| Library / Tipiṭaka / д̇ибидага • Tipiṭaka / д̣̇ийгханигааяа (дийгаа) • Dīghanikāya (ṭīkā) |
4. махаасуд̣̇ассанасуд̇д̇аван̣н̣анаа
4. Mahāsudassanasuttavaṇṇanā
гусаавад̇ийрааж̇ад̇хаанийван̣н̣анаа
Kusāvatīrājadhānīvaṇṇanā
242. сован̣н̣амаяаад̇и суван̣н̣амаяаа. аяам̣ баагаарод̇и саб̣б̣арад̇анамаяо баагааро. д̇аяо д̇аяод̇и анд̇о жа д̇аяо, б̣ахи жа д̇аяод̇и д̇аяо д̇аяо.
242.Sovaṇṇamayāti suvaṇṇamayā. Ayaṃ pākāroti sabbaratanamayo pākāro. Tayo tayoti anto ca tayo, bahi ca tayoti tayo tayo.
зсигад̇т̇амбхо инд̣̇акийло наг̇арасобхано алан̇гаарад̇т̇амбхо. ан̇г̇ийяад̇и н̃ааяад̇и бут̇улабхааво зд̇знаад̇и ан̇г̇ам̣, баригкзбо. д̇иборисам̣ ан̇г̇ам̣ зд̇иссаад̇и д̇иборисан̇г̇аа. д̇знааха ‘‘д̇знаа’’д̇иаад̣̇и. д̇зна бан̃жахад̇т̇аббамаан̣зна д̇иборисзна. бан̣н̣апалзсубийд̇и саб̣б̣арад̇анамаяаанам̣ д̇аалаанам̣ бан̣н̣апалзсуби. зсзва наяод̇и ‘‘бан̣н̣зсу згам̣ бад̇д̇агам̣ сован̣н̣амаяам̣, згам̣ руубияамаяам̣. палзсуби зго лзкаабхааво сован̣н̣амаяо, зго руубияамаяо’’д̇иаад̣̇иго аяамад̇т̇о ад̇ид̣̇идто. баагааранд̇арзд̇и д̣̇виннам̣ д̣̇виннам̣ баагаараанам̣ анд̇арз. згзгаа худ̇ваа тид̇аа д̇аалабанд̇и.
Esikatthambho indakhīlo nagarasobhano alaṅkāratthambho. Aṅgīyati ñāyati puthulabhāvo etenāti aṅgaṃ, parikkhepo. Tiporisaṃ aṅgaṃ etissāti tiporisaṅgā. Tenāha ‘‘tenā’’tiādi. Tena pañcahatthappamāṇena tiporisena. Paṇṇaphalesupīti sabbaratanamayānaṃ tālānaṃ paṇṇaphalesupi. Eseva nayoti ‘‘paṇṇesu ekaṃ pattakaṃ sovaṇṇamayaṃ, ekaṃ rūpiyamayaṃ. Phalesupi eko lekhābhāvo sovaṇṇamayo, eko rūpiyamayo’’tiādiko ayamattho atidiṭṭho. Pākārantareti dvinnaṃ dvinnaṃ pākārānaṃ antare. Ekekā hutvā ṭhitā tālapanti.
чзгод̇и баду сувисад̣̇о, со жасса бадубхааво маносаарод̇и ааха ‘‘сунд̣̇аро’’д̇и. ран̃ж̇зд̇унд̇и рааг̇ам̣ уббаад̣̇зд̇ум̣. камад̇зваад̇и рожад̇зва. на б̣ийбхажчзд̇ийд̇и на д̇аж̇ж̇зд̇и, сод̇асукабхаавад̇о бияааяид̇аб̣б̣о жа ход̇и. гумбхат̇ун̣ад̣̇ад̣̇д̣̇аригаад̣̇и згад̇алам̣ д̇уурияам̣. убхаяад̇алам̣ баагадамзва. саб̣б̣ад̇о барияонад̣̇д̇хам̣ жад̇урассаамб̣ан̣агам̣, бан̣аваад̣̇и жа. вам̣саад̣̇ийд̇и аад̣̇и-сад̣̇д̣̇зна сан̇каад̣̇игам̣ сан̇г̇ан̣хаад̇и. сумужчид̇ассаад̇и судту барияад̇д̇асса. бамаан̣зд̇и наад̇ид̣̇ал̣ханаад̇исит̇илад̇аасан̇каад̇з маж̇жхимз мужчанаббамаан̣з . хад̇т̇ам̣ ваа баад̣̇ам̣ ваа жаалзд̇ваад̇и хад̇т̇алаяабаад̣̇алаяз саж̇ж̇зд̇ваа. нажжанд̇аад̇и саакаанажжам̣ нажжанд̇аа.
Chekoti paṭu suvisado, so cassa paṭubhāvo manosāroti āha ‘‘sundaro’’ti. Rañjetunti rāgaṃ uppādetuṃ. Khamatevāti rocateva. Na bībhacchetīti na tajjeti, sotasukhabhāvato piyāyitabbo ca hoti. Kumbhathuṇadaddarikādi ekatalaṃ tūriyaṃ. Ubhayatalaṃ pākaṭameva. Sabbato pariyonaddhaṃ caturassaambaṇakaṃ, paṇavādi ca. Vaṃsādīti ādi-saddena saṅkhādikaṃ saṅgaṇhāti. Sumucchitassāti suṭṭhu pariyattassa. Pamāṇeti nātidaḷhanātisithilatāsaṅkhāte majjhime mucchanappamāṇe . Hatthaṃ vā pādaṃ vā cāletvāti hatthalayapādalaye sajjetvā. Naccantāti sākhānaccaṃ naccantā.
жаггарад̇анаван̣н̣анаа
Cakkaratanavaṇṇanā
243. убосат̇ам̣ вужжад̇и адтан̇г̇асаманнааг̇ад̇ам̣ саб̣б̣ад̣̇ивасзсу г̇ахадтзхи рагкид̇аб̣б̣асийлам̣, самаад̣̇аанавасзна д̇ам̣ д̇асса ад̇т̇ийд̇и убосат̇иго, д̇асса убосат̇игасса. д̇знааха ‘‘самаад̣̇иннаубосат̇ан̇г̇ассаа’’д̇и. д̇ад̣̇аад̇и д̇асмим̣ гаалз. гасмим̣ бана гаалзд̇и? яасмим̣ гаалз жаггавад̇д̇ибхаавасам̣вад̇д̇анияад̣̇аанасийлаад̣̇ибун̃н̃асамбхаарасамуд̣̇ааг̇амасамбанно буурид̇ажаггавад̇д̇ивад̇д̇о гаалад̣̇ийбад̣̇зсависзсабажжааж̇аад̇ияаа жзва гуларуубабхог̇аад̇хибад̇зяяаад̣̇иг̇ун̣ависзсасамбад̇д̇ияаа жа д̇ад̣̇ануруубз ад̇д̇абхаавз тид̇о ход̇и, д̇асмим̣ гаалз. д̇аад̣̇исз хи гаалз жаггавад̇д̇ибхаавий бурисависзсо яат̇аавуд̇д̇аг̇ун̣асаманнааг̇ад̇о рааж̇аа кад̇д̇ияо муд̣̇д̇хаавасид̇д̇о висуд̣̇д̇хасийло анубосат̇ам̣ сад̇асахассависсаж̇ж̇анаад̣̇инаа саммаабадибад̇д̇им̣ бадибаж̇ж̇ад̇и, на яад̣̇аа жаггарад̇анам̣ уббаж̇ж̇ад̇и, д̇ад̣̇аа зва. имз жа висзсаа саб̣б̣ажаггавад̇д̇ийнам̣ саад̇хааран̣авасзна вуд̇д̇аа. д̇знааха ‘‘баад̇ова…бз… д̇хаммад̇аа’’д̇и. б̣од̇хисад̇д̇аанам̣ бана жаггавад̇д̇ибхааваавахаг̇ун̣ааби жаггавад̇д̇иг̇ун̣ааби саад̇исаяаава хонд̇и.
243.Uposathaṃ vuccati aṭṭhaṅgasamannāgataṃ sabbadivasesu gahaṭṭhehi rakkhitabbasīlaṃ, samādānavasena taṃ tassa atthīti uposathiko, tassa uposathikassa. Tenāha ‘‘samādinnauposathaṅgassā’’ti. Tadāti tasmiṃ kāle. Kasmiṃ pana kāleti? Yasmiṃ kāle cakkavattibhāvasaṃvattaniyadānasīlādipuññasambhārasamudāgamasampanno pūritacakkavattivatto kāladīpadesavisesapaccājātiyā ceva kularūpabhogādhipateyyādiguṇavisesasampattiyā ca tadanurūpe attabhāve ṭhito hoti, tasmiṃ kāle. Tādise hi kāle cakkavattibhāvī purisaviseso yathāvuttaguṇasamannāgato rājā khattiyo muddhāvasitto visuddhasīlo anuposathaṃ satasahassavissajjanādinā sammāpaṭipattiṃ paṭipajjati, na yadā cakkaratanaṃ uppajjati, tadā eva. Ime ca visesā sabbacakkavattīnaṃ sādhāraṇavasena vuttā. Tenāha ‘‘pātova…pe… dhammatā’’ti. Bodhisattānaṃ pana cakkavattibhāvāvahaguṇāpi cakkavattiguṇāpi sātisayāva honti.
