| Library / Tipiṭaka / д̇ибидага • Tipiṭaka / ан̇г̇уд̇д̇аранигааяа (адтагат̇аа) • Aṅguttaranikāya (aṭṭhakathā) |
6. махаасубинасуд̇д̇аван̣н̣анаа
6. Mahāsupinasuttavaṇṇanā
196. чадтз махаасубинаад̇и маханд̇зхи бурисзхи бассид̇аб̣б̣ад̇о маханд̇аанан̃жа ад̇т̇аанам̣ нимид̇д̇абхаавад̇о махаасубинаа. баад̇урахзсунд̇и баагадаа ахзсум̣. д̇ад̇т̇а субинам̣ бассанд̇о жад̇уухи гааран̣зхи бассад̇и д̇хаад̇угкобхад̇о ваа анубхууд̇абуб̣б̣ад̇о ваа д̣̇звад̇обасам̣хаарад̇о ваа буб̣б̣анимид̇д̇ад̇о ваад̇и.
196. Chaṭṭhe mahāsupināti mahantehi purisehi passitabbato mahantānañca atthānaṃ nimittabhāvato mahāsupinā. Pāturahesunti pākaṭā ahesuṃ. Tattha supinaṃ passanto catūhi kāraṇehi passati dhātukkhobhato vā anubhūtapubbato vā devatopasaṃhārato vā pubbanimittato vāti.
д̇ад̇т̇а бид̇д̇аад̣̇ийнам̣ кобхагаран̣абажжаяаббаяог̇зна кубхид̇ад̇хаад̇уго д̇хаад̇угкобхад̇о субинам̣ бассад̇и. бассанд̇о жа наанаавид̇хам̣ субинам̣ бассад̇и баб̣б̣ад̇аа бад̇анд̇о вияа, аагаасзна г̇ажчанд̇о вияа, ваал̣амиг̇ахад̇т̇ижораад̣̇ийхи ануб̣ад̣̇д̇хо вияа жа. анубхууд̇абуб̣б̣ад̇о бассанд̇о буб̣б̣з анубхууд̇абуб̣б̣ам̣ аарамман̣ам̣ бассад̇и. д̣̇звад̇обасам̣хаарад̇о бассанд̇асса д̣̇звад̇аа ад̇т̇агаамад̇ааяа ваа анад̇т̇агаамад̇ааяа ваа ад̇т̇ааяа ваа анад̇т̇ааяа ваа наанаавид̇хаани аарамман̣аани убасам̣харанд̇и. со д̇аасам̣ д̣̇звад̇аанам̣ аанубхаавзна д̇аани аарамман̣аани бассад̇и. буб̣б̣анимид̇д̇ад̇о бассанд̇о бун̃н̃аабун̃н̃авасзна уббаж̇ж̇ид̇угаамасса ад̇т̇асса ваа анад̇т̇асса ваа буб̣б̣анимид̇д̇абхууд̇ам̣ субинам̣ бассад̇и б̣од̇хисад̇д̇амаад̇аа вияа буд̇д̇абадилаабханимид̇д̇ам̣, госаларааж̇аа вияа сол̣аса субинз, аяамзва бхаг̇аваа б̣од̇хисад̇д̇абхууд̇о имз бан̃жа махаасубинз вияа жаад̇и.
Tattha pittādīnaṃ khobhakaraṇapaccayappayogena khubhitadhātuko dhātukkhobhato supinaṃ passati. Passanto ca nānāvidhaṃ supinaṃ passati pabbatā patanto viya, ākāsena gacchanto viya, vāḷamigahatthicorādīhi anubaddho viya ca. Anubhūtapubbato passanto pubbe anubhūtapubbaṃ ārammaṇaṃ passati. Devatopasaṃhārato passantassa devatā atthakāmatāya vā anatthakāmatāya vā atthāya vā anatthāya vā nānāvidhāni ārammaṇāni upasaṃharanti. So tāsaṃ devatānaṃ ānubhāvena tāni ārammaṇāni passati. Pubbanimittato passanto puññāpuññavasena uppajjitukāmassa atthassa vā anatthassa vā pubbanimittabhūtaṃ supinaṃ passati bodhisattamātā viya puttapaṭilābhanimittaṃ, kosalarājā viya soḷasa supine, ayameva bhagavā bodhisattabhūto ime pañca mahāsupine viya cāti.
