| Library / Tipiṭaka / তিপিটক • Tipiṭaka / ৰিনযৰিনিচ্ছয-টীকা • Vinayavinicchaya-ṭīkā |
মহাৰিভঙ্গসঙ্গহকথাৰণ্ণনা
Mahāvibhaṅgasaṅgahakathāvaṇṇanā
৪. এৰং সোতুজনং সৰনে নিযোজেত্ৰা যথাপটিঞ্ঞাতং উত্তরৰিনিচ্ছযং দস্সেতুমাহ ‘‘মেথুন’’ন্তিআদি। ‘‘কতি আপত্তিযো’’তি অযং দিট্ঠসংসন্দনা, অদিট্ঠজোতনা, ৰিমতিচ্ছেদনা, অনুমতি, কথেতুকম্যতাপুচ্ছাতি পঞ্চন্নং পুচ্ছানং কথেতুকম্যতাপুচ্ছা। তিস্সো আপত্তিযো ফুসেতি তস্সা সঙ্খেপতো ৰিস্সজ্জনং।
4. Evaṃ sotujanaṃ savane niyojetvā yathāpaṭiññātaṃ uttaravinicchayaṃ dassetumāha ‘‘methuna’’ntiādi. ‘‘Kati āpattiyo’’ti ayaṃ diṭṭhasaṃsandanā, adiṭṭhajotanā, vimaticchedanā, anumati, kathetukamyatāpucchāti pañcannaṃ pucchānaṃ kathetukamyatāpucchā. Tisso āpattiyo phuseti tassā saṅkhepato vissajjanaṃ.
৫. এৰং গণনাৰসেন দস্সিতানং ‘‘ভৰে’’তিআদি সরূপতো দস্সনং। খেত্তেতি তিণ্ণং মগ্গানং অঞ্ঞতরস্মিং অল্লোকাসে তিলবীজমত্তেপি পদেসে। মেথুনং পটিসেৰন্তস্স পারাজিকং ভৰেতি সম্বন্ধো। ‘‘থুল্লচ্চয’’ন্তি ৰুত্তন্তি যোজনা। ‘‘যেভুয্যক্খাযিতে’’তি ইদং নিদস্সনমত্তং, উপড্ঢক্খাযিতেপি থুল্লচ্চযস্স হেট্ঠা ৰুত্তত্তা। ৰট্টকতে মুখে অফুসন্তং অঙ্গজাতং পৰেসেন্তস্স দুক্কটং ৰুত্তন্তি যোজনা।
5. Evaṃ gaṇanāvasena dassitānaṃ ‘‘bhave’’tiādi sarūpato dassanaṃ. Khetteti tiṇṇaṃ maggānaṃ aññatarasmiṃ allokāse tilabījamattepi padese. Methunaṃ paṭisevantassa pārājikaṃ bhaveti sambandho. ‘‘Thullaccaya’’nti vuttanti yojanā. ‘‘Yebhuyyakkhāyite’’ti idaṃ nidassanamattaṃ, upaḍḍhakkhāyitepi thullaccayassa heṭṭhā vuttattā. Vaṭṭakate mukhe aphusantaṃ aṅgajātaṃ pavesentassa dukkaṭaṃ vuttanti yojanā.
৬. ‘‘অদিন্নং আদিযন্তো’’তিআদযোপি ৰুত্তনযাযেৰ।
6.‘‘Adinnaṃādiyanto’’tiādayopi vuttanayāyeva.
৭. পঞ্চমাসগ্ঘনে ৰাপীতি পোরাণকস্স নীলকহাপণস্স চতুত্থভাগসঙ্খাতে পঞ্চমাসে, তদগ্ঘনকে ৰা। অধিকে ৰাতি অতিরেকপঞ্চমাসকে ৰা তদগ্ঘনকে ৰা। অদিন্নে পঞ্চৰীসতিযা অৰহারানং অঞ্ঞতরেন অৰহটে পরাজযো হোতীতি অত্থো। মাসে ৰা ঊনমাসে ৰা তদগ্ঘনকে ৰা দুক্কটং। ততো মজ্ঝেতি পঞ্চমাসকতো মজ্ঝে। পঞ্চ মাসা সমাহটা, পঞ্চন্নং মাসানং সমাহারোতি ৰা পঞ্চমাসং, পঞ্চমাসং অগ্ঘতীতি পঞ্চমাসগ্ঘনং, পঞ্চমাসঞ্চ পঞ্চমাসগ্ঘনঞ্চ পঞ্চমাসগ্ঘনং, একদেসসরূপেকসেসোযং, তস্মিং। মাসে ৰাতি এত্থাপি মাসো চ মাসগ্ঘনকঞ্চ মাসমাসগ্ঘনকোতি ৰত্তব্বে ‘‘মাসে’’তি একদেসসরূপেকসেসো, উত্তরপদলোপো চ দট্ঠব্বো।
7.Pañcamāsagghane vāpīti porāṇakassa nīlakahāpaṇassa catutthabhāgasaṅkhāte pañcamāse, tadagghanake vā. Adhike vāti atirekapañcamāsake vā tadagghanake vā. Adinne pañcavīsatiyā avahārānaṃ aññatarena avahaṭe parājayo hotīti attho. Māse vā ūnamāse vā tadagghanake vā dukkaṭaṃ. Tato majjheti pañcamāsakato majjhe. Pañca māsā samāhaṭā, pañcannaṃ māsānaṃ samāhāroti vā pañcamāsaṃ, pañcamāsaṃ agghatīti pañcamāsagghanaṃ, pañcamāsañca pañcamāsagghanañca pañcamāsagghanaṃ, ekadesasarūpekasesoyaṃ, tasmiṃ. Māse vāti etthāpi māso ca māsagghanakañca māsamāsagghanakoti vattabbe ‘‘māse’’ti ekadesasarūpekaseso, uttarapadalopo ca daṭṭhabbo.
‘‘পঞ্চমাসগ্ঘনে’’তি সামঞ্ঞেন ৰুত্তেপি পোরাণকস্স নীলকহাপণস্সেৰ চতুত্থভাগৰসেন পঞ্চমাসনিযমো কাতব্বো। তথা হি ভগৰতা দুতিযপারাজিকং পঞ্ঞাপেন্তেন ভিক্খূসু পব্বজিতং পুরাণৰোহারিকমহামত্তং ভিক্খুং ‘‘কিত্তকেন ৰত্থুনা রাজা মাগধো সেনিযো বিম্বিসারো চোরং গহেত্ৰা হনতি ৰা বন্ধতি ৰা পব্বাজেতি ৰা’’তি পুচ্ছিত্ৰা তেন ‘‘পাদেন ৰা পাদারহেন ৰা’’তি ৰুত্তে তেনেৰ পমাণেন অদিন্নং আদিযন্তস্স পঞ্ঞত্তং। অট্ঠকথাযঞ্চ –
‘‘Pañcamāsagghane’’ti sāmaññena vuttepi porāṇakassa nīlakahāpaṇasseva catutthabhāgavasena pañcamāsaniyamo kātabbo. Tathā hi bhagavatā dutiyapārājikaṃ paññāpentena bhikkhūsu pabbajitaṃ purāṇavohārikamahāmattaṃ bhikkhuṃ ‘‘kittakena vatthunā rājā māgadho seniyo bimbisāro coraṃ gahetvā hanati vā bandhati vā pabbājeti vā’’ti pucchitvā tena ‘‘pādena vā pādārahena vā’’ti vutte teneva pamāṇena adinnaṃ ādiyantassa paññattaṃ. Aṭṭhakathāyañca –
‘‘পঞ্চমাসকো পাদোতি পাল়িং উল্লিঙ্গিত্ৰা ‘তদা রাজগহে ৰীসতিমাসকো কহাপণো হোতি, তস্মা পঞ্চমাসকো পাদো’। এতেন লক্খণেন সব্বজনপদেসু কহাপণস্স চতুত্থো ভাগো ‘পাদো’তি ৰেদিতব্বো। সো চ খো পোরাণকস্স নীলকহাপণস্স ৰসেন, ন ইতরেসং দুদ্রদামকাদীনং। তেন হি পাদেন অতীতা বুদ্ধাপি পারাজিকং পঞ্ঞপেসুং, অনাগতাপি পঞ্ঞপেস্সন্তি। সব্ববুদ্ধানঞ্হি পারাজিকৰত্থুম্হি ৰা পারাজিকে ৰা নানত্তং নত্থি, ইমানেৰ চত্তারি পারাজিকৰত্থূনি, ইমানেৰ চত্তারি পারাজিকানি, ইতো ঊনং ৰা অতিরেকং ৰা নত্থি। তস্মা ভগৰাপি ধনিযং ৰিগরহিত্ৰা পাদেনেৰ দুতিযপারাজিকং পঞ্ঞপেন্তো ‘যো পন ভিক্খু অদিন্নং থেয্যসঙ্খাত’ন্তিআদিমাহা’’তি (পারা॰ অট্ঠ॰ ১.৮৮) ৰুত্তং।
‘‘Pañcamāsako pādoti pāḷiṃ ulliṅgitvā ‘tadā rājagahe vīsatimāsako kahāpaṇo hoti, tasmā pañcamāsako pādo’. Etena lakkhaṇena sabbajanapadesu kahāpaṇassa catuttho bhāgo ‘pādo’ti veditabbo. So ca kho porāṇakassa nīlakahāpaṇassa vasena, na itaresaṃ dudradāmakādīnaṃ. Tena hi pādena atītā buddhāpi pārājikaṃ paññapesuṃ, anāgatāpi paññapessanti. Sabbabuddhānañhi pārājikavatthumhi vā pārājike vā nānattaṃ natthi, imāneva cattāri pārājikavatthūni, imāneva cattāri pārājikāni, ito ūnaṃ vā atirekaṃ vā natthi. Tasmā bhagavāpi dhaniyaṃ vigarahitvā pādeneva dutiyapārājikaṃ paññapento ‘yo pana bhikkhu adinnaṃ theyyasaṅkhāta’ntiādimāhā’’ti (pārā. aṭṭha. 1.88) vuttaṃ.
সারত্থদীপনিযঞ্চ –
Sāratthadīpaniyañca –
‘‘চতুত্থো ভাগো পাদোতি ৰেদিতব্বোতি ইমিনাৰ সব্বজনপদেসু কহাপণস্সেৰ ৰীসতিমো ভাগোমাসকোতি ইদঞ্চ ৰুত্তমেৰ হোতীতি দট্ঠব্বং। পোরাণসত্থানুরূপং লক্খণসম্পন্না উপ্পাদিতা নীলকহাপণাতি ৰেদিতব্বা। দুদ্রদামেন উপ্পাদিতো দুদ্রদামকো। সো কির নীলকহাপণস্স তিভাগং অগ্ঘতী’তি ৰত্ৰা ‘যস্মিং পদেসে নীলকহাপণা ন সন্তি, তত্থাপি নীলকহাপণৰসেনেৰ পরিচ্ছেদো কাতব্বো। কথং? নীলকহাপণানং ৰল়ঞ্জনট্ঠানে চ অৰল়ঞ্জনট্ঠানে চ সমানঅগ্ঘৰসেন পৰত্তমানং ভণ্ডং নীলকহাপণেন সমানগ্ঘং গহেত্ৰা তস্স চতুত্থভাগগ্ঘনকং নীলকহাপণস্স পাদগ্ঘনকন্তি পরিচ্ছিন্দিত্ৰা ৰিনিচ্ছযো কাতব্বো’’তি (সারত্থ॰ টী॰ ২.৮৮) অযমত্থোৰ ৰুত্তো।
‘‘Catuttho bhāgo pādoti veditabboti imināva sabbajanapadesu kahāpaṇasseva vīsatimo bhāgomāsakoti idañca vuttameva hotīti daṭṭhabbaṃ. Porāṇasatthānurūpaṃ lakkhaṇasampannā uppāditā nīlakahāpaṇāti veditabbā. Dudradāmena uppādito dudradāmako. So kira nīlakahāpaṇassa tibhāgaṃ agghatī’ti vatvā ‘yasmiṃ padese nīlakahāpaṇā na santi, tatthāpi nīlakahāpaṇavaseneva paricchedo kātabbo. Kathaṃ? Nīlakahāpaṇānaṃ vaḷañjanaṭṭhāne ca avaḷañjanaṭṭhāne ca samānaagghavasena pavattamānaṃ bhaṇḍaṃ nīlakahāpaṇena samānagghaṃ gahetvā tassa catutthabhāgagghanakaṃ nīlakahāpaṇassa pādagghanakanti paricchinditvā vinicchayo kātabbo’’ti (sārattha. ṭī. 2.88) ayamatthova vutto.
