| Library / Tipiṭaka / තිපිටක • Tipiṭaka / සංයුත්‌තනිකාය • Saṃyuttanikāya |
2. මල්‌ලිකසුත්‌තං
2. Mallikasuttaṃ
522. එවං මෙ සුතං – එකං සමයං භගවා මල්‌ලෙසු 1 විහරති උරුවෙලකප්‌පං නාම මල්‌ලානං නිගමො. තත්‍ර ඛො භගවා භික්‌ඛූ ආමන්‌තෙසි – ‘‘යාවකීවඤ්‌ච, භික්‌ඛවෙ, අරියසාවකස්‌ස අරියඤාණං න උප්‌පන්‌නං හොති නෙව තාව චතුන්‌නං ඉන්‌ද්‍රියානං සණ්‌ඨිති හොති, නෙව තාව චතුන්‌නං ඉන්‌ද්‍රියානං අවට්‌ඨිති හොති. යතො ච ඛො, භික්‌ඛවෙ, අරියසාවකස්‌ස අරියඤාණං උප්‌පන්‌නං හොති, අථ චතුන්‌නං ඉන්‌ද්‍රියානං සණ්‌ඨිති හොති, අථ චතුන්‌නං ඉන්‌ද්‍රියානං අවට්‌ඨිති හොති’’.
522. Evaṃ me sutaṃ – ekaṃ samayaṃ bhagavā mallesu 2 viharati uruvelakappaṃ nāma mallānaṃ nigamo. Tatra kho bhagavā bhikkhū āmantesi – ‘‘yāvakīvañca, bhikkhave, ariyasāvakassa ariyañāṇaṃ na uppannaṃ hoti neva tāva catunnaṃ indriyānaṃ saṇṭhiti hoti, neva tāva catunnaṃ indriyānaṃ avaṭṭhiti hoti. Yato ca kho, bhikkhave, ariyasāvakassa ariyañāṇaṃ uppannaṃ hoti, atha catunnaṃ indriyānaṃ saṇṭhiti hoti, atha catunnaṃ indriyānaṃ avaṭṭhiti hoti’’.
‘‘සෙය්‍යථාපි, භික්‌ඛවෙ, යාවකීවඤ්‌ච කූටාගාරස්‌ස කූටං න උස්‌සිතං හොති, නෙව තාව ගොපානසීනං සණ්‌ඨිති හොති, නෙව තාව ගොපානසීනං අවට්‌ඨිති හොති. යතො ච ඛො, භික්‌ඛවෙ, කූටාගාරස්‌ස කූටං උස්‌සිතං හොති, අථ ගොපානසීනං සණ්‌ඨිති හොති, අථ ගොපානසීනං අවට්‌ඨිති හොති. එවමෙව ඛො, භික්‌ඛවෙ, යාවකීවඤ්‌ච අරියසාවකස්‌ස අරියඤාණං න උප්‌පන්‌නං හොති, නෙව තාව චතුන්‌නං ඉන්‌ද්‍රියානං සණ්‌ඨිති හොති, නෙව තාව චතුන්‌නං ඉන්‌ද්‍රියානං අවට්‌ඨිති හොති. යතො ච ඛො, භික්‌ඛවෙ, අරියසාවකස්‌ස අරියඤාණං උප්‌පන්‌නං හොති, අථ චතුන්‌නං ඉන්‌ද්‍රියානං…පෙ.… අවට්‌ඨිති හොති.
‘‘Seyyathāpi, bhikkhave, yāvakīvañca kūṭāgārassa kūṭaṃ na ussitaṃ hoti, neva tāva gopānasīnaṃ saṇṭhiti hoti, neva tāva gopānasīnaṃ avaṭṭhiti hoti. Yato ca kho, bhikkhave, kūṭāgārassa kūṭaṃ ussitaṃ hoti, atha gopānasīnaṃ saṇṭhiti hoti, atha gopānasīnaṃ avaṭṭhiti hoti. Evameva kho, bhikkhave, yāvakīvañca ariyasāvakassa ariyañāṇaṃ na uppannaṃ hoti, neva tāva catunnaṃ indriyānaṃ saṇṭhiti hoti, neva tāva catunnaṃ indriyānaṃ avaṭṭhiti hoti. Yato ca kho, bhikkhave, ariyasāvakassa ariyañāṇaṃ uppannaṃ hoti, atha catunnaṃ indriyānaṃ…pe… avaṭṭhiti hoti.
‘‘කතමෙසං චතුන්‌නං? සද්‌ධින්‌ද්‍රියස්‌ස , වීරියින්‌ද්‍රියස්‌ස, සතින්‌ද්‍රියස්‌ස, සමාධින්‌ද්‍රියස්‌ස. පඤ්‌ඤවතො, භික්‌ඛවෙ, අරියසාවකස්‌ස තදන්‌වයා සද්‌ධා සණ්‌ඨාති, තදන්‌වයං වීරියං සණ්‌ඨාති, තදන්‌වයා සති සණ්‌ඨාති, තදන්‌වයො සමාධි සණ්‌ඨාතී’’ති. දුතියං.
‘‘Katamesaṃ catunnaṃ? Saddhindriyassa , vīriyindriyassa, satindriyassa, samādhindriyassa. Paññavato, bhikkhave, ariyasāvakassa tadanvayā saddhā saṇṭhāti, tadanvayaṃ vīriyaṃ saṇṭhāti, tadanvayā sati saṇṭhāti, tadanvayo samādhi saṇṭhātī’’ti. Dutiyaṃ.
Footnotes:
Related texts:
අට්‌ඨකථා • Aṭṭhakathā / සුත්‌තපිටක (අට්‌ඨකථා) • Suttapiṭaka (aṭṭhakathā) / සංයුත්‌තනිකාය (අට්‌ඨකථා) • Saṃyuttanikāya (aṭṭhakathā) / 2. මල්‌ලිකසුත්‌තවණ්‌ණනා • 2. Mallikasuttavaṇṇanā
ටීකා • Tīkā / සුත්‌තපිටක (ටීකා) • Suttapiṭaka (ṭīkā) / සංයුත්‌තනිකාය (ටීකා) • Saṃyuttanikāya (ṭīkā) / 2. මල්‌ලිකසුත්‌තවණ්‌ණනා • 2. Mallikasuttavaṇṇanā