вуд̇д̇аббагаарабун̃н̃агаммабажжаяанд̇и жаггавад̇д̇ибхааваавахад̣̇аанад̣̇амасам̣яамаад̣̇ибун̃н̃агаммахзд̇угам̣. нийламан̣исан̇гхаад̇асад̣̇исанд̇и инд̣̇анийламан̣исан̃жаяасамаанам̣. д̣̇иб̣б̣аанубхааваяуд̇д̇ад̇д̇аад̇и д̣̇ассанзяяад̇аа, манун̃н̃агхосад̇аа, аагаасаг̇аамид̇аа, обхаасависсаж̇ж̇анаа, аббадигхаад̇ад̇аа, ран̃н̃о ижчид̇ад̇т̇анибпад̇д̇игааран̣ад̇аад̇и звамаад̣̇ийхи д̣̇иб̣б̣асад̣̇исзхи аанубхаавзхи саманнааг̇ад̇ад̇д̇аа, зд̇зна д̣̇иб̣б̣ам̣ вияаад̇и д̣̇иб̣б̣анд̇и д̣̇ассзд̇и. на хи д̇ам̣ д̣̇звалогабарияаабаннам̣. сахассам̣ араа зд̇ассаад̇и ваа сахассаарам̣. саб̣б̣зхи аагаарзхийд̇и саб̣б̣зхи сунд̣̇арзхи барибун̣н̣ааваяавз лагкан̣асамбаннз жаггз ижчид̇аб̣б̣зхи аагаарзхи. барибууранд̇и барибун̣н̣ам̣, саа жассаа баарибуурим̣ ид̣̇аанзва вид̇т̇аарзссад̇и.
Vuttappakārapuññakammapaccayanti cakkavattibhāvāvahadānadamasaṃyamādipuññakammahetukaṃ. Nīlamaṇisaṅghātasadisanti indanīlamaṇisañcayasamānaṃ. Dibbānubhāvayuttattāti dassaneyyatā, manuññaghosatā, ākāsagāmitā, obhāsavissajjanā, appaṭighātatā, rañño icchitatthanipphattikāraṇatāti evamādīhi dibbasadisehi ānubhāvehi samannāgatattā, etena dibbaṃ viyāti dibbanti dasseti. Na hi taṃ devalokapariyāpannaṃ. Sahassaṃ arā etassāti vā sahassāraṃ. Sabbehi ākārehīti sabbehi sundarehi paripuṇṇāvayave lakkhaṇasampanne cakke icchitabbehi ākārehi. Paripūranti paripuṇṇaṃ, sā cassā pāripūriṃ idāneva vitthāressati.
банаал̣ийд̇и чид̣̇д̣̇ам̣. суд̣̇д̇хасинид̣̇д̇хад̣̇анд̇абанд̇ияаа ниб̣б̣иварааяаад̇и ад̇хиббааяо. д̇ассаа бана банаал̣ияаа саманд̇ад̇о бассасса раж̇ад̇амаяад̇д̇аа саарараж̇ад̇амаяаа вуд̇д̇аа. яасмаа жасса жаггасса рат̇ажаггасса вияа анд̇обхааво наама над̇т̇и, д̇асмаа вуд̇д̇ам̣ ‘‘убхосуби б̣аахиранд̇зсуу’’д̇и. гад̇абаригкзбаа ход̇и банаал̣ийд̇и яож̇анаа. наабхибанаал̣ибаригкзбабаддзсууд̇и наабхибаригкзбабаддз жзва наабхияаа банаал̣ибаригкзбабаддз жа.
Panāḷīti chiddaṃ. Suddhasiniddhadantapantiyā nibbivarāyāti adhippāyo. Tassā pana panāḷiyā samantato passassa rajatamayattā sārarajatamayā vuttā. Yasmā cassa cakkassa rathacakkassa viya antobhāvo nāma natthi, tasmā vuttaṃ ‘‘ubhosupi bāhirantesū’’ti. Kataparikkhepā hoti panāḷīti yojanā. Nābhipanāḷiparikkhepapaṭṭesūti nābhiparikkhepapaṭṭe ceva nābhiyā panāḷiparikkhepapaṭṭe ca.
д̇зсанд̇и араанам̣. гхадагаа наама алан̇гаарабхууд̇аа куд̣̇д̣̇агабун̣н̣агхадаа. д̇ат̇аа ман̣игаа наама муд̇д̇аавал̣игаа. барижчзд̣̇алзкаа д̇асса д̇асса барижчзд̣̇ад̣̇ассанавасзна тид̇аа барижчинналзкаа. аад̣̇и-сад̣̇д̣̇зна маалаагаммаад̣̇им̣ сан̇г̇ан̣хаад̇и. сувибхад̇д̇аанзваад̇и ан̃н̃аман̃н̃ам̣ асам̣гин̣н̣ад̇д̇аа судту вибхад̇д̇аани.
Tesanti arānaṃ. Ghaṭakā nāma alaṅkārabhūtā khuddakapuṇṇaghaṭā. Tathā maṇikā nāma muttāvaḷikā. Paricchedalekhā tassa tassa paricchedadassanavasena ṭhitā paricchinnalekhā. Ādi-saddena mālākammādiṃ saṅgaṇhāti. Suvibhattānevāti aññamaññaṃ asaṃkiṇṇattā suṭṭhu vibhattāni.
‘‘сурад̇д̇аа’’д̇иаад̣̇ийсу сурад̇д̇аг̇г̇ахан̣зна махаанаамаван̣н̣ад̇ам̣ бадигкибад̇и, суд̣̇д̇хаг̇г̇ахан̣зна сам̣н̇гилидтад̇ам̣, синид̣̇д̇хаг̇г̇ахан̣зна луукад̇ам̣. гаамам̣ д̇асса жаггарад̇анасса нзмиман̣д̣алам̣ асанд̇хигамзва ниб̣б̣ад̇д̇ам̣, саб̣б̣ад̇т̇агамзва бана гзвалам̣ баваал̣аван̣н̣зна жа собхад̇ийд̇и багад̇ижаггасса санд̇хияуд̇д̇адтаанз сурад̇д̇асуван̣н̣абаддаад̣̇имаяаахи ваддабарижчзд̣̇алзкаахи бан̃н̃ааяамаанаахи сасанд̇хигаа вияа д̣̇иссанд̇ийд̇и ааха ‘‘санд̇хийсу банассаа’’д̇иаад̣̇и.
‘‘Surattā’’tiādīsu surattaggahaṇena mahānāmavaṇṇataṃ paṭikkhipati, suddhaggahaṇena saṃṅkiliṭṭhataṃ, siniddhaggahaṇena lūkhataṃ. Kāmaṃ tassa cakkaratanassa nemimaṇḍalaṃ asandhikameva nibbattaṃ, sabbatthakameva pana kevalaṃ pavāḷavaṇṇena ca sobhatīti pakaticakkassa sandhiyuttaṭṭhāne surattasuvaṇṇapaṭṭādimayāhi vaṭṭaparicchedalekhāhi paññāyamānāhi sasandhikā viya dissantīti āha ‘‘sandhīsu panassā’’tiādi.
нзмиман̣д̣алабидтияанд̇и нзмиман̣д̣аласса бидтибад̣̇зсз. аагаасажаарибхаавад̇о хисса д̇ад̇т̇а ваад̇аг̇г̇аахий баваал̣ад̣̇ан̣д̣о ход̇и. д̣̇асаннам̣ д̣̇асаннам̣ араанам̣ анд̇арзд̇и д̣̇асаннам̣ д̣̇асаннам̣ араанам̣ анд̇арз самийбз бад̣̇зсз. чид̣̇д̣̇аман̣д̣алакажид̇од̇и ман̣д̣аласан̣тааначид̣̇д̣̇авижид̇д̇о. сугусаласаманнаахад̇ассаад̇и судту гусалзна сиббинаа бахад̇асса, ваад̣̇ид̇ассаад̇и ад̇т̇о. ваг̇г̇ууд̇и манорамо. раж̇анийяод̇и сун̣анд̇аанам̣ рааг̇уббаад̣̇аго. гаманийяод̇и ганд̇о. самосарид̇агусумад̣̇аамаад̇и оламб̣ид̇асуг̇анд̇хагусумад̣̇аамаа. нзмибаригкзбассаад̇и нзмибарияанд̇абаригкзбасса. наабхибанаал̣ияаа д̣̇виннам̣ бассаанам̣ васзна ‘‘д̣̇виннамби наабхибанаал̣ийна’’нд̇и вуд̇д̇ам̣. згаа зва хи саа банаал̣и. язхийд̇и язхи д̣̇вийхи мукзхи. буна язхийд̇и язхи муд̇д̇агалаабзхи.
Nemimaṇḍalapiṭṭhiyanti nemimaṇḍalassa piṭṭhipadese. Ākāsacāribhāvato hissa tattha vātaggāhī pavāḷadaṇḍo hoti. Dasannaṃ dasannaṃ arānaṃ antareti dasannaṃ dasannaṃ arānaṃ antare samīpe padese. Chiddamaṇḍalakhacitoti maṇḍalasaṇṭhānachiddavicitto. Sukusalasamannāhatassāti suṭṭhu kusalena sippinā pahatassa, vāditassāti attho. Vaggūti manoramo. Rajanīyoti suṇantānaṃ rāguppādako. Kamanīyoti kanto. Samosaritakusumadāmāti olambitasugandhakusumadāmā. Nemiparikkhepassāti nemipariyantaparikkhepassa. Nābhipanāḷiyā dvinnaṃ passānaṃ vasena ‘‘dvinnampi nābhipanāḷīna’’nti vuttaṃ. Ekā eva hi sā panāḷi. Yehīti yehi dvīhi mukhehi. Puna yehīti yehi muttakalāpehi.
од̇хаабаяамаананд̇и сод̇ум̣ авахид̇аани гурумаанам̣.
Odhāpayamānanti sotuṃ avahitāni kurumānaṃ.
жанд̣̇о бурад̇о жаггарад̇анам̣ бажчаад̇и звам̣ буб̣б̣аабариязна буб̣б̣аабарабхаавзна.
Cando purato cakkaratanaṃ pacchāti evaṃ pubbāpariyena pubbāparabhāvena.
