| Library / Tipiṭaka / তিপিটক • Tipiṭaka / মহানিদ্দেসপাল়ি • Mahāniddesapāḷi |
১৩. মহাৰিযূহসুত্তনিদ্দেসো
13. Mahāviyūhasuttaniddeso
অথ মহাৰিযূহসুত্তনিদ্দেসং ৰক্খতি –
Atha mahāviyūhasuttaniddesaṃ vakkhati –
১৩০.
130.
যে কেচিমে দিট্ঠিপরিব্বসানা, ইদমেৰ সচ্চন্তি চ ৰাদযন্তি 1 ।
Yekecime diṭṭhiparibbasānā, idameva saccanti ca vādayanti2;
সব্বেৰ তে নিন্দমন্ৰানযন্তি, অথো পসংসম্পি লভন্তি তত্থ॥
Sabbeva te nindamanvānayanti, atho pasaṃsampi labhanti tattha.
যে কেচিমে দিট্ঠিপরিব্বসানাতি। যে কেচীতি সব্বেন সব্বং সব্বথা সব্বং অসেসং নিস্সেসং পরিযাদিযনৰচনমেতং – যে কেচীতি। দিট্ঠিপরিব্বসানাতি। সন্তেকে সমণব্রাহ্মণা দিট্ঠিগতিকা; তে দ্ৰাসট্ঠিযা দিট্ঠিগতানং অঞ্ঞতরঞ্ঞতরং দিট্ঠিগতং গহেত্ৰা উগ্গহেত্ৰা গণ্হিত্ৰা পরামসিত্ৰা অভিনিৰিসিত্ৰা সকায সকায দিট্ঠিযা ৰসন্তি সংৰসন্তি আৰসন্তি পরিৰসন্তি। যথা অগারিকা ৰা ঘরেসু ৰসন্তি, সাপত্তিকা ৰা আপত্তীসু ৰসন্তি, সকিলেসা ৰা কিলেসেসু ৰসন্তি; এৰমেৰ সন্তেকে…পে॰… পরিৰসন্তীতি – যে কেচিমে দিট্ঠিপরিব্বসানা।
Ye kecime diṭṭhiparibbasānāti. Ye kecīti sabbena sabbaṃ sabbathā sabbaṃ asesaṃ nissesaṃ pariyādiyanavacanametaṃ – ye kecīti. Diṭṭhiparibbasānāti. Santeke samaṇabrāhmaṇā diṭṭhigatikā; te dvāsaṭṭhiyā diṭṭhigatānaṃ aññataraññataraṃ diṭṭhigataṃ gahetvā uggahetvā gaṇhitvā parāmasitvā abhinivisitvā sakāya sakāya diṭṭhiyā vasanti saṃvasanti āvasanti parivasanti. Yathā agārikā vā gharesu vasanti, sāpattikā vā āpattīsu vasanti, sakilesā vā kilesesu vasanti; evameva santeke…pe… parivasantīti – ye kecime diṭṭhiparibbasānā.
ইদমেৰ সচ্চন্তি চ ৰাদযন্তীতি। ‘‘সস্সতো লোকো, ইদমেৰ সচ্চং মোঘমঞ্ঞ’’ন্তি ৰদন্তি কথেন্তি ভণন্তি দীপযন্তি ৰোহরন্তি। ‘‘অসস্সতো লোকো…পে॰… নেৰ হোতি ন ন হোতি তথাগতো পরং মরণা, ইদমেৰ সচ্চং মোঘমঞ্ঞ’’ন্তি ৰদন্তি কথেন্তি ভণন্তি দীপযন্তি ৰোহরন্তীতি – ইদমেৰ সচ্চন্তি চ ৰাদযন্তি।
Idameva saccanti ca vādayantīti. ‘‘Sassato loko, idameva saccaṃ moghamañña’’nti vadanti kathenti bhaṇanti dīpayanti voharanti. ‘‘Asassato loko…pe… neva hoti na na hoti tathāgato paraṃ maraṇā, idameva saccaṃ moghamañña’’nti vadanti kathenti bhaṇanti dīpayanti voharantīti – idameva saccanti ca vādayanti.
সব্বেৰ তে নিন্দমন্ৰানযন্তীতি। সব্বেৰ তে সমণব্রাহ্মণা নিন্দমেৰ অন্ৰেন্তি, গরহমেৰ অন্ৰেন্তি, অকিত্তিমেৰ অন্ৰেন্তি; সব্বে নিন্দিতাযেৰ হোন্তি, গরহিতাযেৰ হোন্তি, অকিত্তিতাযেৰ হোন্তীতি – সব্বেৰ তে নিন্দমন্ৰানযন্তি।
Sabbeva te nindamanvānayantīti. Sabbeva te samaṇabrāhmaṇā nindameva anventi, garahameva anventi, akittimeva anventi; sabbe ninditāyeva honti, garahitāyeva honti, akittitāyeva hontīti – sabbeva te nindamanvānayanti.
অথো পসংসম্পি লভন্তি তত্থাতি। তত্থ সকায দিট্ঠিযা সকায খন্তিযা সকায রুচিযা সকায লদ্ধিযা পসংসং থোমনং কিত্তিং ৰণ্ণহারিকং লভন্তি পটিলভন্তি উপগচ্ছন্তি ৰিন্দন্তীতি – অথো পসংসম্পি লভন্তি তত্থ।
Atho pasaṃsampi labhanti tatthāti. Tattha sakāya diṭṭhiyā sakāya khantiyā sakāya ruciyā sakāya laddhiyā pasaṃsaṃ thomanaṃ kittiṃ vaṇṇahārikaṃ labhanti paṭilabhanti upagacchanti vindantīti – atho pasaṃsampi labhanti tattha.
তেনাহ সো নিম্মিতো –
Tenāha so nimmito –
‘‘যে কেচিমে দিট্ঠিপরিব্বসানা, ইদমেৰ সচ্চন্তি চ ৰাদযন্তি।
‘‘Ye kecime diṭṭhiparibbasānā, idameva saccanti ca vādayanti;
সব্বেৰ তে নিন্দমন্ৰানযন্তি, অথো পসংসম্পি লভন্তি তত্থা’’তি॥
Sabbeva te nindamanvānayanti, atho pasaṃsampi labhanti tatthā’’ti.
১৩১.
131.
অপ্পঞ্হি এতং ন অলং সমায, দুৰে ৰিৰাদস্স ফলানি ব্রূমি।
Appañhi etaṃ na alaṃ samāya, duve vivādassa phalāni brūmi;
এতম্পি দিস্ৰা ন ৰিৰাদযেথ, খেমাভিপস্সং অৰিৰাদভূমিং॥
Etampi disvā na vivādayetha, khemābhipassaṃ avivādabhūmiṃ.
অপ্পঞ্হি এতং ন অলং সমাযাতি। অপ্পঞ্হি এতন্তি অপ্পকং এতং, ওমকং এতং, থোককং এতং, লামকং এতং, ছতুক্কং এতং, পরিত্তকং এতন্তি – অপ্পঞ্হি এতং। ন অলং সমাযাতি নালং রাগস্স সমায, দোসস্স সমায, মোহস্স সমায , কোধস্স… উপনাহস্স… মক্খস্স… পল়াসস্স… ইস্সায… মচ্ছরিযস্স… মাযায… সাঠেয্যস্স… থম্ভস্স… সারম্ভস্স… মানস্স… অতিমানস্স… মদস্স… পমাদস্স… সব্বকিলেসানং… সব্বদুচ্চরিতানং… সব্বদরথানং … সব্বপরিল়াহানং… সব্বসন্তাপানং… সব্বাকুসলাভিসঙ্খারানং সমায উপসমায ৰূপসমায নিব্বানায পটিনিস্সগ্গায পটিপস্সদ্ধিযাতি – অপ্পঞ্হি এতং ন অলং সমায।
Appañhi etaṃ na alaṃ samāyāti. Appañhi etanti appakaṃ etaṃ, omakaṃ etaṃ, thokakaṃ etaṃ, lāmakaṃ etaṃ, chatukkaṃ etaṃ, parittakaṃ etanti – appañhi etaṃ. Na alaṃ samāyāti nālaṃ rāgassa samāya, dosassa samāya, mohassa samāya , kodhassa… upanāhassa… makkhassa… paḷāsassa… issāya… macchariyassa… māyāya… sāṭheyyassa… thambhassa… sārambhassa… mānassa… atimānassa… madassa… pamādassa… sabbakilesānaṃ… sabbaduccaritānaṃ… sabbadarathānaṃ … sabbapariḷāhānaṃ… sabbasantāpānaṃ… sabbākusalābhisaṅkhārānaṃ samāya upasamāya vūpasamāya nibbānāya paṭinissaggāya paṭipassaddhiyāti – appañhi etaṃ na alaṃ samāya.
দুৰে ৰিৰাদস্স ফলানি ব্রূমীতি। দিট্ঠিকলহস্স দিট্ঠিভণ্ডনস্স দিট্ঠিৰিগ্গহস্স দিট্ঠিৰিৰাদস্স দিট্ঠিমেধগস্স দ্ৰে ফলানি হোন্তি – জযপরাজযো হোতি, লাভালাভো হোতি, যসাযসো হোতি, নিন্দাপসংসো হোতি, সুখদুক্খং হোতি, সোমনস্সদোমনস্সং হোতি, ইট্ঠানিট্ঠং হোতি, অনুনযপটিঘং হোতি, উগ্ঘাতিনিগ্ঘাতি হোতি, অনুরোধৰিরোধো হোতি। অথ ৰা তং কম্মং নিরযসংৰত্তনিকং, তিরচ্ছানযোনিসংৰত্তনিকং, পেত্তিৰিসযসংৰত্তনিকন্তি ব্রূমি আচিক্খামি দেসেমি পঞ্ঞপেমি পট্ঠপেমি ৰিৰরামি ৰিভজামি উত্তানীকরোমি পকাসেমীতি – দুৰে ৰিৰাদস্স ফলানি ব্রূমি।
Duve vivādassa phalāni brūmīti. Diṭṭhikalahassa diṭṭhibhaṇḍanassa diṭṭhiviggahassa diṭṭhivivādassa diṭṭhimedhagassa dve phalāni honti – jayaparājayo hoti, lābhālābho hoti, yasāyaso hoti, nindāpasaṃso hoti, sukhadukkhaṃ hoti, somanassadomanassaṃ hoti, iṭṭhāniṭṭhaṃ hoti, anunayapaṭighaṃ hoti, ugghātinigghāti hoti, anurodhavirodho hoti. Atha vā taṃ kammaṃ nirayasaṃvattanikaṃ, tiracchānayonisaṃvattanikaṃ, pettivisayasaṃvattanikanti brūmi ācikkhāmi desemi paññapemi paṭṭhapemi vivarāmi vibhajāmi uttānīkaromi pakāsemīti – duve vivādassa phalāni brūmi.
এতম্পি দিস্ৰা ন ৰিৰাদযেথাতি। এতম্পি দিস্ৰাতি এতং আদীনৰং দিস্ৰা পস্সিত্ৰা তুলযিত্ৰা তীরযিত্ৰা ৰিভাৰযিত্ৰা ৰিভূতং কত্ৰা দিট্ঠিকলহেসু দিট্ঠিভণ্ডনেসু দিট্ঠিৰিগ্গহেসু দিট্ঠিৰিৰাদেসু দিট্ঠিমেধগেসূতি – এতম্পি দিস্ৰা। ন ৰিৰাদযেথাতি ন কলহং করেয্য, ন ভণ্ডনং করেয্য, ন ৰিগ্গহং করেয্য, ন ৰিৰাদং করেয্য, ন মেধগং করেয্য, কলহং ভণ্ডনং ৰিগ্গহং ৰিৰাদং মেধগং পজহেয্য ৰিনোদেয্য ব্যন্তিং করেয্য অনভাৰং গমেয্য, কলহা ভণ্ডনা ৰিগ্গহা ৰিৰাদা মেধগা আরতো অস্স ৰিরতো পটিৰিরতো নিক্খন্তো নিস্সটো ৰিপ্পমুত্তো ৰিসঞ্ঞুত্তো ৰিমরিযাদিকতেন চেতসা ৰিহরেয্যাতি – এতম্পি দিস্ৰা ন ৰিৰাদযেথ।
Etampi disvā na vivādayethāti. Etampi disvāti etaṃ ādīnavaṃ disvā passitvā tulayitvā tīrayitvā vibhāvayitvā vibhūtaṃ katvā diṭṭhikalahesu diṭṭhibhaṇḍanesu diṭṭhiviggahesu diṭṭhivivādesu diṭṭhimedhagesūti – etampi disvā. Na vivādayethāti na kalahaṃ kareyya, na bhaṇḍanaṃ kareyya, na viggahaṃ kareyya, na vivādaṃ kareyya, na medhagaṃ kareyya, kalahaṃ bhaṇḍanaṃ viggahaṃ vivādaṃ medhagaṃ pajaheyya vinodeyya byantiṃ kareyya anabhāvaṃ gameyya, kalahā bhaṇḍanā viggahā vivādā medhagā ārato assa virato paṭivirato nikkhanto nissaṭo vippamutto visaññutto vimariyādikatena cetasā vihareyyāti – etampi disvā na vivādayetha.
খেমাভিপস্সং অৰিৰাদভূমিন্তি। অৰিৰাদভূমিং ৰুচ্চতি অমতং নিব্বানং। যো সো সব্বসঙ্খারসমথো সব্বূপধিপটিনিস্সগ্গো তণ্হক্খযো ৰিরাগো নিরোধো নিব্বানং। এতং অৰিৰাদভূমিং খেমতো তাণতো লেণতো সরণতো অভযতো অচ্চুততো অমততো নিব্বানতো পস্সন্তো দক্খন্তো ওলোকেন্তো নিজ্ঝাযন্তো উপপরিক্খন্তোতি – খেমাভিপস্সং অৰিৰাদভূমিং।
Khemābhipassaṃavivādabhūminti. Avivādabhūmiṃ vuccati amataṃ nibbānaṃ. Yo so sabbasaṅkhārasamatho sabbūpadhipaṭinissaggo taṇhakkhayo virāgo nirodho nibbānaṃ. Etaṃ avivādabhūmiṃ khemato tāṇato leṇato saraṇato abhayato accutato amatato nibbānato passanto dakkhanto olokento nijjhāyanto upaparikkhantoti – khemābhipassaṃ avivādabhūmiṃ.
তেনাহ ভগৰা –
Tenāha bhagavā –
‘‘অপ্পঞ্হি এতং ন অলং সমায, দুৰে ৰিৰাদস্স ফলানি ব্রূমি।
‘‘Appañhi etaṃ na alaṃ samāya, duve vivādassa phalāni brūmi;
এতম্পি দিস্ৰা ন ৰিৰাদযেথ, খেমাভিপস্সং অৰিৰাদভূমি’’ন্তি॥
Etampi disvā na vivādayetha, khemābhipassaṃ avivādabhūmi’’nti.
১৩২.
132.
যা কাচিমা সম্মুতিযো পুথুজ্জা, সব্বাৰ এতা ন উপেতি ৰিদ্ৰা।
Yā kācimā sammutiyo puthujjā, sabbāva etā na upeti vidvā;
অনূপযো সো উপযং কিমেয্য, দিট্ঠে সুতে খন্তিমকুব্বমানো॥
Anūpayo so upayaṃ kimeyya, diṭṭhe sute khantimakubbamāno.
যা কাচিমা সম্মুতিযো পুথুজ্জাতি। যা কাচীতি সব্বেন সব্বং সব্বথা সব্বং অসেসং নিস্সেসং পরিযাদিযনৰচনমেতং – যা কাচীতি। সম্মুতিযোতি। সম্মুতিযো ৰুচ্চন্তি দ্ৰাসট্ঠি দিট্ঠিগতানি দিট্ঠিসম্মুতিযো। পুথুজ্জাতি পুথুজ্জনেহি জনিতা সম্মুতিযোতি পুথুজ্জা, পুথু নানাজনেহি জনিতা ৰা সম্মুতিযোতি পুথুজ্জাতি – যা কাচিমা সম্মুতিযো পুথুজ্জা।
Yākācimā sammutiyo puthujjāti. Yā kācīti sabbena sabbaṃ sabbathā sabbaṃ asesaṃ nissesaṃ pariyādiyanavacanametaṃ – yā kācīti. Sammutiyoti. Sammutiyo vuccanti dvāsaṭṭhi diṭṭhigatāni diṭṭhisammutiyo. Puthujjāti puthujjanehi janitā sammutiyoti puthujjā, puthu nānājanehi janitā vā sammutiyoti puthujjāti – yā kācimā sammutiyo puthujjā.
সব্বাৰ এতা ন উপেতি ৰিদ্ৰাতি। ৰিদ্ৰা ৰিজ্জাগতো ঞাণী ৰিভাৰী মেধাৰী। সব্বাৰ এতা দিট্ঠিসম্মুতিযো নেতি ন উপেতি ন উপগচ্ছতি ন গণ্হাতি ন পরামসতি নাভিনিৰিসতীতি – সব্বাৰ এতা ন উপেতি ৰিদ্ৰা।
Sabbāva etā na upeti vidvāti. Vidvā vijjāgato ñāṇī vibhāvī medhāvī. Sabbāva etā diṭṭhisammutiyo neti na upeti na upagacchati na gaṇhāti na parāmasati nābhinivisatīti – sabbāva etā na upeti vidvā.
অনূপযো সো উপযং কিমেয্যাতি। উপযোতি দ্ৰে উপযা – তণ্হূপযো চ দিট্ঠূপযো চ…পে॰… অযং তণ্হূপযো…পে॰… অযং দিট্ঠূপযো। তস্স তণ্হূপযো পহীনো, দিট্ঠূপযো পটিনিস্সট্ঠো; তণ্হূপযস্স পহীনত্তা, দিট্ঠূপযস্স পটিনিস্সট্ঠত্তা অনূপযো পুগ্গলো কিং রূপং উপেয্য উপগচ্ছেয্য গণ্হেয্য পরামসেয্য অভিনিৰিসেয্য অত্তা মেতি। কিং ৰেদনং… কিং সঞ্ঞং… কিং সঙ্খারে… কিং ৰিঞ্ঞাণং… কিং গতিং… কিং উপপত্তিং… কিং পটিসন্ধিং… কিং ভৰং … কিং সংসারং… কিং ৰট্টং উপেয্য উপগচ্ছেয্য গণ্হেয্য পরামসেয্য অভিনিৰেসেয্যাতি – অনূপযো সো উপযং কিমেয্য।
Anūpayo so upayaṃ kimeyyāti. Upayoti dve upayā – taṇhūpayo ca diṭṭhūpayo ca…pe… ayaṃ taṇhūpayo…pe… ayaṃ diṭṭhūpayo. Tassa taṇhūpayo pahīno, diṭṭhūpayo paṭinissaṭṭho; taṇhūpayassa pahīnattā, diṭṭhūpayassa paṭinissaṭṭhattā anūpayo puggalo kiṃ rūpaṃ upeyya upagaccheyya gaṇheyya parāmaseyya abhiniviseyya attā meti. Kiṃ vedanaṃ… kiṃ saññaṃ… kiṃ saṅkhāre… kiṃ viññāṇaṃ… kiṃ gatiṃ… kiṃ upapattiṃ… kiṃ paṭisandhiṃ… kiṃ bhavaṃ … kiṃ saṃsāraṃ… kiṃ vaṭṭaṃ upeyya upagaccheyya gaṇheyya parāmaseyya abhiniveseyyāti – anūpayo so upayaṃ kimeyya.
দিট্ঠে সুতে খন্তিমকুব্বমানোতি। দিট্ঠে ৰা দিট্ঠসুদ্ধিযা ৰা সুতে ৰা সুতসুদ্ধিযা ৰা মুতে ৰা মুতসুদ্ধিযা ৰা খন্তিং অকুব্বমানো ছন্দং অকুব্বমানো পেমং অকুব্বমানো রাগং অকুব্বমানো অজনযমানো অসঞ্জনযমানো অনিব্বত্তযমানো অনভিনিব্বত্তযমানোতি – দিট্ঠে সুতে খন্তিমকুব্বমানো।
Diṭṭhe sute khantimakubbamānoti. Diṭṭhe vā diṭṭhasuddhiyā vā sute vā sutasuddhiyā vā mute vā mutasuddhiyā vā khantiṃ akubbamāno chandaṃ akubbamāno pemaṃ akubbamāno rāgaṃ akubbamāno ajanayamāno asañjanayamāno anibbattayamāno anabhinibbattayamānoti – diṭṭhe sute khantimakubbamāno.
তেনাহ ভগৰা –
Tenāha bhagavā –
‘‘যা কাচিমা সম্মুতিযো পুথুজ্জা, সব্বাৰ এতা ন উপেতি ৰিদ্ৰা।
‘‘Yā kācimā sammutiyo puthujjā, sabbāva etā na upeti vidvā;
অনূপযো সো উপযং কিমেয্য, দিট্ঠে সুতে খন্তিমকুব্বমানো’’তি॥
Anūpayo so upayaṃ kimeyya, diṭṭhe sute khantimakubbamāno’’ti.
১৩৩.
133.