এত্থ কহাপণং নাম করোন্তা সুৰণ্ণেনপি করোন্তি রজতেনপি তম্বেনপি সুৰণ্ণরজততম্বমিস্সকেনপি । তেসু কতরং কহাপণং নীলকহাপণন্তি? কেচি তাৰ ‘‘সুৰণ্ণকহাপণ’’ন্তি। কেচি ‘‘মিস্সককহাপণ’’ন্তি। তত্থ ‘‘সুৰণ্ণকহাপণ’’ন্তি ৰদন্তানং অযমধিপ্পাযো – পারাজিকৰত্থুনা পাদেন সব্বত্থ একলক্খণেন ভৰিতব্বং, কালদেসপরিভোগাদিৰসেন অগ্ঘনানত্তং পাদস্সেৰ ভৰিতব্বং। ভগৰতা হি ধম্মিকরাজূহি হননবন্ধনপব্বাজনানুরূপেনেৰ অদিন্নাদানে পারাজিকং পঞ্ঞত্তং, ন ইতরথা। তস্মা এসা সব্বদা সব্বত্থ অব্যভিচারীতি সুৰণ্ণমযস্স কহাপণস্স চতুত্থেন পাদেন ভৰিতব্বন্তি।
Ettha kahāpaṇaṃ nāma karontā suvaṇṇenapi karonti rajatenapi tambenapi suvaṇṇarajatatambamissakenapi . Tesu kataraṃ kahāpaṇaṃ nīlakahāpaṇanti? Keci tāva ‘‘suvaṇṇakahāpaṇa’’nti. Keci ‘‘missakakahāpaṇa’’nti. Tattha ‘‘suvaṇṇakahāpaṇa’’nti vadantānaṃ ayamadhippāyo – pārājikavatthunā pādena sabbattha ekalakkhaṇena bhavitabbaṃ, kāladesaparibhogādivasena agghanānattaṃ pādasseva bhavitabbaṃ. Bhagavatā hi dhammikarājūhi hananabandhanapabbājanānurūpeneva adinnādāne pārājikaṃ paññattaṃ, na itarathā. Tasmā esā sabbadā sabbattha abyabhicārīti suvaṇṇamayassa kahāpaṇassa catutthena pādena bhavitabbanti.
‘‘মিস্সককহাপণ’’ন্তি ৰদন্তানং পন অযমধিপ্পাযো –
‘‘Missakakahāpaṇa’’nti vadantānaṃ pana ayamadhippāyo –
অট্ঠকথাযং –
Aṭṭhakathāyaṃ –
‘‘তদা রাজগহে ৰীসতিমাসকো কহাপণো হোতি, তস্মা পঞ্চমাসকো পাদো। এতেন লক্খণেন সব্বজনপদেসু কহাপণস্স চতুত্থো ভাগো ‘পাদো’তি ৰেদিতব্বো। সো চ খো পোরাণকস্স নীলকহাপণস্স ৰসেন, ন ইতরেসং দুদ্রদামকাদীন’’ন্তি (পারা॰ অট্ঠ॰ ১.৮৮) –
‘‘Tadā rājagahe vīsatimāsako kahāpaṇo hoti, tasmā pañcamāsako pādo. Etena lakkhaṇena sabbajanapadesu kahāpaṇassa catuttho bhāgo ‘pādo’ti veditabbo. So ca kho porāṇakassa nīlakahāpaṇassa vasena, na itaresaṃ dudradāmakādīna’’nti (pārā. aṭṭha. 1.88) –
ৰুত্তত্তা, সারত্থদীপনিযঞ্চ –
Vuttattā, sāratthadīpaniyañca –
‘‘পোরাণসত্থানুরূপং লক্খণসম্পন্না উপ্পাদিতা নীলকহাপণাতি ৰেদিতব্বা’’তি (সারত্থ॰ টী॰ ২.৮৮) –
‘‘Porāṇasatthānurūpaṃ lakkhaṇasampannā uppāditā nīlakahāpaṇāti veditabbā’’ti (sārattha. ṭī. 2.88) –
ৰুত্তত্তা চ ‘‘ৰিনযৰিনিচ্ছযং পত্ৰা গরুকে ঠাতব্ব’’ন্তি ৰচনতো চ মিস্সককহাপণোযেৰ নীলকহাপণো। তত্থেৰ হি পোরাণসত্থৰিহিতং লক্খণং দিস্সতি। কথং? পঞ্চ মাসা সুৰণ্ণস্স, তথা রজতস্স, দস মাসা তম্বস্সাতি এতে ৰীসতি মাসে মিস্সেত্ৰা বন্ধনত্থায ৰীহিমত্তং লোহং পক্খিপিত্ৰা অক্খরানি চ হত্থিআদীনমঞ্ঞতরঞ্চ রূপং দস্সেত্ৰা কতো নিদ্দোসত্তা নীলকহাপণো নাম হোতীতি।
Vuttattā ca ‘‘vinayavinicchayaṃ patvā garuke ṭhātabba’’nti vacanato ca missakakahāpaṇoyeva nīlakahāpaṇo. Tattheva hi porāṇasatthavihitaṃ lakkhaṇaṃ dissati. Kathaṃ? Pañca māsā suvaṇṇassa, tathā rajatassa, dasa māsā tambassāti ete vīsati māse missetvā bandhanatthāya vīhimattaṃ lohaṃ pakkhipitvā akkharāni ca hatthiādīnamaññatarañca rūpaṃ dassetvā kato niddosattā nīlakahāpaṇo nāma hotīti.
সিক্খাভাজনৰিনিচ্ছযে চ কেসুচি পোত্থকেসু ‘‘পাদো নাম পঞ্চ মাসা সুৰণ্ণস্সা’’তি পুরিমপক্খৰাদীনং মতেন পাঠো লিখিতো। কেসুচি পোত্থকেসু দুতিযপক্খৰাদীনং মতেন ‘‘পঞ্চ মাসা হিরঞ্ঞস্সা’’তি পাঠো লিখিতো। সীহল়ভাসায পোরাণকেহি লিখিতায সামণেরসিক্খায পন –
Sikkhābhājanavinicchaye ca kesuci potthakesu ‘‘pādo nāma pañca māsā suvaṇṇassā’’ti purimapakkhavādīnaṃ matena pāṭho likhito. Kesuci potthakesu dutiyapakkhavādīnaṃ matena ‘‘pañca māsā hiraññassā’’ti pāṭho likhito. Sīhaḷabhāsāya porāṇakehi likhitāya sāmaṇerasikkhāya pana –
‘‘পোরাণকস্স নীলকহাপণস্সাতি ৰুত্তঅট্ঠকথাৰচনস্স, পোরাণকে রতনসুত্তাভিধানকসুত্তে ৰুত্তকহাপণলক্খণস্স চ অনুরূপতো ‘সুৰণ্ণরজততম্বানি মিস্সেত্ৰা উট্ঠাপেত্ৰা কতকহাপণং কহাপণং নামা’তি চ ‘সামণেরানমুপসম্পন্নানঞ্চ অদিন্নাদানপারাজিকৰত্থুম্হি কো ৰিসেসো’তি পুচ্ছং কত্ৰা ‘সামণেরানং দসিকসুত্তেনাপি পারাজিকো হোতি, উপসম্পন্নানং পন সুৰণ্ণস্স ৰীসতিৰীহিমত্তেনা’’তি –
‘‘Porāṇakassa nīlakahāpaṇassāti vuttaaṭṭhakathāvacanassa, porāṇake ratanasuttābhidhānakasutte vuttakahāpaṇalakkhaṇassa ca anurūpato ‘suvaṇṇarajatatambāni missetvā uṭṭhāpetvā katakahāpaṇaṃ kahāpaṇaṃ nāmā’ti ca ‘sāmaṇerānamupasampannānañca adinnādānapārājikavatthumhi ko viseso’ti pucchaṃ katvā ‘sāmaṇerānaṃ dasikasuttenāpi pārājiko hoti, upasampannānaṃ pana suvaṇṇassa vīsativīhimattenā’’ti –
চ ৰিসেসো দস্সিতো।
Ca viseso dassito.
তং পন সুৰণ্ণমাসকৰসেন অড্ঢতিযমাসকং হোতি, পঞ্চমাসকেন চ ভগৰতা পারাজিকং পঞ্ঞত্তং। তস্মা তস্স যথাৰুত্তলক্খণস্স কহাপণস্স সব্বদেসেসু অলব্ভমানত্তা সব্বদেসসাধারণেন তস্স মিস্সককহাপণস্স পঞ্চমাসপাদগ্ঘনকেন সুৰণ্ণেনেৰ পারাজিকৰত্থুম্হি নিযমিতে সব্বদেসৰাসীনং উপকারায হোতীতি এৰং সুৰণ্ণেনেৰ পারাজিকৰত্থুপরিচ্ছেদো কতো। অযমেৰ নিযমো সীহল়াচরিযৰাদেহি সারোতি গহিতো। তস্মা সিক্খাগরুকেহি সব্বত্থ পেসলেহি ৰিনযধরেহি অযমেৰ ৰিনিচ্ছযো সারতো পচ্চেতব্বো। হোন্তি চেত্থ –
Taṃ pana suvaṇṇamāsakavasena aḍḍhatiyamāsakaṃ hoti, pañcamāsakena ca bhagavatā pārājikaṃ paññattaṃ. Tasmā tassa yathāvuttalakkhaṇassa kahāpaṇassa sabbadesesu alabbhamānattā sabbadesasādhāraṇena tassa missakakahāpaṇassa pañcamāsapādagghanakena suvaṇṇeneva pārājikavatthumhi niyamite sabbadesavāsīnaṃ upakārāya hotīti evaṃ suvaṇṇeneva pārājikavatthuparicchedo kato. Ayameva niyamo sīhaḷācariyavādehi sāroti gahito. Tasmā sikkhāgarukehi sabbattha pesalehi vinayadharehi ayameva vinicchayo sārato paccetabbo. Honti cettha –
‘‘হেমরজততম্বেহি, সত্থে নিদ্দিট্ঠলক্খণং।
‘‘Hemarajatatambehi, satthe niddiṭṭhalakkhaṇaṃ;
অহাপেত্ৰা কতো ৰীস-মাসো নীলকহাপণো॥
Ahāpetvā kato vīsa-māso nīlakahāpaṇo.
হেমপাদং সজ্ঝুপাদং, তম্বপাদদ্ৰযঞ্হি সো।
Hemapādaṃ sajjhupādaṃ, tambapādadvayañhi so;
মিস্সেত্ৰা রূপমপ্পেত্ৰা, কাতুং সত্থেসু দস্সিতো॥
Missetvā rūpamappetvā, kātuṃ satthesu dassito.
‘এলা’তি ৰুচ্চতে দোসো, নিদ্দোসত্তা তথীরিতো।
‘Elā’ti vuccate doso, niddosattā tathīrito;
তস্স পাদো সুৰণ্ণস্স, ৰীসৰীহগ্ঘনো মতো॥
Tassa pādo suvaṇṇassa, vīsavīhagghano mato.
যস্মিং পন পদেসে সো, ন ৰত্ততি কহাপণো।
Yasmiṃ pana padese so, na vattati kahāpaṇo;
ৰীসসোৰণ্ণৰীহগ্ঘং, তপ্পাদগ্ঘন্তি ৰেদিযং॥
Vīsasovaṇṇavīhagghaṃ, tappādagghanti vediyaṃ.
ৰীসসোৰণ্ণৰীহগ্ঘং, থেনেন্তা ভিক্খৰো ততো।
Vīsasovaṇṇavīhagghaṃ, thenentā bhikkhavo tato;
চৰন্তি সামঞ্ঞগুণা, ইচ্চাহু ৰিনযঞ্ঞুনো’’তি॥
Cavanti sāmaññaguṇā, iccāhu vinayaññuno’’ti.
৯. ওপাতন্তি আৰাটং। দুক্খে জাতেতি যোজনা।
9.Opātanti āvāṭaṃ. Dukkhe jāteti yojanā.
