| Library / Tipiṭaka / ತಿಪಿಟಕ • Tipiṭaka / ಸಂಯುತ್ತನಿಕಾಯ • Saṃyuttanikāya |
೨. ಮಲ್ಲಿಕಸುತ್ತಂ
2. Mallikasuttaṃ
೫೨೨. ಏವಂ ಮೇ ಸುತಂ – ಏಕಂ ಸಮಯಂ ಭಗವಾ ಮಲ್ಲೇಸು 1 ವಿಹರತಿ ಉರುವೇಲಕಪ್ಪಂ ನಾಮ ಮಲ್ಲಾನಂ ನಿಗಮೋ। ತತ್ರ ಖೋ ಭಗವಾ ಭಿಕ್ಖೂ ಆಮನ್ತೇಸಿ – ‘‘ಯಾವಕೀವಞ್ಚ, ಭಿಕ್ಖವೇ, ಅರಿಯಸಾವಕಸ್ಸ ಅರಿಯಞಾಣಂ ನ ಉಪ್ಪನ್ನಂ ಹೋತಿ ನೇವ ತಾವ ಚತುನ್ನಂ ಇನ್ದ್ರಿಯಾನಂ ಸಣ್ಠಿತಿ ಹೋತಿ, ನೇವ ತಾವ ಚತುನ್ನಂ ಇನ್ದ್ರಿಯಾನಂ ಅವಟ್ಠಿತಿ ಹೋತಿ। ಯತೋ ಚ ಖೋ, ಭಿಕ್ಖವೇ, ಅರಿಯಸಾವಕಸ್ಸ ಅರಿಯಞಾಣಂ ಉಪ್ಪನ್ನಂ ಹೋತಿ, ಅಥ ಚತುನ್ನಂ ಇನ್ದ್ರಿಯಾನಂ ಸಣ್ಠಿತಿ ಹೋತಿ, ಅಥ ಚತುನ್ನಂ ಇನ್ದ್ರಿಯಾನಂ ಅವಟ್ಠಿತಿ ಹೋತಿ’’।
522. Evaṃ me sutaṃ – ekaṃ samayaṃ bhagavā mallesu 2 viharati uruvelakappaṃ nāma mallānaṃ nigamo. Tatra kho bhagavā bhikkhū āmantesi – ‘‘yāvakīvañca, bhikkhave, ariyasāvakassa ariyañāṇaṃ na uppannaṃ hoti neva tāva catunnaṃ indriyānaṃ saṇṭhiti hoti, neva tāva catunnaṃ indriyānaṃ avaṭṭhiti hoti. Yato ca kho, bhikkhave, ariyasāvakassa ariyañāṇaṃ uppannaṃ hoti, atha catunnaṃ indriyānaṃ saṇṭhiti hoti, atha catunnaṃ indriyānaṃ avaṭṭhiti hoti’’.
‘‘ಸೇಯ್ಯಥಾಪಿ, ಭಿಕ್ಖವೇ, ಯಾವಕೀವಞ್ಚ ಕೂಟಾಗಾರಸ್ಸ ಕೂಟಂ ನ ಉಸ್ಸಿತಂ ಹೋತಿ, ನೇವ ತಾವ ಗೋಪಾನಸೀನಂ ಸಣ್ಠಿತಿ ಹೋತಿ, ನೇವ ತಾವ ಗೋಪಾನಸೀನಂ ಅವಟ್ಠಿತಿ ಹೋತಿ। ಯತೋ ಚ ಖೋ, ಭಿಕ್ಖವೇ, ಕೂಟಾಗಾರಸ್ಸ ಕೂಟಂ ಉಸ್ಸಿತಂ ಹೋತಿ, ಅಥ ಗೋಪಾನಸೀನಂ ಸಣ್ಠಿತಿ ಹೋತಿ, ಅಥ ಗೋಪಾನಸೀನಂ ಅವಟ್ಠಿತಿ ಹೋತಿ। ಏವಮೇವ ಖೋ, ಭಿಕ್ಖವೇ, ಯಾವಕೀವಞ್ಚ ಅರಿಯಸಾವಕಸ್ಸ ಅರಿಯಞಾಣಂ ನ ಉಪ್ಪನ್ನಂ ಹೋತಿ, ನೇವ ತಾವ ಚತುನ್ನಂ ಇನ್ದ್ರಿಯಾನಂ ಸಣ್ಠಿತಿ ಹೋತಿ, ನೇವ ತಾವ ಚತುನ್ನಂ ಇನ್ದ್ರಿಯಾನಂ ಅವಟ್ಠಿತಿ ಹೋತಿ। ಯತೋ ಚ ಖೋ, ಭಿಕ್ಖವೇ, ಅರಿಯಸಾವಕಸ್ಸ ಅರಿಯಞಾಣಂ ಉಪ್ಪನ್ನಂ ಹೋತಿ, ಅಥ ಚತುನ್ನಂ ಇನ್ದ್ರಿಯಾನಂ…ಪೇ॰… ಅವಟ್ಠಿತಿ ಹೋತಿ।
