདཡོ ཝེདིཏབྦཱ། ཨགྒམགྒཊྛསྶ ཧི དིཊྛེཝ དྷམྨེ ཨེཀཾསིཀཱ ཨཉྙཱརཱདྷནཱ, ཨིཏརེསཾ ཨནེཀཾསིཀཱཏི། སམྤཛྫནཾ སམྤདཱ, ནིཔྥཏྟཱིཏི ཨཏྠོ, ཏསྨཱ ཨེཝཾསམྤདནྟི ཨེཝཾཨཝིརཛ྄ཛྷནཀནིཔྥཏྟིཀནྟི ཝུཏྟཾ ཧོཏི། ཏེནཱཧ ‘‘ཨིམམྤི ཀཱརཎ’’ནྟིཨཱདི། ཏཏྠ ཀཱརཎནྟི ཡུཏྟི། ཏཏྲཱཡཾ ཡུཏྟིནིདྡྷཱརཎཱ ‘‘ནིརཡཱུཔགོ ཨརིཡཱུཔཝཱདཱི ཏདཱདཱཡསྶ ཨཝིཛྫམཱནཏོ སེཡྻཐཱཔི མིཙྪཱདིཊྛཱི’’ཏི། ཨེཏྠ ཙ ‘‘ཏཾ ཝཱཙཾ ཨཔྤཧཱཡཱ’’ཏིཨཱདིཝཙནེན ཏདཱདཱཡསྶ ཨཔྤཧཱནེན ཙ ཨརིཡཱུཔཝཱདོ ཨནྟརཱཡིཀོ ཨནཏྠཱཝཧོ ཙ, པཧཱནེན པན ཨཙྩཡཾ དེསེཏྭཱ ཁམཱཔནེན ཨནནྟརཱཡིཀོ ཨཏྠཱཝཧོ ཙ ཡཐཱ ཏཾ ཝུཊྛིཏཱ དེསིཏཱ ཙ ཨཱཔཏྟཱིཏི དསྶེཏི།

    Assāti ekaṃsikabhāvassa. Sikkhāhi sīlasamādhipaññāhi, tadatthāya vipassanāya ca vinā aññārādhanassa asambhavato ‘‘lokiyalokuttarā sīlasamādhipaññā veditabbā’’ti vatvā puna āsannatare sīlādike dassento ‘‘lokuttaravaseneva vinivattetumpi vaṭṭatī’’ti āha, tasmā aggamaggapariyāpannā sīlādayo veditabbā. Aggamaggaṭṭhassa hi diṭṭheva dhamme ekaṃsikā aññārādhanā, itaresaṃ anekaṃsikāti. Sampajjanaṃ sampadā, nipphattīti attho, tasmā evaṃsampadanti evaṃavirajjhanakanipphattikanti vuttaṃ hoti. Tenāha ‘‘imampi kāraṇa’’ntiādi. Tattha kāraṇanti yutti. Tatrāyaṃ yuttiniddhāraṇā ‘‘nirayūpago ariyūpavādī tadādāyassa avijjamānato seyyathāpi micchādiṭṭhī’’ti. Ettha ca ‘‘taṃ vācaṃ appahāyā’’tiādivacanena tadādāyassa appahānena ca ariyūpavādo antarāyiko anatthāvaho ca, pahānena pana accayaṃ desetvā khamāpanena anantarāyiko atthāvaho ca yathā taṃ vuṭṭhitā desitā ca āpattīti dasseti.

    དསབལཉཱཎཝཎྞནཱ ནིཊྛིཏཱ།

    Dasabalañāṇavaṇṇanā niṭṭhitā.

    ཙཏུཝེསཱརཛྫཉཱཎཝཎྞནཱ

    Catuvesārajjañāṇavaṇṇanā

    ༡༥༠. བྱཱམོཧབྷཡཝསེན (ཨ॰ ནི॰ ཊཱི॰ ༢.༤.༨) སརཎཔརིཡེསནཾ སཱརཛྫནཾ སཱརདོ, བྱཱམོཧབྷཡཾ, ཝིགཏོ སཱརདོ ཨེཏསྶཱཏི ཝིསཱརདོ, ཏསྶ བྷཱཝོ ཝེསཱརཛྫཾ། ཏཾ པན ཉཱཎསམྤདཾ པཧཱནསམྤདཾ དེསནཱཝིསེསསམྤདཾ ཁེམཾ ནིསྶཱཡ པཝཏྟཾ ཙཏུབྦིདྷཾ པཙྩཝེཀྑཎཉཱཎཾ། ཏེནཱཧ ‘‘ཙཏཱུསུ ཋཱནེསཱུ’’ཏིཨཱདི། དསྶིཏདྷམྨེསཱུཏི ཝུཏྟདྷམྨེསུ། ཝཙནམཏྟམེཝ ཧི ཏེསཾ, ན པན དསྶནཾ ཏཱདིསསྶེཝ དྷམྨསྶ ཨབྷཱཝཏོ། བྷགཝཏཱ ཨེཝ ཝཱ ‘‘ཨིམེ དྷམྨཱ ཨནབྷིསམྦུདྡྷཱ’’ཏི པརསྶ ཝཙནཝསེན དསྶིཏདྷམྨེསུ། ‘‘དྷམྨཔཊིསམྦྷིདཱ’’ཏིཨཱདཱིསུ (ཝིབྷ॰ ༧༡༨) ཝིཡ དྷམྨ-སདྡོ ཧེཏུཔརིཡཱཡོཏི ཨཱཧ ‘‘སཧདྷམྨེནཱཏི སཧེཏུནཱ’’ཏི། ཧེཏཱུཏི ཙ ཨུཔཔཏྟིསཱདྷནཧེཏུ ཝེདིཏབྦོ, ན ཀཱརཀོ སམྤཱཔཀོ ཙ། ཨཔྤམཱཎནྟི ཨནིདསྶནཾ། ནིདསྶནཉྷི ཨནྭཡཏོ བྱཏིརེཀཏོ པམཱཎངྒཏཱཡ ‘‘པམཱཎ’’ནྟི ཝུཙྩཏི། ནིམིཏྟནྟི ཙོདནཱཡ ཀཱརཎཾ། ཏཏྠ ཙོདཀོ ཙོདནཾ ཀརོཏཱིཏི ཀཱརཎཾ, དྷམྨོ ཙོདནཾ ཀརོཏི ཨེཏེནཱཏི ཀཱརཎཾ། ཏེནཱཧ ‘‘པུགྒལོཔཱི’’ཏིཨཱདི། ཁེམནྟི ཀེནཙི ཨཔྤཊིབནྡྷིཡབྷཱཝེན ཨནུཔདྡུཏཏཾ།

    150. Byāmohabhayavasena (a. ni. ṭī. 2.4.8) saraṇapariyesanaṃ sārajjanaṃ sārado, byāmohabhayaṃ, vigato sārado etassāti visārado, tassa bhāvo vesārajjaṃ. Taṃ pana ñāṇasampadaṃ pahānasampadaṃ desanāvisesasampadaṃ khemaṃ nissāya pavattaṃ catubbidhaṃ paccavekkhaṇañāṇaṃ. Tenāha ‘‘catūsu ṭhānesū’’tiādi. Dassitadhammesūti vuttadhammesu. Vacanamattameva hi tesaṃ, na pana dassanaṃ tādisasseva dhammassa abhāvato. Bhagavatā eva vā ‘‘ime dhammā anabhisambuddhā’’ti parassa vacanavasena dassitadhammesu. ‘‘Dhammapaṭisambhidā’’tiādīsu (vibha. 718) viya dhamma-saddo hetupariyāyoti āha ‘‘sahadhammenāti sahetunā’’ti. Hetūti ca upapattisādhanahetu veditabbo, na kārako sampāpako ca. Appamāṇanti anidassanaṃ. Nidassanañhi anvayato byatirekato pamāṇaṅgatāya ‘‘pamāṇa’’nti vuccati. Nimittanti codanāya kāraṇaṃ. Tattha codako codanaṃ karotīti kāraṇaṃ, dhammo codanaṃ karoti etenāti kāraṇaṃ. Tenāha ‘‘puggalopī’’tiādi. Khemanti kenaci appaṭibandhiyabhāvena anupaddutataṃ.

    ཨནྟརཱཡོ ཨེཏེསཾ ཨཏྠི, ཨནྟརཱཡེཝཱ ཡུཏྟཱཏི ཨནྟརཱཡིཀཱ། ཨེཝཾབྷཱུཏཱ པན ཏེ ཡསྨཱ ཨནྟརཱཡཀརཱ ནཱམ ཧོནྟི, ཏསྨཱ ཨཱཧ ‘‘ཨནྟརཱཡཾ ཀརོནྟཱིཏི ཨནྟརཱཡིཀཱ’’ཏི། ཨསཉྩིཙྩ ཝཱིཏིཀྐམོ ན ཏཐཱ སཱཝཛྫོཏི ཀཏྭཱ ཝུཏྟཾ ‘‘སཉྩིཙྩ ཝཱིཏིཀྐནྟཱ’’ཏི། སཏྟ ཨཱཔཏྟིཀྑནྡྷཱཏིཨཱདི ནིདསྶནམཏྟཾ ཨིཏརེསམྤི ཙཏུནྣཾ ‘‘ཨནྟརཱཡིཀཱ’’ཏི ཝུཏྟདྷམྨཱནཾ ཏབྦྷཱཝེ བྱབྷིཙཱརཱབྷཱཝཏོ། ཨིདྷ པན མེཐུནདྷམྨོ ཨདྷིཔྤེཏོཏི ཨིདཾ ཨཊྛུཔྤཏྟིཝསེན ཝུཏྟཾ ཨརིཊྛསིཀྑཱཔདཾ (པཱཙི॰ ༤༡༧-༤༢༢) ཝིཡ། ཡསྨཱ ཏངྑཎམྤི ཀཱམེསུ (ཨ॰ ནི॰ ཊཱི॰ ༢.༤.༨) ཨཱདཱིནཝཾ དིསྭཱ ཝིརཏྟོ (ཨ॰ ནི॰ ཊཱི॰ ༢.༤.༨) ཧོཏི ཙེ, ཝིསེསཾ ཨདྷིགཙྪཏི, ན ཀཱམེསུ ཨཱསཏྟོ, ཏསྨཱ ཝུཏྟཾ ‘‘མེཐུནཾ…པེ॰… ཨནྟརཱཡོ ཧོཏཱི’’ཏི། ཏཏྠ ཡསྶ ཀསྶཙཱིཏི ན ཀེཝལཾ པབྦཛིཏསྶེཝ, ཨཐ ཁོ ཡསྶ ཀསྶཙི། ཏཐཱ ཧི ཝུཏྟཾ ‘‘མེཐུནམནུཡུཏྟསྶ, མུསྶཏེཝཱཔི སཱསན’’ནྟི། ཏསྨིཾ ཨནིཡྻཱནིཀདྷམྨེཏི ཏསྨིཾ པརེན པརིཀཔྤིཏཨནིཡྻཱནིཀདྷམྨནིམིཏྟཾ། ནིམིཏྟཏྠེ ཧི ཨིདཾ ཀམྨསཾཡོགེ བྷུམྨཾ།

    Antarāyo etesaṃ atthi, antarāyevā yuttāti antarāyikā. Evaṃbhūtā pana te yasmā antarāyakarā nāma honti, tasmā āha ‘‘antarāyaṃ karontīti antarāyikā’’ti. Asañcicca vītikkamo na tathā sāvajjoti katvā vuttaṃ ‘‘sañcicca vītikkantā’’ti. Satta āpattikkhandhātiādi nidassanamattaṃ itaresampi catunnaṃ ‘‘antarāyikā’’ti vuttadhammānaṃ tabbhāve byabhicārābhāvato. Idha pana methunadhammo adhippetoti idaṃ aṭṭhuppattivasena vuttaṃ ariṭṭhasikkhāpadaṃ (pāci. 417-422) viya. Yasmā taṅkhaṇampi kāmesu (a. ni. ṭī. 2.4.8) ādīnavaṃ disvā viratto (a. ni. ṭī. 2.4.8) hoti ce, visesaṃ adhigacchati, na kāmesu āsatto, tasmā vuttaṃ ‘‘methunaṃ…pe… antarāyo hotī’’ti. Tattha yassa kassacīti na kevalaṃ pabbajitasseva, atha kho yassa kassaci. Tathā hi vuttaṃ ‘‘methunamanuyuttassa, mussatevāpi sāsana’’nti. Tasmiṃ aniyyānikadhammeti tasmiṃ parena parikappitaaniyyānikadhammanimittaṃ. Nimittatthe hi idaṃ kammasaṃyoge bhummaṃ.

    ཙཏུཝེསཱརཛྫཉཱཎཝཎྞནཱ ནིཊྛིཏཱ།

    Catuvesārajjañāṇavaṇṇanā niṭṭhitā.

