| Library / Tipiṭaka / तिपिटक • Tipiṭaka / चरियापिटकपाळि • Cariyāpiṭakapāḷi |
५. महिंसराजचरिया
5. Mahiṃsarājacariyā
३७.
37.
‘‘पुनापरं यदा होमि, महिंसो पवनचारको।
‘‘Punāparaṃ yadā homi, mahiṃso pavanacārako;
पवड्ढकायो बलवा, महन्तो भीमदस्सनो॥
Pavaḍḍhakāyo balavā, mahanto bhīmadassano.
३८.
38.
होतेत्थ ठानं महिंसानं, कोचि कोचि तहिं तहिं॥
Hotettha ṭhānaṃ mahiṃsānaṃ, koci koci tahiṃ tahiṃ.
३९.
39.
‘‘विचरन्तो ब्रहारञ्ञे, ठानं अद्दस भद्दकं।
‘‘Vicaranto brahāraññe, ṭhānaṃ addasa bhaddakaṃ;
तं ठानं उपगन्त्वान, तिट्ठामि च सयामि च॥
Taṃ ṭhānaṃ upagantvāna, tiṭṭhāmi ca sayāmi ca.
४०.
40.
‘‘अथेत्थ कपिमागन्त्वा, पापो अनरियो लहु।
‘‘Athettha kapimāgantvā, pāpo anariyo lahu;
खन्धे नलाटे भमुके, मुत्तेति ओहनेतितं॥
Khandhe nalāṭe bhamuke, mutteti ohanetitaṃ.
४१.
41.
‘‘सकिम्पि दिवसं दुतियं, ततियं चतुत्थम्पि च।
‘‘Sakimpi divasaṃ dutiyaṃ, tatiyaṃ catutthampi ca;
दूसेति मं सब्बकालं, तेन होमि उपद्दुतो॥
Dūseti maṃ sabbakālaṃ, tena homi upadduto.
४२.
42.
‘‘ममं उपद्दुतं दिस्वा, यक्खो मं इदमब्रवि।
‘‘Mamaṃ upaddutaṃ disvā, yakkho maṃ idamabravi;
‘नासेहेतं छवं पापं, सिङ्गेहि च खुरेहि च’॥
‘Nāsehetaṃ chavaṃ pāpaṃ, siṅgehi ca khurehi ca’.
४३.
43.
‘‘एवं वुत्ते तदा यक्खे, अहं तं इदमब्रविं।
‘‘Evaṃ vutte tadā yakkhe, ahaṃ taṃ idamabraviṃ;
‘किं त्वं मक्खेसि कुणपेन, पापेन अनरियेन मं॥
‘Kiṃ tvaṃ makkhesi kuṇapena, pāpena anariyena maṃ.
४४.
44.
‘‘‘यदिहं तस्स पकुप्पेय्यं, ततो हीनतरो भवे।
‘‘‘Yadihaṃ tassa pakuppeyyaṃ, tato hīnataro bhave;
सीलञ्च मे पभिज्जेय्य, विञ्ञू च गरहेय्यु मं॥
Sīlañca me pabhijjeyya, viññū ca garaheyyu maṃ.
४५.
45.
‘‘‘हीळिता जीविता वापि, परिसुद्धेन मतं वरं।
‘‘‘Hīḷitā jīvitā vāpi, parisuddhena mataṃ varaṃ;
क्याहं जीवितहेतूपि, काहामिं परहेठनं’॥
Kyāhaṃ jīvitahetūpi, kāhāmiṃ paraheṭhanaṃ’.
४६.
46.
‘‘ममेवायं मञ्ञमानो, अञ्ञेपेवं करिस्सति।
‘‘Mamevāyaṃ maññamāno, aññepevaṃ karissati;
तेव तस्स वधिस्सन्ति, सा मे मुत्ति भविस्सति॥
Teva tassa vadhissanti, sā me mutti bhavissati.
४७.
47.
‘‘हीनमज्झिमउक्कट्ठे, सहन्तो अवमानितं।
‘‘Hīnamajjhimaukkaṭṭhe, sahanto avamānitaṃ;
एवं लभति सप्पञ्ञो, मनसा यथा पत्थित’’न्ति॥
Evaṃ labhati sappañño, manasā yathā patthita’’nti.
महिंसराजचरियं पञ्चमं।
Mahiṃsarājacariyaṃ pañcamaṃ.
Footnotes:
Related texts:
अट्ठकथा • Aṭṭhakathā / सुत्तपिटक (अट्ठकथा) • Suttapiṭaka (aṭṭhakathā) / खुद्दकनिकाय (अट्ठकथा) • Khuddakanikāya (aṭṭhakathā) / चरियापिटक-अट्ठकथा • Cariyāpiṭaka-aṭṭhakathā / ५. महिंसराजचरियावण्णना • 5. Mahiṃsarājacariyāvaṇṇanā
