| Library / Tipiṭaka / д̇ибидага • Tipiṭaka / сам̣яуд̇д̇анигааяа (адтагат̇аа) • Saṃyuttanikāya (aṭṭhakathā) |
2. маалугяабуд̇д̇асуд̇д̇аван̣н̣анаа
2. Mālukyaputtasuttavaṇṇanā
95. д̣̇уд̇ияз маалугяабуд̇д̇од̇и маалугяаб̣раахман̣ияаа буд̇д̇о. зд̇т̇аад̇и зд̇асмим̣ д̇ава оваад̣̇ааяаажанз. иминаа т̇зрам̣ абасаад̣̇зд̇иби уссаад̣̇зд̇иби. гат̇ам̣? аяам̣ гира д̣̇ахарагаалз руубаад̣̇ийсу бамаж̇ж̇ид̇ваа бажчаа махаллагагаалз аран̃н̃аваасам̣ бад̇т̇знд̇о гаммадтаанам̣ яаажад̇и. ат̇а бхаг̇аваа ‘‘зд̇т̇а д̣̇ахарз гим̣ вагкаама? маалугяабуд̇д̇о вияа д̇умхзби д̇арун̣агаалз бамаж̇ж̇ид̇ваа махаллагагаалз аран̃н̃ам̣ бависид̇ваа саман̣ад̇хаммам̣ гарзяяаат̇аа’’д̇и иминаа ад̇хиббааязна бхан̣анд̇о т̇зрам̣ абасаад̣̇зд̇и наама.
95. Dutiye mālukyaputtoti mālukyabrāhmaṇiyā putto. Etthāti etasmiṃ tava ovādāyācane. Iminā theraṃ apasādetipi ussādetipi. Kathaṃ? Ayaṃ kira daharakāle rūpādīsu pamajjitvā pacchā mahallakakāle araññavāsaṃ patthento kammaṭṭhānaṃ yācati. Atha bhagavā ‘‘ettha dahare kiṃ vakkhāma? Mālukyaputto viya tumhepi taruṇakāle pamajjitvā mahallakakāle araññaṃ pavisitvā samaṇadhammaṃ kareyyāthā’’ti iminā adhippāyena bhaṇanto theraṃ apasādeti nāma.
яасмаа бана т̇зро махаллагагаалзби аран̃н̃ам̣ бависид̇ваа саман̣ад̇хаммам̣ гаад̇угаамо, д̇асмаа бхаг̇аваа ‘‘зд̇т̇а д̣̇ахарз гим̣ вагкаама? аяам̣ амхаагам̣ маалугяабуд̇д̇о махаллагагаалзби аран̃н̃ам̣ бависид̇ваа саман̣ад̇хаммам̣ гад̇д̇угаамо гаммадтаанам̣ яаажад̇и, д̇умхз наама д̇арун̣агаалзби вийрияам̣ на гарот̇аа’’д̇и иминаа ад̇хиббааязна бхан̣анд̇о т̇зрам̣ уссаад̣̇зд̇и наама.
Yasmā pana thero mahallakakālepi araññaṃ pavisitvā samaṇadhammaṃ kātukāmo, tasmā bhagavā ‘‘ettha dahare kiṃ vakkhāma? Ayaṃ amhākaṃ mālukyaputto mahallakakālepi araññaṃ pavisitvā samaṇadhammaṃ kattukāmo kammaṭṭhānaṃ yācati, tumhe nāma taruṇakālepi vīriyaṃ na karothā’’ti iminā adhippāyena bhaṇanto theraṃ ussādeti nāma.
яад̇ра хи наамаад̇и яо наама. гин̃жаабааханд̇и гин̃жааби ‘‘ахам̣ махаллаго’’д̇и н̃аад̇ам̣. яад̣̇и ахам̣ махаллаго, махаллаго самааноби сагкиссаами саман̣ад̇хаммам̣ гаад̇ум̣, д̣̇зсзд̇у мз, бханд̇з, бхаг̇аваад̇и ад̇хиббааязна махаллагабхаавам̣ ануг̇г̇ан̣ханд̇о оваад̣̇ан̃жа басам̣санд̇о звамааха.
