| Upanishads |
Maitreyi Upanishad
Sanskrit Devanagari with Roman transliteration (IAST)
मैत्रेय्युपनिषत्
maitreyyupaniṣat
श्रुत्याचार्योपदेशेन मुनयो यत्पदं ययुः ।
तत्स्वानुभूतिसंसिद्धं स्वमात्रं ब्रह्म भावये ॥
śrutyācāryopadeśena munayo yatpadaṃ yayuḥ ।
tatsvānubhūtisaṃsiddhaṃ svamātraṃ brahma bhāvaye ॥
ॐ आप्यायन्तु ममाङ्गानि वाक्प्राणश्चक्षुः श्रोत्रम् ।
अथो बलमिन्द्रियाणि च सर्वाणि सर्वं ब्रह्मोपनिषदं
माहं ब्रह्म निराकुर्याम् । मा मा ब्रह्म निराकरो-
दनिराकरणमस्तु । अनिराकरणं मेऽस्तु । तदात्मनि निरते
य उपनिषत्सु धर्मास्ते मयि सन्तु ते मयि सन्तु ॥
oṃ āpyāyantu mamāṅgāni vākprāṇaścakṣuḥ śrotram ।
atho balamindriyāṇi ca sarvāṇi sarvaṃ brahmopaniṣadaṃ
māhaṃ brahma nirākuryām । mā mā brahma nirākaro-
danirākaraṇamastu । anirākaraṇaṃ me'stu । tadātmani nirate
ya upaniṣatsu dharmāste mayi santu te mayi santu ॥
ॐ शान्तिः शान्तिः शान्तिः ॥
oṃ śāntiḥ śāntiḥ śāntiḥ ॥
ॐ बृहद्रथो वै नाम राजा राज्ये ज्येष्ठं
पुत्रं निधापयित्वेदमशाश्वतं मन्यमानः
शरीरं वैराग्यमुपेतोऽरण्यं निर्जगाम । स तत्र
परमं तप आस्थायादित्यमीक्षमाण ऊर्ध्वबाहु-
स्तिष्ठत्यन्ते सहस्रस्य मुनिरन्तिकमाजगामाग्नि
रिवाधूमकस्तेजसा निर्दहन्निवात्मविद्भगवाञ्छा-
कायन्य उत्तिष्ठोत्तिष्ठ वरं वृणीश्वेति
राजानमब्रवीत्स तस्मै नमस्कृत्योवाच
भगवन्नाहमात्मवित्त्वं तत्त्वविच्छृणुमो वयं
स त्वं नो ब्रूहीत्येतद्वृत्तं पुरस्तादशक्यं मा
पृच्छ प्रश्नमैक्ष्वाकान्यान्कामान्वृणीश्वेति
शाकायन्यस्य चरणावभिमृश्यमानो
राजेमां गाथां जगाद ॥ १॥
oṃ bṛhadratho vai nāma rājā rājye jyeṣṭhaṃ
putraṃ nidhāpayitvedamaśāśvataṃ manyamānaḥ
śarīraṃ vairāgyamupeto'raṇyaṃ nirjagāma । sa tatra
paramaṃ tapa āsthāyādityamīkṣamāṇa ūrdhvabāhu-
stiṣṭhatyante sahasrasya munirantikamājagāmāgni
rivādhūmakastejasā nirdahannivātmavidbhagavāñchā-
kāyanya uttiṣṭhottiṣṭha varaṃ vṛṇīśveti
rājānamabravītsa tasmai namaskṛtyovāca
bhagavannāhamātmavittvaṃ tattvavicchṛṇumo vayaṃ
sa tvaṃ no brūhītyetadvṛttaṃ purastādaśakyaṃ mā
pṛccha praśnamaikṣvākānyānkāmānvṛṇīśveti
śākāyanyasya caraṇāvabhimṛśyamāno
rājemāṃ gāthāṃ jagāda ॥ 1॥
अथ किमएतैर्मान्यनां शोषणं महार्णवानां
शिखरिणां प्रपतनं ध्रुवस्य प्रचलनं स्थानं
वा तरूणां निमज्जनं पृथिव्याः स्थानादपसरणं
सुराणां सोऽहमित्येतद्विधेऽस्मिन्संसारे किं
कामोपभोगैर्यैरेवाश्रितस्यासकृदुपावर्तनं
दृश्यत इत्युद्धर्तुमर्हसीत्यन्धोदपानस्थो भेक
इवाहमस्मिन्संसारे भगवंस्त्वं नो गतिरिति ॥ २॥
