| Library / Tipiṭaka / திபிடக • Tipiṭaka / சரியாபிடக-அட்ட²கதா² • Cariyāpiṭaka-aṭṭhakathā |
5. மஹிங்ஸராஜசரியாவண்ணனா
5. Mahiṃsarājacariyāvaṇṇanā
37. பஞ்சமே மஹிங்ஸோ பவனசாரகோதி மஹாவனசாரீ வனமஹிங்ஸோ யதா³ ஹோமீதி யோஜனா. பவட்³ட⁴காயோதி வயஸம்பத்தியா அங்க³பச்சங்கா³னஞ்ச தூ²லபா⁴வேன அபி⁴வட்³ட⁴காயோ. ப³லவாதி மஹாப³லோ தா²மஸம்பன்னோ. மஹந்தோதி விபுலஸரீரோ. ஹத்தி²கலப⁴ப்பமாணோ கிர ததா³ போ³தி⁴ஸத்தஸ்ஸ காயோ ஹோதி. பீ⁴மத³ஸ்ஸனோதி மஹாஸரீரதாய வனமஹிங்ஸஜாதிதாய ச ஸீலங் அஜானந்தானங் ப⁴யங் ஜனநதோ ப⁴யானகத³ஸ்ஸனோ.
37. Pañcame mahiṃso pavanacārakoti mahāvanacārī vanamahiṃso yadā homīti yojanā. Pavaḍḍhakāyoti vayasampattiyā aṅgapaccaṅgānañca thūlabhāvena abhivaḍḍhakāyo. Balavāti mahābalo thāmasampanno. Mahantoti vipulasarīro. Hatthikalabhappamāṇo kira tadā bodhisattassa kāyo hoti. Bhīmadassanoti mahāsarīratāya vanamahiṃsajātitāya ca sīlaṃ ajānantānaṃ bhayaṃ jananato bhayānakadassano.
38. பப்³பா⁴ரேதி ஓலம்ப³கஸிலாகுச்சி²யங். த³காஸயேதி ஜலாஸயஸமீபே. ஹோதெத்த² டா²னந்தி எத்த² மஹாவனே யோ கோசி பதே³ஸோ வனமஹிங்ஸானங் திட்ட²னட்டா²னங் ஹோதி. தஹிங் தஹிந்தி தத்த² தத்த².
38.Pabbhāreti olambakasilākucchiyaṃ. Dakāsayeti jalāsayasamīpe. Hotettha ṭhānanti ettha mahāvane yo koci padeso vanamahiṃsānaṃ tiṭṭhanaṭṭhānaṃ hoti. Tahiṃ tahinti tattha tattha.
39. விசரந்தோதி விஹாரபா²ஸுகங் வீமங்ஸிதுங் விசரந்தோ. டா²னங் அத்³த³ஸ ப⁴த்³த³கந்தி ஏவங் விசரந்தோ தஸ்மிங் மஹாரஞ்ஞே ப⁴த்³த³கங் மய்ஹங் பா²ஸுகங் ருக்க²மூலட்டா²னங் அத்³த³க்கி²ங். தி³ஸ்வா ச தங் டா²னங் உபக³ந்த்வான, திட்டா²மி ச ஸயாமி ச கோ³சரங் க³ஹெத்வா தி³வா தங் ருக்க²மூலட்டா²னங் க³ந்த்வா டா²னஸயனேஹி வீதினாமேமீதி த³ஸ்ஸேதி.
39.Vicarantoti vihāraphāsukaṃ vīmaṃsituṃ vicaranto. Ṭhānaṃ addasa bhaddakanti evaṃ vicaranto tasmiṃ mahāraññe bhaddakaṃ mayhaṃ phāsukaṃ rukkhamūlaṭṭhānaṃ addakkhiṃ. Disvā ca taṃ ṭhānaṃ upagantvāna, tiṭṭhāmi ca sayāmi ca gocaraṃ gahetvā divā taṃ rukkhamūlaṭṭhānaṃ gantvā ṭhānasayanehi vītināmemīti dasseti.
