Library / Tipiṭaka / ཏིཔིཊཀ • Tipiṭaka / མཛྫྷིམནིཀཱཡ (ཊཱིཀཱ) • Majjhimanikāya (ṭīkā)

    ༣. མཧཱཝེདལླསུཏྟཝཎྞནཱ

    3. Mahāvedallasuttavaṇṇanā

    ༤༤༩. གརུབྷཱཝོ གཱརཝཾ, པཱསཱཎཙྪཏྟཾ ཝིཡ གརུཀརཎཱིཡཏཱ། སཧ གཱརཝེནཱཏི སགཱརཝོ, གརུནཱ ཀིསྨིཉྩི ཝུཏྟེ གཱརཝཝསེན པཏིསྶཝནཾ པཏིསྶཝོ, སཧ པཏིསྶཝེན སཔྤཏིསྶཝོ, པཏིསྶཝབྷཱུཏཾ ཏཾསབྷཱགཉྩ ཡཾ ཀིཉྩི གརུཀརཎཾ། སགཱརཝེ སཔྤཏིསྶཝཙནཾ སགཱརཝསཔྤཏིསྶཝཙནཾ། གརུཀརཎཾ ཝཱ གཱརཝོ, སགཱརཝསྶ སཔྤཏིསྶཝཙནཾ སགཱརཝསཔྤཏིསྶཝཙནཾ། ཨེཏེན སབྷཱཝེནེཝ སགཱརཝསྶ ཏཐཱཔཝཏྟཾ ཝཙནནྟི དསྶེཏི། ཨཉྙཏྠ དུ-སདྡོ གརཧཏྠོཔི ཧོཏི ‘‘དུཀྑཾ དུཔྤུཏྟོ’’ཏིཨཱདཱིསུ ཝིཡ, ཨིདྷ པན སོ ན སམྦྷཝཏི ཀུཙྪིཏཱཡ པཉྙཱཡ ཨབྷཱཝཏོཏི ཨཱཧ ‘‘པཉྙཱཡ དུཊྛཾ ནཱམ ནཏྠཱི’’ཏི། ‘‘དུསྶཱིལོ’’ཏིཨཱདཱིསུ ཝིཡ ཨབྷཱཝཏྠོ དུ-སདྡོཏི ཝུཏྟཾ ‘‘ཨཔྤཉྙོ ནིཔྤཉྙོཏི ཨཏྠོ’’ཏི། ཀིཏྟཀེནཱཏི ཀེན པརིམཱཎེན། ཏཾ པན པརིམཱཎཾ ཡསྨཱ པརིམེཡྻསྶ ཨཏྠསྶ པརིཙྪིནྡནཾ ཧོཏི, ནུ-སདྡོ ཙ པུཙྪཱཡ ཛོཏཀོ, ཏསྨཱ ‘‘ཀིཏྟཱཝཏཱ ནུ ཁོཏི ཀཱརཎཔརིཙྪེདཔུཙྪཱ’’ཏི ཝཏྭཱ ‘‘ཀིཏྟཀེན ནུ ཁོ ཨེཝཾ ཝུཙྩཏཱིཏི ཨཏྠོ’’ཏི ཨཱཧ། ‘‘ཀཱརཎཔརིཙྪེདཔུཙྪཱ’’ཏི ཨིམིནཱ ‘‘ཀིཏྟཱཝཏཱ’’ཏི སཱམཉྙཏོ པུཙྪཱབྷཱཝོ དསྶིཏོ, ན ཝིསེསཏོ, ཏསྶ པུཙྪཱཝིསེསབྷཱཝཉཱཔནཏྠཾ མཧཱནིདྡེསེ ཨཱགཏཱ སབྦཱཝ པུཙྪཱ ཨཏྠུདྡྷཱརནཡེན དསྶེཏི ‘‘པུཙྪཱ ཙ ནཱམཱ’’ཏིཨཱདིནཱ། ཨདིཊྛཾ ཛོཏཱིཡཏི ཨེཏཱཡཱཏི ཨདིཊྛཛོཏནཱ, པུཙྪཱ། དིཊྛསཾསནྡནཱ སཱཀཙྪཱཝསེན ཝིནིཙྪཡཀརཎཾ། ཝིམཏི ཚིཛྫཏི ཨེཏཱཡཱཏི ཝིམཏིཙྪེདནཱ། ཨནུམཏིཡཱ པུཙྪཱ ཨནུམཏིཔུཙྪཱ། ‘‘ཏཾ ཀིཾ མཉྙཐ, བྷིཀྑཝེ’’ཏིཨཱདིཔུཙྪཱཡ ཧི ‘‘ཀིཾ ཏུམྷཱཀཾ ཨནུམཏཱི’’ཏི ཨནུམཏི པུཙྪིཏཱ ཧོཏི། ཀཐེཏུཾ ཀམྱཏཱཡ པུཙྪཱ ཀཐེཏུཀམྱཏཱཔུཙྪཱ།

    449. Garubhāvo gāravaṃ, pāsāṇacchattaṃ viya garukaraṇīyatā. Saha gāravenāti sagāravo, garunā kismiñci vutte gāravavasena patissavanaṃ patissavo, saha patissavena sappatissavo, patissavabhūtaṃ taṃsabhāgañca yaṃ kiñci garukaraṇaṃ. Sagārave sappatissavacanaṃ sagāravasappatissavacanaṃ. Garukaraṇaṃ vā gāravo, sagāravassa sappatissavacanaṃ sagāravasappatissavacanaṃ. Etena sabhāveneva sagāravassa tathāpavattaṃ vacananti dasseti. Aññattha du-saddo garahatthopi hoti ‘‘dukkhaṃ dupputto’’tiādīsu viya, idha pana so na sambhavati kucchitāya paññāya abhāvatoti āha ‘‘paññāya duṭṭhaṃ nāma natthī’’ti. ‘‘Dussīlo’’tiādīsu viya abhāvattho du-saddoti vuttaṃ ‘‘appañño nippaññoti attho’’ti. Kittakenāti kena parimāṇena. Taṃ pana parimāṇaṃ yasmā parimeyyassa atthassa paricchindanaṃ hoti, nu-saddo ca pucchāya jotako, tasmā ‘‘kittāvatā nu khoti kāraṇaparicchedapucchā’’ti vatvā ‘‘kittakena nu kho evaṃ vuccatīti attho’’ti āha. ‘‘Kāraṇaparicchedapucchā’’ti iminā ‘‘kittāvatā’’ti sāmaññato pucchābhāvo dassito, na visesato, tassa pucchāvisesabhāvañāpanatthaṃ mahāniddese āgatā sabbāva pucchā atthuddhāranayena dasseti ‘‘pucchā ca nāmā’’tiādinā. Adiṭṭhaṃ jotīyati etāyāti adiṭṭhajotanā, pucchā. Diṭṭhasaṃsandanā sākacchāvasena vinicchayakaraṇaṃ. Vimati chijjati etāyāti vimaticchedanā. Anumatiyā pucchā anumatipucchā. ‘‘Taṃ kiṃ maññatha, bhikkhave’’tiādipucchāya hi ‘‘kiṃ tumhākaṃ anumatī’’ti anumati pucchitā hoti. Kathetuṃ kamyatāya pucchā kathetukamyatāpucchā.

    ལཀྑཎནྟི ཉཱཏུཾ ཨིཙྪིཏོ ཡོ ཀོཙི སབྷཱཝོ། ཨཉྙཱཏནྟི ཡེན ཀེནཙི ཉཱཎེན ཨཉྙཱཏབྷཱཝཾ ཨཱཧ། ཨདིཊྛནྟི དསྶནབྷཱུཏེན པཙྩཀྑཾ ཝིཡ ཨདིཊྛཏཾ། ཨཏུལིཏནྟི ‘‘ཨེཏྟཀཾ ཨིད’’ནྟི ཏུལནབྷཱུཏེན ཨཏུལིཏཏཾ། ཨཏཱིརིཏནྟི ཏཱིརཎབྷཱུཏེན ཨཀཏཉཱཎཀིརིཡཱསམཱཔནཏཾ། ཨཝིབྷཱུཏནྟི ཉཱཎསྶ ཨཔཱཀཊབྷཱཝཾ། ཨཝིབྷཱཝིཏནྟི ཉཱཎེན ཨཔཱཀཊཱིཀཏབྷཱཝཾ། ཨིདྷ དིཊྛསཾསནྡནཱཔུཙྪཱ ཨདྷིཔྤེཏཱ, ན ཨདིཊྛཛོཏནཱ ཝིམཏིཙྪེདནཱ ཙཱཏི།

    Lakkhaṇanti ñātuṃ icchito yo koci sabhāvo. Aññātanti yena kenaci ñāṇena aññātabhāvaṃ āha. Adiṭṭhanti dassanabhūtena paccakkhaṃ viya adiṭṭhataṃ. Atulitanti ‘‘ettakaṃ ida’’nti tulanabhūtena atulitataṃ. Atīritanti tīraṇabhūtena akatañāṇakiriyāsamāpanataṃ. Avibhūtanti ñāṇassa apākaṭabhāvaṃ. Avibhāvitanti ñāṇena apākaṭīkatabhāvaṃ. Idha diṭṭhasaṃsandanāpucchā adhippetā, na adiṭṭhajotanā vimaticchedanā cāti.

    ཀཐམཡཾ ཨཏྠོ ཝིཉྙཱཡཏཱིཏི ཨཱཧ ‘‘ཐེརོ ཧཱི’’ཏིཨཱདི། སཡཾ ཝིནིཙྪིནནྟོཏི སཡམེཝ ཏེསཾ པཉྷཱནཾ ཨཏྠཾ ཝིསེསེན ནིཙྪིནནྟོ། ཨིདཾ སུཏྟནྟི ཨིདཾ པཉྩཝཱིསཏིཔཉྷཔཊིམཎྜིཏསུཏྟཾ, ན ཡཾ ཀིཉྩི ཨནཝསེསེནེཝ མཏྠཀཾ པཱཔེསཱིཏི། ‘‘སཡམེཝ པཉྷཾ སམུཊྛཱཔེཏྭཱ སཡཾ ཝིནིཙྪིནནྟོ’’ཏི ཨེཏྠ ཙཏུཀྐོཊིཀཾ བྷཝཏཱིཏི དསྶེནྟོ ‘‘ཨེཀཙྩོ ཧཱི’’ཏིཨཱདིམཱཧ། པཉྷཾ སམུཊྛཱཔེཏུཾཡེཝ སཀྐོཏཱིཏི པུཙྪནཝིདྷིཾཡེཝ ཛཱནཱཏི། ན ནིཙྪེཏུནྟི ནིཙྪེཏུཾ ན སཀྐོཏི, ཝིསྶཛྫནཝིདྷིཾ ན ཛཱནཱཏཱིཏི ཨཏྠོ། ཝིསེསཊྛཱནནྟི ཨཉྙེཧི ཨསདིསཊྛཱནཾ། ཐེརེན སདིསོཏི ཐེརེན སདིསོ སཱཝཀོ ནཏྠི།

    Kathamayaṃ attho viññāyatīti āha ‘‘thero hī’’tiādi. Sayaṃ vinicchinantoti sayameva tesaṃ pañhānaṃ atthaṃ visesena nicchinanto. Idaṃ suttanti idaṃ pañcavīsatipañhapaṭimaṇḍitasuttaṃ, na yaṃ kiñci anavaseseneva matthakaṃ pāpesīti. ‘‘Sayameva pañhaṃ samuṭṭhāpetvā sayaṃ vinicchinanto’’ti ettha catukkoṭikaṃ bhavatīti dassento ‘‘ekacco hī’’tiādimāha. Pañhaṃ samuṭṭhāpetuṃyeva sakkotīti pucchanavidhiṃyeva jānāti. Na nicchetunti nicchetuṃ na sakkoti, vissajjanavidhiṃ na jānātīti attho. Visesaṭṭhānanti aññehi asadisaṭṭhānaṃ. Therena sadisoti therena sadiso sāvako natthi.

    སཾསནྡིཏྭཱཏི སཾཡོཛེཏྭཱ སམཱནཾ ཀཏྭཱ, ཡཐཱ ཏཏྠ སབྦཉྙུཏཉྙཱཎཾ པཝཏྟཾ, ཏཐཱ ཏཾ ཨཝིལོམེཏྭཱཏི ཨཏྠོ། ལཱིལཱ༹ཡནྟོཏི ལཱིལ༹ཾ ཀརོནྟོ། དྷམྨཀཐིཀཏཱཡ ཨགྒབྷཱཝཔྤཏྟིཡཱ ཏཏྠ ཨཔྤཊིཧཏཉཱཎཏཱཡ བུདྡྷལཱིལཱ༹ཡ ཝིཡ ཙཏུནྣཾ པརིསཱནཾ གམནཾ གཎྷནྟོ དྷམྨཀཐཾ ཀཐེཏི།

    Saṃsanditvāti saṃyojetvā samānaṃ katvā, yathā tattha sabbaññutaññāṇaṃ pavattaṃ, tathā taṃ avilometvāti attho. Līḷāyantoti līḷaṃ karonto. Dhammakathikatāya aggabhāvappattiyā tattha appaṭihatañāṇatāya buddhalīḷāya viya catunnaṃ parisānaṃ gamanaṃ gaṇhanto dhammakathaṃ katheti.

    ཨིཏོ ཝཱ ཨེཏྟོ ཝཱ ཨནུཀྐམིཏྭཱཏི ཨུགྒཧིཏཀཐཱམགྒཏོ ཡཏྠ ཀཏྠཙི ཨཱིསཀམྤི ཨནུཀྐམིཏྭཱ ཨུགྒཧིཏནིཡཱམེནེཝཱཏི ཨཏྠོ། ཏེནཱཧ ‘‘ཡཊྛིཀོཊི’’ནྟིཨཱདི། ཨེཀཔདིཀནྟི ཨེཀཔདནིཀྑེཔམཏྟཾ། དཎྜཀསེཏུནྟི ཨེཀདཎྜཀམཡཾ སེཏུཾ། ཧེཊྛཱ ཙ ཨུཔརི ཙ སུཏྟཔདཱནཾ ཨཱཧརཎེན ཏེཔིཊཀཾ བུདྡྷཝཙནཾ ཧེཊྛུཔརིཡཾ ཀརོནྟོ། ཛཱཏསྶརསདིསཉྩ གཱཐཾ, སུཏྟཔདཾ ཝཱ ནིཀྑིཔིཏྭཱ ཏཏྠ ནཱནཱཨུཔམཱཀཱརཎཱནི ཨཱཧརནྟོ ཏཱནི ཙ ཏེཧི སུཏྟཔདེཧི བོདྷེནྟོ སམུཊྛཱཔེནྟོ ‘‘ཛཱཏསྶརེ པཉྩཝཎྞཱནི ཀུསུམཱནི ཕུལླཱཔེནྟོ ཝིཡ སིནེརུམཏྠཀེ ཝཊྚིསཧསྶཾ ཛཱལེནྟོ ཝིཡཱ’’ཏི ཝུཏྟོ།

    Ito vā etto vā anukkamitvāti uggahitakathāmaggato yattha katthaci īsakampi anukkamitvā uggahitaniyāmenevāti attho. Tenāha ‘‘yaṭṭhikoṭi’’ntiādi. Ekapadikanti ekapadanikkhepamattaṃ. Daṇḍakasetunti ekadaṇḍakamayaṃ setuṃ. Heṭṭhā ca upari ca suttapadānaṃ āharaṇena tepiṭakaṃ buddhavacanaṃ heṭṭhupariyaṃ karonto. Jātassarasadisañca gāthaṃ, suttapadaṃ vā nikkhipitvā tattha nānāupamākāraṇāni āharanto tāni ca tehi suttapadehi bodhento samuṭṭhāpento ‘‘jātassare pañcavaṇṇāni kusumāni phullāpento viya sinerumatthake vaṭṭisahassaṃ jālento viyā’’ti vutto.

    ཨེཀཔདུདྡྷཱརེཏི ཨེཀསྨིཾ པདུདྡྷཱརཎཀྑཎེ། པདཝསེན སཊྛི པདསཏསཧསྶཱནི གཱཐཱཝསེན པནྣརས གཱཐཱསཧསྶཱནི། ཨཱཀཌྜྷིཏྭཱ གཎྷནྟོ ཝིཡཱཏི པཙྩེཀཾ པུཔྥཱནི ཨནོཙིནིཏྭཱ ཝལླིམེཝ ཨཱཀཌྜྷིཏྭཱ ཨེཀཛ྄ཛྷཾ པུཔྥཱནི ཀཏྭཱ གཎྷནྟོ ཝིཡ། ཏེནཱཧ ‘‘ཨེཀཔྤཧཱརེནེཝཱ’’ཏི། གཏིམནྟཱནནྟི ཨཏིསཡཱཡ ཉཱཎགཏིཡཱ ཡུཏྟཱནཾ། དྷིཏིམནྟཱནནྟི དྷཱརཎབལེན ཡུཏྟཱནཾ།

    Ekapaduddhāreti ekasmiṃ paduddhāraṇakkhaṇe. Padavasena saṭṭhi padasatasahassāni gāthāvasena pannarasa gāthāsahassāni. Ākaḍḍhitvā gaṇhanto viyāti paccekaṃ pupphāni anocinitvā vallimeva ākaḍḍhitvā ekajjhaṃ pupphāni katvā gaṇhanto viya. Tenāha ‘‘ekappahārenevā’’ti. Gatimantānanti atisayāya ñāṇagatiyā yuttānaṃ. Dhitimantānanti dhāraṇabalena yuttānaṃ.

    ཨནནྟནཡུསྶདནྟི པཙྩཡུཔྤནྣབྷཱསིཏཏྠནིབྦཱནཝིཔཱཀཀིརིཡཱདིཝསེན ཨནནྟཔབྷེདེ ཝིསཡེ པཝཏྟིཡཱ ཨནནྟནཡེཧི ཨུསྶནྣཾ ཨུཔཙིཏཾ། ཙཏུརོགྷནིཏྠརཎཏྠིཀཱནཾ ཏིཏྠེ ཋཔིཏནཱཝཱ ཝིཡཱཏི ཡོཛནཱ། སཧསྶཡུཏྟཨཱཛཉྙརཐོཏི ཝེཛཡནྟརཐཾ སནྡྷཱཡ ཝདཏི།

    Anantanayussadanti paccayuppannabhāsitatthanibbānavipākakiriyādivasena anantapabhede visaye pavattiyā anantanayehi ussannaṃ upacitaṃ. Caturoghanittharaṇatthikānaṃ titthe ṭhapitanāvā viyāti yojanā. Sahassayuttaājaññarathoti vejayantarathaṃ sandhāya vadati.

    ཡསྨཱ པུཙྪཱཡཾ བྱཱཔནིཙྪཱནཡེན ‘‘དུཔྤཉྙོ དུཔྤཉྙོ’’ཏི ཨཱམེཌིཏཝསེན ཝུཏྟཾ, ཏསྨཱ དྷམྨསེནཱཔཏི པུཙྪིཏམཏྠཾ ཝིསྶཛྫེནྟོ པུཙྪཱསབྷཱགེན ‘‘ནཔྤཛཱནཱཏི ནཔྤཛཱནཱཏཱི’’ཏི ཨཱམེཌིཏཝསེནེཝཱཧ། ཏཏྠ ཨིཏི-སདྡོ ཀཱརཎཏྠོཏི དསྶེནྟོ ‘‘ཡསྨཱ ནཔྤཛཱནཱཏི, ཏསྨཱ དུཔྤཉྙོཏི ཝུཙྩཏཱི’’ཏི ཨཱཧ། ཨིདཾ དུཀྑནྟི ཨིདཾ ཨུཔཱདཱནཀྑནྡྷཔཉྩཀཾ དུཀྑཾ ཨརིཡསཙྩཾ། ཏཉྩ ཁོ རུཔྤནཾ ཝེདིཡནཾ སཉྫཱནནཾ ཨབྷིསངྑརཎཾ ཝིཛཱནནནྟི སངྑེཔཏོ ཨེཏྟཀཾ། ཨིཏོ ཨུདྡྷཾ ཀིཉྩི དྷམྨཛཱཏཾ དུཀྑཾ ཨརིཡསཙྩཾ ནཱམ ནཏྠཱིཏི ཡཱཐཱཝསརསལཀྑཎཏོ པཝཏྟིཀྐམཏོ ཙེཝ པཱིལ༹ནསངྑཏསནྟཱཔཝིཔརིཎཱམལཀྑཎཏོ ཙ ཡཐཱབྷཱུཏཾ ཨརིཡམགྒཔཉྙཱཡ ནཔྤཛཱནཱཏི། ཨཝསེསཔཙྩཡསམཱགམེ ཨུདཡཏི ཨུཔྤཛྫཏི, སྭཱཡཾ སམུདཡོ སཾསཱརཔཝཏྟིབྷཱཝེནཱཏི ཨཱཧ ‘‘པཝཏྟིདུཀྑཔབྷཱཝིཀཱ’’ཏི, དུཀྑསཙྩསྶ ཨུཔྤཱདིཀཱཏི ཨཏྠོ། ཡཱཐཱཝསརསལཀྑཎཏོཏི ཡཐཱབྷཱུཏཾ ཨནུཔཙྪེདཀརཎརསཏོ ཙེཝ སམྤིཎྜནནིདཱནསཾཡོགཔལིབོདྷལཀྑཎཏོ ཙ།

    Yasmā pucchāyaṃ byāpanicchānayena ‘‘duppañño duppañño’’ti āmeḍitavasena vuttaṃ, tasmā dhammasenāpati pucchitamatthaṃ vissajjento pucchāsabhāgena ‘‘nappajānāti nappajānātī’’ti āmeḍitavasenevāha. Tattha iti-saddo kāraṇatthoti dassento ‘‘yasmā nappajānāti, tasmā duppaññotivuccatī’’ti āha. Idaṃ dukkhanti idaṃ upādānakkhandhapañcakaṃ dukkhaṃ ariyasaccaṃ. Tañca kho ruppanaṃ vediyanaṃ sañjānanaṃ abhisaṅkharaṇaṃ vijānananti saṅkhepato ettakaṃ. Ito uddhaṃ kiñci dhammajātaṃ dukkhaṃ ariyasaccaṃ nāma natthīti yāthāvasarasalakkhaṇato pavattikkamato ceva pīḷanasaṅkhatasantāpavipariṇāmalakkhaṇato ca yathābhūtaṃ ariyamaggapaññāya nappajānāti. Avasesapaccayasamāgame udayati uppajjati, svāyaṃ samudayo saṃsārapavattibhāvenāti āha ‘‘pavattidukkhapabhāvikā’’ti, dukkhasaccassa uppādikāti attho. Yāthāvasarasalakkhaṇatoti yathābhūtaṃ anupacchedakaraṇarasato ceva sampiṇḍananidānasaṃyogapalibodhalakkhaṇato ca.

    ཨིདཾ ནཱམ ཋཱནཾ པཏྭཱཏི ཨིདཾ ནཱམ ཨཔྤཝཏྟིཀཱརཎཾ ཨཱགམྨ། ནིརུཛ྄ཛྷཏཱིཏི ཨནུཔྤཱདནིརོདྷཝསེན ནིརུཛ྄ཛྷཏི, ཏེནཱཧ ‘‘ཨུབྷིནྣཾ ཨཔྤཝཏྟཱི’’ཏི། ཡཱཐཱཝསརསལཀྑཎཏོཏི ཡཐཱབྷཱུཏཾ ཨཙྩུཏིརསཏོ ཙེཝ ནིསྶརཎཝིཝེཀཱསངྑཏཱམཏལཀྑཎཏོ ཙ། ཨཡཾ པཊིཔདཱཏི ཨཡཾ སམྨཱདིཊྛིཨཱདིཀཱ སམོདྷཱནལཀྑཎཱ པཊིཔཛྫཏི ཨེཏཱཡཱཏི པཊིཔདཱ། དུཀྑནིརོདྷཾ གཙྪཏཱིཏི དུཀྑནིརོདྷཾ ནིབྦཱནཾ སཙྪིཀིརིཡཱབྷིསམཡཝསེན གཙྪཏི ཨཱརབྦྷ པཝཏྟཏི། ཡཱཐཱཝསརསལཀྑཎཏོཏི ཡཐཱབྷཱུཏཾ ཀིལེསཔྤཧཱནཀརཎསརསཏོ ཙེཝ ནིཡྻཱནཧེཏུདསྶནཱདྷིཔཏེཡྻལཀྑཎཏོ ཙ ནཔྤཛཱནཱཏི། ཨནནྟརཝཱརེཏི དུཏིཡཝཱརེ། ཨིམིནཱཝ ནཡེནཱཏི ‘‘ཨིདཾ དུཀྑཾ, ཨེཏྟཀཾ དུཀྑ’’ནྟིཨཱདིནཱ པཋམཝཱརེ ཝུཏྟནཡེན། ཏཏྠ ཧི དུཔྤཉྙནིདྡེསཏྟཱ པཛཱནནཔཊིཀྑེཔཝསེན དེསནཱ ཨཱགཏཱ, ཨིདྷ པཉྙཝནྟནིདྡེསཏྟཱ པཛཱནནཝསེནཱཏི ཨཡམེཝ ཝིསེསོ། ཨེཏྠཱཏི དུཏིཡཝཱརེ།

    Idaṃ nāma ṭhānaṃ patvāti idaṃ nāma appavattikāraṇaṃ āgamma. Nirujjhatīti anuppādanirodhavasena nirujjhati, tenāha ‘‘ubhinnaṃ appavattī’’ti. Yāthāvasarasalakkhaṇatoti yathābhūtaṃ accutirasato ceva nissaraṇavivekāsaṅkhatāmatalakkhaṇato ca. Ayaṃ paṭipadāti ayaṃ sammādiṭṭhiādikā samodhānalakkhaṇā paṭipajjati etāyāti paṭipadā. Dukkhanirodhaṃ gacchatīti dukkhanirodhaṃ nibbānaṃ sacchikiriyābhisamayavasena gacchati ārabbha pavattati. Yāthāvasarasalakkhaṇatoti yathābhūtaṃ kilesappahānakaraṇasarasato ceva niyyānahetudassanādhipateyyalakkhaṇato ca nappajānāti. Anantaravāreti dutiyavāre. Imināva nayenāti ‘‘idaṃ dukkhaṃ, ettakaṃ dukkha’’ntiādinā paṭhamavāre vuttanayena. Tattha hi duppaññaniddesattā pajānanapaṭikkhepavasena desanā āgatā, idha paññavantaniddesattā pajānanavasenāti ayameva viseso. Etthāti dutiyavāre.

    སཝནཏོཏི ཀམྨཊྛཱནསྶ སཝནཏོ ཨུགྒཎྷཱཏི། གནྠསཝནམུཁེན ཧི ཏདཏྠསྶ ཨུགྒཧཎཾ། ཋཔེཏྭཱ ཏཎྷནྟིཨཱདི ཏསྶ ཨུགྒཧཎཱཀཱརནིདསྶནཾ། ཨབྷིནིཝིསཏཱིཏི ཝིཔསྶནཱབྷིནིཝེསཝསེན ཨབྷིནིཝིསཏི ཝིཔསྶནཱཀམྨཊྛཱནཾ པཊྛཔེཏི། ནོ ཝིཝཊྚེཏི ཝིཝཊྚེ ཨབྷིནིཝེསོ ན ཧོཏི ཨཝིསཡཏྟཱ། ཨཡནྟི ཙཏུསཙྩཀམྨཊྛཱནིཀོ།

    Savanatoti kammaṭṭhānassa savanato uggaṇhāti. Ganthasavanamukhena hi tadatthassa uggahaṇaṃ. Ṭhapetvā taṇhantiādi tassa uggahaṇākāranidassanaṃ. Abhinivisatīti vipassanābhinivesavasena abhinivisati vipassanākammaṭṭhānaṃ paṭṭhapeti. No vivaṭṭeti vivaṭṭe abhiniveso na hoti avisayattā. Ayanti catusaccakammaṭṭhāniko.

