| Library / Tipiṭaka / তিপিটক • Tipiṭaka / সারত্থদীপনী-টীকা • Sāratthadīpanī-ṭīkā |
মক্কটিৰত্থুকথাৰণ্ণনা
Makkaṭivatthukathāvaṇṇanā
৪০. অনুত্তানপদৰণ্ণনাতি উত্তানং ৰুচ্চতি পাকটং, তপ্পটিপক্খেন অনুত্তানং অপাকটং অপ্পচুরং দুৰিঞ্ঞেয্যঞ্চ, অনুত্তানানং পদানং ৰণ্ণনা অনুত্তানপদৰণ্ণনা। উত্তানপদৰণ্ণনায পযোজনাভাৰতো অনুত্তানগ্গহণং। পচুরপটিসেৰনো হোতীতি বহুলপটিসেৰনো হোতি, দিৰসে দিৰসে নিরন্তরং পটিসেৰতীতি অত্থো। পচুরত্থে হি ৰত্তমানৰচনন্তি সব্বদা পটিসেৰনাভাৰেপি ‘‘ইহ মল্লা যুজ্ঝন্তী’’তিআদীসু ৰিয বাহুল্লৰুত্তিং উপাদায ৰত্তমানৰচনং। আহিণ্ডন্তাতি ৰিচরন্তা। অঞ্ঞেসুপীতি অঞ্ঞেসুপি ভিক্খূসু।
40.Anuttānapadavaṇṇanāti uttānaṃ vuccati pākaṭaṃ, tappaṭipakkhena anuttānaṃ apākaṭaṃ appacuraṃ duviññeyyañca, anuttānānaṃ padānaṃ vaṇṇanā anuttānapadavaṇṇanā. Uttānapadavaṇṇanāya payojanābhāvato anuttānaggahaṇaṃ. Pacurapaṭisevano hotīti bahulapaṭisevano hoti, divase divase nirantaraṃ paṭisevatīti attho. Pacuratthe hi vattamānavacananti sabbadā paṭisevanābhāvepi ‘‘iha mallā yujjhantī’’tiādīsu viya bāhullavuttiṃ upādāya vattamānavacanaṃ. Āhiṇḍantāti vicarantā. Aññesupīti aññesupi bhikkhūsu.
৪১. সহোড্ঢগ্গহিতোতি সহ ভণ্ডেন গহিতো। অত্তনো মিচ্ছাগাহেন লেসওড্ডনেন ৰা পরিপুণ্ণত্থম্পি পঠমপঞ্ঞত্তিং অঞ্ঞথা করোন্তো ‘‘তঞ্চ খো মনুস্সিত্থিযা, নো তিরচ্ছানগতাযা’’তি আহ। দস্সনন্তি সানুরাগদস্সনং। গহণন্তি অনুরাগৰসেনেৰ হত্থেন গহণং। আমসনং অত্তনো সরীরেন তস্সা সরীরস্স উপরি আমসনমত্তং, ফুসনং ততো দল়্হতরং কত্ৰা সংফুসনং, ঘট্টনং ততোপি দল়্হতরং কত্ৰা সরীরেন সরীরস্স ঘট্টনং। তং সব্বম্পীতি দস্সনাদি সব্বম্পি।
41.Sahoḍḍhaggahitoti saha bhaṇḍena gahito. Attano micchāgāhena lesaoḍḍanena vā paripuṇṇatthampi paṭhamapaññattiṃ aññathā karonto ‘‘tañca kho manussitthiyā, no tiracchānagatāyā’’ti āha. Dassananti sānurāgadassanaṃ. Gahaṇanti anurāgavaseneva hatthena gahaṇaṃ. Āmasanaṃ attano sarīrena tassā sarīrassa upari āmasanamattaṃ, phusanaṃ tato daḷhataraṃ katvā saṃphusanaṃ, ghaṭṭanaṃ tatopi daḷhataraṃ katvā sarīrena sarīrassa ghaṭṭanaṃ. Taṃ sabbampīti dassanādi sabbampi.
