| Library / Tipiṭaka / తిపిటక • Tipiṭaka / అఙ్గుత్తరనికాయ (అట్ఠకథా) • Aṅguttaranikāya (aṭṭhakathā) |
౪. మాలుక్యపుత్తసుత్తవణ్ణనా
4. Mālukyaputtasuttavaṇṇanā
౨౫౭. చతుత్థే మాలుక్యపుత్తోతి మాలుక్యబ్రాహ్మణియా పుత్తో. ఏత్థాతి ఏతస్మిం తవ ఓవాదయాచనే. ఇమినా థేరం అపసాదేతిపి ఉస్సాదేతిపి. కథం? అయం కిర దహరకాలే పచ్చయేసు లగ్గో హుత్వా పచ్ఛా మహల్లకకాలే అరఞ్ఞవాసం పత్థేన్తో కమ్మట్ఠానం యాచతి. అథ భగవా ‘‘ఏత్థ దహరే కిం వక్ఖామ, మాలుక్యపుత్తో వియ తుమ్హేపి తరుణకాలే పచ్చయేసు లగ్గిత్వా మహల్లకకాలే అరఞ్ఞం పవిసిత్వా సమణధమ్మం కరేయ్యాథా’’తి ఇమినా అధిప్పాయేన భణన్తో థేరం అపసాదేతి నామ. యస్మా పన థేరో మహల్లకకాలేవ అరఞ్ఞం పవిసిత్వా సమణధమ్మం కాతుకామో, తస్మా భగవా ‘‘ఏత్థ దహరే కిం వక్ఖామ, అయం అమ్హాకం మాలుక్యపుత్తో మహల్లకకాలేపి అరఞ్ఞం పవిసిత్వా సమణధమ్మం కాతుకామో కమ్మట్ఠానం యాచతి. తుమ్హే తావ తరుణకాలేపి వీరియం న కరోథా’’తి ఇమినా అధిప్పాయేన భణన్తో థేరం ఉస్సాదేతి నామాతి యోజనా.
257. Catutthe mālukyaputtoti mālukyabrāhmaṇiyā putto. Etthāti etasmiṃ tava ovādayācane. Iminā theraṃ apasādetipi ussādetipi. Kathaṃ? Ayaṃ kira daharakāle paccayesu laggo hutvā pacchā mahallakakāle araññavāsaṃ patthento kammaṭṭhānaṃ yācati. Atha bhagavā ‘‘ettha dahare kiṃ vakkhāma, mālukyaputto viya tumhepi taruṇakāle paccayesu laggitvā mahallakakāle araññaṃ pavisitvā samaṇadhammaṃ kareyyāthā’’ti iminā adhippāyena bhaṇanto theraṃ apasādeti nāma. Yasmā pana thero mahallakakāleva araññaṃ pavisitvā samaṇadhammaṃ kātukāmo, tasmā bhagavā ‘‘ettha dahare kiṃ vakkhāma, ayaṃ amhākaṃ mālukyaputto mahallakakālepi araññaṃ pavisitvā samaṇadhammaṃ kātukāmo kammaṭṭhānaṃ yācati. Tumhe tāva taruṇakālepi vīriyaṃ na karothā’’ti iminā adhippāyena bhaṇanto theraṃ ussādeti nāmāti yojanā.
Related texts:
తిపిటక (మూల) • Tipiṭaka (Mūla) / సుత్తపిటక • Suttapiṭaka / అఙ్గుత్తరనికాయ • Aṅguttaranikāya / ౪. మాలుక్యపుత్తసుత్తం • 4. Mālukyaputtasuttaṃ
టీకా • Tīkā / సుత్తపిటక (టీకా) • Suttapiṭaka (ṭīkā) / అఙ్గుత్తరనికాయ (టీకా) • Aṅguttaranikāya (ṭīkā) / ౪-౧౦. మాలుక్యపుత్తసుత్తాదివణ్ణనా • 4-10. Mālukyaputtasuttādivaṇṇanā