সীলুত্তমা সঞ্ঞমেনাহু সুদ্ধিং, ৰতং সমাদায উপট্ঠিতাসে।
Sīluttamā saññamenāhu suddhiṃ, vataṃ samādāya upaṭṭhitāse;
ইধেৰ সিক্খেম অথস্স সুদ্ধিং, ভৰূপনীতা কুসলাৰদানা॥
Idheva sikkhema athassa suddhiṃ, bhavūpanītā kusalāvadānā.
সীলুত্তমা সঞ্ঞমেনাহু সুদ্ধিন্তি। সন্তেকে সমণব্রাহ্মণা সীলুত্তমৰাদা; তে সীলমত্তেন সঞ্ঞমমত্তেন সংৰরমত্তেন অৰীতিক্কমমত্তেন সুদ্ধিং ৰিসুদ্ধিং পরিৰিসুদ্ধিং, মুত্তিং ৰিমুত্তিং পরিৰিমুত্তিং আহু 3 ৰদন্তি কথেন্তি ভণন্তি দীপযন্তি ৰোহরন্তি।
Sīluttamā saññamenāhu suddhinti. Santeke samaṇabrāhmaṇā sīluttamavādā; te sīlamattena saññamamattena saṃvaramattena avītikkamamattena suddhiṃ visuddhiṃ parivisuddhiṃ, muttiṃ vimuttiṃ parivimuttiṃ āhu 4 vadanti kathenti bhaṇanti dīpayanti voharanti.
সমণমুণ্ডিকাপুত্তো এৰমাহ – ‘‘চতূহি খো অহং, গহপতি, ধম্মেহি সমন্নাগতং পুরিসপুগ্গলং পঞ্ঞপেমি সম্পন্নকুসলং পরমকুসলং উত্তমপত্তিপত্তং সমণং অযোজ্ঝং। কতমেহি চতূহি? ইধ, গহপতি, ন কাযেন পাপকম্মং করোতি, ন পাপিকং 5 ৰাচং ভাসতি, ন পাপকং সঙ্কপ্পং সঙ্কপ্পেতি, ন পাপকং আজীৰং আজীৰতি। ইমেহি খো অহং, গহপতি , চতূহি ধম্মেহি সমন্নাগতং পুরিসপুগ্গলং পঞ্ঞপেমি সম্পন্নকুসলং পরমকুসলং উত্তমপত্তিপত্তং সমণং অযোজ্ঝং; এৰমেৰ সন্তেকে সমণব্রাহ্মণা সীলুত্তমৰাদা; তে সীলমত্তেন সঞ্ঞমমত্তেন সংৰরমত্তেন অৰীতিক্কমমত্তেন সুদ্ধিং ৰিসুদ্ধিং পরিসুদ্ধিং, মুত্তিং ৰিমুত্তিং পরিমুত্তিং আহু ৰদন্তি কথেন্তি ভণন্তি দীপযন্তি ৰোহরন্তী’’তি – সীলুত্তমা সঞ্ঞমেনাহু সুদ্ধিং।
Samaṇamuṇḍikāputto evamāha – ‘‘catūhi kho ahaṃ, gahapati, dhammehi samannāgataṃ purisapuggalaṃ paññapemi sampannakusalaṃ paramakusalaṃ uttamapattipattaṃ samaṇaṃ ayojjhaṃ. Katamehi catūhi? Idha, gahapati, na kāyena pāpakammaṃ karoti, na pāpikaṃ 6 vācaṃ bhāsati, na pāpakaṃ saṅkappaṃ saṅkappeti, na pāpakaṃ ājīvaṃ ājīvati. Imehi kho ahaṃ, gahapati , catūhi dhammehi samannāgataṃ purisapuggalaṃ paññapemi sampannakusalaṃ paramakusalaṃ uttamapattipattaṃ samaṇaṃ ayojjhaṃ; evameva santeke samaṇabrāhmaṇā sīluttamavādā; te sīlamattena saññamamattena saṃvaramattena avītikkamamattena suddhiṃ visuddhiṃ parisuddhiṃ, muttiṃ vimuttiṃ parimuttiṃ āhu vadanti kathenti bhaṇanti dīpayanti voharantī’’ti – sīluttamā saññamenāhu suddhiṃ.
ৰতং সমাদায উপট্ঠিতাসেতি। ৰতন্তি হত্থিৰতং ৰা অস্সৰতং ৰা গোৰতং ৰা কুক্কুরৰতং ৰা কাকৰতং ৰা ৰাসুদেৰৰতং ৰা বলদেৰৰতং ৰা পুণ্ণভদ্দৰতং ৰা মণিভদ্দৰতং ৰা অগ্গিৰতং ৰা নাগৰতং ৰা সুপণ্ণৰতং ৰা যক্খৰতং ৰা অসুরৰতং ৰা গন্ধব্বৰতং ৰা মহারাজৰতং ৰা চন্দৰতং ৰা সূরিযৰতং ৰা ইন্দৰতং ৰা ব্রহ্মৰতং ৰা দেৰৰতং ৰা দিসাৰতং ৰা আদায সমাদায আদিযিত্ৰা সমাদিযিত্ৰা গণ্হিত্ৰা পরামসিত্ৰা অভিনিৰিসিত্ৰা উপট্ঠিতা পচ্চুপট্ঠিতা অল্লীনা উপগতা অজ্ঝোসিতা অধিমুত্তাতি – ৰতং সমাদায উপট্ঠিতাসে।
Vataṃ samādāya upaṭṭhitāseti. Vatanti hatthivataṃ vā assavataṃ vā govataṃ vā kukkuravataṃ vā kākavataṃ vā vāsudevavataṃ vā baladevavataṃ vā puṇṇabhaddavataṃ vā maṇibhaddavataṃ vā aggivataṃ vā nāgavataṃ vā supaṇṇavataṃ vā yakkhavataṃ vā asuravataṃ vā gandhabbavataṃ vā mahārājavataṃ vā candavataṃ vā sūriyavataṃ vā indavataṃ vā brahmavataṃ vā devavataṃ vā disāvataṃ vā ādāya samādāya ādiyitvā samādiyitvā gaṇhitvā parāmasitvā abhinivisitvā upaṭṭhitā paccupaṭṭhitā allīnā upagatā ajjhositā adhimuttāti – vataṃ samādāya upaṭṭhitāse.
ইধেৰ সিক্খেম অথস্স সুদ্ধিন্তি। ইধাতি সকায দিট্ঠিযা সকায খন্তিযা সকায রুচিযা সকায লদ্ধিযা। সিক্খেমাতি সিক্খেম আচরেম সমাচরেম সমাদায ৰত্তেমাতি – ইধেৰ সিক্খেম। অথস্স সুদ্ধিন্তি অথস্স সুদ্ধিং ৰিসুদ্ধিং পরিসুদ্ধিং, মুত্তিং ৰিমুত্তিং পরিমুত্তিন্তি – ইধেৰ সিক্খেম অথস্স সুদ্ধিং।
Idheva sikkhema athassa suddhinti. Idhāti sakāya diṭṭhiyā sakāya khantiyā sakāya ruciyā sakāya laddhiyā. Sikkhemāti sikkhema ācarema samācarema samādāya vattemāti – idheva sikkhema. Athassa suddhinti athassa suddhiṃ visuddhiṃ parisuddhiṃ, muttiṃ vimuttiṃ parimuttinti – idheva sikkhema athassa suddhiṃ.
ভৰূপনীতা কুসলাৰদানাতি। ভৰূপনীতাতি ভৰূপনীতা ভৰূপগতা ভৰজ্ঝোসিতা ভৰাধিমুত্তাতি – ভৰূপনীতা । কুসলাৰদানাতি কুসলৰাদা পণ্ডিতৰাদা থিরৰাদা ঞাযৰাদা হেতুৰাদা লক্খণৰাদা কারণৰাদা ঠানৰাদা সকায লদ্ধিযাতি – ভৰূপনীতা কুসলাৰদানা।
Bhavūpanītākusalāvadānāti. Bhavūpanītāti bhavūpanītā bhavūpagatā bhavajjhositā bhavādhimuttāti – bhavūpanītā . Kusalāvadānāti kusalavādā paṇḍitavādā thiravādā ñāyavādā hetuvādā lakkhaṇavādā kāraṇavādā ṭhānavādā sakāya laddhiyāti – bhavūpanītā kusalāvadānā.
তেনাহ ভগৰা –
Tenāha bhagavā –
‘‘সীলুত্তমা সঞ্ঞমেনাহু সুদ্ধিং, ৰতং সমাদায উপট্ঠিতাসে।
‘‘Sīluttamā saññamenāhu suddhiṃ, vataṃ samādāya upaṭṭhitāse;
ইধেৰ সিক্খেম অথস্স সুদ্ধিং, ভৰূপনীতা কুসলাৰদানা’’তি॥
Idheva sikkhema athassa suddhiṃ, bhavūpanītā kusalāvadānā’’ti.
১৩৪.
134.
সচে চুতো সীলৰততো হোতি, পৰেধতী 7 কম্মৰিরাধযিত্ৰা।
Sace cuto sīlavatato hoti, pavedhatī8kammavirādhayitvā;
পজপ্পতী 9 পত্থযতী চ সুদ্ধিং, সত্থাৰ হীনো পৰসং ঘরম্হা॥
Pajappatī10patthayatī ca suddhiṃ, satthāva hīno pavasaṃ gharamhā.
সচে চুতো সীলৰততো হোতীতি। দ্ৰীহি কারণেহি সীলৰততো চৰতি – পরৰিচ্ছিন্দনায ৰা চৰতি, অনভিসম্ভুণন্তো ৰা চৰতি। কথং পরৰিচ্ছিন্দনায চৰতি? পরো ৰিচ্ছিন্দতি সো সত্থা ন সব্বঞ্ঞূ, ধম্মো ন স্ৰাক্খাতো, গণো ন সুপ্পটিপন্নো, দিট্ঠি ন ভদ্দিকা, পটিপদা ন সুপঞ্ঞত্তা, মগ্গো ন নিয্যানিকো, নত্থেত্থ সুদ্ধি ৰা ৰিসুদ্ধি ৰা পরিসুদ্ধি ৰা, মুত্তি ৰা ৰিমুত্তি ৰা পরিমুত্তি ৰা, নত্থেত্থ সুজ্ঝন্তি ৰা ৰিসুজ্ঝন্তি ৰা পরিসুজ্ঝন্তি ৰা, মুচ্চন্তি ৰা ৰিমুচ্চন্তি ৰা, পরিমুচ্চন্তি ৰা, হীনা নিহীনা ওমকা লামকা ছতুক্কা পরিত্তাতি। এৰং পরো ৰিচ্ছিন্দতি। এৰং ৰিচ্ছিন্দিযমানো সত্থারা চৰতি, ধম্মক্খানা চৰতি, গণা চৰতি, দিট্ঠিযা চৰতি, পটিপদায চৰতি, মগ্গতো চৰতি। এৰং পরিৰিচ্ছিন্দনায চৰতি। কথং অনভিসম্ভুণন্তো চৰতি? সীলং অনভিসম্ভুণন্তো সীলতো চৰতি, ৰতং অনভিসম্ভুণন্তো ৰততো চৰতি, সীলব্বতং অনভিসম্ভুণন্তো সীলব্বততো চৰতি। এৰং অনভিসম্ভুণন্তো চৰতীতি – সচে চুতো সীলৰততো হোতি।
Sace cuto sīlavatato hotīti. Dvīhi kāraṇehi sīlavatato cavati – paravicchindanāya vā cavati, anabhisambhuṇanto vā cavati. Kathaṃ paravicchindanāya cavati? Paro vicchindati so satthā na sabbaññū, dhammo na svākkhāto, gaṇo na suppaṭipanno, diṭṭhi na bhaddikā, paṭipadā na supaññattā, maggo na niyyāniko, natthettha suddhi vā visuddhi vā parisuddhi vā, mutti vā vimutti vā parimutti vā, natthettha sujjhanti vā visujjhanti vā parisujjhanti vā, muccanti vā vimuccanti vā, parimuccanti vā, hīnā nihīnā omakā lāmakā chatukkā parittāti. Evaṃ paro vicchindati. Evaṃ vicchindiyamāno satthārā cavati, dhammakkhānā cavati, gaṇā cavati, diṭṭhiyā cavati, paṭipadāya cavati, maggato cavati. Evaṃ parivicchindanāya cavati. Kathaṃ anabhisambhuṇanto cavati? Sīlaṃ anabhisambhuṇanto sīlato cavati, vataṃ anabhisambhuṇanto vatato cavati, sīlabbataṃ anabhisambhuṇanto sīlabbatato cavati. Evaṃ anabhisambhuṇanto cavatīti – sace cuto sīlavatato hoti.
পৰেধতি কম্মৰিরাধযিত্ৰাতি। পৰেধতীতি সীলং ৰা ৰতং ৰা সীলব্বতং ৰা ‘‘ৰিরদ্ধং মযা, অপরদ্ধং মযা, খলিতং মযা, গলিতং মযা, অঞ্ঞায অপরদ্ধো অহ’’ন্তি ৰেধতি পৰেধতি সম্পৰেধতীতি – পৰেধতি। কম্মৰিরাধযিত্ৰাতি পুঞ্ঞাভিসঙ্খারং ৰা অপুঞ্ঞাভিসঙ্খারং ৰা আনেঞ্জাভিসঙ্খারং ৰা ‘‘ৰিরদ্ধং মযা, অপরদ্ধং মযা, খলিতং মযা, গলিতং মযা, অঞ্ঞায অপরদ্ধো অহ’’ন্তি ৰেধতি পৰেধতি সম্পৰেধতীতি – পৰেধতি কম্মৰিরাধযিত্ৰা।
Pavedhati kammavirādhayitvāti. Pavedhatīti sīlaṃ vā vataṃ vā sīlabbataṃ vā ‘‘viraddhaṃ mayā, aparaddhaṃ mayā, khalitaṃ mayā, galitaṃ mayā, aññāya aparaddho aha’’nti vedhati pavedhati sampavedhatīti – pavedhati. Kammavirādhayitvāti puññābhisaṅkhāraṃ vā apuññābhisaṅkhāraṃ vā āneñjābhisaṅkhāraṃ vā ‘‘viraddhaṃ mayā, aparaddhaṃ mayā, khalitaṃ mayā, galitaṃ mayā, aññāya aparaddho aha’’nti vedhati pavedhati sampavedhatīti – pavedhati kammavirādhayitvā.
পজপ্পতী পত্থযতী চ সুদ্ধিন্তি। পজপ্পতীতি সীলং ৰা জপ্পতি, ৰতং ৰা জপ্পতি, সীলব্বতং ৰা জপ্পতি পজপ্পতি অভিজপ্পতীতি – পজপ্পতি। পত্থযতী চ সুদ্ধিন্তি সীলসুদ্ধিং ৰা পত্থেতি, ৰতসুদ্ধিং ৰা পত্থেতি, সীলব্বতসুদ্ধিং ৰা পত্থেতি পিহেতি অভিজপ্পতীতি – পজপ্পতী পত্থযতী চ সুদ্ধিং।
Pajappatī patthayatī ca suddhinti. Pajappatīti sīlaṃ vā jappati, vataṃ vā jappati, sīlabbataṃ vā jappati pajappati abhijappatīti – pajappati. Patthayatī ca suddhinti sīlasuddhiṃ vā pattheti, vatasuddhiṃ vā pattheti, sīlabbatasuddhiṃ vā pattheti piheti abhijappatīti – pajappatī patthayatī ca suddhiṃ.
সত্থাৰ হীনো পৰসং ঘরম্হাতি। যথা পুরিসো ঘরতো নিক্খন্তো সত্থেন পৰসং ৰসন্তো সত্থা ওহীনো, তং ৰা সত্থং অনুবন্ধতি সকং ৰা ঘরং পচ্চাগচ্ছতি; এৰমেৰ সো দিট্ঠিগতিকো তং ৰা সত্থারং গণ্হাতি অঞ্ঞং ৰা সত্থারং গণ্হাতি, তং ৰা ধম্মক্খানং গণ্হাতি অঞ্ঞং ৰা ধম্মক্খানং গণ্হাতি, তং ৰা গণং গণ্হাতি অঞ্ঞং ৰা গণং গণ্হাতি, তং ৰা দিট্ঠিং গণ্হাতি অঞ্ঞং ৰা দিট্ঠিং গণ্হাতি, তং ৰা পটিপদং গণ্হাতি অঞ্ঞং ৰা পটিপদং গণ্হাতি, তং ৰা মগ্গং গণ্হাতি অঞ্ঞং ৰা মগ্গং গণ্হাতি পরামসতি অভিনিৰিসতীতি – সত্থাৰ হীনো পৰসং ঘরম্হা।
Satthāva hīno pavasaṃ gharamhāti. Yathā puriso gharato nikkhanto satthena pavasaṃ vasanto satthā ohīno, taṃ vā satthaṃ anubandhati sakaṃ vā gharaṃ paccāgacchati; evameva so diṭṭhigatiko taṃ vā satthāraṃ gaṇhāti aññaṃ vā satthāraṃ gaṇhāti, taṃ vā dhammakkhānaṃ gaṇhāti aññaṃ vā dhammakkhānaṃ gaṇhāti, taṃ vā gaṇaṃ gaṇhāti aññaṃ vā gaṇaṃ gaṇhāti, taṃ vā diṭṭhiṃ gaṇhāti aññaṃ vā diṭṭhiṃ gaṇhāti, taṃ vā paṭipadaṃ gaṇhāti aññaṃ vā paṭipadaṃ gaṇhāti, taṃ vā maggaṃ gaṇhāti aññaṃ vā maggaṃ gaṇhāti parāmasati abhinivisatīti – satthāva hīno pavasaṃ gharamhā.
তেনাহ ভগৰা –
Tenāha bhagavā –
‘‘সচে চুতো সীলৰততো হোতি, পৰেধতী কম্মৰিরাধযিত্ৰা।
‘‘Sace cuto sīlavatato hoti, pavedhatī kammavirādhayitvā;
পজপ্পতী পত্থযতী চ সুদ্ধিং, সত্থাৰ হীনো পৰসং ঘরম্হা’’তি॥
Pajappatī patthayatī ca suddhiṃ, satthāva hīno pavasaṃ gharamhā’’ti.
১৩৫.
135.
সীলব্বতং ৰাপি পহায সব্বং, কম্মঞ্চ সাৰজ্জনৰজ্জমেতং।
Sīlabbataṃvāpi pahāya sabbaṃ, kammañca sāvajjanavajjametaṃ;
সুদ্ধিং অসুদ্ধিন্তি অপত্থযানো, ৰিরতো চরে সন্তিমনুগ্গহায॥
Suddhiṃ asuddhinti apatthayāno, virato care santimanuggahāya.
সীলব্বতং ৰাপি পহায সব্বন্তি। সব্বা সীলসুদ্ধিযো পহায পজহিত্ৰা ৰিনোদেত্ৰা ব্যন্তিং করিত্ৰা অনভাৰং গমেত্ৰা, সব্বা ৰতসুদ্ধিযো পহায পজহিত্ৰা ৰিনোদেত্ৰা ব্যন্তিং করিত্ৰা অনভাৰং গমেত্ৰা, সব্বা সীলব্বতসুদ্ধিযো পহায পজহিত্ৰা ৰিনোদেত্ৰা ব্যন্তিং করিত্ৰা অনভাৰং গমেত্ৰাতি – সীলব্বতং ৰাপি পহায সব্বং।
Sīlabbataṃvāpi pahāya sabbanti. Sabbā sīlasuddhiyo pahāya pajahitvā vinodetvā byantiṃ karitvā anabhāvaṃ gametvā, sabbā vatasuddhiyo pahāya pajahitvā vinodetvā byantiṃ karitvā anabhāvaṃ gametvā, sabbā sīlabbatasuddhiyo pahāya pajahitvā vinodetvā byantiṃ karitvā anabhāvaṃ gametvāti – sīlabbataṃ vāpi pahāya sabbaṃ.
কম্মঞ্চ সাৰজ্জনৰজ্জমেতন্তি। সাৰজ্জকম্মং ৰুচ্চতি – কণ্হং কণ্হৰিপাকং। অনৰজ্জকম্মং ৰুচ্চতি – সুক্কং সুক্কৰিপাকং। সাৰজ্জঞ্চ কম্মং অনৰজ্জঞ্চ কম্মং পহায পজহিত্ৰা ৰিনোদেত্ৰা ব্যন্তিং করিত্ৰা অনভাৰং গমেত্ৰাতি – কম্মঞ্চ সাৰজ্জনৰজ্জমেতং।
Kammañca sāvajjanavajjametanti. Sāvajjakammaṃ vuccati – kaṇhaṃ kaṇhavipākaṃ. Anavajjakammaṃ vuccati – sukkaṃ sukkavipākaṃ. Sāvajjañca kammaṃ anavajjañca kammaṃ pahāya pajahitvā vinodetvā byantiṃ karitvā anabhāvaṃ gametvāti – kammañca sāvajjanavajjametaṃ.