    པཉྩཀྑནྡྷཱཏི པཉྩུཔཱདཱནཀྑནྡྷཱ། ཁནྡྷཝསེན ཝིཔསྶནཱབྷིནིཝེསསྶ ཙཀྑཱདིཝསེན ཝེདནཱདིཝསེན ཙ སཏིཔི ཨནེཀཝིདྷཏྟེ སུཀརཾ སུཝིཉྙེཡྻནྟི ཙཏུདྷཱཏུམུཁེན ཏཾ དསྶེཏུཾ ‘‘དྷཱཏུཀམྨཊྛཱནཝསེན ཨོཏརིཏྭཱ’’ཏི ཨཱཧ། རཱུཔནྟི ཝཝཏྠཔེཏཱིཏི རུཔྤནཊྛེན རཱུཔནྟི ཨསངྐརཏོ པརིཙྪིནྡཏི། ཏདཱརམྨཎཱཏི ཏཾ རཱུཔཾ ཨཱརམྨཎཾ ཀཏྭཱ པཝཏྟནཀཱ། ནཱམནྟི ཝེདནཱདིཙཏུཀྐཾ ནམནཊྛེན ནཱམནྟི ཝཝཏྠཱཔེཏི། ཡམཀཏཱལཀྑནྡྷཾ བྷིནྡནྟོ ཝིཡ ཡམཀཾ བྷིནྡིཏྭཱ ‘‘ཨརཱུཔཾ, རཱུཔཉྩཱ’’ཏི དྭེཝ ཨིམེ དྷམྨཱ, ན ཨེཏྠ ཀོཙི ཨཏྟཱ ཝཱ ཨཏྟནིཡཾ ཝཱཏི ནཱམརཱུཔཾ ཝཝཏྠཔེཏི པརིཙྪིནྡཏི པརིགྒཎྷཱཏི། ཨེཏྟཱཝཏཱ དིཊྛིཝིསུདྡྷི དསྶིཏཱ། ཏཾ པནེཏཾ ནཱམརཱུཔཾ ན ཨཧེཏུཀཾ། ཡསྨཱ སབྦཾ སབྦཏྠ སབྦདཱ ཙ ནཏྠི, ཏསྨཱ སཧེཏུཀཾ། ཀཱིདིསེན ཧེཏུནཱ? ན ཨིསྶརཱདིཝིསམཧེཏུནཱ། ཡཾ པནེཏྠ ཝཏྟབྦཾ, ཏཾ ཝིསུདྡྷིམགྒསཾཝཎྞནཱཡཾ (ཝིསུདྡྷི॰ མཧཱཊཱི॰ ༢.༤༤༧) ཝུཏྟནཡེན གཧེཏབྦཾ། སཧེཏུཀཏྟཱ ཨེཝ སཔཙྩཡཾ། ཨཝིཛྫཱདཡོཏི ཨཝིཛྫཱཏཎྷུཔཱདཱནཀམྨཱཧཱརཱདཡོ། ཨེཝནྟི ‘‘ཏཾ པནེཏ’’ནྟིཨཱདིནཱ ཝུཏྟཔྤཀཱརེན ཨཝིཛྫཱདིཀེ པཙྩཡེ ཙེཝ རཱུཔཝེདནཱདིཀེ པཙྩཡུཔྤནྣདྷམྨེ ཙ ཝཝཏྠཔེཏྭཱ པརིཙྪིནྡིཏྭཱ པརིགྒཧེཏྭཱ། ཝུཏྟཉྷེཏཾ ‘‘ཨཝིཛྫཱསམུདཡཱ རཱུཔསམུདཡོ, ཏཎྷཱསམུདཡཱ རཱུཔསམུདཡོ’’ཏི (པཊི॰ མ॰ ༡.༥༠)། ཨེཏྟཱཝཏཱ ཀངྑཱཝིཏརཎཝིསུདྡྷིཾ དསྶེཏི།

    Pañcakkhandhāti pañcupādānakkhandhā. Khandhavasena vipassanābhinivesassa cakkhādivasena vedanādivasena ca satipi anekavidhatte sukaraṃ suviññeyyanti catudhātumukhena taṃ dassetuṃ ‘‘dhātukammaṭṭhānavasena otaritvā’’ti āha. Rūpanti vavatthapetīti ruppanaṭṭhena rūpanti asaṅkarato paricchindati. Tadārammaṇāti taṃ rūpaṃ ārammaṇaṃ katvā pavattanakā. Nāmanti vedanādicatukkaṃ namanaṭṭhena nāmanti vavatthāpeti. Yamakatālakkhandhaṃ bhindanto viya yamakaṃ bhinditvā ‘‘arūpaṃ, rūpañcā’’ti dveva ime dhammā, na ettha koci attā vā attaniyaṃ vāti nāmarūpaṃ vavatthapeti paricchindati pariggaṇhāti. Ettāvatā diṭṭhivisuddhi dassitā. Taṃ panetaṃ nāmarūpaṃ na ahetukaṃ. Yasmā sabbaṃ sabbattha sabbadā ca natthi, tasmā sahetukaṃ. Kīdisena hetunā? Na issarādivisamahetunā. Yaṃ panettha vattabbaṃ, taṃ visuddhimaggasaṃvaṇṇanāyaṃ (visuddhi. mahāṭī. 2.447) vuttanayena gahetabbaṃ. Sahetukattā eva sapaccayaṃ. Avijjādayoti avijjātaṇhupādānakammāhārādayo. Evanti ‘‘taṃ paneta’’ntiādinā vuttappakārena avijjādike paccaye ceva rūpavedanādike paccayuppannadhamme ca vavatthapetvā paricchinditvā pariggahetvā. Vuttañhetaṃ ‘‘avijjāsamudayā rūpasamudayo, taṇhāsamudayā rūpasamudayo’’ti (paṭi. ma. 1.50). Ettāvatā kaṅkhāvitaraṇavisuddhiṃ dasseti.

    ཧུཏྭཱཏི ཧེཏུཔཙྩཡསམཝཱཡེ ཨུཔྤཛྫིཏྭཱ། ཨབྷཱཝཊྛེནཱཏི ཏདནནྟརམེཝ ཝིནསྶནཊྛེན། ཨནིཙྩཱཏི ཨནིཙྩཱ ཨདྡྷུཝཱ། ཨནིཙྩལཀྑཎཾ ཨཱརོཔེཏཱིཏི ཏེསུ པཉྩསུ ཁནྡྷེསུ ཨནིཙྩཏཱསངྑཱཏཾ སཱམཉྙལཀྑཎཾ ནིརོཔེཏི། ཏཏོཏི ཨནིཙྩལཀྑཎཱརོཔནཏོ པརཾ, ཏཏོ ཝཱ ཨནིཙྩབྷཱཝཏོ། ཨུདཡབྦཡཔྤཊིཔཱིལ༹ནཱཀཱརེནཱཏི ཨུཔྤཱདནིརོདྷེཧི པཏི པཏི ཨབྷིཀྑཎཾ པཱིལ༹ནཱཀཱརེན ཧེཏུནཱ དུཀྑཱ ཨནིཊྛཱ, དུཀྑམཱ ཝཱ། ཨཝསཝཏྟནཱཀཱརེནཱཏི ཀསྶཙི ཝསེན ཨཝསཝཏྟནཱཀཱརེན། ཨནཏྟཱཏི ན སཡཾ ཨཏྟཱ, ནཱཔི ནེསཾ ཀོཙི ཨཏྟཱ ཨཏྠཱིཏི ཨནཏྟཱཏི། ཏིལཀྑཎཾ ཨཱརོཔེཏྭཱཏི ཨེཝཾ ཨནིཙྩསྶ དུཀྑབྷཱཝཏོ, དུཀྑསྶ ཙ ཨནཏྟབྷཱཝཏོ ཁནྡྷཔཉྩཀེ ཏིཝིདྷམྤི སཱམཉྙལཀྑཎཾ ཨཱརོཔེཏྭཱ། སམྨསནྟོཏི ཨུདཡབྦཡཉཱཎུཔྤཏྟིཡཱ ཨུཔྤནྣེ ཝིཔསྶནུཔཀྐིལེསེ པཧཱཡ མགྒཱམགྒཾ ཝཝཏྠཔེཏྭཱ ཨུདཡབྦཡཉཱཎཱདིཝིཔསྶནཱཔཊིཔཱཊིཡཱ སངྑཱརེ སམྨསནྟོ གོཏྲབྷུཉཱཎཱནནྟརཾ ལོཀུཏྟརམགྒཾ པཱཔུཎཱཏི།

    Hutvāti hetupaccayasamavāye uppajjitvā. Abhāvaṭṭhenāti tadanantarameva vinassanaṭṭhena. Aniccāti aniccā addhuvā. Aniccalakkhaṇaṃ āropetīti tesu pañcasu khandhesu aniccatāsaṅkhātaṃ sāmaññalakkhaṇaṃ niropeti. Tatoti aniccalakkhaṇāropanato paraṃ, tato vā aniccabhāvato. Udayabbayappaṭipīḷanākārenāti uppādanirodhehi pati pati abhikkhaṇaṃ pīḷanākārena hetunā dukkhā aniṭṭhā, dukkhamā vā. Avasavattanākārenāti kassaci vasena avasavattanākārena. Anattāti na sayaṃ attā, nāpi nesaṃ koci attā atthīti anattāti. Tilakkhaṇaṃāropetvāti evaṃ aniccassa dukkhabhāvato, dukkhassa ca anattabhāvato khandhapañcake tividhampi sāmaññalakkhaṇaṃ āropetvā. Sammasantoti udayabbayañāṇuppattiyā uppanne vipassanupakkilese pahāya maggāmaggaṃ vavatthapetvā udayabbayañāṇādivipassanāpaṭipāṭiyā saṅkhāre sammasanto gotrabhuñāṇānantaraṃ lokuttaramaggaṃ pāpuṇāti.

    ཨེཀཔཊིཝེདྷེནཱཏི ཨེཀེནེཝ ཉཱཎེན པཊིཝིཛ྄ཛྷནེན། པཊིཝེདྷོ པཊིགྷཱཏཱབྷཱཝེན ཝིསཡེ ནིསྶངྒཙཱརསངྑཱཏཾ ནིབྦིཛ྄ཛྷནཾ། ཨབྷིསམཡོ ཨཝིརཛ྄ཛྷིཏྭཱ ཨདྷིགམནསངྑཱཏོ ཨཝབོདྷོ། ‘‘ཨིདཾ དུཀྑཾ, ཨེཏྟཾ དུཀྑཾ, ན ཨིཏོ བྷིཡྻོ’’ཏི པརིཙྪིནྡིཏྭཱ ཡཱཐཱཝཏོ ཛཱནནམེཝ ཝུཏྟནཡེན པཊིཝེདྷོཏི པརིཉྙཱཔཊིཝེདྷོ, ཨིདཉྩ ཡཐཱ ཉཱཎེ པཝཏྟེ པཙྪཱ དུཀྑསྶ སརཱུཔཱདིཔརིཙྪེདེ སམྨོཧོ ན ཧོཏི, ཏཐཱ པཝཏྟིཾ གཧེཏྭཱ ཝུཏྟཾ, ན པན མགྒཉཱཎསྶ ‘‘ཨིདཾ དུཀྑ’’ནྟིཨཱདིནཱ པཝཏྟནཏོ། ཏེནཱཧ ‘‘ཏསྨིཉྩསྶ ཁཎེ’’ཏིཨཱདི། པཧཱིནསྶ པུན ཨཔཧཱཏབྦཏཱཡ པཀཊྛཾ ཧཱནཾ ཙཛནཾ སམུཙྪིནྡནཾ པཧཱནཾ, པཧཱནམེཝ ཝུཏྟནཡེན པཊིཝེདྷོཏི པཧཱནཔཊིཝེདྷོ། ཨཡམྤི ཡེན ཀིལེསེན ཨཔྤཧཱིཡམཱནེན མགྒབྷཱཝནཱཡ ན བྷཝིཏབྦཾ, ཨསཏི ཙ མགྒབྷཱཝནཱཡ ཡོ ཨུཔྤཛྫེཡྻ, ཏསྶ པདགྷཱཏཾ ཀརོནྟསྶ ཨནུཔྤཏྟིདྷམྨཏཾ ཨཱཔཱདེནྟསྶ ཉཱཎསྶ ཏཐཱཔཝཏྟིཡཱ པཊིགྷཱཏཱབྷཱཝེན ནིསྶངྒཙཱརཾ ཨུཔཱདཱཡ ཨེཝཾ ཝུཏྟོ། སཙྪིཀིརིཡཱ པཙྩཀྑཀརཎཾ ཨནུསྶཝཱཀཱརཔརིཝིཏཀྐཱདིཀེ མུཉྩིཏྭཱཝ སརཱུཔཏོ ཨཱརམྨཎཀརཎཾ ‘‘ཨིདཾ ཏ’’ནྟི ཡཱཐཱཝསབྷཱཝཏོ གཧཎཾ, སཱ ཨེཝ ཝུཏྟནཡེན པཊིཝེདྷོཏི སཙྪིཀིརིཡཱཔཊིཝེདྷོ། ཨཡམྤི ཡསྶ ཨཱཝརཎསྶ ཨསམུཙྪིནྡནཏོ ཉཱཎཾ ནིརོདྷཾ ཨཱལམྦིཏུཾ ན སཀྐོཏི, ཏསྶ སམུཙྪིནྡནཏོ ཏཾ སརཱུཔཏོ ཝིབྷཱཝིཏམེཝ པཝཏྟཏཱིཏི ཨེཝཾ ཝུཏྟོ།

    Ekapaṭivedhenāti ekeneva ñāṇena paṭivijjhanena. Paṭivedho paṭighātābhāvena visaye nissaṅgacārasaṅkhātaṃ nibbijjhanaṃ. Abhisamayo avirajjhitvā adhigamanasaṅkhāto avabodho. ‘‘Idaṃ dukkhaṃ, ettaṃ dukkhaṃ, na ito bhiyyo’’ti paricchinditvā yāthāvato jānanameva vuttanayena paṭivedhoti pariññāpaṭivedho, idañca yathā ñāṇe pavatte pacchā dukkhassa sarūpādiparicchede sammoho na hoti, tathā pavattiṃ gahetvā vuttaṃ, na pana maggañāṇassa ‘‘idaṃ dukkha’’ntiādinā pavattanato. Tenāha ‘‘tasmiñcassa khaṇe’’tiādi. Pahīnassa puna apahātabbatāya pakaṭṭhaṃ hānaṃ cajanaṃ samucchindanaṃ pahānaṃ, pahānameva vuttanayena paṭivedhoti pahānapaṭivedho. Ayampi yena kilesena appahīyamānena maggabhāvanāya na bhavitabbaṃ, asati ca maggabhāvanāya yo uppajjeyya, tassa padaghātaṃ karontassa anuppattidhammataṃ āpādentassa ñāṇassa tathāpavattiyā paṭighātābhāvena nissaṅgacāraṃ upādāya evaṃ vutto. Sacchikiriyā paccakkhakaraṇaṃ anussavākāraparivitakkādike muñcitvāva sarūpato ārammaṇakaraṇaṃ ‘‘idaṃ ta’’nti yāthāvasabhāvato gahaṇaṃ, sā eva vuttanayena paṭivedhoti sacchikiriyāpaṭivedho. Ayampi yassa āvaraṇassa asamucchindanato ñāṇaṃ nirodhaṃ ālambituṃ na sakkoti, tassa samucchindanato taṃ sarūpato vibhāvitameva pavattatīti evaṃ vutto.

    བྷཱཝནཱ ཨུཔྤཱདནཱ ཝཌྜྷནཱ ཙ། ཏཏྠ པཋམམགྒེ ཨུཔྤཱདནཊྛེན བྷཱཝནཱ, དུཏིཡཱདཱིསུ ཝཌྜྷནཊྛེན, ཨུབྷཡཏྠཱཔི ཝཱ ཨུབྷཡཾ ཝེདིཏབྦཾ། པཋམམགྒོཔི ཧི ཡཐཱརཧཾ ཝུཊྛཱནགཱམིནིཡཾ པཝཏྟཾ པརིཛཱནནཱདིཾ ཝཌྜྷེནྟོ པཝཏྟོཏི ཏཏྠཱཔི ཝཌྜྷནཊྛེན བྷཱཝནཱཏི སཀྐཱ ཝིཉྙཱཏུཾ། དུཏིཡཱདཱིསུཔི ཨཔྤཧཱིནཀིལེསཔྤཧཱནཏོ པུགྒལནྟརསཱདྷནཏོ ཙ ཨུཔྤཱདནཊྛེན བྷཱཝནཱ, སཱ ཨེཝ ཝུཏྟནཡེན པཊིཝེདྷོཏི བྷཱཝནཱཔཊིཝེདྷོ། ཨཡམྤི ཡཐཱ ཉཱཎེ པཝཏྟེ པཙྪཱ མགྒདྷམྨཱནཾ སརཱུཔཔརིཙྪེདེ སམྨོཧོ ན ཧོཏི, ཏཐཱ པཝཏྟིཾ གཧེཏྭཱ ཝུཏྟོ། ཏིཊྛནྟུ ཏཱཝ ཡཐཱདྷིགཏཱ མགྒདྷམྨཱ, ཡཐཱཔཝཏྟེསུ ཕལེསུཔི ཨཡཾ ཡཐཱདྷིགཏསཙྩདྷམྨེསུ ཝིཡ ཝིགཏསམྨོཧོཝ ཧོཏི སེཀྑོཔི སམཱནོ། ཏེན ཝུཏྟཾ – ‘‘དིཊྛདྷམྨོ པཏྟདྷམྨོ ཝིདིཏདྷམྨོ པརིཡོགཱལ༹ྷདྷམྨོ’’ཏི (མཧཱཝ॰ ༢༧)། ཡཐཱ ཙསྶ དྷམྨཱ ཏཱསཾ ཛོཏིཏཱ ཡཐཱདྷིགཏསཙྩདྷམྨཱཝལམྦིནིཡོ མགྒཝཱིཐིཏོ པརཏོ མགྒཕལཔཧཱིནཱཝསིཊྛཀིལེསནིབྦཱནཱནཾ པཙྩཝེཀྑཎཱ པཝཏྟནྟི། དུཀྑསཙྩདྷམྨཱ ཧི སཀྐཱཡདིཊྛིཨཱདཡོ། ཨཡཉྩ ཨཏྠཝཎྞནཱ པརིཉྙཱབྷིསམཡེནཱཏིཨཱདཱིསུཔི ཝིབྷཱཝེཏབྦཱ། ཀིཙྩཏོཏི ཨསམྨོཧཏོ། ནིརོདྷཾ ཨཱརམྨཎཏོཏི ཨེཏྠ ‘‘ཨཱརམྨཎཏོཔཱི’’ཏི པི-སདྡོ ལུཏྟནིདྡིཊྛོ དཊྛབྦོ ནིརོདྷེཔི ཨསམྨོཧཔཊིཝེདྷསྶ ལབྦྷནཏོ། ཨེཏསྶཱཏི ཙཏུསཙྩཀམྨཊྛཱནིཀསྶ པུགྒལསྶ།

    Bhāvanā uppādanā vaḍḍhanā ca. Tattha paṭhamamagge uppādanaṭṭhena bhāvanā, dutiyādīsu vaḍḍhanaṭṭhena, ubhayatthāpi vā ubhayaṃ veditabbaṃ. Paṭhamamaggopi hi yathārahaṃ vuṭṭhānagāminiyaṃ pavattaṃ parijānanādiṃ vaḍḍhento pavattoti tatthāpi vaḍḍhanaṭṭhena bhāvanāti sakkā viññātuṃ. Dutiyādīsupi appahīnakilesappahānato puggalantarasādhanato ca uppādanaṭṭhena bhāvanā, sā eva vuttanayena paṭivedhoti bhāvanāpaṭivedho. Ayampi yathā ñāṇe pavatte pacchā maggadhammānaṃ sarūpaparicchede sammoho na hoti, tathā pavattiṃ gahetvā vutto. Tiṭṭhantu tāva yathādhigatā maggadhammā, yathāpavattesu phalesupi ayaṃ yathādhigatasaccadhammesu viya vigatasammohova hoti sekkhopi samāno. Tena vuttaṃ – ‘‘diṭṭhadhammo pattadhammo viditadhammo pariyogāḷhadhammo’’ti (mahāva. 27). Yathā cassa dhammā tāsaṃ jotitā yathādhigatasaccadhammāvalambiniyo maggavīthito parato maggaphalapahīnāvasiṭṭhakilesanibbānānaṃ paccavekkhaṇā pavattanti. Dukkhasaccadhammā hi sakkāyadiṭṭhiādayo. Ayañca atthavaṇṇanā pariññābhisamayenātiādīsupi vibhāvetabbā. Kiccatoti asammohato. Nirodhaṃ ārammaṇatoti ettha ‘‘ārammaṇatopī’’ti pi-saddo luttaniddiṭṭho daṭṭhabbo nirodhepi asammohapaṭivedhassa labbhanato. Etassāti catusaccakammaṭṭhānikassa puggalassa.

    པཉྙཝཱཏི ནིདྡིཊྛོ ནིཔྤརིཡཱཡཏོ པཉྙཝནྟཏཱཡ ཨིདྷ ཨདྷིཔྤེཏཏྟཱ། པཱལི༹ཏོཏི དྷམྨཏོ། ཨཏྠཏོཏི ཨཊྛཀཐཱཏོ། ཨནུསནྡྷིཏོཏི ཏསྨིཾ ཏསྨིཾ སུཏྟེ ཏཾཏཾཨནུསནྡྷིཏོ། པུབྦཱཔརཏོཏི པུབྦེནཱཔརསྶ སཾསནྡནཏོ། སངྒཱིཏིཀྐམེན ཙེཏྠ པུབྦཱཔརཏཱ ཝེདིཏབྦཱ། ཏཾཏཾདེསནཱཡམེཝ ཝཱ པུབྦབྷཱགེན ཨཔརབྷཱགསྶ སཾསནྡནཏོ། ཝིཉྙཱཎཙརིཏོཏི ཝིཛཱནནཙརིཏོ ཝཱིམཾསནཙརིཏོ ཏེཔིཊཀེ བུདྡྷཝཙནེ ཝིཙཱརཎཱཙཱརཝེཔུལླཏོ། པཉྙཝཱཏི ན ཝཏྟབྦོ མགྒེནཱགཏཱཡ པཉྙཱཡ ཨབྷཱཝཏོ། ཨཛྫ ཨཛྫེཝ ཨརཧཏྟནྟི ཨིཏྟརཾ ཨཏིཁིཔྤམེཝཱཏི ཨདྷིཔྤཱཡོ། པཉྙཝཱཔཀྑཾ བྷཛཏི སེཀྑཔརིཡཱཡསབྦྷཱཝཏོ། སུཏྟེ པན པཊིཝེདྷོཝ ཀཐིཏོ སཙྩཱབྷིསམཡཝསེན ཨཱགཏཏྟཱ།

    Paññavāti niddiṭṭho nippariyāyato paññavantatāya idha adhippetattā. Pāḷitoti dhammato. Atthatoti aṭṭhakathāto. Anusandhitoti tasmiṃ tasmiṃ sutte taṃtaṃanusandhito. Pubbāparatoti pubbenāparassa saṃsandanato. Saṅgītikkamena cettha pubbāparatā veditabbā. Taṃtaṃdesanāyameva vā pubbabhāgena aparabhāgassa saṃsandanato. Viññāṇacaritoti vijānanacarito vīmaṃsanacarito tepiṭake buddhavacane vicāraṇācāravepullato. Paññavāti na vattabbo maggenāgatāya paññāya abhāvato. Ajja ajjeva arahattanti ittaraṃ atikhippamevāti adhippāyo. Paññavāpakkhaṃ bhajati sekkhapariyāyasabbhāvato. Sutte pana paṭivedhova kathito saccābhisamayavasena āgatattā.

    ཨེསཱཏི ཨནནྟརེ ཝུཏྟོ ཨརིཡཔུགྒལོ། ཀམྨཀཱརཀཙིཏྟནྟི བྷཱཝནཱཀམྨསྶ པཝཏྟནཀཙིཏྟཾ ། སུཁཝེདནམྤི ཝིཛཱནཱཏཱིཏི ཀོ ཝེདིཡཏི, ཀསྶ ཝེདནཱ, ཀིཾཀཱརཎཱ ཝེདནཱ, སོཔི ཀསྶཙི ཨབྷཱཝགྒཧཎམུཁེན སུཁཾ ཝེདནཾ སབྷཱཝཏོ སམུདཡཏོ ཨཏྠངྒམཏོ ཨསྶཱདཏོ ཨཱདཱིནཝཏོ ཙ ཡཐཱབྷཱུཏཾ པརིཙྪིནྡནྟོ པརིགྒཎྷནྟོ སུཁཾ ཝེདནཾ ཝིཛཱནཱཏི ནཱམ། སེསཔདདྭཡེཔི ཨེསེཝ ནཡོ། ཡསྨཱ ‘‘སཏིཔཊྛཱནེ’’ཏི ཨིམིནཱ སཏིཔཊྛཱནཀཐཾ ཨུཔལཀྑེཏི། ཏཱཡ ཧི ཏདཏྠོ ཝེདིཏབྦོ, ཏསྨཱ ཏཾསཾཝཎྞནཱཡམྤི (དཱི॰ ནི॰ ཊཱི॰ ༢.༣༨༠) ཝུཏྟནཡེན ཏསྶཏྠོ ཝེདིཏབྦོ ། ཀཱམཉྩེཏཾ ཝིཉྙཱཎཾ ཝེདནཱཏོ ཨཉྙམྤི ཨཱརམྨཎཾ ཝིཛཱནཱཏི, ཨནནྟརཝཱརེ པན རཱུཔམུཁེན ཝིཔསྶནཱབྷིནིཝེསསྶ དསྶིཏཏྟཱ ཨིདྷ ཨརཱུཔམུཁེན དསྶེཏུཾ ‘‘སུཁནྟིཔི ཝིཛཱནཱཏཱི’’ཏིཨཱདིནཱ ནིདྡིཊྛཾ, པུཙྪནྟསྶ ཝཱ ཨཛ྄ཛྷཱསཡཝསེན།

    Esāti anantare vutto ariyapuggalo. Kammakārakacittanti bhāvanākammassa pavattanakacittaṃ . Sukhavedanampi vijānātīti ko vediyati, kassa vedanā, kiṃkāraṇā vedanā, sopi kassaci abhāvaggahaṇamukhena sukhaṃ vedanaṃ sabhāvato samudayato atthaṅgamato assādato ādīnavato ca yathābhūtaṃ paricchindanto pariggaṇhanto sukhaṃ vedanaṃ vijānāti nāma. Sesapadadvayepi eseva nayo. Yasmā ‘‘satipaṭṭhāne’’ti iminā satipaṭṭhānakathaṃ upalakkheti. Tāya hi tadattho veditabbo, tasmā taṃsaṃvaṇṇanāyampi (dī. ni. ṭī. 2.380) vuttanayena tassattho veditabbo . Kāmañcetaṃ viññāṇaṃ vedanāto aññampi ārammaṇaṃ vijānāti, anantaravāre pana rūpamukhena vipassanābhinivesassa dassitattā idha arūpamukhena dassetuṃ ‘‘sukhantipi vijānātī’’tiādinā niddiṭṭhaṃ, pucchantassa vā ajjhāsayavasena.