    ཨཊྛཔརིསཝཎྞནཱ

    Aṭṭhaparisavaṇṇanā

    ༡༥༡. པུརིསསྶ སཱུརཏརབྷཱཝོ ནཱམ སངྒཱམེ པཱཀཊོ ཧོཏི, ན གེཧེ ནིསིནྣཀཱལེ, ཨེཝཾ ཝེསཱརཛྫཉཱཎསྶ ཨཱནུབྷཱཝོ པཎྜིཏཔརིསཱསུ ཡཏྠ ཀཏྠཙཱིཏི དསྶེནྟོ ‘‘ཝེསཱརཛྫཉཱཎསྶ བལདསྶནཏྠ’’ནྟི ཨཱཧ། སནྣིཔཏིཏྭཱ ནིསིནྣཊྛཱནནྟི ཋཱནསཱིསེན སནྣིཔཏིཏཁཏྟིཡཔརིསམེཝ དསྶེཏི། ཨེསེཝ ནཡོ སབྦཏྠཱཏི ཨཏིདེསེན ཨཱཝིབྷཱཝིཏམཏྠཾ དསྶེཏུཾ ‘‘མཱརཀཱཡིཀཱན’’ནྟིཨཱདི ཝུཏྟཾ སདིསཏྠཝིསཡཏྟཱ ཨཏིདེསསྶ། ཡཐཱ ཧི ཁཏྟིཡཱནཾ སམཱུཧོ ཁཏྟིཡཔརིསཱཏི ཨཡམཏྠོ ལབྦྷཏི, ན ཨེཝཾ ‘‘མཱརཔརིསཱ’’ཏི ཨེཏྠ, མཱརསྶ པརིསཱཏི པན མཱརཔརིསཱཏི ཨཡམཏྠོ ཨདྷིཔྤེཏོ། ཏེནཱཧ ‘‘མཱརཀཱཡིཀཱནཾ…པེ॰… ན མཱརཱན’’ནྟི། མཱརཀཱཡིཀཱནནྟི མཱརཔཀྑིཡཱནཾ། ཨུགྒཊྛཱནདསྶནཝསེནཱཏི སཱརཛྫིཏབྦཊྛཱནདསྶནཝསེན, ཨེཝཾ ཨུགྒཱ ཁཏྟིཡཱ ཨཏྟནོ པུཉྙཏེཛེནཱཏི ཨདྷིཔྤཱཡོ། བྲཱཧྨཎཱ ཏཱིསུ ཝེདེསཱུཏི ཨིདཾ ཨིཏརེསཾ ཨཝིསཡདསྶནཝསེན ཝུཏྟཾ། ཝེདེ སཛ྄ཛྷཱཡནྟཱཔི ཧི ཁཏྟིཡཱ ཝེསྶཱ ཙ ཏདཏྠཝིཙཱརཎཱཡ ཡེབྷུཡྻེན ཨསམཏྠཱ ཨེཝཱཏི། ཀསྨཱ པནེཏྠ ཡཱམཱདིཔརིསཱ ན གཧིཏཱཏི? བྷུསཾ ཀཱམཱབྷིགིདྡྷཏཱཡ ཡོནིསོམནསིཀཱརཝིརཧཏོ། ཡཱམཱདཡོ ཧི ཨུལཱ༹རུལཱ༹རེ ཀཱམེ པཊིསེཝནྟཱ ཏཏྠཱབྷིགིདྡྷཏཱཡ དྷམྨསྶཝནཱཡ སབྷཱཝེན ཙིཏྟམྤི ན ཨུཔྤཱདེནྟི, མཧཱབོདྷིསཏྟཱནཾ པན བུདྡྷཱནཉྩ ཨཱནུབྷཱཝེན ཨཱཀཌྜྷིཡམཱནཱ ཀདཱཙི ཏེསཾ པཡིརུཔཱསནཱདཱིནི ཀརོནྟི ཏཱདིསེ མཧཱསམཡེ། ཏེནེཝ ཧི ཝིམཱནཝཏྠུདེསནཱཔི ཏནྣིམིཏྟཱ བཧུལཱ ནཱཧོསི། མནུསྶཱནཾ ཝསེནཱཡཾ ཀཏཱ།

    151. Purisassa sūratarabhāvo nāma saṅgāme pākaṭo hoti, na gehe nisinnakāle, evaṃ vesārajjañāṇassa ānubhāvo paṇḍitaparisāsu yattha katthacīti dassento ‘‘vesārajjañāṇassa baladassanattha’’nti āha. Sannipatitvā nisinnaṭṭhānanti ṭhānasīsena sannipatitakhattiyaparisameva dasseti. Eseva nayo sabbatthāti atidesena āvibhāvitamatthaṃ dassetuṃ ‘‘mārakāyikāna’’ntiādi vuttaṃ sadisatthavisayattā atidesassa. Yathā hi khattiyānaṃ samūho khattiyaparisāti ayamattho labbhati, na evaṃ ‘‘māraparisā’’ti ettha, mārassa parisāti pana māraparisāti ayamattho adhippeto. Tenāha ‘‘mārakāyikānaṃ…pe… na mārāna’’nti. Mārakāyikānanti mārapakkhiyānaṃ. Uggaṭṭhānadassanavasenāti sārajjitabbaṭṭhānadassanavasena, evaṃ uggā khattiyā attano puññatejenāti adhippāyo. Brāhmaṇā tīsu vedesūti idaṃ itaresaṃ avisayadassanavasena vuttaṃ. Vede sajjhāyantāpi hi khattiyā vessā ca tadatthavicāraṇāya yebhuyyena asamatthā evāti. Kasmā panettha yāmādiparisā na gahitāti? Bhusaṃ kāmābhigiddhatāya yonisomanasikāravirahato. Yāmādayo hi uḷāruḷāre kāme paṭisevantā tatthābhigiddhatāya dhammassavanāya sabhāvena cittampi na uppādenti, mahābodhisattānaṃ pana buddhānañca ānubhāvena ākaḍḍhiyamānā kadāci tesaṃ payirupāsanādīni karonti tādise mahāsamaye. Teneva hi vimānavatthudesanāpi tannimittā bahulā nāhosi. Manussānaṃ vasenāyaṃ katā.

    པརཙཀྐཝཱལེ༹སུ ཙ མནུསྶཱནཾ ཝིསེསཱདྷིགམོ ནཏྠཱིཏི པུཙྪཏི ‘‘ཀིཾ པན བྷགཝཱ ཨཉྙཱནི ཙཀྐཝཱལཱ༹ནིཔི གཙྪཏཱི’’ཏི། ཨིཏརོ ཡདིཔི ཏེསཾ ཨརིཡདྷམྨཱདྷིགམོ ནཏྠི, ཝཱསནཱཡ པན ཏཏྠ གནྟྭཱ དྷམྨཾ དེསེཏཱིཏི དསྶེནྟོ ‘‘ཨཱམགཙྪཏཱི’’ཏི ཨཱཧ། ཀེཡཱུརཾ ནཱནཱཝིདྷརཏནཔརིསིབྦིཏསུཝཎྞཛཱལཝིནདྡྷཾ བྷུཛཱབྷརཎཾ། ཨངྒདཾ ནཱནཱགནྡྷགནྡྷིཏཾ, ཀེཝལཾ ཝཱ སུཝཎྞམཡཾ བཱཧུཝལཡཾ། ཚིནྣསྶརཱཏི དྭིདྷཱབྷཱུཏསྶརཱ (དཱི॰ ནི॰ ཊཱི॰ ༢.༡༧༢) གགྒརསྶརཱཏི གགྒརིཀཱཡ ཝིཡ གགྒརཱཡམཱནཁརསྶརཱ (དཱི॰ ནི॰ ཊཱི॰ ༢.༡༧༢; ཨ॰ ནི॰ ཊཱི॰ ༣.༨.༦༩)། བྷཱསནྟརནྟི ཏེསཾ བྷཱསཾ (དཱི॰ ནི॰ ཊཱི॰ ༢.༡༧༢; ཨ॰ ནི॰ ཊཱི॰ ༣.༨.༦༩) སནྡྷཱཡཱཧ། ‘‘ཝཱིམཾསཱ ཨུཔྤཛྫཏཱི’’ཏི སངྑེཔཏོ ཝུཏྟཾ ཝིཝརིཏུཾ ‘‘ཨིདཾ ཝུཏྟཾ ཧོཏཱི’’ཏིཨཱདི ཝུཏྟཾ།

    Paracakkavāḷesu ca manussānaṃ visesādhigamo natthīti pucchati ‘‘kiṃ pana bhagavā aññāni cakkavāḷānipi gacchatī’’ti. Itaro yadipi tesaṃ ariyadhammādhigamo natthi, vāsanāya pana tattha gantvā dhammaṃ desetīti dassento ‘‘āmagacchatī’’ti āha. Keyūraṃ nānāvidharatanaparisibbitasuvaṇṇajālavinaddhaṃ bhujābharaṇaṃ. Aṅgadaṃ nānāgandhagandhitaṃ, kevalaṃ vā suvaṇṇamayaṃ bāhuvalayaṃ. Chinnassarāti dvidhābhūtassarā (dī. ni. ṭī. 2.172) gaggarassarāti gaggarikāya viya gaggarāyamānakharassarā (dī. ni. ṭī. 2.172; a. ni. ṭī. 3.8.69). Bhāsantaranti tesaṃ bhāsaṃ (dī. ni. ṭī. 2.172; a. ni. ṭī. 3.8.69) sandhāyāha. ‘‘Vīmaṃsāuppajjatī’’ti saṅkhepato vuttaṃ vivarituṃ ‘‘idaṃ vuttaṃ hotī’’tiādi vuttaṃ.

    སངྒམྨཱཏི སམཱགནྟྭཱ། ཨཱདིཏོ ལཱཔོ ཨཱལཱཔོ, ཝཙནཔཊིཝཙནཝསེན སམཾ ལཱཔོ སལླཱཔོ། སམྨཱ, སམཉྙཱ ཝཱ ཀཐཱ སཾཀཐཱ, སཾཀཐཱཝ སཱཀཙྪཱ།

    Saṅgammāti samāgantvā. Ādito lāpo ālāpo, vacanapaṭivacanavasena samaṃ lāpo sallāpo. Sammā, samaññā vā kathā saṃkathā, saṃkathāva sākacchā.

    ཨཊྛཔརིསཝཎྞནཱ ནིཊྛིཏཱ།

    Aṭṭhaparisavaṇṇanā niṭṭhitā.

    ཙཏུཡོནིཝཎྞནཱ

    Catuyonivaṇṇanā

    ༡༥༢. ཡཝནྟི ཏཱཡ སཏྟཱ ཨམིསྶིཏཱཔི སམཱནཛཱཏིཏཱཡ མིསྶིཏཱ ཝིཡ ཧོནྟཱིཏི ཡོནི། སཱ པན ཨཏྠཏོ ཨཎྜཱདིཨུཔྤཏྟིཊྛཱནཝིསིཊྛོ ཁནྡྷཱནཾ བྷཱགསོ པཝཏྟིཝིསེསོཏི ཨཱཧ ‘‘ཁནྡྷཀོཊྛཱསོ ཡོནི ནཱམཱ’’ཏི། ཨཎྜེ ཛཱཏཱཏི པཋམཱཡ ཛཱཏིཡཱ ཝསེན ཝུཏྟཾ, དུཏིཡཱཡ པན ཨཎྜཏོ, ཨཎྜེ ཝཱ བྷིཛྫམཱནེ ཛཱཏཱཏི ཨེཝམཏྠོ ཝེདིཏབྦོ། ཏེནཱཧ ‘‘ཨབྷིནིབྦྷིཛྫ ཛཱཡནྟཱི’’ཏི། ཝིནཱཏི ཨེཏེཧི ཨཎྜཱདཱིཧི བཱཧིརཔཙྩཡེཧི ཝིནཱ། ཨུཔྤཏིཏྭཱ ཝིཡཱཏི ཨུཔྤཛྫནཝསེན པཏིཏྭཱ ཝིཡ། བཱཧིརཔཙྩཡནིརཔེཀྑཏྟཱཡེཝ ཝཱ ཨུཔཔཏནེ སཱདྷུཀཱརིནོ ཨུཔཔཱཏིཀཱ, ཏེ ཨེཝ ཨིདྷ ཨོཔཔཱཏིཀཱཏི ཝུཏྟཱ། ཨཱདི-སདྡེན གབྦྷམལེ ནིབྦཏྟམཧཱཔདུམཀུམཱརཱདཱིནཾ སངྒཧོ། ནིཛ྄ཛྷཱམཏཎྷིཀཔེཏཱནཾ ནིཙྩཾ དུཀྑཱཏུརཏཱཡ ཀཱམསེཝནཱ ནཏྠི , ཏསྨཱ ཏེ གབྦྷསེཡྻཀཱ ན ཧོནྟི, ཛཱལཝནྟཏཱཡ ན ཏཱསཾ ཀུཙྪིཡཾ གབྦྷོ སཎྛཱཏི, ཏསྨཱ ཏེ ཨོཔཔཱཏིཀཱཡེཝ སཾསེདཛཏྟཱཡཔི ཨསམྦྷཝཏོ། ནེརཡིཀཱ ཝིཡཱཏི ནིདསྶནཱཔདེསེན ཏེསམྤི ཨོཔཔཱཏིཀཏྟཾ དཱིཔེཏི། ཨཝསེསཱཏི ནིཛ྄ཛྷཱམཏཎྷིཀནེརཡིཀེ ཋཔེཏྭཱ ཨཝསེསཱ ཝིནིཔཱཏིཀཱ། ཡཀྑཱནཾ ཙཱཏུམཧཱརཱཛིཀཏཱཡ ཨོཔཔཱཏིཀབྷཱཝེ ཨེཝ ཨཱཔནྣེ ཏཾ ནིཝཏྟེཏུཾ ‘‘ཨེཝཾ ཡཀྑཱཔཱི’’ཏི ཝུཏྟཾ། ཏཐཱ ཧི ཏེ ན བྷུམྨདེཝཱ ན ཙ ཝིནིཔཱཏིཀཱཏི།

    152. Yavanti tāya sattā amissitāpi samānajātitāya missitā viya hontīti yoni. Sā pana atthato aṇḍādiuppattiṭṭhānavisiṭṭho khandhānaṃ bhāgaso pavattivisesoti āha ‘‘khandhakoṭṭhāso yoni nāmā’’ti. Aṇḍe jātāti paṭhamāya jātiyā vasena vuttaṃ, dutiyāya pana aṇḍato, aṇḍe vā bhijjamāne jātāti evamattho veditabbo. Tenāha ‘‘abhinibbhijja jāyantī’’ti. Vināti etehi aṇḍādīhi bāhirapaccayehi vinā. Uppatitvā viyāti uppajjanavasena patitvā viya. Bāhirapaccayanirapekkhattāyeva vā upapatane sādhukārino upapātikā, te eva idha opapātikāti vuttā. Ādi-saddena gabbhamale nibbattamahāpadumakumārādīnaṃ saṅgaho. Nijjhāmataṇhikapetānaṃ niccaṃ dukkhāturatāya kāmasevanā natthi , tasmā te gabbhaseyyakā na honti, jālavantatāya na tāsaṃ kucchiyaṃ gabbho saṇṭhāti, tasmā te opapātikāyeva saṃsedajattāyapi asambhavato. Nerayikā viyāti nidassanāpadesena tesampi opapātikattaṃ dīpeti. Avasesāti nijjhāmataṇhikanerayike ṭhapetvā avasesā vinipātikā. Yakkhānaṃ cātumahārājikatāya opapātikabhāve eva āpanne taṃ nivattetuṃ ‘‘evaṃ yakkhāpī’’ti vuttaṃ. Tathā hi te na bhummadevā na ca vinipātikāti.

    ཙཏུཡོནིཝཎྞནཱ ནིཊྛིཏཱ།

    Catuyonivaṇṇanā niṭṭhitā.

