| Library / Tipiṭaka / д̇ибидага • Tipiṭaka / т̇зраг̇аат̇аа-адтагат̇аа • Theragāthā-aṭṭhakathā |
5. малид̇авамбхад̇т̇зраг̇аат̇ааван̣н̣анаа
5. Malitavambhattheragāthāvaṇṇanā
угган̣тид̇од̇и ааяасмад̇о малид̇авамбхад̇т̇зрасса г̇аат̇аа. гаа уббад̇д̇и? аяам̣ гира бад̣̇умуд̇д̇арасса бхаг̇авад̇о гаалз химаванд̇ад̇о авид̣̇уурз ан̃н̃ад̇арасмим̣ ж̇аад̇ассарз сагун̣о худ̇ваа ниб̣б̣ад̇д̇и, бад̣̇умуд̇д̇аро бхаг̇аваа д̇ам̣ ануг̇г̇ан̣ханд̇о д̇ад̇т̇а г̇анд̇ваа ж̇аад̇ассарад̇ийрз жан̇гамад̇и. сагун̣о бхаг̇аванд̇ам̣ д̣̇исваа басаннамаанасо сарз гумуд̣̇аани г̇ахзд̇ваа бхаг̇аванд̇ам̣ бууж̇зси. со д̇зна бун̃н̃агаммзна д̣̇звамануссзсу сам̣саранд̇о имасмим̣ б̣уд̣̇д̇хуббаад̣̇з гуругажчанаг̇арз ан̃н̃ад̇арасса б̣раахман̣асса буд̇д̇о худ̇ваа ниб̣б̣ад̇д̇и, малид̇авамбход̇исса наамам̣ ахоси. со вин̃н̃уд̇ам̣ бад̇д̇о бажчаабхуумахаат̇зрам̣ убасан̇гамид̇ваа д̇асса санд̇игз д̇хаммам̣ суд̇ваа бадилад̣̇д̇хасад̣̇д̇хо баб̣б̣аж̇ид̇ваа вибассанааяа гаммам̣ гаронд̇о вихарад̇и. д̇асса жа аяам̣ сабхааво, яад̇т̇а бхож̇анасаббааяо д̣̇уллабхо, ид̇арз сулабхаа, д̇ад̇о на баггамад̇и. яад̇т̇а бана бхож̇анасаббааяо сулабхо, ид̇арз д̣̇уллабхаа, д̇ад̇т̇а на васад̇и баггамад̇зва. звам̣ вихаранд̇о жа хзд̇усамбаннад̇ааяа махаабурисаж̇аад̇игад̇ааяа жа нажирассзва вибассанам̣ вад̣дхзд̇ваа арахад̇д̇ам̣ баабун̣и. д̇зна вуд̇д̇ам̣ абад̣̇аанз (аба. т̇зра 1.16.51-57) –
Ukkaṇṭhitoti āyasmato malitavambhattherassa gāthā. Kā uppatti? Ayaṃ kira padumuttarassa bhagavato kāle himavantato avidūre aññatarasmiṃ jātassare sakuṇo hutvā nibbatti, padumuttaro bhagavā taṃ anuggaṇhanto tattha gantvā jātassaratīre caṅkamati. Sakuṇo bhagavantaṃ disvā pasannamānaso sare kumudāni gahetvā bhagavantaṃ pūjesi. So tena puññakammena devamanussesu saṃsaranto imasmiṃ buddhuppāde kurukacchanagare aññatarassa brāhmaṇassa putto hutvā nibbatti, malitavambhotissa nāmaṃ ahosi. So viññutaṃ patto pacchābhūmahātheraṃ upasaṅkamitvā tassa santike dhammaṃ sutvā paṭiladdhasaddho pabbajitvā vipassanāya kammaṃ karonto viharati. Tassa ca ayaṃ sabhāvo, yattha bhojanasappāyo dullabho, itare sulabhā, tato na pakkamati. Yattha pana bhojanasappāyo sulabho, itare dullabhā, tattha na vasati pakkamateva. Evaṃ viharanto ca hetusampannatāya mahāpurisajātikatāya ca nacirasseva vipassanaṃ vaḍḍhetvā arahattaṃ pāpuṇi. Tena vuttaṃ apadāne (apa. thera 1.16.51-57) –
‘‘химаванд̇ассаавид̣̇уурз , махааж̇аад̇ассаро аху;
‘‘Himavantassāvidūre , mahājātassaro ahu;
бад̣̇умуббаласан̃чанно, бун̣д̣арийгасамод̇т̇адо.