সুদ্ধিং অসুদ্ধিন্তি অপত্থযানোতি। অসুদ্ধিন্তি অসুদ্ধিং পত্থেন্তি, অকুসলে ধম্মে পত্থেন্তি। সুদ্ধিন্তি সুদ্ধিং পত্থেন্তি, পঞ্চ কামগুণে পত্থেন্তি; অসুদ্ধিং পত্থেন্তি, অকুসলে ধম্মে পত্থেন্তি, পঞ্চ কামগুণে পত্থেন্তি; সুদ্ধিং পত্থেন্তি, দ্ৰাসট্ঠি দিট্ঠিগতানি পত্থেন্তি, অসুদ্ধিং পত্থেন্তি, অকুসলে ধম্মে পত্থেন্তি, পঞ্চ কামগুণে পত্থেন্তি, দ্ৰাসট্ঠি দিট্ঠিগতানি পত্থেন্তি; সুদ্ধিং পত্থেন্তি, তেধাতুকে কুসলে ধম্মে পত্থেন্তি, অসুদ্ধিং পত্থেন্তি, অকুসলে ধম্মে পত্থেন্তি, পঞ্চ কামগুণে পত্থেন্তি, দ্ৰাসট্ঠি দিট্ঠিগতানি পত্থেন্তি, তেধাতুকে কুসলে ধম্মে পত্থেন্তি; সুদ্ধিং পত্থেন্তি, পুথুজ্জনকল্যাণকা 11 নিযামাৰক্কন্তিং 12 পত্থেন্তি। সেক্খা অগ্গধম্মং অরহত্তং পত্থেন্তি। অরহত্তে পত্তে অরহা নেৰ অকুসলে ধম্মে পত্থেতি, নপি পঞ্চ কামগুণে পত্থেতি, নপি দ্ৰাসট্ঠি দিট্ঠিগতানি পত্থেতি, নপি তেধাতুকে কুসলে ধম্মে পত্থেতি, নপি নিযামাৰক্কন্তিং পত্থেতি, নপি অগ্গধম্মং অরহত্তং পত্থেতি। পত্থনা সমতিক্কন্তো অরহা ৰুদ্ধিপারিহানিৰীতিৰত্তো 13। সো ৰুট্ঠৰাসো চিণ্ণচরণো…পে॰… জাতিজরামরণসংসারো নত্থি তস্স পুনব্ভৰোতি – সুদ্ধিং অসুদ্ধিন্তি অপত্থযানো।
Suddhiṃ asuddhinti apatthayānoti. Asuddhinti asuddhiṃ patthenti, akusale dhamme patthenti. Suddhinti suddhiṃ patthenti, pañca kāmaguṇe patthenti; asuddhiṃ patthenti, akusale dhamme patthenti, pañca kāmaguṇe patthenti; suddhiṃ patthenti, dvāsaṭṭhi diṭṭhigatāni patthenti, asuddhiṃ patthenti, akusale dhamme patthenti, pañca kāmaguṇe patthenti, dvāsaṭṭhi diṭṭhigatāni patthenti; suddhiṃ patthenti, tedhātuke kusale dhamme patthenti, asuddhiṃ patthenti, akusale dhamme patthenti, pañca kāmaguṇe patthenti, dvāsaṭṭhi diṭṭhigatāni patthenti, tedhātuke kusale dhamme patthenti; suddhiṃ patthenti, puthujjanakalyāṇakā 14 niyāmāvakkantiṃ 15 patthenti. Sekkhā aggadhammaṃ arahattaṃ patthenti. Arahatte patte arahā neva akusale dhamme pattheti, napi pañca kāmaguṇe pattheti, napi dvāsaṭṭhi diṭṭhigatāni pattheti, napi tedhātuke kusale dhamme pattheti, napi niyāmāvakkantiṃ pattheti, napi aggadhammaṃ arahattaṃ pattheti. Patthanā samatikkanto arahā vuddhipārihānivītivatto 16. So vuṭṭhavāso ciṇṇacaraṇo…pe… jātijarāmaraṇasaṃsāro natthi tassa punabbhavoti – suddhiṃ asuddhinti apatthayāno.
ৰিরতো চরে সন্তিমনুগ্গহাযাতি। ৰিরতোতি সুদ্ধিঅসুদ্ধিযা আরতো অস্স ৰিরতো পটিৰিরতো নিক্খন্তো নিস্সটো ৰিপ্পমুত্তো ৰিসঞ্ঞুত্তো, ৰিমরিযাদিকতেন চেতসা ৰিহরতীতি – ৰিরতো। চরেতি চরেয্য ৰিচরেয্য ৰিহরেয্য ইরিযেয্য ৰত্তেয্য পালেয্য যপেয্য যাপেয্যাতি – ৰিরতো চরে। সন্তিমনুগ্গহাযাতি সন্তিযো ৰুচ্চন্তি দ্ৰাসট্ঠি দিট্ঠিগতানি দিট্ঠিসন্তিযো অগণ্হন্তো অপরামসন্তো অনভিনিৰিসন্তোতি – ৰিরতো চরে সন্তিমনুগ্গহায।
Viratocare santimanuggahāyāti. Viratoti suddhiasuddhiyā ārato assa virato paṭivirato nikkhanto nissaṭo vippamutto visaññutto, vimariyādikatena cetasā viharatīti – virato. Careti careyya vicareyya vihareyya iriyeyya vatteyya pāleyya yapeyya yāpeyyāti – virato care. Santimanuggahāyāti santiyo vuccanti dvāsaṭṭhi diṭṭhigatāni diṭṭhisantiyo agaṇhanto aparāmasanto anabhinivisantoti – virato care santimanuggahāya.
তেনাহ ভগৰা –
Tenāha bhagavā –
‘‘সীলব্বতং ৰাপি পহায সব্বং, কম্মঞ্চ সাৰজ্জনৰজ্জমেতং।
‘‘Sīlabbataṃ vāpi pahāya sabbaṃ, kammañca sāvajjanavajjametaṃ;
সুদ্ধিং অসুদ্ধিন্তি অপত্থযানো, ৰিরতো চরে সন্তিমনুগ্গহাযা’’তি॥
Suddhiṃ asuddhinti apatthayāno, virato care santimanuggahāyā’’ti.
১৩৬.
136.
তমূপনিস্সায জিগুচ্ছিতং ৰা, অথ ৰাপি দিট্ঠং ৰ সুতং মুতং ৰা।
Tamūpanissāyajigucchitaṃ vā, atha vāpi diṭṭhaṃ va sutaṃ mutaṃ vā;
উদ্ধংসরা সুদ্ধিমনুত্থুনন্তি, অৰীততণ্হাসে ভৰাভৰেসু॥
Uddhaṃsarā suddhimanutthunanti, avītataṇhāse bhavābhavesu.
তমূপনিস্সায জিগুচ্ছিতং ৰাতি। সন্তেকে সমণব্রাহ্মণা তপোজিগুচ্ছৰাদা তপোজিগুচ্ছসারা তপোজিগুচ্ছনিস্সিতা আনিস্সিতা অল্লীনা উপগতা অজ্ঝোসিতা অধিমুত্তাতি – তমূপনিস্সায জিগুচ্ছিতং ৰা।
Tamūpanissāya jigucchitaṃ vāti. Santeke samaṇabrāhmaṇā tapojigucchavādā tapojigucchasārā tapojigucchanissitā ānissitā allīnā upagatā ajjhositā adhimuttāti – tamūpanissāya jigucchitaṃ vā.
অথ ৰাপি দিট্ঠং ৰ সুতং মুতং ৰাতি। দিট্ঠং ৰা দিট্ঠসুদ্ধিং ৰা সুতং ৰা সুতসুদ্ধিং ৰা মুতং ৰা মুতসুদ্ধিং ৰা নিস্সায উপনিস্সায গণ্হিত্ৰা পরামসিত্ৰা অভিনিৰিসিত্ৰাতি – অথ ৰাপি দিট্ঠং ৰ সুতং মুতং ৰা।
Atha vāpi diṭṭhaṃ va sutaṃ mutaṃ vāti. Diṭṭhaṃ vā diṭṭhasuddhiṃ vā sutaṃ vā sutasuddhiṃ vā mutaṃ vā mutasuddhiṃ vā nissāya upanissāya gaṇhitvā parāmasitvā abhinivisitvāti – atha vāpi diṭṭhaṃ va sutaṃ mutaṃ vā.
উদ্ধংসরা সুদ্ধিমনুত্থুনন্তীতি। সন্তেকে সমণব্রাহ্মণা উদ্ধংসরাৰাদা। কতমে তে সমণব্রাহ্মণা উদ্ধংসরাৰাদা? যে তে সমণব্রাহ্মণা অচ্চন্তসুদ্ধিকা, সংসারসুদ্ধিকা, অকিরিযদিট্ঠিকা, সস্সতৰাদা – ইমে তে সমণব্রাহ্মণা উদ্ধংসরাৰাদা। তে সংসারে সুদ্ধিং ৰিসুদ্ধিং পরিসুদ্ধিং, মুত্তিং ৰিমুত্তিং পরিমুত্তিং থুনন্তি ৰদন্তি কথেন্তি ভণন্তি দীপযন্তি ৰোহরন্তীতি – উদ্ধংসরা সুদ্ধিমনুত্থুনন্তি।
Uddhaṃsarā suddhimanutthunantīti. Santeke samaṇabrāhmaṇā uddhaṃsarāvādā. Katame te samaṇabrāhmaṇā uddhaṃsarāvādā? Ye te samaṇabrāhmaṇā accantasuddhikā, saṃsārasuddhikā, akiriyadiṭṭhikā, sassatavādā – ime te samaṇabrāhmaṇā uddhaṃsarāvādā. Te saṃsāre suddhiṃ visuddhiṃ parisuddhiṃ, muttiṃ vimuttiṃ parimuttiṃ thunanti vadanti kathenti bhaṇanti dīpayanti voharantīti – uddhaṃsarā suddhimanutthunanti.
অৰীততণ্হাসে ভৰাভৰেসূতি। তণ্হাতি রূপতণ্হা সদ্দতণ্হা গন্ধতণ্হা রসতণ্হা ফোট্ঠব্বতণ্হা ধম্মতণ্হা। ভৰাভৰেসূতি ভৰাভৰে কম্মভৰে পুনব্ভৰে কামভৰে, কম্মভৰে কামভৰে পুনব্ভৰে রূপভৰে , কম্মভৰে রূপভৰে পুনব্ভৰে অরূপভৰে, কম্মভৰে অরূপভৰে পুনব্ভৰে পুনপ্পুনব্ভৰে পুনপ্পুনগতিযা পুনপ্পুনউপপত্তিযা পুনপ্পুনপটিসন্ধিযা পুনপ্পুনঅত্তভাৰাভিনিব্বত্তিযা অৰীততণ্হা অৰিগততণ্হা অচত্ততণ্হা অৰন্ততণ্হা অমুত্ততণ্হা অপ্পহীনতণ্হা অপ্পটিনিস্সট্ঠতণ্হাতি – অৰীততণ্হাসে ভৰাভৰেসু।
Avītataṇhāse bhavābhavesūti. Taṇhāti rūpataṇhā saddataṇhā gandhataṇhā rasataṇhā phoṭṭhabbataṇhā dhammataṇhā. Bhavābhavesūti bhavābhave kammabhave punabbhave kāmabhave, kammabhave kāmabhave punabbhave rūpabhave , kammabhave rūpabhave punabbhave arūpabhave, kammabhave arūpabhave punabbhave punappunabbhave punappunagatiyā punappunaupapattiyā punappunapaṭisandhiyā punappunaattabhāvābhinibbattiyā avītataṇhā avigatataṇhā acattataṇhā avantataṇhā amuttataṇhā appahīnataṇhā appaṭinissaṭṭhataṇhāti – avītataṇhāse bhavābhavesu.
তেনাহ ভগৰা –
Tenāha bhagavā –
‘‘তমূপনিস্সায জিগুচ্ছিতং ৰা, অথ ৰাপি দিট্ঠং ৰ সুতং মুতং ৰা।
‘‘Tamūpanissāya jigucchitaṃ vā, atha vāpi diṭṭhaṃ va sutaṃ mutaṃ vā;
উদ্ধংসরা সুদ্ধিমনুত্থুনন্তি, অৰীততণ্হাসে ভৰাভৰেসূ’’তি॥
Uddhaṃsarā suddhimanutthunanti, avītataṇhāse bhavābhavesū’’ti.
১৩৭.
137.
পত্থযমানস্স হি জপ্পিতানি, পৰেধিতং ৰাপি পকপ্পিতেসু।
Patthayamānassa hi jappitāni, pavedhitaṃ vāpi pakappitesu;
চুতূপপাতো ইধ যস্স নত্থি, স কেন ৰেধেয্য কুহিং ৰ জপ্পে॥
Cutūpapāto idha yassa natthi, sa kena vedheyya kuhiṃ va jappe.
পত্থযমানস্স হি জপ্পিতানীতি। পত্থনা ৰুচ্চতি তণ্হা। যো রাগো সারাগো…পে॰… অভিজ্ঝা লোভো অকুসলমূলং। পত্থযমানস্সাতি পত্থযমানস্স ইচ্ছমানস্স সাদিযমানস্স পিহযমানস্স অভিজপ্পযমানস্সাতি – পত্থযমানস্স হি। জপ্পিতানীতি। জপ্পনা ৰুচ্চতি তণ্হা। যো রাগো সারাগো…পে॰… অভিজ্ঝা লোভো অকুসলমূলন্তি – পত্থযমানস্স হি জপ্পিতানি।
Patthayamānassa hi jappitānīti. Patthanā vuccati taṇhā. Yo rāgo sārāgo…pe… abhijjhā lobho akusalamūlaṃ. Patthayamānassāti patthayamānassa icchamānassa sādiyamānassa pihayamānassa abhijappayamānassāti – patthayamānassa hi. Jappitānīti. Jappanā vuccati taṇhā. Yo rāgo sārāgo…pe… abhijjhā lobho akusalamūlanti – patthayamānassa hi jappitāni.
পৰেধিতং ৰাপি পকপ্পিতেসূতি। পকপ্পনাতি দ্ৰে পকপ্পনা – তণ্হাপকপ্পনা চ দিট্ঠিপকপ্পনা চ…পে॰… অযং তণ্হাপকপ্পনা…পে॰… অযং দিট্ঠিপকপ্পনা। পৰেধিতং ৰাপি পকপ্পিতেসূতি। পকপ্পিতং ৰত্থুং অচ্ছেদসঙ্কিনোপি ৰেধেন্তি, অচ্ছিজ্জন্তেপি ৰেধেন্তি, অচ্ছিন্নেপি ৰেধেন্তি; পকপ্পিতং ৰত্থুং ৰিপরিণামসঙ্কিনোপি ৰেধেন্তি, ৰিপরিণমন্তেপি ৰেধেন্তি, ৰিপরিণতেপি ৰেধেন্তি পৰেধেন্তি সম্পৰেধেন্তীতি – পৰেধিতং ৰাপি পকপ্পিতেসু।
Pavedhitaṃ vāpi pakappitesūti. Pakappanāti dve pakappanā – taṇhāpakappanā ca diṭṭhipakappanā ca…pe… ayaṃ taṇhāpakappanā…pe… ayaṃ diṭṭhipakappanā. Pavedhitaṃ vāpi pakappitesūti. Pakappitaṃ vatthuṃ acchedasaṅkinopi vedhenti, acchijjantepi vedhenti, acchinnepi vedhenti; pakappitaṃ vatthuṃ vipariṇāmasaṅkinopi vedhenti, vipariṇamantepi vedhenti, vipariṇatepi vedhenti pavedhenti sampavedhentīti – pavedhitaṃ vāpi pakappitesu.
চুতূপপাতো ইধ যস্স নত্থীতি। যস্সাতি অরহতো খীণাসৰস্স। যস্স গমনং আগমনং গমনাগমনং কালংগতি ভৰাভৰো চুতি চ উপপত্তি চ নিব্বত্তি চ ভেদো চ জাতি চ জরামরণঞ্চ নত্থি ন সন্তি ন সংৰিজ্জন্তি নুপলব্ভন্তি, পহীনা সমুচ্ছিন্না ৰূপসন্তা পটিপস্সদ্ধা অভব্বুপ্পত্তিকা ঞাণগ্গিনা দড্ঢাতি – চুতূপপাতো ইধ যস্স নত্থি।
Cutūpapāto idha yassa natthīti. Yassāti arahato khīṇāsavassa. Yassa gamanaṃ āgamanaṃ gamanāgamanaṃ kālaṃgati bhavābhavo cuti ca upapatti ca nibbatti ca bhedo ca jāti ca jarāmaraṇañca natthi na santi na saṃvijjanti nupalabbhanti, pahīnā samucchinnā vūpasantā paṭipassaddhā abhabbuppattikā ñāṇagginā daḍḍhāti – cutūpapāto idha yassa natthi.
স কেন ৰেধেয্য কুহিং ৰ জপ্পেতি। সো কেন রাগেন ৰেধেয্য, কেন দোসেন ৰেধেয্য, কেন মোহেন ৰেধেয্য, কেন মানেন ৰেধেয্য, কায দিট্ঠিযা ৰেধেয্য, কেন উদ্ধচ্চেন ৰেধেয্য, কায ৰিচিকিচ্ছায ৰেধেয্য, কেহি অনুসযেহি ৰেধেয্য – রত্তোতি ৰা দুট্ঠোতি ৰা মূল়্হোতি ৰা ৰিনিবদ্ধোতি ৰা পরামট্ঠোতি ৰা ৰিক্খেপগতোতি ৰা অনিট্ঠঙ্গতোতি ৰা থামগতোতি ৰা। তে অভিসঙ্খারা পহীনা; অভিসঙ্খারানং পহীনত্তা গতিযা কেন ৰেধেয্য – নেরযিকোতি ৰা তিরচ্ছানযোনিকোতি ৰা পেত্তিৰিসযিকোতি ৰা মনুস্সোতি ৰা দেৰোতি ৰা রূপীতি ৰা অরূপীতি ৰা সঞ্ঞীতি ৰা অসঞ্ঞীতি ৰা নেৰসঞ্ঞীনাসঞ্ঞীতি ৰা, সো হেতু নত্থি পচ্চযো নত্থি কারণং নত্থি যেন ৰেধেয্য পৰেধেয্য সম্পৰেধেয্যাতি – স কেন ৰেধেয্য। কুহিংৰ জপ্পেতি কুহিং ৰা জপ্পেয্য কিম্হি জপ্পেয্য, কত্থ জপ্পেয্য পজপ্পেয্য অভিজপ্পেয্যাতি – স কেন ৰেধেয্য কুহিং ৰ জপ্পে।
Sakena vedheyya kuhiṃ va jappeti. So kena rāgena vedheyya, kena dosena vedheyya, kena mohena vedheyya, kena mānena vedheyya, kāya diṭṭhiyā vedheyya, kena uddhaccena vedheyya, kāya vicikicchāya vedheyya, kehi anusayehi vedheyya – rattoti vā duṭṭhoti vā mūḷhoti vā vinibaddhoti vā parāmaṭṭhoti vā vikkhepagatoti vā aniṭṭhaṅgatoti vā thāmagatoti vā. Te abhisaṅkhārā pahīnā; abhisaṅkhārānaṃ pahīnattā gatiyā kena vedheyya – nerayikoti vā tiracchānayonikoti vā pettivisayikoti vā manussoti vā devoti vā rūpīti vā arūpīti vā saññīti vā asaññīti vā nevasaññīnāsaññīti vā, so hetu natthi paccayo natthi kāraṇaṃ natthi yena vedheyya pavedheyya sampavedheyyāti – sa kena vedheyya. Kuhiṃva jappeti kuhiṃ vā jappeyya kimhi jappeyya, kattha jappeyya pajappeyya abhijappeyyāti – sa kena vedheyya kuhiṃ va jappe.
তেনাহ ভগৰা –
Tenāha bhagavā –
‘‘পত্থযমানস্স হি জপ্পিতানি, পৰেধিতং ৰাপি পকপ্পিতেসু।
‘‘Patthayamānassa hi jappitāni, pavedhitaṃ vāpi pakappitesu;
চুতূপপাতো ইধ যস্স নত্থি, স কেন ৰেধেয্য কুহিং ৰ জপ্পে’’তি॥
Cutūpapāto idha yassa natthi, sa kena vedheyya kuhiṃ va jappe’’ti.
১৩৮.
138.
যমাহু ধম্মং পরমন্তি একে, তমেৰ হীনন্তি পনাহু অঞ্ঞে।
Yamāhu dhammaṃ paramanti eke, tameva hīnanti panāhu aññe;
সচ্চো নু ৰাদো কতমো ইমেসং, সব্বেৰ হীমে কুসলাৰদানা॥
Sacco nu vādo katamo imesaṃ, sabbeva hīme kusalāvadānā.
যমাহু ধম্মং পরমন্তি একেতি। যং ধম্মং দিট্ঠিং পটিপদং মগ্গং একে সমণব্রাহ্মণা ‘‘ইদং পরমং অগ্গং সেট্ঠং ৰিসিট্ঠং পামোক্খং উত্তমং পৰর’’ন্তি , এৰমাহংসু এৰং কথেন্তি এৰং ভণন্তি এৰং দীপযন্তি এৰং ৰোহরন্তীতি – যমাহু ধম্মং পরমন্তি একে।
Yamāhu dhammaṃ paramanti eketi. Yaṃ dhammaṃ diṭṭhiṃ paṭipadaṃ maggaṃ eke samaṇabrāhmaṇā ‘‘idaṃ paramaṃ aggaṃ seṭṭhaṃ visiṭṭhaṃ pāmokkhaṃ uttamaṃ pavara’’nti , evamāhaṃsu evaṃ kathenti evaṃ bhaṇanti evaṃ dīpayanti evaṃ voharantīti – yamāhu dhammaṃ paramanti eke.