৪২. দল়্হতরং সিক্খাপদমকাসীতি ইমস্মিং অধিকারে অনুপঞ্ঞত্তিযা সিক্খাপদস্স দল়্হীকরণং সিথিলকরণঞ্চ পসঙ্গতো আপন্নং ৰিভজিত্ৰা দস্সেতুকামো ‘‘দুৰিধঞ্হি সিক্খাপদ’’ন্তিআদিমাহ। তত্থ যস্স সচিত্তকস্স সিক্খাপদস্স চিত্তং অকুসলমেৰ হোতি, তং লোকৰজ্জং। যস্স সচিত্তকাচিত্তকপক্খসহিতস্স অচিত্তকস্স চ সচিত্তকপক্খে চিত্তং অকুসলমেৰ হোতি, তম্পি সুরাপানাদি লোকৰজ্জন্তি ইমমত্থং সম্পিণ্ডেত্ৰা দস্সেতুং ‘‘যস্স সচিত্তকপক্খে চিত্তং অকুসলমেৰ হোতি, তং লোকৰজ্জং নামা’’তি ৰুত্তং। ‘‘সচিত্তকপক্খে’’তি হি ইদং ৰচনং অচিত্তকং সন্ধায ৰুত্তং। ন হি একংসতো সচিত্তকস্স ‘‘সচিত্তকপক্খে’’তি ৰিসেসনে পযোজনং অত্থি। সচিত্তকপক্খেতি চ ৰত্থুৰীতিক্কমৰিজাননচিত্তেন ‘‘সচিত্তকপক্খে’’তি গহেতব্বং, ন পণ্ণত্তিৰিজাননচিত্তেন। যদি হি ‘‘ন ৰট্টতী’’তি পণ্ণত্তিৰিজাননচিত্তেনপি যস্স সিক্খাপদস্স সচিত্তকপক্খে চিত্তং অকুসলমেৰ, তম্পি লোকৰজ্জন্তি ৰদেয্য, সব্বেসং পণ্ণত্তিৰজ্জসিক্খাপদানম্পি লোকৰজ্জতা আপজ্জেয্য পণ্ণত্তিৰজ্জানম্পি ‘‘ন ৰট্টতী’’তি জানিত্ৰা ৰীতিক্কমে অকুসলচিত্তস্সেৰ সম্ভৰতো। ন হি ভগৰতো আণং জানিত্ৰা মদ্দন্তস্স কুসলচিত্তং উপ্পজ্জতি অনাদরিযৰসেন পটিঘচিত্তস্সেৰ উপ্পজ্জনতো।
42.Daḷhataraṃ sikkhāpadamakāsīti imasmiṃ adhikāre anupaññattiyā sikkhāpadassa daḷhīkaraṇaṃ sithilakaraṇañca pasaṅgato āpannaṃ vibhajitvā dassetukāmo ‘‘duvidhañhi sikkhāpada’’ntiādimāha. Tattha yassa sacittakassa sikkhāpadassa cittaṃ akusalameva hoti, taṃ lokavajjaṃ. Yassa sacittakācittakapakkhasahitassa acittakassa ca sacittakapakkhe cittaṃ akusalameva hoti, tampi surāpānādi lokavajjanti imamatthaṃ sampiṇḍetvā dassetuṃ ‘‘yassa sacittakapakkhe cittaṃ akusalameva hoti, taṃ lokavajjaṃ nāmā’’ti vuttaṃ. ‘‘Sacittakapakkhe’’ti hi idaṃ vacanaṃ acittakaṃ sandhāya vuttaṃ. Na hi ekaṃsato sacittakassa ‘‘sacittakapakkhe’’ti visesane payojanaṃ atthi. Sacittakapakkheti ca vatthuvītikkamavijānanacittena ‘‘sacittakapakkhe’’ti gahetabbaṃ, na paṇṇattivijānanacittena. Yadi hi ‘‘na vaṭṭatī’’ti paṇṇattivijānanacittenapi yassa sikkhāpadassa sacittakapakkhe cittaṃ akusalameva, tampi lokavajjanti vadeyya, sabbesaṃ paṇṇattivajjasikkhāpadānampi lokavajjatā āpajjeyya paṇṇattivajjānampi ‘‘na vaṭṭatī’’ti jānitvā vītikkame akusalacittasseva sambhavato. Na hi bhagavato āṇaṃ jānitvā maddantassa kusalacittaṃ uppajjati anādariyavasena paṭighacittasseva uppajjanato.
