| Library / Tipiṭaka / திபிடக • Tipiṭaka / ஸங்யுத்தனிகாய (அட்ட²கதா²) • Saṃyuttanikāya (aṭṭhakathā) |
2. மாலுக்யபுத்தஸுத்தவண்ணனா
2. Mālukyaputtasuttavaṇṇanā
95. து³தியே மாலுக்யபுத்தோதி மாலுக்யப்³ராஹ்மணியா புத்தோ. எத்தா²தி ஏதஸ்மிங் தவ ஓவாதா³யாசனே. இமினா தே²ரங் அபஸாதே³திபி உஸ்ஸாதே³திபி. கத²ங்? அயங் கிர த³ஹரகாலே ரூபாதீ³ஸு பமஜ்ஜித்வா பச்சா² மஹல்லககாலே அரஞ்ஞவாஸங் பத்தெ²ந்தோ கம்மட்டா²னங் யாசதி. அத² ப⁴க³வா ‘‘எத்த² த³ஹரே கிங் வக்கா²ம? மாலுக்யபுத்தோ விய தும்ஹேபி தருணகாலே பமஜ்ஜித்வா மஹல்லககாலே அரஞ்ஞங் பவிஸித்வா ஸமணத⁴ம்மங் கரெய்யாதா²’’தி இமினா அதி⁴ப்பாயேன ப⁴ணந்தோ தே²ரங் அபஸாதே³தி நாம.
95. Dutiye mālukyaputtoti mālukyabrāhmaṇiyā putto. Etthāti etasmiṃ tava ovādāyācane. Iminā theraṃ apasādetipi ussādetipi. Kathaṃ? Ayaṃ kira daharakāle rūpādīsu pamajjitvā pacchā mahallakakāle araññavāsaṃ patthento kammaṭṭhānaṃ yācati. Atha bhagavā ‘‘ettha dahare kiṃ vakkhāma? Mālukyaputto viya tumhepi taruṇakāle pamajjitvā mahallakakāle araññaṃ pavisitvā samaṇadhammaṃ kareyyāthā’’ti iminā adhippāyena bhaṇanto theraṃ apasādeti nāma.
யஸ்மா பன தே²ரோ மஹல்லககாலேபி அரஞ்ஞங் பவிஸித்வா ஸமணத⁴ம்மங் காதுகாமோ, தஸ்மா ப⁴க³வா ‘‘எத்த² த³ஹரே கிங் வக்கா²ம? அயங் அம்ஹாகங் மாலுக்யபுத்தோ மஹல்லககாலேபி அரஞ்ஞங் பவிஸித்வா ஸமணத⁴ம்மங் கத்துகாமோ கம்மட்டா²னங் யாசதி, தும்ஹே நாம தருணகாலேபி வீரியங் ந கரோதா²’’தி இமினா அதி⁴ப்பாயேன ப⁴ணந்தோ தே²ரங் உஸ்ஸாதே³தி நாம.
Yasmā pana thero mahallakakālepi araññaṃ pavisitvā samaṇadhammaṃ kātukāmo, tasmā bhagavā ‘‘ettha dahare kiṃ vakkhāma? Ayaṃ amhākaṃ mālukyaputto mahallakakālepi araññaṃ pavisitvā samaṇadhammaṃ kattukāmo kammaṭṭhānaṃ yācati, tumhe nāma taruṇakālepi vīriyaṃ na karothā’’ti iminā adhippāyena bhaṇanto theraṃ ussādeti nāma.
யத்ர ஹி நாமாதி யோ நாம. கிஞ்சாபாஹந்தி கிஞ்சாபி ‘‘அஹங் மஹல்லகோ’’தி ஞாதங். யதி³ அஹங் மஹல்லகோ, மஹல்லகோ ஸமானோபி ஸக்கி²ஸ்ஸாமி ஸமணத⁴ம்மங் காதுங், தே³ஸேது மே, ப⁴ந்தே, ப⁴க³வாதி அதி⁴ப்பாயேன மஹல்லகபா⁴வங் அனுக்³க³ண்ஹந்தோ ஓவாத³ஞ்ச பஸங்ஸந்தோ ஏவமாஹ.