    སཾསཊྛཱཏི སམྤཡུཏྟཱ། ཏེནཱཧ ‘‘ཨེཀུཔྤཱདཱདིལཀྑཎེན སཾཡོགཊྛེནཱ’’ཏི། ཝིསཾསཊྛཱཏི ཝིཔྤཡུཏྟཱ། བྷིནྡིཏྭཱཏི ཨཉྙབྷཱུམིཀསྶ ཨཉྙབྷཱུམིདསྶནེནེཝ ཝིནཱསེཏྭཱ, སཾབྷིནྡིཏྭཱ ཝཱ། སཾསཊྛབྷཱཝཾ པུཙྪཏཱིཏི ཏཾཙིཏྟུཔྤཱདཔརིཡཱཔནྣཱནཾ པཉྩཝིཉྙཱཎཱནཾ སཾསཊྛབྷཱཝཾ པུཙྪཏི། ཡདི ཨེཝཾ ཀཐཾ པུཙྪཱཡ ཨཝསརོ ཝིསཾསཊྛབྷཱཝཱསངྐཱཡ ཨེཝ ཨབྷཱཝཏོ? ན, ཙིཏྟུཔྤཱདནྟརགཏཱནཾ མགྒཔཉྙཱམགྒཝིཉྙཱཎཱནཾ ཝིཔསྶནཱཔཉྙཱཝིཔསྶནཱཝིཉྙཱཎཱནཉྩ ཝོམིསྶཀསཾསཊྛབྷཱཝསྶ ལབྦྷམཱནཏྟཱ། ཝིནིཝཊྚེཏྭཱཏི ཨཉྙམཉྙཏོ ཝིཝེཙེཏྭཱ། ནཱནཱཀརཎཾ དསྶེཏུཾ ན སཀྐཱཏི ཨིདཾ ཀེཝལཾ སཾསཊྛབྷཱཝམེཝ སནྡྷཱཡ ཝུཏྟཾ, ན སབྷཱཝབྷེདཾ, སབྷཱཝབྷེདཏོ པན ནཱནཱཀརཎཾ ནེསཾ པཱཀཊམེཝ། ཏེནཱཧ ‘‘ཨཱརམྨཎཏོ ཝཱ ཝཏྠུཏོ ཝཱ ཨུཔྤཱདཏོ ཝཱ ནིརོདྷཏོ ཝཱ’’ཏི། ཨིདཱནི ཏམེཝ སབྷཱཝབྷེདཾ ཝིསཡབྷེདེན སུཊྛུ པཱཀཊཾ ཀཏྭཱ དསྶེཏུཾ ‘‘ཏེསཾ ཏེསཾ པནཱ’’ཏིཨཱདི ཝུཏྟཾ། ཝིསཡོཏི པཝཏྟིཊྛཱནཾ ཨིསྶརིཡབྷཱུམི, ཡེན ཙིཏྟཔཉྙཱནཾ ཏཏྠ ཏཏྠ པུབྦངྒམཏཱ ཝུཙྩཏི།

    Saṃsaṭṭhāti sampayuttā. Tenāha ‘‘ekuppādādilakkhaṇena saṃyogaṭṭhenā’’ti. Visaṃsaṭṭhāti vippayuttā. Bhinditvāti aññabhūmikassa aññabhūmidassaneneva vināsetvā, saṃbhinditvā vā. Saṃsaṭṭhabhāvaṃ pucchatīti taṃcittuppādapariyāpannānaṃ pañcaviññāṇānaṃ saṃsaṭṭhabhāvaṃ pucchati. Yadi evaṃ kathaṃ pucchāya avasaro visaṃsaṭṭhabhāvāsaṅkāya eva abhāvato? Na, cittuppādantaragatānaṃ maggapaññāmaggaviññāṇānaṃ vipassanāpaññāvipassanāviññāṇānañca vomissakasaṃsaṭṭhabhāvassa labbhamānattā. Vinivaṭṭetvāti aññamaññato vivecetvā. Nānākaraṇaṃ dassetuṃ na sakkāti idaṃ kevalaṃ saṃsaṭṭhabhāvameva sandhāya vuttaṃ, na sabhāvabhedaṃ, sabhāvabhedato pana nānākaraṇaṃ nesaṃ pākaṭameva. Tenāha ‘‘ārammaṇato vā vatthuto vā uppādato vā nirodhato vā’’ti. Idāni tameva sabhāvabhedaṃ visayabhedena suṭṭhu pākaṭaṃ katvā dassetuṃ ‘‘tesaṃ tesaṃ panā’’tiādi vuttaṃ. Visayoti pavattiṭṭhānaṃ issariyabhūmi, yena cittapaññānaṃ tattha tattha pubbaṅgamatā vuccati.

    ཀཱམཉྩ ཝིཔསྶནཱཔི པཉྙཱཝསེནེཝ ཀིཙྩཀཱརཱི, མགྒོཔི ཝིཉྙཱཎསཧིཏོཝ, ན ཀེཝལོ, ཡཐཱ པན ལོཀིཡདྷམྨེསུ ཙིཏྟཾ པདྷཱནཾ ཏཏྠསྶ དྷོརཡ྄ཧབྷཱཝེན པཝཏྟིསབྦྷཱཝཏོ། ཏཐཱ ཧི ཏཾ ‘‘ཚདྭཱརཱདྷིཔཏི རཱཛཱ’’ཏི (དྷ॰ པ॰ ཨཊྛ॰ ༢.༡༨༡) ཝུཙྩཏི, ཨེཝཾ ལོཀུཏྟརདྷམྨེསུ པཉྙཱ པདྷཱནཱ པཊིཔཀྑཝིདྷམནསྶ ཝིསེསཏོ ཏདདྷཱིནཏྟཱ། ཏཐཱ ཧི མགྒདྷམྨེ སམྨཱདིཊྛི ཨེཝ པཋམཾ གཧིཏཱ། ཨཡཉྩ ནེསཾ ཝིསཡཝསེན པཝཏྟིབྷེདོ, ཏཐཱ ཙ པཉྙཱཔནཝིདྷི ན ཀེཝལཾ ཐེརེཧེཝ དསྶིཏོ, ཨཔིཙ ཁོ བྷགཝཏཱཔི དསྶིཏོཏི ཝིབྷཱཝེནྟོ ‘‘སམྨཱསམྦུདྡྷོཔཱི’’ཏིཨཱདིམཱཧ། ཡཏྠ པཉྙཱ ན ལབྦྷཏི, ཏཏྠ ཙིཏྟཝསེན པུཙྪནེ ཝཏྟབྦམེཝ ནཏྠི ཡཐཱ ‘‘ཀིཾཙིཏྟོ ཏྭཾ བྷིཀྑཱུ’’ཏིཨཱདཱིསུ (པཱརཱ॰ ༡༣༢-༡༣༥)། ཡཏྠ པན པཉྙཱ ལབྦྷཏི, ཏཏྠཱཔི ཙིཏྟཝསེན ཛོཏནཱ ཧོཏི ཡཐཱ – ‘‘ཨཛ྄ཛྷཏྟམེཝ ཙིཏྟཾ སཎྛཔེཏི སནྣིསཱདེཏི ཨེཀོདིཾ ཀརོཏི སམཱདཧཏི (སཾ॰ ནི॰ ༤.༣༣༢), ཡསྨིཾ སམཡེ ཀཱམཱཝཙརཾ ཀུསལཾ ཙིཏྟཾ ཨུཔྤནྣཾ ཧོཏཱི’’ཏིཨཱདཱིསུ (དྷ॰ ས॰ ༡)། ཨཊྛཀཐཱཡཾ པན ལོཀིཡདྷམྨེསུ ཙིཏྟཝསེན, ལོཀུཏྟརདྷམྨེསུ པཉྙཱཝསེན ཙོདནཾ བྱཏིརེཀམུཁེན དསྶེཏུཾ ‘‘ཀཏམཱ ཏེ བྷིཀྑུ པཉྙཱ ཨདྷིགཏཱ’’ཏིཨཱདི ཝུཏྟཾ། ཡེབྷུཡྻཝསེན ཙེཏཾ ཝུཏྟནྟི དཊྛབྦཾ། ཏཐཱ ཧི ཀཏྠཙི ལོཀིཡདྷམྨཱ པཉྙཱསཱིསེནཔི ནིདྡིསཱིཡནྟི – ‘‘པཋམསྶ ཛྷཱནསྶ ལཱབྷིནོ ཀཱམསཧགཏཱ སཉྙཱམནསིཀཱརཱ སམུདཱཙརནྟི ཧཱནབྷཱགིནཱི པཉྙཱ’’ཏིཨཱདཱིསུ (པཊི॰ མ॰ ༡.༡)། སཉྙཱསཱིསེནཔི – ‘‘ཨུདྡྷུམཱཏཀསཉྙཱཏི ཝཱ སེསརཱུཔཱརཱུཔསཉྙཱཏི ཝཱ ཨིམེ དྷམྨཱ ཨེཀཏྠཱ, ཨུདཱཧུ ནཱནཏྠཱ’’ཏིཨཱདཱིསུ (པཱརཱ॰ ཨཊྛ॰ ༤༥.པདབྷཱཛནཱིཡཝཎྞནཱ)། ཏཐཱ ལོཀུཏྟརདྷམྨཱཔི ཀཏྠཙི ཙིཏྟསཱིསེན ནིདྡིསཱིཡནྟི – ‘‘ཡསྨིཾ སམཡེ ལོཀུཏྟརཾ ཙིཏྟཾ བྷཱཝེཏཱི’’ཏི (དྷ॰ ས॰ ༢༧༧), ཏཐཱ ཕསྶཱདིསཱིསེནཔི – ‘‘ཡསྨིཾ སམཡེ ལོཀུཏྟརཾ ཕསྶཾ བྷཱཝེཏི, ཝེདནཾ སཉྙཾ ཙེཏནཾ བྷཱཝེཏཱི’’ཏིཨཱདཱིསུ (དྷ॰ ས॰ ༢༧༧)།

    Kāmañca vipassanāpi paññāvaseneva kiccakārī, maggopi viññāṇasahitova, na kevalo, yathā pana lokiyadhammesu cittaṃ padhānaṃ tatthassa dhorayhabhāvena pavattisabbhāvato. Tathā hi taṃ ‘‘chadvārādhipati rājā’’ti (dha. pa. aṭṭha. 2.181) vuccati, evaṃ lokuttaradhammesu paññā padhānā paṭipakkhavidhamanassa visesato tadadhīnattā. Tathā hi maggadhamme sammādiṭṭhi eva paṭhamaṃ gahitā. Ayañca nesaṃ visayavasena pavattibhedo, tathā ca paññāpanavidhi na kevalaṃ thereheva dassito, apica kho bhagavatāpi dassitoti vibhāvento ‘‘sammāsambuddhopī’’tiādimāha. Yattha paññā na labbhati, tattha cittavasena pucchane vattabbameva natthi yathā ‘‘kiṃcitto tvaṃ bhikkhū’’tiādīsu (pārā. 132-135). Yattha pana paññā labbhati, tatthāpi cittavasena jotanā hoti yathā – ‘‘ajjhattameva cittaṃ saṇṭhapeti sannisādeti ekodiṃ karoti samādahati (saṃ. ni. 4.332), yasmiṃ samaye kāmāvacaraṃ kusalaṃ cittaṃ uppannaṃ hotī’’tiādīsu (dha. sa. 1). Aṭṭhakathāyaṃ pana lokiyadhammesu cittavasena, lokuttaradhammesu paññāvasena codanaṃ byatirekamukhena dassetuṃ ‘‘katamā te bhikkhu paññā adhigatā’’tiādi vuttaṃ. Yebhuyyavasena cetaṃ vuttanti daṭṭhabbaṃ. Tathā hi katthaci lokiyadhammā paññāsīsenapi niddisīyanti – ‘‘paṭhamassa jhānassa lābhino kāmasahagatā saññāmanasikārā samudācaranti hānabhāginī paññā’’tiādīsu (paṭi. ma. 1.1). Saññāsīsenapi – ‘‘uddhumātakasaññāti vā sesarūpārūpasaññāti vā ime dhammā ekatthā, udāhu nānatthā’’tiādīsu (pārā. aṭṭha. 45.padabhājanīyavaṇṇanā). Tathā lokuttaradhammāpi katthaci cittasīsena niddisīyanti – ‘‘yasmiṃ samaye lokuttaraṃ cittaṃ bhāvetī’’ti (dha. sa. 277), tathā phassādisīsenapi – ‘‘yasmiṃ samaye lokuttaraṃ phassaṃ bhāveti, vedanaṃ saññaṃ cetanaṃ bhāvetī’’tiādīsu (dha. sa. 277).

    ཙཏཱུསུ སོཏཱཔཏྟིཡངྒེསཱུཏི སཔྤུརིསསེཝནཱ, སདྡྷམྨསྶཝནཾ, ཡོནིསོམནསིཀཱརོ, དྷམྨཱནུདྷམྨཔཊིཔཏྟཱིཏི ཨིམེསུ ཙཏཱུསུ སོཏཱཔཏྟིམགྒསྶ ཀཱརཎེསུ། ཀཱམཾ ཙེཏེསུ སཏིཨཱདཡོཔི དྷམྨཱ ཨིཙྪིཏབྦཱཝ ཏེཧི ཝིནཱ ཏེསཾ ཨསམྦྷཝཏོ, ཏཐཱཔི ཙེཏྠ སདྡྷཱ ཝིསེསཏོ ཀིཙྩཀཱརཱིཏི ཝེདིཏབྦཱ། སདྡོ ཨེཝ ཧི སཔྤུརིསེ པཡིརུཔཱསཏི, སདྡྷམྨཾ སུཎཱཏི, ཡོནིསོ ཙ མནསི ཀརོཏི, ཨརིཡམགྒསྶ ཙ ཨནུདྷམྨཾ པཊིཔཛྫཏི, ཏསྨཱ ཝུཏྟཾ ‘‘ཨེཏྠ སདྡྷིནྡྲིཡཾ དཊྛབྦ’’ནྟི། ཨིམིནཱ ནཡེན སེསིནྡྲིཡེསུཔི ཨཏྠོ དཊྛབྦོ། ཙཏཱུསུ སམྨཔྤདྷཱནེསཱུཏི ཙཏུབྦིདྷསམྨཔྤདྷཱནབྷཱཝནཱཡ། ཙཏཱུསུ སཏིཔཊྛཱནེསཱུཏིཨཱདཱིསུཔི ཨེསེཝ ནཡོ། ཨེཏྠ ཙ སོཏཱཔཏྟིཡངྒེསུ སདྡྷཱ ཝིཡ སམྨཔྤདྷཱནབྷཱཝནཱཡ ཝཱིརིཡཾ ཝིཡ ཙ སཏིཔཊྛཱནབྷཱཝནཱཡ – ‘‘སཏིམཱ ཝིནེཡྻ ལོཀེ ཨབྷིཛ྄ཛྷཱདོམནསྶ’’ནྟི (དཱི॰ ནི॰ ༢.༣༧༣; མ॰ ནི॰ ༡.༡༠༦; སཾ॰ ནི॰ ༥.༣༨༤, ༤༠༧) ཝཙནཏོ པུབྦབྷཱགེ ཀིཙྩཏོ སཏི ཨདྷིཀཱ ཨིཙྪིཏབྦཱ། ཨེཝཾ སམཱདྷིཀམྨིཀསྶ སམཱདྷི, ‘‘ཨརིཡསཙྩབྷཱཝནཱ པཉྙཱབྷཱཝནཱ’’ཏི ཀཏྭཱ ཏཏྠ པཉྙཱ པུབྦབྷཱགེ ཨདྷིཀཱ ཨིཙྪིཏབྦཱཏི པཱཀཊོཡམཏྠོ, ཨདྷིགམཀྑཎེ པན སམཱདྷིཔཉྙཱནཾ ཝིཡ སབྦེསམྤི ཨིནྡྲིཡཱནཾ སདྡྷཱདཱིནཾ སམརསཏཱཝ ཨིཙྪིཏབྦཱ། ཏཐཱ ཧི ‘‘ཨེཏྠ སདྡྷིནྡྲིཡ’’ནྟིཨཱདིནཱ ཏཏྠ ཏཏྠ ཨེཏྠགྒཧཎཾ ཀཏཾ། ཨེཝནྟི ཡཾ ཋཱནཾ, ཏཾ ཨིནྡྲིཡསམཏྟཱདིཾ པཙྩཱམསཏི། སཝིསཡསྨིཾཡེཝཱཏི ཨཏྟནོ ཨཏྟནོ ཝིསཡེ ཨེཝ། ལོཀིཡལོཀུཏྟརཱ དྷམྨཱ ཀཐིཏཱཏི ལོཀིཡདྷམྨཱ ལོཀུཏྟརདྷམྨཱ ཙ ཏེན ཏེན པཝཏྟིཝིསེསེན ཀཐིཏཱ། ཨིདཾ ཝུཏྟཾ ཧོཏི – སདྡྷཱཔཉྩམེསུ ཨིནྡྲིཡེསུ སཧ པཝཏྟམཱནེསུ ཏཏྠ ཏཏྠ ཝིསཡེ སདྡྷཱདཱིནཾ ཀིཙྩཱདྷིཀཏཱཡ ཏསྶ ཏསྶེཝ དཊྛབྦཏཱ ཝུཏྟཱ, ན སབྦེསཾ། ཨེཝཾ ཨཉྙེཔི ལོཀིཡལོཀུཏྟརཱ དྷམྨཱ ཡཐཱསཀཾ ཝིསཡེ པཝཏྟིཝིསེསཝསེན བོདྷིཏཱཏི།

    Catūsu sotāpattiyaṅgesūti sappurisasevanā, saddhammassavanaṃ, yonisomanasikāro, dhammānudhammapaṭipattīti imesu catūsu sotāpattimaggassa kāraṇesu. Kāmaṃ cetesu satiādayopi dhammā icchitabbāva tehi vinā tesaṃ asambhavato, tathāpi cettha saddhā visesato kiccakārīti veditabbā. Saddo eva hi sappurise payirupāsati, saddhammaṃ suṇāti, yoniso ca manasi karoti, ariyamaggassa ca anudhammaṃ paṭipajjati, tasmā vuttaṃ ‘‘ettha saddhindriyaṃ daṭṭhabba’’nti. Iminā nayena sesindriyesupi attho daṭṭhabbo. Catūsu sammappadhānesūti catubbidhasammappadhānabhāvanāya. Catūsu satipaṭṭhānesūtiādīsupi eseva nayo. Ettha ca sotāpattiyaṅgesu saddhā viya sammappadhānabhāvanāya vīriyaṃ viya ca satipaṭṭhānabhāvanāya – ‘‘satimā vineyya loke abhijjhādomanassa’’nti (dī. ni. 2.373; ma. ni. 1.106; saṃ. ni. 5.384, 407) vacanato pubbabhāge kiccato sati adhikā icchitabbā. Evaṃ samādhikammikassa samādhi, ‘‘ariyasaccabhāvanā paññābhāvanā’’ti katvā tattha paññā pubbabhāge adhikā icchitabbāti pākaṭoyamattho, adhigamakkhaṇe pana samādhipaññānaṃ viya sabbesampi indriyānaṃ saddhādīnaṃ samarasatāva icchitabbā. Tathā hi ‘‘ettha saddhindriya’’ntiādinā tattha tattha etthaggahaṇaṃ kataṃ. Evanti yaṃ ṭhānaṃ, taṃ indriyasamattādiṃ paccāmasati. Savisayasmiṃyevāti attano attano visaye eva. Lokiyalokuttarā dhammā kathitāti lokiyadhammā lokuttaradhammā ca tena tena pavattivisesena kathitā. Idaṃ vuttaṃ hoti – saddhāpañcamesu indriyesu saha pavattamānesu tattha tattha visaye saddhādīnaṃ kiccādhikatāya tassa tasseva daṭṭhabbatā vuttā, na sabbesaṃ. Evaṃ aññepi lokiyalokuttarā dhammā yathāsakaṃ visaye pavattivisesavasena bodhitāti.

    ཨིདཱནི སདྡྷཱདཱིནཾ ཨིནྡྲིཡཱནཾ ཏཏྠ ཏཏྠ ཨཏིརེཀཀིཙྩཏཾ ཨུཔམཱཡ ཝིབྷཱཝེཏུཾ ‘‘ཡཐཱ ཧཱི’’ཏིཨཱདི ཝུཏྟཾ། ཏཏྲིདཾ ཨུཔམཱསཾསནྡནཾ རཱཛཔཉྩམཱ སཧཱཡཱ ཝིཡ ཝིམུཏྟིཔརིཔཱཙཀཱནི པཉྩིནྡྲིཡཱནི། ནེསཾ ཀཱིལ༹ནཏྠཾ ཨེཀཛ྄ཛྷཾ ཝཱིཐིཨོཏརཎཾ ཝིཡ ཨིནྡྲིཡཱནཾ ཨེཀཛ྄ཛྷཾ ཝིཔསྶནཱཝཱིཐིཨོཏརཎཾ། སཧཱཡེསུ པཋམཱདཱིནཾ ཡཐཱསཀགེཧེཝ ཝིཙཱརཎཱ ཝིཡ སདྡྷཱདཱིནཾ སོཏཱཔཏྟིཨངྒཱདཱིནི པཏྭཱ པུབྦངྒམཏཱ། སཧཱཡེསུ ཨིཏརེསཾ ཏཏྠ ཏཏྠ ཏུཎྷཱིབྷཱཝོ ཝིཡ སེསིནྡྲིཡཱནཾ ཏཏྠ ཏཏྠ ཏདནྭཡཏཱ། ཏསྶ པུབྦངྒམབྷཱུཏསྶ ཨིནྡྲིཡསྶ ཀིཙྩཱནུགཏཏཱ། ན ཧི ཏདཱ ཏེསཾ སསམྦྷཱརཔཐཝཱིཨཱདཱིསུ ཨཱཔཱདཱིནཾ ཝིཡ ཀིཙྩཾ པཱཀཊཾ ཧོཏི, སདྡྷཱདཱིནཾཡེཝ པན ཀིཙྩཾ ཝིབྷཱུཏཾ ཧུཏྭཱ ཏིཊྛཏི པུརེཏརཾ ཏཐཱཔཙྩཡེཧི ཙིཏྟསནྟཱནསྶ ཨབྷིསངྑཏཏྟཱ། ཨེཏྠ ཙ ཝིཔསྶནཱཀམྨིཀསྶ བྷཱཝནཱ ཝིསེསཏོ པཉྙུཏྟརཱཏི དསྶནཏྠཾ རཱཛཱནཾ ནིདསྶནཾ ཀཏྭཱ པཉྙིནྡྲིཡཾ ཝུཏྟཾ། ཨིཏཱིཏིཨཱདི ཡཐཱདྷིགཏསྶ ཨཏྠསྶ ནིགམནཾ།

    Idāni saddhādīnaṃ indriyānaṃ tattha tattha atirekakiccataṃ upamāya vibhāvetuṃ ‘‘yathā hī’’tiādi vuttaṃ. Tatridaṃ upamāsaṃsandanaṃ rājapañcamā sahāyā viya vimuttiparipācakāni pañcindriyāni. Nesaṃ kīḷanatthaṃ ekajjhaṃ vīthiotaraṇaṃ viya indriyānaṃ ekajjhaṃ vipassanāvīthiotaraṇaṃ. Sahāyesu paṭhamādīnaṃ yathāsakageheva vicāraṇā viya saddhādīnaṃ sotāpattiaṅgādīni patvā pubbaṅgamatā. Sahāyesu itaresaṃ tattha tattha tuṇhībhāvo viya sesindriyānaṃ tattha tattha tadanvayatā. Tassa pubbaṅgamabhūtassa indriyassa kiccānugatatā. Na hi tadā tesaṃ sasambhārapathavīādīsu āpādīnaṃ viya kiccaṃ pākaṭaṃ hoti, saddhādīnaṃyeva pana kiccaṃ vibhūtaṃ hutvā tiṭṭhati puretaraṃ tathāpaccayehi cittasantānassa abhisaṅkhatattā. Ettha ca vipassanākammikassa bhāvanā visesato paññuttarāti dassanatthaṃ rājānaṃ nidassanaṃ katvā paññindriyaṃ vuttaṃ. Itītiādi yathādhigatassa atthassa nigamanaṃ.

    མགྒཝིཉྙཱཎམྤཱིཏི ཨརིཡམགྒསཧགཏཾ ཨཔཙཡགཱམིཝིཉྙཱཎམྤི། ཏཐེཝ ཏཾ ཝིཛཱནཱཏཱིཏི སཙྩདྷམྨཾ ‘‘ཨིདཾ དུཀྑ’’ནྟིཨཱདིནཱ ནཡེནེཝ ཝིཛཱནཱཏི ཨེཀཙིཏྟུཔྤཱདཔརིཡཱཔནྣཏྟཱ མགྒཱནུཀཱུལཏྟཱ ཙ། ཡཾ ཝིཛཱནཱཏཱིཏི ཨེཏྠ ཝིཛཱནནཔཛཱནནཱནི ཝིཔསྶནཱཙིཏྟུཔྤཱདཔརིཡཱཔནྣཱནི ཨདྷིཔྤེཏཱནི, ན ‘‘ཡཾ པཛཱནཱཏཱི’’ཏི ཨེཏྠ ཝིཡ མགྒཙིཏྟུཔྤཱདཔརིཡཱཔནྣཱཏི ཨཱཧ ‘‘ཡཾ སངྑཱརགཏ’’ནྟིཨཱདི། ཏཐེཝཱཏི ‘‘ཨནིཙྩ’’ནྟིཨཱདིནཱ ནཡེན། ཨེཀཙིཏྟུཔྤཱདཔརིཡཱཔནྣཏྟཱ ཝིཔསྶནཱབྷཱཝཏོ ཙ སམཱནཔཙྩཡེཧི སཧ པཝཏྟིཀཏཱ ཨེཀུཔྤཱདཏཱ, ཏཏོ ཨེཝ ཨེཀཛ྄ཛྷཾ སཧེཝ ནིརུཛ྄ཛྷནཾ ཨེཀནིརོདྷཏཱ, ཨེཀཾཡེཝ ཝཏྠུཾ ནིསྶཱཡ པཝཏྟི ཨེཀཝཏྠུཀཏཱ, ཨེཀཾཡེཝ ཨཱརམྨཎཾ ཨཱརབྦྷ པཝཏྟི ཨེཀཱརམྨཎཏཱ། ཧེཏུམྷི ཙེཏཾ ཀརཎཝཙནཾ། ཏེན ཨེཀུཔྤཱདཱདིཏཱཡ སཾསཊྛབྷཱཝཾ སཱདྷེཏི། ཨནཝསེསཔརིཡཱདཱནཉྩེཏཾ, ཨིཏོ ཏཱིཧིཔི སམྤཡུཏྟལཀྑཎཾ ཧོཏིཡེཝ།

    Maggaviññāṇampīti ariyamaggasahagataṃ apacayagāmiviññāṇampi. Tatheva taṃ vijānātīti saccadhammaṃ ‘‘idaṃ dukkha’’ntiādinā nayeneva vijānāti ekacittuppādapariyāpannattā maggānukūlattā ca. Yaṃ vijānātīti ettha vijānanapajānanāni vipassanācittuppādapariyāpannāni adhippetāni, na ‘‘yaṃ pajānātī’’ti ettha viya maggacittuppādapariyāpannāti āha ‘‘yaṃ saṅkhāragata’’ntiādi. Tathevāti ‘‘anicca’’ntiādinā nayena. Ekacittuppādapariyāpannattā vipassanābhāvato ca samānapaccayehi saha pavattikatā ekuppādatā, tato eva ekajjhaṃ saheva nirujjhanaṃ ekanirodhatā, ekaṃyeva vatthuṃ nissāya pavatti ekavatthukatā, ekaṃyeva ārammaṇaṃ ārabbha pavatti ekārammaṇatā. Hetumhi cetaṃ karaṇavacanaṃ. Tena ekuppādāditāya saṃsaṭṭhabhāvaṃ sādheti. Anavasesapariyādānañcetaṃ, ito tīhipi sampayuttalakkhaṇaṃ hotiyeva.