40. ததா³ கிர போ³தி⁴ஸத்தோ ஹிமவந்தப்பதே³ஸே மஹிங்ஸயோனியங் நிப்³ப³த்தித்வா வயப்பத்தோ தா²மஸம்பன்னோ மஹாஸரீரோ ஹத்தி²கலப⁴ப்பமாணோ பப்³ப³தபாத³பப்³பா⁴ரகி³ரிது³க்³க³வனக⁴டாதீ³ஸு விசரந்தோ ஏகங் பா²ஸுகங் மஹாருக்க²மூலங் தி³ஸ்வா கோ³சரங் க³ஹெத்வா தி³வா தத்த² வஸதி. அதே²கோ லோலமக்கடோ ருக்கா² ஓதரித்வா மஹாஸத்தஸ்ஸ பிட்டி²ங் அபி⁴ருஹித்வா உச்சாரபஸ்ஸாவங் கத்வா ஸிங்கே³ஸு க³ண்ஹித்வா ஓலம்ப³ந்தோ நங்கு³ட்டே² க³ஹெத்வா தோ³லாயந்தோ கீளி. போ³தி⁴ஸத்தோ க²ந்திமெத்தானுத்³த³யஸம்பதா³ய தங் தஸ்ஸ அனாசாரங் ந மனஸாகாஸி. மக்கடோ புனப்புனங் ததே²வ கரோதி. தேன வுத்தங் ‘‘அதெ²த்த² கபி மாக³ந்த்வா’’திஆதி³.
40. Tadā kira bodhisatto himavantappadese mahiṃsayoniyaṃ nibbattitvā vayappatto thāmasampanno mahāsarīro hatthikalabhappamāṇo pabbatapādapabbhāragiriduggavanaghaṭādīsu vicaranto ekaṃ phāsukaṃ mahārukkhamūlaṃ disvā gocaraṃ gahetvā divā tattha vasati. Atheko lolamakkaṭo rukkhā otaritvā mahāsattassa piṭṭhiṃ abhiruhitvā uccārapassāvaṃ katvā siṅgesu gaṇhitvā olambanto naṅguṭṭhe gahetvā dolāyanto kīḷi. Bodhisatto khantimettānuddayasampadāya taṃ tassa anācāraṃ na manasākāsi. Makkaṭo punappunaṃ tatheva karoti. Tena vuttaṃ ‘‘athettha kapi māgantvā’’tiādi.
தத்த² கபி மாக³ந்த்வாதி கபி ஆக³ந்த்வா, ம-காரோ பத³ஸந்தி⁴கரோ. பாபோதி லாமகோ. அனரியோதி அனயே இரியனேன அயே ச ந இரியனேன அனரியோ, நிஹீனாசாரோதி அத்தோ². லஹூதி லோலோ. க²ந்தே⁴தி க²ந்த⁴ப்பதே³ஸே. முத்தேதீதி பஸ்ஸாவங் கரோதி. ஓஹதே³தீதி கரீஸங் ஒஸ்ஸஜ்ஜதி. தந்தி தங் மங், ததா³ மஹிங்ஸபூ⁴தங் மங்.
Tattha kapi māgantvāti kapi āgantvā, ma-kāro padasandhikaro. Pāpoti lāmako. Anariyoti anaye iriyanena aye ca na iriyanena anariyo, nihīnācāroti attho. Lahūti lolo. Khandheti khandhappadese. Muttetīti passāvaṃ karoti. Ohadetīti karīsaṃ ossajjati. Tanti taṃ maṃ, tadā mahiṃsabhūtaṃ maṃ.