অপিচেত্থ ‘‘সচিত্তকপক্খে চিত্তং অকুসলমেৰা’’তি ৰচনতো অচিত্তকস্স ৰত্থুঅজাননৰসেন অচিত্তকপক্খে চিত্তং অকুসলমেৰাতি অযং নিযমো নত্থীতি ৰিঞ্ঞাযতি। যদি হি অচিত্তকস্স অচিত্তকপক্খেপি চিত্তং অকুসলমেৰ সিযা, ‘‘সচিত্তকপক্খে’’তি ইদং ৰিসেসনং নিরত্থকং সিযা। ‘‘যস্স চিত্তং অকুসলমেৰ হোতি, তং লোকৰজ্জ’’ন্তি এত্তকে ৰুত্তে সুরাতি অজানিত্ৰা পিৰন্তস্স গন্ধৰণ্ণকাদিভাৰং অজানিত্ৰা তানি লিম্পন্তীনং ভিক্খুনীনঞ্চ ৰিনাপি অকুসলচিত্তেন আপত্তিসম্ভৰতো একন্তাকুসলং সচিত্তকসিক্খাপদং ঠপেত্ৰা সুরাপানাদিঅচিত্তকসিক্খাপদানং লোকৰজ্জতা ন সিযাতি তেসম্পি সঙ্গণ্হত্থং ‘‘যস্স সচিত্তকপক্খে চিত্তং অকুসলমেৰ হোতি, তং লোকৰজ্জ’’ন্তি ৰুত্তং। তেনেৰ চূল়গণ্ঠিপদে মজ্ঝিমগণ্ঠিপদে চ ৰুত্তং ‘‘এতং সত্তং মারেস্সামীতি তস্মিংযেৰ পদেসে নিপন্নং অঞ্ঞং মারেন্তস্স পাণসামঞ্ঞস্স অত্থিতায যথা পাণাতিপাতো হোতি, এৰং এতং মজ্জং পিৰিস্সামীতি অঞ্ঞং মজ্জং পিৰন্তস্স মজ্জসামঞ্ঞস্স অত্থিতায অকুসলমেৰ হোতি। যথা পন কট্ঠসঞ্ঞায সপ্পং ঘাতেন্তস্স পাণাতিপাতো ন হোতি, এৰং নাল়িকেরপানসঞ্ঞায মজ্জং পিৰন্তস্স অকুসলং ন হোতী’’তি।
Apicettha ‘‘sacittakapakkhe cittaṃ akusalamevā’’ti vacanato acittakassa vatthuajānanavasena acittakapakkhe cittaṃ akusalamevāti ayaṃ niyamo natthīti viññāyati. Yadi hi acittakassa acittakapakkhepi cittaṃ akusalameva siyā, ‘‘sacittakapakkhe’’ti idaṃ visesanaṃ niratthakaṃ siyā. ‘‘Yassa cittaṃ akusalameva hoti, taṃ lokavajja’’nti ettake vutte surāti ajānitvā pivantassa gandhavaṇṇakādibhāvaṃ ajānitvā tāni limpantīnaṃ bhikkhunīnañca vināpi akusalacittena āpattisambhavato ekantākusalaṃ sacittakasikkhāpadaṃ ṭhapetvā surāpānādiacittakasikkhāpadānaṃ lokavajjatā na siyāti tesampi saṅgaṇhatthaṃ ‘‘yassa sacittakapakkhe cittaṃ akusalameva hoti, taṃ lokavajja’’nti vuttaṃ. Teneva cūḷagaṇṭhipade majjhimagaṇṭhipade ca vuttaṃ ‘‘etaṃ sattaṃ māressāmīti tasmiṃyeva padese nipannaṃ aññaṃ mārentassa pāṇasāmaññassa atthitāya yathā pāṇātipāto hoti, evaṃ etaṃ majjaṃ pivissāmīti aññaṃ majjaṃ pivantassa majjasāmaññassa atthitāya akusalameva hoti. Yathā pana kaṭṭhasaññāya sappaṃ ghātentassa pāṇātipāto na hoti, evaṃ nāḷikerapānasaññāya majjaṃ pivantassa akusalaṃ na hotī’’ti.