    པཉྩགཏིཝཎྞནཱ

    Pañcagativaṇṇanā

    ༡༥༣. གནྟབྦཱཏི ཨུཔཔཛྫིཏབྦཱ། ཡཐཱ ཧི ཀམྨབྷཝོ པརམཏྠཏོ ཨསཏིཔི ཀཱརཀེ པཙྩཡསཱམགྒིཡཱ སིདྡྷོ ཏཾསམངྒིནཱ སནྟཱནལཀྑཎེན སཏྟེན ཀཏོཏི ཝོཧརཱིཡཏི, ཏཐཱ ཨུཔཔཏྟིབྷཝལཀྑཎཱ གཏིཡོ པརམཏྠཏོ ཨསཏིཔི གམཀེ ཏཾཏཾཀམྨཝསེན ཡེསཾ ཏཱནི ཀམྨཱནི, ཏེཧི གནྟབྦཱཏི ཝོཧརཱིཡནྟཱིཏི། ཨེཝཾ སདྡཏྠཏོ གཏིཾ དསྶེཏྭཱ ཨཏྠུདྡྷཱརནཡེནཔི ཏཾ དསྶེཏུཾ ‘‘ཨཔིཙཱ’’ཏིཨཱདི ཝུཏྟཾ། ཡེསུ ནིརཡཱདིབྷེདེསུ ཨུཔཔཏྟིབྷཝེསུ གཏི-སདྡོ ནིརཱུལ༹ྷོ, ཏཏོ ཨཉྙཏྠཱཔི གཏིསདྡཔྤཝཏྟི ཨཏྠི, ཏཾ ཨེཀེན གཏི-སདྡེན ཝིསེསེཏྭཱ ཨཱཧ ‘‘གཏིགཏཱི’’ཏི ཡཐཱ ‘‘དུཀྑདུཀྑཾ, (སཾ॰ ནི॰ ༤.༣༢༧) རཱུཔརཱུཔ’’ནྟི (ཝིསུདྡྷི॰ ༢.༤༤༩) ཙ། ཨུཔྤཱདཱཝཏྠཱཡ གམནཾ ཨུཔགམནནྟི ‘‘ནིབྦཏྟིགཏཱི’’ཏི ཝུཏྟཱ། གཏིནྟི ཙིཏྟགཏིཾ། ཏེནཱཧ ‘‘ཨཛ྄ཛྷཱསཡགཏི ནཱམཱ’’ཏི, ཨཛ྄ཛྷཱསཡཔྤཝཏྟཱིཏི ཨཏྠོ། ཏདཊྛཀཐཱཡཾ (མ॰ ནི॰ ཨཊྛ॰ ༢.༥༠༣) པན ‘‘གཏིནྟི ནིཔྥཏྟི’’ནྟི ཨཏྠོ ཝུཏྟོ། བྲཧྨནིམནྟནསུཏྟེ (མ॰ ནི॰ ༡.༥༠༣) ཧི ཨཡཾ པཱལཱི༹ཏི། ཛུཏིནྟི ཨཱནུབྷཱཝཾ། ཝིབྷཝོཏི ཝིནཱསོ། སོ ཧི ཝིགམོཏི ཨཏྠེན གཏི། ཏེནེཝ ནིབྦཱནཾ ཨརཧཏོ གཏཱིཏི (པརི॰ ༣༣༩) ཨནུཔཱདིསེསནིབྦཱནཾ ཨརཧཏོ གཏི ཝིགམོ ཝིབྷཝོཏི ཨནེཀཏྠཏྟཱ དྷཱཏཱུནཾ། དྭེཡེཝ གཏིཡོཏི དྭེཝ ནིཔྥཏྟིཡོཏི ཨཏྠོཏི ཨཱཧ ‘‘ཨཡཾ ནིཔྥཏྟིགཏི ནཱམཱ’’ཏི།

    153.Gantabbāti upapajjitabbā. Yathā hi kammabhavo paramatthato asatipi kārake paccayasāmaggiyā siddho taṃsamaṅginā santānalakkhaṇena sattena katoti voharīyati, tathā upapattibhavalakkhaṇā gatiyo paramatthato asatipi gamake taṃtaṃkammavasena yesaṃ tāni kammāni, tehi gantabbāti voharīyantīti. Evaṃ saddatthato gatiṃ dassetvā atthuddhāranayenapi taṃ dassetuṃ ‘‘apicā’’tiādi vuttaṃ. Yesu nirayādibhedesu upapattibhavesu gati-saddo nirūḷho, tato aññatthāpi gatisaddappavatti atthi, taṃ ekena gati-saddena visesetvā āha ‘‘gatigatī’’ti yathā ‘‘dukkhadukkhaṃ, (saṃ. ni. 4.327) rūparūpa’’nti (visuddhi. 2.449) ca. Uppādāvatthāya gamanaṃ upagamananti ‘‘nibbattigatī’’ti vuttā. Gatinti cittagatiṃ. Tenāha ‘‘ajjhāsayagati nāmā’’ti, ajjhāsayappavattīti attho. Tadaṭṭhakathāyaṃ (ma. ni. aṭṭha. 2.503) pana ‘‘gatinti nipphatti’’nti attho vutto. Brahmanimantanasutte (ma. ni. 1.503) hi ayaṃ pāḷīti. Jutinti ānubhāvaṃ. Vibhavoti vināso. So hi vigamoti atthena gati. Teneva nibbānaṃ arahato gatīti (pari. 339) anupādisesanibbānaṃ arahato gati vigamo vibhavoti anekatthattā dhātūnaṃ. Dveyeva gatiyoti dveva nipphattiyoti atthoti āha ‘‘ayaṃ nipphattigati nāmā’’ti.

    ཡསྶ ཨུཔྤཛྫཏི, ཏཾ བྲཱུཧེནྟོ ཨེཝ ཨུཔྤཛྫཏཱིཏི ཨཡོ, སུཁཾ། ནཏྠི ཨེཏྠ ཨཡོཏི ནིརཡོ། ཏཏོ ཨེཝ རམིཏབྦཾ ཨསྶཱདེཏབྦཾ ཏཏྠ ནཏྠཱིཏི དསྶེནྟོ ཨཱཧ ‘‘ནིརཏིཨཏྠེན ནིརསྶཱདཊྛེན ནིརཡོ’’ཏི། ཏིརིཡཾ ཨཉྩིཏཱཏི དེཝམནུསྶཱདཡོ ཝིཡ ཨུདྡྷཾ དཱིགྷཱ ཨཧུཏྭཱ ཏིརིཡཾ དཱིགྷཱབྷི ཨཏྠོ། པཀཊྛཏོ སུཁཏོ ཨཡནཾ ཨཔགམོ པེཙྩབྷཱཝོ, ཏཾ པེཙྩབྷཱཝཾ པཏྟཱནཾ ཝིསཡོཏི པེཏཡོནིམེཝ ཝདཏི། མནསོ ཨུསྶནྣཏྟཱཏི སཏིསཱུརབྷཱཝབྲཧྨཙརིཡཡོགྱཏཱདིགུཎཝསེན ཨུཔཙིཏམཱནསཏཱཡ ཨུཀྐཊྛགུཎཙིཏྟཏཱཡཱཏི ཨཏྟོ། ཨཡཾ པནཏྠོ ནིཔྤརིཡཱཡཏོ ཛམྦུདཱིཔཝཱསཱིཝསེན ཝེདིཏབྦོ། ཡཐཱཧ – ‘‘ཏཱིཧི, བྷིཀྑཝེ, ཋཱནེཧི ཛམྦུདཱིཔིཀཱ མནུསྶཱ ཨུཏྟརཀུརུཀེ མནུསྶེ ཨདྷིགྒཎྷནྟི དེཝེ ཙ ཏཱཝཏིཾསེ། ཀཏམེཧི ཏཱིཧི? སཱུརཱ སཏིམནྟོ ཨིདྷ བྲཧྨཙརིཡཝཱསོ’’ཏི (ཨ॰ ནི॰ ༩.༢༡)། ཏེཧི པན སམཱནརཱུཔཱདིཏཱཡ སདྡྷིཾ པརིཏྟདཱིཔཝཱསཱིཧི ཨིཏརམཧཱདཱིཔཝཱསིནོཔི མནུསྶཱཏེཝ པཉྙཱཡིཾསུ། ལོཀིཡཱ པན ‘‘མནུནོ ཨཔཙྩབྷཱཝེན མནུསྶཱ’’ཏི ཝདནྟི། ཨཡམེཏྠ སངྑེཔོ, ཝིཏྠཱརོ པན པརམཏྠདཱིཔནིཡཾ ཝིམཱནཝཏྠུསཾཝཎྞནཱཡཾ (ཝི॰ ཝ॰ ཨཊྛ॰ ༣) ཝུཏྟནཡེན གཧེཏབྦོ། ཨཱནུབྷཱཝེཧཱིཏི དེཝཱནུབྷཱཝསངྑཱཏེཧི ཨིདྡྷིཝིསེསེཧི། ཏཏྠ ཀཱམཱ དེཝཱ ཀཱམགུཎེཧི ཙེཝ ཨིདྡྷིཝིསེསེཧི ཙ ཨིཏརེ ཨིདྡྷིཝིསེསེཧེཝ དིབྦནྟི ཀཱིལ༹ནྟི ཛོཏནྟི, སརཎནྟི ཝཱ གམྨནྟི, ཨབྷིཏྠཝིཡནྟཱིཏི ཝཱ དེཝཱཏི།

    Yassa uppajjati, taṃ brūhento eva uppajjatīti ayo, sukhaṃ. Natthi ettha ayoti nirayo. Tato eva ramitabbaṃ assādetabbaṃ tattha natthīti dassento āha ‘‘niratiatthena nirassādaṭṭhena nirayo’’ti. Tiriyaṃ añcitāti devamanussādayo viya uddhaṃ dīghā ahutvā tiriyaṃ dīghābhi attho. Pakaṭṭhato sukhato ayanaṃ apagamo peccabhāvo, taṃ peccabhāvaṃ pattānaṃ visayoti petayonimeva vadati. Manaso ussannattāti satisūrabhāvabrahmacariyayogyatādiguṇavasena upacitamānasatāya ukkaṭṭhaguṇacittatāyāti atto. Ayaṃ panattho nippariyāyato jambudīpavāsīvasena veditabbo. Yathāha – ‘‘tīhi, bhikkhave, ṭhānehi jambudīpikā manussā uttarakuruke manusse adhiggaṇhanti deve ca tāvatiṃse. Katamehi tīhi? Sūrā satimanto idha brahmacariyavāso’’ti (a. ni. 9.21). Tehi pana samānarūpāditāya saddhiṃ parittadīpavāsīhi itaramahādīpavāsinopi manussāteva paññāyiṃsu. Lokiyā pana ‘‘manuno apaccabhāvena manussā’’ti vadanti. Ayamettha saṅkhepo, vitthāro pana paramatthadīpaniyaṃ vimānavatthusaṃvaṇṇanāyaṃ (vi. va. aṭṭha. 3) vuttanayena gahetabbo. Ānubhāvehīti devānubhāvasaṅkhātehi iddhivisesehi. Tattha kāmā devā kāmaguṇehi ceva iddhivisesehi ca itare iddhiviseseheva dibbanti kīḷanti jotanti, saraṇanti vā gammanti, abhitthaviyantīti vā devāti.

    ཏིརཙྪཱནཡོནིཉྩཱཏིཨཱདཱིསཱུཏི ཨེཏྠ ཏིརཙྪཱནཡོནིཔེཏྟིཝིསཡགྒཧཎེན ཁནྡྷཱནཾ ཨེཝ གཧཎཾ ཏེསཾ ཏཱདིསསྶ པརིཙྪིནྣསྶ ཨོཀཱསསྶ ཨབྷཱཝཏོ། ཡཏྠ ཝཱ ཏེ ཨརཉྙསམུདྡཔབྦཏཱདིཀེ ནིབདྡྷཝཱསཾ ཝསནྟི, ཏཱདིསསྶ ཋཱནསྶ ཝསེན ཨོཀཱསོཔི གཧེཏབྦོ། ནིརཡཱུཔགཱདཱིཧི སཏྟེཧི མགྒིཏབྦཏོ མགྒོ པཊིཔཛྫིཏབྦཱ པཊིཔདཱ ཙཱཏི ཏཾ ཏཾ ཀམྨམེཝ ཝུཏྟནྟི ཨཱཧ ‘‘ཨུབྷཡེནཔཱི’’ཏིཨཱདི། ཡཐཱ ཙ པཊིཔནྣོཏི ཨིམིནཱ ཏསྶ ཀམྨསྶ ཀཏཱུཔཙིཏཱཀཱརམཱཧ། ཨེཏྠ ཙ ནིརཡགཱམིཉྩ མགྒཾ ནིརཡགཱམིནིཉྩ པཊིཔདནྟི ཨིམིནཱ སཱདྷཱརཎཏོ ནིརཡསཾཝཏྟནིཡཾ ཀམྨཾ ཝཏྭཱ པུན ཏཾ ཏཾ སནྟཱནཔཏིཏཏཱཡ ཨསཱདྷཱརཎཏཾ དསྶེཏུཾ ‘‘ཡཐཱཔཊིཔནྣོ’’ཏིཨཱདི ཝུཏྟནྟི དཊྛབྦཾ། ཝིནིཔཏནྟཱིཏི ཝིཝསཱ, ཝིརཱུཔཾ ཝཱ ནིཔཏནྟི། ཀསྨཱ པནེཏྠ པཉྩགཏིཔརིཙྪེདཀཉཱཎཾ དསྶེནྟོ བྷགཝཱ ‘‘ནིབྦཱནཉྩཱཧ’’ནྟིཨཱདིམཱཧཱཏི ཨནུཡོགཾ སནྡྷཱཡཱཧ ‘‘ཨིདཾ པནཱ’’ཏིཨཱདི། ན ཧི བྷགཝཱ ཨཏྟནོ བུདྡྷསུབུདྡྷཏཾ ཝིབྷཱཝེནྟོ སཱཝསེསཾ ཀཏྭཱ དེསནཾ དེསེཏི།

    Tiracchānayoniñcātiādīsūti ettha tiracchānayonipettivisayaggahaṇena khandhānaṃ eva gahaṇaṃ tesaṃ tādisassa paricchinnassa okāsassa abhāvato. Yattha vā te araññasamuddapabbatādike nibaddhavāsaṃ vasanti, tādisassa ṭhānassa vasena okāsopi gahetabbo. Nirayūpagādīhi sattehi maggitabbato maggo paṭipajjitabbā paṭipadā cāti taṃ taṃ kammameva vuttanti āha ‘‘ubhayenapī’’tiādi. Yathā ca paṭipannoti iminā tassa kammassa katūpacitākāramāha. Ettha ca nirayagāmiñca maggaṃ nirayagāminiñca paṭipadanti iminā sādhāraṇato nirayasaṃvattaniyaṃ kammaṃ vatvā puna taṃ taṃ santānapatitatāya asādhāraṇataṃ dassetuṃ ‘‘yathāpaṭipanno’’tiādi vuttanti daṭṭhabbaṃ. Vinipatantīti vivasā, virūpaṃ vā nipatanti. Kasmā panettha pañcagatiparicchedakañāṇaṃ dassento bhagavā ‘‘nibbānañcāha’’ntiādimāhāti anuyogaṃ sandhāyāha ‘‘idaṃ panā’’tiādi. Na hi bhagavā attano buddhasubuddhataṃ vibhāvento sāvasesaṃ katvā desanaṃ deseti.