atha kimaetairmānyanāṃ śoṣaṇaṃ mahārṇavānāṃ
śikhariṇāṃ prapatanaṃ dhruvasya pracalanaṃ sthānaṃ
vā tarūṇāṃ nimajjanaṃ pṛthivyāḥ sthānādapasaraṇaṃ
surāṇāṃ so'hamityetadvidhe'sminsaṃsāre kiṃ
kāmopabhogairyairevāśritasyāsakṛdupāvartanaṃ
dṛśyata ityuddhartumarhasītyandhodapānastho bheka
ivāhamasminsaṃsāre bhagavaṃstvaṃ no gatiriti ॥ 2॥
भगवञ्शरीरमिदं मैथुनादेवोद्भूतं संविदपेतं
निरय एव मूत्रद्वारेण निष्क्रान्तमस्थिभिश्चितं
मांसेनानुलिप्तं चर्मणावबद्धं विण्मूत्रवातपित्त-
कफमज्जामेदोवसाभिरन्यैश्च मलैर्बहुभिः
परिपूर्णमेतादृशे शरीरे वर्तमानस्य भगवंस्त्वं
नो गतिरिति ॥ ३॥
bhagavañśarīramidaṃ maithunādevodbhūtaṃ saṃvidapetaṃ
niraya eva mūtradvāreṇa niṣkrāntamasthibhiścitaṃ
māṃsenānuliptaṃ carmaṇāvabaddhaṃ viṇmūtravātapitta-
kaphamajjāmedovasābhiranyaiśca malairbahubhiḥ
paripūrṇametādṛśe śarīre vartamānasya bhagavaṃstvaṃ
no gatiriti ॥ 3॥
अथ भगवाञ्छकायन्यः सुप्रीतोऽब्रवीद्राजानं
महाराज बृहद्रथेक्ष्वाकुर्वंशध्वजशीर्षात्मज्ञः
कृतकृत्यस्त्वं मरुन्नाम्नो विश्रुतोऽसीत्ययं
खल्वात्मा ते कतमो भगवान्वर्ण्य इति तं होवाच ॥
atha bhagavāñchakāyanyaḥ suprīto'bravīdrājānaṃ
mahārāja bṛhadrathekṣvākurvaṃśadhvajaśīrṣātmajñaḥ
kṛtakṛtyastvaṃ marunnāmno viśruto'sītyayaṃ
khalvātmā te katamo bhagavānvarṇya iti taṃ hovāca ॥
शब्दस्पर्शमया येऽर्था अनर्था इव ते स्थिताः ।
येषां सक्तस्तु भूतात्मा न स्मरेच्च परं पदम् ॥ १॥
śabdasparśamayā ye'rthā anarthā iva te sthitāḥ ।
yeṣāṃ saktastu bhūtātmā na smarecca paraṃ padam ॥ 1॥
तपसा प्राप्यते सत्त्वं सत्त्वात्सम्प्राप्यते मनः ।
मनसा प्राप्यते ह्यात्मा ह्यात्मापत्त्या निवर्तते ॥ २॥
tapasā prāpyate sattvaṃ sattvātsamprāpyate manaḥ ।
manasā prāpyate hyātmā hyātmāpattyā nivartate ॥ 2॥
यथा निरिन्धनो वह्निः स्वयोनावुपशाम्यति ।
तथा वृत्तिक्षयच्चित्तं स्वयोनावुपशाम्यति ॥ ३॥
yathā nirindhano vahniḥ svayonāvupaśāmyati ।
tathā vṛttikṣayaccittaṃ svayonāvupaśāmyati ॥ 3॥
स्वयोनावुपशान्तस्य मनसः सत्यगामिनः ।
इन्द्रियार्थविमूढस्यानृताः कर्मवशानुगाः ॥ ४॥
svayonāvupaśāntasya manasaḥ satyagāminaḥ ।
indriyārthavimūḍhasyānṛtāḥ karmavaśānugāḥ ॥ 4॥
चित्तमेव हि संसारस्तत्प्रयत्नेन शोधयेत् ।
यच्चित्तस्तन्मयो भवति गुह्यमेतत्सनातनम् ॥ ५॥
cittameva hi saṃsārastatprayatnena śodhayet ।
yaccittastanmayo bhavati guhyametatsanātanam ॥ 5॥
चित्तस्य हि प्रसादेन हन्ति कर्म शुभाशुभम् ।
प्रसन्नात्मात्मनि स्थित्वा सुखमक्षयमश्नुते ॥ ६॥
