| Library / Tipiṭaka / ತಿಪಿಟಕ • Tipiṭaka / ಅಙ್ಗುತ್ತರನಿಕಾಯ (ಅಟ್ಠಕಥಾ) • Aṅguttaranikāya (aṭṭhakathā) |
೭. ಮಜ್ಝೇಸುತ್ತವಣ್ಣನಾ
7. Majjhesuttavaṇṇanā
೬೧. ಸತ್ತಮೇ ಪಾರಾಯನೇ ಮೇತ್ತೇಯ್ಯಪಞ್ಹೇತಿ ಪಾರಾಯನಸಮಾಗಮಮ್ಹಿ ಮೇತ್ತೇಯ್ಯಮಾಣವಸ್ಸ ಪಞ್ಹೇ। ಉಭೋನ್ತೇ ವಿದಿತ್ವಾನಾತಿ ದ್ವೇ ಅನ್ತೇ ದ್ವೇ ಕೋಟ್ಠಾಸೇ ಜಾನಿತ್ವಾ। ಮಜ್ಝೇ ಮನ್ತಾ ನ ಲಿಪ್ಪತೀತಿ ಮನ್ತಾ ವುಚ್ಚತಿ ಪಞ್ಞಾ, ತಾಯ ಉಭೋ ಅನ್ತೇ ವಿದಿತ್ವಾ ಮಜ್ಝೇ ನ ಲಿಪ್ಪತಿ, ವೇಮಜ್ಝೇಟ್ಠಾನೇ ನ ಲಿಪ್ಪತಿ। ಸಿಬ್ಬನಿಮಚ್ಚಗಾತಿ ಸಿಬ್ಬನಿಸಙ್ಖಾತಂ ತಣ್ಹಂ ಅತೀತೋ। ಫಸ್ಸೋತಿ ಫಸ್ಸವಸೇನ ನಿಬ್ಬತ್ತತ್ತಾ ಅಯಂ ಅತ್ತಭಾವೋ। ಏಕೋ ಅನ್ತೋತಿ ಅಯಮೇಕೋ ಕೋಟ್ಠಾಸೋ। ಫಸ್ಸಸಮುದಯೋತಿ ಫಸ್ಸೋ ಸಮುದಯೋ ಅಸ್ಸಾತಿ ಫಸ್ಸಸಮುದಯೋ, ಇಮಸ್ಮಿಂ ಅತ್ತಭಾವೇ ಕತಕಮ್ಮಫಸ್ಸಪಚ್ಚಯಾ ನಿಬ್ಬತ್ತೋ ಅನಾಗತತ್ತಭಾವೋ। ದುತಿಯೋ ಅನ್ತೋತಿ ದುತಿಯೋ ಕೋಟ್ಠಾಸೋ। ಫಸ್ಸನಿರೋಧೋತಿ ನಿಬ್ಬಾನಂ। ಮಜ್ಝೇತಿ ಸಿಬ್ಬಿನಿತಣ್ಹಂ ಛೇತ್ವಾ ದ್ವಿಧಾಕರಣಟ್ಠೇನ ನಿಬ್ಬಾನಂ ಮಜ್ಝೇ ನಾಮ ಹೋತಿ। ತಣ್ಹಾ ಹಿ ನಂ ಸಿಬ್ಬತೀತಿ ತಣ್ಹಾ ನಂ ಅತ್ತಭಾವದ್ವಯಸಙ್ಖಾತಂ ಫಸ್ಸಞ್ಚ ಫಸ್ಸಸಮುದಯಞ್ಚ ಸಿಬ್ಬತಿ ಘಟ್ಟೇತಿ। ಕಿಂ ಕಾರಣಾ? ತಸ್ಸ ತಸ್ಸೇವ ಭವಸ್ಸ ಅಭಿನಿಬ್ಬತ್ತಿಯಾ। ಯದಿ ಹಿ ತಣ್ಹಾ ನ ಸಿಬ್ಬೇಯ್ಯ, ತಸ್ಸ ತಸ್ಸ ಭವಸ್ಸ ನಿಬ್ಬತ್ತಿ ನ ಭವೇಯ್ಯ। ಇಮಸ್ಮಿಂ ಠಾನೇ ಕೋಟಿಮಜ್ಝಿಕೂಪಮಂ ಗಣ್ಹನ್ತಿ। ದ್ವಿನ್ನಞ್ಹಿ ಕಣ್ಡಾನಂ ಏಕತೋ ಕತ್ವಾ ಮಜ್ಝೇ ಸುತ್ತೇನ ಸಂಸಿಬ್ಬಿತಾನಂ ಕೋಟಿ ಮಜ್ಝನ್ತಿ ವುಚ್ಚತಿ। ಸುತ್ತೇ ಛಿನ್ನೇ ಉಭೋ ಕಣ್ಡಾನಿ ಉಭತೋ ಪತನ್ತಿ। ಏವಮೇತ್ಥ ಕಣ್ಡದ್ವಯಂ ವಿಯ ವುತ್ತಪ್ಪಕಾರಾ ದ್ವೇ ಅನ್ತಾ, ಸಿಬ್ಬಿತ್ವಾ ಠಿತಸುತ್ತಂ ವಿಯ ತಣ್ಹಾ, ಸುತ್ತೇ ಛಿನ್ನೇ ಕಣ್ಡದ್ವಯಸ್ಸ ಉಭತೋಪತನಂ ವಿಯ ತಣ್ಹಾಯ ನಿರುದ್ಧಾಯ ಅನ್ತದ್ವಯಂ ನಿರುದ್ಧಮೇವ ಹೋತಿ। ಏತ್ತಾವತಾತಿ ಏತ್ತಕೇನ ಇಮಿನಾ ಉಭೋ ಅನ್ತೇ ವಿದಿತ್ವಾ ತಣ್ಹಾಯ ಮಜ್ಝೇ ಅನುಪಲಿತ್ತಭಾವೇನ ಅಭಿಞ್ಞೇಯ್ಯಂ ಚತುಸಚ್ಚಧಮ್ಮಂ ಅಭಿಜಾನಾತಿ ನಾಮ, ತೀರಣಪರಿಞ್ಞಾಯ ಚ ಪಹಾನಪರಿಞ್ಞಾಯ ಚ ಪರಿಜಾನಿತಬ್ಬಂ ಲೋಕಿಯಸಚ್ಚದ್ವಯಂ ಪರಿಜಾನಾತಿ ನಾಮ। ದಿಟ್ಠೇವ ಧಮ್ಮೇತಿ ಇಮಸ್ಮಿಂಯೇವ ಅತ್ತಭಾವೇ। ದುಕ್ಖಸ್ಸನ್ತಕರೋ ಹೋತೀತಿ ವಟ್ಟದುಕ್ಖಸ್ಸ ಕೋಟಿಕರೋ ಪರಿಚ್ಛೇದಪರಿವಟುಮಕರೋ ಹೋತಿ ನಾಮ।
