| Library / Tipiṭaka / д̇ибидага • Tipiṭaka / ан̇г̇уд̇д̇аранигааяа (адтагат̇аа) • Aṅguttaranikāya (aṭṭhakathā) |
7. маж̇жхзсуд̇д̇аван̣н̣анаа
7. Majjhesuttavaṇṇanā
61. сад̇д̇амз баарааяанз мзд̇д̇зяяабан̃хзд̇и баарааяанасамааг̇амамхи мзд̇д̇зяяамаан̣авасса бан̃хз. убхонд̇з вид̣̇ид̇ваанаад̇и д̣̇вз анд̇з д̣̇вз годтаасз ж̇аанид̇ваа. маж̇жхз манд̇аа на либбад̇ийд̇и манд̇аа вужжад̇и бан̃н̃аа, д̇ааяа убхо анд̇з вид̣̇ид̇ваа маж̇жхз на либбад̇и, взмаж̇жхздтаанз на либбад̇и. сиб̣б̣анимажжаг̇аад̇и сиб̣б̣анисан̇каад̇ам̣ д̇ан̣хам̣ ад̇ийд̇о. пассод̇и пассавасзна ниб̣б̣ад̇д̇ад̇д̇аа аяам̣ ад̇д̇абхааво. зго анд̇од̇и аяамзго годтаасо. пассасамуд̣̇аяод̇и пассо самуд̣̇аяо ассаад̇и пассасамуд̣̇аяо, имасмим̣ ад̇д̇абхаавз гад̇агаммапассабажжаяаа ниб̣б̣ад̇д̇о анааг̇ад̇ад̇д̇абхааво. д̣̇уд̇ияо анд̇од̇и д̣̇уд̇ияо годтаасо. пассанирод̇ход̇и ниб̣б̣аанам̣. маж̇жхзд̇и сиб̣б̣инид̇ан̣хам̣ чзд̇ваа д̣̇вид̇хаагаран̣адтзна ниб̣б̣аанам̣ маж̇жхз наама ход̇и. д̇ан̣хаа хи нам̣ сиб̣б̣ад̇ийд̇и д̇ан̣хаа нам̣ ад̇д̇абхаавад̣̇ваяасан̇каад̇ам̣ пассан̃жа пассасамуд̣̇аяан̃жа сиб̣б̣ад̇и гхаддзд̇и. гим̣ гааран̣аа? д̇асса д̇ассзва бхавасса абхиниб̣б̣ад̇д̇ияаа. яад̣̇и хи д̇ан̣хаа на сиб̣б̣зяяа, д̇асса д̇асса бхавасса ниб̣б̣ад̇д̇и на бхавзяяа. имасмим̣ таанз годимаж̇жхигуубамам̣ г̇ан̣ханд̇и. д̣̇виннан̃хи ган̣д̣аанам̣ згад̇о гад̇ваа маж̇жхз суд̇д̇зна сам̣сиб̣б̣ид̇аанам̣ годи маж̇жханд̇и вужжад̇и. суд̇д̇з чиннз убхо ган̣д̣аани убхад̇о бад̇анд̇и. звамзд̇т̇а ган̣д̣ад̣̇ваяам̣ вияа вуд̇д̇аббагаараа д̣̇вз анд̇аа, сиб̣б̣ид̇ваа тид̇асуд̇д̇ам̣ вияа д̇ан̣хаа, суд̇д̇з чиннз ган̣д̣ад̣̇ваяасса убхад̇обад̇анам̣ вияа д̇ан̣хааяа нируд̣̇д̇хааяа анд̇ад̣̇ваяам̣ нируд̣̇д̇хамзва ход̇и. зд̇д̇аавад̇аад̇и зд̇д̇агзна иминаа убхо анд̇з вид̣̇ид̇ваа д̇ан̣хааяа маж̇жхз анубалид̇д̇абхаавзна абхин̃н̃зяяам̣ жад̇усажжад̇хаммам̣ абхиж̇аанаад̇и наама, д̇ийран̣абарин̃н̃ааяа жа бахаанабарин̃н̃ааяа жа бариж̇аанид̇аб̣б̣ам̣ логияасажжад̣̇ваяам̣ бариж̇аанаад̇и наама. д̣̇идтзва д̇хаммзд̇и имасмим̣язва ад̇д̇абхаавз. д̣̇угкассанд̇агаро ход̇ийд̇и ваддад̣̇угкасса годигаро барижчзд̣̇абаривадумагаро ход̇и наама.
