| Library / Tipiṭaka / तिपिटक • Tipiṭaka / जातकपाळि • Jātakapāḷi |
४२९. महासुवजातकं (३)
429. Mahāsuvajātakaṃ (3)
२०.
20.
दुमो यदा होति फलूपपन्नो, भुञ्जन्ति नं विहङ्गमा 1 सम्पतन्ता।
Dumo yadā hoti phalūpapanno, bhuñjanti naṃ vihaṅgamā 2 sampatantā;
खीणन्ति ञत्वान दुमं फलच्चये 3, दिसोदिसं यन्ति ततो विहङ्गमा॥
Khīṇanti ñatvāna dumaṃ phalaccaye 4, disodisaṃ yanti tato vihaṅgamā.
२१.
21.
चर चारिकं लोहिततुण्ड मामरि, किं त्वं सुव सुक्खदुमम्हि झायसि।
Cara cārikaṃ lohitatuṇḍa māmari, kiṃ tvaṃ suva sukkhadumamhi jhāyasi;
तदिङ्घ मं ब्रूहि वसन्तसन्निभ, कस्मा सुव सुक्खदुमं न रिञ्चसि॥
Tadiṅgha maṃ brūhi vasantasannibha, kasmā suva sukkhadumaṃ na riñcasi.
२२.
22.
ये वे सखीनं सखारो भवन्ति, पाणच्चये 5 दुक्खसुखेसु हंस।
Ye ve sakhīnaṃ sakhāro bhavanti, pāṇaccaye 6 dukkhasukhesu haṃsa;
खीणं अखीणन्ति न तं जहन्ति, सन्तो सतं धम्ममनुस्सरन्ता॥
Khīṇaṃ akhīṇanti na taṃ jahanti, santo sataṃ dhammamanussarantā.
२३.
23.
सोहं सतं अञ्ञतरोस्मि हंस, ञाती च मे होति सखा च रुक्खो।
Sohaṃ sataṃ aññatarosmi haṃsa, ñātī ca me hoti sakhā ca rukkho;
तं नुस्सहे जीविकत्थो पहातुं, खीणन्ति ञत्वान न हेस धम्मो 7॥
Taṃ nussahe jīvikattho pahātuṃ, khīṇanti ñatvāna na hesa dhammo 8.
२४.
24.
सचेतं धम्मं रोचेसि, पासंसोसि विजानतं॥
Sacetaṃ dhammaṃ rocesi, pāsaṃsosi vijānataṃ.
२५.
25.
सो ते सुव वरं दम्मि, पत्तयान विहङ्गम।
So te suva varaṃ dammi, pattayāna vihaṅgama;
वरं वरस्सु वक्कङ्ग, यं किञ्चि मनसिच्छसि॥
Varaṃ varassu vakkaṅga, yaṃ kiñci manasicchasi.
२६.
26.
वरञ्च मे हंस भवं ददेय्य, अयञ्च रुक्खो पुनरायुं लभेथ।
Varañca me haṃsa bhavaṃ dadeyya, ayañca rukkho punarāyuṃ labhetha;
सो साखवा फलिमा संविरूळ्हो, मधुत्थिको तिट्ठतु सोभमानो॥
So sākhavā phalimā saṃvirūḷho, madhutthiko tiṭṭhatu sobhamāno.
२७.
27.
तं पस्स सम्म फलिमं उळारं, सहाव ते होतु उदुम्बरेन।
Taṃ passa samma phalimaṃ uḷāraṃ, sahāva te hotu udumbarena;
सो साखवा फलिमा संविरूळ्हो, मधुत्थिको तिट्ठतु सोभमानो॥
So sākhavā phalimā saṃvirūḷho, madhutthiko tiṭṭhatu sobhamāno.
२८.
28.
एवं सक्क सुखी होहि, सह सब्बेहि ञातिभि।
Evaṃ sakka sukhī hohi, saha sabbehi ñātibhi;
यथाहमज्ज सुखितो, दिस्वान सफलं दुमं॥
Yathāhamajja sukhito, disvāna saphalaṃ dumaṃ.
२९.
29.
सुवस्स च वरं दत्वा, कत्वान सफलं दुमं।
Suvassa ca varaṃ datvā, katvāna saphalaṃ dumaṃ;
पक्कामि सह भरियाय, देवानं नन्दनं वनन्ति॥
Pakkāmi saha bhariyāya, devānaṃ nandanaṃ vananti.
महासुवजातकं ततियं।
Mahāsuvajātakaṃ tatiyaṃ.
Footnotes:
Related texts:
अट्ठकथा • Aṭṭhakathā / सुत्तपिटक (अट्ठकथा) • Suttapiṭaka (aṭṭhakathā) / खुद्दकनिकाय (अट्ठकथा) • Khuddakanikāya (aṭṭhakathā) / जातक-अट्ठकथा • Jātaka-aṭṭhakathā / [४२९] ३. महासुवजातकवण्णना • [429] 3. Mahāsuvajātakavaṇṇanā
