| Library / Tipiṭaka / திபிடக • Tipiṭaka / விமதிவினோத³னீ-டீகா • Vimativinodanī-ṭīkā |
மக்கடீவத்து²கதா²வண்ணனா
Makkaṭīvatthukathāvaṇṇanā
40. பசுரத்தே² ஹி வத்தமானவசனந்தி ஏகதா³ படிஸேவித்வா பச்சா² அனோரமித்வா தி³வஸே தி³வஸே ஸேவனிச்சா²ய வத்தமானத்தா ஸேவனாய அபா⁴வக்க²ணேபி இஹ மல்லா யுஜ்ஜ²ந்தீதிஆதீ³ஸு விய அப்³பொ³ச்சி²ன்னதங் பா³ஹுல்லவுத்திதஞ்ச உபாதா³ய படிஸேவதீதி வத்தமானவசனங் கதந்தி அத்தோ². ஆஹிண்ட³ந்தாதி விசரந்தா.
40.Pacuratthe hi vattamānavacananti ekadā paṭisevitvā pacchā anoramitvā divase divase sevanicchāya vattamānattā sevanāya abhāvakkhaṇepi iha mallā yujjhantītiādīsu viya abbocchinnataṃ bāhullavuttitañca upādāya paṭisevatīti vattamānavacanaṃ katanti attho. Āhiṇḍantāti vicarantā.
41. ஸஹொட்³ட⁴க்³க³ஹிதோதி ஸப⁴ண்ட³க்³க³ஹிதோ, அயமேவ வா பாடோ². தங் ஸிக்கா²பத³ங் ததே²வ ஹோதீதி மனுஸ்ஸாமனுஸ்ஸாதி³புக்³க³லவிஸேஸங் கிஞ்சி அனுபாதி³யித்வா ஸாமஞ்ஞதோ ‘‘யோ பன பி⁴க்கு² மேது²னங் த⁴ம்மங் படிஸேவெய்யா’’தி (பாரா॰ 39) வுத்தத்தா மனுஸ்ஸாமனுஸ்ஸதிரச்சா²னக³தானங் இத்தி²புரிஸபண்ட³கஉப⁴தொப்³யஞ்ஜனானங் திங்ஸவிதே⁴பி மக்³கே³ மேது²னங் ஸேவந்தஸ்ஸ தங் ஸிக்கா²பத³ங் மூலச்சே²ஜ்ஜகரங் ஹோதி ஏவாதி அதி⁴ப்பாயோ. ஏதேன யங் அனுபஞ்ஞத்திமூலபஞ்ஞத்தியா ஏவ அதி⁴ப்பாயப்பகாஸனவஸேன ஸுபோ³த⁴த்தா²ய வத்து²வஸேன பவத்தானங் விஸேஸத்த²ஜோதகவஸேனாதி த³ஸ்ஸிதங் ஹோதி. ஆமஸனங் ஆமட்ட²மத்தங். ததோ த³ள்ஹதரங் பு²ஸனங். க⁴ட்டனங் பன ததோ த³ள்ஹதரங் கத்வா ஸரீரேன ஸரீரஸ்ஸ ஸங்க⁴ட்டனங். தங் ஸப்³ப³ம்பீதி அனுராகே³ன பவத்திதங் த³ஸ்ஸனாதி³ஸப்³ப³ம்பி.
41.Sahoḍḍhaggahitoti sabhaṇḍaggahito, ayameva vā pāṭho. Taṃ sikkhāpadaṃ tatheva hotīti manussāmanussādipuggalavisesaṃ kiñci anupādiyitvā sāmaññato ‘‘yo pana bhikkhu methunaṃ dhammaṃ paṭiseveyyā’’ti (pārā. 39) vuttattā manussāmanussatiracchānagatānaṃ itthipurisapaṇḍakaubhatobyañjanānaṃ tiṃsavidhepi magge methunaṃ sevantassa taṃ sikkhāpadaṃ mūlacchejjakaraṃ hoti evāti adhippāyo. Etena yaṃ anupaññattimūlapaññattiyā eva adhippāyappakāsanavasena subodhatthāya vatthuvasena pavattānaṃ visesatthajotakavasenāti dassitaṃ hoti. Āmasanaṃ āmaṭṭhamattaṃ. Tato daḷhataraṃ phusanaṃ. Ghaṭṭanaṃ pana tato daḷhataraṃ katvā sarīrena sarīrassa saṅghaṭṭanaṃ. Taṃ sabbampīti anurāgena pavattitaṃ dassanādisabbampi.
42. பாணாதிபாதாதி³ஸசித்தகஸிக்கா²பதா³னங் ஸுராபானாதி³அசித்தகஸிக்கா²பதா³னஞ்ச (பாசி॰ 326 ஆத³யோ) ஏகேனேவ லக்க²ணவசனேன லோகவஜ்ஜதங் த³ஸ்ஸேதுங் ‘‘யஸ்ஸ ஸசித்தகபக்கே² சித்தங் அகுஸலமேவ ஹோதி, தங் லோகவஜ்ஜங் நாமா’’தி வுத்தங். தத்த² ஸசித்தகபக்கே²தி இத³ங் கிஞ்சாபி அசித்தகஸிக்கா²பத³ங் ஸந்தா⁴யேவ வத்துங் யுத்தங் தஸ்ஸேவ ஸசித்தகபக்க²ஸம்ப⁴வதோ, ததா²பி ஸசித்தகஸிக்கா²பதா³னம்பி அஸஞ்சிச்ச சங்கமனாதீ³ஸு லோகே பாணகா⁴தவோஹாரஸம்ப⁴வேன அசித்தகபக்க²ங் பரிகப்பெத்வா உபி⁴ன்னம்பி ஸசித்தகாசித்தகஸிக்கா²பதா³னங் ஸாதா⁴ரணவஸேன ‘‘ஸசித்தகபக்கே²’’தி வுத்தங். இதரதா² ஸசித்தகஸிக்கா²பதா³னங் இமஸ்மிங் வாக்யே லோகவஜ்ஜதாலக்க²ணங் ந வுத்தங் ஸியா. ‘‘ஸசித்தகபக்கே² சித்தங் அகுஸலமேவா’’தி வுத்தே பன ஸசித்தகஸிக்கா²பதா³னங் சித்தங் அகுஸலமேவ, இதரேஸங் ஸசித்தகபக்கே²யேவ அகுஸலனியமோ, ந அசித்தகபக்கே². தத்த² பன யதா²ஸம்ப⁴வங் குஸலங் வா ஸியா, அகுஸலங் வா, அப்³யாகதங் வாதி அயமத்தோ² ஸாமத்தி²யதோ ஸிஜ்ஜ²தீதி வேதி³தப்³ப³ங். ஸசித்தகபக்கே²தி வத்து²வீதிக்கமவிஜானநசித்தேன ஸசித்தகபக்கே²தி க³ஹேதப்³ப³ங், ந பண்ணத்திவிஜானநசித்தேன ததா² ஸதி ஸப்³ப³ஸிக்கா²பதா³னம்பி லோகவஜ்ஜதாபஸங்க³தோ. ‘‘படிக்கி²த்தமித³ங் காதுங் ந வட்டதீ’’தி ஜானந்தஸ்ஸ ஹி பண்ணத்திவஜ்ஜேபி அனாத³ரியவஸேன படிக⁴சித்தமேவ உப்பஜ்ஜதி, தஸ்மா இத³ங் வாக்யங் நிரத்த²கமேவ ஸியா ஸப்³ப³ஸிக்கா²பதா³னிபி லோகவஜ்ஜானீதி எத்தகமத்தஸ்ஸேவ வத்தப்³ப³தாபஸங்க³தோ.
42.Pāṇātipātādisacittakasikkhāpadānaṃ surāpānādiacittakasikkhāpadānañca (pāci. 326 ādayo) ekeneva lakkhaṇavacanena lokavajjataṃ dassetuṃ ‘‘yassa sacittakapakkhe cittaṃ akusalameva hoti, taṃ lokavajjaṃ nāmā’’ti vuttaṃ. Tattha sacittakapakkheti idaṃ kiñcāpi acittakasikkhāpadaṃ sandhāyeva vattuṃ yuttaṃ tasseva sacittakapakkhasambhavato, tathāpi sacittakasikkhāpadānampi asañcicca caṅkamanādīsu loke pāṇaghātavohārasambhavena acittakapakkhaṃ parikappetvā ubhinnampi sacittakācittakasikkhāpadānaṃ sādhāraṇavasena ‘‘sacittakapakkhe’’ti vuttaṃ. Itarathā sacittakasikkhāpadānaṃ imasmiṃ vākye lokavajjatālakkhaṇaṃ na vuttaṃ siyā. ‘‘Sacittakapakkhe cittaṃ akusalamevā’’ti vutte pana sacittakasikkhāpadānaṃ cittaṃ akusalameva, itaresaṃ sacittakapakkheyeva akusalaniyamo, na acittakapakkhe. Tattha pana yathāsambhavaṃ kusalaṃ vā siyā, akusalaṃ vā, abyākataṃ vāti ayamattho sāmatthiyato sijjhatīti veditabbaṃ. Sacittakapakkheti vatthuvītikkamavijānanacittena sacittakapakkheti gahetabbaṃ, na paṇṇattivijānanacittena tathā sati sabbasikkhāpadānampi lokavajjatāpasaṅgato. ‘‘Paṭikkhittamidaṃ kātuṃ na vaṭṭatī’’ti jānantassa hi paṇṇattivajjepi anādariyavasena paṭighacittameva uppajjati, tasmā idaṃ vākyaṃ niratthakameva siyā sabbasikkhāpadānipi lokavajjānīti ettakamattasseva vattabbatāpasaṅgato.
எத்த² ச ஸசித்தகபக்கே²யேவ சித்தங் அகுஸலந்தி நியமஸ்ஸ அகதத்தா ஸுராபானாதீ³ஸு அசித்தகபக்கே² சித்தங் அகுஸலங் ந ஹோதேவாதி ந ஸக்கா நியமேதுங், கேவலங் பன ஸசித்தகபக்கே² சித்தங் அகுஸலமேவ, ந குஸலாதீ³தி ஏவமெத்த² நியமோ ஸிஜ்ஜ²தி, ஏவஞ்ச ஸுராதி அஜானித்வா பிவந்தானம்பி அகுஸலசித்தேனேவ பானங் க³ந்த⁴வண்ணகாதி³பா⁴வங் அஜானித்வா லிம்பந்தீனங் பி⁴க்கு²னீனங் வினாபி அகுஸலசித்தேன லிம்பனஞ்ச, உப⁴யத்தா²பி ஆபத்திஸம்ப⁴வோ ச ஸமத்தி²தோ ஹோதி. யங் பன ஸாரத்த²தீ³பனியங் (ஸாரத்த²॰ டீ॰ பாராஜிககண்ட³ 2.42) ‘‘ஸசித்தகபக்கே² சித்தங் அகுஸலமேவாதி வசனதோ அசித்தகஸ்ஸ வத்து²அஜானநவஸேன அசித்தகபக்கே² சித்தங் அகுஸலமேவாதி அயங் நியமோ நத்தீ²தி விஞ்ஞாயதீ’’தி வுத்தங், தங் ந யுத்தங் . அசித்தகேஸு ஹி தேரஸஸு லோகவஜ்ஜேஸு ஸுராபானஸ்ஸேவ அசித்தகபக்கே²பி அகுஸலசித்தனியமோ, ந இதரேஸங் த்³வாத³ஸன்னங் அகுஸலாதி³சித்தேனாபி ஆபஜ்ஜிதப்³ப³தோ. யங் பன ஏவங் கேனசி அனிச்ச²மானங் ஸத்³த³தோபி அபதீயமானமிமங் நியமங் பராதி⁴ப்பாயங் கத்வா த³ஸ்ஸேதுங் ‘‘யதி³ ஹி அசித்தகஸ்ஸ அசித்தகபக்கே²பி சித்தங் அகுஸலமேவ ஸியா, ஸசித்தகபக்கே²தி இத³ங் விஸேஸனங் நிரத்த²கங் ஸியா’’திஆதி³ வுத்தங், தங் நிரத்த²கமேவ ஏவங் நியமஸ்ஸ கேனசி அனதி⁴ப்பேதத்தா. ந ஹி கோசி ஸத்³த³ஸத்த²விதூ³ நியமங் இச்ச²தி, யேன ஸசித்தகபக்கே²தி இத³ங் விஸேஸனங் நிரத்த²கங் ஸியாதிஆதி³ வுத்தங் ப⁴வெய்ய, கிந்து ஸசித்தகபக்கே² சித்தங் அகுஸலமேவ, அசித்தகபக்கே² பன சித்தங் அனியதங் அகுஸலமேவ வா ஸியா, குஸலாதீ³ஸு வா அஞ்ஞதரந்தி ஏவமேவ இச்ச²தி. தேன ஸசித்தகபக்கே²தி விஸேஸனம்பி ஸாத்த²கங் ஸியா. அசித்தகஸிக்கா²பதா³னங் ஸசித்தகபக்கே²ஸு அகுஸலனியமேன லோகவஜ்ஜதா ச ஸிஜ்ஜ²தி. தேஸு ச ஸுராபானஸ்ஸேவ அசித்தகபக்கே²பி லோகவஜ்ஜதா அகுஸலசித்ததா ச, இதரேஸங் பன ஸசித்தகபக்கே² ஏவாதி வாதோ³பி ந விருஜ்ஜ²தீதி ந கிஞ்செத்த² அனுபபன்னங் நாம.