д̇ад̇т̇а яам̣ д̇хаад̇угкобхад̇о анубхууд̇абуб̣б̣ад̇о жа субинз бассад̇и, на д̇ам̣ сажжам̣ ход̇и. яам̣ д̣̇звад̇обасам̣хаарад̇о бассад̇и, д̇ам̣ сажжам̣ ваа ход̇и алигам̣ ваа. гуд̣̇д̇хаа хи д̣̇звад̇аа убааязна винаасзд̇угаамаа вибарийд̇амби гад̇ваа д̣̇ассзнд̇и. яам̣ бана буб̣б̣анимид̇д̇ад̇о бассад̇и, д̇ам̣ зганд̇ам̣ сажжамзва ход̇и. зд̇зсам̣ жад̇уннам̣ муулагааран̣аанам̣ сам̣саг̇г̇абхзд̣̇ад̇оби субинабхзд̣̇о ход̇иязва.
Tattha yaṃ dhātukkhobhato anubhūtapubbato ca supine passati, na taṃ saccaṃ hoti. Yaṃ devatopasaṃhārato passati, taṃ saccaṃ vā hoti alikaṃ vā. Kuddhā hi devatā upāyena vināsetukāmā viparītampi katvā dassenti. Yaṃ pana pubbanimittato passati, taṃ ekantaṃ saccameva hoti. Etesaṃ catunnaṃ mūlakāraṇānaṃ saṃsaggabhedatopi supinabhedo hotiyeva.
д̇ам̣ банзд̇ам̣ жад̇уб̣б̣ид̇хамби субинам̣ сзкабут̇уж̇ж̇анаава бассанд̇и аббахийнавибаллаасад̇д̇аа, асзкаа на бассанд̇и бахийнавибаллаасад̇д̇аа. гим̣ банзд̇ам̣ бассанд̇о суд̇д̇о бассад̇и бадиб̣уд̣̇д̇хо, уд̣̇ааху нзва суд̇д̇о на бадиб̣уд̣̇д̇ход̇и? гин̃жзд̇т̇а яад̣̇и д̇аава суд̇д̇о бассад̇и, абхид̇хаммавирод̇хо аабаж̇ж̇ад̇и. бхаван̇г̇ажид̇д̇зна хи субад̇и, д̇ам̣ руубанимид̇д̇аад̣̇иаарамман̣ам̣ рааг̇аад̣̇исамбаяуд̇д̇ам̣ ваа на ход̇и. субинам̣ бассанд̇асса жа ийд̣̇исаани жид̇д̇аани уббаж̇ж̇анд̇и. ат̇а бадиб̣уд̣̇д̇хо бассад̇и, винаяавирод̇хо аабаж̇ж̇ад̇и. яан̃хи бадиб̣уд̣̇д̇хо бассад̇и, д̇ам̣ саб̣б̣охааригажид̇д̇зна бассад̇и. саб̣б̣охааригажид̇д̇зна жа гад̇з вийд̇иггамз анаабад̇д̇и наама над̇т̇и. субинам̣ бассанд̇зна бана гад̇зби вийд̇иггамз зганд̇ам̣ анаабад̇д̇и зва. ат̇а нзва суд̇д̇о на бадиб̣уд̣̇д̇хо бассад̇и, на наама бассад̇и. зван̃жа сад̇и субинасса абхааво жа аабаж̇ж̇ад̇и? на абхааво. гасмаа? яасмаа габимид̣̇д̇хабарзд̇о бассад̇и. вуд̇д̇ан̃хзд̇ам̣ – ‘‘габимид̣̇д̇хабарзд̇о ко, махаарааж̇а, субинам̣ бассад̇ий’’д̇и.
Taṃ panetaṃ catubbidhampi supinaṃ sekhaputhujjanāva passanti appahīnavipallāsattā, asekhā na passanti pahīnavipallāsattā. Kiṃ panetaṃ passanto sutto passati paṭibuddho, udāhu neva sutto na paṭibuddhoti? Kiñcettha yadi tāva sutto passati, abhidhammavirodho āpajjati. Bhavaṅgacittena hi supati, taṃ rūpanimittādiārammaṇaṃ rāgādisampayuttaṃ vā na hoti. Supinaṃ passantassa ca īdisāni cittāni uppajjanti. Atha paṭibuddho passati, vinayavirodho āpajjati. Yañhi paṭibuddho passati, taṃ sabbohārikacittena passati. Sabbohārikacittena ca kate vītikkame anāpatti nāma natthi. Supinaṃ passantena pana katepi vītikkame ekantaṃ anāpatti eva. Atha neva sutto na paṭibuddho passati, na nāma passati. Evañca sati supinassa abhāvo ca āpajjati? Na abhāvo. Kasmā? Yasmā kapimiddhapareto passati. Vuttañhetaṃ – ‘‘kapimiddhapareto kho, mahārāja, supinaṃ passatī’’ti.
