| Library / Tipiṭaka / திபிடக • Tipiṭaka / ஸங்யுத்தனிகாய • Saṃyuttanikāya |
2. மல்லிகஸுத்தங்
2. Mallikasuttaṃ
522. ஏவங் மே ஸுதங் – ஏகங் ஸமயங் ப⁴க³வா மல்லேஸு 1 விஹரதி உருவேலகப்பங் நாம மல்லானங் நிக³மோ. தத்ர கோ² ப⁴க³வா பி⁴க்கூ² ஆமந்தேஸி – ‘‘யாவகீவஞ்ச, பி⁴க்க²வே, அரியஸாவகஸ்ஸ அரியஞாணங் ந உப்பன்னங் ஹோதி நேவ தாவ சதுன்னங் இந்த்³ரியானங் ஸண்டி²தி ஹோதி, நேவ தாவ சதுன்னங் இந்த்³ரியானங் அவட்டி²தி ஹோதி. யதோ ச கோ², பி⁴க்க²வே, அரியஸாவகஸ்ஸ அரியஞாணங் உப்பன்னங் ஹோதி, அத² சதுன்னங் இந்த்³ரியானங் ஸண்டி²தி ஹோதி, அத² சதுன்னங் இந்த்³ரியானங் அவட்டி²தி ஹோதி’’.
522. Evaṃ me sutaṃ – ekaṃ samayaṃ bhagavā mallesu 2 viharati uruvelakappaṃ nāma mallānaṃ nigamo. Tatra kho bhagavā bhikkhū āmantesi – ‘‘yāvakīvañca, bhikkhave, ariyasāvakassa ariyañāṇaṃ na uppannaṃ hoti neva tāva catunnaṃ indriyānaṃ saṇṭhiti hoti, neva tāva catunnaṃ indriyānaṃ avaṭṭhiti hoti. Yato ca kho, bhikkhave, ariyasāvakassa ariyañāṇaṃ uppannaṃ hoti, atha catunnaṃ indriyānaṃ saṇṭhiti hoti, atha catunnaṃ indriyānaṃ avaṭṭhiti hoti’’.
‘‘ஸெய்யதா²பி, பி⁴க்க²வே, யாவகீவஞ்ச கூடாகா³ரஸ்ஸ கூடங் ந உஸ்ஸிதங் ஹோதி, நேவ தாவ கோ³பானஸீனங் ஸண்டி²தி ஹோதி, நேவ தாவ கோ³பானஸீனங் அவட்டி²தி ஹோதி. யதோ ச கோ², பி⁴க்க²வே, கூடாகா³ரஸ்ஸ கூடங் உஸ்ஸிதங் ஹோதி, அத² கோ³பானஸீனங் ஸண்டி²தி ஹோதி, அத² கோ³பானஸீனங் அவட்டி²தி ஹோதி. ஏவமேவ கோ², பி⁴க்க²வே, யாவகீவஞ்ச அரியஸாவகஸ்ஸ அரியஞாணங் ந உப்பன்னங் ஹோதி, நேவ தாவ சதுன்னங் இந்த்³ரியானங் ஸண்டி²தி ஹோதி, நேவ தாவ சதுன்னங் இந்த்³ரியானங் அவட்டி²தி ஹோதி. யதோ ச கோ², பி⁴க்க²வே, அரியஸாவகஸ்ஸ அரியஞாணங் உப்பன்னங் ஹோதி, அத² சதுன்னங் இந்த்³ரியானங்…பே॰… அவட்டி²தி ஹோதி.
‘‘Seyyathāpi, bhikkhave, yāvakīvañca kūṭāgārassa kūṭaṃ na ussitaṃ hoti, neva tāva gopānasīnaṃ saṇṭhiti hoti, neva tāva gopānasīnaṃ avaṭṭhiti hoti. Yato ca kho, bhikkhave, kūṭāgārassa kūṭaṃ ussitaṃ hoti, atha gopānasīnaṃ saṇṭhiti hoti, atha gopānasīnaṃ avaṭṭhiti hoti. Evameva kho, bhikkhave, yāvakīvañca ariyasāvakassa ariyañāṇaṃ na uppannaṃ hoti, neva tāva catunnaṃ indriyānaṃ saṇṭhiti hoti, neva tāva catunnaṃ indriyānaṃ avaṭṭhiti hoti. Yato ca kho, bhikkhave, ariyasāvakassa ariyañāṇaṃ uppannaṃ hoti, atha catunnaṃ indriyānaṃ…pe… avaṭṭhiti hoti.
‘‘கதமேஸங் சதுன்னங்? ஸத்³தி⁴ந்த்³ரியஸ்ஸ , வீரியிந்த்³ரியஸ்ஸ, ஸதிந்த்³ரியஸ்ஸ, ஸமாதி⁴ந்த்³ரியஸ்ஸ. பஞ்ஞவதோ, பி⁴க்க²வே, அரியஸாவகஸ்ஸ தத³ன்வயா ஸத்³தா⁴ ஸண்டா²தி, தத³ன்வயங் வீரியங் ஸண்டா²தி, தத³ன்வயா ஸதி ஸண்டா²தி, தத³ன்வயோ ஸமாதி⁴ ஸண்டா²தீ’’தி. து³தியங்.
‘‘Katamesaṃ catunnaṃ? Saddhindriyassa , vīriyindriyassa, satindriyassa, samādhindriyassa. Paññavato, bhikkhave, ariyasāvakassa tadanvayā saddhā saṇṭhāti, tadanvayaṃ vīriyaṃ saṇṭhāti, tadanvayā sati saṇṭhāti, tadanvayo samādhi saṇṭhātī’’ti. Dutiyaṃ.
Footnotes:
Related texts:
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / ஸங்யுத்தனிகாய (அட்ட²கதா²) • Saṃyuttanikāya (aṭṭhakathā) / 2. மல்லிகஸுத்தவண்ணனா • 2. Mallikasuttavaṇṇanā
டீகா • Tīkā / ஸுத்தபிடக (டீகா) • Suttapiṭaka (ṭīkā) / ஸங்யுத்தனிகாய (டீகா) • Saṃyuttanikāya (ṭīkā) / 2. மல்லிகஸுத்தவண்ணனா • 2. Mallikasuttavaṇṇanā
