Library / Tipiṭaka / তিপিটক • Tipiṭaka / অঙ্গুত্তরনিকায • Aṅguttaranikāya

    ৭. মল্লিকাদেৰীসুত্তং

    7. Mallikādevīsuttaṃ

    ১৯৭. একং সমযং ভগৰা সাৰত্থিযং ৰিহরতি জেতৰনে অনাথপিণ্ডিকস্স আরামে। অথ খো মল্লিকা দেৰী যেন ভগৰা তেনুপসঙ্কমি; উপসঙ্কমিত্ৰা ভগৰন্তং অভিৰাদেত্ৰা একমন্তং নিসীদি। একমন্তং নিসিন্না খো মল্লিকা দেৰী ভগৰন্তং এতদৰোচ –

    197. Ekaṃ samayaṃ bhagavā sāvatthiyaṃ viharati jetavane anāthapiṇḍikassa ārāme. Atha kho mallikā devī yena bhagavā tenupasaṅkami; upasaṅkamitvā bhagavantaṃ abhivādetvā ekamantaṃ nisīdi. Ekamantaṃ nisinnā kho mallikā devī bhagavantaṃ etadavoca –

    ‘‘কো নু খো, ভন্তে, হেতু কো পচ্চযো, যেন মিধেকচ্চো মাতুগামো দুব্বণ্ণা চ হোতি দুরূপা সুপাপিকা 1 দস্সনায; দলিদ্দা চ হোতি অপ্পস্সকা অপ্পভোগা অপ্পেসক্খা চ?

    ‘‘Ko nu kho, bhante, hetu ko paccayo, yena midhekacco mātugāmo dubbaṇṇā ca hoti durūpā supāpikā 2 dassanāya; daliddā ca hoti appassakā appabhogā appesakkhā ca?

    ‘‘কো পন, ভন্তে, হেতু কো পচ্চযো, যেন মিধেকচ্চো মাতুগামো দুব্বণ্ণা চ হোতি দুরূপা সুপাপিকা দস্সনায; অড্ঢা চ হোতি মহদ্ধনা মহাভোগা মহেসক্খা চ?

    ‘‘Ko pana, bhante, hetu ko paccayo, yena midhekacco mātugāmo dubbaṇṇā ca hoti durūpā supāpikā dassanāya; aḍḍhā ca hoti mahaddhanā mahābhogā mahesakkhā ca?

    ‘‘কো নু খো, ভন্তে, হেতু কো পচ্চযো, যেন মিধেকচ্চো মাতুগামো অভিরূপা চ হোতি দস্সনীযা পাসাদিকা পরমায ৰণ্ণপোক্খরতায সমন্নাগতা; দলিদ্দা চ হোতি অপ্পস্সকা অপ্পভোগা অপ্পেসক্খা চ?

    ‘‘Ko nu kho, bhante, hetu ko paccayo, yena midhekacco mātugāmo abhirūpā ca hoti dassanīyā pāsādikā paramāya vaṇṇapokkharatāya samannāgatā; daliddā ca hoti appassakā appabhogā appesakkhā ca?

    ‘‘কো পন, ভন্তে, হেতু কো পচ্চযো, যেন মিধেকচ্চো মাতুগামো অভিরূপা চ হোতি দস্সনীযা পাসাদিকা পরমায ৰণ্ণপোক্খরতায সমন্নাগতা, অড্ঢা চ হোতি মহদ্ধনা মহাভোগা মহেসক্খা চা’’তি?

    ‘‘Ko pana, bhante, hetu ko paccayo, yena midhekacco mātugāmo abhirūpā ca hoti dassanīyā pāsādikā paramāya vaṇṇapokkharatāya samannāgatā, aḍḍhā ca hoti mahaddhanā mahābhogā mahesakkhā cā’’ti?