তমেৰ হীনন্তি পনাহু অঞ্ঞেতি তমেৰ ধম্মং দিট্ঠিং পটিপদং মগ্গং একে সমণব্রাহ্মণা ‘‘হীনং এতং, নিহীনং এতং, ওমকং এতং, লামকং এতং, ছতুক্কং এতং, পরিত্তকং এত’’ন্তি, এৰমাহংসু এৰং কথেন্তি এৰং ভণন্তি এৰং দীপযন্তি এৰং ৰোহরন্তীতি – তমেৰ হীনন্তি পনাহু অঞ্ঞে।
Tameva hīnanti panāhu aññeti tameva dhammaṃ diṭṭhiṃ paṭipadaṃ maggaṃ eke samaṇabrāhmaṇā ‘‘hīnaṃ etaṃ, nihīnaṃ etaṃ, omakaṃ etaṃ, lāmakaṃ etaṃ, chatukkaṃ etaṃ, parittakaṃ eta’’nti, evamāhaṃsu evaṃ kathenti evaṃ bhaṇanti evaṃ dīpayanti evaṃ voharantīti – tameva hīnanti panāhu aññe.
সচ্চো নু ৰাদো কতমো ইমেসন্তি। ইমেসং সমণব্রাহ্মণানং ৰাদো কতমো সচ্চো তচ্ছো তথো ভূতো যাথাৰো অৰিপরীতোতি – সচ্চো নু ৰাদো কতমো ইমেসং।
Sacconu vādo katamo imesanti. Imesaṃ samaṇabrāhmaṇānaṃ vādo katamo sacco taccho tatho bhūto yāthāvo aviparītoti – sacco nu vādo katamo imesaṃ.
সব্বেৰ হীমে কুসলাৰদানাতি। সব্বেৰিমে সমণব্রাহ্মণা কুসলৰাদা পণ্ডিতৰাদা থিরৰাদা ঞাযৰাদা হেতুৰাদা লক্খণৰাদা কারণৰাদা ঠানৰাদা সকায লদ্ধিযাতি – সব্বেৰ হীমে কুসলাৰদানা।
Sabbeva hīme kusalāvadānāti. Sabbevime samaṇabrāhmaṇā kusalavādā paṇḍitavādā thiravādā ñāyavādā hetuvādā lakkhaṇavādā kāraṇavādā ṭhānavādā sakāya laddhiyāti – sabbeva hīme kusalāvadānā.
তেনাহ সো নিম্মিতো –
Tenāha so nimmito –
‘‘যমাহু ধম্মং পরমন্তি একে, তমেৰ হীনন্তি পনাহু অঞ্ঞে।
‘‘Yamāhu dhammaṃ paramanti eke, tameva hīnanti panāhu aññe;
সচ্চো নু ৰাদো কতমো ইমেসং, সব্বেৰ হীমে কুসলাৰদানা’’তি॥
Sacco nu vādo katamo imesaṃ, sabbeva hīme kusalāvadānā’’ti.
১৩৯.
139.
সকঞ্হি ধম্মং পরিপুণ্ণমাহু, অঞ্ঞস্স ধম্মং পন হীনমাহু।
Sakañhi dhammaṃ paripuṇṇamāhu, aññassa dhammaṃ pana hīnamāhu;
এৰম্পি ৰিগ্গয্হ ৰিৰাদযন্তি, সকং সকং সম্মুতিমাহু সচ্চং॥
Evampi viggayha vivādayanti, sakaṃ sakaṃ sammutimāhu saccaṃ.
সকঞ্হি ধম্মং পরিপুণ্ণমাহূতি সকং ধম্মং দিট্ঠিং পটিপদং মগ্গং একে সমণব্রাহ্মণা ‘‘ইদং সমত্তং পরিপুণ্ণং অনোম’’ন্তি, এৰমাহংসু…পে॰… এৰং ৰোহরন্তীতি – সকঞ্হি ধম্মং পরিপুণ্ণমাহু।
Sakañhi dhammaṃ paripuṇṇamāhūti sakaṃ dhammaṃ diṭṭhiṃ paṭipadaṃ maggaṃ eke samaṇabrāhmaṇā ‘‘idaṃ samattaṃ paripuṇṇaṃ anoma’’nti, evamāhaṃsu…pe… evaṃ voharantīti – sakañhi dhammaṃ paripuṇṇamāhu.
অঞ্ঞস্স ধম্মং পন হীনমাহূতি। অঞ্ঞস্স ধম্মং দিট্ঠিং পটিপদং মগ্গং একে সমণব্রাহ্মণা ‘‘হীনং এতং, নিহীনং এতং, ওমকং এতং, লামকং এতং, ছতুক্কং এতং, পরিত্তকং এত’’ন্তি, এৰমাহংসু এৰং কথেন্তি এৰং ভণন্তি এৰং দীপযন্তি এৰং ৰোহরন্তীতি – অঞ্ঞস্স ধম্মং পন হীনমাহু।
Aññassadhammaṃ pana hīnamāhūti. Aññassa dhammaṃ diṭṭhiṃ paṭipadaṃ maggaṃ eke samaṇabrāhmaṇā ‘‘hīnaṃ etaṃ, nihīnaṃ etaṃ, omakaṃ etaṃ, lāmakaṃ etaṃ, chatukkaṃ etaṃ, parittakaṃ eta’’nti, evamāhaṃsu evaṃ kathenti evaṃ bhaṇanti evaṃ dīpayanti evaṃ voharantīti – aññassa dhammaṃ pana hīnamāhu.
এৰম্পি ৰিগ্গয্হ ৰিৰাদযন্তীতি এৰং গহেত্ৰা উগ্গহেত্ৰা গণ্হিত্ৰা পরামসিত্ৰা অভিনিৰিসিত্ৰা ৰিৰাদযন্তি, কলহং করোন্তি, ভণ্ডনং করোন্তি, ৰিগ্গহং করোন্তি, ৰিৰাদং করোন্তি, মেধগং করোন্তি – ‘‘ন ত্ৰং ইমং ধম্মৰিনযং আজানাসি…পে॰… নিব্বেঠেহি ৰা সচে পহোসী’’তি – এৰম্পি ৰিগ্গয্হ ৰিৰাদযন্তি।
Evampi viggayha vivādayantīti evaṃ gahetvā uggahetvā gaṇhitvā parāmasitvā abhinivisitvā vivādayanti, kalahaṃ karonti, bhaṇḍanaṃ karonti, viggahaṃ karonti, vivādaṃ karonti, medhagaṃ karonti – ‘‘na tvaṃ imaṃ dhammavinayaṃ ājānāsi…pe… nibbeṭhehi vā sace pahosī’’ti – evampi viggayha vivādayanti.
সকং সকং সম্মুতিমাহু সচ্চন্তি। ‘‘সস্সতো লোকো, ইদমেৰ সচ্চং মোঘমঞ্ঞ’’ন্তি – সকং সকং সম্মুতিমাহু সচ্চং। ‘‘অসস্সতো লোকো …পে॰… নেৰ হোতি ন ন হোতি তথাগতো পরং মরণা, ইদমেৰ সচ্চং মোঘমঞ্ঞ’’ন্তি – সকং সকং সম্মুতিমাহু সচ্চং।
Sakaṃ sakaṃ sammutimāhu saccanti. ‘‘Sassato loko, idameva saccaṃ moghamañña’’nti – sakaṃ sakaṃ sammutimāhu saccaṃ. ‘‘Asassato loko …pe… neva hoti na na hoti tathāgato paraṃ maraṇā, idameva saccaṃ moghamañña’’nti – sakaṃ sakaṃ sammutimāhu saccaṃ.
তেনাহ ভগৰা –
Tenāha bhagavā –
‘‘সকঞ্হি ধম্মং পরিপুণ্ণমাহু, অঞ্ঞস্স ধম্মং পন হীনমাহু।
‘‘Sakañhi dhammaṃ paripuṇṇamāhu, aññassa dhammaṃ pana hīnamāhu;
এৰম্পি ৰিগ্গয্হ ৰিৰাদযন্তি, সকং সকং সম্মুতিমাহু সচ্চ’’ন্তি॥
Evampi viggayha vivādayanti, sakaṃ sakaṃ sammutimāhu sacca’’nti.
১৪০.
140.
পরস্স চে ৰম্ভযিতেন হীনো, ন কোচি ধম্মেসু ৰিসেসি অস্স।
Parassace vambhayitena hīno, na koci dhammesu visesi assa;
পুথূ হি অঞ্ঞস্স ৰদন্তি ধম্মং, নিহীনতো সম্হি দল়্হং ৰদানা॥
Puthū hi aññassa vadanti dhammaṃ, nihīnato samhi daḷhaṃ vadānā.
পরস্স চে ৰম্ভযিতেন হীনোতি পরস্স চে ৰম্ভযিতকারণা নিন্দিতকারণা গরহিতকারণা উপৰদিতকারণা পরো বালো হোতি হীনো নিহীনো ওমকো লামকো ছতুক্কো পরিত্তোতি – পরস্স চে ৰম্ভযিতেন হীনো।
Parassace vambhayitena hīnoti parassa ce vambhayitakāraṇā ninditakāraṇā garahitakāraṇā upavaditakāraṇā paro bālo hoti hīno nihīno omako lāmako chatukko parittoti – parassa ce vambhayitena hīno.
ন কোচি ধম্মেসু ৰিসেসি অস্সাতি। ধম্মেসু ন কোচি অগ্গো সেট্ঠো ৰিসিট্ঠো পামোক্খো উত্তমো পৰরো অস্সাতি – ন কোচি ধম্মেসু ৰিসেসি অস্স।
Na koci dhammesu visesi assāti. Dhammesu na koci aggo seṭṭho visiṭṭho pāmokkho uttamo pavaro assāti – na koci dhammesu visesi assa.
পুথূ হি অঞ্ঞস্স ৰদন্তি ধম্মং, নিহীনতোতি। বহুকাপি বহূনং ধম্মং ৰদন্তি উপৰদন্তি নিন্দন্তি গরহন্তি হীনতো নিহীনতো ওমকতো লামকতো ছতুক্কতো পরিত্ততো, বহুকাপি একস্স ধম্মং ৰদন্তি উপৰদন্তি নিন্দন্তি গরহন্তি হীনতো নিহীনতো ওমকতো লামকতো ছতুক্কতো পরিত্ততো, একোপি বহূনং ধম্মং ৰদতি উপৰদতি নিন্দতি গরহতি হীনতো নিহীনতো ওমকতো লামকতো ছতুক্কতো পরিত্ততো, একোপি একস্স ধম্মং ৰদতি উপৰদতি নিন্দতি গরহতি হীনতো নিহীনতো ওমকতো লামকতো ছতুক্কতো পরিত্ততোতি – পুথূ হি অঞ্ঞস্স ৰদন্তি ধম্মং।
Puthūhi aññassa vadanti dhammaṃ, nihīnatoti. Bahukāpi bahūnaṃ dhammaṃ vadanti upavadanti nindanti garahanti hīnato nihīnato omakato lāmakato chatukkato parittato, bahukāpi ekassa dhammaṃ vadanti upavadanti nindanti garahanti hīnato nihīnato omakato lāmakato chatukkato parittato, ekopi bahūnaṃ dhammaṃ vadati upavadati nindati garahati hīnato nihīnato omakato lāmakato chatukkato parittato, ekopi ekassa dhammaṃ vadati upavadati nindati garahati hīnato nihīnato omakato lāmakato chatukkato parittatoti – puthū hi aññassa vadanti dhammaṃ.
নিহীনতো সম্হি দল়্হং ৰদানাতি। ধম্মো সকাযনং, দিট্ঠি সকাযনং, পটিপদা সকাযনং, মগ্গো সকাযনং, সকাযনে দল়্হৰাদা থিরৰাদা বলিকৰাদা অট্ঠিতৰাদাতি – নিহীনতো সম্হি দল়্হং ৰদানা।
Nihīnato samhi daḷhaṃ vadānāti. Dhammo sakāyanaṃ, diṭṭhi sakāyanaṃ, paṭipadā sakāyanaṃ, maggo sakāyanaṃ, sakāyane daḷhavādā thiravādā balikavādā aṭṭhitavādāti – nihīnato samhi daḷhaṃ vadānā.
তেনাহ ভগৰা –
Tenāha bhagavā –
‘‘পরস্স চে ৰম্ভযিতেন হীনো, ন কোচি ধম্মেসু ৰিসেসি অস্স।
‘‘Parassa ce vambhayitena hīno, na koci dhammesu visesi assa;
পুথূ হি অঞ্ঞস্স ৰদন্তি ধম্মং, নিহীনতো সম্হি দল়্হং ৰদানা’’তি॥
Puthū hi aññassa vadanti dhammaṃ, nihīnato samhi daḷhaṃ vadānā’’ti.
১৪১.
141.
সদ্ধম্মপূজাপি 17 পনা তথেৰ, যথা পসংসন্তি সকাযনানি।
Saddhammapūjāpi18panā tatheva, yathā pasaṃsanti sakāyanāni;
সদ্ধম্মপূজাপি পনা তথেৰাতি। কতমা সদ্ধম্মপূজা? সকং সত্থারং সক্করোতি গরুং করোতি মানেতি পূজেতি ‘‘অযং সত্থা সব্বঞ্ঞূ’’তি – অযং সদ্ধম্মপূজা। সকং ধম্মক্খানং সকং গণং সকং দিট্ঠিং সকং পটিপদং সকং মগ্গং সক্করোতি গরুং করোতি মানেতি পূজেতি ‘‘অযং মগ্গো নিয্যানিকো’’তি – অযং সদ্ধম্মপূজা । সদ্ধম্মপূজাপি পনা তথেৰাতি সদ্ধম্মপূজা তথা তচ্ছা ভূতা যাথাৰা অৰিপরীতাতি – সদ্ধম্মপূজাপি পনা তথেৰ।
Saddhammapūjāpi panā tathevāti. Katamā saddhammapūjā? Sakaṃ satthāraṃ sakkaroti garuṃ karoti māneti pūjeti ‘‘ayaṃ satthā sabbaññū’’ti – ayaṃ saddhammapūjā. Sakaṃ dhammakkhānaṃ sakaṃ gaṇaṃ sakaṃ diṭṭhiṃ sakaṃ paṭipadaṃ sakaṃ maggaṃ sakkaroti garuṃ karoti māneti pūjeti ‘‘ayaṃ maggo niyyāniko’’ti – ayaṃ saddhammapūjā . Saddhammapūjāpi panā tathevāti saddhammapūjā tathā tacchā bhūtā yāthāvā aviparītāti – saddhammapūjāpi panā tatheva.
যথা পসংসন্তি সকাযনানীতি। ধম্মো সকাযনং দিট্ঠি সকাযনং পটিপদা সকাযনং মগ্গো সকাযনং, সকাযনানি পসংসন্তি থোমেন্তি কিত্তেন্তি ৰণ্ণেন্তীতি – যথা পসংসন্তি সকাযনানি।
Yathā pasaṃsanti sakāyanānīti. Dhammo sakāyanaṃ diṭṭhi sakāyanaṃ paṭipadā sakāyanaṃ maggo sakāyanaṃ, sakāyanāni pasaṃsanti thomenti kittenti vaṇṇentīti – yathā pasaṃsanti sakāyanāni.
সব্বেৰ ৰাদা তথিযা ভৰেয্যুন্তি সব্বেৰ ৰাদা তথা তচ্ছা ভূতা যাথাৰা অৰিপরীতা ভৰেয্যুন্তি – সব্বেৰ ৰাদা তথিযা ভৰেয্যুং।
Sabbeva vādā tathiyā bhaveyyunti sabbeva vādā tathā tacchā bhūtā yāthāvā aviparītā bhaveyyunti – sabbeva vādā tathiyā bhaveyyuṃ.
সুদ্ধী হি নেসং পচ্চত্তমেৰাতি। পচ্চত্তমেৰ তেসং সমণব্রাহ্মণানং সুদ্ধি ৰিসুদ্ধি পরিসুদ্ধি, মুত্তি ৰিমুত্তি পরিমুত্তীতি – সুদ্ধী হি নেসং পচ্চত্তমেৰ।
Suddhīhi nesaṃ paccattamevāti. Paccattameva tesaṃ samaṇabrāhmaṇānaṃ suddhi visuddhi parisuddhi, mutti vimutti parimuttīti – suddhī hi nesaṃ paccattameva.
তেনাহ ভগৰা –
Tenāha bhagavā –
‘‘সদ্ধম্মপূজাপি পনা তথেৰ, যথা পসংসন্তি সকাযনানি।
‘‘Saddhammapūjāpi panā tatheva, yathā pasaṃsanti sakāyanāni;
সব্বেৰ ৰাদা তথিযা ভৰেয্যুং, সুদ্ধী হি নেসং পচ্চত্তমেৰা’’তি॥
Sabbeva vādā tathiyā bhaveyyuṃ, suddhī hi nesaṃ paccattamevā’’ti.
১৪২.
142.
ন ব্রাহ্মণস্স পরনেয্যমত্থি, ধম্মেসু নিচ্ছেয্য সমুগ্গহীতং।
Nabrāhmaṇassa paraneyyamatthi, dhammesu niccheyya samuggahītaṃ;
তস্মা ৰিৰাদানি উপাতিৰত্তো, ন হি সেট্ঠতো পস্সতি ধম্মমঞ্ঞং॥
Tasmā vivādāni upātivatto, na hi seṭṭhato passati dhammamaññaṃ.
ন ব্রাহ্মণস্স পরনেয্যমত্থীতি। নাতি পটিক্খেপো। ব্রাহ্মণোতি সত্তন্নং ধম্মানং বাহিতত্তা ব্রাহ্মণো…পে॰… অসিতো তাদি পৰুচ্চতে স ব্রহ্মা। ন ব্রাহ্মণস্স পরনেয্যমত্থীতি ব্রাহ্মণস্স পরনেয্যতা নত্থি, ব্রাহ্মণো ন পরনেয্যো, ন পরপত্তিযো, ন পরপচ্চযো, ন পরপটিবদ্ধগূ 23 জানাতি পস্সতি অসম্মূল়্হো সম্পজানো পটিস্সতো। ‘‘সব্বে সঙ্খারা অনিচ্চা’’তি ব্রাহ্মণস্স পরনেয্যতা নত্থি, ব্রাহ্মণো ন পরনেয্যো, ন পরপত্তিযো, ন পরপচ্চযো, ন পরপটিবদ্ধগূ জানাতি পস্সতি অসম্মূল়্হো সম্পজানো পটিস্সতো। ‘‘সব্বে সঙ্খারা দুক্খা’’তি…পে॰… ‘‘যং কিঞ্চি সমুদযধম্মং সব্বং তং নিরোধধম্ম’’ন্ত্ন্ত্তি ব্রাহ্মণস্স পরনেয্যতা নত্থি, ব্রাহ্মণো ন পরনেয্যো , ন পরপত্তিযো, ন পরপচ্চযো, ন পরপটিবদ্ধগূ জানাতি পস্সতি অসম্মূল়্হো সম্পজানো পটিস্সতোতি – ন ব্রাহ্মণস্স পরনেয্যমত্থি।
Na brāhmaṇassa paraneyyamatthīti. Nāti paṭikkhepo. Brāhmaṇoti sattannaṃ dhammānaṃ bāhitattā brāhmaṇo…pe… asito tādi pavuccate sa brahmā. Na brāhmaṇassa paraneyyamatthīti brāhmaṇassa paraneyyatā natthi, brāhmaṇo na paraneyyo, na parapattiyo, na parapaccayo, na parapaṭibaddhagū 24 jānāti passati asammūḷho sampajāno paṭissato. ‘‘Sabbe saṅkhārā aniccā’’ti brāhmaṇassa paraneyyatā natthi, brāhmaṇo na paraneyyo, na parapattiyo, na parapaccayo, na parapaṭibaddhagū jānāti passati asammūḷho sampajāno paṭissato. ‘‘Sabbe saṅkhārā dukkhā’’ti…pe… ‘‘yaṃ kiñci samudayadhammaṃ sabbaṃ taṃ nirodhadhamma’’ntntti brāhmaṇassa paraneyyatā natthi, brāhmaṇo na paraneyyo , na parapattiyo, na parapaccayo, na parapaṭibaddhagū jānāti passati asammūḷho sampajāno paṭissatoti – na brāhmaṇassa paraneyyamatthi.