    པཉྩགཏིཝཎྞནཱ ནིཊྛིཏཱ།

    Pañcagativaṇṇanā niṭṭhitā.

    ཉཱཎཔཝཏྟཱཀཱརཝཎྞནཱ

    Ñāṇapavattākāravaṇṇanā

    ༡༥༤. ཉཱཎཔྤཝཏྟཱཀཱརནྟི ཉཱཎསྶ པཝཏྟིཨཱཀཱརཾ, ཉཱཎསྶ ཝཱ པཝཏྟིཔཀཱརཾ། ཨེཀནྟདུཀྑཱཏི ཨེཀནྟེན དུཀྑཱ ཨཙྩནྟདུཀྑཱ། ཏཱ པན སབྦཀཱལཾ དུཀྑཱ སུཁཱལཡེནཔི ཨསམྨིསྶཱཏི དསྶེནྟོ ཨཱཧ ‘‘ནིཙྩདུཀྑཱ ནིརནྟརདུཀྑཱ’’ཏི། བཧལཱཏི ཨཏནུཀཱ, མཧནྟཱཏི ཨཏྠོ ། ཏིབྦཱཏི ཝཱ ཏིཁིཎཱ། ཁརཱཏི ཀཀྑལཱ༹། ཀཊུཀཱཏི ཝཱ ཨནིཊྛཱ། ཀསྶཏི ཁཎཱིཡཏཱིཏི ཀཱསུ, ཨཱཝཱཊོ། ཀསཱིཡཏི ཙཱིཡཏཱིཏི ཀཱསུ, རཱསི། ཕུནནྟཱིཏི དྭཱིཧི ཧཏྠེཧི ཨངྒཱརཱནི ཨུཀྑིཔིཏྭཱ པཊིཝཱཏཾ ཨོཕུནནྟི, ཏེན ཏེསཾ སཀལསརཱིརཾ ཌཡ྄ཧཏི། ཏེནཱཧ ‘‘པརིདཌྜྷགཏྟཱ’’ཏི། པུརིསཔྤམཱཎཾ པོརིསཾ། ཨེཀཔཐེནེཝཱཏི ཨེཀམགྒབྷཱུཏེནེཝ། ཨནུཀྐམནཱིཡེནཱཏི ཨུཀྐམིཏུཾ ཨཔཀྐམིཏུཾ ཨསཀྐུཎེཡྻེན།

    154.Ñāṇappavattākāranti ñāṇassa pavattiākāraṃ, ñāṇassa vā pavattipakāraṃ. Ekantadukkhāti ekantena dukkhā accantadukkhā. Tā pana sabbakālaṃ dukkhā sukhālayenapi asammissāti dassento āha ‘‘niccadukkhā nirantaradukkhā’’ti. Bahalāti atanukā, mahantāti attho . Tibbāti vā tikhiṇā. Kharāti kakkhaḷā. Kaṭukāti vā aniṭṭhā. Kassati khaṇīyatīti kāsu, āvāṭo. Kasīyati cīyatīti kāsu, rāsi. Phunantīti dvīhi hatthehi aṅgārāni ukkhipitvā paṭivātaṃ ophunanti, tena tesaṃ sakalasarīraṃ ḍayhati. Tenāha ‘‘paridaḍḍhagattā’’ti. Purisappamāṇaṃ porisaṃ. Ekapathenevāti ekamaggabhūteneva. Anukkamanīyenāti ukkamituṃ apakkamituṃ asakkuṇeyyena.

    ནནུ ཙ དིབྦཙཀྑུཉཱཎཾ པཙྩུཔྤནྣཝཎྞཱརམྨཎཾ, ཏེན ཀཐཾ རཱུཔནྟརསམངྒིཾ ནིརཡེ ནིབྦཏྟསཏྟཾ ‘‘ཨཡཾ སོ’’ཏི ཛཱནཱཏཱིཏི ཙོདནཾ སནྡྷཱཡཱཧ ‘‘ཏཏྠ ཀིཉྩཱཔཱི’’ཏིཨཱདི། ཡཐཱཀམྨཱུཔགཉཱཎེན ‘‘ཨཡཾ སོ’’ཏི སལླཀྑེཏི, ཏསྶ པན དིབྦཙཀྑུཨཱནུབྷཱཝེན པཏྟབྦཏྟཱ ‘‘དིབྦཙཀྑུབལཾ ནཱམ ཨེཏནྟི ཝུཏྟཾ།

    Nanu ca dibbacakkhuñāṇaṃ paccuppannavaṇṇārammaṇaṃ, tena kathaṃ rūpantarasamaṅgiṃ niraye nibbattasattaṃ ‘‘ayaṃ so’’ti jānātīti codanaṃ sandhāyāha ‘‘tattha kiñcāpī’’tiādi. Yathākammūpagañāṇena ‘‘ayaṃ so’’ti sallakkheti, tassa pana dibbacakkhuānubhāvena pattabbattā ‘‘dibbacakkhubalaṃ nāma etanti vuttaṃ.

    པུརིམནཡེནེཝཱཏི ‘‘གཱུཐཀཱུཔོ ཝིཡ ཏིརཙྪཱནཡོནི དཊྛབྦཱ’’ཏིཨཱདིནཱ ཨངྒཱརཀཱསུཔམཱཡཾ ཝུཏྟནཡེནེཝ། དུཀྑཱ ཝེདནཱ བཧུལཱ ཨེཏཱསཱུཏི དུཀྑབཧུལཱ། བཧལཔཏྟཔལཱསོཏི ཨཝིརལ༹ཏནུཝིཔུལཔཎྞོ། སུཁཔརིབྷོགཾ མཧཱཔཱསཱདཾ དསྶེཏུཾ ‘‘དཱིགྷཔཱསཱདོ’’ཏི ཝུཏྟཾ ཙཏུརསྶཔཱསཱདཱདཱིནཾ ཁུདྡཀཏྟཱ། ཨུཎྞཱམཡཨཏྠརཎེནཱཏི ཨུཎྞཱམཡལོཧིཏཨཏྠརཎེན། ཨུཏྟརཾ ཨུཔརིབྷཱགཾ ཚཱདེཏཱིཏི ཨུཏྟརཙྪདོ, ཝིཏཱནཾ། ཏཾ པན ལོཧིཏཝིཏཱནཾ ཨིདྷཱདྷིཔྤེཏནྟི ‘‘རཏྟཝིཏཱནེནཱ’’ཏི ཝུཏྟཾ།

    Purimanayenevāti ‘‘gūthakūpo viya tiracchānayoni daṭṭhabbā’’tiādinā aṅgārakāsupamāyaṃ vuttanayeneva. Dukkhā vedanā bahulā etāsūti dukkhabahulā. Bahalapattapalāsoti aviraḷatanuvipulapaṇṇo. Sukhaparibhogaṃ mahāpāsādaṃ dassetuṃ ‘‘dīghapāsādo’’ti vuttaṃ caturassapāsādādīnaṃ khuddakattā. Uṇṇāmayaattharaṇenāti uṇṇāmayalohitaattharaṇena. Uttaraṃ uparibhāgaṃ chādetīti uttaracchado, vitānaṃ. Taṃ pana lohitavitānaṃ idhādhippetanti ‘‘rattavitānenā’’ti vuttaṃ.

    ཨཔརབྷཱགཡོཛནཱཏི པཱལི༹ཡཾ ‘‘ཨཔརེན སམཡེནཱ’’ཏི ཝུཏྟསྶ ཨཔརབྷཱགསྶ ཡོཛནཱ། སཱ པན ཨེཀདེསེན པུརིམབྷཱགེ ཝུཏྟེ ཨེཝ སུཝིཉྙེཡྻཱ ཧོཏཱིཏི ‘‘ཡཐཱ སོ’’ཏིཨཱདིམཱཧ། མགྒཱརུལ༹ྷམེཝཱཏི མགྒཾ ཨུཔགཏམཏྟམེཝ།

    Aparabhāgayojanāti pāḷiyaṃ ‘‘aparena samayenā’’ti vuttassa aparabhāgassa yojanā. Sā pana ekadesena purimabhāge vutte eva suviññeyyā hotīti ‘‘yathā so’’tiādimāha. Maggāruḷhamevāti maggaṃ upagatamattameva.

    ནིཡམཱབྷཱཝཱཏི ‘‘དིབྦཙཀྑུནཱཝ པསྶཏཱི’’ཏི ནིཡམསྶ ཨབྷཱཝཱ། ‘‘དིབྦཙཀྑུནཱཔི པསྶིསྶཏཱི’’ཏི ཨིདཾ ན ཨནུཏྟརསུཁཱནུབྷཝནསྶ དིབྦཙཀྑུགོཙརཏྟཱ ཝུཏྟཾ, ཨནཱགཏསྶ པན ཏསྶ དིབྦཙཀྑུཔརིབྷཎྜབྷཱུཏེན ཨནཱགཏཾསཉཱཎེན དསྶནམེཝཱཏི ཀཱརཎཱུཔཙཱརེན ཝུཏྟཾ། པཱལི༹ཡཾ པན ‘‘ཙེཏསཱ ཙེཏོ པརིཙྩ པཛཱནཱམི’’ཙྩེཝ ཝུཏྟཾ། ‘‘ཨཏྠཏོ པན ནཱནཱ ཧོཏཱི’’ཏི སངྑེཔཏོ ཝུཏྟམཏྠཾ ཝིཝརིཏུཾ ‘‘དེཝལོཀསུཁཾ ཧཱི’’ཏིཨཱདིཾ ཝཏྭཱ ཡཐཱདསྶིཏཨུཔམཱཧིཔི ཨཡམཏྠོ པཱཀཊོ ཨེཝཱཏི དསྶེནྟོ ‘‘ཨུཔམཱཡམྤཱི’’ཏིཨཱདིམཱཧ། གོཏྲབྷུཉཱཎུཔྤཱདཏོ པཊྛཱཡ ནིརོདྷཾ པསྶིཏྭཱ ཨུཔྤནྣམགྒཕལཔཙྩཝེཀྑཎཝསེན ཙེཝ པརཏོ ཕལསམཱཔཏྟིསམཱཔཛྫནཝསེན ཙ ཨརིཡསཱཝཀོ ནིརོདྷེ སཡིཏོ ཝིཡ ཧོཏི ཏདཔསྶཡེནེཝ པཝཏྟནཏོཏི ཨཱཧ ‘‘ནིརོདྷསཡནཝརགཏ’’ནྟི། ཏེནཱཧ ‘‘ནིབྦཱནཱ…པེ॰… པསྶཏཱི’’ཏི།

    Niyamābhāvāti ‘‘dibbacakkhunāva passatī’’ti niyamassa abhāvā. ‘‘Dibbacakkhunāpi passissatī’’ti idaṃ na anuttarasukhānubhavanassa dibbacakkhugocarattā vuttaṃ, anāgatassa pana tassa dibbacakkhuparibhaṇḍabhūtena anāgataṃsañāṇena dassanamevāti kāraṇūpacārena vuttaṃ. Pāḷiyaṃ pana ‘‘cetasā ceto paricca pajānāmi’’cceva vuttaṃ. ‘‘Atthato pana nānā hotī’’ti saṅkhepato vuttamatthaṃ vivarituṃ ‘‘devalokasukhaṃ hī’’tiādiṃ vatvā yathādassitaupamāhipi ayamattho pākaṭo evāti dassento ‘‘upamāyampī’’tiādimāha. Gotrabhuñāṇuppādato paṭṭhāya nirodhaṃ passitvā uppannamaggaphalapaccavekkhaṇavasena ceva parato phalasamāpattisamāpajjanavasena ca ariyasāvako nirodhe sayito viya hoti tadapassayeneva pavattanatoti āha ‘‘nirodhasayanavaragata’’nti. Tenāha ‘‘nibbānā…pe… passatī’’ti.

    ཉཱཎཔཝཏྟཱཀཱརཝཎྞནཱ ནིཊྛིཏཱ།

    Ñāṇapavattākāravaṇṇanā niṭṭhitā.

    དུཀྐརཀཱརིཀཱདིསུདྡྷིཝཎྞནཱ

    Dukkarakārikādisuddhivaṇṇanā

    ༡༥༥. པུཙྪཱནུསནྡྷིཨཱདིཨནུསནྡྷིཏྟཡཏོ ཨཉྙཏྟཱ ‘‘པཱཊིཡེཀྐཾ ཨནུསནྡྷིཝསེནཱ’’ཏི ཝུཏྟཾ། ན ཀེཝལཾ ‘‘དུཀྐརཀཱརིཀཱཡ སུདྡྷི ཧོཏཱི’’ཏི ཨེཝཾལདྡྷིཀོ ཨེཝ, ཨཐ ཁོ དུཀྐརཙཱརཱིསུ ཨབྷིཔྤསནྣོཏི དསྶེཏུཾ ‘‘ཨཔིཙཱ’’ཏིཨཱདི ཝུཏྟཾ། ཙཏུཀུཎྜིཀོཏི དྭཱིཧི པཱདེཧི ཧཏྠེཧཱིཏི ཙཏཱུཧི ཨངྒེཧི ཀུཎྜནཀོ ཨཱཧིཎྜནཀོ། ཚམཱནིཀིཎྞནྟི བྷཱུམིཡཾ ཁིཏྟཾ། བྷཀྑསནྟི ཨཱཧཱརཾ།

    155. Pucchānusandhiādianusandhittayato aññattā ‘‘pāṭiyekkaṃ anusandhivasenā’’ti vuttaṃ. Na kevalaṃ ‘‘dukkarakārikāya suddhi hotī’’ti evaṃladdhiko eva, atha kho dukkaracārīsu abhippasannoti dassetuṃ ‘‘apicā’’tiādi vuttaṃ. Catukuṇḍikoti dvīhi pādehi hatthehīti catūhi aṅgehi kuṇḍanako āhiṇḍanako. Chamānikiṇṇanti bhūmiyaṃ khittaṃ. Bhakkhasanti āhāraṃ.

