| Library / Tipiṭaka / තිපිටක • Tipiṭaka / අඞ්‌ගුත්‌තරනිකාය (අට්‌ඨකථා) • Aṅguttaranikāya (aṭṭhakathā) |
7. මජ්‌ඣෙසුත්‌තවණ්‌ණනා
7. Majjhesuttavaṇṇanā
61. සත්‌තමෙ පාරායනෙ මෙත්‌තෙය්‍යපඤ්‌හෙති පාරායනසමාගමම්‌හි මෙත්‌තෙය්‍යමාණවස්‌ස පඤ්‌හෙ. උභොන්‌තෙ විදිත්‌වානාති ද්‌වෙ අන්‌තෙ ද්‌වෙ කොට්‌ඨාසෙ ජානිත්‌වා. මජ්‌ඣෙ මන්‌තා න ලිප්‌පතීති මන්‌තා වුච්‌චති පඤ්‌ඤා, තාය උභො අන්‌තෙ විදිත්‌වා මජ්‌ඣෙ න ලිප්‌පති, වෙමජ්‌ඣෙට්‌ඨානෙ න ලිප්‌පති. සිබ්‌බනිමච්‌චගාති සිබ්‌බනිසඞ්‌ඛාතං තණ්‌හං අතීතො. ඵස්‌සොති ඵස්‌සවසෙන නිබ්‌බත්‌තත්‌තා අයං අත්‌තභාවො. එකො අන්‌තොති අයමෙකො කොට්‌ඨාසො. ඵස්‌සසමුදයොති ඵස්‌සො සමුදයො අස්‌සාති ඵස්‌සසමුදයො, ඉමස්‌මිං අත්‌තභාවෙ කතකම්‌මඵස්‌සපච්‌චයා නිබ්‌බත්‌තො අනාගතත්‌තභාවො. දුතියො අන්‌තොති දුතියො කොට්‌ඨාසො. ඵස්‌සනිරොධොති නිබ්‌බානං. මජ්‌ඣෙති සිබ්‌බිනිතණ්‌හං ඡෙත්‌වා ද්‌විධාකරණට්‌ඨෙන නිබ්‌බානං මජ්‌ඣෙ නාම හොති. තණ්‌හා හි නං සිබ්‌බතීති තණ්‌හා නං අත්‌තභාවද්‌වයසඞ්‌ඛාතං ඵස්‌සඤ්‌ච ඵස්‌සසමුදයඤ්‌ච සිබ්‌බති ඝට්‌ටෙති. කිං කාරණා? තස්‌ස තස්‌සෙව භවස්‌ස අභිනිබ්‌බත්‌තියා. යදි හි තණ්‌හා න සිබ්‌බෙය්‍ය, තස්‌ස තස්‌ස භවස්‌ස නිබ්‌බත්‌ති න භවෙය්‍ය. ඉමස්‌මිං ඨානෙ කොටිමජ්‌ඣිකූපමං ගණ්‌හන්‌ති. ද්‌වින්‌නඤ්‌හි කණ්‌ඩානං එකතො කත්‌වා මජ්‌ඣෙ සුත්‌තෙන සංසිබ්‌බිතානං කොටි මජ්‌ඣන්‌ති වුච්‌චති. සුත්‌තෙ ඡින්‌නෙ උභො කණ්‌ඩානි උභතො පතන්‌ති. එවමෙත්‌ථ කණ්‌ඩද්‌වයං විය වුත්‌තප්‌පකාරා ද්‌වෙ අන්‌තා, සිබ්‌බිත්‌වා ඨිතසුත්‌තං විය තණ්‌හා, සුත්‌තෙ ඡින්‌නෙ කණ්‌ඩද්‌වයස්‌ස උභතොපතනං විය තණ්‌හාය නිරුද්‌ධාය අන්‌තද්‌වයං නිරුද්‌ධමෙව හොති. එත්‌තාවතාති එත්‌තකෙන ඉමිනා උභො අන්‌තෙ විදිත්‌වා තණ්‌හාය මජ්‌ඣෙ අනුපලිත්‌තභාවෙන අභිඤ්‌ඤෙය්‍යං චතුසච්‌චධම්‌මං අභිජානාති නාම, තීරණපරිඤ්‌ඤාය ච පහානපරිඤ්‌ඤාය ච පරිජානිතබ්‌බං ලොකියසච්‌චද්‌වයං පරිජානාති නාම. දිට්‌ඨෙව ධම්‌මෙති ඉමස්‌මිංයෙව අත්‌තභාවෙ. දුක්‌ඛස්‌සන්‌තකරො හොතීති වට්‌ටදුක්‌ඛස්‌ස කොටිකරො පරිච්‌ඡෙදපරිවටුමකරො හොති නාම.
