| Library / Tipiṭaka / திபிடக • Tipiṭaka / ஸாரத்த²தீ³பனீ-டீகா • Sāratthadīpanī-ṭīkā |
மக்கடிவத்து²கதா²வண்ணனா
Makkaṭivatthukathāvaṇṇanā
40. அனுத்தானபத³வண்ணனாதி உத்தானங் வுச்சதி பாகடங், தப்படிபக்கே²ன அனுத்தானங் அபாகடங் அப்பசுரங் து³விஞ்ஞெய்யஞ்ச, அனுத்தானானங் பதா³னங் வண்ணனா அனுத்தானபத³வண்ணனா. உத்தானபத³வண்ணனாய பயோஜனாபா⁴வதோ அனுத்தானக்³க³ஹணங். பசுரபடிஸேவனோ ஹோதீதி ப³ஹுலபடிஸேவனோ ஹோதி, தி³வஸே தி³வஸே நிரந்தரங் படிஸேவதீதி அத்தோ². பசுரத்தே² ஹி வத்தமானவசனந்தி ஸப்³ப³தா³ படிஸேவனாபா⁴வேபி ‘‘இஹ மல்லா யுஜ்ஜ²ந்தீ’’திஆதீ³ஸு விய பா³ஹுல்லவுத்திங் உபாதா³ய வத்தமானவசனங். ஆஹிண்ட³ந்தாதி விசரந்தா. அஞ்ஞேஸுபீதி அஞ்ஞேஸுபி பி⁴க்கூ²ஸு.
40.Anuttānapadavaṇṇanāti uttānaṃ vuccati pākaṭaṃ, tappaṭipakkhena anuttānaṃ apākaṭaṃ appacuraṃ duviññeyyañca, anuttānānaṃ padānaṃ vaṇṇanā anuttānapadavaṇṇanā. Uttānapadavaṇṇanāya payojanābhāvato anuttānaggahaṇaṃ. Pacurapaṭisevano hotīti bahulapaṭisevano hoti, divase divase nirantaraṃ paṭisevatīti attho. Pacuratthe hi vattamānavacananti sabbadā paṭisevanābhāvepi ‘‘iha mallā yujjhantī’’tiādīsu viya bāhullavuttiṃ upādāya vattamānavacanaṃ. Āhiṇḍantāti vicarantā. Aññesupīti aññesupi bhikkhūsu.
41. ஸஹொட்³ட⁴க்³க³ஹிதோதி ஸஹ ப⁴ண்டே³ன க³ஹிதோ. அத்தனோ மிச்சா²கா³ஹேன லேஸஒட்³ட³னேன வா பரிபுண்ணத்த²ம்பி பட²மபஞ்ஞத்திங் அஞ்ஞதா² கரொந்தோ ‘‘தஞ்ச கோ² மனுஸ்ஸித்தி²யா, நோ திரச்சா²னக³தாயா’’தி ஆஹ. த³ஸ்ஸனந்தி ஸானுராக³த³ஸ்ஸனங். க³ஹணந்தி அனுராக³வஸேனேவ ஹத்தே²ன க³ஹணங். ஆமஸனங் அத்தனோ ஸரீரேன தஸ்ஸா ஸரீரஸ்ஸ உபரி ஆமஸனமத்தங், பு²ஸனங் ததோ த³ள்ஹதரங் கத்வா ஸங்பு²ஸனங், க⁴ட்டனங் ததோபி த³ள்ஹதரங் கத்வா ஸரீரேன ஸரீரஸ்ஸ க⁴ட்டனங். தங் ஸப்³ப³ம்பீதி த³ஸ்ஸனாதி³ ஸப்³ப³ம்பி.
41.Sahoḍḍhaggahitoti saha bhaṇḍena gahito. Attano micchāgāhena lesaoḍḍanena vā paripuṇṇatthampi paṭhamapaññattiṃ aññathā karonto ‘‘tañca kho manussitthiyā, no tiracchānagatāyā’’ti āha. Dassananti sānurāgadassanaṃ. Gahaṇanti anurāgavaseneva hatthena gahaṇaṃ. Āmasanaṃ attano sarīrena tassā sarīrassa upari āmasanamattaṃ, phusanaṃ tato daḷhataraṃ katvā saṃphusanaṃ, ghaṭṭanaṃ tatopi daḷhataraṃ katvā sarīrena sarīrassa ghaṭṭanaṃ. Taṃ sabbampīti dassanādi sabbampi.
