| Library / Tipiṭaka / ཏིཔིཊཀ • Tipiṭaka / སཾཡུཏྟནིཀཱཡ • Saṃyuttanikāya |
༢. མལླིཀསུཏྟཾ
2. Mallikasuttaṃ
༥༢༢. ཨེཝཾ མེ སུཏཾ – ཨེཀཾ སམཡཾ བྷགཝཱ མལླེསུ 1 ཝིཧརཏི ཨུརུཝེལཀཔྤཾ ནཱམ མལླཱནཾ ནིགམོ། ཏཏྲ ཁོ བྷགཝཱ བྷིཀྑཱུ ཨཱམནྟེསི – ‘‘ཡཱཝཀཱིཝཉྩ, བྷིཀྑཝེ, ཨརིཡསཱཝཀསྶ ཨརིཡཉཱཎཾ ན ཨུཔྤནྣཾ ཧོཏི ནེཝ ཏཱཝ ཙཏུནྣཾ ཨིནྡྲིཡཱནཾ སཎྛིཏི ཧོཏི, ནེཝ ཏཱཝ ཙཏུནྣཾ ཨིནྡྲིཡཱནཾ ཨཝཊྛིཏི ཧོཏི། ཡཏོ ཙ ཁོ, བྷིཀྑཝེ, ཨརིཡསཱཝཀསྶ ཨརིཡཉཱཎཾ ཨུཔྤནྣཾ ཧོཏི, ཨཐ ཙཏུནྣཾ ཨིནྡྲིཡཱནཾ སཎྛིཏི ཧོཏི, ཨཐ ཙཏུནྣཾ ཨིནྡྲིཡཱནཾ ཨཝཊྛིཏི ཧོཏི’’།
522. Evaṃ me sutaṃ – ekaṃ samayaṃ bhagavā mallesu 2 viharati uruvelakappaṃ nāma mallānaṃ nigamo. Tatra kho bhagavā bhikkhū āmantesi – ‘‘yāvakīvañca, bhikkhave, ariyasāvakassa ariyañāṇaṃ na uppannaṃ hoti neva tāva catunnaṃ indriyānaṃ saṇṭhiti hoti, neva tāva catunnaṃ indriyānaṃ avaṭṭhiti hoti. Yato ca kho, bhikkhave, ariyasāvakassa ariyañāṇaṃ uppannaṃ hoti, atha catunnaṃ indriyānaṃ saṇṭhiti hoti, atha catunnaṃ indriyānaṃ avaṭṭhiti hoti’’.
‘‘སེཡྻཐཱཔི, བྷིཀྑཝེ, ཡཱཝཀཱིཝཉྩ ཀཱུཊཱགཱརསྶ ཀཱུཊཾ ན ཨུསྶིཏཾ ཧོཏི, ནེཝ ཏཱཝ གོཔཱནསཱིནཾ སཎྛིཏི ཧོཏི, ནེཝ ཏཱཝ གོཔཱནསཱིནཾ ཨཝཊྛིཏི ཧོཏི། ཡཏོ ཙ ཁོ, བྷིཀྑཝེ, ཀཱུཊཱགཱརསྶ ཀཱུཊཾ ཨུསྶིཏཾ ཧོཏི, ཨཐ གོཔཱནསཱིནཾ སཎྛིཏི ཧོཏི, ཨཐ གོཔཱནསཱིནཾ ཨཝཊྛིཏི ཧོཏི། ཨེཝམེཝ ཁོ, བྷིཀྑཝེ, ཡཱཝཀཱིཝཉྩ ཨརིཡསཱཝཀསྶ ཨརིཡཉཱཎཾ ན ཨུཔྤནྣཾ ཧོཏི, ནེཝ ཏཱཝ ཙཏུནྣཾ ཨིནྡྲིཡཱནཾ སཎྛིཏི ཧོཏི, ནེཝ ཏཱཝ ཙཏུནྣཾ ཨིནྡྲིཡཱནཾ ཨཝཊྛིཏི ཧོཏི། ཡཏོ ཙ ཁོ, བྷིཀྑཝེ, ཨརིཡསཱཝཀསྶ ཨརིཡཉཱཎཾ ཨུཔྤནྣཾ ཧོཏི, ཨཐ ཙཏུནྣཾ ཨིནྡྲིཡཱནཾ…པེ॰… ཨཝཊྛིཏི ཧོཏི།
‘‘Seyyathāpi, bhikkhave, yāvakīvañca kūṭāgārassa kūṭaṃ na ussitaṃ hoti, neva tāva gopānasīnaṃ saṇṭhiti hoti, neva tāva gopānasīnaṃ avaṭṭhiti hoti. Yato ca kho, bhikkhave, kūṭāgārassa kūṭaṃ ussitaṃ hoti, atha gopānasīnaṃ saṇṭhiti hoti, atha gopānasīnaṃ avaṭṭhiti hoti. Evameva kho, bhikkhave, yāvakīvañca ariyasāvakassa ariyañāṇaṃ na uppannaṃ hoti, neva tāva catunnaṃ indriyānaṃ saṇṭhiti hoti, neva tāva catunnaṃ indriyānaṃ avaṭṭhiti hoti. Yato ca kho, bhikkhave, ariyasāvakassa ariyañāṇaṃ uppannaṃ hoti, atha catunnaṃ indriyānaṃ…pe… avaṭṭhiti hoti.
‘‘ཀཏམེསཾ ཙཏུནྣཾ? སདྡྷིནྡྲིཡསྶ , ཝཱིརིཡིནྡྲིཡསྶ, སཏིནྡྲིཡསྶ, སམཱདྷིནྡྲིཡསྶ། པཉྙཝཏོ, བྷིཀྑཝེ, ཨརིཡསཱཝཀསྶ ཏདནྭཡཱ སདྡྷཱ སཎྛཱཏི, ཏདནྭཡཾ ཝཱིརིཡཾ སཎྛཱཏི, ཏདནྭཡཱ སཏི སཎྛཱཏི, ཏདནྭཡོ སམཱདྷི སཎྛཱཏཱི’’ཏི། དུཏིཡཾ།
‘‘Katamesaṃ catunnaṃ? Saddhindriyassa , vīriyindriyassa, satindriyassa, samādhindriyassa. Paññavato, bhikkhave, ariyasāvakassa tadanvayā saddhā saṇṭhāti, tadanvayaṃ vīriyaṃ saṇṭhāti, tadanvayā sati saṇṭhāti, tadanvayo samādhi saṇṭhātī’’ti. Dutiyaṃ.
Footnotes:
Related texts:
ཨཊྛཀཐཱ • Aṭṭhakathā / སུཏྟཔིཊཀ (ཨཊྛཀཐཱ) • Suttapiṭaka (aṭṭhakathā) / སཾཡུཏྟནིཀཱཡ (ཨཊྛཀཐཱ) • Saṃyuttanikāya (aṭṭhakathā) / ༢. མལླིཀསུཏྟཝཎྞནཱ • 2. Mallikasuttavaṇṇanā
ཊཱིཀཱ • Tīkā / སུཏྟཔིཊཀ (ཊཱིཀཱ) • Suttapiṭaka (ṭīkā) / སཾཡུཏྟནིཀཱཡ (ཊཱིཀཱ) • Saṃyuttanikāya (ṭīkā) / ༢. མལླིཀསུཏྟཝཎྞནཱ • 2. Mallikasuttavaṇṇanā