    ‘‘ইধ , মল্লিকে, একচ্চো মাতুগামো কোধনা হোতি উপাযাসবহুলা। অপ্পম্পি ৰুত্তা সমানা অভিসজ্জতি কুপ্পতি ব্যাপজ্জতি পতিত্থীযতি, কোপঞ্চ দোসঞ্চ অপ্পচ্চযঞ্চ পাতুকরোতি। সা 3 ন দাতা হোতি সমণস্স ৰা ব্রাহ্মণস্স ৰা অন্নং পানং ৰত্থং যানং মালাগন্ধৰিলেপনং সেয্যাৰসথপদীপেয্যং। ইস্সামনিকা 4 খো পন হোতি; পরলাভসক্কারগরুকারমাননৰন্দনপূজনাসু ইস্সতি উপদুস্সতি ইস্সং বন্ধতি। সা চে ততো চুতা ইত্থত্তং আগচ্ছতি, সা 5 যত্থ যত্থ পচ্চাজাযতি দুব্বণ্ণা চ হোতি দুরূপা সুপাপিকা দস্সনায; দলিদ্দা চ হোতি অপ্পস্সকা অপ্পভোগা অপ্পেসক্খা চ।

    ‘‘Idha , mallike, ekacco mātugāmo kodhanā hoti upāyāsabahulā. Appampi vuttā samānā abhisajjati kuppati byāpajjati patitthīyati, kopañca dosañca appaccayañca pātukaroti. Sā 6 na dātā hoti samaṇassa vā brāhmaṇassa vā annaṃ pānaṃ vatthaṃ yānaṃ mālāgandhavilepanaṃ seyyāvasathapadīpeyyaṃ. Issāmanikā 7 kho pana hoti; paralābhasakkāragarukāramānanavandanapūjanāsu issati upadussati issaṃ bandhati. Sā ce tato cutā itthattaṃ āgacchati, sā 8 yattha yattha paccājāyati dubbaṇṇā ca hoti durūpā supāpikā dassanāya; daliddā ca hoti appassakā appabhogā appesakkhā ca.

    ‘‘ইধ পন, মল্লিকে, একচ্চো মাতুগামো কোধনা হোতি উপাযাসবহুলা। অপ্পম্পি ৰুত্তা সমানা অভিসজ্জতি কুপ্পতি ব্যাপজ্জতি পতিত্থীযতি, কোপঞ্চ দোসঞ্চ অপ্পচ্চযঞ্চ পাতুকরোতি। সা দাতা হোতি সমণস্স ৰা ব্রাহ্মণস্স ৰা অন্নং পানং ৰত্থং যানং মালাগন্ধৰিলেপনং সেয্যাৰসথপদীপেয্যং। অনিস্সামনিকা খো পন হোতি; পরলাভসক্কারগরুকারমাননৰন্দনপূজনাসু ন ইস্সতি ন উপদুস্সতি ন ইস্সং বন্ধতি। সা চে ততো চুতা ইত্থত্তং আগচ্ছতি, সা যত্থ যত্থ পচ্চাজাযতি দুব্বণ্ণা চ হোতি দুরূপা সুপাপিকা দস্সনায; অড্ঢা চ হোতি মহদ্ধনা মহাভোগা মহেসক্খা চ।

    ‘‘Idha pana, mallike, ekacco mātugāmo kodhanā hoti upāyāsabahulā. Appampi vuttā samānā abhisajjati kuppati byāpajjati patitthīyati, kopañca dosañca appaccayañca pātukaroti. Sā dātā hoti samaṇassa vā brāhmaṇassa vā annaṃ pānaṃ vatthaṃ yānaṃ mālāgandhavilepanaṃ seyyāvasathapadīpeyyaṃ. Anissāmanikā kho pana hoti; paralābhasakkāragarukāramānanavandanapūjanāsu na issati na upadussati na issaṃ bandhati. Sā ce tato cutā itthattaṃ āgacchati, sā yattha yattha paccājāyati dubbaṇṇā ca hoti durūpā supāpikā dassanāya; aḍḍhā ca hoti mahaddhanā mahābhogā mahesakkhā ca.

    ‘‘ইধ পন, মল্লিকে, একচ্চো মাতুগামো অক্কোধনা হোতি অনুপাযাসবহুলা। বহুম্পি ৰুত্তা সমানা নাভিসজ্জতি ন কুপ্পতি ন ব্যাপজ্জতি ন পতিত্থীযতি, ন কোপঞ্চ দোসঞ্চ অপ্পচ্চযঞ্চ পাতুকরোতি। সা ন দাতা হোতি সমণস্স ৰা ব্রাহ্মণস্স ৰা অন্নং পানং ৰত্থং যানং মালাগন্ধৰিলেপনং সেয্যাৰসথপদীপেয্যং। ইস্সামনিকা খো পন হোতি; পরলাভসক্কারগরুকারমাননৰন্দনপূজনাসু ইস্সতি উপদুস্সতি ইস্সং বন্ধতি। সা চে ততো চুতা ইত্থত্তং আগচ্ছতি, সা যত্থ যত্থ পচ্চাজাযতি অভিরূপা চ হোতি দস্সনীযা পাসাদিকা পরমায ৰণ্ণপোক্খরতায সমন্নাগতা; দলিদ্দা চ হোতি অপ্পস্সকা অপ্পভোগা অপ্পেসক্খা চ।