42. த³ள்ஹதரங் ஸிக்கா²பத³மகாஸீதி இமஸ்மிங் அதி⁴காரே அனுபஞ்ஞத்தியா ஸிக்கா²பத³ஸ்ஸ த³ள்ஹீகரணங் ஸிதி²லகரணஞ்ச பஸங்க³தோ ஆபன்னங் விப⁴ஜித்வா த³ஸ்ஸேதுகாமோ ‘‘து³வித⁴ஞ்ஹி ஸிக்கா²பத³’’ந்திஆதி³மாஹ. தத்த² யஸ்ஸ ஸசித்தகஸ்ஸ ஸிக்கா²பத³ஸ்ஸ சித்தங் அகுஸலமேவ ஹோதி, தங் லோகவஜ்ஜங். யஸ்ஸ ஸசித்தகாசித்தகபக்க²ஸஹிதஸ்ஸ அசித்தகஸ்ஸ ச ஸசித்தகபக்கே² சித்தங் அகுஸலமேவ ஹோதி, தம்பி ஸுராபானாதி³ லோகவஜ்ஜந்தி இமமத்த²ங் ஸம்பிண்டெ³த்வா த³ஸ்ஸேதுங் ‘‘யஸ்ஸ ஸசித்தகபக்கே² சித்தங் அகுஸலமேவ ஹோதி, தங் லோகவஜ்ஜங் நாமா’’தி வுத்தங். ‘‘ஸசித்தகபக்கே²’’தி ஹி இத³ங் வசனங் அசித்தகங் ஸந்தா⁴ய வுத்தங். ந ஹி ஏகங்ஸதோ ஸசித்தகஸ்ஸ ‘‘ஸசித்தகபக்கே²’’தி விஸேஸனே பயோஜனங் அத்தி². ஸசித்தகபக்கே²தி ச வத்து²வீதிக்கமவிஜானநசித்தேன ‘‘ஸசித்தகபக்கே²’’தி க³ஹேதப்³ப³ங், ந பண்ணத்திவிஜானநசித்தேன. யதி³ ஹி ‘‘ந வட்டதீ’’தி பண்ணத்திவிஜானநசித்தேனபி யஸ்ஸ ஸிக்கா²பத³ஸ்ஸ ஸசித்தகபக்கே² சித்தங் அகுஸலமேவ, தம்பி லோகவஜ்ஜந்தி வதெ³ய்ய, ஸப்³பே³ஸங் பண்ணத்திவஜ்ஜஸிக்கா²பதா³னம்பி லோகவஜ்ஜதா ஆபஜ்ஜெய்ய பண்ணத்திவஜ்ஜானம்பி ‘‘ந வட்டதீ’’தி ஜானித்வா வீதிக்கமே அகுஸலசித்தஸ்ஸேவ ஸம்ப⁴வதோ. ந ஹி ப⁴க³வதோ ஆணங் ஜானித்வா மத்³த³ந்தஸ்ஸ குஸலசித்தங் உப்பஜ்ஜதி அனாத³ரியவஸேன படிக⁴சித்தஸ்ஸேவ உப்பஜ்ஜனதோ.
42.Daḷhataraṃ sikkhāpadamakāsīti imasmiṃ adhikāre anupaññattiyā sikkhāpadassa daḷhīkaraṇaṃ sithilakaraṇañca pasaṅgato āpannaṃ vibhajitvā dassetukāmo ‘‘duvidhañhi sikkhāpada’’ntiādimāha. Tattha yassa sacittakassa sikkhāpadassa cittaṃ akusalameva hoti, taṃ lokavajjaṃ. Yassa sacittakācittakapakkhasahitassa acittakassa ca sacittakapakkhe cittaṃ akusalameva hoti, tampi surāpānādi lokavajjanti imamatthaṃ sampiṇḍetvā dassetuṃ ‘‘yassa sacittakapakkhe cittaṃ akusalameva hoti, taṃ lokavajjaṃ nāmā’’ti vuttaṃ. ‘‘Sacittakapakkhe’’ti hi idaṃ vacanaṃ acittakaṃ sandhāya vuttaṃ. Na hi ekaṃsato sacittakassa ‘‘sacittakapakkhe’’ti visesane payojanaṃ atthi. Sacittakapakkheti ca vatthuvītikkamavijānanacittena ‘‘sacittakapakkhe’’ti gahetabbaṃ, na paṇṇattivijānanacittena. Yadi hi ‘‘na vaṭṭatī’’ti paṇṇattivijānanacittenapi yassa sikkhāpadassa sacittakapakkhe cittaṃ akusalameva, tampi lokavajjanti vadeyya, sabbesaṃ paṇṇattivajjasikkhāpadānampi lokavajjatā āpajjeyya paṇṇattivajjānampi ‘‘na vaṭṭatī’’ti jānitvā vītikkame akusalacittasseva sambhavato. Na hi bhagavato āṇaṃ jānitvā maddantassa kusalacittaṃ uppajjati anādariyavasena paṭighacittasseva uppajjanato.
