| Library / Tipiṭaka / তিপিটক • Tipiṭaka / মজ্ঝিমনিকায (টীকা) • Majjhimanikāya (ṭīkā) |
৩. মহাৰচ্ছসুত্তৰণ্ণনা
3. Mahāvacchasuttavaṇṇanā
১৯৩. সহ কথা এতস্স অত্থীতি সহকথী, ‘‘মযং পুচ্ছাৰসেন তুম্হে ৰিস্সজ্জনৰসেনা’’তি এৰং সহপৰত্তকথোতি অত্থো। এতস্সেৰ কথিতানি, তত্থ পঠমে ৰিজ্জাত্তযং দেসিতং, দুতিযে অগ্গিনা দস্সিতন্তি তেৰিজ্জৰচ্ছসুত্তং অগ্গিৰচ্ছসুত্তন্তি নামং ৰিসেসেত্ৰা ৰুত্তং। সীঘং লদ্ধিং ন ৰিস্সজ্জেন্তি, যস্মা সঙ্খারানং নিযতোযং ৰিনাসো অনঞ্ঞসমুপ্পাদো, হেতুসমুপ্পন্নাপি ন চিরেন নিজ্ঝানং খমন্তি, ন লহুং। তেনাহ ‘‘ৰসাতেল …পে॰… সুজ্ঝন্তী’’তি। পচ্ছিমগমনং ঞাণস্স পরিপাকং গতত্তা। যট্ঠিং আলম্বিত্ৰা উদকং তরিতুং ওতরন্তো পুরিসো ‘‘যট্ঠিং ওতরিত্ৰা উদকে পতমানো’’তি ৰুত্তো। কম্মপথৰসেন ৰিত্থারদেসনন্তি সংখিত্তদেসনং উপাদায ৰুত্তং। তেনাহ ‘‘মূলৰসেন চেত্থা’’তিআদি। ৰিত্থারসদিসাতি কম্মপথৰসেন ইধ দেসিতদেসনাৰ মূলৰসেন দেসিতদেসনং উপাদায ৰিত্থারসদিসা। ৰিত্থারদেসনা নাম নত্থীতি ন কেৰলং অযমেৰ, অথ খো সব্বাপি বুদ্ধানং নিপ্পরিযাযেন উজুকেন নিরৰসেসতো ৰিত্থারদেসনা নাম নত্থি দেসনাঞাণস্স মহাৰিসযতায করণসম্পত্তিযা চ তজ্জায মহানুভাৰত্তা সব্বঞ্ঞুতঞ্ঞাণস্স। সব্বঞ্ঞুতঞ্ঞাণসমঙ্গিতায হি অৰসেসপটিসম্ভিদানুভাৰিতায অপরিমিতকালসম্ভতঞাণসম্ভারসমুদাগতায কদাচিপি পরিক্খযানরহায অনঞ্ঞসাধারণায পটিভানপটিসম্ভিদায পহূতজিৰ্হাদিতদনুরূপরূপকাযসম্পত্তিসম্পদায ৰিত্থারিযমানা ভগৰতো দেসনা কথং পরিমিতা পরিচ্ছিন্না ভৰেয্য, মহাকারুণিকতায পন ভগৰা ৰেনেয্যজ্ঝাসযানুরূপং তত্থ তত্থ পরিমিতং পরিচ্ছিন্নং কত্ৰা নিট্ঠপেতি। অযঞ্চ অত্থো মহাসীহনাদসুত্তেন (ম॰ নি॰ ১.১৪৬ আদযো) দীপেতব্বো। সব্বং সংখিত্তমেৰ অত্তজ্ঝাসযৰসেন অকথেত্ৰা বোধনেয্যপুগ্গলজ্ঝাসযৰসেন দেসনায নিট্ঠাপিতত্তা। ন চেত্থ ধম্মসাসনৰিরোধো পরিযাযং অনিস্সায যথাধম্মং ধম্মানং বোধিতত্তা সব্বলহুত্তা চাতি।
193. Saha kathā etassa atthīti sahakathī, ‘‘mayaṃ pucchāvasena tumhe vissajjanavasenā’’ti evaṃ sahapavattakathoti attho. Etasseva kathitāni, tattha paṭhame vijjāttayaṃ desitaṃ, dutiye agginā dassitanti tevijjavacchasuttaṃ aggivacchasuttanti nāmaṃ visesetvā vuttaṃ. Sīghaṃ laddhiṃ na vissajjenti, yasmā saṅkhārānaṃ niyatoyaṃ vināso anaññasamuppādo, hetusamuppannāpi na cirena nijjhānaṃ khamanti, na lahuṃ. Tenāha ‘‘vasātela…pe… sujjhantī’’ti. Pacchimagamanaṃ ñāṇassa paripākaṃ gatattā. Yaṭṭhiṃ ālambitvā udakaṃ tarituṃ otaranto puriso ‘‘yaṭṭhiṃ otaritvā udake patamāno’’ti vutto. Kammapathavasena vitthāradesananti saṃkhittadesanaṃ upādāya vuttaṃ. Tenāha ‘‘mūlavasena cetthā’’tiādi. Vitthārasadisāti kammapathavasena idha desitadesanāva mūlavasena desitadesanaṃ upādāya vitthārasadisā. Vitthāradesanā nāma natthīti na kevalaṃ ayameva, atha kho sabbāpi buddhānaṃ nippariyāyena ujukena niravasesato vitthāradesanā nāma natthi desanāñāṇassa mahāvisayatāya karaṇasampattiyā ca tajjāya mahānubhāvattā sabbaññutaññāṇassa. Sabbaññutaññāṇasamaṅgitāya hi avasesapaṭisambhidānubhāvitāya aparimitakālasambhatañāṇasambhārasamudāgatāya kadācipi parikkhayānarahāya anaññasādhāraṇāya paṭibhānapaṭisambhidāya pahūtajivhāditadanurūparūpakāyasampattisampadāya vitthāriyamānā bhagavato desanā kathaṃ parimitā paricchinnā bhaveyya, mahākāruṇikatāya pana bhagavā veneyyajjhāsayānurūpaṃ tattha tattha parimitaṃ paricchinnaṃ katvā niṭṭhapeti. Ayañca attho mahāsīhanādasuttena (ma. ni. 1.146 ādayo) dīpetabbo. Sabbaṃ saṃkhittameva attajjhāsayavasena akathetvā bodhaneyyapuggalajjhāsayavasena desanāya niṭṭhāpitattā. Na cettha dhammasāsanavirodho pariyāyaṃ anissāya yathādhammaṃ dhammānaṃ bodhitattā sabbalahuttā cāti.
১৯৪. সত্ত ধম্মা কামাৰচরা সম্পত্তসমাদানৰিরতীনং ইধাধিপ্পেতত্তা।
194.Satta dhammā kāmāvacarā sampattasamādānaviratīnaṃ idhādhippetattā.
অনিযমেত্ৰাতি ‘‘সম্মাসম্বুদ্ধো, সাৰকো’’তি ৰা নিযমং ৰিসেসেন অকত্ৰা। অত্তানমেৰ…পে॰… ৰেদিতব্বং, তথা হি পরিব্বাজকো ‘‘তিট্ঠতু ভৰং গোতমো’’তি আহ।
Aniyametvāti ‘‘sammāsambuddho, sāvako’’ti vā niyamaṃ visesena akatvā. Attānameva…pe… veditabbaṃ, tathā hi paribbājako ‘‘tiṭṭhatu bhavaṃ gotamo’’ti āha.
১৯৫. সত্থাৰ অরহা হোতি পটিপত্তিযা পারিপূরিভাৰতো। তস্মিং ব্যাকতেতি তস্মিং ‘‘একভিক্খুপি সাৰকো’’তিআদিনা সুট্ঠু পঞ্হে কথিতে।
195.Satthāvaarahā hoti paṭipattiyā pāripūribhāvato. Tasmiṃ byākateti tasmiṃ ‘‘ekabhikkhupi sāvako’’tiādinā suṭṭhu pañhe kathite.
১৯৬. সম্পাদকোতি পটিপত্তিসম্পাদকো।
196.Sampādakoti paṭipattisampādako.
১৯৭. সেখায ৰিজ্জাযাতি সেখলক্খণপ্পত্তায মগ্গপঞ্ঞায সাতিসযং কত্ৰা করণৰসেন ৰুত্তা, ফলপঞ্ঞা পন তায পত্তব্বত্তা কম্মভাৰেন ৰুত্তা। তেনাহ ‘‘হেট্ঠিমফলত্তযং পত্তব্ব’’ন্তি। ইমং পনেত্থ অৰিপরীতমত্থং পাল়িতো এৰ ৰিঞ্ঞাযমানং অপ্পটিৰিজ্ঝনতো ৰিতণ্ডৰাদী ‘‘যাৰতকং সেখেন পত্তব্বং, অনুপ্পত্তং তং মযা’’তি ৰচনলেসং গহেত্ৰা ‘‘অরহত্তমগ্গোপি অনেন পত্তোযেৰা’’তি ৰদতি। এৰন্তি ইদানি ৰুচ্চমানায গাথায।
197.Sekhāyavijjāyāti sekhalakkhaṇappattāya maggapaññāya sātisayaṃ katvā karaṇavasena vuttā, phalapaññā pana tāya pattabbattā kammabhāvena vuttā. Tenāha ‘‘heṭṭhimaphalattayaṃ pattabba’’nti. Imaṃ panettha aviparītamatthaṃ pāḷito eva viññāyamānaṃ appaṭivijjhanato vitaṇḍavādī ‘‘yāvatakaṃ sekhena pattabbaṃ, anuppattaṃ taṃ mayā’’ti vacanalesaṃ gahetvā ‘‘arahattamaggopi anena pattoyevā’’ti vadati. Evanti idāni vuccamānāya gāthāya.
