| Library / Tipiṭaka / திபிடக • Tipiṭaka / மஜ்ஜி²மனிகாய (டீகா) • Majjhimanikāya (ṭīkā) |
3. மஹாவச்ச²ஸுத்தவண்ணனா
3. Mahāvacchasuttavaṇṇanā
193. ஸஹ கதா² ஏதஸ்ஸ அத்தீ²தி ஸஹகதீ², ‘‘மயங் புச்சா²வஸேன தும்ஹே விஸ்ஸஜ்ஜனவஸேனா’’தி ஏவங் ஸஹபவத்தகதோ²தி அத்தோ². ஏதஸ்ஸேவ கதி²தானி, தத்த² பட²மே விஜ்ஜாத்தயங் தே³ஸிதங், து³தியே அக்³கி³னா த³ஸ்ஸிதந்தி தேவிஜ்ஜவச்ச²ஸுத்தங் அக்³கி³வச்ச²ஸுத்தந்தி நாமங் விஸேஸெத்வா வுத்தங். ஸீக⁴ங் லத்³தி⁴ங் ந விஸ்ஸஜ்ஜெந்தி, யஸ்மா ஸங்கா²ரானங் நியதோயங் வினாஸோ அனஞ்ஞஸமுப்பாதோ³, ஹேதுஸமுப்பன்னாபி ந சிரேன நிஜ்ஜா²னங் க²மந்தி, ந லஹுங். தேனாஹ ‘‘வஸாதேல …பே॰… ஸுஜ்ஜ²ந்தீ’’தி. பச்சி²மக³மனங் ஞாணஸ்ஸ பரிபாகங் க³தத்தா. யட்டி²ங் ஆலம்பி³த்வா உத³கங் தரிதுங் ஓதரந்தோ புரிஸோ ‘‘யட்டி²ங் ஓதரித்வா உத³கே பதமானோ’’தி வுத்தோ. கம்மபத²வஸேன வித்தா²ரதே³ஸனந்தி ஸங்கி²த்ததே³ஸனங் உபாதா³ய வுத்தங். தேனாஹ ‘‘மூலவஸேன செத்தா²’’திஆதி³. வித்தா²ரஸதி³ஸாதி கம்மபத²வஸேன இத⁴ தே³ஸிததே³ஸனாவ மூலவஸேன தே³ஸிததே³ஸனங் உபாதா³ய வித்தா²ரஸதி³ஸா. வித்தா²ரதே³ஸனா நாம நத்தீ²தி ந கேவலங் அயமேவ, அத² கோ² ஸப்³பா³பி பு³த்³தா⁴னங் நிப்பரியாயேன உஜுகேன நிரவஸேஸதோ வித்தா²ரதே³ஸனா நாம நத்தி² தே³ஸனாஞாணஸ்ஸ மஹாவிஸயதாய கரணஸம்பத்தியா ச தஜ்ஜாய மஹானுபா⁴வத்தா ஸப்³ப³ஞ்ஞுதஞ்ஞாணஸ்ஸ. ஸப்³ப³ஞ்ஞுதஞ்ஞாணஸமங்கி³தாய ஹி அவஸேஸபடிஸம்பி⁴தா³னுபா⁴விதாய அபரிமிதகாலஸம்ப⁴தஞாணஸம்பா⁴ரஸமுதா³க³தாய கதா³சிபி பரிக்க²யானரஹாய அனஞ்ஞஸாதா⁴ரணாய படிபா⁴னபடிஸம்பி⁴தா³ய பஹூதஜிவ்ஹாதி³தத³னுரூபரூபகாயஸம்பத்திஸம்பதா³ய வித்தா²ரியமானா ப⁴க³வதோ தே³ஸனா கத²ங் பரிமிதா பரிச்சி²ன்னா ப⁴வெய்ய, மஹாகாருணிகதாய பன ப⁴க³வா வேனெய்யஜ்ஜா²ஸயானுரூபங் தத்த² தத்த² பரிமிதங் பரிச்சி²ன்னங் கத்வா நிட்ட²பேதி. அயஞ்ச அத்தோ² மஹாஸீஹனாத³ஸுத்தேன (ம॰ நி॰ 1.146 ஆத³யோ) தீ³பேதப்³போ³. ஸப்³ப³ங் ஸங்கி²த்தமேவ அத்தஜ்ஜா²ஸயவஸேன அகதெ²த்வா போ³த⁴னெய்யபுக்³க³லஜ்ஜா²ஸயவஸேன தே³ஸனாய நிட்டா²பிதத்தா. ந செத்த² த⁴ம்மஸாஸனவிரோதோ⁴ பரியாயங் அனிஸ்ஸாய யதா²த⁴ம்மங் த⁴ம்மானங் போ³தி⁴தத்தா ஸப்³ப³லஹுத்தா சாதி.
