| Library / Tipiṭaka / திபிடக • Tipiṭaka / அங்கு³த்தரனிகாய (டீகா) • Aṅguttaranikāya (ṭīkā) |
7. மஜ்ஜே²ஸுத்தவண்ணனா
7. Majjhesuttavaṇṇanā
61. ஸத்தமே மந்தாதி ய-காரலோபேன நித்³தே³ஸோ, கரணத்தே² வா ஏதங் பச்சத்தவசனங். தேனாஹ ‘‘தாய உபோ⁴ அந்தே விதி³த்வா’’தி. ப²ஸ்ஸவஸேன நிப்³ப³த்தத்தாதி த்³வயத்³வயஸமாபத்தியங் அஞ்ஞமஞ்ஞங் ஸம்ப²ஸ்ஸவஸேன நிப்³ப³த்தத்தா, ‘‘ப²ஸ்ஸபச்சயா தண்ஹா, தண்ஹாபச்சயா உபாதா³னங், உபாதா³னபச்சயா ப⁴வோ , ப⁴வபச்சயா ஜாதீ’’தி இமினா சானுக்கமேன ப²ஸ்ஸஸமுட்டா²னத்தா இமஸ்ஸ காயஸ்ஸ ப²ஸ்ஸவஸேன நிப்³ப³த்தத்தாதி வுத்தங். ஏகோ அந்தோதி எத்த² அயங் அந்த-ஸத்³தோ³ அந்தஅப்³ப⁴ந்தரமரியாத³லாமகஅபா⁴வகொட்டா²ஸபத³பூரணஸமீபாதீ³ஸு தி³ஸ்ஸதி. ‘‘அந்தபூரோ உத³ரபூரோ’’திஆதீ³ஸு (ஸு॰ நி॰ 197) ஹி அந்தே அந்தஸத்³தோ³. ‘‘சரந்தி லோகே பரிவாரச²ன்னா அந்தோ அஸுத்³தா⁴, ப³ஹி ஸோப⁴மானா’’திஆதீ³ஸு (ஸங்॰ நி॰ 1.122) அப்³ப⁴ந்தரே. ‘‘காயப³ந்த⁴னஸ்ஸ அந்தோ ஜீரதி (சூளவ॰ 278) ஸா ஹரிதந்தங் வா பந்த²ந்தங் வா ஸேலந்தங் வா உத³கந்தங் வா’’திஆதீ³ஸு (ம॰ நி॰ 1.304) மரியாதா³யங். ‘‘அந்தமித³ங், பி⁴க்க²வே, ஜீவிகான’’ந்திஆதீ³ஸு (ஸங்॰ நி॰ 3.80; இதிவு॰ 91) லாமகே. ‘‘ஏஸேவந்தோ து³க்க²ஸ்ஸா’’திஆதீ³ஸு (ம॰ நி॰ 3.393; ஸங்॰ நி॰ 2.51) அபா⁴வே. ஸப்³ப³பச்சயஸங்க²யோ ஹி து³க்க²ஸ்ஸ அபா⁴வோ கோடீதிபி வுச்சதி. ‘‘தயோ அந்தா’’திஆதீ³ஸு (தீ³॰ நி॰ 3.305) கொட்டா²ஸே. ‘‘இங்க⁴ தாவ ஸுத்தந்தங் வா கா³தா²யோ வா அபி⁴த⁴ம்மங் வா பரியாபுணஸ்ஸு, ஸுத்தந்தே ஓகாஸங் காராபெத்வா’’தி (பாசி॰ 442) ச ஆதீ³ஸு பத³பூரணே. ‘‘கா³மந்தங் வா ஓஸடோ (பாரா॰ 409-410; சூளவ॰ 343) கா³மந்தஸேனாஸன’’ந்திஆதீ³ஸு (பாரா॰ அட்ட²॰ 2.410) ஸமீபே. ஸ்வாயமித⁴ கொட்டா²ஸே வத்ததீதி அயமேகோ கொட்டா²ஸோதி.
61. Sattame mantāti ya-kāralopena niddeso, karaṇatthe vā etaṃ paccattavacanaṃ. Tenāha ‘‘tāya ubho ante viditvā’’ti. Phassavasena nibbattattāti dvayadvayasamāpattiyaṃ aññamaññaṃ samphassavasena nibbattattā, ‘‘phassapaccayā taṇhā, taṇhāpaccayā upādānaṃ, upādānapaccayā bhavo , bhavapaccayā jātī’’ti iminā cānukkamena phassasamuṭṭhānattā imassa kāyassa phassavasena nibbattattāti vuttaṃ. Eko antoti ettha ayaṃ anta-saddo antaabbhantaramariyādalāmakaabhāvakoṭṭhāsapadapūraṇasamīpādīsu dissati. ‘‘Antapūro udarapūro’’tiādīsu (su. ni. 197) hi ante antasaddo. ‘‘Caranti loke parivārachannā anto asuddhā, bahi sobhamānā’’tiādīsu (saṃ. ni. 1.122) abbhantare. ‘‘Kāyabandhanassa anto jīrati (cūḷava. 278) sā haritantaṃ vā panthantaṃ vā selantaṃ vā udakantaṃ vā’’tiādīsu (ma. ni. 1.304) mariyādāyaṃ. ‘‘Antamidaṃ, bhikkhave, jīvikāna’’ntiādīsu (saṃ. ni. 3.80; itivu. 91) lāmake. ‘‘Esevanto dukkhassā’’tiādīsu (ma. ni. 3.393; saṃ. ni. 2.51) abhāve. Sabbapaccayasaṅkhayo hi dukkhassa abhāvo koṭītipi vuccati. ‘‘Tayo antā’’tiādīsu (dī. ni. 3.305) koṭṭhāse. ‘‘Iṅgha tāva suttantaṃ vā gāthāyo vā abhidhammaṃ vā pariyāpuṇassu, suttante okāsaṃ kārāpetvā’’ti (pāci. 442) ca ādīsu padapūraṇe. ‘‘Gāmantaṃ vā osaṭo (pārā. 409-410; cūḷava. 343) gāmantasenāsana’’ntiādīsu (pārā. aṭṭha. 2.410) samīpe. Svāyamidha koṭṭhāse vattatīti ayameko koṭṭhāsoti.
ஸந்தோ பரமத்த²தோ விஜ்ஜமானோ த⁴ம்மஸமூஹோதி ஸக்காயோ, பஞ்சுபாதா³னக்க²ந்தா⁴. தேனாஹ ‘‘தேபூ⁴மகவட்ட’’ந்தி. ஸேஸமெத்த² ஸுவிஞ்ஞெய்யமேவ.
Santo paramatthato vijjamāno dhammasamūhoti sakkāyo, pañcupādānakkhandhā. Tenāha ‘‘tebhūmakavaṭṭa’’nti. Sesamettha suviññeyyameva.
மஜ்ஜே²ஸுத்தவண்ணனா நிட்டி²தா.
Majjhesuttavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / அங்கு³த்தரனிகாய • Aṅguttaranikāya / 7. மஜ்ஜே²ஸுத்தங் • 7. Majjhesuttaṃ
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / அங்கு³த்தரனிகாய (அட்ட²கதா²) • Aṅguttaranikāya (aṭṭhakathā) / 7. மஜ்ஜே²ஸுத்தவண்ணனா • 7. Majjhesuttavaṇṇanā