41. ஸகிம்பி தி³வஸந்தி ஏகதி³வஸம்பி தூ³ஸேதி மங் ஸப்³ப³காலம்பி. தேனாஹ ‘‘தூ³ஸேதி மங் ஸப்³ப³கால’’ந்தி. ந கேவலஞ்ச து³தியததியசதுத்த²தி³வஸமத்தங், அத² கோ² ஸப்³ப³காலம்பி மங் பஸ்ஸாவாதீ³ஹி தூ³ஸேதி. யதா³ யதா³ முத்தாதீ³னி காதுகாமோ, ததா³ ததா³ மய்ஹமேவ உபரி கரோதீதி த³ஸ்ஸேதி. உபத்³து³தோதி பா³தி⁴தோ, தேன ஸிங்கே³ஸு ஓலம்ப³னாதி³னா முத்தாதி³அஸுசிமக்க²ணேன தஸ்ஸ ச அபஹரணத்த²ங் அனேகவாரங் ஸிங்க³கோடீஹி வாலக்³கே³ன ச அனேகவாரங் கத்³த³மபங்ஸுமிஸ்ஸகங் உத³கங் ஸிஞ்சித்வா தோ⁴வனேன ச நிப்பீளிதோ ஹோமீதி அத்தோ².
41.Sakimpidivasanti ekadivasampi dūseti maṃ sabbakālampi. Tenāha ‘‘dūseti maṃ sabbakāla’’nti. Na kevalañca dutiyatatiyacatutthadivasamattaṃ, atha kho sabbakālampi maṃ passāvādīhi dūseti. Yadā yadā muttādīni kātukāmo, tadā tadā mayhameva upari karotīti dasseti. Upaddutoti bādhito, tena siṅgesu olambanādinā muttādiasucimakkhaṇena tassa ca apaharaṇatthaṃ anekavāraṃ siṅgakoṭīhi vālaggena ca anekavāraṃ kaddamapaṃsumissakaṃ udakaṃ siñcitvā dhovanena ca nippīḷito homīti attho.
42. யக்கோ²தி தஸ்மிங் ருக்கே² அதி⁴வத்தா² தே³வதா. மங் இத³மப்³ரவீதி ருக்க²க்க²ந்தே⁴ ட²த்வா ‘‘மஹிங்ஸராஜ, கஸ்மா இமஸ்ஸ து³ட்ட²மக்கடஸ்ஸ அவமானங் ஸஹஸீ’’தி இமமத்த²ங் பகாஸெந்தோ நாஸேஹேதங் ச²வங் பாபங் , ஸிங்கே³ஹி ச கு²ரேஹி சாதி இத³ங் வசனங் மங் அபா⁴ஸி.
42.Yakkhoti tasmiṃ rukkhe adhivatthā devatā. Maṃ idamabravīti rukkhakkhandhe ṭhatvā ‘‘mahiṃsarāja, kasmā imassa duṭṭhamakkaṭassa avamānaṃ sahasī’’ti imamatthaṃ pakāsento nāsehetaṃ chavaṃ pāpaṃ, siṅgehi ca khurehi cāti idaṃ vacanaṃ maṃ abhāsi.
43. ஏவங் வுத்தே ததா³ யக்கே²தி ததா³ தஸ்மிங் காலே தஸ்மிங் யக்கே² ஏவங் வுத்தே ஸதி. அஹங் தங் இத³மப்³ரவிந்தி அஹங் தங் யக்க²ங் இத³ங் இதா³னி வக்க²மானங் அப்³ரவிங் அபா⁴ஸிங். குணபேனாதி கிலேஸாஸுசிபக்³க⁴ரணேன ஸுசிஜாதிகானங் ஸாதூ⁴னங் பரமஜிகு³ச்ச²னீயதாய அதிது³க்³க³ந்த⁴வாயனேன ச குணபஸதி³ஸதாய குணபேன. பாபேனாதி பாணாதிபாதபாபேன. அனரியேனாதி அனரியானங் அஸாதூ⁴னங் மாக³விகனேஸாதா³தீ³னங் ஹீனபுரிஸானங் த⁴ம்மத்தா அனரியேன, கிங் கேன காரணேன, த்வங் தே³வதே மங் மக்கே²ஸி, அயுத்தங் தயா வுத்தங் மங் பாபே நியோஜெந்தியாதி த³ஸ்ஸேதி.