১০. উত্তরিং ধম্মন্তি এত্থ ‘‘উত্তরিমনুস্সধম্ম’’ন্তি ৰত্তব্বে নিরুত্তিনযেন মজ্ঝপদলোপং, নিগ্গহীতাগমঞ্চ কত্ৰা ‘‘উত্তরিং ধম্ম’’ন্তি ৰুত্তং। উত্তরিমনুস্সানং ঝাযীনঞ্চেৰ অরিযানঞ্চ ধম্মং উত্তরিমনুস্সধম্মং। অত্তুপনাযিকন্তি অত্তনি তং উপনেতি ‘‘মযি অত্থী’’তি সমুদাচরন্তো, অত্তানং ৰা তত্থ উপনেতি ‘‘অহং এত্থ সন্দিস্সামী’’তি সমুদাচরন্তোতি অত্তুপনাযিকো, তং অত্তুপনাযিকং, এৰং কত্ৰা ৰদন্তোতি সম্বন্ধো।
10.Uttariṃ dhammanti ettha ‘‘uttarimanussadhamma’’nti vattabbe niruttinayena majjhapadalopaṃ, niggahītāgamañca katvā ‘‘uttariṃ dhamma’’nti vuttaṃ. Uttarimanussānaṃ jhāyīnañceva ariyānañca dhammaṃ uttarimanussadhammaṃ. Attupanāyikanti attani taṃ upaneti ‘‘mayi atthī’’ti samudācaranto, attānaṃ vā tattha upaneti ‘‘ahaṃ ettha sandissāmī’’ti samudācarantoti attupanāyiko, taṃ attupanāyikaṃ, evaṃ katvā vadantoti sambandho.
১১. পরিযাযেতি ‘‘যো তে ৰিহারে ৰসতি, সো ভিক্খু অরহা’’তিআদিনা (পরি॰ ২৮৭) পরিযাযভণনে। ঞাতেতি যং উদ্দিস্স ভণতি, তস্মিং ৰিঞ্ঞুম্হি মনুস্সজাতিকে অচিরেন ঞাতে। নো চেতি নো চে জানাতি।
11.Pariyāyeti ‘‘yo te vihāre vasati, so bhikkhu arahā’’tiādinā (pari. 287) pariyāyabhaṇane. Ñāteti yaṃ uddissa bhaṇati, tasmiṃ viññumhi manussajātike acirena ñāte. No ceti no ce jānāti.
ইতি উত্তরে লীনত্থপকাসনিযা
Iti uttare līnatthapakāsaniyā
পারাজিককথাৰণ্ণনা নিট্ঠিতা।
Pārājikakathāvaṇṇanā niṭṭhitā.
১৩. চেতেতি, উপক্কমতি, মুচ্চতি, এৰং অঙ্গত্তযে পুণ্ণে গরুকং ৰুত্তং। দ্ৰঙ্গে চেতেতি, উপক্কমতি যদি ন মুচ্চতি, এৰং অঙ্গদ্ৰযে থুল্লচ্চযন্তি যোজনা। পযোগেতি পযোজেত্ৰা উপক্কমিতুং অঙ্গজাতামসনং, পরস্স আণাপনন্তি এৰরূপে সাহত্থিকাণত্তিকপযোগে।
13. Ceteti, upakkamati, muccati, evaṃ aṅgattaye puṇṇe garukaṃ vuttaṃ. Dvaṅge ceteti, upakkamati yadi na muccati, evaṃ aṅgadvaye thullaccayanti yojanā. Payogeti payojetvā upakkamituṃ aṅgajātāmasanaṃ, parassa āṇāpananti evarūpe sāhatthikāṇattikapayoge.
১৪. ৰুত্তনযেনেৰ উপরূপরি পঞ্হাপুচ্ছনং ঞাতুং সক্কাতি তং অৰত্তুকামো আহ ‘‘ইতো পট্ঠাযা’’তিআদি। মযম্পি যদেত্থ পুব্বে অৰুত্তমনুত্তানত্থঞ্চ, তদেৰ ৰণ্ণযিস্সাম।
14. Vuttanayeneva uparūpari pañhāpucchanaṃ ñātuṃ sakkāti taṃ avattukāmo āha ‘‘ito paṭṭhāyā’’tiādi. Mayampi yadettha pubbe avuttamanuttānatthañca, tadeva vaṇṇayissāma.
১৫. কাযেনাতি অত্তনো কাযেন। কাযন্তি ইত্থিযা কাযং। এস নযো ‘‘কাযবদ্ধ’’ন্তি এত্থাপি।
15.Kāyenāti attano kāyena. Kāyanti itthiyā kāyaṃ. Esa nayo ‘‘kāyabaddha’’nti etthāpi.
১৬. অত্তনো কাযেন পটিবদ্ধেন ইত্থিযা কাযপটিবদ্ধে ফুট্ঠে তু দুক্কটন্তি যোজনা।
16. Attano kāyena paṭibaddhena itthiyā kāyapaṭibaddhe phuṭṭhe tu dukkaṭanti yojanā.
১৭. তিস্সো আপত্তিযো সিযুন্তি যোজনা। দ্ৰিন্নং মগ্গানন্তি ৰচ্চমগ্গপস্সাৰমগ্গানং।
17.Tisso āpattiyo siyunti yojanā. Dvinnaṃ maggānanti vaccamaggapassāvamaggānaṃ.
১৮. ৰণ্ণাদিভঞ্ঞেতি ৰণ্ণাদিনা ভণনে। কাযপটিবদ্ধে ৰণ্ণাদিনা ভঞ্ঞে দুক্কটন্তি যোজনা।
18.Vaṇṇādibhaññeti vaṇṇādinā bhaṇane. Kāyapaṭibaddhe vaṇṇādinā bhaññe dukkaṭanti yojanā.
১৯. অত্তকামচরিযাযাতি অত্তকামপারিচরিযায।
19.Attakāmacariyāyāti attakāmapāricariyāya.
২০. পণ্ডকস্স সন্তিকেপি অত্তকামপারিচরিযায ৰণ্ণং ৰদতো তস্স ভিক্খুনোতি যোজনা। তিরচ্ছানগতস্সাপি সন্তিকেতি এত্থাপি এসেৰ নযো।
20. Paṇḍakassa santikepi attakāmapāricariyāya vaṇṇaṃ vadato tassa bhikkhunoti yojanā. Tiracchānagatassāpi santiketi etthāpi eseva nayo.
২১. ইত্থিপুরিসানমন্তরে সঞ্চরিত্তং সঞ্চরণভাৰং সমাপন্নে ভিক্খুম্হি পটিগ্গণ্হনৰীমংসাপচ্চাহরণকত্তিকে সম্পন্নে তস্স বুধো গরুকং নিদ্দিসেতি যোজনা।
21. Itthipurisānamantare sañcarittaṃ sañcaraṇabhāvaṃ samāpanne bhikkhumhi paṭiggaṇhanavīmaṃsāpaccāharaṇakattike sampanne tassa budho garukaṃ niddiseti yojanā.
২২. দ্ৰঙ্গসমাযোগেতি তীস্ৰেতেসু দ্ৰিন্নং অঙ্গানং যথাকথঞ্চি সমাযোগে। অঙ্গে সতি পনেকস্মিন্তি তিণ্ণমেকস্মিং পন অঙ্গে সতি।
22.Dvaṅgasamāyogeti tīsvetesu dvinnaṃ aṅgānaṃ yathākathañci samāyoge. Aṅge sati panekasminti tiṇṇamekasmiṃ pana aṅge sati.
২৪. পযোগেতি ‘‘অদেসিতৰত্থুকং পমাণাতিক্কন্তং কুটিং, অদেসিতৰত্থুকং মহল্লকৰিহারঞ্চ কারেস্সামী’’তি উপকরণত্থং অরঞ্ঞগমনতো পট্ঠায সব্বপযোগে। একপিণ্ডে অনাগতেতি সব্বপরিযন্তিমং পিণ্ডং সন্ধায ৰুত্তং।
24.Payogeti ‘‘adesitavatthukaṃ pamāṇātikkantaṃ kuṭiṃ, adesitavatthukaṃ mahallakavihārañca kāressāmī’’ti upakaraṇatthaṃ araññagamanato paṭṭhāya sabbapayoge. Ekapiṇḍe anāgateti sabbapariyantimaṃ piṇḍaṃ sandhāya vuttaṃ.
২৫. ইধ যো ভিক্খু অমূলকেন পারাজিকেন ধম্মেন অনুদ্ধংসেতীতি যোজনা।
25. Idha yo bhikkhu amūlakena pārājikena dhammena anuddhaṃsetīti yojanā.
২৬. ওকাসং ন চ কারেত্ৰাতি ‘‘করোতু মে, আযস্মা, ওকাসং, অহং তে ৰত্তুকামো’’তি এৰং তেন ভিক্খুনা ওকাসং অকারাপেত্ৰা।
26.Okāsaṃna ca kāretvāti ‘‘karotu me, āyasmā, okāsaṃ, ahaṃ te vattukāmo’’ti evaṃ tena bhikkhunā okāsaṃ akārāpetvā.
২৮. অঞ্ঞভাগিযেতি অঞ্ঞভাগিযপদেন উপলক্খিতসিক্খাপদে। এৰং অঞ্ঞত্রপি ঈদিসেসু ঠানেসু অত্থো ৰেদিতব্বো।
28.Aññabhāgiyeti aññabhāgiyapadena upalakkhitasikkhāpade. Evaṃ aññatrapi īdisesu ṭhānesu attho veditabbo.
২৯. ‘‘সমনুভাসনায এৰা’’তি পদচ্ছেদো। ন পটিনিস্সজন্তি অপ্পটিনিস্সজন্তো।
29. ‘‘Samanubhāsanāya evā’’ti padacchedo. Na paṭinissajanti appaṭinissajanto.
৩০. ঞত্তিযা দুক্কটং আপন্নো সিযা, দ্ৰীহি কম্মৰাচাহি থুল্লতং আপন্নো সিযা, কম্মৰাচায ওসানে গরুকং আপন্নো সিযাতি যোজনা। ‘‘থুল্লত’’ন্তি ইদং থুল্লচ্চযাপত্তিউপলক্খণৰচনং।
30. Ñattiyā dukkaṭaṃ āpanno siyā, dvīhi kammavācāhi thullataṃ āpanno siyā, kammavācāya osāne garukaṃ āpanno siyāti yojanā. ‘‘Thullata’’nti idaṃ thullaccayāpattiupalakkhaṇavacanaṃ.
৩১. চতূসু যাৰততিযকেসু পঠমে আপত্তিপরিচ্ছেদং দস্সেত্ৰা ইতরেসং তিণ্ণং তেনপি একপরিচ্ছেদত্তা তত্থ ৰুত্তনযমেৰ তেসু অতিদিসন্তো আহ ‘‘ভেদানুৰত্তকে’’তিআদি।
31. Catūsu yāvatatiyakesu paṭhame āpattiparicchedaṃ dassetvā itaresaṃ tiṇṇaṃ tenapi ekaparicchedattā tattha vuttanayameva tesu atidisanto āha ‘‘bhedānuvattake’’tiādi.
ইতি উত্তরে লীনত্থপকাসনিযা
Iti uttare līnatthapakāsaniyā
সঙ্ঘাদিসেসকথাৰণ্ণনা নিট্ঠিতা।
Saṅghādisesakathāvaṇṇanā niṭṭhitā.
৩২. অতিরেকচীৰরন্তি অনধিট্ঠিতং, অৰিকপ্পিতং ৰিকপ্পনুপগপমাণং চীৰরং লদ্ধা দসাহং অতিক্কমন্তো একমেৰ নিস্সগ্গিযং পাচিত্তিযং আপজ্জতি। তিচীৰরেন একরত্তিম্পি ৰিনা ৰসন্তো একমেৰ নিস্সগ্গিযং পাচিত্তিযং আপজ্জতি। ইদঞ্চ জাতিৰসেন একত্তং সন্ধায ৰুত্তং ৰত্থুগণনায আপত্তীনং পরিচ্ছিন্দিতব্বত্তা।
32.Atirekacīvaranti anadhiṭṭhitaṃ, avikappitaṃ vikappanupagapamāṇaṃ cīvaraṃ laddhā dasāhaṃ atikkamanto ekameva nissaggiyaṃ pācittiyaṃ āpajjati. Ticīvarena ekarattimpi vinā vasanto ekameva nissaggiyaṃ pācittiyaṃ āpajjati. Idañca jātivasena ekattaṃ sandhāya vuttaṃ vatthugaṇanāya āpattīnaṃ paricchinditabbattā.
৩৩. গহেত্ৰাকালচীৰরন্তি অকালচীৰরং পটিগ্গহেত্ৰা। মাসন্তি সতিযা পচ্চাসায নিক্খিপিতুং অনুঞ্ঞাতং মাসং। অতিক্কমন্তোতি সতিযাপি পচ্চাসায ৰীতিক্কমন্তো অন্তোমাসে অনধিট্ঠহিত্ৰা, অৰিকপ্পেত্ৰা ৰা তিংসদিৰসানি অতিক্কমন্তো, চীৰরুপ্পাদদিৰসং অরুণং আদিং কত্ৰা একতিংসমং অরুণং উট্ঠাপেন্তোতি অত্থো। একং নিস্সগ্গিযং আপত্তিং আপজ্জতীতি উদীরিতন্তি যোজনা।
33.Gahetvākālacīvaranti akālacīvaraṃ paṭiggahetvā. Māsanti satiyā paccāsāya nikkhipituṃ anuññātaṃ māsaṃ. Atikkamantoti satiyāpi paccāsāya vītikkamanto antomāse anadhiṭṭhahitvā, avikappetvā vā tiṃsadivasāni atikkamanto, cīvaruppādadivasaṃ aruṇaṃ ādiṃ katvā ekatiṃsamaṃ aruṇaṃ uṭṭhāpentoti attho. Ekaṃ nissaggiyaṃ āpattiṃ āpajjatīti udīritanti yojanā.