কেচি পন ৰদন্তি ‘‘সামণেরস্স সুরাতি অজানিত্ৰা পিৰন্তস্স পারাজিকো নত্থি, অকুসলং পন হোতী’’তি, তং তেসং মতিমত্তং। ‘‘ভিক্খুনো অজানিত্ৰাপি বীজতো পট্ঠায মজ্জং পিৰন্তস্স পাচিত্তিযং, সামণেরো জানিত্ৰা পিৰন্তো সীলভেদং আপজ্জতি, ন অজানিত্ৰা’’তি এত্তকমেৰ হি অট্ঠকথাযং ৰুত্তং, ‘‘অকুসলং পন হোতী’’তি ন ৰুত্তন্তি। অপরম্পি ৰদন্তি ‘‘অজানিত্ৰা পিৰন্তস্সপি সোতাপন্নস্স মুখং সুরা ন পৰিসতি কম্মপথপ্পত্তঅকুসলচিত্তেনেৰ পাতব্বতো’’তি, তম্পি ন সুন্দরং। বোধিসত্তে কুচ্ছিগতে বোধিসত্তমাতু সীলং ৰিয হি ইদম্পি অরিযসাৰকানং ধম্মতাসিদ্ধন্তি ৰেদিতব্বং। তেনেৰ দীঘনিকাযে কূটদন্তসুত্তট্ঠকথাযং (দী॰ নি॰ অট্ঠ॰ ১.৩৫২) ৰুত্তং –
Keci pana vadanti ‘‘sāmaṇerassa surāti ajānitvā pivantassa pārājiko natthi, akusalaṃ pana hotī’’ti, taṃ tesaṃ matimattaṃ. ‘‘Bhikkhuno ajānitvāpi bījato paṭṭhāya majjaṃ pivantassa pācittiyaṃ, sāmaṇero jānitvā pivanto sīlabhedaṃ āpajjati, na ajānitvā’’ti ettakameva hi aṭṭhakathāyaṃ vuttaṃ, ‘‘akusalaṃ pana hotī’’ti na vuttanti. Aparampi vadanti ‘‘ajānitvā pivantassapi sotāpannassa mukhaṃ surā na pavisati kammapathappattaakusalacitteneva pātabbato’’ti, tampi na sundaraṃ. Bodhisatte kucchigate bodhisattamātu sīlaṃ viya hi idampi ariyasāvakānaṃ dhammatāsiddhanti veditabbaṃ. Teneva dīghanikāye kūṭadantasuttaṭṭhakathāyaṃ (dī. ni. aṭṭha. 1.352) vuttaṃ –
‘‘ভৰন্তরেপি হি অরিযসাৰকো জীৰিতহেতুপি নেৰ পাণং হনতি, ন সুরং পিৰতি। সচেপিস্স সুরঞ্চ খীরঞ্চ মিস্সেত্ৰা মুখে পক্খিপন্তি, খীরমেৰ পৰিসতি, ন সুরা। যথা কিং? যথা কোঞ্চসকুণানং খীরমিস্সকে উদকে খীরমেৰ পৰিসতি, ন উদকং। ইদং যোনিসিদ্ধন্তি চে? ইদম্পি ধম্মতাসিদ্ধন্তি ৰেদিতব্ব’’ন্তি।
‘‘Bhavantarepi hi ariyasāvako jīvitahetupi neva pāṇaṃ hanati, na suraṃ pivati. Sacepissa surañca khīrañca missetvā mukhe pakkhipanti, khīrameva pavisati, na surā. Yathā kiṃ? Yathā koñcasakuṇānaṃ khīramissake udake khīrameva pavisati, na udakaṃ. Idaṃ yonisiddhanti ce? Idampi dhammatāsiddhanti veditabba’’nti.
