| Library / Tipiṭaka / තිපිටක • Tipiṭaka / සංයුත්‌තනිකාය • Saṃyuttanikāya |
8. මල්‌ලිකාසුත්‌තං
8. Mallikāsuttaṃ
119. සාවත්‌ථිනිදානං . තෙන ඛො පන සමයෙන රාජා පසෙනදි කොසලො මල්‌ලිකාය දෙවියා සද්‌ධිං උපරිපාසාදවරගතො හොති. අථ ඛො රාජා පසෙනදි කොසලො මල්‌ලිකං දෙවිං එතදවොච – ‘‘අත්‌ථි නු ඛො තෙ, මල්‌ලිකෙ, කොචඤ්‌ඤො අත්‌තනා පියතරො’’ති? ‘‘නත්‌ථි ඛො මෙ, මහාරාජ, කොචඤ්‌ඤො අත්‌තනා පියතරො. තුය්‌හං පන, මහාරාජ, අත්‌ථඤ්‌ඤො කොචි අත්‌තනා පියතරො’’ති? ‘‘මය්‌හම්‌පි ඛො, මල්‌ලිකෙ, නත්‌ථඤ්‌ඤො කොචි අත්‌තනා පියතරො’’ති.
119. Sāvatthinidānaṃ . Tena kho pana samayena rājā pasenadi kosalo mallikāya deviyā saddhiṃ uparipāsādavaragato hoti. Atha kho rājā pasenadi kosalo mallikaṃ deviṃ etadavoca – ‘‘atthi nu kho te, mallike, kocañño attanā piyataro’’ti? ‘‘Natthi kho me, mahārāja, kocañño attanā piyataro. Tuyhaṃ pana, mahārāja, atthañño koci attanā piyataro’’ti? ‘‘Mayhampi kho, mallike, natthañño koci attanā piyataro’’ti.
අථ ඛො රාජා පසෙනදි කොසලො පාසාදා ඔරොහිත්‌වා යෙන භගවා තෙනුපසඞ්‌කමි; උපසඞ්‌කමිත්‌වා භගවන්‌තං අභිවාදෙත්‌වා එකමන්‌තං නිසීදි. එකමන්‌තං නිසින්‌නො ඛො රාජා පසෙනදි කොසලො භගවන්‌තං එතදවොච – ‘‘ඉධාහං, භන්‌තෙ, මල්‌ලිකාය දෙවියා සද්‌ධිං උපරිපාසාදවරගතො මල්‌ලිකං දෙවිං එතදවොචං – ‘අත්‌ථි නු ඛො තෙ, මල්‌ලිකෙ, කොචඤ්‌ඤො අත්‌තනා පියතරො’ති? එවං වුත්‌තෙ, භන්‌තෙ, මල්‌ලිකා දෙවී මං එතදවොච – ‘නත්‌ථි ඛො මෙ, මහාරාජ, කොචඤ්‌ඤො අත්‌තනා පියතරො. තුය්‌හං පන, මහාරාජ, අත්‌ථඤ්‌ඤො කොචි අත්‌තනා පියතරො’ති? එවං වුත්‌තාහං, භන්‌තෙ, මල්‌ලිකං දෙවිං එතදවොචං – ‘මය්‌හම්‌පි ඛො, මල්‌ලිකෙ, නත්‌ථඤ්‌ඤො කොචි අත්‌තනා පියතරො’’ති.
Atha kho rājā pasenadi kosalo pāsādā orohitvā yena bhagavā tenupasaṅkami; upasaṅkamitvā bhagavantaṃ abhivādetvā ekamantaṃ nisīdi. Ekamantaṃ nisinno kho rājā pasenadi kosalo bhagavantaṃ etadavoca – ‘‘idhāhaṃ, bhante, mallikāya deviyā saddhiṃ uparipāsādavaragato mallikaṃ deviṃ etadavocaṃ – ‘atthi nu kho te, mallike, kocañño attanā piyataro’ti? Evaṃ vutte, bhante, mallikā devī maṃ etadavoca – ‘natthi kho me, mahārāja, kocañño attanā piyataro. Tuyhaṃ pana, mahārāja, atthañño koci attanā piyataro’ti? Evaṃ vuttāhaṃ, bhante, mallikaṃ deviṃ etadavocaṃ – ‘mayhampi kho, mallike, natthañño koci attanā piyataro’’ti.
අථ ඛො භගවා එතමත්‌ථං විදිත්‌වා තායං වෙලායං ඉමං ගාථං අභාසි –
Atha kho bhagavā etamatthaṃ viditvā tāyaṃ velāyaṃ imaṃ gāthaṃ abhāsi –
‘‘සබ්‌බා දිසා අනුපරිගම්‌ම චෙතසා,
‘‘Sabbā disā anuparigamma cetasā,
නෙවජ්‌ඣගා පියතරමත්‌තනා ක්‌වචි;
Nevajjhagā piyataramattanā kvaci;
එවං පියො පුථු අත්‌තා පරෙසං,
Evaṃ piyo puthu attā paresaṃ,
තස්‌මා න හිංසෙ පරමත්‌තකාමො’’ති.
Tasmā na hiṃse paramattakāmo’’ti.
Related texts:
අට්‌ඨකථා • Aṭṭhakathā / සුත්‌තපිටක (අට්‌ඨකථා) • Suttapiṭaka (aṭṭhakathā) / සංයුත්‌තනිකාය (අට්‌ඨකථා) • Saṃyuttanikāya (aṭṭhakathā) / 8. මල්‌ලිකාසුත්‌තවණ්‌ණනා • 8. Mallikāsuttavaṇṇanā
ටීකා • Tīkā / සුත්‌තපිටක (ටීකා) • Suttapiṭaka (ṭīkā) / සංයුත්‌තනිකාය (ටීකා) • Saṃyuttanikāya (ṭīkā) / 8. මල්‌ලිකාසුත්‌තවණ්‌ණනා • 8. Mallikāsuttavaṇṇanā
