Library / Tipiṭaka / තිපිටක • Tipiṭaka / චරියාපිටකපාළි • Cariyāpiṭakapāḷi |
4. මහාසුදස්සනචරියා
4. Mahāsudassanacariyā
28.
28.
‘‘කුසාවතිම්හි නගරෙ, යදා ආසිං මහීපති;
‘‘Kusāvatimhi nagare, yadā āsiṃ mahīpati;
මහාසුදස්සනො නාම, චක්කවත්තී මහබ්බලො.
Mahāsudassano nāma, cakkavattī mahabbalo.
29.
29.
‘‘තත්ථාහං දිවසෙ තික්ඛත්තුං, ඝොසාපෙමි තහිං තහිං;
‘‘Tatthāhaṃ divase tikkhattuṃ, ghosāpemi tahiṃ tahiṃ;
‘කො කිං ඉච්ඡති පත්ථෙති, කස්ස කිං දීයතූ ධනං.
‘Ko kiṃ icchati pattheti, kassa kiṃ dīyatū dhanaṃ.
30.
30.
‘‘‘කො ඡාතකො කො තසිතො, කො මාලං කො විලෙපනං;
‘‘‘Ko chātako ko tasito, ko mālaṃ ko vilepanaṃ;
නානාරත්තානි වත්ථානි, කො නග්ගො පරිදහිස්සති.
Nānārattāni vatthāni, ko naggo paridahissati.
31.
31.
‘‘‘කො පථෙ ඡත්තමාදෙති, කොපාහනා මුදූ සුභා’;
‘‘‘Ko pathe chattamādeti, kopāhanā mudū subhā’;
ඉති සායඤ්ච පාතො ච, ඝොසාපෙමි තහිං තහිං.
Iti sāyañca pāto ca, ghosāpemi tahiṃ tahiṃ.
32.
32.
‘‘න තං දසසු ඨානෙසු, නපි ඨානසතෙසු වා;
‘‘Na taṃ dasasu ṭhānesu, napi ṭhānasatesu vā;
අනෙකසතඨානෙසු, පටියත්තං යාචකෙ ධනං.
Anekasataṭhānesu, paṭiyattaṃ yācake dhanaṃ.
33.
33.
‘‘දිවා වා යදි වා රත්තිං, යදි එති වනිබ්බකො;
‘‘Divā vā yadi vā rattiṃ, yadi eti vanibbako;
ලද්ධා යදිච්ඡකං භොගං, පූරහත්ථොව ගච්ඡති.
Laddhā yadicchakaṃ bhogaṃ, pūrahatthova gacchati.
34.
34.
‘‘එවරූපං මහාදානං, අදාසිං යාවජීවිකං;
‘‘Evarūpaṃ mahādānaṃ, adāsiṃ yāvajīvikaṃ;
නපාහං දෙස්සං ධනං දම්මි, නපි නත්ථි නිචයො මයි.
Napāhaṃ dessaṃ dhanaṃ dammi, napi natthi nicayo mayi.
35.
35.
‘‘යථාපි ආතුරො නාම, රොගතො පරිමුත්තියා;
‘‘Yathāpi āturo nāma, rogato parimuttiyā;
ධනෙන වෙජ්ජං තප්පෙත්වා, රොගතො පරිමුච්චති.
Dhanena vejjaṃ tappetvā, rogato parimuccati.
36.
36.
‘‘තථෙවාහං ජානමානො, පරිපූරෙතුමසෙසතො;
‘‘Tathevāhaṃ jānamāno, paripūretumasesato;
ඌනමනං පූරයිතුං, දෙමි දානං වනිබ්බකෙ;
Ūnamanaṃ pūrayituṃ, demi dānaṃ vanibbake;
නිරාලයො අපච්චාසො, සම්බොධිමනුපත්තියා’’ති.
Nirālayo apaccāso, sambodhimanupattiyā’’ti.
මහාසුදස්සනචරියං චතුත්ථං.
Mahāsudassanacariyaṃ catutthaṃ.
Related texts:
අට්ඨකථා • Aṭṭhakathā / සුත්තපිටක (අට්ඨකථා) • Suttapiṭaka (aṭṭhakathā) / ඛුද්දකනිකාය (අට්ඨකථා) • Khuddakanikāya (aṭṭhakathā) / චරියාපිටක-අට්ඨකථා • Cariyāpiṭaka-aṭṭhakathā / 4. මහාසුදස්සනචරියාවණ්ණනා • 4. Mahāsudassanacariyāvaṇṇanā