cittasya hi prasādena hanti karma śubhāśubham ।
prasannātmātmani sthitvā sukhamakṣayamaśnute ॥ 6॥
समासक्तं यदा चित्तं जन्तोर्विषयगोचरम् ।
यद्येवं ब्रह्मणि स्यात्तत्को न मुच्येत बन्धनात् ॥ ७॥
samāsaktaṃ yadā cittaṃ jantorviṣayagocaram ।
yadyevaṃ brahmaṇi syāttatko na mucyeta bandhanāt ॥ 7॥
हृत्पुण्डरीकमध्ये तु भावयेत्परमेश्वरम् ।
साक्षिणं बुद्धिवृत्तस्य परमप्रेमगोचरम् ॥ ८॥
hṛtpuṇḍarīkamadhye tu bhāvayetparameśvaram ।
sākṣiṇaṃ buddhivṛttasya paramapremagocaram ॥ 8॥
अगोचरं मनोवाचामवधूतादिसम्प्लवम् ।
सत्तामात्रप्रकाशैकप्रकाशं भावनातिगम् ॥ ९॥
agocaraṃ manovācāmavadhūtādisamplavam ।
sattāmātraprakāśaikaprakāśaṃ bhāvanātigam ॥ 9॥
अहेयमनुपादेयमसामान्यविशेषणम् ।
ध्रुवं स्तिमितगम्भीरं न तेजो न तमस्ततम् ।
निर्विकल्पं निराभासं निर्वाणमयसंविदम् ॥ १०॥
aheyamanupādeyamasāmānyaviśeṣaṇam ।
dhruvaṃ stimitagambhīraṃ na tejo na tamastatam ।
nirvikalpaṃ nirābhāsaṃ nirvāṇamayasaṃvidam ॥ 10॥
नित्यः शुद्धो बुद्धमुक्तस्वभावः
सत्यः सूक्ष्मः संविभुश्चाद्वितीयः ।
आनन्दाब्धिर्यः परः सोऽह-
मस्मि प्रत्यग्धातुर्नात्र संशीतिरस्ति ॥ ११॥
nityaḥ śuddho buddhamuktasvabhāvaḥ
satyaḥ sūkṣmaḥ saṃvibhuścādvitīyaḥ ।
ānandābdhiryaḥ paraḥ so'ha-
masmi pratyagdhāturnātra saṃśītirasti ॥ 11॥
आनन्दमन्तर्निजमाश्रयं त-
माशापिशाचीमवमनयन्तम् ।
आलोकयन्तं जगदिन्द्रजाल-
मापत्कथं मां प्रविशेदसङ्गम् ॥ १२॥
ānandamantarnijamāśrayaṃ ta-
māśāpiśācīmavamanayantam ।
ālokayantaṃ jagadindrajāla-
māpatkathaṃ māṃ praviśedasaṅgam ॥ 12॥
वर्णाश्रमाचारयुता विमूढाः
कर्मानुसारेण फलं लभन्ते ।
वर्णादिधर्मं हि परित्यजन्तः
स्वानन्दतृप्ताः पुरुषा भवन्ति ॥ १३॥
varṇāśramācārayutā vimūḍhāḥ
karmānusāreṇa phalaṃ labhante ।
varṇādidharmaṃ hi parityajantaḥ
svānandatṛptāḥ puruṣā bhavanti ॥ 13॥
वर्णाश्रमं सावयवं स्वरूप-
माद्यन्तयुक्तं ह्यतिकृच्छ्रमात्रम् ।
पुत्रादिदेहेष्वभिमानशून्यं
भूत्वा वसेत्सौख्यतमे ह्यनन्त इति ॥ १४॥ ४॥
varṇāśramaṃ sāvayavaṃ svarūpa-
mādyantayuktaṃ hyatikṛcchramātram ।
putrādideheṣvabhimānaśūnyaṃ
bhūtvā vasetsaukhyatame hyananta iti ॥ 14॥ 4॥
इति प्रथमोऽध्यायः ॥ १॥
iti prathamo'dhyāyaḥ ॥ 1॥
अथ भगवान्मैत्रेयः कैलासं जगाम तं गत्वोवाच
भो भगवन्परमतत्त्वरहस्यमनुब्रूहीति ॥
atha bhagavānmaitreyaḥ kailāsaṃ jagāma taṃ gatvovāca
bho bhagavanparamatattvarahasyamanubrūhīti ॥
स होवाच महादेवः ॥
sa hovāca mahādevaḥ ॥
देहो देवालयः प्रोक्तः स जीवः केवलः शिवः ।