193. Saha kathā etassa atthīti sahakathī, ‘‘mayaṃ pucchāvasena tumhe vissajjanavasenā’’ti evaṃ sahapavattakathoti attho. Etasseva kathitāni, tattha paṭhame vijjāttayaṃ desitaṃ, dutiye agginā dassitanti tevijjavacchasuttaṃ aggivacchasuttanti nāmaṃ visesetvā vuttaṃ. Sīghaṃ laddhiṃ na vissajjenti, yasmā saṅkhārānaṃ niyatoyaṃ vināso anaññasamuppādo, hetusamuppannāpi na cirena nijjhānaṃ khamanti, na lahuṃ. Tenāha ‘‘vasātela…pe… sujjhantī’’ti. Pacchimagamanaṃ ñāṇassa paripākaṃ gatattā. Yaṭṭhiṃ ālambitvā udakaṃ tarituṃ otaranto puriso ‘‘yaṭṭhiṃ otaritvā udake patamāno’’ti vutto. Kammapathavasena vitthāradesananti saṃkhittadesanaṃ upādāya vuttaṃ. Tenāha ‘‘mūlavasena cetthā’’tiādi. Vitthārasadisāti kammapathavasena idha desitadesanāva mūlavasena desitadesanaṃ upādāya vitthārasadisā. Vitthāradesanā nāma natthīti na kevalaṃ ayameva, atha kho sabbāpi buddhānaṃ nippariyāyena ujukena niravasesato vitthāradesanā nāma natthi desanāñāṇassa mahāvisayatāya karaṇasampattiyā ca tajjāya mahānubhāvattā sabbaññutaññāṇassa. Sabbaññutaññāṇasamaṅgitāya hi avasesapaṭisambhidānubhāvitāya aparimitakālasambhatañāṇasambhārasamudāgatāya kadācipi parikkhayānarahāya anaññasādhāraṇāya paṭibhānapaṭisambhidāya pahūtajivhāditadanurūparūpakāyasampattisampadāya vitthāriyamānā bhagavato desanā kathaṃ parimitā paricchinnā bhaveyya, mahākāruṇikatāya pana bhagavā veneyyajjhāsayānurūpaṃ tattha tattha parimitaṃ paricchinnaṃ katvā niṭṭhapeti. Ayañca attho mahāsīhanādasuttena (ma. ni. 1.146 ādayo) dīpetabbo. Sabbaṃ saṃkhittameva attajjhāsayavasena akathetvā bodhaneyyapuggalajjhāsayavasena desanāya niṭṭhāpitattā. Na cettha dhammasāsanavirodho pariyāyaṃ anissāya yathādhammaṃ dhammānaṃ bodhitattā sabbalahuttā cāti.
194. ஸத்த த⁴ம்மா காமாவசரா ஸம்பத்தஸமாதா³னவிரதீனங் இதா⁴தி⁴ப்பேதத்தா.
194.Satta dhammā kāmāvacarā sampattasamādānaviratīnaṃ idhādhippetattā.
அனியமெத்வாதி ‘‘ஸம்மாஸம்பு³த்³தோ⁴, ஸாவகோ’’தி வா நியமங் விஸேஸேன அகத்வா. அத்தானமேவ…பே॰… வேதி³தப்³ப³ங், ததா² ஹி பரிப்³பா³ஜகோ ‘‘திட்ட²து ப⁴வங் கோ³தமோ’’தி ஆஹ.