Yatra hi nāmāti yo nāma. Kiñcāpāhanti kiñcāpi ‘‘ahaṃ mahallako’’ti ñātaṃ. Yadi ahaṃ mahallako, mahallako samānopi sakkhissāmi samaṇadhammaṃ kātuṃ, desetu me, bhante, bhagavāti adhippāyena mahallakabhāvaṃ anuggaṇhanto ovādañca pasaṃsanto evamāha.
அதி³ட்டா² அதி³ட்ட²புப்³பா³தி இமஸ்மிங் அத்தபா⁴வே அதி³ட்டா² அதீதேபி அதி³ட்ட²புப்³பா³. ந ச பஸ்ஸஸீதி ஏதரஹிபி ந பஸ்ஸஸி. ந ச தே ஹோதி பஸ்ஸெய்யந்தி ஏவங் ஸமன்னாஹாரோபி தே யத்த² நத்தி², அபி நு தே தத்த² ச²ந்தா³த³யோ உப்பஜ்ஜெய்யுந்தி புச்ச²தி.
Adiṭṭhā adiṭṭhapubbāti imasmiṃ attabhāve adiṭṭhā atītepi adiṭṭhapubbā. Na ca passasīti etarahipi na passasi. Na ca te hoti passeyyanti evaṃ samannāhāropi te yattha natthi, api nu te tattha chandādayo uppajjeyyunti pucchati.
தி³ட்டே² தி³ட்ட²மத்தந்தி ரூபாயதனே சக்கு²விஞ்ஞாணேன தி³ட்டே² தி³ட்ட²மத்தங் ப⁴விஸ்ஸதி. சக்கு²விஞ்ஞாணஞ்ஹி ரூபே ரூபமத்தமேவ பஸ்ஸதி, ந நிச்சாதி³ஸபா⁴வங், இதி ஸேஸவிஞ்ஞாணேஹிபி மே எத்த² தி³ட்ட²மத்தமேவ சித்தங் ப⁴விஸ்ஸதீதி அத்தோ². அத² வா தி³ட்டே² தி³ட்ட²ங் நாம சக்கு²விஞ்ஞாணங், ரூபே ரூபவிஜானநந்தி அத்தோ². மத்தாதி பமாணங், தி³ட்ட²ங் மத்தா அஸ்ஸாதி தி³ட்ட²மத்தங், சித்தங், சக்கு²விஞ்ஞாணமத்தமேவ மே சித்தங் ப⁴விஸ்ஸதீதி அத்தோ². இத³ங் வுத்தங் ஹோதி – யதா² ஆபாத²க³தரூபே சக்கு²விஞ்ஞாணங் ந ரஜ்ஜதி ந து³ஸ்ஸதி ந முய்ஹதி, ஏவங் ராகா³தி³விரஹேன சக்கு²விஞ்ஞாணமத்தமேவ ஜவனங் ப⁴விஸ்ஸதி, சக்கு²விஞ்ஞாணபமாணேனேவ ஜவனங் ட²பெஸ்ஸாமீதி. அத² வா தி³ட்ட²ங் நாம சக்கு²விஞ்ஞாணேன தி³ட்ட²ரூபங், தி³ட்டே² தி³ட்ட²மத்தங் நாம தத்தே²வ உப்பன்னங் ஸம்படிச்ச²னஸந்தீரணவொட்ட²ப்³ப³னஸங்கா²தங் சித்தத்தயங். யதா² தங் ந ரஜ்ஜதி, ந து³ஸ்ஸதி, ந முய்ஹதி, ஏவங் ஆபாத²க³தே ரூபே தேனேவ ஸம்படிச்ச²னாதி³ப்பமாணேன ஜவனங் உப்பாதெ³ஸ்ஸாமி, நாஹங் தங் பமாணங் அதிக்கமித்வா ரஜ்ஜனாதி³வஸேன உப்பஜ்ஜிதுங் த³ஸ்ஸாமீதி அயமெத்த² அத்தோ². ஏஸேவ நயோ ஸுதமுதேஸு.