габимид̣̇д̇хабарзд̇од̇и маггаданид̣̇д̣̇ааяа яуд̇д̇о. яат̇аа хи маггадасса нид̣̇д̣̇аа лахубаривад̇д̇аа ход̇и, звам̣ яаа нид̣̇д̣̇аа бунаббунам̣ гусалаад̣̇ижид̇д̇авогин̣н̣ад̇д̇аа лахубаривад̇д̇аа, яассаа бавад̇д̇ияам̣ бунаббунам̣ бхаван̇г̇ад̇о уд̇д̇аран̣ам̣ ход̇и, д̇ааяа яуд̇д̇о субинам̣ бассад̇и. д̇знааяам̣ субино гусалоби ход̇и агусалоби аб̣яаагад̇оби. д̇ад̇т̇а субинанд̇з жзд̇ияаванд̣̇анад̇хаммассаванад̇хаммад̣̇зсанаад̣̇ийни гаронд̇асса гусало, баан̣аад̇ибаад̇аад̣̇ийни гаронд̇асса агусало, д̣̇вийхи анд̇зхи муд̇д̇о ааваж̇ж̇анад̇ад̣̇аарамман̣агкан̣з аб̣яаагад̇од̇и взд̣̇ид̇аб̣б̣о. свааяам̣ д̣̇уб̣б̣алавад̇т̇угад̇д̇аа жзд̇анааяа бадисанд̇хим̣ аагад̣дхид̇ум̣ асамад̇т̇о. бавад̇д̇з бана ан̃н̃зхи гусалаагусалзхи убад̇т̇амбхид̇о вибаагам̣ д̣̇зд̇и. гин̃жааби вибаагам̣ д̣̇зд̇и, ат̇а ко ависаяз уббаннад̇д̇аа аб̣б̣охааригаава субинанд̇ажзд̇анаа. со банзса субино гаалавасзнаби д̣̇иваа д̇аава д̣̇идто на самзд̇и, д̇ат̇аа батамаяаамз маж̇жхимаяаамз бажчимаяаамз жа. б̣алавабажжуусз бана асид̇абийд̇акааяид̇з саммаа барин̣аамам̣ г̇ад̇з гааяасмим̣ ож̇ааяа бад̇идтид̇ааяа арун̣з уг̇г̇ажчамаанзва д̣̇идто субино самзд̇и. идтанимид̇д̇ам̣ субинам̣ бассанд̇о идтам̣ бадилабхад̇и, анидтанимид̇д̇ам̣ бассанд̇о анидтам̣.
Kapimiddhaparetoti makkaṭaniddāya yutto. Yathā hi makkaṭassa niddā lahuparivattā hoti, evaṃ yā niddā punappunaṃ kusalādicittavokiṇṇattā lahuparivattā, yassā pavattiyaṃ punappunaṃ bhavaṅgato uttaraṇaṃ hoti, tāya yutto supinaṃ passati. Tenāyaṃ supino kusalopi hoti akusalopi abyākatopi. Tattha supinante cetiyavandanadhammassavanadhammadesanādīni karontassa kusalo, pāṇātipātādīni karontassa akusalo, dvīhi antehi mutto āvajjanatadārammaṇakkhaṇe abyākatoti veditabbo. Svāyaṃ dubbalavatthukattā cetanāya paṭisandhiṃ ākaḍḍhituṃ asamattho. Pavatte pana aññehi kusalākusalehi upatthambhito vipākaṃ deti. Kiñcāpi vipākaṃ deti, atha kho avisaye uppannattā abbohārikāva supinantacetanā. So panesa supino kālavasenapi divā tāva diṭṭho na sameti, tathā paṭhamayāme majjhimayāme pacchimayāme ca. Balavapaccūse pana asitapītakhāyite sammā pariṇāmaṃ gate kāyasmiṃ ojāya patiṭṭhitāya aruṇe uggacchamāneva diṭṭho supino sameti. Iṭṭhanimittaṃ supinaṃ passanto iṭṭhaṃ paṭilabhati, aniṭṭhanimittaṃ passanto aniṭṭhaṃ.