அபிசெத்த² ‘‘ஸசித்தகபக்கே² சித்தங் அகுஸலமேவா’’தி வசனதோ அசித்தகஸ்ஸ வத்து²அஜானநவஸேன அசித்தகபக்கே² சித்தங் அகுஸலமேவாதி அயங் நியமோ நத்தீ²தி விஞ்ஞாயதி. யதி³ ஹி அசித்தகஸ்ஸ அசித்தகபக்கே²பி சித்தங் அகுஸலமேவ ஸியா, ‘‘ஸசித்தகபக்கே²’’தி இத³ங் விஸேஸனங் நிரத்த²கங் ஸியா. ‘‘யஸ்ஸ சித்தங் அகுஸலமேவ ஹோதி, தங் லோகவஜ்ஜ’’ந்தி எத்தகே வுத்தே ஸுராதி அஜானித்வா பிவந்தஸ்ஸ க³ந்த⁴வண்ணகாதி³பா⁴வங் அஜானித்வா தானி லிம்பந்தீனங் பி⁴க்கு²னீனஞ்ச வினாபி அகுஸலசித்தேன ஆபத்திஸம்ப⁴வதோ ஏகந்தாகுஸலங் ஸசித்தகஸிக்கா²பத³ங் ட²பெத்வா ஸுராபானாதி³அசித்தகஸிக்கா²பதா³னங் லோகவஜ்ஜதா ந ஸியாதி தேஸம்பி ஸங்க³ண்ஹத்த²ங் ‘‘யஸ்ஸ ஸசித்தகபக்கே² சித்தங் அகுஸலமேவ ஹோதி, தங் லோகவஜ்ஜ’’ந்தி வுத்தங். தேனேவ சூளக³ண்டி²பதே³ மஜ்ஜி²மக³ண்டி²பதே³ ச வுத்தங் ‘‘ஏதங் ஸத்தங் மாரெஸ்ஸாமீதி தஸ்மிங்யேவ பதே³ஸே நிபன்னங் அஞ்ஞங் மாரெந்தஸ்ஸ பாணஸாமஞ்ஞஸ்ஸ அத்தி²தாய யதா² பாணாதிபாதோ ஹோதி, ஏவங் ஏதங் மஜ்ஜங் பிவிஸ்ஸாமீதி அஞ்ஞங் மஜ்ஜங் பிவந்தஸ்ஸ மஜ்ஜஸாமஞ்ஞஸ்ஸ அத்தி²தாய அகுஸலமேவ ஹோதி. யதா² பன கட்ட²ஸஞ்ஞாய ஸப்பங் கா⁴தெந்தஸ்ஸ பாணாதிபாதோ ந ஹோதி, ஏவங் நாளிகேரபானஸஞ்ஞாய மஜ்ஜங் பிவந்தஸ்ஸ அகுஸலங் ந ஹோதீ’’தி.