त्यजेदज्ञाननिर्माल्यं सोऽहम्भावेन पूजयेत् ॥ १॥
deho devālayaḥ proktaḥ sa jīvaḥ kevalaḥ śivaḥ ।
tyajedajñānanirmālyaṃ so'hambhāvena pūjayet ॥ 1॥
अभेददर्शनं ज्ञानं ध्यानं निर्विषयं मनः।
स्नानं मनोमलत्यागः शौचमिन्द्रियनिग्रहः ॥ २॥
abhedadarśanaṃ jñānaṃ dhyānaṃ nirviṣayaṃ manaḥ।
snānaṃ manomalatyāgaḥ śaucamindriyanigrahaḥ ॥ 2॥
ब्रह्मामृतं पिबेद्भैक्षमाचरेद्देहरक्षणे ।
वसेदेकान्तिको भूत्वा चैकान्ते द्वैतवर्जिते ।
इत्येवमाचरेद्धीमान्स एवं मुक्तिमाप्नुयात् ॥ ३॥
brahmāmṛtaṃ pibedbhaikṣamācareddeharakṣaṇe ।
vasedekāntiko bhūtvā caikānte dvaitavarjite ।
ityevamācareddhīmānsa evaṃ muktimāpnuyāt ॥ 3॥
जातं मृतमिदं देहं मातापितृमलात्मकम् ।
सुखदुःखालयामेध्यं स्पृष्ट्वा स्नानं विधीयते ॥ ४॥
jātaṃ mṛtamidaṃ dehaṃ mātāpitṛmalātmakam ।
sukhaduḥkhālayāmedhyaṃ spṛṣṭvā snānaṃ vidhīyate ॥ 4॥
धातुबद्धं महारोगं पापमन्दिरमध्रुवम् ।
विकाराकारविस्तीर्णं स्पृष्ट्वा स्नानं विधीयते ॥ ५॥
dhātubaddhaṃ mahārogaṃ pāpamandiramadhruvam ।
vikārākāravistīrṇaṃ spṛṣṭvā snānaṃ vidhīyate ॥ 5॥
नवद्वारमलस्रावं सदा काले स्वभावजम् ।
दुर्गन्धं दुर्मलोपेतं स्पृष्ट्वा स्नानं विधीयते ॥ ६॥
navadvāramalasrāvaṃ sadā kāle svabhāvajam ।
durgandhaṃ durmalopetaṃ spṛṣṭvā snānaṃ vidhīyate ॥ 6॥
मातृसूतकसम्बन्धं सूतके सह जायते ।
मृतसूतकजं देहं स्पृष्ट्वा स्नानं विधीयते ॥ ७॥
mātṛsūtakasambandhaṃ sūtake saha jāyate ।
mṛtasūtakajaṃ dehaṃ spṛṣṭvā snānaṃ vidhīyate ॥ 7॥
अहम्ममेति विण्मूत्रलेपगन्धादिमोचनम् ।
शुद्धशौचमिति प्रोक्तं मृज्जलाभ्यां तु लौकिकम् ॥ ८॥
ahammameti viṇmūtralepagandhādimocanam ।
śuddhaśaucamiti proktaṃ mṛjjalābhyāṃ tu laukikam ॥ 8॥
चित्तशुद्धिकरं शौचं वासनात्रयनाशनम् ।
ज्ञानवैराग्यमृत्तोयैः क्षालनाच्छौचमुच्यते ॥ ९॥
cittaśuddhikaraṃ śaucaṃ vāsanātrayanāśanam ।
jñānavairāgyamṛttoyaiḥ kṣālanācchaucamucyate ॥ 9॥
अद्वैतभावनाभैक्षमभक्ष्यं द्वैतभावनम् ।
गुरुशास्त्रोक्तभावेन भिक्षोर्भैक्षं विधीयते ॥ १०॥
advaitabhāvanābhaikṣamabhakṣyaṃ dvaitabhāvanam ।
guruśāstroktabhāvena bhikṣorbhaikṣaṃ vidhīyate ॥ 10॥
विद्वान्स्वदेशमुत्सृज्य संन्यासानन्तरं स्वतः ।
कारागारविनिर्मुक्तचोरवद्दूरतो वसेत् ॥ ११॥
vidvānsvadeśamutsṛjya saṃnyāsānantaraṃ svataḥ ।
kārāgāravinirmuktacoravaddūrato vaset ॥ 11॥
अहङ्कारसुतं वित्तभ्रातरं मोहमन्दिरम् ।
आशापत्नी त्यजेद्यावत्तावन्मुक्तो न संशयः ॥ १२॥
ahaṅkārasutaṃ vittabhrātaraṃ mohamandiram ।
āśāpatnī tyajedyāvattāvanmukto na saṃśayaḥ ॥ 12॥