কিলেসানি পহায পঞ্চাতি পঞ্চোরম্ভাগিযসংযোজনসঙ্খাতে সংকিলেসে পহায পজহিত্ৰা, পহানহেতু ৰা। পরিপুণ্ণসেখোতি সব্বসো ৰড্ঢিতসেখধম্মো। অপরিহানধম্মোতি অপরিহানসভাৰো। ন হি যস্স ফাতিগতেহি সীলাদিধম্মেহি পরিহানি অত্থি, সমাধিম্হি পরিপূরকারিতায চেতোৰসিপ্পত্তো। তেনাহ ‘‘সমাহিতিন্দ্রিযো’’তি। অপরিহানধম্মত্তাৰ ঠিতত্তো।
Kilesāni pahāya pañcāti pañcorambhāgiyasaṃyojanasaṅkhāte saṃkilese pahāya pajahitvā, pahānahetu vā. Paripuṇṇasekhoti sabbaso vaḍḍhitasekhadhammo. Aparihānadhammoti aparihānasabhāvo. Na hi yassa phātigatehi sīlādidhammehi parihāni atthi, samādhimhi paripūrakāritāya cetovasippatto. Tenāha ‘‘samāhitindriyo’’ti. Aparihānadhammattāva ṭhitatto.
অনাগামিনা হি অসেখভাৰাৰহা ধম্মা পরিপূরেতব্বা, ন সেখভাৰাৰহাতি সো একন্তপরিপুণ্ণে সেখো ৰুত্তো। এতং ন বুদ্ধৰচনন্তি ‘‘মগ্গো বহুচিত্তক্খণিকো’’তি এতং ৰচনং ন বুদ্ধৰচনং অনন্তরেকন্তৰিপাকদানতো, বহুক্খত্তুং পৰত্তনে পযোজনাভাৰতো চ লোকুত্তরকুসলস্স, ‘‘সমাধিমানন্তরিকঞ্ঞমাহু (খু॰ পা॰ ৬.৫; সু॰ নি॰ ২২৮), ন পারং দিগুণং যন্তী’’তি (সু॰ নি॰ ৭১৯) এৰমাদীনি সুত্তপদানি এতস্সত্থসাধকানি। ওরম্ভাগিযসংযোজনপ্পহানেন সেক্খধম্মপরিপূরিভাৰস্স ৰুত্ততায অত্থো তৰ ৰচনেন ৰিরুজ্ঝতীতি। অস্স আযস্মতো ৰচ্ছস্স।
Anāgāminā hi asekhabhāvāvahā dhammā paripūretabbā, na sekhabhāvāvahāti so ekantaparipuṇṇe sekho vutto. Etaṃ na buddhavacananti ‘‘maggo bahucittakkhaṇiko’’ti etaṃ vacanaṃ na buddhavacanaṃ anantarekantavipākadānato, bahukkhattuṃ pavattane payojanābhāvato ca lokuttarakusalassa, ‘‘samādhimānantarikaññamāhu (khu. pā. 6.5; su. ni. 228), na pāraṃ diguṇaṃ yantī’’ti (su. ni. 719) evamādīni suttapadāni etassatthasādhakāni. Orambhāgiyasaṃyojanappahānena sekkhadhammaparipūribhāvassa vuttatāya attho tava vacanena virujjhatīti. Assa āyasmato vacchassa.