ধম্মেসু নিচ্ছেয্য সমুগ্গহীতন্তি। ধম্মেসূতি দ্ৰাসট্ঠিযা দিট্ঠিগতেসু। নিচ্ছেয্যাতি নিচ্ছিনিত্ৰা ৰিনিচ্ছিনিত্ৰা ৰিচিনিত্ৰা পৰিচিনিত্ৰা তুলযিত্ৰা তীরযিত্ৰা ৰিভাৰযিত্ৰা ৰিভূতং কত্ৰা। ওধিগ্গাহো বিলগ্গাহো ৰরগ্গাহো কোট্ঠাসগ্গাহো উচ্চযগ্গাহো সমুচ্চযগ্গাহো ‘‘ইদং সচ্চং তথং ভূতং যাথাৰং অৰিপরীত’’ন্তি গহিতং পরামট্ঠং অভিনিৰিট্ঠং অজ্ঝোসিতং অধিমুত্তং নত্থি ন সন্তি ন সংৰিজ্জতি নুপলব্ভতি, পহীনং সমুচ্ছিন্নং ৰূপসন্তং পটিপস্সদ্ধং অভব্বুপ্পত্তিকং ঞাণগ্গিনা দড্ঢন্তি – ধম্মেসু নিচ্ছেয্য সমুগ্গহীতং।
Dhammesu niccheyya samuggahītanti. Dhammesūti dvāsaṭṭhiyā diṭṭhigatesu. Niccheyyāti nicchinitvā vinicchinitvā vicinitvā pavicinitvā tulayitvā tīrayitvā vibhāvayitvā vibhūtaṃ katvā. Odhiggāho bilaggāho varaggāho koṭṭhāsaggāho uccayaggāho samuccayaggāho ‘‘idaṃ saccaṃ tathaṃ bhūtaṃ yāthāvaṃ aviparīta’’nti gahitaṃ parāmaṭṭhaṃ abhiniviṭṭhaṃ ajjhositaṃ adhimuttaṃ natthi na santi na saṃvijjati nupalabbhati, pahīnaṃ samucchinnaṃ vūpasantaṃ paṭipassaddhaṃ abhabbuppattikaṃ ñāṇagginā daḍḍhanti – dhammesu niccheyya samuggahītaṃ.
তস্মা ৰিৰাদানি উপাতিৰত্তোতি। তস্মাতি তস্মা তংকারণা তংহেতু তপ্পচ্চযা তংনিদানা দিট্ঠিকলহানি দিট্ঠিভণ্ডনানি দিট্ঠিৰিগ্গহানি দিট্ঠিৰিৰাদানি দিট্ঠিমেধগানি উপাতিৰত্তো অতিক্কন্তো সমতিক্কন্তো ৰীতিৰত্তোতি – তস্মা ৰিৰাদানি উপাতিৰত্তো।
Tasmā vivādāni upātivattoti. Tasmāti tasmā taṃkāraṇā taṃhetu tappaccayā taṃnidānā diṭṭhikalahāni diṭṭhibhaṇḍanāni diṭṭhiviggahāni diṭṭhivivādāni diṭṭhimedhagāni upātivatto atikkanto samatikkanto vītivattoti – tasmā vivādāni upātivatto.
ন হি সেট্ঠতো পস্সতি ধম্মমঞ্ঞন্তি। অঞ্ঞং সত্থারং ধম্মক্খানং গণং দিট্ঠিং পটিপদং মগ্গং অঞ্ঞত্র সতিপট্ঠানেহি, অঞ্ঞত্র সম্মপ্পধানেহি, অঞ্ঞত্র ইদ্ধিপাদেহি , অঞ্ঞত্র ইন্দ্রিযেহি, অঞ্ঞত্র বলেহি, অঞ্ঞত্র বোজ্ঝঙ্গেহি, অঞ্ঞত্র অরিযা অট্ঠঙ্গিকা মগ্গা, অগ্গং সেট্ঠং ৰিসিট্ঠং পামোক্খং উত্তমং পৰরং ধম্মং ন পস্সতি ন দক্খতি ন ওলোকেতি ন নিজ্ঝাযতি ন উপপরিক্খতীতি – ন হি সেট্ঠতো পস্সতি ধম্মমঞ্ঞং।
Na hi seṭṭhato passati dhammamaññanti. Aññaṃ satthāraṃ dhammakkhānaṃ gaṇaṃ diṭṭhiṃ paṭipadaṃ maggaṃ aññatra satipaṭṭhānehi, aññatra sammappadhānehi, aññatra iddhipādehi , aññatra indriyehi, aññatra balehi, aññatra bojjhaṅgehi, aññatra ariyā aṭṭhaṅgikā maggā, aggaṃ seṭṭhaṃ visiṭṭhaṃ pāmokkhaṃ uttamaṃ pavaraṃ dhammaṃ na passati na dakkhati na oloketi na nijjhāyati na upaparikkhatīti – na hi seṭṭhato passati dhammamaññaṃ.
তেনাহ ভগৰা –
Tenāha bhagavā –
‘‘ন ব্রাহ্মণস্স পরনেয্যমত্থি, ধম্মেসু নিচ্ছেয্য সমুগ্গহীতং।
‘‘Na brāhmaṇassa paraneyyamatthi, dhammesu niccheyya samuggahītaṃ;
তস্মা ৰিৰাদানি উপাতিৰত্তো, ন হি সেট্ঠতো পস্সতি ধম্মমঞ্ঞ’’ন্তি॥
Tasmā vivādāni upātivatto, na hi seṭṭhato passati dhammamañña’’nti.
১৪৩.
143.
জানামি পস্সামি তথেৰ এতং, দিট্ঠিযা একে পচ্চেন্তি সুদ্ধিং।
Jānāmi passāmi tatheva etaṃ, diṭṭhiyā eke paccenti suddhiṃ;
অদক্খি চে কিঞ্হি তুমস্স তেন, অতিসিত্ৰা অঞ্ঞেন ৰদন্তি সুদ্ধিং॥
Adakkhi ce kiñhi tumassa tena, atisitvā aññena vadanti suddhiṃ.
জানামি পস্সামি তথেৰ এতন্তি। জানামীতি পরচিত্তঞাণেন 25 ৰা জানামি, পুব্বেনিৰাসানুস্সতিঞাণেন ৰা জানামি। পস্সামীতি মংসচক্খুনা ৰা পস্সামি, দিব্বেন চক্খুনা ৰা পস্সামি। তথেৰ এতন্তি এতং তথং তচ্ছং ভূতং যাথাৰং অৰিপরীতন্তি – জানামি পস্সামি তথেৰ এতং।
Jānāmi passāmi tatheva etanti. Jānāmīti paracittañāṇena 26 vā jānāmi, pubbenivāsānussatiñāṇena vā jānāmi. Passāmīti maṃsacakkhunā vā passāmi, dibbena cakkhunā vā passāmi. Tatheva etanti etaṃ tathaṃ tacchaṃ bhūtaṃ yāthāvaṃ aviparītanti – jānāmi passāmi tatheva etaṃ.
দিট্ঠিযা একে পচ্চেন্তি সুদ্ধিন্তি। দিট্ঠিযা একে সমণব্রাহ্মণা সুদ্ধিং ৰিসুদ্ধিং পরিসুদ্ধিং, মুত্তিং ৰিমুত্তিং পরিমুত্তিং পচ্চেন্তি। ‘‘সস্সতো লোকো, ইদমেৰ সচ্চং মোঘমঞ্ঞ’’ন্তি দিট্ঠিযা একে সমণব্রাহ্মণা সুদ্ধিং ৰিসুদ্ধিং পরিসুদ্ধিং, মুত্তিং ৰিমুত্তিং পরিমুত্তিং পচ্চেন্তি। ‘‘অসস্সতো লোকো…পে॰… নেৰ হোতি ন ন হোতি তথাগতো পরং মরণা, ইদমেৰ সচ্চং মোঘমঞ্ঞ’’ন্তি দিট্ঠিযা একে সমণব্রাহ্মণা সুদ্ধিং ৰিসুদ্ধিং পরিসুদ্ধিং, মুত্তিং ৰিমুত্তিং পরিমুত্তিং পচ্চেন্তীতি – দিট্ঠিযা একে পচ্চেন্তি সুদ্ধিং।
Diṭṭhiyā eke paccenti suddhinti. Diṭṭhiyā eke samaṇabrāhmaṇā suddhiṃ visuddhiṃ parisuddhiṃ, muttiṃ vimuttiṃ parimuttiṃ paccenti. ‘‘Sassato loko, idameva saccaṃ moghamañña’’nti diṭṭhiyā eke samaṇabrāhmaṇā suddhiṃ visuddhiṃ parisuddhiṃ, muttiṃ vimuttiṃ parimuttiṃ paccenti. ‘‘Asassato loko…pe… neva hoti na na hoti tathāgato paraṃ maraṇā, idameva saccaṃ moghamañña’’nti diṭṭhiyā eke samaṇabrāhmaṇā suddhiṃ visuddhiṃ parisuddhiṃ, muttiṃ vimuttiṃ parimuttiṃ paccentīti – diṭṭhiyā eke paccenti suddhiṃ.
অদক্খি চে কিঞ্হি তুমস্স তেনাতি। অদক্খীতি পরচিত্তঞাণেন ৰা অদক্খি, পুব্বেনিৰাসানুস্সতিঞাণেন ৰা অদক্খি, মংসচক্খুনা ৰা অদক্খি, দিব্বেন চক্খুনা ৰা অদক্খীতি – অদক্খি চে। কিঞ্হি তুমস্স তেনাতি। তস্স তেন দস্সনেন কিং কতং? ন দুক্খপরিঞ্ঞা অত্থি, ন সমুদযস্স পহানং অত্থি, ন মগ্গভাৰনা অত্থি, ন ফলসচ্ছিকিরিযা অত্থি, ন রাগস্স সমুচ্ছেদপহানং অত্থি, ন দোসস্স সমুচ্ছেদপহানং অত্থি, ন মোহস্স সমুচ্ছেদপহানং অত্থি , ন কিলেসানং সমুচ্ছেদপহানং অত্থি, ন সংসারৰট্টস্স উপচ্ছেদো অত্থীতি – অদক্খি চে কিঞ্হি তুমস্স তেন।
Adakkhi ce kiñhi tumassa tenāti. Adakkhīti paracittañāṇena vā adakkhi, pubbenivāsānussatiñāṇena vā adakkhi, maṃsacakkhunā vā adakkhi, dibbena cakkhunā vā adakkhīti – adakkhi ce. Kiñhi tumassa tenāti. Tassa tena dassanena kiṃ kataṃ? Na dukkhapariññā atthi, na samudayassa pahānaṃ atthi, na maggabhāvanā atthi, na phalasacchikiriyā atthi, na rāgassa samucchedapahānaṃ atthi, na dosassa samucchedapahānaṃ atthi, na mohassa samucchedapahānaṃ atthi , na kilesānaṃ samucchedapahānaṃ atthi, na saṃsāravaṭṭassa upacchedo atthīti – adakkhi ce kiñhi tumassa tena.
অতিসিত্ৰা অঞ্ঞেন ৰদন্তি সুদ্ধিন্তি তে তিত্থিযা সুদ্ধিমগ্গং ৰিসুদ্ধিমগ্গং পরিসুদ্ধিমগ্গং ৰোদাতমগ্গং পরিৰোদাতমগ্গং অতিক্কমিত্ৰা সমতিক্কমিত্ৰা ৰীতিৰত্তিত্ৰা অঞ্ঞত্র সতিপট্ঠানেহি, অঞ্ঞত্র সম্মপ্পধানেহি, অঞ্ঞত্র ইদ্ধিপাদেহি, অঞ্ঞত্র ইন্দ্রিযেহি, অঞ্ঞত্র বলেহি অঞ্ঞত্র বোজ্ঝঙ্গেহি, অঞ্ঞত্র অরিযা অট্ঠঙ্গিকা মগ্গা সুদ্ধিং ৰিসুদ্ধিং পরিসুদ্ধিং, মুত্তিং ৰিমুত্তিং পরিমুত্তিং ৰদন্তি কথেন্তি ভণন্তি দীপযন্তি ৰোহরন্তীতি। এৰম্পি অতিসিত্ৰা অঞ্ঞেন ৰদন্তি সুদ্ধিং।
Atisitvā aññena vadanti suddhinti te titthiyā suddhimaggaṃ visuddhimaggaṃ parisuddhimaggaṃ vodātamaggaṃ parivodātamaggaṃ atikkamitvā samatikkamitvā vītivattitvā aññatra satipaṭṭhānehi, aññatra sammappadhānehi, aññatra iddhipādehi, aññatra indriyehi, aññatra balehi aññatra bojjhaṅgehi, aññatra ariyā aṭṭhaṅgikā maggā suddhiṃ visuddhiṃ parisuddhiṃ, muttiṃ vimuttiṃ parimuttiṃ vadanti kathenti bhaṇanti dīpayanti voharantīti. Evampi atisitvā aññena vadanti suddhiṃ.
অথ ৰা বুদ্ধা চ বুদ্ধসাৰকা চ পচ্চেকবুদ্ধা চ তেসং তিত্থিযানং অসুদ্ধিমগ্গং অৰিসুদ্ধিমগ্গং অপরিসুদ্ধিমগ্গং অৰোদাতমগ্গং অপরিৰোদাতমগ্গং অতিক্কমিত্ৰা সমতিক্কমিত্ৰা ৰীতিৰত্তিত্ৰা চতূহি সতিপট্ঠানেহি চতূহি সম্মপ্পধানেহি চতূহি ইদ্ধিপাদেহি পঞ্চহি ইন্দ্রিযেহি পঞ্চহি বলেহি সত্তহি বোজ্ঝঙ্গেহি অরিযেন অট্ঠঙ্গিকেন মগ্গেন সুদ্ধিং ৰিসুদ্ধিং পরিসুদ্ধিং, মুত্তিং ৰিমুত্তিং পরিমুত্তিং ৰদন্তি কথেন্তি ভণন্তি দীপযন্তি ৰোহরন্তীতি – এৰম্পি অতিসিত্ৰা অঞ্ঞেন ৰদন্তি সুদ্ধিং।
Atha vā buddhā ca buddhasāvakā ca paccekabuddhā ca tesaṃ titthiyānaṃ asuddhimaggaṃ avisuddhimaggaṃ aparisuddhimaggaṃ avodātamaggaṃ aparivodātamaggaṃ atikkamitvā samatikkamitvā vītivattitvā catūhi satipaṭṭhānehi catūhi sammappadhānehi catūhi iddhipādehi pañcahi indriyehi pañcahi balehi sattahi bojjhaṅgehi ariyena aṭṭhaṅgikena maggena suddhiṃ visuddhiṃ parisuddhiṃ, muttiṃ vimuttiṃ parimuttiṃ vadanti kathenti bhaṇanti dīpayanti voharantīti – evampi atisitvā aññena vadanti suddhiṃ.
তেনাহ ভগৰা –
Tenāha bhagavā –
‘‘জানামি পস্সামি তথেৰ এতং, দিট্ঠিযা একে পচ্চেন্তি সুদ্ধিং।
‘‘Jānāmi passāmi tatheva etaṃ, diṭṭhiyā eke paccenti suddhiṃ;
অদক্খি চে কিঞ্হি তুমস্স তেন, অতিসিত্ৰা অঞ্ঞেন ৰদন্তি সুদ্ধি’’ন্তি॥
Adakkhi ce kiñhi tumassa tena, atisitvā aññena vadanti suddhi’’nti.
১৪৪.
144.
পস্সং নরো দক্খতি নামরূপং, দিস্ৰান ৰা ঞাযতি 27 তানিমেৰ।
Passaṃ naro dakkhati nāmarūpaṃ, disvāna vā ñāyati28tānimeva;
কামং বহুং পস্সতু অপ্পকং ৰা, ন হি তেন সুদ্ধিং কুসলা ৰদন্তি॥
Kāmaṃ bahuṃ passatu appakaṃ vā, na hi tena suddhiṃ kusalā vadanti.
পস্সং নরো দক্খতি নামরূপন্তি পস্সং নরো দক্খতি পরচিত্তঞাণেন ৰা পস্সন্তো, পুব্বেনিৰাসানুস্সতিঞাণেন ৰা পস্সন্তো, মংসচক্খুনা ৰা পস্সন্তো, দিব্বেন চক্খুনা ৰা পস্সন্তো নামরূপংযেৰ দক্খতি নিচ্চতো সুখতো অত্ততো, ন তেসং ধম্মানং সমুদযং ৰা অত্থঙ্গমং ৰা অস্সাদং ৰা আদীনৰং ৰা নিস্সরণং ৰা দক্খতীতি – পস্সং নরো দক্খতি নামরূপং।
Passaṃnaro dakkhati nāmarūpanti passaṃ naro dakkhati paracittañāṇena vā passanto, pubbenivāsānussatiñāṇena vā passanto, maṃsacakkhunā vā passanto, dibbena cakkhunā vā passanto nāmarūpaṃyeva dakkhati niccato sukhato attato, na tesaṃ dhammānaṃ samudayaṃ vā atthaṅgamaṃ vā assādaṃ vā ādīnavaṃ vā nissaraṇaṃ vā dakkhatīti – passaṃ naro dakkhati nāmarūpaṃ.
দিস্ৰান ৰা ঞাযতি তানিমেৰাতি। দিস্ৰাতি পরচিত্তঞাণেন ৰা দিস্ৰা, পুব্বেনিৰাসানুস্সতিঞাণেন ৰা দিস্ৰা, মংসচক্খুনা ৰা দিস্ৰা, দিব্বেন চক্খুনা ৰা দিস্ৰা, নামরূপংযেৰ দিস্ৰা ঞাযতি নিচ্চতো সুখতো অত্ততো, ন তেসং ধম্মানং সমুদযং ৰা অত্থঙ্গমং ৰা অস্সাদং ৰা আদীনৰং ৰা নিস্সরণং ৰা ঞাযতীতি – দিস্ৰান ৰা ঞাযতি তানিমেৰ।
Disvānavā ñāyati tānimevāti. Disvāti paracittañāṇena vā disvā, pubbenivāsānussatiñāṇena vā disvā, maṃsacakkhunā vā disvā, dibbena cakkhunā vā disvā, nāmarūpaṃyeva disvā ñāyati niccato sukhato attato, na tesaṃ dhammānaṃ samudayaṃ vā atthaṅgamaṃ vā assādaṃ vā ādīnavaṃ vā nissaraṇaṃ vā ñāyatīti – disvāna vā ñāyati tānimeva.
কামং বহুং পস্সতু অপ্পকং ৰাতি। কামং বহুকং ৰা পস্সন্তো নামরূপং অপ্পকং ৰা নিচ্চতো সুখতো অত্ততোতি – কামং বহুং পস্সতু অপ্পকং ৰা।
Kāmaṃ bahuṃ passatu appakaṃ vāti. Kāmaṃ bahukaṃ vā passanto nāmarūpaṃ appakaṃ vā niccato sukhato attatoti – kāmaṃ bahuṃ passatu appakaṃ vā.
ন হি তেন সুদ্ধিং কুসলা ৰদন্তীতি। কুসলাতি যে তে খন্ধকুসলা ধাতুকুসলা আযতনকুসলা পটিচ্চসমুপ্পাদকুসলা সতিপট্ঠানকুসলা সম্মপ্পধানকুসলা ইদ্ধিপাদকুসলা ইন্দ্রিযকুসলা বলকুসলা বোজ্ঝঙ্গকুসলা মগ্গকুসলা ফলকুসলা নিব্বানকুসলা, তে কুসলা পরচিত্তঞাণেন ৰা পুব্বেনিৰাসানুস্সতিঞাণেন ৰা মংসচক্খুনা ৰা দিব্বেন চক্খুনা ৰা নামরূপদস্সনেন সুদ্ধিং ৰিসুদ্ধিং পরিসুদ্ধিং মুত্তিং ৰিমুত্তিং পরিমুত্তিং ন ৰদন্তি ন কথেন্তি ন ভণন্তি ন দীপযন্তি ন ৰোহরন্তীতি – ন হি তেন সুদ্ধিং কুসলা ৰদন্তি।
Na hi tena suddhiṃ kusalā vadantīti. Kusalāti ye te khandhakusalā dhātukusalā āyatanakusalā paṭiccasamuppādakusalā satipaṭṭhānakusalā sammappadhānakusalā iddhipādakusalā indriyakusalā balakusalā bojjhaṅgakusalā maggakusalā phalakusalā nibbānakusalā, te kusalā paracittañāṇena vā pubbenivāsānussatiñāṇena vā maṃsacakkhunā vā dibbena cakkhunā vā nāmarūpadassanena suddhiṃ visuddhiṃ parisuddhiṃ muttiṃ vimuttiṃ parimuttiṃ na vadanti na kathenti na bhaṇanti na dīpayanti na voharantīti – na hi tena suddhiṃ kusalā vadanti.
তেনাহ ভগৰা –
Tenāha bhagavā –
‘‘পস্সং নরো দক্খতি নামরূপং, দিস্ৰান ৰা ঞাযতি তানিমেৰ।
‘‘Passaṃ naro dakkhati nāmarūpaṃ, disvāna vā ñāyati tānimeva;
কামং বহুং পস্সতু অপ্পকং ৰা, ন হি তেন সুদ্ধিং কুসলা ৰদন্তী’’তি॥
Kāmaṃ bahuṃ passatu appakaṃ vā, na hi tena suddhiṃ kusalā vadantī’’ti.
১৪৫.
145.