Apicettha ‘‘sacittakapakkhe cittaṃ akusalamevā’’ti vacanato acittakassa vatthuajānanavasena acittakapakkhe cittaṃ akusalamevāti ayaṃ niyamo natthīti viññāyati. Yadi hi acittakassa acittakapakkhepi cittaṃ akusalameva siyā, ‘‘sacittakapakkhe’’ti idaṃ visesanaṃ niratthakaṃ siyā. ‘‘Yassa cittaṃ akusalameva hoti, taṃ lokavajja’’nti ettake vutte surāti ajānitvā pivantassa gandhavaṇṇakādibhāvaṃ ajānitvā tāni limpantīnaṃ bhikkhunīnañca vināpi akusalacittena āpattisambhavato ekantākusalaṃ sacittakasikkhāpadaṃ ṭhapetvā surāpānādiacittakasikkhāpadānaṃ lokavajjatā na siyāti tesampi saṅgaṇhatthaṃ ‘‘yassa sacittakapakkhe cittaṃ akusalameva hoti, taṃ lokavajja’’nti vuttaṃ. Teneva cūḷagaṇṭhipade majjhimagaṇṭhipade ca vuttaṃ ‘‘etaṃ sattaṃ māressāmīti tasmiṃyeva padese nipannaṃ aññaṃ mārentassa pāṇasāmaññassa atthitāya yathā pāṇātipāto hoti, evaṃ etaṃ majjaṃ pivissāmīti aññaṃ majjaṃ pivantassa majjasāmaññassa atthitāya akusalameva hoti. Yathā pana kaṭṭhasaññāya sappaṃ ghātentassa pāṇātipāto na hoti, evaṃ nāḷikerapānasaññāya majjaṃ pivantassa akusalaṃ na hotī’’ti.
கேசி பன வத³ந்தி ‘‘ஸாமணேரஸ்ஸ ஸுராதி அஜானித்வா பிவந்தஸ்ஸ பாராஜிகோ நத்தி², அகுஸலங் பன ஹோதீ’’தி, தங் தேஸங் மதிமத்தங். ‘‘பி⁴க்கு²னோ அஜானித்வாபி பீ³ஜதோ பட்டா²ய மஜ்ஜங் பிவந்தஸ்ஸ பாசித்தியங், ஸாமணேரோ ஜானித்வா பிவந்தோ ஸீலபே⁴த³ங் ஆபஜ்ஜதி, ந அஜானித்வா’’தி எத்தகமேவ ஹி அட்ட²கதா²யங் வுத்தங், ‘‘அகுஸலங் பன ஹோதீ’’தி ந வுத்தந்தி. அபரம்பி வத³ந்தி ‘‘அஜானித்வா பிவந்தஸ்ஸபி ஸோதாபன்னஸ்ஸ முக²ங் ஸுரா ந பவிஸதி கம்மபத²ப்பத்தஅகுஸலசித்தேனேவ பாதப்³ப³தோ’’தி, தம்பி ந ஸுந்த³ரங். போ³தி⁴ஸத்தே குச்சி²க³தே போ³தி⁴ஸத்தமாது ஸீலங் விய ஹி இத³ம்பி அரியஸாவகானங் த⁴ம்மதாஸித்³த⁴ந்தி வேதி³தப்³ப³ங். தேனேவ தீ³க⁴னிகாயே கூடத³ந்தஸுத்தட்ட²கதா²யங் (தீ³॰ நி॰ அட்ட²॰ 1.352) வுத்தங் –
Keci pana vadanti ‘‘sāmaṇerassa surāti ajānitvā pivantassa pārājiko natthi, akusalaṃ pana hotī’’ti, taṃ tesaṃ matimattaṃ. ‘‘Bhikkhuno ajānitvāpi bījato paṭṭhāya majjaṃ pivantassa pācittiyaṃ, sāmaṇero jānitvā pivanto sīlabhedaṃ āpajjati, na ajānitvā’’ti ettakameva hi aṭṭhakathāyaṃ vuttaṃ, ‘‘akusalaṃ pana hotī’’ti na vuttanti. Aparampi vadanti ‘‘ajānitvā pivantassapi sotāpannassa mukhaṃ surā na pavisati kammapathappattaakusalacitteneva pātabbato’’ti, tampi na sundaraṃ. Bodhisatte kucchigate bodhisattamātu sīlaṃ viya hi idampi ariyasāvakānaṃ dhammatāsiddhanti veditabbaṃ. Teneva dīghanikāye kūṭadantasuttaṭṭhakathāyaṃ (dī. ni. aṭṭha. 1.352) vuttaṃ –
‘‘ப⁴வந்தரேபி ஹி அரியஸாவகோ ஜீவிதஹேதுபி நேவ பாணங் ஹனதி, ந ஸுரங் பிவதி. ஸசேபிஸ்ஸ ஸுரஞ்ச கீ²ரஞ்ச மிஸ்ஸெத்வா முகே² பக்கி²பந்தி, கீ²ரமேவ பவிஸதி, ந ஸுரா. யதா² கிங்? யதா² கோஞ்சஸகுணானங் கீ²ரமிஸ்ஸகே உத³கே கீ²ரமேவ பவிஸதி, ந உத³கங். இத³ங் யோனிஸித்³த⁴ந்தி சே? இத³ம்பி த⁴ம்மதாஸித்³த⁴ந்தி வேதி³தப்³ப³’’ந்தி.