৩৪. অঞ্ঞাতিকায ভিক্খুনিযা। যংকিঞ্চি পুরাণচীৰরন্তি একৰারম্পি পরিভুত্তং সঙ্ঘাটিআদীনমঞ্ঞতরং চীৰরং।
34.Aññātikāya bhikkhuniyā. Yaṃkiñci purāṇacīvaranti ekavārampi paribhuttaṃ saṅghāṭiādīnamaññataraṃ cīvaraṃ.
৩৫. পযোগস্মিন্তি ‘‘ধোৰা’’তিআদিকে ভিক্খুনো আণত্তিকপযোগে, এৰং আণত্তায চ ভিক্খুনিযা উদ্ধনাদিকে সব্বস্মিং পযোগে চ। ‘‘নিস্সগ্গিযাৰ পাচিত্তি হোতীতি নিস্সগ্গিযা পাচিত্তি চ হোতীতি যোজনা।
35.Payogasminti ‘‘dhovā’’tiādike bhikkhuno āṇattikapayoge, evaṃ āṇattāya ca bhikkhuniyā uddhanādike sabbasmiṃ payoge ca. ‘‘Nissaggiyāva pācitti hotīti nissaggiyā pācitti ca hotīti yojanā.
৩৬. পটিগণ্হতোতি এত্থ ‘‘অঞ্ঞত্র পারিৰত্তকা’’তি যোজনা।
36.Paṭigaṇhatoti ettha ‘‘aññatra pārivattakā’’ti yojanā.
৩৮. পযোগস্মিন্তি ৰিঞ্ঞাপনপযোগে। ৰিঞ্ঞাপিতেতি ৰিঞ্ঞাপিতচীৰরে পটিলদ্ধে।
38.Payogasminti viññāpanapayoge. Viññāpiteti viññāpitacīvare paṭiladdhe.
৩৯. ভিক্খূতি অচ্ছিন্নচীৰরো ৰা নট্ঠচীৰরো ৰা ভিক্খু। তদুত্তরিন্তি সন্তরুত্তরপরমতো উত্তরিং।
39.Bhikkhūti acchinnacīvaro vā naṭṭhacīvaro vā bhikkhu. Taduttarinti santaruttaraparamato uttariṃ.
৪১. পযোগেতি ৰিকপ্পনাপজ্জনপযোগে।
41.Payogeti vikappanāpajjanapayoge.
৪২. দুৰেতি দুক্কটপাচিত্তিযৰসেন দুৰে আপত্তিযো ফুসেতি যোজেতব্বং।
42.Duveti dukkaṭapācittiyavasena duve āpattiyo phuseti yojetabbaṃ.
৪৪. পযোগেতি অনুঞ্ঞাতপযোগতো অতিরেকাভিনিপ্ফাদনপযোগে। লাভেতি চীৰরস্স পটিলাভে।
44.Payogeti anuññātapayogato atirekābhinipphādanapayoge. Lābheti cīvarassa paṭilābhe.
কথিনৰগ্গৰণ্ণনা পঠমা।
Kathinavaggavaṇṇanā paṭhamā.
৪৫. কোসিযৰগ্গস্স আদীসু পঞ্চসু সিক্খাপদেসু দ্ৰে দ্ৰে আপত্তিযোতি যোজনা। পযোগেতি করণকারাপনপযোগে। লাভেতি কত্ৰা ৰা কারেত্ৰা ৰা পরিনিট্ঠাপনে।
45. Kosiyavaggassa ādīsu pañcasu sikkhāpadesu dve dve āpattiyoti yojanā. Payogeti karaṇakārāpanapayoge. Lābheti katvā vā kāretvā vā pariniṭṭhāpane.
৪৬. ‘‘গহেত্ৰা এল়কলোমানী’’তি পদচ্ছেদো। অতিক্কমন্তি অতিক্কমন্তো।
46. ‘‘Gahetvā eḷakalomānī’’ti padacchedo. Atikkamanti atikkamanto.
৪৭. অঞ্ঞাযাতি অঞ্ঞাতিকায ভিক্খুনিযা। ‘‘ধোৰাপেতি এল়লোমক’’ন্তি পদচ্ছেদো। এল়লোমকন্তি এল়কলোমানি। নিরুত্তিনযেন ক-কারস্স ৰিপরিযাযো। পযোগেতি ধোৰাপনপযোগে।
47.Aññāyāti aññātikāya bhikkhuniyā. ‘‘Dhovāpeti eḷalomaka’’nti padacchedo. Eḷalomakanti eḷakalomāni. Niruttinayena ka-kārassa vipariyāyo. Payogeti dhovāpanapayoge.
৪৮. পযোগেতি পটিগ্গণ্হনপযোগে।
48.Payogeti paṭiggaṇhanapayoge.
৪৯. নানাকারন্তি নানপ্পকারং। সমাপজ্জন্তি সমাপজ্জন্তো ভিক্খু। সমাপন্নেতি সংৰোহারে সমাপন্নে সতি। পযোগেতি সমাপজ্জনপযোগে।
49.Nānākāranti nānappakāraṃ. Samāpajjanti samāpajjanto bhikkhu. Samāpanneti saṃvohāre samāpanne sati. Payogeti samāpajjanapayoge.
৫০. পযোগেতি কযৰিক্কযাপজ্জনপযোগে। তস্মিং কতেতি তস্মিং ভণ্ডে অত্তনো সন্তকভাৰং নীতে।
50.Payogeti kayavikkayāpajjanapayoge. Tasmiṃ kateti tasmiṃ bhaṇḍe attano santakabhāvaṃ nīte.
কোসিযৰগ্গৰণ্ণনা দুতিযা।
Kosiyavaggavaṇṇanā dutiyā.
৫১. অতিরেককন্তি অনধিট্ঠিতং, অৰিকপ্পিতং ৰা পত্তং। দসাহং অতিক্কমেন্তস্স তস্স ভিক্খুনো একাৰ নিস্সগ্গিযাপত্তি হোতীতি যোজনা।
51.Atirekakanti anadhiṭṭhitaṃ, avikappitaṃ vā pattaṃ. Dasāhaṃ atikkamentassa tassa bhikkhuno ekāva nissaggiyāpatti hotīti yojanā.
৫২-৩. নত্থি এতস্স পঞ্চ বন্ধনানীতি অপঞ্চবন্ধনো, তস্মিং, ঊনপঞ্চবন্ধনে পত্তেতি অত্থো। পযোগেতি ৰিঞ্ঞাপনপযোগে। তস্স পত্তস্স লাভে পটিলাভে।
52-3. Natthi etassa pañca bandhanānīti apañcabandhano, tasmiṃ, ūnapañcabandhane patteti attho. Payogeti viññāpanapayoge. Tassa pattassa lābhe paṭilābhe.
৫৪. ভেসজ্জন্তি সপ্পিআদিকং।
54.Bhesajjanti sappiādikaṃ.
৫৫. পযোগেতি পরিযেসনপযোগে।
55.Payogeti pariyesanapayoge.
৫৬. পযোগেতি অচ্ছিন্দনঅচ্ছিন্দাপনপযোগে। হটেতি অচ্ছিন্দিত্ৰা গহিতে।
56.Payogeti acchindanaacchindāpanapayoge. Haṭeti acchinditvā gahite.
৫৭. দ্ৰে পনাপত্তিযো ফুসেতি ৰাযাপনপযোগে দুক্কটং, ৰিকপ্পনুপগপচ্ছিমচীৰরপমাণেন ৰীতে নিস্সগ্গিযন্তি দ্ৰে আপত্তিযো আপজ্জতীতি অত্থো।
57.Dve panāpattiyo phuseti vāyāpanapayoge dukkaṭaṃ, vikappanupagapacchimacīvarapamāṇena vīte nissaggiyanti dve āpattiyo āpajjatīti attho.
৫৮-৯. যো পন ভিক্খু অপ্পৰারিতো অঞ্ঞাতকস্সেৰ তন্তৰাযে সমেচ্চ উপসঙ্কমিত্ৰা চীৰরে ৰিকপ্পং আপজ্জন্তো হোতি। সোতি সো ভিক্খু। দ্ৰে আপত্তিযো আপজ্জতি, ন সংসযোতি যোজনা। পযোগেতি ৰিকপ্পাপজ্জনপযোগে।
58-9. Yo pana bhikkhu appavārito aññātakasseva tantavāye samecca upasaṅkamitvā cīvare vikappaṃ āpajjanto hoti. Soti so bhikkhu. Dve āpattiyo āpajjati, na saṃsayoti yojanā. Payogeti vikappāpajjanapayoge.
৬০. অচ্চেকসঞ্ঞিতং চীৰরং পটিগ্গহেত্ৰাতি যোজনা। কালন্তি চীৰরকালং।
60. Accekasaññitaṃ cīvaraṃ paṭiggahetvāti yojanā. Kālanti cīvarakālaṃ.
৬১. তিণ্ণমঞ্ঞতরং ৰত্থন্তি তিণ্ণং চীৰরানং অঞ্ঞতরং চীৰরং। ঘরেতি অন্তরঘরে। নিদহিত্ৰাতি নিক্খিপিত্ৰা। তেন চীৰরেন ৰিনা ছারত্ততো অধিকং দিৰসং যস্স আরঞ্ঞকস্স ৰিহারস্স গোচরগামে তং চীৰরং নিক্খিত্তং, তম্হা ৰিহারা অঞ্ঞত্র ৰসন্তো নিস্সগ্গিযং ফুসেতি যোজনা।
61.Tiṇṇamaññataraṃ vatthanti tiṇṇaṃ cīvarānaṃ aññataraṃ cīvaraṃ. Ghareti antaraghare. Nidahitvāti nikkhipitvā. Tena cīvarena vinā chārattato adhikaṃ divasaṃ yassa āraññakassa vihārassa gocaragāme taṃ cīvaraṃ nikkhittaṃ, tamhā vihārā aññatra vasanto nissaggiyaṃ phuseti yojanā.
৬২. সঙ্ঘিকং লাভং পরিণতং জানং জানন্তো।
62. Saṅghikaṃ lābhaṃ pariṇataṃ jānaṃ jānanto.
৬৩. পযোগেতি পরিণামনপযোগে। সব্বত্থাতি পারাজিকাদীসু সব্বসিক্খাপদেসু। অপ্পনাৰারপরিহানীতি পরিৰারে পঠমং ৰুত্তকত্থপঞ্ঞত্তিৰারস্স পরিহাপনং, ইধ অৰচনন্তি অত্থো, তস্স ৰারস্স পরিৰারে সব্বপঠমত্তা পঠমং ৰত্তব্বভাৰেপি তত্থ ৰত্তব্বং পচ্ছা গণ্হিতুকামেন মযা তং ঠপেত্ৰা পঠমং আপত্তিদস্সনত্থং তদনন্তরো কতাপত্তিৰারো পঠমং ৰুত্তোতি অধিপ্পাযো।
63.Payogeti pariṇāmanapayoge. Sabbatthāti pārājikādīsu sabbasikkhāpadesu. Appanāvāraparihānīti parivāre paṭhamaṃ vuttakatthapaññattivārassa parihāpanaṃ, idha avacananti attho, tassa vārassa parivāre sabbapaṭhamattā paṭhamaṃ vattabbabhāvepi tattha vattabbaṃ pacchā gaṇhitukāmena mayā taṃ ṭhapetvā paṭhamaṃ āpattidassanatthaṃ tadanantaro katāpattivāro paṭhamaṃ vuttoti adhippāyo.
পত্তৰগ্গৰণ্ণনা ততিযা।
Pattavaggavaṇṇanā tatiyā.
ইতি উত্তরে লীনত্থপকাসনিযা
Iti uttare līnatthapakāsaniyā
তিংসনিস্সগ্গিযকথাৰণ্ণনা নিট্ঠিতা।
Tiṃsanissaggiyakathāvaṇṇanā niṭṭhitā.
৬৪. মনুস্সুত্তরিধম্মেতি উত্তরিমনুস্সধম্মে। অভূতস্মিং উত্তরিমনুস্সধম্মে সমুল্লপিতে পরাজযো পারাজিকাপত্তি।
64.Manussuttaridhammeti uttarimanussadhamme. Abhūtasmiṃ uttarimanussadhamme samullapite parājayo pārājikāpatti.