43.Evaṃ vutte tadā yakkheti tadā tasmiṃ kāle tasmiṃ yakkhe evaṃ vutte sati. Ahaṃ taṃ idamabravinti ahaṃ taṃ yakkhaṃ idaṃ idāni vakkhamānaṃ abraviṃ abhāsiṃ. Kuṇapenāti kilesāsucipaggharaṇena sucijātikānaṃ sādhūnaṃ paramajigucchanīyatāya atiduggandhavāyanena ca kuṇapasadisatāya kuṇapena. Pāpenāti pāṇātipātapāpena. Anariyenāti anariyānaṃ asādhūnaṃ māgavikanesādādīnaṃ hīnapurisānaṃ dhammattā anariyena, kiṃ kena kāraṇena, tvaṃ devate maṃ makkhesi, ayuttaṃ tayā vuttaṃ maṃ pāpe niyojentiyāti dasseti.
44. இதா³னி தஸ்மிங் பாபத⁴ம்மே ஆதீ³னவங் பகாஸெந்தோ ‘‘யதி³ஹ’’ந்திஆதி³மாஹ. தஸ்ஸத்தோ² – ப⁴த்³தே³ தே³வதே, அஹங் தஸ்ஸ யதி³ குஜ்ஜெ²ய்யங், ததோபி லாமகதரோ ப⁴வெய்யங். யேன ஹி அத⁴ம்மசரணேன ஸோ பா³லமக்கடோ நிஹீனோ நாம ஜாதோ, ஸசே பனாஹங் ததோபி ப³லவதரங் பாபத⁴ம்மங் சரெய்யங், நனு தேன ததோ பாபதரோ ப⁴வெய்யங், அட்டா²னஞ்சேதங் யதி³ஹங் இத⁴லோகபரலோகங் தது³த்தரி ச ஜானித்வா டி²தோ ஏகந்தேனேவ பரஹிதாய படிபன்னோ ஏவரூபங் பாபத⁴ம்மங் சரெய்யந்தி. கிஞ்ச பி⁴ய்யோ – ஸீலஞ்ச மே பபி⁴ஜ்ஜெய்யாதி அஹஞ்சேவ கோ² பன ஏவரூபங் பாபங் கரெய்யங், மய்ஹங் ஸீலபாரமீ க²ண்டி³தா ஸியா. விஞ்ஞூ ச க³ரஹெய்யு மந்தி பண்டி³தா ச தே³வமனுஸ்ஸா மங் க³ரஹெய்யுங் ‘‘பஸ்ஸத², போ⁴, அயங் போ³தி⁴ஸத்தோ போ³தி⁴பரியேஸனங் சரமானோ ஏவரூபங் பாபங் அகாஸீ’’தி.
44. Idāni tasmiṃ pāpadhamme ādīnavaṃ pakāsento ‘‘yadiha’’ntiādimāha. Tassattho – bhadde devate, ahaṃ tassa yadi kujjheyyaṃ, tatopi lāmakataro bhaveyyaṃ. Yena hi adhammacaraṇena so bālamakkaṭo nihīno nāma jāto, sace panāhaṃ tatopi balavataraṃ pāpadhammaṃ careyyaṃ, nanu tena tato pāpataro bhaveyyaṃ, aṭṭhānañcetaṃ yadihaṃ idhalokaparalokaṃ taduttari ca jānitvā ṭhito ekanteneva parahitāya paṭipanno evarūpaṃ pāpadhammaṃ careyyanti. Kiñca bhiyyo – sīlañca me pabhijjeyyāti ahañceva kho pana evarūpaṃ pāpaṃ kareyyaṃ, mayhaṃ sīlapāramī khaṇḍitā siyā. Viññū ca garaheyyu manti paṇḍitā ca devamanussā maṃ garaheyyuṃ ‘‘passatha, bho, ayaṃ bodhisatto bodhipariyesanaṃ caramāno evarūpaṃ pāpaṃ akāsī’’ti.