Aniyametvāti ‘‘sammāsambuddho, sāvako’’ti vā niyamaṃ visesena akatvā. Attānameva…pe… veditabbaṃ, tathā hi paribbājako ‘‘tiṭṭhatu bhavaṃ gotamo’’ti āha.
195. ஸத்தா²வ அரஹா ஹோதி படிபத்தியா பாரிபூரிபா⁴வதோ. தஸ்மிங் ப்³யாகதேதி தஸ்மிங் ‘‘ஏகபி⁴க்கு²பி ஸாவகோ’’திஆதி³னா ஸுட்டு² பஞ்ஹே கதி²தே.
195.Satthāvaarahā hoti paṭipattiyā pāripūribhāvato. Tasmiṃ byākateti tasmiṃ ‘‘ekabhikkhupi sāvako’’tiādinā suṭṭhu pañhe kathite.
196. ஸம்பாத³கோதி படிபத்திஸம்பாத³கோ.
196.Sampādakoti paṭipattisampādako.
197. ஸேகா²ய விஜ்ஜாயாதி ஸேக²லக்க²ணப்பத்தாய மக்³க³பஞ்ஞாய ஸாதிஸயங் கத்வா கரணவஸேன வுத்தா, ப²லபஞ்ஞா பன தாய பத்தப்³ப³த்தா கம்மபா⁴வேன வுத்தா. தேனாஹ ‘‘ஹெட்டி²மப²லத்தயங் பத்தப்³ப³’’ந்தி. இமங் பனெத்த² அவிபரீதமத்த²ங் பாளிதோ ஏவ விஞ்ஞாயமானங் அப்படிவிஜ்ஜ²னதோ விதண்ட³வாதீ³ ‘‘யாவதகங் ஸேகே²ன பத்தப்³ப³ங், அனுப்பத்தங் தங் மயா’’தி வசனலேஸங் க³ஹெத்வா ‘‘அரஹத்தமக்³கோ³பி அனேன பத்தோயேவா’’தி வத³தி. ஏவந்தி இதா³னி வுச்சமானாய கா³தா²ய.
197.Sekhāyavijjāyāti sekhalakkhaṇappattāya maggapaññāya sātisayaṃ katvā karaṇavasena vuttā, phalapaññā pana tāya pattabbattā kammabhāvena vuttā. Tenāha ‘‘heṭṭhimaphalattayaṃ pattabba’’nti. Imaṃ panettha aviparītamatthaṃ pāḷito eva viññāyamānaṃ appaṭivijjhanato vitaṇḍavādī ‘‘yāvatakaṃ sekhena pattabbaṃ, anuppattaṃ taṃ mayā’’ti vacanalesaṃ gahetvā ‘‘arahattamaggopi anena pattoyevā’’ti vadati. Evanti idāni vuccamānāya gāthāya.
கிலேஸானி பஹாய பஞ்சாதி பஞ்சோரம்பா⁴கி³யஸங்யோஜனஸங்கா²தே ஸங்கிலேஸே பஹாய பஜஹித்வா, பஹானஹேது வா. பரிபுண்ணஸேகோ²தி ஸப்³ப³ஸோ வட்³டி⁴தஸேக²த⁴ம்மோ. அபரிஹானத⁴ம்மோதி அபரிஹானஸபா⁴வோ. ந ஹி யஸ்ஸ பா²திக³தேஹி ஸீலாதி³த⁴ம்மேஹி பரிஹானி அத்தி², ஸமாதி⁴ம்ஹி பரிபூரகாரிதாய சேதோவஸிப்பத்தோ. தேனாஹ ‘‘ஸமாஹிதிந்த்³ரியோ’’தி. அபரிஹானத⁴ம்மத்தாவ டி²தத்தோ.
