| Library / Tipiṭaka / തിപിടക • Tipiṭaka / സംയുത്തനികായ • Saṃyuttanikāya |
൨. മല്ലികസുത്തം
2. Mallikasuttaṃ
൫൨൨. ഏവം മേ സുതം – ഏകം സമയം ഭഗവാ മല്ലേസു 1 വിഹരതി ഉരുവേലകപ്പം നാമ മല്ലാനം നിഗമോ. തത്ര ഖോ ഭഗവാ ഭിക്ഖൂ ആമന്തേസി – ‘‘യാവകീവഞ്ച, ഭിക്ഖവേ, അരിയസാവകസ്സ അരിയഞാണം ന ഉപ്പന്നം ഹോതി നേവ താവ ചതുന്നം ഇന്ദ്രിയാനം സണ്ഠിതി ഹോതി, നേവ താവ ചതുന്നം ഇന്ദ്രിയാനം അവട്ഠിതി ഹോതി. യതോ ച ഖോ, ഭിക്ഖവേ, അരിയസാവകസ്സ അരിയഞാണം ഉപ്പന്നം ഹോതി, അഥ ചതുന്നം ഇന്ദ്രിയാനം സണ്ഠിതി ഹോതി, അഥ ചതുന്നം ഇന്ദ്രിയാനം അവട്ഠിതി ഹോതി’’.
522. Evaṃ me sutaṃ – ekaṃ samayaṃ bhagavā mallesu 2 viharati uruvelakappaṃ nāma mallānaṃ nigamo. Tatra kho bhagavā bhikkhū āmantesi – ‘‘yāvakīvañca, bhikkhave, ariyasāvakassa ariyañāṇaṃ na uppannaṃ hoti neva tāva catunnaṃ indriyānaṃ saṇṭhiti hoti, neva tāva catunnaṃ indriyānaṃ avaṭṭhiti hoti. Yato ca kho, bhikkhave, ariyasāvakassa ariyañāṇaṃ uppannaṃ hoti, atha catunnaṃ indriyānaṃ saṇṭhiti hoti, atha catunnaṃ indriyānaṃ avaṭṭhiti hoti’’.
‘‘സേയ്യഥാപി, ഭിക്ഖവേ, യാവകീവഞ്ച കൂടാഗാരസ്സ കൂടം ന ഉസ്സിതം ഹോതി, നേവ താവ ഗോപാനസീനം സണ്ഠിതി ഹോതി, നേവ താവ ഗോപാനസീനം അവട്ഠിതി ഹോതി. യതോ ച ഖോ, ഭിക്ഖവേ, കൂടാഗാരസ്സ കൂടം ഉസ്സിതം ഹോതി, അഥ ഗോപാനസീനം സണ്ഠിതി ഹോതി, അഥ ഗോപാനസീനം അവട്ഠിതി ഹോതി. ഏവമേവ ഖോ, ഭിക്ഖവേ, യാവകീവഞ്ച അരിയസാവകസ്സ അരിയഞാണം ന ഉപ്പന്നം ഹോതി, നേവ താവ ചതുന്നം ഇന്ദ്രിയാനം സണ്ഠിതി ഹോതി, നേവ താവ ചതുന്നം ഇന്ദ്രിയാനം അവട്ഠിതി ഹോതി. യതോ ച ഖോ, ഭിക്ഖവേ, അരിയസാവകസ്സ അരിയഞാണം ഉപ്പന്നം ഹോതി, അഥ ചതുന്നം ഇന്ദ്രിയാനം…പേ॰… അവട്ഠിതി ഹോതി.
‘‘Seyyathāpi, bhikkhave, yāvakīvañca kūṭāgārassa kūṭaṃ na ussitaṃ hoti, neva tāva gopānasīnaṃ saṇṭhiti hoti, neva tāva gopānasīnaṃ avaṭṭhiti hoti. Yato ca kho, bhikkhave, kūṭāgārassa kūṭaṃ ussitaṃ hoti, atha gopānasīnaṃ saṇṭhiti hoti, atha gopānasīnaṃ avaṭṭhiti hoti. Evameva kho, bhikkhave, yāvakīvañca ariyasāvakassa ariyañāṇaṃ na uppannaṃ hoti, neva tāva catunnaṃ indriyānaṃ saṇṭhiti hoti, neva tāva catunnaṃ indriyānaṃ avaṭṭhiti hoti. Yato ca kho, bhikkhave, ariyasāvakassa ariyañāṇaṃ uppannaṃ hoti, atha catunnaṃ indriyānaṃ…pe… avaṭṭhiti hoti.
‘‘കതമേസം ചതുന്നം? സദ്ധിന്ദ്രിയസ്സ , വീരിയിന്ദ്രിയസ്സ, സതിന്ദ്രിയസ്സ, സമാധിന്ദ്രിയസ്സ. പഞ്ഞവതോ, ഭിക്ഖവേ, അരിയസാവകസ്സ തദന്വയാ സദ്ധാ സണ്ഠാതി, തദന്വയം വീരിയം സണ്ഠാതി, തദന്വയാ സതി സണ്ഠാതി, തദന്വയോ സമാധി സണ്ഠാതീ’’തി. ദുതിയം.
‘‘Katamesaṃ catunnaṃ? Saddhindriyassa , vīriyindriyassa, satindriyassa, samādhindriyassa. Paññavato, bhikkhave, ariyasāvakassa tadanvayā saddhā saṇṭhāti, tadanvayaṃ vīriyaṃ saṇṭhāti, tadanvayā sati saṇṭhāti, tadanvayo samādhi saṇṭhātī’’ti. Dutiyaṃ.
Footnotes:
Related texts:
അട്ഠകഥാ • Aṭṭhakathā / സുത്തപിടക (അട്ഠകഥാ) • Suttapiṭaka (aṭṭhakathā) / സംയുത്തനികായ (അട്ഠകഥാ) • Saṃyuttanikāya (aṭṭhakathā) / ൨. മല്ലികസുത്തവണ്ണനാ • 2. Mallikasuttavaṇṇanā
ടീകാ • Tīkā / സുത്തപിടക (ടീകാ) • Suttapiṭaka (ṭīkā) / സംയുത്തനികായ (ടീകാ) • Saṃyuttanikāya (ṭīkā) / ൨. മല്ലികസുത്തവണ്ണനാ • 2. Mallikasuttavaṇṇanā