Ettha ca sacittakapakkheyeva cittaṃ akusalanti niyamassa akatattā surāpānādīsu acittakapakkhe cittaṃ akusalaṃ na hotevāti na sakkā niyametuṃ, kevalaṃ pana sacittakapakkhe cittaṃ akusalameva, na kusalādīti evamettha niyamo sijjhati, evañca surāti ajānitvā pivantānampi akusalacitteneva pānaṃ gandhavaṇṇakādibhāvaṃ ajānitvā limpantīnaṃ bhikkhunīnaṃ vināpi akusalacittena limpanañca, ubhayatthāpi āpattisambhavo ca samatthito hoti. Yaṃ pana sāratthadīpaniyaṃ (sārattha. ṭī. pārājikakaṇḍa 2.42) ‘‘sacittakapakkhe cittaṃ akusalamevāti vacanato acittakassa vatthuajānanavasena acittakapakkhe cittaṃ akusalamevāti ayaṃ niyamo natthīti viññāyatī’’ti vuttaṃ, taṃ na yuttaṃ . Acittakesu hi terasasu lokavajjesu surāpānasseva acittakapakkhepi akusalacittaniyamo, na itaresaṃ dvādasannaṃ akusalādicittenāpi āpajjitabbato. Yaṃ pana evaṃ kenaci anicchamānaṃ saddatopi apatīyamānamimaṃ niyamaṃ parādhippāyaṃ katvā dassetuṃ ‘‘yadi hi acittakassa acittakapakkhepi cittaṃ akusalameva siyā, sacittakapakkheti idaṃ visesanaṃ niratthakaṃ siyā’’tiādi vuttaṃ, taṃ niratthakameva evaṃ niyamassa kenaci anadhippetattā. Na hi koci saddasatthavidū niyamaṃ icchati, yena sacittakapakkheti idaṃ visesanaṃ niratthakaṃ siyātiādi vuttaṃ bhaveyya, kintu sacittakapakkhe cittaṃ akusalameva, acittakapakkhe pana cittaṃ aniyataṃ akusalameva vā siyā, kusalādīsu vā aññataranti evameva icchati. Tena sacittakapakkheti visesanampi sātthakaṃ siyā. Acittakasikkhāpadānaṃ sacittakapakkhesu akusalaniyamena lokavajjatā ca sijjhati. Tesu ca surāpānasseva acittakapakkhepi lokavajjatā akusalacittatā ca, itaresaṃ pana sacittakapakkhe evāti vādopi na virujjhatīti na kiñcettha anupapannaṃ nāma.
யங் பனெத்த² ‘‘ஸுராதி அஜானித்வா பிவந்தஸ்ஸ…பே॰… வினாபி அகுஸலசித்தேன ஆபத்திஸம்ப⁴வதோ…பே॰… ஸுராபானாதி³அசித்தகஸிக்கா²பதா³னங் லோகவஜ்ஜதா ந ஸியா’’திஆதி³ வுத்தங். யஞ்ச தமத்த²ங் ஸாதே⁴துங் க³ண்டி²பதே³ஸு ஆக³தவசனங் த³ஸ்ஸெத்வா ப³ஹுங் பபஞ்சிதங், தங் ந ஸாரதோ பச்சேதப்³ப³ங் அட்ட²கதா²ஹி விருத்³த⁴த்தா. ததா² ஹி ‘‘வத்து²அஜானநதாய செத்த² அசித்தகதா வேதி³தப்³பா³ அகுஸலேனேவ பாதப்³ப³தாய லோகவஜ்ஜதா’’தி வுத்தங். யஞ்சேதஸ்ஸ ‘‘ஸசித்தகபக்கே² அகுஸலேனேவ பாதப்³ப³தோ லோகவஜ்ஜதா’’தி வுத்தங் அட்ட²கதா²வசனங், தங் ந ஸுந்த³ரங். ‘‘ஸசித்தகபக்கே² சித்தங் அகுஸலமேவா’’தி ஸப்³பே³ஸங் லோகவஜ்ஜானங் இதே⁴வ பாராஜிகட்ட²கதா²ய ஸாமஞ்ஞதோ வத்வா ஸுராபானஸிக்கா²பத³ட்ட²கதா²யங் ‘‘அகுஸலேனேவ பாதப்³ப³தாயா’’தி ஏவங் அசித்தகபக்கே²பி அகுஸலசித்ததாய விஸேஸெத்வா வுத்தத்தா. ந ஹி ‘‘ஸாமஞ்ஞதோ இத⁴ வுத்தோவ அத்தோ² புன ஸுராபானட்ட²கதா²யம்பி வுத்தோ’’தி ஸக்கா வத்துங் வுத்தஸ்ஸேவ புன வசனே பயோஜனாபா⁴வா, தத³ஞ்ஞேஸுபி அசித்தகலோகவஜ்ஜேஸு வத்தப்³ப³தாபஸங்க³தோ ச, நாபி ஏகத்த² வுத்தோ நயோ தத³ஞ்ஞேஸுபி ஏகலக்க²ணதாய வுத்தோ ஏவ ஹோதீதி ‘‘ஸுராபானஸிக்கா²பதே³யேவ (பாசி॰ 326 ஆத³யோ) வுத்தோ’’தி ஸக்கா வத்துங் அசித்தகலோகவஜ்ஜானங் ஸப்³ப³பட²மே உய்யுத்தஸிக்கா²பதே³யேவ (பாசி॰ 311 ஆத³யோ) வத்தப்³ப³தோ, ஸுராபானஸிக்கா²பதே³யேவ வா வத்வா ஏஸேவ நயோ ஸேஸேஸு அசித்தகலோகவஜ்ஜேஸுபீதி அதிதி³ஸிதப்³ப³தோ ச.
Yaṃ panettha ‘‘surāti ajānitvā pivantassa…pe… vināpi akusalacittena āpattisambhavato…pe… surāpānādiacittakasikkhāpadānaṃ lokavajjatā na siyā’’tiādi vuttaṃ. Yañca tamatthaṃ sādhetuṃ gaṇṭhipadesu āgatavacanaṃ dassetvā bahuṃ papañcitaṃ, taṃ na sārato paccetabbaṃ aṭṭhakathāhi viruddhattā. Tathā hi ‘‘vatthuajānanatāya cettha acittakatā veditabbā akusaleneva pātabbatāya lokavajjatā’’ti vuttaṃ. Yañcetassa ‘‘sacittakapakkhe akusaleneva pātabbato lokavajjatā’’ti vuttaṃ aṭṭhakathāvacanaṃ, taṃ na sundaraṃ. ‘‘Sacittakapakkhe cittaṃ akusalamevā’’ti sabbesaṃ lokavajjānaṃ idheva pārājikaṭṭhakathāya sāmaññato vatvā surāpānasikkhāpadaṭṭhakathāyaṃ ‘‘akusaleneva pātabbatāyā’’ti evaṃ acittakapakkhepi akusalacittatāya visesetvā vuttattā. Na hi ‘‘sāmaññato idha vuttova attho puna surāpānaṭṭhakathāyampi vutto’’ti sakkā vattuṃ vuttasseva puna vacane payojanābhāvā, tadaññesupi acittakalokavajjesu vattabbatāpasaṅgato ca, nāpi ekattha vutto nayo tadaññesupi ekalakkhaṇatāya vutto eva hotīti ‘‘surāpānasikkhāpadeyeva (pāci. 326 ādayo) vutto’’ti sakkā vattuṃ acittakalokavajjānaṃ sabbapaṭhame uyyuttasikkhāpadeyeva (pāci. 311 ādayo) vattabbato, surāpānasikkhāpadeyeva vā vatvā eseva nayo sesesu acittakalokavajjesupīti atidisitabbato ca.