45. ஹீளிதா ஜீவிதா வாபீதி வா-ஸத்³தோ³ அவதா⁴ரணே. ஏவங் விஞ்ஞூஹி ஹீளிதா க³ரஹிதா ஜீவிதாபி பரிஸுத்³தே⁴ன பரிஸுத்³த⁴ஸீலேன ஹுத்வா மதங் வா மரணமேவ வரங் உத்தமங் ஸெய்யோ. க்யாஹங் ஜீவிதஹேதுபி , காஹாமி பரஹேட²னந்தி ஏவங் ஜானந்தோ ச அஹங் மய்ஹங் ஜீவிதனிமித்தம்பி பரஸத்தவிஹிங்ஸனங் கிங் காஹாமி கிங் கரிஸ்ஸாமி, ஏதஸ்ஸ கரணே காரணங் நத்தீ²தி அத்தோ².
45.Hīḷitā jīvitā vāpīti vā-saddo avadhāraṇe. Evaṃ viññūhi hīḷitā garahitā jīvitāpi parisuddhena parisuddhasīlena hutvā mataṃ vā maraṇameva varaṃ uttamaṃ seyyo. Kyāhaṃ jīvitahetupi, kāhāmi paraheṭhananti evaṃ jānanto ca ahaṃ mayhaṃ jīvitanimittampi parasattavihiṃsanaṃ kiṃ kāhāmi kiṃ karissāmi, etassa karaṇe kāraṇaṃ natthīti attho.
அயங் பன அஞ்ஞேபி மங் விய மஞ்ஞமானோ ஏவங் அனாசாரங் கரிஸ்ஸதி, ததோ யேஸங் சண்ட³மஹிங்ஸானங் ஏவங் கரிஸ்ஸதி, தே ஏவ ஏதங் வதி⁴ஸ்ஸந்தி, ஸா ஏதஸ்ஸ அஞ்ஞேஹி மாரணா மய்ஹங் து³க்க²தோ ச பாணாதிபாததோ ச முத்தி ப⁴விஸ்ஸதீதி ஆஹ. தேன வுத்தங் –
Ayaṃ pana aññepi maṃ viya maññamāno evaṃ anācāraṃ karissati, tato yesaṃ caṇḍamahiṃsānaṃ evaṃ karissati, te eva etaṃ vadhissanti, sā etassa aññehi māraṇā mayhaṃ dukkhato ca pāṇātipātato ca mutti bhavissatīti āha. Tena vuttaṃ –
46.
46.
‘‘மமேவாயங் மஞ்ஞமானோ, அஞ்ஞேபேவங் கரிஸ்ஸதி;
‘‘Mamevāyaṃ maññamāno, aññepevaṃ karissati;
தேவ தஸ்ஸ வதி⁴ஸ்ஸந்தி, ஸா மே முத்தி ப⁴விஸ்ஸதீ’’தி.
Teva tassa vadhissanti, sā me mutti bhavissatī’’ti.
தத்த² மமேவாயந்தி மங் விய அயங். அஞ்ஞேபீதி அஞ்ஞேஸம்பி. ஸேஸங் வுத்தத்த²மேவ.
Tattha mamevāyanti maṃ viya ayaṃ. Aññepīti aññesampi. Sesaṃ vuttatthameva.
47. ஹீனமஜ்ஜி²மஉக்கட்டே²தி ஹீனே ச மஜ்ஜி²மே ச உக்கட்டே² ச நிமித்தபூ⁴தே. ஸஹந்தோ அவமானிதந்தி விபா⁴க³ங் அகத்வா தேஹி பவத்திதங் அவமானங் பரிப⁴வங் ஸஹந்தோ க²மந்தோ. ஏவங் லப⁴தி ஸப்பஞ்ஞோதி ஏவங் ஹீனாதீ³ஸு விபா⁴க³ங் அகத்வா க²ந்திமெத்தானுத்³த³யங் உபட்ட²பெத்வா தத³பராத⁴ங் ஸஹந்தோ ஸீலாதி³பாரமியோ ப்³ரூஹெத்வா மனஸா யதா²பத்தி²தங் யதி²ச்சி²தங் ஸப்³ப³ஞ்ஞுதஞ்ஞாணங் லப⁴தி படிவிஜ்ஜ²தி, தஸ்ஸ தங் ந தூ³ரேதி.