১৯৮. অভিঞ্ঞা ৰা কারণন্তি যঞ্হি তং তত্র তত্র সক্খিভব্বতাসঙ্খাতং ইদ্ধিৰিধপচ্চনুভৰনাদি, তস্স অভিঞ্ঞা কারণং। অথ ইদ্ধিৰিধপচ্চনুভৰনাদি অভিঞ্ঞা, এৰং সতি অভিঞ্ঞাপাদকজ্ঝানং কারণং। অৰসানে ছট্ঠাভিঞ্ঞায পন অরহত্তং। এত্থ চ যস্মা পঠমসুত্তে আসৰক্খযো অধিপ্পেতো, আসৰা খীণা এৰ, ন পুন খেপেতব্বা, তস্মা তত্থ ‘‘যাৰদেৰা’’তি ন ৰুত্তং। ইধ ফলসমাপত্তি অধিপ্পেতা, সা চ পুনপ্পুনং সমাপজ্জীযতি, তস্মা ‘‘যাৰদেৰা’’তি ৰুত্তং। ততো এৰ হি ‘‘অরহত্তং ৰা কারণ’’ন্তি ৰুত্তং। তঞ্হি ‘‘কুদাস্সু নামাহং তদাযতনং উপসম্পজ্জ ৰিহরিস্সামি, যদরিযা এতরহি উপসম্পজ্জ ৰিহরন্তী’’তি (ম॰ নি॰ ১.৪৬৫; ৩.৩০৭) অনুত্তরেসু ৰিমোক্খেসু পিহং উপট্ঠপেত্ৰা অভিঞ্ঞা নিব্বত্তেন্তস্স কারণং, তযিদং সব্বসাধারণং ন হোতীতি সাধারণৰসেন নং দস্সেন্তো ‘‘অরহত্তস্স ৰিপস্সনা ৰা’’তি আহ।
198.Abhiññā vā kāraṇanti yañhi taṃ tatra tatra sakkhibhabbatāsaṅkhātaṃ iddhividhapaccanubhavanādi, tassa abhiññā kāraṇaṃ. Atha iddhividhapaccanubhavanādi abhiññā, evaṃ sati abhiññāpādakajjhānaṃ kāraṇaṃ. Avasāne chaṭṭhābhiññāya pana arahattaṃ. Ettha ca yasmā paṭhamasutte āsavakkhayo adhippeto, āsavā khīṇā eva, na puna khepetabbā, tasmā tattha ‘‘yāvadevā’’ti na vuttaṃ. Idha phalasamāpatti adhippetā, sā ca punappunaṃ samāpajjīyati, tasmā ‘‘yāvadevā’’ti vuttaṃ. Tato eva hi ‘‘arahattaṃ vā kāraṇa’’nti vuttaṃ. Tañhi ‘‘kudāssu nāmāhaṃ tadāyatanaṃ upasampajja viharissāmi, yadariyā etarahi upasampajja viharantī’’ti (ma. ni. 1.465; 3.307) anuttaresu vimokkhesu pihaṃ upaṭṭhapetvā abhiññā nibbattentassa kāraṇaṃ, tayidaṃ sabbasādhāraṇaṃ na hotīti sādhāraṇavasena naṃ dassento ‘‘arahattassa vipassanā vā’’ti āha.
২০০. পরিচরন্তি নাম ৰিপ্পকতব্রহ্মচরিযৰাসত্তা। পরিচিণ্ণো হোতি সাৰকেন নাম সত্থু ধম্মে কত্তব্বা পরিচরিযা সম্মদেৰ নিট্ঠাপিতত্তা। তেনাহ ‘‘ইতি…পে॰… থেরো এৰমাহা’’তি। তেসং গুণানন্তি তেসং অসেক্খগুণানং। সেসং সুৰিঞ্ঞেয্যমেৰ।
200.Paricaranti nāma vippakatabrahmacariyavāsattā. Pariciṇṇo hoti sāvakena nāma satthu dhamme kattabbā paricariyā sammadeva niṭṭhāpitattā. Tenāha ‘‘iti…pe… thero evamāhā’’ti. Tesaṃ guṇānanti tesaṃ asekkhaguṇānaṃ. Sesaṃ suviññeyyameva.
মহাৰচ্ছসুত্তৰণ্ণনায লীনত্থপ্পকাসনা সমত্তা।
Mahāvacchasuttavaṇṇanāya līnatthappakāsanā samattā.
Related texts:
তিপিটক (মূল) • Tipiṭaka (Mūla) / সুত্তপিটক • Suttapiṭaka / মজ্ঝিমনিকায • Majjhimanikāya / ৩. মহাৰচ্ছসুত্তং • 3. Mahāvacchasuttaṃ
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / মজ্ঝিমনিকায (অট্ঠকথা) • Majjhimanikāya (aṭṭhakathā) / ৩. মহাৰচ্ছসুত্তৰণ্ণনা • 3. Mahāvacchasuttavaṇṇanā
