| Library / Tipiṭaka / তিপিটক • Tipiṭaka / থেরগাথা-অট্ঠকথা • Theragāthā-aṭṭhakathā |
২. মহাৰচ্ছত্থেরগাথাৰণ্ণনা
2. Mahāvacchattheragāthāvaṇṇanā
পঞ্ঞাবলীতি আযস্মতো মহাৰচ্ছত্থেরস্স গাথা। কা উপ্পত্তি? অযং কির পদুমুত্তরস্স ভগৰতো ভিক্খুসঙ্ঘস্স চ পানীযদানমদাসি। পুন সিখিস্স ভগৰতো কালে উপাসকো হুত্ৰা ৰিৰট্টূপনিস্সযং বহুং পুঞ্ঞকম্মং অকাসি, সো তেহি পুঞ্ঞকম্মেহি তত্থ তত্থ সুগতীসুযেৰ সংসরন্তো ইমস্মিং বুদ্ধুপ্পাদে মগধরট্ঠে নাল়কগামে সমিদ্ধিস্স নাম ব্রাহ্মণস্স পুত্তো হুত্ৰা নিব্বত্তি। তস্স মহাৰচ্ছোতি নামং অহোসি। সো ৰযপ্পত্তো আযস্মতো সারিপুত্তস্স ভগৰতো সাৰকভাৰং সুত্ৰা ‘‘সোপি নাম মহাপঞ্ঞো। যস্স সাৰকত্তং উপাগতো, সো এৰ মঞ্ঞে ইমস্মিং লোকে অগ্গপুগ্গলো’’তি ভগৰতি সদ্ধং উপ্পাদেত্ৰা সত্থু সন্তিকে পব্বজিত্ৰা কম্মট্ঠানং অনুযুঞ্জন্তো নচিরস্সেৰ অরহত্তং পাপুণি। তেন ৰুত্তং অপদানে (অপ॰ থের ২.৫০.৫১-৫৬) –
Paññābalīti āyasmato mahāvacchattherassa gāthā. Kā uppatti? Ayaṃ kira padumuttarassa bhagavato bhikkhusaṅghassa ca pānīyadānamadāsi. Puna sikhissa bhagavato kāle upāsako hutvā vivaṭṭūpanissayaṃ bahuṃ puññakammaṃ akāsi, so tehi puññakammehi tattha tattha sugatīsuyeva saṃsaranto imasmiṃ buddhuppāde magadharaṭṭhe nāḷakagāme samiddhissa nāma brāhmaṇassa putto hutvā nibbatti. Tassa mahāvacchoti nāmaṃ ahosi. So vayappatto āyasmato sāriputtassa bhagavato sāvakabhāvaṃ sutvā ‘‘sopi nāma mahāpañño. Yassa sāvakattaṃ upāgato, so eva maññe imasmiṃ loke aggapuggalo’’ti bhagavati saddhaṃ uppādetvā satthu santike pabbajitvā kammaṭṭhānaṃ anuyuñjanto nacirasseva arahattaṃ pāpuṇi. Tena vuttaṃ apadāne (apa. thera 2.50.51-56) –
‘‘পদুমুত্তরবুদ্ধস্স, ভিক্খুসঙ্ঘে অনুত্তরে।
‘‘Padumuttarabuddhassa, bhikkhusaṅghe anuttare;
পসন্নচিত্তো সুমনো, পানীযঘটমপূরযিং॥
Pasannacitto sumano, pānīyaghaṭamapūrayiṃ.
‘‘পব্বতগ্গে দুমগ্গে ৰা, আকাসে ৰাথ ভূমিযং।
‘‘Pabbatagge dumagge vā, ākāse vātha bhūmiyaṃ;
যদা পানীযমিচ্ছামি, খিপ্পং নিব্বত্ততে মম॥
Yadā pānīyamicchāmi, khippaṃ nibbattate mama.
‘‘সতসহস্সিতো কপ্পে, যং দানমদদিং তদা।
‘‘Satasahassito kappe, yaṃ dānamadadiṃ tadā;
দুগ্গতিং নাভিজানামি, দকদানস্সিদং ফলং॥
Duggatiṃ nābhijānāmi, dakadānassidaṃ phalaṃ.
‘‘কিলেসা ঝাপিতা ময্হং…পে॰… ভৰা সব্বে সমূহতা।
‘‘Kilesā jhāpitā mayhaṃ…pe… bhavā sabbe samūhatā;
ছল়ভিঞ্ঞা সচ্ছিকতা, কতং বুদ্ধস্স সাসন’’ন্তি॥
Chaḷabhiññā sacchikatā, kataṃ buddhassa sāsana’’nti.