‘‘Bhavantarepi hi ariyasāvako jīvitahetupi neva pāṇaṃ hanati, na suraṃ pivati. Sacepissa surañca khīrañca missetvā mukhe pakkhipanti, khīrameva pavisati, na surā. Yathā kiṃ? Yathā koñcasakuṇānaṃ khīramissake udake khīrameva pavisati, na udakaṃ. Idaṃ yonisiddhanti ce? Idampi dhammatāsiddhanti veditabba’’nti.
யதி³ ஏவங் ஸுராபானஸிக்கா²பத³ட்ட²கதா²யங் (பாசி॰ அட்ட²॰ 329) ‘‘வத்து²அஜானநதாய செத்த² அசித்தகதா வேதி³தப்³பா³, அகுஸலேனேவ பாதப்³ப³தாய லோகவஜ்ஜதா’’தி கஸ்மா வுத்தங்? நாயங் தோ³ஸோ. அயஞ்ஹெத்த² அதி⁴ப்பாயோ – ஸசித்தகபக்கே² அகுஸலசித்தேனேவ பாதப்³ப³தாய லோகவஜ்ஜதாதி. இமினாயேவ ஹி அதி⁴ப்பாயேன அஞ்ஞேஸுபி லோகவஜ்ஜேஸு அசித்தகஸிக்கா²பதே³ஸு அகுஸலசித்ததாயேவ வுத்தா, ந பன ஸசித்தகதா. தேனேவ பி⁴க்கு²னீவிப⁴ங்க³ட்ட²கதா²யங் (பாசி॰ அட்ட²॰ 1227) வுத்தங் –
Yadi evaṃ surāpānasikkhāpadaṭṭhakathāyaṃ (pāci. aṭṭha. 329) ‘‘vatthuajānanatāya cettha acittakatā veditabbā, akusaleneva pātabbatāya lokavajjatā’’ti kasmā vuttaṃ? Nāyaṃ doso. Ayañhettha adhippāyo – sacittakapakkhe akusalacitteneva pātabbatāya lokavajjatāti. Imināyeva hi adhippāyena aññesupi lokavajjesu acittakasikkhāpadesu akusalacittatāyeva vuttā, na pana sacittakatā. Teneva bhikkhunīvibhaṅgaṭṭhakathāyaṃ (pāci. aṭṭha. 1227) vuttaṃ –
‘‘கி³ரக்³க³ஸமஜ்ஜங் சித்தாகா³ரஸிக்கா²பத³ங் ஸங்கா⁴ணி இத்தா²லங்காரோ க³ந்த⁴கவண்ணகோ வாஸிதகபிஞ்ஞாகோ பி⁴க்கு²னீஆதீ³ஹி உம்மத்³த³னபரிமத்³த³னாதி இமானி த³ஸ ஸிக்கா²பதா³னி அசித்தகானி லோகவஜ்ஜானி அகுஸலசித்தானீ’’தி,
‘‘Giraggasamajjaṃ cittāgārasikkhāpadaṃ saṅghāṇi itthālaṅkāro gandhakavaṇṇako vāsitakapiññāko bhikkhunīādīhi ummaddanaparimaddanāti imāni dasa sikkhāpadāni acittakāni lokavajjāni akusalacittānī’’ti,
அயங் பனெத்த² அதி⁴ப்பாயோ – வினாபி சித்தேன ஆபஜ்ஜிதப்³ப³த்தா அசித்தகானி, சித்தே பன ஸதி அகுஸலேனேவ ஆபஜ்ஜிதப்³ப³த்தா லோகவஜ்ஜானி சேவ அகுஸலசித்தானி சாதி. தஸ்மா பி⁴க்கு²விப⁴ங்கே³ ஆக³தானி ஸுராபானஉய்யுத்தஉய்யோதி⁴கஸிக்கா²பதா³னி தீணி, பி⁴க்கு²னீவிப⁴ங்கே³ ஆக³தானி கி³ரக்³க³ஸமஜ்ஜாதீ³னி த³ஸாதி இமேஸங் தேரஸன்னங் அசித்தகஸிக்கா²பதா³னங் லோகவஜ்ஜதாத³ஸ்ஸனத்த²ங் ‘‘ஸசித்தகபக்கே²’’தி இத³ங் விஸேஸனங் கதந்தி நிட்ட²மெத்த² க³ந்தப்³ப³ங். யஸ்மா பன பண்ணத்திவஜ்ஜஸ்ஸ வத்து²வீதிக்கமவிஜானநசித்தேன ஸசித்தகபக்கே² சித்தங் ஸியா குஸலங், ஸியா அகுஸலங், ஸியா அப்³யாகதங், தஸ்மா தஸ்ஸ ஸசித்தகபக்கே² சித்தங் அகுஸலமேவாதி அயங் நியமோ நத்தீ²தி ஸேஸங் பண்ணத்திவஜ்ஜந்தி வுத்தங்.