Kilesāni pahāya pañcāti pañcorambhāgiyasaṃyojanasaṅkhāte saṃkilese pahāya pajahitvā, pahānahetu vā. Paripuṇṇasekhoti sabbaso vaḍḍhitasekhadhammo. Aparihānadhammoti aparihānasabhāvo. Na hi yassa phātigatehi sīlādidhammehi parihāni atthi, samādhimhi paripūrakāritāya cetovasippatto. Tenāha ‘‘samāhitindriyo’’ti. Aparihānadhammattāva ṭhitatto.
அனாகா³மினா ஹி அஸேக²பா⁴வாவஹா த⁴ம்மா பரிபூரேதப்³பா³, ந ஸேக²பா⁴வாவஹாதி ஸோ ஏகந்தபரிபுண்ணே ஸேகோ² வுத்தோ. ஏதங் ந பு³த்³த⁴வசனந்தி ‘‘மக்³கோ³ ப³ஹுசித்தக்க²ணிகோ’’தி ஏதங் வசனங் ந பு³த்³த⁴வசனங் அனந்தரேகந்தவிபாகதா³னதோ, ப³ஹுக்க²த்துங் பவத்தனே பயோஜனாபா⁴வதோ ச லோகுத்தரகுஸலஸ்ஸ, ‘‘ஸமாதி⁴மானந்தரிகஞ்ஞமாஹு (கு²॰ பா॰ 6.5; ஸு॰ நி॰ 228), ந பாரங் தி³கு³ணங் யந்தீ’’தி (ஸு॰ நி॰ 719) ஏவமாதீ³னி ஸுத்தபதா³னி ஏதஸ்ஸத்த²ஸாத⁴கானி. ஓரம்பா⁴கி³யஸங்யோஜனப்பஹானேன ஸெக்க²த⁴ம்மபரிபூரிபா⁴வஸ்ஸ வுத்ததாய அத்தோ² தவ வசனேன விருஜ்ஜ²தீதி. அஸ்ஸ ஆயஸ்மதோ வச்ச²ஸ்ஸ.
Anāgāminā hi asekhabhāvāvahā dhammā paripūretabbā, na sekhabhāvāvahāti so ekantaparipuṇṇe sekho vutto. Etaṃ na buddhavacananti ‘‘maggo bahucittakkhaṇiko’’ti etaṃ vacanaṃ na buddhavacanaṃ anantarekantavipākadānato, bahukkhattuṃ pavattane payojanābhāvato ca lokuttarakusalassa, ‘‘samādhimānantarikaññamāhu (khu. pā. 6.5; su. ni. 228), na pāraṃ diguṇaṃ yantī’’ti (su. ni. 719) evamādīni suttapadāni etassatthasādhakāni. Orambhāgiyasaṃyojanappahānena sekkhadhammaparipūribhāvassa vuttatāya attho tava vacanena virujjhatīti. Assa āyasmato vacchassa.
198. அபி⁴ஞ்ஞா வா காரணந்தி யஞ்ஹி தங் தத்ர தத்ர ஸக்கி²ப⁴ப்³ப³தாஸங்கா²தங் இத்³தி⁴வித⁴பச்சனுப⁴வனாதி³, தஸ்ஸ அபி⁴ஞ்ஞா காரணங். அத² இத்³தி⁴வித⁴பச்சனுப⁴வனாதி³ அபி⁴ஞ்ஞா, ஏவங் ஸதி அபி⁴ஞ்ஞாபாத³கஜ்ஜா²னங் காரணங். அவஸானே ச²ட்டா²பி⁴ஞ்ஞாய பன அரஹத்தங். எத்த² ச யஸ்மா பட²மஸுத்தே ஆஸவக்க²யோ அதி⁴ப்பேதோ, ஆஸவா கீ²ணா ஏவ, ந புன கே²பேதப்³பா³, தஸ்மா தத்த² ‘‘யாவதே³வா’’தி ந வுத்தங். இத⁴ ப²லஸமாபத்தி அதி⁴ப்பேதா, ஸா ச புனப்புனங் ஸமாபஜ்ஜீயதி, தஸ்மா ‘‘யாவதே³வா’’தி வுத்தங். ததோ ஏவ ஹி ‘‘அரஹத்தங் வா காரண’’ந்தி வுத்தங். தஞ்ஹி ‘‘குதா³ஸ்ஸு நாமாஹங் ததா³யதனங் உபஸம்பஜ்ஜ விஹரிஸ்ஸாமி, யத³ரியா ஏதரஹி உபஸம்பஜ்ஜ விஹரந்தீ’’தி (ம॰ நி॰ 1.465; 3.307) அனுத்தரேஸு விமொக்கே²ஸு பிஹங் உபட்ட²பெத்வா அபி⁴ஞ்ஞா நிப்³ப³த்தெந்தஸ்ஸ காரணங், தயித³ங் ஸப்³ப³ஸாதா⁴ரணங் ந ஹோதீதி ஸாதா⁴ரணவஸேன நங் த³ஸ்ஸெந்தோ ‘‘அரஹத்தஸ்ஸ விபஸ்ஸனா வா’’தி ஆஹ.