    མགྒཔཉྙཾ སནྡྷཱཡ ཝུཏྟཾ, སཱ ཧི ཨེཀནྟཏོ བྷཱཝེཏབྦཱ, ན པརིཉྙེཡྻཱ, པཉྙཱཡ པན བྷཱཝེཏབྦཏཱཡ ཏཾསམྤཡུཏྟདྷམྨཱཔི ཏགྒཏིཀཱཝ ཧོནྟཱིཏི ཨཱཧ ‘‘ཏཾསམྤཡུཏྟཾ པནཱ’’ཏིཨཱདི། ཀིཉྩཱཔི ཝིཔསྶནཱཔཉྙཱཡ བྷཱཝནཱཝསེན པཝཏྟནཏོ ཏཾསམྤཡུཏྟཝིཉྙཱཎམྤི ཏཐེཝ པཝཏྟཏི, ཏསྶ པན པརིཉྙེཡྻབྷཱཝཱནཏིཝཏྟནཏོ པརིཉྙེཡྻཏཱ ཝུཏྟཱ། ཏེནེཝཱཧ – ‘‘ཡམྤི ཏཾ དྷམྨཊྛིཏིཉཱཎཾ, ཏམྤི ཁཡདྷམྨཾ ཝཡདྷམྨཾ ཝིརཱགདྷམྨཾ ནིརོདྷདྷམྨ’’ནྟི།

    Maggapaññaṃsandhāya vuttaṃ, sā hi ekantato bhāvetabbā, na pariññeyyā, paññāya pana bhāvetabbatāya taṃsampayuttadhammāpi taggatikāva hontīti āha ‘‘taṃsampayuttaṃ panā’’tiādi. Kiñcāpi vipassanāpaññāya bhāvanāvasena pavattanato taṃsampayuttaviññāṇampi tatheva pavattati, tassa pana pariññeyyabhāvānativattanato pariññeyyatā vuttā. Tenevāha – ‘‘yampi taṃ dhammaṭṭhitiñāṇaṃ, tampi khayadhammaṃ vayadhammaṃ virāgadhammaṃ nirodhadhamma’’nti.

    ༤༥༠. ཨེཝཾ སནྟེཔཱིཏི ཝེདནཱཏི ཨེཝཾ སཱམཉྙགྒཧཎེ སཏིཔི། ཏེབྷཱུམིཀསམྨསནཙཱརཝེདནཱཝཱཏི བྷཱུམིཏྟཡཔརིཡཱཔནྣཱ, ཏཏོ ཨེཝ སམྨསནཉཱཎསྶ གོཙརབྷཱུཏཱ ཝེདནཱ ཨེཝ ཨདྷིཔྤེཏཱ སབྲཧྨཙཱརཱིནཾ ཨུཔཀཱརཱཝཧབྷཱཝེན དེསནཱཡ ཨཱརདྡྷཏྟཱ། ཏཐཱ ཧི ཝུཏྟཾ ‘‘ཙཏུརོགྷནིཏྠརཎཏྠིཀཱན’’ནྟིཨཱདི ། ཨེས ནཡོ པཉྙཱཡཔི། ཨིདྷ སུཁཱདིསདྡཱ ཏདཱརམྨཎཝིསཡཱཏི ཨིམམཏྠཾ སུཏྟེན སཱདྷེཏུཾ ‘‘རཱུཔཉྩ ཧཱི’’ཏིཨཱདི ཝུཏྟཾ། ཨེཀནྟདུཀྑནྟི ཨེཀནྟེནེཝ ཨནིཊྛཾ, ཏཏོ ཨེཝ དུཀྑམཏཱཡ དུཀྑཾ། ཨཱརམྨཎཀརཎཝསེན དུཀྑཝེདནཱཡ ཨནུཔཏིཏཾ, ཨོཏིཎྞཉྩཱཏི དུཀྑཱནུཔཏིཏཾ, དུཀྑཱཝཀྐནྟཾ། སུཁེན ཨནཝཀྐནྟཾ ཨབྷཝིསྶཱཏི ཡོཛནཱ། ནཡིདནྟི ཨེཏྠ ཨིདནྟི ནིཔཱཏམཏྟཾ། སཱརཛྫེཡྻུནྟི སཱརཱགཾ ཨུཔྤཱདེཡྻུཾ། སུཁནྟི སབྷཱཝཏོ ཙ ཨིཊྛཾ། སཱརཱགཱ སཾཡུཛྫནྟཱིཏི བཧལརཱགཧེཏུ ཡཐཱརཧཾ དསཧིཔི སཾཡོཛནེཧི སཾཡུཛྫནྟི། སཾཡོགཱ སཾཀིལིསྶནྟཱིཏི ཏཐཱ སཾཡུཏྟཏཱཡ ཏཎྷཱསཾཀིལེསཱདིཝསེན སཾཀིལིསྶནྟི, ཝིབཱདྷཱིཡནྟི ཨུཔཏཱཔཱིཡནྟི ཙཱཏི ཨཏྠོ། ཨཱརམྨཎནྟི ཨིཊྛཾ, ཨནིཊྛཾ, མཛ྄ཛྷཏྟཉྩ ཨཱརམྨཎཾ ཡཐཱཀྐམཾ སུཁཾ, དུཀྑཾ, ཨདུཀྑམསུཁནྟི ཀཐིཏཾ། ཨེཝཾ ཨཝིསེསེན པཉྩཔི ཁནྡྷེ སུཁཱདིཨཱརམྨཎབྷཱཝེན དསྶེཏྭཱ ཨིདཱནི ཝེདནཱ ཨེཝ སུཁཱདིཨཱརམྨཎབྷཱཝེན དསྶེཏུཾ ‘‘ཨཔིཙཱ’’ཏིཨཱདི ཝུཏྟཾ། པཱཀཏིཀཔཙུརཛནཝསེནཱཡཾ ཀཐིཏཱཏི ཀཏྭཱ ‘‘པུརིམཾ སུཁཾ ཝེདནཾ ཨཱརམྨཎཾ ཀཏྭཱ’’ཏི ཝུཏྟཾ། ཝིསེསལཱབྷཱི པན ཨནཱགཏམྤི སུཁཾ ཝེདནཾ ཨཱརམྨཎཾ ཀརོཏེཝ། ཝུཏྟམེཏཾ སཏིཔཊྛཱནཝཎྞནཱཡཾ (དཱི॰ ནི॰ ཨཊྛ॰ ༢.༣༨༠; མ॰ ནི॰ ཨཊྛ॰ ༡.༧༩)། ཝེདནཱཡ ཧི ཨཱརམྨཎཾ ཝེདིཡནྟིཡཱ ཏཾསམངྒཱིཔུགྒལོ ཝེདེཏཱིཏི ཝོཧཱརམཏྟཾ ཧོཏི།

    450.Evaṃ santepīti vedanāti evaṃ sāmaññaggahaṇe satipi. Tebhūmikasammasanacāravedanāvāti bhūmittayapariyāpannā, tato eva sammasanañāṇassa gocarabhūtā vedanā eva adhippetā sabrahmacārīnaṃ upakārāvahabhāvena desanāya āraddhattā. Tathā hi vuttaṃ ‘‘caturoghanittharaṇatthikāna’’ntiādi . Esa nayo paññāyapi. Idha sukhādisaddā tadārammaṇavisayāti imamatthaṃ suttena sādhetuṃ ‘‘rūpañca hī’’tiādi vuttaṃ. Ekantadukkhanti ekanteneva aniṭṭhaṃ, tato eva dukkhamatāya dukkhaṃ. Ārammaṇakaraṇavasena dukkhavedanāya anupatitaṃ, otiṇṇañcāti dukkhānupatitaṃ, dukkhāvakkantaṃ. Sukhena anavakkantaṃ abhavissāti yojanā. Nayidanti ettha idanti nipātamattaṃ. Sārajjeyyunti sārāgaṃ uppādeyyuṃ. Sukhanti sabhāvato ca iṭṭhaṃ. Sārāgā saṃyujjantīti bahalarāgahetu yathārahaṃ dasahipi saṃyojanehi saṃyujjanti. Saṃyogā saṃkilissantīti tathā saṃyuttatāya taṇhāsaṃkilesādivasena saṃkilissanti, vibādhīyanti upatāpīyanti cāti attho. Ārammaṇanti iṭṭhaṃ, aniṭṭhaṃ, majjhattañca ārammaṇaṃ yathākkamaṃ sukhaṃ, dukkhaṃ, adukkhamasukhanti kathitaṃ. Evaṃ avisesena pañcapi khandhe sukhādiārammaṇabhāvena dassetvā idāni vedanā eva sukhādiārammaṇabhāvena dassetuṃ ‘‘apicā’’tiādi vuttaṃ. Pākatikapacurajanavasenāyaṃ kathitāti katvā ‘‘purimaṃ sukhaṃ vedanaṃ ārammaṇaṃ katvā’’ti vuttaṃ. Visesalābhī pana anāgatampi sukhaṃ vedanaṃ ārammaṇaṃ karoteva. Vuttametaṃ satipaṭṭhānavaṇṇanāyaṃ (dī. ni. aṭṭha. 2.380; ma. ni. aṭṭha. 1.79). Vedanāya hi ārammaṇaṃ vediyantiyā taṃsamaṅgīpuggalo vedetīti vohāramattaṃ hoti.

    སབྦསཉྙཱཡཱཏི སབྦཱཡཔི ཙཏུབྷཱུམིཀསཉྙཱཡ། སབྦཏྠཀསཉྙཱཡཱཏི སབྦསྨིཾ ཙིཏྟུཔྤཱདེ པཝཏྟནཀསཉྙཱཡ། ཝཏྠེ ཝཱཏི ཝཱ-སདྡེན ཝཎྞདྷཱཏུཾ སངྒཎྷཱཏི ། པཱཔེནྟོཏི བྷཱཝནཾ ཨུཔཙཱརཾ ཝཱ ཨཔྤནཾ ཝཱ ཨུཔནེནྟོ། ཨུཔྤཛྫནཀསཉྙཱཔཱིཏི ‘‘ནཱིལཾ རཱུཔཾ, རཱུཔཱརམྨཎཾ ནཱིལ’’ནྟི ཨུཔྤཛྫནཀསཉྙཱཔི།

    Sabbasaññāyāti sabbāyapi catubhūmikasaññāya. Sabbatthakasaññāyāti sabbasmiṃ cittuppāde pavattanakasaññāya. Vatthe vāti vā-saddena vaṇṇadhātuṃ saṅgaṇhāti . Pāpentoti bhāvanaṃ upacāraṃ vā appanaṃ vā upanento. Uppajjanakasaññāpīti ‘‘nīlaṃ rūpaṃ, rūpārammaṇaṃ nīla’’nti uppajjanakasaññāpi.

    ཨསབྦསངྒཱཧིཀཏྟཱཏི སབྦེསཾ ཝེདནཱསཉྙཱཝིཉྙཱཎཱནཾ ཨསངྒཧིཏཏྟཱ། ཏཀྐགཏནྟི སུཏྟཀནྟནཀཏཀྐམྷི, སུཏྟཝཏྟནཀཏཀྐམྷི ཝཱ ཝེཋནཝསེན ཋིཏཾ། པརིཝཊྚཀཱདིགཏནྟི སུཏྟཝེཋནཔརིཝཊྚཀཱདིགཏཾ། ཝིསྶཊྛཏྟཱཝ ན གཧིཏཱ, ཡདགྒེན པཉྙཱ ཝིཉྙཱཎེན སདྡྷིཾ སམྤཡོགཾ ལབྷཱཔིཏཱ, ཏདགྒེན ཝེདནཱསཉྙཱཧིཔི སམྤཡོགཾ ལབྷཱཔིཏཱ ཨེཝཱཏི། ཏདེཝ སཉྫཱནཱཏི སཾསཊྛབྷཱཝཏོ།

    Asabbasaṅgāhikattāti sabbesaṃ vedanāsaññāviññāṇānaṃ asaṅgahitattā. Takkagatanti suttakantanakatakkamhi, suttavattanakatakkamhi vā veṭhanavasena ṭhitaṃ. Parivaṭṭakādigatanti suttaveṭhanaparivaṭṭakādigataṃ. Vissaṭṭhattāva na gahitā, yadaggena paññā viññāṇena saddhiṃ sampayogaṃ labhāpitā, tadaggena vedanāsaññāhipi sampayogaṃ labhāpitā evāti. Tadeva sañjānāti saṃsaṭṭhabhāvato.

    སཉྫཱནཱཏི ཝིཛཱནཱཏཱིཏི ཨེཏྠ ‘‘པཛཱནཱཏཱི’’ཏི པདཾ ཨཱནེཏྭཱ ཝཏྟབྦཾ པཛཱནནཝསེནཔི ཝིསེསསྶ ཝཀྑམཱནཏྟཱ། ཛཱནཱཏཱིཏི ཨཡཾ སདྡོ ཙ ལདྡཏོཡེཝེཏྠ ཨཝིསེསོ, ཨཏྠཏོ པན ཝིསེསཏོ ཨིཙྪིཏབྦོ། ཨནེཀཏྠཏྟཱ ཧི དྷཱཏཱུནཾ ཏེན ཨཱཁྱཱཏཔདེན ནཱམཔདེན ཙ ཝུཏྟམཏྠཾ ཨུཔསགྒཔདཾ ཛོཏཀབྷཱཝེན ཝིསེསེཏི, ན ཝཱཙཀབྷཱཝེན། ཏེནཱཧ ‘‘ཏསྶཔི ཛཱནནཏྠེ ཝིསེསོ ཝེདིཏབྦོ’’ཏི ། ཨེཏེན སཉྙཱཝིཉྙཱཎཔཉྙཱཔདཱནི ཨནྟོགདྷཛཱནནཏྠེ ཡཐཱསཀཾ ཝིསིཊྛཝིསཡེ ཙ ནིཊྛཱནཱིཏི དསྶེཏི། ཏེནེཝཱཧ ‘‘སཉྙཱ ཧཱི’’ཏིཨཱདི། སཉྫཱནནམཏྟམེཝཱཏི ཨེཏྠ མཏྟ-སདྡེན ཝིསེསནིཝཏྟིཨཏྠེན ཝིཛཱནནཔཛཱནནཱཀཱརེ ནིཝཏྟེཏི, ཨེཝ-སདྡེན ཀདཱཙིཔི ཨིམིསྶཱ ཏེ ཝིསེསཱ ནཏྠེཝཱཏི ཨཝདྷཱརེཏི། ཏེནེཝཱཧ ‘‘ཨནིཙྩཾ དུཀྑ’’ནྟིཨཱདི། ཏཏྠ ཝིཉྙཱཎཀིཙྩམྤི ཀཱཏུཾ ཨསཀྐོནྟཱི སཉྙཱ ཀུཏོ པཉྙཱཀིཙྩཾ ཀརེཡྻཱཏི ‘‘ལཀྑཎཔཊིཝེདྷཾ པཱཔེཏུཾ ན སཀྐོཏི’’ཙྩེཝ ཝུཏྟཾ, ན ཝུཏྟཾ ‘‘མགྒཔཱཏུབྷཱཝ’’ནྟི།

    Sañjānāti vijānātīti ettha ‘‘pajānātī’’ti padaṃ ānetvā vattabbaṃ pajānanavasenapi visesassa vakkhamānattā. Jānātīti ayaṃ saddo ca laddatoyevettha aviseso, atthato pana visesato icchitabbo. Anekatthattā hi dhātūnaṃ tena ākhyātapadena nāmapadena ca vuttamatthaṃ upasaggapadaṃ jotakabhāvena viseseti, na vācakabhāvena. Tenāha ‘‘tassapi jānanatthe viseso veditabbo’’ti . Etena saññāviññāṇapaññāpadāni antogadhajānanatthe yathāsakaṃ visiṭṭhavisaye ca niṭṭhānīti dasseti. Tenevāha ‘‘saññā hī’’tiādi. Sañjānanamattamevāti ettha matta-saddena visesanivattiatthena vijānanapajānanākāre nivatteti, eva-saddena kadācipi imissā te visesā natthevāti avadhāreti. Tenevāha ‘‘aniccaṃ dukkha’’ntiādi. Tattha viññāṇakiccampi kātuṃ asakkontī saññā kuto paññākiccaṃ kareyyāti ‘‘lakkhaṇapaṭivedhaṃ pāpetuṃ na sakkoti’’cceva vuttaṃ, na vuttaṃ ‘‘maggapātubhāva’’nti.

    ཨཱརམྨཎེ པཝཏྟམཱནཾ ཝིཉྙཱཎཾ ན སཉྙཱ ཝིཡ ནཱིལཔཱིཏཱདིམཏྟསཉྫཱནནཝསེན པཝཏྟཏི, ཨཐ ཁོ ཏཏྠ ཨཉྙམྤི ཏཱདིསཾ ཝིསེསཾ ཛཱནནྟམེཝ པཝཏྟཏཱིཏི ཨཱཧ ‘‘ཝིཉྙཱཎ’’ནྟིཨཱདི། ཀཐཾ པན ཝིཉྙཱཎཾ ལཀྑཎཔཊིཝེདྷཾ པཱཔེཏཱིཏི? པཉྙཱཡ དསྶིཏམགྒེན། ལཀྑཎཱརམྨཎིཀཝིཔསྶནཱཡ ཧི ཨནེཀཝཱརཾ ལཀྑཎཱནི པཊིཝིཛ྄ཛྷིཏྭཱ པཝཏྟམཱནཱཡ པགུཎབྷཱཝཏོ པརིཙཡཝསེན ཉཱཎཝིཔྤཡུཏྟཙིཏྟེནཔི ཝིཔསྶནཱ སམྦྷཝཏི, ཡཐཱ ཏཾ པགུཎསྶ གནྠསྶ ཨཛ྄ཛྷཡནེ ཏཏྠ ཏཏྠ གཏཱཔི ཝཱརཱ ན ཨུཔདྷཱརཱིཡནྟི། ‘‘ལཀྑཎཔཊིཝེདྷ’’ནྟི ཙ ལཀྑཎཱནཾ ཨཱརམྨཎཀརཎམཏྟཾ སནྡྷཱཡ ཝུཏྟཾ, ན པཊིཝིཛ྄ཛྷནཾ། ཨུསྶཀྐིཏྭཱཏི ཨུདཡབྦཡཉཱཎཱདིཉཱཎཔཊིཔཱཊིཡཱ ཨཱརབྷིཏྭཱ། མགྒཔཱཏུབྷཱཝཾ པཱཔེཏུཾ ན སཀྐོཏི ཨསམྦོདྷསབྷཱཝཏྟཱ། ཨཱརམྨཎམྤི སཉྫཱནཱཏི ཨཝབུཛ྄ཛྷནཝསེནེཝ, ན སཉྫཱནནམཏྟེན། ཏཐཱ ལཀྑཎཔཊིཝེདྷམྤི པཱཔེཏི, ན ཝིཛཱནནམཏྟེན, ཨཏྟནོ པན ཨཉྙཱསཱདྷཱརཎེན ཨཱནུབྷཱཝེན ཨུསྶཀྐིཏྭཱ མགྒཔཱཏུབྷཱཝམྤི པཱཔེཏི།

    Ārammaṇe pavattamānaṃ viññāṇaṃ na saññā viya nīlapītādimattasañjānanavasena pavattati, atha kho tattha aññampi tādisaṃ visesaṃ jānantameva pavattatīti āha ‘‘viññāṇa’’ntiādi. Kathaṃ pana viññāṇaṃ lakkhaṇapaṭivedhaṃ pāpetīti? Paññāya dassitamaggena. Lakkhaṇārammaṇikavipassanāya hi anekavāraṃ lakkhaṇāni paṭivijjhitvā pavattamānāya paguṇabhāvato paricayavasena ñāṇavippayuttacittenapi vipassanā sambhavati, yathā taṃ paguṇassa ganthassa ajjhayane tattha tattha gatāpi vārā na upadhārīyanti. ‘‘Lakkhaṇapaṭivedha’’nti ca lakkhaṇānaṃ ārammaṇakaraṇamattaṃ sandhāya vuttaṃ, na paṭivijjhanaṃ. Ussakkitvāti udayabbayañāṇādiñāṇapaṭipāṭiyā ārabhitvā. Maggapātubhāvaṃ pāpetuṃ na sakkoti asambodhasabhāvattā. Ārammaṇampi sañjānāti avabujjhanavaseneva, na sañjānanamattena. Tathā lakkhaṇapaṭivedhampi pāpeti, na vijānanamattena, attano pana aññāsādhāraṇena ānubhāvena ussakkitvā maggapātubhāvampi pāpeti.

    ཨིདཱནི ཡཐཱཝུཏྟམཏྠཾ ཨུཔམཱཡ ཝིབྷཱཝེཏུཾ ‘‘ཡཐཱ ཧཱི’’ཏིཨཱདི ཝུཏྟཾ། ཏཏྠ ཨཛཱཏབུདྡྷཱིཏི ཨསཉྫཱཏབྱཝཧཱརབུདྡྷི། ཨུཔབྷོགཔརིབྷོགནྟི ཨུཔབྷོགཔརིབྷོགཱརཧཾ, ཨུཔབྷོགཔརིབྷོགཝཏྠཱུནཾ པཊིལཱབྷཡོགྒནྟི ཨཏྠོ། ཀཱུཊོཏི ཀཧཱཔཎཔཏིརཱུཔཀོ ཏམྦཀཾསཱདིམཡོ། ཚེཀོཏི མཧཱསཱརོ། ཀརཏོཏི ཨཌྜྷསཱརོ། སཎྷོཏི མུདུཛཱཏིཀོ སམསཱརོ། ཨིཏི-སདྡོ ཨཱདིཨཏྠོ། ཏེན པཱདསཱརཔརོཔཱདསཱརཨཌྜྷསཱརཱདཱིནཾ སངྒཧོ། ཛཱནནྟོ ཙ པན ནཾ རཱུཔཾ དིསྭཱཔི…པེ॰… ཨསུཀཱཙརིཡེན ཀཏོཏིཔི ཛཱནཱཏི ཏཐཱ ཧེརཉྙིཀགནྠསྶ སུགྒཧིཏཏྟཱ། ཨེཝམེཝནྟིཨཱདི ཨུཔམཱསཾསནྡནཾ། སཉྙཱཝིབྷཱགཾ ཨཀཏྭཱ པིཎྜཝསེནེཝ ཨཱརམྨཎསྶ གཧཎཏོ དཱརཀསྶ ཀཧཱཔཎདསྶནསདིསཱ ཝུཏྟཱ། ཏཐཱ ཧི སཱ ཡཐཱཨུཔཊྛིཏཝིསཡཔདཊྛཱནཱ ཝུཙྩཏི། ཝིཉྙཱཎཾ ཨཱརམྨཎེ ཨེཀཙྩཝིསེསགྒཧཎསམཏྠབྷཱཝཏོ གཱམིཀཔུརིསཀཧཱཔཎདསྶནསདིསཾ ཝུཏྟཾ། པཉྙཱ པན ཨཱརམྨཎེ ཨནཝསེསཱཝབོདྷཏོ ཧེརཉྙིཀཀཧཱཔཎདསྶནསདིསཱ ཝུཏྟཱ། ནེསནྟི སཉྙཱཝིཉྙཱཎཔཉྙཱནཾ ། ཝིསེསོཏི སབྷཱཝཝིསེསོ། དུཔྤཊིཝིཛ྄ཛྷོ པཀཏིཔཉྙཱཡ། ཨིམིནཱཝ ནེསཾ ཨཙྩནྟསུཁུམཏཾ དསྶེཏི།

    Idāni yathāvuttamatthaṃ upamāya vibhāvetuṃ ‘‘yathā hī’’tiādi vuttaṃ. Tattha ajātabuddhīti asañjātabyavahārabuddhi. Upabhogaparibhoganti upabhogaparibhogārahaṃ, upabhogaparibhogavatthūnaṃ paṭilābhayogganti attho. Kūṭoti kahāpaṇapatirūpako tambakaṃsādimayo. Chekoti mahāsāro. Karatoti aḍḍhasāro. Saṇhoti mudujātiko samasāro. Iti-saddo ādiattho. Tena pādasāraparopādasāraaḍḍhasārādīnaṃ saṅgaho. Jānanto ca pana naṃ rūpaṃ disvāpi…pe… asukācariyena katotipi jānāti tathā heraññikaganthassa suggahitattā. Evamevantiādi upamāsaṃsandanaṃ. Saññāvibhāgaṃ akatvā piṇḍavaseneva ārammaṇassa gahaṇato dārakassa kahāpaṇadassanasadisā vuttā. Tathā hi sā yathāupaṭṭhitavisayapadaṭṭhānā vuccati. Viññāṇaṃ ārammaṇe ekaccavisesaggahaṇasamatthabhāvato gāmikapurisakahāpaṇadassanasadisaṃ vuttaṃ. Paññā pana ārammaṇe anavasesāvabodhato heraññikakahāpaṇadassanasadisā vuttā. Nesanti saññāviññāṇapaññānaṃ . Visesoti sabhāvaviseso. Duppaṭivijjho pakatipaññāya. Imināva nesaṃ accantasukhumataṃ dasseti.

    ཨེཀཱརམྨཎེ པཝཏྟམཱནཱནནྟི ཨེཀསྨིཾཡེཝ ཨཱརམྨཎེ པཝཏྟམཱནཱནཾ། ཏེན ཨབྷིནྣཝིསཡཱབྷིནྣཀཱལཏཱདསྶནེན ཨཝིནིབྦྷོགཝུཏྟིཏཾ ཝིབྷཱཝེནྟོ དུཔྤཊིཝིཛ྄ཛྷཏཾཡེཝ ཨུལླིངྒེཏི། ཝཝཏྠཱནནྟི ཨསངྐརཏོ ཋཔནཾ། ཨཡཾ ཕསྶོ…པེ॰… ཨིདཾ ཙིཏྟནྟི ནིདསྶནམཏྟམེཏཾ། ཨིཏི-སདྡོ ཝཱ ཨཱདིཨཏྠོ། ཏེན སེསདྷམྨཱནམྤི སངྒཧོ དཊྛབྦོ། ཨིདནྟི ཨརཱུཔཱིནཾ དྷམྨཱནཾ ཝཝཏྠཱནཀརཎཾ། ཏཏོཏི ཡཾ ཝུཏྟཾ ཏིལཏེལཱདིཨུདྡྷརཎཾ, ཏཏོ། ཡདི དུཀྐརཏརཾ, ཀཐཾ ཏནྟི ཨཱཧ ‘‘བྷགཝཱ པནཱ’’ཏིཨཱདི།

    Ekārammaṇe pavattamānānanti ekasmiṃyeva ārammaṇe pavattamānānaṃ. Tena abhinnavisayābhinnakālatādassanena avinibbhogavuttitaṃ vibhāvento duppaṭivijjhataṃyeva ulliṅgeti. Vavatthānanti asaṅkarato ṭhapanaṃ. Ayaṃ phasso…pe… idaṃ cittanti nidassanamattametaṃ. Iti-saddo vā ādiattho. Tena sesadhammānampi saṅgaho daṭṭhabbo. Idanti arūpīnaṃ dhammānaṃ vavatthānakaraṇaṃ. Tatoti yaṃ vuttaṃ tilatelādiuddharaṇaṃ, tato. Yadi dukkarataraṃ, kathaṃ tanti āha ‘‘bhagavā panā’’tiādi.