அபிச வுத்தமேவத்த²ங் வத³ந்தேன ‘‘ஸசித்தகபக்கே² அகுஸலேனேவ பாதப்³ப³தாயா’’தி புப்³பே³ வுத்தக்கமேனேவ வத்தப்³ப³ங் ஸந்தே³ஹாதி³விக³மத்த²த்தா புன வசனஸ்ஸ. ஸிக்கா²பத³விஸயே ச விஸேஸிதப்³ப³ங் விஸேஸெத்வாவ வுச்சதி, இதரதா² ஆபத்தானாபத்தாதி³பே⁴த³ஸ்ஸ து³விஞ்ஞெய்யத்தா. ததா² ஹி பி⁴க்கு²னீவிப⁴ங்க³ட்ட²கதா²யங் ‘‘வினாபி சித்தேன ஆபஜ்ஜிதப்³ப³த்தா அசித்தகானி, சித்தே பன ஸதி அகுஸலேனேவ ஆபஜ்ஜிதப்³ப³த்தா லோகவஜ்ஜானி சேவ அகுஸலசித்தானி சா’’தி கி³ரக்³க³ஸமஜ்ஜாதீ³னங் ஸசித்தகபக்கே² ஏவ லோகவஜ்ஜதா அகுஸலசித்ததா ச விஸேஸெத்வா வுத்தா, ந ஏவங் ஸுராபானஸ்ஸ. தஸ்ஸ பன பக்க²த்³வயஸ்ஸாபி ஸாதா⁴ரணவஸேன ‘‘அகுஸலேனேவ பாதப்³ப³தாயா’’தி வுத்தங், ந பன ‘‘ஸசித்தகபக்கே²’’தி விஸேஸெத்வா. தஸ்மா இத³ங் ஸுராபானங் ஸசித்தகாசித்தகபக்க²த்³வயேபி லோகவஜ்ஜங் அகுஸலசித்தஞ்சாதி த³ஸ்ஸேதுமேவ ‘‘அகுஸலேனேவ பாதப்³ப³தாய லோகவஜ்ஜதா’’தி விஸுங் வுத்தந்தி ஸுட்டு² ஸிஜ்ஜ²தி. ஏதேனேவ யங் ஸாரத்த²தீ³பனியங் ‘‘ஸசித்தகபக்கே² அகுஸலேனேவ பாதப்³ப³தாய லோகவஜ்ஜதா’’தி வுத்தஸ்ஸ இமஸ்ஸேவ அதி⁴ப்பாயஸ்ஸ படிபாத³கமேதந்தி ஸஞ்ஞாய இமினா ஏவ ஹி அதி⁴ப்பாயேன அஞ்ஞேஸுபி லோகவஜ்ஜேஸு அசித்தகஸிக்கா²பதே³ஸு அகுஸலசித்ததா ஏவ வுத்தா, ந பன திசித்ததா. தேனேவ பி⁴க்கு²னீவிப⁴ங்க³ட்ட²கதா²யங் வுத்தங் ‘‘கி³ரக்³க³ஸமஜ்ஜங் சித்தாகா³ரஸிக்கா²பத³ங் ஸங்கா⁴ணி இத்தா²லங்காரோ க³ந்த⁴வண்ணகோ வாஸிதகபிஞ்ஞாகோ பி⁴க்கு²னீஆதீ³ஹி உம்மத்³த³னபரிமத்³த³னானீதி இமானி த³ஸ ஸிக்கா²பதா³னி அசித்தகானி அகுஸலசித்தானி, அயங் பனெத்த² அதி⁴ப்பாயோ வினாபி சித்தேன ஆபஜ்ஜிதப்³ப³த்தா அசித்தகானி, சித்தே பன ஸதி அகுஸலேனேவ ஆபஜ்ஜிதப்³ப³த்தா லோகவஜ்ஜானி சேவ அகுஸலசித்தானி சா’’தி வுத்தங், தம்பி படிஸித்³த⁴ங் ஹோதி தப்³பி³பரீதஸ்ஸேவ அத்த²ஸ்ஸ யதா²வுத்தனயேன ஸாத⁴னதோ. தஸ்மா ஸுராபானஸ்ஸ அசித்தகபக்கே²பி சித்தங் அகுஸலமேவாதி இமங் விஸேஸங் த³ஸ்ஸேதுமேவ இத³ங் வசனங் வுத்தந்தி க³ஹேதப்³ப³ங். அயஞ்ஹெத்த² அத்தோ² வத்து²அஜானநதாய செத்தா²தி எத்த² ச-காரோ விஸேஸத்த²ஜோதகோ அபிசாதி இமினா ஸமானத்தோ². தஸ்மா யதி³த³ங் அஞ்ஞேஸு அசித்தகலோகவஜ்ஜேஸு வினாபி சித்தேன ஆபஜ்ஜிதப்³ப³த்தா அசித்தகானி, சித்தே பன ஸதி அகுஸலேனேவ ஆபஜ்ஜிதப்³ப³த்தா லோகவஜ்ஜானி சேவ அகுஸலசித்தானி சாதி லோகவஜ்ஜதாய அகுஸலசித்ததாய ச லக்க²ணங் வுச்சதி, தங் எத்த² ஸுராபானஸிக்கா²பதே³ நாக³ச்ச²தி, இத⁴ பன விஸேஸோ அத்தீ²தி வுத்தங் ஹோதி. ஸோ கதரோதி சே? வத்து²அஜானநதாய ஏவ வத்து²ஜானநசித்தேன வினாபி ஆபஜ்ஜிதப்³ப³தாய ஏவ அசித்தகதா வேதி³தப்³பா³, நத்தெ²த்த² அசித்தகதாய விஸேஸோ. கிந்து வத்து²அஜானநஸங்கா²தஅசித்தகபக்கே²பி அகுஸலசித்தேனேவ ஸுராமேரயஸ்ஸ அஜ்ஜோ²ஹரிதப்³ப³தாயாதி இமஸ்ஸ ஸிக்கா²பத³ஸ்ஸ ஸசித்தகபக்கே²பி அசித்தகபக்கே²பி லோகவஜ்ஜதா அகுஸலசித்ததா ச வேதி³தப்³பா³தி அயமெத்த² விஸேஸோ. இத⁴ ஹி ‘‘சித்தே பன ஸதீ’’தி அவிஸேஸெத்வா ‘‘அகுஸலேனேவா’’தி ஸாமஞ்ஞதோ வுத்தத்தா உப⁴யபக்கே²பி லோகவஜ்ஜதா அகுஸலசித்ததா ச ஸித்³தா⁴தி வேதி³தப்³பா³. தேனேவ பரமத்த²ஜோதிகாய (கு²॰ பா॰ அட்ட²॰ 2.பச்சி²மபஞ்சஸிக்கா²பத³வண்ணனா) கு²த்³த³கட்ட²கதா²ய ஸிக்கா²பத³வண்ணனாய ‘‘ஸுராமேரயமஜ்ஜபமாத³ட்டா²னங் காயதோ ச காயசித்ததோ சாதி த்³விஸமுட்டா²ன’’ந்தி வுத்தங். ஸுராதி ஜானநசித்தாபா⁴வேனேவ ஹெத்த² சித்தங்க³விரஹிதோ கேவலோபி காயோ ஏகஸமுட்டா²னங் வுத்தோ, தஸ்மிஞ்ச ஏகஸமுட்டா²னக்க²ணேபி யாய சேதனாய பிவதி, ஸா ஏகந்தஅகுஸலா ஏவ ஹோதி. தேனேவ தத்தே²வ அட்ட²கதா²யங் ‘‘பட²மா செத்த² பஞ்ச ஏகந்தஅகுஸலசித்தஸமுட்டா²னத்தா பாணாதிபாதாதீ³னங் பகதிவஜ்ஜதோ வேரமணியோ, ஸேஸா பண்ணத்திவஜ்ஜதோ’’தி ஏவங் பஞ்சன்னம்பி ஸாமஞ்ஞதோ அகுஸலசித்ததா லோகவஜ்ஜதாஸங்கா²தா பகதிவஜ்ஜதா ச வுத்தா. அங்கே³ஸு ச ஜானநங்க³ங் ந வுத்தங். ததா² ஹி ‘‘ஸுராமேரயமஜ்ஜபமாத³ட்டா²னஸ்ஸ பன ஸுராதீ³னங் அஞ்ஞதரங் ஹோதி மத³னீயங், பாதுகாமதாசித்தஞ்ச பச்சுபட்டி²தங் ஹோதி, தஜ்ஜஞ்ச வாயாமங் ஆபஜ்ஜதி, பீதே ச பவிஸதீதி இமானி சத்தாரி அங்கா³னீ’’தி வுத்தங், ந பன ஸுராதி ஜானநங்கே³ன ஸத்³தி⁴ங் பஞ்சாதி. யதி³ ஹி ஸுராதி ஜானநம்பி அங்க³ங் ஸியா, அவஸ்ஸமேவ தங் வத்தப்³ப³ங் ஸியா, ந ச வுத்தங். யதா² செத்த², ஏவங் அஞ்ஞாஸுபி ஸுத்தபிடகாதி³அட்ட²கதா²ஸு கத்த²சி ஜானநங்க³ங் ந வுத்தங். தஸ்மா ‘‘அகுஸலேனேவ பாதப்³ப³தாய லோகவஜ்ஜதா’’தி இமஸ்ஸ அட்ட²கதா²பாட²ஸ்ஸ அசித்தகபக்கே²பி ‘‘அகுஸலேனேவ பாதப்³ப³தாய லோகவஜ்ஜதா’’தி ஏவமேவ அத்தோ²தி நிட்ட²மெத்த² க³ந்தப்³ப³ங்.
Apica vuttamevatthaṃ vadantena ‘‘sacittakapakkhe akusaleneva pātabbatāyā’’ti pubbe vuttakkameneva vattabbaṃ sandehādivigamatthattā puna vacanassa. Sikkhāpadavisaye ca visesitabbaṃ visesetvāva vuccati, itarathā āpattānāpattādibhedassa duviññeyyattā. Tathā hi bhikkhunīvibhaṅgaṭṭhakathāyaṃ ‘‘vināpi cittena āpajjitabbattā acittakāni, citte pana sati akusaleneva āpajjitabbattā lokavajjāni ceva akusalacittāni cā’’ti giraggasamajjādīnaṃ sacittakapakkhe eva lokavajjatā akusalacittatā ca visesetvā vuttā, na evaṃ surāpānassa. Tassa pana pakkhadvayassāpi sādhāraṇavasena ‘‘akusaleneva pātabbatāyā’’ti vuttaṃ, na pana ‘‘sacittakapakkhe’’ti visesetvā. Tasmā idaṃ surāpānaṃ sacittakācittakapakkhadvayepi lokavajjaṃ akusalacittañcāti dassetumeva ‘‘akusaleneva pātabbatāya lokavajjatā’’ti visuṃ vuttanti suṭṭhu sijjhati. Eteneva yaṃ sāratthadīpaniyaṃ ‘‘sacittakapakkhe akusaleneva pātabbatāya lokavajjatā’’ti vuttassa imasseva adhippāyassa paṭipādakametanti saññāya iminā eva hi adhippāyena aññesupi lokavajjesu acittakasikkhāpadesu akusalacittatā eva vuttā, na pana ticittatā. Teneva bhikkhunīvibhaṅgaṭṭhakathāyaṃ vuttaṃ ‘‘giraggasamajjaṃ cittāgārasikkhāpadaṃ saṅghāṇi itthālaṅkāro gandhavaṇṇako vāsitakapiññāko bhikkhunīādīhi ummaddanaparimaddanānīti imāni dasa sikkhāpadāni acittakāni akusalacittāni, ayaṃ panettha adhippāyo vināpi cittena āpajjitabbattā acittakāni, citte pana sati akusaleneva āpajjitabbattā lokavajjāni ceva akusalacittāni cā’’ti vuttaṃ, tampi paṭisiddhaṃ hoti tabbiparītasseva atthassa yathāvuttanayena sādhanato. Tasmā surāpānassa acittakapakkhepi cittaṃ akusalamevāti imaṃ visesaṃ dassetumeva idaṃ vacanaṃ vuttanti gahetabbaṃ. Ayañhettha attho vatthuajānanatāya cetthāti ettha ca-kāro visesatthajotako apicāti iminā samānattho. Tasmā yadidaṃ aññesu acittakalokavajjesu vināpi cittena āpajjitabbattā acittakāni, citte pana sati akusaleneva āpajjitabbattā lokavajjāni ceva akusalacittāni cāti lokavajjatāya akusalacittatāya ca lakkhaṇaṃ vuccati, taṃ ettha surāpānasikkhāpade nāgacchati, idha pana viseso atthīti vuttaṃ hoti. So kataroti ce? Vatthuajānanatāya eva vatthujānanacittena vināpi āpajjitabbatāya eva acittakatā veditabbā, natthettha acittakatāya viseso. Kintu vatthuajānanasaṅkhātaacittakapakkhepi akusalacitteneva surāmerayassa ajjhoharitabbatāyāti imassa sikkhāpadassa sacittakapakkhepi acittakapakkhepi lokavajjatā akusalacittatā ca veditabbāti ayamettha viseso. Idha hi ‘‘citte pana satī’’ti avisesetvā ‘‘akusalenevā’’ti sāmaññato vuttattā ubhayapakkhepi lokavajjatā akusalacittatā ca siddhāti veditabbā. Teneva paramatthajotikāya (khu. pā. aṭṭha. 2.pacchimapañcasikkhāpadavaṇṇanā) khuddakaṭṭhakathāya sikkhāpadavaṇṇanāya ‘‘surāmerayamajjapamādaṭṭhānaṃ kāyato ca kāyacittato cāti dvisamuṭṭhāna’’nti vuttaṃ. Surāti jānanacittābhāveneva hettha cittaṅgavirahito kevalopi kāyo ekasamuṭṭhānaṃ vutto, tasmiñca ekasamuṭṭhānakkhaṇepi yāya cetanāya pivati, sā ekantaakusalā eva hoti. Teneva tattheva aṭṭhakathāyaṃ ‘‘paṭhamā cettha pañca ekantaakusalacittasamuṭṭhānattā pāṇātipātādīnaṃ pakativajjato veramaṇiyo, sesā paṇṇattivajjato’’ti evaṃ pañcannampi sāmaññato akusalacittatā lokavajjatāsaṅkhātā pakativajjatā ca vuttā. Aṅgesu ca jānanaṅgaṃ na vuttaṃ. Tathā hi ‘‘surāmerayamajjapamādaṭṭhānassa pana surādīnaṃ aññataraṃ hoti madanīyaṃ, pātukāmatācittañca paccupaṭṭhitaṃ hoti, tajjañca vāyāmaṃ āpajjati, pīte ca pavisatīti imāni cattāri aṅgānī’’ti vuttaṃ, na pana surāti jānanaṅgena saddhiṃ pañcāti. Yadi hi surāti jānanampi aṅgaṃ siyā, avassameva taṃ vattabbaṃ siyā, na ca vuttaṃ. Yathā cettha, evaṃ aññāsupi suttapiṭakādiaṭṭhakathāsu katthaci jānanaṅgaṃ na vuttaṃ. Tasmā ‘‘akusaleneva pātabbatāya lokavajjatā’’ti imassa aṭṭhakathāpāṭhassa acittakapakkhepi ‘‘akusaleneva pātabbatāya lokavajjatā’’ti evameva atthoti niṭṭhamettha gantabbaṃ.