নিৰিস্সৰাদী ন হি সুব্বিনাযো, পকপ্পিতা দিট্ঠিপুরেক্খরানো।
Nivissavādīna hi subbināyo, pakappitā diṭṭhipurekkharāno;
যং নিস্সিতো তত্থ সুভং ৰদানো, সুদ্ধিং ৰদো তত্থ তথদ্দসা সো॥
Yaṃ nissito tattha subhaṃ vadāno, suddhiṃ vado tattha tathaddasā so.
নিৰিস্সৰাদী ন হি সুব্বিনাযোতি। ‘‘সস্সতো লোকো, ইদমেৰ সচ্চং মোঘমঞ্ঞ’’ন্তি নিৰিস্সৰাদী, ‘‘অসস্সতো লোকো…পে॰… নেৰ হোতি ন ন হোতি তথাগতো পরং মরণা, ইদমেৰ সচ্চং মোঘমঞ্ঞ’’ন্তি – নিৰিস্সৰাদী। ন হি সুব্বিনাযোতি। নিৰিস্সৰাদী দুব্বিনযো দুপ্পঞ্ঞাপযো 29 দুন্নিজ্ঝাপযো দুপ্পেক্খাপযো দুপ্পসাদযোতি – নিৰিস্সৰাদী ন হি সুব্বিনাযো।
Nivissavādī na hi subbināyoti. ‘‘Sassato loko, idameva saccaṃ moghamañña’’nti nivissavādī, ‘‘asassato loko…pe… neva hoti na na hoti tathāgato paraṃ maraṇā, idameva saccaṃ moghamañña’’nti – nivissavādī. Na hi subbināyoti. Nivissavādī dubbinayo duppaññāpayo 30 dunnijjhāpayo duppekkhāpayo duppasādayoti – nivissavādī na hi subbināyo.
পকপ্পিতা দিট্ঠিপুরেক্খরানোতি। কপ্পিতা পকপ্পিতা অভিসঙ্খতা সণ্ঠপিতা দিট্ঠিং পুরেক্খতো কত্ৰা চরতি। দিট্ঠিধজো দিট্ঠিকেতু দিট্ঠাধিপতেয্যো দিট্ঠিযা পরিৰারিতো চরতীতি – পকপ্পিতা দিট্ঠিপুরেক্খরানো।
Pakappitā diṭṭhipurekkharānoti. Kappitā pakappitā abhisaṅkhatā saṇṭhapitā diṭṭhiṃ purekkhato katvā carati. Diṭṭhidhajo diṭṭhiketu diṭṭhādhipateyyo diṭṭhiyā parivārito caratīti – pakappitā diṭṭhipurekkharāno.
যং নিস্সিতো তত্থ সুভং ৰদানোতি। যং নিস্সিতোতি যং সত্থারং ধম্মক্খানং গণং দিট্ঠিং পটিপদং মগ্গং নিস্সিতো আনিস্সিতো অল্লীনো উপগতো অজ্ঝোসিতো অধিমুত্তোতি – যং নিস্সিতো। তত্থাতি সকায দিট্ঠিযা সকায খন্তিযা সকায রুচিযা সকায লদ্ধিযা। সুভং ৰদানোতি সুভৰাদো সোভনৰাদো পণ্ডিতৰাদো থিরৰাদো ঞাযৰাদো হেতুৰাদো লক্খণৰাদো কারণৰাদো ঠানৰাদো সকায লদ্ধিযাতি – যং নিস্সিতো তত্থ সুভং ৰদানো।
Yaṃ nissito tattha subhaṃ vadānoti. Yaṃ nissitoti yaṃ satthāraṃ dhammakkhānaṃ gaṇaṃ diṭṭhiṃ paṭipadaṃ maggaṃ nissito ānissito allīno upagato ajjhosito adhimuttoti – yaṃ nissito. Tatthāti sakāya diṭṭhiyā sakāya khantiyā sakāya ruciyā sakāya laddhiyā. Subhaṃ vadānoti subhavādo sobhanavādo paṇḍitavādo thiravādo ñāyavādo hetuvādo lakkhaṇavādo kāraṇavādo ṭhānavādo sakāya laddhiyāti – yaṃ nissito tattha subhaṃ vadāno.
সুদ্ধিং ৰদো তত্থ তথদ্দসা সোতি। সুদ্ধিৰাদো ৰিসুদ্ধিৰাদো পরিসুদ্ধিৰাদো ৰোদাতৰাদো পরিৰোদাতৰাদো। অথ ৰা সুদ্ধিদস্সনো ৰিসুদ্ধিদস্সনো পরিসুদ্ধিদস্সনো ৰোদাতদস্সনো পরিৰোদাতদস্সনোতি – সুদ্ধিং ৰাদো। তত্থাতি সকায দিট্ঠিযা সকায খন্তিযা সকায রুচিযা সকায লদ্ধিযা তথং তচ্ছং ভূতং যাথাৰং অৰিপরীতন্তি অদ্দস্স অদক্খি অপস্সি পটিৰিজ্ঝীতি – সুদ্ধিং ৰাদো তত্থ তথদ্দসা সো।
Suddhiṃ vado tattha tathaddasā soti. Suddhivādo visuddhivādo parisuddhivādo vodātavādo parivodātavādo. Atha vā suddhidassano visuddhidassano parisuddhidassano vodātadassano parivodātadassanoti – suddhiṃ vādo. Tatthāti sakāya diṭṭhiyā sakāya khantiyā sakāya ruciyā sakāya laddhiyā tathaṃ tacchaṃ bhūtaṃ yāthāvaṃ aviparītanti addassa adakkhi apassi paṭivijjhīti – suddhiṃ vādo tattha tathaddasā so.
তেনাহ ভগৰা –
Tenāha bhagavā –
‘‘নিৰিস্সৰাদী ন হি সুব্বিনাযো, পকপ্পিতা দিট্ঠিপুরেক্খরানো।
‘‘Nivissavādī na hi subbināyo, pakappitā diṭṭhipurekkharāno;
যং নিস্সিতো তত্থ সুভং ৰদানো, সুদ্ধিং ৰদো তত্থ তথদ্দসা সো’’তি॥
Yaṃ nissito tattha subhaṃ vadāno, suddhiṃ vado tattha tathaddasā so’’ti.
১৪৬.
146.
ন ব্রাহ্মণো কপ্পমুপেতি সঙ্খা, ন দিট্ঠিসারী নপি ঞাণবন্ধু।
Na brāhmaṇo kappamupeti saṅkhā, na diṭṭhisārī napi ñāṇabandhu;
ঞত্ৰা চ সো সম্মুতিযো পুথুজ্জা, উপেক্খতী উগ্গহণন্তি মঞ্ঞে॥
Ñatvā ca so sammutiyo puthujjā, upekkhatī uggahaṇanti maññe.
ন ব্রাহ্মণো কপ্পমুপেতি সঙ্খাতি। নাতি পটিক্খেপো। ব্রাহ্মণোতি সত্তন্নং ধম্মানং বাহিতত্তা ব্রাহ্মণো…পে॰… অসিতো তাদি পৰুচ্চতে স ব্রহ্মা। কপ্পাতি দ্ৰে কপ্পা – তণ্হাকপ্পো চ দিট্ঠিকপ্পো চ…পে॰… অযং তণ্হাকপ্পো…পে॰… অযং দিট্ঠিকপ্পো। সঙ্খা ৰুচ্চতি ঞাণং। যা পঞ্ঞা পজাননা…পে॰… অমোহো ধম্মৰিচযো সম্মাদিট্ঠি। ন ব্রাহ্মণো কপ্পমুপেতি সঙ্খাতি। ব্রাহ্মণো সঙ্খায জানিত্ৰা তুলযিত্ৰা তীরযিত্ৰা ৰিভাৰযিত্ৰা ৰিভূতং কত্ৰা। ‘‘সব্বে সঙ্খারা অনিচ্চা… সব্বে সঙ্খারা দুক্খা…পে॰… যং কিঞ্চি সমুদযধম্মং সব্বং তং নিরোধধম্ম’’ন্ত্ন্ত্তি সঙ্খায জানিত্ৰা তুলযিত্ৰা তীরযিত্ৰা ৰিভাৰযিত্ৰা ৰিভূতং কত্ৰা তণ্হাকপ্পং ৰা দিট্ঠিকপ্পং ৰা নেতি ন উপেতি ন উপগচ্ছতি ন গণ্হাতি ন পরামসতি নাভিনিৰিসতীতি – ন ব্রাহ্মণো কপ্পমুপেতি সঙ্খা।
Nabrāhmaṇo kappamupeti saṅkhāti. Nāti paṭikkhepo. Brāhmaṇoti sattannaṃ dhammānaṃ bāhitattā brāhmaṇo…pe… asito tādi pavuccate sa brahmā. Kappāti dve kappā – taṇhākappo ca diṭṭhikappo ca…pe… ayaṃ taṇhākappo…pe… ayaṃ diṭṭhikappo. Saṅkhā vuccati ñāṇaṃ. Yā paññā pajānanā…pe… amoho dhammavicayo sammādiṭṭhi. Na brāhmaṇo kappamupeti saṅkhāti. Brāhmaṇo saṅkhāya jānitvā tulayitvā tīrayitvā vibhāvayitvā vibhūtaṃ katvā. ‘‘Sabbe saṅkhārā aniccā… sabbe saṅkhārā dukkhā…pe… yaṃ kiñci samudayadhammaṃ sabbaṃ taṃ nirodhadhamma’’ntntti saṅkhāya jānitvā tulayitvā tīrayitvā vibhāvayitvā vibhūtaṃ katvā taṇhākappaṃ vā diṭṭhikappaṃ vā neti na upeti na upagacchati na gaṇhāti na parāmasati nābhinivisatīti – na brāhmaṇo kappamupeti saṅkhā.
ন দিট্ঠিসারী নপি ঞাণবন্ধূতি। তস্স দ্ৰাসট্ঠি দিট্ঠিগতানি পহীনানি সমুচ্ছিন্নানি ৰূপসন্তানি পটিপস্সদ্ধানি অভব্বুপ্পত্তিকানি ঞাণগ্গিনা দড্ঢানি। সো দিট্ঠিযা ন যাযতি ন নীযতি ন ৰুয্হতি ন সংহরীযতি নপি তং দিট্ঠিগতং সারতো পচ্চেতি ন পচ্চাগচ্ছতীতি – ন দিট্ঠিসারী। নপি ঞাণবন্ধূতি অট্ঠসমাপত্তিঞাণেন ৰা পঞ্চাভিঞ্ঞাঞাণেন ৰা তণ্হাবন্ধুং ৰা দিট্ঠিবন্ধুং ৰা ন করোতি ন জনেতি ন সঞ্জনেতি ন নিব্বত্তেতি নাভিনিব্বত্তেতীতি – ন দিট্ঠিসারী নপি ঞাণবন্ধু।
Na diṭṭhisārī napi ñāṇabandhūti. Tassa dvāsaṭṭhi diṭṭhigatāni pahīnāni samucchinnāni vūpasantāni paṭipassaddhāni abhabbuppattikāni ñāṇagginā daḍḍhāni. So diṭṭhiyā na yāyati na nīyati na vuyhati na saṃharīyati napi taṃ diṭṭhigataṃ sārato pacceti na paccāgacchatīti – na diṭṭhisārī. Napi ñāṇabandhūti aṭṭhasamāpattiñāṇena vā pañcābhiññāñāṇena vā taṇhābandhuṃ vā diṭṭhibandhuṃ vā na karoti na janeti na sañjaneti na nibbatteti nābhinibbattetīti – na diṭṭhisārī napi ñāṇabandhu.
ঞত্ৰা চ সো সম্মুতিযো পুথুজ্জাতি। ঞত্ৰাতি ঞত্ৰা জানিত্ৰা তুলযিত্ৰা তীরযিত্ৰা ৰিভাৰযিত্ৰা ৰিভূতং কত্ৰা। ‘‘সব্বে সঙ্খারা অনিচ্চা’’তি ঞত্ৰা জানিত্ৰা তুলযিত্ৰা তীরযিত্ৰা ৰিভাৰযিত্ৰা ৰিভূতং কত্ৰা, ‘‘সব্বে সঙ্খারা দুক্খা’’তি…পে॰… ‘‘যং কিঞ্চি সমুদযধম্মং সব্বং তং নিরোধধম্ম’’ন্তি ঞত্ৰা জানিত্ৰা তুলযিত্ৰা তীরযিত্ৰা ৰিভাৰযিত্ৰা ৰিভূতং কত্ৰাতি – ঞত্ৰা চ সো। সম্মুতিযো ৰুচ্চন্তি দ্ৰাসট্ঠি দিট্ঠিগতানি দিট্ঠিসম্মুতিযো। পুথুজ্জাতি পুথুজ্জনেহি জনিতা ৰা তা সম্মুতিযোতি – পুথুজ্জা। পুথু নানাজনেহি জনিতা ৰা সম্মুতিযোতি পুথুজ্জাতি – ঞত্ৰা চ সো সম্মুতিযো পুথুজ্জা।
Ñatvā ca so sammutiyo puthujjāti. Ñatvāti ñatvā jānitvā tulayitvā tīrayitvā vibhāvayitvā vibhūtaṃ katvā. ‘‘Sabbe saṅkhārā aniccā’’ti ñatvā jānitvā tulayitvā tīrayitvā vibhāvayitvā vibhūtaṃ katvā, ‘‘sabbe saṅkhārā dukkhā’’ti…pe… ‘‘yaṃ kiñci samudayadhammaṃ sabbaṃ taṃ nirodhadhamma’’nti ñatvā jānitvā tulayitvā tīrayitvā vibhāvayitvā vibhūtaṃ katvāti – ñatvā ca so. Sammutiyo vuccanti dvāsaṭṭhi diṭṭhigatāni diṭṭhisammutiyo. Puthujjāti puthujjanehi janitā vā tā sammutiyoti – puthujjā. Puthu nānājanehi janitā vā sammutiyoti puthujjāti – ñatvā ca so sammutiyo puthujjā.
উপেক্খতী উগ্গহণন্তি মঞ্ঞেতি। অঞ্ঞে তণ্হাৰসেন দিট্ঠিৰসেন গণ্হন্তি পরামসন্তি অভিনিৰিসন্তি। অরহা উপেক্খতি ন গণ্হাতি ন পরামসতি নাভিনিৰিসতীতি – উপেক্খতী উগ্গহণন্তি মঞ্ঞে।
Upekkhatī uggahaṇanti maññeti. Aññe taṇhāvasena diṭṭhivasena gaṇhanti parāmasanti abhinivisanti. Arahā upekkhati na gaṇhāti na parāmasati nābhinivisatīti – upekkhatī uggahaṇanti maññe.
তেনাহ ভগৰা –
Tenāha bhagavā –
‘‘ন ব্রাহ্মণো কপ্পমুপেতি সঙ্খা, ন দিট্ঠিসারী নপি ঞাণবন্ধু।
‘‘Na brāhmaṇo kappamupeti saṅkhā, na diṭṭhisārī napi ñāṇabandhu;
ঞত্ৰা চ সো সম্মুতিযো পুথুজ্জা, উপেক্খতী উগ্গহণন্তি মঞ্ঞে’’তি॥
Ñatvā ca so sammutiyo puthujjā, upekkhatī uggahaṇanti maññe’’ti.
১৪৭.
147.
ৰিস্সজ্জ গন্থানি মুনীধ লোকে, ৰিৰাদজাতেসু ন ৰগ্গসারী।
Vissajjaganthāni munīdha loke, vivādajātesu na vaggasārī;
সন্তো অসন্তেসু উপেক্খকো সো, অনুগ্গহো উগ্গহণন্তি মঞ্ঞে॥
Santoasantesu upekkhako so, anuggaho uggahaṇanti maññe.
ৰিস্সজ্জ গন্থানি মুনীধ লোকেতি। গন্থাতি চত্তারো গন্থা – অভিজ্ঝা কাযগন্থো, ব্যাপাদো কাযগন্থো, সীলব্বতপরামাসো কাযগন্থো, ইদংসচ্চাভিনিৰেসো কাযগন্থো। অত্তনো দিট্ঠিযা রাগো অভিজ্ঝা কাযগন্থো, পরৰাদেসু আঘাতো অপ্পচ্চযো ব্যাপাদো কাযগন্থো, অত্তনো সীলং ৰা ৰতং ৰা সীলব্বতং ৰা পরামসতি সীলব্বতপরামাসো কাযগন্থো, অত্তনো দিট্ঠিং অভিনিৰেসো কাযগন্থো ইদংসচ্চাভিনিৰেসো কাযগন্থো। ৰিস্সজ্জাতি গন্থে ৰোস্সজ্জিত্ৰা ৰিস্সজ্জ। অথ ৰা গন্থে গধিতে গন্থিতে 31 বন্ধে ৰিবন্ধে আবন্ধে 32 লগ্গে লগ্গিতে পলিবুদ্ধে বন্ধনে ফোটযিত্ৰা ৰিস্সজ্জ। যথা ৰয্হং ৰা রথং ৰা সকটং ৰা সন্দমানিকং ৰা সজ্জং ৰিস্সজ্জং করোন্তি ৰিকোপেন্তি; এৰমেৰ গন্থে ৰোস্সজ্জিত্ৰা ৰিস্সজ্জ। অথ ৰা গন্থে গথিতে গণ্ঠিতে বন্ধে ৰিবন্ধে আবন্ধে লগ্গে লগ্গিতে পলিবুদ্ধে বন্ধনে ফোটযিত্ৰা ৰিস্সজ্জ। মুনীতি। মোনং ৰুচ্চতি ঞাণং…পে॰… সঙ্গজালমতিচ্চ সো মুনি। ইধাতি ইমিস্সা দিট্ঠিযা…পে॰… ইমস্মিং মনুস্সলোকেতি – ৰিস্সজ্জ গন্থানি মুনীধ লোকে।
Vissajja ganthāni munīdha loketi. Ganthāti cattāro ganthā – abhijjhā kāyagantho, byāpādo kāyagantho, sīlabbataparāmāso kāyagantho, idaṃsaccābhiniveso kāyagantho. Attano diṭṭhiyā rāgo abhijjhā kāyagantho, paravādesu āghāto appaccayo byāpādo kāyagantho, attano sīlaṃ vā vataṃ vā sīlabbataṃ vā parāmasati sīlabbataparāmāso kāyagantho, attano diṭṭhiṃ abhiniveso kāyagantho idaṃsaccābhiniveso kāyagantho. Vissajjāti ganthe vossajjitvā vissajja. Atha vā ganthe gadhite ganthite 33 bandhe vibandhe ābandhe 34 lagge laggite palibuddhe bandhane phoṭayitvā vissajja. Yathā vayhaṃ vā rathaṃ vā sakaṭaṃ vā sandamānikaṃ vā sajjaṃ vissajjaṃ karonti vikopenti; evameva ganthe vossajjitvā vissajja. Atha vā ganthe gathite gaṇṭhite bandhe vibandhe ābandhe lagge laggite palibuddhe bandhane phoṭayitvā vissajja. Munīti. Monaṃ vuccati ñāṇaṃ…pe… saṅgajālamaticca so muni. Idhāti imissā diṭṭhiyā…pe… imasmiṃ manussaloketi – vissajja ganthāni munīdha loke.
ৰিৰাদজাতেসু ন ৰগ্গসারীতি। ৰিৰাদজাতেসু সঞ্জাতেসু নিব্বত্তেসু অভিনিব্বত্তেসু পাতুভূতেসু 35 ছন্দাগতিং গচ্ছন্তেসু দোসাগতিং গচ্ছন্তেসু ভযাগতিং গচ্ছন্তেসু মোহাগতিং গচ্ছন্তেসু ন ছন্দাগতিং গচ্ছতি, ন দোসাগতিং গচ্ছতি, ন ভযাগতিং গচ্ছতি, ন মোহাগতিং গচ্ছতি, ন রাগৰসেন গচ্ছতি, ন দোসৰসেন গচ্ছতি, ন মোহৰসেন গচ্ছতি, ন মানৰসেন গচ্ছতি, ন দিট্ঠিৰসেন গচ্ছতি, ন উদ্ধচ্চৰসেন গচ্ছতি, ন ৰিচিকিচ্ছাৰসেন গচ্ছতি, ন অনুসযৰসেন গচ্ছতি, ন ৰগ্গেহি ধম্মেহি যাযতি নীযতি ৰুয্হতি সংহরীযতীতি – ৰিৰাদজাতেসু ন ৰগ্গসারী।
Vivādajātesu na vaggasārīti. Vivādajātesu sañjātesu nibbattesu abhinibbattesu pātubhūtesu 36 chandāgatiṃ gacchantesu dosāgatiṃ gacchantesu bhayāgatiṃ gacchantesu mohāgatiṃ gacchantesu na chandāgatiṃ gacchati, na dosāgatiṃ gacchati, na bhayāgatiṃ gacchati, na mohāgatiṃ gacchati, na rāgavasena gacchati, na dosavasena gacchati, na mohavasena gacchati, na mānavasena gacchati, na diṭṭhivasena gacchati, na uddhaccavasena gacchati, na vicikicchāvasena gacchati, na anusayavasena gacchati, na vaggehi dhammehi yāyati nīyati vuyhati saṃharīyatīti – vivādajātesu na vaggasārī.