    ‘‘Idha pana, mallike, ekacco mātugāmo akkodhanā hoti anupāyāsabahulā. Bahumpi vuttā samānā nābhisajjati na kuppati na byāpajjati na patitthīyati, na kopañca dosañca appaccayañca pātukaroti. Sā na dātā hoti samaṇassa vā brāhmaṇassa vā annaṃ pānaṃ vatthaṃ yānaṃ mālāgandhavilepanaṃ seyyāvasathapadīpeyyaṃ. Issāmanikā kho pana hoti; paralābhasakkāragarukāramānanavandanapūjanāsu issati upadussati issaṃ bandhati. Sā ce tato cutā itthattaṃ āgacchati, sā yattha yattha paccājāyati abhirūpā ca hoti dassanīyā pāsādikā paramāya vaṇṇapokkharatāya samannāgatā; daliddā ca hoti appassakā appabhogā appesakkhā ca.

    ‘‘ইধ পন, মল্লিকে, একচ্চো মাতুগামো অক্কোধনা হোতি অনুপাযাসবহুলা। বহুম্পি ৰুত্তা সমানা নাভিসজ্জতি ন কুপ্পতি ন ব্যাপজ্জতি ন পতিত্থীযতি, ন কোপঞ্চ দোসঞ্চ অপ্পচ্চযঞ্চ পাতুকরোতি। সা দাতা হোতি সমণস্স ৰা ব্রাহ্মণস্স ৰা অন্নং পানং ৰত্থং যানং মালাগন্ধৰিলেপনং সেয্যাৰসথপদীপেয্যং। অনিস্সামনিকা খো পন হোতি; পরলাভসক্কারগরুকারমাননৰন্দনপূজনাসু ন ইস্সতি ন উপদুস্সতি ন ইস্সং বন্ধতি। সা চে ততো চুতা ইত্থত্তং আগচ্ছতি, সা যত্থ যত্থ পচ্চাজাযতি অভিরূপা চ হোতি দস্সনীযা পাসাদিকা পরমায ৰণ্ণপোক্খরতায সমন্নাগতা; অড্ঢা চ হোতি মহদ্ধনা মহাভোগা মহেসক্খা চ।

    ‘‘Idha pana, mallike, ekacco mātugāmo akkodhanā hoti anupāyāsabahulā. Bahumpi vuttā samānā nābhisajjati na kuppati na byāpajjati na patitthīyati, na kopañca dosañca appaccayañca pātukaroti. Sā dātā hoti samaṇassa vā brāhmaṇassa vā annaṃ pānaṃ vatthaṃ yānaṃ mālāgandhavilepanaṃ seyyāvasathapadīpeyyaṃ. Anissāmanikā kho pana hoti; paralābhasakkāragarukāramānanavandanapūjanāsu na issati na upadussati na issaṃ bandhati. Sā ce tato cutā itthattaṃ āgacchati, sā yattha yattha paccājāyati abhirūpā ca hoti dassanīyā pāsādikā paramāya vaṇṇapokkharatāya samannāgatā; aḍḍhā ca hoti mahaddhanā mahābhogā mahesakkhā ca.

    ‘‘অযং খো, মল্লিকে, হেতু অযং পচ্চযো, যেন মিধেকচ্চো মাতুগামো দুব্বণ্ণা চ হোতি দুরূপা সুপাপিকা দস্সনায; দলিদ্দা চ হোতি অপ্পস্সকা অপ্পভোগা অপ্পেসক্খা চ। অযং পন, মল্লিকে, হেতু অযং পচ্চযো, যেন মিধেকচ্চো মাতুগামো দুব্বণ্ণা চ হোতি দুরূপা সুপাপিকা দস্সনায; অড্ঢা চ হোতি মহদ্ধনা মহাভোগা মহেসক্খা চ। অযং খো, মল্লিকে, হেতু অযং পচ্চযো, যেন মিধেকচ্চো মাতুগামো অভিরূপা চ হোতি দস্সনীযা পাসাদিকা পরমায ৰণ্ণপোক্খরতায সমন্নাগতা; দলিদ্দা চ হোতি অপ্পস্সকা অপ্পভোগা অপ্পেসক্খা চ। অযং পন, মল্লিকে, হেতু অযং পচ্চযো, যেন মিধেকচ্চো মাতুগামো অভিরূপা চ হোতি দস্সনীযা পাসাদিকা পরমায ৰণ্ণপোক্খরতায সমন্নাগতা; অড্ঢা চ হোতি মহদ্ধনা মহাভোগা মহেসক্খা চা’’তি।