анд̇збурассаад̇и анураад̇хабурз ран̃н̃о анд̇збурасса. уд̇д̇арасийхабан̃ж̇арасад̣̇исзд̇и д̇ад̣̇аа ран̃н̃о баасаад̣̇з д̇аад̣̇исасса уд̇д̇арад̣̇исааяа сийхабан̃ж̇арасса лаб̣бхамаанад̇д̇аа вуд̇д̇ам̣. сукзна саггаад̇и гин̃жи анаарухид̇ваа, сарийран̃жа ануллан̇гхид̇ваа яат̇аатид̇знзва хад̇т̇зна бубпамудтияо кибид̇ваа сукзна саггаа ход̇и бууж̇зд̇ум̣.
Antepurassāti anurādhapure rañño antepurassa. Uttarasīhapañjarasadiseti tadā rañño pāsāde tādisassa uttaradisāya sīhapañjarassa labbhamānattā vuttaṃ. Sukhena sakkāti kiñci anāruhitvā, sarīrañca anullaṅghitvā yathāṭhiteneva hatthena pupphamuṭṭhiyo khipitvā sukhena sakkā hoti pūjetuṃ.
наанаавирааг̇арад̇анаббабхаасамуж̇ж̇аланд̇и наанаавид̇хавижид̇д̇аван̣н̣арад̇анобхаасабабхассарам̣. аагаасам̣ аб̣бхуг̇г̇анд̇ваа бавад̇д̇зд̇и ааг̇анд̇ваа тид̇адтаанад̇о убари аагаасам̣ аб̣бхуг̇г̇анд̇ваа бавад̇д̇з.
Nānāvirāgaratanappabhāsamujjalanti nānāvidhavicittavaṇṇaratanobhāsapabhassaraṃ. Ākāsaṃ abbhuggantvā pavatteti āgantvā ṭhitaṭṭhānato upari ākāsaṃ abbhuggantvā pavatte.
244. рааж̇ааяуд̇д̇аад̇и ран̃н̃о гижжз ааяуд̇д̇агабурисаа.
244.Rājāyuttāti rañño kicce āyuttakapurisā.
синзрум̣ ваамабассзна гад̇ваа д̇асса д̇хурад̇арам̣ г̇ажчанд̇о ‘‘ваамабассзна синзрум̣ бахааяаа’’д̇и вуд̇д̇ам̣.
Sineruṃ vāmapassena katvā tassa dhurataraṃ gacchanto ‘‘vāmapassena sineruṃ pahāyā’’ti vuttaṃ.
виниб̣б̣зд̇хзнаад̇и д̇ирияам̣ винивиж̇жханавасзна. саннивзсагкамод̇и канд̇хааваарасаннивзсаяог̇яо. сулабхаахаарубагаран̣од̇и сукзнзва лад̣̇д̇хаб̣б̣ад̇хан̃н̃аг̇орасад̣̇ааруд̇ин̣аад̣̇ибхож̇анасаад̇хано.
Vinibbedhenāti tiriyaṃ vinivijjhanavasena. Sannivesakkhamoti khandhāvārasannivesayogyo. Sulabhāhārupakaraṇoti sukheneva laddhabbadhaññagorasadārutiṇādibhojanasādhano.
баражагганд̇и барасса ран̃н̃о сзнаа, аан̣аа ваа.
Paracakkanti parassa rañño senā, āṇā vā.
ааг̇аманананд̣̇анод̇и ааг̇аманзна нанд̣̇иж̇анано. г̇аманзна сожзд̇ийд̇и г̇аманасожано. убагаббзт̇аад̇и убаруубари габбзт̇а, сам̣вид̣̇ахат̇а убанзт̇аад̇и ад̇т̇о. убабаригкид̇ваад̇и хзд̇уд̇оби сабхаавад̇оби палад̇оби д̣̇идтад̇хаммигасамбарааяигаад̣̇иаад̣̇ийнавад̇оби виймам̣сид̇ваа. вибхаавзнд̇и бан̃н̃ааяа ад̇т̇ам̣ вибхууд̇ам̣ гаронд̇ийд̇и вибхаавино, бан̃н̃аванд̇о. ануяанд̇аад̇и анувад̇д̇агаа, анувад̇д̇агабхаавзнзва, бана ран̃н̃о жа махаанубхаавзна д̇з ж̇иг̇ужчанавасзна баабад̇о анораманд̇ааби згажжз од̇д̇аббавасзна ораманд̇ийд̇и взд̣̇ид̇аб̣б̣ам̣.
Āgamananandanoti āgamanena nandijanano. Gamanena socetīti gamanasocano. Upakappethāti uparūpari kappetha, saṃvidahatha upanethāti attho. Upaparikkhitvāti hetutopi sabhāvatopi phalatopi diṭṭhadhammikasamparāyikādiādīnavatopi vīmaṃsitvā. Vibhāventi paññāya atthaṃ vibhūtaṃ karontīti vibhāvino, paññavanto. Anuyantāti anuvattakā, anuvattakabhāveneva, pana rañño ca mahānubhāvena te jigucchanavasena pāpato anoramantāpi ekacce ottappavasena oramantīti veditabbaṃ.
ог̇ажчамаананд̇и осийд̣̇анд̇ам̣. яож̇анамад̇д̇анд̇и вид̇т̇аарад̇о яож̇анамад̇д̇ам̣ бад̣̇зсам̣. г̇амбхийрабхаавзна бана яат̇аа бхууми д̣̇иссад̇и, звам̣ ог̇ажчад̇и. д̇знааха ‘‘махаасамуд̣̇д̣̇ад̇ала’’нд̇иаад̣̇и. анд̇з жаггарад̇анам̣ уд̣̇агзна сзнааяа анаж̇жход̇т̇аран̣ад̇т̇ам̣. бурад̇т̇имо махаасамуд̣̇д̣̇о барияанд̇о зд̇ассаад̇и бурад̇т̇имамахаасамуд̣̇д̣̇абарияанд̇о, д̇ам̣ бурад̇т̇имамахаасамуд̣̇д̣̇абарияанд̇ам̣, бурад̇т̇имамахаасамуд̣̇д̣̇ам̣ барияанд̇ам̣ гад̇ваад̇и ад̇т̇о.
Ogacchamānanti osīdantaṃ. Yojanamattanti vitthārato yojanamattaṃ padesaṃ. Gambhīrabhāvena pana yathā bhūmi dissati, evaṃ ogacchati. Tenāha ‘‘mahāsamuddatala’’ntiādi. Ante cakkaratanaṃ udakena senāya anajjhottharaṇatthaṃ. Puratthimo mahāsamuddo pariyanto etassāti puratthimamahāsamuddapariyanto, taṃ puratthimamahāsamuddapariyantaṃ, puratthimamahāsamuddaṃ pariyantaṃ katvāti attho.
жаад̇уранд̇ааяаад̇и жад̇усамуд̣̇д̣̇анд̇ааяа, бурад̇т̇имад̣̇исаад̣̇ижад̇угодтаасанд̇ааяа ваа. собхаяамаанам̣ вияаад̇и вияа-сад̣̇д̣̇о нибаад̇амад̇д̇ам̣. ад̇д̇ано ажчарияаг̇ун̣зхи собханд̇амзва хи д̇ам̣ д̇идтад̇и. баал̣ияамби хи ‘‘убасобхаяамаанам̣’’ д̇взва вуд̇д̇ам̣.
Cāturantāyāti catusamuddantāya, puratthimadisādicatukoṭṭhāsantāya vā. Sobhayamānaṃ viyāti viya-saddo nipātamattaṃ. Attano acchariyaguṇehi sobhantameva hi taṃ tiṭṭhati. Pāḷiyampi hi ‘‘upasobhayamānaṃ’’ tveva vuttaṃ.
хад̇т̇ирад̇анаван̣н̣анаа
Hatthiratanavaṇṇanā
246. харижанд̣̇анаад̣̇ийхийд̇и аад̣̇и-сад̣̇д̣̇зна жад̇уж̇ж̇аад̇ияаг̇анд̇хаад̣̇им̣ сан̇г̇ан̣хаад̇и. ааг̇аманам̣ жинд̇зт̇аад̇и вад̣̇анд̇и жаггавад̇д̇ивад̇д̇асса буурид̇ад̇ааяа барижид̇ад̇д̇аа. гаал̣ад̇илагаад̣̇ийнам̣ абхаавзна висуд̣̇д̇хасзд̇асарийро. сад̇д̇абад̇идтод̇и бхуумипусанагзхи ваалад̇хи, варан̇г̇ам̣, хад̇т̇од̇и имзхи жа д̇ийхи, жад̇уухи баад̣̇зхи жаад̇и сад̇д̇ахи аваяавзхи бад̇идтид̇ад̇д̇аа сад̇д̇абад̇идто. саб̣б̣аганидтод̇и саб̣б̣зхи чад̣̇д̣̇анд̇агулахад̇т̇ийхи хийно. убосат̇агулаа саб̣б̣аж̇здтод̇и убосат̇агулад̇о ааг̇ажчанд̇о д̇ад̇т̇а саб̣б̣аббад̇хаано ааг̇ажчад̇ийд̇и яож̇анаа. вуд̇д̇анаязнаад̇и ‘‘махаад̣̇аанам̣ д̣̇ад̇ваа’’д̇иаад̣̇инаа вуд̇д̇зна наязна. жаггавад̇д̇ийнам̣, жаггавад̇д̇ибуд̇д̇аанан̃жа жаггавад̇д̇им̣ уд̣̇д̣̇исса жинд̇аяанд̇аанам̣ ааг̇ажчад̇и. абанзд̇ваад̇и ад̇д̇ано аанубхаавзна абанзд̇ваа. г̇анд̇хамзва хи д̇асса ид̇арз хад̇т̇ий на саханд̇и.