    མཙྪརིཡམལཱདིཔཱཔདྷམྨཝིགམནཏོ མེཏྟཱདིགུཎཱནུབྲཱུཧནཏོ ཙ བྲཧྨཾ སེཊྛཾ ཙརིཡནྟི བྲཧྨཙརིཡཾ, དཱནཾ། ཏཐཱ ཧི ཏཾ བྷགཝཏཱ པཎྜིཏཔཉྙཏྟཾ ཝུཏྟཾ། ཨེཝཾ སེསེསུཔི ཡཐཱརཧཾ བྲཧྨཙརིཡཔརིཡཱཡོ ནིདྡྷཱརེཏྭཱ ཝཏྟབྦོ། ཀིནྟི ཀཱིདིསཾ། ཝཏནྟི སམཱདིནྣཝཏཾ། སུཙིཎྞསྶཱཏི སུཊྛུ ཙིཎྞསྶ པུཉྙསྶ། ཨིདྡྷཱིཏི ཨཱནུབྷཱཝོ། ཛུཏཱིཏི ཝཏྠཱབྷརཎོབྷཱསསམུཛྫལཱ སརཱིརཔྤབྷཱ། བལཝཱིརིཡཱུཔཔཏྟཱིཏི ཀཱཡབལེན ཙེཝ ཨུསྶཱཧེན ཙ སམནྣཱགམོ།

    Macchariyamalādipāpadhammavigamanato mettādiguṇānubrūhanato ca brahmaṃ seṭṭhaṃ cariyanti brahmacariyaṃ, dānaṃ. Tathā hi taṃ bhagavatā paṇḍitapaññattaṃ vuttaṃ. Evaṃ sesesupi yathārahaṃ brahmacariyapariyāyo niddhāretvā vattabbo. Kinti kīdisaṃ. Vatanti samādinnavataṃ. Suciṇṇassāti suṭṭhu ciṇṇassa puññassa. Iddhīti ānubhāvo. Jutīti vatthābharaṇobhāsasamujjalā sarīrappabhā. Balavīriyūpapattīti kāyabalena ceva ussāhena ca samannāgamo.

    ཏེན པཱཎི ཀཱམདདོཏི ཏེན ཨདྡྷིཀཱནཾ ཨུཔགཙྪནྟཱནཾ ཧཏྠཾ པསཱརེཏྭཱ ཨསཡ྄ཧསེཊྛིནོ དཱནཊྛཱནདསྶནམཡེན པུཉྙེན ཨིདཱནི མཡ྄ཧཾ ཧཏྠོ ཀཔྤརུཀྑོ ཝིཡ ཀཱམདདོ ཨིཙྪིཏིཙྪིཏདཱཡཱི, ཀཱམདདོ ཧོནྟོ ཙ མདྷུསྶཝོ ཨིཊྛཝཏྠུཝིསྶཛྫནཀོ ཛཱཏོ། ཏེན མེ བྲཧྨཙརིཡེནཱཏི ཏེན མམ ཡཐཱཝུཏྟཀཱཡཝེཡྻཱཝཊིཡཀམྨསངྑཱཏེན སེཊྛཙརིཡེན། པུཉྙནྟི པུཉྙཕལཾ། ཏམྤི ཧི པུཛྫསབྷཱཝཏོ, ཨུཏྟརཔདལོཔེན ཝཱ ‘‘ཨེཝམིདཾ པུཉྙཾ པཝཌྜྷཏཱི’’ཏིཨཱདཱིསུ (དཱི॰ ནི॰ ༣.༨༠) ‘‘པུཉྙ’’ནྟི ཝུཙྩཏི།

    Tena pāṇi kāmadadoti tena addhikānaṃ upagacchantānaṃ hatthaṃ pasāretvā asayhaseṭṭhino dānaṭṭhānadassanamayena puññena idāni mayhaṃ hattho kapparukkho viya kāmadado icchiticchitadāyī, kāmadado honto ca madhussavo iṭṭhavatthuvissajjanako jāto. Tena me brahmacariyenāti tena mama yathāvuttakāyaveyyāvaṭiyakammasaṅkhātena seṭṭhacariyena. Puññanti puññaphalaṃ. Tampi hi pujjasabhāvato, uttarapadalopena vā ‘‘evamidaṃ puññaṃ pavaḍḍhatī’’tiādīsu (dī. ni. 3.80) ‘‘puñña’’nti vuccati.

    པཉྩ སིཀྑཱཔདཱནི སམཱཧཊཱནི པཉྩསིཀྑཱཔདཾ ཡཐཱ ‘‘ཏིབྷཝཾ, ཏིསཀཊ’’ནྟི ཙ། བྲཧྨཙརིཡསྨིནྟི དྷམྨདེསནཱཡ། སཱ ཧི ཝིནེཡྻཱནཾ བྲཧྨབྷཱཝཱཝཧནཏོ བྲཧྨཾ སེཊྛཾ ཙརིཡཾ, བྲཧྨུནོ ཝཱ བྷགཝཏོ ཝཱཙསིཀཾ ཙརིཡནྟི ‘‘བྲཧྨཙརིཡ’’ནྟི ཝུཙྩཏི།

    Pañca sikkhāpadāni samāhaṭāni pañcasikkhāpadaṃ yathā ‘‘tibhavaṃ, tisakaṭa’’nti ca. Brahmacariyasminti dhammadesanāya. Sā hi vineyyānaṃ brahmabhāvāvahanato brahmaṃ seṭṭhaṃ cariyaṃ, brahmuno vā bhagavato vācasikaṃ cariyanti ‘‘brahmacariya’’nti vuccati.

    སཧསྶཾ མཙྩུཧཱཡིནནྟི སཧསྶམཏྟཱ ཨརཧཏྟསམདྷིགམེན མཙྩུཝིསཡཱཏིཀྐམེན མཙྩུཔཧཱཡིནོ ཛཱཏཱ། བྲཧྨཙཱརཱི བྷཝིསྶཱམཱཏི ཨེཏྠ ཡེན བྲཧྨཙརིཡེན ཏེ བྲཧྨཙཱརིནོཏི ཝུཙྩནྟི, ཏཾ བྲཧྨཙརིཡཾ ནིདྡྷཱརེཏྭཱ ཨཱཧ ‘‘མེཐུནཝིརཏི བྲཧྨཙརིཡནྟི ཝུཏྟཱ’’ཏི།

    Sahassaṃ maccuhāyinanti sahassamattā arahattasamadhigamena maccuvisayātikkamena maccupahāyino jātā. Brahmacārī bhavissāmāti ettha yena brahmacariyena te brahmacārinoti vuccanti, taṃ brahmacariyaṃ niddhāretvā āha ‘‘methunavirati brahmacariyanti vuttā’’ti.

    ནཱཏིཀྐམཱམཱཏི ན ཨཏིཙརཱམ ཨགམནཱིཡཊྛཱནེཔི ཨིཏརཏྠཱཔི ན ཝཱིཏིཀྐམཱམ། ཏེནཱཧ ‘‘ཨཉྙཏྲ ཏཱཧི བྲཧྨཙརིཡཾ ཙརཱམཱ’’ཏི། ཨམྷནྟི ཨམྷཱཀཾ།

    Nātikkamāmāti na aticarāma agamanīyaṭṭhānepi itaratthāpi na vītikkamāma. Tenāha ‘‘aññatra tāhi brahmacariyaṃ carāmā’’ti. Amhanti amhākaṃ.

    ཨཏྟདམནཝསེནཱཏི ཡཐཱཔཊིཉྙཾ ཨརཧནྟཱནཾ ཨནུཀརཎཱཀཱརེན པཝཏྟཙིཏྟདམནཝསེན, མནཙྪཊྛཱནཾ ཨིནྡྲིཡཱནཾ དམནེནཱཏི ཨཏྠོ། སིཁཱཔྤཏྟསེཊྛཙརིཡཏཱཡ ཨརིཡམགྒོ བྲཧྨཙརིཡཾ། བྲཧྨཾ སེཊྛཾ ཙརཏི ཨེཏེནཱཏི བྲཧྨཙརིཡཾ, སཏྠུསཱསནཾ།

    Attadamanavasenāti yathāpaṭiññaṃ arahantānaṃ anukaraṇākārena pavattacittadamanavasena, manacchaṭṭhānaṃ indriyānaṃ damanenāti attho. Sikhāppattaseṭṭhacariyatāya ariyamaggo brahmacariyaṃ. Brahmaṃ seṭṭhaṃ carati etenāti brahmacariyaṃ, satthusāsanaṃ.

    ཨཏརམཱནཱནནྟི ན ཏརམཱནཱནཾ དེསཀཱལཾ ཨུདིཀྑནྟཱནཾ། ཕལཱསཱཝ སམིཛ྄ཛྷཏཱིཏི སུདུལླབྷཕལེཔི ཨཱསཱ སམྨཱཔཡོགམནྭཱཡ སམིཛ྄ཛྷཏི ཨེཝ། ཝིཔཀྐབྲཧྨཙརིཡོསྨཱིཏི ཝིསེསེན ནིཔྥནྣཔཎཱིཏཛ྄ཛྷཱསཡོ པརིཔུཎྞཨུལཱ༹རམནོརཐོ། སོ ཧི སེཊྛམནོསམཱཙཱརཏཱཡ བྲཧྨཙརིཡཔརིཡཱཡེན ཝུཏྟོ།

    Ataramānānanti na taramānānaṃ desakālaṃ udikkhantānaṃ. Phalāsāva samijjhatīti sudullabhaphalepi āsā sammāpayogamanvāya samijjhati eva. Vipakkabrahmacariyosmīti visesena nipphannapaṇītajjhāsayo paripuṇṇauḷāramanoratho. So hi seṭṭhamanosamācāratāya brahmacariyapariyāyena vutto.

    ཨིདམེཝ སུཏྟཾ ཨཱགཏཊྛཱནནྟི ཨདྷིཔྤཱཡོ ཏེཔིཊཀེ བུདྡྷཝཙནེ ཨིདམེཝ སུཏྟཔདཾ ‘‘ཝཱིརིཡཾ བྲཧྨཙརིཡ’’ནྟི ཨཱགཏཊྛཱནནྟི ཨཏྠོ། ཝཱིརིཡཉྷི ཏསྨིཾ ཝིསཡེ ཨུཏྟམཾ པརམུཀྐཾསགཏཾ ཏཱདིསཙརིཡཱཧེཏུ ཙཱཏི བྲཧྨཙརིཡནྟི ཨིདྷ ཝུཏྟཾ། ཙཏུརངྒསམནྣཱགཏནྟི ཙཏུབྦིདྷདུཀྐརཀིརིཡཱཡ སཱདྷཀསྶ ཙཏུབྦིདྷསྶ ཨཏྟནོ པཝཏྟིཨཱཀཱརསྶ ཝསེན ཙཏུརངྒསམནྣཱགཏཾ།

    Idameva suttaṃ āgataṭṭhānanti adhippāyo tepiṭake buddhavacane idameva suttapadaṃ ‘‘vīriyaṃ brahmacariya’’nti āgataṭṭhānanti attho. Vīriyañhi tasmiṃ visaye uttamaṃ paramukkaṃsagataṃ tādisacariyāhetu cāti brahmacariyanti idha vuttaṃ. Caturaṅgasamannāgatanti catubbidhadukkarakiriyāya sādhakassa catubbidhassa attano pavattiākārassa vasena caturaṅgasamannāgataṃ.

    ཀོཙི ཚིནྣབྷིནྣཔཊཔིལོཏིཀདྷརོ དསནྟཡུཏྟསྶ ཝཏྠསྶ ཨབྷཱཝཏོ ནིཙྩེལོཏི ཝཏྟབྦཏཾ ལབྷེཡྻཱཏི ཏཾ ནིཝཏྟེནྟོ ཨཱཧ ‘‘ནགྒོ’’ཏི། ཨེཝཾ ཨཀཱསིཾ, ཨེཝམྤི སཏྟཔཱིལཱ༹ མཱ ཨཧོསཱིཏི ཨདྷིཔྤཱཡོ། ཡཐཱ ‘‘ཨབྷིཧཊཾ ན སཱདིཡཱམཱི’’ཏིཨཱདི (མ॰ ནི॰ ༡.༡༥༥) བྷིཀྑཱཔརིཡེསནེ ཨུཀྐཊྛཙཱརིཏཱདསྶནཾ, ཨེཝཾ ‘‘ནཨེཧི བྷདྡནྟིཀཱདིབྷཱཝོཔཱི’’ཏི གཧེཏབྦཾ། པུརིསནྟརགཏཱཡཱཏི པུརིསསམཱིཔགཏཱཡ། སཾཀིཏྟཱིཡནྟི ཨེཏཱཡཱཏི སཾཀིཏྟི, གཱམཝཱསིཨཱདཱིཧི སམུདཱཡཝསེན ཀརིཡམཱནཀིརིཡཱ། ཨིདྷ པན བྷཏྟསཾཀིཏྟི ཨདྷིཔྤེཏཱཏི ཨཱཧ ‘‘སཾཀིཏྟེཏྭཱ ཀཏབྷཏྟེསཱུ’’ཏི། དདནྟི ཏཱཡཱཏི དཏྟི། ཨེཀཱཧཾ ཨནྟརབྷཱུཏཾ ཨེཏསྶ ཨཏྠཱིཏི ཨེཀཱཧིཀཾ། ཨེས ནཡོ སེསཔདེསུཔི། ཨེཀཱཧཝཱརེནཱཏི ཨེཀཱཧིཀཝཱརེན། ‘‘ཨེཀཱཧིཀ’’ནྟིཨཱདིནཱ ཝུཏྟཝིདྷིམེཝ པཊིཔཱཊིཡཱ པཝཏྟབྷཱཝཾ དསྶེཏུཾ པུན ཝུཏྟཾ། ཏེནཱཧ ‘‘ཨིཏི ཨེཝརཱུཔ’’ནྟིཨཱདི།

    Koci chinnabhinnapaṭapilotikadharo dasantayuttassa vatthassa abhāvato nicceloti vattabbataṃ labheyyāti taṃ nivattento āha ‘‘naggo’’ti. Evaṃ akāsiṃ, evampi sattapīḷā mā ahosīti adhippāyo. Yathā ‘‘abhihaṭaṃ na sādiyāmī’’tiādi (ma. ni. 1.155) bhikkhāpariyesane ukkaṭṭhacāritādassanaṃ, evaṃ ‘‘naehi bhaddantikādibhāvopī’’ti gahetabbaṃ. Purisantaragatāyāti purisasamīpagatāya. Saṃkittīyanti etāyāti saṃkitti, gāmavāsiādīhi samudāyavasena kariyamānakiriyā. Idha pana bhattasaṃkitti adhippetāti āha ‘‘saṃkittetvā katabhattesū’’ti. Dadanti tāyāti datti. Ekāhaṃ antarabhūtaṃ etassa atthīti ekāhikaṃ. Esa nayo sesapadesupi. Ekāhavārenāti ekāhikavārena. ‘‘Ekāhika’’ntiādinā vuttavidhimeva paṭipāṭiyā pavattabhāvaṃ dassetuṃ puna vuttaṃ. Tenāha ‘‘iti evarūpa’’ntiādi.