198.Abhiññā vā kāraṇanti yañhi taṃ tatra tatra sakkhibhabbatāsaṅkhātaṃ iddhividhapaccanubhavanādi, tassa abhiññā kāraṇaṃ. Atha iddhividhapaccanubhavanādi abhiññā, evaṃ sati abhiññāpādakajjhānaṃ kāraṇaṃ. Avasāne chaṭṭhābhiññāya pana arahattaṃ. Ettha ca yasmā paṭhamasutte āsavakkhayo adhippeto, āsavā khīṇā eva, na puna khepetabbā, tasmā tattha ‘‘yāvadevā’’ti na vuttaṃ. Idha phalasamāpatti adhippetā, sā ca punappunaṃ samāpajjīyati, tasmā ‘‘yāvadevā’’ti vuttaṃ. Tato eva hi ‘‘arahattaṃ vā kāraṇa’’nti vuttaṃ. Tañhi ‘‘kudāssu nāmāhaṃ tadāyatanaṃ upasampajja viharissāmi, yadariyā etarahi upasampajja viharantī’’ti (ma. ni. 1.465; 3.307) anuttaresu vimokkhesu pihaṃ upaṭṭhapetvā abhiññā nibbattentassa kāraṇaṃ, tayidaṃ sabbasādhāraṇaṃ na hotīti sādhāraṇavasena naṃ dassento ‘‘arahattassa vipassanā vā’’ti āha.
200. பரிசரந்தி நாம விப்பகதப்³ரஹ்மசரியவாஸத்தா. பரிசிண்ணோ ஹோதி ஸாவகேன நாம ஸத்து² த⁴ம்மே கத்தப்³பா³ பரிசரியா ஸம்மதே³வ நிட்டா²பிதத்தா. தேனாஹ ‘‘இதி…பே॰… தே²ரோ ஏவமாஹா’’தி. தேஸங் கு³ணானந்தி தேஸங் அஸெக்க²கு³ணானங். ஸேஸங் ஸுவிஞ்ஞெய்யமேவ.
200.Paricaranti nāma vippakatabrahmacariyavāsattā. Pariciṇṇo hoti sāvakena nāma satthu dhamme kattabbā paricariyā sammadeva niṭṭhāpitattā. Tenāha ‘‘iti…pe… thero evamāhā’’ti. Tesaṃ guṇānanti tesaṃ asekkhaguṇānaṃ. Sesaṃ suviññeyyameva.
மஹாவச்ச²ஸுத்தவண்ணனாய லீனத்த²ப்பகாஸனா ஸமத்தா.
Mahāvacchasuttavaṇṇanāya līnatthappakāsanā samattā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / மஜ்ஜி²மனிகாய • Majjhimanikāya / 3. மஹாவச்ச²ஸுத்தங் • 3. Mahāvacchasuttaṃ
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / மஜ்ஜி²மனிகாய (அட்ட²கதா²) • Majjhimanikāya (aṭṭhakathā) / 3. மஹாவச்ச²ஸுத்தவண்ணனா • 3. Mahāvacchasuttavaṇṇanā