সন্তো অসন্তেসু উপেক্খকো সোতি। সন্তোতি রাগস্স সন্তত্তা সন্তো, দোসস্স সন্তত্তা সন্তো, মোহস্স সন্তত্তা সন্তো…পে॰… সব্বাকুসলাভিসঙ্খারানং সন্তত্তা সমিতত্তা ৰূপসমিতত্তা ৰিজ্ঝাতত্তা নিব্বুতত্তা ৰিগতত্তা পটিপস্সদ্ধত্তা সন্তো উপসন্তো ৰূপসন্তো নিব্বুতো পটিপস্সদ্ধোতি – সন্তো। অসন্তেসূতি অসন্তেসু অনুপসন্তেসু অৰূপসন্তেসু অনিব্বুতেসু অপ্পটিপস্সদ্ধেসূতি – সন্তো অসন্তেসু। উপেক্খকো সোতি অরহা ছল়ঙ্গুপেক্খায সমন্নাগতো চক্খুনা রূপং দিস্ৰা নেৰ সুমনো হোতি ন দুম্মনো উপেক্খকো ৰিহরতি সতো সম্পজানো। সোতেন সদ্দং সুত্ৰা…পে॰… কালং কঙ্খতি ভাৰিতো সন্তোতি – সন্তো অসন্তেসু উপেক্খকো সো।
Santo asantesu upekkhako soti. Santoti rāgassa santattā santo, dosassa santattā santo, mohassa santattā santo…pe… sabbākusalābhisaṅkhārānaṃ santattā samitattā vūpasamitattā vijjhātattā nibbutattā vigatattā paṭipassaddhattā santo upasanto vūpasanto nibbuto paṭipassaddhoti – santo. Asantesūti asantesu anupasantesu avūpasantesu anibbutesu appaṭipassaddhesūti – santo asantesu. Upekkhako soti arahā chaḷaṅgupekkhāya samannāgato cakkhunā rūpaṃ disvā neva sumano hoti na dummano upekkhako viharati sato sampajāno. Sotena saddaṃ sutvā…pe… kālaṃ kaṅkhati bhāvito santoti – santo asantesu upekkhako so.
অনুগ্গহো উগ্গহণন্তি মঞ্ঞেতি। অঞ্ঞে তণ্হাৰসেন দিট্ঠিৰসেন গণ্হন্তে পরামসন্তে অভিনিৰিসন্তে। অরহা উপেক্খতি ন গণ্হাতি ন পরামসতি নাভিনিৰিসতীতি – অনুগ্গহো উগ্গহণন্তি মঞ্ঞে।
Anuggaho uggahaṇanti maññeti. Aññe taṇhāvasena diṭṭhivasena gaṇhante parāmasante abhinivisante. Arahā upekkhati na gaṇhāti na parāmasati nābhinivisatīti – anuggaho uggahaṇanti maññe.
তেনাহ ভগৰা –
Tenāha bhagavā –
‘‘ৰিস্সজ্জ গন্থানি মুনীধ লোকে, ৰিৰাদজাতেসু ন ৰগ্গসারী।
‘‘Vissajja ganthāni munīdha loke, vivādajātesu na vaggasārī;
সন্তো অসন্তেসু উপেক্খকো সো, অনুগ্গহো উগ্গহণন্তি মঞ্ঞে’’তি॥
Santo asantesu upekkhako so, anuggaho uggahaṇanti maññe’’ti.
১৪৮.
148.
পুব্বাসৰে হিত্ৰা নৰে অকুব্বং, ন ছন্দগূ নোপি নিৰিস্সৰাদী।
Pubbāsave hitvā nave akubbaṃ, na chandagū nopi nivissavādī;
স ৰিপ্পমুত্তো দিট্ঠিগতেহি ধীরো, ন লিম্পতি লোকে অনত্তগরহী॥
Sa vippamutto diṭṭhigatehi dhīro, na limpati loke anattagarahī.
পুব্বাসৰে হিত্ৰা নৰে অকুব্বন্তি। পুব্বাসৰা ৰুচ্চন্তি অতীতা রূপৰেদনাসঞ্ঞাসঙ্খারৰিঞ্ঞাণা। অতীতে সঙ্খারে আরব্ভ যে কিলেসা উপ্পজ্জেয্যুং তে কিলেসে হিত্ৰা চজিত্ৰা পরিচ্চজিত্ৰা পজহিত্ৰা ৰিনোদেত্ৰা ব্যন্তিং করিত্ৰা অনভাৰং গমেত্ৰাতি – পুব্বাসৰে হিত্ৰা। নৰে অকুব্বন্তি নৰা ৰুচ্চন্তি পচ্চুপ্পন্না রূপৰেদনাসঞ্ঞাসঙ্খারৰিঞ্ঞাণা। পচ্চুপ্পন্নে সঙ্খারে আরব্ভ ছন্দং 37 অকুব্বমানো পেমং অকুব্বমানো রাগং অকুব্বমানো অজনযমানো অসঞ্জনযমানো অনিব্বত্তযমানো অনভিনিব্বত্তযমানোতি – পুব্বাসৰে হিত্ৰা নৰে অকুব্বং।
Pubbāsavehitvā nave akubbanti. Pubbāsavā vuccanti atītā rūpavedanāsaññāsaṅkhāraviññāṇā. Atīte saṅkhāre ārabbha ye kilesā uppajjeyyuṃ te kilese hitvā cajitvā pariccajitvā pajahitvā vinodetvā byantiṃ karitvā anabhāvaṃ gametvāti – pubbāsave hitvā. Nave akubbanti navā vuccanti paccuppannā rūpavedanāsaññāsaṅkhāraviññāṇā. Paccuppanne saṅkhāre ārabbha chandaṃ 38 akubbamāno pemaṃ akubbamāno rāgaṃ akubbamāno ajanayamāno asañjanayamāno anibbattayamāno anabhinibbattayamānoti – pubbāsave hitvā nave akubbaṃ.
ন ছন্দগূ নোপি নিৰিস্সৰাদীতি। ন ছন্দাগতিং গচ্ছতি , ন দোসাগতিং গচ্ছতি, ন মোহাগতিং গচ্ছতি, ন ভযাগতিং গচ্ছতি, ন রাগৰসেন গচ্ছতি , ন দোসৰসেন গচ্ছতি, ন মোহৰসেন গচ্ছতি, ন মানৰসেন গচ্ছতি, ন দিট্ঠিৰসেন গচ্ছতি, ন উদ্ধচ্চৰসেন গচ্ছতি, ন ৰিচিকিচ্ছাৰসেন গচ্ছতি, ন অনুসযৰসেন গচ্ছতি, ন ৰগ্গেহি ধম্মেহি যাযতি নীযতি ৰুয্হতি ন সংহরীযতীতি – ন ছন্দগূ। নোপি নিৰিস্সৰাদীতি ‘‘সস্সতো লোকো, ইদমেৰ সচ্চং মোঘমঞ্ঞ’’ন্তি ন নিৰিস্সৰাদী…পে॰… ‘‘নেৰ হোতি ন ন হোতি তথাগতো পরং মরণা, ইদমেৰ সচ্চং মোঘমঞ্ঞ’’ন্তি ন নিৰিস্সৰাদীতি – ন ছন্দগূ নোপি নিৰিস্সৰাদী।
Na chandagū nopi nivissavādīti. Na chandāgatiṃ gacchati , na dosāgatiṃ gacchati, na mohāgatiṃ gacchati, na bhayāgatiṃ gacchati, na rāgavasena gacchati , na dosavasena gacchati, na mohavasena gacchati, na mānavasena gacchati, na diṭṭhivasena gacchati, na uddhaccavasena gacchati, na vicikicchāvasena gacchati, na anusayavasena gacchati, na vaggehi dhammehi yāyati nīyati vuyhati na saṃharīyatīti – na chandagū. Nopi nivissavādīti ‘‘sassato loko, idameva saccaṃ moghamañña’’nti na nivissavādī…pe… ‘‘neva hoti na na hoti tathāgato paraṃ maraṇā, idameva saccaṃ moghamañña’’nti na nivissavādīti – na chandagū nopi nivissavādī.
স ৰিপ্পমুত্তো দিট্ঠিগতেহি ধীরোতি তস্স দ্ৰাসট্ঠি দিট্ঠিগতানি পহীনানি সমুচ্ছিন্নানি ৰূপসন্তানি পটিপস্সদ্ধানি অভব্বুপ্পত্তিকানি ঞাণগ্গিনা দড্ঢানি। সো দিট্ঠিগতেহি ৰিপ্পমুত্তো ৰিসঞ্ঞুত্তো ৰিমরিযাদিকতেন চেতসা ৰিহরতি। ধীরোতি ধীরো পণ্ডিতো পঞ্ঞৰা বুদ্ধিমা ঞাণী ৰিভাৰী মেধাৰীতি – স ৰিপ্পমুত্তো দিট্ঠিগতেহি ধীরো।
Sa vippamutto diṭṭhigatehi dhīroti tassa dvāsaṭṭhi diṭṭhigatāni pahīnāni samucchinnāni vūpasantāni paṭipassaddhāni abhabbuppattikāni ñāṇagginā daḍḍhāni. So diṭṭhigatehi vippamutto visaññutto vimariyādikatena cetasā viharati. Dhīroti dhīro paṇḍito paññavā buddhimā ñāṇī vibhāvī medhāvīti – sa vippamutto diṭṭhigatehi dhīro.
ন লিম্পতি লোকে অনত্তগরহীতি। লেপাতি দ্ৰে লেপা – তণ্হালেপো চ দিট্ঠিলেপো চ…পে॰… অযং তণ্হালেপো …পে॰… অযং দিট্ঠিলেপো। তস্স তণ্হালেপো পহীনো, দিট্ঠিলেপো পটিনিস্সট্ঠো; তস্স তণ্হালেপস্স পহীনত্তা, দিট্ঠিলেপস্স পটিনিস্সট্ঠত্তা অপাযলোকে ন লিম্পতি, মনুস্সলোকে ন লিম্পতি, দেৰলোকে ন লিম্পতি, খন্ধলোকে ন লিম্পতি, ধাতুলোকে ন লিম্পতি, আযতনলোকে ন লিম্পতি ন পলিম্পতি ন উপলিম্পতি, অলিত্তো অপলিত্তো অনুপলিত্তো নিক্খন্তো নিস্সটো ৰিপ্পমুত্তো ৰিসঞ্ঞুত্তো ৰিমরিযাদিকতেন চেতসা ৰিহরতীতি – ন লিম্পতি লোকে।
Na limpati loke anattagarahīti. Lepāti dve lepā – taṇhālepo ca diṭṭhilepo ca…pe… ayaṃ taṇhālepo …pe… ayaṃ diṭṭhilepo. Tassa taṇhālepo pahīno, diṭṭhilepo paṭinissaṭṭho; tassa taṇhālepassa pahīnattā, diṭṭhilepassa paṭinissaṭṭhattā apāyaloke na limpati, manussaloke na limpati, devaloke na limpati, khandhaloke na limpati, dhātuloke na limpati, āyatanaloke na limpati na palimpati na upalimpati, alitto apalitto anupalitto nikkhanto nissaṭo vippamutto visaññutto vimariyādikatena cetasā viharatīti – na limpati loke.
অনত্তগরহীতি দ্ৰীহি কারণেহি অত্তানং গরহতি – কতত্তা চ অকতত্তা চ। কথং কতত্তা চ অকতত্তা চ অত্তানং গরহতি? ‘‘কতং মে কাযদুচ্চরিতং, অকতং মে কাযসুচরিত’’ন্তি অত্তানং গরহতি। ‘‘কতং মে ৰচীদুচ্চরিতং…পে॰… কতং মে মনোদুচ্চরিতং … কতো মে পাণাতিপাতো…পে॰… কতা মে মিচ্ছাদিট্ঠি, অকতা মে সম্মাদিট্ঠী’’তি অত্তানং গরহতি। এৰং কতত্তা চ অকতত্তা চ অত্তানং গরহতি।
Anattagarahīti dvīhi kāraṇehi attānaṃ garahati – katattā ca akatattā ca. Kathaṃ katattā ca akatattā ca attānaṃ garahati? ‘‘Kataṃ me kāyaduccaritaṃ, akataṃ me kāyasucarita’’nti attānaṃ garahati. ‘‘Kataṃ me vacīduccaritaṃ…pe… kataṃ me manoduccaritaṃ … kato me pāṇātipāto…pe… katā me micchādiṭṭhi, akatā me sammādiṭṭhī’’ti attānaṃ garahati. Evaṃ katattā ca akatattā ca attānaṃ garahati.
অথ ৰা ‘‘সীলেসুম্হি ন পরিপূরকারী’’তি অত্তানং গরহতি। ‘‘ইন্দ্রিযেসুম্হি অগুত্তদ্ৰারো’’তি… ‘‘ভোজনেম্হি অমত্তঞ্ঞূ’’তি… ‘‘জাগরিযম্হি অননুযুত্তো’’তি… ‘‘ন সতিসম্পজঞ্ঞেনাম্হি সমন্নাগতো’’তি… ‘‘অভাৰিতা মে চত্তারো সতিপট্ঠানা’’তি… ‘‘অভাৰিতা মে চত্তারো সম্মপ্পধানা’’তি… ‘‘অভাৰিতা মে চত্তারো ইদ্ধিপাদা’’তি… ‘‘অভাৰিতানি মে পঞ্চিন্দ্রিযানী’’তি… ‘‘অভাৰিতানি মে পঞ্চ বলানী’’তি… ‘‘অভাৰিতা মে সত্ত বোজ্ঝঙ্গা’’তি… ‘‘অভাৰিতো মে অরিযো অট্ঠঙ্গিকো মগ্গো’’তি… ‘‘দুক্খং মে অপরিঞ্ঞাত’’ন্তি… ‘‘দুক্খসমুদযো মে অপ্পহীনো’’তি… ‘‘মগ্গো মে অভাৰিতো’’তি… ‘‘নিরোধো মে অসচ্ছিকতো’’তি অত্তানং গরহতি। এৰং কতত্তা চ অকতত্তা চ অত্তানং গরহতি। এৰং অত্তগরহী। তযিদং কম্মং অকুব্বমানো অজনযমানো অসঞ্জনযমানো অনিব্বত্তযমানো অনভিনিব্বত্তযমানো অনত্তগরহীতি – ন লিম্পতি লোকে অনত্তগরহী।
Atha vā ‘‘sīlesumhi na paripūrakārī’’ti attānaṃ garahati. ‘‘Indriyesumhi aguttadvāro’’ti… ‘‘bhojanemhi amattaññū’’ti… ‘‘jāgariyamhi ananuyutto’’ti… ‘‘na satisampajaññenāmhi samannāgato’’ti… ‘‘abhāvitā me cattāro satipaṭṭhānā’’ti… ‘‘abhāvitā me cattāro sammappadhānā’’ti… ‘‘abhāvitā me cattāro iddhipādā’’ti… ‘‘abhāvitāni me pañcindriyānī’’ti… ‘‘abhāvitāni me pañca balānī’’ti… ‘‘abhāvitā me satta bojjhaṅgā’’ti… ‘‘abhāvito me ariyo aṭṭhaṅgiko maggo’’ti… ‘‘dukkhaṃ me apariññāta’’nti… ‘‘dukkhasamudayo me appahīno’’ti… ‘‘maggo me abhāvito’’ti… ‘‘nirodho me asacchikato’’ti attānaṃ garahati. Evaṃ katattā ca akatattā ca attānaṃ garahati. Evaṃ attagarahī. Tayidaṃ kammaṃ akubbamāno ajanayamāno asañjanayamāno anibbattayamāno anabhinibbattayamāno anattagarahīti – na limpati loke anattagarahī.
তেনাহ ভগৰা –
Tenāha bhagavā –
‘‘পুব্বাসৰে হিত্ৰা নৰে অকুব্বং, ন ছন্দগূ নোপি নিৰিস্সৰাদী।
‘‘Pubbāsave hitvā nave akubbaṃ, na chandagū nopi nivissavādī;
স ৰিপ্পমুত্তো দিট্ঠিগতেহি ধীরো, ন লিম্পতি লোকে অনত্তগরহী’’তি॥
Sa vippamutto diṭṭhigatehi dhīro, na limpati loke anattagarahī’’ti.
১৪৯.
149.
স সব্বধম্মেসু ৰিসেনিভূতো, যং কিঞ্চি দিট্ঠং ৰ সুতং মুতং ৰা।
Sa sabbadhammesu visenibhūto, yaṃ kiñci diṭṭhaṃ va sutaṃ mutaṃ vā;
স পন্নভারো মুনি ৰিপ্পমুত্তো, ন কপ্পিযো নূপরতো ন পত্থিযো॥[ইতি ভগৰা]
Sa pannabhāro muni vippamutto, na kappiyo nūparato na patthiyo.[iti bhagavā]
স সব্বধম্মেসু ৰিসেনিভূতো যং কিঞ্চি দিট্ঠং ৰ সুতং মুতং ৰাতি। সেনা ৰুচ্চতি মারসেনা। কাযদুচ্চরিতং মারসেনা, ৰচীদুচ্চরিতং মারসেনা, মনোদুচ্চরিতং মারসেনা, রাগো… দোসো… মোহো… কোধো… উপনাহো… মক্খো… পল়াসো… ইস্সা… মচ্ছরিযং… মাযা… সাঠেয্যং… থম্ভো… সারম্ভো… মানো… অতিমানো… মদো… পমাদো… সব্বে কিলেসা… সব্বে দুচ্চরিতা… সব্বে দরথা… সব্বে পরিল়াহা… সব্বে সন্তাপা… সব্বাকুসলাভিসঙ্খারা মারসেনা।
Sa sabbadhammesu visenibhūto yaṃ kiñci diṭṭhaṃ va sutaṃ mutaṃ vāti. Senā vuccati mārasenā. Kāyaduccaritaṃ mārasenā, vacīduccaritaṃ mārasenā, manoduccaritaṃ mārasenā, rāgo… doso… moho… kodho… upanāho… makkho… paḷāso… issā… macchariyaṃ… māyā… sāṭheyyaṃ… thambho… sārambho… māno… atimāno… mado… pamādo… sabbe kilesā… sabbe duccaritā… sabbe darathā… sabbe pariḷāhā… sabbe santāpā… sabbākusalābhisaṅkhārā mārasenā.
ৰুত্তঞ্হেতং ভগৰতা –
Vuttañhetaṃ bhagavatā –
‘‘কামা তে পঠমা সেনা, দুতিযা অরতি ৰুচ্চতি…পে॰… ।
‘‘Kāmā te paṭhamā senā, dutiyā arati vuccati…pe… ;
ন নং অসুরো জিনাতি, জেত্ৰাৰ লভতে সুখ’’ন্তি॥
Na naṃ asuro jināti, jetvāva labhate sukha’’nti.
যতো চতূহি অরিযমগ্গেহি সব্বা চ মারসেনা সব্বে চ পটিসেনিকরা কিলেসা জিতা চ পরাজিতা চ ভগ্গা ৰিপ্পলুগ্গা পরম্মুখা – সো ৰুচ্চতি ৰিসেনিভূতো। সো দিট্ঠে ৰিসেনিভূতো, সুতে… মুতে … ৰিঞ্ঞাতে ৰিসেনিভূতোতি – স সব্বধম্মেসু ৰিসেনিভূতো, যং কিঞ্চি দিট্ঠং ৰ সুতং মুতং ৰা।
Yato catūhi ariyamaggehi sabbā ca mārasenā sabbe ca paṭisenikarā kilesā jitā ca parājitā ca bhaggā vippaluggā parammukhā – so vuccati visenibhūto. So diṭṭhe visenibhūto, sute… mute … viññāte visenibhūtoti – sa sabbadhammesu visenibhūto, yaṃ kiñci diṭṭhaṃ va sutaṃ mutaṃ vā.
স পন্নভারো মুনি ৰিপ্পমুত্তোতি। ভারাতি তযো ভারা – খন্ধভারো, কিলেসভারো, অভিসঙ্খারভারো। কতমো খন্ধভারো? পটিসন্ধিযা রূপং ৰেদনা সঞ্ঞা সঙ্খারা ৰিঞ্ঞাণং – অযং খন্ধভারো। কতমো কিলেসভারো? রাগো দোসো মোহো…পে॰… সব্বাকুসলাভিসঙ্খারা – অযং কিলেসভারো। কতমো অভিসঙ্খারভারো? পুঞ্ঞাভিসঙ্খারো অপুঞ্ঞাভিসঙ্খারো আনেঞ্জাভিসঙ্খারো – অযং অভিসঙ্খারভারো। যতো খন্ধভারো চ কিলেসভারো চ অভিসঙ্খারভারো চ পহীনা হোন্তি উচ্ছিন্নমূলা তালাৰত্থুকতা অনভাৰংকতা আযতিং অনুপ্পাদধম্মা, সো ৰুচ্চতি পন্নভারো পতিতভারো ওরোপিতভারো সমোরোপিতভারো নিক্খিত্তভারো পটিপস্সদ্ধভারো।
Sa pannabhāro muni vippamuttoti. Bhārāti tayo bhārā – khandhabhāro, kilesabhāro, abhisaṅkhārabhāro. Katamo khandhabhāro? Paṭisandhiyā rūpaṃ vedanā saññā saṅkhārā viññāṇaṃ – ayaṃ khandhabhāro. Katamo kilesabhāro? Rāgo doso moho…pe… sabbākusalābhisaṅkhārā – ayaṃ kilesabhāro. Katamo abhisaṅkhārabhāro? Puññābhisaṅkhāro apuññābhisaṅkhāro āneñjābhisaṅkhāro – ayaṃ abhisaṅkhārabhāro. Yato khandhabhāro ca kilesabhāro ca abhisaṅkhārabhāro ca pahīnā honti ucchinnamūlā tālāvatthukatā anabhāvaṃkatā āyatiṃ anuppādadhammā, so vuccati pannabhāro patitabhāro oropitabhāro samoropitabhāro nikkhittabhāro paṭipassaddhabhāro.
