| Library / Tipiṭaka / តិបិដក • Tipiṭaka / អង្គុត្តរនិកាយ (អដ្ឋកថា) • Aṅguttaranikāya (aṭṭhakathā) |
៧. មល្លិកាទេវីសុត្តវណ្ណនា
7. Mallikādevīsuttavaṇṇanā
១៩៧. សត្តមេ មល្លិកា ទេវីតិ បសេនទិរញ្ញោ ទេវី។ យេន មិធេកច្ចោ មាតុគាមោតិ យេន ឥធេកច្ចា ឥត្ថី។ ទុព្ពណ្ណាតិ ពីភច្ឆវណ្ណា។ ទុរូបាតិ ទុស្សណ្ឋិតា។ សុបាបិកាតិ សុដ្ឋុ បាបិកា សុដ្ឋុ លាមិកា។ ទស្សនាយាតិ បស្សិតុំ។ ទលិទ្ទាតិ ធនទលិទ្ទា។ អប្បស្សកាតិ សកេន ធនេន រហិតា។ អប្បភោគាតិ ឧបភោគបរិភោគភណ្ឌករហិតា។ អប្បេសក្ខាតិ អប្បបរិវារា។ អឌ្ឍាតិ ឥស្សរា។ មហទ្ធនាតិ វឡញ្ជនកធនេន មហទ្ធនា។ មហាភោគាតិ ឧបភោគបរិភោគភណ្ឌភោគេន មហាភោគា។ មហេសក្ខាតិ មហាបរិវារា។ អភិរូបាតិ ឧត្តមរូបា។ ទស្សនីយាតិ ទស្សនយុត្តា។ បាសាទិកាតិ ទស្សនេន បាសាទិកា។ វណ្ណបោក្ខរតាយាតិ វណ្ណេន ចេវ សរីរសណ្ឋានេន ច។
197. Sattame mallikā devīti pasenadirañño devī. Yena midhekacco mātugāmoti yena idhekaccā itthī. Dubbaṇṇāti bībhacchavaṇṇā. Durūpāti dussaṇṭhitā. Supāpikāti suṭṭhu pāpikā suṭṭhu lāmikā. Dassanāyāti passituṃ. Daliddāti dhanadaliddā. Appassakāti sakena dhanena rahitā. Appabhogāti upabhogaparibhogabhaṇḍakarahitā. Appesakkhāti appaparivārā. Aḍḍhāti issarā. Mahaddhanāti vaḷañjanakadhanena mahaddhanā. Mahābhogāti upabhogaparibhogabhaṇḍabhogena mahābhogā. Mahesakkhāti mahāparivārā. Abhirūpāti uttamarūpā. Dassanīyāti dassanayuttā. Pāsādikāti dassanena pāsādikā. Vaṇṇapokkharatāyāti vaṇṇena ceva sarīrasaṇṭhānena ca.
អភិសជ្ជតីតិ លគ្គតិ។ ព្យាបជ្ជតីតិ បកតិំ បជហតិ។ បតិត្ថីយតីតិ កោធវសេន ថិនភាវំ ថទ្ធភាវំ អាបជ្ជតិ។ ន ទាតា ហោតីតិ ន ទាយិកា ហោតិ។ សេយ្យាវសថបទីបេយ្យន្តិ ឯត្ថ សេយ្យាតិ មញ្ចបល្លង្កាទិសយនំ។ អាវសថោតិ អាវសថាគារំ។ បទីបេយ្យំ វុច្ចតិ វដ្ដិតេលាទិបទីបូបករណំ។ ឥស្សាមនិកាតិ ឥស្សាយ សម្បយុត្តចិត្តា។ ឥមិនា នយេន សព្ពត្ថ អត្ថោ វេទិតព្ពោ ។ កោធនា អហោសិន្តិ កោធមនា អហោសិំ។ អនិស្សាមនិកា អហោសិន្តិ ឥស្សាវិរហិតចិត្តា អហោសិំ។ សេសមេត្ថ ឧត្តានត្ថមេវាតិ។
Abhisajjatīti laggati. Byāpajjatīti pakatiṃ pajahati. Patitthīyatīti kodhavasena thinabhāvaṃ thaddhabhāvaṃ āpajjati. Nadātā hotīti na dāyikā hoti. Seyyāvasathapadīpeyyanti ettha seyyāti mañcapallaṅkādisayanaṃ. Āvasathoti āvasathāgāraṃ. Padīpeyyaṃ vuccati vaṭṭitelādipadīpūpakaraṇaṃ. Issāmanikāti issāya sampayuttacittā. Iminā nayena sabbattha attho veditabbo . Kodhanā ahosinti kodhamanā ahosiṃ. Anissāmanikā ahosinti issāvirahitacittā ahosiṃ. Sesamettha uttānatthamevāti.
Related texts:
តិបិដក (មូល) • Tipiṭaka (Mūla) / សុត្តបិដក • Suttapiṭaka / អង្គុត្តរនិកាយ • Aṅguttaranikāya / ៧. មល្លិកាទេវីសុត្តំ • 7. Mallikādevīsuttaṃ
ដីកា • Tīkā / សុត្តបិដក (ដីកា) • Suttapiṭaka (ṭīkā) / អង្គុត្តរនិកាយ (ដីកា) • Aṅguttaranikāya (ṭīkā) / ៧. មល្លិកាទេវីសុត្តវណ្ណនា • 7. Mallikādevīsuttavaṇṇanā