Diṭṭhe diṭṭhamattanti rūpāyatane cakkhuviññāṇena diṭṭhe diṭṭhamattaṃ bhavissati. Cakkhuviññāṇañhi rūpe rūpamattameva passati, na niccādisabhāvaṃ, iti sesaviññāṇehipi me ettha diṭṭhamattameva cittaṃ bhavissatīti attho. Atha vā diṭṭhe diṭṭhaṃ nāma cakkhuviññāṇaṃ, rūpe rūpavijānananti attho. Mattāti pamāṇaṃ, diṭṭhaṃ mattā assāti diṭṭhamattaṃ, cittaṃ, cakkhuviññāṇamattameva me cittaṃ bhavissatīti attho. Idaṃ vuttaṃ hoti – yathā āpāthagatarūpe cakkhuviññāṇaṃ na rajjati na dussati na muyhati, evaṃ rāgādivirahena cakkhuviññāṇamattameva javanaṃ bhavissati, cakkhuviññāṇapamāṇeneva javanaṃ ṭhapessāmīti. Atha vā diṭṭhaṃ nāma cakkhuviññāṇena diṭṭharūpaṃ, diṭṭhe diṭṭhamattaṃ nāma tattheva uppannaṃ sampaṭicchanasantīraṇavoṭṭhabbanasaṅkhātaṃ cittattayaṃ. Yathā taṃ na rajjati, na dussati, na muyhati, evaṃ āpāthagate rūpe teneva sampaṭicchanādippamāṇena javanaṃ uppādessāmi, nāhaṃ taṃ pamāṇaṃ atikkamitvā rajjanādivasena uppajjituṃ dassāmīti ayamettha attho. Eseva nayo sutamutesu.
விஞ்ஞாதே விஞ்ஞாதமத்தந்தி எத்த² பன விஞ்ஞாதங் நாம மனொத்³வாராவஜ்ஜனேன விஞ்ஞாதாரம்மணங், தஸ்மிங் விஞ்ஞாதே விஞ்ஞாதமத்தந்தி ஆவஜ்ஜனபமாணங். யதா² ஆவஜ்ஜனேன ந ரஜ்ஜதி ந து³ஸ்ஸதி ந முய்ஹதி, ஏவங் ரஜ்ஜனாதி³வஸேன உப்பஜ்ஜிதுங் அத³த்வா ஆவஜ்ஜனபமாணேனேவ சித்தங் ட²பெஸ்ஸாமீதி அயமெத்த² அத்தோ².
Viññāte viññātamattanti ettha pana viññātaṃ nāma manodvārāvajjanena viññātārammaṇaṃ, tasmiṃ viññāte viññātamattanti āvajjanapamāṇaṃ. Yathā āvajjanena na rajjati na dussati na muyhati, evaṃ rajjanādivasena uppajjituṃ adatvā āvajjanapamāṇeneva cittaṃ ṭhapessāmīti ayamettha attho.
யதோதி யதா³. ததோதி ததா³. ந தேனாதி தேன ராகே³ன வா ரத்தோ, தோ³ஸேன வா து³ட்டோ², மோஹேன வா மூள்ஹோ ந ப⁴விஸ்ஸதி. ததோ த்வங் மாலுக்யபுத்த ந தத்தா²தி யதா³ த்வங் தேன ராகே³ன வா தோ³ஸமோஹேஹி வா ரத்தோ வா து³ட்டோ² வா மூள்ஹோ வா ந ப⁴விஸ்ஸஸி, ததா³ த்வங் ந தத்த² தஸ்மிங் தி³ட்டே² வா ஸுதமுதவிஞ்ஞாதே வா படிப³த்³தோ⁴ அல்லீனோ பதிட்டி²தோ நாம ப⁴விஸ்ஸஸி. நேவிதா⁴திஆதி³ வுத்தத்த²மேவ.
Yatoti yadā. Tatoti tadā. Na tenāti tena rāgena vā ratto, dosena vā duṭṭho, mohena vā mūḷho na bhavissati. Tato tvaṃ mālukyaputta na tatthāti yadā tvaṃ tena rāgena vā dosamohehi vā ratto vā duṭṭho vā mūḷho vā na bhavissasi, tadā tvaṃ na tattha tasmiṃ diṭṭhe vā sutamutaviññāte vā paṭibaddho allīno patiṭṭhito nāma bhavissasi. Nevidhātiādi vuttatthameva.