    ‘‘Ayaṃ kho, mallike, hetu ayaṃ paccayo, yena midhekacco mātugāmo dubbaṇṇā ca hoti durūpā supāpikā dassanāya; daliddā ca hoti appassakā appabhogā appesakkhā ca. Ayaṃ pana, mallike, hetu ayaṃ paccayo, yena midhekacco mātugāmo dubbaṇṇā ca hoti durūpā supāpikā dassanāya; aḍḍhā ca hoti mahaddhanā mahābhogā mahesakkhā ca. Ayaṃ kho, mallike, hetu ayaṃ paccayo, yena midhekacco mātugāmo abhirūpā ca hoti dassanīyā pāsādikā paramāya vaṇṇapokkharatāya samannāgatā; daliddā ca hoti appassakā appabhogā appesakkhā ca. Ayaṃ pana, mallike, hetu ayaṃ paccayo, yena midhekacco mātugāmo abhirūpā ca hoti dassanīyā pāsādikā paramāya vaṇṇapokkharatāya samannāgatā; aḍḍhā ca hoti mahaddhanā mahābhogā mahesakkhā cā’’ti.

    এৰং ৰুত্তে মল্লিকা দেৰী ভগৰন্তং এতদৰোচ – ‘‘যা নূনাহং 9 ভন্তে, অঞ্ঞং জাতিং 10 কোধনা অহোসিং উপাযাসবহুলা, অপ্পম্পি ৰুত্তা সমানা অভিসজ্জিং কুপ্পিং ব্যাপজ্জিং পতিত্থীযিং কোপঞ্চ দোসঞ্চ অপ্পচ্চযঞ্চ পাত্ৰাকাসিং, সাহং, ভন্তে, এতরহি দুব্বণ্ণা দুরূপা সুপাপিকা দস্সনায।

    Evaṃ vutte mallikā devī bhagavantaṃ etadavoca – ‘‘yā nūnāhaṃ 11 bhante, aññaṃ jātiṃ 12 kodhanā ahosiṃ upāyāsabahulā, appampi vuttā samānā abhisajjiṃ kuppiṃ byāpajjiṃ patitthīyiṃ kopañca dosañca appaccayañca pātvākāsiṃ, sāhaṃ, bhante, etarahi dubbaṇṇā durūpā supāpikā dassanāya.

    ‘‘যা নূনাহং, ভন্তে, অঞ্ঞং জাতিং দাতা অহোসিং সমণস্স ৰা ব্রাহ্মণস্স ৰা অন্নং পানং ৰত্থং যানং মালাগন্ধৰিলেপনং সেয্যাৰসথপদীপেয্যং, সাহং, ভন্তে, এতরহি অড্ঢা 13 মহদ্ধনা মহাভোগা।

    ‘‘Yā nūnāhaṃ, bhante, aññaṃ jātiṃ dātā ahosiṃ samaṇassa vā brāhmaṇassa vā annaṃ pānaṃ vatthaṃ yānaṃ mālāgandhavilepanaṃ seyyāvasathapadīpeyyaṃ, sāhaṃ, bhante, etarahi aḍḍhā 14 mahaddhanā mahābhogā.