৬৫. অমূলন্তিমৰত্থুনা অমূলকেন পারাজিকেন ধম্মেন ভিক্খুং চোদনায গরু সঙ্ঘাদিসেসো হোতীতি যোজনা। পরিযাযৰচনেতি ‘‘যো তে ৰিহারে ৰসতী’’তিআদিনা (পরি॰ ২৮৭) পরিযাযেন কথনে। ঞাতেতি যস্স কথেতি, তস্মিং ৰচনানন্তরমেৰ ঞাতে।
65.Amūlantimavatthunā amūlakena pārājikena dhammena bhikkhuṃ codanāya garu saṅghādiseso hotīti yojanā. Pariyāyavacaneti ‘‘yo te vihāre vasatī’’tiādinā (pari. 287) pariyāyena kathane. Ñāteti yassa katheti, tasmiṃ vacanānantarameva ñāte.
৬৬. নো চে পন ৰিজানাতীতি অথ তং পরিযাযেন ৰুত্তং ৰচনানন্তরমেৰ সচে ন জানাতি। সমুদাহটন্তি কথিতং।
66.Noce pana vijānātīti atha taṃ pariyāyena vuttaṃ vacanānantarameva sace na jānāti. Samudāhaṭanti kathitaṃ.
৬৭. ওমসতো ভিক্খুস্স দুৰে আপত্তিযো ৰুত্তা। উপসম্পন্নং ওমসতো পাচিত্তি সিযা। ইতরং অনুপসম্পন্নং ওমসতো দুক্কটং সিযাতি যোজনা।
67. Omasato bhikkhussa duve āpattiyo vuttā. Upasampannaṃ omasato pācitti siyā. Itaraṃ anupasampannaṃ omasato dukkaṭaṃ siyāti yojanā.
৬৮. পেসুঞ্ঞহরণেপি দ্ৰে আপত্তিযো হোন্তি।
68. Pesuññaharaṇepi dve āpattiyo honti.
৬৯. পযোগেতি পদসো ধম্মং ৰাচেন্তস্স ৰচনকিরিযারম্ভতো পট্ঠায যাৰ পদাদীনং পরিসমাপনং, এত্থন্তরে অক্খরুচ্চারণপযোগে দুক্কটং। পদানং পরিসমত্তিযং পাচিত্তিযং।
69.Payogeti padaso dhammaṃ vācentassa vacanakiriyārambhato paṭṭhāya yāva padādīnaṃ parisamāpanaṃ, etthantare akkharuccāraṇapayoge dukkaṭaṃ. Padānaṃ parisamattiyaṃ pācittiyaṃ.
৭০. ‘‘তিরত্তা অনুপসম্পন্নসহসেয্যাযা’’তি পদচ্ছেদো। অনুপসম্পন্নেন সহসেয্যা অনুপসম্পন্নসহসেয্যা, তায। তিরত্তা উত্তরিং অনুপসম্পন্নসহসেয্যাযাতি যোজনা। পযোগেতি সযনত্থায সেয্যাপঞ্ঞাপনকাযাৰজ্জনাদিপুব্বপযোগে। পন্নেতি কাযপসারণলক্খণেন সযনেন নিপন্নে।
70. ‘‘Tirattā anupasampannasahaseyyāyā’’ti padacchedo. Anupasampannena sahaseyyā anupasampannasahaseyyā, tāya. Tirattā uttariṃ anupasampannasahaseyyāyāti yojanā. Payogeti sayanatthāya seyyāpaññāpanakāyāvajjanādipubbapayoge. Panneti kāyapasāraṇalakkhaṇena sayanena nipanne.
৭১. যো পন ভিক্খু একরত্তিযং মাতুগামেন সহসেয্যং কপ্পেতি। দুক্কটাদযোতি ‘‘পযোগে দুক্কটং, নিপন্নে পাচিত্তিয’’ন্তি যথাৰুত্তদ্ৰেআপত্তিযো আপজ্জতীতি যোজনা।
71. Yo pana bhikkhu ekarattiyaṃ mātugāmena sahaseyyaṃ kappeti. Dukkaṭādayoti ‘‘payoge dukkaṭaṃ, nipanne pācittiya’’nti yathāvuttadveāpattiyo āpajjatīti yojanā.
৭২. পযোগেতি যথাৰুত্তলক্খণপযোগে।
72.Payogeti yathāvuttalakkhaṇapayoge.
৭৩. অনুপসম্পন্নেতি সমীপত্থে চেতং ভুম্মং। অনুপসম্পন্নস্স সন্তিকে ভূতং উত্তরিমনুস্সধম্মং যো সচে আরোচেতীতি যোজনা। দুক্কটাদযোতি যস্স আরোচেতি, সো নপ্পটিৰিজানাতি, দুক্কটং, পটিৰিজানাতি, পাচিত্তিযন্তি এৰং দ্ৰে আপত্তিযো তস্স হোন্তি।
73.Anupasampanneti samīpatthe cetaṃ bhummaṃ. Anupasampannassa santike bhūtaṃ uttarimanussadhammaṃ yo sace ārocetīti yojanā. Dukkaṭādayoti yassa āroceti, so nappaṭivijānāti, dukkaṭaṃ, paṭivijānāti, pācittiyanti evaṃ dve āpattiyo tassa honti.
৭৪. অঞ্ঞতো অঞ্ঞস্স উপসম্পন্নস্স দুট্ঠুল্লস্স আপত্তিং অনুপসম্পন্নে অনুপসম্পন্নস্স সন্তিকে ৰদং ৰদন্তোতি যোজনা। পযোগেতি আরম্ভতো পট্ঠায পুব্বপযোগে দুক্কটং আগচ্ছতি দুক্কটং আপজ্জতি। আরোচিতে পাচিত্তি সিযাতি যোজনা।
74.Aññato aññassa upasampannassa duṭṭhullassa āpattiṃ anupasampanne anupasampannassa santike vadaṃ vadantoti yojanā. Payogeti ārambhato paṭṭhāya pubbapayoge dukkaṭaṃ āgacchati dukkaṭaṃ āpajjati. Ārocite pācitti siyāti yojanā.
৭৫. পযোগেতি ‘‘অকপ্পিযপথৰিং খণিস্সামী’’তি কুদাল পরিযেসনাদিসব্বপযোগেতি।
75.Payogeti ‘‘akappiyapathaviṃ khaṇissāmī’’ti kudāla pariyesanādisabbapayogeti.
মুসাৰাদৰগ্গৰণ্ণনা পঠমা।
Musāvādavaggavaṇṇanā paṭhamā.
৭৬. পাতেন্তোতি ৰিকোপেন্তো। তস্সাতি ভূতগামস্স। পাতেতি ৰিকোপনে।
76.Pātentoti vikopento. Tassāti bhūtagāmassa. Pāteti vikopane.
৭৭. অঞ্ঞৰাদকৰিহেসকানং একযোগনিদ্দিট্ঠত্তা তত্থ ৰুত্তনযেনেৰ ৰিহেসকে চ ঞাতুং সক্কাতি তত্থ ৰিসুং আপত্তিভেদো ন ৰুত্তো।
77. Aññavādakavihesakānaṃ ekayoganiddiṭṭhattā tattha vuttanayeneva vihesake ca ñātuṃ sakkāti tattha visuṃ āpattibhedo na vutto.
৭৮. পরন্তি অঞ্ঞং সঙ্ঘেন সম্মতসেনাসনপঞ্ঞাপকাদিকং উপসম্পন্নং। উজ্ঝাপেন্তোতি তস্স অযসং উপ্পাদেতুকামতায ভিক্খূহি অৰজানাপেতুং ‘‘ছন্দায ইত্থন্নামো ইদং নাম করোতী’’তিআদীনি ৰত্ৰা অৰঞ্ঞায ওলোকাপেন্তো, লামকতো ৰা চিন্তাপেন্তো। পযোগেতি উজ্ঝাপনত্থায তস্স অৰণ্ণভণনাদিকে পুব্বপযোগে।
78.Paranti aññaṃ saṅghena sammatasenāsanapaññāpakādikaṃ upasampannaṃ. Ujjhāpentoti tassa ayasaṃ uppādetukāmatāya bhikkhūhi avajānāpetuṃ ‘‘chandāya itthannāmo idaṃ nāma karotī’’tiādīni vatvā avaññāya olokāpento, lāmakato vā cintāpento. Payogeti ujjhāpanatthāya tassa avaṇṇabhaṇanādike pubbapayoge.
৮৩. সঙ্ঘিকে ৰিহারে পুব্বূপগতং ভিক্খুং জানং জানন্তো অনুপখজ্জ সেয্যং কপ্পেতি, তস্সেৰং সেয্যং কপ্পযতোতি যোজনা। পযোগেদুক্কটাদযোতি এত্থ অলুত্তসমাসো। আদি-সদ্দেন সেয্যাকপ্পনে পাচিত্তিযং সঙ্গণ্হাতি।
83. Saṅghike vihāre pubbūpagataṃ bhikkhuṃ jānaṃ jānanto anupakhajja seyyaṃ kappeti, tassevaṃ seyyaṃ kappayatoti yojanā. Payogedukkaṭādayoti ettha aluttasamāso. Ādi-saddena seyyākappane pācittiyaṃ saṅgaṇhāti.
৮৪. পযোগেতি ‘‘নিক্কড্ঢথ ইম’’ন্তিআদিকে আণত্তিকে ৰা ‘‘যাহি যাহী’’তিআদিকে ৰাচসিকে ৰা হত্থেন তস্স অঙ্গপরামসনাদিৰসেন কতে কাযিকে ৰা নিক্কড্ঢনপযোগে। সেসন্তি পাচিত্তিযং।
84.Payogeti ‘‘nikkaḍḍhatha ima’’ntiādike āṇattike vā ‘‘yāhi yāhī’’tiādike vācasike vā hatthena tassa aṅgaparāmasanādivasena kate kāyike vā nikkaḍḍhanapayoge. Sesanti pācittiyaṃ.
৮৫. ‘‘ৰেহাসকুটিযা উপরী’’তি পদচ্ছেদো। আহচ্চপাদকেতি এত্থ ‘‘মঞ্চে ৰা পীঠে ৰা’’তি সেসো। সীদন্তি নিসীদন্তো। দুক্কটাদযোতি পযোগে দুক্কটং, নিপজ্জায পাচিত্তিযন্তি ইমা আপত্তিযো ফুসেতি অত্থো।
85. ‘‘Vehāsakuṭiyā uparī’’ti padacchedo. Āhaccapādaketi ettha ‘‘mañce vā pīṭhe vā’’ti seso. Sīdanti nisīdanto. Dukkaṭādayoti payoge dukkaṭaṃ, nipajjāya pācittiyanti imā āpattiyo phuseti attho.
৮৬. অস্স পজ্জস্স পঠমপাদং দসক্খরপাদকং ছন্দোৰিচিতিযং ৰুত্তগাথা, ‘‘গাথাছন্দো অতীতদ্ৰয’’ন্তি ইমিনা ছন্দোৰিচিতিলক্খণেন গাথাছন্দত্তা অধিট্ঠিত্ৰা দ্ৰত্তিপরিযাযেতি এত্থ অক্খরদ্ৰযং অধিকং ৰুত্তন্তি দট্ঠব্বং। পযোগেতি অধিট্ঠানপযোগে। অধিট্ঠিতেতি দ্ৰত্তিপরিযাযানং উপরি অধিট্ঠানে কতে।
86. Assa pajjassa paṭhamapādaṃ dasakkharapādakaṃ chandovicitiyaṃ vuttagāthā, ‘‘gāthāchando atītadvaya’’nti iminā chandovicitilakkhaṇena gāthāchandattā adhiṭṭhitvā dvattipariyāyeti ettha akkharadvayaṃ adhikaṃ vuttanti daṭṭhabbaṃ. Payogeti adhiṭṭhānapayoge. Adhiṭṭhiteti dvattipariyāyānaṃ upari adhiṭṭhāne kate.
৮৭. পযোগেতি সিঞ্চনসিঞ্চাপনপযোগে। সিত্তেতি সিঞ্চনকিরিযপরিযোসানে।
87.Payogeti siñcanasiñcāpanapayoge. Sitteti siñcanakiriyapariyosāne.
ভূতগামৰগ্গৰণ্ণনা দুতিযা।
Bhūtagāmavaggavaṇṇanā dutiyā.