61. Sattame pārāyane metteyyapañheti pārāyanasamāgamamhi metteyyamāṇavassa pañhe. Ubhonte viditvānāti dve ante dve koṭṭhāse jānitvā. Majjhe mantā na lippatīti mantā vuccati paññā, tāya ubho ante viditvā majjhe na lippati, vemajjheṭṭhāne na lippati. Sibbanimaccagāti sibbanisaṅkhātaṃ taṇhaṃ atīto. Phassoti phassavasena nibbattattā ayaṃ attabhāvo. Eko antoti ayameko koṭṭhāso. Phassasamudayoti phasso samudayo assāti phassasamudayo, imasmiṃ attabhāve katakammaphassapaccayā nibbatto anāgatattabhāvo. Dutiyo antoti dutiyo koṭṭhāso. Phassanirodhoti nibbānaṃ. Majjheti sibbinitaṇhaṃ chetvā dvidhākaraṇaṭṭhena nibbānaṃ majjhe nāma hoti. Taṇhā hinaṃ sibbatīti taṇhā naṃ attabhāvadvayasaṅkhātaṃ phassañca phassasamudayañca sibbati ghaṭṭeti. Kiṃ kāraṇā? Tassa tasseva bhavassa abhinibbattiyā. Yadi hi taṇhā na sibbeyya, tassa tassa bhavassa nibbatti na bhaveyya. Imasmiṃ ṭhāne koṭimajjhikūpamaṃ gaṇhanti. Dvinnañhi kaṇḍānaṃ ekato katvā majjhe suttena saṃsibbitānaṃ koṭi majjhanti vuccati. Sutte chinne ubho kaṇḍāni ubhato patanti. Evamettha kaṇḍadvayaṃ viya vuttappakārā dve antā, sibbitvā ṭhitasuttaṃ viya taṇhā, sutte chinne kaṇḍadvayassa ubhatopatanaṃ viya taṇhāya niruddhāya antadvayaṃ niruddhameva hoti. Ettāvatāti ettakena iminā ubho ante viditvā taṇhāya majjhe anupalittabhāvena abhiññeyyaṃ catusaccadhammaṃ abhijānāti nāma, tīraṇapariññāya ca pahānapariññāya ca parijānitabbaṃ lokiyasaccadvayaṃ parijānāti nāma. Diṭṭhevadhammeti imasmiṃyeva attabhāve. Dukkhassantakaro hotīti vaṭṭadukkhassa koṭikaro paricchedaparivaṭumakaro hoti nāma.
д̣̇уд̇ияаваарз д̇ин̣н̣ам̣ ган̣д̣аанам̣ васзна убамаа взд̣̇ид̇аб̣б̣аа. д̇ин̣н̣ан̃хи ган̣д̣аанам̣ суд̇д̇зна сам̣сиб̣б̣ид̇аанам̣ суд̇д̇з чиннз д̇ийн̣и ган̣д̣аани д̇ийсу таанзсу бад̇анд̇и, звамзд̇т̇а ган̣д̣ад̇д̇аяам̣ вияа ад̇ийд̇аанааг̇ад̇абажжуббаннаа канд̇хаа, суд̇д̇ам̣ вияа д̇ан̣хаа. саа хи ад̇ийд̇ам̣ бажжуббаннзна, бажжуббаннан̃жа анааг̇ад̇зна сад̣̇д̇хим̣ сам̣сиб̣б̣ад̇и. суд̇д̇з чиннз ган̣д̣ад̇д̇аяасса д̇ийсу таанзсу бад̇анам̣ вияа д̇ан̣хааяа нируд̣̇д̇хааяа ад̇ийд̇аанааг̇ад̇абажжуббаннаа канд̇хаа нируд̣̇д̇хаава хонд̇и.
Dutiyavāre tiṇṇaṃ kaṇḍānaṃ vasena upamā veditabbā. Tiṇṇañhi kaṇḍānaṃ suttena saṃsibbitānaṃ sutte chinne tīṇi kaṇḍāni tīsu ṭhānesu patanti, evamettha kaṇḍattayaṃ viya atītānāgatapaccuppannā khandhā, suttaṃ viya taṇhā. Sā hi atītaṃ paccuppannena, paccuppannañca anāgatena saddhiṃ saṃsibbati. Sutte chinne kaṇḍattayassa tīsu ṭhānesu patanaṃ viya taṇhāya niruddhāya atītānāgatapaccuppannā khandhā niruddhāva honti.