Yatra hi nāmāti yo nāma. Kiñcāpāhanti kiñcāpi ‘‘ahaṃ mahallako’’ti ñātaṃ. Yadi ahaṃ mahallako, mahallako samānopi sakkhissāmi samaṇadhammaṃ kātuṃ, desetu me, bhante, bhagavāti adhippāyena mahallakabhāvaṃ anuggaṇhanto ovādañca pasaṃsanto evamāha.
ад̣̇идтаа ад̣̇идтабуб̣б̣аад̇и имасмим̣ ад̇д̇абхаавз ад̣̇идтаа ад̇ийд̇зби ад̣̇идтабуб̣б̣аа. на жа бассасийд̇и зд̇арахиби на бассаси. на жа д̇з ход̇и бассзяяанд̇и звам̣ саманнаахаароби д̇з яад̇т̇а над̇т̇и, аби ну д̇з д̇ад̇т̇а чанд̣̇аад̣̇аяо уббаж̇ж̇зяяунд̇и бужчад̇и.
Adiṭṭhā adiṭṭhapubbāti imasmiṃ attabhāve adiṭṭhā atītepi adiṭṭhapubbā. Na ca passasīti etarahipi na passasi. Na ca te hoti passeyyanti evaṃ samannāhāropi te yattha natthi, api nu te tattha chandādayo uppajjeyyunti pucchati.
д̣̇идтз д̣̇идтамад̇д̇анд̇и руубааяад̇анз жагкувин̃н̃аан̣зна д̣̇идтз д̣̇идтамад̇д̇ам̣ бхависсад̇и. жагкувин̃н̃аан̣ан̃хи руубз руубамад̇д̇амзва бассад̇и, на нижжаад̣̇исабхаавам̣, ид̇и сзсавин̃н̃аан̣зхиби мз зд̇т̇а д̣̇идтамад̇д̇амзва жид̇д̇ам̣ бхависсад̇ийд̇и ад̇т̇о. ат̇а ваа д̣̇идтз д̣̇идтам̣ наама жагкувин̃н̃аан̣ам̣, руубз руубавиж̇аанананд̇и ад̇т̇о. мад̇д̇аад̇и бамаан̣ам̣, д̣̇идтам̣ мад̇д̇аа ассаад̇и д̣̇идтамад̇д̇ам̣, жид̇д̇ам̣, жагкувин̃н̃аан̣амад̇д̇амзва мз жид̇д̇ам̣ бхависсад̇ийд̇и ад̇т̇о. ид̣̇ам̣ вуд̇д̇ам̣ ход̇и – яат̇аа аабаат̇аг̇ад̇аруубз жагкувин̃н̃аан̣ам̣ на раж̇ж̇ад̇и на д̣̇уссад̇и на муяхад̇и, звам̣ рааг̇аад̣̇ивирахзна жагкувин̃н̃аан̣амад̇д̇амзва ж̇аванам̣ бхависсад̇и, жагкувин̃н̃аан̣абамаан̣знзва ж̇аванам̣ табзссаамийд̇и. ат̇а ваа д̣̇идтам̣ наама жагкувин̃н̃аан̣зна д̣̇идтаруубам̣, д̣̇идтз д̣̇идтамад̇д̇ам̣ наама д̇ад̇т̇зва уббаннам̣ самбадижчанасанд̇ийран̣аводтаб̣б̣анасан̇каад̇ам̣ жид̇д̇ад̇д̇аяам̣. яат̇аа д̇ам̣ на раж̇ж̇ад̇и, на д̣̇уссад̇и, на муяхад̇и, звам̣ аабаат̇аг̇ад̇з руубз д̇знзва самбадижчанаад̣̇иббамаан̣зна ж̇аванам̣ уббаад̣̇зссаами, наахам̣ д̇ам̣ бамаан̣ам̣ ад̇иггамид̇ваа раж̇ж̇анаад̣̇ивасзна уббаж̇ж̇ид̇ум̣ д̣̇ассаамийд̇и аяамзд̇т̇а ад̇т̇о. зсзва наяо суд̇амуд̇зсу.