৮৮. দুক্কটং ফুসেতি যোজনা। ওৰদিতে পাচিত্তি সিযাতি যোজনা।
88. Dukkaṭaṃ phuseti yojanā. Ovadite pācitti siyāti yojanā.
৮৯. ৰিভাগোযেৰ ৰিভাগতা।
89. Vibhāgoyeva vibhāgatā.
৯০. অঞ্ঞাতিকায ভিক্খুনিযা অঞ্ঞত্র পারিৰত্তকা চীৰরং দেন্তো ভিক্খু দুৰে আপত্তিযো ফুসেতি যোজনা। পযোগেতি দানপযোগে।
90.Aññātikāya bhikkhuniyā aññatra pārivattakā cīvaraṃ dento bhikkhu duve āpattiyo phuseti yojanā. Payogeti dānapayoge.
৯৩. ‘‘নাৰং এক’’ন্তি পদচ্ছেদো। পযোগেতি অভিরুহণপযোগে। দুক্কটাদযোতি আদি-সদ্দেন অভিরুল়্হে পাচিত্তিযং সঙ্গণ্হাতি।
93. ‘‘Nāvaṃ eka’’nti padacchedo. Payogeti abhiruhaṇapayoge. Dukkaṭādayoti ādi-saddena abhiruḷhe pācittiyaṃ saṅgaṇhāti.
৯৪. ‘‘দুৰিধং আপত্তি’’ন্তি পদচ্ছেদো।
94. ‘‘Duvidhaṃ āpatti’’nti padacchedo.
৯৬. ভিক্খুনিযা সদ্ধিং রহো নিসজ্জং কপ্পেন্তো ভিক্খু পযোগেদুক্কটাদযো দ্ৰেপি আপত্তিযো ফুসেতি যোজনা।
96. Bhikkhuniyā saddhiṃ raho nisajjaṃ kappento bhikkhu payogedukkaṭādayo dvepi āpattiyo phuseti yojanā.
ওৰাদৰগ্গৰণ্ণনা ততিযা।
Ovādavaggavaṇṇanā tatiyā.
৯৭. তদুত্তরিন্তি ততো ভুঞ্জিতুং অনুঞ্ঞাতএকদিৰসতো উত্তরিং দুতিযদিৰসতো পট্ঠায। অনন্তরস্স ৰগ্গস্সাতি ওৰাদৰগ্গস্স। নৰমেনাতি ভিক্খুনিযা পরিপাচিতপিণ্ডপাতসিক্খাপদেন।
97.Taduttarinti tato bhuñjituṃ anuññātaekadivasato uttariṃ dutiyadivasato paṭṭhāya. Anantarassa vaggassāti ovādavaggassa. Navamenāti bhikkhuniyā paripācitapiṇḍapātasikkhāpadena.
৯৯. দ্ৰত্তিপত্তেতি দ্ৰত্তিপত্তপূরে। তদুত্তরিন্তি দ্ৰত্তিপত্তপূরতো উত্তরিং। পযোগেতি পটিগ্গহণপযোগে।
99.Dvattipatteti dvattipattapūre. Taduttarinti dvattipattapūrato uttariṃ. Payogeti paṭiggahaṇapayoge.
১০১. অভিহট্ঠুন্তি অভিহরিত্ৰা।
101.Abhihaṭṭhunti abhiharitvā.
১০২. তস্সাতি অভিহরন্তস্স। পিটকেতি ৰিনযপিটকে।
102.Tassāti abhiharantassa. Piṭaketi vinayapiṭake.
১০৩. দসমেপীতি এত্থ ‘‘দসমে অপী’’তি পদচ্ছেদো।
103.Dasamepīti ettha ‘‘dasame apī’’ti padacchedo.
ভোজনৰগ্গৰণ্ণনা চতুত্থা।
Bhojanavaggavaṇṇanā catutthā.
১০৪. অচেলকাদিনোতি আদি-সদ্দেন ‘‘পরিব্বাজকস্স ৰা পরিব্বাজিকায ৰা’’তি (পাচি॰ ২৭০) ৰুত্তে সঙ্গণ্হাতি। ভোজনাদিকন্তি আদি-সদ্দেন খাদনীযং সঙ্গণ্হাতি। পযোগেতি সহত্থা দানপযোগে।
104.Acelakādinoti ādi-saddena ‘‘paribbājakassa vā paribbājikāya vā’’ti (pāci. 270) vutte saṅgaṇhāti. Bhojanādikanti ādi-saddena khādanīyaṃ saṅgaṇhāti. Payogeti sahatthā dānapayoge.
১০৫. দাপেত্ৰা ৰা অদাপেত্ৰা ৰা কিঞ্চি আমিসং। পযোগেতি উয্যোজনপযোগে। তস্মিন্তি তস্মিং ভিক্খুম্হি। উয্যোজিতে পাচিত্তি সিযাতি যোজনা।
105.Dāpetvā vā adāpetvā vā kiñci āmisaṃ. Payogeti uyyojanapayoge. Tasminti tasmiṃ bhikkhumhi. Uyyojite pācitti siyāti yojanā.
১০৯. উম্মারাতিক্কমেতি ইন্দখীলাতিক্কমে।
109.Ummārātikkameti indakhīlātikkame.
১১০. তদুত্তরিন্তি ততো পরিচ্ছিন্নরত্তিপরিযন্ততো ৰা পরিচ্ছিন্নভেসজ্জপরিযন্ততো ৰা উত্তরিং।
110.Taduttarinti tato paricchinnarattipariyantato vā paricchinnabhesajjapariyantato vā uttariṃ.
১১১. উয্যুত্তং দস্সনত্থায গচ্ছন্তো দ্ৰে আপত্তিযো ফুসেতি যোজনা।
111. Uyyuttaṃ dassanatthāya gacchanto dve āpattiyo phuseti yojanā.
অচেলকৰগ্গৰণ্ণনা পঞ্চমা।
Acelakavaggavaṇṇanā pañcamā.
১১৪. মেরেয্যন্তি মেরযং। নিরুত্তিনযেন অ-কারস্স এ-কারো, য-কারস্স চ দ্ৰিত্তং। মেরয-সদ্দপরিযাযো ৰা মেরেয্য-সদ্দো। মুনীতি ভিক্খু।
114.Mereyyanti merayaṃ. Niruttinayena a-kārassa e-kāro, ya-kārassa ca dvittaṃ. Meraya-saddapariyāyo vā mereyya-saddo. Munīti bhikkhu.
১১৫. ‘‘ভিক্খু অঙ্গুলিপতোদেনা’’তি পদচ্ছেদো। পযোগেতি হাসাপনপযোগে। তস্সাতি হাসাপেন্তস্স।
115. ‘‘Bhikkhu aṅgulipatodenā’’ti padacchedo. Payogeti hāsāpanapayoge. Tassāti hāsāpentassa.
১১৬. গোপ্ফকা হেট্ঠা উদকে দুক্কটং। গোপ্ফকতো উপরি উপরিগোপ্ফকং, উদকং, তস্মিং, গোপ্ফকতো অধিকপ্পমাণে উদকেতি অত্থো।
116. Gopphakā heṭṭhā udake dukkaṭaṃ. Gopphakato upari uparigopphakaṃ, udakaṃ, tasmiṃ, gopphakato adhikappamāṇe udaketi attho.
১১৭. অনাদরিযন্তি পুগ্গলানাদরিযং, ধম্মানাদরিযং ৰা। পযোগেতি অনাদরিযৰসেন পৰত্তে কাযপযোগে ৰা ৰচীপযোগে ৰা। কতে অনাদরিযে।
117.Anādariyanti puggalānādariyaṃ, dhammānādariyaṃ vā. Payogeti anādariyavasena pavatte kāyapayoge vā vacīpayoge vā. Kate anādariye.
১১৮. পযোগেতি ভিংসাপনপযোগে।
118.Payogeti bhiṃsāpanapayoge.
১১৯. জোতিন্তি অগ্গিং। সমাদহিত্ৰানাতি জালেত্ৰা। ‘‘ৰিসিব্বেন্তো’’তি ইমিনা ফলূপচারেন কারণং ৰুত্তং। ৰিসিব্বনকিরিযা হি সমাদহনকিরিযায ফলন্তি ৰিসিব্বনকিরিযাৰোহারেন সমাদহনকিরিযাৰ। তস্মা ৰিসিব্বেন্তোতি এত্থ সমাদহন্তোতি অত্থো। পযোগেতি সমাদহনসমাদহাপনপযোগে। ৰিসীৰিতেতি ৰুত্তনযেন সমাদহিতেতি অত্থো।
119.Jotinti aggiṃ. Samādahitvānāti jāletvā. ‘‘Visibbento’’ti iminā phalūpacārena kāraṇaṃ vuttaṃ. Visibbanakiriyā hi samādahanakiriyāya phalanti visibbanakiriyāvohārena samādahanakiriyāva. Tasmā visibbentoti ettha samādahantoti attho. Payogeti samādahanasamādahāpanapayoge. Visīviteti vuttanayena samādahiteti attho.
১২০. পযোগেতি চুণ্ণমত্তিকাভিসঙ্খরণাদিসব্বপযোগে। ইতরন্তি পাচিত্তিযং।
120.Payogeti cuṇṇamattikābhisaṅkharaṇādisabbapayoge. Itaranti pācittiyaṃ.
১২১. তিণ্ণং দুব্বণ্ণকরণানন্তি কংসনীলপত্তনীলকদ্দমসঙ্খাতানং তিণ্ণং দুব্বণ্ণকরণানং। একং অঞ্ঞতরং অনাদিয অদত্ৰা। চীৰরন্তি নৰচীৰরং।
121.Tiṇṇaṃ dubbaṇṇakaraṇānanti kaṃsanīlapattanīlakaddamasaṅkhātānaṃ tiṇṇaṃ dubbaṇṇakaraṇānaṃ. Ekaṃ aññataraṃ anādiya adatvā. Cīvaranti navacīvaraṃ.
১২২. নত্থি এতস্স উদ্ধারন্তি অনুদ্ধারো, তং অনুদ্ধারন্তি ৰত্তব্বে গাথাবন্ধৰসেন রস্সত্তং, অকতপচ্চুদ্ধারন্তি অত্থো।
122. Natthi etassa uddhāranti anuddhāro, taṃ anuddhāranti vattabbe gāthābandhavasena rassattaṃ, akatapaccuddhāranti attho.
১২৩. অপনিধেন্তোতি অপনেত্ৰা নিধেন্তো নিক্খিপেন্তো। পত্তাদিকন্তি আদি-সদ্দেন চীৰরনিসীদনসূচিঘরকাযবন্ধনানং গহণং। পযোগেতি অপনিধানপযোগে। তস্মিং পত্তাদিকে পঞ্চৰিধে পরিক্খারে। অপনিহিতে সেসা পাচিত্তিযাপত্তি সিযাতি যোজনা।
123.Apanidhentoti apanetvā nidhento nikkhipento. Pattādikanti ādi-saddena cīvaranisīdanasūcigharakāyabandhanānaṃ gahaṇaṃ. Payogeti apanidhānapayoge. Tasmiṃ pattādike pañcavidhe parikkhāre. Apanihite sesā pācittiyāpatti siyāti yojanā.
সুরাপানৰগ্গৰণ্ণনা ছট্ঠা।
Surāpānavaggavaṇṇanā chaṭṭhā.
১২৪. তপোধনোতি পাতিমোক্খসংৰরসীলসঙ্খাতং তপোধনমস্সাতি তপোধনো, ভিক্খু।
124.Tapodhanoti pātimokkhasaṃvarasīlasaṅkhātaṃ tapodhanamassāti tapodhano, bhikkhu.
১২৫. তস্মিং ওপাতে।
125.Tasmiṃ opāte.
১২৬. মনুস্সৰিগ্গহো মনুস্সসরীরো। তিরচ্ছানগতো নাগো ৰা সুপণ্ণো ৰা। তস্স ওপাতখণকস্স।
126.Manussaviggaho manussasarīro. Tiracchānagato nāgo vā supaṇṇo vā. Tassa opātakhaṇakassa.
১২৭. পটুবুদ্ধিনাতি সব্বেসু ঞেয্যধম্মেসু নিপুনঞাণেন ভগৰতা।
127.Paṭubuddhināti sabbesu ñeyyadhammesu nipunañāṇena bhagavatā.
১২৮. পযোগেতি পরিভোগত্থায গহণাদিকে পযোগে। তস্সাতি ভিক্খুস্স।
128.Payogeti paribhogatthāya gahaṇādike payoge. Tassāti bhikkhussa.
১২৯. উক্কোটেন্তোতি উচ্চালেন্তো যথাঠানে ঠাতুং অদেন্তো। পযোগেতি উক্কোটনপযোগে। উক্কোটিতে পাচিত্তিযং সিযাতি যোজনা।
129.Ukkoṭentoti uccālento yathāṭhāne ṭhātuṃ adento. Payogeti ukkoṭanapayoge. Ukkoṭite pācittiyaṃ siyāti yojanā.