যদি এৰং সুরাপানসিক্খাপদট্ঠকথাযং (পাচি॰ অট্ঠ॰ ৩২৯) ‘‘ৰত্থুঅজাননতায চেত্থ অচিত্তকতা ৰেদিতব্বা, অকুসলেনেৰ পাতব্বতায লোকৰজ্জতা’’তি কস্মা ৰুত্তং? নাযং দোসো। অযঞ্হেত্থ অধিপ্পাযো – সচিত্তকপক্খে অকুসলচিত্তেনেৰ পাতব্বতায লোকৰজ্জতাতি। ইমিনাযেৰ হি অধিপ্পাযেন অঞ্ঞেসুপি লোকৰজ্জেসু অচিত্তকসিক্খাপদেসু অকুসলচিত্ততাযেৰ ৰুত্তা, ন পন সচিত্তকতা। তেনেৰ ভিক্খুনীৰিভঙ্গট্ঠকথাযং (পাচি॰ অট্ঠ॰ ১২২৭) ৰুত্তং –
Yadi evaṃ surāpānasikkhāpadaṭṭhakathāyaṃ (pāci. aṭṭha. 329) ‘‘vatthuajānanatāya cettha acittakatā veditabbā, akusaleneva pātabbatāya lokavajjatā’’ti kasmā vuttaṃ? Nāyaṃ doso. Ayañhettha adhippāyo – sacittakapakkhe akusalacitteneva pātabbatāya lokavajjatāti. Imināyeva hi adhippāyena aññesupi lokavajjesu acittakasikkhāpadesu akusalacittatāyeva vuttā, na pana sacittakatā. Teneva bhikkhunīvibhaṅgaṭṭhakathāyaṃ (pāci. aṭṭha. 1227) vuttaṃ –
‘‘গিরগ্গসমজ্জং চিত্তাগারসিক্খাপদং সঙ্ঘাণি ইত্থালঙ্কারো গন্ধকৰণ্ণকো ৰাসিতকপিঞ্ঞাকো ভিক্খুনীআদীহি উম্মদ্দনপরিমদ্দনাতি ইমানি দস সিক্খাপদানি অচিত্তকানি লোকৰজ্জানি অকুসলচিত্তানী’’তি,
‘‘Giraggasamajjaṃ cittāgārasikkhāpadaṃ saṅghāṇi itthālaṅkāro gandhakavaṇṇako vāsitakapiññāko bhikkhunīādīhi ummaddanaparimaddanāti imāni dasa sikkhāpadāni acittakāni lokavajjāni akusalacittānī’’ti,
অযং পনেত্থ অধিপ্পাযো – ৰিনাপি চিত্তেন আপজ্জিতব্বত্তা অচিত্তকানি, চিত্তে পন সতি অকুসলেনেৰ আপজ্জিতব্বত্তা লোকৰজ্জানি চেৰ অকুসলচিত্তানি চাতি। তস্মা ভিক্খুৰিভঙ্গে আগতানি সুরাপানউয্যুত্তউয্যোধিকসিক্খাপদানি তীণি, ভিক্খুনীৰিভঙ্গে আগতানি গিরগ্গসমজ্জাদীনি দসাতি ইমেসং তেরসন্নং অচিত্তকসিক্খাপদানং লোকৰজ্জতাদস্সনত্থং ‘‘সচিত্তকপক্খে’’তি ইদং ৰিসেসনং কতন্তি নিট্ঠমেত্থ গন্তব্বং। যস্মা পন পণ্ণত্তিৰজ্জস্স ৰত্থুৰীতিক্কমৰিজাননচিত্তেন সচিত্তকপক্খে চিত্তং সিযা কুসলং, সিযা অকুসলং, সিযা অব্যাকতং, তস্মা তস্স সচিত্তকপক্খে চিত্তং অকুসলমেৰাতি অযং নিযমো নত্থীতি সেসং পণ্ণত্তিৰজ্জন্তি ৰুত্তং।