அபிச யங் க³ண்டி²பதே³ஸு ‘‘ஏதங் ஸத்தங் மாரெஸ்ஸாமீதி தஸ்மிங்யேவ பதே³ஸே நிபன்னங் அஞ்ஞங் மாரெந்தஸ்ஸ பாணஸாமஞ்ஞஸ்ஸ அத்தி²தாய யதா² பாணாதிபாதோ ஹோதி, ஏவங் ஏதங் மஜ்ஜங் பிவிஸ்ஸாமீதி அஞ்ஞங் மஜ்ஜங் பிவந்தஸ்ஸ மஜ்ஜஸாமஞ்ஞஸ்ஸ அத்தி²தாய அகுஸலமேவ ஹோதி, யதா² பன கட்ட²ஸஞ்ஞாய ஸப்பங் கா⁴தெந்தஸ்ஸ பாணாதிபாதோ ந ஹோதி, ஏவங் நாளிகேரபானஸஞ்ஞாய மஜ்ஜங் பிவந்தஸ்ஸ அகுஸலங் ந ஹோதீ’’தி பாணாதிபாதேன ஸத்³தி⁴ங் ஸப்³ப³தா² ஸமானத்தேன உபமெத்வா வுத்தங், தங் அதிவிய அயுத்தங் ஸப்³பே³ஸங் ஸிக்கா²பதா³னங் பாணாதிபாதாதி³அகுஸலானஞ்ச அஞ்ஞமஞ்ஞங் ஸமானதாய நியமாபா⁴வா. பாணாதிபாதோ ஹி பரியாயேனாபி ஸிஜ்ஜ²தி, ந ததா² அதி³ன்னாதா³னங். தங் பன ஆணத்தியாபி ஸிஜ்ஜ²தி, ந ச மேது²னாதீ³ஸு. தஸ்மா பயோக³ங்கா³தீ³ஹிபி பி⁴ன்னானமேவ ஸங்ஸட்ட²ங் ஸப்³ப³தா² ஸமீகரணங் அயுத்தமேவ. ‘‘பாணாதிபாதோ விய அதி³ன்னாதா³னமேது²னாதீ³னிபி பரியாயகதா²தீ³ஹி ஸிஜ்ஜ²ந்தீ’’தி கேனசி வுத்தே தங் கிந்தி ந க³ய்ஹதி ததா² வசனாபா⁴வாதி சே? இதா⁴பி ‘‘ததா² பாணாதிபாதஸதி³ஸங் ஸுராபான’’ந்தி வசனாபா⁴வா இத³ம்பி ந க³ஹேதப்³ப³மேவ. கிஞ்சி அட்ட²கதா²வசனேனேவ ஸித்³த⁴மேவத்த²ங் படிபா³ஹந்தேன வினயஞ்ஞுனா ஸுத்தஸுத்தானுலோமாதீ³ஹி தஸ்ஸ விரோத⁴ங் த³ஸ்ஸெத்வா படிபா³ஹேதப்³ப³ங், ந பன பயோக³ங்கா³தீ³ஹி அச்சந்தவிபி⁴ன்னேன ஸிக்கா²பத³ந்தரேன ஸஹ ஸமீகரணமத்தேன. ந ஹி ‘‘ஸுராதி அஜானித்வா பிவந்தஸ்ஸாபி அகுஸலமேவா’’தி எத்த² ஸுத்தாதி³விரோதோ⁴ அத்தி², வினயபிடகே தாவ ஏதஸ்ஸ அத்த²ஸ்ஸ விருத்³த⁴ங் ஸுத்தாதி³கங் ந தி³ஸ்ஸதி, நாபி ஸுத்தபிடகாதீ³ஸு.
Apica yaṃ gaṇṭhipadesu ‘‘etaṃ sattaṃ māressāmīti tasmiṃyeva padese nipannaṃ aññaṃ mārentassa pāṇasāmaññassa atthitāya yathā pāṇātipāto hoti, evaṃ etaṃ majjaṃ pivissāmīti aññaṃ majjaṃ pivantassa majjasāmaññassa atthitāya akusalameva hoti, yathā pana kaṭṭhasaññāya sappaṃ ghātentassa pāṇātipāto na hoti, evaṃ nāḷikerapānasaññāya majjaṃ pivantassa akusalaṃ na hotī’’ti pāṇātipātena saddhiṃ sabbathā samānattena upametvā vuttaṃ, taṃ ativiya ayuttaṃ sabbesaṃ sikkhāpadānaṃ pāṇātipātādiakusalānañca aññamaññaṃ samānatāya niyamābhāvā. Pāṇātipāto hi pariyāyenāpi sijjhati, na tathā adinnādānaṃ. Taṃ pana āṇattiyāpi sijjhati, na ca methunādīsu. Tasmā payogaṅgādīhipi bhinnānameva saṃsaṭṭhaṃ sabbathā samīkaraṇaṃ ayuttameva. ‘‘Pāṇātipāto viya adinnādānamethunādīnipi pariyāyakathādīhi sijjhantī’’ti kenaci vutte taṃ kinti na gayhati tathā vacanābhāvāti ce? Idhāpi ‘‘tathā pāṇātipātasadisaṃ surāpāna’’nti vacanābhāvā idampi na gahetabbameva. Kiñci aṭṭhakathāvacaneneva siddhamevatthaṃ paṭibāhantena vinayaññunā suttasuttānulomādīhi tassa virodhaṃ dassetvā paṭibāhetabbaṃ, na pana payogaṅgādīhi accantavibhinnena sikkhāpadantarena saha samīkaraṇamattena. Na hi ‘‘surāti ajānitvā pivantassāpi akusalamevā’’ti ettha suttādivirodho atthi, vinayapiṭake tāva etassa atthassa viruddhaṃ suttādikaṃ na dissati, nāpi suttapiṭakādīsu.
யங் பனெத்த² கேசி வத³ந்தி ‘‘மனோபுப்³ப³ங்க³மா த⁴ம்மாதி (த⁴॰ ப॰ 1, 2) வுத்தத்தா ஸப்³பா³னி அகுஸலானி புப்³பே³ வீதிக்கமவத்து²ங் ஜானந்தஸ்ஸேவ ஹொந்தீ’’தி. தங் தேஸங் ஸுத்தாதி⁴ப்பாயானபி⁴ஞ்ஞாதமேவ பகாஸேதி. ந ஹி ‘‘மனோபுப்³ப³ங்க³மா த⁴ம்மா’’தி இத³ங் வசனங் புப்³பே³ வீதிக்கமவத்து²ங் ஜானந்தஸ்ஸேவ அகுஸலா த⁴ம்மா உப்பஜ்ஜந்தீதி இமமத்த²ங் தீ³பேதி, அத² கோ² குஸலாகுஸலா த⁴ம்மா உப்பஜ்ஜமானா உப்பாத³பச்சயட்டே²ன புப்³ப³ங்க³மபூ⁴தங் ஸஹஜாதசித்தங் நிஸ்ஸாயேவ உப்பஜ்ஜந்தி, ந வினா சித்தேனாதி இமமத்த²ங் தீ³பேதி. ந ஹெத்த² ‘‘ஸுராதி அஜானித்வா பிவந்தஸ்ஸ அகுஸலமேவா’’தி வுத்தே ஸஹஜாதசித்தங் வினாபி லோபா⁴தி³அகுஸலசேதஸிகா த⁴ம்மா உப்பஜ்ஜந்தீதி அயமத்தோ² ஆபஜ்ஜதி. யேன தங் நிஸேதா⁴ய இத³ங் ஸுத்தங் ஆஹரணீயங் ஸியா, அபி⁴த⁴ம்மவிரோதோ⁴பெத்த² நத்தி² புப்³பே³ நாமஜாதிஆதி³வஸேன அஜானந்தஸ்ஸேவ பஞ்சவிஞ்ஞாணவீதி²யங் குஸலாகுஸலஜவனுப்பத்திவசனதோ.
Yaṃ panettha keci vadanti ‘‘manopubbaṅgamā dhammāti (dha. pa. 1, 2) vuttattā sabbāni akusalāni pubbe vītikkamavatthuṃ jānantasseva hontī’’ti. Taṃ tesaṃ suttādhippāyānabhiññātameva pakāseti. Na hi ‘‘manopubbaṅgamā dhammā’’ti idaṃ vacanaṃ pubbe vītikkamavatthuṃ jānantasseva akusalā dhammā uppajjantīti imamatthaṃ dīpeti, atha kho kusalākusalā dhammā uppajjamānā uppādapaccayaṭṭhena pubbaṅgamabhūtaṃ sahajātacittaṃ nissāyeva uppajjanti, na vinā cittenāti imamatthaṃ dīpeti. Na hettha ‘‘surāti ajānitvā pivantassa akusalamevā’’ti vutte sahajātacittaṃ vināpi lobhādiakusalacetasikā dhammā uppajjantīti ayamattho āpajjati. Yena taṃ nisedhāya idaṃ suttaṃ āharaṇīyaṃ siyā, abhidhammavirodhopettha natthi pubbe nāmajātiādivasena ajānantasseva pañcaviññāṇavīthiyaṃ kusalākusalajavanuppattivacanato.
அபிச பா³லபுது²ஜ்ஜனானங் ச²ஸு த்³வாரேஸு உப்பஜ்ஜமானானி ஜவனானி யேபு⁴ய்யேன அகுஸலானேவ உப்பஜ்ஜந்தி. குஸலானி பன தேஸங் கல்யாணமித்தாதி³உபனிஸ்ஸயப³லேன அப்பகானேவ உப்பஜ்ஜந்தி, துண்ஹீபூ⁴தானம்பி நித்³தா³யித்வா ஸுபினங் பஸ்ஸந்தானம்பி உத்³த⁴ச்சாதி³அகுஸலஜவனஸ்ஸேவ யேபு⁴ய்யப்பவத்திதோ குஸலாகுஸலவிரஹிதஸ்ஸ ஜவனஸ்ஸ தேஸங் அபா⁴வா. அகுஸலா ஹி விஸயானுகு³ணங் வாஸனானுகு³ணஞ்ச யதா²பச்சயங் ஸமுப்பஜ்ஜந்தி, தத்த² கிங் புப்³பே³ ஜானநாஜானநனிப³த்³தே⁴ன. யே பன ஜானநாதி³அங்க³ஸம்பன்னா பாணாதிபாதாத³யோ, யே ச ஜானநாதி³ங் வினாபி ஸிஜ்ஜ²மானா ஸுராபானமிச்சா²தி³ட்டி²ஆத³யோ, தே தே ததா² ததா² யாதா²வதோ ஞத்வா ஸம்மாஸம்பு³த்³தே⁴ன நித்³தி³ட்டா², தேஸஞ்ச யதா²னித்³தி³ட்ட²வஸேன க³ஹணே கோ நாம அபி⁴த⁴ம்மவிரோதோ⁴. ஏவங் ஸுத்தாதி³விரோதா⁴பா⁴வதோ, அட்ட²கதா²ய ச வுத்தத்தா யதா²வுத்தவஸேனேவெத்த² அத்தோ² க³ஹேதப்³போ³. யதி³ ஏவங் கஸ்மா ‘‘ஸாமணேரோ ஜானித்வா பிவந்தோ ஸீலபே⁴த³ங் ஆபஜ்ஜதி, ந அஜானித்வா’’தி அட்ட²கதா²யங் வுத்தந்தி? நாயங் தோ³ஸோ ஸீலபே⁴த³ஸ்ஸ ப⁴க³வதோ ஆணாயத்தத்தா உக்கி²த்தானுவத்திகாதீ³னங் ஸீலபே⁴தோ³ விய. ந ஹி தாஸங் அகுஸலுப்பத்தியா ஏவ ஸீலபே⁴தோ³ ஹோதி ஸங்கா⁴யத்தஸமனுபா⁴ஸனானந்தரேயேவ விஹிதத்தா. ஏவமிதா⁴பி ஜானித்வா பிவனே ஏவ விஹிதோ, ந அஜானித்வா பிவனே. அஞ்ஞோ ஹி ஸிக்கா²பத³விஸயோ, அஞ்ஞோ அகுஸலவிஸயோ. தேனேவ ஸாமணேரானங் புரிமேஸு பஞ்சஸு ஸிக்கா²பதே³ஸு ஏகஸ்மிங் பி⁴ன்னே ஸப்³பா³னிபி ஸிக்கா²பதா³னி பி⁴ஜ்ஜந்தி. அகுஸலங் பன யங் பி⁴ன்னங், தேன ஏகேனேவ ஹோதி, நாஞ்ஞேஹி. தஸ்மா ஸாமணேரஸ்ஸ அஜானித்வா பிவந்தஸ்ஸ ஸீலபே⁴தா³பா⁴வேபி கம்மபத²ப்பத்தங் அகுஸலமேவாதி க³ஹேதப்³ப³ங்.