    ཨེརཀཏིཎཱདཱིནི ཝཱཏི ཨེརཀཏིཎཱདཱིནི གནྠིཏྭཱ ཀཏནིཝཱསནཱནི ཚཝདུསྶཱནི, ནིཧཱིནདུསྶཱནཱིཏི ཨཏྠོ། ཏནྟཱཝུཏཱནནྟི ཏནྟཾ པསཱརེཏྭཱ ཝཱིཏཱནཾ། པཀཏིཀཎྚཀེཏི སལཱཀཀཎྚཀེ།

    Erakatiṇādīni vāti erakatiṇādīni ganthitvā katanivāsanāni chavadussāni, nihīnadussānīti attho. Tantāvutānanti tantaṃ pasāretvā vītānaṃ. Pakatikaṇṭaketi salākakaṇṭake.

    ༡༥༦. ནེཀཝསྶགཎསཉྫཱཏནྟི ཨནེཀཝསྶསམཱུཧསཉྫཱཏཾ། ནནུ ཙ ཨིདཱནེཝ ‘‘སཱཡཏཏིཡཀམྤི ཨུདཀོརོཧནཱནུཡོགམནུཡུཏྟོ’’ཏི ཝུཏྟཾ, ‘‘ནེཀཝསྶགཎིཀཾ རཛོཛལླཾ ཀཱཡེ སནྣིཙིཏ’’ནྟི ཙ, ཏདུབྷཡཾ ཨེཀསྨིཾ ཀཐཾ སམྦྷཝཏཱིཏི ཨཱཧ ‘‘ཨིདཾ ཨཏྟནོ རཛོཛལླཀཝཏསམཱདཱནཀཱལཾ སནྡྷཱཡ ཝདཏཱི’’ཏི། ཨེཏེནེཝ ‘‘ཨཙེལཀོ ཧོམཱི’’ཏི ཝུཏྟཨཙེལཀཔཊིཉྙཱ, ‘‘སཱཎཱནིཔི དྷཱརེམཱི’’ཏིཨཱདིནཱ ཝུཏྟཚནྣཀཔཊིཉྙཱ, ཏཏྠཱཔི སཱཎ-མསཱཎ-ཚཝདུསྶཱདི-ནིཝཏྠ-པཊིཉྙཱ ཙ ཨཝིརུདྡྷཱཏི དཊྛབྦཱ ཏསྨིཾ ཏསྨིཾ ཀཱལེ ཏཐཱ ཏཐཱ པཊིཔནྣཏྟཱ། ཏེཏི ཨཙེལཀཱ། སངྒྷཱཏནྟི སབྦསོ གྷཱཏཾ། ཏེནཱཧ ‘‘ཝདྷ’’ནྟི། སཱིལཝཱ ནཱམ ནཏྠི ‘‘ཨནབྷིསནྡྷིཀམྤི པཱཔཾ ཧོཏཱི’’ཏི ཨེཝཾ ལདྡྷིཀཏྟཱ། སཱིལཾ ཨདྷིཊྛཱཡཱཏི ཨིདཾ པཊིཀྐམནཀིརིཡཾ སནྡྷཱཡ ཝུཏྟཾ།

    156.Nekavassagaṇasañjātanti anekavassasamūhasañjātaṃ. Nanu ca idāneva ‘‘sāyatatiyakampi udakorohanānuyogamanuyutto’’ti vuttaṃ, ‘‘nekavassagaṇikaṃ rajojallaṃ kāye sannicita’’nti ca, tadubhayaṃ ekasmiṃ kathaṃ sambhavatīti āha ‘‘idaṃ attano rajojallakavatasamādānakālaṃ sandhāya vadatī’’ti. Eteneva ‘‘acelako homī’’ti vuttaacelakapaṭiññā, ‘‘sāṇānipi dhāremī’’tiādinā vuttachannakapaṭiññā, tatthāpi sāṇa-masāṇa-chavadussādi-nivattha-paṭiññā ca aviruddhāti daṭṭhabbā tasmiṃ tasmiṃ kāle tathā tathā paṭipannattā. Teti acelakā. Saṅghātanti sabbaso ghātaṃ. Tenāha ‘‘vadha’’nti. Sīlavā nāma natthi ‘‘anabhisandhikampi pāpaṃ hotī’’ti evaṃ laddhikattā. Sīlaṃ adhiṭṭhāyāti idaṃ paṭikkamanakiriyaṃ sandhāya vuttaṃ.

    པཱསཎྜཔརིགྒཧཎཏྠཱཡཱཏི པཱསཎྜེསུ ཨསཱརསཱརབྷཱཝཝཱིམཾསནཏྠཱཡ། ཏཾ པབྦཛྫནྟི ཨཱཛཱིཝཀཔབྦཛྫཾ། ཝིཀཊབྷོཛནེཏི ཝིཀཏབྷོཛནེ ཝིརཱུཔབྷོཛནེ། ཏེནཱཧ ‘‘ཨཔཀཏིབྷོཛནེ’’ཏི།

    Pāsaṇḍapariggahaṇatthāyāti pāsaṇḍesu asārasārabhāvavīmaṃsanatthāya. Taṃ pabbajjanti ājīvakapabbajjaṃ. Vikaṭabhojaneti vikatabhojane virūpabhojane. Tenāha ‘‘apakatibhojane’’ti.

    ༡༥༧. བྷིཾསནཀཏསྨིནྟི བྷཱཝསཱདྷནབྷཱཝཱི ཨིདཾ པདནྟི ཨཱཧ ‘‘བྷིཾསནཀཏསྨིཾ བྷིཾསནཀཀིརིཡཱཡཱ’’ཏི། ‘‘བྷིཾསནཀཏྟསྨི’’ནྟི ཝཏྟབྦེ ཨེཀསྶ ཏ-ཀཱརསྶ ལོཔོ དཊྛབྦོ། ཡེབྷུཡྻགྒཧཎཾ ལོམཝནྟཝསེནཔི ཡོཛེཏབྦཾ, ན ལོམཝསེནཱཏི ཨཱཧ ‘‘བཧུཏརཱནཾ ཝཱ’’ཏིཨཱདི།

    157.Bhiṃsanakatasminti bhāvasādhanabhāvī idaṃ padanti āha ‘‘bhiṃsanakatasmiṃ bhiṃsanakakiriyāyā’’ti. ‘‘Bhiṃsanakattasmi’’nti vattabbe ekassa ta-kārassa lopo daṭṭhabbo. Yebhuyyaggahaṇaṃ lomavantavasenapi yojetabbaṃ, na lomavasenāti āha ‘‘bahutarānaṃ vā’’tiādi.

    སུ-སདྡེ ཨུ-ཀཱརསྶ ཨོ-ཀཱརཾ ཀཏྭཱ པཱལི༹ཡཾ ‘‘སོཏཏྟོ’’ཏི ཝུཏྟནྟི ཏདཏྠཾ ཝིཝརནྟོ ‘‘སུཏཏྟོ’’ཏི ཨཱཧ། སུཊྛུ ཨཝཏཏྟོཏི ཝཱ སོཏཏྟོ། སོསིནྣོཏི ཨེཏྠཱཔི ཨེསེཝ ནཡོ། སུདྡྷིཝསནཏྠཱཡཱཏི སཾསཱརསུདྡྷིགཝེསནཏྠཱཡ།

    Su-sadde u-kārassa o-kāraṃ katvā pāḷiyaṃ ‘‘sotatto’’ti vuttanti tadatthaṃ vivaranto ‘‘sutatto’’ti āha. Suṭṭhu avatattoti vā sotatto. Sosinnoti etthāpi eseva nayo. Suddhivasanatthāyāti saṃsārasuddhigavesanatthāya.

    ཝིཧཱརསྨིནྟི པཙྩཏྟེ བྷུམྨཝཙནནྟི ཨཱཧ ‘‘ཝིཧཱརོ ཨེཝ ཧི ‘ཝིཧཱརསྨི’ནྟི ཝུཏྟོ’’ཏི། ཏེནེཝ ཙཱཏི ཏེནེཝ ཝིབྷཏྟིཝིཔལླཱསཝསེན། ཨེཝཾ ཨཏྠོཏི ཨཡཾ ཨེཝཾ ལིངྒཝིཔལླཱསཝསེན ཨཏྠོ ཝེདིཏབྦོ། དུཀྑཔྤཏྟོཏི ཨཱནེཏྭཱ སམྦནྡྷོ། སབྦཏྠཱཏི སུཁདུཀྑེ ལཱབྷཱལཱབྷཱདིཀེ ཙ། ཏུལིཏོཏི ཏུལཱསདིསོ།

    Vihārasminti paccatte bhummavacananti āha ‘‘vihāro eva hi ‘vihārasmi’nti vutto’’ti. Teneva cāti teneva vibhattivipallāsavasena. Evaṃ atthoti ayaṃ evaṃ liṅgavipallāsavasena attho veditabbo. Dukkhappattoti ānetvā sambandho. Sabbatthāti sukhadukkhe lābhālābhādike ca. Tulitoti tulāsadiso.

    དུཀྐརཀཱརིཀཱདིསུདྡྷིཝཎྞནཱ ནིཊྛིཏཱ།

    Dukkarakārikādisuddhivaṇṇanā niṭṭhitā.

    ཨཱཧཱརསུདྡྷིཝཎྞནཱ

    Āhārasuddhivaṇṇanā

    ༡༥༨. སུཛ྄ཛྷིཏུནྟི སཾསཱརཏོ སུཛ྄ཛྷིཏུཾ།

    158.Sujjhitunti saṃsārato sujjhituṃ.

    ༡༥༩. ཨཱསཱིཏིཀཔབྦཱནཱིཏི ཨཱསཱིཏིཀཔིཊྛིཔབྦཱནི, ‘‘ཀཱལ༹པབྦཱནཱི’’ཏི ཝདནྟི། པབྦཱནཾ མཛ྄ཛྷེ། ཨུནྣཏུནྣཏཱནཱིཏི མཾསེ མིལཱཏེ དྭིནྣཾ སནྡྷཱིནཾ ཨནྟརེ ཝཱཏེནུདྡྷུམཱཏདྷམནཱིཛཱལཏཱཡ ཨུནྣཏཱནི ཨུནྣཏཱནཱིཏི། ཨཱནིསདནྟི ཨཱནིསདཊྛཱནཾ། ནིསིནྣཊྛཱནནྟི པཾསཱུཧི, ཝཱལིཀཱཧི ཝཱ ནིཙིཏཾ ནིསིནྣཊྛཱནཾ། སརཔོངྑེནཱཏི སརསྶ པོངྑཔྤདེསེན, སརཔོངྑསཉྙིཏེན ཝཱ མགྒེན། ཨཀྐནྟནྟི ཨཀྐནྟཊྛཱནཾ། ཏཀྐགོལི༹ཀསདིསཱནཾ, སརཱིརགྷཾསནཏྠཾ ཀཏ ཀུརུཝིནྡགོལ༹ཀཱནཾ ཝཱ ཨཱཝལི༹ ཝཊྚནཱཧཱརོ། ཝཾསཏོཏི པིཊྛིཝཾསཏོ། མཎྜལེཏི བྷིཏྟིཔཱདཱནཾ མཏྠཀེ ཋཔིཏམཎྜལཀེ སཱིསགྒེན པཏིཊྛཧནྟི། ན ཨེཝཾ ཕཱསུལི༹ཡོཏི ཡཐཱ ཡཐཱ ཝུཏྟགོཔཱནསིཡོ པཔཏཱ ཏིཊྛནྟི, ན ཨེཝཾ བོདྷིསཏྟསྶ ཕཱསུཀཱཔི པཔཏཱ ཋིཏཱ།

    159.Āsītikapabbānīti āsītikapiṭṭhipabbāni, ‘‘kāḷapabbānī’’ti vadanti. Pabbānaṃ majjhe. Unnatunnatānīti maṃse milāte dvinnaṃ sandhīnaṃ antare vātenuddhumātadhamanījālatāya unnatāni unnatānīti. Ānisadanti ānisadaṭṭhānaṃ. Nisinnaṭṭhānanti paṃsūhi, vālikāhi vā nicitaṃ nisinnaṭṭhānaṃ. Sarapoṅkhenāti sarassa poṅkhappadesena, sarapoṅkhasaññitena vā maggena. Akkantanti akkantaṭṭhānaṃ. Takkagoḷikasadisānaṃ, sarīraghaṃsanatthaṃ kata kuruvindagoḷakānaṃ vā āvaḷi vaṭṭanāhāro. Vaṃsatoti piṭṭhivaṃsato. Maṇḍaleti bhittipādānaṃ matthake ṭhapitamaṇḍalake sīsaggena patiṭṭhahanti. Na evaṃ phāsuḷiyoti yathā yathā vuttagopānasiyo papatā tiṭṭhanti, na evaṃ bodhisattassa phāsukāpi papatā ṭhitā.

    ཨོཀྑཱཡིཀཱཏི ཨཝཀྑཱཡིཀཱ, ཧེཊྛཱ ཧུཏྭཱ ནིནྣབྷཱཝེན པཉྙཱཡམཱནཱ། ཨེཝརཱུཔཱཏི ཡཐཱཝུཏྟརཱུཔཱ, ནིནྣཏརཱཏི ཨཏྠོ། ཡཱཝ པིཊྛིཀཎྚཀཾ ཨལླཱིནཱ ཧོཏཱིཏི མཡ྄ཧཾ ཨུདརཙྪཝི ཡཱཝ པིཊྛིཀཎྚཀཾ, ཏཱཝ ཏཾ ཨཱཧཙྩ ཋིཏཏྟཱ ཨལླཱིནཱ ཧོཏི ཨུདརིཡསྶ པརིཀྑཡེན ཨནྟཱནཉྩ སུཊྛུམིལཱཏཏཱཡ། བྷཱརིཡབྷཱརིཡཱཏི གརུཏརཱ། སཧཨུདརཙྪཝིཾ པིཊྛིཀཎྚཀཾ, སཧཔིཊྛིཀཎྚཀཾ ཨུདརཙྪཝིནྟི ཡོཛནཱ། ནེཝ ནིཀྑམཏི ཨཱཧཱརསནྣིསྶཡཨཱཔོདྷཱཏུཡཱ སབྦསོ ཝིསུཀྑཏྟཱ། པཱུཏིམཱུལཱནཱིཏི ལོམམཱུལཱནཾ པརིབྲཱུཧནཀེ མཾསེ ལོཧིཏེ ཙ པརིཀྑཱིཎེ ཏཱནི སུཀྑཱནི ཋཱནཏོ བྷཊྛཱནི ཨབྷཱཝེནེཝ ‘‘པཱུཏིམཱུལཱནཱི’’ཏི ཝུཏྟཱནི། ཏེནཱཧ ‘‘ཏསྶ པནཱ’’ཏིཨཱདི།

    Okkhāyikāti avakkhāyikā, heṭṭhā hutvā ninnabhāvena paññāyamānā. Evarūpāti yathāvuttarūpā, ninnatarāti attho. Yāva piṭṭhikaṇṭakaṃallīnāhotīti mayhaṃ udaracchavi yāva piṭṭhikaṇṭakaṃ, tāva taṃ āhacca ṭhitattā allīnā hoti udariyassa parikkhayena antānañca suṭṭhumilātatāya. Bhāriyabhāriyāti garutarā. Sahaudaracchaviṃ piṭṭhikaṇṭakaṃ, sahapiṭṭhikaṇṭakaṃ udaracchavinti yojanā. Neva nikkhamati āhārasannissayaāpodhātuyā sabbaso visukkhattā. Pūtimūlānīti lomamūlānaṃ paribrūhanake maṃse lohite ca parikkhīṇe tāni sukkhāni ṭhānato bhaṭṭhāni abhāveneva ‘‘pūtimūlānī’’ti vuttāni. Tenāha ‘‘tassa panā’’tiādi.