Ayaṃ panettha adhippāyo – vināpi cittena āpajjitabbattā acittakāni, citte pana sati akusaleneva āpajjitabbattā lokavajjāni ceva akusalacittāni cāti. Tasmā bhikkhuvibhaṅge āgatāni surāpānauyyuttauyyodhikasikkhāpadāni tīṇi, bhikkhunīvibhaṅge āgatāni giraggasamajjādīni dasāti imesaṃ terasannaṃ acittakasikkhāpadānaṃ lokavajjatādassanatthaṃ ‘‘sacittakapakkhe’’ti idaṃ visesanaṃ katanti niṭṭhamettha gantabbaṃ. Yasmā pana paṇṇattivajjassa vatthuvītikkamavijānanacittena sacittakapakkhe cittaṃ siyā kusalaṃ, siyā akusalaṃ, siyā abyākataṃ, tasmā tassa sacittakapakkhe cittaṃ akusalamevāti ayaṃ niyamo natthīti sesaṃ paṇṇattivajjanti vuttaṃ.
রুন্ধন্তীতি ৰীতিক্কমং রুন্ধন্তী। দ্ৰারং পিদহন্তীতি ৰীতিক্কমলেসস্স দ্ৰারং পিদহন্তী। সোতং পচ্ছিন্দমানাতি উপরূপরি ৰীতিক্কমসোতং পচ্ছিন্দমানা। অথ ৰা রুন্ধন্তীতি অনাপত্তিলেসং রুন্ধন্তী। দ্ৰারং পিদহন্তীতি অনাপত্তিলেসস্স দ্ৰারং পিদহন্তী। সোতং পচ্ছিন্দমানাতি অনাপত্তিসোতং পচ্ছিন্দমানা, আপত্তিমেৰ কুরুমানাতি ৰুত্তং হোতি। ননু চ লোকৰজ্জে কাচি অনুপঞ্ঞত্তি উপ্পজ্জমানা সিথিলং করোন্তী উপ্পজ্জতি, তস্মা ‘‘লোকৰজ্জে অনুপঞ্ঞত্তি উপ্পজ্জমানা…পে॰… গাল়্হতরং করোন্তী উপ্পজ্জতী’’তি ইদং কস্মা ৰুত্তন্তি আহ ‘‘অঞ্ঞত্র অধিমানা অঞ্ঞত্র সুপিনন্তা’’তিআদি। ‘‘অঞ্ঞত্র অধিমানা’’তি ইমিস্সা অনুপঞ্ঞত্তিযা ‘‘ৰীতিক্কমাভাৰা’’তি কারণং ৰুত্তং, ‘‘অঞ্ঞত্র সুপিনন্তা’’তি ইমিস্সা ‘‘অব্বোহারিকত্তা’’তি কারণং ৰুত্তং। তত্থ ৰীতিক্কমাভাৰাতি পাপিচ্ছো ইচ্ছাপকতোতিআদিৰীতিক্কমাভাৰা। উত্তরিমনুস্সধম্মে হি ‘‘পাপিচ্ছো ইচ্ছাপকতো উত্তরিমনুস্সধম্মং উল্লপতী’’তি (মহাৰ॰ ১২৯) ৰচনতো ৰিসংৰাদনাধিপ্পাযেন মুসা ভণন্তো পারাজিকো হোতি। অযং পন অধিমানেন অধিগতসঞ্ঞী হুত্ৰা উল্লপতি, ন সিক্খাপদং ৰীতিক্কমিতুকামো, তস্মা ‘‘অঞ্ঞত্র অধিমানা’’তি অযং অনুপঞ্ঞত্তি উপ্পজ্জমানা ৰীতিক্কমাভাৰা অনাপত্তিকরা জাতা। অব্বোহারিকত্তাতি সুপিনন্তে ৰিজ্জমানাযপি চেতনায ৰীতিক্কমিচ্ছায চ অব্বোহারিকত্তা। কিঞ্চাপি হি সুপিনন্তে মোচনস্সাদচেতনা সংৰিজ্জতি, কদাচি উপক্কমনম্পি হোতি, তথাপি থিনমিদ্ধেন অভিভূতত্তা তং চিত্তং অব্বোহারিকং, চিত্তস্স অব্বোহারিকত্তা উপক্কমকিরিযাসংৰত্তনিকাপি চেতনা অব্বোহারিকা। তেনেৰ ‘‘অত্থেসা ভিক্খৰে চেতনা, সা চ খো অব্বোহারিকা’’তি (পারা॰ ২৩৫) ভগৰতা ৰুত্তা, তস্মা ‘‘অঞ্ঞত্র সুপিনন্তা’’তি অযং অনুপঞ্ঞত্তি অব্বোহারিকত্তা অনাপত্তিকরা জাতা।