имз бана бан̃жа махаасубинз нзва логияамахааж̇ано бассад̇и, на махаарааж̇аано, на жаггавад̇д̇ирааж̇аано, на аг̇г̇асаавагаа, на бажжзгаб̣уд̣̇д̇хаа, на саммаасамб̣уд̣̇д̇хаа, зго саб̣б̣ан̃н̃уб̣од̇хисад̇д̇оязва бассад̇и. амхаагам̣ бана б̣од̇хисад̇д̇о гад̣̇аа имз субинз бассийд̇и? ‘‘свз б̣уд̣̇д̇хо бхависсаамий’’д̇и жаад̇уд̣̇д̣̇асияам̣ багкасса рад̇д̇ивибхааяанагаалз басси. д̇зрасияанд̇иби вад̣̇анд̇иязва. со имз субинз д̣̇исваа удтааяа баллан̇гам̣ аабхун̃ж̇ид̇ваа нисинно жинд̇зси – ‘‘сажз маяаа габилавад̇т̇унаг̇арз имз субинаа д̣̇идтаа ассу, бид̇у махаарааж̇асса гат̇зяяам̣. сажз бана мз маад̇аа ж̇ийвзяяа, д̇ассаа гат̇зяяам̣. имасмим̣ ко бана таанз имзсам̣ бадиг̇г̇аахаго наама над̇т̇и, ахамзва бадиг̇ан̣хиссаамий’’д̇и. д̇ад̇о ‘‘ид̣̇ам̣ имасса буб̣б̣анимид̇д̇ам̣ ид̣̇ам̣ имассаа’’д̇и саяамзва субинз бадиг̇г̇ан̣хид̇ваа урувзлаг̇аамз суж̇аад̇ааяа д̣̇иннам̣ бааяаасам̣ барибхун̃ж̇ид̇ваа б̣од̇химан̣д̣ам̣ ааруяха б̣од̇хим̣ бад̇ваа ануггамзна ж̇зд̇аванз вихаранд̇о ад̇д̇ано магулаб̣уд̣̇д̇хагаалз д̣̇идтз бан̃жа махаасубинз вид̇т̇аарзд̇ум̣ бхигкуу ааманд̇зд̇ваа имам̣ д̣̇зсанам̣ аарабхи.
Ime pana pañca mahāsupine neva lokiyamahājano passati, na mahārājāno, na cakkavattirājāno, na aggasāvakā, na paccekabuddhā, na sammāsambuddhā, eko sabbaññubodhisattoyeva passati. Amhākaṃ pana bodhisatto kadā ime supine passīti? ‘‘Sve buddho bhavissāmī’’ti cātuddasiyaṃ pakkhassa rattivibhāyanakāle passi. Terasiyantipi vadantiyeva. So ime supine disvā uṭṭhāya pallaṅkaṃ ābhuñjitvā nisinno cintesi – ‘‘sace mayā kapilavatthunagare ime supinā diṭṭhā assu, pitu mahārājassa katheyyaṃ. Sace pana me mātā jīveyya, tassā katheyyaṃ. Imasmiṃ kho pana ṭhāne imesaṃ paṭiggāhako nāma natthi, ahameva paṭigaṇhissāmī’’ti. Tato ‘‘idaṃ imassa pubbanimittaṃ idaṃ imassā’’ti sayameva supine paṭiggaṇhitvā uruvelagāme sujātāya dinnaṃ pāyāsaṃ paribhuñjitvā bodhimaṇḍaṃ āruyha bodhiṃ patvā anukkamena jetavane viharanto attano makulabuddhakāle diṭṭhe pañca mahāsupine vitthāretuṃ bhikkhū āmantetvā imaṃ desanaṃ ārabhi.