    ཨདྷིགཏཱཏི ཨིདཱནི ཨདྷིགཏཱ། ཡཐཱ ཨེཏརཧི ཝིཔསྶནཱཔཉྙཱཡ ཨདྷིགཏཏྟཱཏི ཨིམིནཱ ཀིཉྩཱཔི མཧཱབོདྷིསཏྟཱ པརིཔཱཀགཏཉཱཎཱ ཝསཱིབྷཱུཏཛ྄ཛྷཱནཱབྷིཉྙཱ ཝིཔསྶནཱཡ པརིཀམྨཾ ཀརོནྟི, ཡཐཱ ཙ ནེསཾ ཙརིམབྷཝེ ཝིཔསྶནཱཙཱརོ, ན ཏཐཱ ཏདཱཏི དསྶེཏི། ཨེཏདེཝཱཏི ཡཾ ཡེན ཝུཏྟཾ ཨཏྠཛཱཏཾ, ཨེཏདེཝ ཨེཏྠ ཨེཏསྨིཾ པཱཋཔདེསེ ཡུཏྟཾ པུབྦེནཱཔརཾ ཨཝིརུཛ྄ཛྷནཏོ། ཨིཏརཐཱཏི བྷིཀྑཱུཧི ཝུཏྟཔྤཀཱརེན ཨནནུརཱུཔོ སིཡཱ ‘‘ཨིམིསྶཱ’’ཏི ཝུཏྟཱཡ ཨཉྙཏྟེ།

    Adhigatāti idāni adhigatā. Yathā etarahi vipassanāpaññāya adhigatattāti iminā kiñcāpi mahābodhisattā paripākagatañāṇā vasībhūtajjhānābhiññā vipassanāya parikammaṃ karonti, yathā ca nesaṃ carimabhave vipassanācāro, na tathā tadāti dasseti. Etadevāti yaṃ yena vuttaṃ atthajātaṃ, etadeva ettha etasmiṃ pāṭhapadese yuttaṃ pubbenāparaṃ avirujjhanato. Itarathāti bhikkhūhi vuttappakārena ananurūpo siyā ‘‘imissā’’ti vuttāya aññatte.

    ཨཱཧཱརསུདྡྷིཝཎྞནཱ ནིཊྛིཏཱ།

    Āhārasuddhivaṇṇanā niṭṭhitā.

    སཾསཱརསུདྡྷིཨཱདིཝཎྞནཱ

    Saṃsārasuddhiādivaṇṇanā

    ༡༦༠. སཾསཱརེནཱཏི ཨཔརཱཔརཾ ཙཝནུཔཔཛྫནཝསེན བྷཝེསུ སཾསརཎེན། ཡཾ སནྡྷཱཡ ཝུཏྟཾ –

    160.Saṃsārenāti aparāparaṃ cavanupapajjanavasena bhavesu saṃsaraṇena. Yaṃ sandhāya vuttaṃ –

    ‘‘ཁནྡྷཱནཉྩ པཊིཔཱཊི, དྷཱཏུཨཱཡཏནཱན ཙ།

    ‘‘Khandhānañca paṭipāṭi, dhātuāyatanāna ca;

    ཨབྦོཙྪིནྣཾ ཝཏྟམཱནཱ, སཾསཱརོཏི པཝུཙྩཏཱི’’ཏི༎ (ཝིསུདྡྷི॰ ༢.༦༡༩; དཱི॰ ནི॰ ཨཊྛ॰ ༢.༩༥; སཾ॰ ནི॰ ཨཊྛ॰ ༢.༢.༦༠; ཨ॰ ནི॰ ཨཊྛ॰ ༢.༤.༡༩༩; དྷ॰ ས॰ ཨཊྛ॰ ནིདཱནཀཐཱ; ཝིབྷ॰ ཨཊྛ॰ ༢༢༦; སུ॰ ནི॰ ཨཊྛ॰ ༢.༥༢༣; ཨུདཱ॰ ཨཊྛ॰ ༣༩; ཨིཏིཝུ॰ ཨཊྛ॰ ༡༤, ༥༨; ཐེརགཱ॰ ཨཊྛ॰ ༡.༦༧, ༩༩; བུ॰ ཝཾ॰ ཨཊྛ॰ ༥༨; ཙཱུལ༹ནི॰ ཨཊྛ॰ ༦; པཊི॰ མ॰ ཨཊྛ॰ ༢.༡.༡༡༧; ཝིསུདྡྷི॰ མཧཱཊཱི॰ ༡.༡༢༧; ཨ॰ ནི॰ ཊཱི॰ ༢.༤.༩; སཱརཏྠ॰ ཊཱི॰ ༡.༡)།

    Abbocchinnaṃ vattamānā, saṃsāroti pavuccatī’’ti. (visuddhi. 2.619; dī. ni. aṭṭha. 2.95; saṃ. ni. aṭṭha. 2.2.60; a. ni. aṭṭha. 2.4.199; dha. sa. aṭṭha. nidānakathā; vibha. aṭṭha. 226; su. ni. aṭṭha. 2.523; udā. aṭṭha. 39; itivu. aṭṭha. 14, 58; theragā. aṭṭha. 1.67, 99; bu. vaṃ. aṭṭha. 58; cūḷani. aṭṭha. 6; paṭi. ma. aṭṭha. 2.1.117; visuddhi. mahāṭī. 1.127; a. ni. ṭī. 2.4.9; sārattha. ṭī. 1.1);

    བཧུཀནྟི བཧུཀཱལཾ བཧུཀྑཏྟུཾ། ཨུཔཔཛྫིཏྭཱཏི ཏཏྠ ཏཏྠ བྷཝེ ནིབྦཏྟིཏྭཱ། ཨཱཝཱསེནཱཏི ཏསྨིཾ ཏསྨིཾ སཏྟཱཝཱསེ ཨཱཝསནེན ནིབྦཏྟིཏྭཱ ཛཱིཝནེན། ཁནྡྷཱཡེཝ ཝུཏྟཱ ཏེསཾཡེཝ པཝཏྟིཝིསེསསྶ ཏེན ཏེན པརིཡཱཡེན ཝུཏྟཏྟཱ། བཧུཡཱགེཏི ཨཛསཱུཀརགོམཱཡྭཱདིཀེ བཧུཝིདྷེ མཧཱཡཉྙེ། བཧུཨགྒཱིཏི ཝཱཙཱཔེཡྻཱདིཝསེན ཨནྟམསོ པཱཀཡཉྙཱདིཝསེན ཙ བཧུཀེཔི ཨགྒཱི པརིཙརཎེན།

    Bahukanti bahukālaṃ bahukkhattuṃ. Upapajjitvāti tattha tattha bhave nibbattitvā. Āvāsenāti tasmiṃ tasmiṃ sattāvāse āvasanena nibbattitvā jīvanena. Khandhāyeva vuttā tesaṃyeva pavattivisesassa tena tena pariyāyena vuttattā. Bahuyāgeti ajasūkaragomāyvādike bahuvidhe mahāyaññe. Bahuaggīti vācāpeyyādivasena antamaso pākayaññādivasena ca bahukepi aggī paricaraṇena.

    ༡༦༡. བཱལདཱརཀོཔི ‘‘དཧརོ’’ཏི ཝུཙྩཏཱིཏི ཏཏོ ཝིསེསནཏྠཾ ‘‘ཡུཝཱ’’ཏི ཝུཏྟཾ། ཨཏིཀྐནྟཔཋམཝཡཱ སཏྟཱ སབྷཱཝེན པལིཏསིརཱ ཧོནྟཱིཏི པཋམཝཡེ ཋིཏབྷཱཝཾ དསྶེཏུཾ ‘‘སུསུཀཱལ༹ཀེསོ’’ཏི ཝུཏྟཾ། ཛརཱཛིཎྞོཏི ཛརཱཡ ཛིཎྞོ, ན ཨཀཱལིཀེན ཛརཱཡ ཨབྷིབྷཱུཏོ། ཨུཀྐཾསགཏབུདྡྷཏཱཡ ཝུདྡྷོ། ཏེནཱཧ ‘‘ཝཌྜྷིཏྭཱ ཋིཏཨངྒཔཙྩངྒོ’’ཏི, ཨཱརོཧཔརིཎཱཧཝསེན ཝུདྡྷིརཧིཏོཏི ཨཏྠོ། ཛཱཏིམཧལླཀོཏི ཛཱཏིཡཱ མཧལླཀོ, ན བྷོགཔརིཝཱརཱདཱིཧཱིཏི ཨཏྠོ། ཨདྡྷགཏོཏི ཨེཏྠ ཨདྡྷ-སདྡོ དཱིགྷཀཱལཝཱཙཱིཏི ཨཱཧ ‘‘བཧུཨདྡྷཱནཾ གཏོ’’ཏི། ཝཡོཏིཨཱདིཔདལོཔེནཱཡཾ ནིདྡེསོཏི ཨཱཧ ‘‘པཙྪིམཝཡ’’ནྟི། པདསཏམྤི…པེ॰… སམཏྠཏཱཏི པདསཏམྤི པདསཧསྶམྤི སོཏཔཐམཱགཙྪནྟམེཝ ཨུགྒཧཎསམཏྠཏཱ པརིགྒཧེཏུཾ སམཏྠཏཱ། ཨཡཉྩ གཏིཡཱ བྱཱཔཱརོཏི སཀྐཱ ཝིཉྙཱཏུཾ གཧཎམཏྟབྷཱཝཏོ། ཏདེཝཱཏི པདསཏམྤི པདསཧསྶམྤི། ཨཱདྷཱརཎཾ ཨཔིལཱཔནཝསེན ཧདཡེ དྷཱརཎཾ། ཨུཔནིབནྡྷནཾ ཡཐཱ ན པམུཊྛཾ ཧོཏི, ཏཐཱ ཨུཔེཙྩ ཨཔརཱཔརཾ ནིབནྡྷནཾ། ཨཡཾ པན སཏིཡཱ བྱཱཔཱརོཏི སཀྐཱ ཝིཉྙཱཏུཾ། པཱལི༹ཡཉྩ ‘‘པརམཱཡ གཏིཡཱ ཙ སཏིཡཱ ཙ དྷིཏིཡཱ ཙཱ’’ཏི ཝུཏྟཾ, པརཏོ ཙ ‘‘ཨེཝཾ ཨདྷིམཏྟགཏིམནྟོ’’ཏི ཝུཏྟཾ། སམཏྠཝཱིརིཡཾ དྷིཏི ནཱམཱཏི ཝིསིཊྛཝིསཡཾ དསྶེནྟོ ཡཐཱཝུཏྟསཏིསམཱཡོགཾ ཏསྶ དཱིཔེཏི། ཏསྶཱཏི ཡཐཱཝུཏྟགཏིསཏིདྷིཏཱིཧི སུབྷདྷཱཏཝཙཱིཔརིཙིཏསྶ པརིཡཏྟིདྷམྨསྶ ཨཱགམཝསེན ཨཏྠདསྶནསམཏྠཏཱ ཡུཏྟིཝསེན ཀཱརཎདསྶནསམཏྠཏཱ།

    161. Bāladārakopi ‘‘daharo’’ti vuccatīti tato visesanatthaṃ ‘‘yuvā’’ti vuttaṃ. Atikkantapaṭhamavayā sattā sabhāvena palitasirā hontīti paṭhamavaye ṭhitabhāvaṃ dassetuṃ ‘‘susukāḷakeso’’ti vuttaṃ. Jarājiṇṇoti jarāya jiṇṇo, na akālikena jarāya abhibhūto. Ukkaṃsagatabuddhatāya vuddho. Tenāha ‘‘vaḍḍhitvā ṭhitaaṅgapaccaṅgo’’ti, ārohapariṇāhavasena vuddhirahitoti attho. Jātimahallakoti jātiyā mahallako, na bhogaparivārādīhīti attho. Addhagatoti ettha addha-saddo dīghakālavācīti āha ‘‘bahuaddhānaṃ gato’’ti. Vayotiādipadalopenāyaṃ niddesoti āha ‘‘pacchimavaya’’nti. Padasatampi…pe… samatthatāti padasatampi padasahassampi sotapathamāgacchantameva uggahaṇasamatthatā pariggahetuṃ samatthatā. Ayañca gatiyā byāpāroti sakkā viññātuṃ gahaṇamattabhāvato. Tadevāti padasatampi padasahassampi. Ādhāraṇaṃ apilāpanavasena hadaye dhāraṇaṃ. Upanibandhanaṃ yathā na pamuṭṭhaṃ hoti, tathā upecca aparāparaṃ nibandhanaṃ. Ayaṃ pana satiyā byāpāroti sakkā viññātuṃ. Pāḷiyañca ‘‘paramāya gatiyā ca satiyā ca dhitiyā cā’’ti vuttaṃ, parato ca ‘‘evaṃ adhimattagatimanto’’ti vuttaṃ. Samatthavīriyaṃ dhiti nāmāti visiṭṭhavisayaṃ dassento yathāvuttasatisamāyogaṃ tassa dīpeti. Tassāti yathāvuttagatisatidhitīhi subhadhātavacīparicitassa pariyattidhammassa āgamavasena atthadassanasamatthatā yuttivasena kāraṇadassanasamatthatā.