मृता मोहमयी माता जातो बोधमयः सुतः ।
सूतकद्वयसम्प्राप्तौ कथं सन्ध्यामुपास्महे ॥ १३॥
mṛtā mohamayī mātā jāto bodhamayaḥ sutaḥ ।
sūtakadvayasamprāptau kathaṃ sandhyāmupāsmahe ॥ 13॥
हृदाकाशे चिदादित्यः सदा भासति भासति ।
नास्तमेति न चोदेति कथं सन्ध्यामुपास्महे ॥ १४॥
hṛdākāśe cidādityaḥ sadā bhāsati bhāsati ।
nāstameti na codeti kathaṃ sandhyāmupāsmahe ॥ 14॥
एकमेवाद्वितीयं यद्गुरोर्वाक्येन निश्चितम् ।
एतदेकान्तमित्युक्तं न मठो न वनान्तरम् ॥ १५॥
ekamevādvitīyaṃ yadgurorvākyena niścitam ।
etadekāntamityuktaṃ na maṭho na vanāntaram ॥ 15॥
असंशयवतां मुक्तिः संशयाविष्टचेतसाम् ।
न मुक्तिर्जन्मजन्मान्ते तस्माद्विश्वासमाप्नुयात् ॥ १६॥
asaṃśayavatāṃ muktiḥ saṃśayāviṣṭacetasām ।
na muktirjanmajanmānte tasmādviśvāsamāpnuyāt ॥ 16॥
कर्मत्यागान्न संन्यासो न प्रेषोच्चारणेन तु ।
सन्धौ जीवात्मनोरैक्यं संन्यासः परिकीर्तितः ॥ १७॥
karmatyāgānna saṃnyāso na preṣoccāraṇena tu ।
sandhau jīvātmanoraikyaṃ saṃnyāsaḥ parikīrtitaḥ ॥ 17॥
वमनाहारवद्यस्य भाति सर्वेषणादिषु ।
तस्याधिकारः संन्यासे त्यक्तदेहाभिमानिनः ॥ १८॥
vamanāhāravadyasya bhāti sarveṣaṇādiṣu ।
tasyādhikāraḥ saṃnyāse tyaktadehābhimāninaḥ ॥ 18॥
यदा मनसि वैराग्यं जातं सर्वेषु वस्तुषु ।
तदैव संन्यसेद्विद्वानन्यथा पतितो भवेत् ॥ १९॥
yadā manasi vairāgyaṃ jātaṃ sarveṣu vastuṣu ।
tadaiva saṃnyasedvidvānanyathā patito bhavet ॥ 19॥
द्रव्यार्थमन्नवस्त्रार्थं यः प्रतिष्ठार्थमेव वा ।
संन्यसेद्दुभयभ्रष्टः स मुक्तिं नाप्तुमर्हति ॥ २०॥
dravyārthamannavastrārthaṃ yaḥ pratiṣṭhārthameva vā ।
saṃnyaseddubhayabhraṣṭaḥ sa muktiṃ nāptumarhati ॥ 20॥
उत्तमा तत्त्वचिन्तैव मध्यमं शास्त्रचिन्तनम् ।
अधमा मन्त्रचिन्ता च तीर्थभ्रान्त्यधमाधमा ॥ २१॥
uttamā tattvacintaiva madhyamaṃ śāstracintanam ।
adhamā mantracintā ca tīrthabhrāntyadhamādhamā ॥ 21॥
अनुभूतिं विना मूढो वृथा ब्रह्मणि मोदते ।
प्रतिबिम्बितशाखाग्रफलास्वादनमोदवत् ॥ २२॥
anubhūtiṃ vinā mūḍho vṛthā brahmaṇi modate ।
pratibimbitaśākhāgraphalāsvādanamodavat ॥ 22॥
न त्यजेच्चेद्यतिर्मुक्तो यो माधुकरमातरम् ।
वैराग्यजनकं श्रद्धाकलत्रं ज्ञाननन्दनम् ॥ २३॥
na tyajeccedyatirmukto yo mādhukaramātaram ।
vairāgyajanakaṃ śraddhākalatraṃ jñānanandanam ॥ 23॥
धनवृद्धा वयोवृद्धा विद्यावृद्धास्तथैव च ।
ते सर्वे ज्ञानवृद्धस्य किंकराः शिष्यकिंकराः ॥ २४॥
dhanavṛddhā vayovṛddhā vidyāvṛddhāstathaiva ca ।
te sarve jñānavṛddhasya kiṃkarāḥ śiṣyakiṃkarāḥ ॥ 24॥