ஸதி முட்டா²தி ஸதி நட்டா². தஞ்ச அஜ்ஜோ²ஸாதி தங் ஆரம்மணங் கி³லித்வா. அபி⁴ஜ்ஜா² ச விஹேஸா சாதி அபி⁴ஜ்ஜா²ய ச விஹிங்ஸாய ச. அத² வா ‘‘தஸ்ஸ வட்³ட⁴ந்தீ’’தி பதே³னாபி ஸத்³தி⁴ங் யோஜேதப்³ப³ங், அபி⁴ஜ்ஜா² ச விஹேஸா சாதி இமேபி த்³வே த⁴ம்மா தஸ்ஸ வட்³ட⁴ந்தீதி அத்தோ².
Sati muṭṭhāti sati naṭṭhā. Tañca ajjhosāti taṃ ārammaṇaṃ gilitvā. Abhijjhā ca vihesā cāti abhijjhāya ca vihiṃsāya ca. Atha vā ‘‘tassa vaḍḍhantī’’ti padenāpi saddhiṃ yojetabbaṃ, abhijjhā ca vihesā cāti imepi dve dhammā tassa vaḍḍhantīti attho.
சித்தமஸ்ஸூபஹஞ்ஞதீதி அபி⁴ஜ்ஜா²விஹேஸாஹி அஸ்ஸ சித்தங் உபஹஞ்ஞதி. ஆசினதோதி ஆசினந்தஸ்ஸ. ஆரா நிப்³பா³ன வுச்சதீதி ஏவரூபஸ்ஸ புக்³க³லஸ்ஸ நிப்³பா³னங் நாம தூ³ரே பவுச்சதி. க⁴த்வாதி கா⁴யித்வா. பொ⁴த்வாதி பு⁴த்வா ஸாயித்வா லேஹித்வா. பு²ஸ்ஸாதி பு²ஸித்வா. படிஸ்ஸதோதி படிஸ்ஸதிஸங்கா²தாய ஸதியா யுத்தோ. ஸேவதோ சாபி வேத³னந்தி சதுமக்³க³ஸம்பயுத்தங் நிப்³ப³த்திதலோகுத்தரவேத³னங் ஸேவந்தஸ்ஸ. கீ²யதீதி க²யங் க³ச்ச²தி. கிங் தங்? து³க்க²ம்பி கிலேஸஜாதம்பி. அஞ்ஞதரோதி அஸீதியா மஹாஸாவகானங் அப்³ப⁴ந்தரோ ஏகோ. இதி இமஸ்மிங் ஸுத்தே கா³தா²ஹிபி வட்டவிவட்டமேவ கதி²தங்.
Cittamassūpahaññatīti abhijjhāvihesāhi assa cittaṃ upahaññati. Ācinatoti ācinantassa. Ārā nibbāna vuccatīti evarūpassa puggalassa nibbānaṃ nāma dūre pavuccati. Ghatvāti ghāyitvā. Bhotvāti bhutvā sāyitvā lehitvā. Phussāti phusitvā. Paṭissatoti paṭissatisaṅkhātāya satiyā yutto. Sevato cāpi vedananti catumaggasampayuttaṃ nibbattitalokuttaravedanaṃ sevantassa. Khīyatīti khayaṃ gacchati. Kiṃ taṃ? Dukkhampi kilesajātampi. Aññataroti asītiyā mahāsāvakānaṃ abbhantaro eko. Iti imasmiṃ sutte gāthāhipi vaṭṭavivaṭṭameva kathitaṃ.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / ஸங்யுத்தனிகாய • Saṃyuttanikāya / 2. மாலுக்யபுத்தஸுத்தங் • 2. Mālukyaputtasuttaṃ
டீகா • Tīkā / ஸுத்தபிடக (டீகா) • Suttapiṭaka (ṭīkā) / ஸங்யுத்தனிகாய (டீகா) • Saṃyuttanikāya (ṭīkā) / 2. மாலுக்யபுத்தஸுத்தவண்ணனா • 2. Mālukyaputtasuttavaṇṇanā