Apica bālaputhujjanānaṃ chasu dvāresu uppajjamānāni javanāni yebhuyyena akusalāneva uppajjanti. Kusalāni pana tesaṃ kalyāṇamittādiupanissayabalena appakāneva uppajjanti, tuṇhībhūtānampi niddāyitvā supinaṃ passantānampi uddhaccādiakusalajavanasseva yebhuyyappavattito kusalākusalavirahitassa javanassa tesaṃ abhāvā. Akusalā hi visayānuguṇaṃ vāsanānuguṇañca yathāpaccayaṃ samuppajjanti, tattha kiṃ pubbe jānanājānananibaddhena. Ye pana jānanādiaṅgasampannā pāṇātipātādayo, ye ca jānanādiṃ vināpi sijjhamānā surāpānamicchādiṭṭhiādayo, te te tathā tathā yāthāvato ñatvā sammāsambuddhena niddiṭṭhā, tesañca yathāniddiṭṭhavasena gahaṇe ko nāma abhidhammavirodho. Evaṃ suttādivirodhābhāvato, aṭṭhakathāya ca vuttattā yathāvuttavasenevettha attho gahetabbo. Yadi evaṃ kasmā ‘‘sāmaṇero jānitvā pivanto sīlabhedaṃ āpajjati, na ajānitvā’’ti aṭṭhakathāyaṃ vuttanti? Nāyaṃ doso sīlabhedassa bhagavato āṇāyattattā ukkhittānuvattikādīnaṃ sīlabhedo viya. Na hi tāsaṃ akusaluppattiyā eva sīlabhedo hoti saṅghāyattasamanubhāsanānantareyeva vihitattā. Evamidhāpi jānitvā pivane eva vihito, na ajānitvā pivane. Añño hi sikkhāpadavisayo, añño akusalavisayo. Teneva sāmaṇerānaṃ purimesu pañcasu sikkhāpadesu ekasmiṃ bhinne sabbānipi sikkhāpadāni bhijjanti. Akusalaṃ pana yaṃ bhinnaṃ, tena ekeneva hoti, nāññehi. Tasmā sāmaṇerassa ajānitvā pivantassa sīlabhedābhāvepi kammapathappattaṃ akusalamevāti gahetabbaṃ.
யங் பன ஸாரத்த²தீ³பனியங் (ஸாரத்த²॰ டீ॰ பாராஜிககண்ட³ 2.42) ‘‘ஸாமணேரஸ்ஸ ஸுராதி அஜானித்வா பிவந்தஸ்ஸ பாராஜிகங் நத்தி², அகுஸலங் பன ஹோதீ’’தி கேஹிசி வுத்தவசனங் ‘‘தங் தேஸங் மதிமத்த’’ந்தி படிக்கி²பித்வா ‘‘பி⁴க்கு²னோ அஜானித்வாபி பீ³ஜதோ பட்டா²ய மஜ்ஜங் பிவந்தஸ்ஸ பாசித்தியங். ஸாமணேரோ ஜானித்வா பிவந்தோ ஸீலபே⁴த³ங் ஆபஜ்ஜதி, ந அஜானித்வாதி எத்தகமேவ ஹி அட்ட²கதா²யங் வுத்தங், அகுஸலங் பன ஹோதீதி ந வுத்த’’ந்தி தத்த² காரணங் வுத்தங், தங் அகாரணங். ந ஹி அட்ட²கதா²யங் ஸாமணேரானங் ஜானித்வா பிவனே ஏவ ஸீலபே⁴தோ³, ந அஜானித்வாதி ஸீலபே⁴த³கத²னட்டா²னே அகுஸலங் பன ஹோதீதி அவசனங் அஜானநபக்கே² அகுஸலாபா⁴வஸ்ஸ காரணங் ஹோதி, தத்த² பஸங்கா³பா⁴வா, வத்தப்³ப³ட்டா²னே ஏவ ‘‘அகுஸலேனேவ பாதப்³ப³தாய லோகவஜ்ஜதா’’தி வுத்தத்தா ச. ந ச தே ‘‘அகுஸலங் பன ஹோதீ’’தி வத³ந்தா ஆசரியா இமங் ஸாமணேரானங் ஸீலபே⁴த³ப்பகாஸகங் க²ந்த⁴கட்ட²கதா²பாட²மேவ க³ஹெத்வா அவோசுங், யேன ‘‘எத்தகமேவ அட்ட²கதா²யங் வுத்த’’ந்தி வத்தப்³ப³ங் ஸியா, அத² கோ² ஸுராபானட்ட²கதா²க³தங் ஸுத்தபிடகட்ட²கதா²க³தஞ்ச அனேகவித⁴ங் வசனங், மஹாவிஹாரவாஸீனங் பரம்பரோபதே³ஸஞ்ச க³ஹெத்வா அவோசுங். பி⁴ன்னலத்³தி⁴கானங் அப⁴யகி³ரிகாதீ³னங் மதஞ்ஹேதங், யதி³த³ங் ஜானித்வா பிவந்தஸ்ஸேவ அகுஸலந்தி க³ஹணங். தஸ்மா யங் வுத்தங் கேஹிசி ‘‘ஸாமணேரஸ்ஸ ஸுராதி அஜானித்வா பிவந்தஸ்ஸ பாராஜிகங் நத்தி², அகுஸலங் பன ஹோதீ’’தி, தங் ஸுவுத்தந்தி க³ஹேதப்³ப³ங்.
Yaṃ pana sāratthadīpaniyaṃ (sārattha. ṭī. pārājikakaṇḍa 2.42) ‘‘sāmaṇerassa surāti ajānitvā pivantassa pārājikaṃ natthi, akusalaṃ pana hotī’’ti kehici vuttavacanaṃ ‘‘taṃ tesaṃ matimatta’’nti paṭikkhipitvā ‘‘bhikkhuno ajānitvāpi bījato paṭṭhāya majjaṃ pivantassa pācittiyaṃ. Sāmaṇero jānitvā pivanto sīlabhedaṃ āpajjati, na ajānitvāti ettakameva hi aṭṭhakathāyaṃ vuttaṃ, akusalaṃ pana hotīti na vutta’’nti tattha kāraṇaṃ vuttaṃ, taṃ akāraṇaṃ. Na hi aṭṭhakathāyaṃ sāmaṇerānaṃ jānitvā pivane eva sīlabhedo, na ajānitvāti sīlabhedakathanaṭṭhāne akusalaṃ pana hotīti avacanaṃ ajānanapakkhe akusalābhāvassa kāraṇaṃ hoti, tattha pasaṅgābhāvā, vattabbaṭṭhāne eva ‘‘akusaleneva pātabbatāya lokavajjatā’’ti vuttattā ca. Na ca te ‘‘akusalaṃ pana hotī’’ti vadantā ācariyā imaṃ sāmaṇerānaṃ sīlabhedappakāsakaṃ khandhakaṭṭhakathāpāṭhameva gahetvā avocuṃ, yena ‘‘ettakameva aṭṭhakathāyaṃ vutta’’nti vattabbaṃ siyā, atha kho surāpānaṭṭhakathāgataṃ suttapiṭakaṭṭhakathāgatañca anekavidhaṃ vacanaṃ, mahāvihāravāsīnaṃ paramparopadesañca gahetvā avocuṃ. Bhinnaladdhikānaṃ abhayagirikādīnaṃ matañhetaṃ, yadidaṃ jānitvā pivantasseva akusalanti gahaṇaṃ. Tasmā yaṃ vuttaṃ kehici ‘‘sāmaṇerassa surāti ajānitvā pivantassa pārājikaṃ natthi, akusalaṃ pana hotī’’ti, taṃ suvuttanti gahetabbaṃ.
யஞ்ச ஸாரத்த²தீ³பனியங் (ஸாரத்த²॰ டீ॰ பாராஜிககண்ட³ 2.42) ‘‘அஜானித்வா பிவந்தஸ்ஸாபி ஸோதாபன்னஸ்ஸ முக²ங் ஸுரா ந பவிஸதி கம்மபத²ப்பத்தஅகுஸலசித்தேனேவ பாதப்³ப³தோ’’தி கேஹிசி வுத்தவசனங் ‘‘ந ஸுந்த³ர’’ந்தி படிக்கி²பித்வா ‘‘போ³தி⁴ஸத்தே குச்சி²க³தே போ³தி⁴ஸத்தமாது ஸீலங் விய ஹி இத³ம்பி அரியஸாவகானங் த⁴ம்மதாஸித்³த⁴ந்தி வேதி³தப்³ப³’’ந்தி வத்வா த⁴ம்மதாஸித்³த⁴த்தங்யேவ ஸமத்தே²துங் ‘‘ப⁴வந்தரேபி ஹி அரியஸாவகோ ஜீவிதஹேதுபி நேவ பாணங் ஹனதி, ந ஸுரங் பிவதி. ஸசே பிஸ்ஸ ஸுரஞ்ச கீ²ரஞ்ச மிஸ்ஸெத்வா முகே² பக்கி²பந்தி, கீ²ரமேவ பவிஸதி, ந ஸுரா. யதா² கிங்? யதா² கோஞ்சஸகுணானங் கீ²ரமிஸ்ஸகே உத³கே கீ²ரமேவ பவிஸதி, ந உத³கங். இத³ங் யோனிஸித்³த⁴ந்தி சே, இத³ம்பி த⁴ம்மதாஸித்³த⁴ந்தி வேதி³தப்³ப³’’ந்தி இத³ங் அட்ட²கதா²வசனங் த³ஸ்ஸிதங், தம்பி ந யுத்தமேவ. யதா² ஹி போ³தி⁴ஸத்தமாது ஸீலங் விய அரியஸாவகானங் த⁴ம்மதாஸித்³த⁴ந்தி எத்த² போ³தி⁴ஸத்தமாது த⁴ம்மதா நாம போ³தி⁴ஸத்தஸ்ஸ ச அத்தனோ ச பாரமிதானுபா⁴வேன அகுஸலானுப்பத்தினியமோ ஏவ. ததா² அரியஸாவகானம்பி ப⁴வந்தரே பாணாதிபாதாதீ³னங் த³ஸன்னங் கம்மபதா²னங் அஞ்ஞேஸஞ்ச அபாயஹேதுகானங் அகுஸலானங் அச்சந்தப்பஹாயகஸ்ஸ மக்³க³ஸ்ஸ ஆனுபா⁴வேன தங்தங்ஸீலவீதிக்கமஹேதுகஸ்ஸ அகுஸலஸ்ஸ அனுப்பத்தினியமோ ஏவ த⁴ம்மதா. ந ஹி ஸபா⁴வவாதீ³னங் த⁴ம்மதா விய அஹேதுகதா இத⁴ த⁴ம்மதா நாம. யதா² வா ஏவங்த⁴ம்மதானயே காரணஸ்ஸ பா⁴வே அபா⁴வே ச காரியஸ்ஸ பா⁴வோ அபா⁴வோ ச த⁴ம்மதா, ந அஹேதுஅப்பச்சயாபா⁴வாபா⁴வோ, ஏவமிதா⁴பி பாணாதிபாதாதி³கம்மபதா²னங் ஹேதுபூ⁴தஸ்ஸ கிலேஸஸ்ஸ அச்சந்தாபா⁴வேன தேஸங் அபா⁴வோ, தத³வஸேஸானங் அகுஸலானங் ஹேதுனோ பா⁴வேன பா⁴வோ ச த⁴ம்மதா , ந அஹேதுகதா. தஸ்மா அபாயஹேதுனோ ராக³ஸ்ஸ அபா⁴வேனேவ அரியானங் அஜானித்வாபி ஸுராய அனஜ்ஜோ²ஹரணந்தி ஸுவுத்தமேவித³ங் கேஹிசி ‘‘அஜானித்வா பிவந்தஸ்ஸாபி ஸோதாபன்னஸ்ஸ முக²ங் ஸுரா ந பவிஸதி கம்மபத²ப்பத்தஅகுஸலசித்தேனேவ பாதப்³ப³தோ’’தி, தங் கேன ஹேதுனா ந ஸுந்த³ரங் ஜாதந்தி ந ஞாயதி, த⁴ம்மதாஸித்³த⁴ந்தி வா கத²னேன கத²ங் தங் படிக்கி²த்தந்தி.
