| Library / Tipiṭaka / திபிடக • Tipiṭaka / ஸங்யுத்தனிகாய • Saṃyuttanikāya |
7. மக்கடஸுத்தங்
7. Makkaṭasuttaṃ
373. ‘‘அத்தி², பி⁴க்க²வே, ஹிமவதோ பப்³ப³தராஜஸ்ஸ து³க்³கா³ விஸமா தே³ஸா, யத்த² நேவ மக்கடானங் சாரீ ந மனுஸ்ஸானங். அத்தி², பி⁴க்க²வே, ஹிமவதோ பப்³ப³தராஜஸ்ஸ து³க்³கா³ விஸமா தே³ஸா, யத்த² மக்கடானஞ்ஹி கோ² சாரீ, ந மனுஸ்ஸானங். அத்தி², பி⁴க்க²வே, ஹிமவதோ பப்³ப³தராஜஸ்ஸ ஸமா பூ⁴மிபா⁴கா³ ரமணீயா, யத்த² மக்கடானஞ்சேவ சாரீ மனுஸ்ஸானஞ்ச. தத்ர, பி⁴க்க²வே, லுத்³தா³ மக்கடவீதீ²ஸு லேபங் ஒட்³டெ³ந்தி மக்கடானங் பா³த⁴னாய.
373. ‘‘Atthi, bhikkhave, himavato pabbatarājassa duggā visamā desā, yattha neva makkaṭānaṃ cārī na manussānaṃ. Atthi, bhikkhave, himavato pabbatarājassa duggā visamā desā, yattha makkaṭānañhi kho cārī, na manussānaṃ. Atthi, bhikkhave, himavato pabbatarājassa samā bhūmibhāgā ramaṇīyā, yattha makkaṭānañceva cārī manussānañca. Tatra, bhikkhave, luddā makkaṭavīthīsu lepaṃ oḍḍenti makkaṭānaṃ bādhanāya.
‘‘தத்ர, பி⁴க்க²வே, யே தே மக்கடா அபா³லஜாதிகா அலோலஜாதிகா, தே தங் லேபங் தி³ஸ்வா ஆரகா பரிவஜ்ஜந்தி. யோ பன ஸோ ஹோதி மக்கடோ பா³லஜாதிகோ லோலஜாதிகோ, ஸோ தங் லேபங் உபஸங்கமித்வா ஹத்தே²ன க³ண்ஹாதி. ஸோ தத்த² ப³ஜ்ஜ²தி. ‘ஹத்த²ங் மோசெஸ்ஸாமீ’தி து³தியேன ஹத்தே²ன க³ண்ஹாதி. ஸோ தத்த² ப³ஜ்ஜ²தி. ‘உபோ⁴ ஹத்தே² மோசெஸ்ஸாமீ’தி பாதே³ன க³ண்ஹாதி. ஸோ தத்த² ப³ஜ்ஜ²தி. ‘உபோ⁴ ஹத்தே² மோசெஸ்ஸாமி பாத³ஞ்சா’தி து³தியேன பாதே³ன க³ண்ஹாதி. ஸோ தத்த² ப³ஜ்ஜ²தி. ‘உபோ⁴ ஹத்தே² மோசெஸ்ஸாமி பாதே³ சா’தி துண்டே³ன க³ண்ஹாதி. ஸோ தத்த² ப³ஜ்ஜ²தி. ஏவஞ்ஹி ஸோ, பி⁴க்க²வே, மக்கடோ பஞ்சொட்³டி³தோ து²னங் ஸேதி அனயங் ஆபன்னோ ப்³யஸனங் ஆபன்னோ யதா²காமகரணீயோ லுத்³த³ஸ்ஸ. தமேனங், பி⁴க்க²வே, லுத்³தோ³ விஜ்ஜி²த்வா தஸ்மிங்யேவ கட்ட²கதங்கா³ரே 1 அவஸ்ஸஜ்ஜெத்வா யேன காமங் பக்கமதி. ஏவங் ஸோ தங், பி⁴க்க²வே, ஹோதி யோ அகோ³சரே சரதி பரவிஸயே.
‘‘Tatra, bhikkhave, ye te makkaṭā abālajātikā alolajātikā, te taṃ lepaṃ disvā ārakā parivajjanti. Yo pana so hoti makkaṭo bālajātiko lolajātiko, so taṃ lepaṃ upasaṅkamitvā hatthena gaṇhāti. So tattha bajjhati. ‘Hatthaṃ mocessāmī’ti dutiyena hatthena gaṇhāti. So tattha bajjhati. ‘Ubho hatthe mocessāmī’ti pādena gaṇhāti. So tattha bajjhati. ‘Ubho hatthe mocessāmi pādañcā’ti dutiyena pādena gaṇhāti. So tattha bajjhati. ‘Ubho hatthe mocessāmi pāde cā’ti tuṇḍena gaṇhāti. So tattha bajjhati. Evañhi so, bhikkhave, makkaṭo pañcoḍḍito thunaṃ seti anayaṃ āpanno byasanaṃ āpanno yathākāmakaraṇīyo luddassa. Tamenaṃ, bhikkhave, luddo vijjhitvā tasmiṃyeva kaṭṭhakataṅgāre 2 avassajjetvā yena kāmaṃ pakkamati. Evaṃ so taṃ, bhikkhave, hoti yo agocare carati paravisaye.