মুনীতি মোনং ৰুচ্চতি ঞাণং। যা পঞ্ঞা পজাননা ৰিচযো পৰিচযো ধম্মৰিচযো সল্লক্খণা উপলক্খণা পচ্চুপলক্খণা, পণ্ডিচ্চং কোসল্লং নেপুঞ্ঞং ৰেভব্যা চিন্তা উপপরিক্খা ভূরি মেধা পরিনাযিকা ৰিপস্সনা সম্পজঞ্ঞং পতোদো পঞ্ঞা পঞ্ঞিন্দ্রিযং পঞ্ঞাবলং পঞ্ঞাসত্থং পঞ্ঞাপাসাদো পঞ্ঞাআলোকো পঞ্ঞাওভাসো পঞ্ঞাপজ্জোতো পঞ্ঞারতনং অমোহো ধম্মৰিচযো সম্মাদিট্ঠি। তেন ঞাণেন সমন্নাগতো মুনি মোনপ্পত্তো।
Munīti monaṃ vuccati ñāṇaṃ. Yā paññā pajānanā vicayo pavicayo dhammavicayo sallakkhaṇā upalakkhaṇā paccupalakkhaṇā, paṇḍiccaṃ kosallaṃ nepuññaṃ vebhabyā cintā upaparikkhā bhūri medhā parināyikā vipassanā sampajaññaṃ patodo paññā paññindriyaṃ paññābalaṃ paññāsatthaṃ paññāpāsādo paññāāloko paññāobhāso paññāpajjoto paññāratanaṃ amoho dhammavicayo sammādiṭṭhi. Tena ñāṇena samannāgato muni monappatto.
তীণি মোনেয্যানি – কাযমোনেয্যং, ৰচীমোনেয্যং, মনোমোনেয্যং। কতমং কাযমোনেয্যং? তিৰিধানং কাযদুচ্চরিতানং 39 পহানং কাযমোনেয্যং, তিৰিধং কাযসুচরিতং কাযমোনেয্যং, কাযারম্মণে ঞাণং কাযমোনেয্যং, কাযপরিঞ্ঞা কাযমোনেয্যং, পরিঞ্ঞাসহগতো মগ্গো কাযমোনেয্যং, কাযে ছন্দরাগস্স পহানং কাযমোনেয্যং, কাযসঙ্খারনিরোধো চতুত্থজ্ঝানসমাপত্তি কাযমোনেয্যং – ইদং কাযমোনেয্যং।
Tīṇi moneyyāni – kāyamoneyyaṃ, vacīmoneyyaṃ, manomoneyyaṃ. Katamaṃ kāyamoneyyaṃ? Tividhānaṃ kāyaduccaritānaṃ 40 pahānaṃ kāyamoneyyaṃ, tividhaṃ kāyasucaritaṃ kāyamoneyyaṃ, kāyārammaṇe ñāṇaṃ kāyamoneyyaṃ, kāyapariññā kāyamoneyyaṃ, pariññāsahagato maggo kāyamoneyyaṃ, kāye chandarāgassa pahānaṃ kāyamoneyyaṃ, kāyasaṅkhāranirodho catutthajjhānasamāpatti kāyamoneyyaṃ – idaṃ kāyamoneyyaṃ.
কতমং ৰচীমোনেয্যং? চতুব্বিধানং ৰচীদুচ্চরিতানং পহানং ৰচীমোনেয্যং, চতুব্বিধং ৰচীসুচরিতং ৰচীমোনেয্যং, ৰাচারম্মণে ঞাণং ৰচীমোনেয্যং, ৰাচাপরিঞ্ঞা ৰচীমোনেয্যং, পরিঞ্ঞাসহগতো মগ্গো ৰচীমোনেয্যং, ৰাচায ছন্দরাগস্স পহানং ৰচীমোনেয্যং, ৰচীসঙ্খারনিরোধো দুতিযজ্ঝানসমাপত্তি ৰচীমোনেয্যং – ইদং ৰচীমোনেয্যং।
Katamaṃ vacīmoneyyaṃ? Catubbidhānaṃ vacīduccaritānaṃ pahānaṃ vacīmoneyyaṃ, catubbidhaṃ vacīsucaritaṃ vacīmoneyyaṃ, vācārammaṇe ñāṇaṃ vacīmoneyyaṃ, vācāpariññā vacīmoneyyaṃ, pariññāsahagato maggo vacīmoneyyaṃ, vācāya chandarāgassa pahānaṃ vacīmoneyyaṃ, vacīsaṅkhāranirodho dutiyajjhānasamāpatti vacīmoneyyaṃ – idaṃ vacīmoneyyaṃ.
কতমং মনোমোনেয্যং? তিৰিধানং মনোদুচ্চরিতানং পহানং মনোমোনেয্যং, তিৰিধং মনোসুচরিতং মনোমোনেয্যং, চিত্তারম্মণে ঞাণং মনোমোনেয্যং, চিত্তপরিঞ্ঞা মনোমোনেয্যং, পরিঞ্ঞাসহগতো মগ্গো মনোমোনেয্যং, চিত্তে ছন্দরাগস্স পহানং মনোমোনেয্যং, চিত্তসঙ্খারনিরোধো সঞ্ঞাৰেদযিতনিরোধসমাপত্তি মনোমোনেয্যং – ইদং মনোমোনেয্যং।
Katamaṃ manomoneyyaṃ? Tividhānaṃ manoduccaritānaṃ pahānaṃ manomoneyyaṃ, tividhaṃ manosucaritaṃ manomoneyyaṃ, cittārammaṇe ñāṇaṃ manomoneyyaṃ, cittapariññā manomoneyyaṃ, pariññāsahagato maggo manomoneyyaṃ, citte chandarāgassa pahānaṃ manomoneyyaṃ, cittasaṅkhāranirodho saññāvedayitanirodhasamāpatti manomoneyyaṃ – idaṃ manomoneyyaṃ.
‘‘কাযমুনিং ৰাচামুনিং, মনোমুনিমনাসৰং।
‘‘Kāyamuniṃ vācāmuniṃ, manomunimanāsavaṃ;
মুনিং মোনেয্যসম্পন্নং, আহু সব্বপ্পহাযিনং॥
Muniṃ moneyyasampannaṃ, āhu sabbappahāyinaṃ.
‘‘কাযমুনিং ৰাচামুনিং, মনোমুনিমনাসৰং।
‘‘Kāyamuniṃ vācāmuniṃ, manomunimanāsavaṃ;
ইমেহি তীহি মোনেয্যেহি ধম্মেহি সমন্নাগতা ছ মুনিনো 43 – অগারমুনিনো, অনগারমুনিনো, সেখমুনিনো, অসেখমুনিনো, পচ্চেকমুনিনো, মুনিমুনিনোতি 44। কতমে অগারমুনিনো? যে তে অগারিকা দিট্ঠপদা ৰিঞ্ঞাতসাসনা – ইমে অগারমুনিনো। কতমে অনগারমুনিনো? যে তে পব্বজিতা দিট্ঠপদা ৰিঞ্ঞাতসাসনা – ইমে অনগারমুনিনো। সত্ত সেখা সেখমুনিনো, অরহন্তো অসেখমুনিনো। পচ্চেকবুদ্ধা পচ্চেকমুনিনো। মুনিমুনিনো ৰুচ্চন্তি তথাগতা অরহন্তো সম্মাসম্বুদ্ধা।
Imehi tīhi moneyyehi dhammehi samannāgatā cha munino 45 – agāramunino, anagāramunino, sekhamunino, asekhamunino, paccekamunino, munimuninoti 46. Katame agāramunino? Ye te agārikā diṭṭhapadā viññātasāsanā – ime agāramunino. Katame anagāramunino? Ye te pabbajitā diṭṭhapadā viññātasāsanā – ime anagāramunino. Satta sekhā sekhamunino, arahanto asekhamunino. Paccekabuddhā paccekamunino. Munimunino vuccanti tathāgatā arahanto sammāsambuddhā.
‘‘ন মোনেন মুনি হোতি, মূল়্হরূপো অৰিদ্দসু।
‘‘Na monena muni hoti, mūḷharūpo aviddasu;
যো চ তুলংৰ পগ্গয্হ, ৰরমাদায পণ্ডিতো॥
Yo ca tulaṃva paggayha, varamādāya paṇḍito.
‘‘পাপানি পরিৰজ্জেতি, স মুনি তেন সো মুনি।
‘‘Pāpāni parivajjeti, sa muni tena so muni;
যো মুনাতি উভো লোকে, মুনি তেন পৰুচ্চতি॥
Yo munāti ubho loke, muni tena pavuccati.
‘‘অসতঞ্চ সতঞ্চ ঞত্ৰা ধম্মং, অজ্ঝত্তং বহিদ্ধা চ সব্বলোকে।
‘‘Asatañca satañca ñatvā dhammaṃ, ajjhattaṃ bahiddhā ca sabbaloke;
দেৰমনুস্সেহি পূজিতো যো, সঙ্গজালমতিচ্চ সো মুনি’’॥
Devamanussehi pūjito yo, saṅgajālamaticca so muni’’.
ৰিপ্পমুত্তোতি মুনিনো রাগা চিত্তং মুত্তং ৰিমুত্তং সুৰিমুত্তং; দোসা চিত্তং… মোহা চিত্তং মুত্তং ৰিমুত্তং সুৰিমুত্তং…পে॰… সব্বাকুসলাভিসঙ্খারেহি চিত্তং মুত্তং ৰিমুত্তং সুৰিমুত্তন্তি – স পন্নভারো মুনি ৰিপ্পমুত্তো।
Vippamuttoti munino rāgā cittaṃ muttaṃ vimuttaṃ suvimuttaṃ; dosā cittaṃ… mohā cittaṃ muttaṃ vimuttaṃ suvimuttaṃ…pe… sabbākusalābhisaṅkhārehi cittaṃ muttaṃ vimuttaṃ suvimuttanti – sa pannabhāro muni vippamutto.
ন কপ্পিযো নূপরতো ন পত্থিযোতি ভগৰাতি। কপ্পাতি দ্ৰে কপ্পা – তণ্হাকপ্পো চ দিট্ঠিকপ্পো চ…পে॰… অযং তণ্হাকপ্পো…পে॰… অযং দিট্ঠিকপ্পো। তস্স তণ্হাকপ্পো পহীনো, দিট্ঠিকপ্পো পটিনিস্সট্ঠো; তণ্হাকপ্পস্স পহীনত্তা দিট্ঠিকপ্পস্স পটিনিস্সট্ঠত্তা তণ্হাকপ্পং ৰা দিট্ঠিকপ্পং ৰা ন কপ্পেতি ন জনেতি ন সঞ্জনেতি ন নিব্বত্তেতি নাভিনিব্বত্তেতীতি – ন কপ্পিযো। নূপরতোতি। সব্বে বালপুথুজ্জনা রজ্জন্তি, পুথুজ্জনকল্যাণকং উপাদায সত্ত সেখা অপ্পত্তস্স পত্তিযা অনধিগতস্স অধিগমায অসচ্ছিকতস্স সচ্ছিকিরিযায আরমন্তি ৰিরমন্তি পটিৰিরমন্তি, অরহা আরতো ৰিরতো পটিৰিরতো নিক্খন্তো নিস্সটো ৰিপ্পমুত্তো ৰিসঞ্ঞুত্তো ৰিমরিযাদিকতেন চেতসা ৰিহরতীতি – ন কপ্পিযো নূপরতো। ন পত্থিযোতি। পত্থনা ৰুচ্চতি তণ্হা। যো রাগো সারাগো…পে॰… অভিজ্ঝা লোভো অকুসলমূলং। যস্সেসা পত্থনা তণ্হা পহীনা সমুচ্ছিন্না ৰূপসন্তা পটিপস্সদ্ধা অভব্বুপ্পত্তিকা ঞাণগ্গিনা দড্ঢা, সো ৰুচ্চতি ন পত্থিযো।
Na kappiyo nūparato na patthiyoti bhagavāti. Kappāti dve kappā – taṇhākappo ca diṭṭhikappo ca…pe… ayaṃ taṇhākappo…pe… ayaṃ diṭṭhikappo. Tassa taṇhākappo pahīno, diṭṭhikappo paṭinissaṭṭho; taṇhākappassa pahīnattā diṭṭhikappassa paṭinissaṭṭhattā taṇhākappaṃ vā diṭṭhikappaṃ vā na kappeti na janeti na sañjaneti na nibbatteti nābhinibbattetīti – na kappiyo. Nūparatoti. Sabbe bālaputhujjanā rajjanti, puthujjanakalyāṇakaṃ upādāya satta sekhā appattassa pattiyā anadhigatassa adhigamāya asacchikatassa sacchikiriyāya āramanti viramanti paṭiviramanti, arahā ārato virato paṭivirato nikkhanto nissaṭo vippamutto visaññutto vimariyādikatena cetasā viharatīti – na kappiyo nūparato. Na patthiyoti. Patthanā vuccati taṇhā. Yo rāgo sārāgo…pe… abhijjhā lobho akusalamūlaṃ. Yassesā patthanā taṇhā pahīnā samucchinnā vūpasantā paṭipassaddhā abhabbuppattikā ñāṇagginā daḍḍhā, so vuccati na patthiyo.
ভগৰাতি গারৰাধিৰচনং। অপি চ ভগ্গরাগোতি ভগৰা, ভগ্গদোসোতি ভগৰা, ভগ্গমোহোতি ভগৰা, ভগ্গমানোতি ভগৰা, ভগ্গদিট্ঠীতি ভগৰা, ভগ্গকণ্ডকোতি ভগৰা, ভগ্গকিলেসোতি ভগৰা, ভজি ৰিভজি পৰিভজি ধম্মরতনন্তি ভগৰা, ভৰানং অন্তকরোতি ভগৰা, ভাৰিতকাযো ভাৰিতসীলো ভাৰিতচিত্তো ভাৰিতপঞ্ঞোতি ভগৰা; ভাগী ৰা ভগৰা অরঞ্ঞৰনপত্থানি পন্তানি সেনাসনানি অপ্পসদ্দানি অপ্পনিগ্ঘোসানি ৰিজনৰাতানি মনুস্সরাহস্সেয্যকানি পটিসল্লানসারুপ্পানীতি ভগৰা, ভাগী ৰা ভগৰা চীৰরপিণ্ডপাতসেনাসনগিলানপচ্চযভেসজ্জপরিক্খারানন্তি ভগৰা, ভাগী ৰা ভগৰা অত্থরসস্স ধম্মরসস্স ৰিমুত্তিরসস্স অধিসীলস্স অধিচিত্তস্স অধিপঞ্ঞাযাতি ভগৰা, ভাগী ৰা ভগৰা চতুন্নং ঝানানং চতুন্নং অপ্পমঞ্ঞানং চতুন্নং অরূপসমাপত্তীনন্তি ভগৰা, ভাগী ৰা ভগৰা অট্ঠন্নং ৰিমোক্খানং অট্ঠন্নং অভিভাযতনানং নৰন্নং অনুপুব্বৰিহারসমাপত্তীনন্তি ভগৰা, ভাগী ৰা ভগৰা দসন্নং সঞ্ঞাভাৰনানং দসন্নং কসিণসমাপত্তীনং আনাপানস্সতিসমাধিস্স অসুভসমাপত্তিযাতি ভগৰা, ভাগী ৰা ভগৰা চতুন্নং সতিপট্ঠানানং চতুন্নং সম্মপ্পধানানং চতুন্নং ইদ্ধিপাদানং পঞ্চন্নং ইন্দ্রিযানং পঞ্চন্নং বলানং সত্তন্নং বোজ্ঝঙ্গানং অরিযস্স অট্ঠঙ্গিকস্স মগ্গস্সাতি ভগৰা, ভাগী ৰা ভগৰা দসন্নং তথাগতবলানং চতুন্নং ৰেসারজ্জানং চতুন্নং পটিসম্ভিদানং ছন্নং অভিঞ্ঞানং ছন্নং বুদ্ধধম্মানন্তি ভগৰা, ভগৰাতি নেতং নামং মাতরা কতং ন পিতরা কতং ন ভাতরা কতং ন ভগিনিযা কতং ন মিত্তামচ্চেহি কতং ন ঞাতিসালোহিতেহি কতং ন সমণব্রাহ্মণেহি কতং ন দেৰতাহি কতং; ৰিমোক্খন্তিকমেতং বুদ্ধানং ভগৰন্তানং বোধিযা মূলে সহ সব্বঞ্ঞুতঞ্ঞাণস্স পটিলাভা সচ্ছিকা পঞ্ঞত্তি যদিদং ভগৰাতি – ন কপ্পিযো নূপরতো ন পত্থিযো ইতি ভগৰা।
Bhagavāti gāravādhivacanaṃ. Api ca bhaggarāgoti bhagavā, bhaggadosoti bhagavā, bhaggamohoti bhagavā, bhaggamānoti bhagavā, bhaggadiṭṭhīti bhagavā, bhaggakaṇḍakoti bhagavā, bhaggakilesoti bhagavā, bhaji vibhaji pavibhaji dhammaratananti bhagavā, bhavānaṃ antakaroti bhagavā, bhāvitakāyo bhāvitasīlo bhāvitacitto bhāvitapaññoti bhagavā; bhāgī vā bhagavā araññavanapatthāni pantāni senāsanāni appasaddāni appanigghosāni vijanavātāni manussarāhasseyyakāni paṭisallānasāruppānīti bhagavā, bhāgī vā bhagavā cīvarapiṇḍapātasenāsanagilānapaccayabhesajjaparikkhārānanti bhagavā, bhāgī vā bhagavā attharasassa dhammarasassa vimuttirasassa adhisīlassa adhicittassa adhipaññāyāti bhagavā, bhāgī vā bhagavā catunnaṃ jhānānaṃ catunnaṃ appamaññānaṃ catunnaṃ arūpasamāpattīnanti bhagavā, bhāgī vā bhagavā aṭṭhannaṃ vimokkhānaṃ aṭṭhannaṃ abhibhāyatanānaṃ navannaṃ anupubbavihārasamāpattīnanti bhagavā, bhāgī vā bhagavā dasannaṃ saññābhāvanānaṃ dasannaṃ kasiṇasamāpattīnaṃ ānāpānassatisamādhissa asubhasamāpattiyāti bhagavā, bhāgī vā bhagavā catunnaṃ satipaṭṭhānānaṃ catunnaṃ sammappadhānānaṃ catunnaṃ iddhipādānaṃ pañcannaṃ indriyānaṃ pañcannaṃ balānaṃ sattannaṃ bojjhaṅgānaṃ ariyassa aṭṭhaṅgikassa maggassāti bhagavā, bhāgī vā bhagavā dasannaṃ tathāgatabalānaṃ catunnaṃ vesārajjānaṃ catunnaṃ paṭisambhidānaṃ channaṃ abhiññānaṃ channaṃ buddhadhammānanti bhagavā, bhagavāti netaṃ nāmaṃ mātarā kataṃ na pitarā kataṃ na bhātarā kataṃ na bhaginiyā kataṃ na mittāmaccehi kataṃ na ñātisālohitehi kataṃ na samaṇabrāhmaṇehi kataṃ na devatāhi kataṃ; vimokkhantikametaṃ buddhānaṃ bhagavantānaṃ bodhiyā mūle saha sabbaññutaññāṇassa paṭilābhā sacchikā paññatti yadidaṃ bhagavāti – na kappiyo nūparato na patthiyo iti bhagavā.
তেনাহ ভগৰা –
Tenāha bhagavā –
‘‘স সব্বধম্মেসু ৰিসেনিভূতো, যং কিঞ্চি দিট্ঠং ৰ সুতং মুতং ৰা।
‘‘Sa sabbadhammesu visenibhūto, yaṃ kiñci diṭṭhaṃ va sutaṃ mutaṃ vā;
স পন্নভারো মুনি ৰিপ্পমুত্তো, ন কপ্পিযো নূপরতো ন পত্থিযো’’॥[ইতি ভগৰাতি]
Sa pannabhāro muni vippamutto, na kappiyo nūparato na patthiyo’’.[iti bhagavāti]
মহাৰিযূহসুত্তনিদ্দেসো তেরসমো।
Mahāviyūhasuttaniddeso terasamo.
Footnotes:
Related texts:
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / খুদ্দকনিকায (অট্ঠকথা) • Khuddakanikāya (aṭṭhakathā) / মহানিদ্দেস-অট্ঠকথা • Mahāniddesa-aṭṭhakathā / ১৩. মহাব্যূহসুত্তনিদ্দেসৰণ্ণনা • 13. Mahābyūhasuttaniddesavaṇṇanā