246.Haricandanādīhīti ādi-saddena catujjātiyagandhādiṃ saṅgaṇhāti. Āgamanaṃ cintethātivadanti cakkavattivattassa pūritatāya paricitattā. Kāḷatilakādīnaṃ abhāvena visuddhasetasarīro. Sattapatiṭṭhoti bhūmiphusanakehi vāladhi, varaṅgaṃ, hatthoti imehi ca tīhi, catūhi pādehi cāti sattahi avayavehi patiṭṭhitattā sattapatiṭṭho. Sabbakaniṭṭhoti sabbehi chaddantakulahatthīhi hīno. Uposathakulā sabbajeṭṭhoti uposathakulato āgacchanto tattha sabbappadhāno āgacchatīti yojanā. Vuttanayenāti ‘‘mahādānaṃ datvā’’tiādinā vuttena nayena. Cakkavattīnaṃ, cakkavattiputtānañca cakkavattiṃ uddissa cintayantānaṃ āgacchati. Apanetvāti attano ānubhāvena apanetvā. Gandhameva hi tassa itare hatthī na sahanti.
гхарад̇хзнуважчаго вияаад̇и гхарз барижид̇ад̇хзнуяаа д̇ад̇т̇зва ж̇аад̇асам̣вад̣̇д̇хаважчаго вияа. сагалабат̇авинд̇и сагалам̣ ж̇амб̣уд̣̇ийбасан̃н̃ид̇ам̣ бат̇авим̣.
Gharadhenuvacchako viyāti ghare paricitadhenuyā tattheva jātasaṃvaddhavacchako viya. Sakalapathavinti sakalaṃ jambudīpasaññitaṃ pathaviṃ.
ассарад̇анаван̣н̣анаа
Assaratanavaṇṇanā
247. синд̇хавагулад̇од̇и синд̇хавассааж̇аанийяагулад̇о.
247.Sindhavakulatoti sindhavassājānīyakulato.
ман̣ирад̇анаван̣н̣анаа
Maṇiratanavaṇṇanā
248. сагаданаабхисамабарин̣ааханд̇и барин̣аахад̇о махаасагадасса наабхияаа самаббамаан̣ам̣. убхосу анд̇зсууд̇и хздтаа, убари жаад̇и д̣̇вийсу анд̇зсу. ган̣н̣игабарияанд̇ад̇од̇и д̣̇виннам̣ ган̃жанабад̣̇умаанам̣ ган̣н̣игааяа барияанд̇ад̇о. муд̇д̇ааж̇аалагз табзд̇ваад̇и сувисуд̣̇д̇хз муд̇д̇амаяз ж̇аалагз бад̇идтаабзд̇ваа. арун̣уг̇г̇аманавзлаа вияаад̇и арун̣уг̇г̇аманасийсзна суурияауд̣̇аяагкан̣ам̣ убалагкзд̇и.
248.Sakaṭanābhisamapariṇāhanti pariṇāhato mahāsakaṭassa nābhiyā samappamāṇaṃ. Ubhosu antesūti heṭṭhā, upari cāti dvīsu antesu. Kaṇṇikapariyantatoti dvinnaṃ kañcanapadumānaṃ kaṇṇikāya pariyantato. Muttājālake ṭhapetvāti suvisuddhe muttamaye jālake patiṭṭhāpetvā. Aruṇuggamanavelā viyāti aruṇuggamanasīsena sūriyaudayakkhaṇaṃ upalakkheti.
ид̇т̇ирад̇анаван̣н̣анаа
Itthiratanavaṇṇanā
249. ‘‘ид̇т̇ирад̇анам̣ баад̇убхавад̇ий’’д̇и вад̇ваа гуд̇ассаа баад̇убхаавод̇и д̣̇ассзд̇ум̣ ‘‘мад̣̇д̣̇арааж̇агулад̇о’’д̇иаад̣̇и вуд̇д̇ам̣. мад̣̇д̣̇арадтам̣ гира ж̇амб̣уд̣̇ийбз абхируубаанам̣ ид̇т̇ийнам̣ уббад̇д̇идтаанам̣. д̇ат̇аа хи ‘‘син̃жаяамахаарааж̇асса д̣̇звий, взссанд̇арамахаарааж̇асса д̣̇звий, бхад̣̇д̣̇агаабилааний’’д̇и звамаад̣̇и ид̇т̇ирад̇анам̣ мад̣̇д̣̇арадтз зва уббаннам̣. бун̃н̃аанубхаавзнаад̇и жаггавад̇д̇иран̃н̃о бун̃н̃ад̇зж̇зна.
249. ‘‘Itthiratanaṃ pātubhavatī’’ti vatvā kutassā pātubhāvoti dassetuṃ ‘‘maddarājakulato’’tiādi vuttaṃ. Maddaraṭṭhaṃ kira jambudīpe abhirūpānaṃ itthīnaṃ uppattiṭṭhānaṃ. Tathā hi ‘‘siñcayamahārājassa devī, vessantaramahārājassa devī, bhaddakāpilānī’’ti evamādi itthiratanaṃ maddaraṭṭhe eva uppannaṃ. Puññānubhāvenāti cakkavattirañño puññatejena.
сан̣таанабаарибуурияаад̇и хад̇т̇абаад̣̇аад̣̇исарийрааваяаваанам̣ сусан̣тид̇ааяа. аваяавабаарибуурияаа хи самуд̣̇ааяабаарибуурисид̣̇д̇хи . руубанд̇и сарийрам̣ ‘‘руубам̣ д̇взва сан̇кам̣ г̇ажчад̇ий’’д̇иаад̣̇ийсу (ма. ни. 1.306) вияа. д̣̇ассанийяаад̇и суруубабхаавзна бассид̇аб̣б̣аяуд̇д̇аа. д̇знааха ‘‘д̣̇иссамаанааваа’’д̇иаад̣̇и. соманассавасзна жид̇д̇ам̣ басаад̣̇зд̇и яонисо жинд̇знд̇аанам̣ гаммапаласад̣̇д̇хааяа васзна. басаад̣̇аавахад̇д̇аад̇и гааран̣аважанзна яат̇аа баасаад̣̇игад̇ааяа ван̣н̣абогкарад̇аасид̣̇д̇хи вуд̇д̇аа, звам̣ д̣̇ассанийяад̇ааяа баасаад̣̇игад̇аасид̣̇д̇хи, абхируубад̇ааяа жа д̣̇ассанийяад̇аасид̣̇д̇хи вад̇д̇аб̣б̣аад̇и наяам̣ д̣̇ассзд̇и. бадиломад̇о ваа ван̣н̣абогкарад̇ааяа баасаад̣̇игад̇аасид̣̇д̇хи, баасаад̣̇игад̇ааяа д̣̇ассанийяад̇аасид̣̇д̇хи, д̣̇ассанийяад̇ааяа абхируубад̇аасид̣̇д̇хи яож̇зд̇аб̣б̣аа. звам̣ сарийрасамбад̇д̇ивасзна абхируубад̇аад̣̇игз д̣̇ассзд̇ваа ид̣̇аани сарийрз д̣̇осаабхаававасзнаби д̇з д̣̇ассзд̇ум̣ ‘‘абхируубаа ваа’’д̇иаад̣̇и вуд̇д̇ам̣. д̇ад̇т̇а яат̇аа бамаан̣аяуд̇д̇аа, звам̣ аарохабарин̣аахаяог̇ад̇о жа баасаад̣̇игаа наад̇ид̣̇ийгхад̇аад̣̇аяо, звам̣ мануссаанам̣ д̣̇иб̣б̣аруубад̇аасамбад̇д̇ибийд̇и ‘‘аббад̇д̇аа д̣̇иб̣б̣аван̣н̣а’’нд̇и вуд̇д̇ам̣.
Saṇṭhānapāripūriyāti hatthapādādisarīrāvayavānaṃ susaṇṭhitāya. Avayavapāripūriyā hi samudāyapāripūrisiddhi . Rūpanti sarīraṃ ‘‘rūpaṃ tveva saṅkhaṃ gacchatī’’tiādīsu (ma. ni. 1.306) viya. Dassanīyāti surūpabhāvena passitabbayuttā. Tenāha ‘‘dissamānāvā’’tiādi. Somanassavasena cittaṃ pasādeti yoniso cintentānaṃ kammaphalasaddhāya vasena. Pasādāvahattāti kāraṇavacanena yathā pāsādikatāya vaṇṇapokkharatāsiddhi vuttā, evaṃ dassanīyatāya pāsādikatāsiddhi, abhirūpatāya ca dassanīyatāsiddhi vattabbāti nayaṃ dasseti. Paṭilomato vā vaṇṇapokkharatāya pāsādikatāsiddhi, pāsādikatāya dassanīyatāsiddhi, dassanīyatāya abhirūpatāsiddhi yojetabbā. Evaṃ sarīrasampattivasena abhirūpatādike dassetvā idāni sarīre dosābhāvavasenapi te dassetuṃ ‘‘abhirūpā vā’’tiādi vuttaṃ. Tattha yathā pamāṇayuttā, evaṃ ārohapariṇāhayogato ca pāsādikā nātidīghatādayo, evaṃ manussānaṃ dibbarūpatāsampattipīti ‘‘appattā dibbavaṇṇa’’nti vuttaṃ.
аарохасамбад̇д̇и вуд̇д̇аа уб̣б̣зд̇хзна баасаад̣̇игабхаавад̇о. барин̣аахасамбад̇д̇и вуд̇д̇аа гисат̇уулад̣̇осаабхаавад̇о. ван̣н̣асамбад̇д̇и вуд̇д̇аа виван̣н̣ад̇аабхаавад̇о. гааяавибад̇д̇ияаад̇и сарийрад̣̇осасса. сад̇авааравихад̇ассаад̇и сад̇д̇агкад̇д̇ум̣ вихад̇асса, ‘‘сад̇авааравихад̇ассаа’’д̇и жа ид̣̇ам̣ габбаасабижувасзна вуд̇д̇ам̣, д̇уулабижуно бана вихананамзва над̇т̇и. гун̇гумад̇аг̇арад̇уругкаяаванабубпаани жад̇уж̇ж̇аад̇и. ‘‘д̇амаалад̇аг̇арад̇уругкаяаванабубпааний’’д̇и абарз.