    ༤༥༡. ནིསྶཊེནཱཏི ནིཀྑནྟེན ཨཏཾསམྦནྡྷེན། པརིཙྩཏྟེནཱཏི པརིཙྩཏྟསདིསེན པཙྩཡབྷཱཝཱནུཔགམནེན པཙྩཡུཔྤནྣསམྦནྡྷཱབྷཱཝཏོ། ནིསྶཀྐཝཙནཾ ཨཔཱདཱནདཱིཔནཏོ། ཀརཎཝཙནཾ ཀཏྟུཨཏྠདཱིཔནཏོ། ཀཱམཱཝཙརམནོཝིཉྙཱཎཾ ན ནིཡམཏོ ‘‘ཨིདཾ ནཱམ པཉྩདྭཱརིཀཱསམྦནྡྷཱ’’ཏི སཀྐཱ ཝཏྟུཾ, རཱུཔཱཝཙརཝིཉྙཱཎཾ པན ན ཏཐཱཏི, ཏསྶེཝ པཉྩཧི ཨིནྡྲིཡེཧི ནིསྶཊཏཱ ཝུཏྟཱཏི ཨཱཧ ‘‘རཱུཔཱཝཙརཙཏུཏྠཛ྄ཛྷཱནཙིཏྟེནཱ’’ཏི། ཙཏུཏྠཛ྄ཛྷཱནགྒཧཎཾ ཏསྶེཝ ཨརཱུཔཱཝཙརསྶ པདཊྛཱནབྷཱཝཏོ། པརིསུདྡྷེནཱཏི ཝིསེསཏོ ཨསཾཀིལེསིཀཏྟཱཝ། ཏཉྷི ཝིགཏཱུཔཀྐིལེསཏཱཡ ཝིསེསཏོ པརིསུདྡྷཾ། ཏེནཱཧ ‘‘ནིརུཔཀྐིལེསེནཱ’’ཏི། ཛཱནིཏབྦཾ ནེཡྻཾ, སཔརསནྟཱནེསུ ཨིདཾ ཨཏིསཡཾ ཛཱནིཏབྦཏོ བུཛ྄ཛྷིཏབྦཾ བོདྷེཏབྦཾ ཝཱཏི ཨཏྠོ། ནེཡྻནྟི ཝཱ ཨཏྟནོ སནྟཱནེ ནེཏབྦཾ པཝཏྟེཏབྦནྟི ཨཏྠོ། ཏེནཱཧ ‘‘ནིབྦཏྟེཏུཾ སཀྐཱ ཧོཏི། ཨེཏྠ ཋིཏསྶ ཧི སཱ ཨིཛ྄ཛྷཏཱི’’ཏི། པཱཊིཡེཀྐནྟི ཝིསུཾ ཝིསུཾ, ཨནུཔདདྷམྨཝསེནཱཏི ཨཏྠོ། ཨབྷིནིཝེསཱབྷཱཝཏོཏི ཝིཔསྶནཱབྷིནིཝེསསྶ ཨསམྦྷཝཏོ། ཀལཱཔཏོ ནཡཏོཏི ཀལཱཔསམྨསནསངྑཱཏཏོ ནཡཝིཔསྶནཏོ། བྷིཀྑུནོཏི སཱཝཀསྶ། སཱཝཀསྶེཝ ཧི ཏཏྲ ཨནུཔདདྷམྨཝིཔསྶནཱ ན སམྦྷཝཏི, ན སཏྠུ། ཏེནཱཧ ‘‘ཏསྨཱ’’ཏིཨཱདི། ཝིསྶཛྫེསཱིཏི ཏཔྤཊིབདྡྷཚནྡརཱགཔྤཧཱནེན པཛཧཏི།

    451.Nissaṭenāti nikkhantena ataṃsambandhena. Pariccattenāti pariccattasadisena paccayabhāvānupagamanena paccayuppannasambandhābhāvato. Nissakkavacanaṃ apādānadīpanato. Karaṇavacanaṃ kattuatthadīpanato. Kāmāvacaramanoviññāṇaṃ na niyamato ‘‘idaṃ nāma pañcadvārikāsambandhā’’ti sakkā vattuṃ, rūpāvacaraviññāṇaṃ pana na tathāti, tasseva pañcahi indriyehi nissaṭatā vuttāti āha ‘‘rūpāvacaracatutthajjhānacittenā’’ti. Catutthajjhānaggahaṇaṃ tasseva arūpāvacarassa padaṭṭhānabhāvato. Parisuddhenāti visesato asaṃkilesikattāva. Tañhi vigatūpakkilesatāya visesato parisuddhaṃ. Tenāha ‘‘nirupakkilesenā’’ti. Jānitabbaṃ neyyaṃ, saparasantānesu idaṃ atisayaṃ jānitabbato bujjhitabbaṃ bodhetabbaṃ vāti attho. Neyyanti vā attano santāne netabbaṃ pavattetabbanti attho. Tenāha ‘‘nibbattetuṃ sakkā hoti. Ettha ṭhitassa hi sā ijjhatī’’ti. Pāṭiyekkanti visuṃ visuṃ, anupadadhammavasenāti attho. Abhinivesābhāvatoti vipassanābhinivesassa asambhavato. Kalāpato nayatoti kalāpasammasanasaṅkhātato nayavipassanato. Bhikkhunoti sāvakassa. Sāvakasseva hi tatra anupadadhammavipassanā na sambhavati, na satthu. Tenāha ‘‘tasmā’’tiādi. Vissajjesīti tappaṭibaddhachandarāgappahānena pajahati.

    ཧཏྠགཏཏྟཱཏི ཧཏྠགཏསདིསཏྟཱ, ཨཱསནྣཏྟཱཏི ཨཏྠོ། ཡདཱ ཧི ལོཀནཱཐོ བོདྷིམཱུལེ ཨཔརཱཛིཏཔལླངྐེ ནིསིནྣོ – ‘‘ཀིཙྪཾ ཝཏཱཡཾ ལོཀོ ཨཱཔནྣོ’’ཏིཨཱདིནཱ (དཱི॰ ནི॰ ༢.༥༧; སཾ॰ ནི॰ ༢.༤, ༡༠) པཊིཙྩསམུཔྤཱདམུཁེན ཝིཔསྶནཱབྷིནིཝེསཾ ཀཏྭཱ ཨདྷིགནྟབྦསབྦཉྙུཏཉྙཱཎཱནུརཱུཔཾ ཚཏྟིཾསཀོཊིསཧསྶམུཁེན མཧཱཝཛིརཉཱཎཾ ནཱམ མཧཱབོདྷིསཏྟསམྨསནཾ པཝཏྟེནྟོ ཨནེཀཱཀཱརསམཱཔཏྟིདྷམྨསམྨསནེ ཨནུཔདམེཝ ནེཝསཉྙཱནཱསཉྙཱཡཏནདྷམྨེཔི ཨཔརཱཔརཾ སམྨསི། ཏེནཱཧ ‘‘བྷགཝཱ པནཱ’’ཏིཨཱདི། པརོཔཉྙཱསཱཏི དྭེཔཉྙཱསཾ། ཀཱམཉྩེཏྠ ཀེཙི དྷམྨཱ ཝེདནཱདཡོ ཕསྶཔཉྩམཀཱདཱིསུ ཝུཏྟཱཔི ཛྷཱནཀོཊྛཱསཱདཱིསུཔི སངྒཧིཏཱ, ཏཾཏཾཔཙྩཡབྷཱཝཝིསིཊྛེན པན ཨཏྠཝིསེསེན དྷམྨནྟརཱནི ཝིཡ ཧོནྟཱིཏི ཨེཝཾ ཝུཏྟཾ། ཏཐཱ ཧི ལོཀུཏྟརཙིཏྟུཔྤཱདེསུ ནཝིནྡྲིཡཏཱ ཝུཙྩཏི། ཨངྒུདྡྷཱརེནཱཏི ཏཏྠ ལབྦྷམཱནཛྷཱནངྒབོཛ྄ཛྷངྒམགྒངྒཱནཾ ཨུདྡྷརཎེན། ཨངྒ-སདྡོ ཝཱ ཀོཊྛཱསཔརིཡཱཡོ, ཏསྨཱ ཨངྒུདྡྷཱརེནཱཏི ཕསྶཔཉྩམཀཱདིཀོཊྛཱསཱནཾ སམུདྡྷརཎེན། ཡཱཝཏཱ སཉྙཱསམཱཔཏྟིཡོཏི ཡཏྟཀཱ སཉྙཱསཧགཏཱ ཛྷཱནསམཱཔཏྟིཡོ, ཏཱཧི ཝུཊྛཱཡ ཨདྷིགནྡྷབྦཏྟཱ ཏཱཝཏིཀཱ ཝེནེཡྻཱནཾ ཨཉྙཱཔཊིཝེདྷོ ཨརཧཏྟསམདྷིགམོ།

    Hatthagatattāti hatthagatasadisattā, āsannattāti attho. Yadā hi lokanātho bodhimūle aparājitapallaṅke nisinno – ‘‘kicchaṃ vatāyaṃ loko āpanno’’tiādinā (dī. ni. 2.57; saṃ. ni. 2.4, 10) paṭiccasamuppādamukhena vipassanābhinivesaṃ katvā adhigantabbasabbaññutaññāṇānurūpaṃ chattiṃsakoṭisahassamukhena mahāvajirañāṇaṃ nāma mahābodhisattasammasanaṃ pavattento anekākārasamāpattidhammasammasane anupadameva nevasaññānāsaññāyatanadhammepi aparāparaṃ sammasi. Tenāha ‘‘bhagavā panā’’tiādi. Paropaññāsāti dvepaññāsaṃ. Kāmañcettha keci dhammā vedanādayo phassapañcamakādīsu vuttāpi jhānakoṭṭhāsādīsupi saṅgahitā, taṃtaṃpaccayabhāvavisiṭṭhena pana atthavisesena dhammantarāni viya hontīti evaṃ vuttaṃ. Tathā hi lokuttaracittuppādesu navindriyatā vuccati. Aṅguddhārenāti tattha labbhamānajhānaṅgabojjhaṅgamaggaṅgānaṃ uddharaṇena. Aṅga-saddo vā koṭṭhāsapariyāyo, tasmā aṅguddhārenāti phassapañcamakādikoṭṭhāsānaṃ samuddharaṇena. Yāvatā saññāsamāpattiyoti yattakā saññāsahagatā jhānasamāpattiyo, tāhi vuṭṭhāya adhigandhabbattā tāvatikā veneyyānaṃ aññāpaṭivedho arahattasamadhigamo.

    དསྶནཔརིཎཱཡཀཊྛེནཱཏི ཨནྡྷསྶ ཡཊྛིཀོཊིཾ གཧེཏྭཱ མགྒདེསཀོ ཝིཡ དྷམྨཱནཾ ཡཐཱསབྷཱཝདསྶནསངྑཱཏེན པརིཎཱཡཀབྷཱཝེན། ཡཐཱ ཝཱ སོ ཏསྶ ཙཀྑུབྷཱུཏོ, ཨེཝཾ སཏྟཱནཾ པཉྙཱ། ཏེནཱཧ ‘‘ཙཀྑུབྷཱུཏཱཡ པཉྙཱཡཱ’’ཏི། སམཱདྷིསམྤཡུཏྟཱ པཉྙཱ སམཱདྷིཔཉྙཱ། སམཱདྷི ཙེཏྠ ཨཱརུཔྤསམཱདྷཱིཏི ཝདནྟི, སམྨསནཔཡོགོ པན ཀོཙི ཛྷཱནསམཱདྷཱིཏི ཡུཏྟཾ། ཝིཔསྶནཱབྷཱུཏཱ པཉྙཱ ཝིཔསྶནཱཔཉྙཱ། སམཱདྷིཔཉྙཱཡ ཨནྟོསམཱཔཏྟིཡཾ ཀིཙྩཏོ པཛཱནཱཏི, ‘‘སམཱཧིཏོ ཡཐཱབྷཱུཏཾ པཛཱནཱཏཱི’’ཏི པན ཝཙནཏོ (སཾ॰ ནི॰ ༣.༥; ༤.༩༩-༡༠༠; ༣.༥.༡༠༧༡-༡༠༧༢; ནེཏྟི॰ ༤༠; མི॰ པ॰ ༢.༡.༡༤) ཨསམྨོཧཏོ པཛཱནཱཏི། ཏཏྠ ཀིཙྩཏོཏི གོཙརཛ྄ཛྷཏྟེ ཨཱརམྨཎཀརཎཀིཙྩཏོ། ཨསམྨོཧཏོཏི སམྤཡུཏྟདྷམྨེསུ སམྨོཧཝིདྷམནཏོ ཡཐཱ པཱིཏིཔཊིསཾཝེདནཱདཱིསུ། ཀིམཏྠིཡཱཏི ཀིཾཔཡོཛནཱཏི ཨཱཧ ‘‘ཀོ ཨེཏིསྶཱ ཨཏྠོ’’ཏི། ཨབྷིཉྙེཡྻེ དྷམྨེཏི ཡཱཐཱཝསརསལཀྑཎཱཝབོདྷཝསེན ཨབྷིམུཁཾ ཉེཡྻེ ཛཱནིཏབྦེ ཁནྡྷཱཡཏནཱདིདྷམྨེ། ཨབྷིཛཱནཱཏཱིཏི སལཀྑཎཏོ སཱམཉྙལཀྑཎཏོ ཙ ཨབྷིམུཁཾ ཨཝིརཛ྄ཛྷནཝསེན ཛཱནཱཏི། ཨེཏེན ཉཱཏཔརིཉྙཱབྱཱཔཱརམཱཧ། པརིཉྙེཡྻེཏི ཨནིཙྩཱཏིཔི དུཀྑཱཏིཔི ཨནཏྟཱཏིཔི པརིཙྪིཛྫ ཛཱནིཏབྦེ། པརིཛཱནཱཏཱིཏི ‘‘ཡཾ ཀིཉྩི རཱུཔཾ…པེ॰… ཨནིཙྩཾ ཁཡཊྛེནཱ’’ཏིཨཱདིནཱ (པཊི॰ མ॰ ༡.༤༨) པརིཙྪིནྡིཏྭཱ ཛཱནཱཏི། ཨིམིནཱ ཏཱིརཎཔརིཉྙཱབྱཱཔཱརམཱཧ། པཧཱཏབྦེ དྷམྨེཏི ནིཙྩསཉྙཱདིཀེ ཡཱཝ ཨརཧཏྟམགྒཝཛ྄ཛྷཱ སབྦེ པཱཔདྷམྨེ། པཛཧཏི པཀཊྛཏོ ཛཧཏི, ཝིཀྑམྦྷེཏི ཙེཝ སམུཙྪིནྡཏི ཙཱཏི ཨཏྠོ། ཨིམིནཱ པཧཱནཔརིཉྙཱབྱཱཔཱརམཱཧ། སཱ པནེསཱ པཉྙཱ ལོཀིཡཱཔི ཏིཔྤཀཱརཱ ལོཀུཏྟརཱཔི, ཏཱསཾ ཝིསེསཾ སཡམེཝཱཧ། ཀིཙྩཏོཏི ཨབྷིཛཱནནཝསེན ཨཱརམྨཎཀིཙྩཏོ། ཨསམྨོཧཏོཏི ཡཐཱབལཾ ཨབྷིཉྙེཡྻཱདཱིསུ སམྨོཧཝིདྷམནཏོ། ནིབྦཱནམཱརམྨཎཾ ཀཏྭཱ པཝཏྟནཏོ ཨབྷིཉྙེཡྻཱདཱིསུ ཝིགཏསམྨོཧཏོ ཨེཝཱཏི ཨཱཧ ‘‘ལོཀུཏྟརཱ ཨསམྨོཧཏོ’’ཏི།

    Dassanapariṇāyakaṭṭhenāti andhassa yaṭṭhikoṭiṃ gahetvā maggadesako viya dhammānaṃ yathāsabhāvadassanasaṅkhātena pariṇāyakabhāvena. Yathā vā so tassa cakkhubhūto, evaṃ sattānaṃ paññā. Tenāha ‘‘cakkhubhūtāya paññāyā’’ti. Samādhisampayuttā paññā samādhipaññā. Samādhi cettha āruppasamādhīti vadanti, sammasanapayogo pana koci jhānasamādhīti yuttaṃ. Vipassanābhūtā paññā vipassanāpaññā. Samādhipaññāya antosamāpattiyaṃ kiccato pajānāti, ‘‘samāhito yathābhūtaṃ pajānātī’’ti pana vacanato (saṃ. ni. 3.5; 4.99-100; 3.5.1071-1072; netti. 40; mi. pa. 2.1.14) asammohato pajānāti. Tattha kiccatoti gocarajjhatte ārammaṇakaraṇakiccato. Asammohatoti sampayuttadhammesu sammohavidhamanato yathā pītipaṭisaṃvedanādīsu. Kimatthiyāti kiṃpayojanāti āha ‘‘ko etissā attho’’ti. Abhiññeyye dhammeti yāthāvasarasalakkhaṇāvabodhavasena abhimukhaṃ ñeyye jānitabbe khandhāyatanādidhamme. Abhijānātīti salakkhaṇato sāmaññalakkhaṇato ca abhimukhaṃ avirajjhanavasena jānāti. Etena ñātapariññābyāpāramāha. Pariññeyyeti aniccātipi dukkhātipi anattātipi paricchijja jānitabbe. Parijānātīti ‘‘yaṃ kiñci rūpaṃ…pe… aniccaṃ khayaṭṭhenā’’tiādinā (paṭi. ma. 1.48) paricchinditvā jānāti. Iminā tīraṇapariññābyāpāramāha. Pahātabbe dhammeti niccasaññādike yāva arahattamaggavajjhā sabbe pāpadhamme. Pajahati pakaṭṭhato jahati, vikkhambheti ceva samucchindati cāti attho. Iminā pahānapariññābyāpāramāha. Sā panesā paññā lokiyāpi tippakārā lokuttarāpi, tāsaṃ visesaṃ sayamevāha. Kiccatoti abhijānanavasena ārammaṇakiccato. Asammohatoti yathābalaṃ abhiññeyyādīsu sammohavidhamanato. Nibbānamārammaṇaṃ katvā pavattanato abhiññeyyādīsu vigatasammohato evāti āha ‘‘lokuttarā asammohato’’ti.

    ༤༥༢. ཀམྨསྶཀཏཱ སམྨཱདིཊྛི ཙ ཝཊྚནིསྶིཏཏྟཱ ཨིདྷ ནཱདྷིཔྤེཏཱ, ཝིཝཊྚཀཐཱ ཧེསཱཏི ཝུཏྟཾ ‘‘ཝིཔསྶནཱསམྨཱདིཊྛིཡཱ ཙ མགྒསམྨཱདིཊྛིཡཱ ཙཱ’’ཏི། པརཏོ གྷོསོཏི པརཏོ སཏྠུཏོ, སཱཝཀཏོ ཝཱ ལབྦྷམཱནོ དྷམྨགྷོསོ། ཏེནཱཧ ‘‘སཔྤཱཡདྷམྨསྶཝན’’ནྟི། ཏཉྷི སམྨཱདིཊྛིཡཱ པཙྩཡོ བྷཝིཏུཾ སཀྐོཏི, ན ཡོ ཀོཙི པརཏོགྷོསོ། ཨུཔཱཡམནསིཀཱརོཏི ཡེན ནཱམརཱུཔཔརིགྒཧཱདི སིཛ྄ཛྷཏི, ཏཱདིསོ པཐམནསིཀཱརོ། ཨཡཉྩ སམྨཱདིཊྛིཡཱ པཙྩཡོཏི ནིཡམཔཀྑིཀོ, ན སབྦསཾགཱཧཀོཏི དསྶེནྟོ ‘‘པཙྩེཀབུདྡྷཱནཾ པནཱ’’ཏིཨཱདིམཱཧ། ཡོནིསོམནསིཀཱརསྨིཾཡེཝཱཏི ཨཝདྷཱརཎེན པརཏོགྷོསམེཝ ནིཝཏྟེཏི, ན པདཊྛཱནཝིསེསཾ པཊིཡོགཱིནིཝཏྟནཏྠཏྟཱ ཨེཝ-སདྡསྶ།

    452. Kammassakatā sammādiṭṭhi ca vaṭṭanissitattā idha nādhippetā, vivaṭṭakathā hesāti vuttaṃ ‘‘vipassanāsammādiṭṭhiyā ca maggasammādiṭṭhiyā cā’’ti. Parato ghosoti parato satthuto, sāvakato vā labbhamāno dhammaghoso. Tenāha ‘‘sappāyadhammassavana’’nti. Tañhi sammādiṭṭhiyā paccayo bhavituṃ sakkoti, na yo koci paratoghoso. Upāyamanasikāroti yena nāmarūpapariggahādi sijjhati, tādiso pathamanasikāro. Ayañca sammādiṭṭhiyā paccayoti niyamapakkhiko, na sabbasaṃgāhakoti dassento ‘‘paccekabuddhānaṃ panā’’tiādimāha. Yonisomanasikārasmiṃyevāti avadhāraṇena paratoghosameva nivatteti, na padaṭṭhānavisesaṃ paṭiyogīnivattanatthattā eva-saddassa.

    ལདྡྷུཔཀཱརཱཏི (ཨ॰ ནི॰ ཊཱི॰ ༣.༥.༢༥) ཡཐཱརཧཾ ནིསྶཡཱདིཝསེན ལདྡྷཔཙྩཡཱ། ཝིཔསྶནཱསམྨཱདིཊྛིཡཱ ཨནུགྒཧིཏབྷཱཝེན གཧིཏཏྟཱ མགྒསམྨཱདིཊྛཱིསུ ཙ ཨརཧཏྟམགྒསམྨཱདིཊྛི, ཨནནྟརསྶ ཧི ཝིདྷི, པཊིསེདྷོ ཝཱ། ཨགྒཕལསམཱདྷིམྷི ཏཔྤརིཀྑཱརདྷམྨེསུཡེཝ ཙ ཀེཝལོ ཙེཏོཔརིཡཱཡོ ནིརུལ༹ྷོཏི སམྨཱདིཊྛཱིཏི ཨརཧཏྟམགྒསམྨཱདིཊྛི། ཕལཀྑཎེཏི ཨནནྟརེ ཀཱལནྟརེ ཙཱཏི དུཝིདྷེ ཕལཀྑཎེ། པཊིཔྤསྶདྡྷིཝསེན སབྦསཾཀིལེསེཧི ཙེཏོ ཝིམུཙྩཏི ཨེཏཱཡཱཏི ཙེཏོཝིམུཏྟི, ཨགྒཕལཔཉྙཾ ཋཔེཏྭཱ ཨཝསེསཱ ཕལདྷམྨཱ། ཏེནཱཧ ‘‘ཙེཏོཝིམུཏྟི ཕལཾ ཨསྶཱཏི། ཙེཏོཝིམུཏྟིསངྑཱཏཾ ཕལཾ ཨཱནིསཾསོ’’ཏི, སབྦསཾཀིལེསེཧི ཙེཏསོ ཝིམུཙྩནསངྑཱཏཾ པཊིཔྤསྶམྦྷནསཉྙིཏཾ པཧཱནཾ ཕལཾ ཨཱནིསཾསོ ཙཱཏི ཡོཛནཱ། ཨིདྷ ཙ ཙེཏོཝིམུཏྟི-སདྡེན པཧཱནམཏྟཾ གཧིཏཾ, པུབྦེ པཧཱཡཀདྷམྨཱ, ཨཉྙཐཱ ཕལདྷམྨཱ ཨེཝ ཨཱནིསཾསོཏི གཡ྄ཧམཱནེ པུནཝཙནཾ ནིརཏྠཀཾ སིཡཱ།

    Laddhupakārāti (a. ni. ṭī. 3.5.25) yathārahaṃ nissayādivasena laddhapaccayā. Vipassanāsammādiṭṭhiyā anuggahitabhāvena gahitattā maggasammādiṭṭhīsu ca arahattamaggasammādiṭṭhi, anantarassa hi vidhi, paṭisedho vā. Aggaphalasamādhimhi tapparikkhāradhammesuyeva ca kevalo cetopariyāyo niruḷhoti sammādiṭṭhīti arahattamaggasammādiṭṭhi. Phalakkhaṇeti anantare kālantare cāti duvidhe phalakkhaṇe. Paṭippassaddhivasena sabbasaṃkilesehi ceto vimuccati etāyāti cetovimutti, aggaphalapaññaṃ ṭhapetvā avasesā phaladhammā. Tenāha ‘‘cetovimutti phalaṃ assāti. Cetovimuttisaṅkhātaṃ phalaṃ ānisaṃso’’ti, sabbasaṃkilesehi cetaso vimuccanasaṅkhātaṃ paṭippassambhanasaññitaṃ pahānaṃ phalaṃ ānisaṃso cāti yojanā. Idha ca cetovimutti-saddena pahānamattaṃ gahitaṃ, pubbe pahāyakadhammā, aññathā phaladhammā eva ānisaṃsoti gayhamāne punavacanaṃ niratthakaṃ siyā.

    པཉྙཱཝིམུཏྟིཕལཱནིསཾསཱཏི ཨེཏྠཱཔི ཨེཝམེཝ ཨཏྠོ ཝེདིཏབྦོ། སམྨཱཝཱཙཱཀམྨནྟཱཛཱིཝཱ སཱིལསབྷཱཝཏྟཱ ཝིསེསཏོ སམཱདྷིསྶ ཨུཔཀཱརཱ, ཏཐཱ སམྨཱསངྐཔྤོ ཛྷཱནསབྷཱཝཏྟཱ། ཏཐཱ ཧི སོ ‘‘ཨཔྤནཱ’’ཏི ནིདྡིཊྛོ། སམྨཱསཏིསམྨཱཝཱཡཱམཱ པན སམཱདྷིཔཀྑིཡཱ ཨེཝཱཏི ཨཱཧ ‘‘ཨཝསེསཱ དྷམྨཱ ཙེཏོཝིམུཏྟཱིཏི ཝེདིཏབྦཱ’’ཏི། ཙཏུཔཱརིསུདྡྷིསཱིལནྟི ཨརིཡམགྒཱདྷིགམསྶ པདཊྛཱནབྷཱུཏཾ ཙཏུཔཱརིསུདྡྷིསཱིལཾ། སུཏཱདཱིསུཔི ཨེསེཝ ནཡོ། ཨཏྟནོ ཙིཏྟཔྤཝཏྟིཨཱརོཙནཝསེན སཧ ཀཐནཾ སཾཀཐཱ, སཾཀཐཱཝ སཱཀཙྪཱ། ཨིདྷ པན ཀམྨཊྛཱནཔཊིབདྡྷཱཏི ཨཱཧ ‘‘ཀམྨཊྛཱནེ…པེ॰… ཀཐཱ’’ཏི། ཏཏྠ ཀམྨཊྛཱནསྶ ཨེཀཝཱརཾ ཝཱིཐིཡཱ ཨཔྤཊིཔཛྫནཾ ཁལནཾ, ཨནེཀཝཱརཾ པཀྑལནཾ, ཏདུབྷཡསྶ ཝིཙྪེདནཱིཀཐཱ ཁལནཔཀྑལནཚེདནཀཐཱ། པཱུརེནྟསྶཱཏི ཝིཝཊྚནིསྶིཏཾ ཀཏྭཱ པཱལེནྟསྶ བྲཱུཧེནྟསྶ ཙ། སུཎནྟསྶཱཏི ‘‘ཡཐཱཨུགྒཧིཏཀམྨཊྛཱནཾ ཕཱཏིཾ གམིསྶཏཱི’’ཏི ཨེཝཾ སུཎནྟསྶ། ཏེནེཝ ཧི ‘‘སཔྤཱཡདྷམྨསྶཝན’’ནྟི ཝུཏྟཾ། ཀམྨཾ ཀརོནྟསྶཱཏི བྷཱཝནཱནུཡོགཀམྨཾ ཀརོནྟསྶ།

    Paññāvimuttiphalānisaṃsāti etthāpi evameva attho veditabbo. Sammāvācākammantājīvā sīlasabhāvattā visesato samādhissa upakārā, tathā sammāsaṅkappo jhānasabhāvattā. Tathā hi so ‘‘appanā’’ti niddiṭṭho. Sammāsatisammāvāyāmā pana samādhipakkhiyā evāti āha ‘‘avasesā dhammā cetovimuttīti veditabbā’’ti. Catupārisuddhisīlanti ariyamaggādhigamassa padaṭṭhānabhūtaṃ catupārisuddhisīlaṃ. Sutādīsupi eseva nayo. Attano cittappavattiārocanavasena saha kathanaṃ saṃkathā, saṃkathāva sākacchā. Idha pana kammaṭṭhānapaṭibaddhāti āha ‘‘kammaṭṭhāne…pe… kathā’’ti. Tattha kammaṭṭhānassa ekavāraṃ vīthiyā appaṭipajjanaṃ khalanaṃ, anekavāraṃ pakkhalanaṃ, tadubhayassa vicchedanīkathā khalanapakkhalanachedanakathā. Pūrentassāti vivaṭṭanissitaṃ katvā pālentassa brūhentassa ca. Suṇantassāti ‘‘yathāuggahitakammaṭṭhānaṃ phātiṃ gamissatī’’ti evaṃ suṇantassa. Teneva hi ‘‘sappāyadhammassavana’’nti vuttaṃ. Kammaṃ karontassāti bhāvanānuyogakammaṃ karontassa.

