| Library / Tipiṭaka / තිපිටක • Tipiṭaka / අඞ්‌ගුත්‌තරනිකාය (ටීකා) • Aṅguttaranikāya (ṭīkā) |
7. මජ්‌ඣෙසුත්‌තවණ්‌ණනා
7. Majjhesuttavaṇṇanā
61. සත්‌තමෙ මන්‌තාති ය-කාරලොපෙන නිද්‌දෙසො, කරණත්‌ථෙ වා එතං පච්‌චත්‌තවචනං. තෙනාහ ‘‘තාය උභො අන්‌තෙ විදිත්‌වා’’ති. ඵස්‌සවසෙන නිබ්‌බත්‌තත්‌තාති ද්‌වයද්‌වයසමාපත්‌තියං අඤ්‌ඤමඤ්‌ඤං සම්‌ඵස්‌සවසෙන නිබ්‌බත්‌තත්‌තා, ‘‘ඵස්‌සපච්‌චයා තණ්‌හා, තණ්‌හාපච්‌චයා උපාදානං, උපාදානපච්‌චයා භවො , භවපච්‌චයා ජාතී’’ති ඉමිනා චානුක්‌කමෙන ඵස්‌සසමුට්‌ඨානත්‌තා ඉමස්‌ස කායස්‌ස ඵස්‌සවසෙන නිබ්‌බත්‌තත්‌තාති වුත්‌තං. එකො අන්‌තොති එත්‌ථ අයං අන්‌ත-සද්‌දො අන්‌තඅබ්‌භන්‌තරමරියාදලාමකඅභාවකොට්‌ඨාසපදපූරණසමීපාදීසු දිස්‌සති. ‘‘අන්‌තපූරො උදරපූරො’’තිආදීසු (සු. නි. 197) හි අන්‌තෙ අන්‌තසද්‌දො. ‘‘චරන්‌ති ලොකෙ පරිවාරඡන්‌නා අන්‌තො අසුද්‌ධා, බහි සොභමානා’’තිආදීසු (සං. නි. 1.122) අබ්‌භන්‌තරෙ. ‘‘කායබන්‌ධනස්‌ස අන්‌තො ජීරති (චූළව. 278) සා හරිතන්‌තං වා පන්‌ථන්‌තං වා සෙලන්‌තං වා උදකන්‌තං වා’’තිආදීසු (ම. නි. 1.304) මරියාදායං. ‘‘අන්‌තමිදං, භික්‌ඛවෙ, ජීවිකාන’’න්‌තිආදීසු (සං. නි. 3.80; ඉතිවු. 91) ලාමකෙ. ‘‘එසෙවන්‌තො දුක්‌ඛස්‌සා’’තිආදීසු (ම. නි. 3.393; සං. නි. 2.51) අභාවෙ. සබ්‌බපච්‌චයසඞ්‌ඛයො හි දුක්‌ඛස්‌ස අභාවො කොටීතිපි වුච්‌චති. ‘‘තයො අන්‌තා’’තිආදීසු (දී. නි. 3.305) කොට්‌ඨාසෙ. ‘‘ඉඞ්‌ඝ තාව සුත්‌තන්‌තං වා ගාථායො වා අභිධම්‌මං වා පරියාපුණස්‌සු, සුත්‌තන්‌තෙ ඔකාසං කාරාපෙත්‌වා’’ති (පාචි. 442) ච ආදීසු පදපූරණෙ. ‘‘ගාමන්‌තං වා ඔසටො (පාරා. 409-410; චූළව. 343) ගාමන්‌තසෙනාසන’’න්‌තිආදීසු (පාරා. අට්‌ඨ. 2.410) සමීපෙ. ස්‌වායමිධ කොට්‌ඨාසෙ වත්‌තතීති අයමෙකො කොට්‌ඨාසොති.
61. Sattame mantāti ya-kāralopena niddeso, karaṇatthe vā etaṃ paccattavacanaṃ. Tenāha ‘‘tāya ubho ante viditvā’’ti. Phassavasena nibbattattāti dvayadvayasamāpattiyaṃ aññamaññaṃ samphassavasena nibbattattā, ‘‘phassapaccayā taṇhā, taṇhāpaccayā upādānaṃ, upādānapaccayā bhavo , bhavapaccayā jātī’’ti iminā cānukkamena phassasamuṭṭhānattā imassa kāyassa phassavasena nibbattattāti vuttaṃ. Eko antoti ettha ayaṃ anta-saddo antaabbhantaramariyādalāmakaabhāvakoṭṭhāsapadapūraṇasamīpādīsu dissati. ‘‘Antapūro udarapūro’’tiādīsu (su. ni. 197) hi ante antasaddo. ‘‘Caranti loke parivārachannā anto asuddhā, bahi sobhamānā’’tiādīsu (saṃ. ni. 1.122) abbhantare. ‘‘Kāyabandhanassa anto jīrati (cūḷava. 278) sā haritantaṃ vā panthantaṃ vā selantaṃ vā udakantaṃ vā’’tiādīsu (ma. ni. 1.304) mariyādāyaṃ. ‘‘Antamidaṃ, bhikkhave, jīvikāna’’ntiādīsu (saṃ. ni. 3.80; itivu. 91) lāmake. ‘‘Esevanto dukkhassā’’tiādīsu (ma. ni. 3.393; saṃ. ni. 2.51) abhāve. Sabbapaccayasaṅkhayo hi dukkhassa abhāvo koṭītipi vuccati. ‘‘Tayo antā’’tiādīsu (dī. ni. 3.305) koṭṭhāse. ‘‘Iṅgha tāva suttantaṃ vā gāthāyo vā abhidhammaṃ vā pariyāpuṇassu, suttante okāsaṃ kārāpetvā’’ti (pāci. 442) ca ādīsu padapūraṇe. ‘‘Gāmantaṃ vā osaṭo (pārā. 409-410; cūḷava. 343) gāmantasenāsana’’ntiādīsu (pārā. aṭṭha. 2.410) samīpe. Svāyamidha koṭṭhāse vattatīti ayameko koṭṭhāsoti.
සන්‌තො පරමත්‌ථතො විජ්‌ජමානො ධම්‌මසමූහොති සක්‌කායො, පඤ්‌චුපාදානක්‌ඛන්‌ධා. තෙනාහ ‘‘තෙභූමකවට්‌ට’’න්‌ති. සෙසමෙත්‌ථ සුවිඤ්‌ඤෙය්‍යමෙව.
Santo paramatthato vijjamāno dhammasamūhoti sakkāyo, pañcupādānakkhandhā. Tenāha ‘‘tebhūmakavaṭṭa’’nti. Sesamettha suviññeyyameva.
මජ්‌ඣෙසුත්‌තවණ්‌ණනා නිට්‌ඨිතා.
Majjhesuttavaṇṇanā niṭṭhitā.
Related texts:
තිපිටක (මූල) • Tipiṭaka (Mūla) / සුත්‌තපිටක • Suttapiṭaka / අඞ්‌ගුත්‌තරනිකාය • Aṅguttaranikāya / 7. මජ්‌ඣෙසුත්‌තං • 7. Majjhesuttaṃ
අට්‌ඨකථා • Aṭṭhakathā / සුත්‌තපිටක (අට්‌ඨකථා) • Suttapiṭaka (aṭṭhakathā) / අඞ්‌ගුත්‌තරනිකාය (අට්‌ඨකථා) • Aṅguttaranikāya (aṭṭhakathā) / 7. මජ්‌ඣෙසුත්‌තවණ්‌ණනා • 7. Majjhesuttavaṇṇanā