47.Hīnamajjhimaukkaṭṭheti hīne ca majjhime ca ukkaṭṭhe ca nimittabhūte. Sahanto avamānitanti vibhāgaṃ akatvā tehi pavattitaṃ avamānaṃ paribhavaṃ sahanto khamanto. Evaṃ labhati sappaññoti evaṃ hīnādīsu vibhāgaṃ akatvā khantimettānuddayaṃ upaṭṭhapetvā tadaparādhaṃ sahanto sīlādipāramiyo brūhetvā manasā yathāpatthitaṃ yathicchitaṃ sabbaññutaññāṇaṃ labhati paṭivijjhati, tassa taṃ na dūreti.
ஏவங் மஹாஸத்தோ அத்தனோ அஜ்ஜா²ஸயங் பகாஸெந்தோ தே³வதாய த⁴ம்மங் தே³ஸேஸி. ஸோ கதிபாஹச்சயேன அஞ்ஞத்த² க³தோ. அஞ்ஞோ சண்ட³மஹிங்ஸோ நிவாஸபா²ஸுதாய தங் டா²னங் க³ந்த்வா அட்டா²ஸி. து³ட்ட²மக்கடோ ‘‘ஸோ ஏவ அய’’ந்தி ஸஞ்ஞாய தஸ்ஸ பிட்டி²ங் அபி⁴ருஹித்வா ததே²வ அனாசாரங் அகாஸி. அத² நங் ஸோ விது⁴னந்தோ பூ⁴மியங் பாதெத்வா ஸிங்கே³ன ஹத³யே விஜ்ஜி²த்வா பாதே³ஹி மத்³தி³த்வா ஸஞ்சுண்ணேஸி.
Evaṃ mahāsatto attano ajjhāsayaṃ pakāsento devatāya dhammaṃ desesi. So katipāhaccayena aññattha gato. Añño caṇḍamahiṃso nivāsaphāsutāya taṃ ṭhānaṃ gantvā aṭṭhāsi. Duṭṭhamakkaṭo ‘‘so eva aya’’nti saññāya tassa piṭṭhiṃ abhiruhitvā tatheva anācāraṃ akāsi. Atha naṃ so vidhunanto bhūmiyaṃ pātetvā siṅgena hadaye vijjhitvā pādehi madditvā sañcuṇṇesi.
ததா³ ஸீலவா மஹிங்ஸராஜா லோகனாதோ².
Tadā sīlavā mahiṃsarājā lokanātho.
தஸ்ஸ இதா⁴பி ஹெட்டா² வுத்தனயேனேவ யதா²ரஹங் ஸேஸபாரமியோ நித்³தா⁴ரேதப்³பா³. ததா² ஹத்தி²னாக³- (சரியா॰ 2.1 ஆத³யோ) பூ⁴ரித³த்த- (சரியா॰ 2.11 ஆத³யோ) சம்பெய்யனாக³ராஜ- (சரியா॰ 2.20 ஆத³யோ) சரியாஸு விய இத⁴ மஹாஸத்தஸ்ஸ கு³ணானுபா⁴வா வேதி³தப்³பா³.
Tassa idhāpi heṭṭhā vuttanayeneva yathārahaṃ sesapāramiyo niddhāretabbā. Tathā hatthināga- (cariyā. 2.1 ādayo) bhūridatta- (cariyā. 2.11 ādayo) campeyyanāgarāja- (cariyā. 2.20 ādayo) cariyāsu viya idha mahāsattassa guṇānubhāvā veditabbā.
மஹிங்ஸராஜசரியாவண்ணனா நிட்டி²தா.
Mahiṃsarājacariyāvaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / கு²த்³த³கனிகாய • Khuddakanikāya / சரியாபிடகபாளி • Cariyāpiṭakapāḷi / 5. மஹிங்ஸராஜசரியா • 5. Mahiṃsarājacariyā