Ayaṃ panettha adhippāyo – vināpi cittena āpajjitabbattā acittakāni, citte pana sati akusaleneva āpajjitabbattā lokavajjāni ceva akusalacittāni cāti. Tasmā bhikkhuvibhaṅge āgatāni surāpānauyyuttauyyodhikasikkhāpadāni tīṇi, bhikkhunīvibhaṅge āgatāni giraggasamajjādīni dasāti imesaṃ terasannaṃ acittakasikkhāpadānaṃ lokavajjatādassanatthaṃ ‘‘sacittakapakkhe’’ti idaṃ visesanaṃ katanti niṭṭhamettha gantabbaṃ. Yasmā pana paṇṇattivajjassa vatthuvītikkamavijānanacittena sacittakapakkhe cittaṃ siyā kusalaṃ, siyā akusalaṃ, siyā abyākataṃ, tasmā tassa sacittakapakkhe cittaṃ akusalamevāti ayaṃ niyamo natthīti sesaṃ paṇṇattivajjanti vuttaṃ.
ருந்த⁴ந்தீதி வீதிக்கமங் ருந்த⁴ந்தீ. த்³வாரங் பித³ஹந்தீதி வீதிக்கமலேஸஸ்ஸ த்³வாரங் பித³ஹந்தீ. ஸோதங் பச்சி²ந்த³மானாதி உபரூபரி வீதிக்கமஸோதங் பச்சி²ந்த³மானா. அத² வா ருந்த⁴ந்தீதி அனாபத்திலேஸங் ருந்த⁴ந்தீ. த்³வாரங் பித³ஹந்தீதி அனாபத்திலேஸஸ்ஸ த்³வாரங் பித³ஹந்தீ. ஸோதங் பச்சி²ந்த³மானாதி அனாபத்திஸோதங் பச்சி²ந்த³மானா, ஆபத்திமேவ குருமானாதி வுத்தங் ஹோதி. நனு ச லோகவஜ்ஜே காசி அனுபஞ்ஞத்தி உப்பஜ்ஜமானா ஸிதி²லங் கரொந்தீ உப்பஜ்ஜதி, தஸ்மா ‘‘லோகவஜ்ஜே அனுபஞ்ஞத்தி உப்பஜ்ஜமானா…பே॰… கா³ள்ஹதரங் கரொந்தீ உப்பஜ்ஜதீ’’தி இத³ங் கஸ்மா வுத்தந்தி ஆஹ ‘‘அஞ்ஞத்ர அதி⁴மானா அஞ்ஞத்ர ஸுபினந்தா’’திஆதி³. ‘‘அஞ்ஞத்ர அதி⁴மானா’’தி இமிஸ்ஸா அனுபஞ்ஞத்தியா ‘‘வீதிக்கமாபா⁴வா’’தி காரணங் வுத்தங், ‘‘அஞ்ஞத்ர ஸுபினந்தா’’தி இமிஸ்ஸா ‘‘அப்³போ³ஹாரிகத்தா’’தி காரணங் வுத்தங். தத்த² வீதிக்கமாபா⁴வாதி பாபிச்சோ² இச்சா²பகதோதிஆதி³வீதிக்கமாபா⁴வா. உத்தரிமனுஸ்ஸத⁴ம்மே ஹி ‘‘பாபிச்சோ² இச்சா²பகதோ உத்தரிமனுஸ்ஸத⁴ம்மங் உல்லபதீ’’தி (மஹாவ॰ 129) வசனதோ விஸங்வாத³னாதி⁴ப்பாயேன முஸா ப⁴ணந்தோ பாராஜிகோ ஹோதி. அயங் பன அதி⁴மானேன அதி⁴க³தஸஞ்ஞீ ஹுத்வா உல்லபதி, ந ஸிக்கா²பத³ங் வீதிக்கமிதுகாமோ, தஸ்மா ‘‘அஞ்ஞத்ர அதி⁴மானா’’தி அயங் அனுபஞ்ஞத்தி உப்பஜ்ஜமானா வீதிக்கமாபா⁴வா அனாபத்திகரா ஜாதா. அப்³போ³ஹாரிகத்தாதி ஸுபினந்தே விஜ்ஜமானாயபி சேதனாய வீதிக்கமிச்சா²ய ச அப்³போ³ஹாரிகத்தா. கிஞ்சாபி ஹி ஸுபினந்தே மோசனஸ்ஸாத³சேதனா ஸங்விஜ்ஜதி, கதா³சி