Yañca sāratthadīpaniyaṃ (sārattha. ṭī. pārājikakaṇḍa 2.42) ‘‘ajānitvā pivantassāpi sotāpannassa mukhaṃ surā na pavisati kammapathappattaakusalacitteneva pātabbato’’ti kehici vuttavacanaṃ ‘‘na sundara’’nti paṭikkhipitvā ‘‘bodhisatte kucchigate bodhisattamātu sīlaṃ viya hi idampi ariyasāvakānaṃ dhammatāsiddhanti veditabba’’nti vatvā dhammatāsiddhattaṃyeva samatthetuṃ ‘‘bhavantarepi hi ariyasāvako jīvitahetupi neva pāṇaṃ hanati, na suraṃ pivati. Sace pissa surañca khīrañca missetvā mukhe pakkhipanti, khīrameva pavisati, na surā. Yathā kiṃ? Yathā koñcasakuṇānaṃ khīramissake udake khīrameva pavisati, na udakaṃ. Idaṃ yonisiddhanti ce, idampi dhammatāsiddhanti veditabba’’nti idaṃ aṭṭhakathāvacanaṃ dassitaṃ, tampi na yuttameva. Yathā hi bodhisattamātu sīlaṃ viya ariyasāvakānaṃ dhammatāsiddhanti ettha bodhisattamātu dhammatā nāma bodhisattassa ca attano ca pāramitānubhāvena akusalānuppattiniyamo eva. Tathā ariyasāvakānampi bhavantare pāṇātipātādīnaṃ dasannaṃ kammapathānaṃ aññesañca apāyahetukānaṃ akusalānaṃ accantappahāyakassa maggassa ānubhāvena taṃtaṃsīlavītikkamahetukassa akusalassa anuppattiniyamo eva dhammatā. Na hi sabhāvavādīnaṃ dhammatā viya ahetukatā idha dhammatā nāma. Yathā vā evaṃdhammatānaye kāraṇassa bhāve abhāve ca kāriyassa bhāvo abhāvo ca dhammatā, na ahetuappaccayābhāvābhāvo, evamidhāpi pāṇātipātādikammapathānaṃ hetubhūtassa kilesassa accantābhāvena tesaṃ abhāvo, tadavasesānaṃ akusalānaṃ hetuno bhāvena bhāvo ca dhammatā , na ahetukatā. Tasmā apāyahetuno rāgassa abhāveneva ariyānaṃ ajānitvāpi surāya anajjhoharaṇanti suvuttamevidaṃ kehici ‘‘ajānitvā pivantassāpi sotāpannassa mukhaṃ surā na pavisati kammapathappattaakusalacitteneva pātabbato’’ti, taṃ kena hetunā na sundaraṃ jātanti na ñāyati, dhammatāsiddhanti vā kathanena kathaṃ taṃ paṭikkhittanti.
யம்பி தீ³க⁴னிகாயட்ட²கதா²யங் (தீ³॰ நி॰ அட்ட²॰ 1.352) ‘‘ஸுரஞ்ச கீ²ரஞ்ச மிஸ்ஸெத்வா…பே॰… இத³ங் த⁴ம்மதாஸித்³த⁴’’ந்தி வசனங், தம்பி ஸுராபானஸ்ஸ அசித்தகபக்கே²பி அகுஸலசித்தஞ்ஞேவ ஸாதே⁴தி. ததா² ஹி ‘‘ப⁴வந்தரேபி ஹி அரியஸாவகோ ஜீவிதஹேதுபி பாணங் ந ஹனதி, நாதி³ன்னங் ஆதி³யதி…பே॰… ந ஸுரங் பிவதீ’’தி வுத்தே ‘‘புரிமானங் தாவ சதுன்னங் கம்மபதா²னங் ஸசித்தகத்தா விரமணங் ஸுகரங், பச்சி²மஸ்ஸ பன ஸுராபானஸ்ஸ அசித்தகத்தா கத²ங் விரமணங் ப⁴வெய்யா’’தி சோத³னாஸம்ப⁴வங் மனஸிகத்வா வத்து²அஜானநவஸேன அசித்தகத்தேபி யஸ்மா கம்மபத²ப்பத்தஅகுஸலேனேவ ஸுரா அஜ்ஜோ²ஹரிதப்³பா³, தாதி³ஸீ ச அகுஸலப்பவத்தி அரியஸாவகஸ்ஸ மக்³கே³னேவ ஹதா, தஸ்மாஸ்ஸ பரக³லங் ஸுராய பவிஸனங் நத்தீ²தி அத்த²தோ க³ம்யமானத்த²ங் பரிஹாரவசனங் வத³தா ‘‘ஸசே பிஸ்ஸ ஸுரஞ்ச கீ²ரஞ்சா’’திஆதி³ வுத்தங். தத்த² கீ²ரமேவ பவிஸதி, ந ஸுராதி இத³ங் ஸுராய ஸப்³ப³தா²பி பரக³லப்பவேஸாபா⁴வத³ஸ்ஸனபரங், ந பன ஸுராமிஸ்ஸகீ²ரஸ்ஸ ஸுராய வியோஜனஸாமத்தி²யத³ஸ்ஸனபரங். அயஞ்ஹெத்த² அதி⁴ப்பாயோ – யதி³ ஹி ஸுராமிஸ்ஸே கீ²ரே கிஞ்சி பவிஸெய்ய, கீ²ரமேவ பவிஸெய்ய, ந ஸுரா. கீ²ரே பன ஸுராய அவியுத்தே ந கிஞ்சி பவிஸதீதி . இத³ங் யோனிஸித்³த⁴ந்தி உத³கஸ்ஸ முகே² அப்பவிஸனங் யோனிஸித்³த⁴ங். யோனீதி செத்த² ஜாதி அதி⁴ப்பேதா. தஸ்மா கோஞ்சஜாதிகானங் முக²துண்ட³ஸங்கா²தானங் ரூபத⁴ம்மானங் கீ²ரமிஸ்ஸஉத³கஜ்ஜோ²ஹரணஹேதுத்தாபா⁴வேன தங் அப்பவிஸனங் ஸித்³த⁴ந்தி அத்தோ². இத³ம்பி ஹி கீ²ரமிஸ்ஸாய ஸுராய கீ²ரே பவிஸந்தேபி பரக³லாபவிஸனந்தி. த⁴ம்மதாஸித்³த⁴ந்தி அரியஸாவகஸ்ஸ அரூபத⁴ம்மானங் ஸுராபிவனஹேதுபூ⁴தகிலேஸஸஹிதத்தாபா⁴வஸங்கா²தாய த⁴ம்மதாய ஸித்³த⁴ங். ஏவமெத்த² அசித்தகபக்கே²பி ஸுராய அகுஸலசித்தேனேவ பாதப்³ப³தோ அரியஸாவகானங் அபிவனங் ஸமத்தி²தந்தி வேதி³தப்³ப³ங். அதா²பி ஸியா அஜானநபக்கே² அகுஸலசித்தேன வினாவ பாதப்³ப³த்தேபி ஸுராய அபிவனங் அரியானங் த⁴ம்மதாதி ஸமத்த²னபரமேதந்தி, தங் ந, அட்ட²கதா²வசனந்தரேஹி விருஜ்ஜ²னதோ. யதா² ஹி வசனந்தரேஹி ந விருஜ்ஜ²தி, ததா²யேவ அத்தோ² க³ஹேதப்³போ³.
Yampi dīghanikāyaṭṭhakathāyaṃ (dī. ni. aṭṭha. 1.352) ‘‘surañca khīrañca missetvā…pe… idaṃ dhammatāsiddha’’nti vacanaṃ, tampi surāpānassa acittakapakkhepi akusalacittaññeva sādheti. Tathā hi ‘‘bhavantarepi hi ariyasāvako jīvitahetupi pāṇaṃ na hanati, nādinnaṃ ādiyati…pe… na suraṃ pivatī’’ti vutte ‘‘purimānaṃ tāva catunnaṃ kammapathānaṃ sacittakattā viramaṇaṃ sukaraṃ, pacchimassa pana surāpānassa acittakattā kathaṃ viramaṇaṃ bhaveyyā’’ti codanāsambhavaṃ manasikatvā vatthuajānanavasena acittakattepi yasmā kammapathappattaakusaleneva surā ajjhoharitabbā, tādisī ca akusalappavatti ariyasāvakassa maggeneva hatā, tasmāssa paragalaṃ surāya pavisanaṃ natthīti atthato gamyamānatthaṃ parihāravacanaṃ vadatā ‘‘sace pissa surañca khīrañcā’’tiādi vuttaṃ. Tattha khīrameva pavisati, na surāti idaṃ surāya sabbathāpi paragalappavesābhāvadassanaparaṃ, na pana surāmissakhīrassa surāya viyojanasāmatthiyadassanaparaṃ. Ayañhettha adhippāyo – yadi hi surāmisse khīre kiñci paviseyya, khīrameva paviseyya, na surā. Khīre pana surāya aviyutte na kiñci pavisatīti . Idaṃ yonisiddhanti udakassa mukhe appavisanaṃ yonisiddhaṃ. Yonīti cettha jāti adhippetā. Tasmā koñcajātikānaṃ mukhatuṇḍasaṅkhātānaṃ rūpadhammānaṃ khīramissaudakajjhoharaṇahetuttābhāvena taṃ appavisanaṃ siddhanti attho. Idampi hi khīramissāya surāya khīre pavisantepi paragalāpavisananti. Dhammatāsiddhanti ariyasāvakassa arūpadhammānaṃ surāpivanahetubhūtakilesasahitattābhāvasaṅkhātāya dhammatāya siddhaṃ. Evamettha acittakapakkhepi surāya akusalacitteneva pātabbato ariyasāvakānaṃ apivanaṃ samatthitanti veditabbaṃ. Athāpi siyā ajānanapakkhe akusalacittena vināva pātabbattepi surāya apivanaṃ ariyānaṃ dhammatāti samatthanaparametanti, taṃ na, aṭṭhakathāvacanantarehi virujjhanato. Yathā hi vacanantarehi na virujjhati, tathāyeva attho gahetabbo.
அபிச பாணாதிபாதாதீ³னங் பஞ்சன்னங் கம்மபதா²னங் ப⁴வந்தரேபி அகரணங் அரியானங் த⁴ம்மதாஸீலமேவ, தேஸஞ்ச யதி³ ஸசித்தகதங் ஸமானங். ஸுராபானங் விய இதரானிபி சத்தாரி அஜானந்தேனாபி அரியஸாவகேன ந கத்தப்³பா³னி ஸியுங், ததா² ச அஜானந்தானங் அரியானங் குஸலாப்³யாகதசித்தேஹிபி விரமணபரமாரணபரஸந்தகக³ஹணாதீ³ஸு காயவசீபவத்தி ந ஸம்பஜ்ஜெய்ய, நோ சே ஸம்பஜ்ஜதி, சக்கு²பாலத்தே²ரஸ்ஸ சங்கமனேன பாணவியோக³ஸ்ஸ, உப்பலவண்ணத்தே²ரியா ப³லக்காரேன மக்³கே³னமக்³க³பு²ஸனஸ்ஸ ச பவத்தத்தா. தஸ்மா ஸுராபானஸ்ஸ அசித்தகபக்கே²பி அகுஸலேனேவ பாதப்³ப³தாய ஸுரா அரியானங் பரக³லங் ந பவிஸதீதி விஸேஸெத்வா வுத்தந்தி வேதி³தப்³ப³ங்.
Apica pāṇātipātādīnaṃ pañcannaṃ kammapathānaṃ bhavantarepi akaraṇaṃ ariyānaṃ dhammatāsīlameva, tesañca yadi sacittakataṃ samānaṃ. Surāpānaṃ viya itarānipi cattāri ajānantenāpi ariyasāvakena na kattabbāni siyuṃ, tathā ca ajānantānaṃ ariyānaṃ kusalābyākatacittehipi viramaṇaparamāraṇaparasantakagahaṇādīsu kāyavacīpavatti na sampajjeyya, no ce sampajjati, cakkhupālattherassa caṅkamanena pāṇaviyogassa, uppalavaṇṇattheriyā balakkārena maggenamaggaphusanassa ca pavattattā. Tasmā surāpānassa acittakapakkhepi akusaleneva pātabbatāya surā ariyānaṃ paragalaṃ na pavisatīti visesetvā vuttanti veditabbaṃ.
