| Library / Tipiṭaka / តិបិដក • Tipiṭaka / អង្គុត្តរនិកាយ • Aṅguttaranikāya |
៥. មលសុត្តំ
5. Malasuttaṃ
១៥. ‘‘អដ្ឋិមានិ , ភិក្ខវេ, មលានិ។ កតមានិ អដ្ឋ? អសជ្ឈាយមលា, ភិក្ខវេ, មន្តា; អនុដ្ឋានមលា, ភិក្ខវេ, ឃរា; មលំ, ភិក្ខវេ, វណ្ណស្ស កោសជ្ជំ; បមាទោ, ភិក្ខវេ, រក្ខតោ មលំ; មលំ, ភិក្ខវេ, ឥត្ថិយា ទុច្ចរិតំ; មច្ឆេរំ, ភិក្ខវេ, ទទតោ មលំ; មលា, ភិក្ខវេ, បាបកា អកុសលា ធម្មា អស្មិំ លោកេ បរម្ហិ ច; តតោ 1, ភិក្ខវេ, មលា មលតរំ អវិជ្ជា បរមំ មលំ។ ឥមានិ ខោ, ភិក្ខវេ, អដ្ឋ មលានី’’តិ។
15. ‘‘Aṭṭhimāni , bhikkhave, malāni. Katamāni aṭṭha? Asajjhāyamalā, bhikkhave, mantā; anuṭṭhānamalā, bhikkhave, gharā; malaṃ, bhikkhave, vaṇṇassa kosajjaṃ; pamādo, bhikkhave, rakkhato malaṃ; malaṃ, bhikkhave, itthiyā duccaritaṃ; maccheraṃ, bhikkhave, dadato malaṃ; malā, bhikkhave, pāpakā akusalā dhammā asmiṃ loke paramhi ca; tato 2, bhikkhave, malā malataraṃ avijjā paramaṃ malaṃ. Imāni kho, bhikkhave, aṭṭha malānī’’ti.
‘‘អសជ្ឈាយមលា មន្តា, អនុដ្ឋានមលា ឃរា;
‘‘Asajjhāyamalā mantā, anuṭṭhānamalā gharā;
មលំ វណ្ណស្ស កោសជ្ជំ, បមាទោ រក្ខតោ មលំ។
Malaṃ vaṇṇassa kosajjaṃ, pamādo rakkhato malaṃ.
‘‘មលិត្ថិយា ទុច្ចរិតំ, មច្ឆេរំ ទទតោ មលំ;
‘‘Malitthiyā duccaritaṃ, maccheraṃ dadato malaṃ;
មលា វេ បាបកា ធម្មា, អស្មិំ លោកេ បរម្ហិ ច;
Malā ve pāpakā dhammā, asmiṃ loke paramhi ca;
តតោ មលា មលតរំ, អវិជ្ជា បរមំ មល’’ន្តិ។ បញ្ចមំ;
Tato malā malataraṃ, avijjā paramaṃ mala’’nti. pañcamaṃ;
Footnotes:
Related texts:
អដ្ឋកថា • Aṭṭhakathā / សុត្តបិដក (អដ្ឋកថា) • Suttapiṭaka (aṭṭhakathā) / អង្គុត្តរនិកាយ (អដ្ឋកថា) • Aṅguttaranikāya (aṭṭhakathā) / ៥. មលសុត្តវណ្ណនា • 5. Malasuttavaṇṇanā
ដីកា • Tīkā / សុត្តបិដក (ដីកា) • Suttapiṭaka (ṭīkā) / អង្គុត្តរនិកាយ (ដីកា) • Aṅguttaranikāya (ṭīkā) / ៥-៨. មលសុត្តាទិវណ្ណនា • 5-8. Malasuttādivaṇṇanā