    ‘‘যা নূনাহং, ভন্তে, অঞ্ঞং জাতিং অনিস্সামনিকা অহোসিং, পরলাভসক্কারগরুকারমাননৰন্দনপূজনাসু ন ইস্সিং ন উপদুস্সিং ন ইস্সং বন্ধিং, সাহং, ভন্তে, এতরহি মহেসক্খা। সন্তি খো পন, ভন্তে, ইমস্মিং রাজকুলে খত্তিযকঞ্ঞাপি ব্রাহ্মণকঞ্ঞাপি গহপতিকঞ্ঞাপি, তাসাহং ইস্সরাধিপচ্চং কারেমি। এসাহং, ভন্তে, অজ্জতগ্গে অক্কোধনা ভৰিস্সামি অনুপাযাসবহুলা, বহুম্পি ৰুত্তা সমানা নাভিসজ্জিস্সামি ন কুপ্পিস্সামি ন ব্যাপজ্জিস্সামি ন পতিত্থীযিস্সামি, কোপঞ্চ দোসঞ্চ অপ্পচ্চযঞ্চ ন পাতুকরিস্সামি; দস্সামি সমণস্স ৰা ব্রাহ্মণস্স ৰা অন্নং পানং ৰত্থং যানং মালাগন্ধৰিলেপনং সেয্যাৰসথপদীপেয্যং। অনিস্সামনিকা ভৰিস্সামি, পরলাভসক্কারগরুকারমাননৰন্দনপূজনাসু ন ইস্সিস্সামি ন উপদুস্সিস্সামি ন ইস্সং বন্ধিস্সামি। অভিক্কন্তং, ভন্তে…পে॰… উপাসিকং মং, ভন্তে, ভগৰা ধারেতু অজ্জতগ্গে পাণুপেতং সরণং গত’’ন্তি। সত্তমং।

    ‘‘Yā nūnāhaṃ, bhante, aññaṃ jātiṃ anissāmanikā ahosiṃ, paralābhasakkāragarukāramānanavandanapūjanāsu na issiṃ na upadussiṃ na issaṃ bandhiṃ, sāhaṃ, bhante, etarahi mahesakkhā. Santi kho pana, bhante, imasmiṃ rājakule khattiyakaññāpi brāhmaṇakaññāpi gahapatikaññāpi, tāsāhaṃ issarādhipaccaṃ kāremi. Esāhaṃ, bhante, ajjatagge akkodhanā bhavissāmi anupāyāsabahulā, bahumpi vuttā samānā nābhisajjissāmi na kuppissāmi na byāpajjissāmi na patitthīyissāmi, kopañca dosañca appaccayañca na pātukarissāmi; dassāmi samaṇassa vā brāhmaṇassa vā annaṃ pānaṃ vatthaṃ yānaṃ mālāgandhavilepanaṃ seyyāvasathapadīpeyyaṃ. Anissāmanikā bhavissāmi, paralābhasakkāragarukāramānanavandanapūjanāsu na ississāmi na upadussissāmi na issaṃ bandhissāmi. Abhikkantaṃ, bhante…pe… upāsikaṃ maṃ, bhante, bhagavā dhāretu ajjatagge pāṇupetaṃ saraṇaṃ gata’’nti. Sattamaṃ.




    Next: ৮. অত্তন্তপসুত্তং • 8. Attantapasuttaṃ




    Footnotes:
    1. স্যা॰ পী॰ পোত্থকেসু ‘‘দুব্বণো চ হোতি দুরূপো সুপাপকো’’তি এৰমাদিনা পুল্লিঙ্গিকৰসেন দিস্সতি
    2. syā. pī. potthakesu ‘‘dubbaṇo ca hoti durūpo supāpako’’ti evamādinā pulliṅgikavasena dissati
    3. সো (স্যা॰)
    4. ইস্সামনকো (স্যা॰)
    5. সো (স্যা॰)
    6. so (syā.)
    7. issāmanako (syā.)
    8. so (syā.)
    9. সা নূনাহং (স্যা॰), যং নূনাহং (ক॰)
    10. অঞ্ঞায জাতিযা (স্যা॰)
    11. sā nūnāhaṃ (syā.), yaṃ nūnāhaṃ (ka.)
    12. aññāya jātiyā (syā.)
    13. অড্ঢা চ (সী॰ পী॰ ক॰)
    14. aḍḍhā ca (sī. pī. ka.)



    Related texts:



    অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / অঙ্গুত্তরনিকায (অট্ঠকথা) • Aṅguttaranikāya (aṭṭhakathā) / ৭. মল্লিকাদেৰীসুত্তৰণ্ণনা • 7. Mallikādevīsuttavaṇṇanā

    টীকা • Tīkā / সুত্তপিটক (টীকা) • Suttapiṭaka (ṭīkā) / অঙ্গুত্তরনিকায (টীকা) • Aṅguttaranikāya (ṭīkā) / ৭. মল্লিকাদেৰীসুত্তৰণ্ণনা • 7. Mallikādevīsuttavaṇṇanā


    © 1991-2023 The Titi Tudorancea Bulletin | Titi Tudorancea® is a Registered Trademark | Terms of use and privacy policy
    Contact