61. Sattame pārāyane metteyyapañheti pārāyanasamāgamamhi metteyyamāṇavassa pañhe. Ubhonte viditvānāti dve ante dve koṭṭhāse jānitvā. Majjhe mantā na lippatīti mantā vuccati paññā, tāya ubho ante viditvā majjhe na lippati, vemajjheṭṭhāne na lippati. Sibbanimaccagāti sibbanisaṅkhātaṃ taṇhaṃ atīto. Phassoti phassavasena nibbattattā ayaṃ attabhāvo. Eko antoti ayameko koṭṭhāso. Phassasamudayoti phasso samudayo assāti phassasamudayo, imasmiṃ attabhāve katakammaphassapaccayā nibbatto anāgatattabhāvo. Dutiyo antoti dutiyo koṭṭhāso. Phassanirodhoti nibbānaṃ. Majjheti sibbinitaṇhaṃ chetvā dvidhākaraṇaṭṭhena nibbānaṃ majjhe nāma hoti. Taṇhā hinaṃ sibbatīti taṇhā naṃ attabhāvadvayasaṅkhātaṃ phassañca phassasamudayañca sibbati ghaṭṭeti. Kiṃ kāraṇā? Tassa tasseva bhavassa abhinibbattiyā. Yadi hi taṇhā na sibbeyya, tassa tassa bhavassa nibbatti na bhaveyya. Imasmiṃ ṭhāne koṭimajjhikūpamaṃ gaṇhanti. Dvinnañhi kaṇḍānaṃ ekato katvā majjhe suttena saṃsibbitānaṃ koṭi majjhanti vuccati. Sutte chinne ubho kaṇḍāni ubhato patanti. Evamettha kaṇḍadvayaṃ viya vuttappakārā dve antā, sibbitvā ṭhitasuttaṃ viya taṇhā, sutte chinne kaṇḍadvayassa ubhatopatanaṃ viya taṇhāya niruddhāya antadvayaṃ niruddhameva hoti. Ettāvatāti ettakena iminā ubho ante viditvā taṇhāya majjhe anupalittabhāvena abhiññeyyaṃ catusaccadhammaṃ abhijānāti nāma, tīraṇapariññāya ca pahānapariññāya ca parijānitabbaṃ lokiyasaccadvayaṃ parijānāti nāma. Diṭṭhevadhammeti imasmiṃyeva attabhāve. Dukkhassantakaro hotīti vaṭṭadukkhassa koṭikaro paricchedaparivaṭumakaro hoti nāma.