Rundhantīti vītikkamaṃ rundhantī. Dvāraṃ pidahantīti vītikkamalesassa dvāraṃ pidahantī. Sotaṃ pacchindamānāti uparūpari vītikkamasotaṃ pacchindamānā. Atha vā rundhantīti anāpattilesaṃ rundhantī. Dvāraṃ pidahantīti anāpattilesassa dvāraṃ pidahantī. Sotaṃ pacchindamānāti anāpattisotaṃ pacchindamānā, āpattimeva kurumānāti vuttaṃ hoti. Nanu ca lokavajje kāci anupaññatti uppajjamānā sithilaṃ karontī uppajjati, tasmā ‘‘lokavajje anupaññatti uppajjamānā…pe… gāḷhataraṃ karontī uppajjatī’’ti idaṃ kasmā vuttanti āha ‘‘aññatra adhimānā aññatra supinantā’’tiādi. ‘‘Aññatra adhimānā’’ti imissā anupaññattiyā ‘‘vītikkamābhāvā’’ti kāraṇaṃ vuttaṃ, ‘‘aññatra supinantā’’ti imissā ‘‘abbohārikattā’’ti kāraṇaṃ vuttaṃ. Tattha vītikkamābhāvāti pāpiccho icchāpakatotiādivītikkamābhāvā. Uttarimanussadhamme hi ‘‘pāpiccho icchāpakato uttarimanussadhammaṃ ullapatī’’ti (mahāva. 129) vacanato visaṃvādanādhippāyena musā bhaṇanto pārājiko hoti. Ayaṃ pana adhimānena adhigatasaññī hutvā ullapati, na sikkhāpadaṃ vītikkamitukāmo, tasmā ‘‘aññatra adhimānā’’ti ayaṃ anupaññatti uppajjamānā vītikkamābhāvā anāpattikarā jātā. Abbohārikattāti supinante vijjamānāyapi cetanāya vītikkamicchāya ca abbohārikattā. Kiñcāpi hi supinante mocanassādacetanā saṃvijjati, kadāci upakkamanampi hoti, tathāpi thinamiddhena abhibhūtattā taṃ cittaṃ abbohārikaṃ, cittassa abbohārikattā upakkamakiriyāsaṃvattanikāpi cetanā abbohārikā. Teneva ‘‘atthesā bhikkhave cetanā, sā ca kho abbohārikā’’ti (pārā. 235) bhagavatā vuttā, tasmā ‘‘aññatra supinantā’’ti ayaṃ anupaññatti abbohārikattā anāpattikarā jātā.