यन्मायया मोहितचेतसो मा-
मात्मानमापूर्णमलब्धवन्तः ।
परं विदग्दोधरपूरणाय
भ्रमन्ति काका इव सूरयोऽपि ॥ २५॥
yanmāyayā mohitacetaso mā-
mātmānamāpūrṇamalabdhavantaḥ ।
paraṃ vidagdodharapūraṇāya
bhramanti kākā iva sūrayo'pi ॥ 25॥
पाषाणलोहमणिमृण्मयविग्रहेषु
पूजा पुनर्जननभोगकरी मुमुक्षोः ।
तस्माद्यतिः स्वहृदयार्चनमेव कुर्या-
द्बाह्यार्चनं परिहरेदपुनर्भवाय ॥ २६॥
pāṣāṇalohamaṇimṛṇmayavigraheṣu
pūjā punarjananabhogakarī mumukṣoḥ ।
tasmādyatiḥ svahṛdayārcanameva kuryā-
dbāhyārcanaṃ pariharedapunarbhavāya ॥ 26॥
अन्तःपूर्णो बहिःपूर्णः पूर्णकुम्भ इवार्णवे ।
अन्तःशून्यो बहिःशून्यः शून्यकुम्भ इवाम्बरे ॥२७॥
antaḥpūrṇo bahiḥpūrṇaḥ pūrṇakumbha ivārṇave ।
antaḥśūnyo bahiḥśūnyaḥ śūnyakumbha ivāmbare ॥27॥
मा भव ग्राह्यभावात्मा ग्राहकात्मा च मा भव ।
भावनामखिलं त्यक्त्वा यच्छिष्टं तन्मयो भव ॥ २८॥
mā bhava grāhyabhāvātmā grāhakātmā ca mā bhava ।
bhāvanāmakhilaṃ tyaktvā yacchiṣṭaṃ tanmayo bhava ॥ 28॥
द्रष्टृदर्शनदृश्यानि त्यक्त्वा वासनया सह ।
दर्शनप्रथमाभासमात्मानं केवलं भज ॥ २९॥
draṣṭṛdarśanadṛśyāni tyaktvā vāsanayā saha ।
darśanaprathamābhāsamātmānaṃ kevalaṃ bhaja ॥ 29॥
संशान्तसर्वसंकल्पा या शिलावदवस्थितिः ।
जाग्रन्निद्राविनिर्मुक्ता सा स्वरूपस्थितिः परा ॥ ३०॥
saṃśāntasarvasaṃkalpā yā śilāvadavasthitiḥ ।
jāgrannidrāvinirmuktā sā svarūpasthitiḥ parā ॥ 30॥
इति द्वितीयोऽध्यायः ॥ २॥
iti dvitīyo'dhyāyaḥ ॥ 2॥
अहमस्मि परश्चास्मि ब्रह्मास्मि प्रभवोऽस्म्यहम् ।
सर्वलोकगुरुश्चामि सर्वलोकेऽस्मि सोऽस्म्यहम् ॥ १॥
ahamasmi paraścāsmi brahmāsmi prabhavo'smyaham ।
sarvalokaguruścāmi sarvaloke'smi so'smyaham ॥ 1॥
अहमेवास्मि सिद्धोऽस्मि शुद्धोऽस्मि परमोऽस्म्यहम् ।
अहमस्मि सोमोऽस्मि नित्योऽस्मि विमलोऽस्म्यहम् ॥ २॥
ahamevāsmi siddho'smi śuddho'smi paramo'smyaham ।
ahamasmi somo'smi nityo'smi vimalo'smyaham ॥ 2॥
विज्ञानोऽस्मि विशेषोऽस्मि सोमोऽस्मि सकलोऽस्म्यहम् ।
शुभोऽस्मि शोकहीनोऽस्मि चैतन्योऽस्मि समोऽस्म्यहम् ॥ ३॥
vijñāno'smi viśeṣo'smi somo'smi sakalo'smyaham ।
śubho'smi śokahīno'smi caitanyo'smi samo'smyaham ॥ 3॥
मानावमानहीनोऽस्मि निर्गुणोऽस्मि शिवोऽस्म्यहम् ।
द्वैताद्वैतविहीनोऽस्मि द्वन्द्वहीनोऽस्मि सोऽस्म्यहम् ॥ ४॥
mānāvamānahīno'smi nirguṇo'smi śivo'smyaham ।
dvaitādvaitavihīno'smi dvandvahīno'smi so'smyaham ॥ 4॥
भावाभावविहीनोऽस्मि भासाहीनोऽस्मि भास्म्यहम् ।
शून्याशून्यप्रभावोऽस्मि शोभनाशोभनोऽस्म्यहम् ॥ ५॥
bhāvābhāvavihīno'smi bhāsāhīno'smi bhāsmyaham ।