உபக்கமனம்பி ஹோதி, ததா²பி தி²னமித்³தே⁴ன அபி⁴பூ⁴தத்தா தங் சித்தங் அப்³போ³ஹாரிகங், சித்தஸ்ஸ அப்³போ³ஹாரிகத்தா உபக்கமகிரியாஸங்வத்தனிகாபி சேதனா அப்³போ³ஹாரிகா. தேனேவ ‘‘அத்தே²ஸா பி⁴க்க²வே சேதனா, ஸா ச கோ² அப்³போ³ஹாரிகா’’தி (பாரா॰ 235) ப⁴க³வதா வுத்தா, தஸ்மா ‘‘அஞ்ஞத்ர ஸுபினந்தா’’தி அயங் அனுபஞ்ஞத்தி அப்³போ³ஹாரிகத்தா அனாபத்திகரா ஜாதா.
Rundhantīti vītikkamaṃ rundhantī. Dvāraṃ pidahantīti vītikkamalesassa dvāraṃ pidahantī. Sotaṃ pacchindamānāti uparūpari vītikkamasotaṃ pacchindamānā. Atha vā rundhantīti anāpattilesaṃ rundhantī. Dvāraṃ pidahantīti anāpattilesassa dvāraṃ pidahantī. Sotaṃ pacchindamānāti anāpattisotaṃ pacchindamānā, āpattimeva kurumānāti vuttaṃ hoti. Nanu ca lokavajje kāci anupaññatti uppajjamānā sithilaṃ karontī uppajjati, tasmā ‘‘lokavajje anupaññatti uppajjamānā…pe… gāḷhataraṃ karontī uppajjatī’’ti idaṃ kasmā vuttanti āha ‘‘aññatra adhimānā aññatra supinantā’’tiādi. ‘‘Aññatra adhimānā’’ti imissā anupaññattiyā ‘‘vītikkamābhāvā’’ti kāraṇaṃ vuttaṃ, ‘‘aññatra supinantā’’ti imissā ‘‘abbohārikattā’’ti kāraṇaṃ vuttaṃ. Tattha vītikkamābhāvāti pāpiccho icchāpakatotiādivītikkamābhāvā. Uttarimanussadhamme hi ‘‘pāpiccho icchāpakato uttarimanussadhammaṃ ullapatī’’ti (mahāva. 129) vacanato visaṃvādanādhippāyena musā bhaṇanto pārājiko hoti. Ayaṃ pana adhimānena adhigatasaññī hutvā ullapati, na sikkhāpadaṃ vītikkamitukāmo, tasmā ‘‘aññatra adhimānā’’ti ayaṃ anupaññatti uppajjamānā vītikkamābhāvā anāpattikarā jātā. Abbohārikattāti supinante vijjamānāyapi cetanāya vītikkamicchāya ca abbohārikattā. Kiñcāpi hi supinante mocanassādacetanā saṃvijjati, kadāci upakkamanampi hoti, tathāpi thinamiddhena abhibhūtattā taṃ cittaṃ abbohārikaṃ, cittassa abbohārikattā upakkamakiriyāsaṃvattanikāpi cetanā abbohārikā. Teneva ‘‘atthesā bhikkhave cetanā, sā ca kho abbohārikā’’ti (pārā. 235) bhagavatā vuttā, tasmā ‘‘aññatra supinantā’’ti ayaṃ anupaññatti abbohārikattā anāpattikarā jātā.