61. Sattame pārāyane metteyyapañheti pārāyanasamāgamamhi metteyyamāṇavassa pañhe. Ubhonte viditvānāti dve ante dve koṭṭhāse jānitvā. Majjhe mantā na lippatīti mantā vuccati paññā, tāya ubho ante viditvā majjhe na lippati, vemajjheṭṭhāne na lippati. Sibbanimaccagāti sibbanisaṅkhātaṃ taṇhaṃ atīto. Phassoti phassavasena nibbattattā ayaṃ attabhāvo. Eko antoti ayameko koṭṭhāso. Phassasamudayoti phasso samudayo assāti phassasamudayo, imasmiṃ attabhāve katakammaphassapaccayā nibbatto anāgatattabhāvo. Dutiyo antoti dutiyo koṭṭhāso. Phassanirodhoti nibbānaṃ. Majjheti sibbinitaṇhaṃ chetvā dvidhākaraṇaṭṭhena nibbānaṃ majjhe nāma hoti. Taṇhā hinaṃ sibbatīti taṇhā naṃ attabhāvadvayasaṅkhātaṃ phassañca phassasamudayañca sibbati ghaṭṭeti. Kiṃ kāraṇā? Tassa tasseva bhavassa abhinibbattiyā. Yadi hi taṇhā na sibbeyya, tassa tassa bhavassa nibbatti na bhaveyya. Imasmiṃ ṭhāne koṭimajjhikūpamaṃ gaṇhanti. Dvinnañhi kaṇḍānaṃ ekato katvā majjhe suttena saṃsibbitānaṃ koṭi majjhanti vuccati. Sutte chinne ubho kaṇḍāni ubhato patanti. Evamettha kaṇḍadvayaṃ viya vuttappakārā dve antā, sibbitvā ṭhitasuttaṃ viya taṇhā, sutte chinne kaṇḍadvayassa ubhatopatanaṃ viya taṇhāya niruddhāya antadvayaṃ niruddhameva hoti. Ettāvatāti ettakena iminā ubho ante viditvā taṇhāya majjhe anupalittabhāvena abhiññeyyaṃ catusaccadhammaṃ abhijānāti nāma, tīraṇapariññāya ca pahānapariññāya ca parijānitabbaṃ lokiyasaccadvayaṃ parijānāti nāma. Diṭṭhevadhammeti imasmiṃyeva attabhāve. Dukkhassantakaro hotīti vaṭṭadukkhassa koṭikaro paricchedaparivaṭumakaro hoti nāma.
දුතියවාරෙ තිණ්‌ණං කණ්‌ඩානං වසෙන උපමා වෙදිතබ්‌බා. තිණ්‌ණඤ්‌හි කණ්‌ඩානං සුත්‌තෙන සංසිබ්‌බිතානං සුත්‌තෙ ඡින්‌නෙ තීණි කණ්‌ඩානි තීසු ඨානෙසු පතන්‌ති, එවමෙත්‌ථ කණ්‌ඩත්‌තයං විය අතීතානාගතපච්‌චුප්‌පන්‌නා ඛන්‌ධා, සුත්‌තං විය තණ්‌හා. සා හි අතීතං පච්‌චුප්‌පන්‌නෙන, පච්‌චුප්‌පන්‌නඤ්‌ච අනාගතෙන සද්‌ධිං සංසිබ්‌බති. සුත්‌තෙ ඡින්‌නෙ කණ්‌ඩත්‌තයස්‌ස තීසු ඨානෙසු පතනං විය තණ්‌හාය නිරුද්‌ධාය අතීතානාගතපච්‌චුප්‌පන්‌නා ඛන්‌ධා නිරුද්‌ධාව හොන්‌ති.
Dutiyavāre tiṇṇaṃ kaṇḍānaṃ vasena upamā veditabbā. Tiṇṇañhi kaṇḍānaṃ suttena saṃsibbitānaṃ sutte chinne tīṇi kaṇḍāni tīsu ṭhānesu patanti, evamettha kaṇḍattayaṃ viya atītānāgatapaccuppannā khandhā, suttaṃ viya taṇhā. Sā hi atītaṃ paccuppannena, paccuppannañca anāgatena saddhiṃ saṃsibbati. Sutte chinne kaṇḍattayassa tīsu ṭhānesu patanaṃ viya taṇhāya niruddhāya atītānāgatapaccuppannā khandhā niruddhāva honti.