д̇ад̇ияаваарз ад̣̇угкамасукаа маж̇жхзд̇и д̣̇виннам̣ взд̣̇анаанам̣ анд̇арадтагабхаавзна маж̇жхз. сукан̃хи д̣̇угкасса, д̣̇угкам̣ ваа сукасса анд̇арам̣ наама над̇т̇и. д̇ан̣хаа сиб̣б̣инийд̇и взд̣̇анаасу нанд̣̇ирааг̇о взд̣̇анаанам̣ убажчзд̣̇ам̣ ниваарзд̇ийд̇и д̇аа сиб̣б̣ад̇и наама.
Tatiyavāre adukkhamasukhā majjheti dvinnaṃ vedanānaṃ antaraṭṭhakabhāvena majjhe. Sukhañhi dukkhassa, dukkhaṃ vā sukhassa antaraṃ nāma natthi. Taṇhā sibbinīti vedanāsu nandirāgo vedanānaṃ upacchedaṃ nivāretīti tā sibbati nāma.
жад̇уд̇т̇аваарз вин̃н̃аан̣ам̣ маж̇жхзд̇и бадисанд̇хивин̃н̃аан̣амби сзсавин̃н̃аан̣амби наамаруубабажжаяасамуд̣̇ааг̇ад̇ад̇д̇аа наамаруубаанам̣ маж̇жхз наама.
Catutthavāre viññāṇaṃ majjheti paṭisandhiviññāṇampi sesaviññāṇampi nāmarūpapaccayasamudāgatattā nāmarūpānaṃ majjhe nāma.
бан̃жамаваарз вин̃н̃аан̣ам̣ маж̇жхзд̇и гаммавин̃н̃аан̣ам̣ маж̇жхз, аж̇жхад̇д̇игааяад̇анзсу ваа манааяад̇анзна гаммасса г̇ахид̇ад̇д̇аа ид̇ха яам̣гин̃жи вин̃н̃аан̣ам̣ маж̇жхз наама, манод̣̇ваарз ваа ааваж̇ж̇анасса аж̇жхад̇д̇игааяад̇ананиссид̇ад̇д̇аа ж̇аванавин̃н̃аан̣ам̣ маж̇жхз наама.
Pañcamavāre viññāṇaṃ majjheti kammaviññāṇaṃ majjhe, ajjhattikāyatanesu vā manāyatanena kammassa gahitattā idha yaṃkiñci viññāṇaṃ majjhe nāma, manodvāre vā āvajjanassa ajjhattikāyatananissitattā javanaviññāṇaṃ majjhe nāma.
чадтаваарз саггааяод̇и д̇збхуумагаваддам̣. саггааяасамуд̣̇аяод̇и самуд̣̇аяасажжам̣. саггааяанирод̇ход̇и нирод̇хасажжам̣. барияааязнаад̇и д̇зна д̇зна гааран̣знзва. сзсам̣ саб̣б̣ад̇т̇а вуд̇д̇анаязнзва взд̣̇ид̇аб̣б̣ам̣.
Chaṭṭhavāre sakkāyoti tebhūmakavaṭṭaṃ. Sakkāyasamudayoti samudayasaccaṃ. Sakkāyanirodhoti nirodhasaccaṃ. Pariyāyenāti tena tena kāraṇeneva. Sesaṃ sabbattha vuttanayeneva veditabbaṃ.
Related texts:
д̇ибидага (муула) • Tipiṭaka (Mūla) / суд̇д̇абидага • Suttapiṭaka / ан̇г̇уд̇д̇аранигааяа • Aṅguttaranikāya / 7. маж̇жхзсуд̇д̇ам̣ • 7. Majjhesuttaṃ
дийгаа • Tīkā / суд̇д̇абидага (дийгаа) • Suttapiṭaka (ṭīkā) / ан̇г̇уд̇д̇аранигааяа (дийгаа) • Aṅguttaranikāya (ṭīkā) / 7. маж̇жхзсуд̇д̇аван̣н̣анаа • 7. Majjhesuttavaṇṇanā