ದುತಿಯವಾರೇ ತಿಣ್ಣಂ ಕಣ್ಡಾನಂ ವಸೇನ ಉಪಮಾ ವೇದಿತಬ್ಬಾ। ತಿಣ್ಣಞ್ಹಿ ಕಣ್ಡಾನಂ ಸುತ್ತೇನ ಸಂಸಿಬ್ಬಿತಾನಂ ಸುತ್ತೇ ಛಿನ್ನೇ ತೀಣಿ ಕಣ್ಡಾನಿ ತೀಸು ಠಾನೇಸು ಪತನ್ತಿ, ಏವಮೇತ್ಥ ಕಣ್ಡತ್ತಯಂ ವಿಯ ಅತೀತಾನಾಗತಪಚ್ಚುಪ್ಪನ್ನಾ ಖನ್ಧಾ, ಸುತ್ತಂ ವಿಯ ತಣ್ಹಾ। ಸಾ ಹಿ ಅತೀತಂ ಪಚ್ಚುಪ್ಪನ್ನೇನ, ಪಚ್ಚುಪ್ಪನ್ನಞ್ಚ ಅನಾಗತೇನ ಸದ್ಧಿಂ ಸಂಸಿಬ್ಬತಿ। ಸುತ್ತೇ ಛಿನ್ನೇ ಕಣ್ಡತ್ತಯಸ್ಸ ತೀಸು ಠಾನೇಸು ಪತನಂ ವಿಯ ತಣ್ಹಾಯ ನಿರುದ್ಧಾಯ ಅತೀತಾನಾಗತಪಚ್ಚುಪ್ಪನ್ನಾ ಖನ್ಧಾ ನಿರುದ್ಧಾವ ಹೋನ್ತಿ।
Dutiyavāre tiṇṇaṃ kaṇḍānaṃ vasena upamā veditabbā. Tiṇṇañhi kaṇḍānaṃ suttena saṃsibbitānaṃ sutte chinne tīṇi kaṇḍāni tīsu ṭhānesu patanti, evamettha kaṇḍattayaṃ viya atītānāgatapaccuppannā khandhā, suttaṃ viya taṇhā. Sā hi atītaṃ paccuppannena, paccuppannañca anāgatena saddhiṃ saṃsibbati. Sutte chinne kaṇḍattayassa tīsu ṭhānesu patanaṃ viya taṇhāya niruddhāya atītānāgatapaccuppannā khandhā niruddhāva honti.
ತತಿಯವಾರೇ ಅದುಕ್ಖಮಸುಖಾ ಮಜ್ಝೇತಿ ದ್ವಿನ್ನಂ ವೇದನಾನಂ ಅನ್ತರಟ್ಠಕಭಾವೇನ ಮಜ್ಝೇ। ಸುಖಞ್ಹಿ ದುಕ್ಖಸ್ಸ, ದುಕ್ಖಂ ವಾ ಸುಖಸ್ಸ ಅನ್ತರಂ ನಾಮ ನತ್ಥಿ। ತಣ್ಹಾ ಸಿಬ್ಬಿನೀತಿ ವೇದನಾಸು ನನ್ದಿರಾಗೋ ವೇದನಾನಂ ಉಪಚ್ಛೇದಂ ನಿವಾರೇತೀತಿ ತಾ ಸಿಬ್ಬತಿ ನಾಮ।
Tatiyavāre adukkhamasukhā majjheti dvinnaṃ vedanānaṃ antaraṭṭhakabhāvena majjhe. Sukhañhi dukkhassa, dukkhaṃ vā sukhassa antaraṃ nāma natthi. Taṇhā sibbinīti vedanāsu nandirāgo vedanānaṃ upacchedaṃ nivāretīti tā sibbati nāma.
