| Library / Tipiṭaka / তিপিটক • Tipiṭaka / সংযুত্তনিকায • Saṃyuttanikāya |
২. মল্লিকসুত্তং
2. Mallikasuttaṃ
৫২২. এৰং মে সুতং – একং সমযং ভগৰা মল্লেসু 1 ৰিহরতি উরুৰেলকপ্পং নাম মল্লানং নিগমো। তত্র খো ভগৰা ভিক্খূ আমন্তেসি – ‘‘যাৰকীৰঞ্চ, ভিক্খৰে, অরিযসাৰকস্স অরিযঞাণং ন উপ্পন্নং হোতি নেৰ তাৰ চতুন্নং ইন্দ্রিযানং সণ্ঠিতি হোতি, নেৰ তাৰ চতুন্নং ইন্দ্রিযানং অৰট্ঠিতি হোতি। যতো চ খো, ভিক্খৰে, অরিযসাৰকস্স অরিযঞাণং উপ্পন্নং হোতি, অথ চতুন্নং ইন্দ্রিযানং সণ্ঠিতি হোতি, অথ চতুন্নং ইন্দ্রিযানং অৰট্ঠিতি হোতি’’।
522. Evaṃ me sutaṃ – ekaṃ samayaṃ bhagavā mallesu 2 viharati uruvelakappaṃ nāma mallānaṃ nigamo. Tatra kho bhagavā bhikkhū āmantesi – ‘‘yāvakīvañca, bhikkhave, ariyasāvakassa ariyañāṇaṃ na uppannaṃ hoti neva tāva catunnaṃ indriyānaṃ saṇṭhiti hoti, neva tāva catunnaṃ indriyānaṃ avaṭṭhiti hoti. Yato ca kho, bhikkhave, ariyasāvakassa ariyañāṇaṃ uppannaṃ hoti, atha catunnaṃ indriyānaṃ saṇṭhiti hoti, atha catunnaṃ indriyānaṃ avaṭṭhiti hoti’’.
‘‘সেয্যথাপি, ভিক্খৰে, যাৰকীৰঞ্চ কূটাগারস্স কূটং ন উস্সিতং হোতি, নেৰ তাৰ গোপানসীনং সণ্ঠিতি হোতি, নেৰ তাৰ গোপানসীনং অৰট্ঠিতি হোতি। যতো চ খো, ভিক্খৰে, কূটাগারস্স কূটং উস্সিতং হোতি, অথ গোপানসীনং সণ্ঠিতি হোতি, অথ গোপানসীনং অৰট্ঠিতি হোতি। এৰমেৰ খো, ভিক্খৰে, যাৰকীৰঞ্চ অরিযসাৰকস্স অরিযঞাণং ন উপ্পন্নং হোতি, নেৰ তাৰ চতুন্নং ইন্দ্রিযানং সণ্ঠিতি হোতি, নেৰ তাৰ চতুন্নং ইন্দ্রিযানং অৰট্ঠিতি হোতি। যতো চ খো, ভিক্খৰে, অরিযসাৰকস্স অরিযঞাণং উপ্পন্নং হোতি, অথ চতুন্নং ইন্দ্রিযানং…পে॰… অৰট্ঠিতি হোতি।
‘‘Seyyathāpi, bhikkhave, yāvakīvañca kūṭāgārassa kūṭaṃ na ussitaṃ hoti, neva tāva gopānasīnaṃ saṇṭhiti hoti, neva tāva gopānasīnaṃ avaṭṭhiti hoti. Yato ca kho, bhikkhave, kūṭāgārassa kūṭaṃ ussitaṃ hoti, atha gopānasīnaṃ saṇṭhiti hoti, atha gopānasīnaṃ avaṭṭhiti hoti. Evameva kho, bhikkhave, yāvakīvañca ariyasāvakassa ariyañāṇaṃ na uppannaṃ hoti, neva tāva catunnaṃ indriyānaṃ saṇṭhiti hoti, neva tāva catunnaṃ indriyānaṃ avaṭṭhiti hoti. Yato ca kho, bhikkhave, ariyasāvakassa ariyañāṇaṃ uppannaṃ hoti, atha catunnaṃ indriyānaṃ…pe… avaṭṭhiti hoti.
‘‘কতমেসং চতুন্নং? সদ্ধিন্দ্রিযস্স , ৰীরিযিন্দ্রিযস্স, সতিন্দ্রিযস্স, সমাধিন্দ্রিযস্স। পঞ্ঞৰতো, ভিক্খৰে, অরিযসাৰকস্স তদন্ৰযা সদ্ধা সণ্ঠাতি, তদন্ৰযং ৰীরিযং সণ্ঠাতি, তদন্ৰযা সতি সণ্ঠাতি, তদন্ৰযো সমাধি সণ্ঠাতী’’তি। দুতিযং।
‘‘Katamesaṃ catunnaṃ? Saddhindriyassa , vīriyindriyassa, satindriyassa, samādhindriyassa. Paññavato, bhikkhave, ariyasāvakassa tadanvayā saddhā saṇṭhāti, tadanvayaṃ vīriyaṃ saṇṭhāti, tadanvayā sati saṇṭhāti, tadanvayo samādhi saṇṭhātī’’ti. Dutiyaṃ.
Footnotes:
Related texts:
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / সংযুত্তনিকায (অট্ঠকথা) • Saṃyuttanikāya (aṭṭhakathā) / ২. মল্লিকসুত্তৰণ্ণনা • 2. Mallikasuttavaṇṇanā
টীকা • Tīkā / সুত্তপিটক (টীকা) • Suttapiṭaka (ṭīkā) / সংযুত্তনিকায (টীকা) • Saṃyuttanikāya (ṭīkā) / ২. মল্লিকসুত্তৰণ্ণনা • 2. Mallikasuttavaṇṇanā