Ārohasampatti vuttā ubbedhena pāsādikabhāvato. Pariṇāhasampatti vuttā kisathūladosābhāvato. Vaṇṇasampatti vuttā vivaṇṇatābhāvato. Kāyavipattiyāti sarīradosassa. Satavāravihatassāti sattakkhattuṃ vihatassa, ‘‘satavāravihatassā’’ti ca idaṃ kappāsapicuvasena vuttaṃ, tūlapicuno pana vihananameva natthi. Kuṅkumatagaraturukkhayavanapupphāni catujjāti. ‘‘Tamālatagaraturukkhayavanapupphānī’’ti apare.
аг̇г̇ид̣̇ад̣дхаа вияаад̇и аасанаг̇ад̇зна аг̇г̇инаа д̣̇ад̣дхаа вияа. батамамзваад̇и рааж̇аанам̣ д̣̇исвааби гижжанд̇араббасуд̇аа ахуд̇ваа гижжанд̇арад̇о батамамзва, д̣̇ассанасамагаалам̣ зваад̇и ад̇т̇о. ран̃н̃о нисаж̇ж̇ааяа бажчаа нибаад̇анам̣ нисийд̣̇анам̣ сийлам̣ зд̇иссаад̇и бажчаанибаад̇иний. д̇ам̣ д̇ам̣ ад̇д̇анаа ран̃н̃о гаад̇аб̣б̣агижжам̣ ‘‘гим̣ гаромий’’д̇и бужчид̇аб̣б̣ад̇ааяа гим̣ гаран̣ам̣ бадисаавзд̇ийд̇и гим̣гаарабадиссаавиний.
Aggidaḍḍhā viyāti āsanagatena agginā daḍḍhā viya. Paṭhamamevāti rājānaṃ disvāpi kiccantarappasutā ahutvā kiccantarato paṭhamameva, dassanasamakālaṃ evāti attho. Rañño nisajjāya pacchā nipātanaṃ nisīdanaṃ sīlaṃ etissāti pacchānipātinī. Taṃ taṃ attanā rañño kātabbakiccaṃ ‘‘kiṃ karomī’’ti pucchitabbatāya kiṃ karaṇaṃ paṭisāvetīti kiṃkārapaṭissāvinī.
маад̇уг̇аамо наама язбхуяязна сатаж̇аад̇иго, ид̇т̇ирад̇анасса бана д̇ам̣ над̇т̇ийд̇и д̣̇ассзд̇ум̣ ‘‘сваассаа’’д̇иаад̣̇и вуд̇д̇ам̣.
Mātugāmo nāma yebhuyyena saṭhajātiko, itthiratanassa pana taṃ natthīti dassetuṃ ‘‘svāssā’’tiādi vuttaṃ.
г̇ун̣аад̇и руубаг̇ун̣аа жзва аажаараг̇ун̣аа жа. буримагаммаанубхаавзнаад̇и гад̇асса буримагаммассаанубхаавзна ид̇т̇ирад̇анасса д̇аб̣бхаавасам̣вад̇д̇анияасса буримагаммасса аанубхаавзна. жаггавад̇д̇иноби бариваарасамбад̇д̇исам̣вад̇д̇анияам̣ бун̃н̃агаммам̣ д̇аад̣̇исасса палависзсасса убаниссаяо ход̇иязва. д̇знааха ‘‘жаггавад̇д̇ино бун̃н̃ам̣ убаниссааяаа’’д̇и, зд̇зна сзсзсуби савин̃н̃аан̣агарад̇анзсу ад̇д̇ано гаммавасзна ниб̣б̣ад̇д̇зсуби д̇зсам̣ д̇зсам̣ висзсаанам̣ д̇ад̣̇убаниссаяад̇аа вибхаавид̇аа зваад̇и д̣̇адтаб̣б̣аа. буб̣б̣з згад̣̇зсавасзна лаб̣бхамаанаа баарибуурий ран̃н̃о жаггавад̇д̇ибхаавуубаг̇аманад̇о бадтааяа саб̣б̣аагаарабарибуураа ж̇аад̇аа.
Guṇāti rūpaguṇā ceva ācāraguṇā ca. Purimakammānubhāvenāti katassa purimakammassānubhāvena itthiratanassa tabbhāvasaṃvattaniyassa purimakammassa ānubhāvena. Cakkavattinopi parivārasampattisaṃvattaniyaṃ puññakammaṃ tādisassa phalavisesassa upanissayo hotiyeva. Tenāha ‘‘cakkavattinopuññaṃ upanissāyā’’ti, etena sesesupi saviññāṇakaratanesu attano kammavasena nibbattesupi tesaṃ tesaṃ visesānaṃ tadupanissayatā vibhāvitā evāti daṭṭhabbā. Pubbe ekadesavasena labbhamānā pāripūrī rañño cakkavattibhāvūpagamanato paṭṭhāya sabbākāraparipūrā jātā.
г̇ахабад̇ирад̇анаван̣н̣анаа
Gahapatiratanavaṇṇanā
250. багад̇ияаа ваад̇и сабхаавзнзва жаггарад̇анабаад̇убхаавад̇о буб̣б̣зби. яаад̣̇исам̣ ран̃н̃о жаггавад̇д̇исса бун̃н̃аб̣алам̣ ниссааяа яат̇аавуд̇д̇аа жаггарад̇анаанубхааваниб̣б̣ад̇д̇и, д̇аад̣̇исам̣ зд̇асса бун̃н̃аб̣алам̣ ниссааяа г̇ахабад̇ирад̇анасса гаммавибаагаж̇ам̣ д̣̇иб̣б̣ажагкум̣ ниб̣б̣ад̇д̇зд̇ийд̇и ааха ‘‘жаггарад̇анаанубхаавасахид̇а’’нд̇и. гааран̣асса хи згасанд̇ад̇ибад̇ид̇ад̇ааяа, паласса жа самаанагаалигад̇ааяа д̇ат̇ааважанам̣.
250.Pakatiyā vāti sabhāveneva cakkaratanapātubhāvato pubbepi. Yādisaṃ rañño cakkavattissa puññabalaṃ nissāya yathāvuttā cakkaratanānubhāvanibbatti, tādisaṃ etassa puññabalaṃ nissāya gahapatiratanassa kammavipākajaṃ dibbacakkhuṃ nibbattetīti āha ‘‘cakkaratanānubhāvasahita’’nti. Kāraṇassa hi ekasantatipatitatāya, phalassa ca samānakālikatāya tathāvacanaṃ.
барин̣ааяагарад̇анаван̣н̣анаа
Pariṇāyakaratanavaṇṇanā
251. ‘‘аяам̣ д̇хаммо, аяам̣ ад̇хаммо’’д̇иаад̣̇инаа гаммассагад̇ааваб̣од̇ханасан̇каад̇асса бан̣д̣ид̇абхаавасса ад̇т̇ид̇ааяа бан̣д̣ид̇о. б̣аахусажжаб̣яад̇д̇ияаа б̣яад̇д̇о. сабхаавасид̣̇д̇хааяа мзд̇хаасан̇каад̇ааяа багад̇ибан̃н̃ааяа ад̇т̇ид̇ааяа мзд̇хаавий. ад̇д̇ано яаат̇ааваб̣уд̣̇д̇хамад̇т̇ам̣ барзсам̣ вибхаавзд̇ум̣ багаасзд̇ум̣ самад̇т̇ад̇ааяа вибхаавий. вавад̇т̇абзд̇унд̇и нижчид̇ум̣.
251. ‘‘Ayaṃ dhammo, ayaṃ adhammo’’tiādinā kammassakatāvabodhanasaṅkhātassa paṇḍitabhāvassa atthitāya paṇḍito. Bāhusaccabyattiyā byatto. Sabhāvasiddhāya medhāsaṅkhātāya pakatipaññāya atthitāya medhāvī. Attano yāthāvabuddhamatthaṃ paresaṃ vibhāvetuṃ pakāsetuṃ samatthatāya vibhāvī. Vavatthapetunti nicchituṃ.
жад̇уид̣̇д̇хисаманнааг̇ад̇аван̣н̣анаа
Catuiddhisamannāgatavaṇṇanā
252. вибажжанам̣ вибааго, вибааго зва взбааго яат̇аа ‘‘вигад̇амзва взгад̇а’’нд̇и. самам̣ наад̇исийд̇анаажжун̣хад̇ааяа ависамам̣ бхуд̇д̇асса взбааго зд̇иссаа ад̇т̇ийд̇и самавзбаагиний, д̇ааяа самавзбаагинияаа.
252. Vipaccanaṃ vipāko, vipāko eva vepāko yathā ‘‘vikatameva vekata’’nti. Samaṃ nātisītanāccuṇhatāya avisamaṃ bhuttassa vepāko etissā atthīti samavepākinī, tāya samavepākiniyā.
д̇хаммабаасаад̣̇абогкаран̣иван̣н̣анаа
Dhammapāsādapokkharaṇivaṇṇanā
253. ж̇анараасим̣ гаарзд̇ваа д̇зна ж̇анараасинаа кан̣ид̇ваа на маабзси. гин̃жарахийд̇и ааха ‘‘ран̃н̃о банаа’’д̇иаад̣̇и. д̇ад̇т̇а гааран̣ам̣ барад̇о ааг̇амиссад̇и. згааяа взд̣̇игааяа баригкид̇д̇аа богкаран̣ияо . баривзн̣абарижчзд̣̇абарияанд̇зд̇и зд̇т̇а баривзн̣ам̣ наама саманд̇ад̇о вивадан̇г̇ан̣абхууд̇ам̣ богкаран̣ияаа д̇ийрам̣, д̇асса барижчзд̣̇абхууд̇з барияанд̇з згааяа взд̣̇игааяа баригкид̇д̇аа богкаран̣ияо. зд̇ад̣̇ахосийд̇и зд̇ам̣ ‘‘яам̣нуунаахам̣ имаасу богкаран̣ийсуу’’д̇иаад̣̇игам̣ ахосийд̇и. саб̣б̣од̇уганд̇и саб̣б̣зсу уд̇уусу бубпанагам̣. наанааван̣н̣ауббалаб̣ийж̇аад̣̇ийнийд̇и рад̇д̇анийлаад̣̇инаанааван̣н̣абубпзна бубпанагауббалаб̣ийж̇аад̣̇ийни. ж̇алаж̇ат̇алаж̇амааланд̇и ж̇алаж̇ат̇алаж̇абубпамаалам̣.