śūnyāśūnyaprabhāvo'smi śobhanāśobhano'smyaham ॥ 5॥
तुल्यातुल्यविहीनोऽस्मि नित्यः शुद्धः सदाशिवः ।
सर्वासर्वविहीनोऽस्मि सात्त्विकोऽस्मि सदास्म्यहम् ॥ ६॥
tulyātulyavihīno'smi nityaḥ śuddhaḥ sadāśivaḥ ।
sarvāsarvavihīno'smi sāttviko'smi sadāsmyaham ॥ 6॥
एकसङ्ख्याविहीनोऽस्मि द्विसङ्ख्यावाहनं न च ।
सदसद्भेदहीनोऽस्मि सङ्कल्प्स्रहितोस्म्यहम् ॥ ७॥
ekasaṅkhyāvihīno'smi dvisaṅkhyāvāhanaṃ na ca ।
sadasadbhedahīno'smi saṅkalpsrahitosmyaham ॥ 7॥
नानात्मभेदहीनोऽस्मि ह्यखण्डानन्दविग्रहः ।
नाहमस्मि न चान्योऽस्मि देहादिरहितोऽस्म्यहम् ॥ ८॥
nānātmabhedahīno'smi hyakhaṇḍānandavigrahaḥ ।
nāhamasmi na cānyo'smi dehādirahito'smyaham ॥ 8॥
आश्रयाश्रयहीनोऽस्मि आधाररहितोऽस्म्यहम् ।
बन्धमोक्षादिहीनोऽस्मि शुद्धब्रह्मास्मि सोऽस्म्यहम् ॥ ९॥
āśrayāśrayahīno'smi ādhārarahito'smyaham ।
bandhamokṣādihīno'smi śuddhabrahmāsmi so'smyaham ॥ 9॥
चित्तादिसर्वहीनोऽस्मि परमोऽस्मि परात्परः ।
सदा विचाररूपोऽस्मि निर्विचारोऽस्मि सोऽस्म्यहम् ॥ १०॥
cittādisarvahīno'smi paramo'smi parātparaḥ ।
sadā vicārarūpo'smi nirvicāro'smi so'smyaham ॥ 10॥
अकारोकाररूपोऽस्मि मकरोऽस्मि सनातनः ।
धातृध्यानविहीनोऽस्मि ध्येयहीनोऽस्मि सोऽस्म्यहम् ॥ ११॥
akārokārarūpo'smi makaro'smi sanātanaḥ ।
dhātṛdhyānavihīno'smi dhyeyahīno'smi so'smyaham ॥ 11॥
सर्वपूर्णस्वरूपोऽस्मि सच्चिदानन्दलक्षणः ।
सर्वतीर्थस्वरूपोऽस्मि परमात्मास्म्यहं शिवः ॥ १२॥
sarvapūrṇasvarūpo'smi saccidānandalakṣaṇaḥ ।
sarvatīrthasvarūpo'smi paramātmāsmyahaṃ śivaḥ ॥ 12॥
लक्ष्यालक्ष्यविहीनोऽस्मि लयहीनरसोऽस्म्यहम् ।
मातृमानविहीनोऽस्मि मेयहीनः शिवोऽस्म्यहम् ॥ १३॥
lakṣyālakṣyavihīno'smi layahīnaraso'smyaham ।
mātṛmānavihīno'smi meyahīnaḥ śivo'smyaham ॥ 13॥
न जगत्सर्वद्रष्टास्मि नेत्रादिरहितोस्म्यहम् ।
प्रवृद्धोऽस्मि प्रबुद्धोऽस्मि प्रसन्नोऽस्मि परोऽस्म्यहम् ॥ १४॥
na jagatsarvadraṣṭāsmi netrādirahitosmyaham ।
pravṛddho'smi prabuddho'smi prasanno'smi paro'smyaham ॥ 14॥
सर्वेन्द्रियविहीनोऽस्मि सर्वकर्मकृदप्यहम् ।
सर्ववेदान्ततृप्तोऽस्मि सर्वदा सुलभोऽस्म्यहम् ॥ १५॥
sarvendriyavihīno'smi sarvakarmakṛdapyaham ।
sarvavedāntatṛpto'smi sarvadā sulabho'smyaham ॥ 15॥
मुदितामुदिताख्योऽस्मि सर्वमौनफलोऽस्म्यहम् ।
नित्यचिन्मात्ररूपोऽस्मि सदा सच्चिन्मयोऽस्म्यहम् ॥ १६॥
muditāmuditākhyo'smi sarvamaunaphalo'smyaham ।
nityacinmātrarūpo'smi sadā saccinmayo'smyaham ॥ 16॥
यत्किञ्चिदपि हीनोऽस्मि स्वल्पमप्यति नास्म्यहम् ।