    པཉྩསུཔི ཋཱནེསུ ཨནྟ-སདྡོ ཧེཏུཨཏྠཛོཏནོ དཊྛབྦོ། ཨེཝཉྷི ‘‘ཡཐཱ ཧཱི’’ཏིཨཱདིནཱ ཝུཙྩམཱནཱ ཨམྦུཔམཱ ཙ ཡུཛྫེཡྻ། ཨུདཀཀོཊྛཀནྟི ཨཱལཝཱལཾ། ཐིརཾ ཀཏྭཱ བནྡྷཏཱིཏི ཨསིཐིལཾ དལ༹ྷཾ ནཱཏིམཧནྟཾ ནཱཏིཁུདྡཀཾ ཀཏྭཱ ཡོཛེཏི། ཐིརཾ ཀརོཏཱིཏི ཨུདཀསིཉྩནཀཱལེ ཏཏོ ཏཏོ ཝིསྶརིཏྭཱ ཨུདཀསྶ ཨནིཀྑམནཏྠཾ ཨཱལཝཱལཾ ཐིརཏརཾ ཀརོཏི། སུཀྑདཎྜཀོཏི ཏསྶེཝ ཨམྦགཙྪཀསྶ སུཀྑོ སཱཁཱསཱིསཀོ། ཀིཔིལླིཀཔུཊོཏི ཏམྦཀིཔིལླིཀཀུཊཛཾ། ཁཎིཏྟིནྟི ཀུདཱལཾ། ཀོཊྛཀབནྡྷནཾ ཝིཡ སཱིལཾ སམྨཱདིཊྛིཡཱ ཝཌྜྷནུཔཱཡསྶ མཱུལབྷཱཝཏོ། ཨུདཀསིཉྩནཾ ཝིཡ དྷམྨསྶཝནཾ བྷཱཝནཱཡ པརིབྲཱུཧནཏོ། མརིཡཱདཱཡ ཐིརབྷཱཝཀརཎཾ ཝིཡ སམཐོ ཡཐཱཝུཏྟབྷཱཝནཱདྷིཊྛཱནཱཡ སཱིལམརིཡཱདཱཡ དལ༹ྷབྷཱཝཱཔཱདནཏོ། སམཱཧིཏསྶ ཧི སཱིལཾ ཐིརཏརཾ ཧོཏི། སམཱིཔེ ཝལླིཨཱདཱིནཾ ཧརཎཾ ཝིཡ ཀམྨཊྛཱནེ ཁལནཔཀྑལནཙྪེདནཾ ཨིཛ྄ཛྷིཏབྦབྷཱཝནཱཡ ཝིབནྡྷཱཔནཡནཏོ། མཱུལཁཎནཾ ཝིཡ སཏྟནྣཾ ཨནུཔསྶནཱནཾ བྷཱཝནཱ ཏསྶཱ ཝིབནྡྷསྶ མཱུལཀཱནཾ ཏཎྷཱམཱནདིཊྛཱིནཾ པལིཁཎནཏོ། ཨེཏྠ ཙ ཡསྨཱ སུཔརིསུདྡྷསཱིལསྶ ཀམྨཊྛཱནཾ ཨནུཡུཉྫནྟསྶ སཔྤཱཡདྷམྨསྶཝནཾ ཨིཙྪིཏབྦཾ, ཏཏོ ཡཐཱསུཏེ ཨཏྠེ སཱཀཙྪཱསམཱཔཛྫནཾ, ཏཏོ ཀམྨཊྛཱནཝིསོདྷནེན སམཐནིཔྥཏྟི, ཏཏོ སམཱཧིཏསྶ ཨཱརདྡྷཝིཔསྶཀསྶ ཝིཔསྶནཱཔཱརིཔཱུརི། པརིཔུཎྞཝིཔསྶནོ མགྒསམྨཱདིཊྛིཾ པརིབྲཱུཧེཏཱིཏི ཨེཝམེཏེསཾ ཨངྒཱནཾ པརམྤརཱཡ སམྨུཁཱ ཙ ཨནུགྒཎྷནཏོ ཨཡམཱནུཔུབྦཱི ཀཐིཏཱཏི ཝེདིཏབྦཾ།

    Pañcasupi ṭhānesu anta-saddo hetuatthajotano daṭṭhabbo. Evañhi ‘‘yathā hī’’tiādinā vuccamānā ambupamā ca yujjeyya. Udakakoṭṭhakanti ālavālaṃ. Thiraṃ katvā bandhatīti asithilaṃ daḷhaṃ nātimahantaṃ nātikhuddakaṃ katvā yojeti. Thiraṃ karotīti udakasiñcanakāle tato tato vissaritvā udakassa anikkhamanatthaṃ ālavālaṃ thirataraṃ karoti. Sukkhadaṇḍakoti tasseva ambagacchakassa sukkho sākhāsīsako. Kipillikapuṭoti tambakipillikakuṭajaṃ. Khaṇittinti kudālaṃ. Koṭṭhakabandhanaṃ viya sīlaṃ sammādiṭṭhiyā vaḍḍhanupāyassa mūlabhāvato. Udakasiñcanaṃ viya dhammassavanaṃ bhāvanāya paribrūhanato. Mariyādāya thirabhāvakaraṇaṃ viya samatho yathāvuttabhāvanādhiṭṭhānāya sīlamariyādāya daḷhabhāvāpādanato. Samāhitassa hi sīlaṃ thirataraṃ hoti. Samīpe valliādīnaṃ haraṇaṃ viya kammaṭṭhāne khalanapakkhalanacchedanaṃ ijjhitabbabhāvanāya vibandhāpanayanato. Mūlakhaṇanaṃ viya sattannaṃ anupassanānaṃ bhāvanā tassā vibandhassa mūlakānaṃ taṇhāmānadiṭṭhīnaṃ palikhaṇanato. Ettha ca yasmā suparisuddhasīlassa kammaṭṭhānaṃ anuyuñjantassa sappāyadhammassavanaṃ icchitabbaṃ, tato yathāsute atthe sākacchāsamāpajjanaṃ, tato kammaṭṭhānavisodhanena samathanipphatti, tato samāhitassa āraddhavipassakassa vipassanāpāripūri. Paripuṇṇavipassano maggasammādiṭṭhiṃ paribrūhetīti evametesaṃ aṅgānaṃ paramparāya sammukhā ca anuggaṇhanato ayamānupubbī kathitāti veditabbaṃ.

    ༤༥༣. ཨིདྷ ཀིཾ པུཙྪཏཱིཏི ཨིདྷ ཨེཝཾ ཨརཧཏྟཕལཾ པཱཔིཏཱཡ དེསནཱཡ ‘‘ཀཏི པནཱཝུསོ, བྷཝཱ’’ཏི བྷཝཾ པུཙྪནྟོ ཀཱིདིསཾ ཨནུསནྡྷིཾ ཨུཔཱདཱཡ པུཙྪཏཱིཏི ཨཏྠོ། ཏེནེཝ ཧི ‘‘མཱུལམེཝ གཏོ ཨནུསནྡྷཱི’’ཏི ཝཏྭཱ ཨདྷིཔྤཱཡཾ པཀཱསེནྟོ ‘‘དུཔྤཉྙོ’’ཏིཨཱདིམཱཧ། དུཔྤཉྙོཏི ཧི ཨིདྷ ཨཔྤཊིཝིདྡྷསཙྩོ ཨདྷིཔྤེཏོ, ན ཛལོ༹ ཨེཝ། ཀཱམབྷཝོཏིཨཱདཱིསུ ཀམྨོཔཔཏྟིབྷེདཏོ དུཝིདྷོཔི བྷཝོ ཨདྷིཔྤེཏོཏི དསྶེནྟོ ‘‘ཀཱམབྷཝཱུཔགཾ ཀམྨ’’ནྟིཨཱདིམཱཧ། ཏཏྠ ཡཾ ཝཏྟབྦཾ, ཏཾ ཝིསུདྡྷིམགྒེ ཏཾསཾཝཎྞནཱཡཾ (ཝིསུདྡྷི॰ ༢.༦༤༧; ཝིསུདྡྷི॰ མཧཱཊཱི॰ ༢.༦༤༦-༦༤༧) ཝུཏྟནཡེན ཝེདིཏབྦཾ། པུནབྦྷཝསྶཱཏི པུནཔྤུནཾ ཨཔརཱཔརཾ བྷཝནཏོ ཛཱཡནཏོ པུནབྦྷཝོཏི ལདྡྷནཱམསྶ ཝཊྚཔབནྡྷསྶ། ཏེནཱཧ ‘‘ཨིདྷ ཝཊྚཾ པུཙྪིསྶཱམཱི’’ཏི། ཨབྷིནིབྦཏྟཱིཏི བྷཝཡོནིགཏིཨཱདིཝསེན ནིབྦཏྟི། ཏཧིཾ ཏཧིཾ ཏསྨིཾ ཏསྨིཾ བྷཝཱདིཀེ། ཨབྷིནནྡནཱཏི ཏཎྷཱཨབྷིནནྡནཧེཏུ། གམནཱགམནཾ ཧོཏཱིཏིཨཱདིནཱ བྷཝཱདཱིསུ སཏྟཱནཾ ཨཔརཱཔརཾ ཙུཏིཔཊིསནྡྷིཡོ དསྶེཏི། ཁཡནིརོདྷེནཱཏི ཨཙྩནྟཁཡསངྑཱཏེན ཨནུཔྤཱདནིརོདྷེན། ཨུབྷཡམེཏཾ ན ཝཏྟབྦཾ པཧཱནཱབྷིསམཡབྷཱཝནཱབྷིསམཡཱནཾ ཨཙྩཱསནྣཀཱལཏྟཱ། ཝཏྟབྦཾ ཏཾ ཧེཏུཕལདྷམྨཱུཔཙཱརཝསེན། ཡཐཱ ཧི པདཱིཔུཛྫལནཧེཏུཀོ ཨནྡྷཀཱརཝིགམོ, ཨེཝཾ ཝིཛྫུཔྤཱདཧེཏུཀོ ཨཝིཛྫཱནིརོདྷོ, ཧེཏུཕལདྷམྨཱ ཙ སམཱནཀཱལཱཔི པུབྦཱཔརཀཱལཱ ཝིཡ ཝོཧརཱིཡནྟི ཡཐཱ – ‘‘ཙཀྑུཉྩ པཊིཙྩ རཱུཔེ ཙ ཨུཔྤཛྫཏི ཙཀྑུཝིཉྙཱཎ’’ནྟི (མ॰ ནི॰ ༡.༢༠༤, ༤༠༠; མ॰ ནི॰ ༣.༤༢༠, ༤༢༥, ༤༢༦; སཾ॰ ནི॰ ༢.༤༣-༤༥; ༢.༤.༦༠; ཀཐཱ॰ ༤༦༥, ༤༦༧) པཙྩཡཔཙྩཡུཔྤནྣཀིརིཡཱ། གམནཾ ཨུཔཙྪིཛྫཏི ཨིདྷ ཀཱམབྷཝེ པརིནིབྦཱནེན། ཨཱགམནཾ ཨུཔཙྪིཛྫཏི ཏཏྠ རཱུཔཱརཱུཔེསུ པརིནིབྦཱནེན། གམནཱགམནཾ ཨུཔཙྪིཛྫཏི སབྦསོ ཨཔརཱཔརུཔྤཏྟིཡཱ ཨབྷཱཝཏོ།

    453.Idha kiṃ pucchatīti idha evaṃ arahattaphalaṃ pāpitāya desanāya ‘‘kati panāvuso, bhavā’’ti bhavaṃ pucchanto kīdisaṃ anusandhiṃ upādāya pucchatīti attho. Teneva hi ‘‘mūlameva gato anusandhī’’ti vatvā adhippāyaṃ pakāsento ‘‘duppañño’’tiādimāha. Duppaññoti hi idha appaṭividdhasacco adhippeto, na jaḷo eva. Kāmabhavotiādīsu kammopapattibhedato duvidhopi bhavo adhippetoti dassento ‘‘kāmabhavūpagaṃ kamma’’ntiādimāha. Tattha yaṃ vattabbaṃ, taṃ visuddhimaggetaṃsaṃvaṇṇanāyaṃ (visuddhi. 2.647; visuddhi. mahāṭī. 2.646-647) vuttanayena veditabbaṃ. Punabbhavassāti punappunaṃ aparāparaṃ bhavanato jāyanato punabbhavoti laddhanāmassa vaṭṭapabandhassa. Tenāha ‘‘idha vaṭṭaṃ pucchissāmī’’ti. Abhinibbattīti bhavayonigatiādivasena nibbatti. Tahiṃ tahiṃ tasmiṃ tasmiṃ bhavādike. Abhinandanāti taṇhāabhinandanahetu. Gamanāgamanaṃ hotītiādinā bhavādīsu sattānaṃ aparāparaṃ cutipaṭisandhiyo dasseti. Khayanirodhenāti accantakhayasaṅkhātena anuppādanirodhena. Ubhayametaṃ na vattabbaṃ pahānābhisamayabhāvanābhisamayānaṃ accāsannakālattā. Vattabbaṃ taṃ hetuphaladhammūpacāravasena. Yathā hi padīpujjalanahetuko andhakāravigamo, evaṃ vijjuppādahetuko avijjānirodho, hetuphaladhammā ca samānakālāpi pubbāparakālā viya voharīyanti yathā – ‘‘cakkhuñca paṭicca rūpe ca uppajjati cakkhuviññāṇa’’nti (ma. ni. 1.204, 400; ma. ni. 3.420, 425, 426; saṃ. ni. 2.43-45; 2.4.60; kathā. 465, 467) paccayapaccayuppannakiriyā. Gamanaṃ upacchijjati idha kāmabhave parinibbānena. Āgamanaṃ upacchijjati tattha rūpārūpesu parinibbānena. Gamanāgamanaṃ upacchijjati sabbaso aparāparuppattiyā abhāvato.

    ༤༥༤. ཝིཝཊྚཀཐཱཡ པརཏོ ཛོཏིཏཾ པཋམཾ ཛྷཱནཾ ཝིཝཊྚཾ པཏྭཱ ཋིཏསྶ ཨུཀྐཊྛནིདྡེསེན ཨུབྷཏོབྷཱགཝིམུཏྟསྶ ནིརོདྷསཱདྷཀཾ ཝིབྷཱཝིཏུཾ ཡུཏྟནྟི ཨཱཧ ‘‘ཀཏམཾ པནཱཝུསོཏི ཨིདྷ ཀིཾ པུཙྪཏཱི’’ཏིཨཱདི། ཏཐཱ ཧི ཨནནྟརཾ ནིརོདྷསམཱཔཛྫནཀེན བྷིཀྑུནཱ ཛཱནིཏབྦཱནི པཋམསྶ ཛྷཱནསྶ སམྤཡོགཔཧཱནངྒཱནི པུཙྪིཏཱནི། ཨངྒཝཝཏྠཱནནྟི ཛྷཱནངྒཝཝཏྠཱནཾ། ཀོཊྛཱསཔརིཙྪེདོཏི ཏཏྠ ལབྦྷམཱནཕསྶཔཉྩམཀཱདིདྷམྨཀོཊྛཱསཔརིཙྪེདོ ཛཱནིཏབྦོ། ཨིམསྨིཾ ཛྷཱནེ ཨེཏྟཀཱ དྷམྨཱ སཾཝིཛྫནྟི, ཨེཏྟཀཱ ནིརོདྷིཏཱཏི ཛཱནིཏབྦཾ། ཨུཔཀཱརཱནུཔཀཱརཱནི ཨངྒཱནཱིཏི ནིརོདྷསམཱཔཏྟིཡཱ ཨུཔཀཱརཱནི ཙ ཨནུཔཀཱརཱནི ཙ ཨངྒཱནི། ནིརོདྷསམཱཔཏྟིཡཱ ཧི སོལ༹སཧི ཉཱཎཙརིཡཱཧི ནཝཧི སམཱདྷིཙརིཡཱཧི ཙ པཏྟབྦཏྟཱ ཏཾཏཾཉཱཎསྶ སམཱདྷིཙརིཡཱཧི སམཏིཀྐམིཏབྦཱ དྷམྨཱ ཨནུཔཀཱརཀངྒཱནི, སམཏིཀྐམཀཱ ཨུཔཀཱརཀངྒཱནི། ཏེསཉྷི ཝསེན ཡཐཱནུཔུབྦཾ ཨུཔསནྟུཔསནྟཨོལཱ༹རིཀབྷཱཝཱཡ བྷཝགྒསམཱཔཏྟིཡཱ སངྑཱརཱཝསེསསུཁུམཏཾ པཏྟཱ ཙིཏྟཙེཏསིཀཱ ཡཐཱཔརིཙྪིནྣཾ ཀཱལཾ ནིརུཛ྄ཛྷནྟི, ཨཔྤཝཏྟིཾ གཙྪནྟི། ཏསྶཱཏི ནིརོདྷསྶ། ཨནནྟརཔཙྩཡནྟི ཨནནྟརཔཙྩཡསདིསཾ། ན ཧི ནིརོདྷསྶ ཀོཙི དྷམྨོ ཨནནྟརཔཙྩཡོ ནཱམ ཨཏྠི། ཡཉྷི ཏདཱ ཙིཏྟཙེཏསིཀཱནཾ ཏཐཱ ནིརུཛ྄ཛྷནཾ, ཏཾ ཡཐཱཝུཏྟཔུབྦཱབྷིསངྑཱརཧེཏུཀཱཡ ནེཝསཉྙཱནཱསཉྙཱཡཏནསམཱཔཏྟིཡཱ ཨཧོསཱིཏི སཱ ཏསྶ ཨནནྟརཔཙྩཡོ ཝིཡ ཧོཏཱིཏི ཏཾ ཝུཏྟཾ། ཚ སམཱཔཏྟིཡོཏི སུཏྟནྟནཡེན ཝུཏྟསུཏྟནྟཔིཊཀསཾཝཎྞནཱཏི ཀཏྭཱ། ‘‘སཏྟ སམཱཔཏྟིཡོ’’ཏི པན ཝཏྟབྦཾ, ཨཉྙཐཱ ཨིདཾ ‘‘ཙཏུརངྒིཀ’’ནྟི ན ཝཏྟབྦཾ སིཡཱ། ནཡཾ ཝཱ དསྶེཏྭཱཏི ཨཱདིཨནྟདསྶནཝསེན ནཡདསྶནཾ ཀཏྭཱ།

    454. Vivaṭṭakathāya parato jotitaṃ paṭhamaṃ jhānaṃ vivaṭṭaṃ patvā ṭhitassa ukkaṭṭhaniddesena ubhatobhāgavimuttassa nirodhasādhakaṃ vibhāvituṃ yuttanti āha ‘‘katamaṃ panāvusoti idha kiṃ pucchatī’’tiādi. Tathā hi anantaraṃ nirodhasamāpajjanakena bhikkhunā jānitabbāni paṭhamassa jhānassa sampayogapahānaṅgāni pucchitāni. Aṅgavavatthānanti jhānaṅgavavatthānaṃ. Koṭṭhāsaparicchedoti tattha labbhamānaphassapañcamakādidhammakoṭṭhāsaparicchedo jānitabbo. Imasmiṃ jhāne ettakā dhammā saṃvijjanti, ettakā nirodhitāti jānitabbaṃ. Upakārānupakārāni aṅgānīti nirodhasamāpattiyā upakārāni ca anupakārāni ca aṅgāni. Nirodhasamāpattiyā hi soḷasahi ñāṇacariyāhi navahi samādhicariyāhi ca pattabbattā taṃtaṃñāṇassa samādhicariyāhi samatikkamitabbā dhammā anupakārakaṅgāni, samatikkamakā upakārakaṅgāni. Tesañhi vasena yathānupubbaṃ upasantupasantaoḷārikabhāvāya bhavaggasamāpattiyā saṅkhārāvasesasukhumataṃ pattā cittacetasikā yathāparicchinnaṃ kālaṃ nirujjhanti, appavattiṃ gacchanti. Tassāti nirodhassa. Anantarapaccayanti anantarapaccayasadisaṃ. Na hi nirodhassa koci dhammo anantarapaccayo nāma atthi. Yañhi tadā cittacetasikānaṃ tathā nirujjhanaṃ, taṃ yathāvuttapubbābhisaṅkhārahetukāya nevasaññānāsaññāyatanasamāpattiyā ahosīti sā tassa anantarapaccayo viya hotīti taṃ vuttaṃ. Cha samāpattiyoti suttantanayena vuttasuttantapiṭakasaṃvaṇṇanāti katvā. ‘‘Satta samāpattiyo’’ti pana vattabbaṃ, aññathā idaṃ ‘‘caturaṅgika’’nti na vattabbaṃ siyā. Nayaṃ vā dassetvāti ādiantadassanavasena nayadassanaṃ katvā.

    ༤༥༥. ཨེཝཾ ནིརོདྷསྶ པཱདཀཾ ཝིབྷཱཝེཏྭཱ ཨིདཱནི ཨནྟོནིརོདྷེ ཨནུཔབནྡྷབྷཱཝཏོ པཉྩནྣཾ པསཱདཱནཾ པཙྩཡཔུཙྪནེ པཋམཾ ཏཱཝ ཏེ སརཱུཔཏོ ཨཱཝེཎིཀཏོ ཨཱཝེཎིཀཝིསཡཏོ པཊིསྶརཎཏོ ཙ པུཙྪནཝསེན པཱལི༹ པཝཏྟཱཏི དསྶེནྟོ ‘‘ཝིཉྙཱཎནིསྶཡེ པཉྩ པསཱདེ པུཙྪནྟོ’’ཏི ཨཱཧ། གོཙརཝིསཡནྟི ཨེཏྠ ཀཱམཾ ཏབྦཧུལཙཱརིཏཱཔེཀྑཾ གོཙརགྒཧཎཾ, ཨནཉྙཏྠབྷཱཝཱཔེཀྑཾ ཝིསཡགྒཧཎནྟི ཨཏྠེཝ གོཙརཝིསཡབྷཱཝཱནཾ ཝིསེསོ, ཝིཝརིཡམཱནཾ པན ཨུབྷཡམྤི ཨཱརམྨཎསབྷཱཝམེཝཱཏི ཨཱཧ ‘‘གོཙརབྷཱུཏཾ ཝིསཡ’’ནྟི། ཨེཀེཀསྶཱཏི ཨེཀོ ཨེཀསྶ, ཨཉྙོ ཨཉྙསྶཱཏི ཨཏྠོ། ཨཉྙཏྠོ ཧི ཨཡཾ ཨེཀ-སདྡོ ‘‘ཨིཏྠེཀེ ཨབྷིཝདནྟཱི’’ཏིཨཱདཱིསུ (མ॰ ནི॰ ༣.༢༧) ཝིཡ། སཙེ ཧཱིཏིཨཱདི ཨབྷཱུཏཔརིཀཔྤནཝཙནམེཏཾ། ཏཏྠ སམོདྷཱནེཏྭཱཏི ཨེཀཛ྄ཛྷཾ ཀཏྭཱ། ཝིནཱཔི མུཁེནཱཏིཨཱདིནཱ ཨཏྠསལླཱཔིཀནིདསྶནཾ ནཱམ དསྶེཏི། ཡཐཱ ཝིཉྙཱཎཱདྷིཊྛིཏམེཝ ཙཀྑུ རཱུཔཾ པསྶཏི, ན ཀེཝལཾ, ཨེཝཾ ཙཀྑུནིསྶཡམེཝ ཝིཉྙཱཎཾ ཏཾ པསྶཏི, ན ཨིཏརནྟི ཨཱཧ ‘‘ཙཀྑུཔསཱདེ ཨུཔནེཧཱི’’ཏི། ཏེན ཏེསཾ ཏཏྠ སཾཧཙྩཀཱརིཏཾ དསྶེཏི། ཡདི ཝཱ ནཱིལཾ ཡདི ཝཱ པཱིཏཀནྟི ཨིདཾ ནཱིལཔཱིཏཱདིསབྷཱཝཛཱནནམཏྟཾ སནྡྷཱཡཱཧ། ནཱིལཾ པཱིཏཀནྟི པཛཱནནཾ ཙཀྑུཝིཉྙཱཎསྶ ནཏྠེཝ ཨཝིཀཔྤཀབྷཱཝཏོ། ཨེཏེསཾ ཙཀྑུཝིཉྙཱཎཱདཱིནཾ། ནིསྶཡསཱིསེན ནིསྶིཏཔུཙྪཱ ཧེསཱ, ཨེཝཉྷི ཝིསཡཱནུབྷཝནཙོདནཱ སམཏྠིཏཱ ཧོཏི། ཏེནཱཧ ‘‘ཙཀྑུཝིཉྙཱཎཾ ཧཱི’’ཏིཨཱདི། ཡཐཱསཀཾ ཝིསཡཾ རཛྫནཱདིཝསེན ཨནུབྷཝིཏུཾ ཨསམཏྠཱནི ཙཀྑུཝིཉྙཱཎཱདཱིནི, ཏཏྠ སམཏྠཏཱཡེཝ ཙ ནཏྠི, ན ཀིཉྩི ཨཏྠཏོ པཊིསརནྟཱནི ཝིཡ ཧོནྟཱིཏི ཝུཏྟཾ ‘‘ཀིཾ ཨེཏཱནི པཊིསརནྟཱི’’ཏི། ཛཝནམནོ པཊིསརཎནྟི པཉྩདྭཱརིཀཾ ཨིཏརཉྩ སཱདྷཱརཎཏོ ཝཏྭཱ པུན ཡཱཡ’སྶ རཛྫནཱདིཔཝཏྟིཡཱ པཊིསརཎཏཱ, སཱ སཝིསེསཱ ཡཏྠ ལབྦྷཏི, ཏཾ དསྶེནྟོ ‘‘མནོདྭཱརིཀཛཝནམནོ ཝཱ’’ཏི ཨཱཧ། ཨེཏསྨིཾ པན དྭཱརེཏི ཙཀྑུདྭཱརེ ཛཝནཾ རཛྫཏི ཝཱ དུསྶཏི ཝཱ མུཡ྄ཧཏི ཝཱ, ཡཏོ ཏཏྠ ཨཉྙཱཎཱདིཨསཾཝརོ པཝཏྟཏི།

    455. Evaṃ nirodhassa pādakaṃ vibhāvetvā idāni antonirodhe anupabandhabhāvato pañcannaṃ pasādānaṃ paccayapucchane paṭhamaṃ tāva te sarūpato āveṇikato āveṇikavisayato paṭissaraṇato ca pucchanavasena pāḷi pavattāti dassento ‘‘viññāṇanissaye pañca pasāde pucchanto’’ti āha. Gocaravisayanti ettha kāmaṃ tabbahulacāritāpekkhaṃ gocaraggahaṇaṃ, anaññatthabhāvāpekkhaṃ visayaggahaṇanti attheva gocaravisayabhāvānaṃ viseso, vivariyamānaṃ pana ubhayampi ārammaṇasabhāvamevāti āha ‘‘gocarabhūtaṃ visaya’’nti. Ekekassāti eko ekassa, añño aññassāti attho. Aññattho hi ayaṃ eka-saddo ‘‘ittheke abhivadantī’’tiādīsu (ma. ni. 3.27) viya. Sace hītiādi abhūtaparikappanavacanametaṃ. Tattha samodhānetvāti ekajjhaṃ katvā. Vināpi mukhenātiādinā atthasallāpikanidassanaṃ nāma dasseti. Yathā viññāṇādhiṭṭhitameva cakkhu rūpaṃ passati, na kevalaṃ, evaṃ cakkhunissayameva viññāṇaṃ taṃ passati, na itaranti āha ‘‘cakkhupasāde upanehī’’ti. Tena tesaṃ tattha saṃhaccakāritaṃ dasseti. Yadi vā nīlaṃ yadi vā pītakanti idaṃ nīlapītādisabhāvajānanamattaṃ sandhāyāha. Nīlaṃ pītakanti pajānanaṃ cakkhuviññāṇassa nattheva avikappakabhāvato. Etesaṃ cakkhuviññāṇādīnaṃ. Nissayasīsena nissitapucchā hesā, evañhi visayānubhavanacodanā samatthitā hoti. Tenāha ‘‘cakkhuviññāṇaṃ hī’’tiādi. Yathāsakaṃ visayaṃ rajjanādivasena anubhavituṃ asamatthāni cakkhuviññāṇādīni, tattha samatthatāyeva ca natthi, na kiñci atthato paṭisarantāni viya hontīti vuttaṃ ‘‘kiṃ etāni paṭisarantī’’ti. Javanamano paṭisaraṇanti pañcadvārikaṃ itarañca sādhāraṇato vatvā puna yāya’ssa rajjanādipavattiyā paṭisaraṇatā, sā savisesā yattha labbhati, taṃ dassento ‘‘manodvārikajavanamano vā’’ti āha. Etasmiṃ pana dvāreti cakkhudvāre javanaṃ rajjati vā dussati vā muyhati vā, yato tattha aññāṇādiasaṃvaro pavattati.