තතියවාරෙ අදුක්‌ඛමසුඛා මජ්‌ඣෙති ද්‌වින්‌නං වෙදනානං අන්‌තරට්‌ඨකභාවෙන මජ්‌ඣෙ. සුඛඤ්‌හි දුක්‌ඛස්‌ස, දුක්‌ඛං වා සුඛස්‌ස අන්‌තරං නාම නත්‌ථි. තණ්‌හා සිබ්‌බිනීති වෙදනාසු නන්‌දිරාගො වෙදනානං උපච්‌ඡෙදං නිවාරෙතීති තා සිබ්‌බති නාම.
Tatiyavāre adukkhamasukhā majjheti dvinnaṃ vedanānaṃ antaraṭṭhakabhāvena majjhe. Sukhañhi dukkhassa, dukkhaṃ vā sukhassa antaraṃ nāma natthi. Taṇhā sibbinīti vedanāsu nandirāgo vedanānaṃ upacchedaṃ nivāretīti tā sibbati nāma.
චතුත්‌ථවාරෙ විඤ්‌ඤාණං මජ්‌ඣෙති පටිසන්‌ධිවිඤ්‌ඤාණම්‌පි සෙසවිඤ්‌ඤාණම්‌පි නාමරූපපච්‌චයසමුදාගතත්‌තා නාමරූපානං මජ්‌ඣෙ නාම.
Catutthavāre viññāṇaṃ majjheti paṭisandhiviññāṇampi sesaviññāṇampi nāmarūpapaccayasamudāgatattā nāmarūpānaṃ majjhe nāma.
පඤ්‌චමවාරෙ විඤ්‌ඤාණං මජ්‌ඣෙති කම්‌මවිඤ්‌ඤාණං මජ්‌ඣෙ, අජ්‌ඣත්‌තිකායතනෙසු වා මනායතනෙන කම්‌මස්‌ස ගහිතත්‌තා ඉධ යංකිඤ්‌චි විඤ්‌ඤාණං මජ්‌ඣෙ නාම, මනොද්‌වාරෙ වා ආවජ්‌ජනස්‌ස අජ්‌ඣත්‌තිකායතනනිස්‌සිතත්‌තා ජවනවිඤ්‌ඤාණං මජ්‌ඣෙ නාම.
Pañcamavāre viññāṇaṃ majjheti kammaviññāṇaṃ majjhe, ajjhattikāyatanesu vā manāyatanena kammassa gahitattā idha yaṃkiñci viññāṇaṃ majjhe nāma, manodvāre vā āvajjanassa ajjhattikāyatananissitattā javanaviññāṇaṃ majjhe nāma.
ඡට්‌ඨවාරෙ සක්‌කායොති තෙභූමකවට්‌ටං. සක්‌කායසමුදයොති සමුදයසච්‌චං. සක්‌කායනිරොධොති නිරොධසච්‌චං. පරියායෙනාති තෙන තෙන කාරණෙනෙව. සෙසං සබ්‌බත්‌ථ වුත්‌තනයෙනෙව වෙදිතබ්‌බං.
Chaṭṭhavāre sakkāyoti tebhūmakavaṭṭaṃ. Sakkāyasamudayoti samudayasaccaṃ. Sakkāyanirodhoti nirodhasaccaṃ. Pariyāyenāti tena tena kāraṇeneva. Sesaṃ sabbattha vuttanayeneva veditabbaṃ.
Related texts:
තිපිටක (මූල) • Tipiṭaka (Mūla) / සුත්‌තපිටක • Suttapiṭaka / අඞ්‌ගුත්‌තරනිකාය • Aṅguttaranikāya / 7. මජ්‌ඣෙසුත්‌තං • 7. Majjhesuttaṃ
ටීකා • Tīkā / සුත්‌තපිටක (ටීකා) • Suttapiṭaka (ṭīkā) / අඞ්‌ගුත්‌තරනිකාය (ටීකා) • Aṅguttaranikāya (ṭīkā) / 7. මජ්‌ඣෙසුත්‌තවණ්‌ණනා • 7. Majjhesuttavaṇṇanā