д̇ад̇т̇а махаабат̇авийд̇и жаггаваал̣аг̇аб̣бхам̣ буурзд̇ваа тид̇аа махаабат̇авий. махаасаяанам̣ ахосийд̇и сирисаяанам̣ ахоси. охид̇од̇и табид̇о. со бана на уд̣̇агасмим̣язва табид̇о ахоси, ат̇а ко баажийнасамуд̣̇д̣̇асса убаруубарибхааг̇зна г̇анд̇ваа баажийнажаггаваал̣амад̇т̇агз табид̇о ахосийд̇и взд̣̇ид̇аб̣б̣о. бажчимз самуд̣̇д̣̇з д̣̇агкин̣з самуд̣̇д̣̇зд̇и зд̇зсуби зсзва наяо. д̇ирияаа наама д̇ин̣аж̇аад̇ийд̇и д̣̇аб̣б̣ад̇ин̣ам̣ вужжад̇и. наабхияаа уг̇г̇анд̇ваа набхам̣ аахажжа тид̇аа ахосийд̇и нан̇г̇аламад̇д̇зна рад̇д̇ад̣̇ан̣д̣зна наабхид̇о уг̇г̇анд̇ваа бассанд̇асса бассанд̇ассзва вид̣̇ад̇т̇имад̇д̇ам̣ рад̇анамад̇д̇ам̣ б̣яаамамад̇д̇ам̣ яадтимад̇д̇ам̣ г̇аавуд̇амад̇д̇ам̣ ад̣дхаяож̇анамад̇д̇ам̣ яож̇анамад̇д̇анд̇и звам̣ уг̇г̇анд̇ваа уг̇г̇анд̇ваа анзгаяож̇анасахассам̣ набхам̣ аахажжа тид̇аа ахоси. баад̣̇зхи уссаггид̇ваад̇и аг̇г̇анакад̇о бадтааяа баад̣̇зхи абхирухид̇ваа. наанааван̣н̣аад̇и зго нийлаван̣н̣о, зго бийд̇аван̣н̣о, зго лохид̇аван̣н̣о, зго бан̣д̣убалаасаван̣н̣од̇и звам̣ наанааван̣н̣аа. сзд̇аад̇и бан̣д̣араа барисуд̣̇д̇хаа. махад̇о мийл̣хабаб̣б̣ад̇ассаад̇и д̇ияож̇ануб̣б̣зд̇хасса г̇уут̇абаб̣б̣ад̇асса. убаруубари жан̇гамад̇ийд̇и мад̇т̇агамад̇т̇агз жан̇гамад̇и . д̣̇ийгхааяугаб̣уд̣̇д̇хаа бана д̇ияож̇анигз мийл̣хабаб̣б̣ад̇з анубависид̇ваа нисиннаа вияа хонд̇и.
Tattha mahāpathavīti cakkavāḷagabbhaṃ pūretvā ṭhitā mahāpathavī. Mahāsayanaṃ ahosīti sirisayanaṃ ahosi. Ohitoti ṭhapito. So pana na udakasmiṃyeva ṭhapito ahosi, atha kho pācīnasamuddassa uparūparibhāgena gantvā pācīnacakkavāḷamatthake ṭhapito ahosīti veditabbo. Pacchime samudde dakkhiṇe samuddeti etesupi eseva nayo. Tiriyā nāma tiṇajātīti dabbatiṇaṃ vuccati. Nābhiyā uggantvā nabhaṃ āhacca ṭhitā ahosīti naṅgalamattena rattadaṇḍena nābhito uggantvā passantassa passantasseva vidatthimattaṃ ratanamattaṃ byāmamattaṃ yaṭṭhimattaṃ gāvutamattaṃ aḍḍhayojanamattaṃ yojanamattanti evaṃ uggantvā uggantvā anekayojanasahassaṃ nabhaṃ āhacca ṭhitā ahosi. Pādehi ussakkitvāti agganakhato paṭṭhāya pādehi abhiruhitvā. Nānāvaṇṇāti eko nīlavaṇṇo, eko pītavaṇṇo, eko lohitavaṇṇo, eko paṇḍupalāsavaṇṇoti evaṃ nānāvaṇṇā. Setāti paṇḍarā parisuddhā. Mahato mīḷhapabbatassāti tiyojanubbedhassa gūthapabbatassa. Uparūparicaṅkamatīti matthakamatthake caṅkamati . Dīghāyukabuddhā pana tiyojanike mīḷhapabbate anupavisitvā nisinnā viya honti.
