| Library / Tipiṭaka / තිපිටක • Tipiṭaka / අඞ්‌ගුත්‌තරනිකාය (අට්‌ඨකථා) • Aṅguttaranikāya (aṭṭhakathā) |
7. මල්‌ලිකාදෙවීසුත්‌තවණ්‌ණනා
7. Mallikādevīsuttavaṇṇanā
197. සත්‌තමෙ මල්‌ලිකා දෙවීති පසෙනදිරඤ්‌ඤො දෙවී. යෙන මිධෙකච්‌චො මාතුගාමොති යෙන ඉධෙකච්‌චා ඉත්‌ථී. දුබ්‌බණ්‌ණාති බීභච්‌ඡවණ්‌ණා. දුරූපාති දුස්‌සණ්‌ඨිතා. සුපාපිකාති සුට්‌ඨු පාපිකා සුට්‌ඨු ලාමිකා. දස්‌සනායාති පස්‌සිතුං. දලිද්‌දාති ධනදලිද්‌දා. අප්‌පස්‌සකාති සකෙන ධනෙන රහිතා. අප්‌පභොගාති උපභොගපරිභොගභණ්‌ඩකරහිතා. අප්‌පෙසක්‌ඛාති අප්‌පපරිවාරා. අඩ්‌ඪාති ඉස්‌සරා. මහද්‌ධනාති වළඤ්‌ජනකධනෙන මහද්‌ධනා. මහාභොගාති උපභොගපරිභොගභණ්‌ඩභොගෙන මහාභොගා. මහෙසක්‌ඛාති මහාපරිවාරා. අභිරූපාති උත්‌තමරූපා. දස්‌සනීයාති දස්‌සනයුත්‌තා. පාසාදිකාති දස්‌සනෙන පාසාදිකා. වණ්‌ණපොක්‌ඛරතායාති වණ්‌ණෙන චෙව සරීරසණ්‌ඨානෙන ච.
197. Sattame mallikā devīti pasenadirañño devī. Yena midhekacco mātugāmoti yena idhekaccā itthī. Dubbaṇṇāti bībhacchavaṇṇā. Durūpāti dussaṇṭhitā. Supāpikāti suṭṭhu pāpikā suṭṭhu lāmikā. Dassanāyāti passituṃ. Daliddāti dhanadaliddā. Appassakāti sakena dhanena rahitā. Appabhogāti upabhogaparibhogabhaṇḍakarahitā. Appesakkhāti appaparivārā. Aḍḍhāti issarā. Mahaddhanāti vaḷañjanakadhanena mahaddhanā. Mahābhogāti upabhogaparibhogabhaṇḍabhogena mahābhogā. Mahesakkhāti mahāparivārā. Abhirūpāti uttamarūpā. Dassanīyāti dassanayuttā. Pāsādikāti dassanena pāsādikā. Vaṇṇapokkharatāyāti vaṇṇena ceva sarīrasaṇṭhānena ca.
අභිසජ්‌ජතීති ලග්‌ගති. බ්‍යාපජ්‌ජතීති පකතිං පජහති. පතිත්‌ථීයතීති කොධවසෙන ථිනභාවං ථද්‌ධභාවං ආපජ්‌ජති. න දාතා හොතීති න දායිකා හොති. සෙය්‍යාවසථපදීපෙය්‍යන්‌ති එත්‌ථ සෙය්‍යාති මඤ්‌චපල්‌ලඞ්‌කාදිසයනං. ආවසථොති ආවසථාගාරං. පදීපෙය්‍යං වුච්‌චති වට්‌ටිතෙලාදිපදීපූපකරණං. ඉස්‌සාමනිකාති ඉස්‌සාය සම්‌පයුත්‌තචිත්‌තා. ඉමිනා නයෙන සබ්‌බත්‌ථ අත්‌ථො වෙදිතබ්‌බො . කොධනා අහොසින්‌ති කොධමනා අහොසිං. අනිස්‌සාමනිකා අහොසින්‌ති ඉස්‌සාවිරහිතචිත්‌තා අහොසිං. සෙසමෙත්‌ථ උත්‌තානත්‌ථමෙවාති.
Abhisajjatīti laggati. Byāpajjatīti pakatiṃ pajahati. Patitthīyatīti kodhavasena thinabhāvaṃ thaddhabhāvaṃ āpajjati. Nadātā hotīti na dāyikā hoti. Seyyāvasathapadīpeyyanti ettha seyyāti mañcapallaṅkādisayanaṃ. Āvasathoti āvasathāgāraṃ. Padīpeyyaṃ vuccati vaṭṭitelādipadīpūpakaraṇaṃ. Issāmanikāti issāya sampayuttacittā. Iminā nayena sabbattha attho veditabbo . Kodhanā ahosinti kodhamanā ahosiṃ. Anissāmanikā ahosinti issāvirahitacittā ahosiṃ. Sesamettha uttānatthamevāti.
Related texts:
තිපිටක (මූල) • Tipiṭaka (Mūla) / සුත්‌තපිටක • Suttapiṭaka / අඞ්‌ගුත්‌තරනිකාය • Aṅguttaranikāya / 7. මල්‌ලිකාදෙවීසුත්‌තං • 7. Mallikādevīsuttaṃ
ටීකා • Tīkā / සුත්‌තපිටක (ටීකා) • Suttapiṭaka (ṭīkā) / අඞ්‌ගුත්‌තරනිකාය (ටීකා) • Aṅguttaranikāya (ṭīkā) / 7. මල්‌ලිකාදෙවීසුත්‌තවණ්‌ණනා • 7. Mallikādevīsuttavaṇṇanā