253.Janarāsiṃ kāretvā tena janarāsinā khaṇitvā na māpesi. Kiñcarahīti āha ‘‘rañño panā’’tiādi. Tattha kāraṇaṃ parato āgamissati. Ekāya vedikāya parikkhittā pokkharaṇiyo . Pariveṇaparicchedapariyanteti ettha pariveṇaṃ nāma samantato vivaṭaṅgaṇabhūtaṃ pokkharaṇiyā tīraṃ, tassa paricchedabhūte pariyante ekāya vedikāya parikkhittā pokkharaṇiyo. Etadahosīti etaṃ ‘‘yaṃnūnāhaṃ imāsu pokkharaṇīsū’’tiādikaṃ ahosīti. Sabbotukanti sabbesu utūsu pupphanakaṃ. Nānāvaṇṇauppalabījādīnīti rattanīlādinānāvaṇṇapupphena pupphanakauppalabījādīni. Jalajathalajamālanti jalajathalajapupphamālaṃ.
254. барижааравасзнаад̇и д̇ан̇кан̣игабарижааравасзна, ид̣̇ан̃жа батамам̣ бадтабид̇анияаамзнзва вуд̇д̇ам̣, бажчаа бана яаанасаяанаад̣̇ийни вияа ид̇т̇ияоби ад̇т̇игаанам̣ барижжад̇д̇аа зва. д̇знааха ‘‘ид̇т̇ийхибий’’д̇иаад̣̇и. барижжааг̇авасзнаад̇и нирабзгкабарижжааг̇авасзна. д̣̇ийяад̇ийд̇и д̣̇аанам̣, д̣̇зяяавад̇т̇у. д̇ам̣ аг̇г̇ийяад̇и ниссаж̇ж̇ийяад̇и зд̇т̇аад̇и д̣̇аанаг̇г̇ам̣, баривзсанадтаанам̣. д̇аад̣̇исаани ад̇т̇ийд̇и яаад̣̇исаани ран̃н̃о д̣̇аанаг̇г̇з комасукумаад̣̇ийни вад̇т̇аани, д̇аад̣̇исаани язсам̣ ад̇д̇ано санд̇агаани санд̇и. охааяаад̇и бахааяа д̇ад̇т̇зва табзд̇ваа. ад̇т̇о ад̇т̇и язсам̣ д̇зд̇и ад̇т̇игаа. звам̣ анад̇т̇игааби д̣̇адтаб̣б̣аа.
254.Paricāravasenāti taṅkhaṇikaparicāravasena, idañca paṭhamaṃ paṭṭhapitaniyāmeneva vuttaṃ, pacchā pana yānasayanādīni viya itthiyopi atthikānaṃ pariccattā eva. Tenāha ‘‘itthīhipī’’tiādi. Pariccāgavasenāti nirapekkhapariccāgavasena. Dīyatīti dānaṃ, deyyavatthu. Taṃ aggīyati nissajjīyati etthāti dānaggaṃ, parivesanaṭṭhānaṃ. Tādisāni atthīti yādisāni rañño dānagge khomasukhumādīni vatthāni, tādisāni yesaṃ attano santakāni santi. Ohāyāti pahāya tattheva ṭhapetvā. Attho atthi yesaṃ teti atthikā. Evaṃ anatthikāpi daṭṭhabbā.
255. галахасад̣̇д̣̇обийд̇и би-сад̣̇д̣̇зна д̣̇аанаад̇хиббааязна г̇зхад̇о нийхад̇ам̣ буна г̇зхам̣ бавзсзд̇ум̣ на яуд̇д̇анд̇и имамад̇т̇ам̣ самужжзд̇и. д̇знааха ‘‘на ко зд̇ам̣ амхаагам̣ бад̇ирууба’’нд̇иаад̣̇и (д̣̇ий. ни. 2.255).
255.Kalahasaddopīti pi-saddena dānādhippāyena gehato nīhataṃ puna gehaṃ pavesetuṃ na yuttanti imamatthaṃ samucceti. Tenāha ‘‘na kho etaṃ amhākaṃ patirūpa’’ntiādi (dī. ni. 2.255).
257. ун̣хийсамад̇т̇агзд̇и сикаабарияанд̇амад̇т̇агз. барижчзд̣̇амад̇т̇агзд̇и баасаад̣̇ан̇г̇ан̣абарижчзд̣̇асса мад̇т̇агз.
257.Uṇhīsamatthaketi sikhāpariyantamatthake. Paricchedamatthaketi pāsādaṅgaṇaparicchedassa matthake.
258. харад̇ийд̇и ад̇ивияа бабхассарабхаавзна жагкууни бадихаранд̇ам̣ д̣̇уд̣̇д̣̇игкад̇ааяа д̣̇идтияо харад̇и абанзнд̇ам̣ вияа ход̇и. д̇ам̣ бана харан̣ам̣ нзсам̣ барибпанд̣̇анзнаад̇и ааха ‘‘панд̣̇аабзд̇ий’’д̇и.
258.Haratīti ativiya pabhassarabhāvena cakkhūni paṭiharantaṃ duddikkhatāya diṭṭhiyo harati apanentaṃ viya hoti. Taṃ pana haraṇaṃ nesaṃ paripphandanenāti āha ‘‘phandāpetī’’ti.
батамабхаан̣аваараван̣н̣анаа нидтид̇аа.
Paṭhamabhāṇavāravaṇṇanā niṭṭhitā.
жхаанасамбад̇д̇иван̣н̣анаа
Jhānasampattivaṇṇanā
260. махад̇ияаа ид̣̇д̇хияаад̇и маханд̇зна ижчид̇ад̇т̇асамиж̇жханзна. д̇зсам̣язва ижчид̇ижчид̇ад̇т̇аанам̣. ‘‘анубхавид̇аб̣б̣аана’’нд̇и иминаа аанубхаава-сад̣̇д̣̇асса гаммасаад̇ханад̇ам̣ д̣̇ассзд̇и. буб̣б̣з самбаннам̣ гад̇ваа д̣̇зяяад̇хаммабарижжааг̇асса гад̇абхаавам̣ д̣̇ассзнд̇о ‘‘самбад̇д̇ибарижжааг̇ассаа’’д̇и ааха. ад̇д̇аанам̣ д̣̇амзд̇и зд̇знаад̇и д̣̇амо.
260.Mahatiyā iddhiyāti mahantena icchitatthasamijjhanena. Tesaṃyeva icchiticchitatthānaṃ. ‘‘Anubhavitabbāna’’nti iminā ānubhāva-saddassa kammasādhanataṃ dasseti. Pubbe sampannaṃ katvā deyyadhammapariccāgassa katabhāvaṃ dassento ‘‘sampattipariccāgassā’’ti āha. Attānaṃ dameti etenāti damo.
б̣од̇хисад̇д̇абуб̣б̣аяог̇аван̣н̣анаа
Bodhisattapubbayogavaṇṇanā
ассаад̇и махаасуд̣̇ассанаран̃н̃о. зго т̇зрод̇и аббан̃н̃аад̇о наамаг̇од̇д̇ад̇о ан̃н̃ад̇аро бут̇уж̇ж̇ано т̇зро. т̇зрам̣ д̣̇исваад̇и ан̃н̃ад̇арасмим̣ ругкамуулз нисиннам̣ д̣̇исваа. гадтад̇т̇аран̣анд̇и гадтамаяам̣ ад̇т̇аран̣ам̣, д̣̇аарупалаганд̇и ад̇т̇о.
Assāti mahāsudassanarañño. Eko theroti appaññāto nāmagottato aññataro puthujjano thero. Theraṃ disvāti aññatarasmiṃ rukkhamūle nisinnaṃ disvā. Kaṭṭhattharaṇanti kaṭṭhamayaṃ attharaṇaṃ, dāruphalakanti attho.
барибхог̇абхааж̇ананд̇и баанийяабарибхож̇анийяаад̣̇ибарибхог̇аяог̇яам̣ бхааж̇анам̣. аараган̣даганд̇и сууживиж̇жханагаган̣дагам̣. бибпалиганд̇и куд̣̇д̣̇агасад̇т̇агам̣. уд̣̇агад̇умб̣аганд̇и гун̣д̣игам̣.
Paribhogabhājananti pānīyaparibhojanīyādiparibhogayogyaṃ bhājanaṃ. Ārakaṇṭakanti sūcivijjhanakakaṇṭakaṃ. Pipphalikanti khuddakasatthakaṃ. Udakatumbakanti kuṇḍikaṃ.
гуудааг̇аарад̣̇ваарзязва нивад̇д̇зсийд̇и гуудааг̇аарам̣ бавидтагаалад̇о бадтааяа д̇зсам̣ мижчаавид̇аггаанам̣ бавад̇д̇ияаа огаасам̣ наад̣̇ааси.
Kūṭāgāradvāreyeva nivattesīti kūṭāgāraṃ paviṭṭhakālato paṭṭhāya tesaṃ micchāvitakkānaṃ pavattiyā okāsaṃ nādāsi.