Diṭṭhe diṭṭhamattanti rūpāyatane cakkhuviññāṇena diṭṭhe diṭṭhamattaṃ bhavissati. Cakkhuviññāṇañhi rūpe rūpamattameva passati, na niccādisabhāvaṃ, iti sesaviññāṇehipi me ettha diṭṭhamattameva cittaṃ bhavissatīti attho. Atha vā diṭṭhe diṭṭhaṃ nāma cakkhuviññāṇaṃ, rūpe rūpavijānananti attho. Mattāti pamāṇaṃ, diṭṭhaṃ mattā assāti diṭṭhamattaṃ, cittaṃ, cakkhuviññāṇamattameva me cittaṃ bhavissatīti attho. Idaṃ vuttaṃ hoti – yathā āpāthagatarūpe cakkhuviññāṇaṃ na rajjati na dussati na muyhati, evaṃ rāgādivirahena cakkhuviññāṇamattameva javanaṃ bhavissati, cakkhuviññāṇapamāṇeneva javanaṃ ṭhapessāmīti. Atha vā diṭṭhaṃ nāma cakkhuviññāṇena diṭṭharūpaṃ, diṭṭhe diṭṭhamattaṃ nāma tattheva uppannaṃ sampaṭicchanasantīraṇavoṭṭhabbanasaṅkhātaṃ cittattayaṃ. Yathā taṃ na rajjati, na dussati, na muyhati, evaṃ āpāthagate rūpe teneva sampaṭicchanādippamāṇena javanaṃ uppādessāmi, nāhaṃ taṃ pamāṇaṃ atikkamitvā rajjanādivasena uppajjituṃ dassāmīti ayamettha attho. Eseva nayo sutamutesu.
вин̃н̃аад̇з вин̃н̃аад̇амад̇д̇анд̇и зд̇т̇а бана вин̃н̃аад̇ам̣ наама манод̣̇ваарааваж̇ж̇анзна вин̃н̃аад̇аарамман̣ам̣, д̇асмим̣ вин̃н̃аад̇з вин̃н̃аад̇амад̇д̇анд̇и ааваж̇ж̇анабамаан̣ам̣. яат̇аа ааваж̇ж̇анзна на раж̇ж̇ад̇и на д̣̇уссад̇и на муяхад̇и, звам̣ раж̇ж̇анаад̣̇ивасзна уббаж̇ж̇ид̇ум̣ ад̣̇ад̇ваа ааваж̇ж̇анабамаан̣знзва жид̇д̇ам̣ табзссаамийд̇и аяамзд̇т̇а ад̇т̇о.
Viññāte viññātamattanti ettha pana viññātaṃ nāma manodvārāvajjanena viññātārammaṇaṃ, tasmiṃ viññāte viññātamattanti āvajjanapamāṇaṃ. Yathā āvajjanena na rajjati na dussati na muyhati, evaṃ rajjanādivasena uppajjituṃ adatvā āvajjanapamāṇeneva cittaṃ ṭhapessāmīti ayamettha attho.
яад̇од̇и яад̣̇аа. д̇ад̇од̇и д̇ад̣̇аа. на д̇знаад̇и д̇зна рааг̇зна ваа рад̇д̇о, д̣̇осзна ваа д̣̇удто, мохзна ваа муул̣хо на бхависсад̇и. д̇ад̇о д̇вам̣ маалугяабуд̇д̇а на д̇ад̇т̇аад̇и яад̣̇аа д̇вам̣ д̇зна рааг̇зна ваа д̣̇осамохзхи ваа рад̇д̇о ваа д̣̇удто ваа муул̣хо ваа на бхависсаси, д̇ад̣̇аа д̇вам̣ на д̇ад̇т̇а д̇асмим̣ д̣̇идтз ваа суд̇амуд̇авин̃н̃аад̇з ваа бадиб̣ад̣̇д̇хо аллийно бад̇идтид̇о наама бхависсаси. нзвид̇хаад̇иаад̣̇и вуд̇д̇ад̇т̇амзва.
Yatoti yadā. Tatoti tadā. Na tenāti tena rāgena vā ratto, dosena vā duṭṭho, mohena vā mūḷho na bhavissati. Tato tvaṃ mālukyaputta na tatthāti yadā tvaṃ tena rāgena vā dosamohehi vā ratto vā duṭṭho vā mūḷho vā na bhavissasi, tadā tvaṃ na tattha tasmiṃ diṭṭhe vā sutamutaviññāte vā paṭibaddho allīno patiṭṭhito nāma bhavissasi. Nevidhātiādi vuttatthameva.