১৩০. দুট্ঠুল্লং ৰজ্জকন্তি সঙ্ঘাদিসেসাদিকে। একং পাচিত্তিযং আপত্তিং আপজ্জতি ইতি দীপিতন্তি যোজনা।
130.Duṭṭhullaṃ vajjakanti saṅghādisesādike. Ekaṃ pācittiyaṃ āpattiṃ āpajjati iti dīpitanti yojanā.
১৩১. পযোগেতি গণপরিযেসনাদিপযোগে। দুক্কটং পত্তো সিযা দুক্কটাপত্তিং আপন্নো ভৰেয্যাতি অত্থো। সেসাতি পাচিত্তিযাপত্তি উপসম্পাদিতে সিযা। গাথাবন্ধৰসেন উপসগ্গলোপো।
131.Payogeti gaṇapariyesanādipayoge. Dukkaṭaṃ patto siyā dukkaṭāpattiṃ āpanno bhaveyyāti attho. Sesāti pācittiyāpatti upasampādite siyā. Gāthābandhavasena upasaggalopo.
১৩২-৩. জানং থেয্যসত্থেন সহ সংৰিধায মগ্গং পটিপজ্জতো চ তথেৰ মাতুগামেন সহ সংৰিধায মগ্গং পটিপজ্জতো চাতি যোজনা। পযোগেতি সংৰিধায গন্তুং পটিপুচ্ছাদিকরণপযোগে। পটিপন্নেতি মগ্গপটিপন্নে। অনন্তরন্তি অদ্ধযোজনগামন্তরাতিক্কমনানন্তরং।
132-3. Jānaṃ theyyasatthena saha saṃvidhāya maggaṃ paṭipajjato ca tatheva mātugāmena saha saṃvidhāya maggaṃ paṭipajjato cāti yojanā. Payogeti saṃvidhāya gantuṃ paṭipucchādikaraṇapayoge. Paṭipanneti maggapaṭipanne. Anantaranti addhayojanagāmantarātikkamanānantaraṃ.
১৩৪. ঞত্তিযা ওসানে দুক্কটং ফুসেতি যোজনা।
134. Ñattiyā osāne dukkaṭaṃ phuseti yojanā.
১৩৫. অকতানুধম্মেনাতি অনুধম্মো ৰুচ্চতি আপত্তিযা অদস্সনে ৰা অপ্পটিকম্মে ৰা পাপিকায দিট্ঠিযা অপ্পটিনিস্সগ্গে ৰা ধম্মেন ৰিনযেন সত্থুসাসনেন উক্খিত্তকস্স অনুলোমৰত্তং দিস্ৰা কত্ৰা ওসারণা, সো ওসারণসঙ্খাতো অনুধম্মো যস্স ন কতো, অযং অকতানুধম্মো নাম, তাদিসেন ভিক্খুনা সদ্ধিন্তি অত্থো। সম্ভুঞ্জন্তোতি আমিসসম্ভোগং করোন্তো ভিক্খু। পযোগেতি ভুঞ্জিতুং আমিসপটিগ্গহণাদিপযোগে। ভুত্তেতি সম্ভুত্তে, উভযসম্ভোগে, তদঞ্ঞতরে ৰা কতেতি অত্থো।
135.Akatānudhammenāti anudhammo vuccati āpattiyā adassane vā appaṭikamme vā pāpikāya diṭṭhiyā appaṭinissagge vā dhammena vinayena satthusāsanena ukkhittakassa anulomavattaṃ disvā katvā osāraṇā, so osāraṇasaṅkhāto anudhammo yassa na kato, ayaṃ akatānudhammo nāma, tādisena bhikkhunā saddhinti attho. Sambhuñjantoti āmisasambhogaṃ karonto bhikkhu. Payogeti bhuñjituṃ āmisapaṭiggahaṇādipayoge. Bhutteti sambhutte, ubhayasambhoge, tadaññatare vā kateti attho.
১৩৬. উপলাপেন্তোতি পত্তচীৰরউদ্দেসপরিপুচ্ছনাদিৰসেন সঙ্গণ্হন্তো। পযোগেতি উপলাপনপযোগে।
136.Upalāpentoti pattacīvarauddesaparipucchanādivasena saṅgaṇhanto. Payogeti upalāpanapayoge.
সপ্পাণকৰগ্গৰণ্ণনা সত্তমা।
Sappāṇakavaggavaṇṇanā sattamā.
১৩৭. সহধম্মিকন্তি করণত্থে উপযোগৰচনং, পঞ্চহি সহধম্মিকেহি সিক্খিতব্বত্তা, তেসং ৰা সন্তকত্তা ‘‘সহধম্মিক’’ন্তি লদ্ধনামেন বুদ্ধপঞ্ঞত্তেন সিক্খাপদেন ৰুচ্চমানস্সাতি অত্থো। ভণতোতি ‘‘ভিক্খুস্সা’’তি ইমিনা সমানাধিকরণং।
137.Sahadhammikanti karaṇatthe upayogavacanaṃ, pañcahi sahadhammikehi sikkhitabbattā, tesaṃ vā santakattā ‘‘sahadhammika’’nti laddhanāmena buddhapaññattena sikkhāpadena vuccamānassāti attho. Bhaṇatoti ‘‘bhikkhussā’’ti iminā samānādhikaraṇaṃ.
১৩৮. ৰিৰণ্ণেন্তোতি ‘‘কিং পনিমেহি খুদ্দানুখুদ্দকেহি সিক্খাপদেহি উদ্দিট্ঠেহী’’তিআদিনা গরহন্তো। পযোগেতি ‘‘কিং ইমেহী’’তিআদিনা গরহণৰসেন পৰত্তে ৰচীপযোগে। ৰিৰণ্ণিতে গরহিতে।
138.Vivaṇṇentoti ‘‘kiṃ panimehi khuddānukhuddakehi sikkhāpadehi uddiṭṭhehī’’tiādinā garahanto. Payogeti ‘‘kiṃ imehī’’tiādinā garahaṇavasena pavatte vacīpayoge. Vivaṇṇite garahite.
১৩৯. মোহেন্তোতি ‘‘ইদানেৰ খো অহং, আৰুসো, জানামী’’তিআদিনা অত্তনো অজাননত্তেন আপন্নভাৰং দীপেত্ৰা ভিক্খুং মোহেন্তো, ৰঞ্চেন্তোতি অত্থো। মোহেতি মোহারোপনকম্মে। অরোপিতে কতে।
139.Mohentoti ‘‘idāneva kho ahaṃ, āvuso, jānāmī’’tiādinā attano ajānanattena āpannabhāvaṃ dīpetvā bhikkhuṃ mohento, vañcentoti attho. Moheti mohāropanakamme. Aropite kate.
১৪০. ভিক্খুস্স কুপিতো পহারং দেন্তো ফুসেতি যোজনা। পযোগেতি দণ্ডাদানাদিপযোগে।
140. Bhikkhussa kupito pahāraṃ dento phuseti yojanā. Payogeti daṇḍādānādipayoge.
১৪১. পযোগেতি উগ্গিরণপযোগে। উগ্গিরিতেতি উচ্চারিতে।
141.Payogeti uggiraṇapayoge. Uggiriteti uccārite.
১৪২. অমূলেনেৰাতি দিট্ঠাদিমূলৰিরহিতেনেৰ। যোগেতি ওকাসকারাপনাদিপযোগে। উদ্ধংসিতেতি চোদিতে।
142.Amūlenevāti diṭṭhādimūlavirahiteneva. Yogeti okāsakārāpanādipayoge. Uddhaṃsiteti codite.
১৪৩. কুক্কুচ্চং জনযন্তোতি ‘‘ঊনৰীসতিৰস্সো ত্ৰং মঞ্ঞে উপসম্পন্নো’’তিআদিনা কুক্কুচ্চং উপদহন্তো। যোগেতি কুক্কুচ্চুপ্পাদনপযোগে। উপ্পাদিতেতি কুক্কুচ্চে উপ্পাদিতে।
143.Kukkuccaṃ janayantoti ‘‘ūnavīsativasso tvaṃ maññe upasampanno’’tiādinā kukkuccaṃ upadahanto. Yogeti kukkuccuppādanapayoge. Uppāditeti kukkucce uppādite.
১৪৪. ‘‘তিট্ঠন্তো উপস্সুতি’’ন্তি পদচ্ছেদো। সুতিযা সমীপং উপস্সুতি, সৰনূপচারেতি অত্থো।
144. ‘‘Tiṭṭhanto upassuti’’nti padacchedo. Sutiyā samīpaṃ upassuti, savanūpacāreti attho.
১৪৫. ধম্মিকানং তু কম্মানন্তি ধম্মেন ৰিনযেন সত্থুসাসনেন কতানং অপলোকনাদীনং চতুন্নং কম্মানং। ততো পুনাতি ছন্দদানতো পচ্ছা। খীযনধম্মন্তি অত্তনো অধিপ্পেতভাৰৰিভাৰনমন্তনং। দ্ৰে ফুসে দুক্কটাদযোতি খীযনধম্মাপজ্জনপযোগে দুক্কটং, খীযনধম্মে আপন্নে পাচিত্তিযন্তি এৰং দুক্কটাদযো দ্ৰে আপত্তিযো আপজ্জেয্যাতি অত্থো।
145.Dhammikānaṃ tu kammānanti dhammena vinayena satthusāsanena katānaṃ apalokanādīnaṃ catunnaṃ kammānaṃ. Tato punāti chandadānato pacchā. Khīyanadhammanti attano adhippetabhāvavibhāvanamantanaṃ. Dve phuse dukkaṭādayoti khīyanadhammāpajjanapayoge dukkaṭaṃ, khīyanadhamme āpanne pācittiyanti evaṃ dukkaṭādayo dve āpattiyo āpajjeyyāti attho.
১৪৬. সঙ্ঘে সঙ্ঘমজ্ঝে। ৰিনিচ্ছযেতি ৰত্থুতো ওতিণ্ণৰিনিচ্ছযে। নিট্ঠং অগতেতি ৰত্থুম্হি অৰিনিচ্ছিতে, ঞত্তিং ঠপেত্ৰা কম্মৰাচায ৰা অপরিযোসিতায।
146.Saṅghe saṅghamajjhe. Vinicchayeti vatthuto otiṇṇavinicchaye. Niṭṭhaṃ agateti vatthumhi avinicchite, ñattiṃ ṭhapetvā kammavācāya vā apariyositāya.
১৪৮. সমগ্গেন সঙ্ঘেনাতি সমানসংৰাসকেন সমানসীমাযং ঠিতেন সঙ্ঘেন।
148.Samaggena saṅghenāti samānasaṃvāsakena samānasīmāyaṃ ṭhitena saṅghena.
সহধম্মিকৰগ্গৰণ্ণনা অট্ঠমা।
Sahadhammikavaggavaṇṇanā aṭṭhamā.
১৫০. অৰিদিতো হুত্ৰাতি রঞ্ঞো অৰিদিতাগমনো হুত্ৰা।
150.Aviditohutvāti rañño aviditāgamano hutvā.
১৫২. রতনন্তি মুত্তাদিদসৰিধং রতনং। পযোগেতি রতনগ্গহণপযোগে।
152.Ratananti muttādidasavidhaṃ ratanaṃ. Payogeti ratanaggahaṇapayoge.
১৫৩. ৰিকালেতি মজ্ঝন্তিকাতিক্কমতো পট্ঠায অরুণে।
153.Vikāleti majjhantikātikkamato paṭṭhāya aruṇe.
১৫৫. অট্ঠিদন্তৰিসাণাভিনিব্বত্তন্তি অট্ঠিদন্তৰিসাণমযং। পযোগেতি কারাপনপযোগে।
155.Aṭṭhidantavisāṇābhinibbattanti aṭṭhidantavisāṇamayaṃ. Payogeti kārāpanapayoge.
১৫৬. তস্মিং মঞ্চাদিম্হি কারাপিতে সেসা পাচিত্তিযাপত্তি সিযাতি যোজনা।
156. Tasmiṃ mañcādimhi kārāpite sesā pācittiyāpatti siyāti yojanā.
রতনৰগ্গৰণ্ণনা নৰমা।
Ratanavaggavaṇṇanā navamā.
ইতি উত্তরে লীনত্থপকাসনিযা
Iti uttare līnatthapakāsaniyā
পাচিত্তিযকথাৰণ্ণনা নিট্ঠিতা।
Pācittiyakathāvaṇṇanā niṭṭhitā.