நனு வத்து²ங் ஜானந்தஸ்ஸேவ ஸப்³பே³ கம்மபதா² வுத்தாதி? ந, மிச்சா²தி³ட்டி²யா விபரீதக்³க³ஹணேனேவ பவத்தத்தா. கத²ஞ்ஹி நாம அஸப்³ப³ஞ்ஞுங் ஸப்³ப³ஞ்ஞுதோ, அனிச்சாதி³ங் நிச்சாதி³தோ ச க³ஹணந்தீ தி³ட்டி² வத்து²ங் விஜானாதி. யதி³ ஹி ஜானெய்ய, மிச்சா²தி³ட்டி²யேவ ந ஸியா. ஸா ச கம்மபதே²ஸு க³ணிதாதி குதோ ஜானந்தஸ்ஸேவ கம்மபத²ப்பவத்தினியமோ. அத² ஸப்³ப³ஞ்ஞுங் ஸப்³ப³ஞ்ஞூதி க³ண்ஹந்தீபி ‘‘அயங் ஸத்தோ’’தி தஸ்ஸ ஸரூபக்³க³ஹணதோ தி³ட்டி²பி வத்து²ங் விஜானாதீதி சே? ந, ஸுராபானஸ்ஸபி ‘‘அயங் ந ஸுரா’’தி ஸரூபக்³க³ஹணஸ்ஸ ஸமானத்தா. ‘‘அய’’ந்தி ச வத்து²பராமஸனேபி ‘‘ஸுரா’’தி விஸேஸவிஜானநாபா⁴வா ந ஜானாதீதி சே? ‘‘அய’’ந்தி புக்³க³லத்தங் ஜானந்தீபி ‘‘அஸப்³ப³ஞ்ஞூ’’திபி விஸேஸஜானநாபா⁴வா தி³ட்டி²பி வத்து²ங் ந ஜானாதீதி ஸமானமேவ. ஏவஞ்ஹி தேஸங் பு³த்³தா⁴தி அஹிதோதி அஹிதங் வா பூரணகஸ்ஸபாதி³ங் ஹிதோ படிக⁴ஸ்ஸ வா அனுனயஸ்ஸ வா உப்பாத³னேபி ஏஸேவ நயோ. விபல்லாஸபுப்³ப³கஞ்ஹி ஸப்³ப³ங் அகுஸலங்.
Nanu vatthuṃ jānantasseva sabbe kammapathā vuttāti? Na, micchādiṭṭhiyā viparītaggahaṇeneva pavattattā. Kathañhi nāma asabbaññuṃ sabbaññuto, aniccādiṃ niccādito ca gahaṇantī diṭṭhi vatthuṃ vijānāti. Yadi hi jāneyya, micchādiṭṭhiyeva na siyā. Sā ca kammapathesu gaṇitāti kuto jānantasseva kammapathappavattiniyamo. Atha sabbaññuṃ sabbaññūti gaṇhantīpi ‘‘ayaṃ satto’’ti tassa sarūpaggahaṇato diṭṭhipi vatthuṃ vijānātīti ce? Na, surāpānassapi ‘‘ayaṃ na surā’’ti sarūpaggahaṇassa samānattā. ‘‘Aya’’nti ca vatthuparāmasanepi ‘‘surā’’ti visesavijānanābhāvā na jānātīti ce? ‘‘Aya’’nti puggalattaṃ jānantīpi ‘‘asabbaññū’’tipi visesajānanābhāvā diṭṭhipi vatthuṃ na jānātīti samānameva. Evañhi tesaṃ buddhāti ahitoti ahitaṃ vā pūraṇakassapādiṃ hito paṭighassa vā anunayassa vā uppādanepi eseva nayo. Vipallāsapubbakañhi sabbaṃ akusalaṃ.
அபிச ஸுராய பீயமானாய நியமேன அகுஸலுப்பாத³னங் ஸபா⁴வோ பீதாய விய. கீ²ராதி³ஸஞ்ஞாய பீதஸுரஸ்ஸ புக்³க³லஸ்ஸ மாதுப⁴கி³னிஆதீ³ஸுபி ராக³தோ³ஸாதி³அகுஸலப்பப³ந்தோ⁴ வத்து²ஸபா⁴வேனேவ உப்பஜ்ஜதி, ஏவங் பீயமானக்க²ணேபி திகி²ணோ ராகோ³ உப்பஜ்ஜதேவ, தேனேவ ஸாக³தத்தே²ரஸ்ஸ அஜானித்வா பிவனகாலே பஞ்சாபி⁴ஞ்ஞாதி³ஜா²னபரிஹானி, பச்சா² ச பு³த்³தா⁴தீ³ஸு அகா³ரவாதி³அகுஸலப்பப³ந்தோ⁴ யாவ ஸுராவிக³மா பவத்தித்த². தேனேவ ப⁴க³வாபி தஸ்ஸ அகா³ரவாதி³அகஉஸலப்பவத்தித³ஸ்ஸனமுகே²ன ஸுராதோ³ஸங் பகாஸெத்வா ஸிக்கா²பத³ங் பஞ்ஞபேஸி. ந ஹி பஞ்சனீவரணுப்பத்திங் வினா ஜா²னபரிஹானி ஹோதி. தஸ்மா அஜானந்தஸ்ஸாபி ஸுரா பீயமானா பீதா ச அத்தனோ ஸபா⁴வேனேவ அகுஸலுப்பாதி³காதி அயமத்தோ² ஸாக³தத்தே²ரஸ்ஸ ஜா²னபரிஹானியா அன்வயதோபி, அரியானங் கிலேஸாபா⁴வேன முகே²ன ஸுராய அப்பவேஸஸங்கா²தப்³யதிரேகதோபி ஸிஜ்ஜ²தீதி நிட்ட²மெத்த² க³ந்தப்³ப³ங், ஏவங் க³ஹணமேவ ஹி விப⁴ஜ்ஜவாதீ³மதானுஸாரங்.
Apica surāya pīyamānāya niyamena akusaluppādanaṃ sabhāvo pītāya viya. Khīrādisaññāya pītasurassa puggalassa mātubhaginiādīsupi rāgadosādiakusalappabandho vatthusabhāveneva uppajjati, evaṃ pīyamānakkhaṇepi tikhiṇo rāgo uppajjateva, teneva sāgatattherassa ajānitvā pivanakāle pañcābhiññādijhānaparihāni, pacchā ca buddhādīsu agāravādiakusalappabandho yāva surāvigamā pavattittha. Teneva bhagavāpi tassa agāravādiakausalappavattidassanamukhena surādosaṃ pakāsetvā sikkhāpadaṃ paññapesi. Na hi pañcanīvaraṇuppattiṃ vinā jhānaparihāni hoti. Tasmā ajānantassāpi surā pīyamānā pītā ca attano sabhāveneva akusaluppādikāti ayamattho sāgatattherassa jhānaparihāniyā anvayatopi, ariyānaṃ kilesābhāvena mukhena surāya appavesasaṅkhātabyatirekatopi sijjhatīti niṭṭhamettha gantabbaṃ, evaṃ gahaṇameva hi vibhajjavādīmatānusāraṃ.
யங் பன ‘‘ஜானித்வா பிவந்தஸ்ஸேவ அகுஸல’’ந்தி க³ஹணங், தங் பி⁴ன்னலத்³தி⁴கானங் அப⁴யகி³ரிகாதீ³னமேவ மதங், தங் பன க³ண்டி²பத³காரகாதீ³ஹி ‘‘பரவாதோ³’’தி அஜானந்தேஹி அத்தனோ மதியா ஸங்ஸந்தி³த்வா லிகி²தங் விப⁴ஜ்ஜவாதீ³மண்ட³லம்பி பவிஸித்வா யாவஜ்ஜதனா ஸாஸனங் தூ³ஸேதி, புராபி கிர இமஸ்மிம்பி த³மிளரட்டே² கோசி பி⁴ன்னலத்³தி⁴கோ நாக³ஸேனோ நாம தே²ரோ குண்ட³லகேஸீவத்து²ங் பரவாத³மத²னநயத³ஸ்ஸனத்த²ங் த³மிளகப்³ப³ரூபேன காரெந்தோ ‘‘இமங் ஸுராபானஸ்ஸ ஜானித்வாவ பிவனே அகுஸலனயங், அஞ்ஞஞ்ச தே³ஸகாலாதி³பே⁴தே³ன அனந்தம்பி ஞெய்யங் ஸப்³ப³ஞ்ஞுதஞ்ஞாணங் ஸலக்க²ணவஸேனேவ ஞாதுங் ந ஸக்கோதி ஞாணேன பரிச்சி²ன்னத்தேன ஞெய்யஸ்ஸ அனந்தத்தஹானிப்பஸங்க³தோ. அனிச்சாதி³ஸாமஞ்ஞலக்க²ணவஸேனேவ பன ஞாதுங் ஸக்கோதீ’’தி ச, ‘‘பரமத்த²த⁴ம்மேஸு நாமரூபந்திஆதி³பே⁴தோ³ விய புக்³க³லாதி³ஸம்முதிபி விஸுங் வத்து²பே⁴தோ³ ஏவா’’தி ச ஏவமாதி³கங் ப³ஹுங் விபரீதத்த²னயங் கப்³பா³காரஸ்ஸ கவினோ உபதி³ஸித்வா தஸ்மிங் பப³ந்தே⁴ காரணாபா⁴ஸேஹி ஸதிங் ஸம்மோஹெத்வா பப³ந்தா⁴பேஸி, தஞ்ச கப்³ப³ங் நிஸ்ஸாய இமங் பி⁴ன்னலத்³தி⁴கமதங் இத⁴ விப⁴ஜ்ஜவாதீ³மதே ஸம்மிஸ்ஸங் சிரங் பவத்தித்த². தங் பன பச்சா² ஆசரியபு³த்³த⁴ப்பியமஹாதே²ரேன பா³ஹிரப்³ப⁴ரிகங் தி³ட்டி²ஜாலங் விகா⁴டெத்வா இத⁴ பரிஸுத்³த⁴ங் ஸாஸனங் பதிட்டா²பெந்தேன ஸோதி⁴தம்பி ஸாரத்த²தீ³பனியா (ஸாரத்த²॰ டீ॰ பாராஜிககண்ட³ 2.42) வினயடீகாய ஸுராபானஸ்ஸ ஸசித்தகபக்கே²யேவ சித்தங் அகுஸலந்தி ஸமத்த²னவசனங் நிஸ்ஸாய கேஹிசி விபல்லத்தசித்தேஹி புன உக்கி²த்தஸிரங் ஜாதங், தஞ்ச மஹாதே²ரேஹி வினிச்சி²னித்வா கா³ரய்ஹவாத³ங் கத்வா மத்³தி³த்வா லத்³தி⁴கா³ஹகே ச பி⁴க்கூ² வியோஜெத்வா த⁴ம்மேன வினயேன ஸத்து²ஸாஸனேன சிரேனேவ வூபஸமிதங். தேனேவெத்த² மயங் ஏவங் வித்தா²ரதோ இத³ங் படிக்கி²பிம்ஹ ‘‘மா அஞ்ஞேபி விப⁴ஜ்ஜவாதி³னோ அயங் லத்³தி⁴ தூ³ஸேஸீ’’தி. தஸ்மா இத⁴ வுத்தானி அவுத்தானி ச காரணானி ஸுட்டு² ஸல்லக்கெ²த்வா யதா² ஆக³மவிரோதோ⁴ ந ஹோதி, ததா² அத்தோ² க³ஹேதப்³போ³.