    ཏཏྲཱཏི ཏསྨིཾ ཛཝནམནསྶེཝ པཊིསརཎབྷཱཝེ། དུབྦལབྷོཛཀཱཏི ཧཱིནསཱམཏྠིཡཱ རཱཛབྷོགྒཱ། སེཝཀཱནཾ གཎནཱཡ ཡོཛིཏདིཝསེ ལབྦྷམཱནཀཧཱཔཎོ ཡུཏྟིཀཧཱཔཎོ། ཨནྡུབནྡྷནེན བདྡྷསྶ ཝིསྶཛྫནེན ལབྦྷམཱནཀཧཱཔཎོ བནྡྷཀཧཱཔཎོ། ཀིཉྩི པཧརནྟེ མཱ པཧརནྟཱུཏི པཊིཀྑིཔཏོ དཱཏབྦདཎྜོ མཱཔཧཱརཀཧཱཔཎོ། སོ སབྦོཔི པརིཏྟཀེསུ གཱམིཀམནུསྶེསུ ཏཐཱ ལབྦྷམཱནོ ཨེཏྟཀོ ཧོཏཱིཏི ཨཱཧ ‘‘ཨཊྛཀཧཱཔཎོ ཝཱ’’ཏིཨཱདི། སཏཝཏྠུཀནྟི སཏཀརཱིསཝཏྠུཀཾ། ཨེས ནཡོ སེསཔདདྭཡེཔི། ཏཏྠཱཏིཨཱདི ཨུཔམཱསཾསནྡྷནཾ, ཏཾ སུཝིཉྙེཡྻམེཝ།

    Tatrāti tasmiṃ javanamanasseva paṭisaraṇabhāve. Dubbalabhojakāti hīnasāmatthiyā rājabhoggā. Sevakānaṃ gaṇanāya yojitadivase labbhamānakahāpaṇo yuttikahāpaṇo. Andubandhanena baddhassa vissajjanena labbhamānakahāpaṇo bandhakahāpaṇo. Kiñci paharante mā paharantūti paṭikkhipato dātabbadaṇḍo māpahārakahāpaṇo. So sabbopi parittakesu gāmikamanussesu tathā labbhamāno ettako hotīti āha ‘‘aṭṭhakahāpaṇo vā’’tiādi. Satavatthukanti satakarīsavatthukaṃ. Esa nayo sesapadadvayepi. Tatthātiādi upamāsaṃsandhanaṃ, taṃ suviññeyyameva.

    ༤༥༦. ཨནྟོནིརོདྷསྨིཾ པཉྩ པསཱདེཏི ནིརོདྷསམཱཔནྣསྶ པཝཏྟམཱནེ པཉྩ པསཱདེ། ཀིརིཡམཡཔཝཏྟསྨིནྟི ཛཝནཱདིཀིརིཡཱནིབྦཏྟཀདྷམྨཔྤཝཏྟིཡཾ། བལཝཔཙྩཡཱ ཧོནྟཱིཏི པཙྪཱཛཱཏཝིཔྤཡུཏྟཨཏྠིཨཝིགཏཔཙྩཡེཧི པཙྩཡཱ ཧོནྟི, ཨུཔཏྠམྦྷཀབྷཱཝེན བལཝཔཙྩཡཱ ཧོནྟི། ཛཱིཝིཏིནྡྲིཡཾ པཊིཙྩཱཏི ཨིནྡྲིཡཨཏྠིཨཝིགཏཔཙྩཡཝསེན པཙྩཡབྷཱུཏཾ ཛཱིཝིཏིནྡྲིཡཾ པཊིཙྩ པཉྩཝིདྷོཔི པསཱདོ ཏིཊྛཏི། ཛཱིཝིཏིནྡྲིཡེན ཝིནཱ ན ཏིཊྛཏི ཛཱིཝིཏིནྡྲིཡརཧིཏསྶ ཀམྨསམུཊྛཱནརཱུཔཀལཱཔསྶ ཨབྷཱཝཏོ། ཏསྨཱཏི ཡསྨཱ ཨནུཔཱལནལཀྑཎེན ཛཱིཝིཏེན ཨནུཔཱལིཏཱ ཨེཝ ཨུསྨཱ པཝཏྟཏི, ན ཏེན ཨནནུཔཱལིཏཱ, ཏསྨཱ ཨུསྨཱ ཨཱཡུཾ པཊིཙྩ ཏིཊྛཏི། ཛཱལསིཁཾ པཊིཙྩ ཨཱབྷཱ པཉྙཱཡཏཱིཏི ཛཱལསིཁཱསངྑཱཏབྷཱུཏསངྒྷཱཏཾ སཧེཝ པཝཏྟམཱནཾ ནིསྶཱཡ ‘‘ཨཱབྷཱ’’ཏི ལདྡྷནཱམཱ ཝཎྞདྷཱཏུ ‘‘ཨུཛྫལཏི, ཨནྡྷཀཱརཾ ཝིདྷམཏི, རཱུཔགཏཱནི ཙ ཝིདཾསེཏཱི’’ཏིཨཱདཱིཧི པཀཱརེཧི ཉཱཡཏི། ཏཾ ཨཱལོཀཾ པཊིཙྩཱཏི ཏཾ ཝུཏྟཔྤཀཱརཾ ཨཱལོཀཾ པཙྩཡཾ ལབྷིཏྭཱ། ཛཱལསིཁཱ པཉྙཱཡཏཱིཏི ‘‘ཨཔྤིཀཱ, མཧཏཱི, ཨུཛུ, ཀུཊིལཱ’’ཏིཨཱདིནཱ པཱཀཊཱ ཧོཏི།

    456.Antonirodhasmiṃ pañca pasādeti nirodhasamāpannassa pavattamāne pañca pasāde. Kiriyamayapavattasminti javanādikiriyānibbattakadhammappavattiyaṃ. Balavapaccayā hontīti pacchājātavippayuttaatthiavigatapaccayehi paccayā honti, upatthambhakabhāvena balavapaccayā honti. Jīvitindriyaṃ paṭiccāti indriyaatthiavigatapaccayavasena paccayabhūtaṃ jīvitindriyaṃ paṭicca pañcavidhopi pasādo tiṭṭhati. Jīvitindriyena vinā na tiṭṭhati jīvitindriyarahitassa kammasamuṭṭhānarūpakalāpassa abhāvato. Tasmāti yasmā anupālanalakkhaṇena jīvitena anupālitā eva usmā pavattati, na tena ananupālitā, tasmā usmā āyuṃ paṭicca tiṭṭhati. Jālasikhaṃ paṭicca ābhā paññāyatīti jālasikhāsaṅkhātabhūtasaṅghātaṃ saheva pavattamānaṃ nissāya ‘‘ābhā’’ti laddhanāmā vaṇṇadhātu ‘‘ujjalati, andhakāraṃ vidhamati, rūpagatāni ca vidaṃsetī’’tiādīhi pakārehi ñāyati. Taṃ ālokaṃ paṭiccāti taṃ vuttappakāraṃ ālokaṃ paccayaṃ labhitvā. Jālasikhā paññāyatīti ‘‘appikā, mahatī, uju, kuṭilā’’tiādinā pākaṭā hoti.

    ཛཱལསིཁཱ ཝིཡ ཀམྨཛཏེཛོ ནིསྶཡབྷཱཝཏོ། ཨཱལོཀོ ཝིཡ ཛཱིཝིཏིནྡྲིཡཾ ཏནྣིསྶིཏབྷཱཝཏོ། ཨིདཱནི ཨུཔམོཔམིཏབྦཱནཾ སམྦནྡྷཾ དསྶེཏུཾ ‘‘ཛཱལསིཁཱ ཧཱི’’ཏིཨཱདི ཝུཏྟཾ། ཨཱལོཀཾ གཧེཏྭཱཝ ཨུཔྤཛྫཏཱིཏི ཨིམིནཱ ཡཐཱ ཛཱལསིཁཱཡ སཧེཝ ཨཱལོཀོ ཨུཔྤཛྫཏི, ཨེཝཾ ཀམྨཛུསྨནཱ སཧེཝ ཛཱིཝིཏིནྡྲིཡཾ ཨུཔྤཛྫཏཱིཏི དསྶེཏི། ཛཱལསིཁཱསནྣིསྶཡོ ཏསྶཱ སཏིཡེཝ ཧོནྟོ ཨཱལོཀོ ཏཱཡ ཨུཔྤཱདིཏོ ཝིཡ ཧོཏཱིཏི ཨཱཧ ‘‘ཨཏྟནཱ ཛནིཏཨཱལོཀེནེཝཱ’’ཏི། ཨུསྨཱ ནཱམེཏྠ ཀམྨསམུཊྛཱནཱ ཏེཛོདྷཱཏུ ཏནྣིསྶིཏཉྩ ཛཱིཝིཏིནྡྲིཡཾ ཏདནུཔཱལཀཉྩཱཏི ཨཱཧ ‘‘ཀམྨཛམཧཱབྷཱུཏསམྦྷཝེན ཛཱིཝིཏིནྡྲིཡེན ཨུསྨཱཡ ཨནུཔཱལན’’ནྟི། ན ཀེཝལཾ ཁཎཊྛིཏིཡཱ ཨེཝ, ཨཐ ཁོ པབནྡྷཱནུཔཙྪེདསྶཔི ཛཱིཝིཏིནྡྲིཡཾ ཀཱརཎནྟི ཨཱཧ ‘‘ཝསྶསཏམྤི ཀམྨཛཏེཛཔཝཏྟཾ པཱལེཏཱི’’ཏི། ཨུསྨཱ ཨཱཡུནོ པཙྩཡོ ཧོནྟོ སེསབྷཱུཏསཧིཏོ ཨེཝ ཧོཏཱིཏི ཨཱཧ ‘‘མཧཱབྷཱུཏཱནཱི’’ཏི། ཏཐཱ ཨཱཡུཔི སཧཛཱཏརཱུཔཾ པཱལེནྟམེཝ ཨུསྨཱཡ པཙྩཡོ ཧོཏཱིཏི ཝུཏྟཾ ‘‘མཧཱབྷཱུཏཱནི པཱལེཏཱི’’ཏི།

    Jālasikhāviya kammajatejo nissayabhāvato. Āloko viya jīvitindriyaṃ tannissitabhāvato. Idāni upamopamitabbānaṃ sambandhaṃ dassetuṃ ‘‘jālasikhā hī’’tiādi vuttaṃ. Ālokaṃ gahetvāva uppajjatīti iminā yathā jālasikhāya saheva āloko uppajjati, evaṃ kammajusmanā saheva jīvitindriyaṃ uppajjatīti dasseti. Jālasikhāsannissayo tassā satiyeva honto āloko tāya uppādito viya hotīti āha ‘‘attanā janitaālokenevā’’ti. Usmā nāmettha kammasamuṭṭhānā tejodhātu tannissitañca jīvitindriyaṃ tadanupālakañcāti āha ‘‘kammajamahābhūtasambhavena jīvitindriyena usmāya anupālana’’nti. Na kevalaṃ khaṇaṭṭhitiyā eva, atha kho pabandhānupacchedassapi jīvitindriyaṃ kāraṇanti āha ‘‘vassasatampi kammajatejapavattaṃ pāletī’’ti. Usmā āyuno paccayo honto sesabhūtasahito eva hotīti āha ‘‘mahābhūtānī’’ti. Tathā āyupi sahajātarūpaṃ pālentameva usmāya paccayo hotīti vuttaṃ ‘‘mahābhūtāni pāletī’’ti.

    ༤༥༧. ཨཱཡུ ཨེཝ ཨིནྡྲིཡཔཙྩཡཱདིཝསེན སཧཛཱཏདྷམྨཱནཾ ཨནུཔཱལནཝསེན སངྑརཎཏོ ཨཱཡུསངྑཱརོ། བཧུཝཙནནིདྡེསོ པན ཨནེཀསཏསཧསྶབྷེདེསུ རཱུཔཀལཱཔེསུ པཝཏྟིཡཱ ཨནེཀབྷེདནྟི ཀཏྭཱ། ཨཱརམྨཎརསཾ ཨནུབྷཝནྟཱིཏི ཝེདནིཡཱ ཡཐཱ ‘‘ནིཡྻཱནིཀཱ’’ཏི། ཏེནཱཧ ‘‘ཝེདནཱ དྷམྨཱཝཱ’’ཏི། སུཁཱདིབྷེདབྷིནྣཏྟཱ བཧུཝཙནནིདྡེསོ། ཨིམེསཾ ཨཱཡུསངྑཱརཝེདནཱནཾ ཨེཀནྟནིརོདྷཾ སམཱཔནྣསྶ མརཎེན བྷཝིཏབྦཾ ཝེདནཱཡ ནིརུདྡྷཏྟཱ། ཨཱཡུསངྑཱརཱནཾ ཏཐཱ ཨནིརུདྡྷཏྟཱ ནིརོདྷསྶ སམཱཔཛྫནམེཝ ན སིཡཱ, ཀུཏོ ཝུཊྛཱནཾ། ཏེན ཝུཏྟཾ པཱལི༹ཡཾ ‘‘ཏེ ཙ ཧཱཝུསོ’’ཏིཨཱདི། ཝུཊྛཱནཾ པཉྙཱཡཏི སཉྙཱཝེདནཱདཱིནཾ ཨུཔྤཏྟིཡཱ། ཨིདཱནི ཏམཏྠཾ ཝིཏྠཱརཏོ ཨུཔམཱཡ ཝིབྷཱཝེཏུཾ ‘‘ཡོ ཧཱི’’ཏིཨཱདི ཝུཏྟཾ། ཨུཀྐཎྛིཏྭཱཏི ནཱནཱརམྨཎཱཔཱཏཏོ ནིབྦིནྡིཏྭཱ། ཡཐཱཔརིཙྪིནྣཀཱལཝསེནཱཏི ཡཐཱཔརིཙྪིནྣེ ཀཱལེ སམྤཏྟེ། རཱུཔཛཱིཝིཏིནྡྲིཡཔཙྩཡཱཏི ཨིནྡྲིཡཔཙྩཡབྷཱུཏཱ ། ཛཱལཱཔཝཏྟཾ ཝིཡ ཨརཱུཔདྷམྨཱ ཏེཛུསྶདབྷཱཝཏོ ཝིསཡོབྷཱསནཏོ ཙ། ཨུདཀཔྤཧཱརོ ཝིཡ ནིརོདྷསམཱཔཏྟིཡཱ པུབྦཱབྷིསངྑཱརོ། པིཧིཏཨངྒཱརཱ ཝིཡ རཱུཔཛཱིཝིཏིནྡྲིཡཾ ཨུསྨཱམཏྟཏཱཡ ཨནོབྷཱསནཏོ ། ཡཐཱཔརིཙྪིནྣཀཱལཱགམནནྟི ཡཐཱཔརིཙྪིནྣཀཱལསྶ ཨུཔགམནཾ། ཨནུརཱུཔཔཏྟིཝསེནེཝ རཱུཔཔཝཏྟིགྒཧཎཾ། ཨིམཾ རཱུཔཀཱཡཾ ཛཧནྟཱིཏི ཨིམསྨཱ རཱུཔཀཱཡཱ ཀལེ༹ཝརཱ ཝིགཙྪནྟི ནཔྤཝཏྟནྟི།

    457. Āyu eva indriyapaccayādivasena sahajātadhammānaṃ anupālanavasena saṅkharaṇato āyusaṅkhāro. Bahuvacananiddeso pana anekasatasahassabhedesu rūpakalāpesu pavattiyā anekabhedanti katvā. Ārammaṇarasaṃ anubhavantīti vedaniyā yathā ‘‘niyyānikā’’ti. Tenāha ‘‘vedanā dhammāvā’’ti. Sukhādibhedabhinnattā bahuvacananiddeso. Imesaṃ āyusaṅkhāravedanānaṃ ekantanirodhaṃ samāpannassa maraṇena bhavitabbaṃ vedanāya niruddhattā. Āyusaṅkhārānaṃ tathā aniruddhattā nirodhassa samāpajjanameva na siyā, kuto vuṭṭhānaṃ. Tena vuttaṃ pāḷiyaṃ ‘‘te ca hāvuso’’tiādi. Vuṭṭhānaṃ paññāyati saññāvedanādīnaṃ uppattiyā. Idāni tamatthaṃ vitthārato upamāya vibhāvetuṃ ‘‘yo hī’’tiādi vuttaṃ. Ukkaṇṭhitvāti nānārammaṇāpātato nibbinditvā. Yathāparicchinnakālavasenāti yathāparicchinne kāle sampatte. Rūpajīvitindriyapaccayāti indriyapaccayabhūtā . Jālāpavattaṃ viya arūpadhammā tejussadabhāvato visayobhāsanato ca. Udakappahāro viya nirodhasamāpattiyā pubbābhisaṅkhāro. Pihitaaṅgārā viya rūpajīvitindriyaṃ usmāmattatāya anobhāsanato . Yathāparicchinnakālāgamananti yathāparicchinnakālassa upagamanaṃ. Anurūpapattivaseneva rūpapavattiggahaṇaṃ. Imaṃ rūpakāyaṃ jahantīti imasmā rūpakāyā kaḷevarā vigacchanti nappavattanti.

    ཀཱཡེན སངྑརཱིཡནྟཱིཏི ཀཱཡསངྑཱརཱ ཏཔྤཊིབདྡྷཝུཏྟིཏཱཡ། ཝཱཙཾ སངྑརོནྟཱིཏི ཝཙཱིསངྑཱརཱ། ཝིཏཀྐེཏྭཱ ཝིཙཱརེཏྭཱ ཧི ཝཱཙཾ བྷིནྡཏི ཀཐེཏི། ཙིཏྟེན སངྑརཱིཡནྟཱིཏི ཙིཏྟསངྑཱརཱ ཏཔྤཊིབདྡྷཝུཏྟིཏོ། ཙིཏྟསངྑཱརནིརོདྷཙོདནཱཡ རཱུཔནིརོདྷོ ཝིཡ ཙིཏྟནིརོདྷོ ཨཙོདིཏོ ཏེསཾ ཏཏོ ཨཉྙཏྟཱཏི ན ཙིཏྟསམྤཡུཏྟནིརོདྷོ ཨེཀནྟིཀོ ཝིཏཀྐཱདིནིརོདྷེ ཏདབྷཱཝཏོ། ཡཾ པན ཝུཏྟཾ ‘‘ཝཱཙཱ ཨནིརུདྡྷཱ ཧོཏཱི’’ཏི, ཏམྤི ན། ཝཱཙཾ སངྑརོནྟཱིཏི ཧི ཝཙཱིསངྑཱརཱ, ཏེསུ ནིརུདྡྷེསུ ཀཐཾ ཝཱཙཱཡ ཨནིརོདྷོ། ཙིཏྟཾ པན ནིརུདྡྷེསུཔི ཙིཏྟསངྑཱརེསུ ཏེཧི ཨནབྷིསངྑཏཏྟཱ ཝིཏཀྐཱདིནིརོདྷོ ཝིཡ པཝཏྟཏིཡེཝཱཏི ཨཡམེཏྠ པརསྶ ཨདྷིཔྤཱཡོ། ཨཱནནྟརིཡཀམྨཾ ཀཏཾ བྷཝེཡྻ, ཙིཏྟསྶ ཨནིརུདྡྷཏྟཱ ཏཾ ནིསྶཱཡ ཙ རཱུཔདྷམྨཱནཾ ཨནཔགཏཏྟཱ ཏེ ཛཱིཝནྟི ཨེཝ ནཱམཱཏི། བྱཉྫནེ ཨབྷིནིཝེསཾ ཨཀཏྭཱཏི ‘‘ཙིཏྟསངྑཱརཱ ནིརུདྡྷཱ’’ཏི ཝཙནཏོ ཏེཝ ནིརུདྡྷཱ, ན ཙིཏྟནྟི ཨེཝཾ ནེཡྻཏྠཾ སུཏྟཾ ‘‘ནཱིཏཏྠ’’ནྟི ཨབྷིནིཝེསཾ ཨཀཏྭཱ། ཨཱཙརིཡཱནཾ ནཡེ ཋཏྭཱཏི པརམྤརཱགཏཱནཾ ཨཱཙརིཡཱནཾ ཨདྷིཔྤཱཡེ ཋཏྭཱཏི ཨཏྠོ། ཨུཔཔརིཀྑིཏབྦོཏི སུཏྟནྟརཱགམཏོ སུཏྟནྟརཔདསྶ ཨཝིཔརཱིཏོ ཨཏྠོ ཝཱིམཾསིཏབྦོ། ཡཐཱ ཧི ‘‘ཨསཉྙབྷཝོ’’ཏི ཝཙནཏོ ‘‘སཉྙཱཝ ཏཏྠ ནཏྠི, ཨིཏརེ པན ཙིཏྟཙེཏསིཀཱ སནྟཱི’’ཏི ཨཡམེཏྠ ཨཏྠོ ན གཡ྄ཧཏི། ཡཐཱ ཙ ‘‘ནེཝསཉྙཱནཱསཉྙཱཡཏན’’ནྟི ཝཙནཏོ ‘‘སཉྙཱཝ ཏཏྠ ཏཱདིསཱི, ན ཕསྶཱདཡོ’’ཏི ཨཡམེཏྠ ཨཏྠོ ན གཡ྄ཧཏི སཉྙཱསཱིསེན དེསནཱཏི ཀཏྭཱ, ཨེཝམིདྷཱཔི ‘‘ཙིཏྟསངྑཱརཱ ནིརུདྡྷཱ’’ཏི, ‘‘སཉྙཱཝེདཡིཏནིརོདྷོ’’ཏི ཙ དེསནཱསཱིསམེཝ། སབྦེཔི པན ཙིཏྟཙེཏསིཀཱ ཏཏྠ ནིརུཛ྄ཛྷནྟེཝཱཏི ཨཡམེཏྠ ཨཝིཔརཱིཏོ ཨཏྠོ ཝེདིཏབྦོ, ཏཐཱཔུབྦཱབྷིསངྑཱརེན སབྦེསཾཡེཝ ཙིཏྟཙེཏསིཀཱནཾ ཏཏྠ ནིརུཛ྄ཛྷནཏོ། ཨེཏེན ཡཾ པུབྦེ ‘‘ཨཉྙཏྟཱ, ཏདབྷཱཝཏོ’’ཏི ཙ ཡུཏྟིཝཙནཾ, ཏདཡུཏྟཾ ཨདྷིཔྤཱཡཱནཝབོདྷཏོཏི དསྶིཏཾ ཧོཏི། ཏེནཱཧ ‘‘ཨཏྠོ ཧི པཊིསརཎཾ, ན བྱཉྫན’’ནྟི།

    Kāyena saṅkharīyantīti kāyasaṅkhārā tappaṭibaddhavuttitāya. Vācaṃ saṅkharontīti vacīsaṅkhārā. Vitakketvā vicāretvā hi vācaṃ bhindati katheti. Cittena saṅkharīyantīti cittasaṅkhārā tappaṭibaddhavuttito. Cittasaṅkhāranirodhacodanāya rūpanirodho viya cittanirodho acodito tesaṃ tato aññattāti na cittasampayuttanirodho ekantiko vitakkādinirodhe tadabhāvato. Yaṃ pana vuttaṃ ‘‘vācā aniruddhā hotī’’ti, tampi na. Vācaṃ saṅkharontīti hi vacīsaṅkhārā, tesu niruddhesu kathaṃ vācāya anirodho. Cittaṃ pana niruddhesupi cittasaṅkhāresu tehi anabhisaṅkhatattā vitakkādinirodho viya pavattatiyevāti ayamettha parassa adhippāyo. Ānantariyakammaṃ kataṃ bhaveyya, cittassa aniruddhattā taṃ nissāya ca rūpadhammānaṃ anapagatattā te jīvanti eva nāmāti. Byañjane abhinivesaṃ akatvāti ‘‘cittasaṅkhārā niruddhā’’ti vacanato teva niruddhā, na cittanti evaṃ neyyatthaṃ suttaṃ ‘‘nītattha’’nti abhinivesaṃ akatvā. Ācariyānaṃ naye ṭhatvāti paramparāgatānaṃ ācariyānaṃ adhippāye ṭhatvāti attho. Upaparikkhitabboti suttantarāgamato suttantarapadassa aviparīto attho vīmaṃsitabbo. Yathā hi ‘‘asaññabhavo’’ti vacanato ‘‘saññāva tattha natthi, itare pana cittacetasikā santī’’ti ayamettha attho na gayhati. Yathā ca ‘‘nevasaññānāsaññāyatana’’nti vacanato ‘‘saññāva tattha tādisī, na phassādayo’’ti ayamettha attho na gayhati saññāsīsena desanāti katvā, evamidhāpi ‘‘cittasaṅkhārā niruddhā’’ti, ‘‘saññāvedayitanirodho’’ti ca desanāsīsameva. Sabbepi pana cittacetasikā tattha nirujjhantevāti ayamettha aviparīto attho veditabbo, tathāpubbābhisaṅkhārena sabbesaṃyeva cittacetasikānaṃ tattha nirujjhanato. Etena yaṃ pubbe ‘‘aññattā, tadabhāvato’’ti ca yuttivacanaṃ, tadayuttaṃ adhippāyānavabodhatoti dassitaṃ hoti. Tenāha ‘‘attho hi paṭisaraṇaṃ, na byañjana’’nti.