ಚತುತ್ಥವಾರೇ ವಿಞ್ಞಾಣಂ ಮಜ್ಝೇತಿ ಪಟಿಸನ್ಧಿವಿಞ್ಞಾಣಮ್ಪಿ ಸೇಸವಿಞ್ಞಾಣಮ್ಪಿ ನಾಮರೂಪಪಚ್ಚಯಸಮುದಾಗತತ್ತಾ ನಾಮರೂಪಾನಂ ಮಜ್ಝೇ ನಾಮ।
Catutthavāre viññāṇaṃ majjheti paṭisandhiviññāṇampi sesaviññāṇampi nāmarūpapaccayasamudāgatattā nāmarūpānaṃ majjhe nāma.
ಪಞ್ಚಮವಾರೇ ವಿಞ್ಞಾಣಂ ಮಜ್ಝೇತಿ ಕಮ್ಮವಿಞ್ಞಾಣಂ ಮಜ್ಝೇ, ಅಜ್ಝತ್ತಿಕಾಯತನೇಸು ವಾ ಮನಾಯತನೇನ ಕಮ್ಮಸ್ಸ ಗಹಿತತ್ತಾ ಇಧ ಯಂಕಿಞ್ಚಿ ವಿಞ್ಞಾಣಂ ಮಜ್ಝೇ ನಾಮ, ಮನೋದ್ವಾರೇ ವಾ ಆವಜ್ಜನಸ್ಸ ಅಜ್ಝತ್ತಿಕಾಯತನನಿಸ್ಸಿತತ್ತಾ ಜವನವಿಞ್ಞಾಣಂ ಮಜ್ಝೇ ನಾಮ।
Pañcamavāre viññāṇaṃ majjheti kammaviññāṇaṃ majjhe, ajjhattikāyatanesu vā manāyatanena kammassa gahitattā idha yaṃkiñci viññāṇaṃ majjhe nāma, manodvāre vā āvajjanassa ajjhattikāyatananissitattā javanaviññāṇaṃ majjhe nāma.
ಛಟ್ಠವಾರೇ ಸಕ್ಕಾಯೋತಿ ತೇಭೂಮಕವಟ್ಟಂ। ಸಕ್ಕಾಯಸಮುದಯೋತಿ ಸಮುದಯಸಚ್ಚಂ। ಸಕ್ಕಾಯನಿರೋಧೋತಿ ನಿರೋಧಸಚ್ಚಂ। ಪರಿಯಾಯೇನಾತಿ ತೇನ ತೇನ ಕಾರಣೇನೇವ। ಸೇಸಂ ಸಬ್ಬತ್ಥ ವುತ್ತನಯೇನೇವ ವೇದಿತಬ್ಬಂ।
Chaṭṭhavāre sakkāyoti tebhūmakavaṭṭaṃ. Sakkāyasamudayoti samudayasaccaṃ. Sakkāyanirodhoti nirodhasaccaṃ. Pariyāyenāti tena tena kāraṇeneva. Sesaṃ sabbattha vuttanayeneva veditabbaṃ.
Related texts:
ತಿಪಿಟಕ (ಮೂಲ) • Tipiṭaka (Mūla) / ಸುತ್ತಪಿಟಕ • Suttapiṭaka / ಅಙ್ಗುತ್ತರನಿಕಾಯ • Aṅguttaranikāya / ೭. ಮಜ್ಝೇಸುತ್ತಂ • 7. Majjhesuttaṃ
ಟೀಕಾ • Tīkā / ಸುತ್ತಪಿಟಕ (ಟೀಕಾ) • Suttapiṭaka (ṭīkā) / ಅಙ್ಗುತ್ತರನಿಕಾಯ (ಟೀಕಾ) • Aṅguttaranikāya (ṭīkā) / ೭. ಮಜ್ಝೇಸುತ್ತವಣ್ಣನಾ • 7. Majjhesuttavaṇṇanā