১৫৯. চতূসু পাটিদেসনীযেসুপি অৰিসেসেন আদিচ্চবন্ধুনা বুদ্ধেন দ্ৰিধা আপত্তি নিদ্দিট্ঠাতি যোজনা।
159. Catūsu pāṭidesanīyesupi avisesena ādiccabandhunā buddhena dvidhā āpatti niddiṭṭhāti yojanā.
১৬০. সব্বত্থাতি সব্বেসু চতূসু।
160.Sabbatthāti sabbesu catūsu.
পাটিদেসনীযকথাৰণ্ণনা।
Pāṭidesanīyakathāvaṇṇanā.
১৬১. সেখিযকথা উত্তানত্থাযেৰ।
161. Sekhiyakathā uttānatthāyeva.
সেখিযকথাৰণ্ণনা।
Sekhiyakathāvaṇṇanā.
১৬২. পরিৰারে পঠমং দস্সিতসোল়সৰারপ্পভেদে মহাৰিভঙ্গে ‘‘পঠমং পারাজিকং কত্থ পঞ্ঞত্ত’’ন্তিআদিপ্পভেদো (পরি॰ ১) কত্থপঞ্ঞত্তিৰারো , ‘‘মেথুনং ধম্মং পটিসেৰন্তো কতি আপত্তিযো আপজ্জতী’’তিআদিপ্পভেদো (পরি॰ ১৫৭) কতাপত্তিৰারো, ‘‘মেথুনং ধম্মং পটিসেৰন্তস্স আপত্তিযো চতুন্নং ৰিপত্তীনং কতি ৰিপত্তিযো ভজন্তী’’তিআদিপ্পভেদো (পরি॰ ১৮২) ৰিপত্তিৰারো, ‘‘মেথুনং ধম্মং পটিসেৰন্তস্স আপত্তিযো সত্তন্নং আপত্তিক্খন্ধানং কতিহি আপত্তিক্খন্ধেহি সঙ্গহিতা’’তিআদিপ্পভেদো (পরি॰ ১৮২) সঙ্গহৰারো, ‘‘মেথুনং ধম্মং পটিসেৰন্তস্স আপত্তিযো ছন্নং আপত্তিসমুট্ঠানানং কতিহি সমুট্ঠানেহি সমুট্ঠহন্তী’’তিআদিপ্পভেদো (পরি॰ ১৮৪) সমুট্ঠানৰারো, ‘‘মেথুনং ধম্মং পটিসেৰন্তস্স আপত্তিযো চতুন্নং অধিকরণানং কতমং অধিকরণ’’ন্তিআদিপ্পভেদো (পরি॰ ১৮৫) অধিকরণৰারো, ‘‘মেথুনং ধম্মং পটিসেৰন্তস্স আপত্তিযো সত্তন্নং সমথানং কতিহি সমথেহি সম্মন্তী’’তিআদিপ্পভেদো (পরি॰ ১৮৬) সমথৰারো, তদনন্তরো ইমেহি সত্তহি ৰারেহি মিস্সো অট্ঠমো সমুচ্চযৰারোতি ইমেসু অট্ঠসু ৰারেসু আদিভূতে কত্থপঞ্ঞত্তিনামধেয্যে অপ্পনাৰারে সঙ্গহেতব্বানং নিদানাদিসত্তরসলক্খণানং উভযৰিভঙ্গসাধারণতো উপরি ৰক্খমানত্তা তং ৰারং ঠপেত্ৰা তদনন্তরং অসাধারণং কতাপত্তিৰারং সেখিযাৰসানং পাল়িক্কমানুরূপং দস্সেত্ৰা তদনন্তরা ৰিপত্তিৰারাদযো ছ ৰারা উভযৰিভঙ্গসাধারণতো ৰক্খমানাতি কত্ৰা তেপি ঠপেত্ৰা ইমে পচ্চযসদ্দেন অযোজেত্ৰা দস্সিতা অট্ঠেৰ ৰারা, পুন ‘‘মেথুনং ধম্মং পটিসেৰনপচ্চযা পারাজিকং কত্থ পঞ্ঞত্ত’’ন্তিআদিনা (পরি॰ ১৮৮) পচ্চয-সদ্দং যোজেত্ৰা দস্সিতা অপরে অট্ঠ ৰারা যোজিতাতি তত্থাপি দুতিযং কতাপত্তিপচ্চযৰারং ইমিনা কতাপত্তিৰারেন একপরিচ্ছেদং কত্ৰা দস্সেতুমাহ ‘‘পঞ্ঞত্তা’’তিআদি। পটিসেৰনপচ্চযাতি পটিসেৰনহেতুনা।
162. Parivāre paṭhamaṃ dassitasoḷasavārappabhede mahāvibhaṅge ‘‘paṭhamaṃ pārājikaṃ kattha paññatta’’ntiādippabhedo (pari. 1) katthapaññattivāro , ‘‘methunaṃ dhammaṃ paṭisevanto kati āpattiyo āpajjatī’’tiādippabhedo (pari. 157) katāpattivāro, ‘‘methunaṃ dhammaṃ paṭisevantassa āpattiyo catunnaṃ vipattīnaṃ kati vipattiyo bhajantī’’tiādippabhedo (pari. 182) vipattivāro, ‘‘methunaṃ dhammaṃ paṭisevantassa āpattiyo sattannaṃ āpattikkhandhānaṃ katihi āpattikkhandhehi saṅgahitā’’tiādippabhedo (pari. 182) saṅgahavāro, ‘‘methunaṃ dhammaṃ paṭisevantassa āpattiyo channaṃ āpattisamuṭṭhānānaṃ katihi samuṭṭhānehi samuṭṭhahantī’’tiādippabhedo (pari. 184) samuṭṭhānavāro, ‘‘methunaṃ dhammaṃ paṭisevantassa āpattiyo catunnaṃ adhikaraṇānaṃ katamaṃ adhikaraṇa’’ntiādippabhedo (pari. 185) adhikaraṇavāro, ‘‘methunaṃ dhammaṃ paṭisevantassa āpattiyo sattannaṃ samathānaṃ katihi samathehi sammantī’’tiādippabhedo (pari. 186) samathavāro, tadanantaro imehi sattahi vārehi misso aṭṭhamo samuccayavāroti imesu aṭṭhasu vāresu ādibhūte katthapaññattināmadheyye appanāvāre saṅgahetabbānaṃ nidānādisattarasalakkhaṇānaṃ ubhayavibhaṅgasādhāraṇato upari vakkhamānattā taṃ vāraṃ ṭhapetvā tadanantaraṃ asādhāraṇaṃ katāpattivāraṃ sekhiyāvasānaṃ pāḷikkamānurūpaṃ dassetvā tadanantarā vipattivārādayo cha vārā ubhayavibhaṅgasādhāraṇato vakkhamānāti katvā tepi ṭhapetvā ime paccayasaddena ayojetvā dassitā aṭṭheva vārā, puna ‘‘methunaṃ dhammaṃ paṭisevanapaccayā pārājikaṃ kattha paññatta’’ntiādinā (pari. 188) paccaya-saddaṃ yojetvā dassitā apare aṭṭha vārā yojitāti tatthāpi dutiyaṃ katāpattipaccayavāraṃ iminā katāpattivārena ekaparicchedaṃ katvā dassetumāha ‘‘paññattā’’tiādi. Paṭisevanapaccayāti paṭisevanahetunā.
১৬৩. অল্লোকাসপ্পৰেসনেতি জীৰমানসরীরে তিণ্ণং মগ্গানং অঞ্ঞতরস্মিং মগ্গে অল্লোকাসপ্পৰেসনে। মতে অক্খাযিতে ৰা পি-সদ্দেন যেভুয্যঅক্খাযিতে পৰেসনে পৰেসননিমিত্তং মেথুনং ধম্মং পটিসেৰন্তো ভিক্খু পারাজিকং ফুসেতি সম্বন্ধো।
163.Allokāsappavesaneti jīvamānasarīre tiṇṇaṃ maggānaṃ aññatarasmiṃ magge allokāsappavesane. Mate akkhāyite vā pi-saddena yebhuyyaakkhāyite pavesane pavesananimittaṃ methunaṃ dhammaṃ paṭisevanto bhikkhu pārājikaṃ phuseti sambandho.
১৬৪. তথা যেভুয্যক্খাযিতে, উপড্ঢক্খাযিতে চ মেথুনং ধম্মং পটিসেৰন্তো ভিক্খু থুল্লচ্চযং ফুসেতি যোজনা। ৰট্টকতে মুখে দুক্কটং ৰুত্তন্তি সম্বন্ধো। জতুমট্ঠকেতি ভিক্খুনিযা জতুমট্ঠকে দিন্নে পাচিত্তি ৰুত্তাতি সম্বন্ধো।
164. Tathā yebhuyyakkhāyite, upaḍḍhakkhāyite ca methunaṃ dhammaṃ paṭisevanto bhikkhu thullaccayaṃ phuseti yojanā. Vaṭṭakate mukhe dukkaṭaṃ vuttanti sambandho. Jatumaṭṭhaketi bhikkhuniyā jatumaṭṭhake dinne pācitti vuttāti sambandho.
১৬৬. অৰস্সুতস্সাতি কাযসংসগ্গরাগেন তিন্তস্স। পোসস্সাতি গহণকিরিযাসম্বন্ধে সামিৰচনং। ভিক্খুনিযাতি অত্তসম্বন্ধে সামিৰচনং। ‘‘অত্তনো’’তি সেসো। অৰস্সুতেন পোসেন অত্তনো অধক্খকাদিগহণং সাদিযন্তিযা তথা অৰস্সুতায ভিক্খুনিযা পারাজিকন্তি যোজনা।
166.Avassutassāti kāyasaṃsaggarāgena tintassa. Posassāti gahaṇakiriyāsambandhe sāmivacanaṃ. Bhikkhuniyāti attasambandhe sāmivacanaṃ. ‘‘Attano’’ti seso. Avassutena posena attano adhakkhakādigahaṇaṃ sādiyantiyā tathā avassutāya bhikkhuniyā pārājikanti yojanā.
১৬৭. কাযেনাতি অত্তনো কাযেন। কাযন্তি মাতুগামস্স কাযং। ফুসতোতি কাযসংসগ্গরাগেন ফুসতো। কাযেন কাযবদ্ধন্তি এত্থাপি এসেৰ নযো।
167.Kāyenāti attano kāyena. Kāyanti mātugāmassa kāyaṃ. Phusatoti kāyasaṃsaggarāgena phusato. Kāyena kāyabaddhanti etthāpi eseva nayo.
১৬৮. কাযেন পটিবদ্ধেনাতি অত্তনো কাযপটিবদ্ধেন। পটিবদ্ধন্তি ইত্থিযা কাযপটিবদ্ধং ফুসন্তস্স দুক্কটং। তস্স ভিক্খুস্স।
168.Kāyena paṭibaddhenāti attano kāyapaṭibaddhena. Paṭibaddhanti itthiyā kāyapaṭibaddhaṃ phusantassa dukkaṭaṃ. Tassa bhikkhussa.
‘‘মহাৰিভঙ্গসঙ্গহো নিট্ঠিতো’’তি কস্মা ৰুত্তং, ননু সোল়সৰারসঙ্গহে মহাৰিভঙ্গে কতাপত্তিৰারোযেৰেত্থ ৰুত্তো, ন ইতরে ৰারাতি? সচ্চং, অৰযৰে পন সমুদাযোপচারেন ৰুত্তং। সাধারণাসাধারণানং মহাৰিভঙ্গে গতানং সব্বাপত্তিপভেদানং দস্সনোপচারভূতো কতাপত্তিৰারো দস্সিতোতি তংদস্সনেন অপ্পধানা ইতরেপি ৰারা উপচারতো দস্সিতা হোন্তীতি চ তথা ৰুত্তন্তি ৰেদিতব্বং।
‘‘Mahāvibhaṅgasaṅgaho niṭṭhito’’ti kasmā vuttaṃ, nanu soḷasavārasaṅgahe mahāvibhaṅge katāpattivāroyevettha vutto, na itare vārāti? Saccaṃ, avayave pana samudāyopacārena vuttaṃ. Sādhāraṇāsādhāraṇānaṃ mahāvibhaṅge gatānaṃ sabbāpattipabhedānaṃ dassanopacārabhūto katāpattivāro dassitoti taṃdassanena appadhānā itarepi vārā upacārato dassitā hontīti ca tathā vuttanti veditabbaṃ.
ইতি উত্তরে লীনত্থপকাসনিযা
Iti uttare līnatthapakāsaniyā
মহাৰিভঙ্গসঙ্গহৰণ্ণনা নিট্ঠিতা।
Mahāvibhaṅgasaṅgahavaṇṇanā niṭṭhitā.