    ཨུཔཧཏཱནཱིཏི བཱདྷིཏཱནི། མཀྑིཏཱནཱིཏི དྷཾསིཏཱནི། ཨཱརམྨཎགྷཊྚནཱཡ ཨིནྡྲིཡཱནཾ ཀིལམཐོ ཙཀྑུནཱ བྷཱསུརརཱུཔསུཁུམརཛདསྶནེན ཝིབྷཱཝེཏབྦོ། ཏཐཱ ཧི ཨུཎྷཀཱལེ པུརཏོ ཨགྒིམྷི ཛལནྟེ ཁརསྶརེ ཙ པཎཝེ ཨཱཀོཊིཏེ ཨཀྑཱིནི བྷེདཱནི ཝིཡ ན སཧནྟི སོཏཱནི ‘‘སིཁརེན ཝིཡ ཨབྷིཧཉྙནྟཱི’’ཏི ཝཏྟཱརོ ཧོནྟི།

    Upahatānīti bādhitāni. Makkhitānīti dhaṃsitāni. Ārammaṇaghaṭṭanāya indriyānaṃ kilamatho cakkhunā bhāsurarūpasukhumarajadassanena vibhāvetabbo. Tathā hi uṇhakāle purato aggimhi jalante kharassare ca paṇave ākoṭite akkhīni bhedāni viya na sahanti sotāni ‘‘sikharena viya abhihaññantī’’ti vattāro honti.

    ༤༥༨. རཱུཔཱཝཙརཙཏུཏྠཛ྄ཛྷཱནམེཝ རཱུཔཝིརཱགབྷཱཝནཱཝསེན པཝཏྟཾ ཨརཱུཔཛ྄ཛྷཱནནྟི ནེཝསཉྙཱནཱསཉྙཱཡཏནཾ ཝིསྶཛྫེནྟོ དྷམྨསེནཱཔཏི ‘‘སུཁསྶ ཙ པཧཱནཱ’’ཏིཨཱདིནཱ ཝིསྶཛྫེསི། ཨཔགམནེན ཝིགམེན པཙྩཡཱ ཨཔགམནཔཙྩཡཱ སུཁཱདིཔྤཧཱནཱནི། ཨདྷིགམཔཙྩཡཱ པན ཀསིཎེསུ རཱུཔཱཝཙརཙཏུཏྠཛ྄ཛྷཱནཾ ཧེཊྛིམཱ ཏཡོ ཙ ཨཱརུཔྤཱ། ན ཧི སཀྐཱ ཏཱནི ཨནདྷིགནྟྭཱ ནེཝསཉྙཱནཱསཉྙཱཡཏནམདྷིགནྟུཾ། ནིརོདྷཏོ ཝུཊྛཱནཀཕལསམཱཔཏྟིནྟི ནིརོདྷཏོ ཝུཊྛཱནབྷཱུཏཾ ཨནིཙྩཱནུཔསྶནཱསམུདཱགཏཕལསམཱཔཏྟིཾ། སཱ ཧི ‘‘ཨནིམིཏྟཱ ཙེཏོཝིམུཏྟཱི’’ཏི ཝུཙྩཏི། ཡཐཱ སམཐནིསྶནྡོ ཨབྷིཉྙཱ, མེཏྟཱཀརུཎཱམུདིཏཱབྲཧྨཝིཧཱརནིསྶནྡོ ཨུཔེཀྑཱབྲཧྨཝིཧཱརོ, ཀསིཎནིསྶནྡོ ཨཱརུཔྤཱ, སམཐཝིཔསྶནཱནིསྶནྡོ ནིརོདྷསམཱཔཏྟི, ཨེཝཾ ཝིཔསྶནཱཡ ནིསྶནྡཕལབྷཱུཏཾ སཱམཉྙཕལནྟི ཨཱཧ ‘‘ཝིཔསྶནཱནིསྶནྡཱཡ ཕལསམཱཔཏྟིཡཱ’’ཏི། ཨཱརམྨཎཱ ནཱམ སཱརམྨཎདྷམྨཱནཾ ཝིསེསཏོ ཨུཔྤཏྟིནིམིཏྟནྟི ཨཱཧ ‘‘སབྦནིམིཏྟཱནནྟི རཱུཔཱདཱིནཾ སབྦཱརམྨཎཱན’’ནྟི། ནཏྠི ཨེཏྠ ཀིཉྩི སངྑཱརནིམིཏྟནྟི ཨནིམིཏྟཱ, ཨསངྑཏཱ དྷཱཏཱུཏི ཨཱཧ ‘‘སབྦནིམིཏྟཱཔགཏཱཡ ནིབྦཱནདྷཱཏུཡཱ’’ཏི། ཕལསམཱཔཏྟིསཧཛཱཏཾ མནསིཀཱརཾ སནྡྷཱཡཱཧ, ན ཨཱཝཛྫནམནསིཀཱརཾ། ན ཧེཏྠ ཏསྶ སམྦྷཝོ ཨནུལོམཱནནྟརཾ ཨུཔྤཛྫནཏོ།

    458. Rūpāvacaracatutthajjhānameva rūpavirāgabhāvanāvasena pavattaṃ arūpajjhānanti nevasaññānāsaññāyatanaṃ vissajjento dhammasenāpati ‘‘sukhassa ca pahānā’’tiādinā vissajjesi. Apagamanena vigamena paccayā apagamanapaccayā sukhādippahānāni. Adhigamapaccayā pana kasiṇesu rūpāvacaracatutthajjhānaṃ heṭṭhimā tayo ca āruppā. Na hi sakkā tāni anadhigantvā nevasaññānāsaññāyatanamadhigantuṃ. Nirodhato vuṭṭhānakaphalasamāpattinti nirodhato vuṭṭhānabhūtaṃ aniccānupassanāsamudāgataphalasamāpattiṃ. Sā hi ‘‘animittā cetovimuttī’’ti vuccati. Yathā samathanissando abhiññā, mettākaruṇāmuditābrahmavihāranissando upekkhābrahmavihāro, kasiṇanissando āruppā, samathavipassanānissando nirodhasamāpatti, evaṃ vipassanāya nissandaphalabhūtaṃ sāmaññaphalanti āha ‘‘vipassanānissandāya phalasamāpattiyā’’ti. Ārammaṇā nāma sārammaṇadhammānaṃ visesato uppattinimittanti āha ‘‘sabbanimittānanti rūpādīnaṃ sabbārammaṇāna’’nti. Natthi ettha kiñci saṅkhāranimittanti animittā, asaṅkhatā dhātūti āha ‘‘sabbanimittāpagatāya nibbānadhātuyā’’ti. Phalasamāpattisahajātaṃ manasikāraṃ sandhāyāha, na āvajjanamanasikāraṃ. Na hettha tassa sambhavo anulomānantaraṃ uppajjanato.

    ཨིམསྨིཾ ཋཱནེཏི ཨིདྷ ཝུཏྟནིརོདྷསྶ ཨཱདིམཛ྄ཛྷཔརིཡོསཱནཱནཾ གཧིཏཱནཾ ཨིམསྨིཾ པརིཡོསཱནསྶ གཧིཏཊྛཱནེ། དྭཱིཧི བལེཧཱིཏི སམཐཝིཔསྶནཱབལེཧི། ཏཡོ ཙ སངྑཱརཱནནྟི ཀཱཡསངྑཱརཱདཱིནཾ ཏིཎྞཾ སངྑཱརཱནཾ། སོལ༹སཧི ཉཱཎཙརིཡཱཧཱིཏི ཨནིཙྩཱནུཔསྶནཱ, དུཀྑཱ, ཨནཏྟཱ, ནིབྦིདཱ, ཝིརཱགཱ, ནིརོདྷཱ, པཊིནིསྶགྒཱ, ཝིཝཊྚཱནུཔསྶནཱ, སོཏཱཔཏྟིམགྒོ…པེ॰… ཨརཧཏྟཕལསམཱཔཏྟཱིཏི ཨིམཱཧི སོལ༹སཧི ཉཱཎཙརིཡཱཧི། ནཝཧི སམཱདྷིཙརིཡཱཧཱིཏི པཋམཛ྄ཛྷཱནསམཱདྷིཨཱདཱིཧི ནཝཧི སམཱདྷིཙརིཡཱཧི། ཡོ ཡཐཱཝུཏྟཱསུ ཙརིཡཱསུ པུགྒལསྶ ཝསཱིབྷཱཝོ, སཱ ཝསཱིབྷཱཝཏཱཔཉྙཱ། ཨསྶཱ སཱ ཀཐིཏཱཏི ཡོཛནཱ། ཝིནིཙྪཡཀཐཱཏི ཝིནིཙྪཡཝསེན པཝཏྟཱ ཨཊྛཀཐཱ ཀཐིཏཱ། ཏསྨཱ ཝིསུདྡྷིམགྒེ (ཝིསུདྡྷི॰ ༢.༨༦༨-༨༦༩) ཏཾསཾཝཎྞནཱཡཉྩ (ཝིསུདྡྷི॰ མཧཱཊཱི॰ ༢.༨༦༨) ཝུཏྟནཡེན ཝེདིཏབྦཱ།

    Imasmiṃ ṭhāneti idha vuttanirodhassa ādimajjhapariyosānānaṃ gahitānaṃ imasmiṃ pariyosānassa gahitaṭṭhāne. Dvīhi balehīti samathavipassanābalehi. Tayo ca saṅkhārānanti kāyasaṅkhārādīnaṃ tiṇṇaṃ saṅkhārānaṃ. Soḷasahi ñāṇacariyāhīti aniccānupassanā, dukkhā, anattā, nibbidā, virāgā, nirodhā, paṭinissaggā, vivaṭṭānupassanā, sotāpattimaggo…pe… arahattaphalasamāpattīti imāhi soḷasahi ñāṇacariyāhi. Navahi samādhicariyāhīti paṭhamajjhānasamādhiādīhi navahi samādhicariyāhi. Yo yathāvuttāsu cariyāsu puggalassa vasībhāvo, sā vasībhāvatāpaññā. Assā sā kathitāti yojanā. Vinicchayakathāti vinicchayavasena pavattā aṭṭhakathā kathitā. Tasmā visuddhimagge (visuddhi. 2.868-869) taṃsaṃvaṇṇanāyañca (visuddhi. mahāṭī. 2.868) vuttanayena veditabbā.

    ཝལཉྫནསམཱཔཏྟི ཨརིཡཝིཧཱརཝསེན ཝིཧརཎསམཱཔཏྟི། ཋིཏིཡཱཏི ཨེཏྠ པབནྡྷཊྛིཏི ཨདྷིཔྤེཏཱ, ན ཁཎཊྛིཏི། ཀསྨཱ? སམཱཔཛྫནཏྟཱ། ཏེནཱཧ ‘‘ཋིཏིཡཱཏི ཙིརཊྛིཏཏྠ’’ནྟི། ཨདྡྷཱནཔརིཙྪེདོཏི ཨེཏྟཀཾ ཀཱལཾ སམཱཔཏྟིཡཱ ཝཱིཏིནཱམེསྶཱམཱིཏི པགེཝ ཀཱལཔརིཙྪེདོ། རཱུཔཱདིནིམིཏྟཝསེནཱཏི ཀམྨཀམྨནིམིཏྟགཏིནིམིཏྟེསུ ཡཐཱརཧཾ ལབྦྷམཱནརཱུཔཱདིནིམིཏྟཝསེན། ཏཏྠ ཡསྨཱ ཀམྨནིམིཏྟེ ཚབྦིདྷམྤི ཨཱརམྨཎཾ ལབྦྷཏི, ཏསྨཱ ‘‘སབྦནིམིཏྟཱན’’ནྟི ཝུཏྟཾ, ན སབྦེསཾ ཨཱརམྨཎཱནཾ ཨེཀཛ྄ཛྷཾ, ཨེཀནྟཏོ ཝཱ མནསིཀཱཏབྦཏོ། ལཀྑཎཝཙནཉྷེཏཾ ཡཐཱ ‘‘དཱཏབྦམེཏཾ བྷེསཛྫཾ, ཡདི མེ བྱཱདྷིཏཱ སིཡུ’’ནྟི།

    Valañjanasamāpatti ariyavihāravasena viharaṇasamāpatti. Ṭhitiyāti ettha pabandhaṭṭhiti adhippetā, na khaṇaṭṭhiti. Kasmā? Samāpajjanattā. Tenāha ‘‘ṭhitiyāti ciraṭṭhitattha’’nti. Addhānaparicchedoti ettakaṃ kālaṃ samāpattiyā vītināmessāmīti pageva kālaparicchedo. Rūpādinimittavasenāti kammakammanimittagatinimittesu yathārahaṃ labbhamānarūpādinimittavasena. Tattha yasmā kammanimitte chabbidhampi ārammaṇaṃ labbhati, tasmā ‘‘sabbanimittāna’’nti vuttaṃ, na sabbesaṃ ārammaṇānaṃ ekajjhaṃ, ekantato vā manasikātabbato. Lakkhaṇavacanañhetaṃ yathā ‘‘dātabbametaṃ bhesajjaṃ, yadi me byādhitā siyu’’nti.

    ༤༥༩. ནཱིལམྤི སཉྫཱནཱཏཱིཏིཨཱདིནཱ ནཱིལཱདིགྒཧཎམུཁེན ཏཾཝཎྞཱནཾ སཏྟཱནཾ སཉྫཱནནཾ ཨཝེརཱདིབྷཱཝམནསིཀརཎཾ ཛོཏིཏནྟི ཨཱཧ ‘‘ཨེཏསྨིཉྷི ཋཱནེ ཨཔྤམཱཎཱ ཙེཏོཝིམུཏྟི ཀཐིཏཱ’’ཏི། ཨེཏྠ ཨཱཀིཉྩཉྙཾ ཀཐིཏནྟི སམྦནྡྷོ། ‘‘ཨེཏྠ སུཉྙཏཱ’’ཏི, ‘‘ཨེཏྠ ཨནིམིཏྟཱ’’ཏི ཨེཏྠཱཔི ཨེསེཝ ནཡོ། ནྟི ‘‘ཨིདྷ ཨཉྙཾ ཨབྷིནཝཾ ནཱམ ནཏྠཱི’’ཏིཨཱདིནཱ ཝུཏྟཾ ཨཏྠཝཙནཾ། ཨེཏཱཏི ཨཔྤམཱཎཙེཏོཝིམུཏྟིཨཱདཡོ། ཨེཀནཱམཀཱཏི ཨེཀེཀནཱམཀཱ, ཡེ ནཱནཱབྱཉྫནཱཏི ཨདྷིཔྤེཏཱ། ཨེཀོ དྷམྨོཏི ཨརཧཏྟཕལསམཱཔཏྟི། ཙཏུནཱམཀོཏི ཨཔྤམཱཎཙེཏོཝིམུཏྟིཨཱདིནཱམཀོ། ཨེཏནྟི ཨེཏམཏྠཾ། ཨཔྤམཱཎཱཏི ཨནོདྷིསོ, ཨོདྷིསོཔི ཝཱ ‘‘ཨེཏྟཀཱ’’ཏི ཨཔརིམིཏཱ། ཨསེསེཏྭཱཏི ཨསུབྷསམཱཔཏྟི ཝིཡ ཨེཀསྶེཝ ཨགྒཧཎཏོ།

    459.Nīlampi sañjānātītiādinā nīlādiggahaṇamukhena taṃvaṇṇānaṃ sattānaṃ sañjānanaṃ averādibhāvamanasikaraṇaṃ jotitanti āha ‘‘etasmiñhi ṭhāne appamāṇā cetovimutti kathitā’’ti. Ettha ākiñcaññaṃ kathitanti sambandho. ‘‘Ettha suññatā’’ti, ‘‘ettha animittā’’ti etthāpi eseva nayo. Nti ‘‘idha aññaṃ abhinavaṃ nāma natthī’’tiādinā vuttaṃ atthavacanaṃ. Etāti appamāṇacetovimuttiādayo. Ekanāmakāti ekekanāmakā, ye nānābyañjanāti adhippetā. Eko dhammoti arahattaphalasamāpatti. Catunāmakoti appamāṇacetovimuttiādināmako. Etanti etamatthaṃ. Appamāṇāti anodhiso, odhisopi vā ‘‘ettakā’’ti aparimitā. Asesetvāti asubhasamāpatti viya ekasseva aggahaṇato.

    ཀིཉྩཱཔི ཨསུབྷནིམིཏྟཱརམྨཎམྤི ཀིཉྩནཾ ཧོཏི, ཨཱརམྨཎསངྒྷཊྚནསྶ ཀིཉྩནསྶ ཨསུབྷསམཱཔཏྟཱིནམྤི པཊིབྷཱགནིམིཏྟསངྑཱཏཾ ཨཱརམྨཎཾ སབིམྦཾ ཝིཡ ཝིགྒཧཾ ཀིཉྩནཾ ཧུཏྭཱ ཨུཔཊྛཱཏི, ན ཏཐཱ ཨིམསྶཱཏི། ནནུ བྲཧྨཝིཧཱརཔཋམཱརུཔྤཱནམྤི པཊིབྷཱགནིམིཏྟབྷཱུཏཾ ཀིཉྩི ཨཱརམྨཎཾ ནཏྠཱིཏི? སཙྩཾ ནཏྠི, ཨཡཾ པན པཋམཱརུཔྤཝིཉྙཱཎཾ ཝིཡ ན པཊིབྷཱགནིམིཏྟབྷཱུཏཨཱརམྨཎཏཱཡ ཨེཝཾ ཝུཏྟཱ། ཨཏྟེནཱཏི ཨཏྟནཱ། བྷཝཏི ཨེཏེན ཨཏྟཱཏི ཨབྷིདྷཱནཾ བུདྡྷི ཙཱཏི བྷཱཝོ, ཨཏྟཱ། བྷཱཝ-སདྡོཔི ཨཏྟཔརིཡཱཡོཏི ཨཱཧ ‘‘བྷཱཝཔོསཔུགྒལཱདིསངྑཱཏེནཱ’’ཏི། ནེསཾ ཨཔྤམཱཎསམཱདྷིཨཱདཱིནཾ ཙཏུནྣཾ། ‘‘ནཱནཏཱ པཱཀཊཱཝཱ’’ཏི ཝུཏྟཾ ནཱནཏྟཾ བྷཱུམིཏོ ཨཱརམྨཎཏོ ཙ དསྶེཏུཾ ‘‘ཨཏྠོ པནཱ’’ཏིཨཱདི ཝུཏྟཾ། པརིཏྟཱདིབྷཱཝེན ཨཏཱིཏཱདིབྷཱཝེན ཨཛ྄ཛྷཏྟཱདིབྷཱཝེན ཙ ན ཝཏྟབྦཾ ཨཱརམྨཎཾ ཨེཏིསྶཱཏི ནཝཏྟབྦཱརམྨཎཱ ནིབྦཱནཱརམྨཎཕལསམཱཔཏྟིབྷཱཝཏོ།

    Kiñcāpi asubhanimittārammaṇampi kiñcanaṃ hoti, ārammaṇasaṅghaṭṭanassa kiñcanassa asubhasamāpattīnampi paṭibhāganimittasaṅkhātaṃ ārammaṇaṃ sabimbaṃ viya viggahaṃ kiñcanaṃ hutvā upaṭṭhāti, na tathā imassāti. Nanu brahmavihārapaṭhamāruppānampi paṭibhāganimittabhūtaṃ kiñci ārammaṇaṃ natthīti? Saccaṃ natthi, ayaṃ pana paṭhamāruppaviññāṇaṃ viya na paṭibhāganimittabhūtaārammaṇatāya evaṃ vuttā. Attenāti attanā. Bhavati etena attāti abhidhānaṃ buddhi cāti bhāvo, attā. Bhāva-saddopi attapariyāyoti āha ‘‘bhāvaposapuggalādisaṅkhātenā’’ti. Nesaṃ appamāṇasamādhiādīnaṃ catunnaṃ. ‘‘Nānatā pākaṭāvā’’ti vuttaṃ nānattaṃ bhūmito ārammaṇato ca dassetuṃ ‘‘attho panā’’tiādi vuttaṃ. Parittādibhāvena atītādibhāvena ajjhattādibhāvena ca na vattabbaṃ ārammaṇaṃ etissāti navattabbārammaṇā nibbānārammaṇaphalasamāpattibhāvato.

    ཨེཏྟཀོཏི རཱགཱདཱིཧི སཾཀིལིཊྛཏཱཡ ཨེཏྟཀཔྤམཱཎོ, ཨུཏྟཱནོ པརིཏྟཙེཏསོཏི ཨཏྠོ། ནིབྦཱནམྤི ཨཔྤམཱཎམེཝ པམཱཎཀརཎཱནཾ ཨབྷཱཝེནཱཏི ཨཱནེཏྭཱ སམྦནྡྷོ། ཨཀུཔྤཱཏི ཨརཧཏྟཕལཙེཏོཝིམུཏྟི པཊིཔཀྑེཧི ཨཀོཔནཱིཡཏཱཡ། ཀིཉྩཏཱིཏི ཀཏྟརི པཋིཏོ དྷཱཏུ མདྡནཏྠོཏི ཨཱཧ ‘‘ཀིཉྩཏི མདྡཏཱི’’ཏི། ཏསྶ པཡོགཾ དསྶེཏུཾ ‘‘མནུསྶཱ ཀིརཱ’’ཏིཨཱདི ཝུཏྟཾ།

    Ettakoti rāgādīhi saṃkiliṭṭhatāya ettakappamāṇo, uttāno parittacetasoti attho. Nibbānampi appamāṇameva pamāṇakaraṇānaṃ abhāvenāti ānetvā sambandho. Akuppāti arahattaphalacetovimutti paṭipakkhehi akopanīyatāya. Kiñcatīti kattari paṭhito dhātu maddanatthoti āha ‘‘kiñcati maddatī’’ti. Tassa payogaṃ dassetuṃ ‘‘manussā kirā’’tiādi vuttaṃ.

    སམཱུཧཱདིགྷནཝསེན སཀིཙྩཔརིཙྪེདཏཱཡ ཙ སཝིགྒཧཱ ཝིཡ ཨུཔཊྛིཏཱ སངྑཱརཱ ནིཙྩཱདིགྒཱཧསྶ ཝཏྠུཏཱཡ ‘‘ནིཙྩནིམིཏྟཾ སུཁཱདིནིམིཏྟ’’ནྟི ཙ ཝུཙྩཏི། ཝིཔསྶནཱ པན ཏཏྠ གྷནཝིནིབྦྷོགཾ ཀརོནྟཱི ནིཙྩཱདིགྒཱཧཾ ཝིདྷམེནྟཱི ‘‘ནིམིཏྟཾ སམུགྒྷཱཏེཏཱི’’ཏི ཝུཏྟཱ གྷནནིམིཏྟསྶ ཨཱརམྨཎབྷཱུཏསྶ ཨབྷཱཝཱ། ན གཧིཏཱཏི ཨེཀཏྠཔདནིདྡེསེ པཱལི༹ཡཾ ཀསྨཱ ན གཧིཏཱ? སཱཏི སུཉྙཏཱ ཙེཏོཝིམུཏྟི། སབྦཏྠཱཏི ཨཔྤམཱཎཱཙེཏོཝིམུཏྟིཨཱདིནིདྡེསེསུ། ཨཱརམྨཎཝསེནཱཏི ཨཱརམྨཎཝསེནཔི ཨེཀཏྠཱ, ན ཀེཝལཾ སབྷཱཝསརསཏོཝ། ཨིམིནཱ པརིཡཱཡེནཱཏི ཨཔྤམཱཎཏོཏིཨཱདིནཱ ཨཱརམྨཎཏོ ལདྡྷཔརིཡཱཡེན། ཨཉྙསྨིཾ པན ཋཱནེཏི ཨཱཀིཉྩཉྙཱདིསདྡཔཝཏྟིཧེཏུཏོ ཨཉྙེན ཧེཏུནཱ ཨཔྤམཱཎཱཏིསདྡཔྤཝཏྟིཡཾ ཨེཏསྶ ཙེཏོཝིམུཏྟིཡཱ ཧོནྟི། ཨེས ནཡོ སེསེསུཔི། ཨིམིནཱ པརིཡཱཡེནཱཏི ཨིམིནཱ ཏཱཡ ཏཱཡ སམཉྙཱཡ ཝོཧརིཏབྦཏཱཔརིཡཱཡེན། སཙྩཱནཾ དསྶནམུཁེན ཝཊྚཝསེན ཨུཊྛིཏདེསནཾ ཨརཧཏྟེན ཀཱུཊཾ གཎྷནྟོ ཡཐཱནུསནྡྷིནཱཝ དེསནཾ ནིཊྛཔེསི། ཡཾ པནེཏྠ ཨཏྠཏོ ཨཝིབྷཏྟཾ, ཏཾ སུཝིཉྙེཡྻམེཝ།

    Samūhādighanavasena sakiccaparicchedatāya ca saviggahā viya upaṭṭhitā saṅkhārā niccādiggāhassa vatthutāya ‘‘niccanimittaṃ sukhādinimitta’’nti ca vuccati. Vipassanā pana tattha ghanavinibbhogaṃ karontī niccādiggāhaṃ vidhamentī ‘‘nimittaṃ samugghātetī’’ti vuttā ghananimittassa ārammaṇabhūtassa abhāvā. Na gahitāti ekatthapadaniddese pāḷiyaṃ kasmā na gahitā? Sāti suññatā cetovimutti. Sabbatthāti appamāṇācetovimuttiādiniddesesu. Ārammaṇavasenāti ārammaṇavasenapi ekatthā, na kevalaṃ sabhāvasarasatova. Iminā pariyāyenāti appamāṇatotiādinā ārammaṇato laddhapariyāyena. Aññasmiṃ pana ṭhāneti ākiñcaññādisaddapavattihetuto aññena hetunā appamāṇātisaddappavattiyaṃ etassa cetovimuttiyā honti. Esa nayo sesesupi. Iminā pariyāyenāti iminā tāya tāya samaññāya voharitabbatāpariyāyena. Saccānaṃ dassanamukhena vaṭṭavasena uṭṭhitadesanaṃ arahattena kūṭaṃ gaṇhanto yathānusandhināva desanaṃ niṭṭhapesi. Yaṃ panettha atthato avibhattaṃ, taṃ suviññeyyameva.

    མཧཱཝེདལླསུཏྟཝཎྞནཱཡ ལཱིནཏྠཔྤཀཱསནཱ སམཏྟཱ།

    Mahāvedallasuttavaṇṇanāya līnatthappakāsanā samattā.




    Next: ༤. ཙཱུལ༹ཝེདལླསུཏྟཝཎྞནཱ • 4. Cūḷavedallasuttavaṇṇanā




    Related texts:



    ཏིཔིཊཀ (མཱུལ) • Tipiṭaka (Mūla) / སུཏྟཔིཊཀ • Suttapiṭaka / མཛྫྷིམནིཀཱཡ • Majjhimanikāya / ༣. མཧཱཝེདལླསུཏྟཾ • 3. Mahāvedallasuttaṃ

    ཨཊྛཀཐཱ • Aṭṭhakathā / སུཏྟཔིཊཀ (ཨཊྛཀཐཱ) • Suttapiṭaka (aṭṭhakathā) / མཛྫྷིམནིཀཱཡ (ཨཊྛཀཐཱ) • Majjhimanikāya (aṭṭhakathā) / ༣. མཧཱཝེདལླསུཏྟཝཎྞནཱ • 3. Mahāvedallasuttavaṇṇanā


    © 1991-2023 The Titi Tudorancea Bulletin | Titi Tudorancea® is a Registered Trademark | Terms of use and privacy policy
    Contact