| Library / Tipiṭaka / তিপিটক • Tipiṭaka / সংযুত্তনিকায • Saṃyuttanikāya |
৮. মল্লিকাসুত্তং
8. Mallikāsuttaṃ
১১৯. সাৰত্থিনিদানং । তেন খো পন সমযেন রাজা পসেনদি কোসলো মল্লিকায দেৰিযা সদ্ধিং উপরিপাসাদৰরগতো হোতি। অথ খো রাজা পসেনদি কোসলো মল্লিকং দেৰিং এতদৰোচ – ‘‘অত্থি নু খো তে, মল্লিকে, কোচঞ্ঞো অত্তনা পিযতরো’’তি? ‘‘নত্থি খো মে, মহারাজ, কোচঞ্ঞো অত্তনা পিযতরো। তুয্হং পন, মহারাজ, অত্থঞ্ঞো কোচি অত্তনা পিযতরো’’তি? ‘‘ময্হম্পি খো, মল্লিকে, নত্থঞ্ঞো কোচি অত্তনা পিযতরো’’তি।
119. Sāvatthinidānaṃ . Tena kho pana samayena rājā pasenadi kosalo mallikāya deviyā saddhiṃ uparipāsādavaragato hoti. Atha kho rājā pasenadi kosalo mallikaṃ deviṃ etadavoca – ‘‘atthi nu kho te, mallike, kocañño attanā piyataro’’ti? ‘‘Natthi kho me, mahārāja, kocañño attanā piyataro. Tuyhaṃ pana, mahārāja, atthañño koci attanā piyataro’’ti? ‘‘Mayhampi kho, mallike, natthañño koci attanā piyataro’’ti.
অথ খো রাজা পসেনদি কোসলো পাসাদা ওরোহিত্ৰা যেন ভগৰা তেনুপসঙ্কমি; উপসঙ্কমিত্ৰা ভগৰন্তং অভিৰাদেত্ৰা একমন্তং নিসীদি। একমন্তং নিসিন্নো খো রাজা পসেনদি কোসলো ভগৰন্তং এতদৰোচ – ‘‘ইধাহং, ভন্তে, মল্লিকায দেৰিযা সদ্ধিং উপরিপাসাদৰরগতো মল্লিকং দেৰিং এতদৰোচং – ‘অত্থি নু খো তে, মল্লিকে, কোচঞ্ঞো অত্তনা পিযতরো’তি? এৰং ৰুত্তে, ভন্তে, মল্লিকা দেৰী মং এতদৰোচ – ‘নত্থি খো মে, মহারাজ, কোচঞ্ঞো অত্তনা পিযতরো। তুয্হং পন, মহারাজ, অত্থঞ্ঞো কোচি অত্তনা পিযতরো’তি? এৰং ৰুত্তাহং, ভন্তে, মল্লিকং দেৰিং এতদৰোচং – ‘ময্হম্পি খো, মল্লিকে, নত্থঞ্ঞো কোচি অত্তনা পিযতরো’’তি।
Atha kho rājā pasenadi kosalo pāsādā orohitvā yena bhagavā tenupasaṅkami; upasaṅkamitvā bhagavantaṃ abhivādetvā ekamantaṃ nisīdi. Ekamantaṃ nisinno kho rājā pasenadi kosalo bhagavantaṃ etadavoca – ‘‘idhāhaṃ, bhante, mallikāya deviyā saddhiṃ uparipāsādavaragato mallikaṃ deviṃ etadavocaṃ – ‘atthi nu kho te, mallike, kocañño attanā piyataro’ti? Evaṃ vutte, bhante, mallikā devī maṃ etadavoca – ‘natthi kho me, mahārāja, kocañño attanā piyataro. Tuyhaṃ pana, mahārāja, atthañño koci attanā piyataro’ti? Evaṃ vuttāhaṃ, bhante, mallikaṃ deviṃ etadavocaṃ – ‘mayhampi kho, mallike, natthañño koci attanā piyataro’’ti.
অথ খো ভগৰা এতমত্থং ৰিদিত্ৰা তাযং ৰেলাযং ইমং গাথং অভাসি –
Atha kho bhagavā etamatthaṃ viditvā tāyaṃ velāyaṃ imaṃ gāthaṃ abhāsi –
‘‘সব্বা দিসা অনুপরিগম্ম চেতসা,
‘‘Sabbā disā anuparigamma cetasā,
নেৰজ্ঝগা পিযতরমত্তনা ক্ৰচি।
Nevajjhagā piyataramattanā kvaci;
এৰং পিযো পুথু অত্তা পরেসং,
Evaṃ piyo puthu attā paresaṃ,
তস্মা ন হিংসে পরমত্তকামো’’তি॥
Tasmā na hiṃse paramattakāmo’’ti.
Related texts:
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / সংযুত্তনিকায (অট্ঠকথা) • Saṃyuttanikāya (aṭṭhakathā) / ৮. মল্লিকাসুত্তৰণ্ণনা • 8. Mallikāsuttavaṇṇanā
টীকা • Tīkā / সুত্তপিটক (টীকা) • Suttapiṭaka (ṭīkā) / সংযুত্তনিকায (টীকা) • Saṃyuttanikāya (ṭīkā) / ৮. মল্লিকাসুত্তৰণ্ণনা • 8. Mallikāsuttavaṇṇanā