এৰং পন অরহত্তং পত্ৰা ৰিমুত্তিসুখং অনুভৰন্তো সাসনস্স নিয্যানিকভাৰৰিভাৰনেন সব্রহ্মচারীনং উস্সাহজননত্থং ‘‘পঞ্ঞাবলী’’তি গাথং অভাসি।
Evaṃ pana arahattaṃ patvā vimuttisukhaṃ anubhavanto sāsanassa niyyānikabhāvavibhāvanena sabrahmacārīnaṃ ussāhajananatthaṃ ‘‘paññābalī’’ti gāthaṃ abhāsi.
১২. তত্থ পঞ্ঞাবলীতি পারিহারিযপঞ্ঞায ৰিপস্সনাপঞ্ঞায চ ৰসেন অভিণ্হসো সাতিসযেন পঞ্ঞাবলেন সমন্নাগতো। সীলৰতূপপন্নোতি উক্কংসগতেন চতুপারিসুদ্ধিসীলেন, ধুতধম্মসঙ্খাতেহি ৰতেহি চ উপপন্নো সমন্নাগতো। সমাহিতোতি উপচারপ্পনাভেদেন সমাধিনা সমাহিতো। ঝানরতোতি ততো এৰ আরম্মণূপনিজ্ঝানে লক্খণূপনিজ্ঝানে চ রতো সততাভিযুত্তো। সব্বকালং সতিযা অৰিপ্পৰাসৰসেন সতিমা। যদত্থিযন্তি অত্থতো অনপেতং অত্থিযং, যেন অত্থিযং যদত্থিযং। যথা পচ্চযে পরিভুঞ্জন্তস্স পরিভুঞ্জনং অত্থিযং হোতি, তথা ভোজনং ভুঞ্জমানো। সামিপরিভোগেন হি তং অত্থিযং হোতি দাযজ্জপরিভোগেন ৰা, ন অঞ্ঞথা ভোজনন্তি চ নিদস্সনমত্তং দট্ঠব্বং। ভুঞ্জিযতি পরিভুঞ্জিযতীতি ৰা ভোজনং, চত্তারো পচ্চযা। ‘‘যদত্থিক’’ন্তি ৰা পাঠো। যদত্থং যস্সত্থায সত্থারা পচ্চযা অনুঞ্ঞাতা, তদত্থং কাযস্স ঠিতিআদিঅত্থং, তঞ্চ অনুপাদিসেসনিব্বানত্থং। তস্মা অনুপাদাপরিনিব্বানত্থং ভোজনপচ্চযে ভুঞ্জমানো ততো এৰ কঙ্খেথ কালং অত্তনো অনুপাদাপরিনিব্বানকালং আগমেয্য। ইধ ইমস্মিং সাসনে ৰীতরাগো। বাহিরকস্স পন কামেসু ৰীতরাগস্স ইদং নত্থীতি অধিপ্পাযো।
12. Tattha paññābalīti pārihāriyapaññāya vipassanāpaññāya ca vasena abhiṇhaso sātisayena paññābalena samannāgato. Sīlavatūpapannoti ukkaṃsagatena catupārisuddhisīlena, dhutadhammasaṅkhātehi vatehi ca upapanno samannāgato. Samāhitoti upacārappanābhedena samādhinā samāhito. Jhānaratoti tato eva ārammaṇūpanijjhāne lakkhaṇūpanijjhāne ca rato satatābhiyutto. Sabbakālaṃ satiyā avippavāsavasena satimā. Yadatthiyanti atthato anapetaṃ atthiyaṃ, yena atthiyaṃ yadatthiyaṃ. Yathā paccaye paribhuñjantassa paribhuñjanaṃ atthiyaṃ hoti, tathā bhojanaṃ bhuñjamāno. Sāmiparibhogena hi taṃ atthiyaṃ hoti dāyajjaparibhogena vā, na aññathā bhojananti ca nidassanamattaṃ daṭṭhabbaṃ. Bhuñjiyati paribhuñjiyatīti vā bhojanaṃ, cattāro paccayā. ‘‘Yadatthika’’nti vā pāṭho. Yadatthaṃ yassatthāya satthārā paccayā anuññātā, tadatthaṃ kāyassa ṭhitiādiatthaṃ, tañca anupādisesanibbānatthaṃ. Tasmā anupādāparinibbānatthaṃ bhojanapaccaye bhuñjamāno tato eva kaṅkhetha kālaṃ attano anupādāparinibbānakālaṃ āgameyya. Idha imasmiṃ sāsane vītarāgo. Bāhirakassa pana kāmesu vītarāgassa idaṃ natthīti adhippāyo.
মহাৰচ্ছত্থেরগাথাৰণ্ণনা নিট্ঠিতা।
Mahāvacchattheragāthāvaṇṇanā niṭṭhitā.
Related texts:
তিপিটক (মূল) • Tipiṭaka (Mūla) / সুত্তপিটক • Suttapiṭaka / খুদ্দকনিকায • Khuddakanikāya / থেরগাথাপাল়ি • Theragāthāpāḷi / ২. মহাৰচ্ছত্থেরগাথা • 2. Mahāvacchattheragāthā