261. гасин̣амзва бан̃н̃ааяад̇и махаабурисасса д̇ад̇т̇а д̇ад̇т̇а гад̇аад̇хигаарад̇д̇аа, д̇зсан̃жа бад̣̇зсаанам̣ субаригаммагад̇агасин̣асад̣̇исад̇д̇аа.
261.Kasiṇameva paññāyati mahāpurisassa tattha tattha katādhikārattā, tesañca padesānaṃ suparikammakatakasiṇasadisattā.
262. жад̇д̇аари жхаанаанийд̇и жад̇д̇аари гасин̣аж̇жхаанаани. гасин̣аж̇жхаанаббаман̃н̃аанам̣язва важанам̣ д̇аасам̣ д̇ад̣̇аа аад̣̇араг̇аарававасзна ниб̣б̣ад̇д̇ид̇ад̇д̇аа. махааб̣од̇хисад̇д̇аанан̃хи аруубаж̇жхаанзсу аад̣̇аро над̇т̇и, абхин̃н̃аабад̣̇адтаанад̇ам̣ бана санд̇хааяа д̇ааниби ниб̣б̣ад̇д̇знд̇и, д̇асмаа махаасад̇д̇о д̇аабасабариб̣б̣ааж̇агагаалз яад̇д̇агз логияаг̇ун̣з ниб̣б̣ад̇д̇зд̇и, д̇з саб̣б̣зби д̇ад̣̇аа ниб̣б̣ад̇д̇зсиязва. д̇знааха ‘‘махаабурисо банаа’’д̇иаад̣̇и.
262.Cattāri jhānānīti cattāri kasiṇajjhānāni. Kasiṇajjhānappamaññānaṃyeva vacanaṃ tāsaṃ tadā ādaragāravavasena nibbattitattā. Mahābodhisattānañhi arūpajjhānesu ādaro natthi, abhiññāpadaṭṭhānataṃ pana sandhāya tānipi nibbattenti, tasmā mahāsatto tāpasaparibbājakakāle yattake lokiyaguṇe nibbatteti, te sabbepi tadā nibbattesiyeva. Tenāha ‘‘mahāpuriso panā’’tiādi.
жад̇ураасийд̇инаг̇арасахассаад̣̇иван̣н̣анаа
Caturāsītinagarasahassādivaṇṇanā
263. абхихарид̇аб̣б̣абхад̇д̇анд̇и убанзд̇аб̣б̣абхад̇д̇ам̣.
263.Abhiharitabbabhattanti upanetabbabhattaṃ.
264. ниб̣ад̣̇д̇хавад̇д̇анд̇и буб̣б̣з убаниб̣ад̣̇д̇хам̣ баагавад̇д̇ам̣.
264.Nibaddhavattanti pubbe upanibaddhaṃ pākavattaṃ.
субхад̣̇д̣̇аад̣̇звиубасан̇гаманаван̣н̣анаа
Subhaddādeviupasaṅkamanavaṇṇanā
265. ааваддзд̇ваад̇и ад̇ивисид̇ваа. яам̣ яам̣ ран̃н̃о ижчид̇ам̣ д̣̇аануубагаран̣ан̃жзва бхог̇уубагаран̣ан̃жа, д̇асса д̇асса д̇ат̇зва самид̣̇д̇хабхаавам̣ вид̇т̇авад̇и.
265.Āvaṭṭetvāti ativisitvā. Yaṃ yaṃ rañño icchitaṃ dānūpakaraṇañceva bhogūpakaraṇañca, tassa tassa tatheva samiddhabhāvaṃ vitthavati.
266. сажз бана рааж̇аа ж̇ийвид̇з чанд̣̇ам̣ ж̇анзяяа, ид̇о барамби жирам̣ гаалам̣ д̇идтзяяа махид̣̇д̇хиго махаанубхаавод̇и звам̣ махаж̇жхаасаяаа д̣̇звий бхог̇зсу, ж̇ийвид̇з жа рааж̇аанам̣ саабзгкам̣ гаад̇ум̣ вааяами. д̇зна вуд̇д̇ам̣ ‘‘маа хзва ко рааж̇аа’’д̇иаад̣̇и. д̇знзвааха ‘‘д̇асса гаалан̇гирияам̣ анижчамаанаа’’д̇иаад̣̇и. чанд̣̇ам̣ ж̇анзхийд̇и зд̇т̇а чанд̣̇а-сад̣̇д̣̇о д̇ан̣хаабарияааяод̇и ааха ‘‘бзмам̣ уббаад̣̇зхий’’д̇и. абзгкад̇и аарамман̣ам̣ зд̇ааяа на виссаж̇ж̇зд̇ийд̇и абзгкаа, д̇ан̣хаа.
266. Sace pana rājā jīvite chandaṃ janeyya, ito parampi ciraṃ kālaṃ tiṭṭheyya mahiddhiko mahānubhāvoti evaṃ mahajjhāsayā devī bhogesu, jīvite ca rājānaṃ sāpekkhaṃ kātuṃ vāyami. Tena vuttaṃ ‘‘mā heva kho rājā’’tiādi. Tenevāha ‘‘tassa kālaṅkiriyaṃ anicchamānā’’tiādi. Chandaṃ janehīti ettha chanda-saddo taṇhāpariyāyoti āha ‘‘pemaṃ uppādehī’’ti. Apekkhati ārammaṇaṃ etāya na vissajjetīti apekkhā, taṇhā.
267. г̇арахид̇аад̇и зд̇т̇а гзхи г̇арахид̇аа, гасмаа жа г̇арахид̇аад̇и анд̇олийнам̣ жод̣̇анам̣ виссаж̇ж̇знд̇о ‘‘б̣уд̣̇д̇хзхий’’д̇иаад̣̇имааха, д̇зна вин̃н̃уг̇арахид̇ад̇д̇аа, д̣̇уг̇г̇ад̇исам̣вад̇д̇анияад̇о жа саабзгкагаалагирияаа бариваж̇ж̇зд̇аб̣б̣аад̇и д̣̇ассзд̇и.
267.Garahitāti ettha kehi garahitā, kasmā ca garahitāti antolīnaṃ codanaṃ vissajjento ‘‘buddhehī’’tiādimāha, tena viññugarahitattā, duggatisaṃvattaniyato ca sāpekkhakālakiriyā parivajjetabbāti dasseti.
268. згаманд̇ам̣ г̇анд̇ваад̇и ран̃н̃о жагкубат̇ам̣ виж̇ахид̇ваа.
268.Ekamantaṃ gantvāti rañño cakkhupathaṃ vijahitvā.
б̣рахмалогуубаг̇аманаван̣н̣анаа
Brahmalokūpagamanavaṇṇanā
269. сон̣ассаад̇и гол̣ивийсасса сон̣асса. згаа бхад̇д̇абаад̇ийд̇и згам̣ бхад̇д̇авад̣дхид̇агам̣. д̇аад̣̇исам̣ бхад̇д̇анд̇и д̇ат̇ааруубам̣ г̇арум̣ мад̇хурам̣ синид̣̇д̇хам̣ бхад̇д̇ам̣. бхуд̇д̇аананд̇и бхуд̇д̇аванд̇аанам̣.
269.Soṇassāti koḷivīsassa soṇassa. Ekā bhattapātīti ekaṃ bhattavaḍḍhitakaṃ. Tādisaṃ bhattanti tathārūpaṃ garuṃ madhuraṃ siniddhaṃ bhattaṃ. Bhuttānanti bhuttavantānaṃ.
271. д̣̇аасамануссаад̇и д̣̇аасаа жзва ааяуд̇д̇агамануссаа жа.
271.Dāsamanussāti dāsā ceva āyuttakamanussā ca.
ид̣̇аани яат̇аавуд̇д̇ааяа ран̃н̃о махаасуд̣̇ассанасса бхог̇асамбад̇д̇ияаа гаммасаригкад̇ам̣ уд̣̇д̇харанд̇о ‘‘зд̇аани банаа’’д̇иаад̣̇имааха, д̇ам̣ сувин̃н̃зяяамзва.
Idāni yathāvuttāya rañño mahāsudassanassa bhogasampattiyā kammasarikkhataṃ uddharanto ‘‘etāni panā’’tiādimāha, taṃ suviññeyyameva.
272. аад̣̇ид̇о бадтааяаад̇и самуд̣̇ааг̇аманад̇о бадтааяа. яад̇т̇а д̇ам̣ бун̃н̃ам̣ ааяуухид̇ам̣, яад̇о саа самбад̇д̇и ниб̣б̣ад̇д̇аа, д̇ад̇о д̇ад̇ияад̇д̇абхаавад̇о бабхуд̇и. махаасуд̣̇ассанасса ж̇аад̇агад̣̇зсанаа хи д̇ад̣̇аа самуд̣̇ааг̇аманад̇о бадтааяа бхаг̇авад̇аа д̣̇зсид̇аад̇и. бам̣свааг̇аарагийл̣ам̣ вияаад̇и яат̇аа наама д̣̇аарагаа бам̣суухи ваабиг̇зхабхож̇анаад̣̇ийни д̣̇ассзнд̇аа яат̇ааружи гийл̣ид̇ваа г̇аманагаалз саб̣б̣ам̣ д̇ам̣ вид̇хам̣сзнд̇аа г̇ажчанд̇и, звамзва бхаг̇аваа махаасуд̣̇ассанагаалз ад̇д̇анаа анубхууд̇ам̣ д̣̇иб̣б̣асамбад̇д̇исад̣̇исам̣ ажинд̇зяяаанубхаавасамбад̇д̇им̣ вид̇т̇аарад̇о д̣̇ассзд̇ваа буна ад̇д̇ано д̣̇зсанам̣ аад̣̇ийнаваниссаран̣ад̣̇ассанавасзна виваддаабхимукам̣ вибаривад̇д̇знд̇о ‘‘саб̣б̣аа саа самбад̇д̇и анижжад̇ааяа вибарин̣ад̇аа вид̇хам̣сид̇аа’’д̇и д̣̇ассзнд̇о ‘‘бассаананд̣̇аа’’д̇иаад̣̇имааха. вибарин̣ад̇аад̇и вибарин̣аамам̣ сабхаававиг̇амам̣ г̇ад̇аа. д̇знааха ‘‘багад̇ивиж̇аханзнаа’’д̇иаад̣̇и. багад̇ийд̇и сабхаавад̇хаммаанам̣ уд̣̇аяаваяабарижчинно гагкал̣апусанаад̣̇исабхааво, со бхан̇г̇агкан̣ад̇о бадтааяа ж̇ахид̇о, барижжаж̇анд̇о саб̣б̣асо над̇т̇зва. д̇знааха ‘‘ниб̣б̣уд̇абад̣̇ийбо вияа абан̃н̃ад̇д̇игабхаавам̣ г̇ад̇аа’’д̇и.