Padumuppalasañchanno, puṇḍarīkasamotthaṭo.
‘‘гугуд̇т̇о наама наамзна, д̇ад̇т̇аасим̣ сагун̣о д̇ад̣̇аа;
‘‘Kukuttho nāma nāmena, tatthāsiṃ sakuṇo tadā;
сийлаваа б̣уд̣̇д̇хисамбанно, бун̃н̃аабун̃н̃зсу говид̣̇о.
Sīlavā buddhisampanno, puññāpuññesu kovido.
‘‘бад̣̇умуд̇д̇аро логавид̣̇уу, аахуд̇ийнам̣ бадиг̇г̇ахо;
‘‘Padumuttaro lokavidū, āhutīnaṃ paṭiggaho;
ж̇аад̇ассарассаавид̣̇уурз, сан̃жарид̇т̇а махаамуни.
Jātassarassāvidūre, sañcarittha mahāmuni.
‘‘ж̇алаж̇ам̣ гумуд̣̇ам̣ чзд̇ваа, убанзсим̣ махзсино;
‘‘Jalajaṃ kumudaṃ chetvā, upanesiṃ mahesino;
мама сан̇габбаман̃н̃ааяа, бадиг̇г̇ахи махаамуни.
Mama saṅkappamaññāya, paṭiggahi mahāmuni.
‘‘д̇ан̃жа д̣̇аанам̣ д̣̇ад̣̇ид̇ваана, суггамуулзна жод̣̇ид̇о;
‘‘Tañca dānaṃ daditvāna, sukkamūlena codito;
габбаанам̣ сад̇асахассам̣, д̣̇уг̇г̇ад̇им̣ нубабаж̇ж̇ахам̣.
Kappānaṃ satasahassaṃ, duggatiṃ nupapajjahaṃ.
‘‘сол̣асзд̇о габбасад̇з, аасум̣ варун̣анаамагаа;
‘‘Soḷaseto kappasate, āsuṃ varuṇanāmakā;
адта зд̇з ж̇анаад̇хибаа, жаггавад̇д̇ий махаб̣б̣алаа.
Aṭṭha ete janādhipā, cakkavattī mahabbalā.
‘‘гилзсаа жхаабид̇аа маяхам̣…бз… гад̇ам̣ б̣уд̣̇д̇хасса саасана’’нд̇и.
‘‘Kilesā jhāpitā mayhaṃ…pe… kataṃ buddhassa sāsana’’nti.
арахад̇д̇ам̣ бана бад̇ваа ад̇д̇ано бадибад̇д̇им̣ бажжавзгкид̇ваа уд̣̇аанзнд̇о –
Arahattaṃ pana patvā attano paṭipattiṃ paccavekkhitvā udānento –
105.
105.