    དལ༹ྷཾ (ཨ॰ ནི॰ ཊཱི॰ ༣.༩.༣༨) ཐིརཾ དྷནུ ཨེཏསྶཱཏི དལ༹ྷདྷནྭཱ, སོ ཨེཝ ཨིདྷ ‘‘དལ༹ྷདྷམྨཱ’’ཏི ཝུཏྟོ། པཊིསཏྟུཝིདྷམནཏྠཾ དྷནུཾ གཎྷཱཏཱིཏི དྷནུགྒཧོ, སོ ཨེཝ ཨུསུཾ སརཾ ཨསཏི ཁིཔཏཱིཏི ཨིསྶཱསོཏི ཨཱཧ ‘‘དྷནུཾ གཧེཏྭཱ ཋིཏོ ཨིསྶཱསོ’’ཏི། དྭིསཧསྶཔལཾ ལོཧཱདིབྷཱརཾ ཝཧིཏུཾ སམཏྠཾ དྭིསཧསྶཐཱམཾ། ཏེནཱཧ ‘‘དྭིསཧསྶཐཱམཾ ནཱམཱ’’ཏིཨཱདི། དཎྜེཏི དྷནུདཎྜེ། ཡཱཝ ཀཎྜཔྤམཱཎཱཏི དཱིགྷཏོ ཡཏྟཀཾ ཀཎྜསྶ པམཱཎཾ, ཏཏྟཀེ དྷནུདཎྜེ ཨུཀྑིཏྟམཏྟེ ཨཱརོཔིཏོ ཙེཝ ཧོཏི ཛིཡཱདཎྜོ, སོ ཙ བྷཱརོ པཐཝིཏོ མུཙྩཏི, ཨེཝཾ ཨིདཾ ‘‘དྭིསཧསྶཐཱམཾ ནཱམ དྷནཱུཏི དཊྛབྦཾ། ཨུགྒཧིཏསིཔྤོཏི ཨུགྒཧིཏདྷནུསིཔྤོ། ཀཏཧཏྠོཏི ཐིརཏརཾ ལཀྑེསུ ཨཝིརཛ྄ཛྷནསརཀྑེཔོ། ཨཱིདིསོ པན ཏཏྠ ཝསཱིབྷཱུཏོ ཀཏཧཏྠོ ནཱམ ཧོཏཱིཏི ཨཱཧ ‘‘ཙིཎྞཝསཱིབྷཱཝོ’’ཏི། ཀཏཾ རཱཛཀུལཱདཱིསུ ཨུཔེཙྩ ཨསནཾ ཨེཏེན སོ ཀཏཱུཔཱསནོཏི ཨཱཧ ‘‘རཱཛཀུལཱདཱིསུ དསྶིཏསིཔྤོ’’ཏི། ཨེཝཾ ཀཏནྟི ཨེཝཾ ཨནྟོསུསིརཀརཎཱདིནཱ སལླཧུཀཾ ཀཏཾ།

    Daḷhaṃ (a. ni. ṭī. 3.9.38) thiraṃ dhanu etassāti daḷhadhanvā, so eva idha ‘‘daḷhadhammā’’ti vutto. Paṭisattuvidhamanatthaṃ dhanuṃ gaṇhātīti dhanuggaho, so eva usuṃ saraṃ asati khipatīti issāsoti āha ‘‘dhanuṃ gahetvā ṭhito issāso’’ti. Dvisahassapalaṃ lohādibhāraṃ vahituṃ samatthaṃ dvisahassathāmaṃ. Tenāha ‘‘dvisahassathāmaṃ nāmā’’tiādi. Daṇḍeti dhanudaṇḍe. Yāva kaṇḍappamāṇāti dīghato yattakaṃ kaṇḍassa pamāṇaṃ, tattake dhanudaṇḍe ukkhittamatte āropito ceva hoti jiyādaṇḍo, so ca bhāro pathavito muccati, evaṃ idaṃ ‘‘dvisahassathāmaṃ nāma dhanūti daṭṭhabbaṃ. Uggahitasippoti uggahitadhanusippo. Katahatthoti thirataraṃ lakkhesu avirajjhanasarakkhepo. Īdiso pana tattha vasībhūto katahattho nāma hotīti āha ‘‘ciṇṇavasībhāvo’’ti. Kataṃ rājakulādīsu upecca asanaṃ etena so katūpāsanoti āha ‘‘rājakulādīsu dassitasippo’’ti. Evaṃ katanti evaṃ antosusirakaraṇādinā sallahukaṃ kataṃ.

    ཨོལོཀེཏཱིཏི ཨུདིཀྑཏི། ཨེཝཾ སནྟེཔི ཏེསཾ ཝཱརོ པཉྙཱཡཏཱིཏི ཏེསཾ བྷིཀྑཱུནཾ ‘‘ཨཡཾ པཋམཾ པུཙྪཏི, ཨཡཾ དུཏིཡ’’ནྟིཨཱདིནཱ པུཙྪནཝཱརོ ཏཱདིསསྶ པཉྙཝཏོ པཉྙཱཡཏི སུཁུམསྶ ཨནྟརསྶ ལབྦྷནཏོ། བུདྡྷཱནཾ པན ཝཱརོཏི ཨཱིདིསེ ཋཱནེ བུདྡྷཱནཾ དེསནཱཝཱརོ ཨཉྙེསཾ ནཔཉྙཱཡནཏོ བུདྡྷཱནཾཡེཝ པཉྙཱཡཏི། ཨིདཱནི ཏམེཝ པཉྙཱཡནཏཾ ཡུཏྟིཏོ དསྶེནྟོ ‘‘ཝིདཏྠིཙཏུརངྒུལཚཱཡ’’ནྟིཨཱདིམཱཧ། ཨཙྪརཱསངྒྷཱཊམཏྟེ ཁཎེ ཨནེཀ-ཀོཊིསཧསྶ-ཙིཏྟཔཝཏྟིསམྦྷཝཏོ ‘‘ཝིདཏྠིཙཏུརངྒུལཚཱཡཾ ཨཏིཀྐམནཏོ པུརེཏརཾཡེཝ བྷགཝཱ…པེ॰… ཀཐེཏཱི’’ཏི ཝཏྭཱ ཏཏོ ལཧུཏརཱཔི སཏྠུ དེསནཱཔཝཏྟི ཨཏྠེཝཱཏི དསྶེནྟོ ‘‘ཏིཊྛནྟུ ཝཱ ཏཱཝ ཨེཏེ’’ཏིཨཱདིམཱཧ། ཨིདཱནི ཏཏྠ ཀཱརཎཾ དསྶེཏུཾ ‘‘ཀསྨཱ’’ཏིཨཱདི ཝུཏྟཾ། སོལ༹ས པདཱནི ཀཐེཏཱིཏི ཨེཏེན ལོཀིཡཛནསྶ ཨེཀཔདུཙྩཱརཎཀྑཎེ བྷགཝཱ ཨཊྛཝཱིསསཏཔདཱནི ཀཐེཏཱིཏི དསྶེཏི། ཨིདཱནི ཏསྶཔི ཀཱརཎཾ དསྶེཏུཾ ‘‘ཀསྨཱ’’ཏིཨཱདི ཝུཏྟཾ།

    Oloketīti udikkhati. Evaṃ santepi tesaṃ vāro paññāyatīti tesaṃ bhikkhūnaṃ ‘‘ayaṃ paṭhamaṃ pucchati, ayaṃ dutiya’’ntiādinā pucchanavāro tādisassa paññavato paññāyati sukhumassa antarassa labbhanato. Buddhānaṃ pana vāroti īdise ṭhāne buddhānaṃ desanāvāro aññesaṃ napaññāyanato buddhānaṃyeva paññāyati. Idāni tameva paññāyanataṃ yuttito dassento ‘‘vidatthicaturaṅgulachāya’’ntiādimāha. Accharāsaṅghāṭamatte khaṇe aneka-koṭisahassa-cittapavattisambhavato ‘‘vidatthicaturaṅgulachāyaṃ atikkamanato puretaraṃyeva bhagavā…pe… kathetī’’ti vatvā tato lahutarāpi satthu desanāpavatti atthevāti dassento ‘‘tiṭṭhantu vā tāva ete’’tiādimāha. Idāni tattha kāraṇaṃ dassetuṃ ‘‘kasmā’’tiādi vuttaṃ. Soḷasa padāni kathetīti etena lokiyajanassa ekapaduccāraṇakkhaṇe bhagavā aṭṭhavīsasatapadāni kathetīti dasseti. Idāni tassapi kāraṇaṃ dassetuṃ ‘‘kasmā’’tiādi vuttaṃ.

    དྷམྨོཏི པཱལི༹། པཛྫཏི ཨཏྠོ ཨེཏེནཱཏི པདཾ, ཏདཏྠོ། ཨཏྠཾ བྱཉྫེཏཱིཏི བྱཉྫནཾ, ཨཀྑརཾ། ཏཉྷི པདཝཱཀྱཀྑརབྷཱཝེཧི པརིཙྪིཛྫམཱནཾ ཏཾ ཏཾ ཨཏྠཾ བྱཉྫེཏི པཀཱསེཏི། ཏེནཱཧ ‘‘དྷམྨཔདབྱཉྫནནྟི པཱལི༹ཡཱ པདབྱཉྫནཾ, ཏསྶ ཏསྶ ཨཏྠསྶ བྱཉྫནཀཾ ཨཀྑར’’ནྟི། ཨེཏེན ཨཔརཱཔརེཧི པདབྱཉྫནེཧི སུཙིརམྤི ཀཱལཾ ཀཐེནྟསྶ ཏཐཱགཏསྶ ན ཀདཱཙི ཏེསཾ པརིཡཱདཱནཾ ཨཏྠཱིཏི དསྶེཏི། པཉྷཾ བྱཱཀརོནྟི ཨེཏེནཱཏི པཉྷབྱཱཀརཎཾ, ཏཐཱཔཝཏྟཔཊིབྷཱནཾ། ཨཔརིཀྑཡཔཊིབྷཱནཱ ཧི བུདྡྷཱ བྷགཝནྟོ, ཡཏོ ཝུཏྟཾ ‘‘ནཏྠི དྷམྨདེསནཱཡ ཧཱནཱི’’ཏི (དཱི॰ ནི॰ ཊཱི॰ ༣.༡༤༡, ༣༠༥; ཝིབྷ॰ མཱུལཊཱི॰ ༡.སུཏྟནྟབྷཱཛནཱིཡཝཎྞནཱ)། ཏེནཱཧ ‘‘ཨིམིནཱ ཀིཾ དསྶེཏཱི’’ཏིཨཱདི། ཏཐཱ ཨཱསནྣཔརིནིབྦཱནསྶཔི བྷགཝཏོ དེསནཱཡ ཨིཏརཱཡ ཙ ཝིསེསཱཏཱཝོཏི པཋམབུདྡྷཝཙནམྤི མཛ྄ཛྷིམབུདྡྷཝཙནམྤི པཙྪིམབུདྡྷཝཙནམྤི སདིསམེཝ། ཨཱསཱིཏིཀཝསྶཏོ པརཾ པཉྩམོ ཨཱཡུཀོཊྛཱསོ།

    Dhammoti pāḷi. Pajjati attho etenāti padaṃ, tadattho. Atthaṃ byañjetīti byañjanaṃ, akkharaṃ. Tañhi padavākyakkharabhāvehi paricchijjamānaṃ taṃ taṃ atthaṃ byañjeti pakāseti. Tenāha ‘‘dhammapadabyañjananti pāḷiyā padabyañjanaṃ, tassa tassa atthassa byañjanakaṃ akkhara’’nti. Etena aparāparehi padabyañjanehi sucirampi kālaṃ kathentassa tathāgatassa na kadāci tesaṃ pariyādānaṃ atthīti dasseti. Pañhaṃ byākaronti etenāti pañhabyākaraṇaṃ, tathāpavattapaṭibhānaṃ. Aparikkhayapaṭibhānā hi buddhā bhagavanto, yato vuttaṃ ‘‘natthi dhammadesanāya hānī’’ti (dī. ni. ṭī. 3.141, 305; vibha. mūlaṭī. 1.suttantabhājanīyavaṇṇanā). Tenāha ‘‘iminā kiṃ dassetī’’tiādi. Tathā āsannaparinibbānassapi bhagavato desanāya itarāya ca visesātāvoti paṭhamabuddhavacanampi majjhimabuddhavacanampi pacchimabuddhavacanampi sadisameva. Āsītikavassato paraṃ pañcamo āyukoṭṭhāso.

    ༡༦༢. ཀཱམཉྩེཏྠ བྷགཝཏཱ ནཱགསམཱལཏྠེརསྶ ཨཙྪརིཡཨབྦྷུཏཔཝེདནམུཁེན ཨཏྟནོ ལོམཱནཾ ཧཊྛབྷཱཝསྶ པཝེདིཏཏྟཱ ‘‘ལོམཧཾསནཔརིཡཱཡོ’’ཏི ནཱམཾ གཧིཏཾ, ཏཐཱཔི སབྦཉྙུཏཉྙཱཎཱདི-ཨནཉྙསཱདྷཱརཎཉཱཎཱནུབྷཱཝ-ཝིབྷཱཝནཱདིཝསེན སོལ༹སསམཱུཧཏོ སཱིཧནཱདསྶ ནདནེན དེསནཱཡ པཝཏྟིཏཏྟཱ ‘‘མཧཱསཱིཧནཱདོ’’ཏྭེཝ སངྒཱིཏིཀཱརམཧཱཐེརེཧི ནཱམཾ ཋཔིཏནྟི དཊྛབྦཾ།

    162. Kāmañcettha bhagavatā nāgasamālattherassa acchariyaabbhutapavedanamukhena attano lomānaṃ haṭṭhabhāvassa paveditattā ‘‘lomahaṃsanapariyāyo’’ti nāmaṃ gahitaṃ, tathāpi sabbaññutaññāṇādi-anaññasādhāraṇañāṇānubhāva-vibhāvanādivasena soḷasasamūhato sīhanādassa nadanena desanāya pavattitattā ‘‘mahāsīhanādo’’tveva saṅgītikāramahātherehi nāmaṃ ṭhapitanti daṭṭhabbaṃ.

    མཧཱསཱིཧནཱདསུཏྟཝཎྞནཱཡ ལཱིནཏྠཔྤཀཱསནཱ སམཏྟཱ།

    Mahāsīhanādasuttavaṇṇanāya līnatthappakāsanā samattā.




    Next: ༣. མཧཱདུཀྑཀྑནྡྷསུཏྟཝཎྞནཱ • 3. Mahādukkhakkhandhasuttavaṇṇanā




    Related texts:



    ཏིཔིཊཀ (མཱུལ) • Tipiṭaka (Mūla) / སུཏྟཔིཊཀ • Suttapiṭaka / མཛྫྷིམནིཀཱཡ • Majjhimanikāya / ༢. མཧཱསཱིཧནཱདསུཏྟཾ • 2. Mahāsīhanādasuttaṃ

    ཨཊྛཀཐཱ • Aṭṭhakathā / སུཏྟཔིཊཀ (ཨཊྛཀཐཱ) • Suttapiṭaka (aṭṭhakathā) / མཛྫྷིམནིཀཱཡ (ཨཊྛཀཐཱ) • Majjhimanikāya (aṭṭhakathā) / ༢. མཧཱསཱིཧནཱདསུཏྟཝཎྞནཱ • 2. Mahāsīhanādasuttavaṇṇanā


    © 1991-2023 The Titi Tudorancea Bulletin | Titi Tudorancea® is a Registered Trademark | Terms of use and privacy policy
    Contact