‘‘Seyyathāpi, bhikkhave, yāvakīvañca kūṭāgārassa kūṭaṃ na ussitaṃ hoti, neva tāva gopānasīnaṃ saṇṭhiti hoti, neva tāva gopānasīnaṃ avaṭṭhiti hoti. Yato ca kho, bhikkhave, kūṭāgārassa kūṭaṃ ussitaṃ hoti, atha gopānasīnaṃ saṇṭhiti hoti, atha gopānasīnaṃ avaṭṭhiti hoti. Evameva kho, bhikkhave, yāvakīvañca ariyasāvakassa ariyañāṇaṃ na uppannaṃ hoti, neva tāva catunnaṃ indriyānaṃ saṇṭhiti hoti, neva tāva catunnaṃ indriyānaṃ avaṭṭhiti hoti. Yato ca kho, bhikkhave, ariyasāvakassa ariyañāṇaṃ uppannaṃ hoti, atha catunnaṃ indriyānaṃ…pe… avaṭṭhiti hoti.
‘‘ಕತಮೇಸಂ ಚತುನ್ನಂ? ಸದ್ಧಿನ್ದ್ರಿಯಸ್ಸ , ವೀರಿಯಿನ್ದ್ರಿಯಸ್ಸ, ಸತಿನ್ದ್ರಿಯಸ್ಸ, ಸಮಾಧಿನ್ದ್ರಿಯಸ್ಸ। ಪಞ್ಞವತೋ, ಭಿಕ್ಖವೇ, ಅರಿಯಸಾವಕಸ್ಸ ತದನ್ವಯಾ ಸದ್ಧಾ ಸಣ್ಠಾತಿ, ತದನ್ವಯಂ ವೀರಿಯಂ ಸಣ್ಠಾತಿ, ತದನ್ವಯಾ ಸತಿ ಸಣ್ಠಾತಿ, ತದನ್ವಯೋ ಸಮಾಧಿ ಸಣ್ಠಾತೀ’’ತಿ। ದುತಿಯಂ।
‘‘Katamesaṃ catunnaṃ? Saddhindriyassa , vīriyindriyassa, satindriyassa, samādhindriyassa. Paññavato, bhikkhave, ariyasāvakassa tadanvayā saddhā saṇṭhāti, tadanvayaṃ vīriyaṃ saṇṭhāti, tadanvayā sati saṇṭhāti, tadanvayo samādhi saṇṭhātī’’ti. Dutiyaṃ.
Footnotes:
Related texts:
ಅಟ್ಠಕಥಾ • Aṭṭhakathā / ಸುತ್ತಪಿಟಕ (ಅಟ್ಠಕಥಾ) • Suttapiṭaka (aṭṭhakathā) / ಸಂಯುತ್ತನಿಕಾಯ (ಅಟ್ಠಕಥಾ) • Saṃyuttanikāya (aṭṭhakathā) / ೨. ಮಲ್ಲಿಕಸುತ್ತವಣ್ಣನಾ • 2. Mallikasuttavaṇṇanā
ಟೀಕಾ • Tīkā / ಸುತ್ತಪಿಟಕ (ಟೀಕಾ) • Suttapiṭaka (ṭīkā) / ಸಂಯುತ್ತನಿಕಾಯ (ಟೀಕಾ) • Saṃyuttanikāya (ṭīkā) / ೨. ಮಲ್ಲಿಕಸುತ್ತವಣ್ಣನಾ • 2. Mallikasuttavaṇṇanā