звам̣ зд̇д̇агзна таанзна буб̣б̣анимид̇д̇аани д̣̇ассзд̇ваа ид̣̇аани саха буб̣б̣анимид̇д̇зхи бадилаабхам̣ д̣̇ассзд̇ум̣ яамби, бхигкавзд̇иаад̣̇имааха. д̇ад̇т̇а саб̣б̣аг̇ун̣ад̣̇ааяагад̇д̇аа б̣уд̣̇д̇хаанам̣ арахад̇д̇амаг̇г̇о ануд̇д̇араа саммаасамб̣од̇хи наама. д̇асмаа яам̣ со жаггаваал̣амахаабат̇авим̣ сирисаяанабхууд̇ам̣ ад̣̇д̣̇аса, д̇ам̣ б̣уд̣̇д̇хабхаавасса буб̣б̣анимид̇д̇ам̣. яам̣ химаванд̇абаб̣б̣ад̇арааж̇аанам̣ б̣имб̣оханам̣ ад̣̇д̣̇аса, д̇ам̣ саб̣б̣ан̃н̃уд̇ан̃н̃аан̣аб̣имб̣оханасса буб̣б̣анимид̇д̇ам̣. яам̣ жад̇д̇ааро хад̇т̇абаад̣̇з жаггаваал̣амад̇т̇агз тид̇з ад̣̇д̣̇аса, д̇ам̣ д̇хаммажаггасса аббадивад̇д̇ияабхаавз буб̣б̣анимид̇д̇ам̣. яам̣ ад̇д̇аанам̣ уд̇д̇аанагам̣ нибаннам̣ ад̣̇д̣̇аса, д̇ам̣ д̇ийсу бхавзсу авагуж̇ж̇аанам̣ сад̇д̇аанам̣ уд̇д̇аанамукабхаавасса буб̣б̣анимид̇д̇ам̣. яам̣ агкийни уммийлзд̇ваа бассанд̇о вияа ахоси, д̇ам̣ д̣̇иб̣б̣ажагкубадилаабхасса буб̣б̣анимид̇д̇ам̣. яам̣ яаава бхаваг̇г̇аа згаалогам̣ ахоси, д̇ам̣ анааваран̣ан̃аан̣асса буб̣б̣анимид̇д̇ам̣. сзсам̣ баал̣ивасзнзва взд̣̇ид̇аб̣б̣анд̇и.
Evaṃ ettakena ṭhānena pubbanimittāni dassetvā idāni saha pubbanimittehi paṭilābhaṃ dassetuṃ yampi, bhikkhavetiādimāha. Tattha sabbaguṇadāyakattā buddhānaṃ arahattamaggo anuttarā sammāsambodhi nāma. Tasmā yaṃ so cakkavāḷamahāpathaviṃ sirisayanabhūtaṃ addasa, taṃ buddhabhāvassa pubbanimittaṃ. Yaṃ himavantapabbatarājānaṃ bimbohanaṃ addasa, taṃ sabbaññutaññāṇabimbohanassa pubbanimittaṃ. Yaṃ cattāro hatthapāde cakkavāḷamatthake ṭhite addasa, taṃ dhammacakkassa appaṭivattiyabhāve pubbanimittaṃ. Yaṃ attānaṃ uttānakaṃ nipannaṃ addasa, taṃ tīsu bhavesu avakujjānaṃ sattānaṃ uttānamukhabhāvassa pubbanimittaṃ. Yaṃ akkhīni ummīletvā passanto viya ahosi, taṃ dibbacakkhupaṭilābhassa pubbanimittaṃ. Yaṃ yāva bhavaggā ekālokaṃ ahosi, taṃ anāvaraṇañāṇassa pubbanimittaṃ. Sesaṃ pāḷivaseneva veditabbanti.
Related texts:
д̇ибидага (муула) • Tipiṭaka (Mūla) / суд̇д̇абидага • Suttapiṭaka / ан̇г̇уд̇д̇аранигааяа • Aṅguttaranikāya / 6. махаасубинасуд̇д̇ам̣ • 6. Mahāsupinasuttaṃ
дийгаа • Tīkā / суд̇д̇абидага (дийгаа) • Suttapiṭaka (ṭīkā) / ан̇г̇уд̇д̇аранигааяа (дийгаа) • Aṅguttaranikāya (ṭīkā) / 6. махаасубинасуд̇д̇аван̣н̣анаа • 6. Mahāsupinasuttavaṇṇanā