‘‘угган̣тид̇оби на васз, рамамааноби баггамз;
‘‘Ukkaṇṭhitopi na vase, ramamānopi pakkame;
на д̇взваанад̇т̇асам̣хид̇ам̣, васз ваасам̣ вижагкан̣о’’д̇и. – г̇аат̇ам̣ абхааси;
Na tvevānatthasaṃhitaṃ, vase vāsaṃ vicakkhaṇo’’ti. – gāthaṃ abhāsi;
д̇ад̇т̇а угган̣тид̇оби на васзд̇и яасмим̣ ааваасз васанд̇асса мз бхож̇анасаббааяаалаабхзна ад̇хигусалзсу д̇хаммзсу угган̣таа анабхирад̇и уббаж̇ж̇ад̇и, д̇ад̇т̇а угган̣тид̇оби васаамиязва ид̇арасаббааяалаабхзна на баггамз на баггамаами. на васзд̇и зд̇т̇а на-гаарзнаби баггамзд̇ибад̣̇ам̣ самб̣анд̇хид̇аб̣б̣ам̣. рамамааноби баггамзд̇и яасмим̣ бана ааваасз васанд̇асса мз бажжаяавзгаллаабхаавзна над̇т̇и угган̣таа, ан̃н̃ад̣̇ад̇т̇у абхирамаами, звам̣ абхирамамааноби авасзсасаббааяаалаабхзна д̇ад̇о баггамз, на васзяяам̣. звам̣ бадибаж̇ж̇анд̇оваахам̣ нажирассзва сагад̇т̇ам̣ бажжубаад̣̇инд̇и. аяан̃жзд̇т̇а ад̇д̇абадибад̇д̇ибажжавзгкан̣ааяам̣ яож̇анаа. барасса оваад̣̇ад̣̇аанз бана васзяяа на баггамзяяаад̇и вид̇хаанавасзна яож̇зд̇аб̣б̣ам̣. на д̇взваанад̇т̇асам̣хид̇ам̣, васз ваасам̣ вижагкан̣од̇и яасмим̣ ааваасз бажжаяаа сулабхаа , саман̣ад̇хаммо на баарибуурим̣ г̇ажчад̇и, яасмин̃жа ааваасз бажжаяаа д̣̇уллабхаа, саман̣ад̇хаммоби баарибуурим̣ на г̇ажчад̇и, зваруубо ааваасо ид̇ха анад̇т̇асам̣хид̇о наама авад̣дхисахид̇од̇и гад̇ваа. зваруубам̣ ваасам̣ вижагкан̣о вин̃н̃уж̇аад̇иго сагад̇т̇ам̣ барибуурзд̇угаамо над̇взва васзяяа. яад̇т̇а бана бан̃жан̇г̇асаманнааг̇ад̇о ааваасо лаб̣бхад̇и, сад̇д̇аби саббааяаа лаб̣бханд̇и, д̇ад̇т̇зва васзяяаад̇и ад̇т̇о.
Tattha ukkaṇṭhitopi na vaseti yasmiṃ āvāse vasantassa me bhojanasappāyālābhena adhikusalesu dhammesu ukkaṇṭhā anabhirati uppajjati, tattha ukkaṇṭhitopi vasāmiyeva itarasappāyalābhena na pakkame na pakkamāmi. Na vaseti ettha na-kārenapi pakkametipadaṃ sambandhitabbaṃ. Ramamānopi pakkameti yasmiṃ pana āvāse vasantassa me paccayavekallābhāvena natthi ukkaṇṭhā, aññadatthu abhiramāmi, evaṃ abhiramamānopi avasesasappāyālābhena tato pakkame, na vaseyyaṃ. Evaṃ paṭipajjantovāhaṃ nacirasseva sakatthaṃ paccupādinti. Ayañcettha attapaṭipattipaccavekkhaṇāyaṃ yojanā. Parassa ovādadāne pana vaseyya na pakkameyyāti vidhānavasena yojetabbaṃ. Na tvevānatthasaṃhitaṃ, vase vāsaṃ vicakkhaṇoti yasmiṃ āvāse paccayā sulabhā , samaṇadhammo na pāripūriṃ gacchati, yasmiñca āvāse paccayā dullabhā, samaṇadhammopi pāripūriṃ na gacchati, evarūpo āvāso idha anatthasaṃhito nāma avaḍḍhisahitoti katvā. Evarūpaṃ vāsaṃ vicakkhaṇo viññujātiko sakatthaṃ paripūretukāmo natveva vaseyya. Yattha pana pañcaṅgasamannāgato āvāso labbhati, sattapi sappāyā labbhanti, tattheva vaseyyāti attho.
малид̇авамбхад̇т̇зраг̇аат̇ааван̣н̣анаа нидтид̇аа.
Malitavambhattheragāthāvaṇṇanā niṭṭhitā.
Related texts:
д̇ибидага (муула) • Tipiṭaka (Mūla) / суд̇д̇абидага • Suttapiṭaka / куд̣̇д̣̇аганигааяа • Khuddakanikāya / т̇зраг̇аат̇аабаал̣и • Theragāthāpāḷi / 5. малид̇авамбхад̇т̇зраг̇аат̇аа • 5. Malitavambhattheragāthā