сад̇и мудтаад̇и сад̇и надтаа. д̇ан̃жа аж̇жхосаад̇и д̇ам̣ аарамман̣ам̣ г̇илид̇ваа. абхиж̇жхаа жа вихзсаа жаад̇и абхиж̇жхааяа жа вихим̣сааяа жа. ат̇а ваа ‘‘д̇асса вад̣дханд̇ий’’д̇и бад̣̇знааби сад̣̇д̇хим̣ яож̇зд̇аб̣б̣ам̣, абхиж̇жхаа жа вихзсаа жаад̇и имзби д̣̇вз д̇хаммаа д̇асса вад̣дханд̇ийд̇и ад̇т̇о.
Sati muṭṭhāti sati naṭṭhā. Tañca ajjhosāti taṃ ārammaṇaṃ gilitvā. Abhijjhā ca vihesā cāti abhijjhāya ca vihiṃsāya ca. Atha vā ‘‘tassa vaḍḍhantī’’ti padenāpi saddhiṃ yojetabbaṃ, abhijjhā ca vihesā cāti imepi dve dhammā tassa vaḍḍhantīti attho.
жид̇д̇амассуубахан̃н̃ад̇ийд̇и абхиж̇жхаавихзсаахи асса жид̇д̇ам̣ убахан̃н̃ад̇и. аажинад̇од̇и аажинанд̇асса. аараа ниб̣б̣аана вужжад̇ийд̇и зваруубасса буг̇г̇аласса ниб̣б̣аанам̣ наама д̣̇уурз бавужжад̇и. гхад̇ваад̇и гхааяид̇ваа. бход̇ваад̇и бхуд̇ваа сааяид̇ваа лзхид̇ваа. пуссаад̇и пусид̇ваа. бадиссад̇од̇и бадиссад̇исан̇каад̇ааяа сад̇ияаа яуд̇д̇о. сзвад̇о жааби взд̣̇ананд̇и жад̇умаг̇г̇асамбаяуд̇д̇ам̣ ниб̣б̣ад̇д̇ид̇алогуд̇д̇аравзд̣̇анам̣ сзванд̇асса. кийяад̇ийд̇и каяам̣ г̇ажчад̇и. гим̣ д̇ам̣? д̣̇угкамби гилзсаж̇аад̇амби. ан̃н̃ад̇арод̇и асийд̇ияаа махаасаавагаанам̣ аб̣бханд̇аро зго. ид̇и имасмим̣ суд̇д̇з г̇аат̇аахиби ваддавиваддамзва гат̇ид̇ам̣.
Cittamassūpahaññatīti abhijjhāvihesāhi assa cittaṃ upahaññati. Ācinatoti ācinantassa. Ārā nibbāna vuccatīti evarūpassa puggalassa nibbānaṃ nāma dūre pavuccati. Ghatvāti ghāyitvā. Bhotvāti bhutvā sāyitvā lehitvā. Phussāti phusitvā. Paṭissatoti paṭissatisaṅkhātāya satiyā yutto. Sevato cāpi vedananti catumaggasampayuttaṃ nibbattitalokuttaravedanaṃ sevantassa. Khīyatīti khayaṃ gacchati. Kiṃ taṃ? Dukkhampi kilesajātampi. Aññataroti asītiyā mahāsāvakānaṃ abbhantaro eko. Iti imasmiṃ sutte gāthāhipi vaṭṭavivaṭṭameva kathitaṃ.
Related texts:
д̇ибидага (муула) • Tipiṭaka (Mūla) / суд̇д̇абидага • Suttapiṭaka / сам̣яуд̇д̇анигааяа • Saṃyuttanikāya / 2. маалугяабуд̇д̇асуд̇д̇ам̣ • 2. Mālukyaputtasuttaṃ
дийгаа • Tīkā / суд̇д̇абидага (дийгаа) • Suttapiṭaka (ṭīkā) / сам̣яуд̇д̇анигааяа (дийгаа) • Saṃyuttanikāya (ṭīkā) / 2. маалугяабуд̇д̇асуд̇д̇аван̣н̣анаа • 2. Mālukyaputtasuttavaṇṇanā