‘‘தஸ்மாதிஹ, பி⁴க்க²வே, மா அகோ³சரே சரித்த² பரவிஸயே. அகோ³சரே, பி⁴க்க²வே, சரதங் பரவிஸயே லச்ச²தி மாரோ ஓதாரங், லச்ச²தி மாரோ ஆரம்மணங். கோ ச, பி⁴க்க²வே, பி⁴க்கு²னோ அகோ³சரோ பரவிஸயோ? யதி³த³ங் – பஞ்ச காமகு³ணா. கதமே பஞ்ச? சக்கு²விஞ்ஞெய்யா ரூபா இட்டா² கந்தா மனாபா பியரூபா காமூபஸங்ஹிதா ரஜனீயா, ஸோதவிஞ்ஞெய்யா ஸத்³தா³…பே॰… கா⁴னவிஞ்ஞெய்யா க³ந்தா⁴… ஜிவ்ஹாவிஞ்ஞெய்யா ரஸா… காயவிஞ்ஞெய்யா பொ²ட்ட²ப்³பா³ இட்டா² கந்தா மனாபா பியரூபா காமூபஸங்ஹிதா ரஜனீயா. அயங், பி⁴க்க²வே, பி⁴க்கு²னோ அகோ³சரோ பரவிஸயோ.
‘‘Tasmātiha, bhikkhave, mā agocare carittha paravisaye. Agocare, bhikkhave, carataṃ paravisaye lacchati māro otāraṃ, lacchati māro ārammaṇaṃ. Ko ca, bhikkhave, bhikkhuno agocaro paravisayo? Yadidaṃ – pañca kāmaguṇā. Katame pañca? Cakkhuviññeyyā rūpā iṭṭhā kantā manāpā piyarūpā kāmūpasaṃhitā rajanīyā, sotaviññeyyā saddā…pe… ghānaviññeyyā gandhā… jivhāviññeyyā rasā… kāyaviññeyyā phoṭṭhabbā iṭṭhā kantā manāpā piyarūpā kāmūpasaṃhitā rajanīyā. Ayaṃ, bhikkhave, bhikkhuno agocaro paravisayo.
‘‘கோ³சரே, பி⁴க்க²வே, சரத² ஸகே பெத்திகே விஸயே. கோ³சரே, பி⁴க்க²வே , சரதங் ஸகே பெத்திகே விஸயே ந லச்ச²தி மாரோ ஓதாரங், ந லச்ச²தி மாரோ ஆரம்மணங். கோ ச, பி⁴க்க²வே, பி⁴க்கு²னோ கோ³சரோ ஸகோ பெத்திகோ விஸயோ? யதி³த³ங் – சத்தாரோ ஸதிபட்டா²னா. கதமே சத்தாரோ ? இத⁴, பி⁴க்க²வே, பி⁴க்கு² காயே காயானுபஸ்ஸீ விஹரதி ஆதாபீ ஸம்பஜானோ ஸதிமா, வினெய்ய லோகே அபி⁴ஜ்ஜா²தோ³மனஸ்ஸங்; வேத³னாஸு…பே॰… சித்தே…பே॰… த⁴ம்மேஸு த⁴ம்மானுபஸ்ஸீ விஹரதி ஆதாபீ ஸம்பஜானோ ஸதிமா, வினெய்ய லோகே அபி⁴ஜ்ஜா²தோ³மனஸ்ஸங். அயங், பி⁴க்க²வே, பி⁴க்கு²னோ கோ³சரோ ஸகோ பெத்திகோ விஸயோ’’தி. ஸத்தமங்.
‘‘Gocare, bhikkhave, caratha sake pettike visaye. Gocare, bhikkhave , carataṃ sake pettike visaye na lacchati māro otāraṃ, na lacchati māro ārammaṇaṃ. Ko ca, bhikkhave, bhikkhuno gocaro sako pettiko visayo? Yadidaṃ – cattāro satipaṭṭhānā. Katame cattāro ? Idha, bhikkhave, bhikkhu kāye kāyānupassī viharati ātāpī sampajāno satimā, vineyya loke abhijjhādomanassaṃ; vedanāsu…pe… citte…pe… dhammesu dhammānupassī viharati ātāpī sampajāno satimā, vineyya loke abhijjhādomanassaṃ. Ayaṃ, bhikkhave, bhikkhuno gocaro sako pettiko visayo’’ti. Sattamaṃ.
Footnotes:
Related texts:
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / ஸங்யுத்தனிகாய (அட்ட²கதா²) • Saṃyuttanikāya (aṭṭhakathā) / 7. மக்கடஸுத்தவண்ணனா • 7. Makkaṭasuttavaṇṇanā
டீகா • Tīkā / ஸுத்தபிடக (டீகா) • Suttapiṭaka (ṭīkā) / ஸங்யுத்தனிகாய (டீகா) • Saṃyuttanikāya (ṭīkā) / 7. மக்கடஸுத்தவண்ணனா • 7. Makkaṭasuttavaṇṇanā