272.Āditopaṭṭhāyāti samudāgamanato paṭṭhāya. Yattha taṃ puññaṃ āyūhitaṃ, yato sā sampatti nibbattā, tato tatiyattabhāvato pabhuti. Mahāsudassanassa jātakadesanā hi tadā samudāgamanato paṭṭhāya bhagavatā desitāti. Paṃsvāgārakīḷaṃ viyāti yathā nāma dārakā paṃsūhi vāpigehabhojanādīni dassentā yathāruci kīḷitvā gamanakāle sabbaṃ taṃ vidhaṃsentā gacchanti, evameva bhagavā mahāsudassanakāle attanā anubhūtaṃ dibbasampattisadisaṃ acinteyyānubhāvasampattiṃ vitthārato dassetvā puna attano desanaṃ ādīnavanissaraṇadassanavasena vivaṭṭābhimukhaṃ viparivattento ‘‘sabbā sā sampatti aniccatāya vipariṇatā vidhaṃsitā’’ti dassento ‘‘passānandā’’tiādimāha. Vipariṇatāti vipariṇāmaṃ sabhāvavigamaṃ gatā. Tenāha ‘‘pakativijahanenā’’tiādi. Pakatīti sabhāvadhammānaṃ udayavayaparicchinno kakkhaḷaphusanādisabhāvo, so bhaṅgakkhaṇato paṭṭhāya jahito, pariccajanto sabbaso nattheva. Tenāha ‘‘nibbutapadīpo viya apaññattikabhāvaṃ gatā’’ti.
зд̇д̇аавад̇аад̇и аад̣̇ид̇о бадтааяа бавад̇д̇зна зд̇д̇агзна д̣̇зсанаамаг̇г̇зна. анзгаани вассагодисад̇асахассааниязва уб̣б̣зд̇хо зд̇иссаад̇и анзгавассагодисад̇асахассуб̣б̣зд̇хаа. анижжалагкан̣ам̣ аад̣̇ааяаад̇и д̇ам̣ самбад̇д̇иг̇ад̇ам̣ анижжалагкан̣ам̣ д̣̇зсанааяа г̇ахзд̇ваа вибхаавзд̇ваа. яат̇аа ниссзн̣имужжанз д̇аад̣̇исам̣ сад̇ахад̇т̇уб̣б̣зд̇хам̣ ругкам̣ багад̇ибурисзна аарохид̇ум̣ на саггаа, звам̣ анижжад̇аавибхааванзна д̇ассаа самбад̇д̇ияаа абзгкааниссзн̣имужжанз гзнажи аарохид̇ум̣ на саггаад̇и ааха ‘‘анижжалагкан̣ам̣ аад̣̇ааяа ниссзн̣им̣ мун̃жанд̇о вияаа’’д̇и. д̇знзваад̇и яат̇аавуд̇д̇агааран̣знзва, аад̣̇ид̇о саад̇исаяам̣ гаамзсу ассаад̣̇ам̣ д̣̇ассзд̇вааби убари нзсам̣ ‘‘бассаананд̣̇аа’’д̇иаад̣̇инаа аад̣̇ийнавам̣, огаарам̣, сам̣гилзсам̣, нзгкаммз аанисам̣сан̃жа вибхаавзд̇ваа д̣̇зсанааяа нидтаабид̇ад̇д̇аа. буб̣б̣зд̇и ад̇ийд̇агаалз. васабхарааж̇аад̇и васабханаамаго сийхал̣амахаарааж̇аа.
Ettāvatāti ādito paṭṭhāya pavattena ettakena desanāmaggena. Anekāni vassakoṭisatasahassāniyeva ubbedho etissāti anekavassakoṭisatasahassubbedhā. Aniccalakkhaṇaṃ ādāyāti taṃ sampattigataṃ aniccalakkhaṇaṃ desanāya gahetvā vibhāvetvā. Yathā nisseṇimuccane tādisaṃ satahatthubbedhaṃ rukkhaṃ pakatipurisena ārohituṃ na sakkā, evaṃ aniccatāvibhāvanena tassā sampattiyā apekkhānisseṇimuccane kenaci ārohituṃ na sakkāti āha ‘‘aniccalakkhaṇaṃ ādāya nisseṇiṃ muñcanto viyā’’ti. Tenevāti yathāvuttakāraṇeneva, ādito sātisayaṃ kāmesu assādaṃ dassetvāpi upari nesaṃ ‘‘passānandā’’tiādinā ādīnavaṃ, okāraṃ, saṃkilesaṃ, nekkhamme ānisaṃsañca vibhāvetvā desanāya niṭṭhāpitattā. Pubbeti atītakāle. Vasabharājāti vasabhanāmako sīhaḷamahārājā.
уд̣̇агабубпул̣аад̣̇аяод̇и аад̣̇и-сад̣̇д̣̇зна д̇ин̣аг̇г̇з уссааваб̣инд̣̇уаад̣̇игз сан̇г̇ан̣хаад̇и.
Udakapupphuḷādayoti ādi-saddena tiṇagge ussāvabinduādike saṅgaṇhāti.
махаасуд̣̇ассанасса банаад̇и бана-сад̣̇д̣̇о висзсад̇т̇аж̇од̇ано, д̇зна махаасуд̣̇ассанамахаарааж̇аа жхаанаабхин̃н̃аасамаабад̇д̇ияо ниб̣б̣ад̇д̇зси, д̇ад̣̇аг̇г̇зна барисуд̣̇д̇хз жа саман̣абхаавз бад̇идтид̇о, яад̇о вид̇хуяа зва гаамавид̇аггаад̣̇исаман̣абхаавасам̣гилзсам̣ сун̃н̃ааг̇аарам̣ баависи, звам̣бхууд̇ассааби д̇асса гаалам̣ гирияад̇о сад̇д̇амз д̣̇ивасз саб̣б̣аа жаггавад̇д̇исамбад̇д̇и анд̇арахид̇аа, на д̇ад̇о барам̣, ахо ажчарияамануссо анан̃н̃асаад̇хааран̣аг̇ун̣ависзсод̇и имам̣ висзсам̣ д̣̇ассзд̇и.
Mahāsudassanassa panāti pana-saddo visesatthajotano, tena mahāsudassanamahārājā jhānābhiññāsamāpattiyo nibbattesi, tadaggena parisuddhe ca samaṇabhāve patiṭṭhito, yato vidhuya eva kāmavitakkādisamaṇabhāvasaṃkilesaṃ suññāgāraṃ pāvisi, evaṃbhūtassāpi tassa kālaṃ kiriyato sattame divase sabbā cakkavattisampatti antarahitā, na tato paraṃ, aho acchariyamanusso anaññasādhāraṇaguṇavisesoti imaṃ visesaṃ dasseti.
анаарул̣ханд̇и ‘‘рааж̇аа гира буб̣б̣з г̇ахабад̇игулз ниб̣б̣ад̇д̇ий’’д̇иаад̣̇инаа, (д̣̇ий. ни. адта. 2.260) ‘‘буна т̇зрам̣ ааманд̇зсий’’д̇иаад̣̇инаа (д̣̇ий. ни. адта. 2.272) жа вуд̇д̇амад̇т̇ам̣ санд̇хааяааха. со хи имасмим̣ суд̇д̇з сан̇г̇ийд̇им̣ анаарул̣хо, ан̃н̃ад̇т̇а бана ааг̇ад̇о имиссаа д̣̇зсанааяа бидтивад̇д̇агабхаавзна. яам̣ банзд̇т̇а ад̇т̇ад̇о на вибхад̇д̇ам̣, д̇ам̣ сувин̃н̃зяяам̣ зваад̇и.
Anāruḷhanti ‘‘rājā kira pubbe gahapatikule nibbattī’’tiādinā, (dī. ni. aṭṭha. 2.260) ‘‘puna theraṃ āmantesī’’tiādinā (dī. ni. aṭṭha. 2.272) ca vuttamatthaṃ sandhāyāha. So hi imasmiṃ sutte saṅgītiṃ anāruḷho, aññattha pana āgato imissā desanāya piṭṭhivattakabhāvena. Yaṃ panettha atthato na vibhattaṃ, taṃ suviññeyyaṃ evāti.
махаасуд̣̇ассанасуд̇д̇аван̣н̣анааяа лийнад̇т̇аббагаасанаа.
Mahāsudassanasuttavaṇṇanāya līnatthappakāsanā.
Related texts:
д̇ибидага (муула) • Tipiṭaka (Mūla) / суд̇д̇абидага • Suttapiṭaka / д̣̇ийгханигааяа • Dīghanikāya / 4. махаасуд̣̇ассанасуд̇д̇ам̣ • 4. Mahāsudassanasuttaṃ
адтагат̇аа • Aṭṭhakathā / суд̇д̇абидага (адтагат̇аа) • Suttapiṭaka (aṭṭhakathā) / д̣̇ийгха нигааяа (адтагат̇аа) • Dīgha nikāya (aṭṭhakathā) / 4. махаасуд̣̇ассанасуд̇д̇аван̣н̣анаа • 4. Mahāsudassanasuttavaṇṇanā