অকতে ৰীতিক্কমেতি ‘‘কুক্কুচ্চাযন্তা ন ভুঞ্জিংসূ’’তিআদীসু ৰিয ৰীতিক্কমে অকতে। সিথিলং করোন্তীতি পঠমং সামঞ্ঞতো বদ্ধসিক্খাপদং মোচেত্ৰা অত্তনো অত্তনো ৰিসযে অনাপত্তিকরণৰসেন সিথিলং করোন্তী। দ্ৰারং দদমানাতি অনাপত্তিযা দ্ৰারং দদমানা। তেনেৰাহ ‘‘অপরাপরম্পি অনাপত্তিং কুরুমানা’’তি। ননু চ সঞ্চরিত্তসিক্খাপদে ‘‘অন্তমসো তঙ্খণিকাযপী’’তি অনুপঞ্ঞত্তি উপ্পজ্জমানা আপত্তিমেৰ করোন্তী উপ্পন্না, অথ কস্মা ‘‘অনাপত্তিং কুরুমানা উপ্পজ্জতী’’তি ৰুত্তন্তি আহ ‘‘অন্তমসো তঙ্খণিকাযপী’’তিআদি। উদাযিনা ভিক্খুনা তঙ্খণিকায সঞ্চরিত্তং আপন্নৰত্থুস্মিং পঞ্ঞত্তত্তা ‘‘কতে ৰীতিক্কমে’’তি ৰুত্তং। পঞ্ঞত্তিগতিকাৰ হোতীতি মূলপঞ্ঞত্তিযংযেৰ অন্তোগধা হোতি।
Akate vītikkameti ‘‘kukkuccāyantā na bhuñjiṃsū’’tiādīsu viya vītikkame akate. Sithilaṃ karontīti paṭhamaṃ sāmaññato baddhasikkhāpadaṃ mocetvā attano attano visaye anāpattikaraṇavasena sithilaṃ karontī. Dvāraṃ dadamānāti anāpattiyā dvāraṃ dadamānā. Tenevāha ‘‘aparāparampi anāpattiṃ kurumānā’’ti. Nanu ca sañcarittasikkhāpade ‘‘antamaso taṅkhaṇikāyapī’’ti anupaññatti uppajjamānā āpattimeva karontī uppannā, atha kasmā ‘‘anāpattiṃ kurumānā uppajjatī’’ti vuttanti āha ‘‘antamaso taṅkhaṇikāyapī’’tiādi. Udāyinā bhikkhunā taṅkhaṇikāya sañcarittaṃ āpannavatthusmiṃ paññattattā ‘‘kate vītikkame’’ti vuttaṃ. Paññattigatikāva hotīti mūlapaññattiyaṃyeva antogadhā hoti.
মক্কটিৰত্থুকথাৰণ্ণনা নিট্ঠিতা।
Makkaṭivatthukathāvaṇṇanā niṭṭhitā.
সন্থতভাণৰারো
Santhatabhāṇavāro
Related texts:
তিপিটক (মূল) • Tipiṭaka (Mūla) / ৰিনযপিটক • Vinayapiṭaka / মহাৰিভঙ্গ • Mahāvibhaṅga / ১. পঠমপারাজিকং • 1. Paṭhamapārājikaṃ
অট্ঠকথা • Aṭṭhakathā / ৰিনযপিটক (অট্ঠকথা) • Vinayapiṭaka (aṭṭhakathā) / মহাৰিভঙ্গ-অট্ঠকথা • Mahāvibhaṅga-aṭṭhakathā / ১. পঠমপারাজিকং • 1. Paṭhamapārājikaṃ
টীকা • Tīkā / ৰিনযপিটক (টীকা) • Vinayapiṭaka (ṭīkā) / ৰজিরবুদ্ধি-টীকা • Vajirabuddhi-ṭīkā / মক্কটীৰত্থুকথাৰণ্ণনা • Makkaṭīvatthukathāvaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / ৰিমতিৰিনোদনী-টীকা • Vimativinodanī-ṭīkā / মক্কটীৰত্থুকথাৰণ্ণনা • Makkaṭīvatthukathāvaṇṇanā