हृदयग्रन्थिहीनोऽस्मि हृदयाम्भोजमध्यगः ॥ १७॥
yatkiñcidapi hīno'smi svalpamapyati nāsmyaham ।
hṛdayagranthihīno'smi hṛdayāmbhojamadhyagaḥ ॥ 17॥
षड्विकारविहीनोऽस्मि षट्कोषरहितोऽस्म्यहम् ।
अरिषड्वर्गमुक्तोऽस्मि अन्तरादन्तरोऽस्म्यहम् ॥ १८॥
ṣaḍvikāravihīno'smi ṣaṭkoṣarahito'smyaham ।
ariṣaḍvargamukto'smi antarādantaro'smyaham ॥ 18॥
देशकालविमुक्तोऽस्मि दिगम्बरसुखोऽस्म्यहम् ।
नास्ति नास्ति विमुक्तोऽस्मि नकारहितोऽस्म्यहम् ॥ १९॥
deśakālavimukto'smi digambarasukho'smyaham ।
nāsti nāsti vimukto'smi nakārahito'smyaham ॥ 19॥
अखण्डाकाशरूपोऽस्मि ह्यखण्डाकारमस्म्यहम् ।
प्रपञ्चमुक्तचित्तोऽस्मि प्रपञ्चरहितोऽस्म्यहम् ॥ २०॥
akhaṇḍākāśarūpo'smi hyakhaṇḍākāramasmyaham ।
prapañcamuktacitto'smi prapañcarahito'smyaham ॥ 20॥
सर्वप्रकाशरूपोऽस्मि चिन्मात्रज्योतिरस्म्यहम् ।
कालत्रयविमुक्तोऽस्मि कामादिरहितोऽस्म्यहम् ॥ २१॥
sarvaprakāśarūpo'smi cinmātrajyotirasmyaham ।
kālatrayavimukto'smi kāmādirahito'smyaham ॥ 21॥
कायिकादिविमुक्तोऽस्मि निर्गुणः केवलोऽस्म्यहम् ।
मुक्तिहीनोऽस्मि मुक्तोऽस्मि मोक्षहीनोऽस्म्यहम् सदा ॥ २२॥
kāyikādivimukto'smi nirguṇaḥ kevalo'smyaham ।
muktihīno'smi mukto'smi mokṣahīno'smyaham sadā ॥ 22॥
सत्यासत्यादिहीनोऽस्मि सन्मात्रान्नास्म्यहं सदा ।
गन्तव्यदेशहीनोऽस्मि गमनादिविवर्जितः ॥ २३॥
satyāsatyādihīno'smi sanmātrānnāsmyahaṃ sadā ।
gantavyadeśahīno'smi gamanādivivarjitaḥ ॥ 23॥
सर्वदा समरूपोऽस्मि शान्तोऽस्मि पुरुषोत्तमः ।
एवं स्वानुभवो यस्य सोऽहमस्मि न संशयः ॥ २४॥
sarvadā samarūpo'smi śānto'smi puruṣottamaḥ ।
evaṃ svānubhavo yasya so'hamasmi na saṃśayaḥ ॥ 24॥
यः शृणोति सकृद्वापि ब्रह्मैव भवति स्वयमित्युपनिषत् ॥
yaḥ śṛṇoti sakṛdvāpi brahmaiva bhavati svayamityupaniṣat ॥
इति तृतीयोऽध्यायः ॥ ३॥
iti tṛtīyo'dhyāyaḥ ॥ 3॥
ॐ आप्यान्तु मामाङ्गानि वाक्प्राणश्चक्षुः श्रोत्र-
मथो बलमिन्द्रियाणि च । सर्वाणि सर्वं ब्रह्मोपनिषदं
माहं ब्रह्म निराकुर्यां मा मा ब्रह्म निराकरो-
दनिराकरणमस्त्वनिराकरणं मेस्तु तदात्मनि निरते य
उपनिषत्सु धर्मास्ते मयि सन्तु ते मयि सन्तु ॥
oṃ āpyāntu māmāṅgāni vākprāṇaścakṣuḥ śrotra-
matho balamindriyāṇi ca । sarvāṇi sarvaṃ brahmopaniṣadaṃ
māhaṃ brahma nirākuryāṃ mā mā brahma nirākaro-
danirākaraṇamastvanirākaraṇaṃ mestu tadātmani nirate ya
upaniṣatsu dharmāste mayi santu te mayi santu ॥
ॐ शान्तिः शान्तिः शान्तिः ॥
oṃ śāntiḥ śāntiḥ śāntiḥ ॥
इति मैत्रेय्युपनिषत्समाप्ता ॥
iti maitreyyupaniṣatsamāptā ॥