அகதே வீதிக்கமேதி ‘‘குக்குச்சாயந்தா ந பு⁴ஞ்ஜிங்ஸூ’’திஆதீ³ஸு விய வீதிக்கமே அகதே. ஸிதி²லங் கரொந்தீதி பட²மங் ஸாமஞ்ஞதோ ப³த்³த⁴ஸிக்கா²பத³ங் மோசெத்வா அத்தனோ அத்தனோ விஸயே அனாபத்திகரணவஸேன ஸிதி²லங் கரொந்தீ. த்³வாரங் த³த³மானாதி அனாபத்தியா த்³வாரங் த³த³மானா. தேனேவாஹ ‘‘அபராபரம்பி அனாபத்திங் குருமானா’’தி. நனு ச ஸஞ்சரித்தஸிக்கா²பதே³ ‘‘அந்தமஸோ தங்க²ணிகாயபீ’’தி அனுபஞ்ஞத்தி உப்பஜ்ஜமானா ஆபத்திமேவ கரொந்தீ உப்பன்னா, அத² கஸ்மா ‘‘அனாபத்திங் குருமானா உப்பஜ்ஜதீ’’தி வுத்தந்தி ஆஹ ‘‘அந்தமஸோ தங்க²ணிகாயபீ’’திஆதி³. உதா³யினா பி⁴க்கு²னா தங்க²ணிகாய ஸஞ்சரித்தங் ஆபன்னவத்து²ஸ்மிங் பஞ்ஞத்தத்தா ‘‘கதே வீதிக்கமே’’தி வுத்தங். பஞ்ஞத்திக³திகாவ ஹோதீதி மூலபஞ்ஞத்தியங்யேவ அந்தோக³தா⁴ ஹோதி.
Akate vītikkameti ‘‘kukkuccāyantā na bhuñjiṃsū’’tiādīsu viya vītikkame akate. Sithilaṃ karontīti paṭhamaṃ sāmaññato baddhasikkhāpadaṃ mocetvā attano attano visaye anāpattikaraṇavasena sithilaṃ karontī. Dvāraṃ dadamānāti anāpattiyā dvāraṃ dadamānā. Tenevāha ‘‘aparāparampi anāpattiṃ kurumānā’’ti. Nanu ca sañcarittasikkhāpade ‘‘antamaso taṅkhaṇikāyapī’’ti anupaññatti uppajjamānā āpattimeva karontī uppannā, atha kasmā ‘‘anāpattiṃ kurumānā uppajjatī’’ti vuttanti āha ‘‘antamaso taṅkhaṇikāyapī’’tiādi. Udāyinā bhikkhunā taṅkhaṇikāya sañcarittaṃ āpannavatthusmiṃ paññattattā ‘‘kate vītikkame’’ti vuttaṃ. Paññattigatikāva hotīti mūlapaññattiyaṃyeva antogadhā hoti.
மக்கடிவத்து²கதா²வண்ணனா நிட்டி²தா.
Makkaṭivatthukathāvaṇṇanā niṭṭhitā.
ஸந்த²தபா⁴ணவாரோ
Santhatabhāṇavāro
Related texts:
திபிடக (மூல) • Tipiṭaka (Mūla) / வினயபிடக • Vinayapiṭaka / மஹாவிப⁴ங்க³ • Mahāvibhaṅga / 1. பட²மபாராஜிகங் • 1. Paṭhamapārājikaṃ
அட்ட²கதா² • Aṭṭhakathā / வினயபிடக (அட்ட²கதா²) • Vinayapiṭaka (aṭṭhakathā) / மஹாவிப⁴ங்க³-அட்ட²கதா² • Mahāvibhaṅga-aṭṭhakathā / 1. பட²மபாராஜிகங் • 1. Paṭhamapārājikaṃ
டீகா • Tīkā / வினயபிடக (டீகா) • Vinayapiṭaka (ṭīkā) / வஜிரபு³த்³தி⁴-டீகா • Vajirabuddhi-ṭīkā / மக்கடீவத்து²கதா²வண்ணனா • Makkaṭīvatthukathāvaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / விமதிவினோத³னீ-டீகா • Vimativinodanī-ṭīkā / மக்கடீவத்து²கதா²வண்ணனா • Makkaṭīvatthukathāvaṇṇanā