Yaṃ pana ‘‘jānitvā pivantasseva akusala’’nti gahaṇaṃ, taṃ bhinnaladdhikānaṃ abhayagirikādīnameva mataṃ, taṃ pana gaṇṭhipadakārakādīhi ‘‘paravādo’’ti ajānantehi attano matiyā saṃsanditvā likhitaṃ vibhajjavādīmaṇḍalampi pavisitvā yāvajjatanā sāsanaṃ dūseti, purāpi kira imasmimpi damiḷaraṭṭhe koci bhinnaladdhiko nāgaseno nāma thero kuṇḍalakesīvatthuṃ paravādamathananayadassanatthaṃ damiḷakabbarūpena kārento ‘‘imaṃ surāpānassa jānitvāva pivane akusalanayaṃ, aññañca desakālādibhedena anantampi ñeyyaṃ sabbaññutaññāṇaṃ salakkhaṇavaseneva ñātuṃ na sakkoti ñāṇena paricchinnattena ñeyyassa anantattahānippasaṅgato. Aniccādisāmaññalakkhaṇavaseneva pana ñātuṃ sakkotī’’ti ca, ‘‘paramatthadhammesu nāmarūpantiādibhedo viya puggalādisammutipi visuṃ vatthubhedo evā’’ti ca evamādikaṃ bahuṃ viparītatthanayaṃ kabbākārassa kavino upadisitvā tasmiṃ pabandhe kāraṇābhāsehi satiṃ sammohetvā pabandhāpesi, tañca kabbaṃ nissāya imaṃ bhinnaladdhikamataṃ idha vibhajjavādīmate sammissaṃ ciraṃ pavattittha. Taṃ pana pacchā ācariyabuddhappiyamahātherena bāhirabbharikaṃ diṭṭhijālaṃ vighāṭetvā idha parisuddhaṃ sāsanaṃ patiṭṭhāpentena sodhitampi sāratthadīpaniyā (sārattha. ṭī. pārājikakaṇḍa 2.42) vinayaṭīkāya surāpānassa sacittakapakkheyeva cittaṃ akusalanti samatthanavacanaṃ nissāya kehici vipallattacittehi puna ukkhittasiraṃ jātaṃ, tañca mahātherehi vinicchinitvā gārayhavādaṃ katvā madditvā laddhigāhake ca bhikkhū viyojetvā dhammena vinayena satthusāsanena cireneva vūpasamitaṃ. Tenevettha mayaṃ evaṃ vitthārato idaṃ paṭikkhipimha ‘‘mā aññepi vibhajjavādino ayaṃ laddhi dūsesī’’ti. Tasmā idha vuttāni avuttāni ca kāraṇāni suṭṭhu sallakkhetvā yathā āgamavirodho na hoti, tathā attho gahetabbo.
ஸேஸந்தி யஸ்ஸ வத்து²விஜானநசித்தேன ஸசித்தகபக்கே²பி சித்தங் அகுஸலமேவாதி நியமோ நத்தி², தங் ஸப்³ப³ந்தி அத்தோ². ருந்த⁴ந்தீதி ‘‘திரச்சா²னக³தித்தி²யா தோ³ஸோ நத்தீ²’’திஆதி³னா அனாபத்தியா லேஸக்³க³ஹணங் நிவாரெந்தீ. த்³வாரங் பித³ஹந்தீதி ‘‘தஞ்ச கோ² மனுஸ்ஸித்தி²யா’’திஆதி³னா (பாரா॰ 41) லேஸக்³க³ஹணஸ்ஸ காரணஸங்கா²தங் த்³வாரங் பித³ஹந்தீ. ஸோதங் பச்சி²ந்த³மானாதி தது³ப⁴யலேஸக்³க³ஹணத்³வாரானங் வஸேன அவிச்சி²ன்னங் வீதிக்கமஸோதங் பச்சி²ந்த³மானா. கா³ள்ஹதரங் கரொந்தீதி யதா²வுத்தேஹி காரணேஹி பட²மபஞ்ஞத்திஸித்³த⁴ங் ஆபத்திஞ்ஞேவ த³ள்ஹங் கரொந்தீ, அனாபத்தியா ஓகாஸங் அத³த³மானாதி அத்தோ². ஸா ச யஸ்மா வீதிக்கமாபா⁴வே, அவிஸயதாய அப்³போ³ஹாரிகே வீதிக்கமே ச லோகவஜ்ஜேபி ஸிதி²லங் கரொந்தீ உப்பஜ்ஜதி, தஸ்மா ததா² உப்பத்திங் உப்பத்திகாரணஞ்ச த³ஸ்ஸெந்தோ ஆஹ அஞ்ஞத்ர அதி⁴மானாதிஆதி³. அஞ்ஞத்ர அதி⁴மானாதி இமிஸ்ஸா அனுபஞ்ஞத்தியா ‘‘வீதிக்கமாபா⁴வா’’தி காரணங் வுத்தங். அஞ்ஞத்ர ஸுபினந்தாதி இமிஸ்ஸா ‘‘அப்³போ³ஹாரிகத்தா’’தி காரணங் வுத்தங். தத்த² வீதிக்கமாபா⁴வாதி பாபிச்சா²ய அவிஜ்ஜமானஸ்ஸ உத்தரிமனுஸ்ஸத⁴ம்மஸ்ஸ விஜ்ஜமானதோ பகாஸனவஸப்பவத்தவிஸங்வாத³னாதி⁴ப்பாயஸங்கா²தஸ்ஸ வீதிக்கமஸ்ஸ அபா⁴வதோ. அதி⁴மானிகஸ்ஸ ஹி அனதி⁴க³தே அதி⁴க³தஸஞ்ஞிதாய யதா²வுத்தவீதிக்கமோ நத்தி². அப்³போ³ஹாரிகத்தாதி ‘‘அத்தே²ஸா, பி⁴க்க²வே, சேதனா, ஸா ச கோ² அப்³போ³ஹாரிகா’’தி (பாரா॰ 235) வசனதோ மோசனஸ்ஸாத³சேதனாய உபக்கமனஸ்ஸ ச விஜ்ஜமானத்தேபி தி²னமித்³தே⁴ன அபி⁴பூ⁴ததாய அவஸத்தேன அப்³போ³ஹாரிகத்தா, ஆபத்திகாரணவோஹாராபா⁴வாதி அத்தோ². வா-ஸத்³தோ³ செத்த² ஸமுச்சயத்தோ² த³ட்ட²ப்³போ³, ‘‘அப்³போ³ஹாரிகத்தா சா’’தி வா பாடோ². வுத்தாதி து³விதா⁴பி சேஸா அனுபஞ்ஞத்தி அனாபத்திகரா வுத்தாதி அதி⁴ப்பாயோ.
Sesanti yassa vatthuvijānanacittena sacittakapakkhepi cittaṃ akusalamevāti niyamo natthi, taṃ sabbanti attho. Rundhantīti ‘‘tiracchānagatitthiyā doso natthī’’tiādinā anāpattiyā lesaggahaṇaṃ nivārentī. Dvāraṃ pidahantīti ‘‘tañca kho manussitthiyā’’tiādinā (pārā. 41) lesaggahaṇassa kāraṇasaṅkhātaṃ dvāraṃ pidahantī. Sotaṃ pacchindamānāti tadubhayalesaggahaṇadvārānaṃ vasena avicchinnaṃ vītikkamasotaṃ pacchindamānā. Gāḷhataraṃ karontīti yathāvuttehi kāraṇehi paṭhamapaññattisiddhaṃ āpattiññeva daḷhaṃ karontī, anāpattiyā okāsaṃ adadamānāti attho. Sā ca yasmā vītikkamābhāve, avisayatāya abbohārike vītikkame ca lokavajjepi sithilaṃ karontī uppajjati, tasmā tathā uppattiṃ uppattikāraṇañca dassento āha aññatra adhimānātiādi. Aññatra adhimānāti imissā anupaññattiyā ‘‘vītikkamābhāvā’’ti kāraṇaṃ vuttaṃ. Aññatra supinantāti imissā ‘‘abbohārikattā’’ti kāraṇaṃ vuttaṃ. Tattha vītikkamābhāvāti pāpicchāya avijjamānassa uttarimanussadhammassa vijjamānato pakāsanavasappavattavisaṃvādanādhippāyasaṅkhātassa vītikkamassa abhāvato. Adhimānikassa hi anadhigate adhigatasaññitāya yathāvuttavītikkamo natthi. Abbohārikattāti ‘‘atthesā, bhikkhave, cetanā, sā ca kho abbohārikā’’ti (pārā. 235) vacanato mocanassādacetanāya upakkamanassa ca vijjamānattepi thinamiddhena abhibhūtatāya avasattena abbohārikattā, āpattikāraṇavohārābhāvāti attho. Vā-saddo cettha samuccayattho daṭṭhabbo, ‘‘abbohārikattā cā’’ti vā pāṭho. Vuttāti duvidhāpi cesā anupaññatti anāpattikarā vuttāti adhippāyo.
அகதே வீதிக்கமேதி ஆபதா³ஸுபி பி⁴க்கூ²ஹி ஸிக்கா²பத³வீதிக்கமே அகதே, குக்குச்சா ந பு⁴ஞ்ஜிங்ஸூதிஆதீ³ஸு விய வீதிக்கமங் அகத்வா பி⁴க்கூ²ஹி அத்தனோ து³க்கு²ப்பத்தியா ஆரோசிதாயாதி அத்தோ². ஸிதி²லங் கரொந்தீதி பட²மங் ஸாமஞ்ஞதோ ப³த்³த⁴ஸிக்கா²பத³ங் மோசெத்வா அத்தனோ விஸயே அனாபத்திகரணவஸேன ஸிதி²லங் கரொந்தீ. த்³வாரங் த³த³மானாதி அனாபத்தியா த்³வாரங் த³த³மானா. அபராபரம்பி அனாபத்திங் குருமானாதி தி³ன்னேன தேன த்³வாரேன உபரூபரி அனாபத்திபா⁴வங் தீ³பெந்தீ. பஞ்ஞத்தேபி ஸிக்கா²பதே³ உதா³யினா ‘‘முஹுத்திகாய வேஸியா ந தோ³ஸோ’’தி லேஸேன வீதிக்கமித்வா ஸஞ்சரித்தாபஜ்ஜனவத்து²ஸ்மிங் (பாரா॰ 296 ஆத³யோ) பஞ்ஞத்தத்தா ‘‘கதே வீதிக்கமே’’தி வுத்தங். பஞ்ஞத்திக³திகாதி அத்த²தோ மூலபஞ்ஞத்தியேவாதி அதி⁴ப்பாயோ.
Akate vītikkameti āpadāsupi bhikkhūhi sikkhāpadavītikkame akate, kukkuccā na bhuñjiṃsūtiādīsu viya vītikkamaṃ akatvā bhikkhūhi attano dukkhuppattiyā ārocitāyāti attho. Sithilaṃ karontīti paṭhamaṃ sāmaññato baddhasikkhāpadaṃ mocetvā attano visaye anāpattikaraṇavasena sithilaṃ karontī. Dvāraṃ dadamānāti anāpattiyā dvāraṃ dadamānā. Aparāparampi anāpattiṃ kurumānāti dinnena tena dvārena uparūpari anāpattibhāvaṃ dīpentī. Paññattepi sikkhāpade udāyinā ‘‘muhuttikāya vesiyā na doso’’ti lesena vītikkamitvā sañcarittāpajjanavatthusmiṃ (pārā. 296 ādayo) paññattattā ‘‘kate vītikkame’’ti vuttaṃ. Paññattigatikāti atthato mūlapaññattiyevāti adhippāyo.
மக்கடீவத்து²கதா²வண்ணனானயோ நிட்டி²தோ.
Makkaṭīvatthukathāvaṇṇanānayo niṭṭhito.
Related texts:
திபிடக (மூல) • Tipiṭaka (Mūla) / வினயபிடக • Vinayapiṭaka / மஹாவிப⁴ங்க³ • Mahāvibhaṅga / 1. பட²மபாராஜிகங் • 1. Paṭhamapārājikaṃ
அட்ட²கதா² • Aṭṭhakathā / வினயபிடக (அட்ட²கதா²) • Vinayapiṭaka (aṭṭhakathā) / மஹாவிப⁴ங்க³-அட்ட²கதா² • Mahāvibhaṅga-aṭṭhakathā / 1. பட²மபாராஜிகங் • 1. Paṭhamapārājikaṃ
டீகா • Tīkā / வினயபிடக (டீகா) • Vinayapiṭaka (ṭīkā) / ஸாரத்த²தீ³பனீ-டீகா • Sāratthadīpanī-ṭīkā / மக்கடிவத்து²கதா²வண்ணனா • Makkaṭivatthukathāvaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / வஜிரபு³த்³தி⁴-டீகா • Vajirabuddhi-ṭīkā / மக்கடீவத்து²கதா²வண்ணனா • Makkaṭīvatthukathāvaṇṇanā
