| Library / Tipiṭaka / တိပိဋက • Tipiṭaka / အင္ဂုတ္တရနိကာယ • Aṅguttaranikāya |
၁၀. မလသုတ္တံ
10. Malasuttaṃ
၁၀. ‘‘တီဟိ, ဘိက္ခဝေ, ဓမ္မေဟိ သမန္နာဂတော တယော မလေ အပ္ပဟာယ ယထာဘတံ နိက္ခိတ္တော ဧဝံ နိရယေ။ ကတမေဟိ တီဟိ? ဒုသ္သီလော စ ဟောတိ, ဒုသ္သီလ္ယမလဉ္စသ္သ အပ္ပဟီနံ ဟောတိ; ဣသ္သုကီ စ ဟောတိ, ဣသ္သာမလဉ္စသ္သ အပ္ပဟီနံ ဟောတိ; မစ္ဆရီ စ ဟောတိ, မစ္ဆေရမလဉ္စသ္သ အပ္ပဟီနံ ဟောတိ။ ဣမေဟိ ခော, ဘိက္ခဝေ, တီဟိ ဓမ္မေဟိ သမန္နာဂတော ဣမေ တယော မလေ အပ္ပဟာယ ယထာဘတံ နိက္ခိတ္တော ဧဝံ နိရယေ။
10. ‘‘Tīhi, bhikkhave, dhammehi samannāgato tayo male appahāya yathābhataṃ nikkhitto evaṃ niraye. Katamehi tīhi? Dussīlo ca hoti, dussīlyamalañcassa appahīnaṃ hoti; issukī ca hoti, issāmalañcassa appahīnaṃ hoti; maccharī ca hoti, maccheramalañcassa appahīnaṃ hoti. Imehi kho, bhikkhave, tīhi dhammehi samannāgato ime tayo male appahāya yathābhataṃ nikkhitto evaṃ niraye.
‘‘တီဟိ , ဘိက္ခဝေ, ဓမ္မေဟိ သမန္နာဂတော တယော မလေ ပဟာယ ယထာဘတံ နိက္ခိတ္တော ဧဝံ သဂ္ဂေ။ ကတမေဟိ တီဟိ? သီလဝာ စ ဟောတိ, ဒုသ္သီလ္ယမလဉ္စသ္သ ပဟီနံ ဟောတိ; အနိသ္သုကီ စ ဟောတိ, ဣသ္သာမလဉ္စသ္သ ပဟီနံ ဟောတိ; အမစ္ဆရီ စ ဟောတိ, မစ္ဆေရမလဉ္စသ္သ ပဟီနံ ဟောတိ။ ဣမေဟိ ခော, ဘိက္ခဝေ, တီဟိ ဓမ္မေဟိ သမန္နာဂတော ဣမေ တယော မလေ ပဟာယ ယထာဘတံ နိက္ခိတ္တော ဧဝံ သဂ္ဂေ’’တိ။ ဒသမံ။
‘‘Tīhi , bhikkhave, dhammehi samannāgato tayo male pahāya yathābhataṃ nikkhitto evaṃ sagge. Katamehi tīhi? Sīlavā ca hoti, dussīlyamalañcassa pahīnaṃ hoti; anissukī ca hoti, issāmalañcassa pahīnaṃ hoti; amaccharī ca hoti, maccheramalañcassa pahīnaṃ hoti. Imehi kho, bhikkhave, tīhi dhammehi samannāgato ime tayo male pahāya yathābhataṃ nikkhitto evaṃ sagge’’ti. Dasamaṃ.
ဗာလဝဂ္ဂော ပဌမော။
Bālavaggo paṭhamo.
တသ္သုဒ္ဒာနံ –
Tassuddānaṃ –
ဘယံ လက္ခဏစိန္တီ စ၊ အစ္စယဉ္စ အယောနိသော။
Bhayaṃ lakkhaṇacintī ca, accayañca ayoniso;
အကုသလဉ္စ သာဝဇ္ဇံ၊ သဗ္ယာဗဇ္ဈခတံ မလန္တိ။
Akusalañca sāvajjaṃ, sabyābajjhakhataṃ malanti.
Related texts:
အဋ္ဌကထာ • Aṭṭhakathā / သုတ္တပိဋက (အဋ္ဌကထာ) • Suttapiṭaka (aṭṭhakathā) / အင္ဂုတ္တရနိကာယ (အဋ္ဌကထာ) • Aṅguttaranikāya (aṭṭhakathā) / ၁၀. မလသုတ္တဝဏ္ဏနာ • 10. Malasuttavaṇṇanā
ဋီကာ • Tīkā / သုတ္တပိဋက (ဋီကာ) • Suttapiṭaka (ṭīkā) / အင္ဂုတ္တရနိကာယ (ဋီကာ) • Aṅguttaranikāya (ṭīkā) / ၅-၁၀. အယောနိသောသုတ္တာဒိဝဏ္ဏနာ • 5-10. Ayonisosuttādivaṇṇanā
